အခန်း (၇၄၃-၇၄၄)

အပိုင်း(၇၄၃) ကျောက်စက်ပင့်ကူအိမ်

နောက်ရက်များတွင် ဦးလေးမာတို့အဖွဲ့က စခန်းကို အလျင်အမြန် စတင်တည်ဆောက်ကြပြီး ထူလုံကမူ ကင်းလှည့်အဖွဲ့ဝင်များကို စီစဉ်ကာ ရေပေါ်ကျွန်းပေါ်ရှိ သန္ဓေပြောင်းသတ္တဝါများကို စတင်ရှင်းလင်းခိုင်းခဲ့သည်။

ရေပေါ်ကျွန်းပေါ်ရှိ သန္ဓေပြောင်းသတ္တဝါများသည် အလွန်အမင်း အစွမ်းထက်လှပြီး မျိုးရိုးဗီဇမျိုးစေ့အဆင့်မှာ သာမန်မျှသာဖြစ်ကာ မျိုးရိုးဗီဇ ပြန်လည်ဖွဲ့စည်းခြင်းအဆင့်ရှိ သန္ဓေပြောင်းသတ္တဝါများပင် မကြာခဏ ထွက်ပေါ်လာတတ်သည်။

ဤအချက်က ကင်းလှည့်အဖွဲ့ကို ကြီးမားသော ဖိအားများ ဖြစ်စေခဲ့သည်။ ယာဉ်ပျံကို အားကိုးလျှင်ပင် မျိုးရိုးဗီဇ ပြန်လည်ဖွဲ့စည်းခြင်းအဆင့် မိစ္ဆာကောင်များ၏ တိုက်ခိုက်မှုကိုသာ တားဆီးနိုင်ပြီး တန်ပြန်သတ်ဖြတ်ရန်မှာမူ အလွန်တရာ ခက်ခဲလှသည်။

ထို့ကြောင့် ကျွန်းပေါ်ရှိ မိစ္ဆာကောင်များကို ရှင်းလင်းသည့် လုပ်ငန်းစဉ်မှာ အလွန်နှေးကွေးနေခဲ့၏။

ကံကောင်းသည်မှာ စခန်းတည်ဆောက်မှုနှင့်အတူ ထိုက်ယန်တောင်ဘက်မှလည်း လူအင်အားများကို အဆက်မပြတ် ထပ်မံပို့ဆောင်ပေးနေခြင်း ဖြစ်သည်။

တစ်ကျွန်းလုံးတွင် လူဦးရေမှာ အလျင်အမြန် တိုးပွားလာနေသည်။

လင်းယွမ်ကမူ လေပေါ်ကျွန်း၏ အတွင်းပိုင်းတွင် နှလုံးအမြူတေနှင့် ဦးနှောက်အမြူတေကို အဆက်မပြတ် လိုက်လံရှာဖွေနေခဲ့သည်။

စတုရန်း ၈ မိုင်ခန့် ကျယ်ဝန်းသော ဧရိယာသည် ကြီးသည်ဟု မဆိုသာသလို သေးငယ်လွန်းသည်ဟုလည်း မဆိုနိုင်ပေ။

လင်းယွမ်သည် ရှုပ်ထွေးပွေလီသော သွေးကြောလမ်းကြောင်းများထဲတွင် မရှာဖွေတော့ဘဲ ဧရာမအလောင်းကောင်ကြီး၏ ကလီစာများကြားတွင် တိုက်ရိုက် ပျံသန်းရှာဖွေခဲ့ရာ သူ၏ ရှာဖွေမှုအရှိန်ကို များစွာ မြန်ဆန်သွားစေခဲ့သည်။

သုံးရက်ခန့် ကြာပြီးနောက်... လင်းယွမ်သည် အမှောင်သမ်းသော အနီရောင်များ ဖြာထွက်နေသည့် စက်လုံးပုံသဏ္ဍာန် ကလီစာတစ်ခုရှေ့တွင် ရပ်တန့်လိုက်သည်။

ဤကလီစာကြီးသည် အချင်းဝက် မိုင်ဝက်ကျော်ခန့် ရှိပြီး တစ်ခုလုံး အနီပုပ်ရောင်သမ်းနေကာ အပြင်ဘက်တွင် အရွယ်အစား အရွယ်စုံရှိသော ဧရာမသွေးကြောမကြီးများက ရစ်ပတ်ဖွဲ့နွဲ့နေကြသည်။

"ထင်တဲ့အတိုင်းဆိုရင်... ဒါက ဒီရေပေါ်ကျွန်း ဧရာမအလောင်းကောင်ကြီးရဲ့ နှလုံးသားပဲ ဖြစ်ရမယ်"

"ဘယ်လို ဓာတ်အမျိုးအစားမျိုးလဲ ဆိုတာတော့ မသိသေးဘူး"

လင်းယွမ်၏ မျက်နှာပေါ်တွင် မျှော်လင့်ချက် အရိပ်အယောင်တစ်ခု ပေါ်လာပြီး စကားအပို မဆိုနေတော့ဘဲ ဤအနီပုပ်ရောင် စက်လုံးကြီးအနားသို့ အလျင်အမြန် ချဉ်းကပ်သွားလိုက်သည်။

သူက ထိုနှလုံးသားကြီးကို တစ်ပတ် ပျံသန်းကြည့်ရှုလိုက်ပြီးနောက် အတုတ်ခိုင်ဆုံး သွေးကြောလမ်းကြောင်း တစ်ခုကို ရှာဖွေတွေ့ရှိသွားသည်။

ထို့နောက် သန္ဓေပြောင်းအစွမ်းကို ချက်ချင်း အသက်သွင်းလိုက်ပြီး ပရိုတင်း အဆိပ်ရည်များကို အမြောက်အမြား ထုတ်လွှတ်ကာ ဤသွေးကြောကို အလျင်အမြန် စတင်တိုက်စားစေလိုက်သည်။

မကြာမီမှာပင် သွေးကြောကြီးသည် တိုက်စားခံရမှုကြောင့် အပေါက်ကြီးတစ်ခု ဖြစ်ပေါ်လာတော့သည်။

လင်းယွမ်သည် ကိုယ်ကို တစ်ချက် လွှဲလိုက်ပြီး သွေးကြောလမ်းကြောင်း အတွင်းပိုင်းသို့ ခုန်ဝင်သွားလေသည်။

ဤနေရာရှိ လေထုမှာ ပို၍ နောက်ကျိနေပြီး အနံ့အသက်ဆိုးများမှာလည်း ပိုမို ပြင်းထန်လာ၏။

လင်းယွမ်က အသက်မရှူဘဲ သူ၏ ခြေအောက်သို့ ငုံ့ကြည့်လိုက်သည်။

ခြေအောက်တွင် အနီပုပ်ရောင် ကျောက်သလင်းများ အမြောက်အမြား ရှိနေပြီး ယုံမှားသံသယဖြစ်ဖွယ် မရှိဘဲ ၎င်းတို့မှာ သွေးသလင်းကျောက်များပင် ဖြစ်ပေလိမ့်မည်။

လင်းယွမ်သည် လက်သီးကို မြှောက်လိုက်ပြီး အားကုန် လွှဲ၍ ထိုးချလိုက်တော့သည်။

"ဒုန်း"

သွေးကြောလမ်းကြောင်း တစ်ခုလုံး သိမ့်ခနဲ တုန်ခါသွားပြီး လက်သီးကျရောက်သွားသော နေရာရှိ သွေးသလင်းကျောက်များမှာ ချက်ချင်း ပေါက်ကွဲထွက်သွားကာ အက်ကွဲကြောင်းများစွာ အနှံ့အပြားသို့ ပြန့်ကျဲသွားလေသည်။

လင်းယွမ်က သွေးသလင်းကျောက် တစ်တုံးကို ကောက်ယူလိုက်ပြီး ၎င်းအတွင်းရှိ စွမ်းအင်အရည်အသွေးကို ခံစားကြည့်လိုက်သည်။

ခဏအကြာတွင် သူသည် မျက်လုံးများကို ဖွင့်လိုက်ပြီး အံ့ဩဝမ်းသာသွားသည့် အရိပ်အယောင်များ ပေါ်ထွက်လာ၏။

"ခန္ဓာကိုယ်ကြံ့ခိုင်မှု အမျိုးအစား သွေးသလင်းကျောက်တွေပဲ"

ဤအနီပုပ်ရောင် သွေးသလင်းကျောက်များသည် ထင်မှတ်မထားဘဲ ခန္ဓာကိုယ်ကြံ့ခိုင်မှု အမျိုးအစား သွေးသလင်းကျောက်များ ဖြစ်နေလေသည်။

ထိုက်ယန်တောင်တွင် ယခုအခါ ရေပေါ်ကျွန်း အများအပြား ရှိနေသော်လည်း ယခုအချိန်အထိ ခန္ဓာကိုယ်ကြံ့ခိုင်မှု အမျိုးအစား တစ်ခုမျှ မရှိသေးပေ။

သို့သော် ထိုက်ယန်တောင်ရှိ အသက်ရှင်ကျန်ရစ်သူများထဲတွင် ခန္ဓာကိုယ်ကြံ့ခိုင်မှု၊ ခွန်အား နှင့် အလျင် အမျိုးအစား အစွမ်းပိုင်ရှင်များက အများဆုံး ဖြစ်နေသည် မဟုတ်ပါလော။

ထိုအစွမ်းပိုင်ရှင်များသည် လုံလောက်သော မျိုးရိုးဗီဇမျိုးစေ့များ မရှိသဖြင့် အခက်တွေ့နေကြရပြီး အစွမ်းပိုင်ရှင် အများအပြားမှာ မျိုးရိုးဗီဇမျိုးစေ့ အဆင့်အောက်တွင်သာ ပိတ်မိနေကာ အဆင့်တက်ရန် အချိန်ကြာမြင့်စွာ နှောင့်နှေးနေခဲ့ရသည်။

ယခု ဤသွေးသလင်းကျောက်များကို ရရှိသွားပြီဖြစ်ရာ ထိုက်ယန်တောင်မှ ခန္ဓာကိုယ်ကြံ့ခိုင်မှု အမျိုးအစား အစွမ်းပိုင်ရှင်များသည် အရှိန်အဟုန်ဖြင့် တိုးတက်များပြားလာမည်မှာ သေချာပေါက်ပင်။

လင်းယွမ်၏ ရင်ထဲတွင် ဝမ်းသာပီတိများဖြင့် ပြည့်နှက်သွားသည်။ သူ့၏ ဆင့်ကဲပြောင်းလဲခြင်း ပင်ကိုယ်အစွမ်းသည်ပင်လျှင် အစောဆုံးကာလ၌ ခန္ဓာကိုယ်ကြံ့ခိုင်မှု အမျိုးအစား အစွမ်းများထဲမှ တစ်ခုအဖြစ် သတ်မှတ်နိုင်သည်ကို သိထားရမည်။

