အခန်း (၄၇-၄၈)

အခန်း (၄၇)

ဖရဲသီးစားခြင်းစနစ်က ရယ်မောသည်။ [ငါသာ အသေးစိတ် ရှင်းပြရမယ်ဆိုရင် ဟွာကျိုင်းဂိုဏ်းရဲ့ စတုတ္ထအကြီးအကဲအကြောင်း အတင်းအဖျင်းတွေက သုံးရက်သုံးည ဆက်ပြောလို့ ရတယ်ရယ်။]

နဉ်ရွှီ: …

“ဒါဆို အရင်ဆုံးစိတ်လှုပ်ရှားစရာ အကောင်းဆုံး အပိုင်းကိုပဲ မျှဝေပေါ့။ အောင်မြင်ခဲ့တာမျိုး မရှိတဲ့အပိုင်းတွေကို အသေးစိတ်ပြောဖို့ မလိုပါဘူး”

ဖရဲသီးစားခြင်းစနစ်က စိတ်လှုပ်ရှားစွာ ပြန်ဖြေလာသည်။ [ကောင်းပါပြီ။ သူနဲ့ အခုထိဆက်စပ်နေသေးတဲ့ သူနဲ့ စကြစို့။

သူတို့ထဲက တစ်ယောက်က ဟွာကျိုင်းဂိုဏ်းရဲ့ ဂိုဏ်းအကြီးအကဲပဲ၊ နှစ်ပေါင်း နှစ်ထောင်ကျော်ရှိနေပါပြီ။ သူ့ရဲ့ သားသမီးတွေက နှစ်တစ်ထောင်ကျော် ရှိနေကြပြီ။ ဒါက သူရဲ့အသက်က စတုတ္ထအကြီးအကဲရဲ့ အသက်ထက် ငါးဆကျော်ပိုတယ်လို့ ဆိုလိုတာပဲ။ သူ့ရဲ့သားသမီးတွေရဲ့ အသက်ကလည်း စတုတ္ထအကြီးအကဲရဲ့ အသက်ထက် နှစ်ဆကျော်ပိုတယ်]

နဉ်ရွှီ: !!!

ဒီလို အတင်းအဖျင်းမျိုးက ကျင့်ကြံခြင်းလောကမှာပဲ ရှိတယ်။ သာမန်လူသားလောကမှာဆိုရင် ဒီလောက် အသက်ကြီးတဲ့သူက မျက်နှာတစ်ခုလုံး အရေးအကြောင်းတွေ ပြည့်နေလောက်ပြီ။ ပြီးတော့ သူ့အသက်က စတုတ္ထအကြီးအကဲရဲ့ အသက်ထက် ငါးဆကျော် ပိုတယ်ဆိုတာကို စဉ်းစားကြည့်ပါဦး၊ စိတ်ကူးတောင် မယဉ်နိုင်ဘူး။

နဉ်ရွှီ၏ အတွေးများကို ရိပ်မိသွားသကဲ့သို့ ဖရဲသီးစားခြင်းစနစ်က ဖြည်းဖြည်းချင်း ပြောလာ၏။ [ဒီဂိုဏ်းအကြီးအကဲက အသက်ကြီးပေမယ့် အတော်လေး ရုပ်ရည်ချောမောနေတုန်းပဲ၊ ပြီးတော့ သူ့အရင်းအမြစ်တွေကို ရက်ရက်ရောရောပေးတယ်။ စတုတ္ထအကြီးအကဲက စတုတ္ထအကြီးအကဲဖြစ်လာရတဲ့ အကြောင်းရင်းက သူ့ရဲ့ အကူအညီတစ်စိတ်တစ်ပိုင်း ပါဝင်တယ်လေ]

နဉ်ရွှီက စိတ်ဝင်စားစွာ မေးမြန်းလိုက်သည်။ “သူ့ရဲ့ သားသမီးတွေကရော ဒီအကြောင်းကို သိလား”

ဖရဲသီးစားခြင်းစနစ်က ပြန်ဖြေလိုက်၏။ [မသိကြဘူး။ တကယ်တော့ နင်နဲ့ ငါ၊ သူတို့နှစ်ယောက်၊ ပြီးတော့ တစ်စုံတစ်ခုကို သံသယရှိနေတဲ့ နောက်တစ်ယောက်ကလွဲလို့ ကျင့်ကြံခြင်းလောက တစ်ခုလုံးမှာ ဒီကိစ္စကိုဘယ်သူမှ မသိကြဘူး]

ချီအာ: အခု၊ ကျွန်တော်လည်း ပါဝင်သွားပြီ!

[ဒီသိနေတဲ့ နောက်တစ်ယောက်ကတော့ ခိုင်မာတဲ့ သက်သေအထောက်အထားမရှိဘဲ သံသယလောက်ပဲ ရှိတဲ့သူနဲ့ ပိုတူတယ်]

နဉ်ရွှီက အံ့အားသင့်သွားသည်။ “သူက ဒီလောက်တောင် လျှို့ဝှက်ထားတာလား”

[ဘာလုပ်နိုင်မှာလဲ။ ဂိုဏ်းအကြီးအကဲမှာ အရမ်းစိတ်ဓာတ်ပြင်းထန်တဲ့ လက်တွဲဖော်ရှိတယ်။ သူ့ထက် ကျင့်ကြံမှုအဆင့် ပိုမြင့်တယ်။ သူ့ရဲ့သားနဲ့သမီးကလည်း အားနည်းတာ မဟုတ်ဘူး]

[ဒီကိစ္စ ဖော်ထုတ်ခံရပြီး သူ့ရဲ့ လက်တွဲဖော်နဲ့ သားသမီးတွေက သူက စတုတ္ထအကြီးအကဲကို အရင်းအမြစ်များစွာပေးခဲ့ပြီး ဟွာကျိုင်းဂိုဏ်းရဲ့အကြီးအကဲ ဖြစ်လာအောင်တောင် ကူညီခဲ့တယ်ဆိုတာသိသွားရင်၊ ဂိုဏ်းအကြီးအကဲတစ်ယောက်အနေနဲ့… ပြဿနာကြီးကြီးမားမား တက်သွားမှာပေါ့။]

ဖရဲသီးစားခြင်းစနစ်က “ပြဿနာကြီးကြီးမားမား တက်” မည်ဟု ပြောသော်လည်း ၎င်း၏လေသံတွင် မလွဲမသွေ ပျော်ရွှင်မှုရှိနေသည်။ ၎င်းသည် ပြဇာတ်ကြည့်ရတာကို နှစ်သက်ပြီး ဤကိစ္စဖော်ထုတ်ခံရကာ မြင်ကွင်းကို ပျော်ရွှင်စွာခံစားနိုင်ရန် မျှော်လင့်နေလေ၏။

ဂိုဏ်းအကြီးအကဲ၏ လက်တွဲဖော်နှင့် သန်းနျန်တို့သည် လုံးဝ မတူညီကြသည်ကို သတိပြုသင့်သည်။

သန်းနျန်သည် သဘာဝအတိုင်း အားနည်းပြီး ကြင်နာညင်သာသူ ဖြစ်သည်။ ချီဝူကျန်းရမ်၏ သစ္စာဖောက်ခြင်းကို ခံခဲ့ရသော်လည်း သူမသည် ကြီးကြီးမားမား ဆူပူခြင်းမရှိဘဲ သူနှင့်ဆက်ဆံရေးကိုသာ ဖြတ်တောက်ခဲ့သည်။ သို့သော် ဂိုဏ်းအကြီးအကဲ၏ လက်တွဲဖော်သည် တိုက်ပွဲပေါင်းများစွာကို ဖြတ်သန်းခဲ့သူ ဖြစ်ပါသည်။

ဟွာကျိုင်းဂိုဏ်းသည် မတည်မငြိမ် မဖြစ်နိုင်သော်လည်း ဤကြီးမားသော ပုဂ္ဂိုလ်က အရာများကို လွယ်လွယ်နှင့် လွှတ်ပေးမည် မဟုတ်ပေ။

ဖရဲသီးစားခြင်းစနစ်က မှတ်ချက်ပေးလာသည်။ [ဂိုဏ်းအကြီးအကဲရဲ့ လက်တွဲဖော်က ခက်ခဲတဲ့ဇာတ်ရုပ်ပဲ]

ဤအရာကို ကြားရသောအခါ နဉ်ရွှီသည် သူမ၏ဆုံးဖြတ်ချက်ကို အလျင်အမြန် ချလိုက်၏။

နှစ်ဦးသား စကားပြောနေစဉ် အဖွဲ့သည် မန်ချင်းအနီးသို့ အလျင်အမြန် ရောက်ရှိလာသည်။ သူတို့သည် ဟွာကျိုင်းဂိုဏ်းမှ တပည့်နှစ်ဦး၏ မြင်ကွင်းထဲသို့ နီးကပ်လာသောအခါ နဉ်ရွှီသည် သူမ၏ အဖော်တစ်ဦးစီအား ပျောက်ကွယ်ဆေးလုံး တစ်လုံး ပစ်ပေးလိုက်လေသည်။

“ယူထားကြ”

အဖော်များက “နားလည်ပါပြီ” ဟုသာ ပြန်ဖြေကြ၏။

ပျောက်ကွယ်ဆေးလုံးများကို သောက်သုံးပြီးနောက် အဖွဲ့၏ ပုံပန်းသဏ္ဍာန်များသည် ချက်ချင်း ပြောင်းလဲသွားပြီး သူတို့ အရင်ပုံစံ၏ခြေရာတစ်စုံတစ်ရာမှ မကျန်ခဲ့ပေ။

နဉ်ရွှီက “မြန်မြန်ဆန်ဆန်နဲ့ ပြတ်ပြတ်သားသား လုပ်”

အဖော်များက “သိပါပြီ” ဟူ၍ ပြန်ဖြေလာကြသည်။

နဉ်ရွှီသည် ဦးဆောင်ပြီး တပည့်နှစ်ဦးကို တိုက်ခိုက်လိုက်သည်။

တပည့်နှစ်ဦးသည် သူတို့၏ ပြင်းထန်သော ချဉ်းကပ်မှုကို မြင်သောအခါ လန့်သွားကြ၏။ သူတို့ထဲမှ တစ်ဦးက ဓားကို ဆွဲထုတ်ပြီးအော်ဟစ်ကာ ခုခံကြတော့သည်။

“ဒီနေရာမှာ ဘယ်သူကလာရိုင်းစိုင်းနေတာလဲ။ ငါတို့က ဟွာကျိုင်းဂိုဏ်းရဲ့ တပည့်တွေဆိုတာ မင်းတို့သိရဲ့လား”

ဟွာကျိုင်းဂိုဏ်း၏ အထက်ဆင့် တပည့်များသည် မွေးရာပါတာအိုခန္ဓာကိုယ်နှင့်အတူ ထွက်ခွာသွားကြပြီး သူတို့ နှစ်ဦးသာ ကျန်ခဲ့သည်။

တစ်ဖက်တွင် မန်ချင်းကို လိုအပ်သူ သိပ်မရှိသဖြင့် မည်သူမျှ ယှဉ်ပြိုင်ကြမည် မဟုတ်ပေ။ အခြားတစ်ဖက်တွင် ဟွာကျိုင်းဂိုဏ်းမှ မည်သူမျှ ခိုးဝှက်ရန် ရဲရဲတင်းတင်း မလုပ်နိုင်ဟုသာ သူတို့ ယုံကြည်ခဲ့ကြ၏။

သို့သော် တစ်စုံတစ်ယောက်က သူတို့ထံမှ ခိုးယူရန်ကြိုးစားနေသည်မှာ အမှန်ပင်လော။

နဉ်ရွှီသည် တပည့်များထဲမှ တစ်ဦးမှာ အရင်က သူတို့ကို ထွက်ခွာရန် ပြောခဲ့သူဖြစ်ကြောင်း သတိပြုမိသည်။

သူမ ပြန်မဖြေခဲ့ပေ။ ဤအချိန်တွင် ခြိမ်းခြောက်မှုပေးခြင်းသည် အပိုလုပ်ရပ်တစ်ခုဖြစ်ပြီး အပြောထက် အလုပ်ကပိုအရေးကြီးသည်။

သူမ၏ ဓားသည် ပို၍ပင် မြန်ဆန်ပြီး ပြင်းထန်လာခဲ့၏။

ဖရဲသီးစားခြင်းစနစ်က အားပေးလာသည်။ [အဲဒါပဲ! သူ့ရဲ့ အားနည်းချက်ကိုရှာ တိုက်!]

