အခန်း (၅၅၃-၅၅၄)

အပိုင်း(၅၅၃) ဒုတိယအကြိမ် ထိတွေ့ခြင်း

လော်ယွမ်၏ လက်ရှိအင်အားအရဆိုလျှင် ဤကဲ့သို့သော စစ်ပွဲမျိုးက သူ့အတွက် ကြီးမားသော ဂယက်ရိုက်ခတ်မှုမျိုး မပေးစွမ်းနိုင်တော့ပေ။

သူသာ သာလွန်အဆင့်သို့ ဝင်ရောက်လိုက်မည်ဆိုပါက တစ်စက္ကန့်အတွင်းမှာပင် ဤဗိုရှင်းဂြိုဟ်သားတို့၏ ယာဉ်ပျံအုပ်ကို ကွေးညွတ်ပျံသန်းခြင်း အခြေအနေမှ ရပ်တန့်သွားစေပြီး တစ်ချိန်တည်းမှာပင် အက်တမ်များအဖြစ် ချက်ချင်း ပြိုကွဲသွားစေနိုင်သည်။

သို့သော်လည်း သူက ကိုယ်တိုင်ကိုယ်ကျ ဝင်ရောက်စွက်ဖက်လိုသည့် စိတ်ဆန္ဒကို မျိုသိပ်ထားလိုက်သည်။

လူသားမျိုးနွယ်အတွက်မူ ဤစစ်ပွဲသည် သွေးနှင့်မီးတောက်များကြားမှ ဖြတ်သန်းရမည့် စမ်းသပ်မှုတစ်ခုဖြစ်ပြီး ဂြိုဟ်ပေါ်မှ ယဉ်ကျေးမှုအဆင့်မှ ကြယ်တာရာ ယဉ်ကျေးမှုအဆင့်သို့ ကူးပြောင်းရန်အတွက် စိန်ခေါ်မှုတစ်ရပ်လည်း ဖြစ်သည်။

နိုင်သည်ဖြစ်စေ၊ ရှုံးသည်ဖြစ်စေ ဤသည်က လူသားများအတွက် အဖိုးတန်သော အတွေ့အကြုံတစ်ခု ဖြစ်လာပေလိမ့်မည်။

ထိုစဉ် လော်ယွမ်က လူသားတို့၏ အာကာသတိုက်လေယာဉ်များ ပစ်ခတ်မှုကြောင့် စက်ရပ်သွားပြီး အာကာသထဲတွင် လွင့်မျောနေသော ဗိုရှင်းယာဉ်ပျံ အချို့ဆီသို့ မော့ကြည့်လိုက်သည်။

နောက်တစ်စက္ကန့်တွင် လျှပ်တစ်ပြက် နေရာရွှေ့ပြောင်းလိုက်ပြီးနောက် ယာဉ်ပျံတစ်စင်း၏ အနီးသို့ သူ ရောက်ရှိသွားတော့သည်။

လေခွင်းပုံစံရှိသော ထိုကွေးညွတ်ပျံသန်းရေး ယာဉ်ပျံပေါ်တွင် အာကာသတိုက်လေယာဉ်များ၏ ဂမ်မာရောင်ခြည် အမြောက်များဖြင့် ပစ်ခတ်ခံထားရသည့် အရာများကို ထင်ရှားစွာ မြင်တွေ့နေရသည်။

၎င်းသည် ပြင်းထန်သော အပူရှိန်ကြောင့် အရည်ပျော်ကျသွားပြီးနောက် ပြန်လည်အေးခဲသွားသည့် ပုံစံမျိုးဖြစ်ကာ မျက်နှာပြင်ပေါ်တွင် အေးခဲနေသော လှိုင်းလုံးတစ်ခုကို ထွင်းထုထားသကဲ့သို့ ဖြစ်နေသည်။

လော်ယွမ်က တစ်ချက်မျှသာ ဝေ့ကြည့်လိုက်သော်လည်း ဤယာဉ်ပျံ၏ အချက်အလက်များက သူ၏ ဦးနှောက်ထဲသို့ ချက်ချင်း စီးဝင်လာခဲ့သည်။

ဗိုရှင်းယာဉ်ပျံ၏ သံချပ်ကာသည် ကျုံ့ဝင်မှုအချိုး ၂၅ ဝန်းကျင်ခန့်ရှိသော အထူးသတ္တုတစ်မျိုးဖြစ်သည်။

လူသားတို့၏ အာကာသယာဉ်ပျံများတွင် အများဆုံးအသုံးပြုသည့် ကျုံ့ဝင်မှုအချိုး ၃၀ ရှိသော သတ္တုများနှင့် နှိုင်းယှဉ်ပါက များစွာ အားနည်းနေသည်။

သို့သော်လည်း အာကာသတိုက်လေယာဉ်များ၏ စွမ်းအင်အဆင့်ဖြင့် ဗိုရှင်းယာဉ်ပျံ၏ သံချပ်ကာကို အလုံးစုံ ဖောက်ထွင်းနိုင်ရန်မှာ အလွန် ခက်ခဲနေဆဲပင်။

ကွေးညွတ်ပျံသန်းရေး ယာဉ်ပျံတစ်စင်းလုံး၏ သံချပ်ကာအထူမှာ အံ့မခန်းဖွယ် ပေ ၁၆၀ ကျော်ခန့်ရှိပြီး ဂမ်မာရောင်ခြည် အမြောက်က ပေ ၄၀ ခန့်ကိုသာ အရည်ပျော်စေနိုင်ခဲ့သည်။

အဓိက ထိခိုက်ပျက်စီးမှုမှာ ဂမ်မာရောင်ခြည်၏ ဖောက်ထွင်းနိုင်စွမ်းကြောင့်သာ ဖြစ်သည်။

မကြာမီမှာပင် လော်ယွမ်၏ ပုံရိပ်က ယာဉ်ပျံအတွင်းသို့ ဝင်ရောက်သွားလေသည်။

အတွင်းသို့ ရောက်ရှိသွားသည်နှင့် တစ်ပြိုင်နက် ပြင်းထန်စူးရှသော အနံ့ဆိုးတစ်ခုက သူ၏ နှာခေါင်းထဲသို့ တန်းတန်းမတ်မတ် ဝင်ရောက်လာသဖြင့် သူက အနံ့ခံအာရုံကို ချက်ချင်း ပိတ်ချလိုက်သည်။

ယာဉ်ပျံအတွင်း၌ မီးခိုးငွေ့များ ထူထပ်စွာ ဖုံးလွှမ်းနေပြီး နေရာအနှံ့တွင် ပြာကျလုမတတ် လောင်ကျွမ်းနေသည်။ နေရာတော်တော်များများတွင် မီးတောက်ကြီးများ တောက်လောင်နေပြီး ရံဖန်ရံခါ လျှပ်စစ်မီးပွင့်များ တဖျပ်ဖျပ် ထွက်ပေါ်နေသည်။

