အခန်း (၄၁၃-၄၁၄)

အခန်း (၄၁၃) - ကောင်းကင် ပလူတို၊ မြေကမ္ဘာ ပလူတို(၁)

မီးတောက်မြို့တော်ရှိ လူများမှာ တစ်ယောက်ပြီး တစ်ယောက် မျက်နှာအမူအရာများ ပြောင်းလဲသွားကြသည်။ အဆုံးအစမဲ့မှန်မှာ ကွဲအက်သွားပြီး ကောင်းကင်ယံတွင် အမည်မသိ သတ္တဝါတစ်ကောင် ရုတ်တရက် ပေါ်လာသည်။

မူလက ပွဲကြည့်နေကြသော သူတို့သည် ယခုအခါ ကြောက်ရွံ့မှုကို ခံစားလိုက်ရသည်။

လေဟာနယ်ကို ဖောက်ထွက်လာသော ထူးဆန်းသည့် သတ္တဝါတွင် သူတို့နှင့် သဟဇာတမဖြစ်ဘဲ အပြန်အလှန် တွန်းကန်နေသော အရှိန်အဝါတစ်ခု ရှိနေသည်။

ထိုမျှမက ကောင်းကင်နှင့် မြေကြီး ယွမ်စွမ်းအင်ကပင် ထိုထူးဆန်းသော သတ္တဝါကို တွန်းကန်နေသည်။

ဤကောင်းကင်နှင့် မြေကြီး ယွမ်ချီမှာ ကျင့်ကြံခြင်း၏ အခြေခံအုတ်မြစ်ဖြစ်ပြီး သူတို့၏ ခန္ဓာကိုယ်များ အနှစ်သက်ဆုံး စွမ်းအင်ဖြစ်ကြောင်း သိထားရမည်ဖြစ်သည်။ သို့သော်လည်း ဤထူးဆန်းသော သတ္တဝါ ပေါ်လာသောအခါ ၎င်းကို အမှန်တကယ်ပင် တွန်းကန်ခဲ့သည်။

ဖြစ်နိုင်ချေ တစ်ခုတည်းသာ ရှိသည်။

‘အဲ့တာက... ဒီကမ္ဘာက သတ္တဝါ မဟုတ်ဘူး'

“ဒါက ဘယ်လို မိစ္ဆာကောင်မျိုးလဲ”

“သူ့ရဲ့ အရှိန်အဝါက အရမ်း အစွမ်းထက်တယ်၊ မာရ်နန်းတော်ရဲ့ နန်းတော်သခင်နဲ့တောင် ရင်ပေါင်တန်းနိုင်တယ်”

“အသစ်ရောက်လာတဲ့သူက မကောင်းတဲ့ နိမိတ်တစ်ခုသယ်‌ဆောင်ထားတာပဲ”

“ဒီကောင်က အဲဒီ လျှို့ဝှက်ဆန်းကြယ်တဲ့ လူနဲ့ တူညီတဲ့ ထူးဆန်းတဲ့ အမည်းရောင် စွမ်းအင်ကို ပိုင်ဆိုင်ထားပုံရတယ်”

မီးတောက်မြို့တော်ရှိ လူများက ဤအစွမ်းထက်ပြီး ထူးဆန်းသော သတ္တဝါကို ရှောင်ရှားရင်း ရူးသွပ်စွာ နောက်ဆုတ်သွားကြသည်။

တစ်ချိန်တည်းမှာပင် အနီရင့်ရောင် စစ်တပ်တစ်ခု အောက်ဘက်တွင် ပေါ်လာသည်။ မီးနတ်ဘုရား အစောင့်အရှောက်များက အခက်အခဲများရှိနေသော်လည်း ရှေ့သို့ တက်လာကာ အထက်ရှိ ထူးဆန်းသော သတ္တဝါကို ရင်ဆိုင်ရန် ပြင်ဆင်နေပုံရသည်။

“မီးနတ်ဘုရား အစောင့်အရှောက်တွေ” အနီရောင် သံချပ်ကာကို ဝတ်ဆင်ထားပြီး ဖီးနစ်လှံတံကို ကိုင်ဆောင်ထားသော ထန်ရှင်းလျန်၏ မျက်နှာအမူအရာမှာ အေးစက်နေပြီး သူမက ရုတ်တရက် အေးစက်သော အော်သံတစ်ခုကို ထုတ်လွှတ်လိုက်သည်။

သူမ၏ အသံက မီးတောက်မြို့တော် တစ်ခုလုံးတွင် ပဲ့တင်ထပ်သွားပြီး အနီရင့်ရောင် သံချပ်ကာအထူကြီးများကို ဝတ်ဆင်ထားသော လူရိပ် တစ်ထောင်က လေထဲတွင် တစ်ပြိုင်နက်တည်း ပေါ်လာကြသည်။

သူတို့၏ လက်ထဲရှိ ဧရာမ လှံတံရှည်ကြီးများက ဖြည်းညင်းစွာ မြင့်တက်လာပြီး ထိုအခိုက်အတန့်တွင် မီးနတ်ဘုရား အစောင့်အရှောက်များ အားလုံး၏ အရှိန်အဝါများက ချိတ်ဆက်သွားသကဲ့သို့ ဖြစ်သွားကာ ရေတွက်၍မရနိုင်သော လူများကို ထိတ်လန့်မှုကြောင့် ဖြူရော်သွားစေသည့် ကြောက်မက်ဖွယ်ကောင်းသော စွမ်းအင်လှိုင်းတစ်ခု ပေါ်ထွက်လာသည်။

ဤအချိန်တွင် ဝူယွမ်၊ လင်းတုန်နှင့် အမည်းရောင်ဝတ်ရုံဖြင့် လွှမ်းခြုံထားသော တိယွမ်ဇီတို့ ကောင်းကင်ယံတွင် တိုက်ခိုက်နေကြသည်။

ဝူယွမ်သည် ယခုအခါ တောက်ပသော ခရမ်းရောင်အလင်းတန်းများ တဖျပ်ဖျပ်လက်နေသည့် မိုးကြိုးဝိညာဉ်ကောင်းကင်ဓားကို ကိုင်ဆောင်ထားပြီး လင်းတုန်က လျှပ်စီးများ တဖျပ်ဖျပ်လက်နေသည့် မိုးကြိုးဧကရာဇ် ရာဇလှံတံကို ကိုင်ဆောင်ထားသည်။

“မိုးကြိုးဧကရာဇ် ရတနာကျင့်စဉ်၊ မိုးကြိုးကပ်ဘေးဓား”

