ဧကရာဇ်တစ်ပိုင်းအဆင့် ဆင်းသက်လာခြင်း

အင်မော်တယ်ဘုရင် လင်မိုသည် အစ်ကိုကြီးချန်နှင့် ထိပ်တိုက်ရင်ဆိုင်ရန် အမှန်တကယ်ပင် မဝံ့ရဲချေ။ သူ၏ အင်မော်တယ်နိုင်ငံတော်သည် ရှားပါးအဆင့်သို့ ရောက်ရှိနေပြီ ဖြစ်သော်လည်း ကျန်းချန်ကဲ့သို့ စွမ်းဆောင်နိုင်မည်မဟုတ်ကြောင်း ကောင်းစွာသိရှိသည်။ သူ၏လက်ထဲတွင် နဝမအဆင့် အင်မော်တယ်ဓား ရှိနေလျှင်ပင် အင်မော်တယ်ဘုရင် သုံးဦးမှ ငါးဦးခန့်ကိုသာ အနိုင်ယူနိုင်စွမ်းရှိ၏။ အင်မော်တယ်ဘုရင် သုံးဆယ့်ငါးဦးကို သတ်ဖြတ်နိုင်သည် ဆိုသည်မှာ အင်မော်တယ်ဘုရင် တစ်ပါး လုပ်ဆောင်နိုင်သည့်အရာ မဟုတ်သည်မှာ အထင်အရှားပင်။

"နေဦး"

သူသည် နောက်သို့ အနည်းငယ် ဆုတ်လိုက်ပြီး ဒေါသတကြီးဖြင့် ပြောလိုက်သည်။

"အကြီးအကဲကျန်း... ခင်ဗျားက အထက်အင်မော်တယ်လောကကို မတက်လှမ်းချင်တော့ဘူးလား"

အစ်ကိုကြီးချန် ခေတ္တမျှ မှင်သက်သွားပြီးနောက် မေးမြန်းလိုက်သည်။

"မင်းက ဘာကို ဆိုလိုတာလဲ... ငါ အထက်အင်မော်တယ်လောကကို တက်လှမ်းဖို့ မင်းရဲ့ခွင့်ပြုချက်လိုလို့လား"

အင်မော်တယ်ဘုရင် လင်မိုသည် ရင်ဘတ်ကို မတ်လိုက်ပြီး ဂုဏ်ယူဝံ့ကြွားစွာဖြင့်

"ငါတို့ရဲ့ ဝူကျိဂူဗိမာန်က အထက်အင်မော်တယ်လောကမှာ ဘယ်လို အဆင့်အတန်းမျိုး ရှိတယ်ဆိုတာ မင်းသိသင့်တယ်"

ဟုဆိုသည်။

သူသည် ကောင်းကင်ယံသို့ ဦးညွှတ်လိုက်ပြီး သူ၏ မျက်နှာထားမှာလည်း အလွန်ပင် လေးနက်ကြည်ညိုဖွယ် ဖြစ်သွားသည်။

"အတိတ်နဲ့ ပစ္စုပ္ပန်ကို တုန်လှုပ်စေနိုင်တဲ့ အထွတ်အထိပ် အင်မော်တယ်ဧကရာဇ် သုံးပါးက ငါတို့ဂိုဏ်းကို အုပ်ချုပ်နေတာပဲ"

"အဲဒီတော့ ဘာဖြစ်လဲ"

အစ်ကိုကြီးချန်ကတော့ ဤစကားကို လုံးဝနားမလည်နိုင်။

"ငါ အခု မင်းကို သတ်တော့မယ်... အဲဒီလူတွေက မင်းကိုကယ်ဖို့ ဆင်းလာနိုင်လို့လား"

"သူတို့က ဆင်းလာလို့ မရပါဘူး..."

