အခန်း (၂၂၇-၂၂၈)
Vol. 22 Ch. 227-228
Chapter 227
~
အခန်း ၂၂၇ : မျှော်စင်ကို သန့်စင်ခြင်း...
~
ငွေဖြူရောင် လွှမ်းမိုးထားသော ဟင်းလင်းပြင်အတွင်းရှိ အရာအားလုံးမှာ တလက်လက်တောက်ပြောင်နေပြီး သန့်ရှင်းသပ်ရပ်လှသည်။
ဖြူဖွေးသော ကျောက်စိမ်းများဖြင့် တည်ဆောက်ထားသည့် နန်းတော်ပေါင်းများစွာမှာ ထိုဟင်းလင်းပြင်တစ်ခုလုံးတွင် ပြည့်လုနီးပါး ရှိနေပြီး လက်ရာမြောက်စွာဖြင့် ခန့်ညားထည်ဝါလွန်းလှ၏။ ထိုနန်းတော်များ၏ အလယ်ဗဟို၌မူ ဒဏ်ရာဒဏ်ချက်ပေါင်းများစွာဖြင့် ဟောင်းနွမ်းနေသော ဖြူဖွေးသည့် ရဲတိုက်ကြီးတစ်ခု ရှိနေပေသည်။ ၎င်းသည် ကြက်အုပ်ထဲမှ ကြိုးကြာကဲ့သို့ပင် မြင့်မားစွာ တည်ရှိနေပြီး ထူးထူးခြားခြားပင် မျက်စိကျစရာ ဖြစ်နေသည်။
ထိုရဲတိုက်ကြီးကို ကောင်းကင်ပိတ်လှောင်မျှော်စင် ဟု အမည်ပေးထားပြီး သက်ရှိအားလုံးအတွက် ကောင်းကင်နှင့်မြေကြီးကို ပိတ်လှောင်ကာ လူသားမျိုးနွယ်အတွက် အသက်ရှူပေါက်တစ်ခု ချန်ထားပေးရန် ပထမဧကရာဇ်က ဖန်တီးခဲ့ခြင်း ဖြစ်သည်။ သို့သော်လည်း ဤမျှော်စင်ကြောင့်ပင် ပထမ ဧကရာဇ်လက်ထက်မှစ၍ လူသားမျိုးနွယ်၏ သိုင်းပညာလမ်းစဉ်တွင် ဧကရာဇ်အဆင့်သို့ ရောက်ရှိသူ ထပ်မံထွက်ပေါ်လာခြင်း မရှိတော့ပေ။
လူသားတို့သည်လည်း သူတို့၏ လက်ရှိနယ်မြေအတွင်း၌သာ ထာဝရပိတ်လှောင်ခံထားရပြီး ပြင်ပသို့ ခြေတစ်လှမ်းပင် မလှမ်းနိုင်ကြတော့။
ဂူချန်က ထိုဖြူဖွေးနေသော မျှော်စင်အနီးသို့ အနည်းငယ် ချဉ်းကပ်လိုက်သည်နှင့် ပြင်းထန်လှသော ဖိအားတစ်ခုက သူ့အပေါ်သို့ လွှမ်းမိုးလာသည်ကို ခံစားလိုက်ရသည်။ သူ အင်္ကျီလက်စကို တစ်ချက် ဝှေ့ယမ်းလိုက်ရာ စစ်မှန်သောချီစွမ်းအင် အမြောက်အမြား တိုးထွက်လာပြီး ထိုဖိအားနှင့် ပြင်းထန်စွာ ထိပ်တိုက်တွေ့ဆုံသွားသည်။ အတိုင်းအဆမရှိသော စွမ်းအင်လှိုင်းများမှာ တလိမ့်လိမ့် တက်လာပြီး စွမ်းအင်နှစ်ခုမှာ အချိန်အတော်ကြာသည်အထိ အပြန်အလှန် အားပြိုင်နေကြသည်။
" တော်တော်လေး ဇွဲကောင်းတာပဲ.. "
ဂူချန်က ခပ်ဖျော့ဖျော့ ပြုံးလိုက်ပြီးနောက် လက်ကို ဆန့်ထုတ်လိုက်သည်။ ဟင်းလင်းပြင်၌ အက်ကြောင်းတစ်ခု ပေါ်ထွက်လာပြီး ကြောက်မက်ဖွယ်ကောင်းသော မိစ္ဆာစွမ်းအင်များ ပြည့်နှက်နေသည့် အစွန်းရှစ်ဖက်နတ်မိစ္ဆာလှံပုဆိန်မှာ အထူးနယ်မြေအတွင်းသို့ တိုးဝင်ရောက်ရှိလာသည်။ လှံရှည်ရောက်ရှိလာသည်နှင့် ကမ္ဘာကြီးမှာ တုန်ခါသွားပြီး လှံမှ ထွက်ပေါ်လာသော အနက်ရောင်စွမ်းအင်များသည် ဖြူဖွေးသော မျှော်စင်၏ အလင်းရောင်နှင့် ထိပ်တိုက်တိုးတော့သည်။
မူလ အားပြိုင်နေမှုမှာ ချက်ချင်းပင် ပျက်စီးသွားတော့သည်။ ဖြူဖွေးသော မျှော်စင်မှာ အကြိမ်အနည်းငယ်မျှ တုန်ခါသွားပြီးနောက် သူ၏ အရှိန်အဝါများကို လုံးဝ ရုပ်သိမ်းလိုက်သည်။ ၎င်းသည် ဂူချန်နှင့် နတ်မိစ္ဆာလှံကို မယှဉ်နိုင်မှန်း သိရှိသွားသဖြင့် သူ၏ စွမ်းအားအားလုံးကို ကာကွယ်ရေး၌သာ စုစည်းရန် ပြင်ဆင်လိုက်ခြင်း ဖြစ်ပုံရပေ၏။
သို့သော်လည်း...
