အခန်း (၇-၈)

အခန်း (၇) - မွေးရာပါအဆင့်

ကျိုးရီသည် စစ်ဆေးမေးမြန်းခန်းအပြင်ဘက်တွင် သံသယများအပြည့်ဖြင့် ဟိုဟိုဒီဒီ လျှောက်သွားနေ၏။

ပြတင်းပေါက်မှတစ်ဆင့် ကြည့်လိုက်ရာ အရပ်ခုနစ်ပေပတ်ချာလည် အမျိုးသားတစ်ဦးအား လက်မောင်းလုံးခန့်ရှိသော သံကြိုးကြီးများဖြင့် တုပ်နှောင်ထားသည်ကို သူ မြင်တွေ့လိုက်ရသည်။ သံချိတ်နှစ်ခုက ထိုလူ၏ပခုံးရိုးများကို ဖောက်ထွင်းထားပြီး ခန္ဓာကိုယ်မှာလည်း ပွန်းပဲ့ကာ သွေးသံရဲရဲ ဖြစ်နေချေပြီ။

၎င်းမှာ အကျဉ်းထောင်မှ လူများ၏ လက်ချက်မဟုတ်ဘဲ တရားရေးဝန်ကြီးဌာနမှ စေလွှတ်လိုက်သော သူများ၏ လုပ်ရပ်သာဖြစ်သည်။ ကောင်းကင်အကျဉ်းထောင်မှ ထောင်စောင့်များသည် ဤမျှ အင်အားကြီးမားခြင်း မရှိကြပေ။

ဤကဲ့သို့သော ကျန်းဟူလောကမှ ကျင့်ကြံသူတစ်ဦးကို စစ်ဆေးမေးမြန်းရန်အတွက် ကျန်းဝူဌာနမှ အရာရှိတစ်ဦး၊ တာ့လီဗိမာန် သို့မဟုတ် တရားရေးဝန်ကြီးဌာန မှ ကျွမ်းကျင်သူတစ်ဦး လိုအပ်ပေသည်။

ဖြန်း။

ရေစိမ်ထားသော ကြာပွတ်တစ်ခုက ထိုအမျိုးသားအပေါ်သို့ ကျရောက်လာရာ အနီရောင် သွေးအစင်းရာကြီးတစ်ခု ကျန်ရစ်နေခဲ့သည်။ ထိုအမျိုးသားသည် နှောင်းပိုင်းဖြစ်တည်မှုအဆင့်သို့ ဝင်ရောက်ထားသူဖြစ်ရမည်။

သို့မဟုတ်ပါက ကြာပွတ်တစ်ချက်ရိုက်လိုက်ရုံဖြင့် သူ၏အသားများ ပွင့်ထွက်သွားမည်ပင်။

“ယန်ရှုံး၊ မင်း ဝန်ခံတော့မလား၊ မင်းခိုးလာတဲ့ ပစ္စည်းတွေကို ဘယ်မှာရောင်းခဲ့တာလဲ”

ယန်ရှုံးက ခေါင်းမော့လိုက်ပြီး ဖရိုဖရဲဖြစ်နေသော ဆံပင်အောက်မှ သွေးများပေကျံနေသည့် သွားများပေါ်သည်အထိ ပြုံးပြလိုက်၏။

“ဟဲ ဟဲ… ဟဲ၊ မင်းတို့က လူတစ်ယောက်ကို အပြစ်ပေးဖို့ ဆုံးဖြတ်ထားရင် အမြဲတမ်း ဆင်ခြေတစ်ခု ရှာတွေ့နိုင်မှာပဲ၊ မင်းတို့ အသုံးမကျတဲ့ကောင်တွေက သင်္ချိုင်းဖောက်သူတော်စင်ကို ကိုယ်တိုင်မဖမ်းနိုင်လို့ ငါ့ကို ‘သင်္ချိုင်းဖောက်သူတော်စင်’ ဆိုတဲ့ နာမည်တပ်ပေးလိုက်တာပဲ၊ ဒါက ငါ တရားရေးဝန်ကြီးရဲ့ သခင်လေးကို တစ်ခါက စော်ကားခဲ့ဖူးလို့မလား၊ ငါ့ရဲ့ ကျင့်ကြံခြင်းအဆင့်က မနက်ရှိုင်းခဲ့တာကိုပဲ ငါ နာကြည်းမိတယ်၊ မဟုတ်ရင် တော်ဝင်နန်းတော်ရဲ့ နောက်လိုက်ခွေးလေးတွေဖြစ်တဲ့ မင်းတို့အားလုံးကို ငါ သေချာပေါက်သတ်ပစ်မှာ”

“မင်း သေချင်နေတာလား”

တရားရေးဝန်ကြီးဌာနမှ ကျင့်ကြံသူက နောက်ထပ် အချက်များစွာ ရိုက်နှက်လိုက်လေသည်။

“ယန်ရှုံး...”

ကျိုးရီ ဤနာမည်ကို တစ်နေရာရာတွင် ကြားဖူးသကဲ့သို့ ခံစားလိုက်ရ၏။

ခဏအကြာတွင်။

သူ မှတ်မိသွားပြီဖြစ်သည်။ တစ်ခါက စားသောက်ဆိုင်တစ်ဆိုင်တွင် စားသောက်နေစဉ် ဘေးဝိုင်းမှလူများက သူ့အကြောင်း ပြောဆိုနေကြသည်ကို ကျိုးရီ ကြားခဲ့ဖူးသည်။

သူသည် မြို့တော်အပြင်ဘက်ရှိ ယန်မိသားစု စံအိမ်၏ သခင်ဖြစ်ပြီး ဖြောင့်မတ်တည်ကြည်ကာ သူပိုင်ဆိုင်သော ဓနဥစ္စာများကို ရက်ရက်ရောရော ပေးကမ်းတတ်သူအဖြစ် လူသိများသည်။

ကျန်းဟူလောကတွင် ဂုဏ်သတင်းကြီးမားပြီး လူအများ၏နှလုံးသားကို သိမ်းပိုက်နိုင်ခဲ့သူလည်းဖြစ်၏။ ယနေ့ သူ့အစား အပြစ်ခံယူရန် အဖမ်းခံရလိမ့်မည်ဟု ကျိုးရီ လုံးဝမျှော်လင့်မထားခဲ့ပေ။

သူ သက်ပြင်းတစ်ချက် ချလိုက်မိသည်။

စစ်ဆေးမေးမြန်းမှုမှာ မွန်းတည့်ချိန်အထိ ကြာမြင့်ခဲ့သည်။ ယန်ရှုံး၏ ခြေလက်များမှာ ကျိုးကြေနေခဲ့ပြီဖြစ်ပြီး ခွေးသေတစ်ကောင်ပမာ တိုက်ပိတ်ခန်းတစ်ခုထဲသို့ ပစ်ထည့်ခံလိုက်ရ၏။

