အခန်း (၃၈၄)

ယခုမူ အခန်းတစ်ခန်းစာမျှ ကြီးမားသော အချိန်ကာလ ကျောက်မျက်တစ်ခုလုံးကို တစ်နာရီအတွင်း သူမတစ်ဦးတည်း စုပ်ယူလိုက်ခြင်းဖြစ်ရာ ရွှီရန်အနေဖြင့် အနည်းငယ် စိုးရိမ်သွားခြင်းပင်။

ကျူးယွီဟန်က သူမအား စိုးရိမ်တကြီး ကြည့်နေကြသော အဖော်များကို ကြည့်ကာ

"ကျွန်မ အဆင်ပြေပါတယ်"

"အဆင်ပြေရုံတင်မကဘူး။ ခန္ဓာကိုယ်ထဲမှာ ဆန်းကြယ်တဲ့ စွမ်းအင်တွေ အများကြီး စီးဆင်းနေတာကို ခံစားနေရတယ်" ဟု ပြောလိုက်သည်။

ရွှီရန်က မျက်ခုံးတစ်ချက် ပင့်လိုက်မိသည်။ ဤသည်မှာ အချိန်ကာလ၏ အဆုံးသတ်တွင်ရှိသော ကျူးယွီဟန်၏ လက်ချက်ဖြစ်ပေလိမ့်မည်။

"အချိန်စီးဆင်းမှုနှုန်းကော ဘယ်လိုလဲ"

ကျားမလေးက စိတ်အားထက်သန်စွာ မေးလိုက်သည်။

ကျောက်မျက်ကို စုပ်ယူလိုက်ခြင်းက ကျူးယွီဟန်အား အချိန်ကာလ ထိန်းချုပ်ခြင်းဟူသော ကြောက်မက်ဖွယ် တိုက်ခိုက်ရေးစွမ်းရည်ကို ပေးစွမ်းနိုင်သော်လည်း သူတို့ အလေးထားဆုံးအရာမှာ အချိန်စီးဆင်းမှုနှုန်း ပြောင်းလဲနိုင်သည့် စွမ်းရည်ပင်။

အချိန်စီးဆင်းမှုနှုန်းအကြောင်း ပြောလိုက်သည်နှင့် ကျူးယွီဟန်၏ မျက်နှာတွင် အပြုံးတစ်ခု ပေါ်လာသည်။

"အရင်ကနဲ့ ယှဉ်ရင် အချိန်ကို အရှိန်မြှင့်ဖို့ ပေးဆပ်ရတဲ့ တန်ဖိုးက သုံးဆလောက် လျော့ကျသွားပြီ"

ပေးဆပ်ရတဲ့ တန်ဖိုးက သုံးဆလောက် လျော့ကျသွားတာလား။

မမျှော်လင့်ဘဲ လျှို့ဝှက်နယ်မြေထဲသို့ ဝင်လာရုံရှိသေးသော်လည်း ဤမျှကြီးမားသော လက်ဆောင်ကို ရရှိခဲ့ကြသည်။

ရွှီရန် ရရှိထားသည့် မိစ္ဆာသားရဲဥမှာ ပေါက်ဖွားရန် အနှစ်နှစ်ဆယ် ကြာမြင့်မည်ဖြစ်ရာ အကယ်၍ ကျူးယွီဟန်က အချိန်အရှိန်မြှင့်ပေးပါက သူမ၏ သက်တမ်း အနှစ်နှစ်ဆယ်ကို ပေးဆပ်ရမည် ဖြစ်သည်။

သို့သော် ယခုအခါ ပေးဆပ်ရမည့် တန်ဖိုးမှာ သုံးဆ လျော့ကျသွားပြီဖြစ်သဖြင့် မိစ္ဆာဥကို အောင်မြင်စွာ ဖောက်နိုင်ရန် ခြေတစ်လှမ်း နီးစပ်သွားပြီ ဖြစ်သည်။

