အခန်း (၃၈၅)

"အစ်ကိုကြီး... ကျွန်မ ယွဲ့အဆင့်ပညာရှင်အဖြစ် တိုးတက်သွားပြီ"

ကျားမလေးမှာ ရွှီရန်၏ ဘေးသို့ ချက်ချင်းပြေးလာပြီး ဝမ်းသာအားရ ပြောလိုက်သည်။

ကျူးယွီဟန်၊ ထန်ချီချီ၊ ကွမ်းရှင်းနှင့် အခြားသူများလည်း ထပ်တူပင်။

သူတို့အားလုံး ရွှီရန်အနားသို့ စုရုံးရောက်ရှိလာပြီး ယွဲ့အဆင့် ပညာရှင်များ ဖြစ်လာသည့်အတွက် ပျော်ရွှင်နေကြသည်။

ဤဝမ်းသာမှုမှာ အမှန်တကယ်ပင် အတိုင်းအဆမရှိပေ။ အကြောင်းမှာ ဤသည်မှာ ထီပေါက်လိုက်သကဲ့သို့ အလွန်အမင်း အံ့ဩစရာကောင်းသောကြောင့်ပင်။

ပုံမှန်ဆိုလျှင် သူတို့ မည်မျှပင် ကြိုးစားပမ်းစား ကျင့်ကြံပါစေ ယွဲ့အဆင့်သို့ ရောက်ရန် အနည်းဆုံး နှစ်နှစ်ခွဲခန့် အချိန်ယူရမည် ဖြစ်သည်။

သို့သော် ယခုမူ လျှို့ဝှက်နယ်မြေထဲသို့ တစ်ခေါက်ဝင်ရုံဖြင့် ထိုအဆင့်သို့ ရောက်ရှိသွားခဲ့ခြင်းပင်။

ဤသည်မှာ ခြေလှမ်းကျော်တက်လိုက်ခြင်းပင်။ သူတို့သည် ရွှီရန်ကို ပြုံးရွှင်နေသော မျက်ဝန်းများဖြင့် ကြည့်လိုက်ကြသည်။

ရွှီရန်က ခေါင်းကို အသာအယာ ညိမ့်လိုက်ပြီး လူတိုင်းကို အကဲခတ်လိုက်သည်။ လျှို့ဝှက်နယ်မြေထဲသို့ မဝင်ခင်က အင်အားနှင့် ယှဉ်လိုက်လျှင် သူတို့၏ အရှိန်အဝါမှာ ကောင်းကင်နှင့် မြေကြီးကဲ့သို့ သိသိသာသာ ပြောင်းလဲသွားခဲ့ပြီဖြစ်သည်။

ပိုးတုံးလုံးဘဝမှ လှပသော လိပ်ပြာလေးအဖြစ် အသွင်ပြောင်းသွားသကဲ့သို့ပင်။ ယခင်က သူတို့သည် ပါရမီရှင်များသာ ဖြစ်ခဲ့သော်လည်း ယခုအခါတွင်မူ သူတို့၏ ပါရမီများကို စတင်ဖော်ထုတ်နိုင်ပြီ ဖြစ်သည်။

ဤသည်မှာ အလွန်ကောင်းသည်။

ရွှီရန်က အံ့ဩချီးကျူးသည့်လေသံဖြင့် "ဟင်း... မဆိုးဘူးပဲ သွေးစွမ်းအင် ၁.၃ သန်းဆိုတာ တကယ့်ကို ကြောက်စရာကောင်းတဲ့ ပညာရှင်တွေပဲ။ အခုဆိုရင် မင်းတို့ တိုက်ပွဲအတော်များများမှာ ပါဝင်တိုက်ခိုက်နိုင်ပြီ" ဟု ပြောလိုက်သည်။

ကျားမလေးက လက်သီးကို လွှဲလိုက်ပြီး "ဟားဟားဟား အခုဆိုရင် ကျွန်မ အစ်ကိုကြီးနဲ့အတူ လေ့ကျင့်လို့ ရပြီပေါ့"

