အထက်အင်မော်တယ်လောကပင် မတတ်နိုင်တော့ပါ

အင်မော်တယ်ဘုရင်များသည် အင်မော်တယ်နိုင်ငံတော်များကို ပိုင်ဆိုင်ထားကြသော်လည်း အာကာသဟင်းလင်းပြင်ကိုဖြတ်ကျော်ကာ အခြားသူများကို ခေါ်ဆောင်သွားနိုင်သည့်အဆင့်သို့ ရောက်ရှိရန် အနည်းဆုံး တက်လှမ်းခြင်းအဆင့်ရှိရမည်ဖြစ်သည်။

ထို့ပြင် အထက်အင်မော်တယ်လောကမှ အင်မော်တယ်ဧကရာဇ်များစုပေါင်း၍ တက်လှမ်းခြင်းနိယာမများကို သတ်မှတ်ခဲ့စဉ်ကတည်းက ဤအချက်ကို ထည့်သွင်းစဉ်းစားခဲ့ကြပြီးဖြစ်သည်။ အကယ်၍ တစ်စုံတစ်ယောက်သည် မိသားစုအကုန်လုံးကို အင်မော်တယ်နိုင်ငံတော်အတွင်း ထည့်သွင်းခေါ်ဆောင်ရန်ကြိုးစားပါက ထိုအင်မော်တယ်ဘုရင်ကိုယ်တိုင်သည်ပင် တက်လှမ်းခြင်းစည်းမျဉ်းများ၏ ငြင်းပယ်ခြင်းကိုခံရပေမည်။

တစ်ကိုယ်တည်းသမားများဖြစ်ကြသည့် ဝူကျွယ်၊ ကျိယွမ်နှင့် ရှာလီတို့မှအပ ကျန်သူများမှာ အလယ်အင်မော်တယ်လောကတွင် ကြီးမားသော မိသားစုများနှင့် လုပ်ငန်းများရှိနေကြပြီး ကြည့်ရှုစောင့်ရှောက်ရမည့် မျိုးဆက်သစ်များစွာရှိ၏။ ထို့ကြောင့် လူအယောက်အနည်းငယ်မျှသာ တောင်းဆိုခြင်းမှာ အလွန်ပင် ထိန်းသိမ်းစောင့်စည်းရာရောက်နေလေပြီ။ ယခုတစ်ကြိမ်တွင် အစ်ကိုကြီးချန်က အလယ်အင်မော်တယ်လောကရှိ အင်မော်တယ်ကံကြမ္မာတိုကင် ၉၀ ရာခိုင်နှုန်းကျော်ကို စုဆောင်းထားပြီးဖြစ်ရာ ၎င်းတို့ကိုယ်တိုင် ရှာဖွေလိုလျှင်ပင် မရနိုင်တော့။ ၎င်းတို့အနေဖြင့် သူ့အကူအညီကို တောင်းခံရုံမှတစ်ပါး အခြားရွေးချယ်စရာမရှိ။

"မင်းတို့က ဒီလောက်လူနည်းနည်းလေးပဲ ခေါ်သွားမှာလား"

အစ်ကိုကြီးချန်က စိတ်ထဲတွင် ငါ့ရဲ့ ရွှမ်ကျီရုပ်ပုံက အခုဆို လူသန်းပေါင်းတစ်ရာကျော်တောင် ဆံ့နေပြီဟု တွေးလိုက်သည်။ ထိုလူအနည်းငယ်၏ မျက်လုံးများမှာ ဝင်းလက်သွား၏။ အမှန်ပင်၊ သူ၏လက်ထဲတွင် အင်မော်တယ်ကံကြမ္မာတိုကင်များစွာ ရှိနေသည်မဟုတ်ပါလော။

"ဒါဆို... ဘယ်လောက်အထိခေါ်သွားရင် သင့်တော်မယ်လို့ ဘိုးဘေးကြီးထင်ပါသလဲ"

"ထားလိုက်ပါတော့... မင်းတို့ ခေါ်ချင်သလောက်ခေါ်ခဲ့ကြ"

ကျိယွမ်က အသက်ကို ပြင်းပြင်းရှူလိုက်ပြီး စမ်းသပ်သည့်အနေဖြင့် မေးလိုက်သည်။

"လူတစ်သောင်းလောက်ဆိုရင်ရော အဆင်ပြေပါ့မလား"

အင်မော်တယ်ဘုရင် ဝူကျွယ်က ချက်ချင်းပင် ဆဲရေးလိုက်တော့သည်။

"မင်းကတော့ တကယ်ကို လောဘကြီးတာပဲ... မရှက်ဘူးလား"

"အဟမ်း... ကျွန်တော်က ဒီအတိုင်းပြောကြည့်တာပါ..."

