အခန်း (၄၁၇-၄၁၈)

အခန်း (၄၁၇) - မြေကမ္ဘာ ပလူတိုကို ဖိနှိပ်ခြင်း(၁)

ရွှီး၊

မြေကမ္ဘာ မြေအောက်ကမ္ဘာဘုရင်၏ အမည်းရောင် မိစ္ဆာလှံတံသည် လေဟာနယ် မှန်အတွင်းသို့ ပျောက်ကွယ်သွားပြီး လှိုင်းဂယက်တစ်ခုမျှပင် မဖြစ်ပေါ်ခဲ့ပေ။

“မျှော်လင့်ထားတဲ့အတိုင်း အစွမ်းထက်တာပဲ၊ မဟာ ဧကရာဇ်ရဲ့ ဉာဏ်အလင်းရ လက်နက်နဲ့ တကယ်ကို ထိုက်တန်တယ်၊”

ဝူယွမ်က သူ၏ ရင်ဘတ်ပေါ်ရှိ အဖိုးတန် မှန်ကို ကြည့်ကာ ပို၍ ကျေနပ်လာခဲ့သည်။

လေဟာနယ်မှန်၏ စွမ်းရည်မှာ ယုံကြည်နိုင်စရာမရှိလောက်အောင် အံ့မခန်း ဖြစ်လွန်းလှသည်။ အနည်းဆုံးတော့ လက်ရှိ လောကတွင် ၎င်းသည် အခြား ဝိညာဉ်ရတနာများကို ဖိနှိပ်နိုင်စွမ်းရှိသော နတ်ဘုရားရတနာတစ်ခု ဖြစ်သည်။

မြေကမ္ဘာ မြေအောက်ကမ္ဘာဘုရင်၏ တိုက်ခိုက်မှုက လေဟာနယ်မှန်ထံမှ ကြီးမားသော တုံ့ပြန်မှုကိုပင် မဖြစ်ပေါ်စေခဲ့ခြင်းက လေဟာနယ် မှန်သည် မြေကမ္ဘာ မြေအောက်ကမ္ဘာဘုရင်၏ စွမ်းရည်ထက် များစွာ ကျော်လွန်သော တိုက်ခိုက်မှုများကို ခံနိုင်ရည်ရှိကြောင်း သက်သေပြနေသည်။

“ငါ့ရဲ့ ရတနာက မင်းကို အထိအခိုက် မဖြစ်စေနိုင်ဘူး၊ နာခံမှုရှိရှိနဲ့ ငါ့ရဲ့ စွမ်းအင်ပါ၀ါဘဏ် ဖြစ်လာလိုက်စမ်း”

ဝူယွမ်က မီးတောက် အမျိုးမျိုး၏ လောင်ကျွမ်းခြင်းကို ခံနေရသော မြေကမ္ဘာ မြေအောက်ကမ္ဘာဘုရင်ကို ကြည့်ကာ ကြောက်မက်ဖွယ်ကောင်းအောင် ရယ်မောလိုက်သည်။

မြေကမ္ဘာ မြေအောက်ကမ္ဘာဘုရင်သည် ဝူယွမ်က သူ၏ အစွမ်းထက်သော မိစ္ဆာလှံတံ တိုက်ခိုက်မှုကို လုံးဝ အထိအခိုက်မရှိ ခံနိုင်ရည်ရှိသည်ကို မြင်သောအခါ သူက ဝူယွမ်ကို ဘီလူးတစ်ကောင်ပမာ ကြည့်လိုက်ပြီး သူ၏ စိတ်နှလုံးထဲတွင် အကူအညီမဲ့မှုနှင့် မျှော်လင့်ချက်မဲ့မှု ခံစားချက်များ တဖြည်းဖြည်း မြင့်တက်လာခဲ့သည်။

ဤလူသား လူငယ်လေးကို သူ လုံးဝ အထင်သေးခဲ့မိသည်။ ပြိုင်ဘက်က ကောင်းကင်ပြာနဂါးဘုရင် ချင်းကျီထက်ပင် ပိုမို ကြောက်မက်ဖွယ်ကောင်းပေလိမ့်မည်။

ဤအချိန်တွင် အခြားတစ်ဖက်၌ ချင်းကျီနှင့် မိုလော့တို့ကို တစ်ယောက်တည်း ရင်ဆိုင်နေရသော ကောင်းကင် မြေအောက်ကမ္ဘာဘုရင်မှာ သူ၏လောက်တော့ အခြေအနေ မဆိုးရွားပေ။ သို့သော်လည်း သူသည် လုံးဝ ခုခံနိုင်စွမ်း မရှိခဲ့ပေ။

သူ၏ တိုက်ခိုက်မှုများကို ပြိုင်ဘက်က ဝါးမျိုသွားခဲ့သည်။ သူ မည်သို့ တိုက်ခိုက်ရတော့မည်နည်း။

မြေကမ္ဘာ မြေအောက်ကမ္ဘာဘုရင်သည် ထွက်ပြေးရန် အကြံတစ်ခု ချက်ချင်း ရသွားလေသည်။

သူသည် သူ့ခေါင်းအထက်ရှိ ငရဲ မီးတောင်ကြီးဆီသို့ ပြေးဝင်သွားပြီး တောင်ကြီး၏ ဖိနှိပ်မှုကို ချိုးဖောက်ကာ လေဟာနယ်ကို ဆုတ်ဖြဲ၍ ထွက်ပြေးရန် ကြိုးပမ်းလေသည်။

“မင်း ထွက်သွားလို့ မရဘူး” ဝူယွမ်က တောင်ထိပ်သို့ ပျံသန်းသွားပြီး သူ၏ အစွမ်းကုန် ရုပ်ပိုင်းဆိုင်ရာ ခွန်အားကို ထုတ်လွှတ်ကာ ရူးသွပ်စွာ ဖိနှိပ်လိုက်သည်။