နောက်ပိုင်းတွင် အသွင်တစ်ရာ မျောက်ဝံမိစ္ဆာ မျိုးရိုးဗီဇကို နိုးထနိုင်ခဲ့သော်လည်း သေချာစီစစ်ကြည့်လျှင် ၎င်းသည်လည်း ခန္ဓာကိုယ်ကြံ့ခိုင်မှု အမျိုးအစားပင် ဖြစ်နေဆဲပင်။

ဆိုလိုသည်မှာ ဤနေရာရှိ သွေးသလင်းကျောက်များကို လင်းယွမ်ကိုယ်တိုင်လည်း အဟန့်အတားမရှိ စုပ်ယူနိုင်စွမ်း ရှိနေခြင်းပင်။

လင်းယွမ်သည် အတိုင်းမသိ ဝမ်းသာသွားပြီး နှလုံးခန်းရှိရာဘက်သို့ အလျင်အမြန် လျှောက်သွားလိုက်သည်။

သို့သော် ထိုနှလုံးခန်းအတွင်း၌ အခဲဖြစ်နေသော သွေးရောင် ကျောက်သလင်းများ ပြည့်နှက်နေပြီး နှလုံးခန်း၏ သုံးပုံနှစ်ပုံကျော်ခန့်အထိ ပိတ်ဆို့နေသည်ကို အံ့ဩဖွယ်ရာ မြင်တွေ့လိုက်ရ၏။

လင်းယွမ်က မနေနိုင်ဘဲ ဟားတိုက် ရယ်မောလိုက်တော့သည်။ "ဟားဟားဟား... ဒီလောက်များပြားတဲ့ ခန္ဓာကိုယ်ကြံ့ခိုင်မှု အမျိုးအစား သွေးသလင်းကျောက်တွေဆိုတော့... ဒီတစ်ခါတော့ တကယ့်ကို အချီကြီးပွတာပဲ"

သူက စိတ်စွမ်းအင်များကို လျင်မြန်စွာ ဖြန့်ကြက်လိုက်ပြီး နှလုံးခန်းအတွင်းရှိ နှလုံးအမြူတေ တည်ရှိရာ နေရာကို အဆက်မပြတ် ရှာဖွေလေတော့သည်။

မကြာမီမှာပင် နှလုံးခန်း၏ အလယ်ဗဟိုတည့်တည့် နေရာ၌ ပြင်းထန်လှသော သွေးဓာတ်အငွေ့အသက်များ ဖြာထွက်နေသည့် အမြူတေတစ်ခုကို ရှာဖွေတွေ့ရှိသွားခဲ့သည်။

လင်းယွမ်သည် စကားတစ်ခွန်းမျှ မဆိုတော့ဘဲ ချက်ချင်းပင် စတင်တူးဆွလေတော့၏။

သူ့၏ လက်ရှိ ခွန်အားနှင့်ဆိုလျှင် သွေးသလင်းကျောက်များကို တူးဖော်ရသည်မှာ အလွန်တရာ လွယ်ကူရိုးရှင်းလှသည်။

လင်းယွမ်က ရွှေမွေးခြင်္သေ့မိစ္ဆာအဖြစ် တိုက်ရိုက် အသွင်ပြောင်းလိုက်ပြီး ဓားသွားပမာ ထက်ရှသော လက်သည်းနှစ်ဖက်ဖြင့် သွေးသလင်းကျောက်များကို ဖြတ်တောက်ကာ ကျောက်သလင်းများကို ခက်ခဲမှုမရှိ တူးဆွလိုက်သည်။

အချိန်အနည်းငယ် ကြာသောအခါ ထိုသွေးရောင် အမြူတေကို တူးဖော်ရရှိသွားလေပြီ။

အမြူတေတစ်ခုလုံးကို အနီပုပ်ရောင် စွမ်းအင်ဒြပ်စင် အစုအဝေးတစ်ခုက ရစ်ပတ်ဖုံးလွှမ်းထားသည်။ လင်းယွမ်၏ ရင်ထဲတွင် အတိုင်းမသိ ဝမ်းသာသွားပြီး တွေဝေမနေဘဲ ပါးစပ်ကို ချက်ချင်း ဟလိုက်သည်။

ရွှေမွေးခြင်္သေ့မိစ္ဆာ၏ ဧရာမ ပါးစပ်ကြီးဖြင့် ဤကြီးမားလှသော နှလုံးအမြူတေကြီးကို ဝမ်းဗိုက်ထဲသို့ လွယ်ကူစွာ မျိုချပစ်လိုက်တော့သည်။

ထို့နောက် လင်းယွမ်က မျက်လုံးများကို မှိတ်လိုက်ပြီး နှလုံးအမြူတေကို စတင် သန့်စင်လေတော့၏။

အချိန်များ တဖြည်းဖြည်း ကုန်ဆုံးသွားပြီး နှလုံးအမြူတေမှာ တဖြည်းဖြည်း သန့်စင်ခံလိုက်ရသည်။ ၎င်းအတွင်း ပါဝင်နေသော ဤရေပေါ်ကျွန်းနှင့် ပတ်သက်သည့် သတင်းအချက်အလက်များကိုပါ လင်းယွမ်က တဖြည်းဖြည်းချင်း စုပ်ယူ မှတ်သားနိုင်ခဲ့သည်။

အတန်ကြာပြီးနောက် လင်းယွမ်သည် မျက်လုံးများကို ဖွင့်လိုက်ပြီး လူသားပုံစံသို့ ပြန်လည်ပြောင်းလဲလိုက်သည်။

သူ၏ အသိစိတ်အာရုံသည် ဤရေပေါ်ကျွန်း၏ မည်သည့် မြေမျက်နှာသွင်ပြင်နှင့် နေရာဒေသကိုမဆို အာရုံခံနိုင်နေပြီဖြစ်ပြီး မြေပြင်အနေအထား ပြောင်းလဲခြင်းနှင့် တောင်ကုန်းများကို ရွှေ့ပြောင်းခြင်းများကိုပင် စိတ်ကြိုက် ခြယ်လှယ်နိုင်စွမ်း ရှိလာခဲ့သည်။

"အောင်မြင်သွားပြီပဲ"

လင်းယွမ်က ရယ်မောလိုက်ပြီး တစ်ချိန်တည်းမှာပင် သူသည် ဦးနှောက်ရေကန် တည်ရှိရာ နေရာကိုပါ အာရုံခံမိသွားခဲ့သည်။

"ဒီရေပေါ်ကျွန်းကြီးရဲ့ မူလခန္ဓာကိုယ်က လေဟုန်စီး ငါးလိပ်စွန် လို့ခေါ်တဲ့ ဧရာမ သားရဲကြီး တစ်ကောင် ဖြစ်နေတာကိုး"

"ဒီသားရဲကြီးက သမုဒ္ဒရာထဲက ငါးလိပ်စွန်တွေနဲ့ ဆင်တယ်... ဒါမှမဟုတ်ရင်လည်း ငါးလိပ်စွန် ကနေ ဆင့်ကဲပြောင်းလဲလာတာ ဖြစ်နိုင်တယ်"

"သူက ရေအောက်ထဲမှာ အလျင်အမြန် ကူးခတ်သွားလာနိုင်ရုံတင်မကဘူး... ဟင်းလင်းပြင်ထဲမှာတောင် လွတ်လပ်ပေါ့ပါးစွာ ကျက်စားသွားလာနိုင်တယ်"

"နို့တိုက်သတ္တဝါအမျိုးအစား သားရဲတော့ မဟုတ်ဘူး... ဒါပေမဲ့ နို့တိုက်သတ္တဝါတွေထက် သွေးတွေ ပိုများပြီး သွေးသားခွန်အားကလည်း ပိုပြင်းထန်တယ်... စံပြ ခန္ဓာကိုယ်ကြံ့ခိုင်မှု အမျိုးအစား သန္ဓေပြောင်းသတ္တဝါ စစ်စစ်ပဲ"

(ငါးလိပ်စွန်ဆိုတာ ငါးလိပ်ကျောက်မျိုးနွယ်ထဲက အရွယ်အစားအကြီးဆုံးဖြစ်ပါတယ်)

လင်းယွမ်သည် နှလုံးအမြူတေအတွင်း ပါဝင်လာသော မျိုးရိုးဗီဇ မှတ်ဉာဏ်အချို့ကို ခံစားလိုက်ရပြီး ဤသတ္တဝါနှင့် ပတ်သက်၍ ပိုမို နက်ရှိုင်းစွာ နားလည်သဘောပေါက်လာခဲ့သည်။

သူသည် လေဟုန်စီး ငါးလိပ်စွန်၏ ထူးခြားချက်အမျိုးမျိုးကို အသေးစိတ် လေ့လာနေရန် အချိန်မရှိတော့သဖြင့် အာရုံခံမိသော လမ်းကြောင်းအတိုင်း ဦးနှောက်ရေကန်ရှိရာသို့ အမြင့်ဆုံးအလျင်ဖြင့် ချက်ချင်း လိုက်လံရှာဖွေလေတော့သည်။

"ဦးနှောက်အမြူတေ ရှိနေသေးပါစေလို့ပဲ ဆုတောင်းရမယ်... တခြားသတ္တဝါတွေ မှားစားမိတာမျိုး၊ သန့်စင်လိုက်တာမျိုး မဖြစ်ပါစေနဲ့"

လင်းယွမ်၏ ရွေ့လျားမှု အရှိန်မှာ အလွန် လျင်မြန်လှသည်။ ဤတစ်ကြိမ်တွင် သူသည် အပြင်ဘက်မှ မသွားတော့ဘဲ သွေးကြောလမ်းကြောင်း တစ်ခုအတိုင်းသာ ဝင်ရောက်သွားလေသည်။

သူသည် ဤနေရာရှိ ရှုပ်ထွေးယှက်နွယ်နေသော သွေးကြောလမ်းကြောင်းများကို အလွန် ရင်းနှီးကျွမ်းဝင်နေသည့်အလား လမ်းခွဲများ၌ မည်သည့် တွေဝေတုံ့ဆိုင်းမှုမျှ မရှိဘဲ လမ်းကြောင်းတစ်ခုကို တိုက်ရိုက် ရွေးချယ်သွားနိုင်ခဲ့သည်။

