အခန်း (၅၁၁-၅၁၂)
Vol. 37 Ch. 511-512
အခန်း ( ၅၁၁ ) - သေချာပေါက် သေဆုံးရမည့် လမ်း၊ ကွေ့ရွှီးနယ်မြေ ပွင့်လာခြင်းနှင့် ဧကရာဇ်များ အားလုံး ဝင်ရောက်ခြင်း
နှစ်များတစ်လျှောက် ကွေ့ရွှီးနယ်မြေ၏ တည်နေရာ အတိအကျကို စုံစမ်းရန် ကြိုးစားခဲ့သော နတ်ဆိုးဧကရာဇ်အဆင့် တည်ရှိမှုများ ရှိခဲ့သော်လည်း သူတို့၏စုံစမ်းမှုအားလုံးမှာ အချည်းနှီးသာ ဖြစ်ခဲ့သည်။
ရှာနာနတ်ဆိုးဧကရာဇ်မှ ခေါင်းခါကာ ပြောဆိုလိုက်၏။
" ကွေ့ရွှီးနယ်မြေကို ဘယ်နေရာမှာမှ ရှာမတွေ့နိုင်ပါဘူး... နတ်ဆိုးနယ်မြေရဲ့ အနက်ရှိုင်းဆုံးနေရာမှာ ဝင်ပေါက်တစ်ခုပဲ ရှိပါတယ် "
" အတိတ်တုန်းက... ရှေးဟောင်း နတ်ဆိုးဧကရာဇ်တစ်ပါးက ဒီကွေ့ရွှီးနယ်မြေရဲ့ ဝင်ပေါက်ကနေတစ်ဆင့် သူ့ရဲ့ တည်နေရာ အတိအကျကို စုံစမ်းဖို့ ကြိုးစားခဲ့ဖူးတယ်... ဒါပေမယ့် အဲ့ဒီ နတ်ဆိုးဧကရာဇ်က သဲလွန်စတွေကို နောက်ယောင်ခံလိုက်ခဲ့ပေမဲ့ နောက်ဆုံးမှာ ဘာမှ မတွေ့ခဲ့ရဘူး... အဲ့ဒီနောက်ပိုင်းမှာ ဒီကိစ္စကို စွန့်လွှတ်လိုက်ကြပြီး တခြား ဘယ်နတ်ဆိုးဧကရာဇ်ကမှ ကွေ့ရွှီးနယ်မြေရဲ့ တည်နေရာ အတိအကျကို စုံစမ်းဖို့ မကြိုးစားကြတော့ပါဘူး "
လျှို့ဝှက်ဆန်းကြယ်လှသော ကွေ့ရွှီးနယ်မြေ၊ ၎င်း၏တည်နေရာကို မသိရသလို ၎င်း၏ မူလဇာစ်မြစ်မှာလည်း လျှို့ဝှက်ချက်တစ်ခု ဖြစ်နေဆဲပင်။
နတ်ဆိုးချီများဖြင့် ဖုံးလွှမ်းနေသော ဟွမ်သွမ့်ဂူပေါက်သည် အဆုံးအစမဲ့သော ကပ်ကမ္ဘာများကတည်းက နတ်ဆိုးနယ်မြေ၏ အနက်ရှိုင်းဆုံးနေရာတွင် တည်ရှိနေခဲ့ကြောင်းကိုသာ ရှာနာနတ်ဆိုးဧကရာဇ် သိထားလေသည်။
" ကွေ့ရွှီးနယ်မြေ ပွင့်ဖို့ ဘယ်လောက်လိုသေးလဲ "
အဆုံးမဲ့ နတ်ဆိုးချီများဖြင့် ဖုံးလွှမ်းနေဆဲဖြစ်သော ဟွမ်သွမ့်ဂူပေါက်ကို ကြည့်ကာ ကုချန်မှ မေးမြန်းလိုက်၏။
" ဘယ်သူမှ ပွင့်မယ့်အချိန် အတိအကျကို မပြောနိုင်ပါဘူး "
ရှာနာနတ်ဆိုးဧကရာဇ်မှ ခေါင်းခါလျက် ပြောဆိုလေသည်။
" ကျွန်မတို့က အချိန်ကာလ အကြမ်းဖျင်းကိုပဲ ခံစားသိရှိနိုင်တာပါ... ကွေ့ရွှီးနယ်မြေက လာမယ့် ဆယ်စုနှစ် အနည်းငယ်အတွင်း ပွင့်လာမယ်လို့ ခန့်မှန်းရပေမယ့် ဘယ်အချိန် အတိအကျ ပွင့်မယ်ဆိုတာတော့ ဘယ်သူမှ မပြောနိုင်ပါဘူး "
" ဒါကြောင့် လောလောဆယ် ကျွန်မတို့ လုပ်နိုင်တာက စောင့်ဖို့ပါပဲ "
စောင့်ရုံပဲ ရှိတာပေါ့။
ရှာနာနတ်ဆိုးဧကရာဇ်၏ စကားများကို နားထောင်လျက် ကုချန်သည် ဖြည်းညင်းစွာ ခေါင်းညိတ်လိုက်၏။
မည်သို့ပင်ဆိုစေကာမူ ဆယ်စုနှစ် အနည်းငယ်မျှသာ ဖြစ်ရာ အဆုံးအစမဲ့နီးပါး သက်တမ်းကို ပိုင်ဆိုင်ထားပြီးဖြစ်သော ကုချန်အတွက် ၎င်းမှာ တစ်ရေးအိပ်ရုံမျှသာ ကြာမြင့်မည့် အချိန်တစ်ခုပင် ဖြစ်သည်။