ဂူချန်က ဟင်းလင်းပြင်အတွင်း၌ အကြိမ်အနည်းငယ် လက်ညှိုးဖြင့် တို့လိုက်ရာ ကောင်းကင်ပိတ်လှောင်မျှော်စင်၏ တင်းကျပ်စွာ ပိတ်ထားသော တံခါးကြီးများမှာ အလိုအလျောက် ပွင့်သွားသည်။ စူပါတာမီနယ်သည် သူ့အား ဝင်ရောက်ခွင့် အာဏာအားလုံးကို ပေးအပ်ထားပြီး ဖြစ်ရာ ယခုအခါ သူသည် ထျန်းရှူမြို့တော်၏ အဆင့်မြင့်ဆုံး စီမံခန့်ခွဲသူ ဖြစ်နေချေပြီ။
ဤအရာက ကောင်းကင်ပိတ်လှောင်မျှော်စင်ကို တိုက်ရိုက် သန့်စင်နိုင်ရန် မလုံလောက်သေးသော်လည်း မျှော်စင်၏ တံခါးများကို အတင်းအကျပ် ဖွင့်ခိုင်းရန်နှင့် အားနည်းချက်အားလုံးကို ထုတ်ဖော်ရန်အတွက်မူ လုံလောက်ပေသည်။
ထိုသို့ တွေးတောရင်း ဂူချန်က မျှော်စင်အတွင်းသို့ လှမ်းဝင်လိုက်သည်။ သူ၏ ခရမ်းရောင် မျက်ဝန်းများမှာ နတ်ဘုရားအလင်းတန်းများဖြင့် တောက်ပနေပြီး ကောင်းကင်ပိတ်လှောင်မျှော်စင်၏ တည်ဆောက်ပုံ အဆင့်ဆင့်ကို အသေးစိတ် စတင်ခွဲခြမ်းစိတ်ဖြာ တော့သည်။ မျှော်စင်အတွင်းရှိ ဖြူဖွေးသော ကျောက်စိမ်းနံရံများပေါ်တွင် ရှေးဟောင်းသင်္ကေတပေါင်းများစွာကို ထွင်းထုထားသည်။ သင်္ကေတတစ်ခုချင်းစီမှာ အသက်ရှူနေသကဲ့သို့ ရှိနေပြီး ညကောင်းကင်ယံမှ ကြယ်ပွင့်ကလေးများကဲ့သို့ ခပ်ဖျော့ဖျော့ အလင်းများကို ထုတ်လွှတ်နေသည်။
မျှော်စင်တစ်ခုလုံးတွင် ပုံဆောင်ခဲပေါင်းများစွာကို နေရာချထားပြီး ၎င်းတို့မှာ ထူးဆန်းသော ဆက်နွှယ်မှုတစ်ခု ရှိနေပုံရ၏။ အစွန်းရှစ်ဖက်နတ်မိစ္ဆာလှံပုဆိန်နှင့် မတူသည်မှာ ကောင်းကင်ပိတ်လှောင်မျှော်စင်သည် ကမ္ဘာ၏ အလိုဆန္ဒနှင့် အရာခပ်သိမ်း၏ အနှစ်သာရမှ မွေးဖွားလာခြင်းဖြစ်ရာ မြင့်မားသော ကိုယ်ပိုင်အသိစိတ် ရှိနေခြင်းဖြစ်သည်။
ယခင်က သူသည် အစွန်ရှစ်ဖက် နတ်မိစ္ဆာလှံကို ချောချောမွေ့မွေ့ သန့်စင်နိုင်ခဲ့ခြင်းမှာ စနစ်၏ အကူအညီကြောင့် ဖြစ်သည်ကို သိထားသင့်သည်။ သို့သော်လည်း အချိန်အတော်ကြာပြီးနောက်တွင်မူ သူသည် ယခင်ကကဲ့သို့ အားနည်းသောလူသားမျိုး မဟုတ်တော့ချေ။
" စကြစို့.. "
ဂူချန်သည် သူ့ဘာသာ ရေရွတ်လိုက်ပြီးနောက် လက်ဖဝါးများကို ဖြန့်လိုက်သည်။ မှင်ကဲ့သို့ နက်မှောင်သော အေးစက်သည့် မီးလျှံနှစ်ခုမှာ သူ၏ လက်ဖဝါးအတွင်းမှ ထွက်ပေါ်လာပြီး ၎င်းတို့၏ နက်ရှိုင်းသော နေရာ၌ အနီရောင်အလင်းဖျော့ဖျော့မှာ တဖျတ်ဖျတ် လက်နေသည်။ ၎င်းမှာ နတ်ဘုရားမီးတောက်ဂိုဏ်း၏ မြင့်မြတ်မီးလျှံနှင့် အတိုင်းအဆမရှိသော သန့်စင်ခြင်းတာအိုလမ်းစဉ် နတ်ဘုရားစွမ်းအားများကို ပေါင်းစပ်ထားခြင်း ဖြစ်သည်။
မည်သို့မျှ တွန့်ဆုတ်မနေဘဲ ဂူချန်သည် ထိုအနက်ရောင် မီးလျှံများကို မျှော်စင်အတွင်းရှိ ပုံဆောင်ခဲများဆီသို့ တွန်းပို့လိုက်ပြီး တစ်ခုပြီးတစ်ခု စတင် သန့်စင်တော့သည်။ ကောင်းကင်တာအို နတ်ဘုရားမျက်ဝန်း၏ တွက်ချက်စစ်ဆေးမှုများအရ ကောင်းကင်ပိတ်လှောင်မျှော်စင်သည် ဤထူးဆန်းသော ပုံဆောင်ခဲများကို အသုံးပြု၍ အလွန်အစွမ်းထက်သော အစီအရင်တစ်ခုကို ဖန်တီးထားပြီး ၎င်းမှတစ်ဆင့် အတွင်းဘက်ရှိ စွမ်းအားများကို အတင်းအကျပ် ပြောင်းလဲနေခြင်းဖြစ်ကြောင်း သူ လျင်မြန်စွာ ခွဲခြမ်းစိတ်ဖြာနိုင်ခဲ့သည်။
ဤအရာမှာ ပထမဧကရာဇ်၏ လက်ရာ ဖြစ်နိုင်ခြေ များလှသည်။ ကောင်းကင်ပိတ်လှောင်မျှော်စင်ကို သန့်စင်ရန်အတွက် သူသည် ဤပုံဆောင်ခဲများကို အရင်ဆုံး သန့်စင်ရမည်ပင် ။
မီးလျှံများသည် ရေခဲပုံဆောင်ခဲများနှင့် ထိတွေ့လိုက်သည်နှင့် ၎င်းတို့၏ မျက်နှာပြင်ပေါ်၌ အလွန်သေးငယ်သော အက်ကြောင်းပေါင်းများစွာ ပေါ်ပေါက်လာသည်။ ထိုအက်ကြောင်းများအတွင်းမှ ဖရိုဖရဲစွမ်းအင်များ စိမ့်ထွက်လာပြီး မီးလျှံများနှင့် ရောယှက်ကာ ချိ ချိ ဟူသော အသံများ ထွက်ပေါ်လာသည်။ ဂူချန်သည် အာရုံစိုက်လိုက်ပြီး မီးလျှံများ၏ ပြင်းအားကို မြှင့်တင်လိုက်သည်။
မျှော်စင်အတွင်းရှိ ဟင်းလင်းပြင်မှာ စတင် ပုံပျက်လာတော့သည်။ အနက်ရောင် မီးလျှံများသည် သံကြိုးများအဖြစ် ပြောင်းလဲသွားပြီး ရေခဲပုံဆောင်ခဲများအတွင်းရှိ စွမ်းအားများမှာ ချက်ချင်းပင် အရည်ပျော်သွားသော နှင်းများကဲ့သို့ ခဏချင်းအတွင်းမှာပင် ပြိုကွဲပျက်စီးသွားတော့သည်။
'ဘုန်း...'
နားကွဲမတတ် ကျယ်လောင်သော အသံကြီးမှာ မျှော်စင်အတွင်း၌ ပဲ့တင်ထပ်သွားပြီး ကောင်းကင်ပိတ်လှောင်မျှော်စင် တစ်ခုလုံးမှာလည်း ပြင်းထန်စွာ တုန်ခါသွားသည်။ ဖြူဖွေးသော ကျောက်စိမ်းနံရံပေါ်ရှိ သင်္ကေတများမှာ တစ်ခုပြီးတစ်ခု ပေါက်ကွဲပျက်စီးသွားပြီး လေထဲတွင် လွင့်ပျံ့သွားသော အလင်းစက်ကလေးများအဖြစ် ပြောင်းလဲသွားသည်။
ပုံဆောင်ခဲများ တစ်ခုပြီးတစ်ခု ပြိုကွဲသွားသည်နှင့်အမျှ ကောင်းကင်ပိတ်လှောင်မျှော်စင် တစ်ခုလုံးမှာလည်း အံ့ဖွယ် အသွင်ပြောင်းလဲမှုတစ်ခုကို စတင် ကြုံတွေ့နေရတော့သည်။
တစ်ချိန်တည်းမှာပင် ကောင်းကင်ပိတ်လှောင်မျှော်စင်ပေါ်ရှိ ပုံဆောင်ခဲများ တစ်ခုပြီးတစ်ခု ကြေမွပျက်စီးသွားသည်နှင့်အမျှ မဟာမိတ်အဖွဲ့အတွင်းရှိ လူတိုင်းမှာ ခံစားချက်တစ်ခု ရရှိလိုက်ကြသည်။
သူတို့၏ ခန္ဓာကိုယ်အတွင်းရှိ အလွန်အရေးကြီးသော အရာတစ်ခုမှာ တဖြည်းဖြည်းနှင့် အပြင်သို့ ဆွဲထုတ်ခံနေရသကဲ့သို့ပင် ဖြစ်သည်။ သာမန်လူများအတွက် ထိုခံစားချက်မှာ မပြင်းထန်ဘဲ နေရထိုင်ရ ခက်ခဲရုံမျှသာ ရှိသော်လည်း သိုင်းပညာရှင်များမှာမူ အလွန်ထင်ရှားသော အပြောင်းအလဲကို ခံစားလိုက်ရသည်။ ထို့အပြင် အဆင့်မြင့်မားလေလေ ထိုသို့ ဆွဲထုတ်ခံရသည့် ခံစားချက်မှာ ပိုမိုထင်ရှားလေလေ ဖြစ်သည်။
" ချီးပဲ... ငါ့ရဲ့ ကျင့်စဉ်တွေ ဆုတ်ယုတ်နေပြီ.. "
ထျန်းရှူးမြို့တော်ဆီသို့ ဦးတည်နေသော သိုင်းပညာရှင် မဟာမိတ်တပ်ဖွဲ့အတွင်းရှိ စောင့်ကြည့်ရေးကောင်စီဝင် တစ်ဦးက ရုတ်တရက် အော်ဟစ်လိုက်သည်။ ဘုန်း ကနဲ အသံနှင့်အတူ သူ မနေ့ညကမှ ရောက်ရှိခဲ့သော အဆင့်မှာ ရုတ်တရက် ဆုတ်ယုတ်သွားတော့သည်။ ဤဖြစ်ရပ်မှာ သူတစ်ဦးတည်းတင် မဟုတ်ချေ။
" သွားပြီ... ငါ့ကျင့်စဉ်တွေလည်း ဆုတ်ယုတ်သွားပြီ..အဆင့်နှစ်ခုတောင် တစ်ခါတည်း ကျသွားတာပဲ.. *********... ငါ ငါးနှစ်လုံးလုံး ကျင့်ကြံခဲ့ရတာတွေ အကုန် အလဟဿ ဖြစ်ကုန်ပြီ.. "
" ငါတို့တော့ သွားပြီ.. ဒီလို ဖြစ်ရပ်မျိုးဆိုရင်... ကောင်းကင်ပိတ်လှောင်မျှော်စင် အသန့်စင်ခံနေရတာလား.. "
" အဲဒါ ဘယ်လိုလုပ် ဖြစ်နိုင်မှာလဲ။ ထျန်းရှူးမြို့တော်က ကမ္ဘာပေါ်မှာ ခံစစ်အကောင်းဆုံး မြို့တော်လို့ နာမည်ကြီးတာလေ။ နတ်ဘုရားမီးတောက်ဂိုဏ်းက ဘယ်လောက်ပဲ အစွမ်းထက်ပါစေ ဒီလောက် အချိန်တိုလေးအတွင်းမှာ မထိုးဖောက်နိုင်ပါဘူး.. "
"ဂျုန်း...."
