အခန်း (၁၅၅-၁၅၆)

အခန်း (၁၅၅) အသိဉာဏ် ပွင့်လင်းလာခြင်းနှင့် ဖြစ်ပျက်ခဲ့သမျှကို သိရှိခြင်း

ထိုညက တန်ယန်မြို့တစ်ခုလုံး ဖရိုဖရဲ ဖြစ်သွားပြီး ပြင်းထန်သော ပေါက်ကွဲသံများသည် မြို့တစ်လျှောက် တစ်နာရီနီးပါးခန့် ပဲ့တင်ထပ်နေပြီးမှ နောက်ဆုံးတွင် ရပ်တန့်သွားလေ၏။

ပြဿနာကို စတင်ဖန်တီးသူ ကျိုးယွမ်သည် သူ၏ နေအိမ်သို့ ပြန်ရောက်ပြီးနောက် စိတ်အေးလက်အေး ရှိနေပြီး ဤကိစ္စမှာ သူနှင့် မည်သို့မျှ သက်ဆိုင်ခြင်း မရှိသကဲ့သို့ ပြုမူနေလေ၏။

အရုဏ်တက်ချိန်တွင် ကျိုးယွမ်သည် မျက်လုံးများကို ဖွင့်လိုက်ရာ သူ၏ မျက်လုံးများတွင် ဝမ်းမြောက်သည့် အရိပ်အယောင်တစ်ခု ပေါ်လွင်နေလေသည်။

ကျိုးယွမ်၏ လက်ထဲတွင် ဓားငယ်လေး တစ်လက်သည် သူ၏ ပတ်လည်တွင် ကခုန်နေပြီး သူ၏ စိတ်ထဲတွင် ရွှင်လန်းသော အသံတစ်ခု ပေါ်လာလေ၏။ ဤသည်မှာ အသိဉာဏ် ပွင့်လင်းလာသော အာဃာတဓားပင် ဖြစ်သည်။

ဤအခိုက်အတန့်တွင် အာဃာတဓားသည် မွေးကင်းစ ကလေးငယ်လေး တစ်ယောက်ကဲ့သို့ ကျိုးယွမ်အား ၎င်း၏ ပျော်ရွှင်မှုအကြောင်း ပြောပြနေလေ၏။

အာဃာတဓား အသိဉာဏ် ရရှိလာသည်နှင့်အမျှ ၎င်းသည် ဓား ၉ လက်ထဲတွင် အစွမ်းအထက်ဆုံး ဓား ဖြစ်လာကြောင်းကို ကျိုးယွမ် ရှင်းလင်းစွာ ခံစားနိုင်ပေသည်။

ခဏမျှ ကစားပြီးနောက် အာဃာတဓားသည် ကျိုးယွမ်၏ ခန္ဓာကိုယ်ထဲသို့ ဝန်လေးစွာဖြင့် ပြန်ဝင်သွားလေ၏။

ကျိုးယွမ် မတ်တပ်ရပ်ကာ အကြောအနည်းငယ် ဆန့်လိုက်ပြီးနောက် တံခါးကိုဖွင့်ကာ မှော်အဆောင်ဆရာအသင်းဆီသို့ လမ်းလျှောက်သွားလေသည်။

ယနေ့ ကျိုးယွမ်သည် ဒုတိယအဆင့် သတင်းပို့ မှော်အဆောင်ကို ရေးဆွဲခဲ့သည်။ မနေ့ကထက် အနည်းငယ် ပို၍ ကျွမ်းကျင်လာသော်လည်း အရည်အသွေးမှာ မနေ့ကနှင့် သိပ်မကွာခြားလှချေ။

ကျိုးယွမ်သည် သူ၏ အထူးပြုလုပ်ထားသော အဆောင်ရေးဆွဲသည့် စုတ်တံကို အောက်ချလိုက်ချိန်မှာပင် အဘိုးအိုတစ်ဦးသည် သူနှင့် မလှမ်းမကမ်းတွင် ပေါ်လာလေ၏။

ကျိုးယွမ်က လန့်ဖျပ်သွားသော်လည်း ကံကောင်းထောက်မစွာဖြင့် သူသည် မနေ့ကလည်း အလားတူ အတွေ့အကြုံမျိုး ကြုံဖူးသဖြင့် အလျင်အမြန် တည်ငြိမ်သွားလေသည်။

"ကျိုးယွမ် ခေါင်းဆောင်ဟောင်းကို ဂါရဝပြုပါတယ်..."

ကျိုးယွမ် ဦးညွှတ်လိုက်ပြီးနောက် မျက်မှောင်ကြုတ်သွားလေ၏။ အကြောင်းမှာ အဆောင်ဆရာကြီး ကျုံးချန်အန်းသည် မနေ့ကထက် နှစ်အနည်းငယ် ပို၍ အိုမင်းသွားပုံရသောကြောင့် ဖြစ်သည်။

ကျုံးချန်အန်း အနည်းငယ် ပြုံးကာ ပြောဆိုလိုက်လေ၏။

"တရားဝင် အခမ်းအနားတွေ မလိုပါဘူး... မှော်အဆောင် လေ့လာတာကို တံခါးပိတ်ပြီး လုပ်လို့မရဘူး... သဘာဝတရားကို ပိုပြီး လေ့လာစောင့်ကြည့်ရမယ်..."

"အရာခပ်သိမ်းဟာ သဘာဝတရားမှာ ပေါ်လွင်နေတယ်... သဘာဝတရားဟာ တာအိုပဲ... တာအိုက သဘာဝတရားကို လိုက်နာတယ်..."

ကျုံးချန်အန်း စကားပြောပြီးနောက် လှည့်ကာ ဖြည်းညင်းစွာ ထွက်ခွာသွားလေ၏။ ကျိုးယွမ်တစ်ယောက်တည်း မျက်လုံးများကို မှိတ်ကာ စဉ်းစားခန်း ဝင်ရင်း ကျန်ရစ်ခဲ့လေသည်။

"တာအိုက သဘာဝတရားကို လိုက်နာတယ်ဆိုတော့ ဒါက တာအိုဒဿနနဲ့ ကိုက်ညီနေတာ မဟုတ်ဘူးလား..."

