အခန်း (၁၇၇-၁၇၈)

အခန်း (၁၇၇) သူတို့နှစ်ယောက်က သရုပ်ဆောင်စွမ်းရည်တွေကို ယှဉ်ပြိုင်ပြီး လျှို့ဝှက်ချက်တွေကို ဖော်ထုတ်နေကြတယ်

လမ်းတစ်လျှောက်လုံး စကားတစ်ခွန်းမှ မပြောခဲ့ကြချေ။

မကြာမီပင် ချူယွန်ရှီး၏လမ်းပြမှုဖြင့် သူတို့နှစ်ယောက်သည် ပြန်လည်ဝင်စားခြင်း တာအိုဂိုဏ်း၏ အနက်ရှိုင်းဆုံးနေရာရှိ တောင်ထိပ်တစ်ခုသို့ ရောက်ရှိလာသည်။

ဤနေရာတွင် အင်မော်တယ်မြူခိုးများ လွင့်မျောနေပြီး မြင်ကွင်းမှာ လှပကာ အလွန်အမင်း ခမ်းနားကြီးကျယ်လှသည်။

တိမ်များနှင့် မြူခိုးများကြားတွင် အင်မော်တယ် ငှက်များစွာနှင့် မင်္ဂလာရှိသော သားရဲများ ခုန်ပေါက်ဆော့ကစားနေကြ၏။

တောင်ထိပ်ပေါ်ရှိ ခန်းမဆောင်ထဲတွင် ထိုင်ပြီးနောက်....

ချူယွန်ရှီးက သူမ၏ကျောက်စိမ်းရောင်လက်ကို ညင်သာစွာ ဝှေ့ယမ်းလိုက်သည်။

ဤနေရာ၌ လက်ဖက်ရည်ခွက်တစ်စုံနှင့် ကြွေရောင်ကျောက်စိမ်းဖြင့် ပြုလုပ်ထားသော လက်ဖက်ရည်စားပွဲတစ်ခုကို ပြင်ဆင်ထားပြီး ဖြစ်သည်။

အကယ်၍ တစ်စုံတစ်ယောက်ကသာ နောက်ဆက်တွဲ မြင်ကွင်းကို မျက်မြင်တွေ့ရှိမည်ဆိုပါက သူတို့သည် အလွန်အမင်း အံ့အားသင့်သွားမည်မှာ သေချာပေါက်ပင်။

ပြန်လည်ဝင်စားခြင်းဧကရီ ချူယွန်ရှီးသည် ငယ်ရွယ်သော ဂျူနီယာတစ်ယောက်အတွက် လက်ဖက်ရည်တစ်ခွက်ကို အမှန်တကယ် ငှဲ့ပေးနေလေ၏။

"စီနီယာ... ငါ့အပေါ် မင်း နားလည်မှုလွဲမှားတာ တချို့ ရှိနေတယ်လို့ ငါ ဘာလို့ ခံစားနေရတာလဲ..."

ခုံးဝူတောက်က လက်ဖက်ရည်ကို တစ်ငုံသောက်လိုက်ပြီး သူတို့ကြားမှ တိတ်ဆိတ်မှုကို ချိုးဖျက်ကာ ပေါ့ပေါ့ပါးပါး ပြောလိုက်သည်။

ထိုစကားကို ကြားလိုက်ရသောအခါ ချူယွန်ရှီး၏နှလုံးခုန်သံ တစ်ချက်မှားသွားပြီး သူမ အနည်းငယ် မှင်သက်မသွားဘဲ မနေနိုင်တော့ချေ။

ဤဘဝတွင် ခုံးဝူတောက်ကို ရန်စရန် သူမ တစ်ကြိမ်တစ်ခါမှ မတွေးဖူးသလို သူ၏ရန်သူ ဖြစ်လာရန်လည်း သူမ မတွေးဖူးခဲ့ပေ။

သို့သော် မည်သည်ကြောင့် ခုံးဝူတောက်က ရုတ်တရက် ထိုသို့ ပြောဆိုသနည်း...

သူမသည် ပြန်လည်မွေးဖွားလာသူ ဆိုသည်ကို သူ သိနေပြီဟု အရိပ်အမြွက် ပြောနေခြင်းဖြစ်သလော...

သို့သော် ပြန်လည်ဝင်စားခြင်း ဧကရီသည် သာမန်လူတစ်ယောက် မဟုတ်ချေ။

သူမ၏ စိတ်ထဲတွင် အတွေးများ မရေမတွက်နိုင်အောင် ဖြတ်ပြေးသွားသော်လည်း သူမကိုယ်သူမ လျှင်မြန်စွာ ပြန်လည်ထိန်းချုပ်နိုင်ခဲ့၏။

သူမ၏ အလွန်လှပသော မျက်နှာပေါ်တွင် ပုံမှန်မဟုတ်သည့် အရိပ်အယောင် တစိုးတစိမျှ မပြသခဲ့ချေ။

"နတ်ဘုရားသားတော်အရှင် ခုံးဝူတောက်က ဘာလို့ အဲ့ဒီလို ပြောရတာလဲ...အရှင့်ရဲ့ပါရမီက ပြိုင်ဘက်ကင်းပြီးတော့ လူတွေကို ယဉ်ယဉ်ကျေးကျေး ဆက်ဆံတတ်တယ်... မောက်မာတာမျိုး မရှိသလို စိတ်မရှည်တာမျိုးလည်း မရှိဘူး... အနာဂတ်ကျရင် ကောင်းကင်ဘုံတွေနှင့်အသင်္ချေနယ်မြေတွေမှာ ထိပ်တန်းကျွမ်းကျင်သူတစ်ယောက် ဖြစ်လာဖို့ အရှင်က ကံကြမ္မာ ဖန်တီးခံထားရတာပါ..."

"ဒီဧကရီက နတ်ဘုရားသားတော်အရှင် ခုံးဝူတောက်အပေါ် ဘယ်တုန်းကမှ မကျေမနပ် မဖြစ်ခဲ့ဖူးပါဘူး... ဒါကြောင့် နားလည်မှုလွဲတာမျိုးလည်း မရှိနိုင်ပါဘူး..."

ချူယွန်ရှီး၏အသံမှာ ကြည်လင်ပြီး အေးစက်နေကာ သူမ၏ လှပသော ဖီးနစ် မျက်လုံးများတွင် ကြီးမားသော ရိုးသားမှုများ ပါဝင်နေသည်။

သူမ၏ တည်ကြည်လေးနက်ပြီး ရိုးသားလွန်းသောအကြည့်က သူမအတွက် ထူးခြားသော ဆွဲဆောင်မှုတစ်ခုကို ပေါင်းထည့်ပေးခဲ့လေ၏။

မည်သို့ပင်ဆိုစေကာမူ ပြန်လည်ဝင်စားခြင်း တာအိုဂိုဏ်း၏ ပြန်လည်ဝင်စားခြင်း ဧကရီ အနေဖြင့် ချူယွန်ရှီးသည် ကောင်းကင်ဘုံများနှင့်အသင်္ချေနယ်မြေများတွင် ထိပ်တန်းကျင့်ကြံသူစာရင်း၌ ရှိနေပြီးဖြစ်သည်။

သူမသည်လည်း မိန်းမပျိုလေး တစ်ယောက်၏ မျက်နှာအမူအရာမျိုး ပြသလိမ့်မည်ဟု မည်သူကများ တွေးထင်ထားမိမည်နည်း...

