အခန်း (၁၈၂၅-၁၈၂၆)

အခန်း (၁၈၂၅) - သီးသန့်ဖန်တီးမှု

ဖန့်တိန်၏ စကားများကြောင့် ဖန့်ချန်မှာ ခဏတာ တိတ်ဆိတ်သွားရသည်။

'ဒီလိုဆိုရင်... ဒီသူတော်စင်ကျမ်းစာက... တကယ်တမ်း ပညာပေးတဲ့ ကျင့်စဉ်လမ်းစဉ်တွေဟာ လူတစ်ဦးချင်းစီရဲ့ မတူညီတဲ့ အချက်တွေအပေါ် မူတည်ပြီး သီးသန့်ဖန်တီး ပေးထားတာပေါ့'

ဖန့်ချန်၏ ရင်ထဲ၌ တိတ်တဆိတ် တုန်လှုပ်သွားရသည်။

အကယ်၍ ဤအချက်သာ အမှန်ဖြစ်ပါက ဤအရာ၏ ဆန်းကြယ်မှုမှာ သူ၏ စိတ်ကူးထက်ပင် ကျော်လွန်နေချေပြီ။ ဤအရာကို ဖန်တီးခဲ့သည့် ဟင်းလင်ပြင် အမြင့်ဆုံးမဟာမိတ်အဖွဲ့သည် မည်မျှပင် ထိတ်လန့်ဖွယ်ကောင်းလိမ့်မည်နည်း။

"ဖန့်တိန်... ငါတို့ ဖန့်မျိုးနွယ်စုရဲ့ သူတော်စင်ကျမ်းစာက သူတော်စင် ကိုးပါးဆီမှာရှိတဲ့ ကျမ်းစာတွေနဲ့ တူရဲ့လား။

ပြီးတော့ တခြားမျိုးနွယ်စုတွေ လက်ထဲက ကျမ်းစာတွေနဲ့ကော တူရဲ့လား။

ဟင်းလင်ပြင် အမြင့်ဆုံးမဟာမိတ်အဖွဲ့မှာ ရှိနေမယ့် ကျမ်းစာတွေနဲ့ကော တူမှာလား။

သူတော်စင်ကျမ်းစာမှာ အဆင့်အတန်း ခွဲခြားထားတာမျိုး ရှိသလား"

ဖန့်ချန်၏ မျက်နှာထားမှာ အနည်းငယ် တည်ကြည်လေးနက်နေသည်။ ကျောင်းတော်တံခါးဝတွင် စောင့်နေသည့် အခြေခံအဆင့် ၃ ကျင့်ကြံသူ နှစ်ဦးမှာလည်း ကြောင်အသွားပြီး ထူးဆန်းသော အမူအရာများ ဖြစ်ပေါ်လာသည်။

"သူတော်စင်ကျမ်းစာမှာ အဆင့်အတန်း ခွဲခြားထားတယ်လို့ မကြားဖူးပါဘူး။ မင်ရွှီမှာရှိတဲ့ သူတော်စင်ကျမ်းစာတွေ အားလုံးက တစ်ထပ်တည်း တူညီတယ်လို့ အတည်ပြုနိုင်ပါတယ်။ ဘယ်မျိုးနွယ်စုရဲ့ ကျမ်းစာကမှ ပိုပြီး ထူးထူးခြားခြား အစွမ်းထက်တာမျိုး မရှိပါဘူး။ တခြားမျိုးနွယ်စုတွေဆီမှာလည်း ဒီအတိုင်းပဲ ဖြစ်မှာပါ"

ဖန့်တိန်က စဉ်းစားရင်း ဆိုလိုက်သည်။

"မကြားဖူးဘူးဆိုတာက မရှိဘူးလို့ မဆိုလိုပါဘူး"

ဖန့်ချန်၏ စိတ်ထဲ၌ အတွေးတစ်ခု လျှပ်ခဲသွားသည်။

ဟင်းလင်ပြင် အမြင့်ဆုံးမဟာမိတ်အဖွဲ့က မျိုးနွယ်စုအားလုံးအပေါ် တကယ်တမ်း တန်းတူညီတူ ဆက်ဆံလိမ့်မည်ဟု သူ လုံးဝ မယုံကြည်ပေ။ ဤသူတော်စင်ကျမ်းစာတွင်လည်း အဆင့်အတန်း ခွဲခြားမှု ရှိနိုင်သော်လည်း လူသားမျိုးနွယ်၏ လက်ရှိအင်အားနှင့်ဆိုလျှင် ပို၍ မြင့်မားသော သတင်းအချက်အလက်များကို သိခွင့်မရှိသေးခြင်းသာ ဖြစ်ပေလိမ့်မည်။

'အခုချိန်မှာ နယ်မြေကိုးခုက လူသားတွေဟာ အရိုး ၉ ခုကို ပြန်လည်ရရှိမယ့် နည်းလမ်းကို ရှာတွေ့ခဲ့ရင်တောင် ငါက ဒီသူတော်စင်ကျမ်းစာကို သူတို့ လေ့လာနိုင်ဖို့ ယူသွားပေးလို့ မရဘူး။ ဒီကျမ်းစာအုပ်ကြီး တစ်အုပ်လုံးကို တိုက်ရိုက် မပြီးမချင်းပေါ့'

ဖန့်ချန်သည် ကျောင်းတော်အတွင်းသို့ တစ်ချက် လှည့်ကြည့်ကာ စိတ်ထဲမှ သက်ပြင်းချလိုက်မိသည်။

နောက်ပိုင်းရက်များတွင် ဖန့်ချန်သည် ရှဲ့ကျစ်ဌာနအတွင်း၌ ရံဖန်ရံခါ လမ်းလျှောက်တတ်ပြီး ဖန့်မျိုးနွယ်စုဝင် အတော်များများနှင့် သိကျွမ်းခဲ့သည်။ အချို့နှင့် မျက်မှန်းတန်းမိရုံသာ ရှိသော်လည်း အချို့နှင့်မူ စကားလက်ဆုံ ကျနိုင်သည့်အထိ ဖြစ်လာသည်။

အချိန်အတော်များများကိုမူ သူသည် ခြံဝင်းအတွင်း၌ တစ်ဦးတည်း ရှိနေတတ်ပြီး သူတော်စင်ကျမ်းစာမှ ရရှိခဲ့သည့် ကျင့်စဉ်များကို ဦးနှောက်အတွင်း၌ ထည့်သွင်းကာ ပုံဖော်တွက်ချက်နေတတ်သည်။