ကျိုးရီသည် ထောင်စောင့် ဝမ်ဆန်ကို အကျဉ်းသားများထံ အစားအစာပို့ဆောင်ရာတွင် ကူညီပေးမည်ဟု အကြောင်းပြချက်ပေးကာ ယန်ရှုံး၏ အကျဉ်းခန်းဆီသို့ သွားခဲ့ပြီး ရှင်းဟွာ စားသောက်ဆိုင်မှ ရှင်းဟွာဝိုင် တစ်ခွက်ကို အခွင့်ကောင်းယူ၍ တိုက်လိုက်၏။

ယန်ရှုံးက ဝိုင်တစ်ငုံ သောက်လိုက်ပြီးနောက် အသက် ဝဝရှူလိုက်ကာ ကျိုးရီကိုကြည့်ရင်း အေးစက်စွာ နှာခေါင်းရှုံ့လိုက်၏။

“တော်ဝင်နန်းတော်ရဲ့ ခွေးတစ်ကောင်၊ မင်း ငါ့ကို သတ်ချင်ရင်သတ်လိုက်၊ ဒီမှာ ဘာလို့ ဟန်ဆောင်ကောင်းပြနေရတာလဲ”

ကျိုးရီ အနေခက်စွာဖြင့် ချောင်းဟန့်လိုက်သည်။

တစ်ဖက်လူသည် တရားရေးဝန်ကြီးကို စော်ကားခဲ့ပြီးဖြစ်ကာ ‘သင်္ချိုင်းဖောက်သူတော်စင် အမှု’ ကြောင့် မဟုတ်လျှင်တောင် အခြားအမှုများအတွက် အဖမ်းခံရမည်ဖြစ်သော်လည်း နောက်ဆုံးတွင်မူ ဤကိစ္စဖြစ်လာခဲ့ရာ သူ့တွင်လည်း တာဝန်တစ်စိတ်တစ်ပိုင်း ရှိနေပေသည်။

သူသည် သူ့ကိုယ်သူ လူကောင်းတစ်ယောက်ဟု မယူဆသော်လည်း သူ့ထံတွင် ရှက်တတ်ခြင်းနှင့် သင့်တင့်လျောက်ပတ်မှုဆိုသည့် အသိတရားအနည်းငယ်မျှ ရှိနေသေး၏။

ထို့အပြင် သူ့အရင်လူသည် တရားရေးဝန်ကြီးသားဖြစ်သူ၏ အမျိုးသမီးကို လမ်းပေါ်တွင် ကြည့်မိရုံမျှဖြင့် ထိုသခင်လေး၏ အစေခံများက ရိုက်နှက်သတ်ဖြတ်ခဲ့သည်ကို ခံခဲ့ရသည်မဟုတ်လော။

ရန်သူ၏ ရန်သူသည် မိတ်ဆွေပင်ဖြစ်သည်။

“သခင်ကြီးယန်၊ သခင်ကြီး နားလည်မှုလွဲနေပြီ၊ ကျွန်တော်က လူရာမဝင်တဲ့သူတစ်ယောက်ဆိုပေမယ့် နွေဦးနဲ့ ဆောင်းဦးမှတ်တမ်း တချို့ကို ဖတ်ဖူးပါတယ်၊ ပြီးတော့ ချမ်းသာတဲ့သူတွေဆီက လုယူပြီး ဆင်းရဲသားတွေကို ကူညီတဲ့ သခင်ကြီးယန်ရဲ့ သူရဲကောင်းဆန်တဲ့ လုပ်ရပ်တွေကို ကျွန်တော် လေးစားမိလို့ပါ”

ယန်ရှုံးက မျက်ခုံးပင့်လိုက်မိပြီး ကျိုးရီကို ကြည့်ကာ သက်ပြင်းချလိုက်သည်။

“ငါ သေရတော့မယ့် အချိန်လေးမှာ ဖြောင့်မတ်မှုအကြောင်း နားလည်တဲ့သူတစ်ယောက်နဲ့ တွေ့ရလိမ့်မယ်လို့ မမျှော်လင့်ထားခဲ့ဘူး၊ ညီလေး၊ ကျေးဇူးတင်ပါတယ်၊ ဒါပေမယ့် မင်း မြန်မြန်ထွက်သွားသင့်တယ်၊ ဒီ ကောင်းကင်အကျဉ်းထောင်ထဲမှာ နေရာတိုင်း မျက်လုံးတွေရှိတယ်၊ တရားရေးဝန်ကြီးဆီ သတင်းရောက်သွားရင် မင်းပါ ပြဿနာတက်မှာကို ငါစိုးရိမ်လို့ပါ”

ကျိုးရီက ယန်ရှုံးကို နောက်ထပ်၀ိုင်တစ်ခွက် ထပ်ငှဲ့ပေးလိုက်သည်။

“ဂရုစိုက်ပါ သခင်ကြီးယန်”

ကျိုးရီသည် အကျဉ်းခန်းထဲမှ သက်ပြင်းချရင်း ထွက်ခွာလာခဲ့သည်။ တစ်ဖက်လူပြောသကဲ့သို့ပင် ဤအကျဉ်းထောင်သည် ညစ်ပတ်သော ကိစ္စရပ်များဖြင့် ပြည့်နှက်နေပြီး လူတို့၏နှလုံးသားကို ခန့်မှန်း၍မရနိုင်ပေ။

အချိန်ကြာမြင့်စွာ နေထိုင်ခြင်းက သံသယ ဖြစ်ပေါ်စေမည်ဖြစ်ပြီး ၎င်းမှာ အမှန်တကယ်ပင် ပြဿနာတစ်ခု ဖြစ်လေသည်။ သခင်ကြီးယန်ကို ကယ်တင်ရန်မှာ မဖြစ်နိုင်ပေ။

သူသည် နှောင်းပိုင်းဖြစ်တည်မှုအဆင့်တွင်သာ ရှိနေသေးပြီး ထောင်ဖောက်နိုင်သည့်စွမ်းရည်မျိုး သူ့တွင် မရှိသေးပေ။ သူ၏ နာကျင်မှုကို သက်သာစေရန် ထိုသူအား ဝိုင်နှစ်ခွက်ခန့်သာ တိုက်နိုင်စွမ်းရှိသည်။

၎င်းမှာ တန်ဖိုးများစွာမရှိသော်လည်း သူ၏ခံစားချက်များကို ဖော်ပြနိုင်ခဲ့သည်။

ထိုညတွင် သူ့ကို အကျဉ်းထောင်မှကယ်ထုတ်ရန် ကျန်းဟူလောကမှ လူတစ်ယောက် ရောက်လာခဲ့၏။‌ ရောက်လာသူမှာ မွေးရာပါအဆင့် ကျင့်ကြံသူတစ်ဦးဖြစ်သည်။

သူတို့သည် အစောင့်များစွာကို သတ်ဖြတ်နိုင်ခဲ့သော်ငြား ကံမကောင်းစွာဖြင့် ကောင်းကင်အကျဉ်းထောင်တွင်လည်း သူတို့ကိုတားဆီးရန် မွေးရာပါအဆင့်ကျွမ်းကျင်သူများ ရှိနေခဲ့ရာ အကျဉ်းထောင်တံခါးဝသို့ပင် ဝင်ရောက်နိုင်ခဲ့ခြင်းမရှိပေ။