ဤနေရာသည် အဏုမြူဗုံးတစ်လုံး အတွင်း၌ ပေါက်ကွဲသွားသကဲ့သို့ ဖြစ်နေပြီး ယာဉ်ပျံ၏ မူလပုံစံကိုပင် လုံးဝ မှန်းဆ၍ မရနိုင်တော့ချေ။

လော်ယွမ်က လက်ကို တစ်ချက်ဝှေ့ယမ်းလိုက်ရာ မီးခိုးငွေ့များနှင့် မီးတောက်များအားလုံး ချက်ချင်းပင် လျင်မြန်စွာ ပျောက်ကွယ်သွားကြသည်။

ဂမ်မာရောင်ခြည်ပေါက်ကွဲမှု၏ ဖျက်ဆီးမှုကြောင့် ဤနေရာရှိ စက်ပစ္စည်း အများစုမှာ လုံးဝ ပျက်စီးနေပြီဖြစ်သည်။ သို့သော်လည်း ယာဉ်ပျံအတွင်းပိုင်းရှိ တည်ဆောက်ပုံ အချို့က သူ့ကို အနည်းငယ် ရင်းနှီးကျွမ်းဝင်နေသကဲ့သို့ ခံစားရစေသည်။

ဤသည်မှာလည်း အံ့ဩစရာတော့ မဟုတ်ပေ။ မည်သို့ပင်ဆိုစေ လူသားများနှင့် ဗိုရှင်းတို့၏ နည်းပညာသည် အတိုင်းအတာတစ်ခုအထိ အရင်းအမြစ်တစ်ခုတည်းမှ ဆင်းသက်လာခြင်းဖြစ်သည်။

ယနေ့ခေတ် လူသားတို့၏ ယာဉ်ပျံများပင်လျှင် လူသားများ ပထမဆုံး သိမ်းပိုက်ရရှိခဲ့သော ပထမမျိုးဆက် ဗိုရှင်းယာဉ်ပျံကို အခြေခံ၍ တည်ဆောက်ထားခြင်းဖြစ်သည်။

လူသားတို့၏ နည်းပညာများ ပြောင်းလဲတိုးတက်လာရန် နောက်ထပ် ဆယ်စုနှစ်များ သို့မဟုတ် ရာစုနှစ်များစွာ ကြာမြင့်လာမှသာလျှင် အရိုးထဲအထိ စွဲမြဲနေသော ဤဗိုရှင်းတို့၏ အရိပ်အယောင်များ လုံးဝ ပျောက်ကွယ်သွားနိုင်ပေလိမ့်မည်။

သို့သော် နှိုင်းယှဉ်ကြည့်မည်ဆိုပါက လူသားတို့၏ စစ်သင်္ဘောများက စစ်သင်္ဘောများနှင့် ပို၍တူညီပြီး ဗိုရှင်းဂြိုဟ်သားတို့၏ စစ်သင်္ဘောများကမူ စစ်ဘက်နှင့် အရပ်ဘက် နှစ်မျိုးစလုံး အသုံးပြုနိုင်သော ယာဉ်ပျံမျိုးနှင့် ပိုတူနေသည်။

ဤနေရာက ကြီးမားကျယ်ဝန်းလွန်းလှပြီး နေရာလွတ် အများအပြားကို အလဟဿ ဖြုန်းတီးထားသည်။ ဤကဲ့သို့သော အခြေအနေမျိုးကို စစ်ပွဲများအတွက် သီးသန့်တည်ဆောက်ထားသော လူသားတို့၏ စစ်သင်္ဘောများပေါ်တွင် လုံးဝ မြင်တွေ့ရမည် မဟုတ်ပေ။

မိုးမျှော်တိုက်ကြီးများအလား ကြီးမားလှသော ဘက်ထရီအုပ်စုများနှင့် မရေမတွက်နိုင်သော ပေါင်းစပ်စွမ်းအင်မီးဖိုများ ရှိနေပြီး အလွတ်ဖြစ်နေသော နေရာအားလုံးနီးပါးကို စစ်ပွဲအတွက်သာ အသုံးချထားလေ့ရှိသည်။

ဖြစ်နိုင်သည်မှာ မည်သည့် ပြင်ပရန်သူမျှ မရှိခဲ့ခြင်းကြောင့် ဗိုရှင်းဂြိုဟ်သားတို့၏ ယာဉ်ပျံနေရာတိုင်းတွင် သက်တောင့်သက်သာရှိသည့် အငွေ့အသက်များ ပြည့်နှက်နေခြင်း ဖြစ်ပေမည်။

လူသားများကမူ ကမ္ဘာပျက်ကပ် စတင်ချိန်မှစ၍ စစ်ပွဲများ တစ်ခဏမျှ ရပ်တန့်သွားခြင်း မရှိခဲ့ဘဲ ရှင်သန်ရေးအတွက် အမြဲတမ်း ရုန်းကန်နေခဲ့ရသည်။

ကမ္ဘာမြေကို စွန့်ခွာကာ ထွက်ပြေးရသည့် ခရီးစဉ်တစ်လျှောက်တွင်ပင် စစ်ပွဲအတွက် ရူးသွပ်စွာ ပြင်ဆင်နေခဲ့ကြသည်။

ထိုအရာများကို တွေးမိလိုက်သောအခါ လော်ယွမ်၏ ရင်ထဲတွင် မနာလိုစိတ်အချို့ အလိုအလျောက် ပေါ်ပေါက်လာခဲ့သည်။

ဤကဲ့သို့သော မျိုးနွယ်စုမျိုးက ဤစကြဝဠာကြီးထဲတွင် ရှင်သန်ရန် လုံးဝ အရည်အချင်းမရှိပေ။

.....