ခုံးဝူတောက်သည် ဤအဖြေအတွက် အံ့အားမသင့်ခဲ့ဘဲ သူ၏အပြုံးသည် ပေါ့ပေါ့ပါးပါးနှင့် ကျော့ရှင်းနေဆဲပင်။

"စီနီယာ ယွန်ရှီးက အရမ်းအလေးအနက်ထားနေတာပဲ... ငါက ဒီအတိုင်း ပေါ့ပေါ့ပါးပါး ပြောလိုက်တာပါ... စီနီယာ ယွန်ရှီး... ကျေးဇူးပြုပြီး အဲ့ဒါကို စိတ်ထဲထည့်မထားပါနဲ့..."

"နတ်ဘုရားသားတော်အရှင် ခုံးဝူတောက် အများကြီး မတွေးသရွေ့တော့ ကောင်းပါတယ်..."

ချူယွန်ရှီးက ခုံးဝူတောက်၏ခွက်ကို လက်ဖက်ရည် ဖြည့်ပေးရန် ခေါင်းငုံ့လိုက်ပြီး သူမ၏အသံမှာ ရိုးသားဖြူစင်နေဆဲပင်။

သူမ၏ မျက်နှာအမူအရာကို ထိန်းသိမ်းရန် သူမ အစွမ်းကုန် ကြိုးစားနေခဲ့၏။

ဤသည်မှာ ခုံးဝူတောက်ကို သူမ၏ မျက်နှာအမူအရာ မသိမသာ ပြောင်းလဲမှုများမှတစ်ဆင့် မည်သည့် သဲလွန်စမျှ မပေးမိစေရန်ပင်။

ခုံးဝူတောက်က သူ၏ အစောပိုင်းက ရှင်းပြ၍မရနိုင်သော မေးခွန်းသည် ပေါ့ပေါ့ပါးပါး မေးမြန်းခြင်းမျှသာ ဖြစ်ကြောင်း ရှင်းပြခဲ့သော်လည်း...

ခြေလှမ်းသုံးလှမ်း ကြိုတင်စီစဉ်တတ်ပြီး လူအများ၏စိတ်ကို ကြိုးကိုင်ရသည်အား အလွန်နှစ်သက်သော ခုံးဝူတောက်၏စရိုက်လက္ခဏာ အရ သူ့ထံ၌ သူ၏ ကိုယ်ပိုင်အစီအစဉ် ရှိနေရမည်ဟု သူမ အမြဲတစေ ခံစားနေရသည်။

ရည်ရွယ်ချက်ဟု ထင်ရသော သူ၏ မေးခွန်းက တမင်သက်သက် စမ်းသပ်ခြင်း ဖြစ်နိုင်ခြေ အလွန်များသည်။

သူမက ပြန်လည်မွေးဖွားလာသူဆိုသည့် လျှို့ဝှက်ချက်ကို ခုံးဝူတောက် သိနေနိုင်သည်ဟုပင် သူမ သံသယဝင်မိသည်။

ဤအချက်က ချူယွန်ရှီးကို ပို၍ပင် သတိထားလာစေခဲ့သည်။ အကြောင်းအရင်းမှာ သူမသည်လည်း ခုံးဝူတောက်၏ ကြောက်မက်ဖွယ်ကောင်းသော အကြံအစည်များ၏ လွှမ်းမိုးခြင်းကို ခံခဲ့ရသောကြောင့်ပင်။

သူ၏ ကြောက်မက်ဖွယ်ကောင်းသော နောက်ခံနှင့် ပေါင်းစပ်လိုက်ချိန်၌ သူမသည် နောက်ထပ် ဘဝတစ်ခု အသက်ရှင်နေထိုင်ခဲ့ကြောင်း သူ သိရှိသွားပါက အကျိုးဆက်များသည် စိတ်ကူးယဉ်၍မရနိုင်လောက်အောင် ဖြစ်လာပေလိမ့်မည်။

ဤနေရာတွင် ခုံးဝူတောက်အပေါ် မည်သည့် လှည့်ကွက် အသေးအမွှားလေးများကိုမျှ အသုံးပြုရန် သူမ တွေးတောမည် မဟုတ်ချေ။

မည်သို့ပင်ဆိုစေကာမူ သူမ၏ အာရုံခံနိုင်စွမ်း အရ ခုံးဝူတောက်သည် သူမ၏စိတ်နှလုံးသားကိုပင် ထိတ်လန့်တုန်လှုပ်သွားစေသည့် ကြောက်မက်ဖွယ်ကောင်းသော အရှိန်အဝါများစွာကို ပိုင်ဆိုင်ထားပေ၏။

သူသည် အချိန်လေဟာနယ် တားမြစ်နယ်မြေ၏ နတ်ဘုရားသားတော်အရှင်ဆိုသည့် နာမည်နှင့် အမှန်တကယ်ကို ထိုက်တန်လှသည်။

သူ ပိုင်ဆိုင်ထားသော ပုန်းကွယ်နေသည့် ဝှက်ဖဲများနှင့် နည်းလမ်းများက ဧကရီတစ်ပါးဖြစ်သော သူမကိုပင် ကြောက်ရွံ့မှုတစ်ခု ခံစားရစေခဲ့သည်။

လက်ရှိတွင် သူမသည် အချက်တစ်ချက်ကိုလည်း ခန့်မှန်းမိပေ၏။

ခုံးဝူတောက်က သူမထံသို့ တာအိုနှင့် ပတ်သက်ပြီး ဆွေးနွေးရန်နှင့် အလင်းပြပေးရန် လာခြင်းက အတုအယောင်သာဖြစ်ပြီး သူမကို စမ်းသပ်ခြင်းသည်သာ အစစ်အမှန်ပင်။

အမှန်တကယ်ပင် အနာဂတ်တွင် ကောင်းကင်ဘုံများကို အမှောင်မိုက်ဆုံး ခေတ်ကာလထဲသို့ တွန်းချမည့် တားမြစ်ခံတည်ရှိမှုသည် ငယ်ရွယ်စဉ်မှာပင် သေစေနိုင်လောက်သော အန္တရာယ်များဖြင့် ပြည့်နှက်နေဆဲပင်။

"စီနီယာ ယွန်ရှီး... ရိုးရိုးသားသား ပြောရရင်... ကျွန်တော်တို့ နောက်ဆုံးတစ်ကြိမ် လမ်းခွဲခဲ့ပြီးတဲ့နောက်မှာ မကြာသေးခင်က မင်း တော်တော်လေး သိသာထင်ရှားတဲ့ အပြောင်းအလဲ တစ်ခုကို ကြုံတွေ့ခဲ့ရတယ်ဆိုတာ ငါ သတိထားမိတယ်..."