စောင့်ဆိုင်းခြင်းက အဆင်ပြေပါသည်။ ဤအချိန်ကို အသုံးပြု၍ မည်သည့် နတ်ဆိုးဧကရာဇ်များ ရောက်ရှိလာမည်ကို သူ ကြည့်ရှုနိုင်သလို ကွေ့ရွှီးနယ်မြေအတွင်း ဝင်ရောက်ပြီးနောက် နတ်ဆိုးဧကရာဇ်တစ်ပါးကို သိမ်းသွင်းရန် အကောင်းဆုံး ပစ်မှတ်ကိုလည်း ဆုံးဖြတ်နိုင်ပေသည်။
သို့သော် ကွေ့ရွှီးနယ်မြေသည် နှစ်ထောင်ပေါင်းများစွာကြာမှ တစ်ကြိမ်ပွင့်တတ်ပြီး ပိတ်မည့်အချိန်ကိုလည်း တစ်ခါမျှ အသေအချာ မသိရကြောင်း ရှာနာနတ်ဆိုးဧကရာဇ်ထံမှ ကုချန် သိရှိခဲ့ရ၏။
သို့သော် ကွေ့ရွှီးနယ်မြေအတွင်းရှိ သက်ရှိများသည် ကြိုတင်အသိပေးချက်တစ်ခုကို ဝေဝေဝါးဝါး ခံစားရလေ့ရှိကြသည်။
ထို့ကြောင့် အကောင်းဆုံး ရွေးချယ်မှုမှာ ကွေ့ရွှီးနယ်မြေ ပိတ်တော့မည်ကို ခံစားမိသည်နှင့် တပြိုင်နက် အတွင်းရှိ ကံကြမ္မာအကျိုးပေးများကို တပ်မက်ခြင်းမရှိဘဲ အမြန်ဆုံး ထွက်ခွာရန်ပင် ဖြစ်သည်။
သမိုင်းတစ်လျှောက်၌လည်း ကွေ့ရွှီးနယ်မြေ ပိတ်တော့မည့်အချိန်တွင် နတ်ဆိုးဧကရာဇ်တစ်ပါးသည် မရရှိသေးသော ကံကြမ္မာအကျိုးပေးများကို လောဘတက်ကာ အချိန်မီ ထွက်ခွာခြင်းမပြုခဲ့သောကြောင့် ကွေ့ရွှီးနယ်မြေအတွင်း ပိတ်မိသွားသည့် အဖြစ်အပျက်များ အကြိမ်များစွာ ရှိခဲ့ဖူး၏။ သို့သော် ကွေ့ရွှီးနယ်မြေ နောက်တစ်ကြိမ် ပြန်ပွင့်လာသောအခါ ထိုနတ်ဆိုးဧကရာဇ်၏ အရိပ်အယောင်ကိုပင် မတွေ့ရတော့ချေ။
ကွေ့ရွှီးနယ်မြေထဲတွင် ပိတ်မိ၍ အချိန်မီ မထွက်ခွာနိုင်ခြင်းသည် သေချာပေါက် သေဆုံးရမည့် လမ်းပင်တည်း။
ဤသည်မှာ နတ်ဆိုးဧကရာဇ်များ အားလုံး တိတ်တဆိတ် လက်ခံထားသော အချက်တစ်ချက် ဖြစ်သည်။
ထို့ကြောင့် ကွေ့ရွှီးနယ်မြေထဲတွင် မည်သို့သော ကံကြမ္မာအကျိုးပေးနှင့် ကြုံတွေ့ရပါစေ ကွေ့ရွှီးနယ်မြေ ပိတ်တော့မည်ကို ခံစားသိရှိရသည်နှင့် တပြိုင်နက် အရာအားလုံးကို စွန့်လွှတ်ပြီး ချက်ချင်း ထွက်ပြေးရမည်ပင်။
သို့မဟုတ်ပါက ကွေ့ရွှီးနယ်မြေထဲတွင် ထာဝရ ပိတ်မိနေပြီး လမ်းပျောက်ကာ ကျဆုံးသွားရပေလိမ့်မည်။
ထို့အပြင် ကွေ့ရွှီးနယ်မြေသည် အဆုံးအစမဲ့ ထူးဆန်းအံ့သြဖွယ် ကောင်းလှသည်။ လူတိုင်းက ဟွမ်သွမ့်ဂူပေါက်မှတစ်ဆင့် ဝင်ရောက်ကြသော်လည်း ၎င်း၏ ကြီးမားကျယ်ပြောမှုကြောင့် နတ်ဆိုးဧကရာဇ်အဆင့် တည်ရှိမှုများပင်လျှင် အတွင်း၌ အချင်းချင်း တွေ့ဆုံရန် အလွန်တရာ ခက်ခဲလှသည်။
ကုချန်နှင့် ရှာနာနတ်ဆိုးဧကရာဇ်တို့သာလျှင် သခင်နှင့် အစေခံ ဆက်ဆံရေး ရှိနေသောကြောင့် ဝိညာဉ်အာရုံခံစားမှုမှတစ်ဆင့် အချင်းချင်း ဆက်သွယ်နိုင်ကောင်း ဆက်သွယ်နိုင်ပေလိမ့်မည်။