ကျိုးယွမ်သည် မိမိဘာသာ ရေရွတ်လိုက်ပြီးနောက် နှင်းနယ်မြေ၏ ကျောက်တောင်ကမ်းပါးများမှ သူ လုယူခဲ့သော အက္ခရာတန်းများကို ရုတ်တရက် သတိရသွားလေ၏။

ထိုအချိန်တွင် ကျိုးယွမ်သည် ရုတ်တရက် ဉာဏ်အလင်းတစ်ခု ရရှိသွားပြီး မျက်လုံးများကို ဖွင့်ကာ သူ့ဘေးရှိ အဆောင်ရေးဆွဲသည့် စုတ်တံကို အလျင်အမြန် ကောက်ယူလိုက်လေသည်။

ကျိုးယွမ်က အသက်ပြင်းပြင်း တစ်ချက် ရှူလိုက်လေ၏။ ထိုအခိုက်အတန့်တွင် သူသည် ကျောက်နံရံမှ ရရှိခဲ့သော ပထမဆုံး တာအိုတားမြစ်ခြင်း အက္ခရာကို စဉ်းစားလိုက်သည်။

အနည်းငယ်မျှ တုံ့ဆိုင်းမနေဘဲ ကျိုးယွမ်က သူ၏ စုတ်တံဖြင့် အဆောင်စက္ကူပေါ်တွင် စတင် ရေးဆွဲလေတော့သည်။

ကျိုးယွမ်၏ အထူးပြုလုပ်ထားသော စုတ်တံ လှုပ်ရှားသွားသည်နှင့်အမျှ တာအိုတားမြစ်ခြင်း အက္ခရာ၏ အကြမ်းဖျင်း ပုံစံသည် ဖြည်းညင်းစွာ ပေါ်လာလေ၏။

ကျိုးယွမ် နောက်ဆုံး စုတ်ချက်ကို အဆုံးသတ်တော့မည့် အချိန်တွင် ဧရာမ စွမ်းအားတစ်ခု မှော်အဆောင်မှ ရုတ်တရက် ပေါက်ကွဲထွက်လာလေသည်။ ကျိုးယွမ် မျှော်လင့်မထားခဲ့သဖြင့် နောက်သို့ ခြေလှမ်း ဆယ်လှမ်းကျော် ဆုတ်သွားခဲ့ရလေ၏။

ထိုအခိုက်အတန့်တွင် ကျိုးယွမ်သည် အဆောင်စက္ကူ တစ်ခုလုံး မီးလောင်ကျွမ်းသွားသည်ကို မြင်လိုက်ရလေသည်။ ၎င်းသည် ဤအထူး အက္ခရာကို လုံးလုံးလျားလျား မခံနိုင်သည့်အလား ဖြစ်နေပေသည်။

ကျိုးယွမ် တကယ်ကို အံ့အားသင့်သွားရလေ၏။ သူသည် မှော်အဆောင် မီးလောင်နေသော ဦးတည်ရာကို ကြက်သေသေဖြင့် စိုက်ကြည့်နေပြီး တစ်စုံတစ်ရာကို နားလည်သွားသကဲ့သို့ ခံစားလိုက်ရသည်။

ကျိုးယွမ်က မျက်လုံးများကို အလျင်အမြန် မှိတ်လိုက်ပြီး မိမိကိုယ်ကို တည်ငြိမ်အောင် ထားကာ စတင် တွေးတောလေတော့၏။ သို့သော် အချိန်အတော်ကြာ စဉ်းစားပြီးနောက် ထို အသိအမြင်ကို သူ မဖမ်းဆုပ်နိုင်သေးချေ။

ကျိုးယွမ် မနေနိုင်ဘဲ သက်ပြင်းချလိုက်ပြီး ဤအတွေးကို လောလောဆယ် ဘေးဖယ်ထားလိုက်ရလေ၏။

ကျိုးယွမ် သူ၏ နေအိမ်သို့ ပြန်ရောက်သောအခါ ဟွမ်တ၊ ဟွမ်ဆန်း နှင့် ဟွမ်ကျိုတို့ကို ထပ်မံ တွေ့လိုက်ရလေသည်။

သူတို့ သုံးဦးသည် သူတို့ဘာသာ လာခဲ့ကြခြင်း မဟုတ်ဘဲ ကျိုးယွမ်က သူတို့ကို စေလွှတ်ခဲ့ခြင်း ဖြစ်သည်။ မနေ့ညက ကျိုးယွမ် သူတို့နှင့် လမ်းခွဲချိန်တွင် မနေ့ညက အတိအကျ ဘာတွေ ဖြစ်ခဲ့သလဲ ဆိုတာကို သေချာစုံစမ်းရန် သူတို့သုံးဦးကို ပြောခဲ့လေ၏။

သူတို့ သုံးဦး ကျိုးယွမ်နောက်သို့ လိုက်ကာ အိမ်ထဲ ဝင်လာပြီးနောက် ဟွမ်တက လက်နှစ်ဖက်ယှက်၍ နှုတ်ဆက်လိုက်ပြီး ပြောဆိုလေ၏။

“စီနီယာ... မနေ့ညက ဘာတွေဖြစ်ခဲ့လဲဆိုတာ စုံစမ်းလို့ ရပါပြီ..."

ဤစကားကို ကြားချိန်၌ ကျိုးယွမ်၏ မျက်လုံးများ အရောင်လက်သွားပြီး ချက်ချင်း ပြောဆိုလိုက်လေ၏။

"အသေးစိတ် ပြောပြစမ်းပါ..."

ဤစကားကို ကြားချိန်၌ ဟွမ်တက ချက်ချင်း ခေါင်းညိတ်လိုက်လေသည်။

"စီနီယာ... မနေ့က လေလံပွဲရဲ့ နောက်ဆုံး ပစ္စည်းကတော့ ကောင်းကင်ဖြစ်စဉ်အဆင့် ကျွမ်းကျင်သူတစ်ယောက်ရဲ့ အရိုးစုပဲ ဖြစ်ပါတယ်..."

