အခန်း (၇၅၁-၇၅၂)

အပိုင်း (၇၅၁) ပေါင်းစပ်စက်ရုပ်

"တပ်မှူး... တပ်မှူး... လာပြီ... ထိုက်ယန်တောင်က လူတွေ ရောက်လာပြီ"

တိမ်မြူကျွန်းနှင့် မိုင်အနည်းငယ်အကွာရှိ ပင်လယ်ရေပြင်ထက်တွင် ရေငုပ်သင်္ဘောတစ်စင်းက ရေပေါ်သို့ ပေါ်ထွက်လာ၏။

သို့သော် ထိုရေငုပ်သင်္ဘောက အလွန်ထူးခြားနေပြီး ၎င်း၏ကိုယ်ထည်တစ်ခုလုံးကို ဖောက်ထွင်းမြင်နိုင်သော စွမ်းအင်အကာအကွယ်တစ်ခုက ဖုံးလွှမ်းထားသည်။

အဝေးမှလှမ်းကြည့်လျှင် ၎င်းရှိနေမှန်း လုံးဝမသိနိုင်ဘဲ ရေပေါ်တွင် မျောပါနေသော ပလတ်စတစ်အကြည်စတစ်ခုနှင့်သာ တူနေ၏။

၎င်းက စစ်တပ်မှ တီထွင်ထုတ်လုပ်ထားသော ကိုယ်ပျောက် သင်္ကေတအစီအရင် အသစ်ပင်ဖြစ်သည်။

ဤကိုယ်ပျောက် သင်္ကေတအစီအရင်ကို စစ်တပ်၏ ရေငုပ်သင်္ဘောများနှင့် စစ်ယာဉ်ပျံများ၏ ဒီဇိုင်းများတွင် ကျယ်ကျယ်ပြန့်ပြန့် အသုံးပြုလာကြပြီဖြစ်သည်။

ဤကဲ့သို့သော စစ်ယာဉ်ပျံများနှင့် ရေငုပ်သင်္ဘောများကို ကိုယ်ပျောက်တိုက်လေယာဉ်များ၊ ကိုယ်ပျောက်ရေငုပ်သင်္ဘောများဟုလည်း ခေါ်ဝေါ်ကြသည်။

ယခုအခါ ရေငုပ်သင်္ဘောအတွင်း၌ ကျန်းယွီကျန်း၊ ကျန်းဝမ်ကျင်းနှင့် ယွိပေါ်တို့ လူတစ်စု စုဝေးနေကြသည်။

ယွိပေါ်က စိတ်လှုပ်ရှားနေသော အမူအရာဖြင့် မှန်ပြောင်းကိုကိုင်ကာ တိမ်မြူကျွန်းဘက်ရှိ တိုက်ပွဲအခြေအနေကို ကျန်းယွီကျန်းထံ အလျင်အမြန် သတင်းပို့နေ၏။

သို့သော် ကျန်းယွီကျန်း၏ မျက်နှာကမူ ဝမ်းသာသည့်ပုံမပေါ်ဘဲ အနည်းငယ် ပျက်ယွင်းနေသည်။

ကျန်းဝမ်ကျင်းက "အဖေ... ဘာဖြစ်လို့လဲ... ထိုက်ယန်တောင်က လူတွေ နောက်ဆုံးတော့ လှုပ်ရှားလာပြီလေ... အဖေက ဘာလို့ ဝမ်းမသာရတာလဲ" ဟု မေးလိုက်သည်။

ကျန်းယွီကျန်းက ခေါင်းခါယမ်းလိုက်ပြီး "အရမ်းနောက်ကျသွားပြီကွ" ဟု သက်ပြင်းချကာ ပြောလိုက်၏။

"ဟင်... ဘာက နောက်ကျသွားတာလဲ" ကျန်းဝမ်ကျင်းက နားမလည်နိုင်စွာဖြင့် မေးလိုက်သည်။

ကျန်းယွီကျန်းက လေးနက်သောအသံဖြင့် "သူတို့ လာတာ အရမ်းနောက်ကျသွားတယ်... မဟုတ်ဘူး... လာတာနောက်ကျတာမဟုတ်ဘဲ ဟိုကောင် လင်းယွမ်က တမင်သက်သက် ဒီအချိန်ရောက်မှ လာတာ" ဟု ပြောလိုက်သည်။

"အရင်က ထိုက်ယန်တောင်ဆီကို အကူအညီတောင်းဖို့ ငါ လူတွေကို အကြိမ်ကြိမ် လွှတ်ခဲ့ပေမဲ့... ထိုက်ယန်တောင်က လူတွေက လုံးဝ ဂရုမစိုက်ခဲ့ကြဘူး"

"အခု တိမ်မြူကျွန်း ကျဆုံးသွားမှပဲ ဒီလူတွေက အိမ်တိုင်ရာရောက် ရောက်ချလာကြတယ်"

"ဒါက တိမ်မြူကျွန်းကို ကူညီပြီး မုန်ယာကုမ္ပဏီရဲ့ ယာဉ်ပျံတွေကို မောင်းထုတ်ပေးချင်လို့ မဟုတ်ဘူး... ကျေးဇူးတင်ခံရအောင် လုပ်ပြီး အခွင့်အရေးယူချင်လို့ပဲ"

"သူက ဒါကိုအသုံးချပြီး တိမ်မြူကျွန်းတစ်ခုလုံးကို အပြီးတိုင် သိမ်းပိုက်ချင်နေတာ"

ထိုစကားကို ကြားလိုက်ရသည်နှင့် ကျန်းဝမ်ကျင်း၏ မျက်နှာတွင် ဒေါသအရိပ်အယောင်များ ပေါ်လာပြီး "သူကများ လုပ်ရဲလို့လား... ဘာအရည်အချင်းနဲ့လဲ" ဟု ပြောလိုက်သည်။

ကျန်းယွီကျန်းက သမီးဖြစ်သူကို တစ်ချက်ကြည့်လိုက်ပြီး "အခုချိန်မှာ သူ့ဆီမှာ အဲဒီလိုလုပ်နိုင်တဲ့ အရည်အချင်းရှိနေတာအမှန်ပဲ" ဟု ပြောလိုက်၏။

ကျန်းဝမ်ကျင်းမှာ အသက်ရှူမှားသွားပြီး ထိုက်ယန်တောင်၏ ယာဉ်ပျံများက တစ်ဖက်သတ် ဖိနှိပ်တိုက်ခိုက်နေသည့် မြင်ကွင်းကို လှမ်းကြည့်ကာ ဆွံ့အသွားတော့သည်။

ထိုအချိန်တွင် ယွိပေါ်က မနေနိုင်တော့ဘဲ "တပ်မှူး... တိမ်မြူကျွန်းရဲ့ အမြူတေက တပ်မှူးရဲ့ လက်ထဲမှာ ရှိနေတာပဲ... သူတို့ တိမ်မြူကျွန်းကို သိမ်းပိုက်ချင်တယ်ဆိုရင်တောင် အဲဒီလောက် မလွယ်နိုင်ပါဘူး" ဟု ဝင်ပြောလိုက်သည်။

ကျန်းယွီကျန်းက သက်ပြင်းတစ်ချက်ချလိုက်ပြီး "ဟုတ်တယ်... တိမ်မြူကျွန်းရဲ့ အမြူတေက ငါ့လက်ထဲမှာ ရှိနေသေးတယ်... သူတို့ တိမ်မြူကျွန်းကို အပြီးတိုင် သိမ်းပိုက်ချင်ရင် ငါ့ဆီကို မလာဘဲ နေလို့မရဘူး" ဟု ပြောလိုက်သည်။

"မင်းတို့ပဲ ပြောကြည့်လေ... ငါတို့ရဲ့ လက်ရှိအခြေအနေနဲ့ဆိုရင် လင်းယွမ်နဲ့ ထိုက်ယန်တောင်ကို ရင်ဆိုင်နိုင်ပါ့မလား"

ယွိပေါ်နှင့် ကျန်းဝမ်ကျင်းတို့မှာ ချက်ချင်းပင် ဆွံ့အသွားကြသည်။

ထိုက်ယန်တောင်နှင့် တကယ်တမ်း ထိပ်တိုက်တွေ့ခဲ့လျှင် ဖြစ်လာမည့် အကျိုးဆက်ကို သူတို့နှစ်ဦးစလုံး ကောင်းကောင်းသိထားကြသည်မှာ ထင်ရှားလှ၏။

ကျန်းဝမ်ကျင်းမှာ အနည်းငယ် ထိတ်လန့်သွားပြီး "အဖေ... ဒါဆို အခု သမီးတို့ ဘယ်လိုလုပ်ကြမလဲ" ဟု အလျင်အမြန် မေးလိုက်သည်။

ကျန်းယွီကျန်းက လုံးဝ အရေးနိမ့်နေပြီဖြစ်သော မုန်ယာကုမ္ပဏီ၏ ယာဉ်ပျံတပ်ကြီးကို ကြည့်ရင်း "လူဆိုတာ မြင့်ရာကိုတက်ပြီး ရေဆိုတာ နိမ့်ရာကို စီးဆင်းမြဲပဲကွ" ဟု သက်ပြင်းချကာ ပြောလိုက်သည်။

"ငါတို့ကလည်း သဘာဝအတိုင်း မြင့်တဲ့နေရာကို သွားမှရမယ်... ဒီလင်ကျန်းမြို့မှာ ဆက်နေစရာ အကြောင်းမရှိတော့ဘူး"

"သွားကြစို့... စခန်းထဲက လူတွေကို အကြောင်းကြားလိုက်... ရေငုပ်သင်္ဘောကို စက်နှိုးခိုင်းလိုက်တော့... ငါတို့ လင်ကျန်းမြို့ကနေ ထွက်ခွာကြမယ်"

ထိုစကားကို ကြားလိုက်ရသည်နှင့် ယွိပေါ်နှင့် ကျန်းဝမ်ကျင်းတို့မှာ အတော်လေး အံ့အားသင့်သွားကြသည်။

"တပ်မှူးက တိမ်မြူကျွန်းကို စွန့်လွှတ်ပြီး လင်ကျန်းမြို့ကနေ ထွက်သွားတော့မလို့လား"

