အခန်း (၁၆၅-၁၆၆)

165

လီရှီသည် စိတ်လှုပ်ရှားစွာဖြင့် သူ၏ဖုန်းကို မြှောက်ပြလိုက်သည်။

"သူဌေးမစု ဆရာကြီးဝေ ဆုရသွားပြီဗျ"

၎င်းမှာ လူကြိုက်အများဆုံး လက်ရေးလှ နှင့် ပန်းချီလက်ရာများကို ရွေးချယ်ရန် 'ဟွားကော် လက်ရေးလှစာလုံးနှင့် ပန်းချီပြိုင်ပွဲ' ၏ တရားဝင်ဝဘ်ဆိုဒ်တွင် ပြုလုပ်ခဲ့သော လူထုဆန္ဒမဲပေးပွဲတစ်ခု ဖြစ်သည်။ လူတစ်ဦးလျှင် တစ်ရက်ကို မဲ (၅) မဲ ပေးခွင့်ရှိပြီး မဲပေးကာလမှာ တစ်လကြာမြင့်၏။ အစပိုင်းတွင် စုဟယ်သည် ဆရာကြီးဝေ မဲရရှိစေရန် သူမ၏ အဆက်အသွယ်အားလုံးကို တက်ကြွစွာ စည်းရုံးခဲ့သော်လည်း အချိန်ကြာလာသည်နှင့်အမျှ သူမကိုယ်တိုင်လည်း စိတ်လျှော့လိုက်ပြီး တစ်ရက်လျှင် (၅) မဲ ပုံမှန်ပေးရုံဖြင့်သာ ကျေနပ်နေခဲ့သည်။

သို့သော်လည်း ဒါရိုက်တာကုန်းနှင့် ကြင်ယာတော် နှစ်ပါး ဒဏ္ဍာရီ ဇာတ်လမ်းတွဲအဖွဲ့သားများ၏ ထောက်ခံအားပေးမှုကြောင့် ဆရာကြီးဝေ၏ မဲအရေအတွက်မှာ အခြားသူများထက် များစွာသာလွန်နေခဲ့ပြီး လူကြိုက်အများဆုံး လက်ရာဆု ကို အောင်မြင်စွာ ဆွတ်ခူးနိုင်ခဲ့သည်။ အမှန်စင်စစ် ဤလူကြိုက်အများဆုံး လက်ရာဆု အတွက် ရွေးချယ်ခံရသော လက်ရာမှာ တစ်ခုထက်မကရှိပြီး မဲအရေအတွက်ပေါ်မူတည်၍ သတ်မှတ်သောဆုဖြစ်သဖြင့် ဂုဏ်သိက္ခာပိုင်းအရ အလွန်ကြီးကျယ်လှသည်တော့ မဟုတ်ပေ။ သို့သော်လည်း ကွားကော၏ သတင်းပေါက်ကြားမှုကြောင့် ဆရာကြီးဝေသည် လူအများ၏ အာရုံစိုက်မှုကို တစ်ကျော့ပြန် ရရှိလာခဲ့သည်။

"အား အား အား အားလုံး မြန်မြန်သွားကြည့်ကြဦး၊ ဟိုတစ်ခါက ကွားကောသတင်းရဲ့ နောက်ဆက်တွဲ ထွက်လာပြီဟေ့၊ ဒါရိုက်တာကုန်း ထောက်ခံပေးထားတဲ့ ဝေဖုန်းယီက ဟွားကော် လက်ရေးလှစာလုံး နဲ့ ပန်းချီပြိုင်ပွဲမှာ လူကြိုက်အများဆုံး လက်ရာဆု ရသွားတယ်တဲ့"

"ဒါက အနုပညာရှင်တွေကို ဝိုင်းပြီးမဲထည့်ခိုင်းထားလို့ရတာ မဟုတ်ဘူးလား၊ ဒါက တရားမျှတမှု ရှိရဲ့လား "

အင်တာနက်အသုံးပြုသူ အများအပြားမှာ မကျေမနပ်ဖြစ်နေကြပုံရသည်။

"ဟုတ်တယ်၊ အခုလို ရွေးချယ်မှုမျိုးက အဆက်အသွယ်နဲ့ ဩဇာအာဏာ ပြိုင်ပွဲကြီး ဖြစ်သွားမယ်ဆိုရင် ဘာထူးမှာလဲ၊ သာမန်လူတွေအတွက် ထိုးဖောက်ထွက်နိုင်ဖို့ အခွင့်အရေးတောင် မရှိတော့ဘူးလား "

သို့သော် အချို့မှာမူ အမြင်ကွဲပြားကြသည်။

"ဒါပေမဲ့ ဒါက မူလကတည်းက မဲပေးပြီး ရွေးချယ်ရတဲ့ဆုပဲလေ၊ လူတိုင်းမှာ ကိုယ်ကြိုက်တဲ့သူကို မဲပေးပိုင်ခွင့်ရှိတာ မဟုတ်ဘူးလား၊ ဝေဖုန်းယီက တကယ်ပဲ မဲတွေအများကြီးရခဲ့တယ်ဆိုရင် ဒါဟာ သူဘယ်လောက်အထိ လူကြိုက်များလဲဆိုတာကို ပြနေတာပဲလေ"

"အဲဒါလည်း ဟုတ်ပါရဲ့၊ ဒါပေမဲ့ တစ်ခုခုတော့ မှားနေသလိုပဲ၊ အကယ်၍ ရွေးချယ်မှုတွေက အာဏာပြိုင်ပွဲတွေ ဖြစ်ကုန်ရင် အဲဒီဆုရဲ့တန်ဖိုးက ဘယ်မှာရှိတော့မလဲ "