"စီနီယာ ထွက်သွားပြီး သိပ်မကြာခင်မှာပဲ အရိုးစုက အသက်ဝင်လာပြီး ရှင်ယွင် လေလံရုံက ကောင်းကင်တံခါးအဆင့် ကျွမ်းကျင်သူ နှစ်ယောက်ကို မျက်စိတစ်မှိတ်အတွင်း သတ်ပစ်ကာ သူတို့ရဲ့ အသက်စွမ်းအင်တွေကို ဝါးမျိုသွားခဲ့ပါတယ်..."

"အဲ့ဒီနောက် အရိုးတွေပေါ်မှာ အသားနဲ့ သွေးတွေ ပေါက်ဖွားလာပြီး အလောင်းကောင်တွေက လေလံရုံထဲမှာ ရူးသွပ်စွာ သတ်ဖြတ်ကြတာကြောင့် လေလံရုံ တစ်ခုလုံး မြေပြင်နဲ့ တစ်ပြေးတည်း ဖြစ်သွားခဲ့တယ်..."

"ဒီဖြစ်ရပ်က တန်ယန်မြို့က ထိပ်တန်း မိသားစုတွေ အားလုံးကို ချက်ချင်း သတိပေးလိုက်သလို ဖြစ်သွားပြီး သူတို့အားလုံးက သူ့ကို သတ်ဖို့ သူတို့ရဲ့ အစွမ်းအထက်ဆုံး စစ်သည်တွေကို စေလွှတ်ခဲ့ကြတယ်..."

"ဒါပေမဲ့ ဒီလူက ကြောက်စရာကောင်းလောက်အောင် အစွမ်းထက်တယ်... ကောင်းကင်တံခါးအဆင့် ကျွမ်းကျင်သူ တစ်ဒါဇင်ကျော် ဝိုင်းဝန်း တိုက်ခိုက်တာတောင်မှ သူက အဲ့ဒီနေရာကနေ ဖောက်ထွက်ပြီး သတ်ဖြတ်သွားနိုင်ခဲ့တယ်..."

"အမွှေးတိုင်တစ်တိုင် လောင်ကျွမ်းတဲ့ အချိန်အတွင်းမှာ သူက ကောင်းကင်တံခါးအဆင့် ကျွမ်းကျင်သူ အတော်များများကို သတ်ပစ်ခဲ့တယ်..."

"နောက်ပိုင်းမှာ အဆောင်ဆရာကြီး ရှီဖုက သတိထားမိသွားပြီး ကိုယ်တိုင် ဝင်ရောက် စွက်ဖက်ခဲ့ကာ အဆင့် ၇ မှော်အဆောင်ကို အသုံးပြုပြီး အဲ့ဒီလူကို ပြင်းပြင်းထန်ထန် ဒဏ်ရာရစေခဲ့တယ်..."

"အဲ့ဒီနောက် အဲ့ဒီလူ ထွက်ပြေးဖို့ ကြိုးစားခဲ့ပေမဲ့ ဝင်္ကပါဆရာကြီး ဖန်တီးထားတဲ့ ဝင်္ကပါထဲမှာ ပိတ်မိသွားခဲ့တယ်..."

"အဆောင်ဆရာကြီး ရှီဖုနဲ့ တခြားသူတွေ ရောက်လာပြီး သူတို့ရဲ့ ပူးပေါင်း ကြိုးပမ်းမှုနဲ့ ဝင်္ကပါကတစ်ဆင့် ဒီလူကို မျိုးဖြုတ်ပစ်နိုင်ခဲ့တယ်…”

ဟွမ်တ၏ ရှင်းပြချက်မှာ ရိုးရှင်းသော်လည်း အလွန် ရှင်းလင်းလှပြီး ကျိုးယွမ်အတွက် ရင်ခုန်စိတ်လှုပ်ရှားစရာ ဖြစ်နေလေ၏။

ကျိုးယွမ်က အတော်လေး အရှက်ရသွားလေ၏။ အကယ်၍ သူသာ အလောင်းကောင်ထံမှ အာဃာတအားလုံးကို မလုယူခဲ့ပါက ထိုအကြွင်းအကျန် ဝိညာဉ်လေးသည် နိုးထလာနိုင်မည် မဟုတ်ချေ။

ယနေ့ သူ့ကို မြင်တွေ့ချိန်တွင် အဆောင်ဆရာကြီးရှီဖု အလွန် ပင်ပန်းနေပုံရပြီး ဒဏ်ရာရထားပုံပေါ်သည်မှာ အံ့သြစရာ မရှိတော့ချေ။ ဒါက အကြောင်းရင်း ဖြစ်ပုံရပေသည်။

"ဒီလိုကြီးမားတဲ့ ဖြစ်ရပ်မျိုး ဖြစ်သွားတော့ ရှင်ယွင်လေလံရုံက ရှင်းလင်းချက် တစ်ခုခု ပေးသေးလား..."

ကျိုးယွမ် ဤအချက်ကို ချက်ချင်း စဉ်းစားမိပြီး အလျင်အမြန် မေးမြန်းလိုက်လေ၏။

ဤစကားကို ကြားချိန်၌ ဟွမ်ကျို ချက်ချင်း ပြန်ဖြေလိုက်လေသည်။

"စီနီယာ... ဒီအကြောင်းကို ကျွန်တော် စုံစမ်းထားတာပါ..."

"ရှင်ယွင်လေလံရုံက မနေ့ညက ဆုံးရှုံးမှု ကြီးကြီးမားမား ကြုံတွေ့ခဲ့ရတယ်... ကောင်းကင်တံခါးအဆင့် ကျွမ်းကျင်သူ သုံးယောက် သေဆုံးခဲ့ရုံသာမက ရှင်ယွင် လေလံရုံကို ဗဟိုပြုပြီး မိုင်အနည်းငယ် ပတ်လည် ဧရိယာတစ်ခုလုံး မြေပြင်နဲ့ တစ်ပြေးတည်း ဖြစ်သွားခဲ့တယ်..."

"ရှင်ယွင် လေလံရုံက ပတ်ဝန်းကျင် ဧရိယာကို အမြန်ဆုံး ပြန်လည် တည်ဆောက်ပေးမယ်လို့ ကတိပြုထားပြီး ကုန်ကျစရိတ် အားလုံးကို ရှင်ယွင်လေလံရုံက ကျခံမှာပါ..."