"တပ်မှူး... ကျွန်တော်တို့က ဘယ်ကို သွားမှာလဲ"

သူတို့နှစ်ဦးက အလျင်အမြန် မေးမြန်းလိုက်ကြသည်။

ကျန်းယွီကျန်းက "စိတ်ချပါ... ငါက နောက်ဆုတ်ဖို့ လမ်းကြောင်းကို ကြိုတင် စီစဉ်ထားပြီးသားပါ" ဟု ပြောလိုက်၏။

"လင်ကျန်းမြို့မှာ လင်းယွမ်နဲ့ ထိုက်ယန်တောင် ပေါ်လာပြီဆိုတော့... ဒီနေရာကို ငါတို့ ဆက်ထိန်းထားနိုင်မှာ မဟုတ်တော့ဘူး"

"ဒါပေမဲ့ ကျိအန်မြို့ကတော့ အခုထိ ဖရိုဖရဲ ဖြစ်နေတုန်းပဲ... လွန်ခဲ့တဲ့ ခြောက်လလောက်ကတည်းက အဲဒီကို ငါ လူလွှတ်ထားခဲ့တာ"

"အခု အဲဒီဘက်မှာ မြေမိခင်ဂိုဏ်းနဲ့ ဝိညာဉ်စွမ်းအင်ဂိုဏ်းက အကြွင်းအကျန်တွေ ဦးဆောင်ပြီး အတွင်းတိုက်ပွဲတွေ ဆင်နွှဲနေကြတယ်... ရေပေါ်ကျွန်းတွေကိုလည်း လုယက်နေကြတာ"

"ငါတို့ အခုသွားလိုက်ရင် အကျိုးအမြတ် ခွဲဝေယူဖို့ ကွက်တိပဲ"

ဤစကားများက ကျန်းဝမ်ကျင်းနှင့် ယွိပေါ်တို့ကို အလွန်အမင်း အံ့အားသင့်သွားစေသည်။

"ကျိအန်မြို့က အခုထိ အတွင်းတိုက်ပွဲတွေ ဖြစ်နေတုန်းလား"

"မြေမိခင်ဂိုဏ်းနဲ့ ဝိညာဉ်စွမ်းအင်ဂိုဏ်းရဲ့ အကြွင်းအကျန်တွေက ကျိအန်မြို့မှာ ရှိနေတာလား"

ကျန်းယွီကျန်းက အသာအယာ ပြုံးလိုက်ပြီး "သွားကြစို့... ဒီနေရာမှာ ဆက်နေလို့ မရတော့ဘူး" ဟု ပေါ့ပေါ့ပါးပါး ပြောလိုက်သည်။

"ပြန်ကြမယ်... ရေငုပ်သင်္ဘောကို ချက်ချင်း စက်နှိုးပြီး ငါတို့ အခုပဲ ကျိအန်မြို့ကို ထွက်ခွာကြမယ်"

"အဖေ... ဒါဆို သမီးတို့က ဘာလို့ စောစောမထွက်သွားဘဲ အခုချိန်ထိ စောင့်နေတာလဲ" ကျန်းဝမ်ကျင်းက နားမလည်နိုင်စွာဖြင့် မေးလိုက်သည်။

ကျန်းယွီကျန်းက သက်ပြင်းတစ်ချက်ချလိုက်ပြီး "ဟိုကောင် လင်းယွမ်က တကယ် ဝင်ပါမလား ဆိုတာကို ငါက စောင့်ကြည့်ချင်လို့လေ"

"အခုကြည့်ရတာတော့ သူ တကယ် ဝင်ပါလာပြီ... ဒီကောင်လေးက မုန်ယာကုမ္ပဏီက တိမ်မြူကျွန်းကို ဝင်တိုက်မယ့်အချိန်ကို တစ်ချိန်လုံး စောင့်နေခဲ့တာကိုး"

"အခုတော့ သူက တိမ်မြူကျွန်းကို တရားဝင် သိမ်းပိုက်ပြီး လင်ကျန်းမြို့တစ်ခုလုံးကို အပြီးတိုင် စည်းလုံးသွားနိုင်ပြီပေါ့"

တကယ်တော့ သူ့စိတ်ထဲတွင် ထုတ်မပြောဖြစ်သော နောက်ထပ်အတွေးတစ်ခု ရှိနေသေးသည်။ လင်းယွမ်က မုန်ယာကုမ္ပဏီ၏ တိုက်ခိုက်မှုကို တားဆီးနိုင်မလား ဆိုသည်ကို သူက စောင့်ကြည့်ချင်ခဲ့ခြင်း ဖြစ်၏။

အကယ်၍ လင်းယွမ်က မုန်ယာကုမ္ပဏီကို မယှဉ်နိုင်ဘဲ နှစ်ဖက်စလုံး အထိနာသွားခဲ့လျှင် သူက ကြားကနေ အလွယ်တကူ အကျိုးအမြတ် ရယူနိုင်သည့် အခွင့်အရေး ရှိလာနိုင်သည် မဟုတ်ပါလော။

သို့သော် ယခုအခါတွင်တော့ ထိုအတွေးကို သူ့ရင်ထဲတွင်သာ သိမ်းဆည်းထားလိုက်ရလေပြီ။

မုန်ယာကုမ္ပဏီ၏ ယာဉ်ပျံများသည် ထိုက်ယန်တောင် ယာဉ်ပျံများ၏ ပြိုင်ဘက် မဟုတ်ကြောင်း လုံးဝထင်ရှားနေပြီ ဖြစ်သည်။

ယွိပေါ်က အနည်းငယ် တုံ့ဆိုင်းသွားပြီး "တပ်မှူး... ဒါဆို ကျွန်တော်တို့က ထိုက်ယန်တောင်နဲ့ ဘာလို့ တကယ် ပူးပေါင်းလို့ မရတာလဲ" ဟု မနေနိုင်ဘဲ မေးလိုက်သည်။

"ကျွန်တော်တို့ကလည်း လင်ကျန်းမြို့က လူတွေပဲလေ... ထိုက်ယန်တောင်က အစွမ်းထက်တာဆိုတော့ သူတို့နဲ့သာ ပူးပေါင်းလိုက်ရင် ပိုပြီး အင်အားကြီးသွားမှာ မဟုတ်ဘူးလား... အဲဒါက ကျွန်တော်တို့ ရှင်သန်ဖို့အတွက် ပိုပြီး အကျိုးရှိမနေဘူးလား"

ကျန်းယွီကျန်းက မျက်မှောင်အနည်းငယ် ကြုတ်သွားပြီး ယွိပေါ်ကို တစ်ချက်ကြည့်ကာ "ငါတို့ အခု စဉ်းစားနေရတာက ရှင်သန်ဖို့ ပြဿနာ မဟုတ်တော့ဘူး... ရှင်သန်ရေး အကျပ်အတည်းကို ငါတို့ ဖြေရှင်းပြီးတာ ကြာပြီ" ဟု မေးခွန်းထုတ်လိုက်သည်။

"ငါတို့ စဉ်းစားရမှာက ဒီ ဆင့်ကဲပြောင်းလဲမှု လှိုင်းတံပိုးကြီးထဲကနေ ဘယ်လို ထိုးထွက်မလဲ ဆိုတာကိုပဲ"

"တစ်စုံတစ်ယောက်... ဒါမှမဟုတ် တစ်စုံတစ်ခုသော အဖွဲ့အစည်းနောက်ကို လိုက်ဖို့ မဟုတ်ဘူး... ငါတို့ရဲ့ ကံကြမ္မာကို ငါတို့လက်ထဲမှာပဲ ဆုပ်ကိုင်ထားသင့်တယ်"

"သာမန်လူတစ်စု တည်ထောင်ထားတဲ့ ခိုလှုံရေးစခန်းတစ်ခုက အဆုံးထိတိုင် အောင်မြင်နိုင်မယ်လို့ မင်း ထင်နေလား"

ယွိပေါ်မှာ ပြန်ပြောစရာစကား မရှိတော့ဘဲ ခေါင်းညိတ်လိုက်ရုံသာ တတ်နိုင်တော့သည်။ "တပ်မှူး... ဒါဆို ကျွန်တော်တို့ ကျိအန်မြို့ကို ရောက်ရင် ဘာလုပ်ရမလဲ" ဟု သူက ဆက်မေးလိုက်သည်။

ကျန်းယွီကျန်းက ပြုံးလိုက်ပြီး "ထုံးစံအတိုင်းပဲ အခြေချရပ်တည်နိုင်မယ့် နေရာတစ်ခုကို အရင်ရှာရမှာပေါ့" ဟု ဖြေလိုက်သည်။

"စိတ်ချပါ... အားလုံးကို ငါ စီစဉ်ပြီးသားပါ... သွားကြစို့"

သူ၏ အမိန့်ပေးသံနှင့်အတူ ရေငုပ်သင်္ဘောသည် လျင်မြန်စွာ ရေအောက်သို့ ငုပ်လျှိုးသွားပြီး ပင်လယ်ရေပြင်ထက်မှ တဖြည်းဖြည်း ပျောက်ကွယ်သွားတော့သည်။

မကြာမီအချိန်အတွင်းမှာပင် ပင်လယ်အောက်ခြေ နက်ရှိုင်းသောနေရာရှိ ချောက်နက်ကျွန်းအနီးရှိ စစ်တပ်စခန်းတစ်ခုအတွင်းမှ ဧရာမ ရေငုပ်သင်္ဘော ရေငုပ်သင်္ဘောကြီးတစ်စင်းသည် ရေအောက်မှ ဖြည်းညှင်းစွာ ထွက်ခွာလာပြီး အနောက်မြောက်အရပ်သို့ တရွေ့ရွေ့ ဦးတည်သွားလေသည်။

တစ်ချိန်တည်းမှာပင် ထိုက်ယန်တောင် ယာဉ်ပျံများနှင့် မုန်ယာကုမ္ပဏီ၏ ယာဉ်ပျံများကြားရှိ တိုက်ပွဲမှာ အပြင်းထန်ဆုံး အခြေအနေသို့ ရောက်ရှိနေပြီ ဖြစ်သည်။