ကျူးယွီဟန်က "ရှောင်လျိုလီ... သိပ်ပြီးတော့ ဘဝင်မမြင့်နဲ့ဦး။ ငါတို့က ရွှီရန်ရဲ့ နောက်မှာ အဝေးကြီး ကျန်နေသေးတာ" ဟု သတိပေးလိုက်သည်။

ထိုစကားကို ကြားသောအခါ ရွှီရန်က ခေါင်းခါရင်း အသာအယာ ပြုံးလိုက်မိသည်။

ငါနဲ့ ယှဉ်မယ် ဟုတ်လား အဲဒါက ဘယ်လိုမှ မမျှော်လင့်သင့်တဲ့ ယှဉ်ပြိုင်မှုပဲ။

သူသည် သစ်သားနှလုံးသားများကို အကုန်အစင် စုပ်ယူပြီးနောက် သူ၏ သွေးစွမ်းအင်မှာ ၅.၄ သန်းအထိ ရောက်ရှိသွားခဲ့ပြီ ဖြစ်သည်။

ကျားမလေး၊ ကျူးယွီဟန်၊ ကွမ်းရှင်း၊ ထန်ချီချီနှင့် နင်ရွှမ်တို့ အားလုံး ပေါင်းလိုက်မှသာ သူ့ကို ကျော်လွန်နိုင်မည် ဖြစ်သည်။ သို့သော်လည်း သူတို့အားလုံး ပေါင်းလိုက်လျှင်တောင် ရွှီရန်နှင့် အုပ်စုလိုက် တိုက်ခိုက်ပါက သူတို့ နိုင်မည်မဟုတ်ပေ။

အကြောင်းမှာ ရွှီရန်မှာ တကယ့်ကို ထူးဆန်းသော မိစ္ဆာကောင်ကြီးသဖွယ် ဖြစ်နေသောကြောင့်ပင်။

"ငါနဲ့တော့ လာမယှဉ်ပါနဲ့ဦး။ ဒါပေမဲ့ အခုဆိုရင် မင်းတို့ ငါ့ကို တိုက်ပွဲမှာ ကူညီပေးနိုင်ပါပြီ။ နင်ရွှမ်ရဲ့ စွမ်းအားမြှင့်တင်မှုတွေ၊ ထန်ချီချီရဲ့ ဒိုင်းလွှားတွေက တကယ့်ကို အပြောင်းအလဲ ဖြစ်စေမှာပါ"

ကျားမလေးက သူမ၏ လက်မောင်းများကို ဆန့်ထုတ်ကာ "ကျွန်မလည်း ပါသေးတယ် ကျွန်မရဲ့ မျှော်စင်လေးက သွေးစွမ်းအင် ၇ သန်းရှိတဲ့သူရဲ့ ခုခံမှုကိုတောင် ချေဖျက်ပစ်နိုင်တာ" ဟု ကြွေးကြော်လိုက်သည်။

ကျူးယွီဟန်ကလည်း အရှုံးမပေးဘဲ "ကျွန်မလည်း သွေးစွမ်းအင် ၇ သန်းရှိတဲ့ မိစ္ဆာတစ်ကောင်ကို လှုပ်မရအောင် တားထားနိုင်တယ်" ဟု ပြောလိုက်သည်။

သူတို့၏ တိုးတက်မှုများကို ပြောပြရင်း အားလုံးမှာ အံ့ဩမဆုံး ဖြစ်နေကြသည်။

"ဒီလောက်မြန်မြန် ယွဲ့အဆင့်ကို ရောက်သွားလိမ့်မယ်လို့ မထင်ထားဘူး"

"လျှို့ဝှက်နယ်မြေတွေက တကယ်ကို အံ့ဩဖို့ကောင်းတာပဲ"