ဝူယွမ်က သူ၏ ရတနာကျင့်စဉ်ကို ထုတ်လွှတ်လိုက်သည်။ ရူန်းသင်္ကေတများက မိုးကြိုး ဝိညာဉ် ကောင်းကင်ဓားပေါ်တွင် ပေါ်လာပြီး ကောင်းကင်ကိုးထပ် နတ်ဘုရား မိုးကြိုးကို ဆွဲယူကာ မိုးကြိုးကန်တစ်ခု ဝူယွမ်၏ နောက်ကျောတွင် ပေါ်ထွက်လာသည်။

သူက မိုးကြိုးကန်ကို ထိန်းချုပ်ကာ မိုးကြိုးဓားကို ကိုင်ဆောင်၍ တိယွမ်ဇီကို ခုတ်ပိုင်းလိုက်သည်။

“မိုးကြိုးဧကရာဇ် ရာဇလှံတံ၊ နဂါးကိုးကောင် တိုက်ခိုက်ခြင်း” လင်းတုန်က ကျယ်လောင်စွာ အော်ဟစ်လိုက်သည်။ မိုးကြိုးဧကရာဇ် ရာဇလှံတံပေါ်ရှိ မိုးကြိုးနဂါး ကိုးကောင်က ပြေးထွက်လာပြီး တိယွမ်ဇီကို ရစ်ပတ်သွားကြသည်။

“မိစ္ဆာက မသေနိုင်ဘူး၊ မိစ္ဆာနတ်ဘုရားက ဆင်ကို ဝါးမျိုခြင်း”

တိယွမ်ဇီ၏ ခန္ဓာကိုယ် တစ်ခုလုံးရှိ ကမ္ဘာခြားနတ်ဆိုးစွမ်းအင်များက ဧရာမ အမည်းရောင် လေဝဲကတော့ကြီးတစ်ခုအဖြစ် ပြောင်းလဲသွားပြီး ခမ်းနားကြီးကျယ်လှသော ဧရာမမိစ္ဆာနတ်ဘုရား အရိပ်တစ်ခုက သူ၏ နောက်ကျောတွင် ပေါ်လာကာ ကောင်းကင်ယံကို ဖုံးလွှမ်းနေသော လျှပ်စီးများကို ပိတ်ဆို့လိုက်သည်။

ဤအချိန်တွင် ကောင်းကင်ယံရှိ အမည်းရောင် အက်ကွဲကြောင်းအတွင်းမှ အမည်းရောင် အလင်းတန်းတစ်ခု ရုတ်တရက် ပစ်လွှတ်ထွက်ပေါ်လာပြီးနောက် ဧရာမ အမည်းရောင် အလင်းလက်ကြီးတစ်ခုအဖြစ် ပြောင်းလဲကာ မြေကြီးပေါ်ရှိ လင်းတုန်ဆီသို့ လျှပ်စီးလက်သလို ဖမ်းဆုပ်လိုက်လေသည်။

၎င်းက တိယွမ်ဇီကို ကယ်တင်ရန် လာခြင်းဖြစ်ပုံရသည်။

“ဒါက မီးနတ်ဘုရားနန်းတော်ရဲ့ နယ်မြေပဲ၊ မင်းတို့ကောင်တွေမောက်မာဖို့ နေရာမဟုတ်ဘူး”

အနီရင့်ရောင် အလင်းတန်းတစ်ခုက ထန်ရှင်းလျန်၏ခန္ဓာကိုယ်မှ ရုတ်တရက် ပြန့်ကျဲထွက်ပေါ်လာပြီးနောက် သူမ၏နောက်ကျောတွင် ဖီးနစ်အတောင်ပံများအဖြစ် ထပ်မံပြောင်းလဲသွားလေသည်။

သူမ၏ နူးညံ့သောခန္ဓာကိုယ်က လှုပ်ရှားသွားပြီး မီးနတ်ဘုရားအစောင့်အရှောက်များ၏ ရှေ့ဆုံးသို့ တိုက်ရိုက်ရောက်ရှိသွားကာ ကျောက်စိမ်းလက်လေးက ဖီးနစ်လှံတံကို တင်းကျပ်စွာ ဆုပ်ကိုင်ထားပြီး သူမ၏ အေးစက်သော အော်သံက မြို့တော် တစ်ခုလုံးတွင် ပဲ့တင်ထပ်သွားလေသည်။

“မီးနတ်ဘုရား အစောင့်အရှောက်များ၊ စုစည်းကြ”

“ဟွာလာ”

ထန်ရှင်းလျန်၏ အမိန့်နှင့်အတူ တညီတညွတ်တည်း ထွက်ပေါ်လာသော အသံတစ်ခုပင်။

မီးနတ်ဘုရား အစောင့်အရှောက် တစ်ထောင်က တူညီသော သိုင်းပညာကို အသုံးပြုကာ ခမ်းနားကြီးကျယ်သော အနီရင့်ရောင် ယွမ်စွမ်းအင်များကို ထုတ်လွှတ်လိုက်ကြသည်။

ဤကျယ်ပြောလှသော စွမ်းအားကို ထန်ရှင်းလျန်က စုစည်းလိုက်ပြီး လေထဲတွင် ကျန်းတစ်ထောင်ခန့် ကြီးမားသော မီးဖီးနစ်ငှက်ကြီးတစ်ခုအဖြစ် ပြောင်းလဲသွားစေသည်။

ကောင်းကင်နှင့် နေမင်းကို ဖုံးလွှမ်းနေသော ဧရာမမီးဖီးနစ်ငှက်ကြီးက မီးတောက်မြို့တော်အထက်တွင် နေမင်းကြီးတစ်စင်းပမာ လွင့်မျောနေသည်။

ထန်ရှင်းလျန်၏ လှုပ်ရှားမှုနှင့်အတူ ဖီးနစ်ငှက်က ၎င်း၏အတောင်ပံများကို ဖြန့်လိုက်ရာ ကမ္ဘာကြီးတစ်ခုလုံး၏ အပူချိန်က မြင့်တက်လာပြီး ၎င်း၏ ပတ်ဝန်းကျင်ရှိ လေဟာနယ်ပင်လျှင် ပြင်းထန်သော တွန့်လိမ်မှုတစ်ခုကို ပြသလာသည်။