ထိုက်ယန်တောင် ယာဉ်ပျံများ၏ တစ်ဖက်သတ် ဖိနှိပ်မှုအောက်တွင် နောက်ဆုံး၌ မုန်ယာကုမ္ပဏီမှာ ထိုသို့သော အရှုံးကြီးကို မခံနိုင်တော့ပေ။

ယွီဝမ်ထောင်၏ မျက်နှာမှာ ဒေါသကြောင့် ပြာနှမ်းနေပြီး အံကိုကြိတ်ကာ "ယာဉ်ပျံတွေ အားလုံး... ငါ့နားကို လာစုကြစမ်း" ဟု အသံကုန် အော်ဟစ်လိုက်သည်။

"ဝူး"

ချက်ချင်းပင် ကျန်ရစ်သော ယာဉ်ပျံ လေးစင်းသည် ယွီဝမ်ထောင်ရှိရာ ယာဉ်ပျံဆီသို့ အရှိန်အဟုန်ဖြင့် ပျံသန်းလာကြသည်။

ယွီဝမ်ထောင် ကိုယ်တိုင်ကလည်း သင်္ဘောတံခါးကို အားကုန်ဆွဲဖွင့်လိုက်ပြီး "အကုန်လာခဲ့ကြစမ်း" ဟု ဟိန်းဟောက်လိုက်သည်။

နောက်တစ်ခဏတွင် သူသည် ယာဉ်ပျံထဲမှနေ၍ အပြင်သို့ တိုက်ရိုက် ခုန်ထွက်လိုက်လေသည်။

လေထဲတွင် ရှိနေစဉ် သူ၏ ခန္ဓာကိုယ်မှ သွေးမြူခိုးများ ရုတ်တရက် ပေါက်ကွဲထွက်ပေါ်လာပြီး စက်ယန္တရားများ ပွတ်တိုက်သံ "ချောက်" ဟူသော အသံများ ဆက်တိုက် ထွက်ပေါ်လာသည်။

ထိုသွေးမြူခိုးများသည် အင်ဂျင်မှ ထွက်ပေါ်လာသော မီးခိုးမည်းကြီးများအလား အရပ်မျက်နှာ အနှံ့အပြားသို့ ဖုံးလွှမ်းသွားတော့သည်။

ယာဉ်ပျံ လေးစင်းသည် မီးခိုးမည်းကြီးထဲသို့ အရှိန်ဖြင့် တိုးဝင်သွားကြပြီးနောက် ပြန်လည် ထွက်ပေါ်မလာကြတော့ပေ။

လင်းယွမ်နှင့် အခြားသူများက ထိုမြင်ကွင်းကို မြင်လိုက်ရသောအခါ တစ်ခဏမျှ အံ့အားသင့်သွားကြသည်။

သူက တုံ့ဆိုင်းနေခြင်း အလျဉ်းမရှိဘဲ "ပစ်ကြစမ်း... အသေသတ်နိုင်တဲ့အထိ ပစ်" ဟု အမိန့်ပေးလိုက်သည်။

"အုန်း... အုန်း... အုန်း"

စွမ်းအင်အမြောက်ဆံများက ရူးသွပ်စွာဖြင့် ဆက်တိုက် ပစ်ခတ်တိုက်ခိုက်သွားကြသည်။

စွမ်းအင်အမြောက်ဆံများက မီးခိုးမည်းကြီးထဲသို့ ကျရောက်သွားစဉ် ရုတ်တရက် ဧရာမ စက်ရုပ်လက်တံကြီးတစ်ခုက အပြင်သို့ ထိုးထွက်လာ၏။

ထိုလက်တံကြီးပေါ်တွင် ဧရာမ ဒိုင်းအဝိုင်းကြီး တစ်ခု ရှိနေသည်။

ကားတာယာများနှင့် ဖွဲ့စည်းထားသကဲ့သို့ပင်။

"ဘုန်း"

စက်ရုပ်လက်တံကြီးက အားကုန် ရိုက်ချလိုက်သည်နှင့် စွမ်းအင်အမြောက်ဆံများမှာ ကျယ်လောင်စွာ ပေါက်ကွဲသွားပြီး တိုက်ရိုက်ပင် အနောက်သို့ ပြန်ကန်ထွက်သွားတော့သည်။

ထို့နောက် ပေတစ်ရာနီးပါး မြင့်မားသော ဧရာမ စက်ရုပ်ကြီးတစ်ရုပ်သည် မြူခိုးမည်းကြီးထဲမှနေ၍ ခုန်ထွက်လာလေသည်။

၎င်း၏ ရင်ဘတ်တွင် တာဘိုင်ပန်ကာ လေးခုက လည်ပတ်နေပြီး ကျောဘက်တွင် ဧရာမ သတ္တုတောင်ပံတစ်စုံ ရှိနေရာ ယာဉ်ပျံ၏ တောင်ပံများနှင့် ဖွဲ့စည်းထားပုံ ရသည်။

အင်ဂျင်၏ တွန်းကန်အားကြောင့် ၎င်း၏ အလျင်သည် အစွမ်းပိုင်ရှင်များထက်ပင် များစွာ သာလွန်နေတော့သည်။

မျက်စိတစ်မှိတ်အတွင်းမှာပင် ထိုက်ယန်တောင် ယာဉ်ပျံတစ်စင်း၏ အရှေ့သို့ အရှိန်ဖြင့် ရောက်ရှိသွားသည်။

ထို့နောက် ၎င်းက ဧရာမ စက်ရုပ်လက်တံကြီးကို မြှောက်ကာ အားကုန် ပြင်းထန်စွာ ထိုးနှက်ချလိုက်သည်ကို တွေ့လိုက်ရ၏။

"ဝုန်း"

ကျယ်လောင်သော အသံကြီး ထွက်ပေါ်လာပြီး ၎င်း၏ စက်ရုပ်လက်သီးပေါ်မှ ကြောက်မက်ဖွယ်ကောင်းသော အရှိန်ပြင်း တုန်ခါမှုကြီးတစ်ခု ထွက်ပေါ်လာသည်။

"ဒုန်း... ဒုန်း... ဒုန်း... ဒုန်း"

ကြိမ်နှုန်းမြင့် တုန်ခါမှုအောက်တွင် စွမ်းအင်ငြိမ် သင်္ကေတ၏ ကြိမ်နှုန်းကို အဆက်မပြတ် ရှာဖွေနေလေသည်။

ငါးစက္ကန့်ပင် မကြာလိုက်ဘဲ စွမ်းအင်ငြိမ် သင်္ကေတ အကာအကွယ်မှာ ကျယ်လောင်သောအသံနှင့်အတူ ကြေမွပျက်စီးသွားတော့သည်။

ထို ဧရာမ စက်ရုပ်လက်တံကြီးထဲမှ ရုတ်တရက် "ရွှစ်" ဟူသောအသံနှင့်အတူ ပေသုံးဆယ်နီးပါး ရှည်လျားသော ဧရာမ ဓားရှည်ကြီးတစ်လက် ပစ်ထွက်လာသည်။

"ဒုန်း" ဟူသောအသံနှင့်အတူ ပစ်ထွက်လာသော ဓားရှည်ကြီးသည် မျက်စိတစ်မှိတ်အတွင်း ယာဉ်ပျံထဲသို့ စိုက်ဝင်သွားပြီး ယာဉ်ပျံကို ထက်ပိုင်း ပိုင်းဖြတ်လိုက်တော့သည်။

ထိုခဏချင်းမှာပင် ယာဉ်ပျံအတွင်းရှိ ထိုက်ယန်တောင်မှ လူများမှာ ကြောက်လန့်တကြား အော်ဟစ်လိုက်ကြပြီး ယာဉ်ပျံ အပိုင်းပိုင်းအစစ ပေါက်ကွဲထွက်သွားသည်နှင့်အတူ ကိုယ့်ကိုယ်ကိုယ် ကာကွယ်ရန် သန္ဓေပြောင်းအစွမ်းများကို အလျင်အမြန် ထုတ်သုံးလိုက်ကြရသည်။

နှစ်ပိုင်းကွဲသွားသော ယာဉ်ပျံထဲမှ လူရိပ်တစ်ခု ပျံသန်းထွက်ပေါ်လာသည်ကို တွေ့လိုက်ရ၏။

ရွှေရောင်အလင်းတန်းများ တောက်ပလာပြီးနောက် သူ၏ ခန္ဓာကိုယ်သည် ရုတ်ခြည်း ကြီးထွားလာကာ မျက်စိတစ်မှိတ်အတွင်းမှာပင် ပေလေးဆယ်ကျော် အမြင့်သို့ ရောက်ရှိသွားတော့သည်။

ချန်ကျန့်ဖုန်း ပင်ဖြစ်သည်။

သူက မျိုးရိုးဗီဇ ပြန်လည်ဖွဲ့စည်းခြင်း အဆင့်သို့ တက်လှမ်းနိုင်ခဲ့သည်မှာ အချိန်သိပ်မကြာသေးသော်လည်း ယခုအခါတွင်မူ ဤယာဉ်ပျံပေါ်၌ ကွက်တိ ရှိနေခဲ့ခြင်း ဖြစ်သည်။

မျိုးရိုးဗီဇ ပြန်လည်ဖွဲ့စည်းခြင်း ပုံစံဖြင့် သူ၏ တစ်ကိုယ်လုံးတွင် ရွှေရောင်အလင်းများ တောက်ပနေပြီး ခန္ဓာကိုယ်မှာ ပေသုံးဆယ်ကျော် မြင့်မားကာ ကျောဘက်တွင် တောင်ပံတစ်စုံ ထွက်ပေါ်နေပြီး ခေါင်းမှာလည်း ရွှေရောင်ကျားသစ်ခေါင်း ပုံစံသို့ သိသိသာသာ ပြောင်းလဲနေသည်။

၎င်းက သူ၏ မျိုးရိုးဗီဇမြေပုံ စိန်ကိုယ်ထည် ကျားသစ် ပင်ဖြစ်သည်။

"သေချင်နေတာလား"

