အခန်း (၁၆၁-၁၆၂)

161

ကွားကော သူ၏သတင်းကို ပြန်လည်ဖျက်ချလိုက်သည့် လုပ်ရပ်မှာ ဆူပွက်နေသော ဆီအိုးပူထဲသို့ ရေစက်ချလိုက်သကဲ့သို့ ဖြစ်သွားပြီး၊ လူထုအမြင်များမှာ တစ်ခဏချင်းပင် ပျံ့နှံ့သွားတော့သည်။

"အလိုလေး၊ ကွားကောရဲ့ပို့စ်က အဖျက်ခံလိုက်ရပြီ တကယ်ကို ကြောက်စရာပဲ၊ တည်းခိုခန်းတစ်ခုက ဒီလောက်တောင် သြဇာကြီးတာလား၊ ကွားကောတောင် ပို့စ်ကို ဖျက်လိုက်ရတဲ့အထိပဲ "

"ဒါဟာ အထက်ပိုင်းက ဝင်ရောက်စွက်ဖက်လိုက်တာဖြစ်ရမယ် ငါတို့ကို နှုတ်ပိတ်တာကို လက်မခံဘူး "

"ငါတို့ကြားထဲမှာ မိစ္ဆာတွေရှိနေတာပဲ၊ တရုတ်ပြည်ကတကယ်ပဲ ဒီလောက်တောင် မှောင်မည်းနေတာလား၊ ဒေသန္တရအစိုးရကရော ဒါကိုဘာမှမလုပ်ပေးဘူးလား "

"ဟဲဟဲ ဖြစ်နိုင်တာက ကွားကောရဲ့ ပို့စ်ကို ယုံကျန်းကနေ ဖြုတ်ချခိုင်းလိုက်တာလည်းဖြစ်နိုင်တာပဲ သိတယ်မလား"

သူ၏သတင်းကို ဖျက်ပြီးနောက်တွင် ကွားကောသည် သူ၏အဖွဲ့အစည်းကို အသုံးချကာ 'ကွားကော၏ ပေါက်ကြားမှုများ' မှ Screenshot များကို အွန်လိုင်းအနှံ့တွင် အကောင့်မျိုးစုံဖြင့် ပြန်လည်တင်ခိုင်းလိုက်သည်။ အချို့ကို မှန်သားပြင်ပုံစံဖြင့် ပြောင်းပြန်လှန်၍ တင်ခြင်း၊ အချို့ကို အတိုကောက်စာလုံးများဖြင့် ရည်ညွှန်းခြင်းတို့ ပြုလုပ်ကာ အခြေအနေတစ်ခုလုံးကို လျှို့ဝှက်ဆန်းကြယ်အောင် ဖန်တီးခဲ့၏။ သို့သော် ဤကဲ့သို့ ဝေဝါးပြီး လျှို့ဝှက်သော အခြေအနေမျိုးတွင်ပင် လူအများမှာ ကောလာဟလကို ပို၍ ယုံကြည်လာကြသည်။ လူတို့သည် တိုက်ရိုက်ပေးသော အချက်အလက်များကို မယုံကြည်လိုကြသော်လည်း၊ သူတို့ကိုယ်တိုင် 'ရှာဖွေတွေ့ရှိ' သော အချက်အလက်များကိုမူ အခိုင်အမာ ယုံကြည်တတ်ကြ၏။ အင်တာနက်အသုံးပြုသူ အများအပြားသည် ထိုဝေဝါးလှသော အချက်အလက်စအနများမှတစ်ဆင့် အမျိုးမျိုးသော အတည်ပြုချက်များကို ရှာဖွေတွေ့ရှိလာကြပြီး၊ ကွားကော၏ ပို့စ်မှာ အမှန်တကယ် ဖြစ်သည်ဟု ယူဆလိုက်ကြတော့သည်။ အထူးသဖြင့် ညဘက်အချိန်တွင် ထိုကဲ့သို့သော မိစ္ဆာများနှင့် ဘီလူးသရဲများမှာ နေရာအနှံ့မှ ထွက်ပေါ်လာကြ၏။ အချို့သောသူများသည်လည်း ဤသတင်းဦးကို အခွင့်ကောင်းယူကာ တရုတ်အစိုးရကို တိုက်ခိုက်ရန် ကြိုးပမ်းလာကြပြီး၊ ရှုပ်ထွေးနေသော လူထုအမြင် နယ်ပယ်ထဲတွင် ရေနောက်၌ ငါးဖမ်းရန်နှင့် ပြဿနာရှာရန် စတင်လှုံ့ဆော်လာကြသည်။