ထန်ရှင်းလျန်၏ ပုံရိပ်က ပျံသန်းသွားပြီး ကျန်းတစ်ထောင်ခန့် ကြီးမားသော ဖီးနစ်ငှက်ပေါ်သို့ ဆင်းသက်ကာ ဖီးနစ်လှံတံကိုကိုင်ရင်း ပြင်းပြင်းထန်ထန် ဆောင့်နင်းလိုက်သည်။

ဖီးနစ်ငှက်က ကောင်းကင်သို့မော့ကာ ကြည်လင်ပြတ်သားသော အော်သံတစ်ခုကို ထုတ်လွှတ်လိုက်ပြီး ၎င်း၏ ဧရာမပါးစပ်ကြီးထဲမှ အနီရင့်ရောင် မီးတောက်များက မီးတောက် ပင်လယ်ကြီးတစ်ခုပမာ ပြန့်ကျဲထွက်ပေါ်လာကာ နောက်ဆုံးတွင် အက်ကွဲကြောင်းအတွင်းမှ လေခွဲသံနှင့်အတူ ကျဆင်းလာသော ဧရာမအမည်းရောင်အလင်းလက်ကြီးနှင့် ပြင်းပြင်းထန်ထန် ဝင်တိုက်မိလေသည်။

ဝုန်း

ဖီးနစ်လှံတံက ပြေးဝင်သွားပြီး ကောင်းကင်ယံကို ဖုံးလွှမ်းနေသော မီးတောက်အလင်းရောင်များက အမည်းရောင်အလင်းတန်းကို ဝါးမျိုသွားလေသည်။

“မင်းတို့ ရောက်နေပြီဆိုမှတော့ ကိုယ်ထင်ပြလိုက်ကြ၊ အမှောင်ထဲမှာ ပုန်းနေတဲ့ မိစ္ဆာကောင်တွေ” ထန်ရှင်းလျန်က ဖီးနစ်ငှက်ပေါ်တွင် ရပ်ကာ အေးစက်စွာ ပြောလိုက်သည်။

ကျိ ကျိ ကျိ...

အက်ကွဲကြောင်းအတွင်းမှ အမည်းရောင် မြူခိုးများ ဆူပွက်လာပြီး စူးရှသော ရယ်မောသံတစ်ခု ထွက်ပေါ်လာသည်။

ရက်စက်သော အမည်းရောင် စွမ်းအင်များက ဒီရေလှိုင်းများပမာ ဆူပွက်ထွက်ပေါ်လာပြီးနောက် ကောင်းကင်ယံတွင် လျင်မြန်စွာ ကျုံ့ဝင်သွားကာ နောက်ဆုံးတွင် အမည်းရောင်အရိပ်တစ်ခုအဖြစ် ပြောင်းလဲလာသည်။

အမည်းရောင် အရိပ်၏ ကိုယ်ခန္ဓာမှာ လူသားတစ်ဦးထက် ပိုမိုတောင့်တင်းပြီး ၎င်း၏ နောက်ကျောတွင် ထက်မြက်သော အရိုးများ ဖုံးလွှမ်းနေသည့် မိစ္ဆာအတောင်ပံ တစ်စုံ ရှိနေသည်။

မိစ္ဆာအတောင်ပံများကို ဖြန့်လိုက်သောအခါ ကောင်းကင်ယံကပင် မှေးမှိန်သွားသကဲ့သို့ ဖြစ်သွားသည်။

ပြိုင်ဘက်တွင် လူသားနှင့်တူသော မျက်နှာသွင်ပြင် ရှိသော်လည်း သူ၏အရေပြားကို ရွှေရောင် မိစ္ဆာပုံစံများဖြင့် ဖုံးလွှမ်းထားကာ အလွန် ထူးဆန်းလှသည်။

သူ့နောက်ကျောရှိ မိစ္ဆာအတောင်ပံ တစ်စုံမှာ ပို၍ပင် ထူးခြားလှပြီး ရွှေရောင် ပုံစံများဖြင့် ထူထပ်စွာ ဖုံးလွှမ်းနေကာ သူတို့ လှုပ်ရှားလိုက်သောအခါ ကြောက်မက်ဖွယ်ကောင်းသော စွမ်းအင်လှိုင်းများကို ထုတ်လွှတ်နေသည်။

ဤအချိန်တွင် ဝူယွမ်နှင့် လင်းတုန်တို့သည် တိယွမ်ဇီကို ကိုင်တွယ်ဖြေရှင်းနေဆဲဖြစ်ပြီး သူ့ကို ရိုက်နှက်နေနှင့်ပြီဖြစ်သည်။

ထန်ရှင်းလျန် ဦးဆောင်သော မီးနတ်ဘုရား အစောင့်အရှောက် အများအပြားက ဝူယွမ်နှင့် အခြားသူများရှေ့တွင် ရပ်ကာ မိစ္ဆာ အတောင်ပံများပါရှိသော ဤကမ္ဘာခြားနတ်ဆိုးကို ပိတ်ဆို့ထားကြသည်။

“မင်းတို့လောက်နဲ့ ငါ့ကို တားနိုင်မယ်လို့ တကယ် ထင်နေတာလား” သူက မီးနတ်ဘုရား အစောင့်အရှောက်များကို အထင်သေးစွာ ကြည့်ကာ သူ၏ မျက်လုံးများထဲတွင် ကြမ်းကြုတ်မှုများ ဆူပွက်လာသည်။

သူက လေဟာနယ်ကို ဧရာမလက်ကြီးဖြင့် ဖမ်းဆုပ်လိုက်ရာ ခမ်းနားကြီးကျယ်သော ကမ္ဘာခြားနတ်ဆိုးစွမ်းအင်များ စုစည်းလာပြီး သူ့ရှေ့တွင် အမည်းရောင်လေဝဲကတော့တစ်ခုကို ဖန်တီးလိုက်သည်။

ထို့နောက် သူက အင်္ကျီလက်စကို ဝှေ့ယမ်းလိုက်ရာ လေဝဲကတော့က လျင်မြန်စွာ လည်ပတ်သွားပြီး မီးနတ်ဘုရားအစောင့်အရှောက်များဆီသို့ အံ့မခန်း စွမ်းအားဖြင့် ပြေးဝင်သွားလေသည်။

“ဗိုလ်ချုပ်အဆင့် ကမ္ဘာခြားနတ်ဆိုးလား”

“မင်း တစ်ယောက်တည်းလာတာလား၊ အဲဒါက မလုံလောက်လောက်ဘူး ထင်တယ်”