ခုံးဝူတောက်က ပြောဆိုသည်။

ချူယွန်ရှီး၏စိတ်နှလုံးသား အနည်းငယ် မွန်းကြပ်သွားပေ၏။

သူမ၏မျက်လုံးထောင့်မှနေ၍ ခုံးဝူတောက်၏ အဓိပ္ပာယ်ပါသော အကြည့်ကို သူမ မြင်တွေ့ရပြီးဖြစ်သည်။

သူ၏မျက်နှာအမူအရာသည် အရာရာကို ထိန်းချုပ်ထားနိုင်သည့် ခံစားချက်တစ်ခု ပါဝင်နေပုံရသော်လည်း ထိုအချက်က သူ့ကို နားလည်ရန် ခက်ခဲစေခဲ့သည်။

ထိုအရာက သူမ၏ ယခုလေးတင်မှ ငြိမ်သက်သွားသော နှလုံးသားကို နောက်တစ်ကြိမ် လေးလံသွားစေခဲ့၏။ သူမသည် ခုံးဝူတောက်၏ လက်အောက်တွင် လုံးလုံးလျားလျား တည်ရှိနေသကဲ့သို့ သူမ ခံစားလိုက်ရသည်။

သို့သော် ချူယွန်ရှီးသည် အပြင်ပန်းတွင် တည်ငြိမ်နေဆဲပင်။

မည်သည့် စိတ်ခံစားမှုမျှ မပြသဘဲ သူမသည် မမြင်နိုင်သော်လည်း ရင်တလှပ်လှပ်ဖွယ်ကောင်းသော ဧကရာဇ်အရှိန်အဝါကို ထုတ်လွှတ်ထားသည်။

"နတ်ဘုရားသားတော်အရှင် ခုံးဝူတောက်က တကယ့်ကို ထူးခြားတာပဲ..."

"ရိုးရိုးသားသား ပြောရရင်... ဒီဧကရီက မကြာသေးခင်က တံခါးပိတ် ကျင့်ကြံခြင်းကနေ ကြီးမားတဲ့ အကျိုးအမြတ်တွေ ရခဲ့တယ်... ပြီးတော့ ကျင့်ကြံခြင်းကလည်း တိုးတက်လာခဲ့တယ်..."

ထိုသို့ပြောဆိုရင်း ချူယွန်ရှီးက အလွန်လှပသော်လည်း ဂုဏ်သိက္ခာရှိသော အပြုံးတစ်ခုကို ပြသလိုက်သည်။

"နတ်ဘုရားသားတော်အရှင် ခုံးဝူတောက်က ဒီလောက်ထိမြန်မြန် ထွင်းဖောက်မြင်သွားလိမ့်မယ်လို့ ငါ မျှော်လင့်မထားခဲ့ဘူး..."

ချူယွန်ရှီး၏ လှပသော မျက်လုံးများသည် ကြည်လင်သော စမ်းရေကဲ့သို့ ကြည်လင်နေပြီး သူမ၏အသံမှာ ရိုးသားဖြူစင်နေဆဲပင်။

ဘောလုံးကို နောက်တစ်ကြိမ် ပြန်ပုတ်ထုတ်ပြီး ခုံးဝူတောက်၏ စည်းချက်ထဲသို့ ကျဆင်းသွားကာ သူ တူးထားသော ထောင်ချောက်များထဲသို့ အဆက်မပြတ် ခုန်ချနေမည့်အစား...

သူမသည် အမှန်တရားတစ်ဝက်နှင့် အလိမ်အညာတစ်ဝက်ကို ပြောဆိုခြင်းက ပိုကောင်းပေမည်။

အမှန်တရားနှင့် အလိမ်အညာကို ရောနှောလိုက်ခြင်းက တစ်ဖက်လူကို သူမအား ထွင်းဖောက်မြင်စေရန် ပို၍ခက်ခဲစေပေလိမ့်မည်။

သရုပ်ဆောင်သည့် နေရာတွင်မူ သူမသည် အသေးအမွှား အပြစ်အနာအဆာလေး တစ်ခုကိုပင် နောက်တစ်ကြိမ် လုံးဝဖော်ပြမည် မဟုတ်ပေ။

သို့သော် ထိုသို့ဆိုသည့်တိုင် ချူယွန်ရှီးသည် စိတ်လှုပ်ရှားနေဆဲပင်။

သူမသည် ပြန်လည်ဝင်စားခြင်း ဧကရီတစ်ပါးဖြစ်ပြီး ကြီးမားသော စွမ်းအားများကို ကိုင်စွဲထားကာ မရေမတွက်နိုင်သော သက်ရှိများ၏သေရေးရှင်ရေးများကို ထိန်းချုပ်ထားနိုင်သည်။ သို့သော် သူတော်စင်နယ်ပယ်သို့ပင် မရောက်သေးသော ခုံးဝူတောက်၏ရှေ့တွင် သူမသည် လုံးလုံးလျားလျား ဖိနှိပ်ခံထားရပြီး မည်သည့်ဒေါသမျှ မရှိခဲ့ပေ။

"စီနီယာယွန်ရှီးရဲ့ အရှိန်အဝါက တကယ့်ကို တခြားလူတွေနဲ့ ကွာခြားတယ်... တမင်တကာ ဖိနှိပ်ထားတာတောင်မှ အများကြီး ပိုအားကောင်းနေတယ်..."

"ဖြစ်နိုင်တာက စီနီယာ ယွန်ရှီးက ပြန်လည်ဝင်စားခြင်း မဟာတာအိုနဲ့ ပတ်သက်ပြီး ပိုပြီးနက်ရှိုင်းတဲ့ ထိုးထွင်းသိမြင်မှုတွေ ရခဲ့လို့ ဖြစ်မယ်..."

ခုံးဝူတောက်က လက်ဖက်ရည် တစ်ငုံ သောက်လိုက်ပြီး ညင်သာစွာပြုံးကာ ဆက်ပြောလိုက်၏။

"ဒီဂျူနီယာ ဒီနေ့ ဒီနေရာကို လာခဲ့တာက... တကယ်တော့ ကိစ္စတစ်ခုနဲ့ ပတ်သက်ပြီး စီနီယာ ယွန်ရှီးဆီကနေ အလင်းပြမှုကို လိုချင်လို့ပါ..."

"အလင်းပြမှု..."

ထိုစကားကို ကြားချိန်၌ ချူယွန်ရှီး အနည်းငယ် မှင်သက်သွားပြီး သူမ၏ လှပသော မျက်လုံးများ အနည်းငယ် ပြူးကျယ်သွားသည်။

မဟုတ်သေးဘူး....

သူသည် အချိန်လေဟာနယ် တားမြစ်နယ်မြေ၏ နတ်ဘုရားသားတော်အရှင် ခုံးဝူတောက်ပင်။

တားမြစ်နယ်မြေ၏ အခြေခံအုတ်မြစ်သည် ယုံကြည်နိုင်စရာမရှိလောက်အောင် နက်ရှိုင်းပြီး စွမ်းအားကြီးမားသော ကျွမ်းကျင်သူများသည် မရေမတွက်နိုင်အောင် များပြားလှသည်။

အလင်းပြမှုအတွက် သူသည် သူမကို အထူးတလည် ရှာဖွေရန် ဘာများ လိုအပ်သနည်း...

သူသည် သူမအတွက် နောက်ထပ် ထောင်ချောက်တစ်ခုဆင်ရန် ကြိုးစားနေခြင်း ဖြစ်သလော....

