အခန်း (၁၃၇-၁၃၈)
Vol. 14 Ch. 137-138
Chapter 137
~
အခန်း ၁၃၇ : ကျုပ်တို့ ဇာတ်လမ်းတို ရိုက်နေကြတာ...
~
" ဟမ်.. "
ရင်းနှီးလှသော ထိုအသံကို ကြားလိုက်ရသဖြင့် မေ့ကျီက ဝမ်းသာအားရဖြင့် အသံလာရာဘက်သို့ လှည့်ကြည့်လိုက်ရာ လူအုပ်ကြားမှ ပြေးထွက်လာသော လင်းဖန်ကို တွေ့လိုက်ရသည်။
" နတ်ဆိုးအရှင်.. တကယ်ပဲ အရှင် ဖြစ်နေတာပဲ.. "
မေ့ကျီက ရှေ့သို့ အမြန်ပြေးသွားပြီးနောက် လင်းဖန်၏ ရှေ့သို့တွင် လျှောတိုက်၍ ဒူးထောက်လိုက်၏။ သူ၏ မျက်ဝန်းများတွင် မျက်ရည်များ ဝဲတက်လာပြီး လက်တစ်ဖက်ကို ရင်ဘတ်ပေါ်တင်ကာ ခေါင်းငုံ့၍ ပြောလိုက်သည်။
" အရှင့်ကို လက်အောက်ခံ မေ့ကျီက ဂါရဝပြုပါတယ်.. "
" အရှင့်ကို ကူညီဖို့ နောက်ကျသွားတဲ့အတွက် ဒီငယ်သားမှာ သေဒဏ်ထိုက်တဲ့ အပြစ်ရှိပါတယ်.. အရှင့် စိတ်တိုင်းကျ အပြစ်ပေးတော်မူပါ.. "
လူတိုင်း ... " ... "
ရုတ်တရက်ကြီး ဒူးထောက်ချလိုက်ပြီး ထူးဆန်းသော စကားများကို ရေရွတ်နေသည့် မေ့ကျီကို ကြည့်ကာ ပတ်ဝန်းကျင်ရှိ လူများ၏ မျက်နှာထက်တွင် မေးခွန်းအမှတ်အသားများ ပေါ်လာကြသည်။
' သူ ဘာတွေ လုပ်နေတာလဲ.. နတ်ဆိုးအရှင် ဆိုပါလား... အထပ်ထပ် အခါခါ ခေါ်နေလိုက်တာ.. '
' ကြည့်ရတာ တကယ်ပဲ စိတ်မနှံ့တဲ့သူ ဖြစ်ရမယ်.. '
' ဒါမှမဟုတ် ဒီနှစ်ယောက်က လူကြားထဲမှာ ဇာတ်လမ်းရိုက်နေကြတာလား ..'
' ဖြစ်နိုင်တယ်.. နာမည်ကြီးချင်လို့ ဗီဒီယို အတိုလေးတွေ ရိုက်နေတာလည်း ဖြစ်မှာပေါ့ ..'
ပတ်ဝန်းကျင်ရှိ လူအုပ်ကြီး၏ အံ့သြတုန်လှုပ်နေသော အကြည့်များကို ခံစားလိုက်ရသဖြင့် လင်းဖန်၏ မျက်နှာကြီးမှာ နီရဲသွားသည်။ သူ၏ ခြေချောင်းလေးများမှာ ရှက်လွန်းလှသဖြင့် ကွန်ကရစ်ကြမ်းပြင်ပေါ်တွင် အခန်းသုံးခန်းပါ တိုက်ခန်းတစ်ခန်းစာလောက်အထိ ကျင်းတူးမိတော့မတတ် ခံစားနေမိ၏။
အကယ်၍ ဤနေရာသည် အင်မော်တယ်နတ်ဆိုး တိုက်ကြီးသာ ဖြစ်ပါက သူ ဘာမှ ခံစားရမည်မဟုတ်ဘဲ ထုံးစံအတိုင်းပင် လက်ခံလိုက်မည် ဖြစ်သော်လည်း ယခုက ကမ္ဘာမြေပေါ်တွင် မဟုတ်ပါလော။
လူပေါင်းများစွာ၏ ရှေ့မှောက်တွင် ယခုကဲ့သို့ စကားမျိုး ပြောဆိုခံရပြီး မျောက်တစ်ကောင်လို ဝိုင်းကြည့်ခံနေရခြင်းမှာ အလွန်ပင် ရှက်ဖွယ် ကောင်းလှသည်။
' နတ်ဆိုးအရှင်မှာလည်း သိက္ခာဆိုတာ ရှိသေးတယ်လေ.. '
လင်းဖန် တွေးလိုက်မိသည်။
" အဟမ်း... အဟမ်း... ကောင်းပြီ ..ကောင်းပြီ.. ပြောစရာရှိတာ နောက်မှ ပြောကြတာပေါ့ ..အရင် ထလိုက်ဦး .."
လင်းဖန်သည် သူ၏ အရှက်ရမှုကို ဖုံးကွယ်ရန် ချောင်းနှစ်ချက် ဟမ့်လိုက်ပြီး မေ့ကျီကို အမြန်ထရန် ညွှန်ကြားလိုက်သည်။
" အဲ့လို ဘယ်ဖြစ်ပါ့မလဲ.. ဒီငယ်သားရဲ့ တာဝန်ပျက်ကွက်မှုကြောင့် အရှင် ဒီမှာ သောင်တင်နေခဲ့ရတာပါ.. အရှင်က ဒီငယ်သားကို အပြစ်မပေးဘူးဆိုရင် ဒီငယ်သားက အရှင့်ရဲ့ မျက်နှာကို ဘယ်လိုကြည့်ဝံ့တော့မှာလဲ .."