အိုမင်းပြီး အစွမ်းထက်သော အသံတစ်ခု ထွက်ပေါ်လာသည်။

အမည်းရောင်လေဝဲကတော့ ကျဆင်းလာသည်နှင့်အမျှ အနီရောင်ဝတ်ရုံနှင့် အကြီးအကဲတစ်ဦး မီးနတ်ဘုရားနန်းတော်မှ ပြေးထွက်လာသည်။

သူက ထန်ရှင်းလျန်၏ ရှေ့တွင် ရပ်ကာ သူ၏ လက်ဝါးဖြင့် တိုက်ခိုက်လိုက်ရာ ကျယ်ပြောလှသော ယွမ်စွမ်းအင်များ ဆူပွက်လာပြီး ရှင်သန်ခြင်းနှင့် သေဆုံးခြင်း စွမ်းအင်တို့ ပြီးပြည့်စုံစွာ ပေါင်းစပ်သွားကာ အမည်းရောင် လေဝဲကတော့ဆီသို့ ရိုက်ခတ်သွားသော လှိုင်းတံပိုးတစ်ခုအဖြစ် ပြောင်းလဲသွားလေသည်။

“ဒါ မီးနတ်ဘုရားနန်းတော်က အကြီးအကဲချီယွမ်ပဲ”

“သူကလည်း ဝင်စားခြင်းအဆင့် အစွမ်းထက်ပုဂ္ဂိုလ် တစ်ယောက်ပဲ”

“ဒီမိစ္ဆာကောင်က ငါ့ရဲ့ မီးတောက် နတ်သမီးလေးကို နာကျင်အောင် လုပ်လုနီးပါးပဲ၊ ကံကောင်းလို့ အကြီးအကဲချီယွမ် ရောက်လာတယ်”

အကြီးအကဲချီယွမ် ပေါ်လာသည်ကို မြင်သောအခါ လူတိုင်း သူတို့၏ နှလုံးသားများ တည်ငြိမ်သွားသည်ကို ခံစားလိုက်ရသည်။

သို့သော်လည်း ဗိုလ်ချုပ်အဆင့် ကမ္ဘာခြားနတ်ဆိုးမှာ ယုံကြည်နိုင်စရာမရှိလောက်အောင် အစွမ်းထက်လှပြီး အကြီးအကဲ ချီယွမ်နှင့် ချက်ချင်း တိုက်ခိုက်ကာ အနည်းငယ်မျှပင် အားနည်းမှုကို မပြသပေ။

ဤအရာက လူတိုင်းကို အလွန်တရာ အံ့အားသင့်သွားစေခဲ့သည်။

ရုတ်တရက် ပေါ်လာသော ဤမိစ္ဆာကောင်က ဤမျှလောက် အစွမ်းထက်သော စွမ်းအားကို ပိုင်ဆိုင်ထားခြင်းကို သူတို့ အလွန် အံ့အားသင့်နေကြကြောင်း ထင်ရှားလှသည်။

“ကျိ ကျိ ကျိ၊ မီးနတ်ဘုရားနန်းတော်က အခြေခံအုတ်မြစ်တချို့ ရှိသေးတာပဲ၊ ဒါပေမယ့် မင်းတို့ ငါတို့ကို ယတားနိုင်မလား”

နောက်ထပ် ရက်စက်ပြီး အေးစက်သော အသံတစ်ခု လေဟာနယ် အက်ကွဲကြောင်းမှ ထွက်ပေါ်လာပြီးနောက် ဧရာမအမည်းရောင် မိစ္ဆာအရိပ်များ တစ်ခုပြီး တစ်ခု ၎င်းအတွင်းမှ ထွက်ပေါ်လာသည်။

ခမ်းနားကြီးကျယ်သော အမည်းရောင်မြူခိုးများ ပြန့်ကျဲလာပြီး မိစ္ဆာအရိပ်အလွှာများ ဖြစ်ပေါ်လာကာ ဤအမည်းရောင်မြူခိုးများက စုစည်းသွားကြသည်။

တစ်စုံတစ်ယောက်က ရေတွက်လိုက်သည်။

“တစ်၊ နှစ်၊ သုံး၊ လေး၊ ငါး”

တိတိကျကျ မိစ္ဆာအရိပ်ငါးခု စုစည်းသွားပြီး သူတို့၏ တောင့်တင်းသော ပုံရိပ်များ ပေါ်လာသည်။

ယခင် မိစ္ဆာကောင်ကဲ့သို့ပင် သူတို့အားလုံးတွင် ရွှေရောင်ပုံစံများ ဖုံးလွှမ်းနေသော မိစ္ဆာအတောင်ပံများ နောက်ကျောမှ ဆန့်ထွက်နေကြပြီး တူညီသော သတ္တဝါအမျိုးအစား ဖြစ်ကြောင်း ထင်ရှားလှသည်။

“ဘုရားရေ၊ မိစ္ဆာကောင် ငါးကောင်”

“အရင် တိုက်နေတဲ့ နှစ်ကောင်နဲ့ ပေါင်းရင် ခုနစ်ကောင်ပဲ”

“တစ်ကောင်စီက ဝင်စားခြင်းအဆင့် အစွမ်းထက်ပုဂ္ဂိုလ်တစ်ယောက်နဲ့ နှိုင်းယှဉ်နိုင်တယ်၊ မီးနတ်ဘုရားနန်းတော်က ဒီလို စွမ်းအားမျိုးကို တောင့်ခံနိုင်ပါ့မလား”

“အရာရာ ပြောင်းလဲတော့မယ်”

လူတိုင်း၏ နှလုံးသားများ တုန်လှုပ်သွားကြသည်။

ဝင်စားခြင်းအဆင့် အထူးအစွမ်းထက်ပုဂ္ဂိုလ်များသည် ဤကစဉ်ကလျားမိစ္ဆာပင်လယ်တွင် အုပ်စိုးသူများ ဖြစ်လာရန် လုံလောက်ပေသည်။

မီးနတ်ဘုရားနန်းတော်တွင် ထိုကဲ့သို့သော အုပ်စိုးသူနှစ်ဦး ရှိနေခြင်းကပင် ကစဉ်ကလျားမိစ္ဆာပင်လယ်တွင် အစွမ်းအထက်ဆုံး အင်အားစု ဖြစ်နေပြီဖြစ်သည်။

အခန်း (၄၁၄) - ကောင်းကင် ပလူတို၊ မြေကမ္ဘာ ပလူတို(၂)

