အခန်း (၄၃၇-၄၃၈)

အခန်း ၄၃၇ - အကြောင်းအကျိုးဆက်စပ်မှု။

လုချင်းသည် အသံလာရာဘက်သို့ လှမ်းကြည့်လိုက်သည်။

အဝေးတစ်နေရာတွင် သေတ္တာဆိုင်တစ်ခု၏ ပြတင်းပေါက်နား၌ ပုံရိပ်အချို့ ရပ်နေပြီး အောက်ဘက်ရှိ လမ်းမကို ငုံ့ကြည့်နေကြလေ၏။

သူတို့အထဲတွင် လုချင်းနှင့် ရင်းနှီးသောသူ နှစ်ဦး ပါဝင်လေသည်။ ထိုသူတို့ကတော့ အိမ်တော်ထိန်းဝေ့ နှင့် ခရိုင်အုပ်ချုပ်ရေးမှူး ယန်ချန်းဟိုင် တို့ပင်။

ယခုလေးတင် စကားပြောလိုက်သူမှာကတော့ အသက်နှစ်ဆယ်ခန့်လောက် ရှိပြီး ဈေးကြီးသည့်အဝတ်အစားများကို ဝတ်ဆင်ထားသော လူငယ်တစ်ဦး ဖြစ်လေ၏။ သူ၏ မျက်နှာသွင်ပြင်မှာ ယန်ချန်းဟိုင်နှင့်ပင် တော်တော်လေး တူညီလေသည်။ သူ၏ အနောက်တွင် ထူးခြားသော အငွေ့အသက်များရှိသည့် အစောင့်အချို့ ရပ်နေပြီး သူတို့၏ တည်ရှိမှုက မွေးရာပါနယ်ပယ်မှ နည်းစနစ်တို့ကို ကျွမ်းကျင်ထားကြောင်း ညွှန်ပြနေပေ၏။

ခမ်းနားစွာ ဝတ်ဆင်ထားသော လူငယ်၏ စကားများကို ကြားသောအခါ ယန်ချန်းဟိုင်၏ မျက်နှာမှာ မှောင်မိုက်သွားလေသည်။

"ညီလေး ၇... မင်း ဒီကိုလာတဲ့ ရည်ရွယ်ချက်အစစ်အမှန်က ဘာလဲ။ ငါ့ရဲ့ ကံဆိုးမှုတွေကို ရယ်မောဖို့ သက်သက်တော့ မဟုတ်လောက်ဘူးမလား" သူက အေးစက်စွာ မေးလိုက်သည်။

"အစ်ကိုက ဘာကို ဆိုလိုတာလဲ။ ကျွန်တော်တို့က ညီအစ်ကိုတွေပဲလေ။ ညီတစ်ယောက်က သူ့အစ်ကိုဆီကို သံသယကင်းကင်းနဲ့ လာလည်လို့တောင် မရဘူးလား" လူငယ်က လှောင်ပြောင်သော အပြုံးဖြင့် ပြန်ဖြေလိုက်သည်။

"ညီအစ်ကိုတွေ ဟုတ်လား" ယန်ချန်းဟိုင်မှာ ခါးသီးသော ရယ်မောသံတစ်ခုကို မထိန်းချုပ်နိုင်ခဲ့ချေ။ "ငါ ဒီကို ပြည်နှင်ဒဏ်ပေးခံရတာက တခြားဘယ်သူ့ကြောင့်မှ မဟုတ်ဘူး၊ မင်းနဲ့ ငါတို့ရဲ့ အကြံအစည်ကြီးတဲ့ မောင်နှမတွေကြောင့်ပဲ"

"အခုတော့ အစ်ကို ၄... အစ်ကိုက တရားမျှတမှု မရှိဘူးနော်" လူငယ်က ပြုံးလျက်ပင် ပြန်ဖြေလိုက်သည်။ "ကျွန်တော်တို့က လျှို့ဝှက်ချက်တစ်ခုကို ပြောပြရုံလေးပါ၊ အစ်ကိုက အဖေ့ကို အဲဒီအကြောင်း မမေးဘဲမနေနိုင်ဖြစ်သွားတာလေ။ အဲ့တော့ သူ့ရဲ့ တားမြစ်ချက်ကို ချိုးဖောက်မိသွားတာပေါ့။ ဒါက ဘယ်လိုလုပ် ကျွန်တော်တို့အပြစ်ဖြစ်နိုင်မှာလဲ။ တကယ်လို့ အစ်ကို့ရဲ့ သိချင်စိတ်ကသာ အစ်ကို့ကို မလွှမ်းမိုးခဲ့ဘူးဆိုရင် အစ်ကိုလည်း ဒီကို ပို့ခံရပါ့မလား"

ယန်ချန်းဟိုင်မှာ တောင့်တင်းသွားပြီး ပြန်ပြီးမချေပနိုင်ခဲ့ချေ။ လူငယ်၏ စကားများတွင် အမှန်တရားအချို့ ပါဝင်နေကြောင်း သူ သိနေပေသည်။ သူ၏ လက်ရှိအခက်အခဲမှာ အဓိကအားဖြင့် သူ့ဘာသာသူ ဖန်တီးခဲ့ခြင်းသာ ဖြစ်၏။