လူတိုင်း ငြင်းခုံနေကြစဉ်မှာပင် ထျန်းရှူးမြို့တော်အတွင်းမှ တောက်ပသော အဖြူရောင် အလင်းတန်းတစ်ခုမှာ ကောင်းကင်သို့ ထိုးတက်သွားပြီး မဟာမိတ်နယ်မြေတစ်ခုလုံးကို ဖုံးအုပ်ထားသော မမြင်နိုင်သည့် အကာအကွယ်တံတိုင်းကြီးကို ပြင်းထန်စွာ ရိုက်ခွဲကာ အပေါက်ကြီးတစ်ခု ဖြစ်သွားစေသည်။ ထိုအပေါက်မှာ ခဏချင်းအတွင်းမှာပင် ပြန်လည် ပိတ်သွားသော်လည်း ထိုမြင်ကွင်းက သိုင်းပညာရှင် မဟာမိတ်တပ်ဖွဲ့အတွင်းရှိ လူတိုင်းကို ထိတ်လန့်သွားစေခဲ့သည်။
သူတို့သည် တစ်ယောက်ကိုတစ်ယောက် အမြန်ကြည့်လိုက်ကြရာ သူတို့၏ မျက်ဝန်းများထဲတွင် မယုံကြည်နိုင်မှုများဖြင့် ပြည့်နှက်နေသည်ကို တွေ့လိုက်ရသည်။ ထျန်းရှူးမြို့တော်သည် အမှန်တကယ်ပင် အသိမ်းခံလိုက်ရပြီ ဖြစ်သည်။ နတ်ဘုရားလက်နက်ဖြစ်သော ကောင်းကင်ပိတ်လှောင်မျှော်စင်မှာလည်း ယခုအခါ အသန့်စင်ခံနေရပြီ ဖြစ်သည်။
'မဟုတ်ဘူး... သူ့ကို ဒီအတိုင်း ဆက်လုပ်ခွင့် ပေးလို့မဖြစ်ဘူး။ မဟုတ်ရင် လူသားမဟာမိတ်အဖွဲ့ တစ်ခုလုံးက ဆန်းကျယ် သားရဲတွေအတွက် သားသတ်ရုံကြီး ဖြစ်သွားလိမ့်မယ်..'
ထို့ကြောင့် သိုင်းပညာရှင် မဟာမိတ်တပ်ဖွဲ့မှ စစ်ဗျူဟာမှူး အချို့မှာ မည်သည့်အစီအစဉ်ကိုမျှ ဂရုမစိုက်တော့ဘဲ ထျန်းရှူးမြို့တော်အတွင်းသို့ တိုက်ရိုက်ဝင်ရောက်၍ နတ်ဘုရားမီးတောက်ဂိုဏ်းဝင်များနှင့် တိုက်ခိုက်ရန် အမိန့်ပေးလိုက်တော့သည်။
" မဟာမိတ်အဖွဲ့အတွက်.. "
" ဂိုဏ်းချုပ်အတွက်.. "
သွေးစွန်းသော သတ်ဖြတ်မှုများသည် ထျန်းရှူးမြို့တော် ပြင်ပ၌ တစ်ဖန် ပြန်လည် ပေါ်ပေါက်လာပြန်သည်။ သိုင်းပညာရှင် အားလုံးမှာ မျက်လုံးများ နီရဲနေကြပြီး သူတို့၏ အသက်ကိုပင် ဂရုမစိုက်တော့ဘဲ ရှေ့သို့ တိုးဝင်နေကြသည်။ နေရာအနှံ့အပြားမှ အနားယူနေသော ပညာရှင်များ၊ သိုင်းဘုရင်များပင် ပေါ်ထွက်လာကြသကဲ့သို့ သိုင်းမိသားစုကြီးများမှာလည်း သူတို့၏ ရတနာများကို စုဆောင်းကာ ထျန်းရှူမြို့တော်ဆီသို့ အပြင်း ချီတက်လာကြသည်။
ဂူချန်သည် ကောင်းကင်ပိတ်လှောင်မျှော်စင်ကို သန့်စင်ပြီးသွားသည်နှင့် မဟာမိတ်အဖွဲ့ရှိ သိုင်းပညာရှင် ထက်ဝက်ကျော်မှာ ကျင့်ကြံခွင့် အခွင့်အရေးများ ဆုံးရှုံးရုံသာမက သူတို့၏ အဆင့်များမှာလည်း သာမန်လူတန်းစား အဆင့်အထိ ကျဆင်းသွားမည်ကို သူတို့ ရှင်းရှင်းလင်းလင်း နားလည်ထားကြ၏။ ထို့အပြင် သားရဲမျိုးနွယ်များသည် ဤလူသားမျိုးနွယ်၏ နယ်မြေကို ရှေးကတည်းကပင် လိုချင်တပ်မက်နေကြပြီး သူတို့၏ လှုပ်ရှားမှုများကို စောင့်ကြည့်ကာ အခွင့်ကောင်းကို စောင့်နေကြသည် မဟုတ်ပါလော။
မဟာမိတ်အဖွဲ့တစ်ခုလုံးမှာ အကြီးအကျယ် အန္တရာယ်ကျရောက်နေပြီ ဖြစ်သည်။
ထိုမုန်းတီးစရာကောင်းသော ဂူချန်သည် သူ၏ ကိုယ်ကျိုးအတွက်နှင့် မဟာမိတ်အဖွဲ့တစ်ခုလုံးကို ဤမျှ အန္တရာယ်ရှိသော အခြေအနေသို့ တွန်းပို့ခဲ့ခြင်းမှာ လုံးဝ ခွင့်မလွှတ်နိုင်စရာပင်။ လူတိုင်းက သူ့ကို စိတ်ထဲမှ ကျိန်ဆဲနေကြသကဲ့သို့ ထျန်းရှူးမြို့တော်ဆီသို့လည်း အသည်းအသန် ပြေးလွှားနေကြသည်။
ကောင်းကင်ပိတ်လှောင်မျှော်စင် အပြီးသတ် သန့်စင်ခြင်း မခံရမီ သူတို့ မြန်မြန် လုပ်ဆောင်ကြရမည် ဖြစ်သည်။ မဟုတ်ပါက အားလုံး အဆုံးသတ်သွားပေလိမ့်မည်။
Chapter 228
~
အခန်း ၂၂၈ : ဧကရာဇ်အဆင့်သို့ တက်လှမ်းရန် အချိန်သင့်လေပြီ...