သို့သော်လည်း အမည်းရောင် မြူခိုးများဖြင့် ဖွဲ့စည်းထားသော ဤထူးဆန်းသည့် သတ္တဝါများက ဝင်စားခြင်းအဆင့်နှင့် နှိုင်းယှဉ်နိုင်သော အထူးအစွမ်းထက်ပုဂ္ဂိုလ် ခုနစ်ဦးကို တစ်ပြိုင်နက်တည်း အမှန်တကယ်ပင် ထုတ်ပြလာနိုင်ခဲ့သည်။

ဤမိစ္ဆာအရိပ် ငါးခု အတူတကွ ပေါ်လာသည်နှင့်အမျှ ရက်စက်သော အမည်းရောင် စွမ်းအင်များက ကောင်းကင်နှင့် နေမင်းကို ချက်ချင်း ဖုံးလွှမ်းသွားလေသည်။

ဤအချိန်တွင် ကောင်းကင်ယံရှိ ပူပြင်းလောင်ကျွမ်းနေသော နေမင်းကြီးပင် ၎င်း၏ မူလပြင်းထန်မှုကို ဆုံးရှုံးသွားသကဲ့သို့ ဖြစ်သွားပြီး မီးနတ်ဘုရားအစောင့်အရှောက်များကို ဦးဆောင်ကာ ထန်ရှင်းလျန် ဖန်တီးထားသော ကျန်းတစ်ထောင်ခန့် ကြီးမားသည့် မီးဖီးနစ်ငှက်ကြီးမှာ ယုံကြည်နိုင်စရာမရှိလောက်အောင် သေးငယ်နေပုံရသည်။

“ဗိုလ်ချုပ်အဆင့် ကမ္ဘာခြားနတ်ဆိုး ခြောက်ကောင်ရယ်၊ ဝင်စားခြင်းအဆင့် လူသားမိစ္ဆာ တစ်ကောင်ရယ်၊ ဟဲဟဲ၊ ကြည့်ရတာ မင်းတို့က ငါ့ရဲ့ မီးနတ်ဘုရားနန်းတော်ကို သုတ်သင်ပစ်ဖို့ ပြင်ဆင်လာကြတာပဲ”

အေးစက်သော ခပ်သဲ့သဲ့ရယ်မောသံတစ်ခု ထွက်ပေါ်လာပြီး ရေတွက်၍မရနိုင်သော အကြည့်များက ထိုနေရာသို့ လျင်မြန်စွာ ရောက်ရှိသွားကြသည်။

မီးနတ်ဘုရားနန်းတော်အထက်တွင် ဘယ်အချိန်ကတည်းမှန်း မသိ လူရိပ်တစ်ခု ပေါ်လာခဲ့သည်။

သူ၏ နဖူးတွင် မီးတောက် ရူန်းသင်္ကေတတစ်ခု တဖျပ်ဖျပ်လက်နေပြီး သူ စကားပြောနေစဉ် ရူန်းသင်္ကေတက တိတ်ဆိတ်စွာ လောင်ကျွမ်းနေကာ မီးတောင်ချော်ရည် မုန်တိုင်းတစ်ခုပမာ အလွန်တရာ ကြောက်မက်ဖွယ်ကောင်းပြီး ပူပြင်းလောင်ကျွမ်းနေသော အရှိန်အဝါကို ပန်းထုတ်ကာ ပြန့်ကျဲထွက်ပေါ်နေသည်။

ပေါက်ကွဲထွက်လာသော မီးတောက်စွမ်းအားက မှောင်မိုက်သော မိစ္ဆာစွမ်းအင်များကို ပိတ်ဆို့လိုက်သည်။

“ကျိ ကျိ၊ မိုလော့၊ မင်းဆီမှာ မီးတောက်ဘိုးဘေးအဆောင် ရှိနေရင်တောင် မင်းတစ်ယောက်တည်းနဲ့ ငါတို့ ငါးယောက်ကို တားနိုင်မှာ မဟုတ်ဘူး”

နတ်ဆိုးဗိုလ်ချုပ် တစ်ကောင်က ရက်စက်သော ရယ်မောသံဖြင့် ပြောလိုက်သည်။

“သေချာတာပေါ့၊ အဲဒါကြောင့် ငါ အကူအညီ ခေါ်လိုက်တာ” မိုလော့၏ မျက်နှာအမူအရာမှာ လေးနက်နေပြီး သူ့လေသံမှာ အနည်းငယ် မတည်မငြိမ် ဖြစ်နေသည်။

“မင်းတို့ရဲ့ အရေအတွက်က ငါ မျှော်လင့်ထားတာထက် တကယ်ကို ကျော်လွန်နေတယ်၊ အမှောင်ထဲက ကြွက်တွေ ဒီလောက်အများကြီး တစ်ပြိုင်နက်တည်း ထွက်လာလိမ့်မယ်လို့ ငါ မထင်ထားခဲ့ဘူး”

“ဒါပေမယ့် မင်းတို့ ငါးယောက်တည်းဆိုရင်တော့ ငါ့ရဲ့ မီးနတ်ဘုရားနန်းတော်ကို မင်းတို့ ဖျက်ဆီးနိုင်ဦးမယ်မထင်ဘူး”

ဤအချိန်တွင် လူရိပ် နှစ်ခု လေဟာနယ်မှ ထွက်ပေါ်လာပြီး မိုလော့၏ တစ်ဖက်တစ်ချက်စီတွင် ရပ်လိုက်ကြသည်။

“ဒါ မိစ္ဆာလေ လျှို့ဝှက်ဂူရဲ့ လျှို့ဝှက်ဂူသခင် ဝူရွှမ်ပဲ”

“မသေမျိုး မြင့်မြတ်သောဝေလငါး မျိုးနွယ်စုရဲ့ ဒုတိယမြောက် ဝေလငါးဘုရင် မုလန်ပဲ”

“ဒါဆို နန်းတော်သခင် မိုလော့က အစကတည်းက ပြင်ဆင်ထားတာကိုး”

“ဒီနေ့ ဝင်စားခြင်းအဆင့် အစွမ်းထက်ပုဂ္ဂိုလ်တွေ အများကြီး ပေါ်လာတာပဲ”

ပုံမှန်အားဖြင့် ဤအစွမ်းထက်ပုဂ္ဂိုလ်များသည် တံခါးပိတ်ကျင့်ကြံနေကြပြီး ဤအဆင့်ရှိ အစွမ်းထက်ပုဂ္ဂိုလ်များ လှုပ်ရှားရန် လိုအပ်သော အခွင့်အရေးများ ရှားပါးလှသည်။