မေ့ကျီက ခေါင်းကို ဆက်လက် ငုံ့ထားဆဲ ဖြစ်သည်။ သူ၏ စကားလုံးများမှာ ခိုင်မာပြတ်သားနေပြီး အပြစ်ပေးခြင်းကို ခံယူပြီးမှသာ ခေါင်းမော့ကာ ထရပ်မည့် ပုံစံမျိုး ဖြစ်နေသည်။
လင်းဖန်သည် မေ့ကျီ၏ စိတ်နေစိတ်ထားကို ကောင်းစွာ သိသည်။ ဤလူမှာ အလွန် ခေါင်းမာသူ တစ်ဦး ပင်။
တစ်ခါက အင်မော်တယ်နတ်ဆိုး တိုက်ကြီးတွင် သူ အမှားအယွင်းလေး တစ်ခု ပြုလုပ်ခဲ့ပြီးနောက် လင်းဖန်ထံ လာရောက်ကာ အပြစ်ဝန်ခံခဲ့ဖူးသည်။ လင်းဖန်က ပထမဆုံးအကြိမ် ဖြစ်သလို သေးငယ်သော အမှားလေးသာ ဖြစ်သဖြင့် အရေးမယူရန် ဆုံးဖြတ်ခဲ့သည်။ သို့သော်လည်း ထိုလူမှာ နန်းတော်မဟာရင်ပြင် ပြင်ပတွင် လပေါင်းများစွာတိုင်အောင် မလှုပ်မယှက် ဒူးထောက်နေခဲ့ပြီး တရားမျှတမှု ရှိစေရန်အတွက် အပြစ်ပေးမှုကို မရရအောင် တောင်းဆိုခဲ့ဖူးသည်။
ယခုလည်း သူသာ တစ်စုံတစ်ရာ အပြစ်မပေးလျှင် ထိုနေရာတွင်ပင် ဆက်လက် ဒူးထောက်နေပေဦးမည်။
တခြားနည်းလမ်း မရှိတော့သဖြင့် လူအုပ်ကြီး၏ အကြည့်များကြားမှ အမြန်ဆုံး လွတ်မြောက်နိုင်ရန် လင်းဖန်က လေသံကို တိုးကာ ...
" မင်းရဲ့ လက်ကို ရှေ့ထုတ်လိုက်.. "
" ဟုတ်ကဲ့.. "
မေ့ကျီသည် မည်သည့် ဝိညာဉ်စွမ်းအင် အကာအကွယ်မှ မသုံးဘဲ နတ်ဆိုးအရှင်၏ အပြစ်ပေးမှုကို ခံယူရန် အသင့်ပြင်ကာ သူ၏ လက်ဖဝါးကို ချက်ချင်း ဆန့်ထုတ်လိုက်သည်။
" ဖြတ်.. "
လင်းဖန်က မေ့ကျီ၏ လက်ဖဝါးကို ခပ်ဖွဖွလေး တစ်ချက် ရိုက်လိုက်သည်။
" အ... ဟင်း.. "
မည်သည့် ဝိညာဉ်စွမ်းအင်မှ မပါဘဲ ပထမဆုံးအကြိမ် အပြစ်ပေးခံရခြင်း ဖြစ်သဖြင့် လက်ဖဝါးမှ ခံစားချက်ကြောင့် မေ့ကျီမှာ မအောင့်နိုင်ဘဲ ခပ်တိုးတိုး ညည်းတွားသံလေး ထွက်သွား၏။
" ဟေ့ကောင်..ဟေ့ကောင်..အဲ့လို ထူးဆန်းတဲ့ အသံတွေ မလုပ်နဲ့လေ.. "
လင်းဖန်၏ နဖူးပေါ်တွင် အမည်းရောင် အကြောင်းသုံးကြောင်း ပေါ်လာပြီး အမြန်ပြောလိုက်သည်။ သူသည် အားဖြင့်ပင် မရိုက်ခဲ့ချေ။ ထိုလူ၏ ထူးဆန်းသော ညည်းတွားသံကြောင့် ဘေးလူများ အထင်လွဲသွားနိုင်လေသည် ။
" ဒီငယ်သားရဲ့ အမှားပါ အရှင်.. အရှင့်ရဲ့ အားက အရမ်း နူးညံ့လွန်းနေတော့ ဒီငယ်သားက မတော်တဆ မထိန်းနိုင်ဖြစ်သွားလို့ပါ.. "
" တော်တော့.. တော်တော့.."
လင်းဖန်က စိတ်ပျက်လက်ပျက်ဖြင့် ပြောလိုက်သည်။
သူသည် ထူးဆန်းသော ယောင်္ကျားချင်း စိတ်ဝင်စားသူ ဟူသည့် နာမည်ဆိုး အကပ်ခံရမည်ကို လုံးဝ အဖြစ်မခံနိုင်ချေ။
မေ့ကျီသည် ခုနက အရိုက်ခံလိုက်ရသော လက်ဖဝါးကို ကျန်လက်တစ်ဖက်ဖြင့် အုပ်၍ ဖြည်းဖြည်းချင်း ထရပ်လိုက်သည်။ သူ၏ ခန့်ညားသော မျက်နှာလေးမှာ အနည်းငယ် နီရဲနေလေသည်။
ပတ်ဝန်းကျင်ရှိ လူများမှာ သူတို့နှစ်ဦးကို ထူးဆန်းသော အကြည့်များဖြင့် ကြည့်နေကြပြီး လူငယ်အမျိုးသမီး အားလုံးနီးပါး၏ မျက်နှာပေါ်တွင် စိတ်ပျက်အားငယ်မှုနှင့် မယုံကြည်နိုင်မှုများ အထိုင်းသား ပေါ်လွင်နေတော့သည်။
' မဖြစ်နိုင်တာ.. ဒီလောက်ချောတဲ့သူက ဂေးတစ်ယောက် မဖြစ်နိုင်ပါဘူး ..'