အချိန်အတန်ကြာ တိတ်ဆိတ်နေပြီးနောက် ယန်ချန်းဟိုင်သည် သက်ပြင်းရှည်ကြီးတစ်ချက် ချလိုက်ပြီး ပြောလိုက်သည်။ "ကောင်းပြီလေ... အတိတ်ကို ငါ မငြင်းခုံချင်တော့ပါဘူး။ ဒါပေမဲ့ စကားလုံးစစ်ထိုးနေတာကို ရပ်လိုက်တော့။ မင်း ဘာလို့ ဒီကို ရောက်လာတာလဲဆိုတာကိုပဲ ပြော။ ပြီးတော့ အဖေ့ရဲ့ မွေးနေ့လည်း နီးလာပြီဆိုတော့ မင်း မရှိတဲ့အချိန် တခြားသူတွေက သူ့ရဲ့ မျက်နှာသာပေးမှုကို လုယူသွားမှာကို မင်း မကြောက်ဘူးလား"

ထိုအခါ လူငယ်၏ လှောင်ပြောင်သော မျက်နှာအမူအရာမှာ လေးနက်သွားလေ၏။ "အစ်ကို ၄က အငြိုးအတေးထားနေတုန်းပဲ ထင်တယ်။ ကောင်းပြီလေ၊ အဲ့တော့ ကျွန်တော်လည်း လိုရင်းကိုပဲ သွားလိုက်တော့တာပေါ့"

သူသည် သူ၏ ကိုယ်နေဟန်ထားကို မတ်မတ်ထားလိုက်သည်။ "အဖေ့ရဲ့မွေးနေ့ နီးလာတာကြောင့် ကျွန်တော် ဒီကို ရောက်လာတာ။ သူ့အတွက် ထူးခြားတဲ့ လက်ဆောင်တစ်ခု ပြင်ဆင်ချင်တယ်လေ၊ အဲဒီအတွက် အစ်ကို့ရဲ့အကူအညီ လိုအပ်တယ်"

ယန်ချန်းဟိုင်သည် မျက်တောင်ခတ်လိုက်ပြီးနောက် နှာခေါင်းရှုံ့လိုက်၏။ "ဒီဆင်းရဲနွမ်းပါးတဲ့ နေရာလေးမှာ ဘာရတနာတွေများ ရှိနိုင်မှာမလို့လဲ။ ပြီးတော့ မင်းကို ငါက ဘာကိစ္စနဲ့ ကူညီရမှာလဲ။ တကယ်လို့ ဒီမှာ တန်ဖိုးရှိတဲ့ ပစ္စည်းတွေ ရှိနေရင်တောင် ငါကိုယ်တိုင်ပဲ အဖေ့ကို ဆက်သလိုက်မှာပေါ့"

"အစ်ကို ၄... အစ်ကိုက အရင်တုန်းက တော်တော်လေး ပြဿနာရှာခဲ့တာနော်။ သာမန် မွေးနေ့လက်ဆောင်လေးတစ်ခုက အဖေ့ကို နှစ်သိမ့်ပေးနိုင်မယ်လို့ အစ်ကို ထင်နေတာလား။ သူက အစ်ကို့နာမည်ကို မြင်ရုံနဲ့တင် ဒေါသထွက်သွားလောက်တယ်လေ" လူငယ်က တည်ငြိမ်သောအပြုံးဖြင့် ပြန်ပြောလိုက်၏။

ထိုအခါ ယန်ချန်းဟိုင်ခင်မျာ တိတ်ဆိတ်သွားရရှာသည်။ သူ၏ အတိတ်က လုပ်ရပ်များအပေါ် သူ့ဖခင် မည်မျှ ဒေါသထွက်နေဆဲဖြစ်ကြောင်း သူ ကောင်းကောင်း သိနေပေသည်။ သူ၏ မိခင်ထံမှ စာများကလည်း ဒေါသများ မငြိမ်းမချင်း မြို့တော်နှင့် ဝေးဝေးနေရန် မကြာခဏ သတိပေးလေ့ရှိသည်။ သူ၏ ဖခင်အား သူ၏ တည်ရှိမှုကို သတိမရစေရန် သူ၏ မိခင်နှင့် စာပေးစာယူခြင်းကိုပင် အနည်းဆုံးဖြစ်အောင် ထားရှိရပေ၏။

လူငယ်က ဆက်လက်၍ ဖိအားပေးလိုက်လေသည်။ "တော်ဝင်အမိန့် မရှိဘဲနဲ့ တော်ဝင်အဆင့်အတန်းကို စွန့်လွှတ်တာမျိုး မလုပ်ရင် အစ်ကို ချန်းခရိုင်ကနေ ထွက်သွားလို့ မရဘူးဆိုတာကို အစ်ကိုလည်း ကျွန်တော့်လိုပဲ ကောင်းကောင်း သိပါတယ်"

ယန်ချန်းဟိုင်၏ မျက်နှာအမူအရာမှာ ပို၍ပင်မှောင်မိုက်သွားလေသည်။ သူ၏ အဆင့်အတန်းကို စွန့်လွှတ်ခြင်းဆိုသည်မှာ အရာအားလုံးကို စွန့်လွှတ်လိုက်ခြင်းပင် ဖြစ်၏။ သူ၏ ဘွဲ့အမည်သာမက သူ၏ မိခင်ကိုပါ ထိခိုက်နစ်နာစေနိုင်ပေသည်။

"အဲဒါကြောင့် အစ်ကို ၄... တကယ်လို့ အစ်ကိုသာ ဒီတစ်ကြိမ် ကျွန်တော့်ကို ကူညီပေးမယ်ဆိုရင် ကျွန်တော် နန်းတက်တဲ့အခါကျ အစ်ကို့ရဲ့ ပြစ်ဒဏ်ကို ပယ်ဖျက်ပေးမယ်လို့ ကတိပေးတယ်။