သို့သော်လည်း ဤကဲ့သို့သော အစွမ်းထက်ပုဂ္ဂိုလ်များ စုဝေးလာသည့် အချိန်တိုင်း ၎င်းသည် သေချာပေါက် အသေးအဖွဲကိစ္စတစ်ခု ဖြစ်လိမ့်မည်မဟုတ်ပေ။

ဤထူးဆန်းသော သတ္တဝါများမှာ သူတို့ မသိရှိသော ကြီးမားသည့် လျှို့ဝှက်ချက်တစ်ခု ဖြစ်လောက်ပေသည်။

သို့သော်လည်း မီးနတ်ဘုရားနန်းတော်ဘက်တွင် အထူးအစွမ်းထက်ပုဂ္ဂိုလ် နှစ်ဦး ထပ်မံပေါ်လာသည်ကို မြင်သောအခါ လူတိုင်း အနည်းငယ် သက်သာရာရသွားကြသည်။

အထူးအစွမ်းထက်ပုဂ္ဂိုလ် နှစ်ဦးက နှစ်ကောင်ကို ပိတ်ဆို့ထားနိုင်ပြီး မီးတောက် ဘိုးဘေးအဆောင်ကို ပိုင်ဆိုင်ထားသော မိုလော့က သုံးကောင်ကို သေချာပေါက် ကိုင်တွယ်နိုင်ပေလိမ့်မည်။

“ဒါတွေက ကမ္ဘာခြားနတ်ဆိုးတွေလား” ဝူရွှမ်က ဤသတ္တဝါများကို စူးစမ်းလိုစိတ်ဖြင့် အကဲခတ်ကြည့်ရှုလိုက်သည်။ ဤကဲ့သို့သော သတ္တဝါများကို ရင်ဆိုင်ရခြင်းမှာ ပထမဆုံးအကြိမ် ဖြစ်သည်။

“ညီအစ်ကို ဝူရွှမ်၊ မစိုးရိမ်ပါနဲ့၊ ငါတို့က ဒီလောကရဲ့သခင်တွေပဲ”

“ဒီမှာ တိုက်ခိုက်တာက ကောင်းကင်နဲ့ မြေကြီးရဲ့ စွမ်းအင်တွေကို ငါတို့ စုစည်းနိုင်တယ်၊ ငါတို့ကို အားသာချက် ဖြစ်စေတယ်”

“တစ်ယောက်ချင်း တိုက်ရင် သူတို့ကို အနိုင်ယူဖို့ မခက်ပါဘူး၊”

မုလန်က သူ့ကို နှစ်သိမ့်ပေးလိုက်သည်။ ဤအရာများကို သူ တစ်ကြိမ်ထက်မက တိုက်ခိုက်ခဲ့ဖူးပုံရသည်။

“ကျိ ကျိ ကျိ၊ ဒီအကူအညီ နှစ်ယောက်ပဲ ရှိတယ်ဆိုရင် ဒီနေ့ မီးနတ်ဘုရားနန်းတော် ရှင်သန်ဖို့ အရမ်းခက်ခဲလိမ့်မယ်”

နတ်ဆိုးဗိုလ်ချုပ် ငါးကောင်က သူတို့ သုံးဦးကို အထင်သေးစွာ ကြည့်လိုက်ပြီး သူတို့အားလုံးက အောင်ပွဲခံသော အပြုံးများကို ပြသလိုက်ကြသည်။

“ဟဲဟဲ၊ မင်းတို့ ဘာကို ဒီလောက် ဂုဏ်ယူနေတာလဲဆိုတာ ငါသိပါတယ်”

“မင်းတို့ရဲ့ ဘုရင်လည်း ရောက်နေပြီမဟုတ်ဘူးလား”

“ဘုရင်အဆင့် ကမ္ဘာခြားနတ်ဆိုးတိုင်းရဲ့ လက်အောက်မှာ မဟာနတ်ဆိုးဗိုလ်ချုပ် သုံးကောင်ရှိတယ်”

“ဒီမှာ နတ်ဆိုးဗိုလ်ချုပ် ခြောက်ကောင် ရှိနေပြီဆိုတော့ မင်းတို့ရဲ့ဘုရင်လည်း သေချာပေါက်ရောက်နေမှာပဲ”

“ဘုရင်အဆင့် ကမ္ဘာခြားနတ်ဆိုး တစ်ကောင် လာတာလား၊ နှစ်ကောင်လား”

မိုလော့က လှောင်ပြုံးပြုံးကာ မည်းနက်သော လေဟာနယ် အက်ကွဲကြောင်းကို ကြည့်ပြီး ကျယ်လောင်စွာ ပြောလိုက်သည်။

“ရောက်နေပြီဆိုမှတော့ ကိုယ်ထင်ပြလိုက်တော့လေ”

မိုလော့ စိတ်တွင်းတွင်တော့ တံတွေးတစ်ချက် မျိုချလိုက်မိသည်။ ဤတစ်ကြိမ်တွင် သူ နည်းနည်း အလွန်အကျွံ ကစားမိသွားပြီဖြစ်သည်။

ဗိုလ်ချုပ်အဆင့် ကမ္ဘာခြားနတ်ဆိုး အချို့ သို့မဟုတ် ဘုရင်အဆင့် ကမ္ဘာခြားနတ်ဆိုး တစ်ကောင်လောက်ကို ဆွဲဆောင်နိုင်လျှင်ပင် လုံလောက်ပြီဟု သူ မူလက ထင်မှတ်ခဲ့ပြီး ဤမျှ များပြားလိမ့်မည်ဟု မထင်ထားခဲ့ပေ။

ယခု ပြိုင်ဘက်များက ဝူယွမ်နှင့် လင်းတုန်တို့ကို ပစ်မှတ်ထားနေပြီး သူတို့ကိုပါ ထည့်တွက်ထားပုံရသည်။

“ဝူယွမ်က ငါ့ကို စိတ်ပျက်မစေဘူးလို့ မျှော်လင့်ပါတယ်” သူက တီးတိုး ရေရွတ်လိုက်သည်။ ဤတစ်ကြိမ်တွင် သူသည် မီးနတ်ဘုရားနန်းတော် တစ်ခုလုံးကို လောင်းကြေးထပ်ထားခဲ့ခြင်းဖြစ်သည်။

“ဘုရင်အဆင့် ကမ္ဘာခြားနတ်ဆိုးလား”

“အဲဒါက ဘယ်လိုတည်ရှိမှုမျိုးလဲ”