သို့သော် သူတို့မှ အခြား နတ်ဆိုးဧကရာဇ်များ၏ သဲလွန်စများကို ရှာဖွေလိုပါက ဖြစ်နိုင်ခြေ အလွန်တရာ နည်းပါးပေလိမ့်မည်။
ထို့ကြောင့် ဤအချက်က ကုချန်အား အတွေးတစ်ခု ဝင်သွားစေခဲ့၏။
ဤအခွင့်အရေးကို အသုံးချ၍ ကွေ့ရွှီးနယ်မြေထဲသို့ ဝင်ရောက်ကာ အခြား နတ်ဆိုးဧကရာဇ်တစ်ပါးကို အစေခံအဖြစ် သိမ်းသွင်းရန် ကြိုးစားလိုသော်လည်း ၎င်းမှာ သူ၏ ကံကြမ္မာအပေါ်တွင်သာ မူတည်နေလိမ့်မည်။
အကယ်၍ သူသည် တိုက်တိုက်ဆိုင်ဆိုင် နတ်ဆိုးဧကရာဇ်တစ်ပါးနှင့် ဆုံတွေ့ရ၍ ထိုနတ်ဆိုးဧကရာဇ်သည်လည်း ယောင်ဧကရာဇ်ကဲ့သို့ ရှေးဟောင်း နတ်ဆိုးဧကရာဇ် ဖြစ်နေပါက သိမ်းသွင်းအောင်မြင်ရန် ခက်ခဲလှရာ သူကိုယ်တိုင် ထောင်ချောက်ထဲ ကျသွားခြင်းမျိုး ဖြစ်နိုင်၏။ ထိုသို့စေရန် ထိုအကြံကို စောစောစီးစီး စွန့်လွှတ်လိုက်သင့်၏။
ထို့ကြောင့် ယခုကွေ့ရွှီးနယ်မြေ ခရီးစဉ်သည် ကံကြမ္မာအကျိုးပေးများကို ရှာဖွေရန်သာ အဓိကဖြစ်လိမ့်မည်။ အဆုံးမဲ့ဓားကို နတ်ဆိုးဧကရာဇ် နတ်ဘုရားလက်နက်အဖြစ် အဆင့်တက်လှမ်းနိုင်ရန် ကူညီပေးနိုင်မည့် နတ်ဆိုးဧကရာဇ်အဆင့် နတ်ဘုရားသတ္တုတစ်ခုကို ရှာတွေ့နိုင်ပါက အကောင်းဆုံး ဖြစ်ပေမည်။
နတ်ဆိုးဧကရာဇ်တစ်ပါးကို သိမ်းသွင်းရန် ကိစ္စကတော့ ကံတရားအပေါ်မှာသာ မူတည်ပေတော့မည်။
အချိန် မည်မျှ ကြာမြင့်စွာ စောင့်ဆိုင်းခဲ့ရမှန်း မသိရသော်လည်း ကုချန် အပါအဝင် နတ်ဆိုးဧကရာဇ် ငါးပါးသာ ဤနေရာတွင် တိတ်ဆိတ်စွာ စောင့်ဆိုင်းနေကြကာ အခြား နတ်ဆိုးဧကရာဇ်များ ထပ်မံ ရောက်ရှိလာခြင်း မရှိတော့ပေ။
ဟွမ်သွမ့်ဂူပေါက်ကို ဖုံးလွှမ်းနေသော နတ်ဆိုးချီများသည်လည်း အချိန်နှင့်အမျှ ဖြည်းညင်းစွာ ပျောက်ကွယ်သွားကာ ဟွမ်သွမ့်ဂူပေါက်ကြီးကို အပြည့်အဝ ဖော်ထုတ်ပေးလိုက်လေသည်။
" အဲ့ဒီ နတ်ဆိုးဧကရာဇ်ကြီးက တကယ်ပဲ မလာဘဲ နေနိုင်တာလား "
ဟွမ်သွမ့်ဂူပေါက် အပြည့်အဝ ပွင့်တော့မည်ကို မြင်သော်လည်း နတ်ဆိုးဧကရာဇ်ကြီး၏ အရိပ်အယောင်ကို မတွေ့ရသေးသဖြင့် ရှာနာနတ်ဆိုးဧကရာဇ်မှာ အနည်းငယ် စိတ်ပျက်သွားခဲ့၏။
ထိုသူ၏ စိတ်သဘောထားအရ အန္တရာယ်များစွာကို တိကျစွာ ရှောင်ရှားနိုင်စေမည့် ကံကြမ္မာတာအိုကို ကျွမ်းကျင်ပိုင်နိုင်ထားသဖြင့် ကွေ့ရွှီးနယ်မြေ ပွင့်လာသည့်အခါ မည်သည့်အခွင့်အရေးကိုမျှ သူ လက်လွတ်ခံမည် မဟုတ်ပေ။
ဒီတစ်ခါ ဘာလို့ အဲ့ဒီလူက တုပ်တုပ်မှမလှုပ်ရတာလဲ။
သူနဲ့ အရှင်သခင်ကြားက ဆက်ဆံရေးကို သူ သိသွားလို့များလား။ ပြီးတော့ ဒီတစ်ခေါက် ကွေ့ရွှီးနယ်မြေကို လာရင် ပစ်မှတ်ထားခံရမယ်ဆိုတာကိုပါ သူ သိနေလို့ အိမ်မှာပဲ နေနေတာလား။
ဒါပေမယ့် ဒါက လုံးဝကို မဖြစ်နိုင်တာပဲ!