"တစ်ချိန်တည်းမှာပဲ မနေ့ညက သေဆုံးသွားတဲ့သူတွေဟာ ရှင်ယွင် လေလံရုံကနေ ကြီးမားတဲ့ လျော်ကြေးတွေ ရရှိမှာပါ..."

"ဒါပေမဲ့ လျော်ကြေးငွေ ပမာဏ အတိအကျကိုတော့ သဘောတူညီမှု မရသေးပါဘူး... ဘာပဲဖြစ်ဖြစ် ဒီတစ်ခါ လူတွေအများကြီး သေဆုံးခဲ့ရတာကိုး..."

"ကံကောင်းထောက်မစွာနဲ့ ရှင်ယွင်လေလံရုံက ပိုပြီး အထင်ကြီးလောက်စရာ နောက်ခံရှိတဲ့ ကြီးမားပြီး အစွမ်းထက်တဲ့ မိသားစုတစ်ခု ဖြစ်နေတာပဲ... တန်ယန်မြို့က နာမည်ကြီး မိသားစုတွေ အားလုံးက သူတို့ကို မျက်နှာသာ ပေးကြတယ်..."

"ဒါပေမဲ့ ဒီလို ဖြစ်နေပေမဲ့လည်း တန်ယန်မြို့က ကျင့်ကြံသူတွေရဲ့ ရှင်ယွင်လေလံရုံအပေါ် ယုံကြည်မှုကလည်း ထိုးကျသွားခဲ့တယ်..."

"ကာလတိုအတွင်းမှာတော့ ရှင်ယွင်လေလံရုံကို သွားဖို့ ဆန္ဒရှိတဲ့သူ အလွန် နည်းပါးပါလိမ့်မယ်..."

ဤစကားကို ကြားချိန်၌ ကျိုးယွမ် သဘောတူညီစွာ ခေါင်းညိတ်လိုက်လေ၏။ ဤအချက်ကို သူ လုံးလုံးလျားလျား နားလည်နိုင်ပေသည်။ သို့ရာတွင် သူသည် ဤပြဿနာကို ဖန်တီးခဲ့သူဖြစ်ကြောင်း တွေးမိသောအခါ ကျိုးယွမ် မနေနိုင်ဘဲ သူ၏ နှာခေါင်းကို ပွတ်သပ်လိုက်မိပြီး အတော်လေး အရှက်ရသွားလေ၏။

"ဒီသတင်းတွေအပြင် တခြား သတင်းတွေကော ရှိသေးလား..."

ကျိုးယွမ်က ဤကိစ္စကို ဆက်လက် စုံစမ်းရန် အစီအစဉ် မရှိတော့ချေ။ ဤနေရာတွင်သာ အဆုံးသတ်လိုက်မည်။

"စီနီယာ... တခြားကိစ္စတစ်ခုလည်း ကျွန်တော် စုံစမ်းသိရှိခဲ့ပါတယ်... အပ်တစ်ထောင် နယ်မြေမှာရှိတဲ့ ထိပ်တန်း ကျင့်ကြံခြင်း ဂိုဏ်းသုံးခုထဲက တစ်ခုဖြစ်တဲ့ နှလုံးသားချိတ်ပိတ်ခြင်းဂိုဏ်းက လူတစ်ယောက် တန်ယန်မြို့ကို လာနေပါတယ်..."

"သူတို့က အဆောင်ဆရာကြီး ရှီဖုကို လျှို့ဝှက်နယ်မြေတစ်ခု အတူတကွ စူးစမ်းလေ့လာဖို့ ဖိတ်ခေါ်နေတယ်လို့ ဆိုပါတယ်..."

ဟွမ်ဆန်းက ပြုံးလိုက်ပြီး ကျိုးယွမ်ကို လက်နှစ်ဖက်ယှက်၍ ဂါရဝပြုလိုက်လေ၏။

နှလုံးသားချိတ်ပိတ်ခြင်းဂိုဏ်းဟူသော အမည်ကို ကြားချိန်၌ ကျိုးယွမ်၏ မျက်လုံးများ အနည်းငယ် ကျဉ်းမြောင်းသွားလေ၏။

နှလုံးသားချိတ်ပိတ်ခြင်းဂိုဏ်းသည် အဆင့် ၇ ကျင့်ကြံခြင်း ဂိုဏ်းတစ်ခုဖြစ်ပြီး အပ်တစ်ထောင် နယ်မြေရှိ ထိပ်တန်း အင်အားစု သုံးခုအနက်မှ တစ်ခုဖြစ်ကာ ကောင်းကင်ဖြစ်စဉ်အဆင့် ကျွမ်းကျင်သူ တစ်ဦးက အုပ်ချုပ်လေသည်။

မနေ့ညက ကောင်းကင်ဖြစ်စဉ်အဆင့် အရိုးစုသည် တန်ယန်မြို့တွင် ဖရိုဖရဲ ဖြစ်စေခဲ့သည်။

အစစ်အမှန် ကောင်းကင်ဖြစ်စဉ်အဆင့်သည် ဤသည်ထက် များစွာ ပို၍ ကြောက်မက်ဖွယ် ကောင်းလှပေသည်။

အခန်း (၁၅၆) လျှို့ဝှက်နယ်မြေအတွက် နေရာတစ်နေရာ ရရှိခြင်းနှင့် ယဲ့ဖိန်အကြောင်း ပထမဆုံးအကြိမ် ကြားသိရခြင်း

နှလုံးသားချိတ်ပိတ်ခြင်းဂိုဏ်းက လျှို့ဝှက်နယ်မြေကို ရှာဖွေတွေ့ရှိခဲ့ပြီး အဆောင်ဆရာကြီး ရှီဖုကို အတူတကွ စူးစမ်းလေ့လာရန် တကယ်တမ်း ဖိတ်ခေါ်နေခြင်း ဖြစ်သည်။ ၎င်းမှာ အနည်းငယ် မဖြစ်နိုင်သကဲ့သို့ ထင်ရပေသည်။

"ဒီကိစ္စကို ကျွန်တော့်အတွက် သေချာ စုံစမ်းပေးပါ... ပြီးသွားရင် မင်းတို့ကို သေချာပေါက် ကောင်းကောင်း ဆုချပါ့မယ်..."