ထို့ပြင် လျှို့ဝှက်နယ်မြေထဲ၌ ဤမျှကြီးမားသော ကျောက်မျက်ရှိနေလျှင် အခြားသော နေရာများတွင်လည်း ပြန့်နှံ့နေနိုင်ချေ ရှိသည်။

ဖြစ်နိုင်သည်မှာ ဤလျှို့ဝှက်နယ်မြေ ခရီးစဉ်သည် ကျူးယွီဟန်၏ အချိန်အရှိန်မြှင့်ခြင်းစွမ်းရည်ကို အဆင့်မြင့်ဆုံးအထိ တက်လှမ်းသွားစေနိုင်သည်။

ထို့နောက် ရွှီရန်က မြေကမ္ဘာကြောရိုး ဝိညာဉ်ကို ကြည့်ကာ "လျှို့ဝှက်နယ်မြေထဲမှာ အချိန်ကာလ ကျောက်မျက်တွေ တခြားနေရာမှာလည်း ရှိဦးမှာပေါ့နော်" ဟု မေးလိုက်သည်။

၎င်းမှာ ခန့်မှန်းချက်သာ ဖြစ်သော်လည်း ဝိညာဉ်ကိုယ်ထည်ထံမှ အတည်ပြုချက် ရယူလိုခြင်းပင်။

ဝိညာဉ်ကိုယ်ထည်က ခေါင်းညိမ့်ပြသည်။

"မူလကတော့ လျှို့ဝှက်နယ်မြေထဲမှာ ဒီကျောက်မျက် တစ်ခုတည်းပဲ ရှိတာပါ။ ဒီအရွယ်အစားက အချိန်ထိန်းချုပ်သူ တစ်ယောက် ကျင့်ကြံဖို့ လုံလောက်ပါတယ်။ ဒါပေမဲ့ လျှို့ဝှက်နယ်မြေက နှစ်ပေါင်းများစွာ တည်ရှိလာခဲ့တာဆိုတော့ ဒီလို ထူးခြားတဲ့ ပတ်ဝန်းကျင်မျိုးမှာ တခြားနေရာတွေမှာလည်း အချိန်ကာလ ကျောက်မျက်တွေ ရှိနေနိုင်ပါတယ်။ ဒါပေမဲ့ ရှင်တို့ဘာသာ ရှာဖွေရမှာပါ"

လျှို့ဝှက်နယ်မြေထဲတွင် အခြားသော ကျောက်မျက်များ ရှိနေနိုင်သည်ဆိုရုံနှင့်ပင် လုံလောက်နေပြီဖြစ်သည်။

ခေတ္တမျှ စကားပြောဆိုပြီးနောက် ရွှီရန်သည် အဖွဲ့သားများကို ဦးဆောင်ကာ အခွင့်အလမ်းသစ်များ ရှာဖွေရန် မြေကမ္ဘာကြောရိုး၏ အိပ်စက်ရာ နယ်မြေမှ ထွက်ခွာခဲ့ကြသည်။ လမ်းလျှောက်နေရင်း ကျူးယွီဟန်အတွက် ကျောက်မျက်များကို ကူညီရှာဖွေပေးခဲ့သော်လည်း တစ်နာရီခန့် ကြာသည်အထိ ဘာမှ ရှာမတွေ့ခဲ့ကြချေ။

သူတို့ ဆက်လက် လျှောက်လှမ်းလာရာ တောအုပ်တစ်ခုသို့ ရောက်ရှိလာခဲ့သည်။ ထိုတောအုပ်မှာ ပေတစ်ရာခန့် မြင့်မားပြီး လူပေါင်း ဒါဇင်နှင့်ချီကာ ဝိုင်းပတ်ဖက်ရမည့် ထူးဆန်းသော သစ်ပင်ကြီးများဖြင့် ပြည့်နှက်နေသည်။ မြင်ရသည်မှာ အလွန်ပင် ခန့်ညားထည်ဝါသည်။