ချူယွန်ရှီးတွင် မကောင်းသော ကြိုတင်ခံစားမှု တစ်ခု ရှိနေပေ၏။

ခုံးဝူတောက်က သူမကို နောက်တစ်ကြိမ် စတင်၍ စမ်းသပ်တော့မည်ဟု သူမ သံသယရှိမိသည်။

သို့သော် သူမကို စိတ်ပျက်စေခဲ့သောအရာမှာ သူမ ငြင်းဆန်၍ မရနိုင်ခြင်းပင်။ သူမသည် ခုံးဝူတောက်၏စည်းချက်ကိုသာ ဆက်လက်၍ လိုက်နာနိုင်သည်။

"နတ်ဘုရားသားတော်အရှင် ခုံးဝူတောက်... ကျေးဇူးပြုပြီး လွတ်လွတ်လပ်လပ်ပြောပါ..."

"ဒီဧကရီက နတ်ဘုရားသားတော်အရှင် ခုံးဝူတောက်ကို အလင်းပြပေးဖို့ အစွမ်းကုန် ကြိုးစားပါ့မယ်..."

ခုံးဝူတောက်၏မျက်နှာပေါ်တွင် အမြဲတစေ ခပ်ဖျော့ဖျော့အပြုံးတစ်ခု ရှိနေပြီး မည်သည့် စိတ်ခံစားမှုကိုမျှ ခွဲခြားသိမြင်ရန် မဖြစ်စေနိုင်ခဲ့ချေ။

"စီနီယာ... ရိုးရိုးသားသား ပြောရရင်... ဒီ ဂျူနီယာက ကိစ္စတစ်ခုနဲ့ ပတ်သက်ပြီး အမြဲတမ်း အရမ်းသိချင်နေခဲ့တာ... ဒီလောကမှာ ပြန်လည်မွေးဖွားလာတဲ့ လူတွေ ဒါမှမဟုတ် သူတို့ရဲ့ အရင်ဘဝက မှတ်ဉာဏ်တွေကို ပိုင်ဆိုင်ထားတဲ့ လူတွေ ရှိနိုင်တယ်လို့ မင်း ထင်လား..."

"ပြီးတော့ သူတို့ရဲ့ အရင်ဘဝက မှတ်ဉာဏ်တွေအပေါ် အခြေခံပြီး နယ်မြေတစ်သောင်းက အစိတ်အပိုင်းတချို့ရဲ့ အနာဂတ် ဖွံ့ဖြိုးတိုးတက်မှုကိုတောင် ပြောင်းလဲနိုင်တဲ့ လူမျိုးလေ..."

"ပြန်လည်ဝင်စားခြင်း မဟာတာအိုမှာလည်း ပြန်လည်ဝင်စားခြင်းနဲ့ ပြန်လည်မွေးဖွားခြင်းတွေ ပါဝင်တယ်... တကယ်လို့ ဒီလောကမှာ ပြန်လည်မွေးဖွားလာတဲ့ လူတွေ တကယ် ရှိနေတယ်ဆိုရင်... သူတို့က ဘယ်လိုပုံစံ ဖြစ်နေမလဲ..."

"ဒီပြန်လည်မွေးဖွားလာသူက ပြန်လည်ဝင်စားခြင်း မဟာတာအိုနဲ့ ပတ်သက်ပြီး အထူး ထိုးထွင်းသိမြင်မှုတွေ ရှိနေမလား..."

ခုံးဝူတောက်က လက်ဖက်ရည် နောက်တစ်ငုံ သောက်လိုက်၏။

သို့သော် သူ၏အကြည့်သည် ချူယွန်ရှီးအပေါ်၌ စူးစိုက်နေဆဲပင်။

သူ၏နက်ရှိုင်းသော မျက်လုံးသူငယ်အိမ်များမှ အနက်ရှိုင်းဆုံး နေရာတွင် အဓိပ္ပာယ်ပါသော အပြုံးတစ်ခု ရှိနေပြီး ရှောင်လွှဲခြင်း မရှိဘဲ ချူယွန်ရှီး၏ အကြည့်နှင့် ဆုံတွေ့လိုက်သည်။

"........"

ချူယွန်ရှီးက တိတ်ဆိတ်နေသည်။ သူမသည် မည်သည့် ပုံမှန်မဟုတ်မှုကိုမျှ ပြသ၍မရနိုင်ကြောင်း သူမ သိထားသည်။

သူမ၏မျက်နှာအမူအရာက တည်ငြိမ်နေဆဲ ဖြစ်သော်လည်း သူမ၏နှလုံးသားသည် ဧရာမ လှိုင်းလုံးကြီးများဖြင့် ဆူပွက်နေလေပြီ။

အကယ်၍ ခုံးဝူတောက်က နာမည်များကို တိုက်ရိုက်မပြောဘဲ ရှောင်ကြဉ်မနေခဲ့လျှင် သူမအကြောင်း သူ ပြောနေသည်ဟုပင် သူမ သံသယရှိမိပေလိမ့်မည်။

ပြန်လည်မွေးဖွားလာသူသည် မည်ကဲ့သို့ပုံစံ ဖြစ်နေမည်ဆိုသည်ကို စပ်စုနေသည်မှာ မည်သည့်အရာကို ဆိုလိုသနည်း....

သူသည် အမှန်တကယ်ကို သူမအကြောင်း ပြောနေခြင်း မဟုတ်လော....

အခန်း (၁၇၈) အရင်ဘဝက မြင်ကွင်းတစ်ခု... ဧကရာဇ်ကို လက်ချောင်းတစ်ချောင်းတည်းနဲ့ သတ်ပစ်လိုက်တယ်

ချူယွန်ရှီး၏စိတ်ထဲတွင် အတွေးအမျိုးမျိုး ဖြတ်ပြေးသွားပေ၏။

သူမသည် ရုတ်တရက် အသိပြန်ဝင်လာပြီး အေးစက်သော ချွေးများ ထွက်လာခဲ့သည်။

ခုံးဝူတောက်၏ နည်းလမ်းများနှင့် အကြံအစည်များသည် အမြဲတမ်းလိုလိုပင် နားလည်ရခက်ပြီး ခန့်မှန်း၍မရနိုင်ပေ။

ဤမေးခွန်းကို တိုက်ရိုက်ရှောင်လွှဲခြင်းက သေခြင်းတရားကို ရှာဖွေခြင်းနှင့် အတူတူသာ ဖြစ်ပေလိမ့်မည်။

သို့သော် အကယ်၍ သူမ၏ဖြေ ညံ့ဖျင်းစွာ ဖြေဆိုပါက ခုံးဝူတောက်သည်လည်း တစ်ခုခု မှားယွင်းနေကြောင်းကို သတိပြုမိပေလိမ့်မည်။

ရုတ်ချည်းဆိုသလိုပင် ချူယွန်ရှီးက သူမ၏ ခေါင်းကို အနည်းငယ်မော့လိုက်ပြီး သူမ၏ ဖီးနစ် မျက်လုံးများတွင် ဇဝေဇဝါဖြစ်မှု အရိပ်အယောင်လေးတစ်ခု ထင်ဟပ်လာသည်။

"ပြန်လည်မွေးဖွားလာသူလား..."

