အခန်း (၁၅၁-၁၅၂)

အခန်း (၁၅၁) နက်နဲသော နေမင်းချီအား လုယူခြင်း၊ အဆင့် ၇ သွေးယန်သရဲဂျင်ဆင်း ထွက်ပေါ်လာခြင်း

"ဂုဏ်သရေရှိ ဧည့်သည်တော်တို့... ဒီည လေလံတင်မယ့် ဒုတိယမြောက် ပစ္စည်းကတော့ အခြေခံတည်ဆောက်ခြင်း ဆေးလုံးပဲ ဖြစ်ပါတယ်... စုစုပေါင်း ဆယ်လုံး ရှိပေမဲ့ တစ်ကြိမ်ကို တစ်လုံးစီပဲ လေလံတင်သွားမှာပါ..."

"ကနဦး ဈေးနှုန်းကတော့ အဆင့်နိမ့် ဝိညာဉ်ကျောက်တုံး ၃,၀၀၀ ဖြစ်ပါတယ်... တစ်ကြိမ် ဈေးခေါ်ရင် အနည်းဆုံး အဆင့်နိမ့် ဝိညာဉ်ကျောက်တုံး ၁၀၀ တိုးပေးရပါမယ်..."

ချူဟုန်းယန်၏ စကားကြောင့် လေလံပွဲအတွင်းရှိ စိတ်လှုပ်ရှားမှုများ ပြန်လည် နိုးကြားလာပြီး လူအများအပြား၏ မျက်လုံးများ အရောင်လက်သွားကြလေ၏။

ပွဲလာသူ အများစုမှာ သူတို့၏ မျိုးဆက်သစ်များအတွက် အခြေခံတည်ဆောက်ခြင်း ဆေးလုံးများကို လာရောက် ဝယ်ယူကြသော လေလွင့်ကျင့်ကြံသူများ ဖြစ်ကြပေသည်။

မည်သို့ပင်ဆိုစေကာမူ အခြေခံတည်ဆောက်ခြင်းအဆင့်ကို အောင်မြင်အောင် မကျော်ဖြတ်နိုင်ပါက ရွှေအမြုတေအဆင့်အကြောင်း ပြောဆိုနေရန် အကြောင်းမရှိတော့ချေ။

အခြေခံတည်ဆောက်ခြင်း ဆေးလုံး ဆယ်လုံးမှာ များပြားလှသည်ဟု ထင်ရသော်လည်း လုံလောက်မှု မရှိသေးချေ။ ၎င်းတို့အနက် အနိမ့်ဆုံး ဈေးနှုန်းမှာ အဆင့်နိမ့် ဝိညာဉ်ကျောက်တုံး ၄၅,၀၀၀ ဖြစ်ပြီး အမြင့်ဆုံး ဈေးနှုန်းမှာ အဆင့်နိမ့် ဝိညာဉ်ကျောက်တုံး ၆၀,၀၀၀ အထိ ရောက်ရှိသွားလေ၏။

လေလံဆွဲသူများ အားလုံးမှာ အခြေခံတည်ဆောက်ခြင်းအဆင့် ကျင့်ကြံသူများဖြစ်ကြပြီး တစ်လုံးကိုမူ ချီသန့်စင်ခြင်း အဆင့် ၉ မှ ကျင့်ကြံသူတစ်ဦးက ဝယ်ယူသွားခဲ့လေသည်။

ရွှေအမြုတေအဆင့်နှင့် အထက်မှ မည်သူကမျှ ဝင်ရောက် လေလံဆွဲခြင်း မပြုကြချေ။ သူတို့၏ ကျင့်ကြံမှုအဆင့်ဖြင့် မျိုးဆက်သစ်များနှင့် ဝင်ရောက် ယှဉ်ပြိုင်လောက်အောင် အဆင့်အတန်း လျှော့ချမည် မဟုတ်သောကြောင့် ဖြစ်ပေသည်။

ကျိုးယွမ်သည် မျက်လုံးများကိုပင် မှိတ်ထားခဲ့ပြီး လေလံဆွဲမှု ပြီးဆုံးသွားချိန်မှသာ ပြန်ဖွင့်ကြည့်လေ၏။

ချူဟုန်းယန်သည် အလွန် ဝမ်းသာနေလေသည်။ ယနေ့ည လေထုမှာ အလွန် ကောင်းမွန်လှပေ၏။

"ဂုဏ်သရေရှိ ဧည့်သည်တော်တို့... ဒီည လေလံတင်မယ့် တတိယမြောက် ပစ္စည်းကတော့ ရှေးဟောင်း အစွမ်းထက် အင်မော်တယ်လိုဏ်ဂူတစ်ခုကနေ ရရှိလာတာပါ... ဒါပေမဲ့ အချိန်တွေ အရမ်း ကြာမြင့်ခဲ့ပြီဖြစ်လို့ အတွင်းထဲက အရာအားလုံးဟာ ပြာအဖြစ် ပြောင်းလဲသွားခဲ့တာ ကြာပါပြီ..."

"ဒါပေမဲ့ အင်မော်တယ်လိုဏ်ဂူထဲမှာ ပျက်စီးနေတဲ့ ဆေးမီးဖိုငယ်လေးတစ်ခုပဲ ကျန်ရစ်ခဲ့ပါတယ်..."

"ဒီပစ္စည်းကို ကျွန်မတို့ လေလံရုံက အကြီးအကဲတွေ စစ်ဆေးအတည်ပြုပြီးပါပြီ... အထဲမှာ ပူပြင်းတဲ့ နေမင်းချီစွမ်းအင် အကြွင်းအကျန်လေး ပါဝင်နေပါတယ်..."

"အကယ်၍ ဒ ပူပြင်းတဲ့ နေမင်းချီ စွမ်းအင်ကို ထုတ်ယူနိုင်မယ်ဆိုရင် နေမင်းကျင့်စဉ်ကို ကျင့်ကြံတဲ့သူတွေအတွက် အလွန်အသုံးဝင်မှာ သေချာပါတယ်..."