"ငါတို့ ဒီကို ရောက်တာ ဘယ်လောက်ရှိသေးလို့လဲ ယွီဟန်က အိမ်တစ်လုံးစာလောက်ရှိတဲ့ အချိန်ကာလ ကျောက်မျက်ကို စုပ်ယူနိုင်ခဲ့သလို ငါတို့လည်း သစ်ပင်တောအုပ်ကြီးနဲ့ တွေ့ခဲ့တယ်လေ"

"အရင်ယဉ်ကျေးမှုခေတ်က ချန်ခဲ့တဲ့ လျှို့ဝှက်နယ်မြေဆိုတာ လူသားတွေအတွက် တကယ့်လက်ဆောင်ပဲ။ ဘယ်နေရာကြည့်ကြည့် အခွင့်အလမ်းတွေချည်းပဲ"

အားလုံး ပျော်ရွှင်နေကြစဉ်မှာပင် ရွှီရန်က သတိပေးလိုက်သည်။

"မင်းတို့ရဲ့ သွေးစွမ်းအင်က သန်းချီရောက်သွားပြီ ဆိုပေမဲ့ တကယ့် ယွဲ့အဆင့် ပညာရှင်တွေတော့ မဖြစ်သေးဘူး"

"မင်းတို့ရဲ့ ခန္ဓာကိုယ်ကျင့်ကြံမှုက တစ်သန်း မပြည့်သေးဘူးလေ။ ဒါကြောင့် မင်းတို့က ယွဲ့အဆင့်ရဲ့ လမ်းတစ်ဝက်မှာပဲ ရှိနေသေးတာ"

စိတ်လှုပ်ရှားနေသော အဖွဲ့သားများမှာ ထိုအချက်ကို မေ့နေကြခြင်းပင်။

ကျားမလေးက စိတ်အားထက်သန်စွာဖြင့် "ဒါဆိုရင် လျှို့ဝှက်နယ်မြေထဲမှာ ဆက်ပြီး ရှာဖွေကြတာပေါ့။ ငါတို့ရဲ့ ခန္ဓာကိုယ်စွမ်းအားကို တစ်သန်းအထိ မြှင့်တင်ပေးနိုင်မယ့် အရာတစ်ခုခုများ တွေ့မလားလို့" ဟု ပြောလိုက်သည်။

ကျူးယွီဟန်ကလည်း ထောက်ခံသည်။

"ခန္ဓာကိုယ်စွမ်းအားကို မြှင့်တင်ပေးနိုင်တဲ့ ကျင့်စဉ်တွေက အပြင်မှာ ရှားပြီး တစ်သန်းအထိ ရောက်ဖို့ ခက်ခဲပေမဲ့ အရင်ယဉ်ကျေးမှုခေတ်က လျှို့ဝှက်နယ်မြေမှာတော့ အဲဒီလို ကျင့်စဉ်မျိုး ရှိကောင်းရှိနိုင်မှာပါ"

"မှန်တယ်"

"အချိန်မဆိုင်းဘဲ အခုပဲ သွားကြရအောင်"

ထိုသို့ပြောရင်း သူတို့ ထွက်ခွာရန် ပြင်လိုက်ကြသည်။ သို့သော် ရွှီရန်က သူတို့ကို တားလိုက်ပြီး "ငါ ယွီဟန်ရဲ့ ခန္ဓာကိုယ်စွမ်းအား တိုးလာအောင် ဘယ်လို ကူညီပေးခဲ့လဲဆိုတာ မင်းတို့ မေ့နေကြပြီလား" ဟု မေးလိုက်တော့သည်။

ထိုစကားကြောင့် ကျူးယွီဟန်၏ စိတ်ထဲတွင် ကပ်ဘေးမီးလျှံကို စုပ်ယူခဲ့စဉ်က ခံစားခဲ့ရသည့် နာကျင်မှုများမှာ တရိပ်ရိပ် ပြန်လည်ပေါ်ပေါက်လာသည်။ ၎င်းမှာ သူမ၏ ဘဝတွင် မည်သည့်အခါမျှ မေ့ပျောက်နိုင်တော့မည်မဟုတ်သော နက်ရှိုင်းသည့် အမှတ်တရတစ်ခုပင်။

