အခန်း (၃၈၇)

"ကျွန်မတို့ ခေါင်းဆောင်ရဲ့ သူရဲကောင်းဆန်တဲ့ တိုက်ခိုက်ပုံတွေကို ကိုယ်တိုင်ကိုယ်ကျ မမြင်ဖူးသေးဘူး။ အခုတော့ မြင်ရတော့မှာပေါ့"

"ခေါင်းဆောင်... စိတ်မပူပါနဲ့ ကျွန်မတို့ ခေါင်းဆောင်ရဲ့ ခြေထောက်ကို လုံးဝ ဆွဲထားမှာ မဟုတ်ပါဘူး"

ထိုအချိန်တွင် အပြာရောင်ဝတ်စုံဝတ် မိန်းကလေးက ကြားဖြတ်ပြောလိုက်သည်။

"ခုနက ကျွန်မ အခွင့်အလမ်းတွေကို စူးစမ်းကြည့်နေရင်း ဒီလျှို့ဝှက်နယ်မြေထဲမှာ တခြားသော မိစ္ဆာမျိုးနွယ်တွေ ရှိနေတာကို တွေ့ခဲ့တယ်"

"ဒီမိစ္ဆာတွေရဲ့ အင်အားက သွေးစွမ်းအင် တစ်သန်းအောက်မှာပဲ ရှိကြပြီး နယ်မြေအနှံ့အပြားမှာ ပြန့်နှံ့နေကြတာ"

ရွှီရန်က ခေါင်းညိမ့်လိုက်ကာ "နယ်မြေထဲမှာ တခြား အခွင့်အလမ်းကြီးကြီးမားမား မရှိတော့ဘူးဆိုရင်တော့ ဒီကျူးကျော်သူ မိစ္ဆာအုပ်စုတွေကို အရှင်းသုတ်သင်ပစ်ကြတာပေါ့" ဟု ပြောလိုက်သည်။

ဤနေရာတွင် တစ်သန်းအထက် ကျင့်ကြံသူတစ်ဦးမျှ မရှိချေ။ ရွှီရန်ကို ထားလိုက်ပါက ကျားမလေး တစ်ယောက်တည်းနှင့်ပင် ထိုမိစ္ဆာအားလုံးကို အမြစ်ပြတ်အောင် သတ်ပစ်နိုင်သည်။

ကျားမလေးမှာ စိတ်လှုပ်ရှားသွားပြီး "ကောင်းတယ် ကောင်းတယ် ကျွန်မက တိုက်ရခိုက်ရတာကို အကြိုက်ဆုံးပဲ" ဟု အော်ဟစ်လိုက်သည်။

ရွှီရန်က သတိပေးလိုက်သည် "မှတ်ထားဦး သွေးစွမ်းအင် နှစ်သိန်းအောက်မှာ ရှိတဲ့ မိစ္ဆာတွေကိုတော့ ချန်ထားခဲ့ရမယ်"

"အစ်ကိုကြီး... ဘာလို့လဲ သွေးစွမ်းအင် နှစ်သိန်းဆိုတာ ကျွန်မ လက်သီးတစ်ချက်တည်းနဲ့ သေမှာကို ဘာလို့ ချန်ထားရမှာလဲ"

ရွှီရန်က ရှင်းပြသည်။

"ဒီလျှို့ဝှက်နယ်မြေက နောင်လာမယ့် ကျင့်ကြံသူတွေအတွက် လေ့ကျင့်ကွင်း ဖြစ်လာမှာလေ။ အကယ်၍ သူတို့အတွက် စိန်ခေါ်မှုဖြစ်စေမယ့် နှစ်သိန်းအောက် မိစ္ဆာအချို့ကို ချန်မထားခဲ့ရင် ဒါကို လေ့ကျင့်ကွင်းလို့ ခေါ်လို့ရပါဦးမလား" ဟု ပြောလိုက်သည်။

ကျားမလေးသည် နတ်ဘုရားတစ်ပိုင်း မူကြိုကျောင်းတွင် သူမ၏ ဩဇာအောက်၌ ရှိနေကြသော ပါရမီရှင်များကို သတိရသွားသည်။