ချူဟုန်းယန် စကားပြောနေချိန်တွင် အစေခံမလေး တစ်ဦးသည် ဆေးမီးဖိုငယ်လေးကို ကိုင်ဆောင်ကာ လေလံစင်မြင့်ပေါ်သို့ ရောက်ရှိလာလေ၏။

၎င်းကို ဆေးမီးဖိုငယ်ဟု ခေါ်သော်လည်း တကယ်တမ်းတွင် လက်သီးဆုပ် အရွယ်အစားခန့်သာရှိပြီး တစ်ခုလုံး အနက်ရောင် ဖြစ်နေကာ အတွင်းထဲတွင် မည်သည့်အရာကိုမျှ မမြင်ရချေ။

လေလံရုံထဲရှိ လူအများစုသည် ဆေးမီးဖိုငယ်ကို တစ်ချက် ကြည့်လိုက်ပြီးနောက် ချက်ချင်း စိတ်ဝင်စားမှု ပျောက်ဆုံးသွားကြလေ၏။

[ဒင်... စနစ်မှ ပျက်စီးနေသော ထိပ်တန်း ဝိညာဉ်လက်နက်ဖြစ်သည့် နက်နဲသော နေမင်းဆေးမီးဖိုကို ထောက်လှမ်းမိပါသည်... ၎င်းအတွင်းရှိ နက်နဲသော နေမင်းချီသည် ပိုင်ရှင်၏ ရွှမ်ထျန်းဓားနှင့် မီးတောက်ဓားတို့ကို အဆင့်မြှင့်တင်ပေးနိုင်ပါသည်... လုယူမလား...]

ဆေးမီးဖိုငယ်ကို ပျင်းရိစွာ ကြည့်နေခဲ့သော ကျိုးယွမ်၏ မျက်လုံးများသည် သူ၏ စိတ်ထဲတွင် စနစ်၏ အသံ ပဲ့တင်ထပ်သွားချိန်၌ ရုတ်တရက် အရောင်လက်သွားလေ၏။

အတွင်းထဲရှိ အရာသည် သာမန်ပူပြင်းသော နေမင်းချီ လုံးလုံးလျားလျား မဟုတ်ဘဲ ပိုမို အဆင့်မြင့်သော နက်နဲသည့် နေမင်းချီ ဖြစ်နေကြောင်း ပေါ်လွင်သွားလေပြီ။

"လုယူမယ်..."

အနည်းငယ်မျှ တုံ့ဆိုင်းမနေဘဲ ကျိုးယွမ်က ချက်ချင်း ပြောဆိုလိုက်လေ၏။

ကျိုးယွမ် စကားပြောပြီးသည်နှင့် သူ၏ ဒန်တျန်အတွင်း၌ ထူးခြားသော ချီစွမ်းအင်အစုအဝေးတစ်ခု ပေါ်လာကြောင်း ချက်ချင်း ခံစားလိုက်ရလေသည်။

ဤစွမ်းအင် အစုအဝေးသည် အလွန် နက်နဲဆန်းကြယ်လှပြီး အလွန်အမင်း ပူပြင်းသော အရှိန်အဝါကို ထုတ်လွှတ်နေလေ၏။

ထိုအချိန်တွင် ကျိုးယွမ်၏ ဒန်တျန်အတွင်းရှိ အခြေတည်စိတ်ဝိညာဉ်သည် မျက်လုံးများကို ဖွင့်လိုက်ပြီး သူ၏ မျက်ခုံးကြားတွင် ထူးခြားသော အမှတ်အသားတစ်ခု ပေါ်လာလေ၏။ ထို့နောက် အရောင်သုံးရောင် ကွင်းတစ်ခု ဖြည်းညင်းစွာ ပျံထွက်လာသည်။

အရောင်သုံးရောင် ကွင်းကို မြင်လိုက်ရချိန်တွင် ကျိုးယွမ်၏ မျက်လုံးများ ချက်ချင်း ပြူးကျယ်သွားရလေ၏။

ဤအရာသည် အခြေခံတည်ဆောက်ခြင်းအဆင့်တွင် သူ ဖန်တီးခဲ့သော အရောင်သုံးရောင် တာအိုအုတ်မြစ်ကွင်း မဟုတ်ပါလော။

"ငါ ရွှေအမြုတေအဆင့်ကို စုစည်းခဲ့ချိန်တုန်းက ဒါက အရည်ပျော်သွားပြီး မိုးကြိုးနဲ့ မီး ရွှေအမြုတေ အဖြစ် ပြောင်းလဲသွားခဲ့ပြီလေ... ဘယ်လိုလုပ် ပြန်ပေါ်လာနိုင်တာလဲ..."

အရောင်သုံးရောင် ကွင်း၏ ပတ်လည်ရှိ အပေါက် ကိုးပေါက်တွင် ဓားငယ် ကိုးလက် စိုက်ဝင်နေပြီး ပြီးပြည့်စုံသော တစ်သားတည်းအဖြစ် ဖွဲ့စည်းထားလေ၏။

"ဒါက တကယ်တော့ ဘာတွေဖြစ်နေတာလဲ..."

ကျိုးယွမ် ဇဝေဇဝါ ဖြစ်သွားပြီးနောက် သူ၏ အကြည့်များသည် အရောင်သုံးရောင် ကွင်း ခွဲခြားထားသော နေရာ သုံးခုဆီသို့ ကျရောက်သွားလေ၏။

နေရာတစ်ခုတွင် လျှပ်စီးများ လက်နေပြီး မိုးကြိုးစွမ်းအင်များ ပျံ့နှံ့နေလေသည်။

နောက်ထပ် နေရာတစ်ခုတွင် မီးတောက်များ တောက်လောင်နေပြီး ထိုနေရာ၏ ထောင့်တိုင်းတွင် မီးအဆောင် ဟူသော အက္ခရာကို တွေ့ရလေ၏။

အခြား နေရာတစ်ခုမှာမူ မှေးမှိန်သော ရွှေရောင် အလင်းတန်းများ ထွက်ပေါ်နေပြီး ၎င်းအတွင်း၌ ရွှေရောင် အက္ခရာများ ပေါလောပေါ်နေသည်ကို မှိန်ဖျော့ဖျော့ မြင်တွေ့နေရသည်။

"တာအိုတားမြစ်ခြင်း အက္ခရာပဲ..."