ညသန်းခေါင်အချိန်တွင် ဟဲယဲ့တည်းခိုခန်း နှင့် ကွားကော၏ပေါက်ကြားမှုများ တို့မှာ ဘလော့ဂ်၏ ရေပန်းအစားဆုံး ရှာဖွေမှုဇယား တွင် နံပါတ် (၁) နှင့် (၂) နေရာသို့ ရောက်ရှိသွားပြီး နှစ်ခုစလုံး၏ နောက်တွင် "Hot" ဟူသော အနီရောင်အမှတ်အသားများ ပါရှိနေသည်။ မနက်ခင်း၏ ပထမဆုံးသော နေရောင်ခြည်တန်းမှာ လိုက်ကာကြားမှတစ်ဆင့် ဝူကျန်းကျန်း၏ မျက်နှာပေါ်သို့ နူးညံ့စွာ ကျရောက်လာ၏။ သူမသည် အိပ်ချင်မူးတူးဖြင့် မျက်လုံးများကို ပွတ်သပ်ရင်း ပြီးခဲ့သည့်ညက မက်ခဲ့သော လှပသည့် အိပ်မက်ကို ပြန်လည်အမှတ်ရနေမိသည်။ အိပ်မက်ထဲတွင် သူမသည် ဇာတ်လမ်းထဲမှ ဆင်းရဲသော ရွာသူမလေး ဖြစ်သွားသော်လည်း ဆင်းရဲမှုမှာ သူမ၏ ရည်မှန်းချက်ကို မပြောင်းလဲနိုင်ခဲ့ပေ။ သူမသည် ရွာငယ်လေးမှသည် ပိုမိုကျယ်ပြန့်သော ကမ္ဘာကြီးဆီသို့ လျှောက်လှမ်းခဲ့သော်လည်း သူမ၏ခြေထောက်မှ ကောက်ရိုးဖိနပ်လေးမှာမူ ဘယ်သောအခါမှ မပြောင်းလဲခဲ့ချေ။ အိပ်မက်ထဲတွင် ရွာသူမလေး၏ ကြွယ်ဝသော စိတ်ခံစားချက်များကို သူမ ခံစားခဲ့ရပြီး ဇာတ်ကောင်အပေါ် နားလည်မှုမှာ ပို၍ နက်ရှိုင်းသွားသည်။ သူမသည် အိပ်မက်ထဲမှ မျက်နှာအမူအရာတိုင်း၊ လှုပ်ရှားမှုတိုင်းကို အသေအချာ စောင့်ကြည့်ခဲ့၏။ ဝူကျန်းကျန်းသည် သူမ၏ သရုပ်ဆောင်စွမ်းရည်မှာ အဆင့်သစ်တစ်ခုသို့ တက်လှမ်းနိုင်ခဲ့ပြီဟု ခံစားရသည်။ သူမ၏ ရင်ထဲတွင် ပျော်ရွှင်မှုများ ပြည့်နှက်နေပြီး ထိုပျော်ရွှင်မှုကို သူမ၏ သူငယ်ချင်းများနှင့် မျှဝေရန် ပြင်လိုက်၏။

သို့သော်လည်း ဖုန်းကိုကောက်ကိုင်ကာ ဖုန်းဆက်ရန် ပြင်လိုက်ချိန်တွင် စခရင်ပေါ်၌ ပြသနေသော 'Missed Calls' အရေအတွက်ကို မြင်ပြီး သူမ မှင်သက်သွားရသည်။ 'Missed Calls' ပေါင်း (၂၀) တောင်ပါလား။ ဘာတွေဖြစ်နေတာလဲ။ မကောင်းသော အတိတ်နိမိတ်တစ်ခုမှာ သူမ၏ရင်ထဲတွင် လှိုင်းထသွားပြီး အနီးစပ်ဆုံး ဖုန်းခေါ်ဆိုမှုကို သူမအမြန်ပြန်ခေါ်လိုက်သည်။

"ဟယ်လို ကျန်းကျန်း၊ နောက်ဆုံးတော့ နင်နိုးပြီပေါ့ "

သူမ သူငယ်ချင်း၏ စိုးရိမ်တကြီး အသံမှာ ဖုန်းအခြားတစ်ဖက်မှ ထွက်ပေါ်လာသည်။

"ဘာဖြစ်လို့လဲ၊ ဘာတွေဖြစ်ကုန်တာလဲ"

ဝူကျန်းကျန်း၏ ရင်ထဲတွင် တင်းကျပ်သွားသည်။ သူမ၏ အလိုလိုသိစိတ်အရ ဤအရာမှာ သတင်းကောင်း မဖြစ်နိုင်မှန်း သိနေ၏။

"နင် ရေပန်းစားမှုသတင်းထဲ‌ရောက်နေပြီ၊ ကိစ္စက အကြီးအကျယ် ဖြစ်နေတာ"

သူငယ်ချင်းဖြစ်သူ၏ အသံမှာ အနည်းငယ် တုန်ရီနေပြီး ကိစ္စ၏ကြီးလေးမှုမှာ သူမစိတ်ကူးထားသည်ထက် ကျော်လွန်နေပုံရသည်။

"ရေပန်းစားတာ၊ ဘာရေပန်းစားတာလဲ"

ဝူကျန်းကျန်း လုံးဝ ဝေခွဲမရ ဖြစ်သွားသည်။ သူမ ဘယ်လိုလုပ်ပြီး ရုတ်တရက်ကြီး ရေပန်းစားနေသည့် အကြောင်းအရာ ဖြစ်သွားသည်ကို နားမလည်နိုင်ပေ။ သူမသည် ပြီးခဲ့သည့် နှစ်အနည်းငယ်အတွင်း သူမ၏ အလုပ်အပေါ်မှာသာ အာရုံစိုက်ခဲ့ပြီး သတင်းဖြစ်လောက်စရာ ဘာမှမလုပ်ခဲ့ဟု ထင်ထားမိသည်။

"စျေးကွက်ရှာဖွေရေး အကောင့်တစ်ခုက အွန်လိုင်းမှာ သတင်းတွေ ဖြန့်နေတာ၊ နင့်ရဲ့ Moments မှာ ဟဲယဲ့တည်းခိုခန်းက ပစ္စည်းတွေကို ကြော်ငြာတင်တာက အဲဒီတည်းခိုခန်းအပေါ် 'သစ္စာခံခြင်း' လို့ သွယ်ဝိုက်ပြီး ပြောထားတာ၊ အခု အင်တာနက်ပေါ်မှာ ပေါက်ကွဲနေပြီ "

သူမ၏ သူငယ်ချင်းမှာ စကားကို အမြန်ပြောသွားပြီး သူမပြောသွားသောအရာများမှာ ဝူကျန်းကျန်းအတွက် ယုံရခက်လောက်အောင် ဖြစ်နေကာ လုံးဝကို အူကြောင်ကြောင် ဖြစ်သွားရသည်။

"ဘာသစ္စာခံတာလဲ၊ ဟုတ်တယ် ငါဝန်ခံပါတယ်၊ ငါ အဲဒီ Moments ကို တင်လိုက်တာက တည်းခိုခန်းပိုင်ရှင်နဲ့ ပိုနီးစပ်သွားအောင်၊ ဆက်ဆံရေးကောင်း တည်ဆောက်ပြီး အခန်းကို ကြိုဘွတ်ကင်လုပ်လို့ရမလားဆိုပြီး တင်ခဲ့တာ၊ တခြားလူတွေလည်း ဟဲယဲ့တည်းခိုခန်းမှာ တည်းတယ်ဆိုပြီး Moments တင်တာ ငါတွေ့ဖူးပါတယ် ဟုတ်တယ်မလား၊ ဒါက တရားမဝင်တာမှ မဟုတ်တာ"