ဝေဖုန်းယီ လူကြိုက်အများဆုံး လက်ရာဆု ရရှိခြင်းအပေါ် အင်တာနက်အသုံးပြုသူများ အငြင်းပွားနေကြစဉ်မှာပင်၊ နောက်ထပ် သတင်းတစ်ခုက သူတို့ကို မှင်တက်သွားစေခဲ့ပြန်သည်။

"{ လင့်ခ် } ယုံကျန်း လက်ရေးလှစာလုံး နှင့် ပန်းချီအသင်းက ဝေဖုန်းယီ၏ဟွားကော် လက်ရေးလှစာလုံး နှင့် ပန်းချီပြိုင်ပွဲတွင် ပထမဆု ဆွတ်ခူးနိုင်မှုအတွက် လှိုက်လှိုက်လှဲလှဲဂုဏ်ပြုအပ်ပါသည်"

"ဒီလင့်ခ်က ဘာကို ဆိုလိုတာလဲ ဝေဖုန်းယီက လူကြိုက်အများဆုံး လက်ရာဆု တင်မကဘဲ ပထမဆုကိုပါ ရသွားတာလား "

"ငါ တရားဝင်ဝဘ်ဆိုဒ်ကို သွားစစ်ကြည့်ပြီးပြီ၊ ဆုရတဲ့စာရင်းကို ကြေညာထားတယ်၊ ငါ အကြမ်းဖျင်းကြည့်ရသလောက်တော့ လူကြိုက်အများဆုံး လက်ရာဆုက ဖျော်ဖြေရေးသက်သက် ဆုမျိုးဖြစ်လို့ လက်မှတ်ပဲရတာ၊ ဒါပေမဲ့ လက်ရာတွေရဲ့ အရည်အသွေးကိုတော့ ကျွမ်းကျင်ပညာရှင်ဒိုင်တွေက အုပ်စုအလိုက် အကဲဖြတ်တာ၊ ဆိုလိုတာက လက်ရေးလှအုပ်စု၊ တရုတ်ရိုးရာပန်းချီအုပ်စု ဆိုပြီးခွဲထားသလို၊ အဲဒီထဲမှာမှ ကျွမ်းကျင်ပညာရှင်အုပ်စု ၊ အပျော်တမ်းအုပ်စု၊ ကလေးသူငယ်အုပ်စု စသဖြင့် ထပ်ခွဲထားတာ၊ ဒီ ဝေဖုန်းယီ ဆိုတဲ့လူ ရသွားတဲ့ ပထမဆုက ကျွမ်းကျင်ပညာရှင်အုပ်စုမှာ နံပါတ် (၁) ရတာဗျ၊ အဲဒီဆုက ဂုဏ်သိက္ခာ အတော်လေး ကြီးတာ"

"ငါ ကြည့်လိုက်တော့ ဒုတိယနဲ့ တတိယရတဲ့သူတွေက ပန်းချီအသင်းအသီးသီးရဲ့ ဥက္ကဋ္ဌတွေ ဒါမှမဟုတ် နာမည်ကြီး ပါမောက္ခတွေချည်းပဲ၊ ဒါပေမဲ့ ဒီဝေဖုန်းယီရဲ့ အလုပ်အကိုင်နေရာမှာ ဟဲယဲ့တည်းခိုခန်း လို့ ရေးထားတာက တကယ်ကို ထူးဆန်းနေတယ်၊ ဒါ နောက်ကွယ်မှာ တစ်ခုခု ရှိနေတာ သေချာတယ်"

"ဟဲဟဲ ငါ ပြောသားပဲ၊ နောက်ကွယ်မှာ တစ်ခုခု ရှိပါတယ်ဆိုတာ ခင်ဗျားတို့က မယုံကြဘူး၊ အခုတော့ သူက သူ့ရဲ့အခွင့်ထူးခံ အရှိန်အဝါကို လက်တွေ့ပြပြီး ငါတို့အပေါ် နင်းခြေသွားပြီ၊ ဒီတစ်ခါတော့ ဘယ်သူကများ သူ့ဘက်က ဆင်ခြေပေးဦးမလဲ ကြည့်ကြသေးတာပေါ့ "

"သေချာ စုံစမ်းစစ်ဆေးကြစမ်းပါ ဒီတည်းခိုခန်းက ဘယ်လိုအာဏာမျိုး ရှိနေလို့လဲ၊ ဟွားကော် လက်ရေးလှ နဲ့ ပန်းချီဆုကိုတောင် ခြယ်လှယ်နိုင်နေတာလား၊ ဒါကို အသေးစိတ် စုံစမ်းရမယ် "