"သေသွားတဲ့သူတွေက ပြန်ရှင်လာလို့ မရပါဘူး... ဒါက ဘယ်လိုမှ မလွဲချော်နိုင်တဲ့ ထာဝရအမှန်တရားတစ်ခုပါပဲ..."

"တကယ်လို့ နတ်ဘုရားသားတော်အရှင် ခုံးဝူတောက်ကသာ အဲ့ဒါကို မပြောခဲ့ဘူးဆိုရင်... အဲ့ဒီလို တည်ရှိမှုမျိုးတွေက ထာဝရအမှန်တရားကို ချိုးဖျက်နိုင်မယ်လို့ ဒီဧကရီက ဘယ်တုန်းကမှ စိတ်ကူးမိမှာ မဟုတ်ဘူး..."

"ဘာလို့ နတ်ဘုရားသားတော်အရှင် ခုံးဝူတောက်က ရုတ်တရက်ကြီး ဒီမေးခွန်းကို မေးရတာလဲ... ဖြစ်နိုင်တာက အရှင်က ဒီလို ထူးခြားတဲ့ လူမျိုးကို ကိုယ်တိုင် မြင်တွေ့ခဲ့ရလို့လား..."

သူမ၏စကားအဆုံးတွင် မျှော်လင့်တကြီး စပ်စုလိုစိတ် အရိပ်အယောင်လေးတစ်ခုက ချူယွန်ရှီး၏လှပသောမျက်လုံးများတွင် ထွက်ပေါ်လာပေ၏။

သူမက အခြေအနေကို ပြောင်းပြန်လှန်လိုက်ပြီး ခုံးဝူတောက်ကို ပြန်လည်မွေးဖွားလာသူများအကြောင်း ပို၍ပြောပြစေချင်သည့်အလားပင်။

သူမ၏ဟန်ပန်ကို မြင်လိုက်ရသောအခါ ခုံးဝူတောက်က သူ၏စိတ်ထဲတွင် ရယ်မောလိုက်သည်။

ဤချူယွန်ရှီးသည် ဟန်ဆောင်သည့်နေရာတွင် အလွန်ထူးချွန်သည်။

သူမသည် အပြင်ပန်းတွင် တည်ငြိမ်နေဆဲဖြစ်ပြီး ဧကရီတစ်ပါး၏ ဂုဏ်သိက္ခာကို ထုတ်လွှတ်နေသော်လည်း အသေးအမွှား အပြစ်အနာအဆာ အနည်းငယ်ကို ပြသခဲ့ဆဲပင်။

ဥပမာအားဖြင့် အစောပိုင်းက ပြန်လည်မွေးဖွားလာသူများဆိုသော မေးခွန်းကို သူ တမင်သက်သက် ထုတ်ဖော်ပြောဆိုခဲ့စဉ်က ချူယွန်ရှီး၏တည်ငြိမ်သော မျက်လုံးများမှ အနက်ရှိုင်းဆုံးနေရာတွင် တခဏတာကြာ တွေဝေမှုနှင့် ထိတ်လန့်မှုတို့ ဖြတ်ပြေးသွားပေ၏။

ခုံးဝူတောက်၏ မူလနတ်ဘုရားစိတ်ဝိညာဉ်သည် အလွန်အားကောင်းပြီး ဤမြင်ကွင်းကို ရှင်းလင်းစွာ ဖမ်းယူနိုင်သည်။

ဧကရီတစ်ပါးက ဂျူနီယာ တစ်ယောက်ဖြစ်သော သူ၏ရှေ့တွင် ဤကဲ့သို့ အပြစ်အနာအဆာမျိုး ပြသရန်ဆိုသည်မှာ ထိုအချက်က သူမသည် သူ၏နောက်ခံ သို့မဟုတ် သူကိုယ်တိုင်ကို အလွန်ကြောက်ရွံ့နေကြောင်း ဆိုလိုနိုင်သည်။

ကံမကောင်းစွာဖြင့် ဤအရာအားလုံးကို နားလည်ရန်အတွက် ချူယွန်ရှီး၏ ယခင်ဘဝက သူမ မသေဆုံးမီ မည်သည့်အရာများ ကြုံတွေ့ခဲ့ရသနည်းဆိုသည်ကို သူ သိရန် လိုအပ်သည်။

"ဒင်... စနစ်က သခင်ရဲ့ အခက်အခဲကို ထောက်လှမ်းမိပြီး ချူယွန်ရှီးရဲ့ အရင်ဘဝက သေဆုံးမှု မြင်ကွင်းကို ချိတ်ပိတ်ထားတာ ဖျက်ဆီးဖို့ အဆင့်မြှင့်တင်လိုက်ပါပြီ... ကျေးဇူးပြုပြီး လေ့လာကြည့်ရှုပါ သခင်..."

စနစ်၏အသံ ပျောက်ကွယ်သွားသည်နှင့် ခုံးဝူတောက်၏ အမြင်အာရုံသည် ဝေဝါးပြီး တွန့်လိမ်သွားပေ၏။

မကြာမီပင် သူ တစ်ယောက်တည်းသာ မြင်နိုင်သော မြင်ကွင်းတစ်ခု ထွက်ပေါ်လာခဲ့သည်။

ထိုမြင်ကွင်းသည် ကျယ်ပြန့်ပြီး အဆုံးအစမရှိသော ကြယ်တာရာ ကောင်းကင်ယံတွင် တည်ရှိနေသည့်အလားပင်။

ကောင်းကင်နတ်ဘုရားများနှင့် ဗုဒ္ဓများကဲ့သို့ ကြောက်မက်ဖွယ်ကောင်းသော ပုံရိပ်များသည် ဖျက်ဆီးလိုခြင်း နတ်ဘုရားစွမ်းရည်များကို ပေါက်ကွဲထွက်လာစေပြီး ပြင်းထန်သော တိုက်ပွဲများတွင် ပါဝင်နေကာ ဧကရာဇ်အလင်းတန်းများ တလိမ့်လိမ့်ထနေပြီး သွေးများယိုစီးကျနေသည်။

ပြန်လည်ဝင်စားခြင်းဧကရီနှင့် မဟာဧကရာဇ်ကျွမ်းကျင်သူ ဆယ်ယောက်ကျော်တို့သည် သူတို့၏ ဧကရာဇ် အရှိန်အဝါများကို သူတို့၏ နံဘေးပတ်လည်တွင် တလိမ့်လိမ့်ထနေစေပြီး သူတို့၏ ဧကရာဇ်လက်နက်များကို အပြည့်အဝ အသက်သွင်းကာ ရှေးဟောင်းကမ္ဘာ တစ်ခုပြီးတစ်ခုကို ဖန်တီးနေကြပေသည်။

ဤသည်မှာ အနာဂတ်တွင် ဖြစ်လာမည့် ရက်စက်သော တိုက်ပွဲတစ်ခု ဖြစ်နေသလော...