ကျိုးယွမ်သည် တစ်ချက် ကြည့်လိုက်ရုံဖြင့် ချက်ချင်း မှတ်မိသွားလေ၏။ ၎င်းမှာ တာအိုတားမြစ်ခြင်း အက္ခရာပင် ဖြစ်သည်။

နေရာသုံးခုစလုံးမှာ အရွယ်အစား တူညီကြပြီး အပြားဝိုင်းကို ပြီးပြည့်စုံစွာ ခွဲဝေထားလေ၏။

မှေးမှိန်သော ရွှေရောင် နေရာကို ကြည့်ရင်း ကျိုးယွမ်သည် ရုတ်တရက် အသိအမြင် ပွင့်လင်းသွားသကဲ့သို့ ခံစားလိုက်ရလေသည်။

အကယ်၍ကွင်းကိုယ်တိုင်ကို တစ်ခုအဖြစ် သတ်မှတ်မည်ဆိုလျှင် ၎င်း၏ အရောင်သုံးရောင် နေရာများမှာ သုံးခုဖြစ်ပြီး ဓားငယ် ကိုးလက်မှာ ကိုးခု ဖြစ်ပေသည်။

တစ်ခုမှ သုံးခုဖြစ်လာသည်... သုံးခုမှ ကိုးခုဖြစ်လာသည်... ကိုးခုမှာ အထွတ်အထိပ်ပင် ဖြစ်သည်။ ၎င်းသည် အရာခပ်သိမ်းအဖြစ် အသွင်ပြောင်းလဲနိုင်ပေသည်။

ဤအချက်ကို တွေးမိချိန်၌ ကျိုးယွမ်၏ ခေါင်းထဲတွင် ပေါက်ကွဲသွားသကဲ့သို့ ခံစားလိုက်ရပြီး သူ၏ အနာဂတ် လမ်းကြောင်းကို စတင် နားလည်လာလေ၏။

ထိုအချိန်တွင် ရွှမ်ထျန်းဓားနှင့် မီးတောက်ဓားတို့သည် အရောင်သုံးရောင် ကွင်းမှ ပျံထွက်လာပြီး နက်နဲသော နေမင်းချီ အစုအဝေးထဲသို့ တစ်ပြိုင်နက်တည်း ဝင်ရောက်သွားလေသည်။

အချိန်တိုလေးအတွင်းမှာပင် နက်နဲသော နေမင်းချီသည် ဓားငယ် နှစ်လက်၏ ဝါးမျိုခြင်းကို လုံးလုံးလျားလျား ခံလိုက်ရလေ၏။

အလွန် နက်နဲဆန်းကြယ်လှသော မရေမတွက်နိုင်သည့် အက္ခရာများသည် ဓားငယ် နှစ်လက်ပေါ်တွင် ပေါ်လာလေသည်။

ကျိုးယွမ်သည် ဓားငယ် နှစ်လက်ထံမှ ထွက်ပေါ်လာသော သဲ့သဲ့မျှ စိတ်လှုပ်ရှားမှု အရိပ်အယောင်ကို အာရုံခံမိလိုက်လေ၏။

ဤသည်မှာ အသိဉာဏ် စတင် ပွင့်လင်းလာတော့မည့် လက္ခဏာပင် ဖြစ်သည်။

ထိုအခိုက်အတန့်တွင် ကျိုးယွမ် အနည်းငယ် ထုံကျဉ်သွားရလေ၏။ လေလံရုံသို့ လာရောက်သည့် ဤခရီးစဉ်မှ ဤမျှလောက် အကျိုးအမြတ် ရရှိလိမ့်မည်ဟု သူ ဘယ်သောအခါကမျှ မမျှော်လင့်ထားခဲ့ချေ။

ကျိုးယွမ်သည် အရောင်သုံးရောင်ကွင်းကို စူးစိုက်ကြည့်လိုက်လေ၏။ မိုးကြိုးနှင့် မီး နေရာများနှင့် နှိုင်းယှဉ်ပါက တာအိုတားမြစ်ခြင်း အက္ခရာ နေရာယူထားသော အပိုင်းမှာ သိသိသာသာ ပါးလွှာနေပေသည်။

"ငါ့ရဲ့ နတ်ဘုရားအသွင်ပြောင်းအဆင့် လမ်းကြောင်းက အရောင်သုံးရောင်ကွင်းတွေကြား မျှတတဲ့ အခြေအနေတစ်ခု ရရှိဖို့များလား..."

ကျိုးယွမ် ပိုတွေးလေလေ ပို၍ ယုတ္တိတန်လေလေ ဖြစ်နေသည်။ သူ၏ ဦးတည်ရာကို ရှာတွေ့သွားပြီဟု ခံစားရသဖြင့် သူ၏ မျက်လုံးများတွင် ဝမ်းမြောက်သည့် အရိပ်အယောင်တစ်ခု ပေါ်လာလေ၏။

သေချာသည်မှာ နတ်ဘုရားအသွင်ပြောင်းအဆင့်သည် အဆင့် ၅ အဆောင်သခင်နှင့် ညီမျှပြီး ကျိုးယွမ်မှာ လက်ရှိတွင် အဆင့် ၂ ၌သာ ရှိနေသေးသည်။

အကယ်၍ ထိုသို့ဆိုလျှင် ကျိုးယွမ် လျှောက်လှမ်းရမည့် ခရီးမှာ အလွန် ဝေးကွာနေသေးပေသည်။

ကျိုးယွမ် သတိပြန်ဝင်လာချိန်တွင် လေလံရုံအတွင်းမှ လှောင်ပြောင် ရယ်မောသံများကို ကြားလိုက်ရလေ၏။

ကျိုးယွမ် လေလံစင်မြင့်ဆီသို့ လှမ်းကြည့်လိုက်ရာ ဆေးမီးဖိုငယ်လေး တကယ်တမ်း ကွဲအက်သွားသည်ကို မြင်လိုက်ရလေသည်။