နတ်ဆိုးဧကရာဇ်ကြီး၌ ထိုအရာကိုပင် တွက်ချက်နိုင်စွမ်းရှိလိမ့်မည်ဟု ရှာနာနတ်ဆိုးဧကရာဇ် လုံးဝ မယုံကြည်ပေ။
အကြိမ်ကြိမ် စဉ်းစားပြီးနောက် ထိုသူသည် ကံကောင်း၍ ဤဘေးအန္တရာယ်မှ လွတ်မြောက်သွားခြင်း ဖြစ်သည်ဟုသာ ကောက်ချက်ချနိုင်တော့သည်။
" နှမြောစရာပဲ "
ရှာနာနတ်ဆိုးဧကရာဇ်မှာ အနည်းငယ် မကျေမနပ် ဖြစ်နေမိ၏။ အကယ်၍ ထိုနတ်ဆိုးဧကရာဇ်ကြီးသာ ရောက်လာပြီး အရှင်သခင်၏ သိမ်းသွင်းခြင်းကို ခံလိုက်ရပါက သူသည် အရှင်သခင်၏ ပထမဆုံး အစေခံအဖြစ် ထိုသူ့ကို ဖိနှိပ်နိုင်ပေလိမ့်မည်။ ယခုမူ ဤအခွင့်အရေးကို သူ လက်လွတ်ရတော့မည်ပုံ ပေါ်နေပြီပင်။
" ဝုန်း! "
ရှာနာနတ်ဆိုးဧကရာဇ် အတွေးထဲ နစ်မျောနေစဉ်မှာပင် ဟွမ်သွမ့်ဂူပေါက်၌ ရုတ်တရက် အပြောင်းအလဲတစ်ခု ဖြစ်ပေါ်လာခဲ့၏။
ဟွမ်သွမ့်ဂူပေါက်ကို ဖုံးလွှမ်းနေသော နတ်ဆိုးချီများသည် နောက်ဆုံးတွင် အပြည့်အဝ ပျောက်ကွယ်သွားကာ ဟွမ်သွမ့်ဂူပေါက်၏ အစစ်အမှန် ရုပ်သွင်ကို ဖော်ထုတ်ပေးလိုက်လေသည်။
" ကွေ့ရွှီးနယ်မြေ ပွင့်ပြီ! "
ယောင်ဧကရာဇ်သည် အပြည့်အဝ ပွင့်ဟသွားသော ဟွမ်သွမ့်ဂူပေါက်ကို မော့ကြည့်လိုက်လျက် စိတ်လှုပ်ရှားစွာ ပြောဆိုလိုက်၏။
" ဟက်... ငါအရှင် အရင် သွားနှင့်မယ်! "
ကွေ့ရွှီးနယ်မြေ နောက်ဆုံးတွင် ပွင့်သွားသည်ကို မြင်သောအခါ ဆက်လက်၍ မအောင့်အည်းနိုင်တော့သော ချူးဧကရာဇ်သည် ချက်ချင်း ထရပ်ကာ ဟွမ်သွမ့်ဂူပေါက်ထဲသို့ ဝင်ရောက် ပျောက်ကွယ်သွားလေတော့သည်။
ကွေ့ရွှီးနယ်မြေ ပွင့်မည့်အချိန်ကို စောင့်ဆိုင်းနေရခြင်း မဟုတ်ပါက သူသည် ရှာနာနတ်ဆိုးဧကရာဇ်နှင့် အချိန်ကြာကြာ အတူနေလိုမည် မဟုတ်ပေ။
ယခု ကွေ့ရွှီးနယ်မြေ ပွင့်သွားပြီဖြစ်ရာ အချိန်မဆွဲလိုတော့သဖြင့် သူသည် ပထမဆုံး ဝင်ရောက်မည့် အခွင့်အရေးကို အရယူလိုက်ခြင်း ဖြစ်သည်။
" ဟီးဟီး... တာအိုမိတ်ဆွေတို့... ငါအရှင်လည်း သွားတော့မယ် "
ယောင်ဧကရာဇ်မှာ အနည်းငယ် ပြုံးလိုက်ကာ ဒုတိယမြောက်သူအဖြစ် ဝင်ရောက်သွားလေသည်။
" ကွေ့ရွှီးနယ်မြေ... ဒီတစ်ခေါက် ငါအရှင်အတွက် အသုံးဝင်မယ့် တစ်ခုခုကို ရှာတွေ့နိုင်ဖို့ မျှော်လင့်ပါတယ် "
ချီဖျန့်ဧကရာဇ်သည်လည်း ထရပ်လိုက်၍ ဟွမ်သွမ့်ဂူပေါက်ထဲသို့ မဝင်ရသေးသော ရှာနာနတ်ဆိုးဧကရာဇ်နှင့် ကုချန်တို့ကို တစ်ချက်ကြည့်ကာ ဝင်ရောက်သွားလေသည်။
" အရှင်သခင်... ကျွန်မလည်း သွားတော့မယ် "
ရှာနာနတ်ဆိုးဧကရာဇ်သည် ကုချန်ထံသို့ လျှို့ဝှက်စွာ ဝိညာဉ်သတင်းစကား ပေးပို့လိုက်ပြီးနောက် ချက်ချင်းပင် အနောက်မှလိုက်ကာ ဟွမ်သွမ့်ဂူပေါက်ထဲသို့ ဝင်ရောက်သွားလေသည်။
ရှာနာနတ်ဆိုးဧကရာဇ် ကွေ့ရွှီးနယ်မြေထဲသို့ ဝင်ရောက်သွားသောအခါ သူနှင့် အဆက်အသွယ် ပြတ်တောက်သွားကြောင်း ကုချန် ချက်ချင်း သိရှိလိုက်လေသည်။
ဒီကွေ့ရွှီးနယ်မြေက အဆုံးမဲ့ကမ္ဘာတွေ အားလုံးကနေ သီးခြား ကင်းလွတ်နေတဲ့ အံ့သြဖွယ် နေရာတစ်ခုဆိုတာ တကယ်ပဲလား။
ကုချန်မှာ တိတ်တဆိတ် အံ့အားသင့်သွားရလေသည်။
သူနှင့် ရှာနာနတ်ဆိုးဧကရာဇ်တို့ကြားရှိ ဝိညာဉ်ဆက်သွယ်မှုသည် အဆုံးမဲ့ကမ္ဘာများ အားလုံးကို ဖြတ်ကျော်၍ တစ်ယောက်၏ တည်ရှိမှုကို တစ်ယောက် ခံစားသိရှိနိုင်၏။
သို့သော် ရှာနာနတ်ဆိုးဧကရာဇ် ကွေ့ရွှီးနယ်မြေထဲသို့ ဝင်ရောက်သွားသောအခါ သူတို့၏ ဆက်သွယ်မှုများသည် လုံးဝ ပျောက်ကွယ်သွားကာ ဘာကိုမျှ ဆက်လက် ခံစားသိရှိနိုင်ခြင်း မရှိတော့ချေ။
အခန်း ( ၅၁၂ ) - အဆက်အသွယ်ပြတ်တောက်ခြင်း၊ ရှောင်လင်ဧကရီထံမှ သတင်းနှင့် ကြယ်အကြွင်းအကျန် ယဇ်ပလ္လင်
ကုချန်သည် သူ၏အတွေးများကို ထိန်းချုပ်လိုက်ပြီး နောက်ဆုံးတွင် ဟွမ်သွမ့်ဂူပေါက်ရှေ့သို့ ရောက်ရှိလာကာ ခြေတစ်လှမ်းလှမ်း၍ အထဲသို့ ဝင်ရောက်သွားလေသည်။
တစ်ချိန်တည်းမှာပင် အင်မော်တယ်နယ်မြေအတွင်း၌.....