ကျိုးယွမ်က ခဏမျှ စဉ်းစားပြီးနောက် ပြောဆိုလိုက်လေ၏။

ဤစကားကို ကြားချိန်၌ ဟွမ်တနှင့် အခြားနှစ်ဦး အလျင်အမြန် ခေါင်းညိတ်လိုက်ကြပြီး ကျိုးယွမ်၌ ထပ်မံ ညွှန်ကြားစရာ မရှိတော့သည်ကို မြင်သောအခါ သူတို့ ထွက်ခွာသွားကြလေ၏။

ကျိုးယွမ်သည် လျှို့ဝှက်နယ်မြေကို စူးစမ်းလေ့လာရန် သဘာဝကျကျ အလွန်အမင်း စိတ်ဝင်စားနေလေသည်။ သူ နှင်းနယ်မြေတွင် ရှိနေစဉ်က ချင်ယောင် ဖန်တီးထားသော လျှို့ဝှက်နယ်မြေသို့ တစ်ကြိမ် ရောက်ရှိခဲ့ဖူးလေ၏။

ယနေ့ သူ၏ ဘေးတွင်ရှိသော ရွှေရောင်ရေနဂါးပျံမှာလည်း ထိုလျှို့ဝှက်နယ်မြေမှ ရရှိခဲ့ခြင်း ဖြစ်သည်။

ကျိုးယွမ်က ခဏမျှသာ စဉ်းစားလိုက်ပြီးနောက် ရယ်မောလိုက်ကာ တာအိုအနှစ်သာရမှော်အဆောင်ကျမ်းကို ထုတ်ယူပြီး အလေးအနက် လေ့လာလေတော့၏။

ဤတာအိုအနှစ်သာရမှော်အဆောင်ကျမ်း စာအုပ်သည် တကယ့်ကို ထူးခြားပြောင်မြောက်လှပေသည်။ ကျိုးယွမ် ဖတ်လေလေ ပို၍ နက်ရှိုင်းပြီး အသိအမြင်များ ရရှိလေလေ ဖြစ်သည်။ ဤနေရာတွင် မိတ်ဆက်ထားသော အရာအများစုမှာ အလွန် အခြေခံကျသော်လည်း ဖတ်လေလေ ပို၍ နက်ရှိုင်းကျယ်ပြန့်လေလေ ဖြစ်သည်ဟု ထင်ရပေသည်။

တာအို၏ အနှစ်သာရမှာ ရိုးရှင်းခြင်း ဖြစ်သည်။ ရှုပ်ထွေးသော အလှဆင်မှုများ မလိုအပ်ချေ။

ကျိုးယွမ် နှစ်နာရီခန့် လေ့လာကြည့်ရှုပြီးနောက် စတင် ကျင့်ကြံလေတော့၏။ ဝိညာဉ်ချိတ်ပိတ်ခြင်း လျှို့ဝှက်ကျင့်စဉ် နှင့် ကြယ်နှင့်လကျဆင်းခြင်းအပြင် သူသည် ဓားကွက်တစ်ခုကိုလည်း လေ့ကျင့်နေလေသည်။ ယင်နှင့်ယန်ကိုခွဲဖြာသည့် ဓားတချက်ဓားသိုင်းပင် ဖြစ်သည်။

ဤဓားသိုင်းကို မည်သူ့ထံမှ ရရှိခဲ့သည်ကို ကျိုးယွမ် မေ့သွားသော်လည်း ၎င်းမှာ အလွန်အမင်း အစွမ်းထက်လှပေသည်။

အချိန်အနည်းငယ်အကြာက တန်ယန်မြို့သို့ အလာလမ်းတွင် သူသည် တိုက်ခိုက်ရေး သိုင်းပညာ အမျိုးမျိုးကို စုစည်းခဲ့ပြီး သင်ယူရန် အနည်းငယ်ကို ရွေးချယ်ခဲ့လေ၏။

ယင်နှင့်ယန်ကိုခွဲဖြာသည့် ဓားတချက်ဓားသိုင်းကို ထိုအချိန်က ရှာဖွေတွေ့ရှိခဲ့ခြင်း ဖြစ်သည်။

နောက်တစ်နေ့တွင် ကျိုးယွမ် မှော်အဆောင်ဆရာအသင်းသို့ ရောက်ရှိချိန်၌ ချင်ချန် ပြုံးလျက် ရပ်နေသည်ကို မြင်လိုက်ရသဖြင့် သူ အံ့အားသင့်သွားရလေ၏။

ကျိုးယွမ် အံ့အားသင့်သွားပြီးနောက် အလျင်အမြန် ရှေ့သို့ တက်သွားကာ ရိုသေစွာ နှုတ်ဆက်လိုက်လေ၏။

"ဆရာ့ကို ဂါရဝပြုပါတယ်..."

ချင်ချန်က အနည်းငယ် ပြုံးကာ ပြောဆိုလိုက်လေ၏။

"ဒီနေ့ နှလုံးသားချိတ်ပိတ်ခြင်းဂိုဏ်းက လူတစ်ယောက်လာမယ်... ခေါင်းဆောင်ဟောင်းက ငါ့ကို သူတို့နဲ့ လိုက်ပါဖို့ တောင်းဆိုခဲ့လို့ ငါ့ရဲ့ တံခါးပိတ် ကျင့်ကြံမှုကို ရွှေ့ဆိုင်းလိုက်တယ်..."

ကျိုးယွမ် မမေးမြန်းမီမှာပင် ချင်ချန်က ကိစ္စ၏ အကြောင်းရင်းကို အကျဉ်းချုပ် ရှင်းပြလိုက်ရာ ကျိုးယွမ် ရုတ်တရက် သဘောပေါက်သွားလေ၏။

"ဆရာ... မနေ့က လူတချို့ ပြောနေကြတာ ကြားခဲ့တယ်... နှလုံးသားချိတ်ပိတ်ခြင်းဂိုဏ်းက လျှို့ဝှက်နယ်မြေ တစ်ခုကို ရှာဖွေတွေ့ရှိခဲ့တယ် ဆိုတာ..."