"ဒါဆိုရင် မင်းက ဘာလို့ အဓိပ္ပာယ်မရှိတာတွေ ပြောနေတာလဲ"

ဒါက တကယ်ကို ရယ်စရာကောင်းလှသည်။ ဤအဘိုးကြီးသည် သူ၏နောက်ခံအင်အားကို ထုတ်ပြရုံဖြင့် တစ်ဖက်လူက ကြောက်ရွံ့တုန်လှုပ်သွားမည်ဟု အမှန်တကယ်ပင် ထင်မှတ်နေပုံရ၏။ သူသည် အိပ်မက်ယောင်နေခြင်းသာ။

ကျန်းချန်က အမှန်တကယ်ပင် တိုက်ခိုက်တော့မည်ကို မြင်သောအခါ အင်မော်တယ်ဘုရင် လင်မိုမှာ ထိတ်လန့်သွားပြီး အလျင်အမြန်ပင် နောက်ထပ်ဆုတ်လိုက်သည်။

"မင်းက တကယ်ကိုရဲတင်းလွန်းတာပဲ... အထက်အင်မော်တယ်လောကကို ရောက်တဲ့အခါ အစဖျောက်ချေမှုန်းခံရမှာကို မကြောက်ဘူးလား"

"အဲဒါက အနာဂတ်ကိစ္စပဲ... အခုနဲ့ ဘာမှမဆိုင်ဘူး"

"ကောင်းပြီ... အရမ်းကောင်းတယ်"

"ဒါက မင်းကိုယ်တိုင် ငါ့ကို အတင်းအကျပ် လုပ်ခိုင်းတာပဲ"

အင်မော်တယ်ဘုရင် လင်မိုသည် ဒေါသကြောင့် မျက်နှာတစ်ခုလုံး ဖြူလျော်သွားသည်။ သူသည် ရုတ်တရက် လက်ကိုဆန့်ထုတ်လိုက်ပြီး အမွှေးတိုင်တစ်တိုင်ကို ထုတ်ယူလိုက်၏။ ထိုအမွှေးတိုင်မှာ အပြာနုရောင်ရှိပြီး လက်ညှိုးတစ်ချောင်းစာခန့်သာရှည်သော်လည်း ဤလောကနှင့် မသက်ဆိုင်သော နက်နဲသိမ်မွေ့သည့် အငွေ့အသက်များကို ထုတ်လွှင့်နေသည်။ သူ၏နောက်ကွယ်မှ ဖေးရှန်ဂိုဏ်း၏ အကြီးအကဲများမှာ ထိုအမွှေးတိုင်ကိုမြင်သောအခါ မျက်နှာပျက်သွားကြပြီး ထိတ်လန့်တကြား အော်ဟစ်လိုက်ကြ၏။

"နတ်ဘုရားဖိတ်ခေါ် အမွှေးတိုင်ပဲ"

"ဘိုးဘေးကြီး... သူ့ကို အဲဒီအမွှေးတိုင်ထွန်းခွင့် မပေးပါနဲ့"

"ဒီအမွှေးတိုင်က အထက်အင်မော်တယ်လောကနဲ့ ဆက်သွယ်နိုင်ပါတယ်"

နတ်ဘုရားဖိတ်ခေါ် အမွှေးတိုင်သည် ထိပ်တန်းအဆင့်မှော်ရတနာဖြစ်ပြီး တစ်ကြိမ်သာအသုံးပြုနိုင်သောအရာဖြစ်သော်လည်း ၎င်းကိုဖန်တီးရန် အလွန်ခက်ခဲလှသည်။ ဤအမွှေးတိုင်တွင် အသုံးပြုချက်တစ်ခုတည်းသာရှိ၏၊ ၎င်းမှာ အထက်အင်မော်တယ်လောကမှ စစ်ကူများကိုဖိတ်ခေါ်ရန်ပင်။ နတ်ဘုရားဖိတ်ခေါ် အမွှေးတိုင်သည် အင်မော်တယ်လောက နှစ်ခုကြားတွင် ကျဉ်းမြောင်းသော လမ်းကြောင်းတစ်ခုကို ခဏတာမျှ အတင်းအကျပ်ဖွင့်လှစ်ပေးမည်ဖြစ်ပြီး အမွှေးတိုင်ရှိရာနေရာသည် အထက်လောကမှ ဆင်းသက်လာသူများ နားခိုမည့်နေရာဖြစ်လာပြီး တစ်ကြိမ်အသုံးပြုပြီးနောက် ၎င်းသည် အလိုအလျောက်ပျက်စီးသွားမည်။