အစ်ကိုက မြို့တော်ကို ပြန်လာဖို့ဖြစ်ဖြစ်၊ ကမ္ဘာအနှံ့ လွတ်လွတ်လပ်လပ်နဲ့ လှည့်လည်သွားလာဖို့ဖြစ်ဖြစ် လွတ်လပ်ခွင့် ရလိမ့်မယ်။ အစ်ကို့ကို ပိုင်နက်နယ်မြေတစ်ခုတောင် ကျွန်တော် ပေးနိုင်သေးတယ်လေ"

"နန်းတက်မယ် ဟုတ်လား" ယန်ချန်းဟိုင်က မျက်ခုံးပင့်လိုက်ပြီး နှုတ်ခမ်းပေါ်တွင် လှောင်ပြောင်သော အပြုံးတစ်ခု ပေါ်လာခဲ့လေသည်။ "အဖေက တော်တော်လေးကို ကျန်းမာရေးကောင်းနေတုန်းပဲလေ။ သူ့နေရာကို မင်း ဆက်ခံရမယ်ဆိုတာ မင်း အဲဒီလောက်တောင် သေချာနေတာလား"

"အဲဒါ အစ်ကို စိုးရိမ်ရမယ့်ကိစ္စမဟုတ်ပါဘူး" လူငယ်က ခံစားချက်ကင်းမဲ့စွာ ပြန်ဖြေလိုက်၏။ "ဒါပေမဲ့ ဒီလောက်တော့ ကျွန်တော် ပြောပြနိုင်ပါတယ်။ မကြာသေးမီက 'ထျန်းလောင်' ရဲ့ ထောက်ခံမှုကို ကျွန်တော် ရထားတယ်လေ"

"ထျန်းလောင်က မင်းကို ထောက်ခံဖို့ ကတိပေးထားတယ် ဟုတ်လား" ယန်ချန်းဟိုင်၏ ခန္ဓာကိုယ်မှာ တောင့်တင်းသွားခဲ့ရလေ၏။

"ဟုတ်တယ်။ ပြီးတော့ အဲဒီထက်ပိုပြီး သတင်းတစ်ခုကိုလည်း ကျွန်တော် မျှဝေချင်သေးတယ်။ မကြာသေးမီက ကောင်းကင်နဲ့ မြေကြီး ပြောင်းလဲသွားတဲ့အချိန်မှာ ထျန်းလောင်က နက်ရှိုင်းတဲ့ ထိုးထွင်းသိမြင်မှုတစ်ခုကို ခံစားခဲ့ရတယ်လေ။ အခုဆို သူက မွေးရာပါနယ်ပယ်ကိုတောင် ကျော်လွန်ပြီး အဆင့်တက်လှမ်းသွားပြီ"

"မွေးရာပါနယ်ပယ်ကိုတောင် ကျော်လွန်သွားပြီလား" ယန်ချန်းဟိုင်သည် အလွန်အမင်း တုန်လှုပ်သွားကာ အော်ဟစ်လိုက်မိ၏။

"ဒါပေါ့" လူငယ်က ပြောလိုက်၏။ "အဲ့ဒါကြောင့် အစ်ကို ၄... ထီးနန်းကို သိမ်းပိုက်ဖို့ ကျွန်တော့်မှာ နည်းလမ်းမရှိဘူးလို့ အစ်ကို ထင်နေတုန်းပဲလား"

ယန်ချန်းဟိုင်၏ မျက်နှာအမူအရာမှာ ရှုပ်ထွေးသွားလေသည်။

တော်ဝင်မိသားစု၏ အစွမ်းအထက်ဆုံး ကျင့်ကြံသူဖြစ်သော ထျန်းလောင်သည် ထီးနန်းဆက်ခံမှုအပေါ် ကြီးမားသော လွှမ်းမိုးမှု ရှိပေသည်။ သူ၏ မကြာသေးမီက အဆင့်တက်မှုနှင့်အတူ အခြား ဂိုဏ်းအကြီးအကဲများစွာသည်လည်း သူ၏ လမ်းညွှန်မှုနောက်သို့ လိုက်လာဖွယ် ရှိပါ၏။

အနီးအနားတွင် ရပ်နေသော အိမ်တော်ထိန်းဝေ့သည်လည်း အလားတူပင် အံ့အားသင့်သွားခဲ့သော်ငြား သူ၏ ခံစားချက်များကို ဖုံးကွယ်ထားခဲ့လေသည်။ ထီးနန်းဆက်ခံမှုနှင့် ပတ်သက်သော ဤကဲ့သို့သော သတင်းကို ကြားလိုက်ရသော်လည်း ခရိုင်အုပ်ချုပ်ရေးမှူးက သူ့ကို အဘယ်ကြောင့် ဤနေရာသို့ ခေါ်ယူခဲ့ကြောင်းကို သူ နားမလည်နိုင်သေးချေ။

ဝေ့မိသားစုကို ထီးနန်းလုပွဲမှာ ပါဝင်စေချင်လို့များလား။

အချိန်အတန်ကြာ တိတ်ဆိတ်နေပြီးနောက် ယန်ချန်းဟိုင်က စကားပြောလိုက်သည်။ "ငါ့ကို ဘာလုပ်ပေးစေချင်တာလဲ"

လူငယ်က ပြုံးလိုက်၏။ "ရှင်းပါတယ်။ အစ်ကိုနဲ့ ထျန်းကျီမျှော်စင်ရဲ့ အဓိကတပည့်ဖြစ်တဲ့ လင်းကျိယွဲ့တို့က ရင်းနှီးတဲ့ သူငယ်ချင်းတွေလို့ ကျွန်တော် ကြားထားတယ်။ သူနဲ့ ကျွန်တော့်ကို မိတ်ဆက်ပေးစေချင်တယ်။ ကျွန်တော့်မှာ သူ့ရဲ့အကူအညီ လိုအပ်တဲ့ ကိစ္စတစ်ခု ရှိလို့"