ကျိုးရီသည် ဤကိစ္စကို နောက်နေ့မှသာ သိရှိခဲ့ရပြီး နက်ရှိုင်းသော စိတ်ခံစားမှုများကို မတားဆီးနိုင်ခဲ့ပေ။ တော်ဝင်နန်းတော်ကို ဆန့်ကျင်ရန် သာမန်လူတစ်ဦးအတွက် အလွန်ပင် ခက်ခဲလွန်းလှသည်။

သူ ပိုမို အင်အားကြီးမားလာမှရပေမည်။

“ကျိုးရီ၊ အဲဒီ ‘သင်္ချိုင်းဖောက်သူတော်စင်’ အသက်မရှူတော့ဘူး၊ သွားပြီး အလောင်းကိုစစ်ဆေး၊ ပြီးရင် အစီရင်ခံစာတင်လိုက်”

သူ၏လုပ်ဖော်ကိုင်ဖက်များနှင့် စကားပြောနေစဉ် တစ်ယောက်က ကျိုးရီကို လှမ်းခေါ်လိုက်သည်။

“လာပြီ”

ကျိုးရီသည် အကျဉ်းခန်းဆီသို့ စိတ်လေးလံစွာဖြင့် လျောက်သွားပြီး ‌စက္ကူနှင့် စုတ်တံကိုပါ ယူဆောင်လာခဲ့သည်။

တောင့်တင်းနေပြီဖြစ်သော အလောင်းကို ကြည့်ရင်း ဘာပြောရမည်ကို သူ မသိတော့ပေ။ သူ ဆောင့်ကြောင့်ထိုင်ချလိုက်ပြီး အလောင်းကို ထိတွေ့ကာ တစ်ဖက်လူ၏မှတ်ဉာဏ်များကို စတင်စုပ်ယူလိုက်သည်။

[ငါ့မိန်းမနဲ့ ကလေးတွေကို ငါ ဘယ်တော့မှ ပြန်တွေ့ရတော့မှာမဟုတ်ဘူး၊ သူတို့က ဇာတိရွာမှာ ပုန်းနေတုန်းပဲ၊ အနာဂတ်မှာ သူတို့ ဘယ်လိုရှင်သန်ကြမလဲဆိုတာ ငါ မသိနိုင်တော့ဘူး]

[ငါ သေသွားတာနဲ့ သင်္ချိုင်းဖောက်သူတော်စင်နဲ့ ပတ်သက်တဲ့ ဖိအားတွေ အများကြီးလျော့ကျသွားလိမ့်မယ်]

[သူက ချမ်းသာတဲ့သူတွေဆီက လုယူပြီး ဆင်းရဲသားတွေကို ကူညီတာကို ဆက်လုပ်နိုင်ဖို့နဲ့ ဒီအကျင့်ပျက်အရာရှိတွေကို သေချာအပြစ်ပေးနိုင်ဖို့ ငါ မျှော်လင့်ပါတယ်၊ ငါ မတရားခံရတာက အလကားဖြစ်သွားမှာ မဟုတ်လောက်ပါဘူး]

[ငါ အရည်အချင်းမရှိခဲ့တာ နှမြောစရာပဲ၊ ငါသာ ဘိုးဘေးတွေရဲ့ နတ်ဆင်နဂါးကျင့်စဉ်ကို လေ့ကျင့်နိုင်ခဲ့ရင် ဒီလိုအခြေအနေမျိုးကို ရောက်လာခဲ့မှာမဟုတ်ဘူး]

[ငါ ဒီ‌လောကကြီးကမထွက်ခွာခင် ညီလေးတစ်ယောက်ဆီက အကူအညီရခဲ့တယ်၊ ဒီလောကမှာ လူကောင်းတွေရှိနေသေးတာပဲ၊ ကောင်းကင်ဘုံက သူ့ကို ဘေးကင်းလုံခြုံပြီး ငြိမ်းချမ်းပျော်ရွှင်တဲ့ ဘဝတစ်ခု ကောင်းချီးပေးပါစေလို့ ငါမျှော်လင့်ပါတယ်]

ကျိုးရီ တစ်ခဏမျှ တိတ်ဆိတ်သွား၏။ သူသည် နေ့စဉ်ကြုံတွေ့နေရသော ညစ်ပတ်သည့် မှတ်ဉာဏ်များဖြင့် အသားကျနေပြီဖြစ်သော်လည်း ယခုကဲ့သို့ ဖြောင့်မတ်တည်ကြည်သူတစ်ဦးနှင့် အမှန်တကယ် ကြုံတွေ့လိုက်ရသောအခါ အနည်းငယ် ခံစားရခက်နေခဲ့သည်။

တစ်ချိန်က သူသည်လည်း စိတ်အားထက်သန်သော လူငယ်တစ်ဦး ဖြစ်ခဲ့ဖူးသော်ငြား သူ့နှလုံးသားမှာ ဤရှုပ်ထွေးသော လောကကြီးကြောင့် ထုံထိုင်းပြီး ဇဝေဇဝါ ဖြစ်သွားခဲ့ရသည်။

ရေသန့်အနည်းငယ်က ဖုန်မှုန့်များကို ဆေးကြောနိုင်ပြီး ကြင်နာမှုအချို့ကို ရှာဖွေတွေ့ရှိရန် ကူညီပေးနိုင်သေးသည်။

“ငြိမ်းချမ်းစွာအနားယူပါ သခင်ကြီး၊ သခင်ကြီးရဲ့ ကိစ္စတွေကို တခြားသူတွေက ကူညီပေးပါလိမ့်မယ်”

ဒဏ်ရာများကို မှတ်တမ်းတင်ပြီး အစီရင်ခံစာရေးသားပြီးနောက် ကျိုးရီသည် ကောင်းကင်အကျဉ်းထောင် မှ ထွက်ခွာလာခဲ့၏။

အချိန်မှာ မွန်းတည့်ချိန်ဖြစ်ပြီး သူ၏အလုပ်ချိန် မပြီးဆုံးသေးသဖြင့် သူသည် နတ်ဆင်နဂါးကျင့်စဉ်ကို နားလည်သဘောပေါက်ရန်အတွက် ကောင်းကင်အကျဉ်းထောင်ရှိ သူ၏တာဝန်ကျအခန်းကိုသာ ပြန်လာခဲ့လိုက်သည်။

၎င်းမှာ သူ၏ အကျင့်တစ်ခုဖြစ်သည်။ ကျင့်ကြံခြင်းသိုင်းပညာအသစ်တစ်ခု ရရှိတိုင်း ၎င်းကို အရင်ဆုံး လေ့လာကြည့်ရှုလေ့ရှိသည်။