လူထုအမြင်များမှာ တစ်ဖန်ပြန်လည် ဆူပွက်လာခဲ့သည်။ ဟဲယဲ့တည်းခိုခန်း၏ ရှင်းလင်းချက်နှင့် ရှေ့နေစာကို မြင်ပြီးနောက် တွေဝေသွားကြသော အင်တာနက်အသုံးပြုသူများသည် ယခုအခါ ပြန်လည် မရေမရာ ဖြစ်လာကာ အချင်းချင်း အပြင်းအထန် ငြင်းခုံနေကြတော့၏။ တစ်ချိန်တည်းမှာပင် ဟဲယဲ့တည်းခိုခန်းနှင့် ဝေဖုန်းယီတို့၏ လူကြိုက်များမှုမှာ ဒုံးပျံတစ်စင်းကဲ့သို့ပင် အရှိန်အဟုန်ဖြင့် ထိုးတက်သွားခဲ့သည်။ ဝေဖုန်းယီ ဆုရရှိသွားသည်ကို ကြားလိုက်ရသဖြင့် စုဟယ်မှာ သဘာဝအတိုင်းပင် ဝမ်းသာသွားရ၏။ သူမသည် ဆရာကြီးဝေ ကိုယ်တိုင် ရေးသားနေသည်ကို မျက်မြင်တွေ့ဖူးသူဖြစ်ရာ သူမည်မျှ ကျွမ်းကျင်သည်ကို ကောင်းစွာ သိထားသည်။ ထို့ကြောင့် ဆရာကြီးဝေ ဆုရရှိခြင်းမှာ လုံးဝ ထိုက်တန်လှပေ၏။ ဆရာကြီးဝေ၏ စုတ်ချက်အောက်တွင် လိုင်းတစ်ခုချင်းစီတိုင်းမှာ ခွန်အားနှင့် အလှတရားများဖြင့်ပြည့်နှက်နေသည်။ သူ၏ လက်ရေးလှစာလုံးသည် မှင်စက်များ စုစည်းထားခြင်းသက်သက် မဟုတ်ဘဲ စိတ်ခံစားမှုနှင့် ဝိညာဉ်ကို ဖော်ပြနေခြင်း ဖြစ်သည်။

စုဟယ်သည် ဤကိစ္စကို လီရှီနှင့် ဆွေးနွေးရန် ပြင်လိုက်သည်။ လီရှီသည်လည်း ဆရာကြီးဝေအတွက် နေ့တိုင်း မဲပေးနေသူ ဖြစ်သည်မဟုတ်ပါလော။ သို့သော် သူမ စကားပြောရန် ပြင်လိုက်စဉ်မှာပင် တံခါးဝမှ ရှင်းလင်းလှသော မြည်သံနှစ်ချက် ထွက်ပေါ်လာသည်။ စုဟယ် အနည်းငယ် တုံ့သွားပြီးမှ သူမ စောင့်မျှော်နေသော ပါဆယ်လ်ပစ္စည်း ရောက်ရှိလာပြီဖြစ်ကြောင်း သတိပြုမိလိုက်၏။ သူမသည် တံခါးဝသို့ အမြန်လျှောက်သွားရာ အပြင်ဘက်တွင် ဖေးရွှန်း အမြန်ချောပို ဝတ်စုံဝတ်ထားသော ဝန်ထမ်းတစ်ဦးနှင့်အတူ အနီးနားတွင် ရပ်ထားသော ပစ္စည်းတင်လှည်းကို တွေ့လိုက်ရသည်။ ဖေးရွှန်း အမြန်ချောပို့ ဝန်ထမ်းသည် လုပ်ငန်းခွင်အပြုံးတစ်ခုဖြင့် လက်ထဲတွင် ဖောင်းကားနေသော စာရွက်စာတမ်းအိတ် သုံးအိတ်ကို ကိုင်ထား၏။ အိတ်များ၏ ထောင့်စွန်းများကို သူ၏ လက်မောင်းကြားတွင် သေသေချာချာ ညှပ်ထားပြီး၊ ကျန်လက်တစ်ဖက်မှာမူ ပစ္စည်းလက်ခံရရှိကြောင်း အတည်ပြုရန် အီလက်ထရွန်နစ် ကိရိယာတစ်ခုကို ကိုင်ထားသည်။ စုဟယ်သည် ပစ္စည်းလက်ခံရန် လက်နှစ်ဖက်ကို ဖြန့်ပေးလိုက်သောအခါ အမြန်ချောပို့ဝန်ထမ်းမှာ အိတ်များကို တစ်ခုပြီးတစ်ခု ကမ်းပေးလိုက်၏။

သူမသည် ဦးစွာ အပေါ်ဆုံးအိတ်ကို လက်တစ်ဖက်ဖြင့် လှမ်းယူလိုက်ရာ၊ အိတ်၏ အလေးချိန်ကို ခံစားလိုက်ရသဖြင့် သူမ၏ မျက်လုံးများတွင် အံ့သြရိပ်များ ပေါ်သွားသည်။ ထို့နောက် ကျန်လက်တစ်ဖက်ဖြင့် ဒုတိယအိတ်ကို ယူလိုက်ပြီး နောက်ဆုံးတွင် တတိယအိတ်ကို ယူလိုက်၏။ အိတ်တစ်အိတ်ချင်းစီ၏ အလေးချိန်နှင့် အထူမှာ သူမ မျှော်လင့်ထားသည်ထက် ကျော်လွန်နေသည်။ ဝန်ထမ်းသည် စုဟယ်၏ လက်မှတ်ကို အီလက်ထရွန်နစ် ကိရိယာပေါ်တွင် မှတ်တမ်းတင်ပြီးနောက် ယဉ်ကျေးစွာ ခေါင်းညိတ်ပြကာ ထွက်ခွာသွားတော့၏။ ဝန်ထမ်း ထွက်သွားပြီးနောက် စုဟယ်သည် ဤစာရွက်စာတမ်းအိတ်များအတွင်းရှိ အကြောင်းအရာများကို အသေးစိတ် စစ်ဆေးရန် တည်းခိုခန်းအတွင်းသို့ ပြန်ဝင်လာခဲ့သည်။ သူမသည် ဆိုဖာပေါ်တွင် အသာအယာ ထိုင်လိုက်ပြီး ရှေ့ရှိ စားပွဲပေါ်တွင် စာရွက်စာတမ်းအိတ်များကို တစ်အိတ်ချင်းစီ စီထားလိုက်၏။ သူမသည် ပထမဆုံးအိတ်ကို ဖွင့်လိုက်ရာ၊ အတွင်း၌ ထူထဲသော စာရွက်စာတမ်းပုံကြီးနှင့်အတူ အပေါ်ဆုံးတွင် လက်ရာမြောက်လှသော လက်မှတ်တစ်ခု ပါရှိသည်။ စုဟယ်၏ အကြည့်မှာ ထိုလက်မှတ်ပေါ်ရှိ စာသားများဆီသို့ ချက်ချင်း ရောက်ရှိသွား၏။