[နင်တို့ ဟွာကျိုင်းဂိုဏ်းရဲ့ တပည့်တွေဖြစ်နေရင်ကော ဘာဖြစ်လဲ]

[အမြှောင်မတွေ မွေးထုတ်ပေးတဲ့ အမှိုက်ဂိုဏ်းသာသာပဲ။]

[နင်တို့က တစ်ခုခုထူးခြားတယ်လို့ တကယ် ထင်နေတာလား]

ဓားသည် တပည့်၏ ပခုံးကို ထိသောအခါ ထိုတပည့်သည် ဤစကားများကို ကြားရသောအခါ အံ့အားသင့်သွားသည်။

ဒါ ဘယ်သူလဲ။

“အမြှောင်မတွေ မွေးထုတ်ပေးတာ” ဆိုတာ ဘာကို ရည်ညွှန်းတာလဲ။

ဒါသူတို့ရဲ့ ဟွာကျိုင်းဂိုဏ်းအကြောင်းလား။

ဤခဏတာ အာရုံပျံ့လွင့်မှုသည် နဉ်ရွှီ၏ ဓားစွမ်းအင်က ထိုတပည့်၏ ဘယ်ဘက်လက်တစ်ခုလုံးကို အားမသန်အောင် လုပ်ဆောင်ရန် လုံလောက်ခဲ့သည်။ ၎င်းကိုကုသရန်အတွက် သူသည် အနည်းဆုံး တတိယအဆင့် ပြန်လည်ကောင်းမွန်ရေးဆေးလုံး လိုအပ်မည်။

Hostတိုက်ခိုက်နေသည်ကို ကြည့်ပြီး ဖရဲသီးစားခြင်းစနစ်က ကျေနပ်စွာ ပြောလာသည်။ [ဒါက မလေးမစားလုပ်မိတဲ့ တန်ဖိုးပဲ]

[သူ့ကို တိုက်! ဆက်တိုက်! သူ့ကို အော်ဟစ်ခိုင်းလိုက်စမ်း!]

ဟွာကျိုင်းဂိုဏ်းတပည့်: ???

ဒီရက်စက်တဲ့သူက ဘယ်သူလဲ။

သူတို့မှာ ပြင်းထန်တဲ့ ရန်ငြိုးတွေ မရှိခဲ့ဘူး၊ မလား။

ဟွာကျိုင်းဂိုဏ်းတပည့်သည် သူဟာ မတော်တဆ ရန်ငြိုးဖွဲ့တက်သူ တစ်ဦးဦးကို စော်ကားမိခဲ့ပါသလားဟု တွေးတောရင်း အလွန်အမင်း စဉ်းစားခန်း ဝင်နေခဲ့သည်။

လူယုတ်မာကို စော်ကားမိသည်ထက် လူကြီးလူကောင်းကို စော်ကားမိခြင်းက ပိုကောင်းပါသည်။

သူသည် မည်သူ့ကို စော်ကားမိသည်ကို မသိသော်လည်း နေ့စဉ်ဘဝတွင် သတိထားပြီးနေထိုင်ခဲ့သည်ဟု ထင်သော်လည်း၊ သူ့ရင်ထဲတွင် နောင်တရသော ခံစားချက်တိုးလာသည်ကိုတော့ မတားနိုင်ချေ။

ဟွာကျိုင်းဂိုဏ်းတပည့်၏ လက်ကိုအားမသန်အောင် လုပ်ဆောင်ပြီးနောက် နဉ်ရွှီသည် သူမ၏ ဓားကို အလျင်အမြန် သိမ်းဆည်းလိုက်သည်။ ဖရဲသီးစားခြင်းစနစ်က နောင်တရစွာ လျှာနှစ်ချက် တီးခေါက်လိုက်၏။ ဤအချိန်တွင် အခြားတစ်ဖက်ရှိ တိုက်ပွဲသည် အဆုံးသတ်သို့ နီးကပ်လာနေပြီဖြစ်သည်။

ဖြူစင်သောကျင့်ကြံသူနှင့် ဝူလုချန်တို့သည်လည်း အခြား ဟွာကျိုင်းဂိုဏ်းတပည့်ကို ဖြုတ်ချခဲ့သည်။

ချီအာသည် ပါဝင်ရန် အခွင့်အရေး မရခဲ့ပေ။

မည်သူမျှ မန်ချင်းကို မစောင့်ကြပ်တော့သည်ကို မြင်သောအခါ သူက စိတ်အားထက်သန်စွာ ဆန္ဒပြုလာသည်။ “ကျွန်တော် ခူးပါမယ်! မန်ချင်းရဲ့ ဆေးဖက်ဝင် အာနိသင်တွေကို အထိရောက်ဆုံး ထိန်းသိမ်းနိုင်မယ့် နည်းလမ်းကို ကျွန်တော် သိတယ်!”

လက်ရှိ လေလံပွဲအိမ်၏ ခေါင်းဆောင်အဖြစ် ချီအာသည် ငယ်စဉ်ကတည်းက ဘဏ္ဍာများစွာကို မြင်ဖူးပြီး ဝိညာဉ်အပင်များအကြောင်းကို အလွန်အသိပညာ ကြွယ်ဝသည်။ မန်ချင်းပန်းကို ခူးခြင်းသည် သူ့အတွက် အသေးအမွှာကိစ္စသာ။

မန်ချင်းကို ခူးပြီးနောက် ချီအာသည် ၎င်းကိုလုံခြုံစွာ ထိန်းသိမ်းရန် သူ၏ သိုလှောင်လက်စွပ်မှ အထူး သစ်သားသေတ္တာကို ထုတ်ယူခဲ့၏။

ဖရဲသီးစားခြင်းစနစ်က ကျေနပ်သွားသည်။ [သူ့ကို ကယ်တင်ခဲ့တာ အချည်းနှီး မဖြစ်ပါဘူး။ သူကလေလံပွဲအိမ်ထက်ကို အသုံးဝင်တယ်]

ချီအာ: …

သူသည် သူ့ကိုယ်သူ ရေရွတ်လိုက်သည်၊ ကောင်းပြီ၊ ချီးကျူးစကားအတွက် ကျေးဇူးတင်ပေးရဦးမလား။

မန်ချင်းကို ခူးပြီးနောက် အဖွဲ့သည် ထိုဧရိယာမှအလျင်အမြန် ထွက်ခွာသွားသည်။ ဟွာကျိုင်းဂိုဏ်းတပည့်နှစ်ဦးသည် သူတို့၏ကျန်ရှိသော ခွန်အားဖြင့် သတိမမေ့မြောမီ သူတို့၏ ဂိုဏ်းထံသို့ သတင်းစကားပို့ရန် အထူးနည်းလမ်းများကို အသုံးပြုခဲ့ကြသည်။

တစ်ချိန်တည်းမှာပင် မွေးရာပါတာအိုခန္ဓာကိုယ်နှင့် အဖွဲ့သည် ရွှံ့နွံအနီးသို့ နောက်ဆုံးတွင် ရောက်ရှိလာသည်။ သူတို့၏ အဖော်တပည့်များနှင့် တွေ့ဆုံပြီးနောက် ဖူရှန့်၏ ပုံသဏ္ဍာန်ကို မကြာမီ မြင်တွေ့ခဲ့ကြသည်။

မွေးရာပါတာအိုခန္ဓာကိုယ်သည် ဖူရှန့်ကို ဂရုတစိုက် အကဲဖြတ်ခဲ့သည်၊ သူမ၏ ဂိုဏ်းမှ သတင်းစကား မှန်ကန်ကြောင်း အတည်ပြုခဲ့ပြီးနောက်၊ သူမ၏ အတွင်းရှိ စိတ်ခံစားမှုများကို ဖိနှိပ်ကာ ဦးညွှတ်ပြီး လက်အုပ်ချီ၍ “အကြီးအကဲ” ဟူ၍ ပြောလိုက်သည်။

စက္ကန့်များစွာ ကြာသွားသော်လည်း တုံ့ပြန်မှု မရှိခဲ့ပေ။

မိနစ်ဝက် ကြာသွားသည်၊ သို့သော် တုံ့ပြန်မှု မရှိသေးပေ။

ဟွာကျိုင်းဂိုဏ်းတပည့်များသည် ရှုပ်ထွေးစွာဖြင့် အချင်းချင်း ကြည့်နေကြ၏။ ဘာတွေ ဖြစ်နေတာလဲ။

မွေးရာပါတာအိုခန္ဓာကိုယ်သည် အကြီးအကဲက သူမပုံစံအား ကျေနပ်အားမရသေးဘူးဟူ၍ ထင်မှတ်သဖြင့် လက်အုပ်ချီသည့် ကိုယ်ဟန်ကို ဆက်လက် ထိန်းထားပြီး သူမကိုယ်သူမ အကျဉ်းချုံး မိတ်ဆက်လိုက်သည် “အကြီးအကဲ၊ ကျွန်မ နာမည်က ရွှီယဲ့ပါ၊ ကျွန်မ အသက် ၂၁ နှစ် ရှိပါပြီ၊ လက်ရှိ ရွှေအမြုတေ အစောပိုင်းအဆင့်မှာ ရှိပါတယ်။ ကျွန်မရဲ့ ကျင့်ကြံမှုက အရမ်းမြန်မြန်တိုးတက်လာတာ၊ ကျွန်မ ချီသန့်စင်ခြင်းအဆင့်မှာရှိနေတုန်းက ထျန်းယာလျှို့ဝှက်နယ်မြေ မဖွင့်ခဲ့ပါဘူး၊ ဒါကြောင့် ဒီတစ်ကြိမ်မှာ ကျွန်မ လျှို့ဝှက်နယ်မြေကို ဝင်ရောက်ဖို့ ချီသန့်စင်ခြင်းအဆင့်ရဲ့ နဝမအဆင့်အထိ ကျွန်မရဲ့ ကျင့်ကြံမှုကို ဖိနှိပ်ခဲ့ရပါတယ်”

သူမကိုယ်သူမ မိတ်ဆက်ပြီးနောက် မွေးရာပါတာအိုခန္ဓာကိုယ်သည် တုံ့ပြန်မှု မရရှိသေးပေ။

သူမသည် စိတ်အနှောင့်အယှက် အနည်းငယ် ဖြစ်လာရ၏။

ဤပုဂ္ဂိုလ်သည် သူမ၏ အတိတ်ဘဝတွင် မဟာကျင့်ကြံသူ မဟုတ်ခဲ့ပါက သူမသည် ဤကဲ့သို့ နှိမ့်ချမည် မဟုတ်ပေ။ သူမ အမွေအနှစ်ကို ရရှိပြီးသည်နှင့်…

ထိုအချိန်တွင် ရဲရင့်သော တပည့်တစ်ဦးက ဖူရှန့်ကို ခိုးကြောင်ခိုးဝှက် လှမ်းကြည့်လိုက်သည်။

ကြည့်လိုက်သောအခါ သူမ တစ်ခုခု မှားနေသည်ကို သဘောပေါက်ခဲ့သည်။

သူမက “ဒီအကြီးအကဲရဲ့ နတ်ဝိညာဉ်အာရုံရဲ့ ရွှေရောင်အလင်းကဘာလို့ ပျောက်သွားတာလဲ” ဟူ၍ မဆင်မခြင် အော်ဟစ်လိုက်သည်။

ဤမှတ်ချက်သည် လူအုပ်ကို ထိတ်လန့်တုန်လှုပ်စေခဲ့သည်။

အခြား တပည့်များလည်း မော့ကြည့်လိုက်ကြသည်။

သူတို့ သေသေချာချာ ကြည့်သောအခါ ဖူရှန့်ကို အမြဲ ဝန်းရံနေသည့် ရွှေရောင် အလင်း မရှိတော့သည်ကို သတိပြုမိကြသည်။

သူတို့အားလုံး စတင် ပြောဆိုလာကြ၏။

“ဒီမှာ ဘာတွေ ဖြစ်နေတာလဲ”

“သူ တကယ်ပဲ အသက်ရှင်တုန်းက မဟာကျင့်ကြံသူ ဟုတ်ခဲ့ရဲ့လား”

မွေးရာပါတာအိုခန္ဓာကိုယ်သည် အနည်းငယ် လှမ်းတက်ပြီး ဖူရှန့်၏ ကိုယ်ခန္ဓာတွင် ကပ်ထားသည့် အဆောင်ကို ဆွဲဖြဲလိုက်သည်။