အသုံးဝင်ပါက သူ သင်ယူမည်ဖြစ်ပြီး အသုံးမဝင်ပါက စွန့်ပစ်လိုက်မည်ဖြစ်သည်။

ပထမတော့ သူ အလေးအနက် မကြည့်ခဲ့သော်လည်း တစ်ချက်ကြည့်လိုက်ရုံဖြင့် သူ့ကို အလွန်အမင်း ထိတ်လန့်သွားစေခဲ့သည်။

“သောက်ကျိုးနည်း”

တစ်ဖက်လူ၏ မှတ်ဉာဏ်များမှတစ်ဆင့် ဤ ဝက်ဝံနဂါးဆင်သိုင်းကြမ်းမှာ အတော်လေး အံဩဖွယ်ကောင်းကြောင်း ကျိုးရီ တွေ့ရှိလိုက်ရသည်။

၎င်းသည် မြောက်ပိုင်းမန် မြက်ခင်းပြင်တွင် ယန်မိသားစု၏ ဘိုးဘေးဖြစ်သူ ယင်နှင့် ယန်တို့ ဆုံတွေ့မှုမှတစ်ဆင့် ရရှိခဲ့သော နတ်ဘုရားသိုင်းပညာတစ်ခုဖြစ်သည်။

၎င်းမှာ မြောက်ပိုင်းမန် လျှို့ဝှက်ဂိုဏ်း၏ ထိပ်တန်း လျှို့ဝှက်သိုင်းပညာတစ်ခုဖြစ်သည်။

ဤသိုင်းပညာကို ကျင့်ကြံသူ မည်သူမဆို သူတို့၏ခန္ဓာကိုယ်အတွင်းရှိ ပြန့်ကျဲနေသော အစစ်အမှန်ချီစွမ်းအင်များကို နဂါးဆင်ခွန်အား အဖြစ်သို့ ပြောင်းလဲပေးနိုင်သည်။

နဂါးဆင်ခွန်အား တစ်မျှင်သည် ဂျင် ၁၀၂,၅၀၀ နှင့် ညီမျှသည်။ ၎င်းသည် ဤလောကတွင် အကြမ်းတမ်းဆုံးနှင့် အစွမ်းထက်ဆုံးသော စွမ်းအားတစ်ခုပင်ဖြစ်သည်။

တိုက်ခိုက်သည့်အခါတွင် ခွန်အားများကို ချက်ချင်း ထုတ်လွှတ်နိုင်သည်။ ထို့အပြင် အစစ်အမှန်ချီစွမ်းအင် အလုံအလောက်ရှိနေသရွေ့ ၎င်းကို ထပ်ဆင့် အသုံးပြုနိုင်သေး၏။

“ကျင့်စဉ်ကောင်းတစ်ခုပဲ”

သူ့တွင် အခြားသူများ၏ အစစ်အမှန်ချီစွမ်းအင်ကို စုပ်ယူနိုင်သည့် နတ်ဆိုးသိုင်းပညာ တစ်ခုဖြစ်သော ကောင်းကင်ဝါးမျိုနတ်ဆိုးသိုင်း ရှိလေသည်။

အကယ်၍ သူသည် နတ်ဆင်နဂါးကျင့်စဉ်ထဲက နည်းလမ်းကို အသုံးပြု၍ ကျင့်ကြံကာ သူ၏ကိုယ်ပိုင်စွမ်းအားကို ချဲ့ထွင်ရန်အတွက် နဂါးဆင်ခွန်အားအဖြစ် ပြောင်းလဲလိုက်မည်ဆိုပါက ပိုကောင်းမည်မဟုတ်လော။

ကျိုးရီသည် တုံ့ဆိုင်းနေခြင်းမရှိဘဲ ချက်ချင်းပင် စတင်ကျင့်ကြံလေတော့သည်။ တစ်ဖက်လူ၏ မှတ်ဉာဏ်များကို လိုက်နာကာ ကျင့်ကြံခြင်းသိုင်းပညာကို လှည့်ပတ်လိုက်သည်။

သူ၏ခန္ဓာကိုယ်အတွင်းရှိ အစစ်အမှန်ချီစွမ်းအင်များကို သွေးကြောများတစ်လျှောက် လည်ပတ်ရန် လျင်မြန်စွာ လမ်းညွှန်လိုက်ပြီး နောက်ဆုံးတွင် သူ၏ခန္ဓာကိုယ်အတွင်း လှည့်လည်သွားလာနေသော သာမန်မျက်စိဖြင့် မမြင်မရသည့် စွမ်းအားတစ်ခုအဖြစ် ဖန်တီးလိုက်သည်။

၎င်း ရွေ့လျားသွားသောအခါ မိုးခြိမ်းသံကဲ့သို့ ကျယ်လောင်စွာ ဟိန်းဟောက်နေသော နဂါးနှင့် ဆင်တို့၏ အသံများ ထွက်ပေါ်လာရာ အလွန်ပင် ထိတ်လန့်ဖွယ်ကောင်းလှပေ၏။

ထိုအချိန်မှာပင် ခန္ဓာကိုယ်က ပြင်းထန်စွာ တုန်ရီသွားကာ လျှို့ဝှက်ဆန်းကြယ်ပြီး နက်နဲသောအဆင့်တစ်ခုသို့ ဝင်ရောက်သွားလေသည်။

ခန္ဓာကိုယ်ရှိ ချွေးပေါက်တိုင်း ပွင့်ထွက်သွားပြီး ပတ်ဝန်းကျင်ရှိ ကောင်းကင်၊ မြေကြီးတို့နှင့် ဆက်သွယ်သွားသကဲ့သို့ ခံစားလိုက်ရသည်။

သူသည် ခန္ဓာကိုယ်ကို ကာကွယ်ဖို့ရာ အကာအကွယ်အလွှာကို ဖွဲ့စည်းရန် အစစ်အမှန် ချီစွမ်းအင်များကို ထုတ်လွှတ်နိုင်ရုံသာမက ကောင်းကင်နှင့် မြေကြီး၏ စွမ်းအင်များကိုပါ စုပ်ယူကာ အစစ်အမှန်ချီစွမ်းအင် အဖြစ် ဖိသိပ်ပေါင်းစပ်ပြီး ဤဖြစ်စဉ်ကို အရှိန်မြှင့်တင်နိုင်လေသည်။

ကျိုးရီ မျက်လုံးများကို ဖြည်းညင်းစွာ ဖွင့်လိုက်ပြီး နှုတ်ခမ်းထောင့်တွင် ဝမ်းသာနေသည့် အရိပ်အယောင်တစ်ခု ပေါ်လာ၏။

“ငါ မွေးရာပါအဆင့်ကို ဝင်ရောက်သွားပြီ၊ ပြီးတော့ နဂါးဆင်ခွန်အား တစ်မျှင်ကိုတောင် ကျင့်ကြံနိုင်ခဲ့ပြီပဲ”

လူတစ်ယောက် မမွေးဖွားမီ မိခင်၏ဝမ်းဗိုက်ထဲတွင် ရှိနေစဉ် ပါးစပ်နှင့် နှာခေါင်းမှ မဟုတ်ဘဲ ချက်ကြိုးမှတစ်ဆင့် အသက်ရှူသည်ဟု ကောလာဟလ ရှိလေသည်။