ဤသည်မှာ လေဟုန်စီး ငါးလိပ်စွန်၏ နှလုံးအမြူတေကို သူ ထိန်းချုပ်နိုင်ခဲ့ခြင်းကြောင့် ဖြစ်သည်။ ယခုအချိန်၌ ဤကျွန်း၏ တည်ဆောက်ပုံ အားလုံးကို လင်းယွမ် ကောင်းကောင်းကြီး ရှင်းလင်းသိမြင်နေပြီ ဖြစ်သည်။

သွေးကြောလမ်းကြောင်းများ မည်မျှပင် ရှုပ်ထွေးနေစေကာမူ ယခုအချိန်တွင်မူ လင်းယွမ်၏ စိတ်ထဲ၌ အလွန်အမင်း ရှင်းလင်းပြတ်သားနေတော့သည်။

"ရွှစ်... ရွှစ်... ရွှစ်"

မကြာမီမှာပင် လင်းယွမ်သည် ခြောက်မိုင်ခန့် အကွာအဝေးကို ဖြတ်ကျော်လာခဲ့ပြီး ဧရာမ ကော်စေးရွှံ့ ရေကန်ကြီး တစ်ခုရှေ့သို့ ရောက်ရှိလာခဲ့သည်။

ရေကန်၏ အကျယ်အဝန်းမှာ သိပ်မကြီးမားလှဘဲ ဘောလုံးကွင်း ငါးကွင်း ခြောက်ကွင်းစာခန့်သာ ရှိသော်လည်း ထိုနှလုံးခန်းထက်မူ အတော်လေး ပိုကြီးနေသေးသည်။

အဖြူရောင် ကော်စေးရွှံ့ ရေကန်ကြီး၏ ပတ်လည်တွင် အနီပုပ်ရောင် အသားတုံး အတားအဆီးများ ရှိနေသည်။

လင်းယွမ်သည် အနည်းငယ်မျှ တွန့်ဆုတ်မနေတော့ဘဲ ကိုယ်ကို တစ်ချက် လွှဲလိုက်ကာ ဦးနှောက်ရေကန်ထဲသို့ တိုက်ရိုက် ခုန်ဆင်းသွားလေသည်။

"ဗွမ်း"

စေးကပ်နေသော ကော်စေးရွှံ့ ရေကန်ထဲမှ စေးကပ်သည့် ရေလှိုင်းများ ပန်းထွက်လာပြီး ရေပြင်တွင် ဂယက်များ ထသွားသည်။

လင်းယွမ်သည် ရေအောက်တွင် လျင်မြန်စွာ ကူးခတ်သွားလာနေပြီး သူ အာရုံခံမိထားသော လမ်းကြောင်းအတိုင်း အရှိန်အဟုန်ဖြင့် ကူးသွားလေသည်။

ပေရာချီမျှသာ ရှေ့ဆက်သွားရသေးချိန်တွင် သူ၏ ကိုယ်လုံးမှာ ရုတ်တရက် ရပ်တန့်သွားပြီး အရှေ့ဘက်ရှိ ကော်စေးရွှံ့ ရေပြင်ဆီသို့ လှမ်းကြည့်လိုက်သည်။

ထိုကော်စေးရွှံ့ ရေကန်ထဲတွင် ရေငုပ်သင်္ဘောငယ်လေးများ ရေအောက်၌ ရပ်နားနေသည်ကို မြင်လိုက်ရ၏။

ရေငုပ်သင်္ဘောပေါ်ရှိ သင်္ကေတ အလင်းရောင်များက တောက်ပနေပြီး ၎င်းတို့၏ ပတ်ပတ်လည်တွင် အကာအကွယ် တစ်လွှာက လွှမ်းခြုံထားသည်။

ရေငုပ်သင်္ဘော၏ အပြင်ဘက်တွင် အလွန်ကြီးမားသော အမှတ်တံဆိပ် တစ်ခုကို ရေးဆွဲထားသည်။

၎င်းမှာ အညှောက်ပေါက်နေသော သစ်ရွက်နုလေး အမှတ်တံဆိပ်ပင် ဖြစ်သည်။

"မုန်ယာကုမ္ပဏီလား"

လင်းယွမ် မျက်ခုံးတစ်ချက် ပင့်လိုက်မိသည်။ "သူတို့လူတချို့က ဒီဦးနှောက်ရေကန်ဘက်ကိုတောင် ရောက်လာခဲ့ပြီပဲ"

"တစ်ဖက်လူက ဦးနှောက်အမြူတေကို ရှာတွေ့သွားပြီလား ဆိုတာကိုတော့ မသိရသေးဘူး"

လင်းယွမ်က စိတ်ထဲမှ တိတ်တဆိတ် ခန့်မှန်းတွေးတောလိုက်ပြီးနောက် ထိုနေရာဆီသို့ အလျင်အမြန် ကူးခတ်သွားလိုက်သည်။

အချိန်အနည်းငယ် ကြာပြီးနောက် အရှေ့ဘက် ဦးနှောက်ရေကန်၏ အနက်ပိုင်းတွင် ဟာလာဟင်းလင်း ဖြစ်နေသော နယ်မြေတစ်ခုကို မြင်တွေ့လိုက်ရသည်။

အသွင်သဏ္ဍာန်မဲ့ လှိုင်းဂယက် တစ်ခုက ပတ်ဝန်းကျင်ကို လွှမ်းခြုံထားပြီး ကော်စေးရွှံ့ ရေများကို အကာအကွယ်ဖြင့် ခြားနားထားသည့်အလား ပင်။

"ဒါက... ဦးနှောက်အမြူတေ နယ်မြေပဲ"

ဤမြင်ကွင်းကို မြင်လိုက်ရသောအခါ လင်းယွမ်က တွင်းနက်အရိပ်ရေပေါ်ကျွန်း တွင် ဦးနှောက်အမြူတေကို လုယူခဲ့ရသည့် အဖြစ်အပျက်ကို ချက်ချင်း ပြန်လည်အမှတ်ရသွားသည်။

ထိုအချိန်က ဦးနှောက်အမြူတေကို တွင်းနက်အရိပ်နဂါး စားသွားခဲ့သော်လည်း ထိုစဉ်က အခြေအနေနှင့် ယခုမြင်ကွင်းမှာ အလွန်တရာ ဆင်တူနေသည်။

သို့သော် မျက်စိရှေ့ရှိ ဤလေဟာနယ် နယ်မြေအတွင်း၌ အနီပုပ်ရောင် အလင်းတန်းများ လှည့်ပတ်စီးဆင်းနေပြီး အပေါက်တစ်ခု ပွင့်နေပြီ ဖြစ်သည်။

၎င်းအတွင်းတွင် လက်နက်ကိုင်တပ်ဖွဲ့ဝင် အများအပြား အဝင်အထွက် ပြုလုပ်နေသည်ကို မြင်တွေ့နိုင်ပေသည်။

ဤလူများသည် စိတ်စွမ်းအင် အမျိုးအစား သွေးသလင်းကျောက်များကို တူးဖော်နေကြခြင်း ဖြစ်သည်။

လင်းယွမ်က အခြေအနေ မကောင်းတော့ကြောင်း ချက်ချင်း သိလိုက်သည်။ "သွေးသလင်းကျောက်တွေကိုတောင် စပြီး တူးဖော်နေကြပြီပဲ... ဦးနှောက်အမြူတေကိုများ တစ်ဖက်လူက သန့်စင်လိုက်ပြီလား"

သူ စဉ်းစားနေဆဲမှာပင် ရုတ်တရက် အနောက်ဘက်ရှိ ဦးနှောက်ရေကန်က လှုပ်ခတ်သွားပြီး ၎င်းနောက် ရေကန်ထဲမှ အလင်းရောင်များ တောက်ပနေသည့် ဧရာမ ပင့်ကူအိမ်ကြီး တစ်ခု ထွက်ပေါ်လာကာ လင်းယွမ်ထံသို့ ရုတ်ခြည်း အုပ်မိုးချလာတော့သည်။

လင်းယွမ် ရင်ထိတ်သွားပြီး "ဘယ်သူလဲ" ဟု အော်လိုက်သည်။

သူက မသိစိတ်ဖြင့် သန္ဓေပြောင်းအစွမ်းကို အသက်သွင်းလိုက်ပြီး ဟင်းလင်းပြင် အစွမ်းကို တိုက်ရိုက် အသုံးပြုကာ ဟင်းလင်းပြင်ကို ချက်ချင်း တွန့်လိမ်စေလိုက်ပြီး သူ၏ ကိုယ်လုံးကို ပေရာချီအကွာသို့ ရွှေ့ပြောင်းလိုက်လေသည်။

ဤသို့ ပြုလုပ်လိုက်ခြင်းဖြင့် ဧရာမ ပင့်ကူအိမ်ကြီး၏ ဖုံးလွှမ်းမှုအောက်မှ ချက်ချင်း လွတ်မြောက်သွားခဲ့သည်။

သို့သော် ဤမျှနှင့် မပြီးသေးပေ။ ပတ်ဝန်းကျင်၌ ရပ်နားထားသော ရေငုပ်သင်္ဘောများက ရုတ်တရက် အသံကျယ်လောင်စွာ မြည်ဟည်းပြီး အင်ဂျင်များကို စတင် မောင်းနှင်လိုက်ကြသည်။

နောက်တစ်စက္ကန့်တွင် ဤရေငုပ်သင်္ဘောများသည် လင်းယွမ်၏ ပတ်လည်သို့ အရှိန်အဟုန်ဖြင့် ပြေးဝင်လာကြသည်။

ထိုဧရာမ ပင့်ကူအိမ်ကြီးကလည်း ဖောင်းကားနေသော အိတ်ကြီးတစ်ခုကဲ့သို့ လင်းယွမ်ကို ရုတ်ခြည်း ဖမ်းဆီးအုပ်မိုးသွားလေတော့သည်။

ချက်ချင်းပင် ပင့်ကူအိမ်ပေါ်၌ သင်္ကေတ အလင်းတန်းများ တစ်ခုပြီးတစ်ခု လင်းလက်လာပြီး ဤကြိုးမျှင်များက ပြင်းထန်သော စေးကပ်သည့် ဒြပ်စင်များဖြင့် လင်းယွမ်အား ရူးသွပ်စွာ ပတ်ရစ်ကပ်ငြိသွားကြသည်။

လင်းယွမ်၏ မျက်နှာထား အနည်းငယ် တင်းမာသွားပြီး "မုန်ယာကုမ္ပဏီက သိပ်တော်လှချည်လား" ဟု ရေရွတ်လိုက်သည်။

"ဟီးဟီးဟီး... မင်းကို မိပြီကွ"

ရယ်မောသံကို ကြားလိုက်ရပြီးနောက် ဦးနှောက်ရေကန် လှုပ်ခတ်သွားကာ ရေကန်ထဲမှ လူရိပ်တစ်ခု ထွက်ပေါ်လာသည်ကို မြင်တွေ့လိုက်ရသည်။