၎င်းကို မြင်သောအခါ သူမက အေးစက်စွာဖြင့် “ငါ လှည့်စားခံရပြီ!” ဖူရှန့်၏ ကိုယ်ခန္ဓာပေါ်ရှိ အဆောင်များသည် အခြေခံအကျဆုံးနှင့် သာမန်ဆုံးများသာဖြစ်ပြီး သူမကို ဝန်းရံထားသော ရွှေရောင်အလင်းသည် တစ်စုံတစ်ယောက်က သူမအား “တောက်ပသောအဆောင်” ကို အသုံးပြုခြင်းကြောင့် ဖြစ်နိုင်ဖွယ် အရှိဆုံးဖြစ်သည်။

ဤအချိန်တွင် နောက်ထပ် တပည့်တစ်ဦးက “ရွှီဆယ့်နှစ်နဲ့ တခြားသူတွေက မန်ချင်း အခိုးခံရတယ်လို့ သတင်းပို့တယ်”

“ဘာ”

“တစ်ယောက်ယောက်က မန်ချင်းကို ခိုးသွားတာလား”

မွေးရာပါတာအိုခန္ဓာကိုယ်သည် တစ်ခုခုကို အလျင်အမြန် သဘောပေါက်သွားသည်။ သူမက ဖြည်းဖြည်းချင်း ပြောလာ၏။ “တစ်ယောက်ယောက်က ငါ့ကို ဒီကို ဆွဲဆောင်ဖို့ ဒီနတ်ဝိညာဉ်အာရုံကို အသုံးပြုခဲ့တာ၊ အားလုံးကမန်ချင်းကို ခိုးဖို့ပဲ”

သူမ၏ အစေခံမက ရှုပ်ထွေးစွာဖြင့် မေးလိုက်သည်။ “မန်ချင်းကို ဘယ်တုန်းက ဒီလောက်အထိ လိုချင်လာတာလဲ”

မွေးရာပါတာအိုခန္ဓာကိုယ်၏ လေသံသည် အေးစက်သွား၏။ “နင် မသိဘူးလား။ မန်ချင်းက ‘ဖရဲသီးရွှေ့ပြောင်းသူ’ ထုတ်ဝေခဲ့တဲ့ စာတမ်းထဲက အဓိက ပါဝင်ပစ္စည်းပဲ။ အဲဒီ စာတမ်းက ရှားပါးတဲ့ ဆေးပင်တွေကို အသုံးပြုပြီး အားနည်းသူတွေရဲ့ အသက်ကို ရှည်စေနိုင်တယ်လို့ ဆိုထားတယ်”

အဖော်တပည့်တစ်ဦးက မေးလာသည်။ “အကြီးဆုံးအစ်မ၊ ‘ဖရဲသီးရွှေ့ပြောင်းသူ’ က ဘယ်သူလဲ”

မွေးရာပါတာအိုခန္ဓာကိုယ်က ပုံမှန်အတိုင်း ပြောလိုက်၏။ “ငါတို့ ဂိုဏ်းရဲ့ ရန်သူပဲ”

ဖရဲသီးရွှေ့ပြောင်းသူက သူမနှင့် သူမဆရာ၏ ကိစ္စကို “နယ်မြေသုံးထောင် ကျင့်ကြ‌သူများ သတင်းဖလှယ်ရာနေရာ” မှာ ဖော်ထုတ်ပြီး ပြဿနာ မရှာခဲ့ရင် သူမ၏ ဆရာဟာ မိုးကြိုးနယ်မြေမှာ အနှစ်တစ်ရာ ကိုယ့်ကိုယ်ကိုယ် အပြစ်ပေးစရာ မလိုပေ!

သူမသည် ဒီအကြွေးကို မှတ်ထားလိုက်ပြီ!

မူလက မွေးရာပါတာအိုခန္ဓာကိုယ်သည် ဤသတင်းအချက်အလက်များကို မသိခဲ့ပေ။

လျှို့ဝှက်နယ်မြေ အပြင်ဘက်မှ လျှို့ဝှက်နည်းလမ်းများကို အသုံးပြု၍ သတင်းစကားများကို သူမထံ ပို့ဆောင်ခဲ့သူမှာ စတုတ္ထအကြီးအကဲပင် ဖြစ်သည်။

နောက်ဆုံးတွင် စတုတ္ထအကြီးအကဲက ချီဝူကျန်းရမ်သည် သူမ၏ ဆရာ မဖြစ်နိုင်တော့ကြောင်း၊ သူမသည် သူမကိုတပည့်အဖြစ် ခေါ်ယူပြီး၊ သူမဆရာ၏ တာဝန်များကိုလည်း ထမ်းဆောင်နိုင်ကြောင်း ညွှန်ပြခဲ့သည်။

မွေးရာပါတာအိုခန္ဓာကိုယ် ငြင်းဆန်ခြင်းမှ ကာကွယ်ရန် သူမသည် ဒုတိယဆရာအဖြစ် ကမ်းလှမ်းရန် တစ်လှမ်းနောက်ဆုတ်ခဲ့ရသည်။

ပါရမီရှင် တပည့်တစ်ဦးသည် ဆရာတစ်ဦးတည်းရှိ၍ မရဘူး မဟုတ်လား။

ဤအချိန်တွင် မွေးရာပါတာအိုခန္ဓာကိုယ်၏ ကျောက်စိမ်းတံဆိပ် မြည်လာသည်။

၎င်းသည် စတုတ္ထအကြီးအကဲထံမှ သတင်းစကား ဖြစ်သည်။

“မင်း စဉ်းစားပြီးပြီလား”

ဒီတစ်ကြိမ်မှာ မွေးရာပါတာအိုခန္ဓာကိုယ်သည် တွန့်ဆုတ်ခြင်း မရှိဘဲ “ကျွန်မ သဘောတူပါတယ်” ဟုသာ တိုက်ရိုက် ပြောလိုက်သည်။

__

စတုတ္ထအကြီးအကဲသည် မွေးရာပါတာအိုခန္ဓာကိုယ်၏ ဒုတိယဆရာ ဖြစ်လာသည်ဟူသော သတင်းသည် အလျင်အမြန် ပျံ့နှံ့သွား၏။

“နယ်မြေသုံးထောင် ကျင့်ကြ‌သူများ သတင်းဖလှယ်ရာနေရာ” သည် ဤအကြောင်းအရာနှင့် ပတ်သက်၍ သီးသန့် စကားဝိုင်းတစ်ခုကိုပင် ဖွင့်လှစ်ခဲ့သည်။

[ဟွာကျိုင်းဂိုဏ်းရဲ့ စတုတ္ထအကြီးအကဲ ဘာကို စဉ်းစားနေတာလဲ]

[ကျွန်တော် ပြောနိုင်တာကတော့ ဒီလူက သူရဲကောင်းပဲ]

[ဟွာကျိုင်းဂိုဏ်းက မွေးရာပါတာအိုခန္ဓာကိုယ်ကို ဘယ်လိုနည်းနဲ့မဆို ကာကွယ်ဖို့ ဆုံးဖြတ်လိုက်ပုံရတယ်]

[ဘာပဲဖြစ်ဖြစ်၊ ဒီလို မွေးရာပါတာအိုခန္ဓာကိုယ် ပေါ်ထွက်လာတာ နှစ်ပေါင်း တစ်ထောင်နီးပါး ရှိပြီ။ သူတို့က ဘဏ္ဍာတစ်ခုလို ကာကွယ်သင့်တယ် မဟုတ်လား]

[ဘာကြောင့်မှန်းမသိပေမယ့် ငါ ရုတ်တရက် စတုတ္ထအကြီးအကဲအတွက် စိုးရိမ်မိနေတယ်]

[ကျွန်တော့်ကို စဉ်းစားခွင့်ပေးပါဦး… လုချူယီနဲ့ နတ်ဘုရား ချီရှန့်၊ ချီဝူကျန်းရမ်ကို ထောက်ခံခဲ့တဲ့သူ နှစ်ဦးစလုံး ကျရှုံးခဲ့ကြပြီ။ အခု စတုတ္ထအကြီးအကဲက ရှေ့ထွက်ဖို့ ရွေးချယ်တယ်၊ သူက နောက်ထပ် ကျရှုံးသူဖြစ်လာမလား]

[သတိထားမိလား။ “ဖရဲသီးရွှေ့ပြောင်းသူ”က ဒီ ဆရာ-တပည့် စုံတွဲကို ချေမှုန်းဖို့ ကြိုးစားနေပုံပဲ။ သူတို့ကိုကူညီတဲ့ ဘယ်သူမဆို ချေမှုန်းခံရတယ်]

[အဲဒါတကယ်ဆိုရင် “ဖရဲသီးရွှေ့ပြောင်းသူ” က တကယ်ကို…]

[“ဖရဲသီးရွှေ့ပြောင်းသူ”က ဟွာကျိုင်းဂိုဏ်း တစ်ခုလုံးကို တစ်ယောက်တည်း ရင်ဆိုင်ဖို့ တကယ် ရည်ရွယ်နေတာလား]

[“ဖရဲသီးရွှေ့ပြောင်းသူ” ဘုရားရေ!]

“နယ်မြေသုံးထောင် ကျင့်ကြ‌သူများ သတင်းဖလှယ်ရာနေရာ” ဖိုရမ်သည် စတုတ္ထအကြီးအကဲသည် နောက်ထပ် အတင်းအဖျင်းဘုရင်မ ဖြစ်လာမည်လားဟု မှန်းဆနေစဉ် နဉ်ရွှီနှင့် အခြားသူများသည် ထိုကိစ္စကို သိရှိခဲ့ကြသည်။

သို့သော် ၎င်းသည် သူတို့အတွက် သိပ်အရေးမကြီးပေ။ စတုတ္ထအကြီးအကဲသည် မွေးရာပါတာအိုခန္ဓာကိုယ်ကို တပည့်အဖြစ် လက်ခံသည်ဖြစ်စေ၊ မခံသည်ဖြစ်စေ၊ မွေးရာပါတာအိုခန္ဓာကိုယ်ကို ထောက်ခံသည့်အတွက်ကြောင့်သာလျှင် နဉ်ရွှီသည် သူ့ကို ဆက်လက် ကိုင်တွယ်ဖြေရှင်းမည်ဖြစ်သည်။

ဤအချိန်တွင် သူတို့သည် သူတို့၏ နောက်ထပ် အဖော်ကို ရှာဖွေရန် စီစဉ်နေကြ၏။

ဖရဲသီးစားခြင်းစနစ်က သတိပေးလာသည်။ [ချင်းရီလော့နဲ့ နတ်ဘုရား ချင်ကျို့တို့က အတူတူ ရှိနေတယ်]

နဉ်ရွှီ “ဒါကောင်းတယ်၊ ငါတို့ နောက်တစ်ယောက်ကို ရှာဖို့ မလိုတော့ဘူး”

“သူတို့ အခု ဘယ်မှာလဲ”

[အနောက်ဘက်ကို သွားရုံပဲ]

နဉ်ရွှီနှင့် အဖွဲ့သည် အနောက်ဘက်သို့ သွားရန် ဆုံးဖြတ်လိုက်သောအခါ ဖရဲသီးစားခြင်းစနစ်သည် ရုတ်တရက် ညည်းညူခြင်း စတင်လိုက်သည်။ [သူတို့ ပြင်းထန်တဲ့ မိစ္ဆာတစ်ကောင်နဲ့ ပြေးတိုက်မိခဲ့ပြီး နတ်ဘုရား ချင်ကျို့က လုံးဝအသုံးမဝင်ဘူး၊ ချင်းရီလော့ရဲ့ တိုက်ခိုက်မှုတွေပေါ်မှာ လုံးလုံးလျားလျား မှီခိုနေရတယ်]

[Loverတွေက စိတ်မချရဘူး။ သူ့အသက်အရွယ်မှာတောင် ဓားပညာကို ဘယ်လိုတိုးတက်အောင် လုပ်ရမယ်ဆိုတာ မသိသေးဘူး]

[သူအသက်ရှည်ခဲ့တာတောင် ကိုယ့်ကိုယ်ကိုယ် ကာကွယ်ဖို့ ဘယ်လို လုပ်ရမယ်ဆိုတာ မသင်ယူရသေးဘူး]