သို့သော် ရွှီရန် ပြောသည်မှာ မှန်ကန်ကြောင်း သူမ လက်ခံရမည် ဖြစ်သည်။

ကပ်ဘေးမီးလျှံကြောင့် ရရှိလာသော ခန္ဓာကိုယ်ကြံ့ခိုင်မှုမှာ ငြင်းပယ်၍မရအောင်ပင် အစွမ်းထက်လှသည်။

လက်ရှိအခြေအနေတွင် သူတို့၏ ခန္ဓာကိုယ်စွမ်းအားကို တစ်သန်းအထိ မြှင့်တင်ရန်အတွက် ကပ်ဘေးမီးလျှံကို အသုံးပြုခြင်းမှာ အကောင်းဆုံးနည်းလမ်းပင်။

အဖွဲ့သားများမှာလည်း ယခင်က ကျူးယွီဟန် ခံစားခဲ့ရသော နာကျင်မှုများကို ပြန်လည်သတိရသွားကြသည်။

"ယွီဟန်ကတော့ အရင်တစ်ခေါက်က အချိန်ကာလ အရိုးအဆစ်ရဲ့ ပင်ကိုယ်စွမ်းရည်ကြောင့် ကပ်ဘေးမီးလျှံဒဏ်ကို ခံနိုင်ခဲ့တာလေ။ ငါတို့ကော တကယ် ခံနိုင်ပါ့မလား"

နင်ရွှမ်က စိုးရိမ်တကြား မေးလိုက်သည်။

ထန်ချီချီနှင့် ကွမ်းရှင်းတို့လည်း ထပ်တူပင် စိုးရိမ်နေကြသည်။

သို့သော် ကျားမလေးကတော့ စိတ်လှုပ်ရှားစွာဖြင့် "လာစမ်းပါ... ကျွန်မလည်း ဒီကပ်ဘေးမီးလျှံဆိုတာကို စမ်းကြည့်ချင်နေတာ ကြာပြီ" ဟု ပြောလိုက်သည်။

ရွှီရန်က အသာအယာ ပြုံးလိုက်ပြီး "စိတ်မပူကြပါနဲ့။ အခု မင်းတို့မှာ သွေးစွမ်းအင် သန်းချီရှိနေပြီဆိုတော့ ကပ်ဘေးမီးလျှံရဲ့ လောင်မြိုက်မှုကို ခံနိုင်ရည် ရှိနေပါပြီ" ဟု အားပေးလိုက်သည်။

ထန်ချီချီက အသက်ကို ဝဝရှူလိုက်ပြီး "ဒါဆိုရင်လည်း လုပ်လိုက်ကြတာပေါ့။ ခေါင်းဆောင်က ငါတို့ကို လိမ်မှာမဟုတ်ပါဘူး" ဟု ပြောလိုက်သည်။

နင်ရွှမ်ကလည်း "ခေါင်းဆောင်က ဆုံးဖြတ်ပြီးပြီဆိုမှတော့ အဆုံးထိ တိုက်ပွဲဝင်ရမှာပေါ့" ဟု ခေါင်းညိမ့်ထောက်ခံသည်။

ကွမ်းရှင်းကလည်း "ခေါင်းဆောင်က အဆင်ပြေတယ်လို့ ပြောရင် အဆင်ပြေတာပဲ" ဟု ယုံကြည်ချက်အပြည့်ဖြင့် ပြောလိုက်သည်။

ကျူးယွီဟန်ကလည်း ဘာမှ ကန့်ကွက်စရာ မရှိပေ။ လူတိုင်း သဘောတူညီမှု ရရှိသည်နှင့် ရွှီရန်သည် သူ၏ နှလုံးသားအတွင်းမှ ကပ်ဘေးမီးလျှံများကို ထုတ်ယူလိုက်သည်။