ဝူကျန်းကျန်း၏ အသံတွင် မယုံကြည်နိုင်မှုများ ပါဝင်နေသည်။ အခုခေတ် အင်တာနက်အသုံးပြုသူတွေမှာ အနုပညာရှင်များအပေါ် ဒီလောက်အထိ တောင်းဆိုချက် မြင့်မားနေကြပြီလား။ Moments တောင် တင်လို့မရတော့ဘူးလား။

"မဟုတ်ဘူး မဟုတ်ဘူး၊ ကွားကောက ဟဲယဲ့တည်းခိုခန်းမှာ မူးယစ်ဆေးဝါးတွေ၊ အစုလိုက်အပြုံလိုက် ကာမစပ်ယှက်မှုတွေနဲ့ ပတ်သက်နေတယ်လို့ သွယ်ဝိုက်ပြောသွားတာ၊ အခု အွန်လိုင်းပေါ်မှာ လူထုအမြင်က ထိန်းမနိုင်သိမ်းမရ ဖြစ်နေပြီ၊ နင် အမြန် ရှင်းလင်းချက် ထုတ်ဖို့လိုတယ်"

သူမသူငယ်ချင်းမှာ စကားများပင် ရှုပ်ထွေးနေပြီး အခြေအနေ၏ အကြောင်းရင်းနှင့် ရလဒ်ကို အမြန်ရှင်းပြနေသည်။ ဝူကျန်းကျန်းမှာ အသက်ပြင်းပြင်းရှူလိုက်ပြီး အော်ဟစ်ဆဲဆိုပစ်ချင်စိတ် ပေါက်သွားတော့၏။ ဘာတွေမှန်းကို မသိတော့ဘူး။

"ဒီလို အခြေအမြစ်မရှိတဲ့လုပ်ကြံဇာတ်လမ်းကို တကယ်ယုံတဲ့သူရှိလို့လား"

ဝူကျန်းကျန်းမှာ စကားပင် မထွက်နိုင်တော့ပေ။ သူမ၏အသက်မွေးဝမ်းကျောင်း လုပ်ငန်းတစ်ခုလုံး ပျက်စီးတော့မည်ဟု သူမထင်ခဲ့သော်လည်း ဤရေပန်းစားနေသည့်ကိစ္စမှာ သူမ လုံးဝခန့်မှန်းမထားသော လမ်းကြောင်းသို့ ရောက်ရှိနေခြင်းဖြစ်သည်။ ဝူကျန်းကျန်း၏ လေသံမှာ အားကိုးရာမဲ့မှုများဖြင့်ပြည့်နှက်နေ၏။

"နင်လည်း ဒီတည်းခိုခန်းမှာ တည်းဖူးတာပဲ၊ ဒီစျေးကွက်ရှာဖွေရေး အကောင့်ပြောတဲ့ အရာတွေက အမှန်ဖြစ်နိုင်မယ်လို့ နင်ထင်လား"

သူမသူငယ်ချင်းက လေးလေးနက်နက် ပြောလိုက်သည်။

"ကျန်းကျန်း၊ ဒီကိစ္စတစ်ခုလုံးက ရယ်စရာကောင်းနေတာမှန်ပေမဲ့ လူအများအပြားကတော့ လူထုအမြင်ကြားမှာ အမှားနဲ့အမှန်ကို မခွဲခြားနိုင်ကြဘူး၊ စဉ်းစားကြည့်ပါဦး လိမ်လည်မှု တိုက်ဖျက်ရေးကို နေ့တိုင်းကြော်ငြာနေတာတောင် လူတွေအများကြီး အလိမ်ခံနေရတုန်းပဲ၊ အွန်လိုင်းပေါ်မှာ အကြီးအကျယ် ဖြစ်သွားတဲ့ နိုင်ငံခြားကျောင်းသားတွေ ဂိုဏ်းတစ်ခုရဲ့ ခြိမ်းခြောက်မှုကို ခံရတယ်ဆိုတဲ့ ကိစ္စကို မှတ်မိလား၊ အဲဒါလည်း စျေးကွက်ရှာဖွေရေး အကောင့်တစ်ခုက လုပ်ကြံခဲ့တဲ့ သတင်းအတုပဲ၊ ဒါပေမဲ့ နိုင်ငံခြားကျောင်းသား အားလုံးကို မလုံခြုံသလို ခံစားရစေခဲ့ပြီး နောက်ဆုံးမှာ သံရုံးကပါ ထွက်ပြီး ရှင်းလင်းပေးခဲ့ရတယ်၊ နင် လူထုအမြင်ရဲ့ စွမ်းအားကို လျှော့မတွက်သင့်ဘူး "

သူငယ်ချင်းဖြစ်သူနှင့် ဖုန်းချပြီးနောက် ဝူကျန်းကျန်းသည် သူမ၏ အေးဂျင့် ဆီသို့ အမြန်ဖုန်းဆက်လိုက်သည်။ အေးဂျင့်ကလည်း ဤကိစ္စမှာ အလွန်ပင် ယုတ္တိမရှိဟု ခံစားရ၏။

"ကျန်းကျန်း၊ မနေ့က လူထုအမြင်တွေက ရုတ်တရက်ကြီး ပေါက်ကွဲထွက်လာတာ၊ ဒီလို သတင်းအတုတွေကို လူတွေ ယုံလိမ့်မယ်လို့ ငါတို့ မမျှော်လင့်ထားခဲ့ဘူး၊ ဒါပေမဲ့ မစိုးရိမ်ပါနဲ့၊ နင့်ရဲ့ ပရိသတ်တွေကတော့ အသိတရား ရှိကြပါတယ်၊ ဒီလိုလုပ်ရအောင်၊ နင်လည်း ဘလော့ဂ်တစ်ခု တင်လိုက်၊ ဒါပေမဲ့ တိုက်ရိုက်တော့ မရှင်းနဲ့ဦး "