ကုချန်၏ ပင်မခန္ဓာကိုယ်နှင့် သူ၏ တတိယကိုယ်ပွားတို့သည် တစ်ချိန်တည်းမှာပင် အံ့အားသင့်သည့် အမူအရာများကို ပြသလိုက်ကြ၏။
အဘယ်ကြောင့်ဆိုသော် သူ၏ပင်မခန္ဓာကိုယ်ရော တတိယကိုယ်ပွားပါ ဒုတိယကိုယ်ပွား၏ တည်ရှိမှုကို တစ်ပြိုင်နက်တည်း မခံစားနိုင်တော့သောကြောင့်ပင်။
ဤသည်မှာ ယခင်က တစ်ကြိမ်တစ်ခါမျှ မဖြစ်ဖူးခဲ့သော အရာဖြစ်သည်။
ကုချန်မှ "ချီတစ်ခုမှ သန့်စင်သူသုံးပါး ခွဲထွက်ခြင်း" နည်းလမ်းကို သင်ယူပြီး ကိုယ်ပွားနှစ်ခု ဖန်တီးခဲ့သည့် အချိန်မှစ၍ အဆုံးအစမဲ့ ကောင်းကင်ဘုံများက ခြားနားထားလျှင်တောင်မှ မည်သည့်အချိန်၊ မည်သည့်နေရာတွင်မဆို ပင်မခန္ဓာကိုယ်နှင့် ကိုယ်ပွားနှစ်ခုတို့သည် တစ်ယောက်နှင့်တစ်ယောက်၏ တည်ရှိမှုကို အမြဲတမ်း ခံစားသိရှိနိုင်ခဲ့သည်။
သို့သော် ယခု ဒုတိယကိုယ်ပွားသည် ဒဏ္ဍာရီလာ ကွေ့ရွှီးနယ်မြေထဲသို့ ဝင်ရောက်သွားပြီးနောက် ပင်မခန္ဓာကိုယ်၊ တတိယကိုယ်ပွားတို့နှင့် အဆက်အသွယ် ပြတ်တောက်သွားသည့်အလား ခြေရာလက်ရာမကျန် ပျောက်ကွယ်သွားလေသည်။
ထိုခံစားချက်မှာ ပထမဆုံးကိုယ်ပွားသည် ဤကျယ်ပြောလှသော ကောင်းကင်ဘုံကြီးအတွင်းတွင် ဆက်လက် တည်ရှိမနေတော့ဘဲ အခြားသော လုံးဝ ကွဲပြားခြားနားသည့် ကောင်းကင်နှင့် မြေကြီးတစ်ခုဆီသို့ ထွက်ခွာသွားသကဲ့သို့ ဖြစ်နေသည်။
" တစ်ခုခုတော့ ထူးဆန်းနေတယ်..... "
ကုချန်၏ ပင်မခန္ဓာကိုယ်မှ တီးတိုး ရေရွတ်လိုက်၏။
ကိုယ်ပွားမှ ပင်မခန္ဓာကိုယ်နှင့် အဆက်အသွယ် မရနိုင်ခြင်း ဆိုသည်မှာ သူသည် ပင်မခန္ဓာကိုယ်နှင့် ကိုယ်ပွား၏ တိုက်ခိုက်ရေးစွမ်းရည်များကို ပေါင်းစပ်ရန် "ချီတစ်ခုမှ သန့်စင်သူသုံးပါး ခွဲထွက်ခြင်း" နည်းလမ်းကို အသုံးမပြုနိုင်တော့ကြောင်း ဆိုလိုခြင်းပင်။
ယင်းရလဒ်အနေဖြင့် နတ်ဆိုးဧကရာဇ်အဆင့်ကို ရင်ဆိုင်ရာတွင် သူ၏ အကြီးမားဆုံး တိုက်ကွက်ကို ဆုံးရှုံးသွားရလေသည်။
နတ်ဆိုးနယ်မြေတွင်ရှိသော သူ၏ ဒုတိယကိုယ်ပွားသည် နတ်ဆိုးဧကရာဇ်အဆင့်သို့ပင် မရောက်သေးချေ။
ကံကောင်းထောက်မစွာဖြင့် ယခင် တံခါးပိတ်ကျင့်ကြံမှု နှစ်ကြိမ်ပြီးနောက် ဒုတိယကိုယ်ပွား၏ တိုက်ခိုက်ရေးစွမ်းရည်နှင့် အဆင့်သည် အင်မော်တယ်ဘုရင်အဆင့်၏ အထွတ်အထိပ်သို့ ရောက်ရှိလာခဲ့ပြီး ဧကရာဇ်တစ်ပိုင်းအဆင့်သို့ ရောက်ရှိလာခဲ့သည်။
"ချီတစ်ခုမှ သန့်စင်သူသုံးပါး ခွဲထွက်ခြင်း" ၏ ပေါင်းစပ်အာနိသင် မရှိလျှင်တောင်မှ "ကောင်းကင်ဘုံအလုံးစုံ အမှန်တရား နားလည်ခြင်း" ၏ အားဖြည့်မှုဖြင့် ဒုတိယကိုယ်ပွား၏ တိုက်ခိုက်ရေးစွမ်းရည်သည် နတ်ဆိုးဧကရာဇ်အဆင့် တည်ရှိမှုတစ်ခုနှင့် 'ယှဉ်ပြိုင်' နိုင်ကာ မိမိကိုယ်ကို ကာကွယ်နိုင်စွမ်း ရှိပေသည်။
ထို့အပြင် သတင်းကောင်းမှာ သူတစ်ယောက်တည်းသာ ကွေ့ရွှီးနယ်မြေထဲသို့ ဝင်ရောက်သွားခြင်း မဟုတ်ဘဲ ရှာနာနတ်ဆိုးဧကရာဇ်လည်း ရှိနေခြင်းပင်ဖြစ်သည်။