နဉ်ရွှီ: …

နတ်ဘုရား ချင်ကျို့သည် ဝိညာဉ်သားရဲ၏ တိုက်ခိုက်မှုများကို ရှောင်တိမ်းနေစဉ် ရုတ်တရက် နှာချေလိုက်သည်။

ဖရဲသီးစားခြင်းစနစ်က သူ့ကို ကျိန်ဆဲနေတာ ဖြစ်နိုင်ပါ့မလား။

ဒါပေမဲ့ အံ့သြစရာတော့ မရှိပါဘူး။

သူ ဖရဲသီးစားခြင်းစနစ်၏ အသံလှိုင်းထဲမှာရှိနေတိုင်း ၎င်းက သူ့ကို ကျိန်ဆဲလေ့ရှိ၏။ အဲဒါက သူ့အသက်အရွယ်အကြောင်း အမြဲ မဟုတ်၊ တစ်ခါတလေ သူ၏ “အချစ်ရူးဦးနှောက်” အကြောင်း၊ သို့မဟုတ် သူ ဘယ်လောက် အသုံးမဝင်ကြောင်း ပြောတတ်၍ သူ အကျင့်ရနေပါပြီ။

ဘာပဲဖြစ်ဖြစ် ၎င်းက အမှန်တရားပင်။

__

နဉ်ရွှီနှင့် အဖွဲ့သည် နတ်ဘုရား ချင်ကျို့နှင့် ချင်းရီလော့တို့နှင့် တွေ့ဆုံရန် ဦးတည်သွားစဉ် ဖရဲသီးစားခြင်းစနစ်သည် တိုက်ပွဲကို နဉ်ရွှီထံ ဆက်လက် ထုတ်လွှင့်ပေးနေသည်။

[ချင်းရီလော့ရဲ့ ဝိညာဉ်စွမ်းအင်နည်းလာပြီ]

[သူက ပြင်းထန်တဲ့ ပထမအဆင့် မိစ္ဆာကို ယှဉ်ဖို့ နည်းနည်းလေး လိုနေသေးတယ်]

[နေပါဦး!]

[သူ တိုက်ပွဲအတွင်းမှာ အောင်မြင်မှု ရသွားပြီ!]

[မဆိုးပါဘူး၊ သူက အခု ချီသန့်စင်ခြင်းအဆင့် စတုတ္ထအဆင့် ကျင့်ကြံသူဖြစ်သွားပြီ]

နဉ်ရွှီ: “သူ့အတွက် ဂုဏ်ယူပါတယ်”

ရုတ်တရက် ဖရဲသီးစားခြင်းစနစ်က အော်ဟစ်လာ၏။ [အရှက်မရှိတဲ့ ဟွာကျိုင်းဂိုဏ်းတပည့်၊ သူတို့က အားနည်းနေတဲ့ ပြင်းထန်တဲ့ မိစ္ဆာကို တကယ် သတ်ပစ်လိုက်တယ်!]

[ပြီးတော့ မိစ္ဆာရဲ့ အမြု‌တေကို ယူသွားတယ်!]

[နတ်ဘုရား ချင်ကျို့က တကယ်ကို အသုံးမဝင်ဘူး၊ အမြုတေတောင် အခိုးခံလိုက်ရတယ်]

[သူ အရင်က အင်အားကြီးပုဂ္ဂိုလ် ဖြစ်ခဲ့ဖူးတယ်၊ အခုတော့ သူ တကယ် ဘာမှမဟုတ်တော့ဘူး၊ ကျင့်ကြံမှုလည်း မရှိဘူး ကာကွယ်တဲ့ ပစ္စည်းတွေလည်း မရှိဘူး]

[သူ့ကို ထားထားတာ ဘာအဓိပ္ပာယ်ရှိသေးလဲ]

နဉ်ရွှီက သမာသမတ်ကျစွာ ပြောလာသည်။ “အနည်းဆုံး သူက ဆေးလုံးတွေဆက်ပြီး သန့်စင်နိုင်ပါသေးတယ်”

ဖရဲသီးစားခြင်းစနစ်: […]

နဉ်ရွှီသည် သူမ ကြားခဲ့ရသော သတင်းကို မမေ့ခဲ့ပေ။ “နောက်ထပ် ဟွာကျိုင်းဂိုဏ်းတပည့်တစ်ယောက်လား”

[ဟုတ်တယ်]

သူတို့သည် ဟွာကျိုင်းဂိုဏ်းနှင့် ပဋိပက္ခဖြစ်ရန် ကံကြမ္မာပါလာသည်ဟု ထင်ရသည်။

[ဟွာကျိုင်းဂိုဏ်းမှာ လျှို့ဝှက်နည်းလမ်းတစ်ခု ရှိတယ်လို့ ထင်တယ်။ အပြင်ဘက်က တပည့်တွေက အတွင်းက တပည့်တွေကို ဆက်သွယ်နိုင်တယ်]

[ဟွာကျိုင်းဂိုဏ်းရဲ့ အပြင်ဘက်က တပည့်တွေ မတည်မငြိမ်ဖြစ်သွားရင် အတွင်းက တပည့်တွေလည်း ထိခိုက်နိုင်တယ်]

နဉ်ရွှီသည် ဖရဲသီးစားခြင်းစနစ်၏ အဓိပ္ပာယ်ကို အလျင်အမြန် နားလည်ခဲ့သည်။

မည်သို့ပင်ဆိုစေကာမူ သူမသည် စတုတ္ထအကြီးအကဲ၏ အတင်းအဖျင်းကို ပြင်ဆင်ထားပြီးသားဖြစ်သည်။ ဤအရာကို တွေးတောရင်း သူမသည် တိုက်ရိုက်သာ ပြောလိုက်သည်။ “စနစ်၊ အတင်းအဖျင်းကို ထုတ်ပြန်!”

ဖရဲသီးစားခြင်းစနစ်: [ကောင်းပြီ]

“နယ်မြေသုံးထောင် ကျင့်ကြ‌သူများ သတင်းဖလှယ်ရာနေရာ” မှ လူများသည် အတင်းအဖျင်းအသစ်ကို စိတ်အားထက်သန်စွာ စောင့်ဆိုင်းနေစဉ် သူတို့သည် ဖိုရမ်တွင် ပို့စ်အသစ်တစ်ခုကို ပထမဆုံး သတိပြုမိကြသည်။

ပြီးတော့ ပို့စ်အသစ်သည် မျှော်လင့်ထားသည့်အတိုင်း မွေးရာပါတာအိုခန္ဓာကိုယ်ကို တပည့်အဖြစ် လက်ခံလိုက်သော ဟွာကျိုင်းဂိုဏ်း၏ စတုတ္ထအကြီးအကဲကို ပစ်မှတ်ထားလေသည်။

ပို့စ်ခေါင်းစဉ်မှာ–

“ဟွာကျိုင်းဂိုဏ်းရဲ့ စတုတ္ထအကြီးအကဲက လွန်ခဲ့တဲ့ နှစ်လေးရာအတွင်း အိမ်ထောင်သည် အမျိုးသား သုံးဆယ့်တစ်ယောက်နဲ့ ဖောက်ပြန်ခဲ့တာကို စစ်ဆေးခြင်း။ သုံးဆယ့်တစ်ယောက်ထဲမှ တစ်ယောက်က တကယ်တမ်း…”

ဟွာကျိုင်းဂိုဏ်းက ဘာဖြစ်တာလဲ။

“တစ်ယောက်က တကယ်တမ်း…” ဆိုသည်မှာ ဘာကို ဆိုလိုတာလဲ။

ကျင့်ကြံသူများသည် ပို့စ်ကို နှိပ်ရန် မစောင့်နိုင်တော့ပေ။

ကံကောင်းစွာဖြင့် “ဖရဲသီးရွှေ့ပြောင်းသူ” သည် သူတို့ကို ရင်ခုန်အောင် မထားခဲ့ဘဲ ပထမစာကြောင်းတွင်ပင် အဖြေကို ဖော်ထုတ်ခဲ့သည်။

“ဂိုဏ်းအကြီးအကဲ”

စာဖတ်သူများသည် ဤလေးလုံးသော စာလုံးများကို မြင်သည်နှင့် တစ်ပြိုင်နက် သူတို့အားလုံး တူညီသော အတွေး ရှိခဲ့ကြသည်။

ဆိုသည်မှာ ဖရဲသီးရွှေ့ပြောင်းသူသည် တကယ်ကို အရမ်း ကြောက်မက်ဖွယ်ကောင်းလှသည်!

သူတို့သည် တကယ်ကို မကြောက်မရွံ့ဘဲ မည်သူ့ကိုမဆို စော်ကားရန် ရဲရင့်လေသည်!

__

အခန်း (၄၈)

ယေဘူယျအားဖြင့် ဂိုဏ်းအကြီးအကဲ ရာထူးကို ရယူနိုင်သူများသည် အနည်းဆုံး ခန္ဓာကိုယ်ပေါင်းစည်းခြင်းအဆင့် သို့မဟုတ် ပိုမိုမြင့်မားသော ကျင့်ကြံမှုအဆင့် ရှိကြသည်။

ဝိညာဉ်ဖြစ်ပေါ်ခြင်းအဆင့်ကို ကျော်လွန်၍ တိုးတက်ရန်မှာ အလွန် ခက်ခဲပြီး အခွင့်အရေး၊ ကံကောင်းခြင်း၊ နှင့် အရည်အချင်းတို့အားလုံးသည် မရှိမဖြစ်သော အချက်များဖြစ်ပါသည်။ ဟုတ်ပါသည်၊ ၎င်းက သာမန် အခြေအနေများအောက်မှာသာ သက်ရောက်မှုရှိပေသည်။

ကျင့်ကြံသူအချို့သည် သူတို့၏ ဘဝတစ်ခုလုံးကို ဝိညာဉ်ဖြစ်ပေါ်ခြင်းအဆင့်တွင် ပိတ်မိနေနိုင်သည်။

သို့သော် ခန္ဓာကိုယ် ပေါင်းစည်းခြင်းအဆင့်သည် သာမန်ကျင့်ကြံသူများပင် ရောက်ရှိရန် စိတ်ကူးယဉ်ရန် မဝံ့ရဲသည့် အလွန်မြင့်မားသော နယ်ပယ်တစ်ခုဖြစ်သည်။ ထိုအဆင့်ရှိသူတစ်ဦးကို စော်ကားရန်ဆိုသည်မှာ မည်သူမဆို ဆုံးရှုံးရန်တတ်နိုင်သည်ထက် ပိုမိုများပြားသော အသက်များ လိုအပ်မည်။

ဂိုဏ်းအကြီးအကဲ၏ အဆင့်အတန်းသည် ဝိညာဉ်ဖြစ်ပေါ်ခြင်းအဆင့် စစ်မှန်သောဘုရင်၏ အဆင့်အတန်းနှင့် လုံးဝ နှိုင်းယှဉ်၍ မရပေ။

ဒါဆို “ဖရဲသီးရွှေ့ပြောင်းသူ” သည် အသိဉာဏ်မဲ့ခြင်းကြောင့် ကြောက်ရွံ့မှု ကင်းမဲ့ခြင်းလား၊ သို့မဟုတ် သူတို့အား ထိုမျှလောက် ယုံကြည်မှု ပေးသော နောက်ခံ တစ်စုံတစ်ခု ရှိသလား။

ကျင့်ကြံသူအများစုသည် ဒုတိယအချက်ဘက်သို့ ပိုမို ယိမ်းသွားကြ၏။

“ဖရဲသီးရွှေ့ပြောင်းသူ” သည် မည်သူ့ကိုမဆို စော်ကားရန် မကြောက်ပုံရသည်ကို အံ့ဩပြီးနောက် ကျင့်ကြံသူအားလုံးသည် တူညီသော အတွေးတစ်ခုကို မျှဝေခဲ့ကြသည်။

ဟွာကျိုင်းဂိုဏ်းတွင် ဂိုဏ်းအကြီးအကဲ တစ်ဦးတည်းသာ ရှိသည်မဟုတ်ပေ။ “ဖရဲသီးရွှေ့ပြောင်းသူ” က မည်သူကို ရည်ညွှန်းနေသနည်း။ သို့မဟုတ်... သူတို့အားလုံးကိုလား။

“ဖရဲသီးရွှေ့ပြောင်းသူ” သည် ပိုမိုမြင့်မားသော အဆင့်အတန်းရှိ ပုဂ္ဂိုလ်များ ပါဝင်သည့် ပြင်းထန်သော အတင်းအဖျင်းတစ်ခုပြီးတစ်ခုကို ဆက်လက် ဖော်ထုတ်နေသည်နှင့်အမျှ နယ်မြေသုံးထောင်ရှိ ကျင့်ကြံသူများ၏ စိတ်ကူးစိတ်သန်းများသည် ရိုင်းစိုင်းစွာ ပြေးလွှားနေသည်ဟု ဆိုရမည်။

သို့သော် ဤတစ်ကြိမ်တွင် သူတို့ လွန်လွန်ကျွံကျွံ စဉ်းစားခဲ့ကြရသည်။

ပါဝင်ပတ်သက်သော ဂိုဏ်းအကြီးအကဲမှာ တစ်ဦးတည်းသာ ဖြစ်သောကြောင့် ဖြစ်ပါသည်။

“ဖရဲသီးရွှေ့ပြောင်းသူ” သည် သူတို့၏ ပို့စ်တွင် ရှင်းလင်းစွာ ရေးသားခဲ့၏။

[အခြားသူများ ထိခိုက်မှုမရှိစေရန် ဒီဂိုဏ်းအကြီးအကဲကို ယုံဖုန်းလို့ သတ်မှတ်လိုက်ပါတယ်။]

ဤစာကြောင်းကို မြင်သည်နှင့် ကျင့်ကြံသူများသည် စိတ်တည်ငြိမ်မှုကို ဆက်လက် ထိန်းထားနိုင်ခြင်း မရှိတော့ပေ!