ကျွိ

ဝူယွင်သည် နေမင်းတစ်စင်းအဖြစ် ပြောင်းလဲသွားပြီး နယ်မြေအတွင်းသို့ ပြေးဝင်သွားလေသည်။ ၎င်းသည် အစွမ်းအထက်ဆုံး မီးတောက် စွမ်းအား ဖြစ်နှင့်ပြီးဖြစ်ကာ နယ်မြေအတွင်းသို့ ဝင်ရောက်သွားသောအခါ မီးတောက်များကိုလည်း မကြောက်သကဲ့သို့ ဖန်ထျန်း အစီအရင်ကိုလည်း မကြောက်ပေ။ ယင်းအစား ၎င်းသည် ဤနေရာရှိ အစီအရင်ကို ပိုမို အစွမ်းထက်လာစေရန် ၎င်း၏ စွမ်းအားကို အသုံးပြုနိုင်သည်။

ပိုမို ပြင်းထန်သော မီးတောက်များ ပြန့်ကျဲလောင်ကျွမ်းလာပြီး အလွန်တရာ ကြမ်းတမ်းလှသည်။ မြေကမ္ဘာ မြေအောက်ကမ္ဘာဘုရင်၏ ခန္ဓာကိုယ်ပေါ်ရှိ ကမ္ဘာခြားနတ်ဆိုးစွမ်းအင်များ အဆက်မပြတ် သုံးစွဲခံနေရသည်။ ကောင်းကင်နှင့် မြေကြီး၏ တွန်းကန်မှုကို ခံရသဖြင့် သူသည် ကောင်းကင်နှင့် မြေကြီး ယွမ်စွမ်းအင်များကို မစုစည်းနိုင်တော့ဘဲ သူ၏ ခန္ဓာကိုယ်အတွင်းရှိ ကမ္ဘာခြားနတ်ဆိုးစွမ်းအင်များကိုသာ အဆက်မပြတ် ထုတ်လွှတ်နေရသည်။ ဧရာမ အမည်းရောင် လက်ကြီးတစ်ခုက ဝူယွင်ကို ဖမ်းဆုပ်လိုက်ပြီး ၎င်းကို ဆုတ်ဖြဲရန် ကြိုးပမ်းလေသည်။

သို့သော်လည်း ဝူယွင်၏ ကြောက်မက်ဖွယ်ကောင်းသော မီးတောက်များက သူ၏ အမည်းရောင် လက်ကို တိုက်ရိုက် လောင်ကျွမ်းသွားစေခဲ့သည်။

မြေကမ္ဘာ မြေအောက်ကမ္ဘာဘုရင်မှာ မျှော်လင့်ချက်မဲ့နေသော အခြေအနေသို့ ရောက်ရှိနေပြီဖြစ်ပြီး သူ၏ နောက်ဆုံး ထွက်သက်တွင် ရုန်းကန်နေရုံသာ ရှိတော့သည်။

အခြားတစ်ဖက်တွင် ချင်းကျီနှင့် မိုလော့တို့သည်လည်း ကောင်းကင် မြေအောက်ကမ္ဘာဘုရင်နှင့် အသည်းအသန် ရင်ဆိုင်နေရသည်။

ကောင်းကင် မြေအောက်ကမ္ဘာဘုရင်မှာ မြေကမ္ဘာ မြေအောက်ကမ္ဘာဘုရင်ထက် ပိုမို အစွမ်းထက်ပြီး သူတို့နှစ်ဦး၏ အစွမ်းထက်သော တိုက်ခိုက်မှုအောက်တွင်ပင် အဆက်မပြတ် တန်ပြန်တိုက်ခိုက်နေကြောင်း တွေ့မြင်နိုင်သည်။

သူတို့ထဲတွင် အသက်သာဆုံး သူများမှာ လင်းတုန်၊ ယင်းရွှမ်ဇီနှင့် အခြားသူများ ဖြစ်ကြသည်။ အဘယ်ကြောင့်ဆိုသော် သူတို့၏ အရေအတွက် အားသာချက်ကြောင့် ဤနတ်ဆိုးဗိုလ်ချုပ်များမှာ အပြည့်အဝ ဖိနှိပ်ခံထားရပြီး ရိုက်နှက်ခံနေရသောကြောင့် ဖြစ်သည်။

သူတို့၏ ဘုရင်များက ရန်သူများကို အလျင်အမြန် ဖြေရှင်းပြီး သူတို့ကို လာရောက် ကယ်တင်မည်ဟု မျှော်လင့်နေကြသည်။

သို့သော်လည်း သူတို့၏ ဘုရင်များမှာ သူတို့ကိုယ်သူတို့ ကာကွယ်ရန်ပင် ရုန်းကန်နေရလေပြီ။

သူတို့ ဘာအကူအညီမှ မပေးနိုင်တော့ပေ။

လွတ်လပ်သော တိုက်ခိုက်ရေးသမားအဖြစ် ဆောင်ရွက်နေသော လင်းတုန်သည် ဝူယွမ် ပေးထားသော ဝါးမျိုခြင်းအလောင်းကောင်ကို ယူဆောင်လာပြီး ၎င်းကို ဝါးမျိုခြင်းစွမ်းအားဖြင့် ထိန်းချုပ်ထားသည်။ ဝါးမျိုခြင်းအလောင်းကောင်၏ ခန္ဓာကိုယ်မှာ အလွန်တရာ ကြံ့ခိုင်မာကျောလှသည်။ အတိတ်က ၎င်းသည် ဝါးမျိုခြင်းသခင်ကြီးနှင့်အတူ ရှိနေစဉ် ဘုရင်အဆင့် ကမ္ဘာခြားနတ်ဆိုးများ၏ တိုက်ခိုက်မှုများကိုပင် ခံနိုင်ရည်ရှိခဲ့သည်။ ဤဗိုလ်ချုပ်အဆင့် ကမ္ဘာခြားနတ်ဆိုးများကို ကိုင်တွယ်ဖြေရှင်းရာတွင် ၎င်းသည် ထိုနေရာတွင် ရပ်ကာ အထိုးခံလျှင်ပင် ပြဿနာမရှိပေ။