ဗိုရှင်းဂြိုဟ်သားများသည် အလင်းအလျင်ဖြင့် နှစ်ရက်စာ ခရီးအကွာအဝေးအထိ ပျံသန်းသွားပြီးနောက် ကွေ့ဝိုက်ကာ တစ်ဖန် ပြန်လှည့်လာခဲ့ကြသည်။

စစ်ပွဲ ထပ်မံဖြစ်ပွားလာသောအခါ အစပိုင်းတွင် လူသားများက အောင်ပွဲခံနိုင်ခဲ့သော်လည်း နောက်ပိုင်းတွင် တစ်ဖက်သတ် အရေးနိမ့်လာသည့် အခြေအနေသို့ ရောက်ရှိလာခဲ့သည်။

သိပ်သည်းဆမြင့်မားသော စွမ်းအင်ရောင်ခြည်တန်းများစွာက အာကာသထဲတွင် ဖြတ်သန်းသွားခဲ့သော်လည်း ပစ်မှတ်ကို လုံးဝ မထိမှန်နိုင်ခဲ့ပေ။

ဗိုရှင်းဂြိုဟ်သားများက လက်နက်စနစ်ဖြင့် တိုက်ခိုက်ခြင်းကို လုံးဝ စွန့်လွှတ်လိုက်ပြီး ကွေးညွတ်ပျံသန်းခြင်း အရှိန်ဖြင့်သာ တည့်တည့်မတ်မတ် ဝင်တိုက်လာခဲ့ကြသည်။

တစ်ရက်ခွဲခန့် အကြာတွင် လူသားတို့၏ အာကာသယာဉ်ပျံတစ်စင်းနှင့် ဗိုရှင်းယာဉ်ပျံတို့ ပွတ်တိုက်မိသွားပြီး လူသားတို့၏ ယာဉ်ပျံမှာ ချက်ချင်း စက်ရပ်သွားခဲ့ရသည်။

ကံကောင်းထောက်မစွာဖြင့် ယာဉ်ပျံသုံးစင်းမှာ လုံလောက်စွာ ခွဲထွက်နေခဲ့ကြသဖြင့် တစ်ခါတည်း အကုန်လုံး ချေမှုန်းမခံခဲ့ရပေ။

သို့သော်လည်း ဤအရာများက လုံးဝ အဓိပ္ပာယ်မရှိပေ။

အကယ်၍ ရန်သူကိုပင် ရှာမတွေ့နိုင်ဘဲ တိုက်ခိုက်၍လည်း မရနိုင်ပါက ယာဉ်ပျံမည်မျှပင် ကျန်ရှိနေပါစေ မည်သည့်အသုံးမှ ဝင်မည်မဟုတ်ချေ။

ထို့အပြင် ယခုတစ်ကြိမ်တွင် ဗိုရှင်းဂြိုဟ်သားများက သင်ခန်းစာရသွားပုံရပြီး ဖြောင့်တန်းစွာ ပျံသန်းခြင်းမရှိတော့ဘဲ စည်းမျဉ်းမဲ့ ကွေးညွတ်ပျံသန်းမှုများကို စတင်လုပ်ဆောင်လာကြသည်။

ဤသည်က မူလကတည်းက ကံတရားကိုသာ အားကိုးနေရသော ထိမှန်နှုန်းကို ပို၍ပင် မျှော်လင့်ချက် ကင်းမဲ့သွားစေသည်။

လက်နက်စနစ်အားလုံးက ပစ်မှတ်ကို အသေမှတ်မရတော့သလို ကြိုတင်ခန့်မှန်း၍လည်း မရနိုင်တော့ပေ။ ပစ်မှတ်အတိအကျကို ထောက်လှမ်းရန်ဆိုသည်မှာ ပို၍ပင် မဖြစ်နိုင်တော့ချေ။

အလင်းထက်မြန်သော ယာဉ်ပျံကို ရင်ဆိုင်ရာတွင် လူသားတို့၏ တုံ့ပြန်မှုအားလုံးမှာ အချည်းနှီး ဖြစ်သွားခဲ့ပြီး ကံတရားကိုသာ ပုံအပ်ထားရတော့သည်။

မကြာမီမှာပင် ဗိုရှင်းယာဉ်ပျံအုပ်က အပြင်ဘက်ဆုံးရှိ အမြောက်စခန်းများကို ကျော်ဖြတ်သွားပြီး အံ့မခန်း အမြန်နှုန်းဖြင့် အာကာသမြို့တော်ဆီသို့ တည့်တည့်မတ်မတ် ဦးတည်လာခဲ့သည်။

အာကာသ ကာကွယ်ရေးစနစ်မှာ ဗိုရှင်းယာဉ်ပျံများရှေ့တွင် လေဟာနယ်တစ်ခုအလား ဖြစ်နေပြီး အလွယ်တကူပင် ဖောက်ထွင်းခံလိုက်ရသည်။

ဤအချိန်တွင် နေအဖွဲ့အစည်းအပြင်ဘက်ရှိ လူသားတို့၏ အဓိကယာဉ်ပျံပေါ်တွင် ဟော်ရှုဝမ်က ပင်မအမြောက် ပစ်ခတ်ခလုတ်ကို လက်ချောင်းဖြင့် ရွယ်ထားဆဲဖြစ်သည်။

ယာဉ်ပျံ၏ လက်နက်စနစ်များကို အစောပိုင်းကတည်းက လူကိုယ်တိုင် ထိန်းချုပ်သည့် စနစ်သို့ သူ ပြောင်းလဲထားခဲ့ပြီးဖြစ်သည်။

မူလက သူ၏ အလိုအလျောက်သိစိတ်ကို အားကိုး၍ ဗိုရှင်းယာဉ်ပျံများကို ပြင်းထန်သော ထိုးနှက်ချက်ပေးရန် ပြင်ဆင်ထားခဲ့သည်။

သို့ရာတွင် မျှော်လင့်ချက် ကင်းမဲ့စရာကောင်းလှသည်မှာ သူ မည်သို့ပင် ပစ်မှတ်ကို ဖမ်းယူရန် ကြိုးစားစေကာမူ ယခင်က အကြိမ်ရာချီ မှန်ကန်ခဲ့ဖူးသော သူ၏ အလိုအလျောက်သိစိတ်က လုံးဝ ပျောက်ကွယ်သွားသကဲ့သို့ ဖြစ်နေသည်။ ယာဉ်ပျံများ ဘေးမှ ဖြတ်သွားသည့်တိုင် သူက ခလုတ်ကို မနှိပ်နိုင်ခဲ့ဘဲ တစ်ကြိမ်မျှပင် မတိုက်ခိုက်နိုင်ခဲ့ချေ။

အလင်းထက်မြန်သော ပျံသန်းမှုရှေ့တွင် သူ၏ အလိုအလျောက်သိစိတ်မှာ လုံးဝ အသုံးမဝင်ကြောင်း သူ တွေ့ရှိလိုက်ရသည်။

"ငါက လူသားမျိုးနွယ်ရဲ့ တရားခံပဲ... လူတိုင်းရဲ့ မျှော်လင့်ချက်တွေကို ငါ ဖျက်ဆီးပစ်လိုက်ပြီ"