သို့သော် သူ၏ ကျင့်စဉ်အဆင့်မှာ အဆင့် ၈ သို့ မရောက်သေးသဖြင့် သူတော်စင်ကျမ်းစာ ကျင့်စဉ်ကို စတင်ကျင့်ကြံနိုင်မည့် အမှတ်သို့ပင် မရောက်သေးပေ။ အရေးကြီးသည့် သတင်းအချက်အလက် တစ်ပိုင်းတစ်စ လိုအပ်နေသဖြင့် သူ၏ ပုံဖော်တွက်ချက်မှုမှာလည်း ထိရောက်သော ရလဒ် ထွက်မလာခဲ့ပေ။

ထိုနေ့တွင် ဖန့်ချန်သည် မိန်းကလေးငယ် တစ်ဦးနှင့် ထပ်မံ တွေ့ဆုံခဲ့ရသည်။

ဤဘိုးဘေးမကြီး၏ အမည်မှာ ဖန့်ချန်းရွှယ်ဖြစ်ကြောင်း သူ သိခဲ့ရပြီ။ သူမသည် လဲ့ဘိုးဘေးကြီး၏ တူမဖြစ်ပြီး လက်ရှိ ဖန့်မျိုးနွယ်စု၏ ဒုတိယမျိုးဆက် ဘိုးဘေးတစ်ဦး ဖြစ်သည်။

ထိုနေ့က တွေ့ခဲ့ရသည့် ကန့်သတ်ချက်ကျော်လွန်ခြင်း သုံးဆင့် ပုဂ္ဂိုလ် (၁၃) ဦးထဲတွင် ဒုတိယမျိုးဆက် ဘိုးဘေးအပြင် တတိယမျိုးဆက် ဘိုးဘေးများလည်း ပါဝင်ကြသည်။ ဖန့်တိန်ကဲ့သို့သော အဆင့် ၉ မသေမျိုးကျင့်ကြံသူများသည်ပင် တတိယမျိုးဆက် ဘိုးဘေးများကို မြင်လျှင် ဘိုးဘေးကြီး ဟု ခေါ်ကြရသည်။

"ငါတို့ရဲ့ တွက်ချက်မှုအရ မင်းရဲ့ သွေးမျိုးဆက် သန့်စင်မှုက ငါတို့ ဖန့်မျိုးနွယ်စုရဲ့ တတိယမျိုးဆက်တွေနဲ့ တန်းတူပဲ"

ဖန့်ချန်းရွှယ်သည် ခြံဝင်းထဲတွင် ရပ်ကာ ဖန့်ချန်ကို အပေါ်အောက် အကဲခတ်ရင်း အေးစက်စွာ ဆိုလိုက်သည်။

'တကယ်ပဲ... သူက အနည်းဆုံးတော့ တတိယမျိုးဆက် ဘိုးဘေးကြီးပဲ'

ဖန့်တိန်၏ ရင်ထဲ၌ ထိတ်လန့်သွားရသည်။ ဤရက်ပိုင်းအတွင်း သူ့ကို ဘိုးဘေးကြီးဟု ခေါ်ဆိုခဲ့ရသည်မှာ အလကား မဟုတ်တော့ကြောင်း ခံစားလိုက်ရသည်။

"မင်း တစ်ခုခုနဲ့ ကြုံတွေ့ခဲ့ရလို့ ကျင့်စဉ်အဆင့်တွေ လျော့ကျသွားပြီး မှတ်ဉာဏ်တွေလည်း ထိခိုက်သွားတာ ဖြစ်နိုင်တယ်။ ဒါပေမဲ့ ဒါက အရေးမကြီးပါဘူး။ လောလောဆယ်မှာတော့ မင်းက တတိယမျိုးဆက်ရဲ့ လုပ်ပိုင်ခွင့်တွေကို ရမှာမဟုတ်ဘူး။ အလုပ်မရှိ အကိုင်မရှိတဲ့ လူကြီးတစ်ယောက်လိုပဲ သဘောထားပြီး နေလိုက်ပါ။ မျိုးဆက်သစ်တွေရဲ့ ကိစ္စတွေထဲကို ဝင်မစွက်ဖက်နဲ့"

ဖန့်ချန်းရွှယ်က ခပ်အေးအေးပင် ဆိုသည်။

သူမ၏ စကားကို ဖန့်ချန် နားလည်လိုက်သည်။ တစ်ဖက်လူက သူ့ကို အာဏာမရှိသော လူကြီးတစ်ဦးအဖြစ် ငြိမ်ငြိမ်လေး နေရန်နှင့် ရှဲ့ကျစ်ဌာန၏ လည်ပတ်မှုများတွင် ဝင်မပါရန် ပြောခြင်းဖြစ်သည်။ ၎င်းမှာလည်း မဆန်းပေ၊ သူ၏ အမှတ်အသား အစစ်အမှန်မှာ လုံးဝ ရှင်းရှင်းလင်းလင်း မရှိသေးသောကြောင့် ဖြစ်သည်။

"တကယ်လို့ ကျွန်တော်က တတိယမျိုးဆက်ဆိုရင်... ခင်ဗျားကို ဘယ်လို ခေါ်ရမလဲ"

ဖန့်ချန်က စဉ်းစားရင်း မေးလိုက်သည်။

"အဒေါ်"

ဖန့်ချန်းရွှယ်က ဆိုသည်။

"တူဖြစ်သူက အဒေါ်ကို ဂါရဝပြုပါတယ်"

ဖန့်ချန်က ဦးညွှတ်ဂါရဝပြုလိုက်သည်။ ခေါ်လိုက်ရသည်မှာ အလွန်ပင် ချောမွေ့နေ၏။

"အင်း... ငါ ဒီနေ့ လာတာက ဝမ်မျိုးနွယ်စုက ဆွေးနွေးဖို့ လာတဲ့လူတွေ စန့်လုံမြို့ကို ရောက်နေပြီမို့လို့ပဲ။ မင်းက အရင်က ဝမ်မျိုးနွယ်စုအတွက် အလုပ်လုပ်ပေးခဲ့ဖူးသလို ဒီဆွေးနွေးပွဲ ဖြစ်လာအောင်လည်း စီစဉ်ပေးခဲ့တဲ့သူဆိုတော့ လာပြီး နားထောင်ဖို့ ခွင့်ပြုတယ်။ ငါနဲ့ လိုက်ခဲ့"

ဖန့်ချန်းရွှယ်သည် ပြောပြီးသည်နှင့် ခြံဝင်းထဲမှ လှည့်ထွက်သွားတော့သည်။

ဖန့်ချန်သည် ဖန့်တိန်နှင့်အတူ သူမနောက်မှ အပြေးအလွှား လိုက်သွားခဲ့သည်။

လမ်းတစ်လျှောက်တွင် ဖန့်မျိုးနွယ်စုဝင်များသည် ဖန့်ချန်းရွှယ်ကို မြင်သည်နှင့် လမ်းဘေးသို့ ချက်ချင်း ဖယ်ပေးကြကာ ခေါင်းငုံ့၍ ရိုသေစွာ ဂါရဝပြုရင်း 'ဘိုးဘေးမကြီး' ဟု ခေါ်ကြသည်။