' ဒါမျိုးတော့ မဖြစ်ပါစေနဲ့..ဘုရားအားလုံးကို တောင်းပန်ပါတယ်.. '
" သူတို့နှစ်ယောက် နမ်းနေတဲ့ ပုံရိပ်တွေ ငါ့ခေါင်းထဲ ရောက်လာပြီ... (နှာခေါင်းသွေးများ ယိုစီးကျလာခြင်း) "
" ကျေးဇူးပြုပြီး အဲ့လိုမျိုးတွေ မတွေးကြပါနဲ့ဦး .."
လူအုပ်ကြီး၏ ပြောဆိုသံများကြားမှ ရဲအရာရှိ နှစ်ဦးသည် လင်းဖန်နှင့် မေ့ကျီတို့၏ အနားသို့ ဖြည်းဖြည်းချင်း လျှောက်လာကြသည်။
" မင်္ဂလာပါ .. မင်း သူ့ကို သိလား .."
စကားဆုံးသည်နှင့် ရဲအရာရှိတစ်ဦးမှာ လင်းဖန်ကို သေသေချာချာ ကြည့်လိုက်ပြီး ချက်ချင်း မှတ်မိသွားသည်။
" အော်... မင်းက ဟိုတစ်ခေါက် လမ်းမပေါ်မှာ မင်းရဲ့ ရည်းစားကို ချီလို့ အတိုင်ခံရတဲ့ လူငယ် မလား.. "
" ဟားဟား..ဟုတ်ပါတယ် ရဲအရာရှိကြီး.. ကျွန်တော်တို့ ပြန်တွေ့ကြပြန်ပြီနော် .."
" တကယ်ပဲ အားနာပါတယ်ဗျာ.. ကျွန်တော်နဲ့ ကျွန်တော့်သူငယ်ချင်းက ဟာသဗီဒီယို အတိုလေး တစ်ခု ရိုက်နေကြတာပါ.. ဆရာတို့ကို ထပ်ပြီး ဒုက္ခပေးမိပြန်ပြီ.. "
လင်းဖန်က ခေါင်းကို ကုတ်လျက် ရိုးသားသော အပြုံးမျိုးဖြင့် ပြောလိုက်ရာ ကြည့်ရသည်မှာ အလွန်ပင် အပြစ်ကင်းစင်ပုံရသည်။
" ဗီဒီယို ရိုက်လို့တော့ ရပါတယ်..ဒါပေမဲ့ ဒီလောက်အထိ ရုတ်ရုတ်သဲသဲတော့ မလုပ်သင့်ဘူးလေ.. လူထု လမ်းပန်းဆက်သွယ်ရေးကို ထိခိုက်နေတယ်.. "
ရဲအရာရှိက ပိုမိုများပြားလာသော လူအုပ်ကြီးကို လက်ညှိုးထိုးပြကာ စိတ်ပျက်လက်ပျက် ဆုံးမလိုက်သည်။
" ဟုတ်ကဲ့ .. ဟုတ်ကဲ့.. နောက်တစ်ခါကျရင် သေချာ ဂရုစိုက်ပါ့မယ်ဗျ.. "
လင်းဖန်က ပြုံး၍ တောင်းပန်လိုက်၏ ။
ကျန်ရှိသော ရဲအရာရှိတစ်ဦးကမူ မျက်မှောင်ကြုတ်လျက် မေ့ကျီကို အထပ်ထပ်အခါခါ စူးစမ်းကြည့်နေမိသည်။
" မင်းရဲ့ သူငယ်ချင်းက ဒီဒေသက လူနဲ့တော့ မတူဘူးနော်.. "
" သူ့ကို မှတ်ပုံတင်လေး ပြခိုင်းလို့ ရမလား .."
ပြောပြောဆိုဆိုဖြင့် ရဲအရာရှိက မေ့ကျီထံသို့ လက်ကမ်းကာ မှတ်ပုံတင် တောင်းလိုက်သည်။
" မှတ်ပုံတင်လား... ဟုတ်တာပေါ့.. သေချာပေါက် ရှိတာပေါ့.. "
လင်းဖန်က ပြုံးပြီး ပြန်ဖြေလိုက်သော်လည်း ဘေးနားရှိ မေ့ကျီမှာမူ ဇဝေဇဝါ ဖြစ်သွားသည်။
" နတ်ဆိုးအရှင်.. ဒီငယ်သားမှာ အဲ့လိုမျိုး အရာ... အု.. "
မေ့ကျီ၏ စကားမဆုံးခင်မှာပင် လင်းဖန်က သူ၏ တံတောင်ဖြင့် မေ့ကျီ၏ ခါးကို အားရပါးရ တွတ်လိုက်သဖြင့် မေ့ကျီမှာ ချက်ချင်းပင် စကားစရပ်သွားကာ မြေပြင်ပေါ်သို့ ခွေကျသွားတော့သည်။
' အော်... ဒါကမှ နတ်ဆိုးအရှင်ရဲ့ တကယ့် အပြစ်ပေးမှုပဲ... '
မေ့ကျီ တွေးလိုက်မိသည်။
ရဲအရာရှိ နှစ်ဦးမှာမူ ကြောင်တောင်တောင် ဖြစ်သွားကြသည်။
လင်းဖန်က ရဲအရာရှိ နှစ်ဦးကို ကြည့်လိုက်ရာ သူ၏ မျက်ဝန်းများတွင် နီရဲသော ဝိညာဉ်အလင်းတန်းလေး တစ်ခု လက်ခနဲ ပေါ်လာခဲ့သည်။ ထိုအခါ ရဲအရာရှိ နှစ်ဦး၏ မျက်နှာမှာ တဖြည်းဖြည်းနှင့် ငေးငိုင်သွားကြတော့သည်။
" ဆရာတို့ စစ်ဆေးတာ အဆင်ပြေသွားပါပြီ .. ပြန်ပြီး အလုပ်ဆင်းဖို့ ပြင်လို့ရပါပြီ.. "
သူ၏ စကားအဆုံးတွင် ရဲအရာရှိ နှစ်ဦးမှာ ငေးငိုင်နေရာမှ ပြန်လည် နိုးထလာကြပြီး မျက်နှာပေါ်တွင် တောက်ပသော အပြုံးများ ပေါ်လာကြသည်။