ဝူကျန်းကျန်း နားလည်သွားသည်။ ခဏမျှ စဉ်းစားပြီးနောက် သူမသည် ဘလော့ဂ်တစ်ခု တင်လိုက်၏။

"ဒီနေ့ဟာလည်း တောက်ပတဲ့ နေ့တစ်နေ့ပါပဲ { မျက်နှာပေါ်တွင် ဆပ်ပြာမြှုပ်များဖြင့် ရိုက်ထားသော Selfie ပုံ၊ ထိုပုံတွင် ဟဲယဲ့တည်းခိုခန်းမှ အသားဖြူဆေးဆပ်ပြာကို ထင်ရှားစွာ ပြသထားသည် } "

တစ်ညလုံး ကောင်းကောင်းအိပ်ပျော်ပြီး လန်းဆန်းနေသော ဝူကျန်းကျန်းနှင့် နှိုင်းယှဉ်လျှင် စုဟယ်၏ မျက်ကွင်းညိုမှုမှာ ပန်ဒါဝက်ဝံထက်ပင် ပိုကြီးနေသည်။ မနေ့က သူမ အိပ်မက်ကမ္ဘာထဲတွင် ရှိနေစဉ် ညသန်းခေါင်အချိန်၌ စနစ်၏ အသိပေးချက် ကို ရုတ်တရက် ကြားလိုက်ရ၏။ ကုတင်ပေါ်မှ အားယူထလာရင်း စုဟယ် မှင်သက်သွားသည်။ သူမ အိပ်မက်မက်နေဆဲဟု ထင်နေမိနေသေးသည်။ သို့မဟုတ်ပါက မစ်ရှင်အောင်မြင်ကြောင်း စနစ်၏ အသိပေးချက်ကို ဘယ်လိုလုပ်ပြီး မြင်နိုင်ပါမည်နည်း။

စနစ်သတိပေးချက် - ကျော်ကြားမှု ရယူခြင်း မစ်ရှင်ကို အောင်မြင်စွာ ပြီးမြောက်ခဲ့သည့်အတွက် ကစားသမားအား ဂုဏ်ယူပါသည်။ ကတ်ဆွဲခွင့် (၁) ကြိမ် ရရှိပါသည်။

စနစ်မစ်ရှင် - ကစားသမားအနေဖြင့် ကမ္ဘာကျော်တည်းခိုခန်း ဖြစ်လာစေရန် ရည်မှန်းချက်ဆီသို့ ဆက်လက်ကြိုးစားပါ။ တည်းခိုခန်း၏ ကျော်ကြားမှုကို လူသိများခြင်း အဆင့်သို့ ရောက်ရှိအောင် မြှင့်တင်ပါ။

လူသိများခြင်း - တည်းခိုခန်း၏ ကျော်ကြားမှုမှာ (၁၃) သန်း / (၃၀) သန်းသို့ ရောက်ရှိနေပြီ ဖြစ်သည်။

မစ်ရှင်ဆုလာဘ် - ကတ်ဆွဲခွင့် (၁)

မဖြစ်နိုင်ပေ။ ပြီးခဲ့သည့် ရက်အနည်းငယ်အတွင်း တည်းခိုခန်းတွင် ဧည့်သည်များ အပြည့်ဖြစ်နေသဖြင့် ဟဲယဲ့တည်းခိုခန်း၏ ကျော်ကြားမှုမှာ မြန်မြန်ဆန်ဆန် မြင့်တက်လာခဲ့သည်မှာ မှန်သော်လည်း လွန်ခဲ့သည့် နှစ်ရက်တွင် ကျော်ကြားမှုမှာ (၂) သန်းကျော်ပဲ ရှိသေးသည် မဟုတ်လား။ ဒီညမှာတင် ကျော်ကြားမှုမှာ (၁၀) သန်းကို တိုက်ရိုက်ကျော်သွားတာလား။ ဘာတွေ ဖြစ်နေတာလဲ။ စုဟယ်မှာ အံ့အားသင့်ကာ အူကြောင်ကြောင်ဖြင့် သူမ၏ ဖုန်းကို အမြန်ဖွင့်လိုက်သည်။ ဖုန်းကိုဖွင့်ပြီးနောက် စုဟယ်သည် သူမ၏ ဖုန်းကို ပြန်လည် ထိန်းချုပ်နိုင်ရန် နာရီဝက်ခန့် စောင့်လိုက်ရသည်။ အဘယ်ကြောင့်ဆိုသော် သူမ၏ ဖုန်းအသိပေးချက်များမှာ (999+) ဖြစ်နေပြီး မျိုးစုံသော မက်ဆေ့ခ်ျများမှာ အဆက်မပြတ် ပေါ်လာနေသောကြောင့်ဖြစ်၏။ အခုက ညသန်းခေါင်အချိန်ပဲ ရှိသေးတယ် မဟုတ်လား။ ဒီမက်ဆေ့ခ်ျတွေက ဘာတွေလဲ။