ထိုလူသည် အရပ် ၆ ပေခန့် ရှိပြီး မုန်ယာကုမ္ပဏီ၏ အမှတ်တံဆိပ် ပါရှိသော တူညီဝတ်စုံကို ဝတ်ဆင်ထားသော်လည်း ဤဝတ်စုံ၏ အရောင်မှာ သာမန် မုန်ယာကုမ္ပဏီ ဝန်ထမ်းများနှင့် မတူညီပေ။

ဤလူသည် မုန်ယာကုမ္ပဏီ၏ အထက်တန်းအရာရှိ တစ်ဦးဖြစ်ကြောင်း သိသာထင်ရှားလှသည်။

ထိုလူ၏ တစ်ကိုယ်လုံးကို ရေဒြပ်စင်များက လွှမ်းခြုံထားပြီး ရေဓာတ် အစွမ်းပိုင်ရှင် တစ်ယောက် ဖြစ်ကြောင်း သိသာလှ၏။

သူ၏ မျက်နှာပေါ်တွင် လှောင်ပြောင်သည့် အပြုံးတစ်ခု ရှိနေသည်။ "မင်းက ဘယ်သူလဲ... ငါတို့ မုန်ယာကုမ္ပဏီ စခန်းကို ကျူးကျော်ဝင်ရောက်ရဲရုံတင်မကဘူး... ငါတို့ စခန်းကိုပါ ဖျက်ဆီးပစ်ရဲတယ်ပေါ့လေ... သေချင်နေတာပဲ"

လင်းယွမ်က မျက်လုံးများကို မှေးစင်းလိုက်သည်။ တစ်ကိုယ်လုံး စေးကပ်နေသော ပင့်ကူအိမ်ဖြင့် ပတ်ရစ်ချည်နှောင် ခံထားရသော်လည်း တည်ငြိမ်သောအမူအရာဖြင့် ပြန်မေးလိုက်သည်။ "မင်းကကော ဘယ်သူလဲ"

"ဟက်ဟက်... မင်း စိတ်ရှင်းရှင်းနဲ့ သေရအောင် ပြောပြလိုက်မယ်... ငါက မုန်ယာကုမ္ပဏီ ရှေ့ပြေးတပ်ဖွဲ့ အမှတ်(၁၉) ရဲ့ ခေါင်းဆောင် ကျိုးဟောင်ရန် ပဲ"

"ဟေ့ကောင်... မင်းဆီက ရင်းနှီးနေတဲ့ အငွေ့အသက်ကို ငါ ခံစားမိတယ်... မင်း နှလုံးအမြူတေကို သန့်စင်လိုက်တာလား" ကျိုးဟောင်ရန်က အေးစက်သောအသံဖြင့် မေးလိုက်သည်။

လင်းယွမ်က မဲ့ပြုံး ပြုံးလိုက်သည်။ "တိုက်ဆိုင်လိုက်တာ... မင်းဆီကနေလည်း ရင်းနှီးတဲ့ အငွေ့အသက်ကို ငါ ခံစားမိတယ်... ကြည့်ရတာ ဦးနှောက်အမြူတေက မင်းဆီမှာ ရှိနေတဲ့ပုံပဲ"

ကျိုးဟောင်ရန်က သတ်ဖြတ်လိုစိတ်ကို ချက်ချင်း ပြသလိုက်ပြီး "မသေချင်ရင် နှလုံးအမြူတေကို ပေးစမ်း... မဟုတ်ရင်တော့ ငါ့ရဲ့ အစွမ်းတွေကို မင်း မြည်းစမ်းကြည့်ရလိမ့်မယ်" ဟု အော်ဟစ်လိုက်သည်။

လင်းယွမ်က ခပ်ဖျော့ဖျော့ ပြုံးလိုက်သည်။ "ငါလည်းမင်းကို အဲ့ဒီလိုပြောမလို့ပဲ"

"သေချင်နေတာပဲ"

ကျိုးဟောင်ရန်မှာ ချက်ချင်း ဒေါသထွက်သွားပြီး လက်ဝှေ့ယမ်းကာ အော်ဟစ်လိုက်သည်။ "လျှပ်စစ်ပင့်ကူအိမ် အသွင်ပြောင်း"

နောက်တစ်စက္ကန့်တွင် လင်းယွမ်ကို ပတ်ရစ်ထားသော ဧရာမ ပင့်ကူအိမ်ကြီး၏ အဆုံးရှိ ရေငုပ်သင်္ဘောအချို့က ခလုတ်များကို အသီးသီး ဖွင့်လိုက်ကြသည်။

ထိုခဏချင်းမှာပင် သိပ်သည်းနေသော ကြိုးမျှင်များပေါ်၌ ဗို့အားမြင့် လျှပ်စီးတန်းများ လျှပ်ခနဲ ဖြတ်သန်းသွားပြီး လင်းယွမ်ထံသို့ ရူးသွပ်စွာ စီးဆင်းသွားတော့သည်။

ကြောက်မက်ဖွယ်ကောင်းသော ဗို့အားမြင့် လျှပ်စီးက လင်းယွမ်၏ ခန္ဓာကိုယ်ကို ချက်ချင်း ထိုးဖောက်ဝင်ရောက်တော့မည့် အခြေအနေပင်။

လင်းယွမ်က နှုတ်ခမ်းတစ်ဖက် တွန့်ရုံသာ ပြုံးလိုက်ပြီး သူ၏ ကိုယ်လုံးမှာ ရုတ်တရက် တဖြည်းဖြည်း မှိန်ဖျော့သွားလေသည်။

မျက်စိတစ်မှိတ်အတွင်း လူအများ ကြည့်နေစဉ်မှာပင် ပုံရိပ်ယောင်တစ်ခုအဖြစ် ပြောင်းလဲသွားပြီး ပုံသဏ္ဍာန်မဲ့ အရိပ်တစ်ခုပမာ စေးကပ်နေသော ဧရာမ ပင့်ကူအိမ်ကြီးကို တိုက်ရိုက် ဖောက်ထွက်သွားခဲ့သည်။

"ဘာ"

ကျိုးဟောင်ရန် အလွန်အမင်း အံ့အားသင့်သွားသည်။ "ကျောက်စက်ပင့်ကူအိမ် က မကပ်နိုင်တဲ့ အရာဆိုတာ မရှိဘူး... သူက... အမှောင်ဓာတ် အစွမ်းကို သုံးလိုက်တာပဲ"

"မကောင်းတော့ဘူး"

ကျိုးဟောင်ရန်၏ မျက်နှာ အကြီးအကျယ် ပျက်ယွင်းသွားသော်လည်း အနောက်သို့ ဆုတ်ခွာသွားခြင်း မရှိဘဲ မျက်ဝန်းထဲ၌ သတ်ဖြတ်လိုစိတ်များ ပေါ်ထွက်လာသည်။

ရုတ်တရက် ကြောက်မက်ဖွယ်ကောင်းသော သွေးမြူများက သူ၏ ခန္ဓာကိုယ်ထဲမှ ပေါက်ကွဲထွက်ပေါ်လာ၏။

နောက်တစ်စက္ကန့်တွင် သွေးမြူများ ပျံ့နှံ့သွားပြီး လင်းယွမ်၏ အမြင်အာရုံထဲ၌ ဧရာမ အပြာရောင် ဂဏန်းကြီးတစ်ကောင် ထွက်ပေါ်လာသည်ကို မြင်တွေ့လိုက်ရသည်။

မျိုးရိုးဗီဇ ပြန်လည်ဖွဲ့စည်းခြင်း အသွင်...

ဤကျိုးဟောင်ရန်သည် မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းပိုင်ရှင်တစ်ယောက် ဖြစ်နေလေသည်။

ဂဏန်းကြီးအဖြစ် အသွင်ပြောင်းသွားပြီးနောက် သူ၏ ပတ်လည်တွင် အပြာရောင် အလင်းကွင်းများ ရိုက်ခတ်သွားသည်ကို မြင်တွေ့လိုက်ရသည်။

ရေပွက်သံများနှင့်အတူ ပူဖောင်းများက အဆက်မပြတ် ပန်းထွက်လာပြီး ပူဖောင်းပေါင်းများစွာက ပတ်လည်တွင် ဝန်းရံကာ တစ်ခုနှင့်တစ်ခု ချိတ်ဆက်သွားကြသည်။

လင်းယွမ်၏ အရိပ်က ပူဖောင်းတစ်ခုထဲသို့ ဖြတ်သန်းဝင်ရောက်သွားပြီးနောက် သူ၏ မျက်ခုံးများ ရုတ်တရက် ပင့်တက်သွားရသည်။

ပူဖောင်းအတွင်း၌ ရေဒြပ်စင် စွမ်းအားများ အမြောက်အမြား ပြည့်နှက်နေပြီး ၎င်းက သူ့ကို အမှောင်ဓာတ်၏ အရိပ်ရွှေ့ပြောင်းခြင်း အစွမ်းကို အသုံးပြုခွင့် မရအောင် ဟန့်တားထားလေသည်။

"စိတ်ဝင်စားစရာပဲ"

လင်းယွမ်က ခပ်ဟဟ ရယ်မောလိုက်သည်။ အမှောင်ဓာတ် အစွမ်းက မူလကတည်းက ပုန်းအောင်းရန်နှင့် ထွက်ပြေးရန်အတွက်သာ အားသာပြီး မျက်နှာချင်းဆိုင် တိုက်ပွဲများတွင် အနည်းငယ် အားနည်းတတ်ပေသည်။

သို့သော် သူ့တွင် အမှောင်ဓာတ် အစွမ်းတစ်ခုတည်း ရှိနေခြင်းတော့ မဟုတ်ပေ။

လင်းယွမ်၏ ခန္ဓာကိုယ်က ပြန်လည် ထွက်ပေါ်လာပြီး သွေးမြူများ ပျံ့နှံ့သွားသည်။ ၎င်းနောက်တွင် ပတ်ဝန်းကျင်ရှိ ရေခိုးရေငွေ့များက ရုတ်တရက် အရိုးခိုက်မတတ် အေးစက်လာတော့သည်။

ထိုသွေးမြူများကြားထဲတွင် ပေတစ်ရာခန့် မြင့်မားသော ဧရာမ ကိုယ်လုံးကြီးတစ်ခု ထွက်ပေါ်လာသည်ကို မြင်တွေ့လိုက်ရသည်။

ထိုအရာ ထွက်ပေါ်လာသည်နှင့်တပြိုင်နက် ပတ်ဝန်းကျင် အပူချိန်မှာ အလျင်အမြန် ကျဆင်းသွားပြီး ထိုရေပူဖောင်းများပင်လျှင် ချက်ချင်း ရေခဲရိုက်ကာ ပေါက်ကွဲကွဲအက်သွားတော့သည်။

မျိုးရိုးဗီဇ ပြန်လည်ဖွဲ့စည်းခြင်း... ရေခဲမြေရိုင်းဝက်ဝံ အသွင်။

ဆက်ရန်...