လင်းတုန် ကိုယ်တိုင်ကလည်း မသေနိုင်သော ပိုးဟပ်တစ်ကောင် ဖြစ်သည်။ သူ၏ ဘုရင်ခန္ဓာကိုယ်မှာ ဝင်စားခြင်းအဆင့်နှင့် အပြည့်အဝ ယှဉ်ပြိုင်နိုင်စွမ်း ရှိသည်။

ဝါးမျိုခြင်း အလောင်းကောင်ကို ယူဆောင်လာကာ သူသည် အခြားသူများနှင့် နတ်ဆိုးဗိုလ်ချုပ်များကြား တိုက်ပွဲများအတွင်းသို့ အတင်းအကျပ် ဝင်ရောက်သွားပြီး ပြိုင်ဘက်၏ တိုက်ခိုက်မှုများကို ရင်ဆိုင်ကာ ထိပ်တိုက် တွေ့ဆုံပြီး ပြိုင်ဘက်ကို အားနည်းသွားစေရန် အနီးကပ်တိုက်ပွဲများကို အသုံးပြုခဲ့သည်။ ထို့နောက် သူသည် သူတို့ကို ဖိနှိပ်ရန် မိုးကြိုးဘိုးဘေးအဆောင်နှင့် ဝါးမျိုခြင်းဘိုးဘေးအဆောင်၏ စွမ်းအားကို အသုံးပြုခဲ့သည်။

သူတို့ကို ရှေးဟောင်းကျောက်တိုင်က ဖွင့်လှစ်ထားသော လေဟာနယ်တံခါးဆီသို့ ခေါ်ဆောင်လာပြီး ချီရှင်းထံ လွှဲပြောင်းပေးကာ ကောင်းကင်ပိတ်လှောင် အစီအရင် မြေပုံဖြင့် ချိတ်ပိတ်ပြီးနောက် ရှေးဟောင်းကျောက်တိုင်အတွင်းသို့ ပို့ဆောင်လိုက်သည်။

ထိုနေရာတွင် ဟွမ်နှင့် ဟွမ်ယွမ်တို့က သူတို့ကို ကမ္ဘာသစ်ပင်အောက်ရှိ လှောင်ချိုင့်အတွင်း၌ အကျဉ်းချထားလေသည်။

ကမ္ဘာသစ်ပင်အောက်ရှိ မြေအောက်အကျဉ်းထောင်တွင် ကမ္ဘာခြားနတ်ဆိုး အများအပြားကို ဖမ်းဆီးထားသည်။ ဤကမ္ဘာခြားနတ်ဆိုးများ ထွက်ပြေးမည်ကို စိုးရိမ်စရာမလိုပေ။ အဘယ်ကြောင့်ဆိုသော် ရှေးဟောင်းကျောက်တိုင် ကမ္ဘာတစ်ခုလုံး၏ စွမ်းအားက သူတို့ကို ဖိနှိပ်ထားသောကြောင့်ပင်။

ထို့အပြင် ကမ္ဘာသစ်ပင်၏ အမြစ်များက သံကြိုးများအဖြစ် ပြောင်းလဲသွားပြီး ဤကမ္ဘာခြားနတ်ဆိုးများ၏ ခန္ဓာကိုယ်များကို ယှက်နွှယ်ကာ သူတို့၏ စွမ်းအားများကို အဆက်မပြတ်စုပ်ယူနေသည်။

ဤကဲ့သို့သော အခြေအနေမျိုးတွင် မြေအောက်အကျဉ်းထောင်၌ အကျဉ်းချခံထားရသော ဤကမ္ဘာခြားနတ်ဆိုးများသည် နောက်ဆုံးတွင် ကမ္ဘာသစ်ပင်အတွက် အာဟာရသက်သက်သာ ဖြစ်လာပေလိမ့်မည်။

နတ်ဆိုးဗိုလ်ချုပ် တစ်ကောင်ကို ဖြေရှင်းပြီးနောက် ဝင်စားခြင်းအဆင့် အစွမ်းထက်ပုဂ္ဂိုလ်တစ်ဦး လွတ်မြောက်လာမည်ဖြစ်ပြီး ထို့နောက် လင်းတုန်နောက်သို့ လိုက်ကာ နောက်တစ်ကောင်ကို ဖိနှိပ်နိုင်သည်။

ထို့ကြောင့် သူတို့ဘက်ရှိ ဖိအားများမှာ တဖြည်းဖြည်း သေးငယ်လာခဲ့သည်။

လင်းတုန်သည် အခြားသူများကိုကူညီရင်း ဤလုပ်ငန်းစဉ်ကို ထပ်ခါတလဲလဲ လုပ်ဆောင်ကာ ဗိုလ်ချုပ်အဆင့် ကမ္ဘာခြားနတ်ဆိုးခြောက်ကောင်ကို တစ်ကောင်ပြီး တစ်ကောင် ဖြေရှင်းခဲ့သည်။

ဤအချိန်တွင် ကမ္ဘာခြားနတ်ဆိုးဘုရင် နှစ်ကောင်မှာ တောင့်ခံထားရန် ရုန်းကန်နေရဆဲပင်။

သူတို့၏ စွမ်းအားမှာ နတ်ဆိုးဗိုလ်ချုပ် တစ်ကောင်ထက် အဆတစ်ရာ ပိုများသည်။ သူတို့၏ ခန္ဓာကိုယ်များအတွင်း၌ ကျယ်ပြောလှသော လေဟာနယ် တစ်ခု ရှိပြီး ကမ္ဘာခြားနတ်ဆိုးစွမ်းအင် အမြောက်အမြားကို သိုလှောင်ထားသဖြင့် သူတို့ကို အလွန် ခံနိုင်ရည်ရှိစေသည်။ ၎င်းမှာ ကမ္ဘာခြားနတ်ဆိုးဘုရင် အများစုသည် ရှေးဟောင်း ဖိနှိပ်မှုမှ ယခုအချိန်အထိ အသက်ရှင်ကျန်ရစ်နိုင်ခဲ့သည့် အကြောင်းရင်းလည်း ဖြစ်သည်။ သူတို့သည် အစွမ်းထက်သော ကမ္ဘာခြားနတ်ဆိုးစွမ်းအင်ကို ပိုင်ဆိုင်ထားကြသည်။