ခုံးဝူတောက်သည် ကြယ်တာရာစစ်မြေပြင်၏ ဗဟိုတွင် သူကိုယ်တိုင်ဟု ထင်ရသော ပုံရိပ်တစ်ခုကို မြင်တွေ့လိုက်ရသည်။

ထိုပုံရိပ်သည် ဝေဝါးနေသော်လည်း သူ၏ ကြောက်မက်ဖွယ်ကောင်းသော စွမ်းအားက ကောင်းကင်ဘုံများအားလုံးကို ဖိနှိပ်နိုင်စွမ်းရှိပုံ ရသည်။

ပြန်လည်ဝင်စားခြင်း ဧကရီ၏ ရှုထောင့်မှ ကြည့်မည်ဆိုပါက "သူ" သည် လက်ချောင်းတစ်ချောင်းကို မြှောက်ကာ ညင်သာစွာ ဝှေ့ယမ်းလိုက်ရုံသာ ဖြစ်ပေ၏။

ကြောက်မက်ဖွယ်ကောင်းသော ဖျက်ဆီးလိုခြင်း စွမ်းအားတစ်ရပ် ပျံ့နှံ့လာပြီး လောကရှိ အရာအားလုံးကို ဖျက်ဆီးပစ်ရန် လုံလောက်သည်။

စွမ်းအားကြီးမားသော မဟာဧကရာဇ်များပင်လျှင် ဤစွမ်းအား၏ရှေ့တွင် ပုရွက်ဆိတ်များကဲ့သို့ သေးငယ်နေသည်။ သူတို့၏ ဧကရာဇ် ရုပ်ခန္ဓာကိုယ်များ ချက်ချင်းဆိုသလိုပင် ခြေမွှဖျက်ဆီးခံရပြီး သွေးမြူတိမ်တိုက်ကြီးများအဖြစ် အသွင်ပြောင်းသွားတော့သည်။

ဝုန်းခနဲအသံနှင့်အတူ အဆုံးမဲ့ သွေးရောင် အလင်းတန်းများက ပြန်လည်ဝင်စားခြင်း ဧကရီ၏ အမြင်အာရုံကို လုံးလုံးလျားလျား ဖုံးကွယ်သွားပေ၏။

မျှော်လင့်ချက်မဲ့နေသော စွမ်းအားကို ရင်ဆိုင်ရသောအခါ ပြန်လည်ဝင်စားခြင်းဧကရီသည် လုံးလုံးလျားလျား အကူအညီမဲ့နေခဲ့သည်။

သူမ၏ခန္ဓာကိုယ် အဆက်မပြတ် ဆုတ်ဖြဲခံရပြီး ပြိုကွဲပျက်စီးသွားကာ ပူပြင်းသော ဧကရာဇ် သွေးများ အဆက်မပြတ် ကျဆင်းလာသည်ကိုသာ သူမ ကြည့်နေခဲ့ရသည်။

သူမ မသေဆုံးမီ ချူယွန်ရှီး၏နာကျင်မှု နောင်တရမှုနှင့် ဆန္ဒမရှိမှုတို့ကိုလည်း သူ မြင်တွေ့မိသည်။

မကြာမီပင် သူ့ရှေ့ရှိ မြင်ကွင်း လုံးလုံးလျားလျား ပျောက်ကွယ်သွားပေ၏။

ခုံးဝူတောက် အနည်းငယ် တိတ်ဆိတ်သွားပြီး တစ်ချိန်တည်းမှာပင် နားလည်သွားခဲ့သည်။

'ဂုဏ်သိက္ခာရှိတဲ့ ဧကရီ တစ်ပါးက ဂျူနီယာ တစ်ယောက်ဖြစ်တဲ့ ငါ့အပေါ် ဘာလို့ ကြောက်ရွံ့မှုတွေ ပြသနေတာလဲဆိုတာ အံ့အားသင့်စရာ မရှိတော့ဘူး...'

သူ တွေးတောလိုက်၏။

ထိုမြင်ကွင်းတွင် သူ ပိုင်ဆိုင်ထားသော စွမ်းအားသည် အလွန်အားကောင်းလွန်းသဖြင့် သူ့အတွက်ပင် စိမ်းသက်နေသကဲ့သို့ ခံစားနေရသည်။

မဟာဧကရာဇ်တစ်ပါးသည် ပုရွက်ဆိတ်တစ်ကောင်လို ခြေမွှဖျက်ဆီးခံရခြင်းဖြစ်ရာ သူမ နောက်ဆုံးတွင် သေဆုံးသွားလျှင်ပင် မည်သို့ စိတ်ကျေနပ်နိုင်မည်နည်း...

သို့သော် ဤချူယွန်ရှီးသည် ငတုံးငအတစ်ယောက် မဟုတ်ချေ။

အကယ်၍ ထိုလူမိုက် တုန်လှုပ်ချောက်ချား အင်မော်တယ်ကဲ့သို့ တခြားပြန်လည်မွေးဖွားလာသော မဟာဧကရာဇ်များသာဆိုလျှင်...

အကယ်၍ သူတို့သာ ပြန်လည်မွေးဖွားလာပြီးနောက် သူတို့၏ မဟာဧကရာဇ် ကျင့်ကြံခြင်းကို ထိန်းသိမ်းထားနိုင်မည်ဆိုလျှင် သူတို့၏ ယခင်ဘဝက လက်စားချေရန်အတွက် သူ အားနည်းနေစဉ်မှာပင် သူ့ကို ဖယ်ရှားရန် နည်းလမ်းပေါင်းစုံဖြင့် သေချာပေါက် ကြိုးစားကြပေလိမ့်မည်။

သို့သော် ချူယွန်ရှီးထံမှ သူ့အပေါ် သတ်ဖြတ်လိုခြင်းစိတ်ဆန္ဒကို အရိပ်အယောင်တစ်ခုမျှပင် သူ မခံစားရချေ။

ဆန့်ကျင်ဘက်အနေဖြင့် သူမသည် သူ့ကို မိတ်ဆွေဖွဲ့ရန်နှင့် စိတ်ရင်းကိုပြသရန်ပင် ရည်ရွယ်ချက် ရှိနေပေ၏။

အစောပိုင်းက သူ ကောင်းကင်ဘုံ တာအိုနယ်မြေတွင် ရှိနေစဉ် ပြန်လည်ဝင်စားခြင်း တာအိုဂိုဏ်းမှ လူများနှင့်လည်း သူ ကြုံတွေ့ခဲ့ရသည်။

ပြန်လည်ဝင်စားခြင်း တာအိုဂိုဏ်းမှ လူများသညိ သူ့ကို မဆန့်ကျင်ခဲ့ရုံသာမက ထိုအစား သူတို့က ချူယွန်ရှီး၏ အမိန့်ကို ရရှိထားပြီး သူ့ကို ကူညီရန် အထူးတလည် လာခဲ့ခြင်းဖြစ်ကြောင်း ပြောခဲ့ကြသည်။

ခုံးဝူတောက်၏နှုတ်ခမ်းများ အနည်းငယ် ကွေးတက်သွားပေ၏။

ကံကောင်းသည်မှာ ဤချူယွန်ရှီးက အသိဉာဏ်ရှိနေသောကြောင့်ပင်။

ထိုသို့မဟုတ်လျှင် ယနေ့၌ သူ တစ်ယောက်တည်း လာမည် မဟုတ်ဘဲ အချိန်လေဟာနယ် တားမြစ်နယ်မြေ၏ စစ်တပ်များနှင့် မဟာဧကရာဇ်များ ဤနေရာသို့ ဆင်းသက်လာပေမည်။

သူမ၏သရုပ်ဆောင်မှုတွင် အပြည့်အဝ နစ်မြုပ်နေသော ချူယွန်ရှီးသည် အချက်တစ်ချက်ကို ဘယ်သောအခါမျှ စိတ်ကူးယဉ်မိမည် မဟုတ်ချေ။

ဤသည်မှာ အစောပိုင်းက သူမနှင့် ပြန်လည်ဝင်စားခြင်း တာအိုဂိုဏ်းသည် ငရဲတံခါးဝကို ဖြတ်လျှောက်ခဲ့ပြီးပြီ ဆိုသည်ကိုပင်။

"နတ်ဘုရားသားတော်အရှင် ခုံးဝူတောက်..."