အပိုင်း(၇၄၄) ယွီကျိုးပြည်နယ်၏ အခြေအနေ

"ဂျစ်"

"ဂျစ်"

"ဂျစ်"

ပတ်ဝန်းကျင်ရှိ ဦးနှောက်ရေကန်၏ အပူချိန်မှာ အလျင်အမြန် ကျဆင်းသွားပြီး ရေခဲမြေရိုင်းဝက်ဝံ ၏ တစ်ကိုယ်လုံးမှ ကြောက်မက်ဖွယ် ကောင်းသော အအေးဓာတ်များ ပေါက်ကွဲထွက်လာကာ မိုင်အနည်းငယ် ပတ်လည်ရှိ ဦးနှောက်ရေကန်ကို မျက်စိတစ်မှိတ်အတွင်း အေးခဲသွားစေသည်။

မျက်နှာချင်းဆိုင်ရှိ ရေဓာတ်အသွင်ပြောင်း ဂဏန်းကြီး၏ မျက်နှာမှာမူ ထိုအခိုက်အတန့်တွင် အလွန်တရာ အကျည်းတန်နေလေပြီ။

၎င်းက လက်မည်းကြီး နှစ်ဖက်ကို အဆက်မပြတ် ဝှေ့ယမ်းကာ ရေခဲလွှာများကို ခွဲထုတ်နေ၏။

သို့သော် ရေခဲလွှာများ ကွဲအက်သွားသော်လည်း အသစ်ဖြစ်ပေါ်လာသော ရေခဲလွှာများက ချက်ချင်းပင် ထပ်မံ ဖုံးအုပ်လာပြန်သည်။

"သူက ခုနလေးတင် အမှောင်ဓာတ် အစွမ်းကို သုံးနေတာ... အခုကျတော့ ဘယ်လိုလုပ်ပြီး ဒီလောက် ကြောက်စရာကောင်းတဲ့ ရေခဲဓာတ် မျိုးရိုးဗီဇအသွင်ကို ပြောင်းသွားရတာလဲ"

"အဓိကအချက်က ဒီလူရဲ့ မျိုးရိုးဗီဇအသွင်ပြောင်းထားတဲ့ ခန္ဓာကိုယ် အရွယ်အစားက ပေ ၁၀၀ ကျော်လောက်တောင် ရှိနေတယ်... ဒါက သူ့ရဲ့ မျိုးရိုးဗီဇ ပြန်လည်ဖွဲ့စည်းခြင်း အဆင့်က ၃၀ ရာခိုင်နှုန်း ကျော်နေပြီလို့ ဆိုလိုတာ မဟုတ်ဘူးလား"

ကျိုးဟောင်ရန် ၏ ရင်ထဲတွင် လေးလံသွားသည်။ သူက ဦးနှောက်အမြူတေကို သန့်စင်ထားပြီးဖြစ်ရာ ကျွန်းပေါ်ရှိ အခြေအနေ အရပ်ရပ်ကို ရှင်းလင်းစွာ အာရုံခံသိရှိနိုင်သည်။

ဦးနှောက်ရေကန်ထဲတွင် ဆက်လက်နေထိုင်နေရခြင်းမှာ ရေကန်ထဲရှိ စိတ်စွမ်းအင် အမျိုးအစား စွမ်းအင်ကျောက်တုံးများကို သယ်ဆောင်ရန်အပြင် မုန်ယာကုမ္ပဏီ ဌာနချုပ်မှ စစ်ကူကို စောင့်ဆိုင်းရန်ဟူသော ရည်ရွယ်ချက်ကြောင့် ဖြစ်သည်။

နောက်ထပ် ရည်ရွယ်ချက်တစ်ခုမှာ ဤနေရာတွင် ထောင်ချောက်ဆင်ထားပြီး တစ်ဖက်လူ ကိုယ့်သေတွင်းကိုယ် တူးလာမည့်အချိန်ကို စောင့်ဆိုင်းရန်ပင်။

ထင်ထားသည့်အတိုင်းပင် တစ်ဖက်လူသည် ဦးနှောက်အမြူတေကို ပစ်မှတ်ထား၍ ရောက်လာခဲ့ပြီး သူတို့၏ ကျောက်စက် ပင့်ကူအိမ် ထောင်ချောက်ထဲသို့ အောင်မြင်စွာ ဖမ်းမိသွားခဲ့သည်။

သို့သော် တစ်ဖက်လူ၏ ခွန်အားက ဤမျှလောက်အထိ ကြီးမားနေလိမ့်မည်ဟု သူ ထင်မှတ်မထားခဲ့ပေ။ အမှောင်ဓာတ် ကိုယ်ပျောက်အစွမ်းကို ကျွမ်းကျင်ရုံသာမက ရေခဲဓာတ် မျိုးရိုးဗီဇ ပြန်လည်ဖွဲ့စည်းခြင်း တွင်လည်း ထိပ်တန်းအဆင့် ကျွမ်းကျင်သူတစ်ဦး ဖြစ်နေသေးသည်။

သူသည် ချက်ချင်းပင် အကျပ်အတည်းထဲသို့ ကျရောက်သွားလေသည်။

အဘယ်ကြောင့်ဆိုသော် သူ၏ အစွမ်းမှာ ရေဓာတ်ဖြစ်နေသောကြောင့်ပင်။ ဤကဲ့သို့သော အခြေအနေမျိုးတွင် သူ၏ အစွမ်းက တစ်ဖက်လူ၏ အပြည့်အဝ ချုပ်ချယ်မှုကို ခံလိုက်ရသည်။

ပို၍ အရေးကြီးသည်မှာ သူ၏ မျိုးရိုးဗီဇ ပြန်လည်ဖွဲ့စည်းခြင်း အဆင့်သည် တစ်ဖက်လူလောက် မမြင့်မားခြင်းပင် ဖြစ်၏။

"ဆက်တိုက်လို့ မဖြစ်တော့ဘူး"

ဤအခိုက်အတန့်တွင် ကျိုးဟောင်ရန်သည် သူတို့နှစ်ဦးကြားရှိ ကွာဟချက်ကို တွက်ဆမိသွားပြီး စကားတစ်ခွန်းမျှ မဆိုဘဲ အလျင်အမြန် နောက်ဆုတ်သွားတော့သည်။

ဧရာမ ဂဏန်းလက်မကြီးများကို ပြင်းထန်စွာ ဝှေ့ယမ်းကာ သန်မာသော ရုပ်ပိုင်းဆိုင်ရာ ခွန်အားကို အားပြု၍ ရေခဲပြင်ကို ရိုက်ခွဲလိုက်သည်။

သူသည် သန္ဓေပြောင်းအစွမ်းကို ထုတ်သုံးကာ ရေဓာတ်ဖြင့် တိုက်ခိုက်ခြင်းကို မပြုလုပ်ရဲပေ။

ထိုသို့ပြုလုပ်လိုက်ပါက တစ်ဖက်လူ၏ အေးခဲခြင်းကို ချက်ချင်းခံရမည်ဖြစ်ပြီး မည်သည့် အကျိုးသက်ရောက်မှုမျှ ရှိမည်မဟုတ်သောကြောင့် ဖြစ်သည်။

"ဘုန်း"

"ဘုန်း"

"ဘုန်း"

လင်းယွမ် ထပ်ကြပ်မကွာ လိုက်လံတိုက်ခိုက်ရန် ပြင်လိုက်စဉ် ရုတ်တရက် ပတ်ဝန်းကျင်မှ ပြင်းထန်သော ပေါက်ကွဲသံကြီးများ ထွက်ပေါ်လာသည်။

ယခင်က ရေငုပ်သင်္ဘောငယ်များသည် စွမ်းအင်အမြောက်ဆံများကို တစ်လုံးပြီးတစ်လုံး ပစ်လွှတ်ကာ လင်းယွမ်ထံသို့ အရူးအမူး ဗုံးကြဲတိုက်ခိုက်နေကြသည်ကို တွေ့လိုက်ရ၏။

လင်းယွမ်က အေးစက်စွာ ပြုံးလိုက်ပြီး စိတ်ထဲမှ အနည်းငယ် အာရုံပြုလိုက်သည်နှင့် အနီးအနား နှစ်မိုင် သုံးမိုင်ခန့်ရှိ ရေကန်တစ်ခုလုံးကို ချက်ချင်း အေးခဲသွားစေသည်။

ချက်ချင်းပင် ထိုစွမ်းအင်အမြောက်ဆံများသည် မာကျောသော ရေခဲပြင်၏ တားဆီးမှုကို ခံလိုက်ရပြီး ပေါက်ကွဲသံများ ဆက်တိုက် ထွက်ပေါ်နေသော်လည်း လင်းယွမ်ကိုမူ အနည်းငယ်မျှပင် မထိခိုက်နိုင်ပေ။

ရေငုပ်သင်္ဘောများ၏ ပတ်လည်ရှိ ရေကန်မှာလည်း အေးခဲသွားသဖြင့် ၎င်းတို့မှာ လုံးဝ လှုပ်ရှား၍ မရနိုင်တော့ချေ။

ဤကဲ့သို့သော ရေအောက် ပတ်ဝန်းကျင်မျိုးတွင် ရေခဲဓာတ်သည် ယုတ္တိမတန်လောက်အောင် ကြီးမားသော စွမ်းအားကို ပိုင်ဆိုင်ထားလေသည်။

အထူးသဖြင့် လင်းယွမ်၏ မျိုးရိုးဗီဇ ပြန်လည်ဖွဲ့စည်းခြင်း အဆင့်က ဤမျှ မြင့်မားနေသည့် အခြေအနေမျိုးတွင် ပို၍ပင် ဆိုးရွားလှ၏။

ဤ မုန်ယာကုမ္ပဏီမှ လူများသည် သူ့ကို အနည်းငယ်မျှပင် တားဆီးနိုင်စွမ်း မရှိကြပေ။

"ဝုန်း"

ထိုအချိန်မှာပင် ရေကန်ထဲ၌ ရုတ်တရက် လှိုင်းတံပိုးများ ထန်လာပြီး မြူခိုးများ စုဝေးလာကာ အရပ်မျက်နှာ အနှံ့အပြားသို့ ဖုံးလွှမ်းသွားသည်။