ချန်ကျန့်ဖုန်းက ဒေါသတကြီး ဟိန်းဟောက်လိုက်ပြီး လူစကားကို ပြောဆိုကာ ကျားသစ်လက်သည်းများဖြင့် စက်ရုပ်ဘီလူးကြီးထံသို့ အရှိန်ဖြင့် ခုန်အုပ်လိုက်သည်။

"ထန်... ထန်... ထန်"

ကြောက်မက်ဖွယ်ကောင်းသော လက်သည်းချွန်များက သတ္တုကို ခြစ်ဆွဲသွားသော အသံများ ထွက်ပေါ်လာပြီး သွားကျိန်းစရာကောင်းလောက်အောင် "ကျွီ" ဟူသော အသံများ ထွက်ပေါ်လာသည်။

ယွီဝမ်ထောင်က လက်မောင်းကို အားကုန် ရမ်းလိုက်ရာ ဧရာမ စက်ရုပ်လက်တံကြီးက မျက်စိတစ်မှိတ်အတွင်းမှာပင် ချန်ကျန့်ဖုန်းကို လက်သီးဖြင့် ထိုးလွှင့်လိုက်တော့သည်။

"ဒုန်း" ဟူသောအသံနှင့်အတူ ချန်ကျန့်ဖုန်းမှာ ပေသုံးရာကျော်ခန့် လွင့်စင်သွားပြီး တောင်ပံများကို အလျင်အမြန် ခတ်လိုက်မှသာ သူ့ကိုယ်သူ အနိုင်နိုင် ပြန်ထိန်းနိုင်တော့သည်။

တစ်ချိန်တည်းမှာပင် သူ၏ ရင်ဘတ်တွင် ချိုင့်ဝင်သွားသော ဒဏ်ရာအရာကြီးတစ်ခု ပေါ်လာလေသည်။

ယခုအခါတွင် သူသည် အမှန်တကယ် စိန်ကိုယ်ထည်ကို ပိုင်ဆိုင်ထားပြီး တစ်ကိုယ်လုံးကို ဒြပ်စင်အဖြစ် ပြောင်းလဲထားသည့် ပုံစံဖြစ်ကြောင်းကို သိထားရမည်။

သို့သော် သူက မျိုးရိုးဗီဇ ပြန်လည်ဖွဲ့စည်းခြင်းကို ယခုမှ ရရှိထားသူဖြစ်ရာ တစ်ဖက်မှ ယွီဝမ်ထောင်နှင့် ယှဉ်လျှင် ကွာဟချက်က အရမ်းကို ကြီးမားလွန်းနေသည်။

ယွီဝမ်ထောင်သည် မျိုးရိုးဗီဇ ပြန်လည်ဖွဲ့စည်းခြင်း၏ သုံးဆယ်ရာခိုင်နှုန်း အဆင့်သို့ ရောက်ရှိနေပြီ ဖြစ်သည်။

ဤအဆင့်သည် မုန်ယာကုမ္ပဏီ၏ ရှေ့တန်းတပ်ဖွဲ့ ခေါင်းဆောင်တစ်ဦးဖြစ်သော ကျိုးဟောင်ရန်ထက်ပင် ပို၍ အစွမ်းထက်နေသေးသည်။

"ဘယ်သူက သေချင်နေတာလဲဆိုတာ မသေချာသေးဘူးနော်... ကောင်လေး"

ယွီဝမ်ထောင်က စက်ရုပ်မှထွက်ပေါ်လာသည့်အလား အီလက်ထရောနစ်အသံဖြင့် ပြောလိုက်ပြီးနောက် ၎င်း၏ ကျောဘက်မှ ပစ်လွှတ်ကိရိယာက ချက်ချင်း ပေါက်ကွဲထွက်လာကာ မာ့ချ်စက်ကွင်း လေးခုအဖြစ် ပြောင်းလဲသွားသည်။

မျက်စိတစ်မှိတ်အတွင်းမှာပင် အသံတံတိုင်းကို ဖောက်ထွက်သွားပြီး ကြောက်မက်ဖွယ်ကောင်းသော အသံပေါက်ကွဲမှုကို ဖြစ်ပေါ်စေလျက် ချန်ကျန့်ဖုန်း ပြောင်းလဲထားသော စိန်ကိုယ်ထည် ကျားသစ်ထံသို့ ဓားဖြင့် တိုက်ရိုက် ခုတ်ပိုင်းလိုက်တော့သည်။

ချန်ကျန့်ဖုန်း၏ သူငယ်အိမ်များ ကျဉ်းမြောင်းသွားပြီး လက်သီးနှစ်ဖက်ကို အရှေ့တွင် ကြက်ခြေခတ်ကာ အတင်း ဝင်ခံရန် ပြင်လိုက်သည်။

ယွီဝမ်ထောင်က ရက်စက်စွာ ရယ်မောလိုက်ပြီး "မျိုးရိုးဗီဇ ပြန်လည်ဖွဲ့စည်းခြင်းကို အခုမှ ရထားတဲ့ကောင်ကများ ငါ့ရှေ့မှာ လာဟောင်ရဲသေးတယ်ပေါ့လေ... သွားသေလိုက်စမ်း"

"ဝုန်း"

ကြောက်မက်ဖွယ်ကောင်းသော သတ္တုစပ်ဓားကြီးသည် ဧရာမ အသံပေါက်ကွဲမှုကြီးကို ဖြစ်ပေါ်စေလျက် ချန်ကျန့်ဖုန်း၏ လက်သီးနှစ်ဖက်ဆီသို့ ပြင်းထန်စွာ ကျရောက်လာတော့သည်။

ချန်ကျန့်ဖုန်း၏ ရင်ထဲတွင် ထိတ်လန့်မှုတစ်ခု ဖြစ်ပေါ်လာပြီး ဤဓားချက်ကို သူ မခံနိုင်ကြောင်း အလိုအလျောက် သိမြင်သွားသည်။

သို့သော် ယခုအခိုက်အတန့်တွင် သူ့၌ တခြား မည်သည့်နည်းလမ်းမှ မရှိသလို လွတ်အောင်လည်း မရှောင်တိမ်းနိုင်တော့ပေ။

တစ်ဖက်လူ၏ အလျင်က တကယ်ကို မြန်ဆန်လွန်းနေသည်။

ဤဓားချက်ကြီး ကျရောက်လာတော့မည့် ဆဲဆဲတွင်။

ရုတ်တရက် လေထုကြီးက ခဲယဉ်းသွားပြီး ကြောက်မက်ဖွယ်ကောင်းသော အအေးဓာတ်ကြီးက ကောင်းကင်တစ်ခွင် လွှမ်းခြုံကာ ဝင်ရောက်လာတော့သည်။

ဘယ်ဘက်ဆီမှ ရေခဲပြာရောင် ဧရာမ ဓားရှည်ကြီးတစ်လက်က ချက်ချင်း ပစ်ထွက်လာပြီး ပေသုံးဆယ်ကျော် ရှည်လျားသော သတ္တုစပ်ဓားကြီးနှင့် တိုက်ရိုက် ဝင်တိုက်မိသွားသည်ကို တွေ့လိုက်ရ၏။

ထိုခဏချင်းမှာပင် ကြောက်မက်ဖွယ်ကောင်းသော တိုက်ခိုက်သံကြီး ပေါက်ကွဲထွက်ပေါ်လာသည်။

"အုန်း"

ကြောက်မက်ဖွယ်ကောင်းသော အသံပေါက်ကွဲမှုက ချက်ချင်းပင် လှိုင်းဂယက် အထပ်ထပ်ကို ဖြစ်ပေါ်စေပြီး အရပ်မျက်နှာ အနှံ့အပြားသို့ ရူးသွပ်စွာ ပြန့်နှံ့သွားတော့သည်။

ထိုအခါ နန်းတွင်းဝတ်စုံကို ဝတ်ဆင်ထားပြီး ခေါင်းတွင် သရဖူကိုဆောင်းထားသော လင်ယွီရုံ သည် လေဟာပြင်ထက်တွင် မျောပါလျက် အေးစက်သော အမူအရာဖြင့် လျှောက်လှမ်းလာသည်ကို တွေ့လိုက်ရ၏။

သူမ၏ ခန္ဓာကိုယ်အထက်ပိုင်းက လူသားပုံစံဖြစ်ပြီး အောက်ပိုင်းကမူ ငါးအမြီးပုံစံဖြစ်ကာ တစ်ကိုယ်လုံးကို ရေခဲချပ်ဝတ်က ဖုံးလွှမ်းထားပြီး ခန္ဓာကိုယ်အရွယ်အစားမှာ ပေတစ်ရာ့သုံးဆယ်ကျော်အထိ ဧရာမကြီးမားလှသည်။

တစ်ကိုယ်လုံးမှ ကြောက်မက်ဖွယ်ကောင်းသော ဖိအားများကို ထုတ်လွှင့်နေသည်။

ယွီဝမ်ထောင်က ခေါင်းလှည့်ကာ ဤမြင်ကွင်းကို တွေ့လိုက်ရသည်နှင့် သူ၏ သူငယ်အိမ်များ ချက်ချင်း ကျဉ်းမြောင်းသွားတော့သည်။

သူ၏ ညာဘက် အီလက်ထရောနစ် မျက်လုံးက အရှိန်အဟုန်ဖြင့် လင်းလက်သွားပြီးနောက် အချက်အလက် တစ်စုက သူ၏ အမြင်အာရုံထဲသို့ လျင်မြန်စွာ ပေါ်ထွက်လာသည်။

ထို့နောက် သူက အလန့်တကြား အော်ဟစ်လိုက်တော့သည်။ "ပြန်လည်ဖွဲ့စည်းခြင်း အဆင့်က ၄၀ ရာခိုင်နှုန်းတဲ့လား"

ဆက်ရန်...