ကပ်ဘေးမီးလျှံများ ပေါ်ထွက်လာသည်နှင့် ပတ်ဝန်းကျင် တစ်ခုလုံးမှာ မီးတောက်များအတွင်း ရောက်ရှိသွားသကဲ့သို့ ခံစားရပြီး ဟင်းလင်းပြင်မှာပင် တွန့်လိမ်သွားတော့သည်။ အနည်းငယ်မျှ ထိတွေ့မိရုံနှင့်ပင် ထာဝရ ပျက်စီးသွားနိုင်လောက်အောင် ပြင်းထန်သော စွမ်းအားများ ဖြစ်သည်။

ထန်ချီချီ၊ ကွမ်းရှင်းနှင့် နင်ရွှမ်တို့မှာ ထိုကြောက်မက်ဖွယ် အရှိန်အဝါကို ခံစားမိသည်နှင့် တံတွေးကို အနိုင်နိုင် မျိုချလိုက်ရပြီး သူတို့၏ မျက်နှာပေါ်တွင် ကြောက်ရွံ့ရိပ်အချို့ ဖြတ်ပြေးသွားသည်။ သို့သော် ထိုခံစားချက်မှာ ခဏမျှသာဖြစ်ပြီး ခိုင်မာသော ဆုံးဖြတ်ချက်များဖြင့် အစားထိုးလိုက်ကြသည်။

လူအများရှေ့တွင် တောက်ပနိုင်ရန်အတွက် ကွယ်ရာတွင် နာကျင်မှုများကို အံတုရန်မှာ မလွဲမသွေ လိုအပ်သည်။

ကျားမလေးနှင့် ကျူးယွီဟန်မှာမူ ယခင်က ကပ်ဘေးမီးလျှံဖြင့် ခန္ဓာကိုယ်ကို ပကတိအတိုင်း ကျင့်ကြံခဲ့ဖူးသဖြင့် တည်ငြိမ်လျက် ရှိနေကြသည်။

"အစ်ကိုကြီး... စလိုက်ရအောင်"

ရွှီရန်က ခေါင်းညိမ့်ပြလိုက်ပြီးနောက် ကပ်ဘေးမီးလျှံ အလင်းတန်းများစွာမှာ သူတို့၏ ခန္ဓာကိုယ်များဆီသို့ ပစ်လွှတ်လိုက်ကာ သန့်စင်မှုကို စတင်တော့သည်။

ကျားမလေး အပါအဝင် လူတိုင်း၏ မျက်နှာများမှာ နာကျင်မှုကြောင့် တွန့်လိမ်သွားကြသည်။ ကပ်ဘေးမီးလျှံများက သူတို့၏ ခန္ဓာကိုယ်ပေါ်တွင် လောင်မြိုက်နေပြီး ခဏချင်းမှာပင် သူတို့ ငါးဦးစလုံး၏ ခန္ဓာကိုယ်၌ ကောင်းမွန်သော နေရာတစ်ခုမျှ မကျန်တော့ချေ။ ခြေလက်များ ကြေမွကာ ခန္ဓာကိုယ်နှင့် ဝိညာဉ်များပင် ပျက်စီးတော့မတတ် ခံစားနေရသည်။

အကယ်၍ သူတို့သည် သစ်သားနှလုံးသားများကို မစုပ်ယူမီကသာ ဤကပ်ဘေးမီးလျှံဖြင့် ခန္ဓာကိုယ်ကို ကျင့်ကြံခဲ့လျှင် သေဆုံးရန်သာ လမ်းရှိပေလိမ့်မည်။

သို့သော် ယခုအခါတွင်မူ သူတို့၌ သွေးစွမ်းအင် တစ်သန်းစီ ရှိနေပြီဖြစ်ရာ ခန္ဓာကိုယ်များ လောင်ကျွမ်းပျက်စီးနေသော်လည်း ပြင်းထန်သော ပြန်လည်ရှင်သန်နိုင်စွမ်းကြောင့်သာ အသက်ဓာတ်ကို ဆက်လက် ထိန်းထားနိုင်ကြခြင်းပင်။