~
ကောင်းကင်ပိတ်လှောင်မျှော်စင်အတွင်း၌...
ပုံဆောင်ခဲများ တစ်ခုပြီးတစ်ခု ကြေမွပျက်စီးသွားသည်နှင့်အမျှ ကောင်းကင်ပိတ်လှောင်မျှော်စင်၏ စစ်မှန်သော အသွင်သဏ္ဍာန်မှာ ဂူချန်၏ ရှေ့မှောက်၌ ပေါ်ထွက်လာသည်။
ထိုပုံရိပ်မှာ အသက်သုံးနှစ်ခန့်အရွယ် ကလေးငယ်တစ်ဦးဖြစ်ပြီး ခန္ဓာကိုယ်က ဝိညာဉ်တစ်ခုကဲ့သို့ ကြည်လင်နေသည်။ သူသည် မျှော်စင်၏ ခန္ဓာကိုယ်မှ ခွဲထွက်ကာ လေထဲသို့ ပျံတက်လာပြီးနောက် နှုတ်ခမ်းလှုပ်ရှားမှု မရှိဘဲ ကလေးသံဖြင့် ပြောလိုက်သည်။
" လူငယ်လေး... မင်းက ငါ့ရဲ့ အချုပ်အနှောင်တွေကို ဖြည်ပေးခဲ့ပြီး ပြိုင်ဘက်ကင်းတဲ့ ပါရမီကို ပိုင်ဆိုင်ထားတာပဲ။ ဒီမျှော်စင်က မင်းကို အသိအမှတ်ပြုတယ်။ ငါ့ရဲ့ ဆန္ဒသုံးခုကို ဖြည့်ဆည်းပေးမယ်ဆိုရင် ငါက..."
"ဟားဟားဟား.. သောက်ရူး... "
ထိုကလေးငယ်၏ စကားမဆုံးခင်မှာပင် ဂူချန်က အေးစက်စွာ ရယ်မောလိုက်သည်။ သူ၏ လက်မောင်းကို တစ်ချက် လှုပ်ခါလိုက်ပြီး လက်ငါးချောင်းကို ဟင်းလင်းပြင်အတွင်း ဆုပ်ကိုင်လိုက်ရာ အနီရောင် သန့်စင်ခြင်းလမ်းစဉ် မုန်တိုင်းတစ်ခုက ထိုပုံရိပ်ကို ဝါးမြိုပြီး အပိုင်းပိုင်းအစစ ကြိတ်ခြေပစ်လိုက်တော့သည်။
အင်အားကုန်ခမ်းနေပြီ ဖြစ်သော်လည်း အခြေအနေများ တောင်းဆိုရန် ဝံ့ရဲနေသေးသည်လော။ သူက သူများအတွက် အလုပ်အကျွေးပြုနေရသည့် ဦးနှောက်မရှိသော ဇာတ်လိုက်များထဲမှ တစ်ယောက်ဟု ထင်နေသလော။
ဂူချန်သည် ကောင်းကင်ပိတ်လှောင်မျှော်စင်၏ အနှစ်သာရရှိရာသို့ လှမ်းဝင်လိုက်ပြီး ထိုအပေါ်သို့ လက်နှစ်ဖက်ဖြင့် ပြင်းထန်စွာ ဖိချလိုက်သည်။ ကြောက်မက်ဖွယ်ကောင်းသော အနီရောင်မုန်တိုင်း စွမ်းအင်များသည် မျှော်စင်၏ ထောင့်တိုင်းသို့ စီးဆင်းသွားပြီး ကျန်ရှိနေသော အမှတ်အသားအားလုံးကို ဆေးကြောပစ်လိုက်တော့သည်။
ထို့နောက် သူ၏ ဝိညာဉ်ပင်လယ်မှာ ကျယ်ပြန့်လာပြီး အတိုင်းအဆမရှိသော စိတ်ဝိညာဉ်စွမ်းအင် ဝဲဂယက်ကြီးတစ်ခုမှာ မျှော်စင်အတွင်း၌ စတင်လည်ပတ်ကာ မျှော်စင်၏ ကျန်ရှိနေသော ကိုယ်ပိုင်အသိစိတ်ကို အကုန်အစင် ကြိတ်ခြေဖျက်ဆီးပစ်လိုက်တော့၏။
"အားးး...."
စူးရှလှသော အော်ဟစ်သံကြီးတစ်ခု ထွက်ပေါ်လာပြီးနောက် ကောင်းကင်ပိတ်လှောင်မျှော်စင်၏ ကိုယ်ပိုင်အသိစိတ်မှာ လုံးဝဥဿုံ ပျက်စီးသွားတော့သည်။
[ အိမ်ရှင်သည် ဤကမ္ဘာကြီးကို မူလလမ်းကြောင်းမှန်ပေါ်သို့ ပြန်လည်ရောက်ရှိအောင် ကူညီပေးခဲ့ပြီး ကမ္ဘာကြီး၏ ငြိမ်းချမ်းရေးနှင့် စနစ်တကျရှိမှုကို ထိန်းသိမ်းပေးခဲ့သည်ဟု စနစ်က တွေ့ရှိရသည်။ စေတနာရမှတ် + ၁၀၀,၀၀၀ ]
တစ်ချိန်တည်းမှာပင် ထျန်းရှူးမြို့တော်၏ ပြင်ပ၌ တိုက်ခိုက်နေကြသော နတ်ဘုရားမီးတောက်ဂိုဏ်းဝင်များနှင့် သိုင်းပညာရှင် မဟာမိတ်တပ်ဖွဲ့ဝင်များသည် သူတို့၏ ခန္ဓာကိုယ်နှင့် စိတ်ဝိညာဉ်အတွင်း၌ ဖော်ပြ၍မရနိုင်လောက်အောင် ပြင်းထန်သော နာကျင်မှုကို ခံစားလိုက်ရသည်။ ၎င်းမှာ အသားကို အပိုင်းပိုင်းလှီးဖြတ်ခံရသည်ထက်ပင် ပိုမိုဆိုးရွားလှသည်။
ခဏချင်းအတွင်းမှာပင် ပြင်းထန်နေသော တိုက်ပွဲမှာ ရုတ်တရက် ရပ်တန့်သွားပြီး လူပေါင်းများစွာမှာ မြေပြင်ပေါ်၌ လဲကျကာ နာကျင်စွာ အော်ဟစ်နေကြတော့သည်။
" အား... ငါ့ကျင့်စဉ်တွေ... ငါ့ကျင့်စဉ်တွေ ... "
" သွားပြီ... သွားပြီ... သွားပြီ ... "
တိမ်တိုက်များ ဖုံးလွှမ်းနေသော ကောင်းကင်ယံမှနေ၍ အလင်းတန်းတစ်ခုမှာ ရုတ်တရက် ထိုးထွက်လာပြီး အောက်ရှိ လူအုပ်ကြီးပေါ်သို့ ကျဆင်းလာသည်။ တစ်ချိန်တည်းမှာပင် လူသားမဟာမိတ် နယ်မြေအတွင်း၌ အနိုင်နိုင် အသက်ရှင်နေကြသော ဆန်းကျယ် သားရဲများအားလုံးသည် သူတို့၏ သွေးသားအတွင်းမှ အမိန့်တစ်ခုကို လက်ခံရရှိလိုက်ကြသည်။
' သတ်ကြ ... '
ယခုအချိန်၌ ဤအဆင့်သို့ ရောက်ရှိလာပြီးနောက် ဂူချန်သည် နောက်ဆုံးတွင် ခပ်ဖျော့ဖျော့ ပြုံးလိုက်တော့သည်။ သူ၏ ပုံရိပ်မှာ လှုပ်ခါသွားပြီး ကောင်းကင်ပိတ်လှောင်မျှော်စင်၏ ပြင်ပ၌ ချက်ချင်း ပေါ်လာသည်။ သူသည် မည်သို့မျှ မတွန့်ဆုတ်ဘဲ လက်ဖဝါးကို ဆန့်ထုတ်ကာ အောက်သို့ ပြင်းထန်စွာ ဝှေ့ယမ်းလိုက်သည်။
"ဝူး..."