“ဒီတစ်ကောင်ကို အရင် ဖြေရှင်းကြစို့”

ဝူယွမ်က လင်းတုန်ကို လှမ်းအော်လိုက်သည်။

ကောင်းကင် မြေအောက်ကမ္ဘာဘုရင်မှာ ပို၍ပင် ကြောက်မက်ဖွယ်ကောင်းပြီး သူ့ကို ကိုင်တွယ်ဖြေရှင်းရန် ခက်ခဲလိမ့်မည်ဖြစ်သည်။ သို့သော် မြေကမ္ဘာ မြေအောက်ကမ္ဘာဘုရင်မှာမူ ရှုံးနိမ့်နေသော တိုက်ပွဲတစ်ခုကို ဆင်နွှဲနေရပြီ ဖြစ်သည်။

လင်းတုန်သည် ဘိုးဘေးအဆောင် နှစ်ခုနှင့် ဝါးမျိုခြင်း အလောင်းကောင်ကို ယူဆောင်လာပြီး ချီရှင်းကလည်း ရှေးဟောင်းကျောက်တိုင်ကို ယူဆောင်လာသည်။

“ကောင်းကင်ပိတ်လှောင် အစီအရင် မြေပုံ၊ သူ့ရဲ့ ရှင်သန်နိုင်တဲ့ နေရာကို ကျုံ့ပစ်လိုက်၊ ဘိုးဘေးအဆောင်တွေ၊ သူ့ကို ဖိနှိပ်၊ ဟွမ်ယွမ်၊ သူ့ကို ဆွဲသွင်းလိုက်”

ဝူယွမ်က အမိန့်ပေးလိုက်သည်။

လူတိုင်း လှုပ်ရှားလိုက်ကြသည်။ ချီရှင်းသည် ကောင်းကင်ပိတ်လှောင် အစီအရင် မြေပုံဖြင့် ငရဲ မီးတောင်ကြီးကို လွှမ်းခြုံလိုက်ပြီး ဖန်ထျန်းမီးဖိုကိုပါ ထည့်သွင်းကာ ငရဲ မီးတောင်ကြီးနှင့် ဖန်ထျန်းမီးဖိုကြားရှိ လေဟာနယ်ကို အဆက်မပြတ် ဖိသိပ်လိုက်ပြီး မြေကမ္ဘာ မြေအောက်ကမ္ဘာဘုရင်ကို ဖန်ထျန်းမီးဖိုအတွင်းသို့ တွန်းသွင်းရန် ရည်ရွယ်လိုက်သည်။

မြေကမ္ဘာ မြေအောက်ကမ္ဘာဘုရင်က ရူးသွပ်စွာ ခုခံလေသည်။ သူ၏ ထူးဆန်းပြီး အေးစက်သော မိစ္ဆာ စွမ်းအင်များက လေဟာနယ် တစ်ခုလုံးကို ပြည့်နှက်သွားပြီး ဝူယွမ်၏ မီးတောက်များနှင့် တိုက်ခိုက်နေသည်။

ရွှီး၊ ရွှီး၊ ရွှီး... လင်းတုန်က မိုးကြိုးဘိုးဘေးအဆောင်နှင့် ဝါးမျိုခြင်းဘိုးဘေးအဆောင်ကို ဆင့်ခေါ်လိုက်သည်။

ဝါးမျိုခြင်းဘိုးဘေးအဆောင်က ရှေးဟောင်းကျောက်တိုင်ပေါ်တွင် ကပ်တွယ်သွားပြီး ဧရာမ အမည်းရောင် လေဝဲကတော့ကြီးတစ်ခုအဖြစ် ပြောင်းလဲသွားကာ မြေကမ္ဘာ မြေအောက်ကမ္ဘာဘုရင်အနီးသို့ ချဉ်းကပ်လာသည်။ ဧရာမ ရေစုပ်စက်ကြီးတစ်ခုပမာ မြေကမ္ဘာ မြေအောက်ကမ္ဘာဘုရင်၏ မိစ္ဆာ စွမ်းအင်များကို ရူးသွပ်စွာ ဝါးမျိုပြီး ရှေးဟောင်းကျောက်တိုင် ကမ္ဘာအတွင်းသို့ ဆွဲသွင်းသွားလေသည်။

တစ်ချိန်တည်းမှာပင် မိုးကြိုးဘိုးဘေးအဆောင်က လျှပ်စီးသံကြိုး အများအပြားကို ဆန့်ထုတ်လိုက်ပြီး မြေကမ္ဘာ မြေအောက်ကမ္ဘာဘုရင်ကို ရစ်ပတ်ကာ သူ၏ ခန္ဓာကိုယ်အတွင်းသို့ပင် ထိုးဖောက်ဝင်ရောက်သွားကြသည်။

“အား... မင်းတို့ ရွံစရာကောင်းတဲ့ လူသားတွေ၊ မင်းတို့ အားလုံး အသေဆိုးနဲ့ သေရမယ်”

မြေကမ္ဘာ မြေအောက်ကမ္ဘာဘုရင်က ဟိန်းဟောက်လိုက်ရာ သူ၏ အသံမှာ အလွန်တရာ စူးရှနေသည်။ သူသည် အဆုံးအစမဲ့ နာကျင်မှုကို ခံစားနေရသည်။ လျှပ်စီး၏ စွမ်းအားက သူ၏ အသက်စွမ်းအင်ကို တိုက်စားနေပြီး သူ၏ စွမ်းအားများကို လျင်မြန်စွာ အားနည်းသွားစေသည်။

အခန်း (၄၁၈) - မြေကမ္ဘာ ပလူတိုကို ဖိနှိပ်ခြင်း(၂)