ဗိုရှင်းစစ်သင်္ဘောများက အလင်းထက်မြန်သောနှုန်းဖြင့် အဝေးသို့ ထွက်ခွာသွားပြီဖြစ်ပြီး ယခုအချိန်မှ တိုက်ခိုက်မည်ဆိုလျှင်လည်း အခွင့်အရေး လုံးဝ ဆုံးရှုံးသွားပြီ ဖြစ်သော်လည်း သူက ကျောက်ရုပ်တစ်ရုပ်အလား အချိန်အကြာကြီး မလှုပ်မယှက် ရပ်နေဆဲဖြစ်သည်။

နဖူးမှ ချွေးသီးချွေးပေါက်များ တစ်ပေါက်ပြီးတစ်ပေါက် ကျဆင်းလာပြီး ပြင်းထန်သော ကိုယ့်ကိုယ်ကိုယ် အပြစ်တင်စိတ်ကြောင့် သူ၏ စိတ်ခံစားချက်များက ပြိုလဲလုနီးပါး ဖြစ်နေတော့သည်။

ထိုအချိန်မှာပင် ဖိနှိပ်ထားသော အငွေ့အသက်တစ်ခုက တိတ်ဆိတ်စွာ ပျံ့နှံ့လာပြီး ထိန်းချုပ်ရေးခန်းအတွင်းရှိ လူအားလုံး၏ ခန္ဓာကိုယ်များ ချက်ချင်း တောင့်တင်းသွားကာ ဦးနှောက်ထဲတွင်လည်း ဟာလာဟင်းလင်း ဖြစ်သွားတော့သည်။

ဟော်ရှုဝမ်က ပြင်းထန်သော ထူးခြားမှုကို ခံစားလိုက်ရပြီး ခေါင်းကို ခက်ခဲစွာ လှည့်ကြည့်လိုက်သည်။ ထူးခြားသော အာရုံခံနိုင်စွမ်းရှိသည့် ကိုယ်ပျောက်သန္ဓေပြောင်းသူ တစ်ဦးအနေဖြင့် သူ၏ စိတ်စွမ်းအားက အတော်လေး အားကောင်းနေသေးသဖြင့် သတိကို မနည်းထိန်းထားနိုင်ခဲ့သည်။

တင်းကျပ်စွာ ပိတ်ထားသော ထိန်းချုပ်ရေးခန်း တံခါးကြီးက အလိုအလျောက် ပွင့်သွားပြီး လူရိပ်တစ်ခုက တစ္ဆေသရဲတစ်ကောင်အလား သူတို့ဆီသို့ ဖြည်းညှင်းစွာ လျှောက်လာခဲ့သည်။

ထိုသူ၏ မျက်နှာကို မြင်လိုက်ရသောအခါ တစ်ကိုယ်လုံး တုန်ယင်သွားပြီး စိတ်ဝိညာဉ်များ လွင့်စင်သွားသကဲ့သို့ ဖြစ်သွားရသည်။

ဝိုးတဝါးအသိထဲတွင် ထိုသူက အနည်းငယ် စိမ်းသက်နေသကဲ့သို့ ခံစားရပြီး အသားအရောင်ကလည်း လူသားတစ်ယောက်နှင့် မတူဘဲ ထူးဆန်းနေသည်။

သို့သော် နှေးကွေးနေသော တွေးခေါ်နိုင်စွမ်းကြောင့် သူက အသေအချာ မစဉ်းစားနိုင်တော့ပေ။

ဉာဏ်ရည်တုဦးနှောက်ကလည်း မည်သည့် အချက်ပေးသံမျှ မမြည်ခဲ့ချေ။ ဤသူက ယာဉ်ပျံ၏ အမှုထမ်းတစ်ဦး ဖြစ်နေသကဲ့သို့ပင်။

တစ်ဖက်လူက သူ့ကို တစ်ချက်ကြည့်လိုက်သည်ဟု ဟော်ရှုဝမ် ခံစားလိုက်ရပြီး သူက အိပ်မက်ယောင်နေသူတစ်ဦးအလား မတ်တပ်ရပ်ကာ ဘေးသို့ ဖယ်ပေးလိုက်သည်။ အရာအားလုံးက သဘာဝကျနေသကဲ့သို့ပင်။

ရောက်လာသူမှာ အခြားသူမဟုတ်ဘဲ လော်ယွမ်ပင် ဖြစ်သည်။

ဤစစ်ပွဲအတွက် ရှုံးနိမ့်မှုကို သူ လက်ခံနိုင်သည်။ သေကြေဒဏ်ရာရမှုများကိုလည်း သူ လက်ခံနိုင်သည်။ သို့သော် တစ်ဖက်သတ် အရေးနိမ့်နေခြင်းကမူ အဓိပ္ပာယ်မဲ့လွန်းလှသည်။

ဤစစ်ပွဲကို အာကာသမြို့တော်တွင် ရပ်တန့်ပစ်ရမည်။ မည်သို့ပင်ဆိုစေ သူ၏ စစ်သားမွေးစားသားက အာကာသမြို့တော်တွင် တာဝန်ထမ်းဆောင်နေဆဲဖြစ်ရာ ထိုနေရာကို လုံးဝ အထိခိုက်ခံ၍ မဖြစ်ပေ။

လော်ယွမ်က ခုံပေါ်တွင် ဝင်ထိုင်လိုက်ပြီး အနည်းငယ် တုံ့ဆိုင်းနေခဲ့သည်။ အချိန်အတော်ကြာမှသာ နဖူးပေါ်ရှိ ပလာစမာ အကာအကွယ်ကို ဖြုတ်ချလိုက်သည်။ အကာအကွယ် ပျောက်ကွယ်သွားသည်နှင့် သူ၏ လေးဘက်မြင် အမြင်အာရုံက လျှပ်တစ်ပြက် လွတ်မြောက်လာတော့သည်။

ဦးနှောက်ထဲတွင် အနည်းငယ် မူးဝေသွားသကဲ့သို့ ခံစားလိုက်ရသော်လည်း လော်ယွမ်က ချက်ချင်းပင် ပြန်လည် အသားကျသွားခဲ့သည်။

ကြီးမားကျယ်ပြန့်ပြီး ရှင်းလင်းပြတ်သားလှသော လေးဘက်မြင် ပုံရိပ်တစ်ခုက သူ၏ ဦးနှောက်ထဲတွင် ပေါ်လာပြီး ထိုဗိုရှင်းယာဉ်ပျံအုပ်ကလည်း ထိုပုံရိပ်ထဲတွင် ပါဝင်နေလေသည်။

ဆက်ရန်...