"မစ္စတာ ဝေဖုန်းယီ၊ သင်၏ လက်ရေးလှစာလုံးအနုပညာနယ်ပယ်တွင် ထူးချွန်သော စွမ်းဆောင်မှုများနှင့် အောင်မြင်မှုများကို အသိအမှတ်ပြုသောအားဖြင့် ဆာလာနန် နိုင်ငံ၏ ယဉ်ကျေးမှုဖလှယ်ရေး သံတမန်ဘွဲ့ကို ဤလက်မှတ်ဖြင့် ချီးမြှင့်အပ်ပါသည်"

လက်မှတ်၏ အောက်ခြေတွင် ဆရာကြီးဝေ၏ အမည်နှင့် ဆာလာနန်နိုင်ငံ၏ နိုင်ငံတော်တံဆိပ်ကို ခန့်ညားထည်ဝါစွာ တွေ့မြင်ရသည်။ စုဟယ်သည် ထိုလက်မှတ်ကို အသာအယာ ဘေးသို့ဖယ်ထားပြီး အောက်ရှိ စာရွက်စာတမ်းများကို ဆက်လက် လှန်လှောကြည့်ရှု၏။ ထိုစာရွက်စာတမ်းများသည် ဆရာကြီးဝေ၏ မူလတန်းမှ ယခုအချိန်အထိ ပညာရေးဆိုင်ရာ အတွေ့အကြုံ အားလုံးကို အသေးစိတ် မှတ်တမ်းတင်ထားကြောင်း သူမ တွေ့ရှိရသည်။ စာရွက်စာတမ်း တစ်ခုချင်းစီကို သေသေသပ်သပ် ချုပ်လုပ်ထားပြီး စာရွက်များ၏ အနားသတ်များမှာ ဟောင်းနွမ်းနေကာ သဘာဝအတိုင်း ဝါကျင်ကျင် အရောင်သန်းနေသည်။ သူမသည် ဆရာကြီးဝေ၏ မူလတန်းကျောင်းဆင်း လက်မှတ်ကို တွေ့လိုက်ရရာ ထိုထဲတွင် သူ ငယ်စဉ် ဓာတ်ပုံလေး တစ်ပုံလည်း ပါရှိ၏။ ထို့နောက် စုဟယ်သည် ဆရာကြီးဝေ၏ အလယ်တန်း အမှတ်စာရင်းနှင့် ကျောင်းဆင်းလက်မှတ်တို့ကို လှန်ကြည့်သည်။ အမှတ်စာရင်းတွင် သူ၏ ဘာသာရပ်တိုင်းအတွက် ရမှတ်များမှာ ထူးထူးခြားခြား ကောင်းမွန်လှသည်။ ၎င်းတင်မကသေးဘဲ ဆရာကြီးဝေ၏ တက္ကသိုလ်ဝင်ခွင့်စာကိုလည်း စုဟယ် မြင်တွေ့လိုက်ရ၏။ စနစ်မှာ ဆရာကြီးဝေအတွက် တက္ကသိုလ်ဘွဲ့တစ်ခုကိုပါ စီစဉ်ပေးထားခြင်းလား။ ဝင်ခွင့်စာတွင် ဆရာကြီးဝေသည် နာမည်ကြီး တက္ကသိုလ်တစ်ခုတွင် လက်ရေးလှအနုပညာအထူးပြုဖြင့် တက်ရောက်ခွင့်ရရှိခဲ့ကြောင်း ဖော်ပြထားသည်။

သူမ ဆက်လက် လှန်လှောကြည့်ရာ ဆရာကြီးဝေ၏ တက္ကသိုလ်ကျောင်းဆင်းလက်မှတ်နှင့် ဘွဲ့လက်မှတ်တို့ကို တွေ့ရှိရသည်။ လက်မှတ်များပေါ်တွင် တက္ကသိုလ်တံဆိပ်နှင့် ကျောင်းအုပ်ကြီး၏ လက်မှတ်တို့ ပါရှိရာ ဆရာကြီးဝေ၏ တက္ကသိုလ်ကျောင်းသားဘဝ ပညာရေးအောင်မြင်မှုများကို သက်သေထူနေ၏။ စနစ်မှာ ဆရာကြီးဝေအတွက် ဤမျှအထိ အသေးစိတ် ပြင်ဆင်ပေးထားလိမ့်မည်ဟု စုဟယ် မျှော်လင့်မထားခဲ့ပေ။ သူမသည် စာရွက်စာတမ်းအိတ်ကို ဆက်လက် လှန်လှောကြည့်ရာ ဆရာကြီးဝေအတွက် နောက်ထပ် ကိုယ်ရေးကိုယ်တာ အထောက်အထားများကို တွေ့ရှိရပြန်သည်။ လက်ရေးလှစာလုံးပြပွဲများနှင့် ပြိုင်ပွဲအမျိုးမျိုးတွင် ပါဝင်ခဲ့သည့် ဆုတံဆိပ်များနှင့် လက်ရေးလှ အနုပညာအတွက် သူ၏ ပေးဆပ်မှုများအတွက် ဂုဏ်ထူးဆောင် လက်မှတ်များလည်းပါရှိ၏။ စုဟယ်သည် ဟုန်လျန် အတွက် စနစ်မှ ပြင်ဆင်ပေးထားသော စာရွက်စာတမ်းများကိုလည်း ပြန်လည်သတိရသွားကာ အတွေးနက်သွားသည်။