အင်မော်တယ်ဘုရင် လင်မိုသည် မူလက ဝူကျိဂူဗိမာန်၏ အရှိန်အဝါဖြင့် အစ်ကိုကြီးချန်ကို ဖိအားပေးရန် ရည်ရွယ်ခဲ့သော်လည်း အစ်ကိုကြီးချန်က ဂရုမစိုက်ခဲ့ပေ။ ထို့ကြောင့် ယခုအခါတွင် သူသည် သူ၏ နောက်ဆုံးလက်နက်ကို မတတ်သာဘဲ အသုံးပြုလိုက်ရတော့သည်။ နတ်ဘုရားဖိတ်ခေါ် အမွှေးတိုင်မှာ အလွန်တန်ဖိုးကြီးလှပြီး အဌမအဆင့် အင်မော်တယ်လက်နက်တစ်ခုကို ပြုလုပ်ရသည်ထက်ပင်ခက်ခဲ၏။ ၎င်းတို့ကဲ့သို့ ထိပ်တန်းမူလအင်မော်တယ်ဂိုဏ်းများတွင်သာ ရှိနိုင်သောအရာဖြစ်သည်။ ဤအမွှေးတိုင်ရှိနေသဖြင့် သူသည် အောင်မြင်မှုအပေါ် အကြွင်းမဲ့ ယုံကြည်ချက်ရှိသည်။

ကျန်းချန်သည် အလယ်အင်မော်တယ်လောကတွင် တားဆီး၍မရနိုင်သောသူ ဖြစ်နိုင်သော်လည်း အထက်အင်မော်တယ်လောကမှာ ထိုသို့မဟုတ်ပါ၊ ထိုနေရာမှာ အင်မော်တယ်ဧကရာဇ်များ ကြီးစိုးရာလောကဖြစ်သည်။ အင်မော်တယ်ဘုရင်များကို သတ်နိုင်ရုံမျှဖြင့် အင်မော်တယ်ဧကရာဇ် တစ်ပါး၏ နည်းလမ်းများကို ခုခံနိုင်မည်ဟု မဆိုလိုနိုင်ပေ။

တစ်ဖက်တွင်မူ အင်မော်တယ်ဘုရင် ဝူလော့နှင့် အခြားသူများမှာ အလွန်ဝမ်းသာသွားကြသည်။ ဤအမွှေးတိုင်ကို မြင်လိုက်ရသဖြင့် ၎င်းတို့ အသက်ဘေးမှ လွတ်မြောက်ပြီဖြစ်ကြောင်း သိလိုက်ကြ၏။ တစ်ချိန်တည်းမှာပင် ရှောင်ကွန်း၊ ကျိယွန်းနှင့် အခြားသူများ၏ မျက်နှာထားများမှာလည်း အနည်းငယ်ပြောင်းလဲသွားသည်။

"အခုက အထက်လောက တက်လှမ်းချိန်ရဲ့ နောက်ဆုံးဆယ်နှစ်အတွင်းကို ရောက်နေပြီပဲ။ နိယာမတွေအရ အင်မော်တယ်ဧကရာဇ်တွေက ဒီအချိန်မှာ လုံးဝဆင်းသက်လာလို့မရဘူး"

အင်မော်တယ်ဘုရင် ဝူကျွယ်သည် တဖြည်းဖြည်း တည်ငြိမ်သွားပြီးနောက်

"ဒါကြောင့် နတ်ဘုရားဖိတ်ခေါ် အမွှေးတိုင် ရှိနေရင်တောင် သူတို့က အင်မော်တယ်ဧကရာဇ် တစ်ပါးကို ဖိတ်ခေါ်နိုင်မှာမဟုတ်ဘူး"