ထိုအခိုက်အတန့်တွင် မူလက လေလံဆွဲရန် စဉ်းစားနေခဲ့သူများ အားလုံး စိတ်ဝင်စားမှု ချက်ချင်း ပျောက်ဆုံးသွားကြလေ၏။ ဤအရာသည် အမှိုက်တစ်စဖြစ်နေပြီ မဟုတ်ပါလော။

ချူဟုန်းယန်သည်လည်း လုံးလုံးလျားလျား ဇဝေဇဝါဖြစ်သွားပြီး မည်သည့်အရာများ ဖြစ်ပျက်နေသည်ကို နားမလည်နိုင်အောင် ဖြစ်သွားလေ၏။

အချိန်တစ်လျှောက်လုံး အကောင်းပကတိ ရှိနေခဲ့ပါလျက် လေလံစင်မြင့်ပေါ် ရောက်ရောက်ချင်း အဘယ်ကြောင့် ကွဲအက်သွားရသနည်း။

ထိုအချိန်တွင် အဘိုးအိုတစ်ဦးသည် စင်နောက်ဘက်မှ ထွက်လာပြီး လေလံစင်မြင့်ပေါ်သို့ ခုန်တက်ကာ အစေခံမလေးထံမှ နက်နဲသော နေမင်းဆေးမီးဖိုကို ယူလိုက်ပြီး မျက်မှောင်ကြုတ်သွားလေ၏။

ဆေးမီးဖိုအတွင်း၌ မူလက ပါဝင်နေသော ထူးခြားသည့် အရှိန်အဝါသည် လေထဲတွင် အရိပ်အယောင်မျှ မချန်ဘဲ ပျောက်ကွယ်သွားခဲ့လေပြီ။

"တာအိုရောင်းရင်းတို့... ဒီပစ္စည်းကို လေလံတင်တာ ရွှေ့ဆိုင်းလိုက်ကြပါစို့... ကျွန်တော် ဒါကို ပြန်ယူသွားပြီး ဆုံးဖြတ်ချက် မချခင် သေချာလေ့လာကြည့်ပါရစေ..."

အဘိုးအို စကားပြောပြီးနောက် လူအုပ်ကို လက်နှစ်ဖက်ယှက်၍ ဂါရဝပြုလိုက်ပြီး လုံးလုံးလျားလျား ပျက်စီးသွားသော နက်နဲသော နေမင်းဆေးမီးဖိုနှင့်အတူ လေလံစင်မြင့်ပေါ်မှ ထွက်ခွာသွားလေ၏။

ဤကဲ့သို့သော အခြေအနေမျိုးကို ပထမဆုံးအကြိမ် ကြုံတွေ့ရခြင်းဖြစ်သဖြင့် ချူဟုန်းယန်လည်း အတော်လေး အရှက်ရသွားလေ၏။ သို့ရာတွင် သူမ၌ အလွန် ခိုင်မာသော စိတ်ဓာတ်ခွန်အား ရှိနေသဖြင့် သူမ၏ မျက်နှာပေါ်တွင် ထိတ်လန့်သည့် အရိပ်အယောင်များ ပေါ်မလာခဲ့ချေ။

"ဂုဏ်သရေရှိ ဧည့်သည်တော်တို့... ခုနက ဖြစ်ပျက်သွားတဲ့ ကိစ္စအတွက် တောင်းပန်ပါတယ်ရှင်..."

"ဒီဖြစ်ရပ်က ကျွန်မတို့ ရှင်ယွင် လေလံရုံ အနေနဲ့ အနာဂတ်မှာ ပိုပြီး ကြိုးစားအားထုတ်ရမယ်ဆိုတဲ့ သင်ခန်းစာတစ်ခု ပေးလိုက်တာပါပဲ..."

ချူဟုန်းယန်၏ စကားသည် လူတိုင်း၏ မျက်နှာသာပေးမှုကို ချက်ချင်း ရရှိသွားစေလေသည်။ မိမိ၏ အားနည်းချက်များကို ပွင့်ပွင့်လင်းလင်း ဝန်ခံနိုင်သော လေလံရုံတစ်ခုသည် လေးစားထိုက်ပေသည်။

ဤစကားကို ကြားချိန်၌ ကျိုးယွမ် တိတ်ဆိတ်စွာ ခေါင်းညိတ်လိုက်လေ၏။ ဤချူဟုန်းယန်သည် တကယ်ကို ထူးခြားပြောင်မြောက်လှပေသည်။

"ဆက်လက်ပြီး ကျွန်မတို့ လေလံတင်ရမယ့် ပစ္စည်းကတော့ အစစ်အမှန် ကောင်းကင်နဲ့မြေကြီး ရတနာဖြစ်တဲ့ အဆင့် ၇ သွေးယန်သရဲဂျင်ဆင်းပဲ ဖြစ်ပါတယ်..."

"ရောက်ရှိနေကြတဲ့ ဂုဏ်သရေရှိ ဧည့်သည်တော်တွေထဲမှာ ဒီပစ္စည်းကို မှတ်မိတဲ့သူများ ရှိပါသလား..."

ချူဟုန်းယန် စကားပြောနေချိန်တွင် အစေခံမလေးတစ်ဦးက မီတာဝက်ခန့် ရှည်လျားသော သွေးနီရောင် ဂျင်ဆင်း ပါရှိသည့် သေတ္တာတစ်လုံးကို သယ်ဆောင်လာလေ၏။

"အဆင့် ၇ သွေးယန်သရဲဂျင်ဆင်း... ဒါ တကယ်ပဲလား..."