ချက်ချင်းပင် ရွှီရန်သည် ထိုသစ်ပင်ကြီးများထံမှ အလွန်ရင်းနှီးသော အရှိန်အဝါတစ်ခုကို ခံစားလိုက်ရသည်။ ခေတ္တမျှ စဉ်းစားကြည့်ပြီးနောက် သူ မှတ်မိသွားခဲ့သည်။

ဤအပင်များသည် ယခင်က ပထမအဆင့် ညစ်ညမ်းနယ်မြေတွင် သူတွေ့ခဲ့ဖူးသော သစ်ပင်ကြီးများနှင့် တစ်ပုံစံတည်းပင်ဖြစ်ကာ ကွာခြားချက်မှာ အရှိန်အဝါ၌သာ ရှိသည်။

တစ်ဖက်မှာ ညစ်ညမ်းနေပြီး ဤနေရာရှိ အပင်များမှာ ဝိညာဉ်စွမ်းအင်များဖြင့် ပြည့်နှက်နေခြင်းကလွဲ၍ ကျန်သည်မှာ အတူတူပင်။

"ဒီသစ်ပင်ကြီးတွေထဲမှာလည်း သစ်သားနှလုံးသားတွေ ရှိနေနိုင်မလား"

ရွှီရန်က ရေရွတ်လိုက်မိသည်။

ဘေးတွင် ရှိနေသော ကျားမလေးက ကြားသွားပြီး "အစ်ကို... သစ်သားနှလုံးသားဆိုတာ ဘာလဲ" ဟု မေးလိုက်သည်။

ရွှီရန်က ရှင်းပြသည်။

"အရင်က ငါ ပထမအဆင့် ညစ်ညမ်းနယ်မြေမှာ လေ့ကျင့်တုန်းက အဲဒီက သစ်ပင်ဝိညာဉ်ဆီကနေ သစ်သားနှလုံးသား တစ်ခု ရခဲ့ဖူးတယ်။ အဲဒါက ငါ့ရဲ့ သွေးစွမ်းအင်ကို သန်းချီတဲ့အထိ မြှင့်တင်ပေးခဲ့တာလေ" ဟု ပြောလိုက်သည်။

ထက်မြက်သော ကျူးယွီဟန်က ရှေ့မှ သစ်ပင်ကြီးများကို ကြည့်ကာ "ရှောင်ရန်... မင်းပြောချင်တာက ဒီတောအုပ်ထဲက အပင်တွေအားလုံးမှာ သစ်သားနှလုံးသားတွေ ရှိနေနိုင်တယ်လို့ ပြောတာလား" ဟု မေးလိုက်သည်။

ရွှီရန်က ခေါင်းညိမ့်လျက် "ဟုတ်တယ်"

ကျားမလေးမှာလည်း စိတ်လှုပ်ရှားသွားပြီး "ဒါဆို ဘာစောင့်နေတာလဲ။ သွားကြည့်ကြတာပေါ့" ဟု ပြောလိုက်သည်။

ရွှီရန် ပြောပြချက်အရ သစ်သားနှလုံးသား တစ်ခုရလျှင် သူတို့၏ သွေးစွမ်းအင်ကို တစ်သောင်းခန့် ချက်ချင်း မြှင့်တင်ပေးနိုင်ကြောင်း သိထားကြသည်။

ရှေ့တွင် မရေမတွက်နိုင်သော သစ်ပင်ကြီးများ ရှိနေသည်ဖြစ်ရာ အကယ်၍ သစ်သားနှလုံးသားများသာ ရှိနေခဲ့လျှင် သူတို့၏ သွေးစွမ်းအင်မှာ သန်းနှင့်ချီသည့် အဆင့်အထိ ချက်ချင်း ခုန်တက်သွားနိုင်သည်။