"မင်းက ကျိယွဲ့နဲ့ တွေ့ချင်တာလား" ယန်ချန်းဟိုင်က အံ့အားသင့်စွာဖြင့် မေးလိုက်၏။ "ဒါကို ငါ မမျှော်လင့်ထားခဲ့ဘူး"

သူသည် မျက်မှောင်ကြုတ်လိုက်ပြီးနောက် ထပ်ပြောလိုက်သည်။ "ကျိယွဲ့က အပြင်လူတွေနဲ့ တွေ့ရတာကို မကြိုက်ဘူး။ မင်းရဲ့ တောင်းဆိုမှုက ခက်ခဲလိမ့်မယ်"

"ထျန်းကျီမျှော်စင်က တပည့်တွေက လူအများနဲ့ မဆက်ဆံဘူးဆိုတာကို ကျွန်တော်လည်း သိပါတယ်" လူငယ်က ပြန်ဖြေလိုက်သည်။ "ဒါပေမဲ့ တကယ်လို့ အစ်ကိုကသာ ကျွန်တော့်ကို မိတ်ဆက်ပေးနိုင်မယ်ဆိုရင် အစ်ကို့ပေါ် ကျွန်တော် အကြွေးကြီးကြီး တင်သွားပြီလေ"

"သူ့ဆီကနေ မင်း ဘာလိုအပ်တာလဲ" ယန်ချန်းဟိုင်က ဖိအားပေး မေးလိုက်၏။ "ငါ့ကို အရင်ပြောပြ၊ ပြီးရင် သူ လက်ခံဖို့ ဖြစ်နိုင်၊ မဖြစ်နိုင် ငါ ဆုံးဖြတ်ပေးမယ်"

လူငယ်၏ မျက်လုံးများ လှုပ်ခတ်သွားသော်လည်း လျင်မြန်စွာပင် သူ၏ ပေါ့ပေါ့ပါးပါး အမူအရာကို ပြန်ပြီးရယူလိုက်လေသည်။ "ကြီးကြီးမားမားတော့ မဟုတ်ပါဘူး။ မကြာသေးမီကမှ အရှက်ကွဲသွားတဲ့ မိသားစုငယ်လေးတစ်ခုဆီကနေ မြေပုံတစ်ခုကို ကျွန်တော် ရခဲ့တယ်လေ။ ဒါပေမဲ့ အဲဒီမှာ စကားဝှက်တွေ ပါနေတော့ မြို့တော်က အကောင်းဆုံး ကျွမ်းကျင်သူတွေနဲ့တောင် တိုင်ပင်ခဲ့ပေမယ့်လည်း ဘယ်သူမှ မဖော်ထုတ်နိုင်ခဲ့ဘူး"

သူက ဆက်ပြောသည်။ "ထျန်းကျီမျှော်စင်က တပည့်တွေက သူတို့ရဲ့ ကျယ်ပြန့်တဲ့ ဗဟုသုတတွေကြောင့် နာမည်ကြီးကြတယ်လေ။ သူတို့က ကောင်းကင်နဲ့ မြေကြီးကို နားလည်နိုင်ပြီးတော့ သာမန်လူတွေ နားမလည်နိုင်တဲ့ လျှို့ဝှက်ချက်တွေကို ဟောကိန်းထုတ်နိုင်တယ်လို့ ပြောကြတယ်။ အဲ့‌တာကြောင့် မြေပုံကို အဓိပ္ပာယ်ဖော်ပေးဖို့ ကျိယွဲ့ကို ကျွန်တော်အကူအညီ တောင်းချင်တာပဲ"

"ဘယ်လို မြေပုံမျိုးကများ မင်းအတွက် ဒီလောက်တောင် အရေးကြီးနေရတာလဲ" ယန်ချန်းဟိုင်က မေးလိုက်ပြီး သူ၏ သိချင်စိတ်များ တိုးပွားလာခဲ့လေသည်။

လူငယ်သည် ခေတ္တမျှသာ တုံ့ဆိုင်းနေပြီးနောက် ဖွင့်ဟလိုက်၏။ "မြေပုံက မိသားစုငယ်လေးတစ်ခုကနေ ရလာတာဆိုပေမယ့် သူတို့ရဲ့ဘိုးဘေးက သာမန်မဟုတ်တဲ့ ပုဂ္ဂိုလ်တစ်ယောက်ပဲ။ အစ်ကို ၄... လီဝေ့ထျန်းဆိုတဲ့ နာမည်ကို အစ်ကို ကြားဖူးလား"

ဤစကားကို ကြားသောအခါ၌ တိတ်တဆိတ် စောင့်ကြည့်နေခဲ့သော လုချင်းသည် ရုတ်တရက် သဘောပေါက်သွားခဲ့တော့၏။

ခရိုင်အထက်တွင် ပျံသန်းနေစဉ် အစောပိုင်းက သူ ခံစားခဲ့ရသော အနည်းအကျဉ်းမျှ စိုးရိမ်ပူပန်မှုများမှာ ယခုအခါတွင်တော့ အဓိပ္ပာယ်ရှိသွားလေပြီဖြစ်၏။

အကြောင်းရင်းမှာ ဤနေရာတွင် ရှိနေခြင်းပင်။

....