၎င်းတို့သည် ဂိုဏ်းချုပ်ကျန်း၏ စွမ်းဆောင်ရည်အပေါ်တွင် ယုံကြည်ချက်ရှိနေဆဲ။ အင်မော်တယ်ဧကရာဇ် အဆင့်အောက်တွင် မည်သူ့ကိုမဆို သူက အလွယ်တကူ ကိုင်တွယ်နိုင်လိမ့်မည် မဟုတ်ပါလား။

သို့သော် တစ်ဖက်မှ အင်မော်တယ်ဘုရင် လင်မိုကတော့ တည်ငြိမ်နေဆဲဖြစ်ပြီး ယုံကြည်ချက်အပြည့် ရှိနေပုံရပါသည်။ သူသည် နတ်ဘုရားဖိတ်ခေါ် အမွှေးတိုင်ကို ထွန်းညှိလိုက်ရာ ပြာလွင်သော မီးခိုးတန်းတစ်ခု ထွက်ပေါ်လာပြီး ချက်ချင်းပင် ပျောက်ကွယ်သွားသည်။ လုပ်ငန်းစဉ်တစ်ခုလုံးမှာ အလွန်မြန်ဆန်၏။ မျက်စိတစ်မှိတ်အတွင်းမှာပင် သူ့လက်ထဲမှ အမွှေးတိုင်မှာ ကွယ်ပျောက်သွားလေပြီ။

အစ်ကိုကြီးချန်က မည်သို့မျှ တုံ့ပြန်ခြင်းမရှိသည်ကို မြင်သောအခါ သူသည် ခေါင်းကိုမော့၍ ရယ်မောလိုက်တော့သည်။

"ဟားဟားဟား"

"မင်းသာ စောစောက ငါ့ကိုတားခဲ့ရင်တော့ မျှော်လင့်ချက်နည်းနည်း ရှိနိုင်သေးတယ်... အခုတော့ နောက်ကျသွားပြီ"

သူ၏ ယုံကြည်မှုများကြောင့် အစ်ကိုကြီးချန်မှာ ဇဝေဇဝါဖြစ်သွားရသည်။

"အင်မော်တယ်ဧကရာဇ်ကို ဖိတ်ခေါ်လို့မရဘူးလို့ သူတို့က ပြောနေကြတယ် မဟုတ်လား"

"ဒါမှမဟုတ် အထက်အင်မော်တယ်လောကက အင်မော်တယ်ဘုရင်တွေက ပိုပြီးအစွမ်းထက်နေလို့လား"

"ဒါကြောင့် မင်းက ဘာမှနားမလည်ဘူးလို့ ပြောတာပေါ့..."

အင်မော်တယ်ဘုရင် လင်မို၏ အိုမင်းသော မျက်လုံးများထဲတွင် သနားစရာ ကောင်းသည်ဟု ထင်မြင်သည့် အငွေ့အသက်များ ထွက်ပေါ်လာပါသည်။

"ဒီနောက်ဆုံး ဆယ်နှစ်အတွင်းမှာ အင်မော်တယ်ဧကရာဇ် တစ်ပါးကို ဖိတ်ခေါ်လို့မရတာ မှန်ပေမဲ့ ဧကရာဇ်တစ်ပိုင်းအဆင့်ကိုတော့ ခေါ်ယူလို့ရတယ်"

"ငါတို့က အင်မော်တယ်ဧကရာဇ်ရဲ့ စစ်မှန်တဲ့ခန္ဓာကိုယ်ကို ဖိတ်ခေါ်လို့မရပေမဲ့ အင်မော်တယ်ဧကရာဇ်ရဲ့ နိယာမဥပဒေသတွေကိုတော့ ခေါ်ယူနိုင်တယ်"