စနစ်သည် ကတ်ဇာတ်ကောင်၏ ကျွမ်းကျင်မှုနှင့် အထူးပြုချက်ပေါ် မူတည်၍ အချက်အလက်များကို ပြင်ဆင်ပေးခြင်း ဖြစ်သည်။ ဥပမာအားဖြင့် ဟုန်လျန်၏ ကိုယ်ရေးစာရွက်စာတမ်းများတွင် ကျန်းမာရေးထောက်ခံချက်နှင့် ဆေးစစ်ချက် အစီရင်ခံစာများ ပါရှိသော်လည်း ဝေဖုန်းယီ၏ စာရွက်စာတမ်းများတွင်မူ ၎င်းတို့ မပါရှိချေ။ စုဟယ်သည် ပထမစာရွက်စာတမ်းအိတ်မှ အကြောင်းအရာများကို ပြန်လည်စီစဉ်ပြီးနောက် ဒုတိယအိတ်ကိုဖွင့်လိုက်၏။ မျှော်လင့်ထားသည့်အတိုင်းပင် မစ္စကျိ ၏ စာရွက်စာတမ်းများမှာ အလွန်အမင်း များပြားခြင်း မရှိဘဲ သူမ၏ ကိုးနှစ်တာ မဖြစ်မနေ သင်ကြားရမည့် ပညာရေး ဆင်းလက်မှတ်သာ ပါရှိသည်။ ယွမ်ဒန်းချူး၏ ကိုယ်ရေးစာရွက်စာတမ်းများတွင်မူ ယွမ်ဒန်းချူး အမြဲတမ်း တောင့်တနေခဲ့သော တာအိုဘုန်းကြီးလက်မှတ်ပါရှိ၏။ ဤတာအိုဘုန်းကြီးလက်မှတ် ရှိနေသရွေ့ ယွမ်ဒန်းချူးသည် မောက်ရှန်းတောင်သို့ ဝင်ကြေးပေးစရာ မလိုဘဲ သွားနိုင်တော့မည် ဖြစ်သည်။

166

စောစောရောက်လာခြင်းထက် အချိန်ကိုက်ရောက်လာခြင်းမှာ ပို၍ ထိရောက်သည်ဟု ဆိုရပေမည်။ စုဟယ်သည် ဆရာကြီးဝေ၊ မစ္စကျိနှင့် ယွမ်ဒန်းချူးတို့ထံသို့ လူသားအဖြစ် ရှင်သန်နေထိုင်မှုဆိုင်ရာ အထောက်အထားများကို ဝေငှပေးပြီး သူတို့၏ ကိုယ်ရေးအချက်အလက်သစ်များကို ရင်းနှီးကျွမ်းဝင်အောင် မှတ်သားခိုင်းမည့်အချိန်တွင် သက်ဆိုင်ရာ ဌာနအသီးသီးမှ တာဝန်ရှိသူများ ချက်ချင်းဆိုသလို ရောက်ရှိလာကြတော့သည်။

တည်းခိုခန်းတံခါးဝတွင် ယူနီဖောင်းဝတ်ထားသော အရာရှိတစ်စုရပ်နေကြပြီး တစ်ယောက်ချင်းစီ၏ မျက်နှာတွင် တည်ကြည်လေးနက်သော အမူအရာများနှင့် ထက်မြက်သော မျက်လုံးများ ရှိနေကြသည်။ သူတို့၏ အရေအတွက်မှာ ယခင်က လာရောက်စစ်ဆေးခဲ့သမျှ အကြိမ်များထက် ပိုမိုများပြားနေပြီး အရှိန်အဝါဖြင့် ဖိနှိပ်ထားသကဲ့သို့ ပြင်းထန်သော ခံစားချက်ကို ပေးစွမ်းနေ၏။ ဟဲယဲ့တည်းခိုခန်းတွင် အွန်လိုင်း၌ ပျံ့နှံ့နေသော ကောလာဟလများကဲ့သို့ ပြဿနာမျိုး လုံးဝမရှိကြောင်း စုဟယ် သိထားသော်လည်း သူမ၏ ရင်ထဲတွင် မသိမသာ တင်းကျပ်သွားရသည်။ သို့သော် သူမသည် စိတ်အခြေအနေကို ချက်ချင်း ပြန်လည်ထိန်းညှိလိုက်ပြီး ပြုံးလျက် မေးလိုက်၏။

"မင်္ဂလာပါ ကျွန်မက ဟဲယဲ့တည်းခိုခန်းရဲ့ သူဌေး စုဟယ်ပါ၊ ဘာများ အကူအညီပေးရမလဲရှင့်"

ခေါင်းဆောင်ဖြစ်သူ အရာရှိမှာ ရှေ့သို့ တစ်လှမ်းတက်လာပြီး စုဟယ်၏ မျက်နှာကို ဝေ့ဝဲကြည့်ရှုလိုက်ကာ အေးစက်သောအသံဖြင့် ပြောလိုက်သည်။

"ကျွန်တော်တို့ အွန်လိုင်းကနေ တိုင်ကြားစာအချို့ လက်ခံရရှိထားလို့ တည်းခိုခန်းကို ပုံမှန်စစ်ဆေးမှု ပြုလုပ်ဖို့ လိုအပ်ပါတယ်၊ ကျွန်တော်တို့ရဲ့ လုပ်ငန်းဆောင်တာတွေကို ပူးပေါင်းကူညီပေးပါ"