အပိုင်း(၅၅၄) စစ်ပွဲပြီးဆုံးခြင်း

ကိုယ့်ကိုယ်ကိုယ် ပြန်လည်သိရှိလာပြီးနောက်ပိုင်း၊ နိုးကြားလာသော အသိစိတ်က သူ၏အတွေးအချက်အလတ်ပင်လယ်ပြင်နှင့် အချိန်မရွေး အားပြိုင်နေ၍ဖြစ်စေ၊ သို့မဟုတ် အချိန်ကြာမြင့်စွာ ရပ်တန့်နေခဲ့ပြီးနောက် စွမ်းအားများ ပြန်လည်စုစည်းမိလာ၍ဖြစ်စေ... ဤကာလအတွင်း လော်ယွမ်၏ စိတ်စွမ်းအားသည် အတိုင်းအတာတစ်ခုအထိ ကြီးမားသော တိုးတက်မှုကာလသို့ ရောက်ရှိလာခဲ့သည်။

အချိန်တိုအတွင်းမှာပင် သူ၏ စိတ်စွမ်းအားပြင်းအားသည် မှတ် ၃၀ အထိပင် ချဉ်းကပ်လာခဲ့ပြီ ဖြစ်သည်။

ယခုအချိန်တွင် လေးဘက်မြင် အမြင်အာရုံကို လုံးဝဖွင့်ချလိုက်လျှင်ပင်၊ မရေမတွက်နိုင်သော သတင်းအချက်အလက်များ၏ လွှမ်းမိုးမှုကို ရင်ဆိုင်ရချိန်၌ သူ၏ စိတ်စွမ်းအားသည် ကျောက်ဆောင်တစ်ခုအလား ခိုင်မာတည်ကြည်နေဆဲဖြစ်သည်။

သေချာသည်မှာ အချိန်ကြာမြင့်သွားပါက လော်ယွမ်၏ စိတ်ပိုင်းဆိုင်ရာသည် လွှမ်းမိုးခံရပြီး ပုံပျက်သွားမည်မှာ မလွဲဧကန်ပင်။ ဤသည်မှာ တဖြည်းဖြည်းချင်း ဝါးမျိုခံရမည့် လုပ်ငန်းစဉ်ဖြစ်ပြီး သင်၏စိတ်ကို တိတ်တဆိတ် ကူးစက်သွားမည်ဖြစ်သည်။ အနည်းငယ် ပေါ့ဆလိုက်သည်နှင့် သင့်ကိုယ်သင်ပင် မသိလိုက်ဘဲ သင်၏ တွေးခေါ်မှုများကို ပြောင်းပြန်လှန်ပစ်နိုင်စွမ်း ရှိသည်။

သို့သော် မှတ် ၃၀ ရှိသော စိတ်စွမ်းအားသည် အချိန်တိုအတွင်း သတိရှိနေစေရန် လုံလောက်နေဆဲဖြစ်ပြီး၊ ထိုအချိန်တိုဆိုသည်မှာ ရက်များဖြင့်ပင် တွက်ချက်နိုင်သည်။

လေးဘက်မြင် အမြင်အာရုံကို ဖွင့်လှစ်လိုက်ပြီးနောက် လော်ယွမ်က သူ၏အမြင်အာရုံမှာ ယာဉ်ပျံနှင့် ကင်းကွာသွားသကဲ့သို့ အဆုံးမရှိ မြင့်တက်သွားကာ ဤကမ္ဘာမြေကို အထက်မှနေ၍ စီးမိုးကြည့်ရှုနေသလို ခံစားလိုက်ရသည်။

ထို့အပြင် ဤအမြင်အာရုံက အလင်းရောင်ကို မှီခိုနေခြင်းမရှိသောကြောင့် ဤသည်မှာ အမှန်တကယ်ပင် အလင်းထက်မြန်သော ထောက်လှမ်းမှုတစ်ခုဖြစ်ပြီး သူ၏အမြင်အာရုံသည် အချိန်နှင့်တစ်ပြေးညီ နီးပါး ဖြစ်နေသည်။

"နီးပါး" ဟု ဆိုရခြင်းမှာ ဤလေးဘက်မြင် အမြင်အာရုံတွင် အချိန်ကြန့်ကြာမှု အနည်းငယ် ရှိနေသေးသောကြောင့်ဖြစ်သည်။

သို့သော် အမြန်နှုန်းမှာ အလင်းအလျင်ထက် များစွာ သာလွန်နေပြီး အလင်းရက်များဖြင့် တိုင်းတာရမည့် အကွာအဝေးမှာပင် စက္ကန့်အနည်းငယ်မျှသာ ကြန့်ကြာမှုရှိလေသည်။

ဤစစ်ပွဲကို ဝင်ရောက်မစွက်ဖက်မီ လော်ယွမ်က ယာဉ်ပျံ၏ ဉာဏ်ရည်တုဦးနှောက်ကို အရင်ဆုံး ဖောက်ထွင်းခဲ့သည်။

ထို့နောက် ယာဉ်ပျံ၏ ကွမ်တမ်ဆက်သွယ်ရေးစနစ်မှတစ်ဆင့် အာကာသမြို့တော်ရှိ ကာကွယ်ရေးစနစ် ထိန်းချုပ်ရေးစင်မြင့်ဆီသို့ မည်သူမျှ မသိလိုက်ဘဲ ထိုးဖောက်ဝင်ရောက်သွားခဲ့သည်။

သူက ဗိုရှင်းဂြိုဟ်သားများ၏ စစ်သင်္ဘောများကို "လှမ်းကြည့်" လိုက်သည်။ အရှိန်အဟုန်ဖြင့် ပြောင်းလဲနေသော သူ၏အတွေးများနှင့်အတူ မရေမတွက်နိုင်သော ကြိုတင်သိမြင်မှု ပုံရိပ်များက အရိပ်များအလား လျင်မြန်စွာ ဖြတ်ပြေးသွားကြသည်။

ဤစက္ကန့်တိုလေးအတွင်း လော်ယွမ်၏ စိတ်ထဲတွင် ဖြတ်သန်းသွားသော ကြိုတင်သိမြင်မှု ပုံရိပ်များအားလုံးကို ပေါင်းစပ်ကာ ပြန်လည်ဖွင့်ပြမည်ဆိုပါက ကြည့်ရှုရန် နှစ်ပေါင်းများစွာ ကြာမြင့်မည်မှာ သေချာလှသည်။

နောက်တစ်စက္ကန့်တွင် လော်ယွမ်က သူလိုချင်သော ရလဒ်ကို ရရှိသွားခဲ့သည်။

သူက ခလုတ်ကို နှိပ်လိုက်သည်။ သူ၏ လှုပ်ရှားမှုက မမြန်ဆန်သည့်အပြင် အလွန်ပင် နှေးကွေးတည်ငြိမ်နေသည်ဟု ဆိုနိုင်ပြီး သူရင်ဆိုင်နေရသည်မှာ စစ်ပွဲတစ်ခုမဟုတ်ဘဲ ဂိမ်းတစ်ခုကို ကစားနေသကဲ့သို့ပင်။

ရလဒ်ကို သူ စောင့်ကြည့်မနေတော့ဘဲ အခြား ယာဉ်ပျံတစ်စင်းဆီသို့ ချက်ချင်း "လှမ်းကြည့်" လိုက်ပြန်သည်။

အဘယ်ကြောင့်ဆိုသော် ယာဉ်ပျံနှင့် အနီးဆုံးရှိသော အမြောက်စခန်းပင်လျှင် အာနိသင်ပြရန် မိနစ်အနည်းငယ် ကြာမြင့်ဦးမည် ဖြစ်သောကြောင့်ပင်။

...