ကွေ့ရွှီးနယ်မြေထဲတွင် ရှာနာနတ်ဆိုးဧကရာဇ်နှင့် သူ၏ကိုယ်ပွားတို့ အဆက်အသွယ် ရကောင်း ရနိုင်ပေလိမ့်မည်။ ကိုယ်ပွားနှင့် ရှာနာနတ်ဆိုးဧကရာဇ် အမြန်ဆုံး ပြန်လည် ပေါင်းဆုံနိုင်ပါက ရှာနာနတ်ဆိုးဧကရာဇ်၏ အကာအကွယ်ဖြင့် သူ၏ ဒုတိယကိုယ်ပွား၏ လုံခြုံရေးသည် အတိုင်းအတာတစ်ခုအထိ အာမခံချက် ရှိပေလိမ့်မည်။
ကုချန်၏ ပင်မခန္ဓာကိုယ်သည် ကိုယ်ပွား၏ ကွေ့ရွှီးနယ်မြေ ခရီးစဉ် ချောမွေ့ပါမည်လားဟု တွေးတောနေစဉ်မှာပင် သူ၏ ဆံပင်များကြားမှ လင်းလက်တောက်ပသော ကြယ်ရောင်တစ်စ ရုတ်တရက် ကျဆင်းလာကာ တစ်ချိန်တည်းမှာပင် ကြယ်ရောင်ထဲမှ အေးစက်သော အသံတစ်ခု ထွက်ပေါ်လာလေသည်။
" အချိန်ကျပြီ... ဝိညာဉ်တစ်သောင်း တာအိုကျမ်း ရှိနေတဲ့ တည်နေရာ အတိအကျကို ဒီကြယ်ရောင်ထဲမှာ မှတ်တမ်းတင်ထားတယ်... မင်းရဲ့ နတ်ဘုရားဝိညာဉ်နဲ့ စူးစမ်းကြည့်လိုက်ရုံနဲ့ အဲ့ဒါတွေကို မြင်နိုင်ပါလိမ့်မယ် "
ထိုအသံမှာ ရှောင်လင်ဧကရီ၏ အသံဖြစ်သည်။ ဝိညာဉ်တစ်သောင်း တာအိုကျမ်း၏ တည်နေရာ အတိအကျကို နောက်ဆုံးတွင် သူ အပြည့်အဝ ခံစားသိရှိသွားပြီဖြစ်သည်။
" ကောင်းပြီ "
ကုချန်၏မျက်လုံးများတွင် ထက်ရှသော အလင်းရောင်တစ်ချက် လင်းလက်သွားကာ ဖြည်းညင်းစွာ ခေါင်းညိတ်လိုက်၏။ ထို့နောက် ကြယ်ရောင်ထဲသို့ နတ်ဘုရားအာရုံ အနည်းငယ် ပို့လွှတ်လိုက်ရာ အဆုံးအစမဲ့ ဝေးကွာသော နေရာတစ်ခုမှ အရာတစ်ခုက သူ့ကို ခေါ်ဆောင်နေသကဲ့သို့ ချက်ချင်း ခံစားလိုက်ရသည်။
ထိုနေရာ၏ တည်နေရာကို ခံစားသိရှိလိုက်ရသောအခါ ကုချန်၏ မျက်လုံးများထဲတွင် အံ့အားသင့်မှု အနည်းငယ် မပေါ်လာဘဲ မနေနိုင်ခဲ့ချေ။
အဘယ်ကြောင့်ဆိုသော် ရှောင်လင်ဧကရီ ပေးလိုက်သော နေရာသည် အင်မော်တယ်နယ်မြေတွင် ရှိနေပုံမရဘဲ အဆုံးမဲ့ကမ္ဘာများအတွင်း၌သာ ဖြစ်နေသည်ကို သူ မှိန်ဖျော့ဖျော့ ခံစားခဲ့ရသောကြောင့်ပင်။
" အောက်ဘုံမှာလား "
ကုချန်၏အတွေးများမှာ လှုပ်ရှားသွားကာ ယွဲ့လင်ကောင်းကင်ဘုံ၏ နယ်စပ်ရှိ ခမ်းနားကြီးကျယ်လှသော အင်မော်တယ်ဂိတ်တံခါးရှေ့သို့ ရောက်ရှိသွား၏။ ထို့နောက် အင်မော်တယ်ဘုရင် အမှတ်အသားကို အသုံးပြု၍ အင်မော်တယ်ဂိတ်တံခါးကို ဖွင့်ကာ အဆုံးမဲ့ကမ္ဘာများအတွင်းသို့ တိတ်တဆိတ် ဝင်ရောက်သွားလေသည်။
အဆုံးမဲ့ကမ္ဘာသို့ ရောက်ရှိလာသောအခါ သူ့ကို ခေါ်ဆောင်နေသည့် ခံစားချက်မှာ ပိုမို ပြင်းထန်လာခဲ့၏။
ကုချန်သည် မျက်လုံးများကို မှိတ်ကာ တစ်ခဏမျှ အာရုံခံလိုက်ရာ ထိုနေရာသည် ဟွမ်သွမ့်ပင်လယ်၏ အနက်ရှိုင်းဆုံးနေရာတွင် ဖြစ်နေကြောင်း တွေ့ရှိလိုက်ရသည်။
ထို့ကြောင့် သူသည် အချိန်မဆွဲတော့ဘဲ အဆုံးမဲ့ကမ္ဘာမှ ချက်ချင်း ထွက်ခွာကာ ဟွမ်သွမ့်ပင်လယ်၏ အနက်ရှိုင်းဆုံးဆီသို့ ဦးတည်သွားလေတော့သည်။
...