ဤသည်မှာ လျှို့ဝှက်နယ်မြေတစ်ခု ဖြစ်သော်လည်း အတွင်းရှိ အရင်းအမြစ်များမှာ အကန့်အသတ်ရှိပြီး ကျင့်ကြံသူတိုင်း ဝင်ခွင့်ရမည် မဟုတ်ချေ။ ပထမဆုံး ရွေးချယ်ခံရမည့်သူများမှာ နတ်ဘုရားတစ်ပိုင်း မူကြိုမှ ပါရမီရှင်များသာ ဖြစ်ပေလိမ့်မည်။

သူတို့၏ လက်ရှိအင်အားမှာ သွေးစွမ်းအင် တစ်သိန်းကိုပင် မကျော်ကြသေးချေ။ ကျားမလေးတို့ အဖွဲ့ဝင်မလာခင်က သူတို့သည် ရွှီရန်ထံမှ အရင်းအမြစ်များစွာ ရရှိထားပြီး အတော်ဆုံးအုပ်စု ဖြစ်သော်လည်း သွေးစွမ်းအင် နှစ်သိန်းဝန်းကျင်သာ ရှိကြသည်။

အဖွဲ့ငယ်လေးတစ်ခုအနေဖြင့် စုပေါင်းပြီး နှစ်သိန်းအဆင့် မိစ္ဆာများကို ရင်ဆိုင်လျှင် မနိုင်

သည့်တိုင် အနည်းဆုံးတော့ ကိုယ့်ကိုကိုယ် ကာကွယ်နိုင်ပေလိမ့်မည်။

"ဒါဆိုရင် ငါတို့ လူခွဲပြီး အကောင်အထည်ဖော်ကြတာပေါ့"

ရွှီရန်က ပြောလိုက်သည်။

အားလုံးက ခေါင်းညိမ့်သဘောတူကြသည်။ ထို့နောက် အပြာရောင်ဝတ် မိန်းကလေးက မိစ္ဆာများ အခြေချနေထိုင်ရာ နေရာများကို လူတိုင်းအား အသိပေးလိုက်သည်။

"ရှင်တို့ရဲ့ အင်အားနဲ့ဆိုရင် သွေးစွမ်းအင် နှစ်သိန်းအထက် ရှိတဲ့ မိစ္ဆာအားလုံးကို ရှင်းလင်းဖို့ ဆယ်ရက်လောက်ပဲ ကြာပါလိမ့်မယ်"

"ကောင်းပြီ"

ရွှီရန်က ထပ်မံသတိပေးသည်။

"မိစ္ဆာတွေကို ရှင်းလင်းနေရင်းနဲ့ တခြား အခွင့်အလမ်းလေးတွေ ရှိမရှိကိုလည်း သတိထားကြည့်ကြဦး။ တစ်ခုခုတွေ့ရင် ရတနာပုလဲကတစ်ဆင့် အချင်းချင်း အကြောင်းကြားကြတာပေါ့"

"ဟုတ်ကဲ့"

ချက်ချင်းပင် သူတို့ ခြောက်ဦးမှာ လူခွဲလိုက်ကြပြီး လျှို့ဝှက်နယ်မြေအတွင်းရှိ မိစ္ဆာများကို စတင်ရှင်းလင်းကြတော့သည်။

မီးပြတိုက်အဖွဲ့အစည်းနှင့် ဘုရားကျောင်းအဖွဲ့အစည်းနှစ်ခုမှာ ကမ္ဘာမြေပေါ်တွင် ဟွာရှမှလွဲ၍ အကြီးမားဆုံးသော အဖွဲ့အစည်းများ ဖြစ်ကြသည်။ ကမ္ဘာပေါ်ရှိ ဟွာရှ နယ်မြေမှအပ ကျန်ရှိသော ဒေသအားလုံးကို ဤသာသနာပြုအဖွဲ့နှစ်ခုက အုပ်ချုပ်ထားသည်။