ကျားမလေးသည် ရှေ့ဆုံးမှ ဦးဆောင်ကာ သူမ၏ ဓားမြှောင်လေးဖြင့် သစ်ပင်ကြီးတစ်ပင်အနားသို့ တိုးသွားသည်။ ပတ်ဝန်းကျင် ဘေးကင်းကြောင်း အတည်ပြုပြီးနောက် သစ်ခွံများကို စတင်ခွာတော့သည်။

တစ်လွှာပြီးတစ်လွှာ ခွာလိုက်ရာ နောက်ဆုံးတွင် သစ်ပင်အတွင်းပိုင်းမှ နီရဲသော အရောင်မှာ ပေါ်ထွက်လာခဲ့သည်။

ရွှီရန်သည် ထိုရင်းနှီးသော အရောင်ကို မြင်လိုက်ရသည်နှင့် အဓိပ္ပာယ်ပါသော အပြုံးတစ်ခု ပြုံးလိုက်ကာ "တကယ်ပဲ ရှိနေတာပဲ" ဟု ပြောလိုက်သည်။

နောက်တစ်ခဏတွင် ကျားမလေးက အော်ဟစ်လိုက်သည်။

"ဟုတ်တယ် အထဲမှာ သစ်သားနှလုံးသား တကယ်ရှိတယ်"

အဖွဲ့သားများမှာ ထိုအသံကြောင့် အနားသို့ စုရုံး၍ ရောက်ရှိလာကြသည်။ ကျားမလေး၏ လက်ထဲတွင် တောက်ပနေသော အနီရောင် သစ်သားနှလုံးသား တစ်ခု ရှိနေသည်။

သူတို့အားလုံး ရွှီရန်ဘက်သို့ လှည့်ကြည့်ကာ "ခေါင်းဆောင်... ဒါ အဲဒီဟာပဲလား" ဟု မေးကြသည်။

ရွှီရန်က "အင်း... ဟုတ်တယ်" ဟု ခေါင်းညိမ့်ပြလိုက်သည်။

အတည်ပြုချက် ရသည်နှင့် ကျားမလေးမှာ သူမလက်ထဲရှိ သစ်သားနှလုံးသားကို ချက်ချင်းပင် စုပ်ယူလိုက်သည်။ ချက်ချင်းဆိုသလိုပင် သူမ၏ သွေးစွမ်းအင် တစ်သောင်းခန့် တိုးလာသည်ကို သိသိသာသာ ခံစားလိုက်ရသည်။

"အစ်ကို... ကျွန်မရဲ့ သွေးစွမ်းအင် တစ်သောင်း တိုးသွားပြီ"

ကျားမလေးက ဝမ်းသာအားရ အော်ဟစ်လိုက်လေတော့သည်။

အဖွဲ့သားများအားလုံးမှာလည်း ထပ်တူထပ်မျှ စိတ်လှုပ်ရှားနေကြသည်။

"တစ်သောင်းတောင်လား... သစ်သားနှလုံးသား တစ်ခုတည်းနဲ့ သွေးစွမ်းအင် တစ်သောင်း တိုးလာတယ်ဆိုတာ တကယ်ကို အံ့ဩဖို့ကောင်းတာပဲ"

"ဒီသစ်ပင်ကြီးတွေသာ အကုန်ရရင် ငါတို့ ကျင့်ကြံစရာတောင် မလိုဘဲ သွေးစွမ်းအင်ကို သန်းချီ၊ ကုဋေချီတဲ့အထိ မြှင့်တင်နိုင်မှာပေါ့"

"အရင်ယဉ်ကျေးမှုခေတ်က ဘိုးဘေးတွေ ချန်ခဲ့တဲ့ လျှို့ဝှက်နယ်မြေဆိုတာ မပြောနဲ့တော့ တောအုပ်တစ်ခုတည်းတင် ဒီလောက် အစွမ်းထက်နေတာ"