ဖန့်ချန်သည် မိမိနှင့် ခြေလှမ်းအနည်းငယ်သာ ဝေးသော ဖန့်ချန်းရွှယ်ကို ကြည့်ရင်း ရင်ထဲ၌ စပ်စုလိုစိတ်များ ပေါ်လာသည်။

သူမသည် ကန့်သတ်ချက်ကျော်လွန်ခြင်း၏ ဘယ်နှဆင့်မြောက်သို့ ရောက်နေသနည်း။

ဒုတိယမျိုးဆက် ဖြစ်တိုင်း တတိယမျိုးဆက်ထက် ကျင့်စဉ်အဆင့် မြင့်မည်ဟု မဆိုလိုသော်လည်း ပြီးခဲ့သည့်အကြိမ်က လူ (၁၃) ဦး ပေါ်လာစဉ်က သူမသည် ခေါင်းဆောင်သဖွယ် ဖြစ်နေသဖြင့် ကန့်သတ်ချက်ကျော်လွန်ခြင်း တတိယအဆင့်သို့ ရောက်နေနိုင်ချေ ရှိသည်။

ဤသည်မှာ ဖန့်ချန်အတွက် ကန့်သတ်ချက်ကျော်လွန်သည့် ပုဂ္ဂိုလ်တစ်ဦးနှင့် ဤမျှ နီးကပ်စွာ ပထမဆုံးအကြိမ် ထိတွေ့ဖူးခြင်း ဖြစ်သည်။

ကန့်သတ်ချက်ကျော်လွန်သူနှင့် အဆင့် ၉မသေမျိုး ကျင့်ကြံသူကြားတွင် မည်သို့သော ကွာခြားချက် ရှိသနည်းဆိုသည်ကို သူ အလွန်သိချင်နေသည်။

အခြေခံအဆင့်တွေမှာ ဝိညာဉ်စွမ်းအား ကို အဓိကထားတယ်၊ အဆင့် ၉ ကတော့ မသေမျိုးစွမ်းအား ကို အဓိကထားတယ်။ ကန့်သတ်ချက်ကျော်လွန်သွားရင်ကော စွမ်းအားတွေက အရည်အသွေး ပြောင်းလဲသွားမှာလား။

ဒီလောကကြီးထဲမှာ တာအိုအမြင်အာရုံ ပိုင်ဆိုင်ထားတဲ့ ငါတောင် မမြင်နိုင်တဲ့ စွမ်းအားမျိုး ရှိနေသေးတာလား။

ဖန့်ချန် စိတ်ထဲမှ တိတ်တဆိတ် စဉ်းစားနေမိသည်။

မကြာမီမှာပင် ဖန့်ချန်းရွှယ်သည် အခြားသော အဆင့် ၉ မသေမျိုးကျင့်ကြံသူ (၁၀) ဦးကျော်နှင့် ပူးပေါင်းလိုက်သည်။ သူတို့အားလုံးမှာ ဖန့်တိန်ကဲ့သို့ပင် ရှဲ့ကျစ်ဌာနတွင် အာဏာရှိသော စီမံခန့်ခွဲသူများ ဖြစ်ကြသည်။

ထို့နောက် ဖန့်ချန်းရွှယ်၏ ရှေ့မှောက်တွင် တံခါးကြီးတစ်ချပ် ပေါ်လာပြီး လူတိုင်း သူမနောက်မှ လိုက်ပါသွားရာ ချက်ချင်းပင် လူစည်ကားလှသော လမ်းမထက်သို့ ရောက်ရှိသွားတော့သည်။

ရှေ့နားတွင် ချောင်ရှန်းမျှော်စင် ရှိနေသည်။ ၎င်းမှာ ယနေ့ ဆွေးနွေးမည့် နေရာပင် ဖြစ်သည်။

လူတိုင်း ဖန့်ချန်းရွှယ်နောက်မှ လိုက်၍ ချောင်ရှန်းမျှော်စင်ပေါ်သို့ တက်လှမ်းခဲ့ကြသည်။

တစ်ထပ်ပြီး တစ်ထပ်။

ထိုအတောအတွင်း ပတ်ဝန်းကျင်မှ လူများမှာ သူတို့ကို လုံးဝ မမြင်ရသကဲ့သို့ ရှိသော်လည်း သူတို့နှင့် ရင်ဆိုင်မိသည့်အခါတွင်မူ မသိစိတ်ဖြင့် လမ်းဖယ်ပေးကြသည်။

ဖန့်တိန်တို့အတွက်မူ ဤသည်မှာ မဆန်းသော်လည်း ဖန့်ချန်ကမူ ဤစွမ်းအားအပေါ် စပ်စုမိသွားသည်။ သူ၏ တာအိုအမြင်အာရုံ ဖြင့် ကြည့်လျှင်ပင် မသေမျိုးစွမ်းအားနှင့် လုံးဝ မတူညီသော မျဉ်းကြောင်း များ လူတိုင်း၏ ပတ်ပတ်လည်တွင် ရစ်ပတ်နေသည်ကို ဝေဝေဝါးဝါးသာ မြင်တွေ့နိုင်သည်။

'ဒီ မျဉ်းကြောင်း တွေက ကန့်သတ်ချက်ကျော်လွန်တဲ့ စွမ်းအားကို ကိုယ်စားပြုနေတာလား'

ဖန့်ချန် ဆက်လက် အကဲမခတ်ရသေးခင်မှာပင် ဖန့်ချန်းရွှယ်သည် လူတိုင်းကို ခေါ်ဆောင်ကာ ချောင်ရှန်းမျှော်စင်၏ အမြင့်ဆုံးအလွှာသို့ ရောက်ရှိသွားပြီ ဖြစ်သည်။

ဤအထပ်မှာ တိမ်တိုက်များကြားတွင် တည်ရှိနေသကဲ့သို့ ဖြစ်နေပြီး လှိုင်းတံပိုးများသဖွယ် ခမ်းနားလှပသော တိမ်ပင်လယ်ကြီးကို မြင်တွေ့နေရသည်။

ဤနေရာတွင် လူတစ်စုမှာ စောင့်ဆိုင်းနေသည်မှာ ကြာပြီ ဖြစ်သည်။ သူတို့သည် ဖန့်ချန်းရွှယ်ကို မြင်သောအခါ အားလုံး ထရပ်လိုက်ကြပြီး ဝတ်စုံနက်ဝတ် အဘိုးအိုတစ်ဦး၏ ဦးဆောင်မှုဖြင့် ရှေ့သို့ ကြိုဆိုရန် ထွက်လာကြသည်။