အစ်ကိုကြီးချန်က သူ့ကို စောင်းငဲ့ကြည့်လိုက်ပြီး ရည်ရွယ်ချက်ရှိရှိဖြင့် ကြွားလုံးထုတ်လိုက်သည်။

"မင်းတို့က ရည်မှန်းချက်မရှိလိုက်တာ... လူတစ်သောင်းဆိုတာ ဘာမှမဟုတ်ဘူး"

"တကယ်လား"

လူတစ်သောင်းကို တကယ်ပဲခေါ်သွားနိုင်တာလား...

၎င်းတို့သည် ရွှမ်ကျီရုပ်ပုံ တည်ရှိမှုကို မသိကြသော်လည်း အတိုင်းထက်အလွန် ဝမ်းသာသွားကြသည်။ ယခုတစ်ကြိမ် တက်သွားပြီးလျှင် ပြန်လာကြတော့မည်မဟုတ်သဖြင့် မျိုးဆက်သစ်များကို တတ်နိုင်သမျှ ပိုမိုကူညီလိုကြခြင်းမှာ သဘာဝပင်။

"ကဲ... အားလုံး ပြန်ပြီးပြင်ဆင်ကြတော့"

၎င်းတို့ကို လွှတ်လိုက်ပြီးနောက် သူသည် ဖေးရှန်ဂိုဏ်းသို့ ပြန်လာခဲ့သည်။ ယခုတစ်ကြိမ်ရရှိခဲ့သော ကံတရားအမှတ်အားလုံးကို အင်မော်တယ်ဆေးလုံးများအဖြစ် လဲလှယ်လိုက်ပြီးနောက် သူသည် စတုတ္ထအဆင့် အင်မော်တယ်ဘုရင်မှ ဆဋ္ဌမအဆင့်သို့ တက်လှမ်းနိုင်ခဲ့သည်။

"ဒါကတော့ တကယ်ကိုခက်တာပဲ... အင်မော်တယ်ဘုရင် တစ်ယောက်အနေနဲ့ အဆင့်တက်ရတာ ဒီလောက်တောင် ခက်ခဲတာလား"

စတုတ္ထအဆင့်မှ ပဉ္စမအဆင့်သို့ တက်လှမ်းရန်မှာ တတိယအဆင့်မှ စတုတ္ထအဆင့်သို့ တက်လှမ်းစဉ်ကထက် ဆေးလုံးအရေအတွက် သုံးဆပိုလိုအပ်သည်။ တစ်ခါကြွားလိုက်ရုံဖြင့် အဆင့်အများကြီးတက်လေ့ရှိသော အစ်ကိုကြီးချန်အတွက်မူ ဤအဆင့်တက်နှုန်းမှာ အလွန်နှေးကွေးနေသလို ခံစားနေရ၏။

"အထက်အင်မော်တယ်လောကကို မြန်မြန်သွားဖို့လိုနေပြီထင်တယ်"

"အလယ်အင်မော်တယ်လောကရဲ့စင်မြင့်က ငါ့အတွက်သေးလွန်းနေပြီ... အမှတ်တွေလည်း အများကြီး ထပ်မရနိုင်တော့ဘူး"

သူ အဆင့်တက်နေစဉ်အတွင်း ပြင်ပလောကတွင် ဝူကျိဂူဗိမာန်ပျက်စီးသွားပြီဟူသောသတင်းများ ပျံ့နှံ့သွား၏။ ထို့ကြောင့် တစ်လောကလုံးမှာ မျှော်လင့်ထားသည့်အတိုင်း ထပ်မံ၍ လှုပ်လှုပ်ရှားရှား ဖြစ်သွားကြပြန်သည်။ ယခင်က အင်မော်တယ်ဘုရင် ၃၅ ပါးကို သတ်ဖြတ်ခဲ့စဉ်ကပင် အလွန်တုန်လှုပ်ဖွယ်ကောင်းခဲ့ပြီးဖြစ်၏။ သို့သော် ထိုအင်မော်တယ်ဘုရင်များမှာ အနည်းဆုံးတော့ ဂိုဏ်းအသီးသီးမှ လာကြသူများဖြစ်သည်။