ကျိုးဟောင်ရန် အသွင်ပြောင်းထားသော ဂဏန်းကြီးမှာ ပျောက်ကွယ်သွားပြီး သူသည် လူသားအသွင်သို့ ပြန်လည် ပြောင်းလဲသွားသည်ကို တွေ့လိုက်ရ၏။

ဤအခိုက်အတန့်တွင် သူသည် ဦးနှောက်အမြူတေ၏ အစွမ်းကို အသုံးပြုကာ ဦးနှောက်ရေကန် တစ်ခုလုံး၌ ဦးနှောက်မြူခိုးများကို ဖန်တီးပြီး လင်းယွမ်၏ အမြင်အာရုံကို ဖုံးကွယ်လိုက်သည်။

ဦးနှောက်အမြူတေ ရှိနေသောကြောင့် ကျိုးဟောင်ရန်သည် ကျွန်းပေါ်ရှိ သက်ရှိအားလုံး၏ တည်နေရာကို ရှင်းလင်းစွာ အာရုံခံနိုင်သည်။

ထို့ကြောင့် မြူခိုးများ ဖုံးလွှမ်းနေသည့်တိုင် သူက ပို၍ အသာစီး ရနေလေသည်။

"အတင်းဝင်မတိုက်သင့်ဘူး... ဒီနေရာကနေ အရင်ထွက်သွားပြီး ဌာနချုပ်က စစ်ကူလာမယ့်အချိန်ကို စောင့်ရမယ်"

"ထူးဆန်းတယ်... ဒီလူတွေက ဘယ်အဖွဲ့အစည်းကလဲ... ဒီလို ထိပ်တန်းကျွမ်းကျင်သူမျိုး ဘယ်လိုလုပ် ရှိနေတာလဲ"

"ခိုက်ရီနည်းပညာ က လူတွေလား... ဒါမှမဟုတ် နတ်ဘုရားနိုင်ငံတော် က လူတွေလား"

ကျိုးဟောင်ရန် မျက်မှောင်ကြုတ်သွားပြီး ချက်ချင်း တွေးမိလိုက်သည်။ "နတ်ဘုရားနိုင်ငံတော်က လူတွေတော့ မဖြစ်နိုင်ဘူး... နတ်ဘုရားနိုင်ငံတော်က ဒီနေရာနဲ့ အရမ်းဝေးတယ်... ခိုက်ရီနည်းပညာကတော့ အမြဲတမ်း အပြင်ဘက်ကို စူးစမ်းရှာဖွေပြီး လေပေါ်ကျွန်းတွေကို အဆက်မပြတ် ကျူးကျော်နေတာဆိုတော့ ငါတို့ မုန်ယာကုမ္ပဏီရဲ့ နယ်မြေတွေနဲ့ ထပ်နေတာမျိုး ရှိတယ်"

"ဒါ ခိုက်ရီနည်းပညာက လူတွေများလား"

ကျိုးဟောင်ရန် ၏ ရင်ထဲတွင် သတိထားမိသွားသည်။ အနီးအနား၌ ခိုက်ရီနည်းပညာမှ သိမ်းပိုက်ထားသော လေပေါ်ကျွန်းဖြစ်သည့် ငရဲကျွန်း ရှိနေသည်ကို သူ မှတ်မိလိုက်၏။

"ကောင်းတယ်... ကောင်းတယ်... သူတို့ အနှေးနဲ့အမြန် လက်တုံ့ပြန်လာလိမ့်မယ် ဆိုတာ ငါ သိသားပဲ... ဒီ လင်ကျန်းမြို့ ကောင်းကင်ယံမှာ လေပေါ်ကျွန်းက ဒီလောက်ပဲ ရှိတာဆိုတော့... သူတို့ တကယ်ပဲ စလှုပ်ရှားလာပြီပေါ့"

"မဖြစ်ဘူး... ဒီကိစ္စကို ဌာနချုပ်ဆီ အမြန်ဆုံး သတင်းပို့မှ ရမယ်"

ထိုသို့ တွေးမိပြီးနောက် ကျိုးဟောင်ရန်သည် မြူခိုးများကြားတွင် ပိတ်မိနေသော လင်းယွမ်ကို ဂရုမစိုက်တော့ဘဲ အပြင်လောကသို့ သတင်းပို့ရန်အတွက် လေဟုန်စီးလင်းနို့ကျွန်းမှ အမြန်ဆုံး ထွက်ခွာရန်သာ စိတ်ကူးလျက် အလျင်အမြန် ထွက်ပြေးလေတော့သည်။

"ဝှီး"

သူသည် တစ်လျှောက်လုံး အမြန်ပြေးလွှားကာ ဦးနှောက်ရေကန်ထဲမှ လျင်မြန်စွာ ပျံသန်းထွက်ခွာလာပြီး သူတို့ ဝင်လာခဲ့သော လမ်းကြောင်းဆီသို့ ဦးတည်သွားလေသည်။

သို့သော် သူ ဦးနှောက်ရေကန်အပြင်ဘက်သို့ ရောက်ရှိသွားချိန်တွင် သူ၏ မျက်နှာထားမှာ ချက်ချင်း ကြောင်အမ်းသွားရ၏။

သူတို့ ဝင်လာခဲ့သော လမ်းကြောင်းမှာ ယခုအခါ လုံးဝ ပျောက်ကွယ်နေပြီ ဖြစ်ကြောင်း တွေ့လိုက်ရသောကြောင့်ပင်။

မူလက သူတို့၏ ယာဉ်ပျံ ပျံသန်းဝင်ရောက်လာနိုင်လောက်အောင် ကြီးမားကျယ်ပြန့်သော လမ်းကြောင်းကြီးက ယခုအခါ အရိပ်အယောင်ပင် မတွေ့ရတော့ချေ။

ယခု ထိုလမ်းကြောင်းကြီးသည် လုံးဝ ပျောက်ကွယ်သွားခဲ့လေပြီ။

"ဘာတွေ ဖြစ်ကုန်တာလဲ"

ကျိုးဟောင်ရန် အံ့အားသင့်သွားပြီး မြေပြင်အနီးအနားတွင် အလျင်အမြန် လိုက်လံ ရှာဖွေလေတော့သည်။

မကြာမီမှာပင် မြေပြင်ပေါ်၌ ပွတ်တိုက်ထားသော ခြေရာလက်ရာ အများအပြားကို သူ တွေ့လိုက်ရ၏။

၎င်းတို့မှာ ယာဉ်ပျံ၏ ဘီးများက မြေပြင်ကို ပွတ်ဆွဲသွားစဉ်က ကျန်ရစ်ခဲ့သော အရာများ ဖြစ်သည်။

အနီးအနားတွင် မည်းနက်နေသော မီးလောင်ရာများလည်း ရှိနေပြီး ထိုအရာများမှာ ယာဉ်ပျံမှ ပန်းထုတ်လိုက်သော စွမ်းအင်မြင့် လောင်စာများကြောင့် လောင်ကျွမ်းသွားသော အရာများပင် ဖြစ်လေသည်။

သူသည် ထိုအရာများကို ခြေရာခံကာ နံရံဘက်သို့ ချက်ချင်း လှမ်းကြည့်လိုက်သည်။

သို့သော် အသားနံရံကြီးတစ်ခုက ထိုခြေရာများအပေါ်တွင် ကန့်လန့်ဖြတ် တည်ရှိနေပြီး မူလလမ်းကြောင်းကို အပြီးတိုင် ပိတ်ဆို့ထားသည်ကို တွေ့လိုက်ရ၏။

ကျိုးဟောင်ရန် ချက်ချင်း သတိဝင်လာသည်။ "သေစမ်း... အဲဒီလူက နှလုံးအမြူတေကို သန့်စင်ပြီးသွားလို့ လေပေါ်ကျွန်းရဲ့ မြေမျက်နှာသွင်ပြင်ကို သူ့စိတ်ကြိုက် ပြောင်းလဲပစ်နိုင်တာပဲ"

"ဒီလမ်းကြောင်းကို သူ ပိတ်ပစ်လိုက်တာပဲ"

ထိုသို့ တွေးမိလိုက်သည်နှင့် ကျိုးဟောင်ရန်၏ မျက်နှာမှာ ချက်ချင်း မှောင်မိုက်သွားတော့သည်။

"ပြေးလေ... ဘာလို့ ရပ်သွားတာလဲ"

ထိုအချိန်မှာပင် သူ၏အနောက်ဘက်မှ အေးစက်စက် အသံတစ်သံ ထွက်ပေါ်လာသဖြင့် ကျိုးဟောင်ရန် ရင်ထဲ အေးခနဲ ဖြစ်သွားပြီး ရုတ်တရက် နောက်လှည့်ကြည့်လိုက်သည်။

မူလက ဦးနှောက်ရေကန်ထဲရှိ မြူခိုးများကြားတွင် ပိတ်မိနေသော လင်းယွမ်သည် မည်သည့်အချိန်ကတည်းက ရောက်ရှိနေမှန်း မသိဘဲ သူ့နောက်သို့ လိုက်ပါလာခဲ့လေပြီ။

ကျိုးဟောင်ရန်၏ မျက်နှာအမူအရာ အနည်းငယ် ပြောင်းလဲသွားသည်။ "မင်း ဘယ်လို ထွက်လာတာလဲ"

လင်းယွမ်က အေးစက်စွာ ပြုံးလိုက်သည်။ "ငါ နှလုံးအမြူတေကို သန့်စင်လိုက်ပြီဆိုတာ မင်း ခန့်မှန်းမိနေမှတော့... ဒီကျွန်းပေါ်က မြေမျက်နှာသွင်ပြင် အားလုံးကို ငါ မျက်လုံးမှိတ်ပြီး လျှောက်ရင်တောင် အပြင်ကို ထွက်လာနိုင်တယ် ဆိုတာ မင်း မသိဘူးလား"

ကျိုးဟောင်ရန်၏ မျက်နှာထားမှာ အလွန် ကြည့်ရဆိုးသွားပြီး မသိစိတ်၏ စေ့ဆော်မှုဖြင့် နောက်သို့ ခြေလှမ်းအနည်းငယ် ဆုတ်လိုက်မိသည်။

"မင်းက ခိုက်ရီနည်းပညာ က လူလား"

"ငါတို့ မုန်ယာကုမ္ပဏီ နဲ့ မင်းတို့က တစ်ယောက်နဲ့ တစ်ယောက် ရန်စဖူးတာမှ မရှိတာ... အားလုံးက ကုမ္ပဏီအတွက် အလုပ်လုပ်ပေးနေကြတာပဲကို... ဒီလောက်အထိ အသေသတ်ဖို့ လိုလို့လားဗျာ"

လင်းယွမ်က သူ့ကိုကြည့်ကာ ရုတ်တရက် ပြုံးလိုက်ပြီး ခေါင်းအသာညိတ်လျက် ပြောလိုက်သည်။ "မင်း ပြောတာလည်း အဓိပ္ပာယ်ရှိပါတယ်... ဒီလိုလုပ်... ဦးနှောက်အမြူတေကို ပေးခဲ့ရင် မင်းကို ငါ လွှတ်ပေးမယ်"

ကျိုးဟောင်ရန်၏ မျက်လုံးများ အရောင်လက်သွားပြီး မေးလိုက်သည်။ "ငါ မင်းကို ဘယ်လို ယုံရမလဲ"

လင်းယွမ်က ပြုံးစစဖြင့် "မင်းက ဘယ်လို ဖြစ်ချင်လို့လဲ" ဟု မေးလိုက်သည်။

"အရင်ဆုံး ငါ့ကို ဦးနှောက်ရေကန်ကနေ ထွက်သွားခွင့်ပေး... ပြီးတော့ ငါ့အတွက် ယာဉ်ပျံ တစ်စင်း ပြင်ဆင်ပေးထား..."