ဝတ်စုံနက်ဝတ် အဘိုးအိုမှာ မျက်နှာတွင် အပြုံးများဖြင့် ပြည့်နှက်နေပြီး လက်အုပ်ချီလျက်

"ဝမ်မျိုးနွယ်စုက ဝမ်ကျိလုံ ပါ၊ မိန်းကလေးကို နှုတ်ခွန်းဆက်ပါတယ်။ မိန်းကလေးဟာ ဖန့်မျိုးနွယ်စုရဲ့ ဒုတိယမျိုးဆက် ဘိုးဘေး ဖန့်ချန်းရွှယ် ဖြစ်မယ်ထင်တယ်၊ တွေ့ရတာ ဝမ်းသာပါတယ်"

ဝမ်ကျိလုံ

ဖန့်ချန်မှာ ခဏတာ ကြောင်အသွားသည်။ ထိုဝတ်စုံနက်ဝတ် အဘိုးအို၏ ကိုယ်ပေါ်တွင် ဝမ်ကျိလုံနှင့် ဆင်တူသည့် အချက်တစ်ခုမှ ရှာမတွေ့ပေ။

ဤမျှအထိ တိုက်ဆိုင်နိုင်ပါ့မလား

ဝမ်ချုံစန်းသည်လည်း ထိုနေရာ၌ ရှိနေသည်ကို သူ မြင်လိုက်ရသည်။ သို့သော် ဝမ်ချုံစန်းမှာ လူအုပ်ကြားထဲက မထင်မရှား နေရာတစ်ခုတွင်သာ ရှိနေပြီး လာသမျှလူတိုင်းမှာ ဝမ်မျိုးနွယ်စုအတွင်း၌ သူ့ထက် အဆင့်အတန်း မြင့်ပုံရသည်။

"ငါတို့ ဖန့်မျိုးနွယ်စုဝင် တစ်ယောက်ချင်းစီရဲ့ အသေးစိတ် သတင်းအချက်အလက်တွေက မင်းတို့ ဝမ်မျိုးနွယ်စုရဲ့ စားပွဲပေါ်မှာ သေသေသပ်သပ် ရှိနေပြီးသားပဲ ဖြစ်မှာပါ၊ ဒါကြောင့် အားနာစရာတွေ ပြောမနေပါနဲ့တော့"

ဖန့်ချန်းရွှယ်က ခပ်ပြုံးပြုံးဖြင့် ဆိုသည်

"ငါ စကားကို ဒဲ့ပဲ ပြောမယ်။ သူတော်စင်ကျမ်းစာ မွေးနေ့ပွဲနေ့ဟာ ငါတို့မျိုးနွယ်စုရဲ့ ဖန့်သူတော်စင်တစ်ပိုင်း သူတော်စင်အဆင့် တက်လှမ်းမယ့်နေ့ပဲ။ မင်းတို့ ဝမ်မျိုးနွယ်စုရဲ့ သဘောထားက ဘယ်လိုလဲ"

ဝမ်မျိုးနွယ်စုမှ ကျင့်ကြံသူများသည် တစ်ဦးကိုတစ်ဦး ကြည့်လိုက်ကြပြီး သူတို့၏ မျက်ဝန်းထဲတွင် အတွေးအမျိုးမျိုး ရှိနေကြသည်။

"တစ်ခုတော့ ငါ အတည်ပြုချင်တယ်။ ဖန့်သူတော်စင်တစ်ပိုင်းက တကယ်ပဲ အဲဒီနေ့မှာ သူတော်စင်အဆင့် တက်လှမ်းဖို့ ရွေးချယ်မှာလား"

ဝမ်ကျိလုံက စဉ်းစားရင်း မေးလိုက်သည်။

"သေချာတာပေါ့"

ဖန့်ချန်းရွှယ်က ခေါင်းညိတ်ပြလိုက်သည်။

"ဒါဆိုရင် ငါတို့ ဝမ်မျိုးနွယ်စုရဲ့ သဘောထားက... ဘေးကနေ ကြည့်နေရုံပါပဲ။ ဒီအဖြေကို မင်းတို့ ကျေနပ်ရဲ့လား"

ဝမ်ကျိလုံက ခဏစဉ်းစားပြီးနောက် ပြောလိုက်သည်။

ဝမ်မျိုးနွယ်စုဝင် အားလုံးသည် ဖန့်ချန်းရွှယ်ကို စိုက်ကြည့်နေကြပြီး သူမ၏ မျက်နှာအမူအရာမှတစ်ဆင့် တစ်စုံတစ်ခုကို သိရှိနိုင်ရန် ကြိုးစားနေကြလေသည်။

အခန်း (၁၈၂၆) - လော့ရွှယ်မဟာမိတ်အဖွဲ့၏ အခြေအနေ

"ဘေးကနေ ကြည့်နေရုံ ဟုတ်လား"

ဖန့်ချန်းရွှယ်၏ မျက်ဝန်းထဲတွင် လှောင်ပြောင်ရိပ်အချို့ ဖြတ်ပြေးသွားသည်၊

"ဒီလို အမြတ်ထွက်မယ့် အလုပ်မျိုးကို မင်းတို့ ဝမ်မျိုးနွယ်စုတောင် လုပ်ပိုင်ခွင့် မရှိဘူး"

"ဒါဆိုရင် ခင်ဗျားတို့ဘက်က ဘယ်လို ရည်ရွယ်ချက် ရှိလို့လဲ"

ဝမ်ကျိလုံ မျက်မှောင်ကြုတ်သွားသည်

"မမေ့ပါနဲ့ဦး၊ ခင်ဗျားတို့ရဲ့ ဖန့်သူတော်စင်တစ်ပိုင်းက သူတော်စင်အဆင့်ကို မရောက်သေးဘူး။ ပြီးတော့ ဒီသတင်းသာ ပြန့်သွားရင် အဲဒီနေ့မှာ တောခွေးတွေ၊ ကျားသစ်တွေလို ရန်သူတွေ အုပ်စုလိုက် ရောက်လာမှာပဲ။ ငါတို့ ဝမ်မျိုးနွယ်စုက ဝင်မစွက်ဖက်ဘူးဆိုတာကပဲ ငါတို့ရဲ့ သဘောထားကို ပြသပြီးသား ဖြစ်နေပြီ"