ယခုအချိန်တွင် အာကာသမြို့တော်၏ စစ်ပွဲကွပ်ကဲရေးစင်တာသည် ဖရိုဖရဲ ဖြစ်နေပြီး အထိတ်တလန့် အငွေ့အသက်များက ခန်းမတစ်ခုလုံးကို လွှမ်းခြုံထားသည်။

လူသားများအနေဖြင့် ဤအခြေအနေမျိုးကို ကြိုတင်ခန့်မှန်းထားပြီး လေ့ကျင့်မှုများ ပြုလုပ်ထားခဲ့သော်လည်း၊ တကယ်တမ်း ဖြစ်ပေါ်လာချိန်တွင်မူ နက်ရှိုင်းသော စွမ်းဆောင်နိုင်စွမ်း ကင်းမဲ့မှုနှင့် မျှော်လင့်ချက်မဲ့မှုတို့ကို ခံစားနေကြရဆဲဖြစ်သည်။

လူမိုက်ဆန်သော ဤတိုက်ခိုက်ရေးနည်းဗျူဟာကို လူသားတို့၏ လက်ရှိနည်းပညာဖြင့် ဖြေရှင်းနိုင်ရန် လုံးဝ မဖြစ်နိုင်ပေ။

လူသားတို့၏ အာကာသ ကာကွယ်ရေးတစ်ခုလုံးသည် ပစ်မှတ်ကို ထောက်လှမ်းခြင်း၊ ပစ်ခတ်ရန် အမိန့်ပေးခြင်း၊ လက်နက်စွမ်းအင် စုဆောင်းခြင်းမှသည် တိုက်ခိုက်မှု စတင်ခြင်းအထိ အသိဉာဏ်မြင့်မားသော တိုက်ခိုက်မှု လုပ်ငန်းစဉ်တစ်ခုလုံးကို သုည ဒသမ တစ် စက္ကန့်အတွင်း အပြီးသတ်နိုင်နေပြီဖြစ်သည်။

ဤ သုည ဒသမ တစ် စက္ကန့်သည် အတိအကျ မဟုတ်ဘဲ အကြောင်းအမျိုးမျိုးကြောင့် ပစ်ခတ်မှုတိုင်းတွင် အချိန်အနည်းငယ် အတက်အကျ ရှိနိုင်သော်လည်း၊ ပစ်ခတ်မှု ထိန်းချုပ်ရေးစနစ်၏ အလိုအလျောက် ပြင်ဆင်မှုအောက်တွင် ချို့ယွင်းချက်မှာ နာနိုစက္ကန့် တစ်ရာထက် ပိုမည်မဟုတ်ချေ။

သို့သော် အလွန်ဝေးကွာသော အကွာအဝေးတွင်ရှိပြီး အလင်းထက်မြန်သောနှုန်းဖြင့် ရွေ့လျားနေကာ တိကျသော တည်နေရာကို မသိရသည့် ပစ်မှတ်အား ရင်ဆိုင်ရချိန်တွင်၊ ဤသို့ ပစ်ခတ်ရခြင်းမှာ ထီပေါက်ရန် အခွင့်အရေးထက် အဆပေါင်း သောင်းချီ၍ ပိုမိုနည်းပါးလှသည်။

စစ်ပွဲစတင်ချိန်မှ ယခုအထိ လူသားတို့၏ တိုက်ခိုက်မှုများမှာ အကြိမ်ပေါင်း ထောင်ချီ၍ ဆက်တိုက် ပြုလုပ်ခဲ့သော်လည်း၊ ယနေ့အထိ ဗိုရှင်းဂြိုဟ်သားများ၏ စစ်သင်္ဘော တစ်စင်းကိုမျှ မဖျက်ဆီးနိုင်ခဲ့သေးပေ။

ပိကျန့်ဖိန်က ဗဟို သုံးဘက်မြင် ဖန်သားပြင်ပေါ်တွင် အာကာသမြို့တော်ဆီသို့ လျင်မြန်စွာ ချဉ်းကပ်လာနေသော ဗိုရှင်းတပ်ဖွဲ့၏ အလင်းစက်လေးကို အသက်မဲ့သော မျက်လုံးများဖြင့် ငေးကြည့်နေမိသည်။

လူသားတို့၏ တန်ပြန်တိုက်ခိုက်မှုများက ဆက်လက် ဖြစ်ပေါ်နေဆဲဖြစ်သည်။ ဗိုရှင်းစစ်သင်္ဘောများ အာကာသမြို့တော်နှင့် နီးကပ်လာသည်နှင့်အမျှ ပစ်ခတ်မှုများက ပိုမိုပြင်းထန်လာပြီး မရေမတွက်နိုင်သော သိပ်သည်းဆမြင့် ရောင်ခြည်တန်းများကြောင့် ကြယ်တာရာစနစ် တစ်ခုလုံး၏ အပူချိန်မှာ ၅ ဒီဂရီခန့် မြင့်တက်သွားကာ အမှောင်ထုဖုံးလွှမ်းနေသော ဟင်းလင်းပြင်ကြီးသည်ပင် အရောင်အသွေး စုံလင်စွာဖြင့် တောက်ပလာခဲ့သည်။

သို့သော် အကျိုးသက်ရောက်မှုမှာ သုညသာ ဖြစ်သည်။

ဗိုရှင်းစစ်သင်္ဘောများ ရောက်ရှိလာရန် ခြောက်နာရီပင် မလိုတော့ပေ။ တစ်နည်းအားဖြင့် ဤသည်မှာ သူ၏ ဘဝသက်တမ်း ကုန်ဆုံးရန် ရေတွက်နေခြင်းနှင့် အတူတူပင်။

သူက ခဏမျှ ကြည့်နေပြီးနောက် မည်သည့်အကြောင်းကြောင့်မှန်း မသိဘဲ သူ၏ စိုးရိမ်ပူပန်နေသော စိတ်များက တည်ငြိမ်သွားခဲ့သည်။