ခုံးဝူတောက် အချိန်အတော်ကြာ တိတ်ဆိတ်နေသည်ကို မြင်လိုက်ရသောအခါ ချူယွန်ရှီးက မေးမြန်းလိုက်၏။

"တောင်းပန်ပါတယ်... ငါ ခုဏက နည်းနည်းလေး အာရုံလွင့်သွားလို့ပါ..."

ခုံးဝူတောက်၏ နှုတ်ခမ်းများတွင် နူးညံ့သော အပြုံးတစ်ခု ရှိနေဆဲပင်။

"ဒီပြန်လည်မွေးဖွားလာသူကို ငါက တကယ်ပဲ ကြုံတွေ့ခဲ့ဖူးပြီးတော့ သူနဲ့တောင် အဆက်အသွယ် ရှိခဲ့ဖူးတယ်..."

ချူယွန်ရှီး အနည်းငယ် မှင်သက်သွားပြီး သူမ၏ စိုးရိမ်ပူပန်မှုများ ပို၍ကြီးထွားလာသည်။

သူမက ပြန်လည်မွေးဖွားလာသူဆိုသည့် အထောက်အထား အမှန်တကယ်ပင် ဖော်ထုတ်ခံလိုက်ရသလော....

ခုံးဝူတောက်က ဤအကြောင်းအရာကို နားလည်ရခက်စွာ ပြောဆိုခဲ့သဖြင့် သူမ၏ အထောက်အထားကို သူ သိပြီးသားဆိုသည်ကို တမင်သက်သက် အရိပ်အမြွက် ပြောနေခြင်းဖြစ်သလော...

"တကယ်လား..."

"ဒါဆိုရင် နတ်ဘုရားသားတော်အရှင် ခုံးဝူတောက်... ဒီပြန်လည်မွေးဖွားလာသူရဲ့ ထူးခြားတဲ့ အချက်တွေကို ဒီဧကရီကို ပြောပြပေးနိုင်မလား... ဒီဧကရီကို အမြင်ကျယ်လာအောင် လုပ်ပေးလို့ ရမလား..."

ချူယွန်ရှီးက နားမလည်သလို ဟန်ဆောင်နေဆဲဖြစ်သည်ကို မြင်လိုက်ရခြင်းက ခုံးဝူတောက်၏ မျှော်လင့်ချက်များအတွင်းတွင် ရှိနေသည်။

လူအများ၏စိတ်ကို ကြိုးကိုင်ရန် အကောင်းဆုံး နည်းလမ်းမှာ သူတို့၏ စိတ်ပိုင်းဆိုင်ရာ ကာကွယ်ရေးများကို တဖြည်းဖြည်းချင်း တိုက်စားပစ်ရန်ပင်။

ဤနည်းလမ်းသည် သူတို့၏ ကာကွယ်ရေးများကို တိုက်ရိုက်ချိုးဖျက်ခြင်းထက် များစွာပို၍ကြောက်မက်ဖွယ်ကောင်းပြီး ထိရောက်မှုရှိသည်။

"တိုက်ဆိုင်လိုက်တာ... လွန်ခဲ့တဲ့ အချိန်တိုလေးက ဒီနတ်ဘုရားသားတော် ကောင်းကင်ဘုံ တာအိုနယ်မြေကို သွားတုန်းက အဲ့ဒီလို လူတစ်ယောက်နဲ့ တိုက်တိုက်ဆိုင်ဆိုင် ဆုံတွေ့ခဲ့တယ်..."

"ဒီကောင်က သူ့ရဲ့အရင်ဘဝတုန်းက မဟာဧကရာဇ် တစ်ပါး ဖြစ်ပုံရပြီးတော့ ဒီနတ်ဘုရားသားတော်အပေါ်မှာ အတော်လေး ရန်လိုမှုတွေ ရှိနေတယ်... ဒီမတည်ငြိမ်တဲ့ အချက်ကို ဖယ်ရှားဖို့အတွက် ဒီ ဂျူနီယာက သဘာဝကျကျပဲ ပထမဆုံး အခွင့်အရေးရတာနဲ့ သူ့ကို ဖယ်ရှားခဲ့တယ်..."

"ဒီ ဂျူနီယာက ကြီးမားတဲ့ အခွင့်အရေးတစ်ခု ရခဲ့တယ်လို့ သတ်မှတ်လို့ ရပါတယ်... ဒီ ပြန်လည်မွေးဖွားလာသူကို သတ်ပြီးတဲ့နောက်မှာ သူ့ရဲ့ မှတ်ဉာဏ်တချို့ကို ငါ ရခဲ့ပြီးတော့... ပြန်လည်မွေးဖွားလာသူဆိုတာက ဘာလဲဆိုတာကို ငါ အကြမ်းဖျင်း နားလည်သွားတယ်..."

"အဲ့ဒီလို တည်ရှိမှုမျိုးတွေက ပြန်လည်မွေးဖွားလာပြီးတဲ့နောက်မှာ ယေဘုယျအနေနဲ့ သူတို့ရဲ့ အရင်ဘဝက မှတ်ဉာဏ်တွေကို ပိုင်ဆိုင်ထားကြပြီးတော့ နောက်ပိုင်းအချိန်ကာလတွေမှာ ဖြစ်လာမယ့် အရာများစွာကိုတောင် သိနိုင်စွမ်းရှိတယ်... သူတို့က နောက်ပိုင်းအချိန်ကာလတွေရဲ့ သမိုင်းဖြစ်စဉ်ကိုတောင် ပြောင်းလဲပြီး လွှမ်းမိုးနိုင်ကြတယ်..."

ခုံးဝူတောက်၏ ဇာတ်ကြောင်းပြောပြမှုကို နားထောင်ရင်း ချူယွန်ရှီး၏စိတ်နှလုံးသားသည် ပို၍ပို၍ မသက်မသာဖြစ်လာပြီး သူမ ဖိနှိပ်ထားသော တည်ငြိမ်မှုသည်ပင် ယိမ်းယိုင်လာပေ၏။

ထိုစကားက အမှန်လော သို့မဟုတ် အမှားလော...

ခုံးဝူတောက် သတ်လိုက်သည့်လူသည် အမှန်တကယ်ပင် သူ၏ ယခင်ဘဝက မဟာဧကရာဇ် တစ်ပါး ဖြစ်နေသလော...