" စစ်ဆေးတာ အဆင်ပြေပါတယ်.. ငါတို့လည်း ပြန်ပြီး အလုပ်ဆင်းဖို့ ပြင်ရတော့မယ်.. "
ပြောပြောဆိုဆိုဖြင့် ရဲအရာရှိ နှစ်ဦးမှာ ဖော်ဖော်ရွေရွေ လက်ပြနှုတ်ဆက်ကာ လှည့်ထွက်သွားကြတော့သည်။
" နတ်ဆိုးအရှင်.. ဒီသာမန်လူသား နှစ်ယောက်ကို ဘာလို့ ဒီလောက်အထိ ယဉ်ကျေးနေရတာလဲ.. သူတို့ကို ရှင်းပစ်လိုက်တာက ပိုမကောင်းဘူးလား.. "
ရဲအရာရှိ နှစ်ဦး ထွက်သွားပြီးနောက် မေ့ကျီက သူ၏ ခါးကို ကိုင်ပြီး မြေပြင်မှ ဖြည်းဖြည်းချင်း ထရပ်လိုက်သည်။ သူ၏ မျက်နှာမှာ ဇဝေဇဝါ ဖြစ်နေဆဲပင်။
လင်းဖန်က သူ့ကို စိတ်ပျက်လက်ပျက်ဖြင့် တစ်ချက် ကြည့်လိုက်သည်။
" မေ့ကျီ.. ဒီမှာ လူတွေအများကြီး ဝိုင်းကြည့်နေတာ.. မင်း တစ်ခုခု လုပ်လိုက်တာနဲ့ အားလုံးက သတိထားမိကုန်လိမ့်မယ်.. မင်းက ဒီမှာရှိတဲ့ လူအားလုံးကို ရှင်းပစ်ချင်လို့လား .."
" ရှင်းလိုက်ရုံပေါ့.. အရှင်သာ အမိန့်ပေးမယ်ဆိုရင် ဒီငယ်သားက အားလုံးကို မြူတစ်မှုန်မကျန် ရှင်းလင်းပေးပါ့မယ်.. ဘယ်သူ့ကိုမှ အသက်ရှင်လျက် ချန်ထားမှာ မဟုတ်ဘူး .."
မေ့ကျီက လက်တစ်ဖက်ကို ရင်ဘတ်ပေါ်တင်ကာ ဂုဏ်ယူစွာဖြင့် အမိန့်တော်ကို ခံယူရန် အသင့်ပြင်လိုက်သည်။
ဤအခိုက်အတန့်တွင် သူသည် ဤနေရာသို့ မလာခင်က စီရင်စုအရှင် ရှန့် မှာကြားလိုက်သည့် အချက်များကို အကုန်လုံး မေ့လျော့သွားပုံရသည်။
လင်းဖန် ... " ... "
လင်းဖန်မှာ ဘာပြောရမှန်းမသိ ဆွံ့အသွားသည်။ သူ အချိန်မီ ရောက်လာခဲ့ခြင်းမှာ တကယ်ပင် ကံကောင်းလှသည်။ မဟုတ်လျှင် မနက်ဖြန် သတင်းစာများတွင် တစ်ကမ္ဘာလုံးကို တုန်လှုပ်သွားစေမည့် ကြောက်မက်ဖွယ် အကြမ်းဖက် တိုက်ခိုက်မှုကြီးတစ်ခု ပါလာပေလိမ့်မည်။
" မေ့ကျီ.. မင်းလည်း သတိထားမိမှာပါ.. ဒီကမ္ဘာမှာ ဝိညာဉ်ချီစွမ်းအင်လုံးဝ မရှိဘူး..ငါတို့ ခန္ဓာကိုယ်ထဲမှာ ရှိနေတဲ့ ဝိညာဉ်ချီစွမ်းအင်တွေက အရမ်း တန်ဖိုးရှိတယ်.. မဖြစ်မနေ လိုအပ်တဲ့ အခြေအနေမျိုးကလွဲရင် အလဟဿ မဖြုန်းတီးသင့်ဘူး .."
" ဪ... ဒါကြောင့်ကိုး.. "
မေ့ကျီမှာ ရုတ်တရက် သဘောပေါက်သွားပြီး သူ၏ မျက်နှာတွင် လေးစားကြည်ညိုမှုများ အထိုင်းသား ပေါ်လာသည်။
" အရှင်က တကယ်ကို အမြော်အမြင် ကြီးမားပြီး ပါးနပ်လွန်းလှပါတယ်.. ဒီငယ်သားရဲ့ ပေါ့ဆမှုကြောင့် အရှင့်ရဲ့ အစီအစဉ်တွေကို ပျက်စီးစေတော့မလို့ပါ..အရှင် စိတ်တိုင်းကျ အပြစ်ပေးတော်မူပါ.. "
လင်းဖန်မှာ တခြားနည်းလမ်း မရှိတော့သဖြင့် သူ့ကို ဂရုမစိုက်တော့ဘဲ လှည့်ထွက်ကာ လမ်းပြခေါ်ဆောင်သွားတော့သည်။ မေ့ကျီကလည်း အမြန်ပင် နောက်မှ လိုက်ပါလာသည်။
" အရှင်... ဘယ်သွားမလို့လဲ.. "
" မင်းအတွက် မှတ်ပုံတင်တစ်ခု လုပ်ပေးပြီး အဝတ်အစားတွေလဲ ဝယ်ပေးရမယ်.. မင်းရဲ့ အခုဝတ်စုံက လူတွေ အာရုံစိုက်လွန်းတယ်.. "
လင်းဖန်က နောက်သို့ပင် လှည့်မကြည့်ဘဲ ပြောလိုက်သည်။
ရှေ့လျှောက် ရက်များသည်တော့ တော်တော်လေးကို ပြဿနာ တက်တော့မည်ဟု သူ ခံစားနေမိ၏။
Chapter 138
~
အခန်း ၁၃၈ : မရဘူး ..ဒီငယ်သားကတော့ စိတ်ထဲထားတယ်...