“သူတို့က ဒီမိစ္ဆာတွေထက် ပိုပြီး အစွမ်းထက်လို့လား”

မိုလော့၏စကားများကြောင့် လူများ အံ့အားသင့်သွားကြပြီး ကမ္ဘာခြားနတ်ဆိုးများအကြောင်း အလွန် နည်းပါးစွာ သိရှိကြသဖြင့် မေးခွန်းများစွာ ထွက်ပေါ်လာကြသည်။

မိုလော့၏ဘေးရှိ ဝူရွှမ်သည်လည်း အနည်းငယ် တွေဝေသွားလေသည်။

“ဘုရင်အဆင့် ကမ္ဘာခြားနတ်ဆိုးတွေက ငါတို့ရဲ့ သံသရာအဆင့် အစွမ်းထက်ပုဂ္ဂိုလ်တွေနဲ့ နှိုင်းယှဉ်နိုင်တယ်” မုလန်က လေသံနိမ့်နိမ့်ဖြင့် ပြောလိုက်သည်။

“ကျိ ကျိ ကျိ...”

“တကယ်ကို မီးတောက် ဘိုးဘေးအဆောင်ရဲ့ ထိန်းချုပ်သူဂုဏ်ပုဒ်နဲ့ ထိုက်တန်တာပဲ”

“ကြည့်ရတာ ငါတို့ရဲ့ သန့်ရှင်းသော မျိုးနွယ်စုအကြောင်း မင်း တော်တော်များများ သိထားပုံရတယ်”

“အို၊ ဟုတ်သားပဲ၊ မင်းရဲ့ မိသားစုတစ်ခုလုံးကို ငါတို့ရဲ့ သန့်ရှင်းသော မျိုးနွယ်စုက သတ်ဖြတ်ခဲ့တာပဲ၊ မင်း လက်စားချေချင်စိတ် အရမ်းပြင်းပြနေမှာပဲ၊ ဒီနှစ်တွေတစ်လျှောက်လုံး ငါတို့ကို ရှာနေခဲ့လောက်တယ်”

“ဒါပေမယ့် နှမြောစရာပဲ၊ ငါတို့ကို ရှာတွေ့တော့ကော ဘာကောင်းမှာလဲ”

“အရင်တုန်းက မင်းကို ငါတို့ လွတ်မြောက်ခွင့်ပေးခဲ့ပေမယ့် ဒီတစ်ခါတော့ မင်းကို ထပ်လွှတ်ပေးမှာမဟုတ်တော့ဘူး”

မဟာနတ်ဆိုးဗိုလ်ချုပ် ငါးကောင်က ရက်စက်စွာ ရယ်မောလိုက်ကြပြီး မိုလော့ကို နည်းလမ်းမျိုးစုံဖြင့် လှောင်ပြောင်လိုက်ကြသည်။

သူတို့သည် ကောင်းကင်နှင့် မြေကြီး၏ သခင်များ ဖြစ်နေပြီဖြစ်သည့်အလား မိုလော့နှင့် အခြားသူများကို သနားခြင်း၊ လှောင်ပြောင်ခြင်းများဖြင့် ကြည့်နေကြသည်။

“ဘုရင် ရောက်လာပြီ”

မဟာ နတ်ဆိုးဗိုလ်ချုပ် ငါးကောင်က ရုတ်တရက် သူတို့၏ ခန္ဓာကိုယ်များကို နိမ့်ချလိုက်ပြီး ကောင်းကင်ယံရှိ ဧရာမအမည်းရောင်အက်ကွဲကြောင်းကြီးကို လေးစားစွာ ကြည့်လိုက်ကြသည်။

“မင်းတို့ ဘိုးဘေးအဆောင် ထိန်းချုပ်သူတွေက တကယ်ကို စိတ်အနှောင့်အယှက် ဖြစ်စရာကောင်းတာပဲ”

ခမ်းနားကြီးကျယ်ပြီး လွှမ်းမိုးနိုင်သော အသံတစ်ခုက ဧရာမအမည်းရောင်အက်ကွဲကြောင်းကြီးမှ ထွက်ပေါ်လာပြီးနောက် စေးပျစ်သော အမည်းရောင် မိစ္ဆာစွမ်းအင်များက ဒီရေလှိုင်းများပမာ ဆူပွက်ထွက်ပေါ်လာသည်။

အမည်းရောင် မိစ္ဆာစွမ်းအင်မှာ အရည်နီးပါး ဖြစ်နေပြီး ဤလောကနှင့် ထိတွေ့မိသည်နှင့် စူးရှသော မြည်သံများနှင့်အတူ ပေါက်ကွဲသွားလေသည်။

မူလက ကောင်းကင်နှင့် မြေကြီးကို ပြည့်နှက်နေသော ယွမ်စွမ်းအင်များမှာ ဤစေးပျစ်သော အမည်းရောင် မိစ္ဆာစွမ်းအင်များနှင့် ထိတွေ့မိသည်နှင့် လုံးဝ ပျောက်ကွယ်သွားလေသည်။

ကောင်းကင်နှင့် မြေကြီး၏ စွမ်းအားကပင် ၎င်းကို လမ်းဖယ်ပေးရလေသည်။

ကြောက်မက်ဖွယ်ကောင်းပြီး ဖော်ပြ၍မရနိုင်သော အရှိန်အဝါနှစ်ခု လေထုထဲတွင် စိမ့်ဝင်ပျံ့နှံ့လာသည်။

မီးတောက်မြို့တော်ရှိ လူများမှာ ကြီးမားလှသော ဖိအားကို ခံစားလိုက်ရသည်။ သူတို့ မော့ကြည့်လိုသော်လည်း အလွန်ခက်ခဲနေကြောင်း တွေ့ရှိရပြီး သူတို့၏ စိတ်နှလုံးထဲတွင် ကြောက်ရွံ့မှုများပင် ဖြစ်ပေါ်လာခဲ့သည်။

သူတို့၏ ခန္ဓာကိုယ်များမှာ ဗီဇအရ တုန်ယင်နေပြီး စိတ်ဓာတ် အားနည်းသူများဆိုလျှင် မြေပြင်ပေါ်တွင် ဝပ်တွားလိုစိတ်ပင် ဖြစ်ပေါ်လာခဲ့သည်။

မိစ္ဆာစွမ်းအားမှာ ယခင် ငါးကောင်ထက် များစွာ သာလွန်နေသည်။

‘ဒါက ဘုရင်အဆင့် ကမ္ဘာခြားနတ်ဆိုး ဆိုတာလား'