အခန်း ၄၃၈ ၊ အပိုင်း (၁) - အရင်းအမြစ်၊ မင်း ယူရဲလား

သေသပ်လှပစွာ ဝတ်ဆင်ထားသော လူငယ်က လီဝေ့ထျန်းဆိုသည့် နာမည်အား ပြောလိုက်သည်ကို လုချင်း ကြားလိုက်ရသောအခါ အစောပိုင်းက သူ၏ စိတ်ဝိညာဉ်တွင် ရုတ်တရက် လှိုင်းဂယက်တစ်ခု အဘယ်ကြောင့် ခံစားခဲ့ရကြောင်းကို နောက်ဆုံးတွင် သူ နားလည်သွားခဲ့တော့၏။

ထိုစဉ်က ယွီဟွာဂူအတွင်း၌ လီဝေ့ထျန်း ချန်ရစ်ခဲ့သော အမွေအနှစ် ကျောက်စိမ်းပြားကို သူ ရရှိခဲ့သည်။

၎င်းသည် သူ၏ ကျင့်ကြံခြင်းခရီးစဉ်အစတွင် သူ့အား ကြီးမားလှသော အကူအညီများကို ပေးစွမ်းခဲ့ရာ သူ ဘယ်သောအခါမျှ မေ့ပျောက်နိုင်မည်မဟုတ်သော ကျေးဇူးတစ်ခု ဖြစ်လေသည်။

အစပိုင်းက လုချင်းသည် နှစ်ပေါင်းများစွာ ကြာပြီးနောက် လီဝေ့ထျန်းနှင့် ပတ်သက်သော ကိစ္စရပ်အားလုံးမှာ ကြာမြင့်စွာကတည်းက ပျောက်ကွယ်သွားခဲ့ပြီဟု ထင်ခဲ့သည်။ လီဝေ့ထျန်း မိသားစု၏ မျိုးဆက်အချို့ ယနေ့တိုင်အောင် အသက်ရှင်ကျန်ရစ်လိမ့်မည်ဟု သူ ဘယ်သောအခါမျှ မမျှော်လင့်ထားခဲ့ချေ။

မိသားစုငယ်လေးတစ်ခုက ရာဇဝတ်မှုတစ်ခု ကျူးလွန်ခဲ့ကြောင်း သေသပ်လှပစွာ ဝတ်ဆင်ထားသော လူငယ်က ပြောသည်ကို ကြားသောအခါ၌ ဤအကြောင်းအကျိုးဆက်စပ်မှု ကြိုးမျှင်လေးကို ပြန်ဆပ်ရန် အချိန်ရောက်ပြီဖြစ်ကြောင်း လုချင်း သဘောပေါက်လိုက်တော့၏။

လုချင်း တွေးတောနေစဉ် တည်းခိုခန်းရှိ စကားပြောဆိုမှုများက ဆက်လက်ဖြစ်ပေါ်နေလေသည်။

"လီဝေ့ထျန်းလား"

ယန်ချန်းဟိုင်၏ မျက်နှာပေါ်တွင် ဇဝေဇဝါဖြစ်မှု အရိပ်အယောင်တစ်ခု ပေါ်လာခဲ့ရာ ထိုနာမည်ကို သူ တစ်ခါမျှ မကြားဖူးကြောင်း ထင်ရှားလှပေသည်။

"အစ်ကို ၄က သူ့အကြောင်း မသိတာ အံ့သြစရာတော့ မဟုတ်ပါဘူး။ အဲဒီလီဝေ့ထျန်းက လွန်ခဲ့တဲ့ နှစ်ပေါင်း ခုနစ်ရာ၊ ရှစ်ရာလောက်က အသက်ရှင်ခဲ့တာဆိုတော့ ယန်မိသားစု အာဏာမရခင် အချိန်အတော်ကြာကတည်းကပဲလေ။

တမင်သက်သက် စုံစမ်းစစ်ဆေးပြီးမှ သူ့အကြောင်းကို ကျွန်တော်လည်း မတော်တဆ သိခဲ့ရတာ။ အဲဒီလိုနဲ့ပဲ သူ့ရဲ့ လုပ်ရပ်တွေအကြောင်း နည်းနည်းပါးပါး သိလာရတာလေ" သေသပ်လှပစွာ ဝတ်ဆင်ထားသော လူငယ်က အပြုံးဖြင့် ပြောလိုက်သည်။

"လွန်ခဲ့တဲ့ နှစ်ပေါင်း ခုနစ်ရာ၊ ရှစ်ရာလောက်ကလား"

ယန်ချန်းဟိုင်သည် သဘောပေါက်သွား၏။ မြို့တော်မှ နှစ်ပေါင်းများစွာ ကင်းကွာနေခဲ့သော်လည်း ထိုအချိန်ကာလအတွင်း ထူးခြားသော တစ်စုံတစ်ယောက် ပေါ်ပေါက်ခဲ့မည်ဆိုလျှင် သူ လုံးဝ မသိဘဲနေမည် မဟုတ်ကြောင်း သူ့ကိုယ်သူ တွေးလိုက်မိလေသည်။

ထို့နောက် သူက သိချင်စိတ်ဖြင့် မေးလိုက်၏။ "အဲဒီလီဝေ့ထျန်းက မင်း အဲဒီလောက်တောင် အာရုံစိုက်ရလောက်အောင် ဘာတွေများ ထူးခြားနေလို့လဲ"

"လီဝေ့ထျန်းက သူ့ခေတ်သူ့အခါက ပြိုင်ဘက်ကင်းတဲ့ ကျွမ်းကျင်သူ တစ်ယောက်ပဲ။

သူ့ရဲ့ ကျင့်ကြံခြင်းက ပြီးပြည့်စုံခြင်းရဲ့ အထွတ်အထိပ်ကို ရောက်ခဲ့တယ်လို့ ပြောကြတယ်လေ။ ကျီ နိုင်ငံရဲ့ နိုင်ငံတော်စောင့်ရှောက်သူအနေနဲ့ ပတ်ဝန်းကျင် နိုင်ငံတွေက မွေးရာပါနယ်ပယ် ကျွမ်းကျင်သူတွေအားလုံးကို နှိမ်နင်းဖို့အတွက် ဓားတစ်လက်တည်းကိုပဲ သုံးခဲ့တယ်တဲ့။ သူ့ရှေ့မှာ ဘယ်သူကမှ ခေါင်းမမော့ရဲကြဘူးတဲ့လေ။