~
" အရှင်... ဒီငယ်သားအတွက် အခုလို အဝတ်အစားတွေ အများကြီး ဝယ်ပေးတာ တကယ်ပဲ အဆင်ပြေရဲ့လား .."
အပြန်လမ်းတွင် မေ့ကျိသည် သူအသစ်လဲလှယ်ဝတ်ဆင်ထားသော အဝတ်အစားများကို ငုံ့ကြည့်ရင်း စိတ်လှုပ်ရှားမှုနှင့်အတူ အားနာစိတ်များဖြင့် ပြောလိုက်သည်။
နတ်ဆိုးအရှင်၏ အားကိုးရသော လက်အောက်ငယ်သားတစ်ဦးအနေဖြင့် သူသည် အရှင်၏ သောကများကို ကူညီဖြေရှင်းပေးရမည့်အစား ယခုမူ အရှင်ကသာ သူ့အတွက် ခြေလှမ်းတိုင်း စိုးရိမ်ပူပန်ပေးနေရပြီး အဝတ်အစားသစ်များ ဝယ်ပေးရန်အတွက် ငွေကြေးပါ အကုန်အကျခံနေရသည်။
' အရှင်မင်းမြတ်က တကယ်ကို နူးညံ့သိမ်မွေ့လွန်းတာပဲ.. '
မေ့ကျီ တွေးလိုက်မိသည်။
" ရပါတယ် ..ဒါတွေက သာမန်အဝတ်အစားတွေပဲဟာ.. အများကြီးလည်း မပေးရပါဘူး .."
လင်းဖန်က အရေးမစိုက်သလို ပြောလိုက်သည်။ သို့သော် ထိုစကားကို ကြားလိုက်ရသည့်အခါ မေ့ကျီမှာ ထူးထူးခြားခြားပင် တုံ့ပြန်မှု ပြင်းထန်လာခဲ့သည်။
" အရှင်.. ဒါက ငွေကြေးကိစ္စတင် မဟုတ်ပါဘူး.. မူဝါဒပိုင်းဆိုင်ရာ ကိစ္စပါ.. "
" ဒီငယ်သားက အရှင့်ကို ဒုက္ခပေးရုံတင်မကဘဲ အခုလို ငွေပါ ကုန်ကျအောင် လုပ်မိတာကို ဘယ်လိုများ ခွင့်လွှတ်နိုင်ပါ့မလဲ.. "
" ဒီလို အပြစ်မျိုးက သေဒဏ်နဲ့ အစားထိုးရင်တောင် မလုံလောက်ပါဘူး.. ကျေးဇူးပြုပြီး ဒီငယ်သားကို ပြင်းပြင်းထန်ထန် အပြစ်ပေးတော်မူပါ .. "
လင်းဖန် ... " ... "
" သေဒဏ်နဲ့ အစားထိုးတာမျိုးကို အလွယ် ထုတ်မပြောစမ်းနဲ့ဟ.. "
လင်းဖန်က အနည်းငယ် မျက်မှောက်ကြုတ်လိုက်၏။ နောက်ဆုံးတွင် သူ မထိန်းနိုင်တော့ဘဲ နောက်သို့ လှည့်ကာ လက်သီးဆုပ်၍ မေ့ကျီ၏ ဝမ်းဗိုက်ဆီသို့ အားဖြင့် တစ်ချက် ထိုးလိုက်တော့သည်။
" အု... "
မေ့ကျီသည် ဗိုက်ကိုကိုင်လျက် ရှေ့သို့ မှောက်ခုံ လဲကျသွားသော်လည်း ကျေးဇူးတင်စကား ပြောရန်မူ မမေ့ချေ။
" အပြစ်ပေးတဲ့အတွက်... ကျေးဇူးတင်ပါတယ်... အရှင်.. "
ထိုလက်သီးတစ်ချက်ကြောင့် သူ၏ ရင်ထဲမှ အားနာစိတ်များမှာ ချက်ချင်းပင် သက်သာသွားသလို ခံစားလိုက်ရသည်။
" အရှင် .. အရှင် ဒီငယ်သားအတွက် ဝယ်ပေးထားတဲ့ ဒီအဝတ်အစားတွေကို အမြဲ တန်ဖိုးထားနေမှာပါ..နောက်ကျရင် အိမ်မှာ အမှတ်တရ ချိတ်ထားပြီး ဒိငယ်သားအပေါ် အရှင် ဒီနေ့ပြသခဲ့တဲ့ နူးညံ့သိမ်မွေ့မှုကို အမြဲ ဂုဏ်ပြုနေပါ့မယ်.. "
ပြန်လည် ထရပ်နိုင်သည်နှင့် မေ့ကျီသည် သူ၏ ကိုယ်ပေါ်မှ အဝတ်အစားများကို ယုယစွာ ပွတ်သပ်ရင်း စိတ်လှုပ်ရှားစွာ ပြောလိုက်သည်။
ဤအရာများမှာ နတ်ဆိုးအရှင် ကိုယ်တိုင် ဝယ်ပေးထားခြင်း ဖြစ်သည်။ ဤလောကတွင် မည်သူက ဤမျှ တန်ဖိုးကြီးလှသော ဂုဏ်ဒြပ်ကို ပိုင်ဆိုင်နိုင်ပါဦးမည်နည်း။