"ဟား ဟား... မင်း တွေးထားတာတွေက တော်တော်လေး လှပနေပါလား"

လင်းယွမ် ရုတ်တရက် ရယ်မောလိုက်ပြီး ကျိုးဟောင်ရန် တုံ့ပြန်ရန် အချိန်ပင် မရလိုက်မီ သူ၏ စိတ်ပင်လယ်ထဲမှ ကြောက်မက်ဖွယ်ကောင်းသော စိတ်စွမ်းအင်တစ်ခု ရုတ်ခြည်း ပေါက်ကွဲထွက်လာလေသည်။

"ရွှပ်"

မျက်စိတစ်မှိတ်အတွင်းမှာပင် ကြီးမားလှသော စိတ်စွမ်းအင်များက ကြိုးမျှင်လေးများအဖြစ် စုစည်းသွားကာ ကျိုးဟောင်ရန်ထံသို့ အရှိန်အဟုန်ဖြင့် ပြေးထွက်သွားတော့သည်။

ကျိုးဟောင်ရန်၏ မျက်နှာ အကြီးအကျယ် ပျက်ယွင်းသွားပြီး သန္ဓေပြောင်းအစွမ်းကို အလျင်အမြန် ထုတ်သုံးကာ သူ၏ ခန္ဓာကိုယ်ကို ရေဓာတ်အဖြစ် ချက်ချင်း အသွင်ပြောင်းလိုက်သည်။

သို့သော် သူ အပြည့်အဝ အသွင်မပြောင်းနိုင်ခင်မှာပင် လင်းယွမ်က ရုတ်တရက် နှုတ်မှ ဖွင့်ဟလိုက်သည်။ "ဒီနေရာမှာ ဓာတ်အသွင်ပြောင်းခြင်းကို တားမြစ်တယ်"

"ဝုန်း"

မျက်စိဖြင့် မမြင်နိုင်သော စွမ်းအားတစ်ခုက ချက်ချင်း ပျံ့နှံ့သွားပြီး အမည်မသိ အကြောင်းအကျိုး သင်္ကေတတစ်ခုက အနီးအနားရှိ ဧရိယာတစ်ခုလုံးသို့ ကျရောက်သွားလေသည်။

ကျိုးဟောင်ရန်၏ ဓာတ်အသွင်ပြောင်းခြင်း ဖြစ်စဉ်မှာ ရုတ်တရက် အဟန့်အတား ခံလိုက်ရပြီး သူ၏ ခန္ဓာကိုယ်တစ်ခုလုံး ရုပ်ပိုင်းဆိုင်ရာ အခြေအနေသို့ ချက်ချင်း ပြန်လည် ရောက်ရှိသွားတော့သည်။

သူသည် ချက်ချင်းပင် ထိတ်လန့်တုန်လှုပ်သွားပြီး မယုံကြည်နိုင်စွာဖြင့် စူးစူးဝါးဝါး အော်ဟစ်လိုက်သည်။ "ဘယ်လိုလုပ် ဖြစ်နိုင်မှာလဲ"

သို့သော် မည်သူကမျှ သူ့ကို ဂရုမစိုက်ချေ။ ထို စိတ်စွမ်းအင် ကြိုးမျှင်များသည် သူ၏ ခန္ဓာကိုယ်ထဲသို့ ချက်ချင်း တိုးဝင်သွားပြီး သူ၏ ဦးနှောက်အာရုံကြော ကွန်ရက်ကို တိုက်ရိုက် ထိန်းချုပ်လိုက်လေသည်။

မျက်စိတစ်မှိတ်အတွင်းမှာပင် သူ၏ တစ်ကိုယ်လုံး သစ်သားရုပ်သဖွယ် တောင့်တင်းသွားပြီး အနည်းငယ်မျှပင် လှုပ်ရှား၍ မရနိုင်တော့ပေ။

"ရုပ်သေးကြိုးမျှင်"

လင်းယွမ်က ခပ်ဟဟ ရယ်မောလိုက်ပြီး အနားသို့ လျှောက်လာကာ ရုပ်သေးကြိုးမျှင်ကို အသုံးပြု၍ ကျိုးဟောင်ရန်၏ ခန္ဓာကိုယ်တွင်းရှိ ဦးနှောက်အမြူတေကို သူကိုယ်တိုင် ထုတ်ယူလာစေရန် ဖြည်းညှင်းစွာ ထိန်းချုပ်လိုက်သည်။

ရုပ်သေးကြိုးမျှင်၏ ထိန်းချုပ်မှုအောက်တွင် ကျိုးဟောင်ရန်သည် သူ၏ ခန္ဓာကိုယ်ကို လုံးဝ ထိန်းချုပ်နိုင်စွမ်း မရှိတော့ဘဲ သူ၏ ခန္ဓာကိုယ်တွင်းရှိ ဦးနှောက်အမြူတေကို ကိုယ်တိုင်ကိုယ်ကျ စုစည်းထုတ်ဖော်လိုက်ရလေသည်။

ကြည်လင်တောက်ပနေသော ဦးနှောက်အမြူတေ တစ်လုံးက သူ၏ နဖူးထဲမှ ပျံသန်းထွက်ပေါ်လာပြီး အနီရောင် အလင်းတန်းများကို ဖြာထွက်နေသည်။

လင်းယွမ်က လက်လှမ်းကာ ဦးနှောက်အမြူတေကို ဖမ်းဆုပ်လိုက်ပြီး ၎င်းထဲတွင် ပါဝင်သော စွမ်းအင်များကို ခံစားကြည့်လိုက်သည်။

သူက ကျိုးဟောင်ရန်ကို ကြည့်ကာ ပြောလိုက်သည်။ "မုန်ယာကုမ္ပဏီက ယွီကျိုးပြည်နယ် မှာ ရှိတာကို... ငါတို့ လင်ကျန်းမြို့ ကောင်းကင်ယံအထိ လာပြီး လေပေါ်ကျွန်းကို အပိုင်စီးရဲတယ်ဆိုတော့... မင်းတို့ လက်တံက တော်တော် ရှည်တာပဲ"

ကျိုးဟောင်ရန်၏ နှုတ်ခမ်းများ လှုပ်ရှားသွားသော်လည်း စကားတစ်ခွန်းမျှ ထွက်ပေါ်လာခြင်း မရှိပေ။

လင်းယွမ်က သူ၏ မျက်နှာကြွက်သားများအပေါ် ထိန်းချုပ်ထားမှုကို လွှတ်ပေးလိုက်သည်။

ထိုအခါမှသာ ကျိုးဟောင်ရန်က စကားပြောလာလေသည်။ "ငါတို့ရဲ့ ယာဉ်ပျံ စူးစမ်းလေ့လာချက်အရ... ယွီမြစ် ရဲ့ တောင်ဘက်မှာရှိတဲ့ နေရာတွေ အကုန်လုံးနီးပါး ရေမြုပ်ကုန်ပြီ... တောင်ကုန်းတချို့လောက်ပဲ ရေပေါ်ပေါ်နေတော့တာ... တခြားမြို့တွေဆိုတာလည်း ပျောက်ကွယ်သွားတာ ကြာပြီ"

"လင်ကျန်းမြို့ ရှိတဲ့ ကျန်းနန်ပြည်နယ် ကလည်း ရေပြင်ကြီးသက်သက် ဖြစ်နေပြီကိုး... ငါတို့ ဒီနေရာကို သိမ်းပိုက်တာ ဘာများ မှားနေလို့လဲဗျာ"

လင်းယွမ် အေးစက်စွာ ပြုံးလိုက်သည်။ "မင်းတို့ရဲ့ ယာဉ်ပျံက ဒီ လင်ကျန်းမြို့ကို လာပြီး စူးစမ်းလေ့လာထားတာ ကြာပြီပေါ့... အဲဒီ တောင်တွေပေါ်မှာ အသက်ရှင်ကျန်ရစ်သူတွေ အများကြီး ရှိနေသေးတာကိုရော မင်းတို့ မြင်ခဲ့ကြရဲ့လား"

ကျိုးဟောင်ရန်က ပြန်ပြောသည်။ "မြင်တယ်လေ... ဒါပေမဲ့ ဘာဖြစ်လဲ... ငါတို့ ယွီကျိုးပြည်နယ် မှာလည်း အသက်ရှင်ကျန်ရစ်သူတွေက နွားမွှေးတွေလောက်ကို များနေတာ... အရင်းအမြစ်တွေကတောင် မလောက်မငှ ဖြစ်နေပြီလေ... ဒီလူတွေကို ကယ်ဖို့အတွက် မိုင်ထောင်ချီ အဝေးကြီးကို ငါတို့က လာရဦးမှာလား"

"ကုမ္ပဏီက အဲဒီလို လုံးဝ လုပ်မှာမဟုတ်ဘူး... ဒါကဘာအကျိုးအမြတ်မှ မရှိတဲ့ အလုပ်ပဲ"

"နေပါဦး... မင်းက ခိုက်ရီနည်းပညာ က လူမဟုတ်ဘူးလား... မင်းက ဒီ လင်ကျန်းမြို့ က ဒေသခံလား"

ဤအခိုက်အတန့်တွင် ကျိုးဟောင်ရန် ရုတ်တရက် သဘောပေါက်သွားပြီး သူ၏ မျက်နှာပေါ်၌ တုန်လှုပ်အံ့သြမှုများ ပြည့်နှက်သွားတော့သည်။

"အခုမှ စဉ်းစားမိတာလား" လင်းယွမ် အေးစက်စွာ ပြုံးလိုက်သည်။ သူသည် လက်ထဲရှိ ဦးနှောက်အမြူတေကို စတင် သန့်စင်နေပြီ ဖြစ်သည်။