အပိုင်း(၇၅၂) ရှီဟိုင်ကျူး၏ မျိုးရိုးဗီဇ ပုံစံ

"ပေ ၁၃၀ လောက်ရှိတဲ့ ခန္ဓာကိုယ်အရွယ်အစား... သူ့ရဲ့ မျိုးရိုးဗီဇ ပြန်လည်ဖွဲ့စည်းခြင်း အဆင့်က သေချာပေါက် ၄၀ ရာခိုင်နှုန်းကို ကျော်လွန်နေပြီ"

စက်ရုပ်ဘီလူးကြီး၏ မျက်ဝန်းအိမ်များ ကျဉ်းမြောင်းသွားပြီး သွေးရောင် အီလက်ထရောနစ် အလင်းတန်းများက တဖျပ်ဖျပ် လက်လာ၏။

ယွီဝမ်ထောင်၏ စက်ရုပ်မျက်လုံးများတွင် အချိန်နှင့်တပြေးညီ ခွဲခြမ်းစိတ်ဖြာနိုင်သော စွမ်းရည် ပါရှိသည်။

ပြိုင်ဘက်၏ အကြမ်းဖျင်း ခွန်အားကို တွက်ချက်နိုင်စွမ်း ရှိသည်။

ယခုအချိန်၌ သူသည် လင်ယွီရုံထံမှ ယခင်က တစ်ခါမျှ မကြုံဖူးသော ဖိအားနှင့် ခြိမ်းခြောက်မှုကို ခံစားနေရပြီ ဖြစ်သည်။

"ဘုန်း"

စက်ရုပ်လက်မောင်းပေါ်ရှိ ဧရာမ ဓားသွားကြီးမှာ ဧရာမ ရေခဲဓားကြီး၏ ရိုက်ခတ်မှုအောက်တွင် ရုတ်ခြည်း ကြေမွပျက်စီးသွားတော့သည်။

ထို့နောက် ကြောက်မက်ဖွယ်ကောင်းသော ရေခဲခဲသည့်အအေးဓာတ်က ကျိုးပဲ့သွားသော ဓားကိုယ်ထည်တစ်လျှောက်မှ စက်ရုပ်လက်မောင်းရှိရာသို့ အလွန်လျင်မြန်သော အရှိန်ဖြင့် ပျံ့နှံ့လာလေသည်။

ဤမြင်ကွင်းကို မြင်လိုက်ရသည်နှင့် ယွီဝမ်ထောင်သည် အနောက်သို့ အလျင်အမြန် ဆုတ်ခွာလိုက်ပြီး တစ်ချိန်တည်းမှာပင် သူ၏ ရင်ဘတ်ပေါ်ရှိ တာဘိုင်လေးခုမှာ အသံကျယ်လောင်စွာ လည်ပတ်သွားသည်။

ပြင်းထန်သော မီးတောက်များက အရှိန်အဟုန်ဖြင့် ပန်းထွက်လာပြီး အေးခဲနေသော စက်ရုပ်လက်မောင်းကို ချက်ချင်းပင် မီးကင်လိုက်တော့သည်။

ပူပြင်းသော လေလှိုင်းများက လက်မောင်းပေါ်ရှိ ရေခဲများကို ချက်ချင်း အရည်ပျော်သွားစေ၏။

ယွီဝမ်ထောင်က ထိုလက်မောင်းကို တစ်ချက် ခါရမ်းလိုက်ရာ "ဂျွတ်" ဟူသော အသံမြည်လာပြီး စွမ်းအင်အလင်းတန်းများဖြင့် ဖွဲ့စည်းထားသော အလင်းဓားအသစ်တစ်လက် ရုတ်ခြည်း ဖြစ်ပေါ်လာသည်။

သူက လင်ယွီရုံကို စူးရဲစွာ စိုက်ကြည့်လျက် အော်ဟစ်လိုက်သည်။ "မင်းက ဘယ်သူလဲ... မင်းတို့က ခိုက်ရီနည်းပညာက လူတွေ လုံးဝ မဟုတ်ဘူး"

ခိုက်ရီနည်းပညာကုမ္ပဏီမှ လူများကို သူ ကောင်းကောင်း သိထားသည်။ လက်ရှိ ဤဒေသတွင် ခိုက်ရီနည်းပညာ၏ လုပ်ငန်းကိစ္စ အဝဝကို တာဝန်ယူထားသူမှာ ဝမ်ထျန်အန်း ဖြစ်သည်။

သို့သော် ထိုသူကို သူ သိထားပြီး ဝမ်ထျန်အန်း၏ စွမ်းရည်မှာ သူ့ထက် များစွာ သာလွန်နေခြင်း မရှိပေ။

သူနှင့် ကျိုးဟောက်ရန်တို့ ပူးပေါင်းလိုက်လျှင် ဝမ်ထျန်အန်းကိုပင် အလွယ်တကူ အနိုင်ယူနိုင်စွမ်း ရှိသည်။

သို့သော် သူ၏ မျက်စိရှေ့မှ ဤအမျိုးသမီးမှာ အလွန် အစွမ်းထက်လွန်းလှသည်။ ၄၀ ရာခိုင်နှုန်းရှိသော မျိုးရိုးဗီဇ ပြန်လည်ဖွဲ့စည်းခြင်း အဆင့်ဖြင့်ဆိုလျှင် ဝမ်ထျန်အန်း ဤနေရာတွင် ရှိနေပါကလည်း တစ်ဖက်လူကို အနိုင်ယူနိုင်မည် မဟုတ်ချေ။

ထို့ကြောင့် ဤလူစုသည် ခိုက်ရီနည်းပညာမှ လူများ လုံးဝ မဟုတ်နိုင်ပေ။

လင်ယွီရုံ၏ မျက်နှာထားက ခံစားချက်ကင်းမဲ့နေပြီး ဘာမျှ ပြန်မဖြေခဲ့ပေ။

ထိုအစား သူ၏ အနောက်ဘက်မှ အသံတစ်သံ ထွက်ပေါ်လာ၏။

"ဘယ်လိုလဲ... မင်းတို့ လင်ကျောင်းမြို့ကို ကျူးကျော်လာတာတောင် ဒီနယ်မြေမှာ တခြား အင်အားစုတွေ ရှိမရှိ အရင် မစုံစမ်းတော့ဘူးလား"

ယွီဝမ်ထောင်က ရုတ်တရက် လှည့်ကြည့်လိုက်သည်။

မသိလိုက်သည့် အချိန်လေးအတွင်းမှာပင် သူ၏ အနောက်ဘက် လေဟာပြင်၌ လူရိပ်တစ်ခု ရပ်နေသည်ကို တွေ့လိုက်ရ၏။

ထိုလူရိပ်၏ ဘေးတွင် အမျိုးသားတစ်ဦးနှင့် အမျိုးသမီးတစ်ဦး ရှိနေသေးသည်။

ယခုအချိန်၌ လူသုံးယောက်စလုံးက သူ့ကို အေးစက်စွာ စိုက်ကြည့်နေကြသည်။

ယွီဝမ်ထောင်က ချက်ချင်း သဘောပေါက်သွားသည်။ "မင်းတို့က လင်ကျောင်းမြို့က လူတွေပေါ့လေ"

"မင်းတို့ တော်တော် ရဲတင်းပါလား... ငါက ဘယ်သူလဲဆိုတာ သိရဲ့လား"

"ငါတို့ မုန်ယာကုမ္ပဏီက ယွီကျိုးပြည်နယ်မှာ အင်အားအကြီးဆုံး အဖွဲ့အစည်းပဲ... မင်းတို့က ငါတို့ရဲ့ ယာဉ်ပျံကို လာတိုက်ခိုက်ရဲတယ်ဆိုတော့ တကယ်ပဲ သေရမှာကို မကြောက်ဘူးလား"

သူက ကြမ်းတမ်းသော လေသံဖြင့် အော်ဟစ်မေးမြန်းလိုက်သော်လည်း စိတ်ထဲတွင်တော့ မိမိကိုယ်ကို မည်သို့ ကာကွယ်ရမည်ကို တွက်ဆနေပြီ ဖြစ်သည်။

ယခု တစ်ဖက်တွင် မျိုးရိုးဗီဇ ပြန်လည်ဖွဲ့စည်းခြင်း ၄၀ ရာခိုင်နှုန်းအထိ ရှိသော အစွမ်းပိုင်ရှင်တစ်ဦး ရှိနေရာ ဤတိုက်ပွဲကို ဆက်လက် ဆင်နွှဲရန် လုံးဝ မလိုအပ်တော့ပေ။

သူ သေချာပေါက် ရှုံးနိမ့်ပေလိမ့်မည်။

မဆင်မချင်လုပ်မိပါက ဤတစ်ကြိမ်တွင် သူ အသက်ရှင်လျက် လွတ်မြောက်နိုင်မည် မဟုတ်ပေ။

ထို့ကြောင့် ဤလင်ကျောင်းမြို့မှ နယ်ခံများကို ခြိမ်းခြောက်နိုင်ရန် မုန်ယာကုမ္ပဏီ၏ နာမည်ကြီးကို ချက်ချင်း ထုတ်ပြောလိုက်ခြင်း ဖြစ်သည်။

လင်းယွမ်က သဘောကျစွာ ရယ်မောလိုက်သည်။ "မုန်ယာကုမ္ပဏီက အဲဒီလောက်တောင် စွမ်းလို့လား"

"လွန်ခဲ့တဲ့ရက်ပိုင်းက ဝူယောင်ပန်းလို့ခေါ်တဲ့ကောင်တစ်ကောင် မုန်ယာကုမ္ပဏီက ဌာနမန်နေဂျာဆိုပြီး လင်ကျောင်းမြို့မှာ လာသောင်းကျန်းသေးတယ်... အခုတော့ သူ့အလောင်းကို သန္ဓေပြောင်းငါးတွေ စားလို့တောင် ကုန်နေလောက်ပြီ"

"ဝူယောင်ပန်း"

ထိုနာမည်ကို ကြားလိုက်ရသောအခါ ယွီဝမ်ထောင်မှာ အကြီးအကျယ် အံ့အားသင့်သွားပြီး မယုံကြည်နိုင်အောင် ဖြစ်သွားသည်။

"မင်းက ဝူယောင်ပန်းကို သတ်လိုက်တာလား"