သူက အဲဒီအချိန်တုန်းက ကမ္ဘာပေါ်မှာ အစွမ်းအထက်ဆုံး ပုဂ္ဂိုလ်တွေထဲက တစ်ယောက်ဆိုတာ အသေအချာပဲ။ ကျုံးကျိုးမှာတောင် သူ့ကို ယှဉ်နိုင်တဲ့သူ နည်းတယ်"

"အဲဒီလောက်တောင် အစွမ်းထက်တဲ့ ပုဂ္ဂိုလ်ကြီးလား"

ယန်ချန်းဟိုင်မှာ သိသိသာသာ တုန်လှုပ်သွားသော်လည်း သူ၏ တည်ငြိမ်မှုကို လျင်မြန်စွာ ပြန်ပြီးရယူလိုက်၏။

"ကျီ နိုင်ငံ ဟုတ်လား... ဒါဆို အဲဒါက..."

"ဟုတ်တယ်၊ အတိကျပဲ" သေသပ်လှပစွာ ဝတ်ဆင်ထားသော လူငယ်က ခေါင်းညိတ်လိုက်၏။ "ကျီ နိုင်ငံက ကျွန်တော်တို့ရဲ့ လက်ရှိ ယန် နိုင်ငံရဲ့ ရှေ့ပြေးနိုင်ငံပဲ။

အဲဒီအချိန်တုန်းက ကျီ နိုင်ငံက အရှေ့ဘက်ဒေသမှာ အင်အားအကြီးဆုံး နိုင်ငံတွေထဲက တစ်ခုပဲ။ အဲဒီအင်အားရဲ့ အစိတ်အပိုင်း အများစုက လီဝေ့ထျန်းဆီကနေ လာတာလေ။

ဒါပေမဲ့ လီဝေ့ထျန်း ပျောက်ကွယ်သွားပြီးနောက်မှာတော့ ကျီ နိုင်ငံက တဖြည်းဖြည်း ကျဆင်းလာခဲ့တယ်။ နှစ်တစ်ရာကျော် ရုန်းကန်ပြီးနောက် နောက်ဆုံးမှာတော့ ပြိုကွဲသွားခဲ့ပြီး သူတို့ရဲ့ နယ်မြေအများစုက ယန်မိသားစုရဲ့ အုပ်ချုပ်မှုအောက်ကို ရောက်ရှိသွားတော့တာပဲ။ အဲ့လို့နဲ့ ယန် နိုင်ငံကို တည်ထောင်ခဲ့တာလေ"

"ဒီလိုသမိုင်းကြောင်းမျိုး ရှိခဲ့တာကိုး" ယန်ချန်းဟိုင်က ရေရွတ်လိုက်၏။

"ကျွန်တော် ကိုင်ထားတဲ့ မြေပုံက လီဝေ့ထျန်းရဲ့မိသားစုမျိုးဆက်တွေဆီကနေ ရလာတာ။

သူ့ရဲ့ အထွတ်အထိပ်ကာလမှာ လီဝေ့ထျန်းရဲ့ သိုင်းပညာစွမ်းရည်က ပြိုင်ဘက်ကင်းခဲ့တယ်။ ဒါပေမဲ့ သူက သူ့ရဲ့ ဒေါသကြီးတဲ့ စိတ်သဘောထားနဲ့ တိုက်ခိုက်ရတာကို နှစ်သက်တဲ့အတွက်လည်း နာမည်ကြီးတယ်လေ။

ကျီ နိုင်ငံရဲ့ စောင့်ရှောက်သူအနေနဲ့ သူက ပတ်ဝန်းကျင် နိုင်ငံတွေက မွေးရာပါနယ်ပယ် ကျွမ်းကျင်သူတွေအားလုံးကို တစ်ချိန်က စိန်ခေါ်ခဲ့ဖူးတယ်။ သူတို့ အိမ်ကနေ မထွက်ချင်ဘူးလို့ ငြင်းဆန်တဲ့အခါမျိုးမှာတောင် သူတို့နဲ့ ယှဉ်ပြိုင်တိုက်ခိုက်ဖို့ သူတို့ရဲ့ တံခါးဝအထိ အတင်းအကျပ် သွားရောက်လေ့ရှိတယ်တဲ့။

မှတ်တမ်းတွေအရတော့ သူက အဲဒီတိုက်ပွဲတွေမှာ တစ်ကြိမ်တစ်ခါလေးတောင်မှ မရှုံးခဲ့ဖူးတာကြောင့် ပြိုင်ဘက်ကင်းတယ်ဆိုတဲ့ ဘွဲ့အမည်ကိုတောင် ရခဲ့တယ်ဆိုပဲ။

ဒါပေမဲ့ ဒီလိုကိုယ်ရည်ကိုယ်သွေးမျိုးကပဲ သူ့ကို ရန်သူတွေ အများကြီး ရစေခဲ့တယ်လေ။ လီဝေ့ထျန်း ပျောက်ကွယ်သွားပြီးနောက် သူ့ရဲ့ မိသားစုကလည်း သဘာဝကျကျပဲ လက်စားချေမှုရဲ့ ပစ်မှတ်ဖြစ်လာခဲ့တော့တာပေါ့။