"ဘေးကနေ ကြည့်နေမယ်ဆိုရင်တော့... ဖန့်သူတော်စင်တစ်ပိုင်း သူတော်စင်ဖြစ်လာတဲ့အခါ မင်းတို့ ဝမ်မျိုးနွယ်စုကို စတင်ပြီး စာရင်းရှင်းတော့မှာပဲ။ ဒီနှစ်တွေအတွင်း မင်းတို့ ဝမ်မျိုးနွယ်စုရဲ့ ကင်းလှည့်စစ်ဆေးရေးဌာန က ငါတို့ ရှဲ့ကျစ် ကို ဒုက္ခပေးခဲ့တာ မနည်းဘူး။ ငါတို့ ဖန့်မျိုးနွယ်စုက အားလုံးကို သဘောထားကြီးကြီးနဲ့ ခွင့်လွှတ်ပေးလိမ့်မယ်လို့ မင်း တကယ်ပဲ ထင်နေတာလား"

ဖန့်ချန်းရွှယ်က ခပ်အေးအေးပင် ဆိုလိုက်သည်။

"ဒါဆိုရင် ဆွေးနွေးလို့ မရတော့ဘူးပေါ့"

ဝမ်ကျိလုံက သက်ပြင်းတစ်ချက် ချလိုက်သည်

"ငါ ပြောနေကျ စကားဟောင်းကိုပဲ ပြန်ပြောရမယ်။ ခင်ဗျားတို့ ဖန့်သူတော်စင်တစ်ပိုင်း သူတော်စင် ဖြစ်၊ မဖြစ်ဆိုတာက မသေချာသေးတဲ့ ကိစ္စပဲ။ ဒီလို အခြေအနေမျိုးမှာ ငါတို့ ဝမ်မျိုးနွယ်စုက ဘက်ရွေးဖို့ တကယ်ကို မဖြစ်နိုင်ဘူး။

အခု ငါတို့ လာဆွေးနွေးရတာကလည်း ငါတို့အိမ်က သူတော်စင်တစ်ပိုင်းက လူတော်ကို နှမြောလို့ပဲ။ သူက ဖန့်သူတော်စင်တစ်ပိုင်း သာမန်ဘဝကနေ အခုလို အဆင့်အထိ ဘယ်လို ရုန်းကန်တက်လှမ်းလာတယ်ဆိုတာကို ကိုယ်တိုင် မြင်တွေ့ခဲ့ရသူမို့လို့ပဲ"

ဖန့်ချန်းရွှယ်က စကားများများစားစား မပြောတော့ဘဲ ခပ်ပြတ်ပြတ်ပင် ဆိုသည်။

"မင်းတို့ ပြန်လို့ရပြီ"

ဝမ်ကျိလုံမှာ ခဏတာ ကြောင်အသွားပြီး မျက်နှာပျက်သွားသည်။ တစ်ဖက်လူက သူ့ကို စကားအချေအတင် ပြန်ပြောဦးမည်ဟု ထင်ထားသော်လည်း ဤမျှ ပြတ်သားစွာဖြင့် ဆွေးနွေးပွဲ ပျက်ပြားကြောင်း ကြေညာလိမ့်မည်ဟု မမျှော်လင့်ထားပေ။

"ထပ်ပြီး မဆွေးနွေးတော့ဘူးလား"

ဝမ်ကျိလုံက စမ်းသပ်သည့်သဘောဖြင့် မေးလိုက်သည်။

"ဘာဆွေးနွေးစရာ ရှိသေးလို့လဲ"

ဖန့်ချန်းရွှယ်က အေးစက်စွာ တုံ့ပြန်သည်။

ဝမ်ကျိလုံ ခဏတာ တိတ်ဆိတ်သွားပြီးနောက် မေးသည်။

"ဖန့်သူတော်စင်တစ်ပိုင်းက သူတော်စင်ဖြစ်လာမယ်ဆိုတာကို တကယ်ပဲ ဒီလောက်တောင် ယုံကြည်မှု ရှိနေတာလား မကြာခင်မှာ ခင်ဗျားတို့က ဒီအကြောင်းကို မင်ရွှီတစ်ခွင် ကြေညာတော့မယ်လို့ အောက်ကလူတွေ ပြောတာ ကြားမိတယ်။ ငါ သိချင်တာက ဘာကြောင့်လဲ ဘာကြောင့် ဖန့်သူတော်စင်တစ်ပိုင်းက သူ့ကိုယ်သူ ဒီလောက် အန္တရာယ်များတဲ့ အခြေအနေထဲကို တွန်းပို့နေတာလဲ"

"ဖန့်သူတော်စင်တစ်ပိုင်းကိုပဲ သွားမေးပါလား၊ ငါက ဘယ်လိုလုပ် သိမှာလဲ"

ဖန့်ချန်းရွှယ်က 'မင်းကတော့ ရယ်စရာပဲ' ဆိုသည့် အမူအရာမျိုးဖြင့် ကြည့်ကာ

"ငါက ဒီနေ့ မင်းနဲ့ လာဆွေးနွေးတာ၊ သတင်းပို့ပေးဖို့ လာတာမဟုတ်ဘူး။ ငါတို့ရဲ့ ကမ်းလှမ်းချက်ကို လက်ခံမလား၊ ဒါမှမဟုတ် တိုက်ရိုက်ပဲ ပြန်မလား... တစ်ခုခု ရွေးလိုက်"

ဝမ်မျိုးနွယ်စုမှ ကျင့်ကြံသူများသည် ဒေါသရိပ်များ ယှက်သန်းသွားကြသည်။

သူတို့အမြင်တွင် ဖန့်သူတော်စင်တစ်ပိုင်းနှင့် သူ၏လက်အောက်မှ ကန့်သတ်ချက်ကျော်လွန်သူများသည် လော့ရွှယ်မဟာမိတ်အဖွဲ့ ၏ ဖမ်းဝရမ်းထုတ်ခံထားရသူများသာ ဖြစ်သည်။ နှစ်ဖက်စလုံး၏ အဆင့်အတန်းမှာ အစိုးရစစ်တပ် နှင့် 'ူသူပုန် ကဲ့သို့ ကွာခြားသည်။ သို့သော် ယခု ထို သူပုန် က ဤမျှအထိ မောက်မာရိုင်းစိုင်းပြီး လူကို အထင်မသေးလွန်းဘူးလား။

"ဒါဆိုရင်... ဖန့်မျိုးနွယ်စုက ငါတို့ ဝမ်မျိုးနွယ်စုကို ဘာလုပ်ပေးစေချင်သလဲဆိုတာ ကြားကြည့်ပါရစေ"

ဝမ်မျိုးနွယ်စုဝင်များ ထင်ထားသည်နှင့် ဆန့်ကျင်ဘက်ဖြစ်ကာ ဝမ်ကျိလုံမှာ ဒေါသမထွက်ဘဲ တည်ငြိမ်စွာ မေးလိုက်သည်။