ထို့နောက် သူက ချက်ချင်း သတိပြန်ဝင်လာပြီး ခေါင်းခါလျက် ပြောလိုက်သည်။ "ဟက်... ဝူယောင်ပန်းမှာ ကိုယ်ပွားတွေ အများကြီးရှိတယ်... မင်းက ဘယ်လိုလုပ်ပြီး သူ့ကို သတ်နိုင်မှာလဲ... အလွန်ဆုံး သေရင်တောင် ကိုယ်ပွားတစ်ခုပဲ သေသွားတာ ဖြစ်ရမယ်"

"မင်းက ဝူယောင်ပန်းနဲ့ တွေ့ဖူးမှတော့ သူ့ရဲ့ စွမ်းရည်ကို သိလောက်မှာပါ"

"ငါ ပြောပြမယ်... ဝူယောင်ပန်းလို စွမ်းရည်မျိုးက ငါတို့ မုန်ယာကုမ္ပဏီမှာ ဌာနမန်နေဂျာအဆင့်လောက်ပဲ ရှိတာကွ"

"ငါတို့ ကုမ္ပဏီမှာ ထိပ်တန်းအဆင့် အစွမ်းပိုင်ရှင်တွေ အများကြီး ရှိတယ်... ငါ အကြံပေးချင်တာကတော့ မင်းတို့ ဒီကိစ္စထဲ ဝင်မပါတာ အကောင်းဆုံးပဲ"

လင်းယွမ်က ပြုံးလိုက်ပြီး ပြောသည်။ "စကားတွေ အများကြီး ပြောမနေနဲ့တော့... လင်ယွီရုံ... တင်းယန်... ရှီဟိုင်ကျူး... စကြတော့... သူ့ကို ဖမ်းလိုက်... အရှင် လိုချင်တယ်"

လင်းယွမ်၏ အနောက်ဘက်ရှိ တင်းယန်က စကားတစ်ခွန်းမျှ မဆိုတော့ဘဲ ကိုယ်ကို တစ်ချက်ယိမ်းလိုက်ရာ ခန္ဓာကိုယ်အတွင်းမှ စွမ်းအင်များ ပေါက်ကွဲထွက်လာပြီး မျိုးရိုးဗီဇ ပြန်လည်ဖွဲ့စည်းခြင်း အခြေအနေသို့ ချက်ချင်း ဝင်ရောက်သွားတော့သည်။

ဘေးနားရှိ ရှီဟိုင်ကျူးကလည်း အရှေ့သို့ ခြေလှမ်းလိုက်ပြီး သူ၏ ခန္ဓာကိုယ် အရွယ်အစားက တဖြည်းဖြည်း ကြီးထွားလာသည်။

သူ၏ အရေပြားများက လျင်မြန်စွာ ကျောက်တုံးအဖြစ် ပြောင်းလဲသွားပြီး လူတစ်ကိုယ်လုံးကလည်း ကျောက်လူသားကြီး တစ်ဦးအလား "ဂျွတ်" ဟူသော အသံများနှင့်အတူ ကြီးမားလာ၏။

ပေ ၄၀ ကျော်ခန့်အထိ ရောက်ရှိသွားမှသာ ရပ်တန့်သွားတော့သည်။

တစ်ချက်ကြည့်လိုက်ရုံဖြင့် သူ၏ တစ်ကိုယ်လုံးရှိ ကြွက်သားများမှာ ကျောက်တုံးများနှင့် ဖွဲ့စည်းထားသကဲ့သို့ ဖြစ်နေသည်။

သူက ရူးသွပ်စွာ ရယ်မောလိုက်သည်။ "စက်ရုပ် ဟုတ်လား... လာစမ်း... မင်းရဲ့ ဒီစက်ရုပ်စုတ်ကြီးက ငါ့လက်သီးကို ခံနိုင်မခံနိုင် စမ်းကြည့်ရအောင်"

ပြောပြီးသည်နှင့် ရှေ့သို့ တစ်လှမ်း လှမ်းလိုက်သော်လည်း သူ၏ အလျင်က မမြန်ဆန်လှပေ။

သူ၏ လှုပ်ရှားမှု နှေးကွေးနေသည်ကို မြင်လိုက်ရသောအခါ ယွီဝမ်ထောင်က အေးစက်စွာ ပြုံးလိုက်သည်။ "မင်းလိုကောင်ကများ"

သူ၏ အာရုံစိုက်မှု အားလုံးသည် လင်ယွီရုံအပေါ်၌သာ အမြဲတမ်း ရှိနေသည်။

မျိုးရိုးဗီဇ ပြန်လည်ဖွဲ့စည်းခြင်း အဆင့် ၂၀ ရာခိုင်နှုန်းပင် မပြည့်သေးသည့် ဤပြိုင်ဘက် နှစ်ဦးကို သူက လုံးဝ အရေးမစိုက်ပေ။

"ဘုန်း"

သူ၏ ကျောဘက်ရှိ အင်ဂျင်မှ အသံကျယ်လောင်စွာ ထွက်ပေါ်လာပြီး လူတစ်ကိုယ်လုံး လေထဲသို့ အလျင်အမြန် ပျံတက်သွားကာ လင်ယွီရုံနှင့် အကွာအဝေးကို အမြန်ဆွဲဆန့်လိုက်ပြီး လင်းယွမ် ရှိရာသို့ တိုက်ရိုက် တိုက်ခိုက်လေတော့သည်။

ဤလူစုထဲတွင် လင်းယွမ်က ခေါင်းဆောင်ဖြစ်ကြောင်းကို သူ ရိပ်မိသွားသည်မှာ ထင်ရှားလှသည်။

လင်းယွမ်၏ မျက်နှာထားက တည်ငြိမ်နေပြီး ယွီဝမ်ထောင် သူ့ထံသို့ အရှိန်အဟုန်ဖြင့် ပြေးဝင်လာသည်ကိုသာ ကြည့်နေ၏။

ယွီဝမ်ထောင် အနားသို့ မရောက်လာခင်မှာပင် အားကောင်းသော စွမ်းအင်လှိုင်းတစ်ခုက ဝုန်းခနဲ ဝင်တိုက်လာသည်။

"ဘုန်း"

တင်းယန် ပြောင်းလဲသွားသော လီနီယာ စွမ်းအင်သားရဲက လက်သီးဖြင့် တိုက်ရိုက် ထိုးချလိုက်ရာ ကြောက်မက်ဖွယ်ကောင်းသော စွမ်းအင်အလင်းတန်းများ ပေါက်ကွဲထွက်လာသည်ကို တွေ့လိုက်ရသည်။

ဧရာမ ရိုက်ခတ်မှုအားကြောင့် ယွီဝမ်ထောင်၏ ခန္ဓာကိုယ်မှာ လေထဲတွင် လည်ထွက်သွားပြီး ရပ်တန့်သွားရသည်။

သို့သော် သူ၏ တစ်ကိုယ်လုံးတွင် အကာအကွယ် အစီအရင် ဖွင့်ထားသဖြင့် တင်းယန်၏ ဤလက်သီးက သူ၏ အစီအရင်ကိုပင် မဖောက်နိုင်ခဲ့ပေ။

ဤအကာအကွယ် အစီအရင်သည် ယွီဝမ်ထောင်၏ ပင်ကိုယ်အစွမ်း မဟုတ်သလို သူ၏ မျိုးရိုးဗီဇအစွမ်းလည်း မဟုတ်ပေ။

ယခင်က ယာဉ်ပျံလေးစင်းကို ပေါင်းစပ်ပြီးနောက် ဖြစ်ပေါ်လာသော စက်ရုပ်ချပ်ဝတ်တန်ဆာပင် ဖြစ်သည်။

ဤချပ်ဝတ်တန်ဆာများသည် မူလ ယာဉ်ပျံများတွင် ပါရှိသော အကာအကွယ် သင်္ကေတ အစီအရင်များကို ပြီးပြည့်စုံစွာ ထိန်းသိမ်းထားနိုင်သည်။

ထိုကဲ့သို့သော သင်္ကေတ အစီအရင်ကို မိုးကြိုးမုန်တိုင်းဒေသမှ မိုးကြိုးများပင် ဖောက်ထွင်းနိုင်ခြင်း မရှိရာ တင်းယန်၏ လက်သီးက မဖောက်နိုင်သည်မှာ သဘာဝပင် ဖြစ်သည်။

သို့သော် ဤအကာအကွယ် အစီအရင်ကို ဖွင့်ရန်အတွက် ယွီဝမ်ထောင်၏ သန္ဓေပြောင်းစွမ်းအင် အများအပြားကို သုံးစွဲရသည်။

သူသည် အစွမ်းပိုင်ရှင်တစ်ဦးသာ ဖြစ်ပြီး ယာဉ်ပျံတစ်စင်း မဟုတ်ပေ။

ယာဉ်ပျံ လည်ပတ်နိုင်ရခြင်းမှာ အထဲတွင် အထူး ဒီဇိုင်းဆွဲထားသော စွမ်းအင်စနစ် ပါရှိသောကြောင့် ဖြစ်သည်။

ယခုအခါ ယာဉ်ပျံသည် သူ၏ မျိုးရိုးဗီဇအစွမ်းဖြစ်သော စက်ပစ္စည်းပေါင်းစပ်ခြင်း ကို အသုံးပြု၍ သူ၏ ခန္ဓာကိုယ် အစိတ်အပိုင်းတစ်ခုအဖြစ် ပေါင်းစပ်သွားပြီဖြစ်ကာ စွမ်းအင်စနစ်သည်လည်း သူ၏ ကျောဘက်အင်ဂျင်၏ အစိတ်အပိုင်းတစ်ခု ဖြစ်သွားပြီ ဖြစ်သည်။

အကာအကွယ် အစီအရင်ကို ဖွင့်လိုပါက သူ၏ ကိုယ်ပိုင် သန္ဓေပြောင်းစွမ်းအင်များကို သုံးစွဲရမည် ဖြစ်သည်။

အဓိက အချက်မှာ သူ၏ ကိုယ်ပိုင် သန္ဓေပြောင်းစွမ်းအင်က အကန့်အသတ်ရှိနေပြီး စက်ပစ္စည်းပေါင်းစပ်ခြင်း အစွမ်းကိုလည်း ဆက်လက် ထိန်းသိမ်းထားရဦးမည် ဖြစ်သည်။