ဤစကားကို ကြားလိုက်ရသောအခါ အဆင်ပြေမည်ဟု ထင်မှတ်ထားကြသည့် ရှောင်ကွန်း၊ ဝူကျွယ်နှင့် အခြားသူများမှာ ထပ်မံ၍ စိုးရိမ်ပူပန်သွားကြပြန်သည်။ ဧကရာဇ်တစ်ပိုင်းအဆင့် ဆိုသည်မှာ အမှန်စင်စစ် အင်မော်တယ်ဧကရာဇ်တစ်ပါး၏ အားနည်းသောပုံစံသာဖြစ်၏။ ဧကရာဇ်တစ်ပိုင်းအဆင့်သည် စည်းမျဉ်းများနှင့်ပေါင်းစပ်ခြင်းမရှိသေးဘဲ ထိုစည်းမျဉ်း၏ ကိုယ်ပွားတစ်ခု ဖြစ်မလာသေးသဖြင့် စစ်မှန်သော အင်မော်တယ်ဧကရာဇ်နှင့် အနည်းငယ် ကွာဟချက်ရှိနေခြင်းသာ။ သို့သော် ထိုကွာဟချက်မှာ အင်မော်တယ်ဧကရာဇ်နှင့် နှိုင်းယှဉ်လျှင်သာ ဖြစ်ပါသည်။ အင်မော်တယ်ဘုရင် တစ်ပါးနှင့် ရင်ဆိုင်ရသောအခါတွင်မူ ၎င်းတို့၏ အရှိန်အဝါမှာ စစ်မှန်သော အင်မော်တယ်ဧကရာဇ်နှင့် သိပ်ပြီးမကွာလှချေ။

နိယာမဥပဒေသများမှာမူ ပို၍ပင်ထူးခြားသည်။ စည်းမျဉ်းများနှင့်ပေါင်းစပ်ပြီးနောက် အင်မော်တယ်ဧကရာဇ်တစ်ပါးသည် ၎င်းတို့၏ ကိုယ်ပိုင်နိယာမဥပဒေသများကို ဖန်တီးနိုင်စွမ်းရှိသည်။ ထိုနိယာမဥပဒေသများကို ထုတ်ဖော်လိုက်သည်နှင့် အင်မော်တယ်ဘုရင်အဆင့်တွင် မည်သို့မျှမခုခံနိုင်တော့ဘဲ စည်းမျဉ်းများဖြင့် နှိပ်ကွပ်ခံရခြင်းနှင့် မခြားတော့ချေ။ ၎င်းမှာ အနှစ်သာရအားဖြင့် အဆင့်အတန်းမြင့်မားလွန်းသော တိုက်ခိုက်မှုမျိုးဖြစ်သည်။

အစ်ကိုကြီးချန်သည် ပြီးခဲ့သည့်အကြိမ်က အင်မော်တယ်ဧကရာဇ် ကျိုယန်ကို ၎င်းတို့ရှေ့တွင် သတ်ဖြတ်ခဲ့ဖူးသော်လည်း ယခုတစ်ကြိမ်တွင် အခြားသော အင်မော်တယ်ဧကရာဇ်တစ်ပါးနှင့် ကြုံတွေ့ရသောအခါ သူသည် အံ့ဖွယ်စွမ်းဆောင်ရည်များကို ဆက်လက်ပြသနိုင်ပါဦးမည်လားဆိုသည်မှာ မည်သူမျှမသေချာကြချေ။ ၎င်းတို့မှာ သူ၏ မြင့်မြတ်သော တန်ခိုးအာဏာကို နောက်တစ်ကြိမ် ထပ်မံမြင်တွေ့ရပါစေကြောင်းသာ တိတ်တဆိတ် ဆုတောင်းနေကြတော့သည်။

နတ်ဘုရားဖိတ်ခေါ် အမွှေးတိုင်၏ အကျိုးသက်ရောက်မှုမှာ အလွန်လျင်မြန်လှ၏။ စကားပြောပြီးသည်နှင့် ကောင်းကင်ယံမှ ရွှေရောင်အလင်းတန်းသုံးခု ရုတ်တရက်ဆင်းသက်လာသည်။ ထိုအလင်းတန်းများသည် အင်မော်တယ်ဘုရင် လင်မိုနှင့် အခြားသော ဝူကျိဂူဗိမာန်မှ အကြီးအကဲနှစ်ဦးတို့၏ ခန္ဓာကိုယ်အတွင်းသို့ မျက်စိတစ်မှိတ်အတွင်း တိုးဝင်ပျောက်ကွယ်သွား၏။ ၎င်းတို့သုံးဦးလုံးမှာ ရုတ်တရက်တုန်ခါသွားပြီးနောက် ၎င်းတို့၏အရှိန်အဝါများမှာလည်း အရှိန်အဟုန်ဖြင့် မြင့်တက်လာတော့သည်။ ၎င်းတို့ မျက်လုံးများကို ပြန်ဖွင့်ကြည့်လိုက်သောအခါ ထိုနေရာရှိ အင်မော်တယ်ဘုရင်အားလုံးမှာ တညီတညွတ်တည်း ကြောက်ရွံ့မှုကို ခံစားလိုက်ရ၏။ ၎င်းတို့သည် အဆင့်အတန်းမတူတော့သကဲ့သို့ ခံစားကြရသည်။