"မင်းတို့ ဝမ်မျိုးနွယ်စု လုပ်ရမှာက လော့ရွှယ်မဟာမိတ်အဖွဲ့ကနေ နုတ်ထွက်ကြောင်း ကြေညာဖို့ပဲ"

ဖန့်ချန်းရွှယ်က ပြုံးလျက် ဆိုသည်

"တစ်လောကလုံး သိအောင် ကြေညာရမှာမျိုးပေါ့"

လော့ရွှယ်မဟာမိတ်အဖွဲ့ကနေ နုတ်ထွက်ရမယ်

လူတိုင်းမှာ ဆွံ့အသွားကြသည်။

ဝမ်ချုံစန်း၏ မျက်ဝန်းထဲတွင် စဉ်းစားခန်း ဝင်နေသော အရိပ်အယောင်များ ပေါ်လာသည်။

ဤကမ်းလှမ်းချက်မှာ... တကယ်တမ်းတော့ သိပ်မမြင့်လှပေ။ ဝမ်မျိုးနွယ်စု၏ ထူးခြားသော အဆင့်အတန်းအရ သူတို့သည် လော့ရွှယ်မဟာမိတ်အဖွဲ့၏ လက်အောက်တွင် အလုပ်လုပ်ချင်ကြသူများ မဟုတ်ပေ။

သို့သော် လက်ရှိ အခြေအနေအရ ဝမ်မျိုးနွယ်စုသာ လော့ရွှယ်မဟာမိတ်အဖွဲ့မှ နုတ်ထွက်ကြောင်း အမှန်တကယ် ကြေညာလိုက်ပါက ဖန့်သူတော်စင်တစ်ပိုင်း သူတော်စင် မဖြစ်လာခင်အထိ နောက်ထပ် ဆယ်စုနှစ်များစွာအတွင်း ဖိနှိပ်မှုများကို သေချာပေါက် ခံရပေလိမ့်မည်။

အကယ်၍ ထိုဖန့်သူတော်စင်တစ်ပိုင်းသာ သူတော်စင် မဖြစ်လာခဲ့ပါက ဝမ်မျိုးနွယ်စုသည် လော့ရွှယ်မဟာမိတ်အဖွဲ့ကို မည်သို့ ပြန်လည်ရင်ဆိုင်မည်နည်း။

သိသာသည်မှာ ဝမ်ကျိလုံတို့ အုပ်စုလည်း ဤအချက်ကို တွေးမိပုံရပြီး ဒေါသကြောင့် ရယ်ချင်သလိုမျိုး ဖြစ်နေကြသည်။

"မင်းတို့မှာ စဉ်းစားဖို့ အချိန်ရှိပါသေးတယ်။ နောက်ထပ် (၁၀) နှစ်အတွင်းမှာ ဆုံးဖြတ်ချက် ချပေးရင် ရပါပြီ"

ဖန့်ချန်းရွှယ်က ခပ်အေးအေးပင် ဆိုသည်

"မင်းတို့ ပြန်လို့ရပြီ"

"ဒါဆိုရင်... ကျွန်တော်မျိုးတို့ နှုတ်ဆက်ပါတယ်"

ဝမ်ကျိလုံက လက်အုပ်ချီ နှုတ်ဆက်ကာ လူအုပ်ကို ခေါ်ဆောင်၍ ထွက်ခွာသွားတော့သည်။

ဝမ်ချုံစန်း ထွက်သွားချိန်တွင် ဖန့်ချန်နှင့် မျက်လုံးချင်း ဆုံသွားပြီး အသံလွှင့်ကာ လှမ်းမေးလိုက်သည်။

"ဟေ့ ဖန့်ချန်... အတွင်းသတင်း ဘာရှိလဲ၊ ပြောပြပါဦး"

"မစဉ်းစားနဲ့တော့ ဝမ်အိုကြီး၊ ငါ့အဆင့်အတန်းက အဲဒီလောက် မမြင့်ဘူး၊ သိတာက မင်းနဲ့ မထူးမခြားနားပါပဲ။ ဒါပေမဲ့ ငါထင်တာတော့... မင်းတို့ ဖန့်မျိုးနွယ်စုရဲ့ ခြေလှမ်းအတိုင်း လိုက်ရင် မှားမယ်မထင်ဘူး"

ဖန့်ချန်က အသံလွှင့်၍ ပြန်ပြောလိုက်သည်။

"နှမြောစရာပဲ၊ ငါလည်း ကိုယ်တိုင် ဆုံးဖြတ်လို့ မရဘူး..."

ဝမ်ချုံစန်း စိတ်ထဲမှ သက်ပြင်းချလိုက်ပြီး ဖန့်ချန်ကို ခေါင်းညိတ်ပြကာ ဝမ်မျိုးနွယ်စုဝင်များနောက်သို့ အမှီလိုက်ရင်း လှေကားထိပ်တွင် ပျောက်ကွယ်သွားတော့သည်။

နောက်ထပ် (၁၀) ရက်ခန့် ကုန်ဆုံးသွားခဲ့သည်။

သတင်းတစ်ခုမှာ မင်ရွှီနယ်မြေအတွင်း ရုတ်တရက် ပျံ့နှံ့သွားခဲ့ပြီး ကူးစက်ရောဂါတစ်ခုကဲ့သို့ အလျင်အမြန်ပင် ပြန့်နှံ့သွားတော့သည်။

"သူတော်စင်ကျမ်းစာ မွေးနေ့ပွဲနေ့မှာ ဖန့်သူတော်စင်တစ်ပိုင်းက စန့်လုံမြို့ရဲ့ ချောင်ရှန်းမျှော်စင်ပေါ်မှာ သူတော်စင်အဆင့် တက်လှမ်းတော့မှာ ဟုတ်လား "

"ဒီသတင်းက အစစ်အမှန်ကော ဟုတ်ရဲ့လား"

"အစစ်ဖြစ်ဖြစ်၊ အတုဖြစ်ဖြစ်... အဲဒီနေ့မှာ စန့်လုံမြို့ကတော့ တကယ်ကို စည်ကားတော့မှာပဲ။ နှစ်တစ်ထောင်မှာ တစ်ခါမှ မမြင်ဖူးတဲ့ ထူးခြားတဲ့ မြင်ကွင်းမျိုး ဖြစ်လာလိမ့်မယ်၊ ငါ သေချာပေါက် သွားကြည့်ရမယ်"

"ဖန့်လဲ့လေးက... လူသိရှင်ကြား သူတော်စင်အဆင့် တက်လှမ်းဖို့ ကြံရွယ်နေတာလား "