မွေးရာပါနယ်ပယ် ကျွမ်းကျင်သူတွေက သာမန်သေမျိုးတွေကို တိုက်ရိုက် လက်စားချေလို့ မရပေမယ့် သူတို့ရဲ့ သြဇာလွှမ်းမိုးမှုအောက်မှာ လီမိသားစုက မြန်မြန်ဆန်ဆန်နဲ့ပဲ ကျဆင်းသွားခဲ့ရတယ်။

နောက်ဆုံးမှာတော့ သူတို့က ကမ္ဘာပေါ်ကနေတောင် ပျောက်ကွယ်သွားခဲ့တယ်လေ။ အဲဒီအချိန်တုန်းက မွေးရာပါနယ်ပယ် ကျွမ်းကျင်သူတစ်ယောက်က လီမိသားစုတစ်ခုလုံးကို ဘယ်သူမှမသိစေဘဲ မျိုးတုံးသတ်ဖြတ်ပစ်ခဲ့တယ်လို့ အများစုက ယုံကြည်ခဲ့ကြတယ်။

ဒါပေမဲ့ မကြာသေးမီကမှ လီမိသားစုက မျိုးတုံးသတ်ဖြတ်မခံရသေးဘူးဆိုတာကို ကျွန်တော်လည်း သိလိုက်ရတယ်။

အဲဒီအစား သူတို့က လူစုခွဲပြီး ပုန်းအောင်းဖို့ ရွေးချယ်ခဲ့ကြတယ်လေ။ သူတို့ရဲ့ နာမည်တွေကို ပြောင်းပြီး ထောက်လှမ်းမခံရအောင်လို့ ခေါင်ဖျားတဲ့ တောင်တန်းတွေနဲ့ ကျေးလက်ဒေသတွေမှာ နေထိုင်ခဲ့ကြတာပေါ့။

ဒီနည်းနဲ့ သူတို့က ရှင်သန်နိုင်ခဲ့ပေမယ့် ရာစုနှစ်ပေါင်းများစွာ စစ်ပွဲတွေနဲ့ မတည်ငြိမ်မှုတွေကြောင့် သူတို့ရဲ့ အရေအတွက်က လူဒါဇင်အနည်းငယ်လောက်ပဲ ကျန်တော့တဲ့အထိ လျော့နည်းသွားခဲ့တယ်လေ"

လူငယ်၏ စကားများကို ကြားသောအခါ ယန်ချန်းဟိုင်သည် ဖော်ပြ၍မရနိုင်သော ခံစားချက်တစ်ခုကို ခံစားလိုက်ရ၏။ အထွန်းကားဆုံးသော အထက်တန်းလွှာမိသားစုများပင်လျှင် အချိန်၏ စီးဆင်းမှုကို မခံနိုင်ဘဲ ဒီရေများကဲ့သို့ တက်လိုက်ကျလိုက် ဖြစ်နေကြလေသည်။

သို့သော် သူ့ကို ပို၍ စိတ်ဝင်စားစေခဲ့သည်မှာ အခြားကိစ္စတစ်ခု ဖြစ်၏ယ

"လီမိသားစုက သူတို့ရဲ့နာမည်ကို အချိန်အကြာကြီး ဖုံးကွယ်ထားခဲ့တယ်ဆိုရင် ဒီအကြောင်းတွေအားလုံးကို မင်းက ဘယ်လိုလုပ်ပြီးသိလာတာလဲ။ အဲဒီမြေပုံကိုကော ဘယ်လိုရလာတာလဲ"

"အဲဒါက တော်တော်လေး တိုက်ဆိုင်သွားတာပါ။ မကြာသေးခင်က ကျွန်တော် မယားငယ်အသစ်တစ်ယောက် ယူခဲ့တယ်လေ။

တစ်နေ့ ကျွန်တော်တို့ အပြင်ထွက် လမ်းလျှောက်နေတုန်း ပြဿနာရှာတဲ့သူတစ်ယောက်က ကျွန်တော်တို့နဲ့ ဝင်တိုက်မိတယ်။ ကျွန်တော်လည်း အရမ်းဒေါသထွက်သွားပြီး သူ့မိသားစုတစ်ခုလုံးကို ဖမ်းဆီးလိုက်ပြီးတော့ အကျဉ်းချပြီး ကွပ်မျက်ပစ်ဖို့အထိ ရည်ရွယ်ခဲ့တယ်လေ။

အဲဒီ ပြဿနာရှာတဲ့သူက လီမိသားစုရဲ့ လက်ရှိ အကြီးအကဲရဲ့ သားဖြစ်နေတာပဲ။

သူတို့ရဲ့ အသက်တွေကို ကယ်ဖို့အတွက် လီမိသားစု အကြီးအကဲက မြေပုံကို လွှဲပြောင်းပေးပြီး သူတို့ မိသားစုရဲ့ ဇာစ်မြစ်ကို ဖော်ထုတ်ခဲ့တယ်လေ။

မြေပုံကို လီဝေ့ထျန်းကိုယ်တိုင်က သူ မပျောက်ကွယ်ခင် ချန်ရစ်ခဲ့တာလို့ ပြောကြတယ်။

အဲ့လိုနဲ့ ကျွန်တော်လည်း စိတ်ဝင်စားသွားပြီး မြေပုံရဲ့ လျှို့ဝှက်ချက်တွေကို ဖော်ထုတ်ဖို့ ဆုံးဖြတ်ခဲ့တာ‌ပေါ့။ တကယ်လို့ အဲဒါက တကယ်ပဲ ရတနာတစ်ခုခုဆီကို ဦးတည်နေတယ်ဆိုရင် အဖေ့ရဲ့ မွေးနေ့အတွက် အကောင်းဆုံး လက်ဆောင်တစ်ခု ဖြစ်လာမှာပဲ"