ယခုမူ ဝူကျိဂူဗိမာန်မှ အင်မော်တယ်ဘုရင် ၁၅ ပါးလုံး သုတ်သင်ခံလိုက်ရခြင်းမှာ အလယ်အင်မော်တယ်လောက၏ ထိပ်တန်း ရှေးဦးအင်မော်တယ်ဂိုဏ်းတစ်ခု သမိုင်းထဲတွင် ပျောက်ကွယ်သွားခြင်းကို ဆိုလိုသည်။ ၎င်းမှာ ကမ္ဘာပျက်သကဲ့သို့ ဖြစ်ရပ်ဆိုးကြီးပင်။ အထက်အင်မော်တယ်လောကရှိ ဝူကျိဂူဗိမာန်က ဤကိစ္စကို ထိုင်ကြည့်နေမည်မဟုတ်ကြောင်း ကြိုတင်မြင်နိုင်ပေသည်။

ထိုအင်မော်တယ်ဘုရင် ၁၅ ပါးမှာ ကျန်းချန်ကိုယ်တိုင် သတ်ဖြတ်ခဲ့ခြင်းမဟုတ်သော်လည်း ပြင်ပလူများအတွက်ရရှိသည့် တုန်လှုပ်မှုမှာ သေးငယ်လှသည်မဟုတ်။ တစ်ချိန်က နာမည်ကျော်ခဲ့သော အင်မော်တယ်ဘုရင် ချန်ကျိုး ပြန်လည်ပေါ်ထွက်လာရုံသာမက ကျန်းချန်၏အမိန့်ကို နာခံနေရခြင်းမှာ ဝူကျိဂူဗိမာန် ပျက်စီးခြင်းထက်ပင် ပိုမို၍ယုံကြည်ရခက်လှသည်။ ထို့ပြင် အင်မော်တယ်ဘုရင် ဝူလော့နှင့် မိစ္ဆာဘုရင် ရန်အန်း အပါအဝင် အင်မော်တယ်ဘုရင် တစ်ရာကျော်ထံမှ ဓားပြတိုက်ခံရသည့် သတင်းများအရ...

ဤသတင်းများအားလုံးသည် လူတိုင်းအတွက် တစ်စုံတစ်ခုကို ထပ်မံအတည်ပြုပေးလိုက်ပြန်သည်... အလယ်အင်မော်တယ်လောကတွင် မည်သူမျှ ဖေးရှန်ဂိုဏ်းမှ ဘိုးဘေးကြီးကျန်းကို မဆန့်ကျင်ရဲတော့။ အချို့သော ထိပ်တန်းရှေးဦးအင်မော်တယ်ဂိုဏ်းများနှင့် မိစ္ဆာလမ်းစဉ် ဂိုဏ်းများသည် မူလက ဝူကျိဂူဗိမာန်ကဲ့သို့ပင် ရည်ရွယ်ချက်များရှိခဲ့ကြသော်လည်း ယခုအခါ ၎င်းတို့၏လှုပ်ရှားမှုများကို ချက်ချင်းရပ်တန့်လိုက်ကြပြီး အချို့မှာ ဂိုဏ်းတံခါးကိုပါ ယာယီပိတ်ထားလိုက်ကြ၏။ ၎င်းတို့မှာ မျက်နှာပြရန်ပင် မဝံ့မရဲဖြစ်နေကြသည်။

ကြယ်ကိုးပွင့် ကောင်းကင်နယ်မြေတွင် မိစ္ဆာဘုရင်များနှင့် မိစ္ဆာအရှင်သခင်များ စုပေါင်းကာ ထိုနေရာတွင် တည်ရှိသော ကြယ်ကိုးပွင့် မိစ္ဆာနန်းတော်သို့ လာရောက်လည်ပတ်ကြသည်။

"ဘိုးဘေး ကျိဟွန်း... ကျေးဇူးပြုပြီး အမြန်ဆုံး ထွက်လာပေးပါဦး"