မီးပြတိုက် အဖွဲ့အစည်းတွင် အကြီးဆုံးသော ရင်ပြင်ထက်တွင် ထူးဆန်းသော အနက်ရောင် အရှိန်အဝါများ ထွက်ပေါ်နေသည့် ရုပ်ထုကြီးများ စိုက်ထူထားပြီး ၎င်းတို့မှာ ကြည့်ရသည်မှာ ကောင်းသောနိမိတ် လုံးဝမရှိချေ။ အထူးသဖြင့် ဂြိုဟ်ပြင်ပ မိစ္ဆာများ ကျူးကျော်လာပြီးနောက်တွင် ၎င်းတို့၏ ပတ်ဝန်းကျင်ရှိ အရှိန်အဝါများမှာ ညစ်ညမ်းမှုများနှင့် ဆင်တူလာခဲ့သည်။

ဂြိုဟ်ပြင်ပ မိစ္ဆာများ မကျူးကျော်မီက ဤရုပ်ထုကြီးများမှာ ရင်ပြင်ပေါ်တွင် ရှိမနေခဲ့ချေ။ သို့သော် ကျူးကျော်မှု စတင်သည်နှင့် ဤရုပ်ထုများသည် ကောင်းကင်မှ ကျဆင်းလာခဲ့ပြီး ဘုရားသခင်က သူတို့ကို ကယ်တင်ရန် စေလွှတ်လိုက်သကဲ့သို့ပင်။

အစပိုင်းတွင် အလွန်ဆိုးဝါးသော အခြေအနေနှင့် ရင်ဆိုင်နေရသော မီးပြတိုက် အဖွဲ့အစည်းသည် ပတ်ဝန်းကျင်ရှိ ညစ်ညမ်းမှုအားလုံးမှာ ထိုရုပ်ထုကြီးများဆီသို့ စုစည်းသွားသည်ကို တွေ့လိုက်ရသဖြင့် ရှင်သန်ရန် မျှော်လင့်ချက် ရောင်ခြည်အချို့ ပြန်လည် မြင်တွေ့ခဲ့ရသည်။

တစ်ချိန်တည်းမှာပင် သူတို့သည် ဤရုပ်ထုကြီးများကို ဘုရားသခင်က စေလွှတ်လိုက်သော တမန်တော်များအဖြစ် မှတ်ယူကြပြီး နေ့စဉ်နေ့တိုင်း လူအုပ်ကြီးမှာ ဤနေရာသို့ စုရုံးရောက်ရှိလာကာ ဒူးထောက်ဝတ်ပြုခြင်း၊ ပူဇော်ပသခြင်းနှင့် ယုံကြည်ကိုးကွယ်မှုဆိုင်ရာ ဓမ္မသီချင်းများကို သီဆိုချီးမွမ်းခြင်းများ ပြုလုပ်ကြသည်။

"အို... ဘုရားသခင် ဒုက္ခရောက်နေတဲ့ ကိုယ်တော့်ရဲ့ သားသမီးတွေကို ကယ်တင်တော်မူပါ"

"အို... ဘုရားသခင် ဒုက္ခရောက်နေတဲ့ ကိုယ်တော့်ရဲ့ သားသမီးတွေကို ကယ်တင်တော်မူပါ"

"အို... ဘုရားသခင် ဒုက္ခရောက်နေတဲ့ ကိုယ်တော့်ရဲ့ သားသမီးတွေကို ကယ်တင်တော်မူပါ"

ရင်ပြင်တစ်ခုလုံးတွင် ဂါထာမန္တန်များ ရွတ်ဆိုသံများ ပဲ့တင်ထပ်နေသည်။ လူပေါင်းသောင်းနှင့်ချီသော သူတို့၏ ယုံကြည်ကိုးကွယ်မှု စွမ်းအင်များသည် အပြင်ဘက်တွင် ရွှေရောင်တောက်ပသော်လည်း အတွင်း၌မူ မှောင်မည်းနေသော အလင်းမျှင်တန်းများအဖြစ် စုစည်းသွားကြပြီး မြွေဆံပင်နှင့် ရုပ်ထုကြီးဆီသို့ လွင့်မျောသွားကြတော့သည်။

...