များပြားလှသော သန့်စင်ခြင်းလမ်းစဉ် နတ်ဘုရားစွမ်းအားများ ပေါ်ထွက်လာပြီး မျက်စိတစ်မှိတ်အတွင်းမှာပင် အလျားပေ ထောင်ပေါင်းများစွာရှိသည့် သန့်စင်ခြင်းတာအို နဂါးကြီးများအဖြစ် ပြောင်းလဲသွားတော့သည်။
ထိုနဂါးကြီးများ၏ ခန္ဓာကိုယ်မှာ တောက်ပသော အလင်းရောင်များဖြင့် လင်းလက်နေသည်။ သူတို့သည် လေထဲတွင် ကြောက်မက်ဖွယ်ကောင်းအောင် ဟိန်းဟောက်နေကြပြီး သူတို့၏ သာမန်အသက်ရှူသံမှာပင် ပြင်းထန်သော လေဆင်နှာမောင်းများကို ဖြစ်ပေါ်စေနိုင်သည်။ ထို့နောက် ဂူချန်၏ အတွေးတစ်ချက်ဖြင့် ထိုနဂါးကြီးများသည် တစ်ပြိုင်နက်တည်း ဟိန်းဟောက်လိုက်ကြသည်။
သူတို့သည် လေးကြိုးမှ လွှတ်လိုက်သော မြားများကဲ့သို့ ဖြူဖွေးသော မျှော်စင်ကြီးဆီသို့ တိုးဝင်သွားကြသည်။
"ဘုန်း...."
နဂါးကြီးများသည် မျှော်စင်နှင့် ထိပ်တိုက်တွေ့သော်လည်း ၎င်းကို ဖျက်ဆီးခြင်း မပြုဘဲ သားကောင်ကို ဖမ်းဆီးထားသော စပါးအုန်းမြွေများကဲ့သို့ မျှော်စင်ကြီးကို ရစ်ပတ်လိုက်ကြသည်။
ချိ... ချိ...
နဂါးကြီးများ၏ ရစ်ပတ်မှု ပိုမိုတင်းကျပ်လာသည်နှင့်အမျှ ဖြူဖွေးသော မျှော်စင်ထံမှ စိမ်းဖျော့ဖျော့ မီးခိုးငွေ့များ ထွက်ပေါ်လာပြီး ၎င်း၏ အလင်းရောင်မှာလည်း တဖျတ်ဖျတ် တုန်ခါနေတော့သည်။
' ဒီအရာကို သန့်စင်ဖို့ကတော့ အချိန်ပဲ လိုတော့တယ်... '
သူ၏ ခန္ဓာကိုယ်အတွင်းမှ ကုန်ခမ်းလုနီးပါးဖြစ်နေသော သန့်စင်ခြင်းလမ်းစဉ် နတ်ဘုရားစွမ်းအားများကို ခံစားရင်း ဂူချန်သည် စိတ်အေးသွားသည်။ ကံကောင်းထောက်မစွာဖြင့် သူ၏ အခြေခံမှာ ခိုင်မာပြီး သူ၏ သန့်စင်ခြင်းလမ်းစဉ်မှာလည်း ပြိုင်ဘက်ကင်း မဟာသခင် အထွတ်အထိပ်သို့ ရောက်ရှိနေသောကြောင့်သာ ဖြစ်သည်။ မဟုတ်ပါက ဤမျှော်စင်ကို တစ်ထိုင်တည်းနှင့် သန့်စင်နိုင်မည် မဟုတ်ချေ။
နောက်ထပ် ၁၅ မိနစ်ခန့်အတွင်းမှာပင် ကောင်းကင်ပိတ်လှောင်မျှော်စင်ကို သူက ကံကြမ္မာမျှော်စင်အဖြစ် ပြောင်းလဲသန့်စင်ပြီး ကမ္ဘာကြီး၏ ကံတရားနှင့် ကံကောင်းခြင်းများကို လုယူစုဆောင်းရန် အသုံးပြုပေလိမ့်မည်။ ထိုအချိန်ကျလျှင် ဤကမ္ဘာ၏ အလိုဆန္ဒပင်လျှင် သူ့ကို ဘာမှလုပ်နိုင်တော့မည် မဟုတ်ချေ။
သို့သော် ထိုသို့မလုပ်မီ သူ လုပ်စရာ တစ်ခု ကျန်သေးသည်။
[ လက်ရှိ စေတနာရမှတ် - ၆၂၅,၄၀၀ ]
သူ့ရှေ့မှ စနစ်ဖန်သားပြင်ကို ကြည့်ရင်း ဂူချန်၏ ခရမ်းရောင်မျက်ဝန်းများမှာ ပိုမိုတောက်ပလာသည်။ ဤတိုက်ပွဲမတိုင်ခင်က သူ၏ ရမှတ်မှာ သုံးသိန်းပင် မပြည့်ခဲ့ချေ။ သို့သော် လှံဖြင့် ကောင်းကင်ကို ခွဲခြင်း၊ ထျန်းရှုမြို့တော်ကို နှစ်ခြမ်းခွဲခြင်း၊ ဆိုင်ဘော့ဂ်များကို ဖျက်ဆီးခြင်းနှင့် နတ်ဘုရားမီးတောက်ဂိုဏ်းဝင်များ၏ ကောင်းမှု များကြောင့် ပေါင်းလိုက်လျှင် ရမှတ် ခြောက်သိန်းကျော် ရှိနေပြီ ဖြစ်သည်။
ခြောက်သိန်းကျော်ဟူသော ပမာဏမှာ သူ၏ မျှော်လင့်ချက်ထက် များစွာ ကျော်လွန်နေသည်။ အမှန်တကယ်တော့ သူ၏ ကနဦး တွက်ချက်မှုအရ ဤတိုက်ပွဲအပြီးတွင် ဧကရာဇ် အဆင့် ၃ သို့မဟုတ် ၄ သို့ ရောက်ရှိလျှင်ပင် အတော်လေး ကောင်းမွန်နေပြီ ဖြစ်သည်။ ထိုစွမ်းအားနှင့် နတ်ဘုရားလက်နက် နှစ်ခုရှိလျှင် သားရဲမျိုးနွယ် စစ်တပ်ကို ပြန်လည်တွန်းလှန်ရန် ပြဿနာမရှိချေ။
ဂူချန်က ခပ်ဖျော့ဖျော့ ပြုံးလိုက်ပြီး စိတ်ထဲမှ စနစ်ကို အမိန့်ပေးလိုက်သည်။
" စေတနာရမှတ် အားလုံးကို သိုင်းအဆင့် ကော်လံမှာ ထည့်လိုက်စမ်း... "
[ ဒင် ]
[ သင်၏ ကျင့်ကြံမှုအတွက် ပြင်ဆင်နေသည်... ]
ဂူချန်သည် သူ၏ သိုလှောင်ရတနာကို ဖွင့်လိုက်ရာ နတ်ဘုရားအလင်းတန်းများ တောက်ပနေသော ကောင်းကင်နှင့်မြေကြီး ရတနာများမှာ ရေပန်းတစ်ခုကဲ့သို့ ပန်းထွက်လာသည်။ ထိုဆေးဖက်ဝင် အပင်များထဲမှ တစ်ပင်တည်းမှာပင် ပြင်ပကမ္ဘာရှိ လူများကို ရူးသွပ်သွားစေရန် လုံလောက်ပေသည်။