လူငယ်၏ စကားများက ကြားကောင်းသော်လည်း သူ၏ စိတ်သဘောထားကို သိရှိထားသော ယန်ချန်းဟိုင်သည် အရင်းခံ လှည့်စားမှုကို အလွယ်တကူ သိမြင်နိုင်လေသည်။

သူက နှာခေါင်းရှုံ့လိုက်၏။ "ပြဿနာရှာတဲ့သူ ဟုတ်လား။ ငါ ခန့်မှန်းရရင် အဲဒီအမျိုးသမီးက အိမ်ထောင်ကျပြီးသား ဖြစ်ရမယ်၊ ပြီးတော့ သူ့ရဲ့အလှအပကြောင့် မင်းက သူ့ကို မယားငယ်အဖြစ် အတင်းအဓမ္မ သိမ်းပိုက်ခဲ့တာမလား"

လူငယ်က မငြင်းဘဲ ခံစားချက်ကင်းမဲ့စွာ ပြန်ဖြေလိုက်သည်။ "ကျွန်တော်ရဲ့မျက်စိကျခံရတာနဲ့တင် အဲ့မိန်းကလေး တော်တော်‌ကံကောင်းနေပြီလေ။ စည်းစိမ်ချမ်းသာနဲ့ ဇိမ်ကျကျ နေရတာက မိသားစုငယ်လေးတစ်ခုမှာ အိမ်ထောင်ကျရတာထက် အများကြီး ပိုကောင်းတာပေါ့"

"ပြီးတော့ မြေပုံရဲ့ လျှို့ဝှက်ချက်တွေကို ဖော်ထုတ်ပြီးရင် လီမိသားစုကို မင်း ဘာလုပ်မှာလဲ" ယန်ချန်းဟိုင်က မေးလိုက်၏။

"ရတနာတွေက ကျွန်တော့်ကို ကျေနပ်စေတယ်ဆိုရင်တော့ သူတို့ရဲ့ အသက်ကို ချမ်းသာပေးဖို့ ကျွန်တော် စဉ်းစားကောင်းစဉ်းစားပေးမှာပေါ့။ မဟုတ်ရင်တော့ အရာအားလုံးက ဥပဒေအတိုင်းပဲ ဆက်သွားလိမ့်မယ်လေ" လူငယ်က အပြုံးဖြင့် ပြောလိုက်၏။

ယန်ချန်းဟိုင်သည် သူ၏ ညီလေး ၇ကို ကောင်းကောင်းသိထားသဖြင့် အထင်သေးစွာဖြင့် ပြုံးလိုက်၏။ "ဥပဒေအတိုင်း" ဆိုသည်မှာ နောက်ဆုံးတွင်တော့ သူ ဆုံးဖြတ်သမျှသာ ဖြစ်ပေလိမ့်မည်။

"အစ်ကို ၄... အခု ကျွန်တော်က ဒီလောက်အထိ ပွင့်ပွင့်လင်းလင်း ပြောပြပြီးပြီဆိုတော့ ကျိယွဲ့ဆီကို ကျွန်တော့်ကို မိတ်ဆက်ပေးနိုင်မလား"

ယန်ချန်းဟိုင်သည် ခေတ္တမျှ စဉ်းစားပြီးနောက် ပြန်ဖြေလိုက်လေသည်။ "ငါ ကျိယွဲ့ကို ပြောပေးနိုင်တယ်။ ဒါပေမဲ့ မင်းကိုတွေ့ဖို့ သူ သဘောတူမယ်လို့တော့ အာမမခံနိုင်ဘူးနော်"

"အစ်ကိုက အဲဒီအကြောင်းကို ပြောပေးဖို့ ဆန္ဒရှိသရွေ့ပါ။ ထျန်းကျီမျှော်စင်က လူတွေက ကမ္ဘာကြီးရဲ့ လျှို့ဝှက်ချက်တွေကို ဖော်ထုတ်ရတာကို နှစ်သက်တယ်လို့ ကျွန်တော် ကြားဖူးတယ်။ ဒီမြေပုံက လီဝေ့ထျန်း ရာစုနှစ်ပေါင်းများစွာက ဘာလို့ ပျောက်ကွယ်သွားရသလဲဆိုတာနဲ့ ပတ်သက်တဲ့ သဲလွန်စတွေကို သိမ်းဆည်းထားနိုင်တယ်လေ။

ဒီလို ပြိုင်ဘက်ကင်းတဲ့ ပုဂ္ဂိုလ်တစ်ယောက်ရဲ့ နောက်ဆုံးအချိန် ရောက်ခဲ့တဲ့ နေရာကို ကျိယွဲ့လို လူတစ်ယောက်က သေချာပေါက် စိတ်ဝင်စားမှာပဲ" လူငယ်က ယုံကြည်မှုရှိစွာဖြင့် ပြောလိုက်၏။

ယန်ချန်းဟိုင်ခင်မျာ တိတ်ဆိတ်သွားရသည်။ သို့သော် အတွင်းစိတ်တွင်တော့ ကျိယွဲ့သည် သူ၏ ညီလေး ၇၏ ကိုယ်ရည်ကိုယ်သွေးကိုသယ သိရှိပါက သူ့ကို လက်ခံတွေ့ဆုံလိမ့်မည်ဟု သူ သံသယဝင်မိလေသည်။

ထိုအချိန်တွင် လူငယ်သည် သူ၏ အကြည့်ကို အိမ်တော်ထိန်းဝေ့ဆီသို့ လှည့်လိုက်တော့၏။

"ခင်ဗျားက ဝေ့မိသားစုရဲ့ အိမ်တော်ထိန်း ဖြစ်ရမယ် ဟုတ်တယ်မလား"

...