"တကယ်ကို နွားသငယ်က ကျားကို မကြောက်တဲ့အတိုင်းပဲ၊ အဲဒီနေ့မှာ သွားပြီး အခြေအနေကို ကြည့်ရမယ်"

"အတူတူ သွားကြစို့"

စန့်လုံမြို့အနှံ့တွင်ပင် ဤသတင်းမှာ ကျယ်ကျယ်ပြန့်ပြန့် ပျံ့နှံ့နေသည်ကို မြင်သောအခါ ဖန့်ချန်၏ ရင်ထဲ၌ ထိုဖန့်သူတော်စင်တစ်ပိုင်း၏ ရည်ရွယ်ချက်အပေါ် ပိုမို၍ စပ်စုလိုစိတ်များ ဖြစ်ပေါ်လာသည်။

'ပုံမှန်အတိုင်းဆိုရင်... တကယ်လို့ သူက သူတော်စင်အဆင့်ကို အရင်ကတည်းက ရောက်နေခဲ့ရင် ဒီနည်းလမ်းကို သုံးပြီး ရန်သူတွေကို ဖော်ထုတ်သတ်ဖြတ်နိုင်ပေမယ့်... ဟိုဘက်က သူတော်စင်တွေ၊ သူတော်စင်တစ်ပိုင်းတွေကလည်း လူအတွေ မဟုတ်ဘူး၊ ဒီအချက်ကို သူတို့လည်း တွက်မိမှာပဲ'

ဖန့်ချန် အကြာကြီး စဉ်းစားသော်လည်း အဖြေရှာမရသဖြင့် ဆက်မစဉ်းစားတော့ပေ။ မည်သို့ပင်ဆိုစေ သူတော်စင်ကျမ်းစာ မွေးနေ့ပွဲနေ့သို့ ရောက်ရန်မှာ နောက်ထပ် ဆယ်စုနှစ် အနည်းငယ်သာ လိုတော့သဖြင့် မျက်စိတစ်မှိတ်အတွင်း ရောက်လာပေလိမ့်မည်။

ထိုနေ့သို့ ရောက်လျှင် ဖန့်သူတော်စင်တစ်ပိုင်း၏ အစီအစဉ်ကို သူ သိမြင်ရပေလိမ့်မည်။

ဤသတင်း ပျံ့နှံ့သွားပြီးနောက်တွင် ဆွေးနွေးရေးအဖွဲ့များမှာ တစ်ဖွဲ့ပြီးတစ်ဖွဲ့ စန့်လုံမြို့သို့ ရောက်ရှိလာကြသည်။

နောက်ပိုင်း ဆွေးနွေးပွဲများတွင် ဖန့်ချန် တက်ရောက်ခွင့် မရတော့သော်လည်း လာရောက်ဆွေးနွေးသူများမှာ မည်သူမည်ဝါဖြစ်ကြောင်းကို ဖန့်တိန်ထံမှ သိရှိရသည်။

အများစုမှာ လော့ရွှယ်မဟာမိတ်အဖွဲ့အတွင်းမှ သူတော်စင်တစ်ပိုင်း မျိုးနွယ်စုများ ဖြစ်ကြသည်။ အချို့မှာမူ အခြားသော သူတော်စင်များ၏ လက်အောက်ခံ အင်အားစုများဖြစ်ပြီး ဖန့်မျိုးနွယ်စုနှင့် အငြိုးအတေး ရှိခဲ့သူများ ဖြစ်ကြသည်။

သို့သော် ပို၍များပြားသော အင်အားစုများမှာမူ ဘေးမှနေ၍ လှောင်ပြောင်ခြင်း၊ ကဲ့ရဲ့ခြင်းများဖြင့်သာ စောင့်ကြည့်နေကြသည်။

ဥပမာအားဖြင့် အကြီးကျယ်ဆုံးသော သူတော်စင် ကိုးပါး မှ တစ်ဦးတစ်ယောက်မျှ ဆွေးနွေးရန် လူမလွှတ်ခဲ့ပေ။

ဖန့်မျိုးနွယ်စုနှင့် ရန်ငြိုးကို ဖြေဖျောက်၍ မရနိုင်တော့ဟု ယူဆထားသော သူတော်စင်တစ်ပိုင်း မျိုးနွယ်စုများစွာမှာလည်း လူမလွှတ်ကြဘဲ သူတော်စင်ကျမ်းစာ မွေးနေ့ပွဲနေ့တွင် ပွဲကြည့်ရန်သာ စောင့်ဆိုင်းနေကြသည်။

နောက်ဆုံးတွင် ဆွေးနွေးမှုရလဒ်များ မည်သို့ရှိခဲ့သည်ကိုမူ ဖန့်ချန် မသိရှိရပေ။

(၁၀) နှစ်ခန့် အချိန်ကုန်လွန်သွားသောအခါ...

ပထမဆုံးအနေဖြင့် ဝမ်မျိုးနွယ်စုက လော့ရွှယ်မဟာမိတ်အဖွဲ့မှ နုတ်ထွက်ကြောင်း ကြေညာခဲ့သည်။ ထို့နောက် ရှီး မျိုးနွယ်စုကလည်း နုတ်ထွက်ကြောင်း ကြေညာခဲ့ပြန်သည်။

တိုတောင်းလှသော အချိန်အတွင်းမှာပင် လော့ရွှယ်မဟာမိတ်အဖွဲ့အတွင်းမှ သူတော်စင်တစ်ပိုင်း (၇) ဦး၊ (၈) ဦးခန့်မှာ မဟာမိတ်အဖွဲ့မှ နုတ်ထွက်ကြောင်း ကြေညာကာ ဖန့်မျိုးနွယ်စုဘက်မှ ရပ်တည်ခဲ့ကြသည်။

ဤလုပ်ရပ်ကြောင့် လော့ရွှယ်မဟာမိတ်အဖွဲ့အတွင်း၌ ပရမ်းပတာများ ဖြစ်ပေါ်ခဲ့ပြီး စစ်မြေပြင်အချို့တွင်လည်း အကြီးအကျယ် ရှုံးနိမ့်မှုများနှင့် ရင်ဆိုင်ခဲ့ရသည်။ အဘယ်ကြောင့်ဆိုသော် ထိုသူတော်စင်တစ်ပိုင်း မျိုးနွယ်စုဝင်များသည် လော့ရွှယ်မဟာမိတ်အဖွဲ့၏ အဓိက အင်အားစုများ ဖြစ်ကြသောကြောင့်ပင်။