စုဟယ်သည် ထိတ်လန့်တုန်လှုပ်ခြင်း မရှိဘဲ နားလည်မှုရှိရှိနှင့် ပူးပေါင်းဆောင်ရွက်မည်ဖြစ်ကြောင်း ခေါင်းညိတ်ပြလိုက်သည်။ သူမသည် ဘေးသို့ အသာဖယ်ပေးလိုက်ပြီး တာဝန်ရှိသူများကို တည်းခိုခန်းအတွင်းသို့ ဝင်ရန် အချက်ပြလိုက်တော့၏။ တာဝန်ရှိသူများသည် တစ်ယောက်ပြီးတစ်ယောက် အထဲသို့ တန်းစီဝင်လာကြပြီး သူတို့၏ လှုပ်ရှားမှုများမှာ လျင်မြန်ဖြတ်လတ်ကာ စနစ်တကျ ရှိလှသည်။ သူတို့သည် တည်းခိုခန်းအတွင်းရှိ လွတ်နေသော အခန်းအားလုံးကို အမြန်ဆုံးစစ်ဆေးကြ၏။ သူတို့ထဲမှ အချို့သည် ဧည့်သည်များ တည်းခိုနေသော အခန်းများကို စစ်ဆေးရန် လီရှီထံမှ အခန်းကတ်များကို ယူဆောင်သွားကြသည်။ သူတို့၏ အကြည့်များသည် အခန်းတွင်းရှိ နေရာလွတ်မကျန် သံသယဖြစ်ဖွယ် အစအနများ ရှာဖွေနေသည့်အလား စိုက်ကြည့်နေတတ်ကြ၏။

စုဟယ်သည် ဘေးတွင် ရပ်နေရင်း သူတို့၏ လှုပ်ရှားမှုတိုင်းကို တိတ်တဆိတ် စောင့်ကြည့်နေမိသည်။ ထိုတာဝန်ရှိသူများ၏ လုပ်ငန်းခွဲဝေပုံမှာ ရှင်းလင်းပြတ်သားနေသည်ကို မြင်ရသဖြင့် သူတို့ မလာရောက်မီကပင် ဟဲယဲ့တည်းခိုခန်းအကြောင်းကို အသေအချာ လေ့လာထားပြီးဖြစ်ကြောင်း သူမ သိလိုက်၏။ ခဏတာ စစ်ဆေးပြီးနောက်တွင်မူ တာဝန်ရှိသူများမှာ ထူးခြားသော မူမမှန်မှု တစ်စုံတစ်ရာ ရှာမတွေ့သဖြင့် သူတို့၏ မျက်နှာများမှာ အနည်းငယ် ပြေလျော့သွားကြသည်။ ဦးဆောင်သူ အရာရှိမှာ လှည့်ကြည့်ကာ စုဟယ်ကို ပြောလိုက်၏။

"ဒီတည်းခိုခန်းနဲ့ ပတ်သက်တဲ့ သက်ဆိုင်ရာ စာရွက်စာတမ်းတွေနဲ့ အချက်အလက်တွေကို ကျေးဇူးပြုပြီး ထုတ်ပေးပါ၊ ကျွန်တော်တို့ အတည်ပြုစစ်ဆေးဖို့ လိုပါတယ်"

စုဟယ် ခေါင်းညိတ်လိုက်ပြီး ကြိုတင်စုဆောင်းထားသော စာရွက်စာတမ်းများကို အရာရှိထံသို့ တစ်ခုချင်းစီ ကမ်းပေးလိုက်သည်။ အရာရှိများသည် စာရွက်စာတမ်းများကို လက်ခံယူကာ ဂရုတစိုက် စတင်စစ်ဆေးတော့၏။ တည်းခိုခန်း၏ လုပ်ငန်းလိုင်စင်များအပြင် ဝန်ထမ်းများ၏ ကိုယ်ရေးကိုယ်တာ အထောက်အထားများလည်း ပါဝင်သည်။ သူတို့၏ လုပ်ဆောင်ချက်များမှာ အသေးစိတ်ကျပြီး အလွန်ပင် ကျွမ်းကျင်လေးနက်သော ပုံစံရှိသည်။ စုဟယ်မှာမူ ဘေးတွင် ရပ်နေရင်း သူမ၏ လက်များကို မသိစိတ်ဖြင့် တင်းတင်းဆုပ်ထားမိကာ အနည်းငယ် စိုးရိမ်နေမိ၏။

တည်းခိုခန်း၏ စာရွက်စာတမ်းများမှာ ပြဿနာမရှိသော်လည်း စနစ်မှ ထုတ်ပေးထားသော ကတ်ဇာတ်ကောင်များ၏ အထောက်အထားများမှာတော့ သူမကို အမြဲတမ်း စိတ်ပူစေသည်။ သေးငယ်သော ပြဿနာတစ်ခုပင်လျှင် ကြီးမားသော နောက်ဆက်တွဲဆိုးကျိုးများကို ဖြစ်ပေါ်စေနိုင်သောကြောင့်ပင်။ သူမ၏ အကြည့်မှာ အရာရှိများ၏ လှုပ်ရှားမှုတိုင်းအပေါ်တွင် တည်မြဲနေပြီး မည်သည့်အသေးစိတ်အချက်ကိုမျှ လွတ်သွားမည်ကို ကြောက်ရွံ့နေမိသည်။ အချိန်များမှာ တစ်မိနစ်ပြီးတစ်မိနစ် ကုန်ဆုံးသွားပြီးနောက် နောက်ဆုံးတွင် အရာရှိများမှာ စစ်ဆေးမှုများကို အဆုံးသတ်လိုက်ကြ၏။ သူတို့၏ အမူအရာများမှာ လုံးဝ ပြေလျော့သွားပြီး ခေါင်းဆောင်အရာရှိမှာ စုဟယ်ကို ပြောလိုက်သည်။