သူက အသက်စွန့်ရန် ပြင်ဆင်ထားပြီး ဖြစ်သည်။

"အပြင်ဘက်က တပ်စွဲထားတဲ့ နေရာတွေကို အရင်ဆုတ်ခွာခိုင်းဖို့ အကြောင်းကြားလိုက်ပါ... ဒီစစ်ပွဲမှာ သူတို့ကို မလိုအပ်တော့ဘူး"

ပိကျန့်ဖိန်က တည်ငြိမ်သော မျက်နှာထားဖြင့် ပြောလိုက်သည်။

"ဟုတ်ကဲ့ပါ ဒုမြို့တော်ဝန်"

ဘေးတွင်ပါလာသော အဆင့်မြင့် စစ်ဘက်ဆိုင်ရာ အရာရှိများက ခေတ္တမျှ ကြောင်အမ်းသွားပြီးနောက် အလျင်အမြန် ပြန်ဖြေလိုက်ကြသည်။

ထို့နောက် ပိကျန့်ဖိန်က လှည့်ထွက်သွားပြီး ပြတင်းပေါက်မှတစ်ဆင့် မြို့တော်၏ ခမ်းနားလှသော ရှုခင်းကို အချိန်အတော်ကြာအောင် မလှုပ်မယှက် ငေးကြည့်နေလေသည်။

အခြားသူများ ဆုတ်ခွာနိုင်သော်လည်း သူကတော့ ဆုတ်ခွာ၍ မရပေ။

အထူးသဖြင့် ဤစစ်ပွဲ၏ အမည်ခံ စစ်သေနာပတိချုပ်တစ်ဦးအနေဖြင့်၊ ဤနေရာရှိ အမြင့်ဆုံး ခေါင်းဆောင်တစ်ဦးအနေဖြင့် အာကာသမြို့တော်ကြီး ပျက်စီးသွားမည် ဆိုလျှင်တောင် သူက ရှေ့တန်းမျက်နှာစာတွင် ရှိနေရမည်ဖြစ်သည်။

နှစ်များစွာကြာ စစ်အတွင်း ဝါဒဖြန့်ချိမှုများအရ ဗိုရှင်းဂြိုဟ်သားများအပေါ် လူသားတို့၏ အရိုးထဲထိ စိမ့်ဝင်နေသော အမုန်းတရားများနှင့် ပြင်းထန်သော စိတ်ခံစားမှုများကို သူ့ထက် ပိုသိသူ မရှိချေ။

လူသားများနှင့် ဗိုရှင်းဂြိုဟ်သားများကြားရှိ ဤသွေးချောင်းစီး စစ်ပွဲကြီးတွင် လူသားများအနေဖြင့် ဂုဏ်သိက္ခာမဲ့သော ထွက်ပြေးသူ တစ်ဦးကို စိတ်ပိုင်းဆိုင်ရာအရ လုံးဝ လက်ခံနိုင်မည် မဟုတ်သလို၊ ဤစစ်ပွဲ ရှုံးနိမ့်မှုအတွက် တစ်စုံတစ်ယောက်က မလွဲမသွေ တာဝန်ယူရမည် ဖြစ်သည်။

ဤသည်မှာ အာဏာ၏နောက်ကွယ်တွင် မဖြစ်မနေ ထမ်းဆောင်ရမည့် တာဝန်ဖြစ်သည်။ ဤစစ်ပွဲ၏ ဆိုးရွားလှသော ရှုံးနိမ့်မှုသည် ရည်ရွယ်ချက်ရှိရှိ မှားယွင်းမှု မဟုတ်ဘဲ အခြေအနေအရ ရှောင်လွှဲမရခြင်း ဖြစ်လျှင်တောင်မှ တာဝန်ယူရမည်သာ ဖြစ်သည်။

ထိုအချိန်တွင် စစ်ပွဲကွပ်ကဲရေးခန်းမထဲ၌ အချက်ပေးသံများ ရုတ်တရက် ထွက်ပေါ်လာပြီး ခန်းမတစ်ခုလုံး ရုတ်ရုတ်သဲသဲ ဖြစ်သွားသည်။ သို့သော် အသေးစိတ် စစ်ဆေးမှုများ မပြုလုပ်နိုင်မီမှာပင် အချက်ပေးသံက ချက်ချင်း ရပ်တန့်သွားခဲ့သည်။

"ဘာတွေဖြစ်ကုန်တာလဲ"

ပိကျန့်ဖိန်က တည်ငြိမ်သောစိတ်ဖြင့် မေးလိုက်သည်။

"လက်နက်စနစ်မှာ ပုံမှန်မဟုတ်တဲ့ အချက်အလတ်လျှံကျမှုတွေ ဖြစ်ပေါ်နေတယ်... ကျူးကျော်ခံလိုက်ရတဲ့ပုံပဲ... ဒါပေမဲ့ ထူးဆန်းတာက ချက်ချင်းပဲ ပြန်လည်ငြိမ်သက်သွားတယ်"

ပိကျန့်ဖိန်က ခေတ္တမျှ ငေးကြောင်သွားပြီး ဤအခြေအနေမှာ အရင်က ကြုံဖူးသကဲ့သို့ ရင်းနှီးနေကြောင်း ရုတ်တရက် ခံစားလိုက်ရသည်။

"ဒီလိုအခြေအနေမျိုးက ပုံမှန်ပဲလား"

"ဖြစ်နိုင်ခြေ လုံးဝမရှိသလောက်ပါပဲ... အာကာသကာကွယ်ရေး လက်နက်ထိန်းချုပ်မှုစနစ်ရဲ့ ကွမ်တမ်ကွန်ပျူတာက မျိုးဆက်သစ် ကွမ်တမ်ကွန်ပျူတာဖြစ်ပြီး တွက်ချက်နိုင်စွမ်းက အလွန်ကို မြင့်မားလွန်းပါတယ်... ကွန်ရက်ကို ကျူးကျော်မခံရဘူးဆိုရင် လုံးဝဖြစ်နိုင်ခြေမရှိပါဘူး"

"ဒါပေမဲ့ ဗိုရှင်းဂြိုဟ်သားတွေက အလင်းထက်မြန်တဲ့ ကွေးညွတ်ပျံသန်းခြင်း အခြေအနေကို ရောက်နေပြီမို့လို့ ဒီလိုအခြေအနေမျိုးမှာ ကျွန်တော်တို့ရဲ့ တွက်ချက်မှုတွေအရ သူတို့အနေနဲ့ ပျံသန်းတာကလွဲပြီး တခြားဘာမှ လုပ်နိုင်စွမ်း မရှိတော့ပါဘူး"

"လေဟာနယ်လှိုင်းတွေက ကျွန်တော်တို့ရဲ့ အီလက်ထရောနစ် ပစ္စည်းတွေကို သက်ရောက်မှု ရှိသွားတာလည်း ဖြစ်နိုင်ပါတယ်... ဒါပေမဲ့ အသေးစိတ်ကိုတော့ သေချာစစ်ဆေးကြည့်ဖို့ လိုပါသေးတယ်"