စုဟယ်က ပေါ်လာသော မက်ဆေ့ခ်ျတစ်ခုကို နှိပ်ကြည့်လိုက်ရာ၊ ၎င်းမှာ ဆရာကြီးဝေ ၏ လက်ရေးလှဂရု ဖြစ်နေသည်။ ဆရာကြီးဝေ၏ Live လွှင့်မှုမှာ ဖန်များ ပို၍ရလာနေ၏။ စုဟယ်သည် Live စတင်မည့်အချိန်ကို အသိပေးရန်အတွက် ဂရုပေါင်း (၃၀) ခန့် ဖန်တီးထားပြီး၊ တစ်ခါတစ်ရံတွင် ဆရာကြီးဝေ ကိုယ်တိုင်လည်း ဂရုထဲတွင် ပေါ်လာကာ မေးခွန်းများကို ဖြေကြားပေးလေ့ရှိသည်။ စုဟယ်သည် များသောအားဖြင့် ထိုဂရုများကို အသံပိတ်ထားလေ့ရှိ၏။ အခု အသိပေးချက်တွေ တောက်လျှောက် ပေါ်နေရခြင်းမှာ ဂရုထဲရှိ လူအများအပြားမှာ စုဟယ်ကို @ ခေါ်ကာ စကားပြောရန် တောင်းဆိုနေကြသောကြောင့် ဖြစ်သည်။ ဝေဖုန်းယီကို အင်တာနက်အသုံးပြုသူများမှ ကတ်ဇာတ်ကောင်တစ်ဦးအဖြစ် ရှာတွေ့သွားသည်မှလွဲ၍ ဂရုထဲမှလူတွေကို ဒီလောက်အထိ အံ့အားသင့်စေမည့်အရာကို စုဟယ် တကယ်ကို စဉ်းစားမရပေ။ စုဟယ်သည် မျက်လုံးတစ်ဖက်ကို မှိတ်ကာ ဂရုထဲမှ စာများကို သတိထားပြီး ဖွင့်ကြည့်လိုက်တော့သည်။

162

ဂရုထဲတွင် တရစပ်တက်လာနေသည့် မက်ဆေ့ခ်ျများကို ကြည့်ရင်း စုဟယ်၏ လည်ပင်းနားအထိ တက်နေသော နှလုံးခုန်သံမှာ တစ်ဝက်ခန့် ပြန်လည်တည်ငြိမ်သွားပြီး မျက်လုံးတစ်ဖက်ကို အုပ်ထားသည့် လက်မှာလည်း လျော့ကျသွားတော့သည်။ ဆရာကြီးဝေရဲ့ မည်သူမည်ဝါဖြစ်ကြောင်း ပေါက်ကြားမသွားသေးဘူးပဲ။ သို့သော်လည်း ဂရုထဲရှိ မှတ်ချက်များကို ကြည့်ရင်း စုဟယ် စိတ်ထဲတွင် အတော်လေး မသက်မသာဖြစ်နေမိသည်။ လူအများအပြားမှာ ဆရာကြီးဝေကို ဝိုင်းပြီး ဆဲဆိုနေကြသောကြောင့်ဖြစ်၏။ ဆရာကြီးဝေ၏ လက်ရေးလှဂရုထဲတွင် ယနေ့ လေထုမှာ ထူးထူးခြားခြား တင်းမာနေသည်။ ဂရုအဖွဲ့ဝင်များမှာ အွန်လိုင်းတွင် ပျံ့နှံ့နေသည့် ဆရာကြီးဝေနှင့် ပတ်သက်သော မကောင်းသတင်းများကို တစ်ယောက်တစ်ပေါက် ဆွေးနွေးနေကြ၏။

"တွေ့လိုက်ကြလား၊ အွန်လိုင်းက သတင်းဆိုးတွေအကုန်လုံးလေ၊ ဝေဖုန်းယီက ဘယ်လိုလုပ် ဒီလိုကိစ္စမျိုးတွေ လုပ်နိုင်ရတာလဲ"

အင်တာနက်အသုံးပြုသူတစ်ဦးမှာ ဂရုထဲတွင် ဒေါသတကြီး စာတင်လိုက်သည်။

"ဟုတ်ပါ့၊ ကျွန်တော်ကတော့ ဝေဖုန်းယီကို လောကီအညစ်အကြေးတွေနဲ့ မပက်သက်ဘဲ ကိုယ်ကျင့်တရား မြင့်မားတဲ့ လက်ရေးလှပညာရှင်တစ်ယောက်လို့ အမြဲထင်ခဲ့တာ၊ သူက ဒီလိုလူစားမျိုး ဖြစ်နေလိမ့်မယ်လို့ လုံးဝကို မမျှော်လင့်ထားဘူး"

နောက်ထပ် အင်တာနက်အသုံးပြုသူတစ်ဦးမှာလည်း စိတ်ပျက်အားလျော့မှုများ ပြည့်နှက်နေသော အသံဖြင့် ထောက်ခံလိုက်သည်။

"ဝေဖုန်းယီဆိုတာ မှောင်ခိုအင်အားစုတွေရဲ့ ကိုယ်စားလှယ်ပဲ၊ ဟွန်း သူက ဆရာလို့ ခေါ်ခံရဖို့ မတန်ဘူး"

နောက်တစ်ယောက်မှာလည်း သူ၏ မကျေနပ်ချက်ကို ဒေါသတကြီး ထုတ်ဖော်လိုက်ပြန်သည်။

"တွေးကြည့်ရုံနဲ့တင် နောင်တရတယ်၊ အဲဒီတုန်းက ဆရာကြီးဝေအတွက် မဲပေးဖို့ လင့်ခ်တွေကိုတောင် ကူပြီး မျှဝေပေးခဲ့သေးတာ၊ ငါ့မိသားစုနဲ့ သူငယ်ချင်းတွေကိုပါ မဲပေးခိုင်းခဲ့တာ၊ ဘယ်လိုလုပ် ဒီလိုဖြစ်ရတာလဲ၊ ဆရာကြီးဝေရဲ့ လက်ရေးလှက တကယ်ကို ကောင်းတာပါ"

တစ်ဦးမှာ ညည်းတွားလိုက်သည်။

"နင်က သူ့ကို ဆရာကြီးဝေလို့ ခေါ်နေတုန်းလား၊ အရာအားလုံးကို ဖုံးကွယ်ပေးထားတဲ့ ဒီလို လူယုတ်မာမျိုးက ဆရာလို့ ခေါ်ခံရဖို့ မထိုက်တန်ဘူး၊ ဟားဟား နင်တို့တွေ အခုထိ နားမလည်ကြသေးဘူးလား၊ အနုပညာလက်ရာနဲ့ လူဆိုတာ အမြဲတမ်း သီးခြားစီပဲလေ၊ ချိုက်ကျင့်ကလည်း လက်ရေးလှ ပညာရှင်ကြီးတစ်ယောက်ပဲ မဟုတ်လား"