ဆွေးနွေးမှုများက စာမူအောက်တွင် ပေါက်ကွဲသွားသည်။

[ယုံဖုန်း! သူက ယုံဖုန်းဝင်ရှန်း ဖြစ်နေတာပဲ]

[ကောင်းကင်ဘုံကြီးရေ၊ ဒါတောင် ခွင့်ပြုထားသေးလား။ ဒီအကြောင်းကို တကယ်ပြောလို့ရလား]

[ဒါရူးသွပ်မှုပဲ။ ဝိညာဉ်ဖြစ်ပေါ်ခြင်းအဆင့် ကျင့်ကြံသူတွေကို အတင်းအဖျင်း ပြောရတာ “ဖရဲသီးရွှေ့ပြောင်းသူ” အတွက် မလုံလောက်တော့ဘူးလား။ သူတို့က အခု ယုံဖုန်းဝင်ရှန်းဆီကို တိုက်ရိုက် သူတို့ရဲ့ ဓားကိုဦးတည်လိုက်ပြီ! ကျွန်တော်က ဒီအတင်းအဖျင်းကို ပေါက်ကြားအောင် လုပ်သူ မဟုတ်ပေမယ့် ကျွန်တော် လန့်နေတုန်းပဲ]

[ဘယ်သူက မကြောက်ဘဲ နေမှာလဲ။ ဒီပိုစ့်ကို ဖတ်ရုံနဲ့တင် ငါ့နှလုံးခုန်နှုန်း မြန်နေပြီ။]

[ကျွန်တော်လည်း ဒီလိုပဲ… ဒါက နှောင်းပိုင်း ခန္ဓာကိုယ် ပေါင်းစည်းခြင်းအဆင့် အင်အားကြီး ပုဂ္ဂိုလ်အကြောင်း ပြောနေတာ! ဟွာကျိုင်းဂိုဏ်းရဲ့ ဂိုဏ်းအကြီးအကဲခြောက်ဦးထဲမှာ သူကအနက်ရှိုင်းဆုံး အခြေခံ၊ အမြင့်ဆုံးအဆင့်အတန်းနဲ့ အနက်ရှိုင်းဆုံးကျင့်ကြံမှု ရှိတယ်]

[ဟွာကျိုင်းဂိုဏ်းရဲ့ ဂိုဏ်းအကြီးအကဲ ခြောက်ဦးအကြောင်းကို ကျွန်တော် တစ်ခါမှ စဉ်းစားရဲခဲ့တာတောင် မဟုတ်ဘူး။ သူဖြစ်နေမယ်ဆိုတာ မယုံနိုင်ဘူး]

[“ဖရဲသီးရွှေ့ပြောင်းသူ” ဒီမှာ ရပ်လိုက်ပါတော့လား။ ကျွန်တော် တကယ်ပိုသိချင်တယ်၊ ဒါပေမဲ့ မင်းရဲ့လုံခြုံရေးအတွက်လည်း စိုးရိမ်တယ်]

[သတင်းဆိုး– “ဖရဲသီးရွှေ့ပြောင်းသူ” က ယုံဖုန်းဝင်ရှန်းရဲ့ သတ်ရန် စာရင်းထဲမှာ ပါဝင်နေလောက်ပြီ။ သတင်းကောင်း– “ဖရဲသီးရွှေ့ပြောင်းသူ” မှာ အရန် အစီအစဉ် ရှိမယ်လို့ ကျွန်တော် လောင်းရဲတယ်]

[ပထမဆုံး ဝိညာဉ်ဖြစ်ပေါ်ခြင်းအဆင့် ကျင့်ကြံသူတွေနဲ့ မွေးရာပါတာအိုခန္ဓာကိုယ်ကို စော်ကားတယ်၊ အခု ခန္ဓာကိုယ် ပေါင်းစည်းခြင်းအဆင့် အင်အားကြီး ပုဂ္ဂိုလ်ကို ဓားနဲ့သွားမွှန်းနေတယ်! ငါ ဘာပြောနိုင်သေးလဲ။ “ဖရဲသီးရွှေ့ပြောင်းသူ” မင်း အံ့ဩစရာ ကောင်းတယ်!]

[ကျွန်တော် “ဖရဲသီးရွှေ့ပြောင်းသူ” ဖော်ထုတ်ခဲ့တဲ့ အင်အားကြီး ပုဂ္ဂိုလ်များ စာရင်းခေါင်းစဉ်နဲ့ စကားဝိုင်းတစ်ခု စတင်ချင်စိတ် ပေါ်လာတယ်။ အခုထိ စာရင်းမှာ နာမည် လေးခု ပါဝင်နေပြီ]

[နာမည် လေးခု? “ဖရဲသီးရွှေ့ပြောင်းသူ” က စုစုပေါင်း အရှုပ်တော်ပုံ ခြောက်ခု ဖော်ထုတ်ခဲ့တာ မဟုတ်ဘူးလား]

ဤကျင့်ကြံသူက အလျင်အမြန် ပြန်ဖြေလာသည်။

[လုချူယီနဲ့ စတုတ္ထအကြီးအကဲတို့က ဒီစာရင်းမှာ ပါဝင်ဖို့တောင် အရည်အချင်း မပြည့်မီဘူး။ အခုထိ နတ်ဘုရား မြူ၊ နတ်ဘုရား ချီရှန့်၊ မွေးရာပါတာအိုခန္ဓာကိုယ်နဲ့ ယုံဖုန်းဝင်ရှန်းတို့ပဲ]

ယုံဖုန်း၏ နာမည်ကို ရိုးရိုးလေး ဖော်ပြလိုက်သည်နှင့်တောင်မှ “နယ်မြေသုံးထောင် ကျင့်ကြ‌သူများ သတင်းဖလှယ်ရာနေရာ” သည် ပို၍ပင် ဆူပူသွားခဲ့သည်။

စိတ်လှုပ်ရှားမှုက ဆူပွက်လုနီးပါး ဖြစ်နေသည်။

ကျင့်ကြံသူများ၏ တုံ့ပြန်မှုများကို မြင်သောအခါ နဉ်ရွှီက အနည်းငယ် အံ့အားသင့်သွား၏။ “ယုံဖုန်းက တကယ်ကို အဲဒီလောက် နာမည်ကြီးတာလား”

ဖရဲသီးစားခြင်းစနစ်က လျစ်လျူရှုသည့် လေသံဖြင့် ပြန်ဖြေလိုက်သည်။

[တကယ်တော့ မဟုတ်ပါဘူး။ သူက အချိန်ကြာကြာရှိနေခဲ့တဲ့ လူအိုကြီးတစ်ယောက်ပါပဲ]

[ရိုးရိုးသားသား ပြောရရင် နှစ်ပေါင်းနှစ်ထောင်ကျော် အသက်ရှင်နေတဲ့သူဆိုတော့ သူတို့ကိုယ်သူတို့ နာမည်တစ်လုံးရအောင် လုပ်ဖို့ အခွင့်အရေးရှိတယ်လေ။]

နဉ်ရွှီ: “နားလည်ပါပြီ”

ချီအာ: …

ဒါဆို ခန္ဓာကိုယ် ပေါင်းစည်းခြင်းအဆင့် ကျင့်ကြံသူတစ်ဦးတောင်မှ မင်းကို အထင်မကြီးစေဘူးလား။

ဒါလိုဆိုတော့ သူ့လို အဆင့်နိမ့် ကျင့်ကြံသူတစ်ဦးသည် နဉ်ရွှီနှင့်အတူ ခရီးသွားရန် ကံကောင်းလွန်းသည်ဟုတွေးကာ သူ မယုံကြည်နိုင်ဖြစ်နေခဲ့ရသည်။

“နယ်မြေသုံးထောင် ကျင့်ကြ‌သူများ သတင်းဖလှယ်ရာနေရာ” ရှိ ကျင့်ကြံသူများသည် ပို့စ်ကို စိတ်အားထက်သန်စွာ ဆက်လက် ဖတ်ရှုခဲ့ကြသည်။

အကြောင်းအရာက

[ယုံဖုန်းက အိမ်ထောင်သည် အမျိုးသားသုံးဆယ့်တစ်ယောက်ထဲက တစ်ယောက်။]

[အခြားသူတွေထဲက အချို့က အောင်မြင်စွာ မြူဆွယ်ခံခဲ့ရပြီး၊ အချို့က တွန်းလှန်ခဲ့ကြတယ်။ ဒီပို့စ်မှာ စတုတ္ထအကြီးအကဲက အောင်အောင်မြင်မြင် မြူဆွယ်နိုင်ခဲ့တဲ့ သူတွေကိုပဲ စာရင်းပြုစုထားတယ်။ ယုံဖုန်း အပါအဝင် စုစုပေါင်း နှစ်ဆယ့်သုံးယောက်ပေါ့။]

[ပါဝင်ပတ်သက်တဲ့ ကျင့်ကြံသူ အရေအတွက်ကို ထောက်ရှုပြီး ဟွာကျိုင်းဂိုဏ်းနဲ့ ဆက်စပ်သူတွေကိုပဲ ဒီနေရာမှာ စာရင်းပြုစုထားတာ။]

[ယုံဖုန်း၊ လောယွီ]

[စုစုပေါင်း နှစ်ယောက် နာမည်။]

ပို့စ်က ထိုတွင် အဆုံးသတ်ထားသည်။ ၎င်းကိုဖတ်ပြီးနောက် ကျင့်ကြံသူများသည် သူတို့၏ စိတ်လှုပ်ရှားမှုများကို မထိန်းနိုင်ဘဲ မှတ်ချက်များကို ဆက်လက် ရေလွှမ်းခဲ့ကြသည်။

[“ဖရဲသီးရွှေ့ပြောင်းသူ” က ဟွာကျိုင်းဂိုဏ်းကို တရားဝင် စစ်ကြေညာလိုက်ကြောင်း အတည်ပြုတယ်]

[အခြား ကျင့်ကြံသူများ: ဒါဆို ငါတို့ လွတ်မြောက်ပြီလား]

[အခြား ကျင့်ကြံသူများ: ဟွာကျိုင်းဂိုဏ်းကို မဝင်ခဲ့မိလို့ ကျေးဇူးတင်ပါတယ်]

[လောယွီက စစ်မှန်တဲ့ ဘုရင်လား။ စိတ်မကောင်းပါဘူး၊ ဒါပေမဲ့ အခုတော့ ကျွန်တော် ဝင်ရှန်းအကြောင်း အတင်းအဖျင်းကိုပဲ စိတ်ဝင်စားနေမိတယ်]

[“ဖရဲသီးရွှေ့ပြောင်းသူ” က မယုံနိုင်စရာပဲ။ ချီဝူကျန်းရမ်က သူတို့ ဟွာကျိုင်းဂိုဏ်း တစ်ခုလုံးကို စော်ကားဖို့ ကြိုးစားနေတာလားလို့ မေးတဲ့အခါ သူတို့က ‘ဟွာကျိုင်းဂိုဏ်းက ငါ့အတွက် ဘာလဲ’ လို့ ပြန်ဖြေခဲ့တယ်။ ဒီနေ့မှာ သူတို့ ဟွာကျိုင်းဂိုဏ်းကို လုံးဝ ဂရုမစိုက်ကြောင်းလုပ်ရပ်တွေနဲ့ သက်သေပြလိုက်ပြီ]