ဤလောကကြီးတွင် ထိုကဲ့သို့ တိုက်ဆိုင်မှုများ အမှန်တကယ် ရှိနေနိုင်သလော....

ကောင်းကင်ဘုံများနှင့်အသင်္ချေနယ်မြေများတွင် သူမကဲ့သို့ ပြန်လည်မွေးဖွားလာသူများ အမြောက်အများ ရှိနေသလော။

"ဒါပေမယ့်... တကယ့်ကို နှမြောစရာပဲ..."

သို့သော် ခုံးဝူတောက်က အကြောင်းအရာကို ပြောင်းလိုက်သည်။

"ဒီပြန်လည်မွေးဖွားလာသူ ပိုင်ဆိုင်ထားတဲ့ မှတ်ဉာဏ်တွေက အရင်ခေတ်နဲ့ပဲ သက်ဆိုင်ပြီး နှောင်းပိုင်းခေတ်တွေအထိ မရောက်နိုင်ဘူး..."

ခုံးဝူတောက်က ကြီးမားသော နောင်တရမှုဖြင့် သက်ပြင်းချလိုက်၏။

"ဟူး... တကယ်လို့ သူ့မှာ နှောင်းပိုင်းခေတ်တွေရဲ့ မှတ်ဉာဏ်တွေ ရှိနေခဲ့ရင်... ငါက သူ့ကို သတ်ပစ်မှာ မဟုတ်ဘဲနဲ့ သူ့ကို ကောင်းကောင်း သိမ်းထားပြီး သူ့ရဲ့ တန်ဖိုးကို အများဆုံး အသုံးချဖို့ ရွေးချယ်မိမှာပဲ..."

သူ၏စကားကို သေချာအာရုံစိုက်၍ နားထောင်နေသော ချူယွန်ရှီးသည် မည်သည့်အချိန်ကမှန်းမသိရဘဲ ပုံမှန်မဟုတ်သည့် မျက်နှာအမူအရာကို ပြသလိုက်သည်။

သူမ အံ့အားသင့်သွားပြီး ကြက်သေသေသွားသည့်အလားပင်။

ဤသည်က တမင်သက်သက် မရည်ရွယ်ဘဲ ပြောလိုက်သကဲ့သို့ ထင်ရသော သူ၏ စကားများဖြစ်ကြောင်း ခုံးဝူတောက် သိလိုက်သည်။

ချူယွန်ရှီး၏စိတ်အတွင်းရှိ ကာကွယ်မှုများကို သူ လှုပ်ခတ်ပြီးဖြစ်သည်။

အရေးအကြီးဆုံး အဆင့်အတွက် အချိန်ကျရောက်လာလေပြီ။

"စီနီယာယွန်ရှီး... နှောင်းပိုင်းခေတ်တွေရဲ့ မှတ်ဉာဏ်တွေကို ပိုင်ဆိုင်ထားတဲ့ ပြန်လည်မွေးဖွားလာသူ တစ်ယောက် ဒီလောကမှာရှိနိုင်တယ်လို့ မင်း ထင်လား..."

"ပြီးတော့ ဒီပြန်လည်မွေးဖွားလာသူရဲ့ အရင်ဘဝကလည်း မဟာဧကရာဇ်တစ်ပါး ဖြစ်နေနိုင်မလား..."

"ဒင်... ​ပုံမှန်မဟုတ်တဲ့ ကောင်းကင်ကံကြမ္မာပိုင်ရှင် ချူယွန်ရှီးရဲ့ တာအိုနှလုံးသားမှာ သိသာထင်ရှားတဲ့ တုန်လှုပ်မှုတစ်ခုကို ထောက်လှမ်းတွေ့ရှိရပါတယ်... တစ်ဖက်ရဲ့ ကောင်းကင်ကံကြမ္မာအမှတ်တွေကို ၂၅၀၀ နှုတ်ယူလိုက်ပြီး ၁၇၇၅၀၀ မှတ် ကျန်ရှိနေပါတယ်..."

"သခင်က နှစ်ဆပြင်းထန်တဲ့ တိုက်ခိုက်မှုကို ဖြစ်ပေါ်စေခဲ့ပြီး ကောင်းကင်ကံကြမ္မာအမှတ် ၅၀၀၀ ကို အောင်မြင်စွာ ရရှိသွားတဲ့အတွက် ဂုဏ်ယူပါတယ်..."

"သခင်က ယဉ်ပါးအောင် သွေးဆောင်တဲ့ ချဉ်းကပ်မှုကို အသုံးပြုခဲ့တာကို ထည့်သွင်းစဉ်းစားရင်... ချူယွန်ရှီးက ၂ ရာခိုင်နှုန်း ယဉ်ပါးအောင် သွေးဆောင်ခံလိုက်ရပါပြီ..."

"လက်ရှိ ယဉ်ပါးအောင် သွေးဆောင်မှု တိုးတက်မှု...၆ ရာခိုင်နှုန်း (ဒီကိစ္စမတိုင်ခင် ၄ ရာခိုင်နှုန်း ယဉ်ပါးအောင် သွေးဆောင်ပြီး)"

ထိုအရာက တစ်ဖက်လူကို ယဉ်ပါးအောင် သွေးဆောင်နိုင်မှု တိုးတက်သွားစေနိုင်လိမ့်မည်ဟု မျှော်လင့်မထားမိသဖြင့် ခုံးဝူတောက်က မျက်ခုံးတစ်ဖက် အနည်းငယ်ပင့်လိုက်၏။

သို့သော် သူမသည် ပုံမှန်မဟုတ်သော ကောင်းကင်ကံကြမ္မာပိုင်ရှင်များကြားတွင် အစစ်အမှန် ဧကရီတစ်ပါးပင်။

သူမကို ယဉ်ပါးအောင် သွေးဆောင်ခြင်း၏ အခက်အခဲမှာ အလွန်မြင့်မားသည်။

သို့သော် ထိုကဲ့သို့ စိန်ခေါ်မှုမျိုးကို ကြိုးစားရန် သူ ဆန္ဒရှိသည်။

အလားတူပင် ဤစမ်းသပ်မှု အပြီးတွင် တစ်ဖက်လူသည် ပြန်လည်မွေးဖွားလာသူ တစ်ဦး သေချာပေါက် ဖြစ်နေကြောင်း ခုံးဝူတောက် အတည်ပြုပြီးလေပြီ။

ထို့ပြင် နှောင်းပိုင်းခေတ်များရှိ ကောင်းကင်ဘုံများ၏သမိုင်းကြောင်း ဖွံ့ဖြိုးတိုးတက်မှုကို သူမ သိရှိထားရန် ဖြစ်နိုင်ခြေများသည်။

ထိုကဲ့သို့သော တည်ရှိမှုကို သူ့အတွက် အသုံးပြုရန် နည်းလမ်းရှာရပေမည်။

သေချာသည်မှာ တစ်ဖက်လူသည် အမှန်တကယ်ကို အ​ခြေအနေအား နားမလည်ပါက သူ မရနိုင်သောအရာကို သူ ဖျက်ဆီးပစ်ရပေမည်။