ရွှီရန်၏ မျက်လုံးများမှာလည်း ရှေ့မှ သစ်ပင်ကြီးများကို ကြည့်ကာ တောက်ပနေသည်။

"ဒီတောအုပ်ထဲမှာ သစ်ပင်ကြီးတွေ အနည်းဆုံး သောင်းနဲ့ချီပြီး ရှိမှာပဲ။ ငါသာ ဒီက သစ်သားနှလုံးသားတွေ အကုန်စုပ်ယူနိုင်ရင် တစ်ကမ္ဘာလုံးမှာ ပြိုင်ဘက်ကင်း ဖြစ်သွားမှာ မဟုတ်လား"

သစ်သားနှလုံးသား တစ်ခုလျှင် သွေးစွမ်းအင် တစ်သောင်းဆိုပါက သစ်သားနှလုံးသား တစ်သောင်းဆိုလျှင် သွေးစွမ်းအင် သန်းတစ်ရာပင်။ အကယ်၍ သူသာ သွေးစွမ်းအင် သန်းတစ်ရာ ရရှိခဲ့ပါက သူ၏ အခြားသော စွမ်းရည်များနှင့် ပေါင်းစပ်ပြီး ကမ္ဘာမြေကို ကျူးကျော်နေသည့် ပြဿနာကို တစ်ယောက်တည်းနှင့် ဖြေရှင်းပစ်နိုင်မည်ဖြစ်သည်။ ဂြိုဟ်ပြင်ပ မိစ္ဆာဂြိုဟ်သို့ပင် တစ်ကိုယ်တော် သွားရောက်ပြီး မိစ္ဆာအားလုံးကို အမြစ်ပြတ် သုတ်သင်ပစ်နိုင်ပေလိမ့်မည်။

လူတိုင်း ဝမ်းသာပီတိ ဖြစ်နေစဉ်မှာပင် အပြာရောင်ဝတ်စုံဝတ် မိန်းကလေး၏ အရိပ်မှာ သူတို့ရှေ့၌ ပေါ်လာပြန်သည်။

"သိပ်ပြီးတော့ စိတ်မလှုပ်ရှားကြပါနဲ့ဦး"

ကျားမလေးက ဇဝေဇဝါဖြင့် "ဘာလို့လဲ အစ်မ"

မိန်းကလေးက ရှင်းပြသည်။

"ဒီလျှို့ဝှက်နယ်မြေဆိုတာ ကျင့်ကြံသူတွေ လေ့ကျင့်ဖို့အတွက်ပဲ။ တစ်ခဏချင်းမှာ ပြိုင်ဘက်ကင်း ဖြစ်သွားအောင် လုပ်ပေးဖို့ မဟုတ်ဘူး။ ဒါကြောင့် ဒီနယ်မြေမှာ သူ့ရဲ့ ကိုယ်ပိုင် စည်းမျဉ်းတွေ ရှိတယ်"

ရွှီရန်က အံ့အားသင့်သွားပြီး "ဘာစည်းမျဉ်းလဲ"

"တစ်ယောက်ကို သစ်ပင် အပင် ၁၀၀ ပဲ ခုတ်ခွင့်ရှိတယ်။ သစ်သားနှလုံးသား အခု ၁၀၀ ပဲ ရနိုင်မှာပါ"

ထိုစကားကို ကြားလိုက်ရသည်နှင့် အားလုံးမှာ စိတ်ပျက်သွားကြသည်။

ကျားမလေးက "သစ်သားနှလုံးသားတွေ စုပ်ယူပြီး အစ်ကို့ကို မီအောင် လိုက်နိုင်မယ်လို့ ထင်နေတာ"

နင်ရွှမ်ကလည်း "နှမျောစရာပဲ အပင် ၁၀၀ ပဲ ခုတ်ခွင့်ရှိတာလား"

ကွမ်းရှင်းက "သစ်သားနှလုံးသား ၁၀၀ က သွေးစွမ်းအင် တစ်သန်း တိုးလာမယ်ဆိုပေမဲ့ အစ်ကိုနဲ့ ယှဉ်ရင်တော့ အဝေးကြီး လိုသေးတာပဲ"