ကျိုးယွမ် လျှို့ဝှက်နယ်မြေ အကြောင်း ပြောချိန်တွင် ခေတ္တ ရပ်တန့်သွားပြီး ချင်ချန်ကို လှည့်ကြည့်လိုက်လေ၏။

ချင်ချန်က အနည်းငယ် ပြုံးလိုက်ပြီးနောက် ပြောဆိုလေ၏။

"မှန်တယ်... အဲ့ဒီလျှို့ဝှက်နယ်မြေက အဆင့် ၆ အဆောင်ဆရာကြီး တစ်ယောက်ရဲ့ အင်မော်တယ်လိုဏ်ဂူ ဖြစ်သင့်တယ်..."

"ဒါပေမဲ့ ဒီပုဂ္ဂိုလ်က ဝင်္ကပါတွေ အမြောက်အမြား တပ်ဆင်ထားပြီး ဝင်ပေါက်မှာ အသက် ၁၀၀ အောက် လူတွေကိုပဲ ဝင်ခွင့်ပြုတဲ့ အထူး ထောက်လှမ်းရေး ဝင်္ကပါတစ်ခု ရှိတယ်..."

"နှလုံးသားချိတ်ပိတ်ခြင်းဂိုဏ်းက မှော်အဆောင် လမ်းစဉ်မှာ မကျွမ်းကျင်ဘူး... ဒါကြောင့် သူတို့က မှော်အဆောင်ဆရာအသင်းကို အတူတကွ ဆွေးနွေးဖို့ ဖိတ်ခေါ်ဖို့ ဆုံးဖြတ်ခဲ့ကြတာပဲ..."

"အကယ်၍ မင်း စိတ်ဝင်စားတယ်ဆိုရင် နေရာတစ်နေရာရအောင် ငါ ကူညီပေးနိုင်တယ်..."

ချင်ချန်သည် ကျိုးယွမ်၏ ကျင့်ကြံမှုအဆင့်မှာ အခြေတည်စိတ်ဝိညာဉ် အထွတ်အထိပ်အဆင့်ဖြစ်ကြောင်း ကောင်းစွာ သိရှိထားပေသည်။ အကယ်၍ သူ လျှို့ဝှက်နယ်မြေထဲသို့ ဝင်ရောက်မည်ဆိုပါက သူ၏ လုံခြုံရေးအတွက် စိုးရိမ်စရာ မလိုအပ်ချေ။

ဤစကားကို ကြားချိန်၌ ကျိုးယွမ် အကြိမ်ကြိမ် ခေါင်းညိတ်လိုက်လေ၏။ သူ တကယ်တမ်း စိတ်ဝင်စားနေပေသည်။

ကျိုးယွမ်နှင့်အတူ အဆင့် ၆ ဝင်္ကပါဆရာကြီး ချင်ယောင် ပါရှိသဖြင့် သူသည် ဝင်္ကပါများနှင့် ပတ်သက်၍ လုံးလုံးလျားလျား စိုးရိမ်စရာ မလိုချေ။

ထို့ကြောင့် အကယ်၍ သူ လျှို့ဝှက်နယ်မြေထဲသို့ ဝင်ရောက်နိုင်ပါက သူ သေချာပေါက် ထိပ်ဆုံးမှ ထွက်ပေါ်လာမည်ဟု သူ ယုံကြည်ချက်ရှိနေလေ၏။

ထိုနေ့မွန်းလွဲပိုင်းတွင် ချင်ချန်သည် ကျိုးယွမ်ထံသို့ သတင်းကောင်း ယူဆောင်လာခဲ့သည်။ မှော်အဆောင်ဆရာအသင်းတွင် နေရာ ငါးနေရာ ရရှိနိုင်ပြီး သူက ၎င်းတို့အထဲမှ တစ်ဦး ဖြစ်ပေသည်။

သို့သော် ဤလျှို့ဝှက်နယ်မြေတွင် အခြား ဝင်ပေါက်များ ရှိနိုင်ကြောင်း နှလုံးသားချိတ်ပိတ်ခြင်းဂိုဏ်းမှ လူများက ပြောခဲ့သည်ဟု ချင်ချန်က သူ့ကို ပြောပြခဲ့လေ၏။ ထို့ကြောင့် လျှို့ဝှက်နယ်မြေအတွင်းရှိ လူအရေအတွက်မှာ နှလုံးသားချိတ်ပိတ်ခြင်းဂိုဏ်းနှင့် မှော်အဆောင်ဆရာအသင်းမှ လူများသာ ကန့်သတ်ထားမည် မဟုတ်ချေ။

ထွက်ခွာမည့် အချိန်နှင့် ပတ်သက်၍ ချင်ချန် ကိုယ်တိုင် မနက်ဖြန် နံနက်စောစောတွင် အဖွဲ့ကို ဦးဆောင်မည် ဖြစ်သည်။

ကျိုးယွမ် ငှားရမ်းထားသောအခန်းသို့ ပြန်ရောက်သောအခါ တံခါးဝတွင် စောင့်ဆိုင်းနေသော ဟွမ်တနှင့် အခြားနှစ်ဦးကို တကယ်တမ်း တွေ့လိုက်ရလေ၏။

ကျိုးယွမ် သူတို့ သုံးဦးကို တစ်ချက် ကြည့်လိုက်ပြီး အနည်းငယ် အံ့အားသင့်သွားလေ၏။ ဟွမ်တ၏ ကျင့်ကြံမှုမှာ အခြေခံတည်ဆောက်ခြင်းအဆင့် နှောင်းပိုင်းသို့ ရောက်ရှိနေပြီး ဟွမ်ဆန်း နှင့် ဟွမ်ကျိုတို့မှာ အခြေခံတည်ဆောက်ခြင်း အလယ်အလတ်အဆင့်တွင် အသီးသီး ရှိနေကြလေသည်။

ကျိုးယွမ်က သူတို့ သုံးဦးနှင့် ပထမဆုံး တွေ့ဆုံချိန်ကနှင့် နှိုင်းယှဉ်ပါက သုံးဦးစလုံးမှာ အဆင့်ငယ်တစ်ခုစီ တိုးတက်လာခဲ့ကြလေပြီ။

သတင်းအချက်အလက် စုဆောင်းရန် ဤကဲ့သို့သော လူသုံးဦး ရှိနေခြင်းက အတော်လေး ကောင်းမွန်ကြောင်း ကျိုးယွမ် တွေ့ရှိခဲ့လေသည်။ အနည်းဆုံးတော့ သူ့အတွက် ပြဿနာအများအပြားကို သက်သာစေပေသည်။

"စီနီယာ... တကယ်ကို စိတ်ဝင်စားစရာကောင်းတဲ့ ကိစ္စတစ်ခု ကြားခဲ့ရတယ်..."