နှုတ်ခမ်းထောင့်တွင်ခန္ဓာကိုယ်ကို ဤအခြေအနေသို့ ပြန်လည်ရောက်ရှိစေခြင်း၊ မဟုတ်သေး၊ ဤအခြေအနေထက် ကျော်လွန်သွားစေခြင်း ဖြစ်သည်။

၎င်းသည် ရင်နှင့် တုသွေးကြောများကို ဖွင့်ပေးရုံသာမက ခန္ဓာကိုယ်ရှိ ချွေးပေါက်တိုင်းက ကောင်းကင်နှင့် မြေကြီး၏စွမ်းအင်များကို စုပ်ယူလာနိုင်ကာ ထိုစွမ်းအင်များကို အသုံးပြုခြင်းဖြင့် အစာမစားဘဲ နေလျှင်ပင် အငတ်ဘေးမှကင်းဝေးမည်ဖြစ်သည်။

အခန်း (၈) - နိုင်ငံတော်ကံကြမ္မာ၊ စစ်ချီတက်ခြင်း

သို့သော်လည်း တစ်ခုခုလွဲချော်နေသလို ခံစားနေရသည်။ မွေးရာပါအဆင့်သို့ ချိုးဖောက်ဝင်ရောက်ရန်မှာ အလွန်ခက်ခဲရှုပ်ထွေးလှသည်မဟုတ်လော။

အချိန်များစွာပေးရသည့်အပြင် အနည်းငယ်ပေါ့ဆလိုက်သည်နှင့် ဖောက်လွဲဖောက်ပြန်ဖြစ်ကာ သွေးကြောများပေါက်ကွဲပြီး အသက်အန္တရာယ်ပင် ရှိနိုင်သည်ဟု ကြားဖူးထားသည်။

ထို့ကြောင့်ပင် လူအများစုသည် ရက်အတန်ကြာ အစားအသောက်ဖြတ်ကာ တံခါးပိတ်ကျင့်ကြံပြီး ကြိုတင်ပြင်ဆင်မှုများ ပြုလုပ်ကြရခြင်းဖြစ်သည်။ ကျိုး

ကျိုးရီမှာမူ မည်သည့်နာကျင်မှုကိုမျှ မခံစားလိုက်ရဘဲ အဆင့်ချိုးဖျက်ခြင်း အောင်မြင်သွားခဲ့ပြီဖြစ်သည်။ လောကကြီးက တမင် နောက်ပြောင်နေသည်လားပင် မသိတော့ပေ။

“ဒီခန္ဓာကိုယ်ကြောင့်ပဲ ထပ်ဖြစ်ပြန်ပြီလား”

ကျိုးရီ တွေးတောလိုက်မိသည်။ ဤခန္ဓာကိုယ်ထဲတွင် ထူးခြားသည့် လျှို့ဝှက်ချက်တစ်ခုခု ရှိနေသည်မှာ သေချာသည်။

ကျင့်ကြံလေလေ ဤခန္ဓာကိုယ်၏ ပါရမီက ပိုမိုထက်မြက်လာလေလေ ဖြစ်ကြောင်း သူသတိပြုမိလာသည်။

ကျင့်ကြံမှုအဆင့် တိုးတက်လာသည်နှင့်အမျှ ပိတ်ဆို့နေသည့် မျိုးဗီဇပါရမီများကို တစ်ခုပြီးတစ်ခု ဖွင့်လှစ်နေရသကဲ့သို့ပင်။ ယခုဆိုလျှင် အန္တရာယ်များကိုပင် လျစ်လျူရှုထားနိုင်ပြီဖြစ်သည်။

ကျင့်ကြံမှုသာ လိုအပ်သည့်အမှတ်သို့ ရောက်ရှိသွားပါက အလိုအလျောက် လျင်မြန်စွာ ချိုးဖောက်ဝင်ရောက်သွားမည်ဖြစ်သည်။

မည်သို့ပင်ဖြစ်စေ ဤသည်မှာ ကောင်းသောလက္ခဏာပင်။ သူ၏ လက်ရှိစွမ်းအား မည်မျှကြီးမားနေပြီလဲဆိုသည်ကို စမ်းသပ်ကြည့်ချင်စိတ်များ ပေါ်ပေါက်လာသော်လည်း နောက်ဆုံးတွင် မိမိကိုယ်ကို ထိန်းချုပ်လိုက်သည်။

ရင့်ကျက်သော ကူးပြောင်းသူတစ်ယောက်အနေဖြင့် အလွယ်တကူ ကြွားဝါခြင်းမျိုး မပြုလုပ်သင့်ကြောင်းကို သူ ကောင်းစွာနားလည်ထားပေသည်။

ဤနေရာသည် ကောင်းကင်အကျဉ်းထောင်၏ နောက်ဖေးခြံဝင်း ဖြစ်သည်။ စိတ်ကူးပေါက်တိုင်း စွမ်းအင်များ ထုတ်ဖော်ပြသလိုက်၍မဖြစ်ချေ။

တစ်စုံတစ်ယောက်က သတိထားမိသွားကာ မွေးရာပါအဆင့် ကျင့်ကြံမှုများ ပေါ်ပေါက်သွားပါက သေလမ်းရှာသကဲ့သို့ ဖြစ်သွားပေလိမ့်မည်။

အပြင်ထွက်ခွင့်ရမည့် အခွင့်အရေးကိုသာ စောင့်ဆိုင်းပြီး မိမိစွမ်းအား မည်မျှအထိ စွမ်းဆောင်နိုင်မည်ကို စမ်းသပ်ကြည့်ရန် ဆုံးဖြတ်လိုက်သည်။

လက်ဝါးတစ်ချက်ရိုက်ချလိုက်ရုံဖြင့် အိမ်တစ်လုံးကို အလွယ်တကူ ပြိုကျပျက်စီးသွားစေနိုင်မည်ဟု သူခန့်မှန်းမိသည်။

အချိန်သိပ်မကြာလိုက်မီမှာပင် ကောင်းကင်အကျဉ်းထောင်အတွင်းမှ ခေါင်းလောင်းထိုးသံများ ရုတ်တရက် ထွက်ပေါ်လာသည်။ အကျဉ်းထောင် အထက်အရာရှိများက အားလုံးကို ခေါ်ယူစုဝေးစေခြင်းဖြစ်သည်။

ကျိုးရီ ကောင်းကင်အကျဉ်းထောင်အတွင်းသို့ ဝင်ရောက်သွားချိန်တွင် လူတိုင်း အလွန်အမင်း စိတ်လှုပ်ရှားနေကြသည်ကို မြင်တွေ့လိုက်ရသည်။