' ဒါက ငါ့အပေါ် အရှင်မင်းမြတ်ရဲ့ ယုံကြည်မှုနဲ့ မျက်နှာသာပေးမှုကို ပြတာပဲ မလား.. '
သူ တွေးလိုက်မိသည်။
" အဲ့ဒီလောက်အထိတော့ မလိုပါဘူး... "
" ဒီအဝတ်အစားတွေက မင်း ယာယီဝတ်ဖို့ပဲ.. နောက်ကျရင် မင်းကြိုက်တဲ့ အဝတ်အစားမျိုးနဲ့ အချိန်မရွေး လဲလို့ရတယ်.. "
မေ့ကျီက ထိုအဝတ်အစားများကို သိမ်းဆည်းကာ ချိတ်ထားမည်ဟု ပြောလိုက်သဖြင့် လင်းဖန် ကြက်သီးထလာပြီး အမြန် တားမြစ်လိုက်ရသည်။
ဤသည်မှာ ယွမ်အနည်းငယ်သာ ပေးရသည့် သာမန်အဝတ်အစားများ ဖြစ်ကြပြီး တန်ဖိုးကြီးလှသည့် ဝတ်စုံများ မဟုတ်ကြချေ။ အကယ်၍ သူ၏ လက်အောက်ငယ်သားက ထိုအဝတ်အစားများကို ပြခန်းသဖွယ် ချိတ်ဆွဲထားမည်ဆိုလျှင် နတ်ဆိုးအရှင်ဖြစ်သော သူ့အတွက် လူပုံအလယ်တွင် အရှက်ခွဲခံရသလို ခံစားရပေလိမ့်မည်။
" အဲ့လို ဘယ်ဖြစ်ပါ့မလဲ.. "
မေ့ကျီက ပြတ်ပြတ်သားသား ပြန်လည် ငြင်းခုံလိုက်သည်။ သူ၏ လက်ဖဝါးကို ရင်ဘတ်ပေါ်တွင် ဖိကပ်ထားပြီး မျက်နှာပေါ်တွင်လည်း ဂုဏ်ယူမှုနှင့် ကျေးဇူးတင်မှုများ အထင်းသား ပေါ်လွင်နေသည်။
" ဒါတွေက အရှင်ကိုယ်တိုင် ဒီငယ်သားကို ပေးထားတဲ့ အရာတွေပါ.. ဒါတွေက ဘယ်လောက်ပဲ တန်ဖိုးရှိရှိ.. မရှိရှိ... ဒီငယ်သားရဲ့ ရင်ထဲမှာတော့ ဒီကမ္ဘာပေါ်က ဘယ်အဝတ်အစားနဲ့မှ လဲလို့မရပါဘူး ..."
" ... "
" ကောင်းပြီ ..မင်းကြိုက်သလိုသာ လုပ်တော့.. "
လင်းဖန်က ဆက်လက် ငြင်းခုံရန် ပျင်းရိသွားသဖြင့် လက်လျှော့ကာ သူအလိုရှိသလိုသာ ပြော ခွင့်ပြုလိုက်တော့သည်။
" မှတ်ထား... ဒီကမ္ဘာမှာ အင်မော်တယ်တွေ.. နတ်ဆိုးတွေ..မိစ္ဆာတွေ မရှိဘူး..သာမန်လူသားတွေပဲ ရှိတယ်.. ဒီကမ္ဘာက လူသားတွေအတွက် ငါတို့က ပြင်ပက လာတဲ့သူတွေပဲ.. "
" ဒီမှာဆိုရင် ငါတို့ရဲ့ အထောက်အထားတွေကို အတတ်နိုင်ဆုံး ဖုံးကွယ်ထားရမယ် ..အင်မော်တယ်နတ်ဆိုးတိုက်ကြီးအကြောင်းကိုလည်း အလွယ်တကူ မပြောရဘူး.. ငါတို့ရဲ့ အစစ်အမှန် တည်ရှိမှုကိုလည်း လူတွေ သိအောင် မလုပ်ရဘူး ..နားလည်လား.. "
" အရှင်...ဒီငယ်သားနားမလည်တာက ဘာလို့ ကျွန်တော်တို့ရဲ့ တည်ရှိမှုကို ဖုံးကွယ်ထားရမှာလဲ.. "
" သူတို့က သာမန်လူသားတွေပဲ ဆိုရင်တော့ စိုးရိမ်စရာ မရှိပါဘူး .."
" ငါတို့ရဲ့ တည်ရှိမှု ပေါ်သွားရင် မလိုအပ်တဲ့ ပြဿနာတွေ အများကြီး ဖြစ်လာလိမ့်မယ်.. ဒီကမ္ဘာမှာ လူသားတွေတင် ရှိနေတာ မဟုတ်ဘဲ တခြားအရာတွေလည်း ရှိနေနိုင်တယ်... "
လင်းဖန်သည် ကောင်းကင်ယံကို မော့ကြည့်လိုက်ရာ သူ၏ မျက်ဝန်းများမှာ အနည်းငယ် စူးရှသွားသည်။ မေ့ကျီမှာလည်း တစ်စုံတစ်ရာကို ရိပ်မိသွားပုံရပြီး သူ၏ မျက်နှာအမူအရာမှာလည်း ပိုမို လေးနက်လာခဲ့သည်။
" အရှင်မင်းမြတ်... အရှင် ဆိုလိုတာက... ကောင်းကင်တာအို လား ..."