“နယ်မြေသုံးထောင် ကျင့်ကြ‌သူများ သတင်းဖလှယ်ရာနေရာ” သည် နောက်ဆုံး အတင်းအဖျင်းကြောင့် ဆူပွက်နေချိန်တွင် နဉ်ရွှီနှင့် အခြားသူများသည် ချင်းရီလော့နှင့် နတ်ဘုရား ချင်ကျို့တို့နှင့် ပြန်လည် ပေါင်းစည်းခဲ့ကြသည်။

သူတို့ ရောက်ရှိလာသောအခါ ချင်းရီလော့သည် သူ၏ ဓားကို အေးဆေးစွာ သုတ်နေ၏။

သူသည် စိတ်ခံစားမှုများစွာကို မပြသသော်လည်း နဉ်ရွှီသည် သူ၏ စိတ်အခြေအနေ နိမ့်ကျနေသည်ကို ခံစားမိနေဆဲ ဖြစ်သည်။

နဉ်ရွှီက “မိစ္ဆာအမြုတေ ခိုးယူသွားတဲ့ တပည့်ပေါ်မှာ ခြေရာခံ အမှတ်အသား တစ်ခုခုချန်ထားခဲ့မိလား”

နတ်ဘုရား ချင်ကျို့က အနည်းငယ် ချောင်းဟန့်၍ “ကျွန်တော် သူ့ပေါ်မှာ ခြေရာခံမှုန့် ဖြူးခဲ့တယ်။ အနံ့က သုံးရက်လောက်အထိ မပျောက်ဘူး”

“အခု သူ့ကို နေရာရှာလို့ ရပြီလား”

ချင်ကျို့က ရှင်းပြလိုက်သည်။ “ငါးကီလိုမီတာအတွင်းမှာဆိုရင် သူ့ကို ရှင်းရှင်းလင်းလင်း သိရှိနိုင်တယ်။ အခု သူက ကီလိုမီတာ သုံးဆယ်လောက် အကွာအဝေးမှာ ရှိနေတယ်၊ ဒါကြောင့် ခက်ခဲတဲ့ ဦးတည်ချက်ကိုပဲ သတ်မှတ်နိုင်တယ်”

နဉ်ရွှီက တိကျသော အမိန့်ကို ပေးလာသည်။ “ဦးဆောင်”

ဖရဲသီးစားခြင်းစနစ်က ရယ်မောလျက်

[Host၊ နင်က အမိန့်ပေးတဲ့ အဖွဲ့ခေါင်းဆောင်လို ပိုပိုပြီး ဖြစ်လာနေပြီပဲ]

နတ်ဘုရား ချင်ကျို့က ဦးဆောင်နေသဖြင့် နဉ်ရွှီ၏အဖွဲ့သည် မိစ္ဆာအမြုတေ ခိုးယူသွားသော တပည့်ကို လျင်မြန်စွာ ခြေရာခံ လိုက်ခဲ့ကြသည်။

သူတို့ ရောက်ရှိလာသောအခါ တပည့်သည် မိစ္ဆာအမြုတေကို စုပ်ယူပြီးကာစဖြစ်ပြီး ၎င်းကိုသန့်စင်ခြင်း လုပ်ငန်းစဉ်တွင် ရှိနေသည်။

သူတို့ကို မြင်သောအခါ တပည့်သည် အနည်းငယ် လန့်သွားသည် “မင်းတို့ ငါ့ကို ဘယ်လို ရှာတွေ့တာလဲ”

ခြေရာခံမှုန့်သည် သာမန် တပည့်များ ရယူနိုင်သည့် အရာမဟုတ်ပေ။ နတ်ဘုရား ချင်ကျို့ကဲ့သို့ တစ်ချိန်က ကြီးမားသော ပုဂ္ဂိုလ် ဖြစ်ခဲ့သူမှသာ ထိုကဲ့သို့သော ပစ္စည်းများကို ပိုင်ဆိုင်နိုင်မည် ဖြစ်သည်။

နဉ်ရွှီသည် စကားလုံးများ မဖြုန်းဘဲ “တိုက်ခိုက်” ဟုသာ တိုက်ရိုက် အမိန့်ပေးခဲ့သည်။

ချက်ချင်းပင် ဓားနည်းစနစ် အမျိုးမျိုးသည် ဟွာကျိုင်းဂိုဏ်းတပည့်ပေါ်သို့ မိုးရွာသကဲ့သို့ ကျရောက်လာ၏။

အချိန်တိုအတွင်းတွင် တပည့်သည် ဒဏ်ရာများဖြင့် ပြည့်နှက်သွားသည်။ သို့သော် သူသည် မာကျောပြီး သနားခံခြင်း မပြုခဲ့ပေ။ ပြိုင်ဘက် ငါးဦးကို တစ်ဦးတည်း ရင်ဆိုင်နေရချိန်တွင်ပင် သူသည် သူ၏ ရပ်တည်ချက်ကို ထိန်းထားနိုင်ခဲ့သည်။

ဤတပည့်သည် ချီသန့်စင်ခြင်းအဆင့် အဋ္ဌမအဆင့်တွင် ရှိပြီး ခိုင်မာသော အခြေခံကို တည်ဆောက်ထားသည်။

နဉ်ရွှီ၏ အဖွဲ့သည် ကျင့်ကြံမှုအဆင့် နိမ့်သော်လည်း ဦးရေ ပိုများသည်။

ထို့ကြောင့် သူတို့သည် ဤဟွာကျိုင်းဂိုဏ်းတပည့်ကို ဓားသွေးကျောက်သဖွယ် သဘောထားပြီး သူတို့၏ ဓားနည်းစနစ်များကို သွေးခဲ့ကြသည်။

ဟွာကျိုင်းဂိုဏ်းတပည့်သည် ဤအရာကို အလျင်အမြန် သဘောပေါက်ပြီး “…”

ကံမကောင်းစွာဖြင့် သူသည် မိစ္ဆာအမြုတေကို လုံးဝ မသန့်စင်ရသေးသဖြင့် ထွက်ပြေးရန် မတတ်နိုင်ခဲ့ပေ။

ထိုအချိန်တွင် ဖရဲသီးစားခြင်းစနစ်သည် ရုတ်တရက် စိတ်လှုပ်ရှားစွာ အော်ဟစ်လိုက်သည်။

လန့်သွားသဖြင့် နဉ်ရွှီ၏ ဓားသည် အနည်းငယ် ယိမ်းယိုင်သွားခဲ့၏။

သူမသည် သူမ၏ ပစ်မှတ်ကို အလျင်အမြန် ပြန်လည်ပြင်ဆင်ပြီးမှ မေးမြန်းလိုက်သသည်။ “ဘာဖြစ်တာလဲ”

ဖရဲသီးစားခြင်းစနစ်က ဝမ်းမြောက်ဝမ်းသာ လေသံဖြင့် ပြန်ဖြေလိုက်သည်။ [ယုံဖုန်းရဲ့ တာအိုလက်တွဲဖော် ဒီအကြောင်းကို သိသွားပြီ]

[သူ့ရဲ့ သားသမီးတွေလည်း သိသွားပြီ]

[အခု သူ့ရဲ့ တာအိုလက်တွဲဖော်က သူ့ကိုရင်ဆိုင်နေပြီး သူ့ကို သင်ခန်းစာ ပေးတော့မှာ]

ဤအရာကို ကြားရသောအခါ နဉ်ရွှီ၏ဓားချက်များသည် အင်အားအသစ် ရရှိလာသကဲ့သို့ သူမ၏ လှုပ်ရှားမှုများက ပို၍ပင်ပြတ်သားလာခဲ့သည်။

နဉ်ရွှီ: “ဘယ်လို သင်ခန်းစာမျိုးလဲ”

ဖရဲသီးစားခြင်းစနစ်က ပြန်ဖြေသည်။ [သူ့ရဲ့ တာအို လက်တွဲဖော်က နှောင်းပိုင်း ပေါင်းစည်းခြင်းအဆင့်မှာ ရှိတယ်၊ သူ့ထက် အသေးစားနယ်ပယ်တစ်ခုလောက် မြင့်တယ်]

[ဒါ့အပြင် သူမက သူမရဲ့ ခက်ထန်တဲ့ စိတ်နေစိတ်ထားကြောင့် နာမည်ဆိုးထွက်နေတာ။]

[သူမ ရောက်တာနဲ့ တစ်ပြိုင်နက် ယုံဖုန်းရဲ့ ခေါင်းကို ရိုက်ချလိုက်တယ်]

[ယုံဖုန်းက ပေါင်းစည်းခြင်းအဆင့် ကျွမ်းကျင်သူဖြစ်ကောင်း ဖြစ်နိုင်ပေမယ့် ရိုက်ခံရပြီးနောက် ကန့်ကွက်စကားတစ်လုံးတောင် ထုတ်ပြောဖို့ မရဲခဲ့ဘူး]

နဉ်ရွှီသည် မျက်ခုံးပင့်ကာ “သူ သူ့ ဇနီးကို ကြောက်တာလား”

ဖရဲသီးစားခြင်းစနစ်က လျှာနှစ်ချက် တီးခေါက်၍ [အတော်လေးတော့ ဟုတ်တယ်။ သူတို့ရဲ့ သားနဲ့သမီးကို သူမက မွေးခဲ့တာ၊ မိခင်နဲ့သားသမီးကြားက နှောင်ကြိုးက အရမ်းခိုင်မာတယ်။ သူသာ သူ့ တာအိုလက်တွဲဖော်ကို စော်ကားရင် သူတို့သုံးယောက်လုံးကို စော်ကားသလိုပဲကိုး]

[သူ သူ့တာအို လက်တွဲဖော် တစ်ယောက်တည်းတောင် စော်ကားဖို့ မတတ်နိုင်တာ၊ နှစ်ယောက် ထပ်ပေါင်းထည့်ဖို့ဆိုတာ ဝေးရော]

နဉ်ရွှီက စဉ်းစားလျက် “ဒါဆို သူ ဘာလို့ စတုတ္ထအကြီးအကဲနဲ့ ဆက်ပါဝင်ပတ်သက်နေတာလဲ”

[ဘယ်သူမှ သိမှာမဟုတ်ဘူးလို့ သူ တွေးခဲ့လို့ဖြစ်နိုင်တယ်။ ရိုးရိုးသားသား ပြောရရင် သူ့ရဲ့ကိစ္စတွေကို လျှို့ဝှက်နိုင်စွမ်းက ဒီနေရာမှာ အလေအလွင့်ဖြစ်နေတယ်၊ သူ လျှို့ဝှက် အေးဂျင့်ကောင်းတစ်ယောက် ဖြစ်နိုင်တယ်။ အဲဒီအစား သူကဖောက်ပြန်ဖို့ပဲ အသုံးပြုနေတယ်… တကယ်ကို အရည်အချင်းရှိပြီး သုံးစားမရဘူး။]

“နင် သူ့ကို ချီးမွမ်းနေတာလား”

[မဟုတ်ပါဘူး၊ မဟုတ်ပါဘူး။ ငါလှောင်ပြောင်နေတာပါ]

နဉ်ရွှီနှင့် ဖရဲသီးစားခြင်းစနစ်တို့ အတင်းအဖျင်း ပြောနေစဉ် ဟွာကျိုင်းဂိုဏ်းတပည့်၏ ဓားချက်များသည် ပို၍ နှေးပြီး အားနည်းလာ၏။

“သူ့ အားတွေ ကုန်နေတာလား” နဉ်ရွှီက မေးလိုက်သည်။

ဖရဲသီးစားခြင်းစနစ်က အတင်းအဖျင်းပေါ်တွင် အာရုံစိုက်နေဆဲဖြစ်ပြီး ပေါ့ပေါ့ဆဆ ပြန်ဖြေလိုက်၏။ [ဖြစ်နိုင်ပါတယ်။ သူ အာရုံပျံ့လွင့်နေပုံရတယ်၊ သူက နင်တို့အားလုံးကို တစ်ယောက်တည်း ရင်ဆိုင်ရမှာ ကြောက်နေတာဖြစ်နိုင်တယ်]