“အထွတ်အထိပ် အခြေအနေမှာ ရှိနေတဲ့ ဘုရင်အဆင့် ကမ္ဘာခြားနတ်ဆိုး ဆိုတဲ့အတိုင်းပဲ၊ တကယ်ကို ခံနိုင်ရည်ရှိတာပဲ”

ဝူယွမ် သက်ပြင်းမချဘဲ မနေနိုင်တော့ပေ။ နည်းလမ်းပေါင်းစုံ၏ ဖိနှိပ်မှုအောက်တွင် မြေကမ္ဘာ မြေအောက်ကမ္ဘာဘုရင်မှာ အသက်စွမ်းအင်များ အပြည့်အဝ ရှိနေဆဲပင်။ ဤစွမ်းအင်ဘဏ်တွင် စွမ်းအားများ အရမ်းများလွန်းလှသည်။

“သူ့ကို ဓားချက် အနည်းငယ်လောက် ခုတ်လိုက်ဦးမယ်”

“ကစဉ်ကလျားထိန်းချုပ်ခြင်း ဓားအတတ်”

ဝူယွမ်က သူ၏ မူလစိတ်ဝိညာဉ် စွမ်းအားကို အသက်သွင်းလိုက်ရာ ၎င်းတို့က မူလစိတ်ဝိညာဉ် ဓားသန္ဓေသားများအဖြစ် ပြောင်းလဲသွားပြီး မြေကမ္ဘာ မြေအောက်ကမ္ဘာဘုရင်၏ ခေါင်းအတွင်းသို့ ပစ်လွှတ်ဝင်ရောက်သွားလေသည်။

သူ၏ လက်ရှိ မူလစိတ်ဝိညာဉ် စွမ်းအားမှာ သံသရာအဆင့်တွင် ရှိသူများကိုသာ ခြိမ်းခြောက်နိုင်စွမ်း ရှိသည်။ သံသရာအဆင့်နှင့် နှိုင်းယှဉ်နိုင်သော မြေကမ္ဘာ မြေအောက်ကမ္ဘာဘုရင်ကဲ့သို့ အစွမ်းထက်ပုဂ္ဂိုလ်တစ်ဦးကို မူလစိတ်ဝိညာဉ် ဓားသန္ဓေသားများဖြင့် သတ်ရန်မှာ ခက်ခဲလှသည်။ အဘယ်ကြောင့်ဆိုသော် သူတို့၏ မူလစိတ်ဝိညာဉ်များမှာ သံသရာကပ်ဘေးကို ကျော်ဖြတ်ပြီးဖြစ်ကာ ငြိမ်းသတ်ရန် ခက်ခဲသောကြောင့် ဖြစ်သည်။

သို့သော်လည်း သူ့ကို မသတ်နိုင်သော်လည်း ကစဉ်ကလျားထိန်းချုပ်ခြင်း ဓားအတတ်က ထုတ်လွှတ်လိုက်သော မူလစိတ်ဝိညာဉ် ဓားသန္ဓေသားများမှာ သူ၏ မူလစိတ်ဝိညာဉ်ကို တုန်လှုပ်သွားစေရန် လုံလောက်ပြီး သူ၏ မူလစိတ်ဝိညာဉ်သို့ အတော်လေး ကြီးမားသော စိတ်ပိုင်းဆိုင်ရာ မုန်တိုင်းတစ်ခုကို ယူဆောင်လာပေးသည်။

ဝူယွမ်၏ နှောင့်ယှက်မှုအောက်တွင် မြေကမ္ဘာ မြေအောက်ကမ္ဘာဘုရင်၏ ခုခံမှုမှာ ကစဉ်ကလျား ဖြစ်သွားပြီး တဖြည်းဖြည်း အားနည်းလာခဲ့သည်။

ဤအခွင့်အရေးနှင့်အတူ လင်းတုန်၊ ချီရှင်း၊ ဝူယွင်၊ ဟွမ်နှင့် ဟွမ်ယွမ်တို့က ပူးပေါင်းကာ ဖိနှိပ်၊ ချိတ်ပိတ်ပြီး ဆွဲယူလိုက်ကြရာ နောက်ဆုံးတွင် မြေကမ္ဘာ မြေအောက်ကမ္ဘာဘုရင်ကို ရှေးဟောင်းကျောက်တိုင် ကမ္ဘာအတွင်းသို့ ဆွဲသွင်းသွားနိုင်ခဲ့သည်။

ရှေးဟောင်းကျောက်တိုင် ကမ္ဘာအတွင်းသို့ ဝင်ရောက်လာသောအခါ သူတို့သည် ဝူယွမ်နှင့် သူတို့၏ အိမ်ကွင်းသို့ ရောက်ရှိလာကြသည်။

ဤနေရာတွင် ရှေးဟောင်းကျောက်တိုင် ကမ္ဘာသည် ကမ္ဘာတစ်ခု၏ သန္ဓေသားပုံစံ ရှိနေပြီဖြစ်ပြီး ဟွမ်နှင့် ဟွမ်ယွမ်တို့မှာ ဤကမ္ဘာ၏ အသိစိတ်များ ဖြစ်ကြသဖြင့် သူတို့သည် ရှေးဟောင်းကျောက်တိုင် ကမ္ဘာ၏ သဘာဝ စွမ်းအားများကို ထိန်းချုပ်နိုင်ပြီး ကောင်းကင်နှင့် မြေကြီး၏ ဖိအားကို အသုံးပြုကာ မြေကမ္ဘာ မြေအောက်ကမ္ဘာဘုရင်ကို ဖိနှိပ်နိုင်သည်။

ကောင်းကင်နှင့် မြေကြီး၏ စွမ်းအားမှာ ကမ္ဘာကြီး တစ်ခုလုံး၏ စွမ်းအား ဖိအားပင် ဖြစ်သည်။ မင်းက ဒီကမ္ဘာကြီးကို မှောက်လှန်ပစ်နိုင်လောက်အောင် အစွမ်းထက်နေမှလွဲရင် မင်းက ဖိနှိပ်ခံရဖို့ပဲ ရှိတော့တယ်။

မြေကမ္ဘာ မြေအောက်ကမ္ဘာဘုရင်တွင် ရှေးဟောင်းကျောက်တိုင် ကမ္ဘာကို တုန်လှုပ်စေနိုင်သော စွမ်းအား ရှိသော်လည်း ကံမကောင်းစွာဖြင့် ရှေးဟောင်းကျောက်တိုင် ကမ္ဘာမှာ တစ်ယောက်တည်း တိုက်ခိုက်နေခြင်း မဟုတ်ဘဲ ဝူယွမ်၊ လင်းတုန်နှင့် အခြားသူများလည်း ထိုနေရာတွင် ရှိနေကြသည်။

ကောင်းကင်ပိတ်လှောင် အစီအရင် မြေပုံ၊ ဝါးမျိုခြင်းဘိုးဘေးအဆောင်နှင့် မိုးကြိုးဘိုးဘေးအဆောင်တို့၏ ဖိနှိပ်မှုအောက်တွင် မြေကမ္ဘာ မြေအောက်ကမ္ဘာဘုရင်မှာ မလိုလားမှုနှင့် ဒေါသတကြီး အော်ဟစ်သံများကြားတွင် မြေအောက်အကျဉ်းထောင်အတွင်းသို့သာ ဖိနှိပ်ခံလိုက်ရလေသည်။

ကမ္ဘာသစ်ပင်၏ အမြစ်များက သံကြိုးများအဖြစ် ပြောင်းလဲသွားပြီး ကောင်းကင်ပိတ်လှောင် အစီအရင် မြေပုံ၊ ဘိုးဘေးအဆောင်များနှင့်အတူ သူ့ကို ဖိနှိပ်ထားကြသည်။

“ဟွမ်ယွမ်နဲ့ တခြားသူတွေ မြေကမ္ဘာ မြေအောက်ကမ္ဘာဘုရင်ကို ဖိနှိပ်ဖို့ ကူညီပေးဖို့ ကောင်းကင်ပိတ်လှောင် အစီအရင် မြေပုံကို ဒီမှာ အရင် ထားခဲ့လိုက်၊ သူ့ရဲ့ စွမ်းအင် အများစု ကုန်ခမ်းသွားပြီး မခုခံနိုင်တော့တဲ့ အချိန်ကျမှ အဲဒါကို ပြန်ထုတ်ယူကြတာပေါ့” ဝူယွမ်က ညွှန်ကြားလိုက်သည်။

သူတို့၏ နေ့စဉ်ဘဝတွင် ကောင်းကင်ပိတ်လှောင် အစီအရင် မြေပုံကို အသုံးပြုရသည့် အကြိမ်က ရှားပါးလှသည်။

“သွားကြစို့၊ အခု အပြင်ထွက်ပြီး ကောင်းကင် မြေအောက်ကမ္ဘာဘုရင်ကို ကိုင်တွယ်ဖို့ ချင်းကျီနဲ့ တခြားသူတွေကို ကူညီကြမယ်”

အချိန်က ကပ်နေပြီဖြစ်သည်။ မြေကမ္ဘာ မြေအောက်ကမ္ဘာဘုရင်ကို ဖိနှိပ်ပြီးနောက် ဝူယွမ်နှင့် အခြားသူများက ချက်ချင်း ပြေးထွက်လာကြပြီး ကောင်းကင် မြေအောက်ကမ္ဘာဘုရင်ကိုပါ ဖိနှိပ်ရန် ပြင်ဆင်လိုက်ကြသည်။

အပြင်ဘက်တွင် စစ်မြေပြင်ကို အဆက်မပြတ် စောင့်ကြည့်နေခဲ့သော ကောင်းကင် မြေအောက်ကမ္ဘာဘုရင်၏ မျက်နှာမှာ ပို၍ပို၍ မှုန်ကုပ်လာခဲ့သည်။

နတ်ဆိုးဗိုလ်ချုပ် ခြောက်ကောင်မှာ ဆက်တိုက် ဖိနှိပ်ခံလိုက်ရသော်လည်း သူ ဘာမှမတတ်နိုင်ခဲ့ပေ။ ချင်းကျီ တစ်ယောက်တည်းကို ကိုင်တွယ်ဖြေရှင်းရခြင်းကပင် အတော်လေး ခက်ခဲနေပြီဖြစ်ပြီး မီးတောက် ဘိုးဘေးအဆောင်ကို ပိုင်ဆိုင်ထားသော မိုလော့ပါ ရှိနေသဖြင့် သူ၏ အခြား လက်အောက်ခံများကို ကူညီရန် အချိန်မရနိုင်ခဲ့ပေ။

သူသည် သူ၏ ညီငယ် မြေကမ္ဘာ မြေအောက်ကမ္ဘာဘုရင်အပေါ် မျှော်လင့်ချက်ထားခဲ့သည်။ မြေကမ္ဘာ မြေအောက်ကမ္ဘာဘုရင်ကသာ ဝူယွမ်နှင့် အခြားသူများကို လျင်မြန်စွာ သတ်ဖြတ်နိုင်ပါက သူတို့သည် အခြေအနေကို ပြောင်းလဲနိုင်ပြီး မီးတောက်မြို့တော်ရှိ လူတိုင်းကို သုတ်သင်ပစ်နိုင်ပေလိမ့်မည်။

သို့သော်လည်း မြေကမ္ဘာ မြေအောက်ကမ္ဘာဘုရင်သည် သူ့ရှေ့ရှိ ပြိုင်ဘက်ကြောင့် ရှုံးနိမ့်ကာ ဖိနှိပ်ခံလိုက်ရမည်ကိုတေယ့ သူ တစ်ခါမှ မမျှော်လင့်ထားခဲ့ပေ။

သူ တစ်ယောက်တည်းသာ ကျန်တော့ပြီး အခြေအနေမှာ ကယ်တင်၍မရနိုင်တော့ကြောင်း မြင်သောအခါ ကောင်းကင် မြေအောက်ကမ္ဘာဘုရင်သည် ထွက်ပြေးရန် ချက်ချင်း တွေးတောလိုက်လေသည်။