ကျိုးဟောင်ရန်က မယုံကြည်နိုင်စွာဖြင့် ပြောလေသည်။ "မဖြစ်နိုင်ဘူး... ဒါ ဘယ်လိုလုပ် ဖြစ်နိုင်မှာလဲ"

"မင်းတို့ဆီမှာ ရေမြုပ်သွားတာ ကြာလှပြီကို... မိုးကြိုးမုန်တိုင်း ဇုန်ကို ဖြတ်သန်းသွားနိုင်တဲ့ ယာဉ်ပျံကို တီထွင်ဖို့ မင်းတို့ဆီမှာ နည်းပညာတွေ ဘယ်ကရလာတာလဲ"

"မင်းက တကယ်တော့ ဘယ်သူလဲ"

"ငါတို့ မုန်ယာကုမ္ပဏီက ဘယ်လောက် အစွမ်းထက်လဲဆိုတာ မင်း သိလား... အခု မင်းရဲ့ လုပ်ရပ်တွေက ငါတို့ ကုမ္ပဏီကို လုံးလုံးလျားလျား ရန်စလိုက်တာပဲ... မင်း ဇာတ်သိမ်းလှမှာ မဟုတ်ဘူးနော်"

"အခု ငါ့ကို လွှတ်ပေးလိုက်ပါ... ငါ့ ဦးလေးက ကုမ္ပဏီရဲ့ အထက်ပိုင်း အရာရှိတစ်ယောက်ပဲ... မင်းအတွက် ငါ အသနားခံပေးလို့ ရတယ်"

ခေတ္တမျှ တုန်လှုပ်သွားပြီးနောက် ကျိုးဟောင်ရန်သည် ချက်ချင်း အသိဝင်လာကာ လင်းယွမ်အား အလျင်အမြန် ဖျောင်းဖျ နားချလေတော့သည်။

လင်းယွမ်ကမူ မကြားဟန်ဆောင်ကာ ဦးနှောက်အမြူတေကိုသာ တိတ်တဆိတ် ဆက်လက် သန့်စင်နေလေ၏။

သူ၏ စိတ်စွမ်းအင် ပြင်းအားဖြင့် ဦးနှောက်အမြူတေကို သန့်စင်သည့် အမြန်နှုန်းမှာ အလွန်တရာ လျင်မြန်လှသည်။

ဦးနှောက်အမြူတေမှ အချက်အလက် မြောက်မြားစွာသည် လင်းယွမ်၏ ဦးနှောက်ထဲသို့ ဝင်ရောက်လာသည်။ ၎င်းက ဤလေပေါ်ကျွန်းကြီးကို သူ အပြီးတိုင် ထိန်းချုပ်နိုင်သွားပြီဖြစ်ကြောင်း ဖော်ပြနေခြင်းပင်။

ဦးနှောက်အမြူတေကို သန့်စင်ပြီးစီးသွားချိန်တွင် လင်းယွမ် မျက်လုံးများကို ဖွင့်ကြည့်လိုက်သည်။

မျက်နှာချင်းဆိုင်ရှိ ကျိုးဟောင်ရန်မှာ လင်းယွမ် သူ့ကို လွှတ်ပေးစေရန် ခြိမ်းခြောက်တစ်လှည့် မြှူဆွယ်တစ်လှည့်ဖြင့် မရပ်မနား ပြောဆိုဖျောင်းဖျနေဆဲပင်။

လင်းယွမ်သည် သူနှင့် အချည်းနှီး စကားပြောဆိုနေရန် စိတ်မဝင်စားတော့ဘဲ ဝိညာဉ် ချုပ်နှောင်ခြင်း သင်္ကေတ တစ်ခုကို တိုက်ရိုက် စုစည်းထုတ်ဖော်ကာ တစ်ဖက်လူ၏ စိတ်ပင်လယ်ထဲသို့ ရိုက်သွင်းလိုက်တော့သည်။

မျက်စိတစ်မှိတ်အတွင်းမှာပင် ကျိုးဟောင်ရန်သည် လင်းယွမ်၏ အပြည့်အဝ ထိန်းချုပ်မှုကို ခံလိုက်ရလေပြီ။

"မင်း... မင်း..."

ကျိုးဟောင်ရန် ဒေါသတကြီး အော်ဟစ်ချင်သော်လည်း ပြန်လည် မခုခံနိုင်သော စွမ်းအားတစ်ခုက လင်းယွမ်၏ ရှေ့မှောက်တွင် အညံ့ခံရန် သူ့ကို အတင်းအကျပ် ဖိအားပေးနေ၏။

အညံ့မခံပါက ကြီးမားလှသော ဘေးဆိုးကြီး ကျရောက်လာတော့မည့် အလားပင်။

သူ၏ မျက်နှာမှာ ဖြူဖျော့နေပြီး "မင်း... ငါ့ကို ဘာလုပ်လိုက်တာလဲ" ဟု မေးလိုက်သည်။

လင်းယွမ်က သူ့ကို ဂရုမစိုက်ဘဲ တိုက်ရိုက် ပြောလိုက်သည်။ "အခု... မင်းတို့ ယွီကျိုးပြည်နယ် ရဲ့ အခြေအနေကို ငါနဲ့ သေချာ ဆွေးနွေးကြတာပေါ့"

"မင်းရဲ့ စကားအရဆိုရင် ယွီကျိုးပြည်နယ်ထဲမှာ မုန်ယာကုမ္ပဏီ တင်မကဘူး... တခြား အဖွဲ့အစည်းတွေပါ ရှိနေသေးတာပေါ့... မင်းတို့ ယွီကျိုးပြည်နယ်က ရေမြုပ်တာ လုံးဝ မခံရသေးဘူးဆိုတဲ့ သဘောလား"

ကျိုးဟောင်ရန်သည် စကားလမ်းကြောင်း လွှဲချင်သော်လည်း ဝိညာဉ် ချုပ်နှောင်ခြင်း သင်္ကေတ၏ ထိန်းချုပ်မှုအောက်တွင် သူသည် လင်းယွမ်၏ စကားများကို အနည်းငယ်မျှပင် မလွန်ဆန်ရဲတော့ချေ။

"ဟုတ်တယ်... ငါတို့ ယွီကျိုးပြည်နယ်က အခုထိ ရေအပြည့်အဝ မမြုပ်သေးဘူး... အဆောက်အအုံ တော်တော်များများက တစ်ဝက်ကျော်လောက် ရေပေါ်မှာ ပေါ်နေတုန်းပဲ"

"ယွီကျိုးမှာ တောင်တွေ များတယ်လေ... တောင်ပေါ် တော်တော်များများမှာ နေထိုင်လို့ရတဲ့ မြေနေရာတွေ အများကြီး ရှိသေးတယ်... ပြီးတော့ လေပေါ်ကျွန်း တချို့ပါ ပေါ်လာတော့ ငါတို့ ဆက်လက် ရပ်တည်နိုင်ခဲ့တာပါ"

"လောလောဆယ် ယွီကျိုးကို အဓိက အဖွဲ့အစည်းကြီး သုံးခုက ထိန်းချုပ်ထားတယ်... အဲဒါတွေကတော့ ငါတို့ မုန်ယာ... နိုင်ငံတကာ လုပ်ငန်းစုဖြစ်တဲ့ ခိုက်ရီနည်းပညာ နဲ့ နတ်ဘုရားနိုင်ငံတော် တို့ပဲ"

"အဲဒီထဲမှာမှ နတ်ဘုရားနိုင်ငံတော်က ယွီကျိုး မြောက်ပိုင်းမှာ အဓိက အခြေစိုက်တယ်... သူတို့က တောင်ပိုင်းကို သိပ်ပြီး နယ်မြေ မချဲ့ထွင်တတ်ဘူး"

"ငါတို့နဲ့ ခိုက်ရီနည်းပညာ ကတော့ ယွီကျိုး တောင်ပိုင်းမှာ ရှိကြတယ်... အဲဒီထဲမှာ ခိုက်ရီနည်းပညာက ငါတို့ထက် မြောက်ပိုင်းက နတ်ဘုရားနိုင်ငံတော်နဲ့ ပိုနီးတယ်... ဌာနချုပ်က ကျိုးတောက်တောင် မှာ ရှိတာ"

"ငါတို့ မုန်ယာကုမ္ပဏီ ဌာနချုပ်ကတော့ ချီတောင် မှာ ရှိပြီး ကျန်းနန်ပြည်နယ် ဟွေကျိုး နဲ့ ပိုနီးတယ်"

ကျိုးဟောင်ရန်၏ ရှင်းပြချက်များနှင့်အတူ လင်းယွမ်သည် ယွီကျိုးပြည်နယ် တစ်ခုလုံးအပေါ် အကြမ်းဖျင်း နားလည်လာခဲ့လေပြီ။

ယွီကျိုးပြည်နယ်၏ ရေဘေး အန္တရာယ်မှာ ကျန်းနန်ပြည်နယ် ထက်စာလျှင် များစွာ ပိုမို ကောင်းမွန်နေသည်။ အနည်းဆုံးတော့ ရေလွှမ်းမိုးမှုသည် ယွီကျိုးရှိ လူနေအဆောက်အအုံများကို အပြည့်အဝ မဖုံးလွှမ်းနိုင်သေးဘဲ ရေမျက်နှာပြင်မှာလည်း ထိုမျှလောက်အထိ မြင့်တက်မလာသေးပေ။

ယွီကျိုးပြည်နယ် တစ်ခုလုံးသည် အစောပိုင်း ထိတ်လန့် ဝရုန်းသုန်းကား အခြေအနေများကို ဖြတ်သန်းပြီးနောက် အကြီးအသေး အဖွဲ့အစည်းများ တဖြည်းဖြည်း ပေါ်ပေါက်လာခဲ့သည်။

ထို့နောက် အဆက်မပြတ် ဝါးမျို သိမ်းပိုက်မှုများကြားမှ အဓိက အဖွဲ့အစည်းကြီး သုံးခုက တဖြည်းဖြည်း ထင်ရှား ပေါ်ထွက်လာခဲ့ခြင်း ဖြစ်၏။

ထို အဖွဲ့အစည်းကြီး သုံးခုမှာ ယွီကျိုး မြောက်ပိုင်းရှိ နတ်ဘုရားနိုင်ငံတော်၊ ယွီကျိုး အလယ်ပိုင်း ကျိုးတောက်တောင် မှ ခိုက်ရီနည်းပညာ နှင့် ယွီကျိုး တောင်ပိုင်းမှ မုန်ယာကုမ္ပဏီ တို့ပင် ဖြစ်လေတော့သည်။

ဆက်ရန်...