ဒုတိယထပ်ရှိ အမှတ်တစ် အထူးဧည့်ခန်းဆောင်၏ တံခါးသည် တိုက်ရိုက် ပွင့်လာပြီး အဘိုးအိုတစ်ဦး ထွက်လာကာ သူ၏ မျက်လုံးများကို လေလံစင်မြင့်ပေါ်သို့ စူးစိုက်ထားလေ၏။

တစ်ချိန်တည်းမှာပင် အမှတ် ၅ ခန်းဆောင်နှင့် အမှတ် ၆ ခန်းဆောင်ရှိ လူများထံမှ အံ့အားသင့်စွာ သက်ပြင်းချသံများ ထွက်ပေါ်လာရာ သူတို့သည်လည်း လေလံပစ္စည်းကြောင့် မှင်တက်သွားကြကြောင်း ထင်ရှားပေသည်။

အခန်း (၁၅၂) စိတ်အားထက်သန်မှုနှင့် အနေခက်သော တိတ်ဆိတ်မှု

ပထမထပ်တွင် ပုံရိပ်အချို့လည်း မတ်တပ်ရပ်လာကြပြီး သူတို့၏ မျက်လုံးများကို စင်မြင့်ပေါ်ရှိ အဆင့် ၇ သွေးယန်သရဲဂျင်ဆင်းအပေါ် စူးစိုက်ထားကာ သူတို့၏ မျက်လုံးများတွင် ပြင်းထန်သော လောဘများ ပေါ်လွင်နေလေ၏။

ဤသည်မှာ ကျိုးယွမ် အဆင့် ၇ သွေးယန်သရဲဂျင်ဆင်းကို ပထမဆုံးအကြိမ် မြင်တွေ့ဖူးခြင်း ဖြစ်သည်။ အဆင့် ၇ သွေးယန်သရဲဂျင်ဆင်းပေါ်တွင် သွေးစိမ်းများ စီးဆင်းနေသည်ကို သူ မြင်တွေ့လိုက်ရလေ၏။

ထို့ပြင် အဆင့် ၇ သွေးယန်သရဲဂျင်ဆင်း၏ ခန္ဓာကိုယ်သည် ပေါ်လာလိုက် ပျောက်သွားလိုက် ဖြစ်နေပြီး ပျောက်ကွယ်သွားတော့မည့်အလား ထင်မှတ်ရလေသည်။

"အဆင့် ၇ သွေးယန်သရဲဂျင်ဆင်းဟာ သွေးတွေပေါများပြီး ယင်စွမ်းအင် မြင့်မားတဲ့ နေရာတွေမှာ ကြီးထွားလေ့ရှိပြီး အဓိက အကျိုးကျေးဇူး လေးချက် ရှိပါတယ်ရှင်..."

"ပထမအချက်ကတော့ ဝိညာဉ်သွေးကြောကို ပြန်လည်ပုံဖော်ပေးတာပါ... အသုံးမဝင်တဲ့ ဝိညာဉ်သွေးကြော ပိုင်ရှင်ဆိုရင်တောင် ဒီအဆင့် ၇ သွေးယန်သရဲဂျင်ဆင်းကို စားသုံးပြီးနောက်မှာ ကျင့်ကြံသူတစ်ယောက် ဖြစ်လာနိုင်ပြီး အလွန် ကြောက်မက်ဖွယ်ကောင်းတဲ့ ဝိညာဉ်သွေးကြောကို ပိုင်ဆိုင်နိုင်ပါတယ်..."

"ဒုတိယအချက်ကတော့ ဝိညာဉ်သွေးကြော အဆင့်မြှင့်တင်ပေးတာပါ... အဆင့် ၇ သွေးယန်သရဲဂျင်ဆင်း တစ်ပင်တည်းနဲ့ သာမန် ပါရမီရှင်တစ်ယောက်ကို ပြိုင်ဘက်ကင်း ပါရမီရှင်အဖြစ် မြှင့်တင်ပေးဖို့ လုံလောက်ပါတယ်..."

"တတိယအချက်ကတော့ သွေးသားကို ခိုင်မာစေပြီး သက်တမ်းကို ရှည်စေတာပါ... အဆင့် ၇ သွေးယန်သရဲဂျင်ဆင်းက လူတစ်ယောက်ရဲ့ သက်တမ်းကို အနှစ်ငါးဆယ်အထိ တိုးမြှင့်ပေးဖို့ လုံလောက်ပါတယ်..."

"နောက်ထပ် သက်တမ်း အနှစ်ငါးဆယ် ရလာပြီဆိုရင် နောက်တစ်ဆင့်ကို တက်လှမ်းဖို့ ပြင်ဆင်ချိန် ပိုရလာမှာပါ..."

"နောက်ဆုံး အကျိုးကျေးဇူးကတော့ အလှအပကို တိုးတက်စေတာပါပဲ... အဆင့် ၇ သွေးယန်သရဲဂျင်ဆင်းကို စားသုံးပြီးနောက်မှာ အကယ်၍ သင်က အမျိုးသမီးတစ်ယောက်ဆိုရင် သင့်ရဲ့ ရုပ်ရည်သွင်ပြင်က နှစ်ရာပေါင်းများစွာတိုင်အောင် ပြောင်းလဲသွားမှာ မဟုတ်ပါဘူး..."

"ဒီ အဆင့် ၇ သွေးယန်သရဲဂျင်ဆင်းဟာ မူလက လေလံတင်မယ့် ပစ္စည်းတွေထဲမှာ မပါဝင်ခဲ့ပါဘူး... ဒါပေမဲ့ မကြာသေးမီက ပြဿနာအနည်းငယ် ပေါ်ပေါက်ခဲ့တာကြောင့် ရှင်ယွင်လေလံရုံအနေနဲ့ အခု ဒါကို လေလံတင်ဖို့ ဆန္ဒရှိလာတာပါ..."

"ဒီပစ္စည်းရဲ့ ကနဦး ဈေးနှုန်းကတော့ အဆင့်နိမ့် ဝိညာဉ်ကျောက်တုံး ၂၀၀,၀၀၀ဖြစ်ပြီး တစ်ကြိမ် ဈေးခေါ်ရင် အဆင့်နိမ့် ဝိညာဉ်ကျောက်တုံး ၁၀,၀၀၀ ထက် မနည်း တိုးပေးရပါမယ်..."