ကျူးယွီဟန်က သူတို့ကို နှစ်သိမ့်လိုက်သည်။

"သစ်သားနှလုံးသား ၁၀၀ ဆိုတာလည်း နည်းတာ မဟုတ်ပါဘူး။ အနည်းဆုံးတော့ ငါတို့အားလုံး ယွဲ့အဆင့် ကျင့်ကြံသူတွေ ဖြစ်လာနိုင်တာပေါ့"

ရွှီရန်လည်း အနည်းငယ် စိတ်မကောင်း ဖြစ်သွားသော်လည်း အားလုံးကို ပြန်လည် အားပေးလိုက်သည်။

"တကယ်လို့ ဒီနယ်မြေက အကန့်အသတ်မရှိ ခုတ်ခွင့်ပေးတယ်ဆိုရင်တောင် ငါတို့က အကုန်လုံးကို စုပ်ယူဖို့ မမျှော်လင့်သင့်ဘူး။ ငါတို့က အကုန်ယူလိုက်ရင် နောက်မှလာမယ့် ကျင့်ကြံသူတွေအတွက် ဘာကျန်တော့မှာလဲ"

ထိုသို့ ပြောလိုက်သော်လည်း ရွှီရန်၏ စိတ်ထဲတွင်တော့ အနည်းငယ် နှမျောမိသည်မှာ အမှန်

ပင်။ သို့သော်လည်း ဤမျှ ရရှိခြင်းမှာပင် အတော်လေး ကောင်းမွန်နေပြီဖြစ်သည်။

သူ၏ လက်ရှိ သွေးစွမ်းအင်မှာ ၄ သန်း ဖြစ်ရာ ယခု ၁ သန်း ထပ်တိုးပါက ၅ သန်း ဖြစ်လာမည်။ သူ၏ စွမ်းရည်များနှင့်ဆိုလျှင် သွေးစွမ်းအင် သန်း ၄၀ ရှိသော ပြိုင်ဘက်ကိုပင် တစ်ချက်တည်းနှင့် သတ်ဖြတ်နိုင်မည်ဖြစ်သည်။

ယခင်က ကြုံခဲ့ရသည့် သဲကန္တာရ ကပ်ဘေးနှင့် ထပ်မံရင်ဆိုင်ရပါက သေမှအသက်ဝင်သည့် သွေးဆာသော မသေမျိုးအရိုးကိုပင် သုံးစရာမလိုဘဲ လက်တစ်ဖက် မြှောက်ရုံဖြင့် အဆုံးသတ်နိုင်မည် ဖြစ်သည်။

အဖွဲ့သားများမှာ စိတ်ပျက်ခဲ့သော်လည်း အားတင်းကာ သစ်ပင်စတင်ခုတ်ကြတော့သည်။ နာရီဝက်အတွင်းမှာပင် လူတိုင်း သစ်သားနှလုံးသား ၁၀၀ စီ ရရှိခဲ့ကြသည်။

ရွှီရန်အတွက်ကတော့ ထူးခြားသော အကျိုးအမြတ်တစ်ခု ပိုရခဲ့သည်။

[ထုတ်ယူမှု အောင်မြင်သည်။ မွန်မြတ်သော ရွှေသွေး +၀.၀၅ စက်]

[ထုတ်ယူမှု အောင်မြင်သည်၊ မွန်မြတ်သော ရွှေသွေး +၀.၀၅ စက်]

...