ထို့ကြောင့် ဤအကာအကွယ် အစီအရင်ကို သူ အချိန်ပြည့် ဖွင့်ထား၍ မရနိုင်ပေ။

တင်းယန်၏ တိုက်ခိုက်မှုကို ကာကွယ်ပြီးနောက် သူ၏ ကျောဘက်ရှိ အင်ဂျင်များ ချက်ချင်း အသံကျယ်လောင်စွာ တုန်ခါသွားသည်။

သူသည် ဘေးဘက်သို့ ရှောင်တိမ်းလိုက်ပြီး လင်းယွမ်ရှိရာသို့ နောက်တစ်ကြိမ် ပြေးဝင်သွားပြန်သည်။

သို့သော် ထိုအချိန်တွင် ကောင်းကင်ယံမှ ရွှေရောင်အရိပ်တစ်ခုက ချက်ချင်း ခုန်ဆင်းလာသည်။

ရွှေရောင်အရိပ်သည် ရွှေရောင် ဟာရီကိန်းမုန်တိုင်းတစ်ခုအလား ရူးသွပ်စွာ လည်ပတ်နေပြီး မုန်တိုင်းအတွင်းမှ အရာကို လုံးဝ မမြင်ရပေ။

ယွီဝမ်ထောင်နှင့် ထိတွေ့သွားသည့် အခိုက်အတန့်တွင် သတ္တုတုံးတစ်တုံး အသားကြိတ်စက်ထဲသို့ ကျသွားသကဲ့သို့ ဖြစ်သွားသည်။

ခဏချင်းမှာပင် ပြင်းထန်သော ခုတ်ထစ်သံများ ဆက်တိုက် ထွက်ပေါ်လာတော့သည်။

ယွီဝမ်ထောင်မှာ ဒေါသထွက်ကာ အံ့အားသင့်သွားပြီး ရင်ဘတ်ပေါ်ရှိ တာဘိုင်က ရုတ်ခြည်း ပန်းထွက်လာသည်။

မျက်စိတစ်မှိတ်အတွင်း ကြောက်မက်ဖွယ်ကောင်းသော မီးတောက်များ ပန်းထွက်လာပြီး အားကောင်းသော ပေါက်ကွဲမှုစွမ်းအားက ဤသတ္တုမုန်တိုင်းကို ချက်ချင်းပင် လွင့်စင်သွားစေသည်။

ဟာရီကိန်းမုန်တိုင်းမှာ ချက်ချင်း ရပ်တန့်သွားပြီး လေထဲတွင် အကွာအဝေး အတော်ကြာအောင် လွင့်ထွက်သွားပြီးနောက် ၎င်း၏ ပင်ကိုယ်ပုံစံကို ဖော်ပြလာသည်။

၎င်းမှာ ချန်ကျန့်ဖုန်း ပြောင်းလဲထားသော ရွှေနက်ကျားသစ်ပင် ဖြစ်သည်။

စောစောက ဟာရီကိန်းမုန်တိုင်းသည် သူ၏ မျိုးရိုးဗီဇ ပြန်လည်ဖွဲ့စည်းပြီးနောက် နိုးထလာသော ရွှေနက်တောင်ပံဓား အစွမ်းပင် ဖြစ်သည်။

သူ၏ တောင်ပံနှစ်ဖက်သည် သဘာဝအတိုင်း ဖြစ်တည်နေသော ဧရာမ ရွှေနက်ဓားကြီး နှစ်လက်ပင် ဖြစ်သည်။

သူ ရူးသွပ်စွာ လည်ပတ်နေချိန်တွင် ကြောက်မက်ဖွယ်ကောင်းသော သတ္တုမုန်တိုင်းတစ်ခု ဖြစ်ပေါ်လာသည်။

မည်သည့် ပြိုင်ဘက်မဆို ၎င်းအတွင်းသို့ ဝင်ရောက်မိပါက အသားစများအဖြစ် ခုတ်ထစ်ခံရမည် ဖြစ်သည်။

သို့သော် ယွီဝမ်ထောင်၏ စက်ရုပ်ကိုယ်ထည်ကလည်း အထင်သေး၍ မရကြောင်း သိသာလှပြီး အားကောင်းသော အကာအကွယ် စွမ်းရည်ကြောင့် ချန်ကျန့်ဖုန်း၏ တိုက်ခိုက်မှုကို တားဆီးနိုင်ခဲ့သည်။

သို့သော် ရင်ဘတ်နေရာတွင်မူ ခုတ်ထစ်ခံထားရသော အရာများ အမြောက်အမြား ပေါ်လာခဲ့သည်။

ထိုအချက်က ယွီဝမ်ထောင်ကို ဒေါသအမျက် ထွက်စေခဲ့သည်။

"မင်း သေချင်နေတာလား"

မျိုးရိုးဗီဇ ပြန်လည်ဖွဲ့စည်းခြင်း အဆင့် ဆယ်ဂဏန်းရာခိုင်နှုန်းမျှသာ ရှိသော ပြိုင်ဘက်တစ်ဦးက သူ့ကို ထိခိုက်ဒဏ်ရာ ရစေနိုင်သည်လား။

သူ ချက်ချင်း ဒေါသထွက်သွားပြီး လက်နှစ်ဖက်ကို မြှောက်လိုက်ရာ လက်ဝါးပြင်မှ "ဂျွတ်" ဟူသော အသံမြည်လာပြီး ဧရာမ အမြောက်ပြောင်းဝကြီးများအဖြစ် ပြောင်းလဲသွားသည်။

သူ၏ သန္ဓေပြောင်းစွမ်းအင်ကို ထုတ်သုံးကာ ချန်ကျန့်ဖုန်းကို လက်ဝါးအမြောက်ဖြင့် ပစ်ခတ်ရန် ပြင်လိုက်သည်။

"ဘုန်း"

ဧရာမ စွမ်းအင်အမြောက်နှစ်လုံးက ကျယ်လောင်စွာ ပေါက်ကွဲထွက်လာပြီး ချန်ကျန့်ဖုန်းဆီသို့ ပြင်းထန်စွာ ပစ်ခတ်သွားသည်။

သို့သော် ထိုအချိန်မှာပင် ကောင်းကင်ယံမှ ဥက္ကာခဲ နှစ်လုံးက လေတိုးသံများနှင့်အတူ အပေါ်မှ ပြုတ်ကျလာသည်။

"ဝှီး"

ထို ဥက္ကာခဲ နှစ်လုံးသည် ဘယ်ညာ တစ်ဖက်တစ်ချက်စီမှ အလွန်လျင်မြန်သော အရှိန်ဖြင့် ယွီဝမ်ထောင်ထံသို့ ဝုန်းခနဲ ဝင်ဆောင့်လာသည်။

ယွီဝမ်ထောင် အကြီးအကျယ် လန့်သွားပြီး ရှောင်တိမ်းရန် ကြိုးစားသော်လည်း အချိန်မမီတော့ပေ။

ထို ဥက္ကာခဲများ ပျံသန်းလာသော အရှိန်မှာ အလွန်မြန်ဆန်လှသဖြင့် လေထုနှင့် ပွတ်တိုက်မိရာမှ မီးတောက်များပင် ထွက်ပေါ်နေသည်။

သူက အကာအကွယ် အစီအရင်ကို အလျင်အမြန် ပြန်ဖွင့်ကာ အတင်း ခုခံလိုက်ရသည်။

လေထဲတွင် ပြင်းထန်သော ရိုက်ခတ်သံကြီးများ ထွက်ပေါ်လာသည်။

"ဒုန်း" ဟူသော အသံကျယ်ကြီးများနှင့်အတူ ကြောက်မက်ဖွယ် ရိုက်ခတ်မှုအတွင်း ယွီဝမ်ထောင်၏ ခန္ဓာကိုယ်အတွင်းရှိ သန္ဓေပြောင်းစွမ်းအင်များ ချက်ချင်းပင် တစ်ဝက်အထိ ကျဆင်းသွားတော့သည်။

သူ၏ မျက်နှာမှာ အလွန် ရုပ်ဆိုးသွားပြီး ဥက္ကာခဲများ ပျံသန်းလာရာ အရပ်သို့ ကြည့်လိုက်သည်။

ရှီဟိုင်ကျူး ပြောင်းလဲထားသော ဧရာမ ကျောက်လူသားကြီးက မလှမ်းမကမ်းတွင် ရပ်နေပြီး သူ၏ လက်မောင်းနှစ်ဖက်ကို မြှောက်ထားသော်လည်း လက်သီးနှစ်ဖက်မှာမူ ထူးဆန်းစွာ ပျောက်ကွယ်နေသည်ကို တွေ့လိုက်ရသည်။

ဒီဥက္ကာခဲ နှစ်လုံးက သူ၏ လက်သီးများ ပြောင်းလဲသွားခြင်း ဖြစ်နေသည်။

၎င်းမှာ ရှီဟိုင်ကျူး၏ မျိုးရိုးဗီဇအစွမ်းများထဲမှ တစ်ခုဖြစ်သော ဥက္ကာခဲလက်သီး ပင် ဖြစ်သည်။

ဤအစွမ်းသည် သူ၏ လက်သီးနှစ်ဖက်ကို ဥက္ကာခဲ နှစ်လုံးအဖြစ် ပြောင်းလဲနိုင်ပြီး အလွန်မြန်ဆန်သော အရှိန်ဖြင့် ပစ်လွှတ်နိုင်ကာ ကောင်းကင်ယံမှ အမှန်တကယ် ဥက္ကာခဲများ ကျဆင်းလာသကဲ့သို့ ဖြစ်စေသည်။

ဤတိုက်ခိုက်မှုအပြီး ဥက္ကာခဲများ ပေါက်ကွဲထွက်သွားပြီးနောက် ကွဲအက်သွားသော ကျောက်စလစ်ခဲများသည် သူ၏ လက်မောင်းပေါ်သို့ အလိုအလျောက် ပြန်လည်ပျံသန်းလာပြီး လက်သီးအသစ်အဖြစ် ပြန်လည် ဖြစ်ပေါ်လာမည် ဖြစ်သည်။