ကုချန်၏ ပင်မခန္ဓာကိုယ်မှ ရှောင်လင်ဧကရီပေးလိုက်သော နေရာအတိုင်း ဝိညာဉ်တစ်သောင်း တာအိုကျမ်း၏ တည်နေရာကို ရှာဖွေနေချိန်၌ ကုချန်၏ ဒုတိယကိုယ်ပွားသည် အလွန်အမင်း ထူးဆန်းသော ကမ္ဘာတစ်ခုတွင် သူ့ကိုယ်သူ တွေ့ရှိလိုက်ရ၏။
ဤသည်မှာ ပျက်စီးနေသော စကြဝဠာကြီး တစ်ခုဖြစ်သည်။
ကြယ်များအားလုံး ငြိမ်းသတ်သွားကာ အလင်းရောင် တစ်စက်မျှပင် မရှိတော့ချေ။
ဗလာနတ္ထိဖြစ်လျက် မှောင်မိုက်နေသော စကြဝဠာထဲတွင် မရေမတွက်နိုင်သော ကြယ်အလောင်းကောင်များသာ မလှုပ်မယှက် ကျန်ရစ်နေပြီး လုံးဝ တိတ်ဆိတ်နေလေသည်။
ဤနေရာသည် သက်ရှိဟူ၍ လုံးဝမရှိတော့သည့် 'သေဆုံး' နေသော စကြဝဠာကြီး တစ်ခုနှင့် တူနေ၏။ ဤစကြဝဠာအတွင်းရှိ အဆုံးမဲ့တာအိုများပင်လျှင် ပျက်စီးယိုယွင်းခြင်းနှင့် ဆုတ်ယုတ်ကျဆင်းခြင်း အရိပ်အယောင်များကို သယ်ဆောင်နေလေသည်။
ကုချန်မှ သူ၏နတ်ဘုရားအာရုံကို အနည်းငယ် ဖြန့်ကျက်လိုက်ရုံဖြင့် ဤစကြဝဠာထဲတွင် သူတစ်ဦးတည်းသာ သက်ရှိဖြစ်ကြောင်း အတည်ပြုနိုင်ခဲ့သည်။ သူမှလွဲ၍ သက်ရှိအရိပ်အယောင် တစ်ခုမျှပင် မရှိတော့ချေ။
တစ်ချိန်တည်းမှာပင် သူသည် သူ၏ ပင်မခန္ဓာကိုယ်၊ တတိယကိုယ်ပွားတို့နှင့် အဆက်အသွယ် လုံးဝ ပြတ်တောက်သွားကြောင်းကိုလည်း ခံစားလိုက်ရသည်။
" ဒီကွေ့ရွှီးနယ်မြေက တကယ်ကို ကြောက်စရာကောင်းတယ် "
ကုချန်သည် လေးနက်မှုများ ပါဝင်သော လေသံဖြင့် တီးတိုး ရေရွတ်လိုက်၏။
ပင်မခန္ဓာကိုယ်၊ တတိယကိုယ်ပွားတို့နှင့် အဆက်အသွယ် ပြတ်တောက်သွားကြောင်း သိရှိပြီးနောက် ကုချန်သည် သူ၏ ခန္ဓာကိုယ်သုံးခုကို ပေါင်းစည်းနိုင်ခြင်း ရှိမရှိ သိနိုင်ရန် "ချီတစ်ခုမှ သန့်စင်သူသုံးပါး ခွဲထွက်ခြင်း" ကို အသုံးပြုရန် ကြိုးစားကြည့်ခဲ့သည်။
သို့သော် ရလဒ်မှာတော့ သူ့ကို စိတ်ပျက်စေခဲ့၏။ ယခင်က အဆုံးအစမဲ့ ကောင်းကင်ဘုံများကို ဖြတ်ကျော်၍ပင် အလွယ်တကူ အသုံးပြုနိုင်ခဲ့သော "ချီတစ်ခုမှ သန့်စင်သူသုံးပါး ခွဲထွက်ခြင်း" နည်းလမ်းသည် ယခုအခါ လုံးဝ အသုံးပြု၍ မရတော့ချေ။
သို့သော် တစ်ခုတည်းသော သတင်းကောင်းမှာ ကွေ့ရွှီးနယ်မြေထဲသို့ ဝင်ရောက်ပြီးနောက် ရှာနာနတ်ဆိုးဧကရာဇ်နှင့် သူ၏ ဝိညာဉ်ဆက်သွယ်မှုကို ပြန်လည်ရရှိခဲ့ကြောင်း တွေ့ရှိရခြင်းဖြစ်သည်။
သို့သော် ရှာနာနတ်ဆိုးဧကရာဇ်ကို ကိုယ်စားပြုသော ဝိညာဉ်အလင်းစက်လေးမှာ သူနှင့် အလွန်အမင်း ဝေးကွာနေ၏။ ရှာနာနတ်ဆိုးဧကရာဇ်၏ တည်နေရာ အကြမ်းဖျင်းကိုသာ မှိန်ဖျော့ဖျော့ ခံစားသိရှိနိုင်ပြီး အခြေခံအကျဆုံး ဝိညာဉ်ဆက်သွယ်မှုကိုပင် လုပ်ဆောင်၍ မရနိုင်ချေ။
ဤကွေ့ရွှီးနယ်မြေထဲတွင် ရှာနာနတ်ဆိုးဧကရာဇ်နှင့် သူ၏ဆက်သွယ်မှုကို ပိတ်ဆို့နေသော ရှင်းပြ၍မရသည့် စွမ်းအားတစ်ခု ရှိနေပုံရသည်။