မဟုတ်၊ ဟွာကျိုင်းဂိုဏ်းတပည့်သည် မကြောက်ခဲ့ပါ။

သူသည် သူတို့၏ စကားဝိုင်းကြောင့် လုံးဝထိတ်လန့်နေခဲ့ခြင်း ဖြစ်သည်။

သူသည် တွေဝေစွာရပ်နေပြီး သူ ကြားခဲ့ရသမျှကိုပြန်လည် စဉ်းစားနေခဲ့သည်။

သူတို့ ဘာတွေ ပြောနေတာလဲ။

ဒါတွေက အမှန်လား အမှားလား။

ပြီးတော့ သူတို့ ဒီသတင်းအချက်အလက်တွေကို ဘယ်က ရခဲ့တာလဲ။

အရေးအကြီးဆုံးက ယုံဖုန်းလို အဆင့်မြင့်သူအကြောင်းကိုတောင် အတင်းအဖျင်း ပြောရဲလောက်အောင် သူတို့ ဘယ်လိုများကြောက်ရွံ့မှု ကင်းမဲ့နေရတာလဲ။

တပည့်သည် သူ၏တုန်လှုပ်မှုမှ ပြန်လည် မထူထောင်နိုင်မီ ဓားတစ်ချောင်းက သူ၏ ကျင့်ကြံမှု ဗဟိုချက်ကို ရုတ်တရက် ထိုးဖောက်သွားပြီး သူတုံ့ပြန်ချိန် မရမီ ၎င်းကို လုံးဝ ပျက်စီးစေခဲ့သည်။

ဓားသည် လေးလံပြီး ရိုးရှင်းသော အနက်ရောင်ဖြစ်ကာ ပုံပန်းသဏ္ဍာန်က ထူးခြားမှုမရှိသော်လည်း ၎င်းသည် ပြင်းထန်သော ထိုးနှက်ချက်ကို ပေးခဲ့သည်။

တပည့်သည် သူ၏ မေးခွန်းများကို ထုတ်ဖော်ပြောဆိုရန် အခွင့်အရေး မရခဲ့ပေ။

ဓားကို ဆွဲထုတ်လိုက်သောအခါ ဘာတစ်ခုမှ မကျန်တော့ဘဲ တပည့်သည် ကျယ်လောင်သော အသံဖြင့် နောက်ပြန် လဲကျသွား၍ ဖုန်မှုန့်များ ပျံ့လွင့်သွားလေသည်။

သေဆုံးချိန်တွင်ပင် သူ၏ မျက်လုံးများက ပြူးကျယ်နေဆဲဖြစ်ပြီး ကြောက်ရွံ့မှုနှင့် မယုံကြည်နိုင်မှုများဖြင့် ပြည့်နက်နေ၏။

ဤအရာကို မြင်သောအခါ နဉ်ရွှီသည် ခဏတာ ကြောင်သွားပြီးနောက် သတိပြန်ဝင်လာခဲ့သည်။

သူမ၏ ဓားကို ကိုင်ထားဆဲဖြစ်ပြီး သူမက “ဘာလို့ ရုတ်တရက်ကြီး သတ်လိုက်တာလဲ”

ခုနက ထိုးနှက်ခဲ့သော ဖြူစင်သောကျင့်ကြံသူသည် သူ၏အေးစက်သော စွမ်းအင်ကို ရုပ်သိမ်းပြီး သူ၏ ပုံမှန် အန္တရာယ်ကင်းသော၊ ခွေးပေါက်စလေးလို ပုံစံသို့ ပြန်ရောက်သွားခဲ့သည်။

သူ၏ မျက်လုံးများကို အနည်းငယ် လျှော့ချလိုက်ပြီး သူ ပြန်ဖြေလာခဲ့သည်မှာ “ကျွန်တော် သူ့ကို မကြိုက်ဘူး”

အမှန်တရားတွင် တပည့်သည် နဉ်ရွှီနှင့် ဖရဲသီးစားခြင်းစနစ်အကြောင်းကို အလွန်အကျွံ သိရှိသွားခဲ့သောကြောင့်သာ။

သူတို့၏ လျှို့ဝှက်ချက်ကို ဖော်ထုတ်လိုက်သော ပြင်ပလူတစ်ဦးသည် *မတည်ငြိမ်သော အကြောင်းအရာတစ်ခုဖြစ်ပြီး ဖယ်ရှားရမည့်သူ ဖြစ်ပေသည်။

(T/N- အန္တရာယ်ရှိတယ်၊ အစီအစဉ်နဲ့ လုံခြုံရေးကို ထိခိုက်စေတယ်လို့ပြောချင်တာ)

ဤအရာသည် လျှို့ဝှက်နယ်မြေသို့ မဝင်မီ သူတို့၏ ဂိုဏ်းချုပ်က သူ့ကို တာဝန်ပေးအပ်ခဲ့သော လုပ်ငန်းဖြစ်ပြီး သူဆန္ဒအလျောက် လက်ခံခဲ့သော မစ်ရှင်တစ်ခုဖြစ်သည်။

ဒါ့အပြင် နတ်ဝိညာဉ်အာရုံကို ပိတ်ဆို့ထားသော ပစ္စည်းသည် ယခုအခါ သူ့လက်ထဲတွင် ပြန်လည် ရောက်ရှိနေပြီဖြစ်သည်။

လျှို့ဝှက်နယ်မြေအတွင်းတွင် သူသည် ဖရဲသီးစားခြင်းစနစ် ဖုံးကွယ်ပြီး လုံခြုံနေစေရန် နဉ်ရွှီ၏ အနီးတွင် အမြဲတမ်း နေခဲ့သည်။

ဖရဲသီးစားခြင်းစနစ်က အားပေးသည်။ [ကောင်းတယ်! အဲဒါမျိုး ဖြစ်သင့်တယ်၊ မဆိုင်းမတွဘဲ သတ်ပစ်လိုက်တာမျိုးပေါ့! ဓားကျင့်ကြံသူတစ်ဦးက အမြဲတမ်း ပြတ်သားနေရမယ်]

[သူက ငါတို့ရဲ့ မိစ္ဆာအမြုတေကို ခိုးယူပြီး ငါတို့ကို အရင် စိန်ခေါ်ခဲ့တာ]

[သူသာ မိစ္ဆာမမြုတေကို သန့်စင်ဖို့ အလျင်မလိုခဲ့ဘူးဆိုရင်၊ ပြီးတော့ အရေးမကြီးတဲ့ကိစ္စတွေအတွက် စွမ်းအင်မဖြုန်းမိအောင် ရှောင်ခဲ့တာမျိုးမဟုတ်ရင် သူ ချင်းရီလော့နဲ့ နတ်ဘုရား ချင်ကျို့တို့ကို ဒီလောက် လွယ်လွယ်နဲ့လွှတ်ပေးခဲ့မှာ မဟုတ်ဘူး]

[ဖြူစင်သောကျင့်ကြံသူက လောက,က ပိုးမွှားတွေကို ဖယ်ရှားနေရုံလေးပဲ]

နဉ်ရွှီသည် နောက်ဆုံးတွင် အခြေအနေကို လက်ခံလိုက်သည်။

ထိုဟွာကျိုင်းဂိုဏ်းတပည့်သည် လူကောင်း မဟုတ်ခဲ့ပေ။ သူ့ကို သတ်ခြင်းသည် တရားမျှတပါသည်။

သူမကို အံ့အားသင့်စေဆုံးက ဖြူစင်သောကျင့်ကြံသူ၏ ထိုးနှက်ချက်သည် မည်မျှသန့်ရှင်းပြီး ပြတ်သားခဲ့ခြင်းပင်။

သူ၏ အန္တရာယ်ကင်းပုံရသည့် ပုံပန်းသဏ္ဍာန်ရှိသော်လည်း သူတို့ထဲတွင် အပြင်းထန်ဆုံး ဖြစ်နေသည်ကို တွေ့ရသည်။

ပို၍ပင် အံ့အားသင့်စရာမှာ သူ၏ဓားပညာပင်။

သူသည် အဓိကအားဖြင့် အစားအသောက် ကျင့်ကြံသူ ဖြစ်သော်လည်း ဓားပညာကို ဒုတိယအနေဖြင့်သာ လေ့ကျင့်သော်လည်း သူ၏ဓားကို သူ့ကိုယ်သူ တိုးချဲ့ထားသကဲ့သို့ ကိုင်တွယ်ခဲ့သည်။

အချို့သော အကြောင်းပြချက်ကြောင့် နဉ်ရွှီသည် ဖရဲသီးစားခြင်းစနစ်က အရင်က ဖော်ပြခဲ့သော တစ်စုံတစ်ခုကို သတိရလိုက်၏။

၎င်းက သူမ၏ အဖော်များထဲတွင် ပြန်လည်ဝင်စားသော အင်အားကြီး ပုဂ္ဂိုလ်တစ်ဦး ရှိကြောင်း အရိပ်အမြွက် ပြောခဲ့သည်။

ပြီးတော့ ထိုသူသည် သူမနှင့် အလွန် နီးစပ်သည်။

ဤပြန်လည်ဝင်စားသော အင်အားကြီး ပုဂ္ဂိုလ်သည် သူတို့၏ အတိတ်ဘဝတွင် သစ္စာဖောက်ခံခဲ့ရပြီး နောက်ဆုံးတွင် သူတို့၏ကိုယ်ခန္ဓာ ပျက်စီးပြီး ဝိညာဉ် ငြိမ်းသတ်ခံရခြင်းဖြင့် ကြေကွဲဖွယ် အဆုံးသတ်နှင့် တွေ့ဆုံခဲ့သည်။

သို့သော် အင်အားကြီး ပုဂ္ဂိုလ်သည် အင်အားကြီးပုဂ္ဂိုလ်အဖြစ် ဆက်လက် တည်ရှိသည်။ ပြန်လည်ဝင်စားပြီးနောက်တွင်ပင် သူတို့၏ အရည်အချင်းသည် ထူးခြားနေဆဲဖြစ်သည်။

ရုတ်တရက် နဉ်ရွှီက “နင် ပြောခဲ့တာက အင်အားကြီးပုဂ္ဂိုလ်ကို ထိခိုက်စေဖို့ ပါဝင်ခဲ့တဲ့လေးယောက်က အခုဆိုရင်သြဇာကြီးမားနေတော့ လှုပ်ရှားဖို့ခက်ခဲနေပြီဆို”

“ဒါပေမဲ့ ငါတို့သာ သူတို့ကို နေ့တိုင်း နည်းနည်းစီလှုပ်ရှားပေးရင် နောက်ဆုံးမှာ သူတို့ကို ဖြုတ်ချနိုင်မှာ မဟုတ်ဘူးလား”

ဤအရာကို ကြားရသောအခါ ဖရဲသီးစားခြင်းစနစ်သည် ခဏတာ တိတ်ဆိတ်သွားပြီးမှ မေးလာ၏။

[Host၊ နင် ဘာလုပ်ဖို့ စီစဉ်နေတာလဲ]

နဉ်ရွှီက တိုက်ရိုက် ပြန်မဖြေဘဲ “သူတို့ ဘယ်သူတွေလဲဆိုတာ ပြောပြ”

ဒီတစ်ကြိမ်မှာ ဖရဲသီးစားခြင်းစနစ်သည် ပို၍ပင် ကြာအောင် တိတ်ဆိတ်နေခဲ့သည်။

နောက်ဆုံးတွင် ၎င်းက ရှင်းပြလာ၏။

[တစ်စုံတစ်ယောက် မဟာယာနအဆင့်ကို ရောက်ရှိသွားပြီဆိုရင် *တာအိုနာမည်ကို ဖော်ပြရုံနဲ့တောင် နင့်ရဲ့ တည်ရှိနေမှုကို သူတို့ ခံစားနိုင်တယ်]

(T/N- တာအိုနာမည်က ဓားကျင့်ကြံသူဘာညာ အဲ့လိုဟာထင်တယ်)

[မဟာယာနကျင့်ကြံသူတစ်ယောက်ကို အခု ရင်ဆိုင်ဖို့က ပညာရှိရာ မရောက်ဘူး]

နဉ်ရွှီက နောက်ဆုတ်ခြင်း မရှိပေ။ “သူတို့ လေးယောက်လုံးက မဟာယာနအဆင့်မှာ ရှိတာလား”

[မဟုတ်ပါဘူး၊ နှစ်ယောက်က မဟာယာနအဆင့်မှာ ရှိပြီး နှစ်ယောက်က အတိဒုက္ခဖြတ်ကျော်ခြင်းအဆင့်မှာ ရှိတယ်]