အချို့သော အဖွဲ့ဝင်များမှာ ဝေဖုန်းယီအား ဆရာဟု ခေါ်ရန် မထိုက်တန်တော့ကြောင်း ယုံကြည်နေကြသည်။ ဂရုထဲတွင် ဒေါသသံများနှင့် ဆဲဆိုသံများ ဆူပွက်နေစဉ်မှာပင်၊ ကွဲပြားခြားနားသော အသံတစ်ခု ပေါ်ထွက်လာ၏။

"အားလုံး ခဏလောက် စိတ်အေးအေးထားကြပါဦး၊ ကျွန်တော်ဟဲယဲ့တည်းခိုခန်းကို ရောက်ဖူးသလို ဆရာကြီးဝေရဲ့ သင်တန်းကိုလည်း ကိုယ်တိုင်တက်ဖူးပါတယ်၊ သူက အွန်လိုင်းမှာ ပြောနေကြသလို လူစားမျိုး လုံးဝမဟုတ်ပါဘူး"

ယခင်က ဆရာကြီးဝေနှင့် ထိတွေ့ဆက်ဆံဖူးသည့် အင်တာနက်အသုံးပြုသူတစ်ဦးမှာ ရှေ့ထွက်၍ အားလုံး၏ ဒေါသကို ငြိမ်းသတ်ရန် ကြိုးစားလိုက်သည်။

"ဟုတ်ပါတယ် ကျွန်တော်လည်း ဆရာကြီးဝေနဲ့ အဆက်အသွယ် ရှိခဲ့ဖူးတယ်၊ သူ့ရဲ့ စရိုက်နဲ့ သင်ကြားပြသတဲ့ အမူအကျင့်က တကယ့်ကို ဖြောင့်မတ်ပါတယ်၊ ဒီနေရာမှာ တစ်ခုခု နားလည်မှုလွဲနေတာ ရှိလိမ့်မယ်လို့ ကျွန်တော် ယုံကြည်တယ်"

နောက်ထပ်တစ်ဦးမှာလည်း ရှင်းလင်းချက်ထဲတွင် ပါဝင်လာသည်။

"အားလုံးပဲ၊ အွန်လိုင်းက ကောလာဟလတွေကို အလွယ်တကူ မယုံကြပါနဲ့၊ ကျွန်တော်တို့ ဆရာကြီးဝေကို ရှင်းပြဖို့ အခွင့်အရေးပေးသင့်တယ်၊ ဆရာကြီးဝေက ဘာအမှားမှ မလုပ်ခဲ့ဘူးလေ၊ ဆိုတော့ လူတွေမှာ ဖျော်ဖြေရေးလောကက သူငယ်ချင်းတွေရှိခွင့်မရှိဘူးလား၊ အကယ်၍ ကျွန်တော်ကသာ ဖျော်ဖြေရေးလောကထဲမှာ ရှိနေရင်လည်း ဆရာကြီးဝေအတွက် မဲပေးဖို့လင့်ခ်တွေ မျှဝေပေးမှာပဲ"

နောက်တစ်ယောက်လည်း မေတ္တာရပ်ခံလိုက်သည်။

"ဟုတ်ပါတယ် ဟုတ်ပါတယ်၊ တည်းခိုခန်းမှာ တကယ်ပဲ တစ်ခုခုဖြစ်နေတယ်ဆိုရင်တောင်မှ အဲဒါက ဆရာကြီးဝေနဲ့ မဆိုင်ဘူးလေ၊ အဲဒါက သူဌေးရဲ့ပြဿနာပဲ "

အချို့သောသူများမှာ သံသယရှိနေကြဆဲ ဖြစ်သော်လည်း ဆရာကြီးဝေနှင့် ထိတွေ့ဖူးသူများ၏ ပြောစကားများမှာ ကြည်လင်သော ရေစမ်းတစ်ခုကဲ့သို့ ဂရုထဲရှိဒေါသများကို တဖြည်းဖြည်းငြိမ်သက်သွားစေသည်။ သူတို့သည် ဆရာကြီးဝေနှင့် ဟဲယဲ့တည်းခိုခန်းကို သီးခြားစီ ခွဲခြားမြင်ရန် ယာယီအားဖြင့် သဘောတူညီမှုရရှိသွားကြ၏။

"အဲဒီ ကိုယ်ကျင့်တရားမရှိတဲ့ သူဌေးကို ထွက်လာပြီး စကားပြောခိုင်းလိုက် "

အင်တာနက်အသုံးပြုသူတစ်ဦးမှာ စုဟယ်ကို @ ခေါ်ကာ စတင်လိုက်သည်။

"ဟုတ်တယ်၊ အွန်လိုင်းက တစ်ဖက်သတ် ပြောစကားတွေပေါ်မှာတင် အခြေခံပြီး တစ်စုံတစ်ယောက်ကို အပြစ်ပေးလို့ မရဘူး၊ သူဌေးကို ထွက်လာခိုင်း"

နောက်ထပ်တစ်ဦးမှာလည်း သဘောတူလိုက်သည်။

"ဆရာကြီးဝေက သနားစရာကောင်းတဲ့ လစာစား ဝန်ထမ်းလေးပါ၊ ကျွန်တော်တို့ ဆရာကြီးဝေကို ဒီကိစ္စထဲ ဆွဲမသွင်းကြပါနဲ့ သူဌေး ထွက်လာပြီး ဝန်ခံခံလိုက်စမ်း "