"ကျွန်တော်တို့ စစ်ဆေးပြီးတဲ့နောက်မှာတော့ တည်းခိုခန်းရဲ့ သက်ဆိုင်ရာ စာရွက်စာတမ်းနဲ့ အချက်အလက် အားလုံးဟာ အစစ်အမှန်ဖြစ်ပြီး တရားဝင်ခိုင်လုံကြောင်း တွေ့ရပါတယ်၊ ဘာပြဿနာမှ ရှာမတွေ့ပါဘူး၊ ဒါတွေကို မှတ်တမ်းတင်ထားဖို့အတွက် ကျွန်တော်တို့ ဓာတ်ပုံရိုက်ယူသွားဖို့လည်း လိုအပ်ပါတယ်"

"ဟုတ်ကဲ့၊ အဆင်ပြေပါတယ်ရှင်"

စုဟယ် ပြုံးလိုက်သည်။ ကံကောင်းထောက်မစွာပင် သူမသည် ဤစစ်ဆေးမှုအတွက် ကြိုတင်ပြင်ဆင်ထားခဲ့သဖြင့် ယခုအခါ အခြေအနေများ ငြိမ်သက်သွားပြီဖြစ်ရာ ဆရာကြီးဝေနှင့် အခြားသူများအတွက် စိတ်ပူစရာ မလိုတော့ပေ။ ဧည့်ခန်းများအတွင်းသို့ ဝင်ရောက်စစ်ဆေးခဲ့သော တာဝန်ရှိသူများသည် သက်သေခံပစ္စည်းထည့်သည့် အိတ်များဖြင့် ပြန်ထွက်လာကြရာ စုဟယ်သည် အိတ်အတွင်း၌ ဝက်သစ်ချပင်အရွက်အချို့ကို မြင်လိုက်ရသည်။ ထိုတာဝန်ရှိသူများသည် အိပ်မက်လှုံ့ဆော်အမွေးနံ့သာ နှင့် ပတ်သက်ပြီး ဧည့်သည်များကို မေးမြန်းစုံစမ်းခဲ့ပုံရပြီး ထို့ကြောင့်ပင် စစ်ဆေးရန်အတွက် ဤအရွက်များကို ယူဆောင်သွားခြင်းဖြစ်ပေလိမ့်မည်။ ဝက်သစ်ချရွက်များကို သက်သေခံအဖြစ် ယူဆောင်သွားသည့်အပြင် စုဟယ်နှင့် တည်းခိုခန်းဝန်ထမ်းများကိုလည်း ပိုမိုနက်ရှိုင်းသော စစ်ဆေးမှုတစ်ခုဖြစ်သည့် ဆံပင်နမူနာနှင့် သွေးစစ်ဆေးမှုများကို ပူးပေါင်းဆောင်ရွက်ပေးရန် တောင်းဆိုခဲ့သည်။ ၎င်းမှာ တည်းခိုခန်းအတွင်းရှိ တစ်စုံတစ်ယောက်သည် တားမြစ်ထားသော ပစ္စည်းများ သုံးစွဲထားခြင်း ရှိ၊ မရှိ ဆုံးဖြတ်ရန် ဖြစ်၏။ ဦးဆောင်သူ အရာရှိမှာ ရှေ့သို့တက်လာပြီး တည်ငြိမ်ပြတ်သားသော အသံဖြင့် ပြောလိုက်သည်။

"သူဌေးစု၊ စုံစမ်းစစ်ဆေးမှု ပြည့်စုံစေဖို့အတွက် ကျွန်တော်တို့ ခင်ဗျားနဲ့ တည်းခိုခန်း ဝန်ထမ်းတွေဆီက ဆံပင်နမူနာတွေနဲ့ သွေးနမူနာတွေကို ရယူဖို့ လိုအပ်ပါတယ်၊ ကျွန်တော်တို့ရဲ့ အလုပ်ကို နားလည်ပေးပြီး ပူးပေါင်းဆောင်ရွက်ပေးပါ"

စုဟယ် ခေါင်းညိတ်လိုက်သည်။ ဤကဲ့သို့ စစ်ဆေးမှုမျိုးမှသာ အွန်လိုင်းမှ သံသယများကို လုံးဝအမြစ်ပြတ်အောင် ရှင်းလင်းနိုင်ပြီး တည်းခိုခန်း၏ ဂုဏ်သိက္ခာကို ပြန်လည်ရရှိနိုင်မည်ဖြစ်ကြောင်း သူမ နားလည်ထား၏။ တာဝန်ရှိသူများမှာ သူတို့၏ အလုပ်ကို စတင်ကြတော့သည်။ သူတို့မှာ စုဟယ်ကို ဧည့်ခန်းမတွင် ကုလားထိုင်တစ်လုံး၌ ထိုင်ခိုင်းလိုက်ပြီး၊ နည်းပညာရှင်တစ်ဦးမှ သွေးဖောက်စစ်ဆေးသည့် ကိရိယာကို ကိုင်ကာ အနားသို့ ချဉ်းကပ်လာ၏။ စုဟယ်သည် သူမလက်မောင်းကို ဆန့်ပေးလိုက်ရာ နည်းပညာရှင်မှာ အရက်ပြန်ဂွမ်းဖြင့် လက်မောင်းကို သုတ်လိုက်ပြီး သွေးပြန်ကြောအတွင်းသို့ အပ်ကို ကျွမ်းကျင်စွာ ထိုးသွင်းလိုက်သည်။ ထို့နောက် အခြားနည်းပညာရှင်တစ်ဦးမှာ ညှပ်ဖြင့် စုဟယ်၏ ဦးခေါင်းမှ သေးငယ်သော ဆံပင်နမူနာတစ်ခုကို အသာအယာ နုတ်ယူလိုက်၏။