" ဒီကမ္ဘာမှာ ဝိညာဉ်ချီစွမ်းအင် မရှိတာတောင် ကောင်းကင်တာအိုက တကယ်ပဲ ရှိနေတာလား.. "
" ဘယ်သူသိမှာလဲ... ဘာပဲဖြစ်ဖြစ် ငါပြောသလိုသာ လုပ်ပါ.. "
လင်းဖန်၏ နှုတ်ခမ်းထောင့်များတွင် အဓိပ္ပာယ်ပါသော အပြုံးတစ်ခု ပေါ်လာသည်။ သူ ထပ်မံ ရှင်းမပြတော့ဘဲ အလေးအနက်သာ ထပ်မံ မှာကြားလိုက်သည်။
" မှန်လှပါ အရှင်.. "
မေ့ကျီက ခါးကို အနည်းငယ် ညွှတ်ကာ လေးနက်စွာ ပြန်ဖြေလိုက်သည်။ အရှင် ဘာကို စိုးရိမ်နေသည်ကို သူ မသိသော်လည်း အရှင့်တွင် ကိုယ်ပိုင် အကြံညဏ်နှင့် အစီအစဉ်များ ရှိမည်ဟု သူ ယူဆလိုက်သည်။
' ငါလို လူက အရှင့်ရဲ့ ဉာဏ်ပညာကို ဘယ်လိုလုပ်ပြီး အမီလိုက်နိုင်မှာလဲ.. '
သူ တွေးလိုက်မိသည်။
" အရှင်... "
မေ့ကျီက စကားစလိုက်သည်နှင့် လင်းဖန်သည် ချက်ချင်း ရပ်လိုက်ပြီး စိတ်တိုတိုဖြင့် နောက်သို့ လှည့်ကာ သူ့ကို လက်ညှိုးထောင်ပြလိုက်သည်။
" ပထမဆုံး အချက်..ဒီမှာ ငါ့ကို အရှင်လို့ ခေါ်တာကို ခွင့်မပြုဘူး.. အနည်းဆုံးတော့ သူစိမ်းတွေ ရှေ့မှာ လုံးဝ မခေါ်ရဘူး.. "
သူသည် တိတ်တဆိတ် နေရာမျိုးတွင် အရှင် ဟု အခေါ်ခံရသည်ကို အသားကျနေပြီ ဖြစ်သဖြင့် အရေးမကြီးသော်လည်း သူစိမ်းများ သို့မဟုတ် သူငယ်ချင်းများ ရှေ့တွင် ထိုသို့ အခေါ်ခံရခြင်းမှာ အလွန်ပင် အရှက်ရဖွယ် ကောင်းလှသည်။
ဘေးလူများ၏ အကြည့်တွင် သူတို့သည် စိတ်ကူးယဉ် ကမ္ဘာထဲမှာ နစ်မွန်းနေသည့် လူငယ်များ ကဲ့သို့ မြင်ကြပေလိမ့်မည်။ ထို့အပြင် နတ်ဆိုးအရှင် ဟူသော ဘွဲ့အမည်မှာ လူသားများ၏ အာရုံကို ဖမ်းစားလွန်းလှသည်။
" ဒါပေမဲ့ အရှင်က အရှင်ပဲလေ.. "
" တကယ်လို့ဒီငယ်သားက အရှင်လို့ မခေါ်ရင် တခြား ဘယ်လို ခေါ်ရမှာလဲ.. "
မေ့ကျီမှာ ဤစကားကို ကြားလိုက်ရသဖြင့် အခက်တွေ့သွားဟန် ရှိသည်။
နတ်ဆိုးအရှင် ဟူသော အမည်မှာ နတ်ဆိုးနယ်မြေ၏ အမြင့်မြတ်ဆုံးသော ဂုဏ်ဒြပ် ဖြစ်ပြီး နတ်ဆိုးနယ်မြေ၏ အထွဋ်အထိပ် အုပ်ချုပ်သူအတွက်သာ ခေါ်ဝေါ်သော ဘွဲ့အမည် ဖြစ်သည်။ အရှင် ဟူသော အခေါ်အဝေါ်မှလွဲ၍ အရှင်ကို ခေါ်ဝေါ်ရန် တခြားအမည်ကို သူ မစဥ်းစားနိုင်ပေ။
" ဒီကမ္ဘာမှာ ငါ့နာမည်က လင်းဖန်.. မင်းလည်း တခြားသူတွေလိုပဲ ငါ့ကို လင်းဖန်လို့ ခေါ်နိုင်တယ်.. "
လင်းဖန်က အေးအေးဆေးဆေးပင် ပြောလိုက်သည်။
" အဲ့လို ဘယ်ဖြစ်ပါ့မလဲ.. "
" ဒီငယ်သားက အရှင်ရဲ့ နာမည်ရင်းကို ဘယ်လိုလုပ်ပြီး တိုက်ရိုက် ခေါ်ဝံ့မှာလဲ.. "
မေ့ကျီက ကန့်ကွက်သည့်အနေဖြင့် အော်ဟစ်လိုက်သည်။ သူ၏ အမြင်တွင် အရှင်၏ နာမည်ကို တိုက်ရိုက်ခေါ်ဆိုခြင်းမှာ မရိုမသေ ပြုလုပ်ခြင်း ဖြစ်သည်။ သူသာမက နတ်ဆိုးနယ်မြေရှိ မည်သူကမျှ ထိုကဲ့သို့သော လုပ်ရပ်မျိုးကို ခွင့်ပြုကြမည် မဟုတ်ချေ။
" ဒါက အထူးအခြေအနေမို့လို့ ရပါတယ်.. ငါလည်း စိတ်ထဲ မထားပါဘူး... "
" မရဘူး..ဒီငယ်သားကတော့ စိတ်ထဲ ထားတယ်.. "
" ဒီငယ်သားကတော့ အရှင့်ရဲ့ နာမည်ကို တိုက်ရိုက်ခေါ်ဖို့ ကိုယ့်ကိုယ်ကိုယ် ဘယ်လိုမှ စိတ်မတင်းနိုင်ပါဘူး .."