ကံကောင်းထောက်မစွာဖြင့် ကွေ့ရွှီးနယ်မြေထဲသို့ မဝင်ရောက်မီနှင့် ကွေ့ရွှီးနယ်မြေထဲ ရောက်ပြီးနောက် သူ၏တည်နေရာကို ခံစားသိရှိနိုင်ပါက ချက်ချင်း လာရောက်ရန် ရှာနာနတ်ဆိုးဧကရာဇ်ကို သူ မှာကြားထားခဲ့ပြီးဖြစ်သည်။
သို့သော် ကွေ့ရွှီးနယ်မြေသည် အဆုံးအစမဲ့ အန္တရာယ်များဖြင့် ပြည့်နှက်နေ၏။ ရှာနာနတ်ဆိုးဧကရာဇ်မှ အစွမ်းကုန် ကြိုးစား၍ လာမည်ဆိုလျှင်တောင် လမ်းခရီးတွင် အချိန်များစွာ ယူရပေလိမ့်မည်။ အကယ်၍ လမ်းခုလတ်တွင် တားမြစ်နယ်မြေ တစ်ခုခု သို့မဟုတ် အန္တရာယ် တစ်ခုခုကြောင့် နှောင့်နှေးသွားပါက နှစ်ရာပေါင်းများစွာပင် ကြာမြင့်သွားနိုင်ချေရှိသည်။
ထို့ကြောင့် ရှာနာနတ်ဆိုးဧကရာဇ်ကို ကိုယ်စားပြုသော အလင်းစက်လေးသည် သူ့ဆီသို့ ဖြည်းညင်းစွာ ရွေ့လျားလာနေကြောင်း အတည်ပြုပြီးနောက် ကုချန်သည် အာရုံပျံ့လွင့်စေသော အတွေးများကို ဘေးဖယ်ထားလိုက်ကာ သူရောက်ရှိနေသော ပျက်စီးနေသည့် စကြဝဠာကို စတင် စူးစမ်းလေ့လာလိုက်လေသည်။
သူသည် သူ၏နတ်ဘုရားအာရုံကို ဖြန့်ကျက်ပြီး ဤပျက်စီးနေသော စကြဝဠာထဲတွင် သက်ရှိဟူ၍ လုံးဝမရှိတော့ကြောင်း အတည်ပြုပြီးဖြစ်သည်။
သို့သော် တစ်ချိန်တည်းမှာပင် ဤစကြဝဠာအတွင်း၌ 'လျှို့ဝှက်ဆန်းကြယ်သော' နေရာတစ်ခုကိုလည်း ရှာတွေ့ခဲ့သည်။
၎င်းမှာ ဤပျက်စီးနေသော စကြဝဠာထဲတွင် တစ်ချိန်က နေထိုင်ခဲ့ကြသည့် သက်ရှိများ ချန်ရစ်ထားခဲ့သော အကြွင်းအကျန်များ ဖြစ်ပုံပင်။
ဤကွေ့ရွှီးနယ်မြေထဲတွင်လည်း သက်ရှိများ ရှိနေခဲ့သည်လော။
သို့မဟုတ် ဤပျက်စီးနေသော စကြဝဠာသည် အကြောင်းအရင်း တစ်ခုခုကြောင့် ဤကွေ့ရွှီးနယ်မြေထဲသို့ မတော်တဆ ဝင်ရောက်လာခဲ့ကာ ၎င်း၏နေထိုင်သူများ အားလုံး လုံးဝ မျိုးတုံးပျောက်ကွယ်သွားရခြင်း ဖြစ်မည်လော။
ကုချန်၏အတွေးများမှာ ရှုပ်ယှက်ခတ်နေသော်လည်း ညင်သာစွာ ခြေလှမ်းလိုက်လျက် ပျက်စီးနေသော စကြဝဠာ၏ ဗဟိုဆီသို့ ရောက်ရှိသွားခဲ့၏။ ထိုနေရာသည် ယခင်က သူ ထူးခြားမှုကို ခံစားမိခဲ့သည့် နေရာပင်ဖြစ်သည်။
အေးစက်၍ တိတ်ဆိတ်နေသော စကြဝဠာ လေဟာနယ်အတွင်း တိုင်းတာ၍မရနိုင်လောက်အောင် ကျယ်ပြောလှသော တိုက်ကြီးတစ်ခု တိတ်ဆိတ်စွာ မျောလွင့်နေလေသည်။
အနီးကပ် ကြည့်လိုက်သောအခါ ထိုအရာမှာ ဘယ်လိုလုပ် တိုက်ကြီးတစ်ခု ဖြစ်နိုင်မည်နည်း။ ၎င်းမှာ မရေမတွက်နိုင်သော ကြယ်အလောင်းကောင်များ စုပေါင်းထားသည့် အရာဖြစ်ကြောင်း ရှင်းလင်းနေ၏။
မရေမတွက်နိုင်သော ကြယ်အလောင်းကောင်များ ပေါင်းဆုံကာ ဤဧရာမ ကုန်းမြေကြီးကို ဖန်တီးထားခြင်း ဖြစ်သည်။
ထိုအဆုံးအစမဲ့သော ကြယ်အကြွင်းအကျန်များပေါ်တွင် မရေမတွက်နိုင်သော ကြယ်အလောင်းကောင်များ စုပုံကာ တည်ဆောက်ထားသည့် ရှေးဟောင်း ယဇ်ပလ္လင်တစ်ခု မားမားမတ်မတ် ရပ်တည်နေလေသည်။