“အရှင်မင်းကြီးက ဒီစစ်ပွဲမှာ မြောက်ပိုင်းမန် တစ်ခွင်လုံးကို သေချာပေါက် တိုက်ခိုက်သိမ်းပိုက်နိုင်မှာပဲ။ ဒါဟာ မြေကြီးပေါ်မှာ အလကားရမယ့် စစ်မှုထမ်းဆုလာဘ်တွေကို ကောက်ယူဖို့ အသင့်စောင့်နေတာနဲ့ အတူတူပဲကွ”

တစ်စုံတစ်ယောက်က အားပါးတရ ပြောဆိုလိုက်သည်။

“ဒါပေါ့လေ၊ ငါးသိန်းလောက်ရှိတဲ့ စစ်တပ်ကြီး ချီတက်သွားမှာဆိုတော့ ဘယ်လူမျိုးစုကများ ခံနိုင်ရည်ရှိမှာလဲ။ ပြောရရင် အပျော်ခရီးထွက်တာနဲ့တောင် တူနေသေးတယ်"

“အချိန်ကျလာရင် ဝံပုလွေတောင်မှာ ယဇ်ပူဇော်တာတွေတောင် လုပ်နိုင်ဦးမယ်၊ ပြီးတော့ သူတို့ရဲ့ နာမည်တွေက သမိုင်းဝင်သွားပြီး သူတို့ရဲ့အမွေအနှစ်တွေက နောင်မျိုးဆက် သောင်းချီတိုင်အောင် တည်တံ့သွားလိမ့်မယ်”

“ဟီးဟီး ညီအစ်ကိုတို့ ဝမ်ဆန်းရဲ့ ကံကောင်းခြင်းတွေ ရောက်လာပြီ၊ ဒီတစ်ကြိမ် နိုင်ငံတော် စစ်မှုထမ်းခေါ်ယူရေးမှာ တာ့ချန်မြို့တော်အတွက် တာဝန်ယူရတဲ့ တပ်မှူး ကျန်းစိုင်က ငါနဲ့ ငယ်ငယ်ကတည်းက အတူတူကြီးပြင်းလာတဲ့ ညီအစ်ကိုရင်းလိုပဲ”

“မနက်ဖြန် စစ်တပ်စခန်းကိုသွားပြီး သတင်းပို့မယ်၊ မြောက်ပိုင်းမန်ကနေ ရွှေရောင်လွှမ်းပြီး ပြန်လာတာနဲ့ ငါလည်း ရာထူးကြီးအရာရှိတစ်ယောက် ဖြစ်လာတော့မှာ”

ထိုစကားကို ကြားလိုက်ရချိန်တွင် အားလုံး အံ့သြတကြီး ရေရွတ်လိုက်မိကြပြီး ဝမ်ဆန်းအား မနာလိုအားကျသည့် မျက်လုံးများဖြင့် ကြည့်လိုက်မိကြသည်။

“ငါ အမြဲတမ်း ပြောဖူးပါတယ်၊ ဝမ်ဆန်းလို နဂါးတစ်ကောင်က တစ်နေ့ကျရင် သေချာပေါက် အောင်မြင်လာလိမ့်မယ်ဆိုတာ”

“ငါလည်း စောစောစီးစီးကတည်းက မြင်မိပါတယ်၊ ဝမ်ဆန်းဆိုတာ ကောင်းကင်ဘုံက ဆင်းသက်လာတဲ့ နတ်ဒေဝါတစ်ပါးပဲ၊ ငါတို့ရဲ့ ကောင်းကင်အကျဉ်းထောင်ကို ရောက်လာတာက ကပ်ဘေးကျော်ဖြတ်ဖို့ သက်သက်ပဲ”

“အခု ကပ်ဘေးကလည်း ပြီးသွားပြီဆိုတော့ ကျန်တာကတော့ ဘဝကို အေးအေးလူလူ စံစားဖို့ပဲပေါ့”

“ဝမ်ဆန်း မင်း ချမ်းသာလာရင် ငါတို့ကို မေ့မပစ်နဲ့ဦးနော်”

“မမေ့ပါဘူး မမေ့ပါဘူး၊ ငါက ဘယ်လိုလူမျိုးလဲဆိုတာ မင်းတို့ အသိဆုံးပဲကို၊ ဒီမြို့တော်တစ်ခုလုံးရဲ့ ကောင်းကင်အကျဉ်းထောင်မှာ သစ္စာတရားဆိုတဲ့ စကားလုံးနဲ့ ပတ်သက်လာရင် ငါက နံပါတ်တစ်ပဲ”

ဝမ်ဆန်းက လက်မထောင်ပြလိုက်ရာ အားလုံးကလည်း ဝိုင်းဝန်းထောက်ခံလိုက်ကြသည်။

အတန်ကြာ နားထောင်ပြီးနောက်တွင်မှ မည်သည့်အရာများ ဖြစ်ပျက်နေသည်ကို ကျိုးရီ သဘောပေါက်သွားတော့သည်။

မြောက်ဘက်နယ်စပ်ရှိ လူမျိုးစုတစ်စုက တာ့ချန်နိုင်ငံသားများကို သတ်ဖြတ်ကာ စားနပ်ရိက္ခာများကို လုယက်သွားခဲ့သည့်အတွက် လူငယ်ဧကရာဇ်မင်းကိုယ်တိုင် ဦးဆောင်ကာ စစ်သည်အင်အား သိန်းငါးဆယ်ကို ကွပ်ကဲ၍ မြောက်ပိုင်းမန်သို့ စစ်ချီသွားခြင်းဖြစ်သည်။

ဤကမ္ဘာ၏ သမိုင်းကြောင်းမှာ ယခင်ဘဝက သမိုင်းတချို့နှင့် အနည်းငယ် တူညီနေသည်။

တာ့ချန်နိုင်ငံသည် မြင့်မြတ်သော ကုန်းမြေ၏ အလယ်ပိုင်းလွင်ပြင်တွင် တည်ရှိပြီး ကမ္ဘာပေါ်တွင် အရင်းအမြစ်ပေါကြွယ်ဝဆုံး ဒေသကို ထိန်းချုပ်ထားသည်။

စိုက်ပျိုးရေး၊ မွေးမြူရေး၊ ပိုးမွေးမြူရေးနှင့် အခြားလုပ်ငန်းအားလုံး ကောင်းစွာဖွံ့ဖြိုးတိုးတက်နေပြီး လူဦးရေ အထူထပ်ဆုံးနှင့် ကမ္ဘာပေါ်တွင် အကြီးကျယ်ဆုံးသော နိုင်ငံကြီးဖြစ်သည်။

စားဝတ်နေရေး အခက်အခဲရှိသော သာမန်ပြည်သူများစွာ ရှိနေသော်လည်း ယင်းမှာ ခေတ်ကာလ၏ နောက်ခံအခြေအနေနှင့် စားနပ်ရိက္ခာ ထုတ်လုပ်မှုကြောင့် ကန့်သတ်ချက်များ ရှိနေခြင်းသာ။