သစ်ပင်များကို ခုတ်နေစဉ်အတွင်း ရွှီရန်သည် မွန်မြတ်သော ရွှေသွေး ၅ စက်ကိုပါ ရရှိခဲ့သည်။

ကျားမလေးသည် တစ်ခုကို စုပ်ယူပြီးဖြစ်၍ ၉၉ ခု ကျန်ရှိသေးသည်။ ထို့နောက် လူတိုင်း တင်ပျဉ်ခွေထိုင်ကာ သစ်သားနှလုံးသားများကို စတင်စုပ်ယူကြတော့သည်။

ရွှီရန်က အပြာရောင်ဝတ်စုံဝတ် မိန်းကလေးကို ကြည့်ကာ "ကျွန်တော်တို့ကို ခဏလောက် စောင့်ရှောက်ပေးပါဦး။ တစ်ခုခု ထူးခြားတာရှိရင် ချက်ချင်း အသိပေးပါ" ဟု အကူအညီတောင်းလိုက်သည်။

မိန်းကလေးက "ရပါတယ် ပြဿနာမရှိဘူး"

ထို့နောက် ရွှီရန်သည် သူ၏ သစ်သားနှလုံးသား ၁၀၀ ကို စုပ်ယူတော့သည်။ တစ်ခုပြီးတစ်ခု ပျောက်ကွယ်သွားသည်နှင့်အမျှ လူတိုင်း၏ သွေးစွမ်းအင်မှာ တစ်သောင်းစီ တိုးတက်လာခဲ့သည်။ လူတိုင်း၏ ခန္ဓာကိုယ်မှ စိမ်းဖန့်ဖန့် အလင်းတန်းများ ထွက်ပေါ်နေသည်။

ကျားမလေးမှာ အစိတ်လှုပ်ရှားဆုံး ဖြစ်နေပြီး တစ်ခုစုပ်ယူတိုင်း "တစ်သောင်း၊ တစ်သောင်း၊ တစ်သောင်း" ဟု တိုးတိုးလေး ရေရွတ်နေသည်။

အခြားအဖွဲ့သားများမှာလည်း သူမကို ကြည့်ကာ မသိစိတ်ဖြင့် "တစ်သောင်း၊ တစ်သောင်း၊ တစ်သောင်း" ဟု လိုက်ဆိုမိကြသည်။

မကြာမီမှာပင် အားလုံးမှာ သစ်သားနှလုံးသား ၁၀၀ စီကို အကုန်အစင် စုပ်ယူပြီးသွားကြသည်။

ကျားမလေးသည် မျက်လုံးများကို ဖြည်းညင်းစွာ ဖွင့်လိုက်သည်။ သူမ၏ ရွှေရောင်မျက်ဝန်းများထဲတွင် ထူးခြားသော တာအို သင်္ကေတများ လည်ပတ်နေပြီး အလွန်ပင် နက်ရှိုင်းသော အရှိန်အဝါများ ပေါ်ထွက်နေသည်။

ကျူးယွီဟန်သည်လည်း အလားတူပင် သူမ၏ ပတ်ပတ်လည်တွင် အချိန်ကာလ ကျောက်မျက်မှ ရရှိခဲ့သော ဖြူလွလွ အလင်းတန်းများ ဝန်းရံနေသည်။ ထန်ချီချီ၏ ဘေးတွင်မူ သုံးဆင့်ပြောင်းလဲခြင်း ဒိုင်းလွှားမှာ တောင်ကြီးတစ်လုံးကဲ့သို့ လေးလံထူးခြားသော စွမ်းအားများ ထုတ်လွှတ်လျက် ပေါ်ထွက်လာသည်။

နင်ရွှမ်၏ ခန္ဓာကိုယ်တွင်မူ နဂါးနတ်ဘုရား တံဆိပ်များ ထင်ဟပ်နေပြီး သူမ၏ အရှိန်အဝါမှာ တဖြည်းဖြည်း မြင့်တက်လာရာ ကျားမလေးကိုပင် ကျော်လွန်သွားတော့သည်။

ကွမ်းရှင်း ထိုင်နေသော နေရာတွင်မူ မြေကြီးထဲမှ အပင်ပေါက်လေးများစွာ ရုတ်တရက် ပေါက်ထွက်လာပြီး ၎င်းတို့၏ ပြင်းထန်သော သက်စောင့်စွမ်းအားကြောင့် နောက်ကွယ်ရှိ သစ်ပင်ကြီးများပင် တုန်ခါသွားရလေတော့သည်။