"မှန်ပါတယ်... အခုအချိန်မှာ ကြယ်ကိုးပွင့် မိစ္ဆာနန်းတော် တစ်ခုတည်းကပဲ ဒီလူကို ထိန်းချုပ်နိုင်တော့မှာပါ"

"အထက်အင်မော်တယ်လောကက မိစ္ဆာဧကရာဇ်တွေကို အကူအညီတောင်းနိုင်ရင် ဒီလူယုတ်မာကို သေချာပေါက် သုတ်သင်နိုင်မှာပါ"

ကြယ်ကိုးပွင့် မိစ္ဆာနန်းတော်တွင် မိစ္ဆာဘုရင်သုံးပါးသာရှိသဖြင့် အလယ်အင်မော်တယ်လောကတွင် သင့်တင့်သောအင်အားဟု ဆိုနိုင်သော်လည်း အင်မော်တယ်ဘုရင် ၁၅ ပါးရှိသော ဝူကျိဂူဗိမာန်ကဲ့သို့သော ဂိုဏ်းနှင့်နှိုင်းယှဉ်ပါက အဆင့်ချင်းလုံးဝမတူချေ။ ထို့ပြင် ဘိုးဘေးကျိဟွန်း၏ အစွမ်းမှာလည်း အင်မော်တယ်ဘုရင် လင်မိုထက် မသာလွန်နိုင်ပေ။

သို့သော် တက်လှမ်းသည့် အလှည့်တိုင်းတွင် ၎င်းတို့သည် ဝူကျိဂူဗိမာန်ကဲ့သို့ပင် အင်မော်တယ်ကံကြမ္မာတိုကင် ၃၀၀ ကို ရရှိထားကြသည်။ အထက်အင်မော်တယ်လောကရှိ ၎င်းတို့၏ ကြယ်ကိုးပွင့် မိစ္ဆာနန်းတော်မှာ အလွန်အစွမ်းထက်ပြီး အထက်လောက မိစ္ဆာလမ်းစဉ်ဂိုဏ်းများတွင် လွှမ်းမိုးမှုအရှိဆုံးဂိုဏ်းတစ်ခုဖြစ်၏။ ဤဘဝတွင် အထက်အင်မော်တယ်လောကသို့ မသွားရန် မစီစဉ်ထားပါက မည်သူက ၎င်းတို့ကို မျက်နှာမပေးဘဲ နေရဲမည်နည်း။

အင်မော်တယ်လောကကို သုံးပိုင်း ပိုင်းခြားလိုက်ပြီးနောက် ကြီးမားသော ရှေးဦးအင်မော်တယ်ဂိုဏ်းများနှင့် မိစ္ဆာဂိုဏ်း အများအပြားမှာ အထက်အင်မော်တယ်လောကကိုသာ အာရုံစိုက်ခဲ့ကြပြီး အလယ်အင်မော်တယ်လောကတွင် အမွေအနှစ်များကို ချန်မထားခဲ့ကြပေ။ ကြယ်ကိုးပွင့် မိစ္ဆာနန်းတော်သည် အလယ်အင်မော်တယ်လောကကို အလေးမထားသော်လည်း အနည်းဆုံးတော့ သူတို့၏အစဉ်အလာကို ချန်ထားခဲ့သည်။

ယခုအခါ ကျန်းချန်မှာ မည်သူမျှတားဆီး၍ မရနိုင်တော့ပေ။ ဝူကျိဂူဗိမာန်က ဆင်းသက်စေခဲ့သော နိယာမစွမ်းအားပင်လျှင် သူ့ကိုမသတ်နိုင်ခဲ့ပါချေ။ ထိုမိစ္ဆာဘုရင်များနှင့် မိစ္ဆာအရှင်သခင်များ၏ အမြင်တွင် ယခုအခါ ကျန်းချန်ကို ဆန့်ကျင်တိုက်ခိုက်နိုင်မည့်သူမှာ ပိုမိုကြောက်မက်ဖွယ်ကောင်းသော အခြေခံအုတ်မြစ်ရှိသည့် ကြယ်ကိုးပွင့် မိစ္ဆာနန်းတော် တစ်ခုတည်းသာရှိတော့သည်။ ဘိုးဘေးကျိဟွန်းအနေဖြင့် အထက်လောကရှိ ဌာနချုပ်နှင့် ဆက်သွယ်လိုက်လျှင် ပိုမိုအားကောင်းသော နည်းလမ်းများကို သေချာပေါက် စေလွှတ်ပေးလိမ့်မည်ဟုယူဆကြ၏။

"ပြန်ကြပါတော့..."