ချူဟုန်းယန်သည် ဖြည်းညင်းစွာ မိတ်ဆက်လိုက်ပြီး သူမ စကားပြောပြီးသည်နှင့် လေလံရုံအတွင်းရှိ လူအများအပြားမှာ အသက်ရှူသံများ ပို၍ပို၍ မြန်ဆန်လာကြလေ၏။

"အဆင့်နိမ့် ဝိညာဉ်ကျောက်တုံး ၅၀၀,၀၀၀ ပေးမယ်..."

အမှတ်တစ် ခန်းဆောင်မှ အဘိုးအိုသည် တိုက်ရိုက် ပြောဆိုလိုက်ပြီး သူ၏ မျက်လုံးများတွင် ပူပြင်းသော အရိပ်အယောင်များ ပေါ်လွင်နေလေ၏။

ကျိုးယွမ်သည် အမှတ်တစ်ခန်းဆောင်မှ အဘိုးအိုကို မော့ကြည့်လိုက်လေသည်။ ထိုအမျိုးသားကို ပြင်းထန်သော သေခြင်းချီများ ဝန်းရံထားကြောင်း သူ ရှင်းလင်းစွာ ခံစားနိုင်ပေသည်။

သို့သော် ဤပုဂ္ဂိုလ်သည် ကောင်းကင်တံခါးအဆင့် နှောင်းပိုင်း၏ ဖိနှိပ်ထားသော အရှိန်အဝါကို ပိုင်ဆိုင်ထားရာ မည်သူကမျှ အကြည့်မလွှဲနိုင်အောင် ဖြစ်စေလေ၏။

ကျိုးယွမ်က နားလည်သွားလေသည်။ အဘိုးအိုတွင် သက်တမ်း များများစားစား ကျန်ရှိတော့မည်မဟုတ်ရာ ထို့ကြောင့်ပင် ဤမျှလောက် အလုအယက် ဖြစ်နေခြင်း ဖြစ်ပေမည်။

"အဆင့်နိမ့် ဝိညာဉ်ကျောက်တုံး ၆၀၀,၀၀၀ ပေးမယ်..."

အမှတ်ခြောက် ခန်းဆောင်မှ အေးစက်သော အသံတစ်ခု ထွက်ပေါ်လာပြီး အမျိုးသား သို့မဟုတ် အမျိုးသမီး ဖြစ်ကြောင်း ခွဲခြား၍မရနိုင်ချေ။

ဈေးနှုန်းသည် နှစ်ကြိမ် ဈေးခေါ်ရုံဖြင့် အဆင့်နိမ့် ဝိညာဉ်ကျောက်တုံး ၆၀၀,၀၀၀ သို့ ရောက်ရှိသွားရာ ယှဉ်ပြိုင်ရန် စဉ်းစားနေဆဲဖြစ်သူများကို ချက်ချင်း တိတ်ဆိတ်သွားစေလေ၏။

"ငါ တကယ့်ကို ပိုက်ဆံ ပြတ်နေတာပဲ..."

"အဆင့်နိမ့် ဝိညာဉ်ကျောက်တုံး ၈၀၀,၀၀၀..."

အမှတ်တစ်ခန်းဆောင်မှ အဘိုးအိုသည် ချက်ချင်းပင် အဆင့်နိမ့် ဝိညာဉ်ကျောက်တုံး ၂၀၀,၀၀၀ တိုးပေးလိုက်ရာ အနိုင်ရရှိရန် သူ၏ ဆုံးဖြတ်ချက်ကို ဖော်ပြနေလေ၏။

"အဆင့်နိမ့် ဝိညာဉ်ကျောက်တုံး ၉၀၀,၀၀၀..."

အမှတ်ခြောက် ခန်းဆောင်မှ လူသည်လည်း အရှုံးမပေးချင်ကြောင်း ထင်ရှားနေပြီး ဒုတိယအကြိမ် ဈေးထပ်ခေါ်လိုက်လေ၏။

အမှတ်တစ် ခန်းဆောင်မှ အဘိုးအိုသည် အမှတ်ခြောက် ခန်းဆောင်ရှိ လူကို ကြည့်ရင်း မျက်လုံးများကို အနည်းငယ် ကျဉ်းမြောင်းလိုက်ကာ "အဆင့်နိမ့် ဝိညာဉ်ကျောက်တုံး တစ်သန်း..." ဟု အေးစက်စွာ ကြေညာလိုက်လေသည်။

ထိုအခိုက်အတန့်တွင် လေလံရုံအတွင်းရှိ လူအများအပြား ဆွံ့အသွားကြလေသည်။ အဆင့်နိမ့် ဝိညာဉ်ကျောက်တုံးတစ်သန်း ဆိုသည်မှာ တောင်ကြီးတစ်လုံးလို ပုံနေမည်မှာ သေချာပေသည်။

ကျိုးယွမ်က ဝင်ရောက် ယှဉ်ပြိုင်ရန် ရည်ရွယ်ချက် မရှိခဲ့ချေ။ စနစ်ကပင် အဆင့် ၇ သွေးယန်သရဲဂျင်ဆင်းကို မလိုချင်မှတော့ သူက လှုပ်ရှားရန် ပျင်းရိနေလေပြီ။

"ငါတို့ စံနှုန်းတွေ မြင့်ဖို့ လိုတယ်... ဒါမှ စနစ်က ငါတို့ကို အထင်သေးမှာ မဟုတ်ဘူး..."

အမှတ်ခြောက် ခန်းဆောင်ရှိ လူသည် ဝိညာဉ်ကျောက်တုံး တစ်သန်း ဟူသော စကားကို ကြားချိန်၌ တိတ်ဆိတ်သွားလေ၏။ အကြောင်းမှာ သူတို့သည် ယနေ့ည ရည်ရွယ်ချက်တစ်ခုဖြင့် လာခဲ့ကြခြင်း ဖြစ်သည်။

အကယ်၍ ဝိညာဉ်ကျောက်တုံး တစ်သန်းကျော်သာ သုံးလိုက်ပါက အရာအားလုံး အောက်ခြေသို့ ဆင်းသွားတော့မည် ဖြစ်သည်။

ခဏမျှ စောင့်ဆိုင်းပြီးနောက် မည်သူမျှ ဈေးမခေါ်တော့သည်ကို ကြားသောအခါ အဆင့် ၇ သွေးယန်သရဲဂျင်ဆင်းကို အမှတ်တစ် ခန်းဆောင်မှ အဘိုးအိုထံ အဆင့်နိမ့် ဝိညာဉ်ကျောက်တုံး တစ်သန်းဖြင့် ရောင်းချလိုက်လေ၏။

အဘိုးအိုသည် စိတ်သက်သာရာ ရသွားပြီး သူ၏ သီးသန့် အခန်းဆီသို့ ပြန်လှည့်သွားလေသည်။

"ဒီအဘိုးအိုက ဘယ်သူလဲ... သူ့ဆီမှာ ဒီလောက် ကြောက်စရာကောင်းတဲ့ အရှိန်အဝါတွေ ရှိနေတာ..."