ဂရုအသီးသီးမှ လူအများအပြားသည် စုဟယ်ကို @ ခေါ်ကာ အမြန်ထွက်လာရန် ပြောဆိုနေကြသည်။ စုဟယ်မှာ ကုတင်ပေါ်မှ ခုန်ဆင်းကာ အဝတ်အစားများကို ကမန်းကတန်း ဝတ်လိုက်ပြီး၊ ကွန်ပျူတာကိုဖွင့်၍ ဖြစ်ရပ်၏ အကြောင်းရင်းကို ရှာဖွေတော့၏။ ဘယ်လိုလုပ်ပြီး ဒီလောက်အထိ ရယ်စရာကောင်းတဲ့ ကောလာဟလတွေ ရှိနိုင်ရတာလဲ။ စုဟယ်မှာ မူးမေ့လဲချင်သွား၏။ သူမ၏ ကျော်ကြားမှု အမှတ်တွေ ဘာကြောင့် ဒီလောက်မြန်မြန် တက်လာရသလဲဆိုသည်မှာ အံ့သြစရာ မဟုတ်တော့ချေ။ ဤကိစ္စမှာ Weibo မှသည် လူမှုကွန်ယက် ပလက်ဖောင်း အသီးသီးဆီသို့ ပျံ့နှံ့သွားခဲ့ပြီဖြစ်သည်။ အကယ်၍သာ ဆက်ပြီး ပျံ့နှံ့နေမည်ဆိုပါက နောက်ထပ် စနစ်မစ်ရှင်တစ်ခုကို ပြီးမြောက်အောင် လုပ်ဖို့မှာ ပြဿနာ မရှိတော့ဟု စုဟယ် ခံစားလိုက်ရသည်။ အချို့သော အနုပညာရှင်များက ဘာကြောင့် မဟုတ်မဟတ် ကိစ္စတွေကို တမင်တကာ လုပ်ကြသလဲဆိုသည်မှာ အံ့သြစရာ မဟုတ်တော့ပေ။ မကောင်းသော သတင်းများမှတစ်ဆင့် ရေပန်းစားခြင်းမှာလည်း ကြည့်ရှုနှုန်း တစ်ခုပင် မဟုတ်ပါလော။

ယခုအခါတွင် သက်သေဟု ခေါ်သော အရာများမှာ ပို၍ များပြားလာသည်။ အချို့သောသူများမှာ ယုံကျန်းမြို့မှ နာမည်ကြီး ချမ်းသာသော ဒုတိယမျိုးဆက် လူငယ်များ တည်းခိုခန်းတွင် တည်းခိုနေစဉ် ဟဲယဲ့တည်းခိုခန်းမှမုန့်များကို ဓာတ်ပုံရိုက်ထားသည်များကို ရှာဖွေဖော်ထုတ်လိုက်ကြ၏။ အင်တာနက်အသုံးပြုသူများမှာ "ချမ်းသာသော ဒုတိယမျိုးဆက်" ဟူသော စကားလုံးသုံးလုံးအပေါ် အစကတည်းမှ အမြင်မကြည်ကြရာ၊ ယခုအခါတွင် ထိုသူများနှင့် ဖျော်ဖြေရေးလောကမှ စတားများကို ဆက်စပ်ကာ ဤဓာတ်ပုံများကို ဟဲယဲ့တည်းခိုခန်းတွင် အစုလိုက်အပြုံလိုက် ကာမပျော်ပါးပွဲများ ကျင်းပနေသည့် သက်သေအဖြစ် အသုံးချလိုက်ကြသည်။ စုဟယ်မှာတော့ သူမကိုယ်သူမ တကယ်ကို မတရား အစွပ်စွဲခံရပြီး သေချင်စရာကောင်းသည်ဟု ခံစားနေရ၏။ သူမသည် ဂရုထဲသို့ မက်ဆေ့ခ်ျတစ်ခု အမြန်ပို့လိုက်သည်။

"လူကြီးမင်းတို့၊ ကျွန်မ မတရားအစွပ်စွဲခံထားရတာပါ၊ ကျွန်မရဲ့ဘိုးဘွား (၃) ဆက်လုံးဟာ ဥပဒေကို လိုက်နာတဲ့ နိုင်ငံသားကောင်းတွေပါ၊ ကျွန်မက ဘယ်လိုလုပ်ပြီး တရားမဝင်တာတွေ လုပ်ဝံ့မှာလဲ ပြီးတော့ ဆရာကြီးဝေက တကယ်ကို အသိပညာ ကြွယ်ဝပြီး ကိုယ်ကျင့်တရား မြင့်မားတဲ့လူတစ်ယောက်ပါ၊ ကျေးဇူးပြုပြီး ဆရာကြီးဝေအပေါ် ဒေါသပုံမချကြပါနဲ့ရှင်"

စုဟယ် ဂရုထဲသို့ မက်ဆေ့ခ်ျပို့လိုက်သည်နှင့်တစ်ပြိုင်နက် ဂရုထဲရှိလူများမှာ ချက်ချင်းပင် လှုပ်လှုပ်ရှားရှား ဖြစ်သွားကြသည်။

"အမလေး သူဌေး၊ နောက်ဆုံးတော့ ထွက်လာပြီပေါ့ အခုဘာတွေ တကယ်ဖြစ်နေတာလဲဆိုတာ မြန်မြန်ပြောပြစမ်းပါဦး "

"နင်နဲ့ ဖျော်ဖြေရေးလောကကြားက ပတ်သက်မှုက တကယ်တော့ ဘာလဲ "

"သူဌေး အမြန်ဆုံး ရှင်းလင်းချက် ထုတ်ဖို့ မမေ့နဲ့ဦး၊ အခု ဆရာကြီးဝေရဲ့ ဗီဒီယိုတွေအောက်မှာ မကောင်းတဲ့ မှတ်ချက်တွေ အများကြီးပဲ၊ ကျွန်တော် တစ်ယောက်တည်းနဲ့ အဲဒီ မှတ်ချက်ဆိုးတွေကို ပြန်ချေပဖို့ မတတ်နိုင်တော့ဘူး။"