"အဲဒါတွေက နိယာမဥပဒေသတွေပဲ"

"အထက်အင်မော်တယ်လောကက ဟင်းလင်းပြင်ကိုဖြတ်ပြီး နိယာမဥပဒေသသုံးခုကို ပေးပို့လိုက်တာပဲ"

"သူတို့က နိယာမဥပဒေသတွေရဲ့ ကောင်းချီးကို ရရှိသွားကြပြီ"

မိစ္ဆာဘုရင် ရှားလီနှင့် ဟွာယင် အင်မော်တယ်ဘုရင်တို့မှာ ထိတ်လန့်သွားကြသလို မနာလိုမိကြသည်။ နိယာမဥပဒေသများ၏ကောင်းချီးကို ရရှိခြင်းမှာ ထာဝရမဟုတ်ဘဲ အချိန်တိုအတွင်းသာဖြစ်သော်လည်း ဤအချိန်တိုအတွင်းတွင် ထိုပြိုင်ဘက်သုံးဦးမှာ အင်မော်တယ်ဧကရာဇ်အဆင့်၏ စွမ်းအားအစိတ်အပိုင်းအချို့ကို အသုံးပြုနိုင်စွမ်းရှိသွားပြီဖြစ်ရာ အင်မော်တယ်ဘုရင် အားလုံးထက် သာလွန်သွားသည်။

မူလက ၎င်းတို့သည် အင်မော်တယ်ဘုရင် လင်မိုနှင့် ရင်ဆိုင်ရလျှင် မည်သည့်ဖိအားမှ ခံစားရခြင်းမရှိသော်လည်း ယခုအခါတွင်မူ ၎င်းတို့၏ နှလုံးသားထဲတွင် သေစေနိုင်သော အန္တရာယ်အငွေ့အသက်များ ဖြစ်ပေါ်နေ၏။ တစ်ဖက်လူက လက်ကလေးတစ်ချက်ဝှေ့ယမ်းရုံမျှဖြင့် ၎င်းတို့ကို ချေမှုန်းပစ်နိုင်တော့မည်ကဲ့သို့ပင်။ မူလအင်မော်တယ်ဂိုဏ်းကြီးများ၏ ကြောက်မက်ဖွယ်ကောင်းသော အခြေခံအုတ်မြစ်များကို ယခုအခါ သိသာထင်ရှားစွာ မြင်တွေ့နေရလေပြီ။

"ဟားဟား... မင်းမှာ ဘာပြောစရာ ကျန်သေးလဲ"

"အလယ်အင်မော်တယ်လောကရဲ့ စည်းမျဉ်းတွေကိုချိုးဖောက်ခဲ့တဲ့ မင်းကို ကောင်းကင်နဲ့ မြေကြီးကတောင် ခွင့်မလွှတ်နိုင်ဘူး"

"နိယာမဥပဒေသတွေရဲ့ ရှေ့မှာတော့ သက်ရှိအားလုံးက ပုရွက်ဆိတ်တွေလိုပဲ"

ဝူကျိဂူဗိမာန်မှ အင်မော်တယ်ဘုရင် သုံးပါးမှာ လူအုပ်ထဲမှထွက်လာကြပြီး အစ်ကိုကြီးချန်ကို တြိဂံပုံစံဝိုင်းရံလိုက်ကြသည်။ ဤလူသည် အင်မော်တယ်ဘုရင် သုံးဆယ့်ငါးဦးကို သတ်ဖြတ်နိုင်စွမ်းရှိသဖြင့် ၎င်းတို့မှာ အလွန်အကျွံ မောက်မာခြင်းမရှိကြ။