"ဒီပုဂ္ဂိုလ်ကိုတောင် မင်း မသိဘူးလား... သူက အပ်တစ်ထောင် နယ်မြေက နာမည်ကြီး ရွှမ်ယွီစီနီယာလေ... သူက လေလွင့်ကျင့်ကြံသူ တစ်ယောက် ဖြစ်ပေမဲ့ ထိပ်တန်း အင်အားစုတွေကတောင် သူ့ကို မစော်ကားချင်ကြဘူး..."

"ဪ သူဖြစ်နေတာကိုး... အမှတ် ၆ ခန်းဆောင်က လူ အရှုံးပေးသွားတာ အံ့သြစရာ မရှိပါဘူး... မဟုတ်ရင် သက်တမ်း သိပ်မကျန်တော့တဲ့ မိစ္ဆာအိုကြီးကို ဒေါသထွက်အောင် လုပ်မိရင် တကယ့်ကို ခေါင်းကိုက်ရလိမ့်မယ်..."

ကျိုးယွမ်သည် ပတ်ဝန်းကျင်မှ တီးတိုး ပြောဆိုသံများကို ကြားလိုက်ရပြီး ဘာတွေဖြစ်နေသလဲ ဆိုတာကို ချက်ချင်း သိလိုက်လေ၏။

ဆက်လက် ကျင်းပသော လေလံပွဲမှာလည်း အလွန် ရေပန်းစားနေဆဲဖြစ်ပြီး ပစ္စည်း အမျိုးမျိုးက လူအုပ်ကြီးထံမှ လေလံဆွဲမှုများကို လှုံ့ဆော်ပေးနေလေသည်။ သို့ရာတွင် ကျိုးယွမ် စိတ်ဝင်စားစရာ တစ်ခုမျှ မတွေ့ရချေ။

"ရောက်ရှိနေကြတဲ့ ဂုဏ်သရေရှိ ဧည့်သည်တော်တွေ အားလုံးက အခု ကျွန်မတို့ လေလံတင်မယ့် ပစ္စည်းကို ရင်းနှီးပြီးသား ဖြစ်မယ်လို့ ယုံကြည်ပါတယ်... တချို့ဆိုရင် ဒီပစ္စည်းအတွက် သီးသန့် လာခဲ့ကြတာတောင် ဖြစ်နိုင်ပါတယ်..."

ချူဟုန်းယန် စကားပြောပြီးသည်နှင့် အဘိုးအိုတစ်ဦး ရှေ့သို့ ထွက်လာပြီး သူ၏ လက်ထဲတွင် တရားထိုင်ဖျာ တစ်ချပ်ကို ကိုင်ဆောင်ထားလေ၏။

"ဂုဏ်သရေရှိ ဧည့်သည်တော်တို့... ဒါက ကောင်းကင်တံခါးအဆင့် အထွတ်အထိပ်က စီနီယာတစ်ယောက် ထားရှိသွားတဲ့ တရားထိုင်ဖျာပဲ ဖြစ်ပါတယ်..."

"ဒီဖျာပေါ်မှာ ကျင့်ကြံရင် နှလုံးသားမိစ္ဆာကို ဖယ်ရှားပေးနိုင်ပါတယ်... နောက်တစ်ဆင့်ကို တက်လှမ်းဖို့အတွက် နှစ်နဲ့ချီပြီး တံခါးပိတ် ကျင့်ကြံနေသူတွေအတွက် အထူး သင့်တော်ပါတယ်..."

"ဒီပစ္စည်းနဲ့ဆိုရင် နောက်တစ်ဆင့် တက်လှမ်းနိုင်ဖို့ အခွင့်အလမ်း အနည်းဆုံး ၁၀% တိုးလာနိုင်ပါတယ်..."

"ဒီပစ္စည်းကို ဝိညာဉ်ကျောက်တုံးနဲ့ လေလံမတင်ဘဲ ပစ္စည်းချင်း ဖလှယ်တဲ့ စနစ်နဲ့ လုပ်ဆောင်ဖို့ စီနီယာက ညွှန်ကြားထားပါတယ်... ကျွန်မဆီ စာတို ပေးပို့နိုင်ပြီး သင့်တော်ရင် ကျွန်မ လက်ခံပေးပါ့မယ်..."

ချူဟုန်းယန်၏ စကားကြောင့် တက်ရောက်လာသူများ အချင်းချင်း ဇဝေဇဝါဖြင့် ကြည့်လိုက်ကြပြီး အများအပြားမှာ ချက်ချင်း တိတ်ဆိတ်သွားကြလေ၏။

"ဟေး လေလံမှူးချူ... ကျွန်တော်တို့ကို အရိပ်အမြွက်လေးတော့ ပေးဖို့ လိုမယ်နော်... ဒီစီနီယာက ဘယ်လို ပစ္စည်းမျိုးတွေ လိုချင်တာလဲ... မဟုတ်ရင် ကျွန်တော်တို့က မျက်ကန်း လေလံဆွဲသလို ဖြစ်နေလိမ့်မယ်..."