ဟွမ်တက ပြုံးလျက် စတင် ပြောဆိုလိုက်ပြီး သူ၏ မျက်နှာပေါ်တွင် ကောက်ကျစ်သော အပြုံးတစ်ခု ရှိနေလေ၏။

ကျိုးယွမ်က အံ့အားသင့်သွားပြီးနောက် ပြောဆိုလိုက်လေ၏။

"အိုး... ပြောပြစမ်းပါဦး..."

"တာဖုန်းကုန်သွယ်ရေးအဖွဲ့ ခေါင်းဆောင်ရဲ့ အငယ်ဆုံး သမီးက လင်ရှောင်ခန်းမက သားတော်နဲ့ စေ့စပ်ထားတာကို ဖျက်သိမ်းလိုက်တယ်... ဘာလို့လဲဆိုတော့ လင်ရှောင်ခန်းမက သားတော်က အဲ့ဒီမိန်းကလေးဟာ သူမရဲ့ စီနီယာအစ်ကိုနဲ့ ဖောက်ပြန်နေတယ်ဆိုတာကို တွေ့သွားလို့တဲ့..."

"လင်ရှောင်ခန်းမက သားတော်က ဒေါသတကြီးနဲ့ ရန်ဖြစ်ခဲ့ပေမဲ့ ရလဒ်ကတော့ တော်တော်လေး မျှော်လင့်မထားစရာ ဖြစ်ခဲ့တယ်... လင်ရှောင်ခန်းမက သားတော်ဟာ တာဖုန်းကုန်သွယ်ရေးအဖွဲ့က အဲ့ဒီနာမည်မသိ တပည့်ရဲ့ အနိုင်ယူတာကို ခံလိုက်ရတယ်..."

"ဒီကိစ္စက အခု အပ်တစ်ထောင် နယ်မြေမှာ တစ်မြို့လုံး ပြောစရာဖြစ်နေပြီး တာဖုန်းကုန်သွယ်ရေးအဖွဲ့နဲ့ လင်ရှောင်ခန်းမ ကြားက လေထုက အလွန်အမင်း တင်းမာနေကာ စစ်ပွဲဆီ ဦးတည်သွားနိုင်တဲ့ အနေအထား ရှိနေတယ်..."

ဤစကားကို ကြားချိန်၌ ကျိုးယွမ် အံ့အားသင့်သွားရလေသည်။ ဤမျှလောက် ပြဇာတ်ဆန်သော ဇာတ်လမ်းမျိုး ရှိလိမ့်မည်ဟု ဘယ်သောအခါကမျှ မမျှော်လင့်ထားခဲ့ချေ။

ရုတ်တရက် ကျိုးယွမ် တစ်စုံတစ်ရာကို သတိရသွားပုံရပြီး သူ၏ မျက်မှောင် အနည်းငယ် ကြုတ်သွားလေ၏။

ကျိုးယွမ်၏ အနည်းငယ် မျက်မှောင်ကြုတ်သွားသည်ကို မြင်သောအခါ ဟွမ်တ၊ ဟွမ်ဆန်း နှင့် ဟွမ်ကျို တို့သည် ဘေးတွင် ရပ်နေကြပြီး စကားမပြောရဲကြချေ။

"တာဖုန်းကုန်သွယ်ရေးအဖွဲ့ ခေါင်းဆောင်ရဲ့ သမီးနဲ့ အတူရှိနေတဲ့ အဲ့ဒီလူက ဘယ်သူလဲဆိုတာ မင်းတို့ သိလား..."

ကျိုးယွမ်က တစ်စုံတစ်ရာကို တွေးမိလိုက်လေ၏။

ကံကြမ္မာသားတော်။

ကံကြမ္မာ၏ သားတော်များသည် မိသားစုငယ်လေးများမှ ကလေးများအဖြစ် အမြဲတမ်း ပေါ်လာတတ်ပြီး ဇာစ်မြစ် နိမ့်ကျသော်လည်း ဧရာမကံကြမ္မာကို ပိုင်ဆိုင်ထားကြလေသည်။ ထို့နောက် သူသည် ဆက်တိုက်ဆိုသလို အောင်မြင်မှုများ ရရှိလာပြီး အခြားသူများ၏ မျက်နှာကို အဆက်မပြတ် ရိုက်ချကာ အမျိုးသမီး ဇာတ်ဆောင် အမျိုးမျိုး၊ အထူးသဖြင့် ဂိုဏ်းချုပ်၏ တပည့်များနှင့် ကလေးများ၏ ချစ်ခင်မြတ်နိုးမှုကို ရရှိတတ်လေ၏။

သူ၏ ပြိုင်ဘက်များမှာ များသောအားဖြင့် အစွမ်းထက်ပြီး နာမည်ကြီးသော လူများဖြစ်ကြကာ ကံကြမ္မာသားတော် ကြီးထွားလာရန်အတွက် ခြေနင်းတုံးများ ဖြစ်လာကြလေသည်။

ကျိုးယွမ် သူ၏ ခရီးစဉ်တစ်လျှောက်လုံး ဤကဲ့သို့သော လူမျိုးနှင့် ဘယ်သောအခါကမျှ မကြုံတွေ့ခဲ့ဖူးသဖြင့် ခေတ္တမျှ မှင်တက်သွားလေ၏။

ကျိုးယွမ်၏ စကားကို ကြားချိန်၌ ဟွမ်တနှင့် အခြားနှစ်ဦး အံ့အားသင့်သွားကြပြီး သူတို့၏ မျက်နှာများပေါ်တွင် အရှက်ရသည့် အမူအရာများ ပေါ်လာလေသည်။

"စီနီယာ... ကျွန်တော်တို့ သိပ်များများစားစား မစုံစမ်းနိုင်ခဲ့ပါဘူး... အဲ့ဒီလူရဲ့ နာမည်က ယဲ့ဖိန်ဖြစ်ပြီး ဆုတ်ယုတ်နေတဲ့ မိသားစုက လာတယ်လို့ပဲ သိရပါတယ်..."