မက်ဆေ့ခ်ျများမှာ တရစပ်တက်လာသဖြင့် ဆုဟယ်မှာ မျက်စိပင်လည်သွားရသည်။ သို့သော်လည်း အသုံးဝင်သော မက်ဆေ့ခ်ျအချို့ကိုတော့ သူမမြင်လိုက်ရ၏။ ဂရုထဲရှိ အင်တာနက်အသုံးပြုသူများ ပြောသည်မှာ မှန်ပါသည်။ သူမအနေဖြင့် အချိန်မီ ရှင်းလင်းချက် ထုတ်ပြန်ရန် တကယ်ကို လိုအပ်နေပြီဖြစ်၏။ စုဟယ်သည် သူမ၏ ဖုန်းအဆက်အသွယ်များကို ရှာဖွေလိုက်ကာ သူမ မဆက်သွယ်ဖြစ်သည်မှာ ကြာပြီဖြစ်သော ရှေ့နေကို ရှာတွေ့သွားသည်။

"ရှေ့နေကြီး၊ ကျွန်မ အရင်ကပြောဖူးတဲ့ ချောင်လီဖန်း ကို မှတ်မိသေးလား၊ သူမ နောက်တစ်ခါ ပြဿနာရှာနေပြန်ပြီ"

စုဟယ်သည် ရှေ့နေကို ဖုန်းခေါ်ရန်ပြင်လိုက်သော်လည်း Chat ထဲတွင် 'စာရိုက်နေသည်' ဟုပေါ်လာသည်။ ဤမျှ နောက်ကျနေပြီကို ရှေ့နေကြီးမှာ မအိပ်သေးဘဲ အလုပ်ကြိုးစားနေဆဲပင်။ အခြေအနေကို နားလည်သွားပြီးနောက် ယခုတစ်ကြိမ်တွင် ရှေ့နေမှာ ယုံကြည်မှုများ ပြည့်နှက်နေသည်။

"စိတ်မပူပါနဲ့၊ ဒီတစ်ခါတော့ သူမ အသရေဖျက်မှုကနေ လွတ်မှာမဟုတ်တော့ဘူး "

အမှုကို လက်ခံလိုက်သော ရှေ့နေသည် စုဟယ်အတွက် ရှေ့နေစာ တစ်စောင်ကို အမြန်ပင် ရေးသားပေးလိုက်သည်။

'ဇီရင်းရှေ့နေရုံးမှ ရှေ့နေ ထုတ်ပြန်ချက်'

"ဇီရင်း ရှေ့နေရုံးသည် ဟဲယဲ့တည်းခိုခန်း၏ လွှဲအပ်ညွှန်ကြားချက်အရ၊ ဟဲယဲ့တည်းခိုခန်းကိုယ်စား အောက်ပါအတိုင်း ထုတ်ပြန်ကြေညာအပ်ပါသည်၊ အခြေခံ စုံစမ်းစစ်ဆေးမှုများ ပြုလုပ်ပြီးနောက် 'ကွားကော၏ ပေါက်ကြားမှုများ' အကောင့်သည် Weibo အစရှိသော ပလက်ဖောင်းများမှတစ်ဆင့် သတင်းအမှားများကို ထုတ်ပြန်ခဲ့ကြောင်း တွေ့ရှိရပါသည်၊ ထိုသတင်းအမှားများသည် ကျွန်တော်တို့အမှုသည်၏ စီးပွားရေးနှင့်ဂုဏ်သိက္ခာကို ကြီးလေးစွာ ထိခိုက်စေခဲ့ပြီး ပုံမှန် စီးပွားရေး လုပ်ငန်းလည်ပတ်မှုအပေါ် ဆိုးကျိုးများ သက်ရောက်စေခဲ့သည်၊ ဤရှေ့နေရုံးသည် တရားစီရင်ရေး လုပ်ငန်းစဉ်များကို စတင်ရန် လွှဲအပ်ခြင်းခံထားရပြီး ဤဖြစ်ရပ်၊ သက်ဆိုင်သူများနှင့် သက်ဆိုင်ရာ အကောင့်များ၊ ပလက်ဖောင်းများအပေါ် အခြားသော ဥပဒေကြောင်းအရ အရေးယူမှုများကို ဆက်လက် ဆောင်ရွက်သွားပိုင်ခွင့်ရှိသည်"

စုဟယ်သည် ဤကျွမ်းကျင်ပိုင်နိုင်သော ရှေ့နေစာကို 'ကွားကော၏ ပေါက်ကြားမှုများ' အကောင့်ထံ ပေးပို့လိုက်ပြီး၊ ပလက်ဖောင်းအသီးသီးရှိ ဟဲယဲ့တည်းခိုခန်း၏ လူမှုကွန်ယက် အကောင့်များတွင်လည်း လူသိရှင်ကြား တင်လိုက်သည်။ ရှေ့နေစာထုတ်ပြန်ခြင်းမှာ ပထမဆုံး အဆင့်သာဖြစ်ပြီး ကိစ္စမှာမပြီးသေးပေ။ အကြောင်းမှာ ဖျော်ဖြေရေးလောကမှ အနုပညာရှင်များသည် ရှေ့နေစာကို ရယ်စရာတစ်ခုသဖွယ် လုပ်ထားကြသောကြောင့် ဖြစ်သည်။ စုဟယ်သည် သူမ အရင်က သိမ်းဆည်းထားသော ချောင်လီဖန်းနှင့် ဖုန်းပြောထားသည့် အသံဖိုင်များကို ရှာဖွေလိုက်၏။ သူမသည် ဤခြိမ်းခြောက်နေသော အသံဖိုင်ကို စနစ်တကျပြန်လည်စုစည်းလိုက်ပြီး ချောင်လီဖန်း၏ တိုင်တန်းမှုကြောင့် တည်းခိုခန်းကို မီးသတ်ဌာနနှင့် စျေးကွက်ကြီးကြပ်ရေးဗျူရိုတို့မှ လာရောက်စစ်ဆေးပြီးနောက် ထုတ်ပြန်ပေးခဲ့သည့် "စစ်ဆေးရေး အစီရင်ခံစာ" ကိုလည်း ရှာတွေ့ခဲ့သည်။ သူမသည် ဤသက်သေ အထောက်အထားများ အားလုံးကို စုစည်းကာ ပလက်ဖောင်းပေါ်သို့တင်လိုက်တော့၏။