ဂူချန်သည် ထိုရတနာအားလုံးကို တစ်ငုံတည်းဖြင့် ဝါးမြိုသန့်စင်လိုက်တော့သည်။
[ သင်သည် ကောင်းကင်မူလ ရွှေအမြုတေ၊ ဖရိုဖရဲ ကြာပန်းပြာ၊ ကောင်းကင်နှင့်မြေကြီး ဝိညာဉ်မြစ်၊ နဂါးနှင့်ဖီးနစ် သွေးအနှစ်သာရ၊ နှစ်သောင်းချီသက်တမ်းရှိ လင်ဇီး.........တို့ကို စားသုံးလိုက်သည်။ ပြင်းထန်လှသော ဆေးစွမ်းအားများသည် ခန္ဓာကိုယ်အတွင်း၌ ရူးသွပ်စွာ ပြေးလွှားနေသော်လည်း သင်၏ ခန္ဓာကိုယ်ကို အနည်းငယ်မျှ မထိခိုက်စေနိုင်ဘဲ သန့်စင်ခြင်း စွမ်းအားများ၏ လွှမ်းမိုးခြင်းကို ခံလိုက်ရသည်။ ]
[ စိတ်ဝိညာဉ်စွမ်းအင် အကြီးအကျယ် တိုးတက်လာသည်... စိတ်ဝိညာဉ်ပင်လယ် ကျယ်ပြန့်လာသည်... ခန္ဓာကိုယ် နုပျိုလန်းဆန်းလာသည်... ဝိညာဉ်ကို အာဟာရဖြည့်တင်းပေးသည်... ]
[ ယခုအခါ သင်သည် နတ်ပြည်သို့ တက်လှမ်းနေသကဲ့သို့ ခံစားနေရသည် ]
[ သတိပေးချက် - သင်၏ ကျင့်ကြံမှုအရှိန်မှာ ၇၀၀% တိုးတက်သွားသည် ]
ဂူချန်၏ မျက်ဝန်းများမှာ အနည်းငယ် ကျုံ့သွားသည်။ သူသည် အထောက်အကူပြု တာအိုလက်နက် များစွာကို သူ၏ ခန္ဓာကိုယ်၌ ထပ်မံ အသုံးပြုလိုက်သည်။ သူ ရင်ဆိုင်ရမည့်အရာမှာ သားရဲဧကရာဇ် တစ်ပါးနှစ်ပါး မဟုတ်ဘဲ ရာနှင့်ချီ၍ ဖြစ်သည်။
[ ...ကျင့်ကြံမှုအရှိန် တိုးတက်လာသည်... ]
[ အပြစ်အနာအဆာကင်းသော ခန္ဓာကိုယ်၊ အတိုင်းအဆမရှိ ကျယ်ပြောသော စိတ်ဝိညာဉ်ပင်လယ်နှင့် ခိုင်မာလှသော လမ်းစဉ်အခြေခံတို့၏ အကူအညီဖြင့်၊ ယခင်က ကျော်ဖြတ်ရန် ခက်ခဲလှသော အဆင့် ၈(အရှင်သခင်) နှင့် အဆင့် ၉ (ဧကရာဇ်) ကြားမှ အတားအဆီးကြီးမှာ ယခုအခါ စိုစွတ်နေသော တစ်ရှူးစက္ကူကဲ့သို့ပင် အလွယ်တကူ ဖောက်ထွက်နိုင်ပြီ ဖြစ်သည် ]
[ စေတနာရမှတ် ၃၀,၀၀၀ အသုံးပြုလိုက်သည်။ သင်၏ မူလကပင် အနာအဆာကင်းသော ခန္ဓာကိုယ်မှာ လုံးဝဥဿုံ အသွင်ပြောင်းလဲသွားပြီ ဖြစ်သည်။ သင်၏ အရေပြားနှင့် အသားတိုင်းမှာ ဒဏ္ဍာရီထဲမှ ထန်ဆန်း ကဲ့သို့ပင် ဖြစ်သွားပြီး သင့်အသားကို စားသုံးသူတိုင်းမှာ နှစ်ပေါင်းရာချီသော ကံကောင်းခြင်းနှင့် သက်ရှည်ကျန်းမာခြင်းကို ရရှိပေလိမည် ]
"ဘုန်း...."
အထူးနယ်မြေတစ်ခုလုံး ပေါက်ကွဲသွားသည်။ ကောင်းကင်ပိတ်လှောင်မျှော်စင်နှင့် ပတ်ဝန်းကျင်ရှိ နန်းတော်ပေါင်းများစွာမှာ မြေပြင်ပေါ်၌ တင်ပျဉ်ခွေထိုင်နေသော အနက်ရောင်ဝတ်စုံ ပုံရိပ်နှင့်အတူ ထျန်းရှူမြို့တော်အတွင်းသို့ ချက်ချင်း ရောက်ရှိသွားသည်။
ဂူချန်က တင်ပျဉ်ခွေ ထိုင်နေဆဲဖြစ်ပြီး သူ၏ နောက်ကွယ်၌ အနက်ရောင် စွမ်းအင်လှိုင်းများမှာ ရူးသွပ်စွာ ကခုန်နေကြသည်။ သူ၏ ကြောက်မက်ဖွယ်ကောင်းသော အရှိန်အဝါမှာလည်း တည်ငြိမ်စွာပင် မြင့်တက်လာနေတော့သည်။
[ စေတနာရမှတ် ၃၈,၀၀၀ အသုံးပြုလိုက်သည်။ သင်၏ စိတ်ဝိညာဉ်ပင်လယ်မှာ အတိုင်းအဆမရှိ ကျယ်ပြန့်လာသည်။ သင်၏ အသိစိတ်မှာ အမြင့်ဆုံးအဆင့်သို့ တက်လှမ်းသွားပြီ ဖြစ်သည်။ သင်၏ စိတ်ဝိညာဉ်အာရုံမှာ မိုင်ပေါင်းတစ်သောင်းပတ်လည်ကို လွှမ်းခြုံထားနိုင်ပြီး သင် အလိုရှိပါက အသေးစိတ်အချက်အလက် တစ်ခုမျှ သင်၏ အာရုံမှ လွတ်မြောက်နိုင်မည် မဟုတ်ချေ။ ]
[ စေတနာရမှတ် ၅၀,၀၀၀ အသုံးပြုလိုက်သည်။ သင်၏ အသက်စွမ်းအားမှာ အသွင်ပြောင်းလဲသွားပြီး သာမန်လူသား အဆင့်မှ လုံးဝ ကျော်လွန်သွားပြီ ဖြစ်သည်။ သင်သည် ဟင်းလင်းပြင် ကို ဖြတ်ကျော်နိုင်စွမ်း ရရှိပြီ ဖြစ်သည် ]
[ ဂုဏ်ယူပါသည်၊ သင်သည် အဆင့် ၉ ရှိသော ကြယ်စင်ဧကရာဇ်အဆင့် သို့ လုံးဝ တက်လှမ်းနိုင်ခဲ့ပြီ ဖြစ်သည် ]
ခဏချင်းအတွင်းမှာပင် လေနှင့်တိမ်တိုက်များ၏ အရောင်မှာ ပြောင်းလဲသွားပြီး ကမ္ဘာကြီးမှာ အသွင်ပြောင်းသွားတော့သည်။ ကြောက်မက်ဖွယ်ကောင်းသော ဖိအားကြီးမှာ နတ်ပြည်မှ မြစ်ကြီးတစ်ခု ကျဆင်းလာသကဲ့သို့ မိုင်ပေါင်းတစ်သောင်းပတ်လည် မြေပြင်ကြီးကို လွှမ်းမိုးလိုက်တော့သည်။
" အား... တကယ်ကို ကျေနပ်စရာကောင်းတယ်..."