"အဲ့ဒီမိသားစုရဲ့ အမြင့်ဆုံး ကျင့်ကြံမှုအဆင့်က အခြေခံတည်ဆောက်ခြင်းအဆင့် အထွတ်အထိပ်ပဲ ရှိတယ်လို့ ဆိုပါတယ်..."

ဟွမ်ဆန်းက အလျင်အမြန် ပြောဆိုလိုက်လေ၏။ မည်သို့ပင်ဆိုစေ သူက ဤသတင်းအချက်အလက်ကို ရရှိခဲ့သူ ဖြစ်ပေသည်။

ဤစကားကို ကြားချိန်၌ ကျိုးယွမ်၏ ကျောရိုးတစ်လျှောက် စိမ့်တက်သွားသည်ကို ခံစားလိုက်ရလေသည်။

ယဲ့မိသားစုသည် ရှေးခေတ်ကတည်းက ပြိုင်ဘက်ကင်းသော တိုက်ခိုက်ရေး စွမ်းရည်ဖြင့် အစွမ်းထက်သော လူအများအပြားကို မွေးထုတ်ပေးခဲ့လေသည်။ ပြီးတော့ နာမည်က ပိုပြီး ရိုးရှင်းလေလေ ပိုပြီး ကြောက်စရာကောင်းလေလေပဲ။

"ကျွန်တော် မနက်ဖြန် တန်ယန်မြို့ကနေ ရက်အနည်းငယ် ထွက်ခွာမယ်... ဒီကာလအတွင်းမှာ ယဲ့ဖိန်အကြောင်း သတင်းအချက်အလက်တွေကို အကောင်းဆုံး စုဆောင်းပေးပါ... ပိုအသေးစိတ်လေ ပိုကောင်းလေပဲ..."

ကျိုးယွမ်က စကားပြောပြီးနောက် ပထမအဆင့် ဆေးလုံးတစ်ရာ ပါဝင်သော ကြွေပုလင်းတစ်လုံးကို ပစ်ပေးလိုက်လေ၏။

ပထမအဆင့် ဆေးလုံးများ အလွန်များပြားလှသဖြင့် ၎င်းတို့မှာ တောင်ကြီးတစ်လုံးလို ပုံနေလုနီးပါး ဖြစ်နေပေသည်။ အဆင့် ၁ ဆေးလုံး တစ်လုံးမှာ အပြင်ဘက်တွင် အဆင့်နိမ့် ဝိညာဉ်ကျောက်တုံး ငါးတုံး သို့မဟုတ် ခြောက်တုံးခန့်သာ ရရှိမည်ဖြစ်ပြီး ကျိုးယွမ်က ထိုအသေးအဖွဲ ငွေကြေးများကို မလိုအပ်သဖြင့် ၎င်းကို ရောင်းချရန် ပျင်းရိနေလေ၏။

သို့သော် ၎င်းသည် သူတို့ သုံးဦးအတွက် ဆုလာဘ်အဖြစ် ပြီးပြည့်စုံပေလိမ့်မည်။

ဤစကားကို ကြားချိန်၌ ဟွမ်တနှင့် အခြားနှစ်ဦး သဘောတူညီစွာ အလျင်အမြန် လက်နှစ်ဖက်ယှက်လိုက်ကြပြီးနောက် ဦးညွှတ်ကာ ထွက်ခွာသွားကြလေ၏။

သူတို့ သုံးဦး ကျိုးယွမ်၏ နေအိမ်မှ ထွက်လာပြီးနောက် အဆင့် ၁ ဆေးလုံး တစ်ရာကို မြင်သောအခါ သူတို့၏ မျက်လုံးများ ပျော်ရွှင်မှုကြောင့် အရောင်လက်သွားကြလေသည်။

ဒီစီနီယာအတွက် အလုပ်လုပ်ပေးရတာ တကယ်ကို ပျော်စရာကောင်းတယ်... သူက ရက်ရက်ရောရော ဆုချဖို့ ဝန်မလေးဘူးပဲ။

ဤအခိုက်အတန့်တွင် သူတို့ သုံးဦးစလုံး ပြင်းထန်သော စိတ်အားထက်သန်မှု လှိုင်းတံပိုးကို ခံစားလိုက်ရလေ၏။

အဆင့် ၁ ဆေးလုံးသည် အဆင့် ၂ ဆေးလုံးလောက် မကောင်းမွန်သော်လည်း ဤမျှလောက် များပြားသော ပမာဏသည် သူတို့သုံးဦး နောက်တစ်ဆင့် တက်လှမ်းရန်အတွက် လုံလောက်ပေသည်။

အနည်းငယ်မျှ တုံ့ဆိုင်းမနေဘဲ ကျိုးယွမ်သည် သူ၏ နေ့စဉ် ကျင့်ကြံမှုကို ဆက်လက် ပြုလုပ်လေ၏။ ကိုယ်ပိုင်စွမ်းအားသည် အရေးအကြီးဆုံးဖြစ်ကြောင်း သူ ယုံကြည်ထားပေသည်။

တာအိုအနှစ်သာရမှော်အဆောင်ကျမ်းကို ဖတ်ရှုနေစဉ်အတွင်း သူ၏ တာအိုတားမြစ်ခြင်း ဝိညာဉ်သွေးကြောသည် အထူးတက်ကြွလာပြီး ဝိညာဉ်သွေးကြော တစ်ခုလုံး တောက်ပလာကြောင်း ကျိုးယွမ် တွေ့ရှိခဲ့လေ၏။

ကျိုးယွမ် သူ၏ အရောင်သုံးရောင်ကွင်းကို စစ်ဆေးကြည့်လိုက်လေသည်။ အပြောင်းအလဲ နီးပါးမျှ မရှိသော်လည်း တာအိုတားမြစ်ခြင်း ဝိညာဉ်သွေးကြော နေရာရှိ ရွှေရောင်မှာ အနည်းငယ် ပို၍ ပြင်းထန်လာပုံရကြောင်း ကျိုးယွမ် ခံစားလိုက်ရလေ၏။

ဤသည်က ကျိုးယွမ်ကို စိတ်အားထက်သန်မှု အများအပြား ပေးစွမ်းလေသည်။