သူတို့၏ ရွေးချယ်မှုမှာ သက်ရောက်မှု အလွန်ကြီးမားလှသည်။

လော့ရွှယ်မဟာမိတ်အဖွဲ့မှာ ဖြစ်ပေါ်လာသော ရှုပ်ထွေးမှုများကို နှိမ်နင်းရန် နှစ်ပေါင်းများစွာ အချိန်ယူခဲ့ရပြီး အခြားသော သူတော်စင်များ၏ အကူအညီကို ရယူပြီးမှသာ မီးနတဘုရားမျိုးနွယ်စု နှင့် တိုက်ပွဲကို ဟန်ချက်ညီအောင် ထိန်းထားနိုင်ခဲ့သည်။

ထို့နောက်တွင် လော့ရွှယ်မဟာမိတ်အဖွဲ့သည် ထိုသဘောတူညီချက်မပါဘဲ နုတ်ထွက်သွားသော သူတော်စင်တစ်ပိုင်း မျိုးနွယ်စုအားလုံးကို ဖမ်းဝရမ်းထုတ်ကာ စစ်ကြေညာခဲ့သည်။

သို့သော် ထိုမျိုးနွယ်စုများသည် မိမိတို့၏ အင်အားကို ထိန်းသိမ်းရန် ရွေးချယ်ခဲ့ကြပြီး အများစုမှာ အတွင်းအာရုံနယ်မြေ များထဲသို့ ဝင်ရောက်ပုန်းအောင်းကာ အပြင်သို့ ထွက်မလာတော့ဘဲ လော့ရွှယ်မဟာမိတ်အဖွဲ့နှင့် ထိပ်တိုက်ရင်ဆိုင်ခြင်းကို ရှောင်ရှားခဲ့ကြသည်။

'ထူးဆန်းလိုက်တာ၊ သူတို့က ဘာလို့ (၁၀) နှစ်အကြာမှာမှ လော့ရွှယ်မဟာမိတ်အဖွဲ့ကနေ နုတ်ထွက်ဖို့ သဘောတူခဲ့ကြတာလဲ ဒီကြားထဲမှာ သူတို့က ဘယ်လို သတင်းအချက်အလက်မျိုး ရခဲ့လို့ ဒီလို ဆုံးဖြတ်ချက်ကို ချခဲ့ကြတာလဲ '

ဖန့်ချန်သည် အပြင်လောကမှ သတင်းအချက်အလက်များကို စုဆောင်းကာ အကြောင်းအရာများ၏ အဆက်အစပ်ကို ဖော်ထုတ်ရန် ကြိုးစားသော်လည်း အဓိကကျသော သတင်းအချက်အလက်များ လိုအပ်နေသဖြင့် အကြောင်းရင်းကို ခန့်မှန်း၍ မရနိုင်ဘဲ ရှိနေသည်။

'ဝမ်အိုကြီးလည်း ဝမ်မျိုးနွယ်စုရဲ့ အတွင်းအာရုံနယ်မြေထဲမှာ ပုန်းနေလောက်ပြီ။ ဒါမှမဟုတ်ရင် သူ့ကို ခေါ်ပြီး စကားပြောကြည့်ရင် တစ်ခုခု သိရကောင်း သိရနိုင်တယ်'

ဖန့်ချန် စဉ်းစားနေမိသည်။

"ဘိုးဘေးကြီး... ဒီနေ့ ကျင့်ကြံဖို့ အချိန်ရောက်ပါပြီ"

ဖန့်တိန်၏ အသံ ထွက်ပေါ်လာသည်။

မိမိ၏ ကျင့်စဉ်အဆင့်ကို အဆင့် ၅ အထွတ်အထိပ်သို့ မြှင့်တင်ထားပြီးသော ဖန့်ချန်သည် ထိုစကားကို ကြားသောအခါ ချက်ချင်းပင် ထရပ်လိုက်ပြီး ကိုယ်လက်အကြောဆန့်ကာ ဖန့်တိန်နောက်မှ လိုက်၍ သူတော်စင်မျှော်စင် ဆီသို့ လျှောက်လှမ်းခဲ့သည်။

'တကယ်လို့ ဒီနေရာမှာသာ အဆင့် ၆ မသေမျိုးဆေးပင် ကို ရှာတွေ့နိုင်ရင်... ငါ့ရဲ့ အခြေခံအင်အားနဲ့ဆိုရင် အဆင့် ၆ ကို တက်လှမ်းဖို့ လုံလောက်နေပြီ...

ရှေးဟောင်းမသေမျိုး အဆင့်အတန်း အတွက်လည်း ငါ့မှာ ရှိနေပြီးသားပဲ၊ အဆင့် ၇ မသေမျိုးဆေးပင်နဲ့သာ ပေါင်းစပ်လိုက်ရင် ရှေးဟောင်းမသေမျိုးအဆင့်ကို တက်လှမ်းနိုင်လိမ့်မယ်...'

ဖန့်ချန် ရင်ထဲ၌ ခံစားချက်အချို့ ဖြစ်ပေါ်နေမိသည်။

ဤနေရာတွင် နေထိုင်ခဲ့သည့် (၁၀) နှစ်ကျော်အတွင်း ရရှိခဲ့သည့် တိုးတက်မှုမှာ မြောက်လေတောင်တန်း တွင် နှစ်ပေါင်း (၂၀၀) နေခဲ့ရသည်ထက် များစွာ သာလွန်နေသည်။

ဤနေရာရှိ သူတော်စင်မျှော်စင် မှာ ကျင့်ကြံသူများအတွက် အထူးမြတ်ဆုံးသော နေရာတစ်ခုဖြစ်သလို၊ ဖန့်ချန်၏ ကျင့်ကြံနည်းနှင့်လည်း အလွန်ပင် ကိုက်ညီလှသည်။ အလွန်တိုတောင်းသော အချိန်အတွင်းမှာပင် မသေမျိုးစွမ်းအားများကို ကုန်ခမ်းစေပြီး ပြန်လည် ပြည့်တင်းလာသောအခါတွင် မသေမျိုးစွမ်းအားကို ပိုမိုအစွမ်းထက်လာစေသည်။

ယခုအခါ သူသည် ဖန့်တိန်ကို ဓားမသေမျိုးလမ်းစဉ် အတွက် အဆင့် ၆ နှင့် အဆင့် ၇ မသေမျိုးဆေးပင်များကို ကူညီရှာဖွေပေးရန် ပြောထားပြီး ဖြစ်သည်။

အကယ်၍ သတင်းကောင်းသာ ရခဲ့လျှင်... သူ ဤ သမိုင်းဝင်မသေမျိုးမှတ်တမ်းကျမ်း ထဲမှ ထွက်ခွာသွားချိန်တွင် သူ၏ အစွမ်းမှာ ကောင်းကင်နှင့် မြေကြီးကဲ့သို့ ပြောင်းလဲသွားလိမ့်မည်ဟု သူ ခံစားနေရသည်...