ခန္ဓာကိုယ် ပေါင်းစည်းခြင်းအဆင့်ပြီးနောက် အတိဒုက္ခဖြတ်ကျော်ခြင်းအဆင့် လာသည်၊ ပြီးနောက် မဟာယာနအဆင့် ဖြစ်သည်။

လက်ရှိတွင် မဟာယာနကျင့်ကြံသူများသည် ကျင့်ကြံခြင်းလောက၏ အမြင့်ဆုံး တိုက်ခိုက်ရေးစွမ်းအားကို ကိုယ်စားပြု၏။

နဉ်ရွှီက တိုက်ရိုက် မေးလိုက်သည်။ “အတိဒုက္ခဖြတ်ကျော်ခြင်းအဆင့်မှာ ရှိတဲ့သူတွေက ငါ့ရဲ့ တည်ရှိနေမှုကို ခံစားနိုင်လား”

[မရဘူး] ခဏရပ်ပြီးနောက် ဖရဲသီးစားခြင်းစနစ်က ထပ်ပြောလာသည်။

[ဒါပေမဲ့ ငါတော့ ဒါက သူတို့ကို ရင်ဆိုင်ဖို့ အကောင်းဆုံး အချိန်လို့ မထင်ဘူး…]

၎င်းက ရုတ်တရက် စိတ်လှုပ်ရှားလာသည်။

[ဒါပေမဲ့ နင် သူတို့ရဲ့ လျှို့ဝှက်ချက်တွေကို ဖော်ထုတ်ချင်တယ်ဆိုရင် ငါက နင့်ကို အပြည့်အဝ ထောက်ခံပါ့မယ်]

သူတို့၏ လျှို့ဝှက်ချက်များလား။

နဉ်ရွှီက “အလျင်လိုဖို့ မလိုပါဘူး။ လျှို့ဝှက်ချက်တွေကို တစ်ချိန်တည်း တစ်ခုချင်းစီ ထုတ်ဖော်သင့်တယ်”

လျှို့ဝှက်ချက်များ အများကြီးကို တစ်ပြိုင်နက် ချပေးလိုက်ရင် ကျင့်ကြံသူများကို လွှမ်းမိုးသွားစေနိုင်ပါသည်။

“ကျင့်ကြံမှုအဆင့် အနိမ့်ဆုံးသူအကြောင်းကို အရင် ပြောပြ”

[ကောင်းပြီ]

နဉ်ရွှီသည် ဖရဲသီးစားခြင်းစနစ်၏ လျှို့ဝှက်ချက်များ ထုတ်ဖော်ခြင်းကို နားထောင်နေစဉ် သူမ၏ အဖော်များထံ လှည့်ပြီး “ငါတို့ ဝိညာဉ်ဆေးပင်တွေ ရှာဖို့အတွက် ဧရိယာကိုခွဲပြီး ရှာကြစို့”

အဖော်များသည် ချီအာနှင့်အတူ အချင်းချင်း ကြည့်ကြပြီး သဘောတူညီမှုကို ဖော်ပြသော်လည်း သူတို့ထဲမှ မည်သူမျှ တကယ်တမ်း လှုပ်ရှားခြင်း မရှိ၊ သူတို့အားလုံး ထိုနေရာတွင် ဆက်နေခဲ့ကြ၏။

နဉ်ရွှီ: ???

မျက်နှာပြောင်သော ချီအာက ပထမဆုံး စကားပြောလာသည်။ “ကျွန်တော် ခင်ဗျားနဲ့ အတူနေလို့ ရမလား။ တာအို မိတ်ဆွေ၊ ကျွန်တော် ခင်ဗျားရဲ့ ဘေးကနေ တစ်လှမ်းတောင် မခွာချင်ဘူး”

ဟုတ်ပါတယ်၊ ဒါက ချဲ့ကားပြောဆိုခြင်းမျှသာ။

သူ၏ အမှန်တကယ် ရည်ရွယ်ချက်မှာ နဉ်ရွှီ၏အနီးတွင် နေပြီး အရည်ရွှမ်းသော အတင်းအဖျင်းများကို ဆက်နားထောင်ရန်ဖြစ်သည်။

နဉ်ရွှီ မတုံ့ပြန်နိုင်မီ ဖရဲသီးစားခြင်းစနစ်က စတင် ညည်းညူတော့သည်။

[အရမ်း စေးကပ်လွန်းတယ်! အရမ်းကို စေးကပ်တာပဲ]

[Host၊ သူ့ကို ထွက်သွားဖို့ ပြောလိုက်]

ဖရဲသီးစားခြင်းစနစ်ကို လျစ်လျူရှုပြီး နဉ်ရွှီက အခြားသူများကို ကြည့်ပြီး “ရှင်တို့ရော ဘယ်လိုလဲ”

ဝူလုချန်နှင့် ကျန်သူများက အလျင်အမြန် ပါဝင်လာသည်။ “ကျွန်တော်တို့လည်း ခင်ဗျားနဲ့ အတူနေချင်ပါတယ်”

နဉ်ရွှီက ခေါင်းညိတ်သည်။ “ကောင်းပြီ၊ ဒါဆို အတူတူ သွားကြစို့”

ဤအချိန်တွင် စေတနာ့ဝန်ထမ်းလေး ချီအာက “ကျွန်တော့်မှာ ဝိညာဉ်ဆေးပင်တွေရဲ့ နေရာကို ရှာဖွေနိုင်တဲ့ ကိရိယာတစ်ခု ရှိတယ်။ ကျွန်တော် လမ်းပြပေးပါမယ်၊ ဒါက ရှာဖွေမှုကို ပိုမြန်စေတယ်”

ဖရဲသီးစားခြင်းစနစ်က ရုတ်တရက် သူ၏လေသံကို ပြောင်းလိုက်၏။

[ကောင်းပြီ၊ သူက တစ်စုံတစ်ရာ အသုံးဝင်နေသေးတဲ့အတွက် သူ့ကို ထွက်သွားခိုင်းတာကို ခေတ္တရပ်လိုက်ရအောင်]

နဉ်ရွှီ: …

ချီအာ: (မျက်ရည်ကျခြင်း) လုံးဝ ထိမိသွားပြီ။

ဝိညာဉ်ဆေးပင်များ ရှာဖွေခြင်းမပြုမီ ဖြူစင်သောကျင့်ကြံသူသည် နဉ်ရွှီအား ပြည့်စုံသော ဟင်းချိုတစ်ခွက် ကမ်းပေးသည်။

“အလုပ်ရှုပ်နေခဲ့တော့ ဟင်းချိုအရင် သောက်လိုက်ပါဦး”

မှိုနှင့် ကြက်ဟင်းချို၏ မွှေးရနံ့က သူမ၏ အာရုံများကို ပြည့်စေသည်။ နဉ်ရွှီက တွန့်ဆုတ်ခြင်း မရှိဘဲ “ဟုတ်ပြီ”

ဖြူစင်သောကျင့်ကြံသူ၏ ချက်ပြုတ်မှု စွမ်းရည်သည် အမြဲတမ်း ထူးခြားသည်။

နဉ်ရွှီသည် သူမ၏ ဟင်းချိုကို မြည်းစမ်းနေစဉ် ချီအာသည် သူ၏ ပန်းကန်လုံးထဲရှိ ဟင်းချို၏ အရည်ကျဲကျဲ ကြည့်ပြီး အနည်းငယ် စကားမဲ့သွားခဲ့၏။

“ဒီလောက်လေးပဲ ရတာလား”

ဘာပဲဖြစ်ဖြစ် သူသည် သူ၏ ဈေးကြီးသော ကိရိယာကို အသုံးပြုပြီး ဝိညာဉ်ဆေးပင်များကို ရှာဖွေတော့မည်။ ဒီဟင်းချို အနည်းငယ်က သူ့ ဆာလောင်မှုကိုတောင် မထိခိုက်နိုင်ပေ။

ဝူလုချန်က သူ့ကို လှမ်းကြည့်ပြီး “ကျေးဇူးတင်ပါတယ်” ဟုသာ တိုးတိုးလေး ပြောလိုက်သည်။

သူပင်လျှင် ဖြူစင်သောကျင့်ကြံသူ၏ ညီငယ်တပည့်ဖြစ်သည့်တိုင် ဟင်းချို သုံးဇွန်းသာရခဲ့သည်။

အိုးထဲရှိ ဟင်းချို ပမာဏသည် သတ်မှတ်ထားသည်။ နဉ်ရွှီ ပိုရရှိသောကြောင့် အခြားသူများက သဘာဝအတိုင်း လျော့နည်းသွားခဲ့၏။

သို့သော် သူတို့သည် တွဲပါလာသူများမျှသာဖြစ်သည်ကို ထည့်သွင်းစဉ်းစားပါက မည်သည့် ဟင်းချိုကိုမဆို ရရှိခြင်းသည် ကံကောင်းနေပြီဖြစ်ပါသည်။

သူတို့သည် နဉ်ရွှီ၏ ကျေးဇူးကို ခံစားနေရခြင်းမျှသာ။

သူမသာ မရှိပါက ဖြူစင်သောကျင့်ကြံသူသည် သူတို့အတွက် ချက်ပြုတ်ရန်ပင် စိတ်ပူမည် မဟုတ်ပေ။

__

သူမ၏ ဟင်းချိုကို သောက်နေစဉ် နဉ်ရွှီသည် သူမ၏ နောက်ခြေလှမ်းများအကြောင်းကိုလည်း ဂရုတစိုက် စဉ်းစားနေခဲ့သည်။

ဟုတ်ပါသည်။ သူမသည် အတိဒုက္ခဖြတ်ကျော်ခြင်းအဆင့် ဘုရင်တစ်ဦး၏ လျှို့ဝှက်ချက်များကို ထုတ်ဖော်တော့မည်!

ဖရဲသီးစားခြင်းစနစ်က သူ၏ လက်များကို ပွတ်သပ်လျက်

[Host နင်ယုံဖုန်းအကြောင်း အရှုပ်တော်ပုံတစ်ခုကို ဖော်ထုတ်ခဲ့တဲ့ နောက်ဆုံးတစ်ကြိမ်တုန်းက “နယ်မြေသုံးထောင် ကျင့်ကြကြသူများ သတင်းဖလှယ်ရာနေရာ” တစ်ခုလုံး ဆူညံသွားခဲ့တာ။ သူတို့က နင့်ကို နောက်မကျခင် ရပ်တန့်ဖို့ စည်းရုံးဖို့တောင် ကြိုးစားခဲ့ကြတယ်]

[နင်သာ အတိဒုက္ခဖြတ်ကျော်ခြင်းအဆင့် ဘုရင်တစ်ဦးကို ဖော်ထုတ်တော့မယ်ဆိုတာ သူတို့သိသွားရင် သူတို့ သတိမေ့သွားလောက်မှာ မဟုတ်ဘူးလား]

နဉ်ရွှီက ထိုမျှလောက် အလေးအနက်ဟု မထင်သော်လည်း “သူတို့ကို ပြင်ဆင်ချိန်ပေးဖို့အတွက် ကြိုတင်မိတ်ဆက်တာတစ်ခုကို အရင် ပို့စ်တင်သင့်လား”

ဖရဲသီးစားခြင်းစနစ်က ချက်ချင်း သဘောတူလာသည်။

[ကောင်းတဲ့ စိတ်ကူးပဲ]

မကြာမီ “နယ်မြေသုံးထောင် ကျင့်ကြ‌သူများ သတင်းဖလှယ်ရာနေရာ” ဖိုရမ်ကို ကြည့်ရှုနေသော ကျင့်ကြံသူများသည် စာမူအသစ်တစ်ခုကို မြင်သောအခါ ကြောင်သွားကြသည်။

စာမူတင်သူသည် ဖရဲသီးရွှေ့ပြောင်းသူ ဖြစ်နေဆဲဖြစ်ပြီး ခေါင်းစဉ်က ထိတ်လန့်စရာကောင်းလောက်အောင် ရိုးရှင်းလှ၏။

[နောက်ထပ် လျှို့ဝှက်ချက်- ကုန်းချိန်]

ကျင့်ကြံသူများ: !!!

ကုန်းချိန်လား။ အတိဒုက္ခဖြတ်ကျော်ခြင်းအဆင့် ဘုရင် ကုန်းချိန်လား။

__