ဤမျှ ဆန်းကြယ်သော မျိုးရိုးဗီဇအစွမ်းကြောင့် ယွီဝမ်ထောင်ပင်လျှင် မျှော်လင့်မထားဘဲ အထိနာသွားရသည်။

သို့သော် ဤမျှနှင့် မပြီးသေးပေ။ ရှီဟိုင်ကျူးက အသံကျယ်ကြီးဖြင့် ရယ်မောလိုက်သည်ကို တွေ့ရသည်။ "အစ်ကိုချန်... ငါ့ရဲ့ ဒီလက်သီးတစ်ချက်က ဘယ်လိုလဲ"

ချန်ကျန့်ဖုန်းက စကားမပြောနိုင်တော့ဘဲ အော်ပြောလိုက်သည်။ "ငါ့ရဲ့ စောစောက အကွက်ကရော ညံ့လို့လား"

"ဟားဟားဟား... မညံ့ပါဘူးဗျ... မြန်မြန် လုပ်ကြမယ်... ဒီစက်ရုပ်ကို ဖြုတ်ပစ်ရအောင်"

"ကောင်းပြီ"

သူတို့နှစ်ဦးစလုံး အသံကျယ်ကြီးဖြင့် ရယ်မောလိုက်ကြပြီးနောက် ချက်ချင်းပင် ရှေ့သို့ ပြေးဝင်လာကြသည်။

ယွီဝမ်ထောင်၏ ရင်ထဲတွင် ဒေါသများ ပေါက်ကွဲထွက်လာသည်။ မျိုးရိုးဗီဇ ပြန်လည်ဖွဲ့စည်းခြင်း ဆယ်ရာခိုင်နှုန်းကျော်မျှသာ ရှိသော ကောင်နှစ်ကောင်က သူ့ကို ဖြုတ်ပစ်မည်ဟု ရဲရဲတင်းတင်း ပြောရဲသည်လား။

သူက ဒေါသထွက်လွန်းသဖြင့် ရယ်မောလိုက်သည်။ "ဟားဟားဟား... ကောင်းပြီ... ကောင်းပြီ... ကောင်းပြီ... ငါ့ကို အနိုင်ကျင့်လို့ လွယ်တယ် ထင်နေလား"

"မင်းတို့ နှစ်ယောက်လုံး တပြိုင်တည်း ဝင်လာခဲ့ကြ"

သူ၏ လက်မောင်းနှစ်ဖက်ကို အပြင်သို့ ရုတ်တရက် ဆန့်ထုတ်လိုက်ရာ တစ်ကိုယ်လုံးရှိ စက်ပစ္စည်းများမှ "ဂျွတ်" ဟူသော အသံများ ထွက်ပေါ်လာသည်။

ခန္ဓာကိုယ် တစ်ခုလုံးက လျင်မြန်စွာ ပုံစံပြောင်းလဲသွားသည်။

စက်ရုပ်ပုံစံ ယွီဝမ်ထောင်သည် မျက်စိတစ်မှိတ်အတွင်းမှာပင် စက်ရုပ်ရေဘဝဲကြီး တစ်ကောင်အဖြစ် ပြောင်းလဲသွားသည်ကို တွေ့လိုက်ရသည်။

စက်ရုပ် လက်မောင်းရှစ်ချောင်းက လေထဲတွင် ဝှေ့ယမ်းနေပြီး မိစ္ဆာကောင်တစ်ကောင်အလား ဖြစ်နေသည်။

လုံးဝန်းနေသော ခေါင်းကြီးပေါ်တွင် အမြောက်ပြောင်းဝများ ပြည့်နှက်နေသည်။

အောက်ဘက်ရှိ စုပ်ခွက်များမှ မီးတောက်များ အမြောက်အမြား ပန်းထွက်နေပြီး ဧရာမ ခန္ဓာကိုယ်ကြီးက လေထဲတွင် အလွန်လျင်မြန်စွာ ပျံသန်းလျက် ရှီဟိုင်ကျူးထံသို့ တိုက်ရိုက် ပြေးဝင်သွားတော့သည်။

ရှီဟိုင်ကျူးက ထိုအခြေအနေကို မြင်သောအခါ လက်သီးကို နောက်တစ်ကြိမ် ပစ်သွင်းလိုက်ရာ လက်သီးနှစ်ဖက်က ဝုန်းခနဲ အသံနှင့်အတူ ဥက္ကာခဲ နှစ်လုံးအဖြစ် ပြောင်းလဲသွားပြီး ရူးသွပ်စွာ ပစ်ခတ်သွားသည်။

သို့သော် ဤတစ်ကြိမ်တွင် စက်ရုပ်ရေဘဝဲ အခြေအနေရှိ ယွီဝမ်ထောင်က ရှောင်တိမ်းခြင်း မပြုခဲ့ပေ။

ထိုအစား ဧရာမ စက်ရုပ်ရေဘဝဲ လက်တံနှစ်ချောင်းက ကြာပွတ်နှစ်ချောင်းအလား ပြင်းထန်စွာ ရိုက်ချလိုက်သည်။

"ဘုန်း"

ကျယ်လောင်သော အသံကြီးနှစ်သံနှင့်အတူ ထိုဥက္ကာခဲများသည် ဂျင်နှစ်လုံးအလား ရိုက်ချခံလိုက်ရသည့် အခိုက်အတန့်တွင် ဘေးဘက်သို့ လွင့်စင်သွားပြီး ဝုန်းခနဲ ပေါက်ကွဲသွားတော့သည်။

ချန်ကျန့်ဖုန်းသည်လည်း ထိုအချိန်တွင် ပြေးဝင်လာပြီး ရွှေနက်ကျားသစ်သည် ထက်မြက်သော ဟာရီကိန်းမုန်တိုင်းအဖြစ် ပြောင်းလဲသွားကာ ရူးသွပ်စွာ ခုတ်ထစ်လေတော့သည်။

သို့သော် သူ ယွီဝမ်ထောင် အနားသို့ မရောက်လာခင်မှာပင် ထိုစက်ရုပ်ရေဘဝဲ၏ ခေါင်းပေါ်ရှိ အမြောက်ပြောင်းဝများက စွမ်းအင်အမြောက်များကို ကျယ်လောင်စွာ ပစ်ခတ်လိုက်သည်။

မျက်စိတစ်မှိတ်အတွင်း စွမ်းအင်အလင်းတန်း ဒါဇင်ပေါင်းများစွာက ဗုံးကြဲတိုက်ခိုက်သွားသည်။

ရွှေနက်ကျားသစ်သည် ချက်ချင်းပင် လွင့်စင်ထွက်သွားပြီး သတ္တုအဖြစ် ပြောင်းလဲနေသော ခန္ဓာကိုယ်ပေါ်တွင် ကျည်ဆန်ရာ ချိုင့်ခွက်များ ပြည့်နှက်သွားတော့သည်။

စက်ရုပ်ရေဘဝဲ၏ စုပ်ခွက်ပန်းထုတ်စက်များက အသံထက်မြန်သော အရှိန်ဖြင့် ရူးသွပ်စွာ ပန်းထုတ်လိုက်ရာ ခန္ဓာကိုယ်က ဝှီးခနဲ အသံနှင့်အတူ ရှီဟိုင်ကျူး၏ ရှေ့သို့ ရောက်ရှိလာပြီ ဖြစ်သည်။

ဧရာမ စက်ရုပ်ရေဘဝဲ လက်တံနှစ်ချောင်းက စပါးအုံးမြွေကြီးများအလား ချက်ချင်းပင် ရှီဟိုင်ကျူးကို ရစ်ပတ်လိုက်သည်။

ရှီဟိုင်ကျူး၏ လှုပ်ရှားမှုက အလွန် နှေးကွေးလွန်းလှရာ ယခုအချိန်တွင် ရှောင်တိမ်းရန် အချိန်မမီတော့ဘဲ လက်နှစ်ဖက်ကို အလျင်အမြန် ဆန့်ထုတ်ကာ တားဆီးလိုက်ရသည်။

"တိုက်တန်ခွန်အား"

သူက အသံကျယ်ကြီးဖြင့် ဟိန်းဟောက်လိုက်ပြီး တစ်ကိုယ်လုံးရှိ ကျောက်တုံးအလား ကြွက်သားများ ကြီးထွားလာကာ စက်ရုပ်လက်တံများကို အားကုန်ဆွဲဖယ်လိုက်သည်။

သို့သော် သူ၌ လက်နှစ်ဖက်သာ ရှိပြီး စက်ရုပ်ရေဘဝဲတွင်မူ ရှစ်ချောင်း ရှိနေသည်။

အခြား စက်ရုပ်လက်တံအချို့က ရှီဟိုင်ကျူးကို ချက်ချင်း ရစ်ပတ်လိုက်ပြီး နောက်တစ်စက္ကန့်တွင် ရှီဟိုင်ကျူးကို အားကုန် ညှစ်သတ်ရန် ပြင်လိုက်သည်။

ထိုအချိန်မှာပင် တင်းယန် ပြောင်းလဲထားသော လီနီယာ စွမ်းအင်သားရဲက လေထဲသို့ ခုန်တက်လိုက်ပြီး ၎င်း၏ ခေါင်းပေါ်သို့ တိုက်ရိုက် ခုန်တက်သွားတော့သည်။

လက်သီးနှစ်ဖက်တွင် ကြောက်မက်ဖွယ်ကောင်းသော စွမ်းအင်လှိုင်းများကို စုစည်းကာ စက်ရုပ်ရေဘဝဲ၏ ခေါင်းပေါ်သို့ ပြင်းထန်စွာ ရိုက်ချလိုက်သည်။

သို့သော် ထိုအချိန်မှာပင် စက်ရုပ်ရေဘဝဲ၏ စက်ရုပ်လက်တံတစ်ချောင်းက တင်းယန်ကို အလျင်အမြန် ဖမ်းဆွဲလိုက်ပြီး အတင်းဆွဲကာ အဝေးသို့ ပြင်းထန်စွာ လွှင့်ပစ်လိုက်တော့သည်။

ဆက်ရန်...