“ချင်းကျီ၊ အရမ်း မာနမကြီးနဲ့”

“ငါ့ရဲ့ သန့်ရှင်းသော မျိုးနွယ်စု ပြန်လာလိမ့်မယ်”

ကောင်းကင် မြေအောက်ကမ္ဘာဘုရင်က ဟိန်းဟောက်လိုက်ရာ သူ၏ မျက်နှာမှာ ပုံမှန်မဟုတ်လောက်အောင် လိမ်ကောက်သွားပြီး သူ၏ မျက်လုံးများထဲတွင် အဆုံးအစမဲ့ ကြမ်းကြုတ်မှုများ ဆူပွက်လာသည်။ နောက်တစ်ခဏတွင် သူက သွားများကို ပြင်းပြင်းထန်ထန် ကြိတ်လိုက်ပြီး သူ၏ လက်ဟန်သင်္ကေတများ ရုတ်တရက် ပြောင်းလဲသွားကာ သိပ်သည်းသော ခရမ်းရွှေရောင်မိစ္ဆာပုံစံများက အလွန်တရာ ကြမ်းတမ်းသော စွမ်းအင်လှိုင်းတစ်ခုနှင့်အတူ သူ၏ ခန္ဓာကိုယ် မျက်နှာပြင်ပေါ်တွင် ရုတ်တရက် ပေါ်လာသည်။

၎င်းကို မြင်သောအခါ ချင်းကျီနှင့် မိုလော့တို့၏ မျက်နှာအမူအရာများ ပြောင်းလဲသွားကြပြီး သူတို့ အလျင်အမြန် နောက်ဆုတ်သွားကြသည်။

“ဝုန်း”

ကောင်းကင် မြေအောက်ကမ္ဘာဘုရင်၏ ခန္ဓာကိုယ်က ရုတ်တရက် ပေါက်ကွဲသွားလေသည်။ ထိုအခိုက်အတန့်တွင် ကြောက်မက်ဖွယ်ကောင်းသော မိစ္ဆာစွမ်းအင်များက ဧရာမလှိုင်းလုံးကြီးတစ်ခုကို တိုက်ရိုက် ဖန်တီးလိုက်ပြီး ရူးသွပ်စွာ ပြန့်ကျဲထွက်ပေါ်လာသည်။ မိစ္ဆာလှိုင်းလုံး ဖြတ်သန်းသွားသော နေရာတိုင်းတွင် လေဟာနယ် လုံးဝ ကြေမွပျက်စီးသွားလေသည်။

ကောင်းကင် မြေအောက်ကမ္ဘာဘုရင်သည် ကိုယ့်ကိုယ်ကို ဖောက်ခွဲပစ်လိုက်ခြင်း ဖြစ်သည်။

မိုလော့၏ မီးတောက် ဘိုးဘေးအဆောင်သည် ပေတစ်သောင်းခန့်ရှိသော ဖီးနစ် အရိပ်တစ်ခုအဖြစ် ပြောင်းလဲသွားပြီး သူတို့၏ ရှေ့တွင် ပိတ်ဆို့ထားကာ ဆူပွက်လာသော မိစ္ဆာလှိုင်းလုံးကို လောင်ကျွမ်း အငွေ့ပျံသွားစေခဲ့သည်။

မိစ္ဆာလှိုင်းလုံးကြီး ရိုက်ခတ်သွားသည်နှင့်အမျှ ကောင်းကင် မြေအောက်ကမ္ဘာဘုရင် ကိုယ့်ကိုယ်ကိုယ် ဖောက်ခွဲလိုက်သော နေရာတွင် အမည်းရောင် စွမ်းအင်များ စုစည်းလာပြီး ခရမ်းရွှေရောင် အလင်းပုံစံများဖြင့် စိမ့်ဝင်နေသော အမည်းရောင် နှလုံးသားတစ်ခုကို ဖန်တီးလိုက်သည်။

ဤနှလုံးသား ပေါ်လာသည်နှင့်တစ်ပြိုင်နက် ထွက်ပြေးရန် ကြိုးစားလေသည်။

“ဒီလှည့်ကွက် ထပ်လာပြန်ပြီ၊ သူ ထွက်ပြေးချင်နေတာပဲ”

ချင်းကျီက အေးစက်စွာ နှာခေါင်းရှုံ့လိုက်ပြီး အစိမ်းရောင် အလင်း အရိပ်တစ်ခုအဖြစ် ပြောင်းလဲကာ လေဟာနယ်ကို ဖြတ်သန်းသွားပြီး ကောင်းကင် မြေအောက်ကမ္ဘာဘုရင်၏ နှလုံးသားရှေ့တွင် အမှန်တကယ် ပိတ်ဆို့လိုက်လေသည်။

“ကောင်းကင် မြေအောက်ကမ္ဘာဘုရင်၊ ငါ မင်းတို့ ကမ္ဘာခြားနတ်ဆိုးတွေနဲ့ ရင်ဆိုင်ခဲ့ရတာ ရေတွက်လို့တောင် မရတော့ဘူး၊ ဒီလို လှည့်ကွက်တွေက ငါ့ကို လှည့်စားလို့ မရဘူး”

ချင်းကျီ၏ ကြည်လင်ပြတ်သားသော ရယ်မောသံက ပြန့်ကျဲသွားလေသည်။ သူသည် ဤအချိန်တွင် အလွန်တရာ ကောင်းမွန်သော စိတ်အခြေအနေတွင် ရှိနေသည်။ ဝူယွမ်သည် သူ့ကို တကယ်ပင် ကြီးမားသော အံ့အားသင့်မှုတစ်ခု ပေးစွမ်းခဲ့ပြီး မြေကမ္ဘာ မြေအောက်ကမ္ဘာဘုရင်ကဲ့သို့ ဘုရင်အဆင့် ကမ္ဘာခြားနတ်ဆိုး တစ်ကောင်ကိုပင် အနိုင်ယူနိုင်ခဲ့သည်။