တာ့ချန်နိုင်ငံနှင့် နှိုင်းယှဉ်ပါက အရှေ့ဘက်မှ တုန်းလျောင်၊ တောင်ဘက်နယ်စပ်၊ အနောက်ဘက်မှ ရှီရှားနှင့် မြောက်ဘက်မှ မြောက်ပိုင်းမန် မြက်ခင်းပြင် လူမျိုးစုများအပြင် အခြားသော နိုင်ငံကြီး၊ နိုင်ငံငယ်များမှ သာမန်ပြည်သူများ၏အခြေအနေမှာ ပို၍ပင် ဆိုးရွားလှသည်။

ထိုအထဲတွင် မြောက်ပိုင်းမန် မြက်ခင်းပြင် လူမျိုးစုများမှာ အင်အားအကြီးမားဆုံး ဖြစ်သည်။ သိုင်းပညာလမ်းစဉ်ကို လေ့လာလိုက်စားကြပြီး အလယ်ပိုင်းလွင်ပြင်၏ နတ်နဂါးကို အမြဲလိုလို ရန်စတတ်ကြသည်။

တာ့ချန်နိုင်ငံကို သိုင်းပညာအပေါ် အခြေခံ၍ တည်ထောင်ထားခြင်းဖြစ်သည်။ နိုင်ငံတည်ထောင်စ အစောပိုင်းကာလများတွင် ထိုက်ကျူဧကရာဇ်မင်းကြီးသည် နိုင်ငံအတွင်းရှိ အင်အားစုအားလုံးကို လေဆင်နှာမောင်းတစ်ခုပမာ ဖယ်ရှားရှင်းလင်းပစ်ခဲ့၏။

ထို့အပြင် မြောက်ပိုင်းမန်သို့ နာမည်ကျော်စစ်သူကြီးအချို့ကို ဆက်တိုက်စေလွှတ်ကာ မြောက်ပိုင်းမန် လူမျိုးစုများ ခေါင်းမဖော်နိုင်သည်အထိ တိုက်ခိုက်ချေမှုန်းခဲ့သည်။

ထို့နောက် တတိယမြောက် ဧကရာဇ်မင်းဖြစ်သော ထိုက်ကျုံးဧကရာဇ်မင်းကြီးသည် စစ်ပွဲရူးသွပ်သူတစ်ဦးဖြစ်ပြီး ပတ်ဝန်းကျင်ရှိ နိုင်ငံများကို အပြတ်အသတ် တိုက်ခိုက်ချေမှုန်းခဲ့ကာ တစ်ချိန်က နန်းတွင်းအရာရှိများအဖြစ်ပင် သတ်မှတ်ခဲ့သည်။

ထိုက်ကျုံးဧကရာဇ်မင်းကြီး၏ မြေးတော်ဖြစ်သူ ရွှမ်ကျုံးဧကရာဇ်မင်းကြီး လက်ထက်တွင်မူ အနည်းငယ် အင်အားနည်းပါးသွားသော်လည်း အရပ်လေးမျက်နှာမှ လူရိုင်းများမှာ မိမိတို့သဘောဖြင့် ဝင်ရောက်ကျူးကျော်ရန် မဝံ့ရဲခဲ့ကြပေ။

လက်ရှိ ဧကရာဇ်မင်းကြီးမှာ ရွှမ်ကျုံး၏သားတော်ဖြစ်သည်။

ငယ်ရွယ်စဉ်ကတည်းက နန်းတက်ခဲ့ရသဖြင့် မြောက်ပိုင်းမန် လူရိုင်းများက ဧကရာဇ်မင်းအသစ်၏ နောက်ဆုံးစည်းနှင့် အဆင့်အတန်းကို စမ်းသပ်လိုဟန်ရှိသည်။

သို့သော်လည်း ထိုသို့စမ်းသပ်မှုက ဧကရာဇ်မင်းအသစ်ကို ငါးသိန်းရှိသော စစ်တပ်ကြီးကို ကိုယ်တိုင်ဦးဆောင်ကာ စစ်ချီလာစေရန် ဖန်တီးပေးလိုက်သလို ဖြစ်သွားခဲ့သည်။

ဤစစ်ပွဲသည် ထိုက်ကျုံး၊ ရွှမ်ကျုံးနှင့် ထိုက်ကျူဧကရာဇ်မင်းကြီးတို့ လက်ထက်ကထက်ပင် ပိုမိုကြီးကျယ်ခမ်းနားလှသည်။ အကယ်၍ အခြေအနေများ မကောင်းပါက ဤတစ်ကြိမ်တွင် မြောက်ပိုင်းမန်တစ်ခုလုံး ပြောင်သလင်းခါသွားနိုင်သည်။

ထို့ကြောင့်ပင် ဤအကျဉ်းထောင်စောင့်များ မနာလိုအားကျနေကြသည်မှာ အံ့သြစရာတော့မဟုတ်ပေ။

ဤမျှကောင်းမွန်သော အခွင့်အရေးမျိုးတွင် စစ်မြေပြင်မှ စစ်မှုထမ်းဆုလာဘ်အချို့ ရရှိခဲ့ပါက ရာထူးကြီးအရာရှိတစ်ဦးအဖြစ် ပြန်လည်ရောက်ရှိလာနိုင်မည်ဖြစ်သည်။

မည်သည့်အလုပ်မျှ မလုပ်ရလျှင်တောင် နန်းတွင်းမှပေးအပ်သော လစာငွေကို ခံစားခွင့်ရရှိပြီး အရာရှိတစ်ဦး၏ အထူးအခွင့်အရေးများစွာကိုပါ ရရှိနိုင်မည်ဖြစ်သည်။

မည်မျှ ကောင်းမွန်လှသနည်း။

သို့သော်လည်း မည်သည့်အကြောင်းကြောင့်မှန်းမသိ ကျိုးရီ အနည်းငယ် စိုးရိမ်ပူပန်နေမိသည်။ ဤမျှ ရင်းနှီးနေသော ဇာတ်လမ်းမျိုးကို တစ်နေရာရာတွင် မြင်ဖူးနေသကဲ့သို့ အမြဲခံစားနေရသည်။

အတန်ကြာပြီးနောက်တွင် သူ ခေါင်းခါလိုက်မိသည်။

“ဒါက ငါနဲ့ ဘာဆိုင်လို့လဲ၊ ငါက သာမန် မွေးရာပါအဆင့်လေးပဲဟာကို”

သာမန်လူတစ်ယောက်အမြင်တွင် ဤအရာသည် ကြီးကျယ်မြင့်မြတ်နေနိုင်သော်လည်း ရှုပ်ထွေးပွေလီလှသော သိုင်းလောကအတွက်မူ သူသည် တောင်ခြေတွင်သာ ရှိနေသေးသည်။

ထို့ကြောင့် မောက်မာဝင်ကြွားခြင်း သို့မဟုတ် စိတ်မြန်လက်မြန် လုပ်ဆောင်ခြင်းမျိုး မပြုလုပ်သင့်ပေ။ မြေကြီးပေါ်တွင် ခြေစုံရပ်လျက် သတိထားကာ ဆက်လက်လျှောက်လှမ်းရပေမည်။