ယခင်က တိတ်ဆိတ်နေခဲ့သော အမှတ် ၄ အထူးဧည့်ခန်းဆောင်မှ ပျင်းရိသော အမျိုးသားအသံတစ်ခု ရုတ်တရက် ထွက်ပေါ်လာလေ၏။

သူ၏ စကားသည် လူတိုင်း၏ တညီတညွတ်တည်း ထောက်ခံမှုကို ချက်ချင်း ရရှိသွားလေသည်။

ချူဟုန်းယန်က အနည်းငယ် ပြုံးလိုက်ပြီးနောက် ပြုံးလျက် ပြောဆိုလိုက်လေ၏။

"ဒီဂုဏ်သရေရှိ ဧည့်သည်တော် ပြောတာ မှန်ပါတယ်ရှင်..."

"ဒီစီနီယာက အမှောင်ဓာတ်နဲ့ သက်ဆိုင်တဲ့ အရာတစ်ခုခု လိုအပ်တယ်လို့ သတ်မှတ်ထားပါတယ်..."

"ဝိညာဉ်လက်နက်တွေပဲ ဖြစ်ဖြစ်၊ ကျင့်စဉ်တွေပဲ ဖြစ်ဖြစ်၊ တိုက်ခိုက်ရေး သိုင်းပညာတွေပဲ ဖြစ်ဖြစ်၊ အထူး အမှောင်ဓာတ် ကောင်းကင်နဲ့မြေကြီး ရတနာတွေပဲ ဖြစ်ဖြစ် အားလုံး လက်ခံပါတယ်ရှင်..."

"အားလုံးပဲ ယုံကြည်စိတ်ချစွာနဲ့ လေလံဆွဲနိုင်ပါတယ်... ရှင်ယွင်လေလံရုံ အနေနဲ့ ဧည့်သည်တော်တို့ စိတ်ဝိညာဉ်အာရုံကနေတစ်ဆင့် မျှဝေထားတဲ့ ပစ္စည်းတွေကို ဘယ်တော့မှ ထုတ်ဖော်ပြောဆိုမှာ မဟုတ်ပါဘူးရှင်..."

ချူဟုန်းယန်၏ စကားကို ကြားချိန်၌ လူတိုင်း တိတ်ဆိတ်သွားကြလေ၏။ ဤကဲ့သို့သော အမှောင်ဓာတ် ပစ္စည်းများမှာ အလွန် ရှားပါးလွန်းလှပြီး အကယ်၍ ရှိနေလျှင်ပင် မည်သူကမျှ လဲလှယ်ရန် ဆန္ဒရှိမည် မဟုတ်ချေ။

၎င်းမှာ ဖျာနှင့် မလဲလှယ်နိုင်ခြင်းကြောင့် မဟုတ်ဘဲ အမှောင်ဓာတ် သွင်ပြင်ရှိသော အရာများကို တန်ဖိုးထားသောကြောင့်သာ ဖြစ်ပေသည်။

အခန်းထဲတွင် တိတ်ဆိတ်သွားပြီး လူအများအပြားသည် မျက်လုံးများကိုပင် မှိတ်ထားကာ အရောင်းအဝယ် ပြီးစီးရန် စောင့်ဆိုင်းနေကြလေ၏။

အမှောင်ဓာတ်နှင့် ပတ်သက်သည့် မည်သည့်အရာကိုမဆို ကြားချိန်၌ ကျိုးယွမ်၏ စိတ်ထဲတွင် ချက်ချင်း လှုပ်ရှားသွားလေ၏။ အကယ်၍ ဤကဲ့သို့သော အရာမျိုး ရှိနေပါက သူလည်း လိုချင်ပေသည်။

သူ၏ အမှောင်ထုဓား အဆင့်တက်ရန်အတွက် အမှောင်ဓာတ် ပါဝင်သော ပစ္စည်းများစွာ ထပ်မံ လိုအပ်နေသေးသည်။

လေလံရုံအတွင်း မိနစ်အနည်းငယ်ခန့် တိတ်ဆိတ်သွားပြီးနောက် ချူဟုန်းယန်က ခေါင်းကို အကြိမ်ကြိမ် ခါရမ်းလိုက်ရာ အရောင်းအဝယ် မအောင်မြင်ကြောင်း ပြသနေလေ၏။

"ဂုဏ်သရေရှိ ဧည့်သည်တော်တို့... ဒီပစ္စည်းကို လောလောဆယ် ပြန်သိမ်းထားပါမယ်... လေလံပွဲ ပြီးတဲ့အခါ စိတ်ဝင်စားတဲ့သူ ရှိရင် ကျွန်မတို့ကို သီးသန့် ဆက်သွယ်နိုင်ပါတယ်ရှင်…”

ချူဟုန်းယန် စကားပြောပြီးနောက် အဘိုးအိုသည် တရားထိုင်ဖျာနှင့်အတူ ထွက်ခွာသွားလေ၏။

ချူဟုန်းယန်သည်လည်း စိတ်သက်သာရာ ရသွားလေ၏။ ဤကဲ့သို့သော ပစ္စည်းချင်း ဖလှယ်သည့် အစီအစဉ်မှာ အောင်မြင်ရန် အလားအလာ မရှိသဖြင့် သူမလည်း ဤပစ္စည်းကို လေလံမတင်ချင်ခဲ့ချေ။

အကယ်၍ သင်က ပစ္စည်းချင်း ဖလှယ်လိုပါက လူတိုင်း မိမိ မလိုအပ်သော ပစ္စည်းများကို ထုတ်ယူကာ သီးသန့် လဲလှယ်ကြသည့် သေးငယ်သော သီးသန့် လူစုလူဝေးမျိုးကို တက်ရောက်ခြင်းက အကောင်းဆုံး ဖြစ်ပေသည်။

သို့သော် ရှင်ယွင် လေလံရုံကလည်း ဤစီနီယာ၏ မျက်နှာကို ငဲ့ကွက်ရသဖြင့် သူ ပါဝင်ခွင့်ရရန် စီစဉ်ပေးခဲ့ရခြင်း ဖြစ်ပေသည်။

အရောင်းအဝယ် မအောင်မြင်ခြင်းမှာ သူတို့ လေလံရုံနှင့် မည်သို့မျှ သက်ဆိုင်ခြင်း မရှိတော့ချေ။