ယခု သူသည် အမှန်တကယ်ပင် နောက်ကျကျန်နေခဲ့ပြီဖြစ်သည်။

“သေစမ်း”

ချင်းကျီက ဟိန်းဟောက်လိုက်ရာ အစိမ်းရောင်အလင်းတန်းများ ဆူပွက်ထွက်ပေါ်လာပြီး နဂါးလက်သည်းတစ်ခုအဖြစ် ပြောင်းလဲသွားကာ ကောင်းကင် မြေအောက်ကမ္ဘာဘုရင်၏ နှလုံးသားဆီသို့ လှမ်းဆွဲလိုက်လေသည်။

ခရမ်းရွှေရောင်အလင်းပုံစံများဖြင့် ဖုံးလွှမ်းနေသော အမည်းရောင် နှလုံးသားမှာ လျင်မြန်စွာ ခုန်နေသည်။ ကောင်းကင် မြေအောက်ကမ္ဘာဘုရင်၏ မျက်နှာက နှလုံးသားပေါ်တွင် ပေါ်လာပြီး သူက ဒေါသတကြီး အော်ဟစ်လိုက်သည်။

“ချင်းကျီ၊ ငါ့မျိုးနွယ်စုရဲ့ ဘုရင်အဆင့် သက်ရှိတစ်ခုကို မင်း သတ်ရဲတယ်ပေါ့လေ၊ ထာဝရ ပြန်မထနိုင်တော့မှာကို မင်း မကြောက်ဘူးလား”

“ငါ ဒီမိစ္ဆာသန္ဓေသားကို သတ်လိုက်ရင် မင်း လုံးဝသုတ်သင်ခံရလိမ့်မယ်၊ အဲဒီအချိန်ကျရင် ငါ ပြန်ထလာမလား မလာဘူးလားဆိုတာ မင်း မြင်နိုင်တော့မှာ မဟုတ်ဘူးလေ၊ ဟုတ်တယ်မလား”

ချင်းကျီက ခပ်ဖျော့ဖျော့ ပြုံးလိုက်ရာ သူ၏ ချောမောခံ့ညားသော မျက်နှာမှာ လုံးဝ ကြောက်ရွံ့မှု ကင်းမဲ့နေသည်။ သူ၏ ရှေ့ရှိ လေဟာနယ်မှ အစိမ်းရောင် အလင်း လှိုင်းဂယက်များ တက်လာပြီး သူ၏ နဂါးလက်သည်းက လေပြေပမာ လျင်မြန်စွာ တိုက်ခိုက်လိုက်လေသည်။

“ဒီအရှင်သခင်က အဲဒီလောက်လွယ်လွယ်နဲ့ မသေပါဘူး”

ကောင်းကင် မြေအောက်ကမ္ဘာဘုရင်က ထွက်ပြေးဖို့ရာ အစွမ်းကုန်ကြိုးစားလိုက်သည်။ သူ၏ နှလုံးသားက လေဟာနယ်အတွင်းသို့ ထိုးဆင်းသွားပြီး နဂါးလက်သည်းကို ရှောင်တိမ်းကာ မူလနေရာမှ ပျောက်ကွယ်သွားလေသည်။

ချင်းကျီ၏ မျက်လုံးများမှာ အေးတိအေးစက် ဖြစ်နေသည်။ သူ နောက်ထပ် ခြေတစ်လှမ်း တိုးလိုက်ရာ အစိမ်းရောင် အလင်းတန်းများ သူ၏ ခန္ဓာကိုယ်မှ ပြန့်ကျဲထွက်ပေါ်လာသည်။ တောက်ပပြီး သိပ်သည်းသော ကောင်းကင်ပြာနဂါး အလင်းပုံစံများ ပျံတက်သွားပြီး ကျန်းတစ်ထောင်ခန့် ဧရာမ ကောင်းကင်ပြာနဂါး လက်သည်းကြီးတစ်ခုအဖြစ် တိုက်ရိုက် ပြောင်းလဲသွားလေသည်။

ရှေ့ရှိ လေဟာနယ်မှာ ကြေမွပျက်စီးသွားပြီး ကောင်းကင် မြေအောက်ကမ္ဘာဘုရင်၏ နှလုံးသား ပြန်လည်ပေါ်လာသည်။ သေမင်း၏ အရိပ်တစ်ခုပမာ ကျန်းတစ်ထောင်ခန့် နဂါးလက်သည်းကြီးက မိစ္ဆာ သန္ဓေသားကို လွှမ်းခြုံသွားလေသည်။

“ချင်းကျီ၊ ဒီနေ့သာ ငါ မသေခဲ့ရင် အနာဂတ်မှာ မင်းကို ငါ သေချာပေါက် သုတ်သင်ပစ်မယ်”

ကောင်းကင် မြေအောက်ကမ္ဘာဘုရင်မှာ အလွန်တရာ ထိတ်လန့်သွားလေသည်။ မိစ္ဆာသန္ဓေသားထံမှ ကောင်းကင် မြေအောက်ကမ္ဘာဘုရင်၏ ဒေါသတကြီး ကျိန်ဆဲသံများ ပဲ့တင်ထပ်လာသည်။

သိပ်သည်းသော မိစ္ဆာ စွမ်းအင်များ အလျင်အမြန် ဆူပွက်လာပြီး သူ၏ နောက်ကျောရှိ လေဟာနယ်ကလည်း လျင်မြန်စွာ လိမ်ကောက်သွားလေသည်။ သို့သော်လည်း လေဟာနယ် လမ်းကြောင်း ပုံသဏ္ဌာန် ပေါ်လာလုနီးပါး အချိန်မှာပင် ဖျက်ဆီးပစ်နိုင်လောက်သော စွမ်းအားများ ပြည့်နှက်နေသည့် ကောင်းကင်ပြာနဂါးလက်သည်းက လေဟာနယ်ကို ထိုးဖောက်သွားနှင့်ပြီဖြစ်သည်။