နတ်ဘုရားဖိတ်ခေါ် အမွှေးတိုင်၏ အကျိုးသက်ရောက်မှုမှာ ကုန်ဆုံးသွားခြင်းမရှိသေးချေ။ ကောင်းကင်ယံတွင် ရှေးဟောင်းဓားတစ်စင်း ဆင်းသက်လာပြီး ဟင်းလင်းပြင်တွင် ကြီးမားသော အက်ကြောင်းကြီးတစ်ခု ဖြစ်ပေါ်လာစေသည်။

"ဧကရာဇ်တစ်ပိုင်းအဆင့်လား"

ဝူကျိဂူဗိမာန်မှ အင်မော်တယ်ဘုရင်များသာမက အင်မော်တယ်ဘုရင် ဝူလော့နှင့် အခြားသူများမှာလည်း ထပ်မံ၍ ဝမ်းသာအားရ ဖြစ်သွားကြပြန်ပါသည်။

"ဧကရာဇ်တစ်ပိုင်းအဆင့် ဆင်းသက်လာပြီ"

"အထက်လောကက ဒီလူကို တကယ်ပဲ အလေးအနက်ထားပုံရတယ်... နိယာမဥပဒေသတွေကို ပို့ပေးရုံတင်မကဘဲ ဧကရာဇ်တစ်ပိုင်းအဆင့်ကိုယ်တိုင်တောင် ဆင်းသက်လာစေတယ်"

"ဟားဟား... ဒီတစ်ကြိမ်မှာတော့ အားလုံးပြီးဆုံးသွားပါပြီ"

ပျံ့လွင့်နေသော အင်မော်တယ်ဂီတသံများနှင့် တောက်ပသော အရောင်အသွေးများကြားတွင် စည်းမျဉ်းများဖြင့် ဖွဲ့စည်းထားသော မြစ်ရှည်ကြီးတစ်ခု၏အထက်၌ လူတစ်ဦးသည် လှိုင်းများကိုစီးနင်းလျှက် ရောက်ရှိလာပါသည်။ ထိုဝတ်စုံဖြူမှာ ဤလောကနှင့် လုံးဝ လိုက်ဖက်မှုမရှိသကဲ့သို့ပင်။ လူတိုင်းသည် ထိုရှေးဟောင်းဆန်ပြီး ရိုးရှင်းသောမျက်နှာကို ရှင်းလင်းစွာ မြင်တွေ့နေရသော်လည်း ၎င်းမှာ စစ်မှန်သော လူသားတစ်ဦး မဟုတ်သကဲ့သို့ ထူးဆန်းသော ခံစားမှုကို ရရှိနေကြ၏။ သူသည် ကျန်းချန်၏ရှေ့တွင် တည်ငြိမ်သောမျက်နှာထားဖြင့်ရပ်နေပြီး မည်သည့်တန်ခိုးအရှိန်အဝါကိုမျှ ထုတ်ဖော်ခြင်းမရှိ။ သို့သော် သူ၏တည်ရှိမှုကပင် ထိုနေရာရှိ လူအားလုံး၏ အင်မော်တယ်ဝိညာဉ်များကို မတည်မငြိမ်ဖြစ်သွားစေပြီး ပတ်ဝန်းကျင်ရှိ စည်းမျဉ်းများကိုပင် ဆက်သွယ်၍မရနိုင်တော့အောင် ဖြစ်သွားစေသည်။ နိယာမဥပဒေသများ၏ ကောင်းချီးကိုရရှိထားသော အင်မော်တယ်ဘုရင်သုံးပါးပင် ရှေးဦးကမ္ဘာဦးမှ ကြောက်မက်ဖွယ် သားရဲကြီးတစ်ကောင်နှင့် ရင်ဆိုင်နေရသကဲ့သို့ ဦးရေပြားများပင် ကျိန်းစပ်လာရတော့သည်။