မိစ္ဆာဘုရင် တစ်ရာကျော်၏ စုပေါင်းတောင်းဆိုမှုကို ရင်ဆိုင်ရင်း စိမ်းပုပ်ရောင် ဝိညာဉ်ပလ္လင်ပေါ်တွင် ထိုင်နေသော ဘိုးဘေးကျိဟွန်းက ခေါင်းယမ်းလိုက်သည်။

"ဒီလူက သိပ်ပြီးအသက်ရှည်မှာမဟုတ်ပါဘူး... အထက်အင်မော်တယ်လောကက သူ့အတွက် သင်္ချိုင်းကုန်းဖြစ်လာပါလိမ့်မယ်"

အင်း... ဒါက... သူ မကြာခင်မှာ ဝဋ်လည်ပါလိမ့်မယ်ဆိုတဲ့ အစွမ်းမရှိဘဲ ဒေါသတကြီးကျိန်ဆဲတဲ့ စကားတွေနဲ့ ဘာများထူးခြားနေလို့လဲ။ သူ ဘာမှမလုပ်တော့ဘူးဆိုတဲ့သဘောမဟုတ်လား။

"ဘိုးဘေး ကျိဟွန်း... ခင်ဗျားအနေနဲ့ ဒါကို လျစ်လျူရှုထားလို့မရပါဘူး"

"ကြယ်ကိုးပွင့် မိစ္ဆာနန်းတော်က ကျွန်တော်တို့ရဲ့ နောက်ဆုံးမျှော်လင့်ချက်ပါ... အလယ်အင်မော်တယ်လောက တစ်ခုလုံးက ခင်ဗျားကိုစောင့်ကြည့်နေကြတာပါ..."

"မှန်ပါတယ်... ဒီလူက အလယ်အင်မော်တယ်လောကရဲ့မျှခြေကို လုံးဝဖျက်ဆီးလိုက်ပါပြီ... သူက တကယ်ကို အန္တရာယ်များလွန်းလို့ သူ့ကို ဒီအတိုင်းလွှတ်ထားလို့ မဖြစ်ပါဘူး"

"သူ့ကို အလယ်အင်မော်တယ်လောကမှာတင် သတ်ပစ်ရပါမယ်... ဒါမှ နောင်ရေးအတွက် စိတ်အေးရမှာပါ"

အောက်ရှိ မိစ္ဆာများမှာ ဒေါသတကြီး ပြောဆိုနေကြသော်လည်း ဘိုးဘေးကျိဟွန်းမှာ အလွန်ပင် မကျေမနပ် ဖြစ်နေရသည်။ သူ ဘာမှမလုပ်ခဲ့ခြင်း မဟုတ်ပါချေ။ အမှန်တကယ်တွင် ဝူကျိဂူဗိမာန် ပျက်စီးသွားသည့် သတင်းထွက်လာပြီးနောက် သူသည် အထက်အင်မော်တယ်လောကသို့ ချက်ချင်း ဆက်သွယ်ခဲ့သည်။

သို့သော် အထက်လောကမှ မိစ္ဆာဧကရာဇ်က သူ့ကိုပေးခဲ့သော နောက်ဆုံးအဖြေမှာ...

နိယာမစွမ်းအားများနှင့် ဧကရာဇ်တစ်ပိုင်းများကို ဆင်းသက်စေခြင်းမှာ ကြီးမားသောပေးဆပ်မှုများလိုအပ်ပြီး အောင်မြင်ရန်လည်း မသေချာသဖြင့် မလိုအပ်ကြောင်းဖြစ်သည်။ ကျန်းချန် အထက်သို့ တက်လာသည်အထိ စောင့်ပြီးမှ မိစ္ဆာဧကရာဇ်ကိုယ်တိုင် အရေးယူဆောင်ရွက်ခြင်းက ပို၍ကောင်းမွန်လိမ့်မည်ဟုဆို၏။ ထို့ကြောင့် အထက်လောကတွင်လည်း လက်ရှိတွင် ကျန်းချန်ကို ကိုင်တွယ်ရန်နည်းလမ်းမရှိသေးဘဲ သူ့ကို နောက်ထပ် နှစ်အနည်းငယ် အသက်ရှင်ခွင့်ပေးထားရခြင်းဖြစ်ကြောင်း သူ ကောင်းစွာသိရှိထားသည်။