လီရှီနှင့် အခြားသူများသည်လည်း စုဟယ်၏ ဦးဆောင်မှုအောက်တွင် အထူးပင် ပူးပေါင်းဆောင်ရွက်ကြသည်။ သူတို့သည် တစ်ယောက်ပြီးတစ်ယောက် တန်းစီကာ သွေးဖောက်ခြင်းနှင့် နမူနာရယူခြင်းများကို ခံယူကြ၏။ တည်းခိုခန်းတွင် လူအများအပြားမရှိသလို၊ တာဝန်ရှိသူများ၏ လုပ်ဆောင်ချက်မှာလည်း ကျွမ်းကျင်လျင်မြန်လှသဖြင့် ဝန်ထမ်းများအတွက် အနှောင့်အယှက် အနည်းဆုံးဖြစ်အောင် လုပ်ဆောင်ပေးကြသည်။ နောက်ဆုံးလူဖြစ်သည့် ဟုန်လျန်ထံမှ နမူနာကို ရယူပြီးသောအခါ တာဝန်ရှိသူများမှာ သူတို့၏ ကိရိယာများကို ပြန်လည်သိမ်းဆည်းကြတော့သည်။ သူတို့သည် ဟုန်လျန်လုပ်ထားသောမုန့်အချို့ကိုလည်း အိတ်ထဲထည့်ကာ ယူဆောင်သွားကြ၏။ ဦးဆောင်သူအရာရှိမှာ စုဟယ်ကို တစ်ဖန် ကျေးဇူးတင်စကား ဆိုလိုက်ပြန်သည်။

"သူဌေးစု၊ နားလည်ပေးပြီး ပူးပေါင်းဆောင်ရွက်ပေးတဲ့အတွက် ကျေးဇူးတင်ပါတယ်၊ ကျွန်တော်တို့ ဒီစစ်ဆေးမှုတွေကို အမြန်ဆုံး အပြီးသတ်ပြီး ရလဒ်တွေကို လူထုထံ ချက်ချင်း အသိပေးသွားမှာပါ"

သူစတင်ရောက်ရှိလာချိန်နှင့် နှိုင်းယှဉ်ပါက သူ၏ အမူအရာမှာ များစွာပြေလျော့သွားပြီဖြစ်သည်။ ဤတာဝန်ရှိသူများသည် အမှုအခင်းများကို ကိုင်တွယ်ရာတွင် အတွေ့အကြုံ ရင့်ကျက်သူများ ဖြစ်ကြ၏။ အမှန်စင်စစ် သူတို့ တည်းခိုခန်းသို့ ရောက်ရှိလာသည်နှင့် ဤနေရာတွင် ပြဿနာရှိနိုင်ခြေ မရှိသလောက် နည်းပါးကြောင်း သိရှိထားပြီးသား ဖြစ်သည်။ ယခု စစ်ဆေးမှုမှာတော့ အွန်လိုင်းမှ ကောလာဟလများမှာ ဟာသတစ်ခုသာဖြစ်ကြောင်း သူတို့၏ ယုံကြည်ချက်ကို ပိုမိုခိုင်မာစေခဲ့၏။ တာဝန်ရှိသူများ စစ်ဆေးနေစဉ်အတွင်း တစ်စုံတစ်ယောက်မှာ တိတ်တဆိတ် ဓာတ်ပုံများ ရိုက်ကူးနေခဲ့သည်။ ထိုလူများသည် ထောင့်များတွင် ပုန်းကွယ်နေကြပြီး သူတို့၏လှုပ်ရှားမှုများကို မရည်ရွယ်သယောင် ဟန်ဆောင်ထားကြသော်လည်း ဟဲယဲ့တည်းခိုခန်း၏ ဧည့်ကြိုကောင်တာမှာ သိပ်မကျယ်လှသဖြင့် စုဟယ်မှာ သူတို့ကို ချက်ချင်း သတိထားမိလိုက်၏။ သို့သော်လည်း စုဟယ်သည် သူတို့ကို ချက်ချင်းသွားရောက်တားဆီးခြင်း မပြုခဲ့ပေ။ တာဝန်ရှိသူများနှင့် သူမ၏ဆက်ဆံပြောဆိုမှုများမှာ တရားဝင်ပြီး ပွင့်လင်းမြင်သာမှု ရှိကာ ဖုံးကွယ်ထားစရာဘာမှမရှိပေ။ သူမကိုယ်တိုင်မှာလည်း စည်းမျဉ်းစည်းကမ်းများနှင့် ဥပဒေများအတိုင်း လုပ်ဆောင်နေသူဖြစ်ရာ ရှက်ကြောက်နေစရာ အကြောင်းမရှိပေ။ ဤဓာတ်ပုံရိုက်နေသူများသည် ၎င်းတို့ကို အွန်လိုင်းပေါ်သို့ တင်ကြမည်မှာ သေချာလှပြီး စုဟယ်မှာတော့ ထိုအချက်အပေါ် အတော်လေး သဘောကျနေမိသည်။ ထိုဓာတ်ပုံများသည် တည်းခိုခန်းအတွက် သက်သေအထောက်အထားများ ဖြစ်လာနိုင်ပြီး၊ တည်းခိုခန်းကို စနစ်တကျ စစ်ဆေးမှု ခံယူပြီးကြောင်း ပြသရာရောက်ကာ နောက်ပိုင်းတွင် ရလဒ်များ ထွက်ပေါ်လာသည့်အခါ ပိုမိုယုံကြည်စိတ်ချရစေမည် ဖြစ်သောကြောင့် ဖြစ်ပေတော့၏။