သူတတ်နိုင်သည်မှာ တာ့ချန်နိုင်ငံကို ကောင်းကင်ဘုံက ကောင်းချီးပေးရန်နှင့် ရာသီဥတု သာယာစေရန် ဆုတောင်းပေးပြီး ကိုယ်တိုင် ဆယ်စုနှစ်အနည်းငယ်မျှ လုံခြုံစွာ ပုန်းကွယ်နေထိုင်ကာ နိုင်ငံသိုင်းသူတော်စင်အဆင့်သို့ ရောက်ရှိသည်အထိ ဆက်လက်ကျင့်ကြံသွားရန်သာ ဖြစ်သည်။

ထိုအဆင့်သို့ ရောက်ရှိပြီးမှသာ အပြင်ထွက်ကာ သိုင်းလောကကို မွှေနှောက်ရပေမည်။

သိုင်းသခင်များကို ခြေစုံပစ်ကန်မည်။ တော်ဝင်မျိုးနွယ်များကို ဓားတစ်ချက်ဖြင့် ပိုင်းဖြတ်မည်။ ကမ္ဘာမြေတစ်ခွင်လုံးကို တိုက်ခိုက်သိမ်းပိုက်ကာ အပြင်းထန်ဆုံးသော စစ်ပွဲများကို ဆင်နွှဲပြီး အမိုက်စားဟန်ဖြင့် အစွမ်းများ ထုတ်ဖော်ပြသမည်ဖြစ်သည်။

များမကြာမီမှာပင် အကျဉ်းထောင်မှူး ရောက်ရှိလာပြီး အခြေအနေများကို ရှင်းပြလေသည်။ ယခု လူစုဝေးရခြင်းမှာလည်း စစ်မှုထမ်းခေါ်ယူရေးအတွက်ပင် ဖြစ်နေသည်။

အကျဉ်းထောင်စောင့်များသည် သဘာဝကျကျပင် စိတ်လှုပ်ရှားစွာဖြင့် စာရင်းပေးသွင်းရန် တတ်စွမ်းသမျှ ကြိုးစားနေကြသည်။ ကံမကောင်းစွာဖြင့် ပုံမှန်လုပ်ငန်းစဉ်များမှာ အလွန်တင်းကျပ်လွန်းလှသည်။

လူအများစုမှာ စဦးဖြစ်တည်မှုအဆင့်သို့ပင် မရောက်ရှိကြသေးသောကြောင့် အကျဉ်းထောင်စောင့် အများစုမှာ ပယ်ချခံလိုက်ရသည်။ ဤသည်က လူတိုင်းကို ဝမ်ဆန်းအား ပို၍ပင် မနာလိုအားကျဖြစ်စေခဲ့သည်။

“ငါ ဘာလို့ တတိယအစ်ကိုရဲ့ ကံမျိုး မပါလာရတာလဲ”

“တတိယအစ်ကိုရဲ့ ကံအကြောင်းကို ပြောနေစရာ လိုသေးလို့လား၊ သူ့ကို အင်မော်တယ်တွေ ကာကွယ်ပေးထားတယ်ဆိုတာ ကောင်းကင်အကျဉ်းထောင်မှာ ကောလာဟလထွက်နေတာ ကြာလှပြီ"

“အဲဒီတုန်းက ကျန်းမိသားစုသခင်လေးက သူ့ကို ပါးချလိုက်တာ၊ အဲဒီညမှာပဲ သူ့ဘိုးဘွားတွေရဲ့ သင်္ချိုင်းဂူ ဖော်ခံလိုက်ရတယ်”

“ဝန်ကြီးဌာနရဲ့ ဒုတိယဝန်ကြီး ရှောက်အာဟောင်က တတိယအစ်ကိုကို ပါးချလိုက်တော့လည်း နောက်တစ်နေ့ကျရော ဘာဖြစ်သွားတယ်ထင်လဲ သူပုန်တွေနဲ့ ပူးပေါင်းကြံစည်မှုနဲ့ စုံစမ်းစစ်ဆေးခံရပြီး ချက်ချင်း ကွပ်မျက်ခံလိုက်ရတယ်"

“ဒီနှစ်တွေအတွင်းမှာ ငါတို့ရဲ့ ကောင်းကင်အကျဉ်းထောင်ကို ရောက်လာတဲ့ အရာရှိကြီးတွေ၊ အရာရှိငယ်တွေနဲ့ သြဇာအာဏာကြီးမားတဲ့ မှူးမတ်တွေထဲက တတိယအစ်ကိုကို ရိုက်နှက်ဖူးတဲ့လူတွေထဲမှာ ဘယ်သူကများ ဒုက္ခမရောက်ဘဲ နေဖူးလို့လဲ”

ဝမ်ဆန်း၏ ဆန်းကြယ်လှသော ကံကြမ္မာကို ပြန်လည်အမှတ်ရသွားချိန်တွင် အားလုံးမှာ အံ့သြမှင်သက်သွားကြသည်။ လူအချို့မှာ မွေးရာပါဇာတ်လိုက်များအဖြစ် မွေးဖွားလာကြခြင်းဖြစ်သည်ဟု ဆိုရမည်သာ။

ကျိုးရီ တစ်ယောက်တည်းသာ မေးခွန်းတစ်ခုကို တွေးတောနေမိသည်။ နန်းတွင်းမှ သိန်းငါးဆယ်မျှရှိသော စစ်တပ်ကြီးကို ခေါ်ဆောင်သွားမည်ဖြစ်ပြီး ၎င်းတို့အထဲမှ အများစုမှာ ခွန်အားကြီးမားသူများ ဖြစ်ကြသည်။

စစ်ပွဲဆိုသည်မှာ သေရေးရှင်ရေး တိုက်ပွဲတစ်ခုဖြစ်သောကြောင့် မည်သူကမျှ နောက်ဆုတ်နေမည်မဟုတ်သလို မိမိတို့၏ စွမ်းအားများကိုလည်း ဖုံးကွယ်ထားမည်မဟုတ်ပေ။

ဆိုလိုသည်မှာ တာ့ချန်မြို့တော်၏ ကာကွယ်ရေးယန္တရားမှာ များစွာ လျော့ရဲသွားပြီဖြစ်သည်။

“ဟီးဟီး...”

သူက အနည်းငယ် ဆူပူလှုပ်ရှားမှုများ ပြုလုပ်လိုက်လျှင်ပင် မည်သူကမျှ သူ့ထံ လာရောက်ပြဿနာရှာရန် စိတ်ကူးရှိမည် မဟုတ်သလို အချိန်လည်း ရမည်မဟုတ်ပေ။

ယခုအချိန်သည် သူ၏ စွမ်းအားများကို ထုတ်ဖော်ပြသရန် အချိန်ကောင်းပင် ဖြစ်သည်။

‘မြေအောက်မှာ အိပ်စက်နေကြတဲ့ ဝိညာဉ်တွေ... နာကျင်မှုကိုခံစားဖို့ အဆင်သင့်ဖြစ်နေကြပြီလား'