ဂူချန်သည် သူ၏ လက်ဖဝါးကို ဖြန့်ကြည့်လိုက်ရာ နတ်ဘုရားအလင်းတန်းများ တောက်ပနေသော အရေပြားကို တွေ့လိုက်ရသည်။ သူ အလွန်ပင် လန်းဆန်းတက်ကြွနေပေ၏။ ယခုခံစားချက်ကို မည်သည့်စကားလုံးနှင့်မျှ ပြည့်စုံအောင် ဖော်ပြနိုင်မည် မဟုတ်ချေ။
စနစ်ဖန်သားပြင်ကို လှမ်းကြည့်လိုက်သောအခါ သူ ခပ်တိုးတိုး ရယ်မောလိုက်မိသည်။ ကြယ်စင်ဧကရာဇ်အဆင့်သို့ တက်လှမ်းပြီးနောက်မှာပင် သူ၏ လက်ထဲ၌ စေတနာရမှတ် ငါးသိန်းခန့် ကျန်ရှိနေသေးသည်။
သူ၏ မျက်ဝန်းများမှာ တောက်ပနေပြီး ပြင်ပမှ ရုန်းရင်းဆန်ခတ်မှုများကို ဂရုမစိုက်ဘဲ ဖန်သားပြင်ကို ထပ်မံ ကြည့်လိုက်သည်။
[ သင်သည် ကြယ်စင်ဧကရာဇ်အဆင့် ၁ သို့ ရောက်ရှိသွားပြီး ခန္ဓာကိုယ်မှာ ဟင်းလင်းပြင်စွမ်းအားများနှင့် စတင် အသားကျလာပြီ ဖြစ်သည်။ သင်၏ အပြစ်အနာအဆာကင်းသော ခန္ဓာကိုယ်နှင့် ဝိညာဉ်ကြောင့် ထိုအရာမှာ အလွန်ပင် သေးငယ်လှသည်။ ]
[ ဧကရာဇ်အဆင့်သို့ ရောက်ရှိပြီး ဟင်းလင်းပြင်စွမ်းအားများကို ခံစားမိချိန်၌၊ ယခင်က မည်သည့်ပညာရှင်မျှ လှည့်စားမှုလမ်းစဉ် နှင့် သန့်စင်ခြင်းလမ်းစဉ်တို့မှတစ်ဆင့် ဧကရာဇ်ဖြစ်ခဲ့ဖူးခြင်း မရှိသဖြင့်၊ သင်သည် အတိုင်းအဆမရှိသော အမှောင်ပင်လယ်ကြီးကို ထိတွေ့နေရသကဲ့သို့ ခံစားရသည်။ ]
[ သို့သော် သင်၏ ကောင်းကင်တာအို နတ်ဘုရားမျက်ဝန်း၏ ခွဲခြမ်းစိတ်ဖြာနိုင်စွမ်းဖြင့် သင်သည် မသိနားမလည်သော နယ်ပယ်ကို လျင်မြန်စွာ စူးစမ်းနိုင်ခဲ့ပြီး ဂူချန် အတွေးအခေါ် သီအိုရီကို ဖန်တီးနိုင်ခဲ့သည်။ ]
[ စေတနာရမှတ် ၂၅,၀၀၀ အသုံးပြုလိုက်သည်။ သင်၏ စိတ်ဝိညာဉ်စွမ်းအားမှာ ဟင်းလင်းပြင်စွမ်းအားများနှင့် စတင် ပေါင်းစပ်သွားပြီး ဟင်းလင်းပြင်ကို ဖြတ်ကျော်နိုင်စွမ်းကို ကနဦး ရရှိသွားသည်။ ]
[ ဂုဏ်ယူပါသည် ။သင်သည် ကြယ်စင်ဧကရာဇ် အဆင့် ၂ သို့ အောင်မြင်စွာ တက်လှမ်းနိုင်ခဲ့သည် ]
[ စေတနာရမှတ် ၅၇,၈၀၀ အသုံးပြုလိုက်သည်။ သင်၏ ခန္ဓာကိုယ်အတွင်း၌ ဟင်းလင်းပြင်စွမ်းအားများ ကိန်းဝပ်လာသည်။ သင်သည် ဟင်းလင်းပြင်၏ တီးတိုးသံများကိုပင် ကြားနိုင်သကဲ့သို့ ဖြစ်နေသည်။ သင်၏ လှုပ်ရှားမှုတိုင်းတွင် ဟင်းလင်းပြင်စွမ်းအားများက လိုက်ပါနေပြီး သင်၏ ဖိအားမှာ သမုဒ္ဒရာကြီးကဲ့သို့ ဖြစ်နေသည်။ ]
[ သင်သည် စိတ်ဝိညာဉ်ကို ခန္ဓာကိုယ်မှ ခွဲထွက်၍ ဟင်းလင်းပြင်အတွင်း လှည့်လည်သွားလာနိုင်ပြီ ဖြစ်သည်။ ]
[ ဂုဏ်ယူပါသည် ။ သင်သည် ကြယ်စင်ဧကရာဇ် အဆင့် ၃ သို့ အောင်မြင်စွာ တက်လှမ်းနိုင်ခဲ့သည် ]
ဂူချန်သည် ခေါင်းကို အနည်းငယ် ညိတ်လိုက်ပြီး သူ၏ ရှေ့မှ လေထုထဲ၌ မျဉ်းတစ်ကြောင်းကို အသာအယာ ဆွဲလိုက်ရာ ကြယ်စင်များ ပြည့်နှက်နေသော ဟင်းလင်းပြင် အက်ကြောင်းတစ်ခု ပေါ်ထွက်လာသည်။ သူ၏ စိတ်အကြံတစ်ချက်ဖြင့် ထိုအက်ကြောင်းမှတစ်ဆင့် ဤဂြိုဟ်မှ ထွက်ခွာသွားနိုင်သည်ဟု သူ ခံစားနေရသည်။
ဂူချန်သည် သူ၏ လက်ငါးချောင်းကို ပြင်းထန်စွာ ဆုပ်ကိုင်လိုက်ရာ လေထုပင်လျှင် ကြေမွသွားသကဲ့သို့ အသံများ ထွက်ပေါ်လာသည်။ တစ်ခဏအတွင်းမှာပင် သူ၏ နောက်ကွယ်မှ ဟင်းလင်းပြင်မှာ ဖန်သားပြင်တစ်ခုကဲ့သို့ အက်ကွဲသွားပြီး အက်ကြောင်းများမှာ ပင့်ကူအိမ်ကဲ့သို့ ပြန့်နှံ့သွားတော့သည်။ အေးစက်လှသော ဟင်းလင်းပြင် စွမ်းအင်များ စိမ့်ထွက်လာသည်။
"ချလွင်..."
အနက်ရောင် ကြည်လင်နေသော သံကြိုးပေါင်းများစွာမှာ ထိုအက်ကြောင်းများအတွင်းမှ ထွက်ပေါ်လာသည်။ ထိုသံကြိုးများ၏ ထိပ်ဖျားမှာ လှံများကဲ့သို့ ထက်မြက်နေပြီး ဟင်းလင်းပြင်ကို အလွယ်တကူ ထိုးဖောက်နိုင်သည်။ ဂူချန်သည် ထိုဟင်းလင်းပြင်အတွင်း၌ ရပ်နေပြီး သူ၏ လက်လှုပ်ရှားမှုနှင့်အတူ သံကြိုးများမှာလည်း လေထဲတွင် ကခုန်နေကြသည်။
"ဘုန်း...."