သို့သော် ဤအချက်ကို သူက တိုက်ရိုက်ပြောပြ၍မဖြစ်ချေ။ သို့မဟုတ်ပါက အထက်လောကသည် အလယ်အင်မော်တယ်လောကကိုပင် မနှိမ်နင်းနိုင်သော အသုံးမကျသူများအဖြစ် ထင်မြင်သွားကြမည် မဟုတ်ပါလော။

"အထက်အင်မော်တယ်လောကက သူ့အတွက် ပိုက်စိပ်တိုက် ပိုက်ကွန်ဖြန့်ထားပြီးပြီ... သူတက်လာတာနဲ့ အဆင်သင့်ပဲ"

"စိတ်ချပါ... သူက နောင်ရေးအတွက် ပြဿနာဖြစ်လာမှာမဟုတ်ပါဘူး... သူ သေချာပေါက်သေရမှာပါ"

မိစ္ဆာများမှာ တစ်ဦးကိုတစ်ဦး ကြည့်လိုက်ကြသည်။ ဤစကားအရဆိုလျှင် အထက်လောကနှင့် ဆက်သွယ်ပြီးပြီဟု ဆိုလိုခြင်းလော။

"ဒါဆို အထက်လောကက မိစ္ဆာဧကရာဇ်တွေက သူ့ကို ဒီအတိုင်းပဲဆက်ပြီး သောင်းကျန်းခွင့်ပေးထားတော့မှာလား"

အကယ်၍ အစ်ကိုကြီးချန်သာ ဤစွပ်စွဲချက်ကို ကြားလျှင် သူသည် အလွန်ပင် အပြစ်ကင်းစင်ကြောင်း ခံစားရမည် ဖြစ်သည်။

ငါဘယ်တုန်းက သောင်းကျန်းခဲ့လို့လဲ...

မင်းတို့ ငါ့ကိုလာမနှောင့်ယှက်သရွေ့ ငါက ပတ်ပြီးသောင်းကျန်းနေဖို့ စိတ်မဝင်စားဘူး... ဟုတ်ပြီလား...

သူကဲ့သို့ ပျင်းရိသောလူတစ်ယောက်အတွက် ငြိမ်ငြိမ်လေးအိပ်နေရခြင်းက ပို၍မကောင်းပေဘူးလား...

"မှန်ပါတယ်... သူက အင်မော်တယ်ကံကြမ္မာတိုကင် ၃ သိန်းကိုလည်း လက်ဝါးကြီးအုပ်ထားတယ်"

"သူ့ကြောင့် ကျွန်တော်တို့ရဲ့ တပည့်တွေနဲ့ မျိုးဆက်တွေ မတက်လှမ်းနိုင်တော့ဘူး..."

"ဒီလူက ကျွန်တော်တို့ရဲ့ ရှင်သန်မှုလမ်းစကို ဖြတ်တောက်လိုက်တာပဲ"

"ဘိုးဘေးကျိဟွန်းက အဲဒီတုန်းက အင်မော်တယ်ကံကြမ္မာတိုကင် ခွဲဝေမှုစည်းမျဉ်းတွေကို သတ်မှတ်ခဲ့တဲ့သူတွေထဲက တစ်ယောက်ပဲ"

"အခု အခြေအနေတွေက ဒီလိုဖြစ်နေတာတောင် ဘာမှမလုပ်တော့ဘူးလား"

"အထက်လောကက မိစ္ဆာဧကရာဇ်တွေကို နောက်တစ်ကြိမ်ဆက်သွယ်ပြီး သူတို့ရဲ့ပြင်းထန်တဲ့ အရေးယူမှုတွေကို အမြန်ဆုံးလုပ်ဆောင်ပေးဖို့ တောင်းဆိုပေးပါဦး"