လင်းဖန် ..." ... "
' သွားပြီ... ဒီခေါင်းမာတဲ့ ကောင်ကတော့ စပြန်ပြီ... '
လင်းဖန် တွေးလိုက်မိသည်။
ပြတ်သားလှသော မေ့ကျီကို ကြည့်ကာ လင်းဖန်မှာ စိတ်ပျက်မိသလို တခြားနည်းလမ်းလည်း မရှိတော့ချေ။ သူ၏ သစ္စာရှိမှုနှင့် နတ်ဆိုးနယ်မြေ၏ စည်းမျဉ်းများကို လိုက်နာမှုမှာ ကောင်းမွန်သော်လည်း အခြေအနေအရ အနည်းငယ်တော့ ပြောင်းလွယ်ပြင်လွယ် ရှိသင့်သည် မဟုတ်ပါလော။
" ကောင်းပြီလေ.. အရှင်လို့ ခေါ်တာက လွဲလို့ မင်း ကြိုက်သလို ခေါ်နိုင်တယ်.. "
လင်းဖန်က သက်ပြင်းချလျက် အလျှော့ပေးလိုက်သည်။ မေ့ကျီက မျက်မှောင်ကြုတ်ကာ မေးစေ့ကို လက်ဖြင့် ပွတ်ရင်း အလေးအနက် စဉ်းစားနေတော့သည်။
" နတ်ဆိုးအရှင်ဘုရင်ကြီး လား.. "
" မဟုတ်ဘူး .."
" နတ်ဆိုးအရှင်နတ်ဘုရားကြီး လား.. "
" ပယ်ချတယ်.. "
" နတ်ဆိုး... ဖြန်း ..."
" မင်းခေါင်းက နတ်ဆိုးတွေနဲ့ပဲ ပြည့်နေတာလား.."
ယခုတစ်ကြိမ်တွင် မေ့ကျီ၏ စကားမဆုံးခင်မှာပင် လင်းဖန်က စိတ်မထိန်းနိုင်တော့ဘဲ မေ့ကျီ၏ ခန့်ညားသော မျက်နှာကို လက်သီးဖြင့် လှမ်းထိုးလိုက်ပြန်သည်။ မေ့ကျီသည် လေထဲတွင် ၃၆၀ ဒီဂရီ လည်ထွက်သွားပြီးနောက် မြေပြင်ပေါ်သို့ မျက်နှာဖြင့် ကပ်လျက် ကျသွားတော့သည်။
လင်းဖန်က စိတ်တိုတိုဖြင့် သူ၏ လက်သီးကို ပြန်ရုပ်လိုက်သည်။ နတ်ဆိုးအရှင်ဟု မခေါ်ရန် ပြောထားသော်လည်း နတ်ဆိုးတောထဲက မထွက်ချေ။ ထိုအမည်များသည် နတ်ဆိုးအရှင်နှင့် ဘာများ ကွာခြားနေပါသနည်း။ ဒေါသထွက်စရာ ကောင်းလွန်းလှ၏။
မေ့ကျီသည် မျက်နှာကို ကိုင်ကာ မြေပြင်ပေါ်တွင် ဝမ်းနည်းပူဆွေးသော အမူအရာဖြင့် လဲလျောင်းနေလေသည်။
' ဒါပေမဲ့ အရှင်ပဲ... နတ်ဆိုးအရှင် ကလွဲလို့ တခြား ကြိုက်တာ ခေါ်လို့ရတယ်လို့ ပြောခဲ့တာလေ... '
သူ့ စိတ်ထဲတွင် တွေးနေမိသည်။
" အဲ့ဒါဆိုရင်... သခင်လေး လား.. "
မေ့ကျီက ပြန် ထရပ်လိုက်ပြီး သေချာ စဉ်းစားကာ သတိကြီးစွာဖြင့် မေးလိုက်သည်။
" အင်း... အဲ့ဒါဆိုရင်တော့ ရပါတယ်.. "
လင်းဖန်က စဉ်းစားကြည့်ပြီးနောက် အနည်းငယ် ကျေနပ်သွားကာ ခေါင်းညိတ် လိုက်လျောလိုက်သည်။
သခင်လေး ဟူသော အခေါ်အဝေါ်မှာ ဤခေတ်ကာလနှင့် အနည်းငယ် ကွဲလွဲနေဦးမည် ဖြစ်သော်လည်း နတ်ဆိုးအရှင်၊ နတ်ဆိုးဘုရင် သို့မဟုတ် နတ်ဆိုးနတ်ဘုရား ဟူသော အခေါ်အဝေါ်များထက်စာလျှင် တော်ပေသေးသည်။
" ဪ... ဒါနဲ့ .. ခုနက မင်း ငါ့ကို ခေါ်လိုက်တာ ဘာပြောမလို့လဲ.. "
တိုက်ခန်းအတွင်းသို့ ဝင်လာပြီးနောက် လင်းဖန်က လှေကားပေါ်သို့ တက်လှမ်းရင်း စူးစမ်းလိုစိတ်ဖြင့် မေးလိုက်သည်။
" အရှင်... မဟုတ်ဘူး... သခင်လေး..ဒီငယ်သား သိချင်တာက ကျွန်တော်တို့ ဘယ်ကို သွားနေတာလဲ.. "
မေ့ကျီက ကျဉ်းမြောင်းလှသော လှေကားကို ဇဝေဇဝါဖြင့် ကြည့်ရင်း မေးလိုက်သည်။
" ငါ့အိမ်ကို ပြန်ခေါ်သွားမလို့... "
လင်းဖန်က အေးအေးဆေးဆေးပင် ပြန်ဖြေလိုက်သည်။
စကားပြောနေကြစဉ်မှာပင် သူသည် တိုက်ခန်းတံခါးဝသို့ ရောက်ရှိသွားပြီး သော့ကို ထုတ်ကာ တံခါးပေါက်ထဲသို့ ထည့်လိုက်သည်။
' အရှင်ရဲ့ အိမ် ဟုတ်လား ..'
မေ့ကျီသည် လင်းဖန်၏ နောက်တွင် ရပ်နေရင်း ပွင့်တော့မည့် တံခါးကို စူးစမ်းစွာ ကြည့်နေမိ၏။
တစ်နည်းအားဖြင့် ပြောရလျှင် ဤတံခါး၏ နောက်ကွယ် ဤကမ္ဘာတွင် အသစ်တည်ဆောက်ထားသော နတ်ဆိုးအရှင်၏ နန်းတော် ပင် ဖြစ်ချေလိမ့်မည်။