သံကြိုးများမှာ မှန်သားပြင်များကဲ့သို့ ကြေမွပျက်စီးသွားပြီးနောက် အရာအားလုံးမှာ ပုံမှန်အတိုင်း ပြန်ဖြစ်သွားသည်။ ဂူချန်၏ နှုတ်ခမ်းထောင့်တွင် အပြုံးတစ်ခု ပေါ်လာသည်။ ဤ ဟင်းလင်းပြင်သံကြိုး နည်းပညာဖြင့် ရန်သူသည် ကမ္ဘာ၏ အခြားတစ်ဖက်၌ ရှိနေလျှင်ပင် သူသည် ချက်ချင်း ဖမ်းဆီးနိုင်ပေလိမ့်မည်။
[ စေတနာရမှတ် ၁၃၅,၀၀၀ အသုံးပြုလိုက်သည်။ သင်၏ ခန္ဓာကိုယ်အတွင်း၌ ဟင်းလင်းပြင်အသေးစားတစ်ခု ဖြစ်ပေါ်လာသည်။ သင်၏ တိုက်ခိုက်ရေးစွမ်းအားမှာ အထွတ်အထိပ်သို့ ရောက်ရှိသွားပြီ ဖြစ်သည်။ သင်၏ သာမန်တိုက်ခိုက်မှု တစ်ချက်မှာပင် သက်ရှိသန်းပေါင်းများစွာကို သုတ်သင်ပစ်နိုင်သည်။ ]
[ ဂုဏ်ယူပါသည် ။ သင်သည် ကြယ်စင်ဧကရာဇ် အဆင့် ၆ သို့ အောင်မြင်စွာ တက်လှမ်းနိုင်ခဲ့သည် ။ ]
[ စေတနာရမှတ် ၂၇၉,၈၀၀ အသုံးပြုလိုက်သည်။ သင်၏ ခန္ဓာကိုယ်အစိတ်အပိုင်း အားလုံးမှာ ကောင်းကင်နှင့်မြေကြီးနှင့် ပဲ့တင်ထပ်နေသည်။ သင်၏ အရှိန်အဝါ အနည်းငယ်မျှသည်ပင် သာမန်လူတစ်ဦး၏ ကျင့်စဉ်ကို မြှင့်တင်ပေးနိုင်သော ဆေးစွမ်းကောင်း ဖြစ်လာသည်။ သင်၏ ခန္ဓာကိုယ်နှင့် ဝိညာဉ်မှာ အင်မော်တယ် အဆင့်သို့ ရောက်ရှိသွားပြီ ဖြစ်သည်။ ]
[ အကယ်၍ သင်၏ ခန္ဓာကိုယ် ပျက်စီးသွားလျှင်ပင် သင်၏ ဝိညာဉ်သည် အဆုံးမရှိသော အချိန်မြစ်အတွင်းသို့ ထွက်ပြေး၍ ပြန်လည်မွေးဖွားရန် ရှာဖွေနိုင်ပေလိမ့်မည်။ ]
[ ဂုဏ်ယူပါသည် ။ သင်သည် ကြယ်စင်ဧကရာဇ်အဆင့်၏ အထွတ်အထိပ် သို့ အောင်မြင်စွာ တက်လှမ်းနိုင်ခဲ့ပြီ ဖြစ်သည် ။ ]
[ ယခုအခါ ဤကမ္ဘာပေါ်တွင် မည်သည့်သက်ရှိမျှ သင်၏ ပြိုင်ဘက် မဟုတ်တော့ချေ။ သင်သည် ကောင်းကင်အောက်၌ ပြိုင်ဘက်ကင်း ဖြစ်သွားပြီ ဖြစ်သည် ။]
"ဘုန်း..."
ဂူချန်သည် ရုတ်တရက် မတ်တပ်ရပ်လိုက်ပြီး ခေါင်းကိုမော့ကာ အဝေးသို့ လှမ်းကြည့်လိုက်သည်။ သူ၏ အကြည့်မှာ အနက်ဆုံးသော ချောက်ကမ္ဘာကြီးကဲ့သို့ နက်ရှိုင်းလှပြီး ဟင်းလင်းပြင်အလွှာများကို ဖြတ်ကျော်ကာ သက်ရှိအားလုံးကို တိုက်ရိုက် စောင့်ကြည့်နေသကဲ့သို့ပင် ရှိတော့သည်။
လွန်ခဲ့သော သုံးမိနစ်ခန့်က မဟာမိတ်နယ်မြေ၏ ပြင်ပ၌...
ဤအချိန်၌ ပုံသဏ္ဍာန်အမျိုးမျိုးနှင့် ကြောက်မက်ဖွယ်ကောင်းသော အရှိန်အဝါများ ရှိကြသည့် သားရဲမျိုးနွယ် ခေါင်းဆောင် တစ်ရာကျော်တို့သည် လူသားမဟာမိတ် နယ်မြေ၏ ပတ်ဝန်းကျင်ရှိ နေရာအသီးသီးတွင် စခန်းချနေကြသည်။ အမှန်တကယ်တော့ သူတို့မှာ ထိုနေရာ၌ အိပ်ပျော်နေကြခြင်းပင် ။
အဘယ်ကြောင့်ဆိုသော် သူတို့ ဤနေရာ၌ စောင့်ကြပ်နေသည်မှာ နှစ်ပေါင်း နှစ်ထောင်ကျော်ပြီ ဖြစ်သည်။ သက်တမ်းရှည်လှသော သားရဲဧကရာဇ်များ အတွက်ပင် ထိုအချိန်မှာ အလွန်ပင် ကြာရှည်လှသည်။ နှစ်ပေါင်း နှစ်ထောင်လုံးလုံး ဘာမှမဖြစ်ခဲ့ဘဲ ယနေ့မှ တစ်ခုခု ဖြစ်လာမည်လော။ အဓိပ္ပာယ်မရှိသော စကားပင်။
သူတို့သည် စောင့်ရသည်ကို ငြီးငွေ့နေကြပြီး သူတို့ ရှိနေသေးကြောင်း ပြသရန်အတွက် သူတို့၏ အရှိန်အဝါများကိုသာ စဉ်ဆက်မပြတ် ထုတ်လွှတ်နေကြခြင်း ဖြစ်သည်။
"ဝုန်းးးးး..."
ရုတ်တရက် လူသားနယ်မြေအတွင်းမှ ကြီးမားသော တုန်ခါမှုကြီးတစ်ခု ထွက်ပေါ်လာသည်။ အိပ်ပျော်နေသော သားရဲဧကရာဇ်များ အားလုံးမှာ အိပ်မက်မှ လန့်နိုးလာကြသည်။ သူတို့၏ ကြီးမားလှသော မျက်လုံးကြီးများသည် လူသားနယ်မြေဆီသို့ စိုက်ကြည့်လိုက်ကြပြီး ထိုရုတ်တရက် အပြောင်းအလဲကို အလျင်အမြန် စူးစမ်းလိုက်ကြသည်။
သူတို့ အံ့ဩသွားသည်မှာ လူသားနယ်မြေကို အမြဲတမ်း ပိတ်ဆို့ထားသော မမြင်နိုင်သည့် အကာအကွယ်တံတိုင်းကြီးမှာ ရုတ်တရက် ကွယ်ပျောက်သွားခြင်းပင် ဖြစ်သည်။
" လူသားမျိုးနွယ်တွေ အမြဲ ဂုဏ်ယူနေတဲ့ နတ်ဘုရားလက်နက် အကာအကွယ်က... ပျက်စီးသွားပြီလား .."
တောင်ငယ်တစ်ခုကဲ့သို့ မြင့်မားလှသော ချီလင် သားရဲကြီးတစ်ကောင် ရှေ့သို့ လှမ်းလာသည်။ သူ၏ ခန့်ညားလှသော အသံထဲတွင် အံ့ဩမှုများ ပါဝင်နေပေသည်။ ချီလင်မျိုးနွယ်စုသည် သားရဲမျိုးနွယ်၏ မြင့်မြတ်သော မျိုးနွယ်စုများထဲမှ တစ်ခု ဖြစ်ပြီး ဧကရာဇ်များထဲတွင်ပင် သူ၏ အဆင့်အတန်းမှာ အလွန်မြင့်မားလှသည်။
" အဲဒီလိုဆိုရင်တော့..."
ချီလင်၏ တောက်ပနေသော မျက်လုံးများမှာ အနည်းငယ် လှုပ်ခါသွားပြီးနောက် အမိန့်ပေးလိုက်သည်။
" လူသားမျိုးနွယ်တွေကို ပိတ်ဆို့ထားလိုက်ကြ။ အရင်ဆုံး အောက်ခြေအဆင့် သားရဲစစ်တပ်တွေကို အခြေအနေသွားကြည့်ခိုင်းလိုက်။ ငါကိုယ်တိုင် သားရဲနတ်ဘုရားဆီ သတင်းသွားပို့လိုက်မယ်.. "
ထိုသို့ပြောပြီးနောက် ချီလင်သည် ဟင်းလင်းပြင်အတွင်းသို့ ပျောက်ကွယ်သွားတော့သည်။ မကြာမီမှာပင် ချီလင်သည် ပြန်လည် ပေါ်လာပြီး အမိန့်ကို ချက်ချင်း ထုတ်ပြန်လိုက်တော့သည်။
" သားရဲနတ်ဘုရားရဲ့ အမိန့်အရ လူသားမဟာမိတ်အဖွဲ့ကို ချက်ချင်း တိုက်ခိုက်ကြ .. "
" တစ်ယောက်မှ အရှင်မထားနဲ့... "