လူများ ထိတ်လန့်သွားကြသည်။

ကောင်းကင်ယံတွင် စေးပျစ်သော အမည်းရောင်စွမ်းအင်များက လူးလွန့်သွားပြီး ဧရာမ အမည်းရောင် ပလ္လင်ကြီး နှစ်ခုကို ဖန်တီးလိုက်သည်။

ပလ္လင်များ ပုံသဏ္ဌာန် ပေါ်လာသည်နှင့်အမျှ တစ်ခုစီတွင် လူရိပ်တစ်ခု ပေါ်လာသည်။

ပလ္လင်ပေါ်ရှိ လူရိပ် နှစ်ခုအနက် တစ်ခုမှာ ခရမ်းရောင် ဝတ်ရုံကို ဝတ်ဆင်ထားပြီး သူ၏ မျက်နှာမှာ လူသားတစ်ဦးနှင့် ခွဲခြား၍မရသော်လည်း သူ၏ နောက်ကျောတွင်မူ ကြမ်းကြုတ်သော မိစ္ဆာ အတောင်ပံ တစ်စုံက ဆန့်ထွက်နေသည်။

မိစ္ဆာအတောင်ပံများမှာ ခရမ်းရွှေရောင် ဖြစ်ပြီး သူတို့ ဖြန့်ကျက်လိုက်သည်နှင့် အဖျက်စွမ်းအင်လှိုင်းတစ်ခု ၎င်းတို့ထံမှ ပြန့်ကျဲထွက်ပေါ်လာသကဲ့သို့ ဖြစ်နေသည်။

သူ့တွင် ခရမ်းရောင်မျက်လုံး တစ်စုံ ရှိသော်လည်း ၎င်းတို့အတွင်း၌ မည်သည့် စိတ်ခံစားမှု အရိပ်အယောင်မျှ မရှိဘဲ ထိုမျက်လုံးများမှာ သေမင်း၏ မျက်လုံးများနှင့် တူလှသည်။

အခြားတစ်ဦးမှာလည်း ဆင်တူသော မျက်နှာသွင်ပြင် ရှိပြီး ငွေရောင်ဝတ်ရုံကို ဝတ်ဆင်ထားကာ သူ၏ နောက်ကျောရှိ မိစ္ဆာအတောင်ပံများမှာ မြေကြီးရောင် ဖြစ်ပြီး ရွှေရောင်တဖျပ်ဖျပ်လက်နေကာ နက်ရှိုင်းသော ငွေရောင်မျက်လုံးများ ရှိသည်။

“ငါ့နာမည်က ထျန်းမင်၊ ငါ့ကို ကောင်းကင် မြေအောက်ကမ္ဘာဘုရင်လို့ ခေါ်လို့ ရတယ်”

“ဒါက ငါ့ညီ မြေကမ္ဘာ မြေအောက်ကမ္ဘာဘုရင်၊ ပြီးတော့ သူတို့က ငါနဲ့ ငါ့ညီရဲ့ လက်အောက်ခံ မဟာနတ်ဆိုးဗိုလ်ချုပ် ခြောက်ကောင်ပဲ”

ခရမ်းရောင်ဝတ် အမျိုးသားက မိုလော့ကို ပြုံးကာ ကြည့်ပြီး ခင်မင်ရင်းနှီးစွာ ပြောလိုက်သည်။ “နန်းတော်သခင် မိုလော့ရဲ့ ကြင်နာတဲ့ ဖိတ်ကြားမှုအတွက် ကျေးဇူးတင်ပါတယ်”

“ဒီနေ့ မင်းရဲ့ ခွေးအသက်ကို ယူဖို့ မိုင်ထောင်ချီ ခရီးနှင်လာခဲ့တာပါ”

“ထောင်ချောက်ဆိုတာ သိသိရက်နဲ့တောင် ကျူးကျော်လာရဲသေးတယ်၊ ကြည့်ရတာ မင်း တော်တော် ယုံကြည်ချက်ရှိနေပုံရတယ်” မိုလော့က မျက်နှာထားတင်းတင်းဖြင့် ပြောလိုက်သည်။

ဘုရင် နှစ်ပါး၊ ဗိုလ်ချုပ် ခြောက်ကောင်။

ဤအင်အားစုမှာ သူတို့၏ မီးနတ်ဘုရားနန်းတော်ကို အကြိမ်ကြိမ် ချေမှုန်းပစ်ရန် လုံလောက်ပေသည်။

“ဟဲဟဲ၊ မိုးကြိုးဘိုးဘေးအဆောင်ရဲ့ ဆွဲဆောင်မှုက မသေးဘူးလေ၊ လာရကျိုးနပ်ပါတယ်”

“ပြီးတော့ မိုးကြိုးဘိုးဘေးအဆောင်က အတုဖြစ်နေရင်တောင် မီးတောက် ဘိုးဘေးအဆောင်က အစစ်ပဲလေ” ကောင်းကင် မြေအောက်ကမ္ဘာဘုရင်က ရယ်မောလိုက်သည်။

“နန်းတော်သခင် မိုလော့ဆီမှာ မီးတောက်ဘိုးဘေးအဆောင် ရှိတယ်ဆိုတာ ငါ သိနေတာ ကြာပြီ၊ ဒါပေမယ့် ငါ လှုပ်ရှားလို့မရခဲ့ဘူး”

“ဒီနေ့ မင်း ကိုယ်ထင်ပြလာပြီဆိုတော့ ငါလည်း မီးတောက်ဘိုးဘေးအဆောင်ကို ယူသွားရမှာပေါ့၊ ဒီလိုနတ်ဘုရားရတနာမျိုးက မင်းလက်ထဲမှာ မရှိတာ ပိုကောင်းပါတယ်”

မြေကမ္ဘာ မြေအောက်ကမ္ဘာဘုရင်က တိုက်ခိုက်နေဆဲဖြစ်သော ဝူယွမ်နှင့် လင်းတုန်တို့ကို ကြည့်လိုက်ပြီး သူ၏နှုတ်ခမ်းများပေါ်တွင် အပြုံးတစ်ခု ပေါ်လာကာ ပြောလိုက်သည်။

“ပြီးတော့ စိတ်ဝင်စားစရာကောင်းတဲ့ အဲဒီ ကောင်လေး နှစ်ယောက်က ငါတို့ရဲ့ သန့်ရှင်းသော မျိုးနွယ်စုမှာ ပူးပေါင်းဖို့ အရမ်း သင့်တော်တာပဲ”