ဘေးတွင်ပါလာသော အဆင့်မြင့် စစ်ဘက်ဆိုင်ရာ အရာရှိက မျက်နှာထား တည်တင်းစွာဖြင့် ပြောလိုက်သည်။

သို့သော် ယခုအချိန်တွင် ပိကျန့်ဖိန်၏ စိတ်များက ဤနေရာတွင် မရှိတော့ချေ။ တစ်ဖက်လူ၏ အသံမှာ အဝေးမှ လွင့်ပျံလာသကဲ့သို့ ဝိုးတဝါးဖြစ်နေပြီး ဘာတွေပြောနေမှန်း လုံးဝ မသိတော့ပေ။

မည်သည့်အကြောင်းကြောင့် ဤကဲ့သို့ ရင်းနှီးနေရသနည်းဆိုသည်ကို သူ နောက်ဆုံးတွင် သတိရသွားခဲ့ပြီဖြစ်သည်။

အဘယ်ကြောင့်ဆိုသော် ဤသည်မှာ ထိုပုဂ္ဂိုလ်၏ လုပ်ရပ်များနှင့် တစ်ထပ်တည်း ကျနေသောကြောင့်ပင်။

သူ တကယ်ပဲ စတင်လှုပ်ရှားလိုက်ပြီလား။

သူက ခေါင်းကို ရုတ်တရက် မော့လိုက်ပြီး ဗဟိုဖန်သားပြင်ကို စူးစိုက်ကြည့်လိုက်သည်။ သူ၏ ပူပြင်းသော အကြည့်များက ဖန်သားပြင်ကို ဖောက်ထွင်းကာ ကြီးမြတ်ခမ်းနားပြီး နတ်ဘုရားတစ်ပါးအလား အစွမ်းထက်လှသော ထိုပုဂ္ဂိုလ်က ဗိုရှင်းဂြိုဟ်သားများ၏ စစ်သင်္ဘောများကို အေးစက်စွာ ကြည့်ရှုနေသည်ကို မြင်နေရသကဲ့သို့ပင်။ ဤသို့ တွေးမိလိုက်သည်နှင့် သူ၏ ခန္ဓာကိုယ်က သဘာဝမကျစွာဖြင့် အနည်းငယ် တုန်ယင်လာခဲ့သည်။

မည်သို့ပင်ဆိုစေ အသက်ရှင်ခွင့်ရမည်ဆိုပါက မည်သူက သေချင်မည်နည်း။

အချိန်များက တစ်စက္ကန့်ပြီးတစ်စက္ကန့် ကုန်ဆုံးသွားပြီး သူ့အတွက် အလွန်အမင်း ညှဉ်းပန်းနှိပ်စက်ခံနေရသလို ခံစားရစေသည်။

အချိန်ခြောက်မိနစ် ကုန်လွန်သွားချိန်တွင်...

ဉာဏ်ရည်တုဦးနှောက်၏ အေးစက်စက် အသံက ခန်းမတစ်ခုလုံးတွင် ရုတ်တရက် ပဲ့တင်ထပ်သွားသည်။

"ရန်သူ့စစ်သင်္ဘောတစ်စင်း တပ်ဖွဲ့ကနေ ခွဲထွက်သွားတာကို ထောက်လှမ်းတွေ့ရှိရပါတယ်... ကျွန်တော်တို့ဘက်က ဖျက်ဆီးလိုက်ပါပြီ"

ခန်းမတစ်ခုလုံး ရုတ်တရက် တိတ်ဆိတ်သွားပြီး လူတိုင်း၏ မျက်နှာများမှာ အံ့သြမှင်သက်စွာဖြင့် ရပ်တန့်သွားကြသည်။

သို့သော် ဤသည်မှာ အစသာ ရှိသေးသည်။

ဆယ်စက္ကန့် အကြာတွင် နောက်ထပ် ဗိုရှင်းစစ်သင်္ဘောတစ်စင်း ထပ်မံ ဖျက်ဆီးခံလိုက်ရသည်။

ထို့နောက် တတိယတစ်စင်း၊ စတုတ္ထတစ်စင်း၊ ပဉ္စမတစ်စင်း...

ထိုအထဲမှ တစ်စင်းမှာ ဆန့်ကျင်ဘက်ဒြပ်သား ခဲယမ်းတိုက်ကို အထိခံလိုက်ရသဖြင့် ဆန့်ကျင်ဘက်ဒြပ်သား ကာကွယ်ရေး ယန္တရားများ ပျက်စီးသွားပြီး နေမင်းထက် အဆပေါင်းရာချီ ပိုမိုစူးရှသော အလင်းရောင်များ ပေါက်ကွဲထွက်လာကာ အာကာသတစ်ခုလုံးကို မျက်စိတစ်မှိတ်အတွင်း လင်းထိန်သွားစေသည်။

လူတိုင်းက ကျောက်ရုပ်များအလား မလှုပ်မယှက် ဖြစ်နေကြပြီး ခန်းမထဲတွင် အပ်ကျသံကိုပင် ကြားရလောက်အောင် တိတ်ဆိတ်နေသည်။ ဉာဏ်ရည်တုဦးနှောက်၏ အသံကသာ အကြိမ်ကြိမ် ရှင်းလင်းစွာ ထွက်ပေါ်နေပြီး အိပ်မက်မက်နေသကဲ့သို့ အစစ်အမှန် မဟုတ်ဟု ခံစားရစေသည်။

"ထောက်လှမ်းရရှိမှုတွေအရ ရန်သူ့ပစ်မှတ်တွေအားလုံးကို အကုန်အစင် ဖျက်ဆီးလိုက်ပါပြီ... စစ်ပွဲပြီးဆုံးသွားပါပြီ"

အချိန်တစ်မိနစ်တိုလေး အတွင်းမှာပင် ဗိုရှင်းစစ်သင်္ဘောများကို ကိုယ်စားပြုသော လေဟာနယ်လှိုင်းရင်းမြစ်များ လုံးဝ ပျောက်ကွယ်သွားခဲ့ပြီဖြစ်သည်။

ဖန်သားပြင်ပေါ်တွင် ပျက်စီးနေသော ယာဉ်ပျံခုနစ်စင်းသာ ကျန်ရစ်ခဲ့ပြီး အေးစက်သော အခေါင်းတလားများအလား သေဆုံးနေသော အာကာသဟင်းလင်းပြင်ထဲတွင် တိတ်ဆိတ်စွာ လွင့်မျောနေလေတော့သည်။

ဆက်ရန်...