အခန်း (၁၄၃-၁၄၄)

အခန်း(၁၄၃) ယူနာက မိုက်ကယ် ထက် တစ်နှစ်လောက် နောက်ကျပြီးမှ ဒီကမ္ဘာထဲကို ပြန်လည်ဝင်စားလာခဲ့တာဖြစ်ပါတယ်။ သူမ သေဆုံးသွားချိန်မှာ နတ်ဘုရားမနဲ့ တွေ့ဆုံခဲ့ပြီး နောက်ထပ် ဆယ်နှစ်ကြာတဲ့အထိ ကလေးဘဝနဲ့ ရှင်သန်ခဲ့ရတာပေါ့။ မိုက်ကယ် လိုပဲ သူမလည်း ဒီကမ္ဘာမှာ သူမတစ်ယောက်တည်းပဲ ပြန်လည်ဝင်စားလာသူလို့ ထင်မှတ်နေခဲ့တာပါ။ နတ်ဘုရားမကလည်း သူမကို 'ဒီမှာ သက်သောင့်သက်သာနဲ့ ဘဝကို ပျော်ပျော်ပါးပါး ဖြတ်သန်းလိုက်ပါ' လို့ပဲ ပြောပြီး ပြန်လည်ဝင်စားခြင်း သံသရာထဲကို ပို့လွှတ်လိုက်တာဖြစ်ပြီး သူမထက် တစ်နှစ်စောပြီး ရောက်နေတဲ့သူ ရှိတယ်ဆိုတဲ့ အချက်ကိုတော့ ချန်ထားခဲ့တယ်။ မောင့်ဂိုမာရီ မိသားစုရဲ့ အငယ်ဆုံးသမီးအဖြစ် မွေးဖွားလာခဲ့တဲ့ ယူနာဟာ အရင်ဘဝက K-pop star တစ်ယောက်အဖြစ် ရှင်သန်ခဲ့တာတွေကို အကုန်မေ့ဖျောက်ပြီး ဒီဘဝသစ်ထဲမှာပဲ အပြည့်အဝ နစ်မျောနေခဲ့တာပေါ့။ မိုက်ကယ်လိုပဲ သူမကလည်း အသက် ငါးနှစ်အရွယ်လောက်ကတည်းက ထူးချွန်တဲ့ ပါရမီတွေကို ပြသနိုင်ခဲ့တယ်။ အရင်ဘဝတုန်းက Dancerတစ်ယောက်ဖြစ်ခဲ့တဲ့ အခြေခံကြောင့် သူမရဲ့ မျက်စိနဲ့ လက် လှုပ်ရှားမှု အချိတ်အဆက်က အလွန်ကောင်းမွန်နေပြီး တခြားသူတွေထက် အများကြီး ပိုလွယ်လွယ်ကူကူနဲ့ လှံရှည်အတတ်ပညာကို တတ်မြောက်သွားခဲ့တာကြောင့် လူတစ်သန်းမှာ တစ်ယောက် ပေါ်ထွန်းတဲ့ ပါရမီရှင်လို့တောင် သတ်မှတ်ခံခဲ့ရတာပါ။ ဒါပေမဲ့ သူမကတော့ ဒီဘဝသစ်မှာ မိစ္ဆာတွေကို လိုက်တိုက်ခိုက်ရင်း၊ ဆရာ့လက်အောက်မှာ တစ်နေ့ကို ၁၅ နာရီလောက် အချိန်ပေးပြီး လေ့ကျင့်နေရတဲ့ ဘဝမျိုးနဲ့ မကုန်ဆုံးချင်ခဲ့ပါဘူး။ ဒါကြောင့် သူမဟာ သူမအဘွားရဲ့ခြေရာကို လိုက်ပြီး သံတမန်တစ်ယောက် ဖြစ်လာဖို့ ရွေးချယ်လိုက်တာပေါ့။ အဲဒါကတော့ တိုက်ကြီးပေါ်မှာ ရှိသမျှ နယ်မြေတိုင်းနဲ့ မိတ်ဆွေဖွဲ့ရမယ့် အလုပ်ပဲလေ။ သူမရဲ့ ငယ်စဉ်ဘဝ အချိန်အတော်များများကိုတော့ စာအုပ်တွေ ဖတ်ရင်းနဲ့ သူမအဘွားဆီက ပညာဗဟုသုတတွေကို သင်ယူရင်း ကုန်ဆုံးခဲ့တယ်။ ဒါပေမဲ့ တစ်နေ့မှာတော့ မှော်ဆရာအချို့ဟာ တစ်ဖက်ကို နယ်ရုပ် ၁၆ ရုပ်စီနဲ့ ကစားရတဲ့ ရင်းနှီးနေတဲ့ ကစားနည်းတစ်ခုကို ကစားနေကြတာကို သူမ ရုတ်တရက် မြင်လိုက်ရတယ်။ အရင်ဘဝတုန်းက မှန်ရှေ့မှာ ဖျော်ဖြေပွဲအတွက် ကကွက်တွေ လေ့ကျင့်မနေတဲ့ အချိန်ဆိုရင် ယူနာက သူမရဲ့ ဖုန်းနဲ့ အွန်လိုင်းစစ်တုရင် ကစားရင်းပဲ အချိန်ကုန်ဆုံးခဲ့တာပါ။ ခန္ဓာကိုယ် ပင်ပန်းသွားတဲ့ အခါတိုင်းမှာလည်း ဦးနှောက်ကို လေ့ကျင့်ခန်းပေးတဲ့အနေနဲ့ စစ်တုရင်ကို နာရီပေါင်းများစွာ အချိန်ပေးပြီး ကစားတတ်တာပေါ့။ နောက်ဆုံးမှာတော့ သူမဟာ စစ်တုရင် ကစားတဲ့နေရာမှာ တကယ်ကို တော်တဲ့သူတစ်ယောက် ဖြစ်လာခဲ့တယ်။ ဒီဘဝမှာ စစ်တုရင်ကို ပြန်မြင်ရလိမ့်မယ်လို့ သူမ တစ်ခါမှ မထင်ထားခဲ့ပါဘူး။ ဒါပေမဲ့ အရင်ဘဝက တစ်စုံတစ်ယောက်က ဒီကမ္ဘာထဲကို ဒါကို မိတ်ဆက်ပေးခဲ့တာလို့တော့ သူမ မတွေးမိခဲ့ဘူး။ တခြား ပါရမီရှင် တစ်ယောက်ယောက်က တိုက်တိုက်ဆိုင်ဆိုင်ပဲ အလားတူကစားနည်းမျိုးကို တီထွင်လိုက်တာလို့ပဲ သူမ ထင်လိုက်တာပေါ့။ ဘာပဲဖြစ်ဖြစ် သူမကတော့ ဒီကမ္ဘာကို အရင်ကမ္ဘာနဲ့ တူညီတဲ့ အချက်အနည်းငယ်ပဲ ရှိပြီး မတူညီတာတွေ အများကြီး ရှိနေတဲ့ ပြိုင်ဘက်ကမ္ဘာတစ်ခုလို့ပဲ ယူဆထားတာကိုး။ ဒါနဲ့ သူမလည်း မှော်ဆရာတွေနဲ့ စစ်တုရင်ကစားခဲ့ပြီး ကစားတဲ့အကြိမ်တိုင်းမှာ သူတို့ကို အနိုင်ယူနိုင်ခဲ့တာပေါ့။ သူမက သူတို့နဲ့ လောင်းကြေးတောင် ထပ်ခဲ့သေးတယ်၊ အကယ်၍ သူတို့ ရှုံးသွားခဲ့ရင် သူမရဲ့ လူတစ်ပိုင်းသတ္တဝါ အစေခံတွေကို မှော်ပညာ အချို့ သင်ပေးရမယ်ဆိုပြီးတော့လေ။ နောက်ဆုံးမှာတော့ မှော်ဆရာတွေဟာ သင်ခန်းစာ ရသွားကြတော့တာပါပဲ။ သူတို့က သူမကိုလည်း မနိုင်ကြသလို လူတစ်ပိုင်းသတ္တဝါတွေကို ရိုးရှင်းတဲ့ မှော်ပညာတွေ သင်ပေးရတာကလည်း သူတို့အတွက် အင်အားတွေ အများကြီး ကုန်ဆုံးစေခဲ့တာကြောင့် သူမနဲ့ ဆက်ပြီး မကစားတော့ဖို့ ဆုံးဖြတ်လိုက်ကြတယ်။ သူမရဲ့ အစေခံတွေနဲ့ သစ္စာရှိတဲ့ မိတ်ဆွေတွေကို ပိုပြီး စွမ်းအားတွေ တိုးလာအောင် လုပ်ပေးချင်တာကြောင့် သူမဟာ နောက်ဆုံးမှာ ကင်းစ်နယ်မြေ ကို သွားဖို့ ဆုံးဖြတ်လိုက်တယ်။ အဲဒီမှာတော့ သူပိုင်ဆိုင်တဲ့ မှော်မျှော်စင်စာကြည့်တိုက်ထဲမှာ မန္တန်အမြောက်အမြား ရှိနေတဲ့အပြင် လောင်းကြေး အလွဲတွေ ထပ်တတ်တဲ့ အလေ့အထ ရှိတဲ့ ဆီဘက်စတီယန် အော့ဂင်ဒေါ ဆီကို သွားရှာဖို့ပေါ့။ သူမ မထွက်ခွာခင်မှာ အဘွားဖြစ်သူက သူမအနားကို လာပြီး ကမ္ဘာပေါ်မှာ အချမ်းသာဆုံး မိသားစုရဲ့ အငယ်ဆုံးသားဖြစ်တဲ့ သူမရဲ့ စေ့စပ်ထားသူ မိုက်ကယ် ဗန်ဒါဘစ် အကြောင်းကို ပြောပြခဲ့တယ်။ သေချာတာပေါ့၊ သူမကိုယ်တိုင် မဆုံးဖြတ်ခဲ့တဲ့ အစီအစဉ်တစ်ခုကို လိုက်နာဖို့ သူမမှာ အစီအစဉ် လုံးဝ မရှိပါဘူး။ ဒါတင်မကသေးဘဲ သူမက ကလေးခန္ဓာကိုယ်ထဲက လူကြီးတစ်ယောက် ဖြစ်နေတာကိုး။ ဒါကြောင့် သူမဟာ မိုက်ကယ်ကို တစ်ချက်လောက် သွားကြည့်ဖို့နဲ့ ဆိုးရွားတဲ့ အခြေအနေတွေ မဖြစ်လာခင်မှာ သူနဲ့ စေ့စပ်ထားတာကို အပြီးတိုင် ဖျက်သိမ်းဖို့ ဆုံးဖြတ်လိုက်တယ်။ သူမ ကင်းစ်နယ်မြေ ထဲကို ဝင်လိုက်တဲ့ အချိန်မှာတော့ ဒီလို အလယ်ခေတ်ကမ္ဘာမှာ လုံးဝမရှိသင့်တဲ့ အရာတွေကို တွေ့လိုက်ရတယ်။ လမ်းတွေက ကွန်ကရစ်လမ်းတွေ ဖြစ်နေပြီး ကျေးရွာတွေမှာလည်း ဘုံဘိုင်ခေါင်း တွေကနေ ရေတွေ ထွက်နေတာကို တွေ့ရတယ်။ အဆန်းဆုံးကတော့ လမ်းမတွေပေါ်မှာ နယ်မြေတစ်ခုလုံးကို ပျံ့နှံ့မောင်းနှင်နေတဲ့ ကားတွေပဲ ဖြစ်ပါတယ်။ ဒါဟာ ဒီကမ္ဘာမှာ၊ အထူးသဖြင့် တိုက်ကြီးရဲ့ တောရိုင်းမြေလို့ သတ်မှတ်ခံရတဲ့ ကင်းစ်နယ်မြေ မှာ လုံးဝ မရှိသင့်တဲ့ နည်းပညာ တိုးတက်မှုတွေ ဖြစ်နေတာပေါ့။ အဲဒီအချိန်မှာပဲ သူမ တစ်ခုခုကို သံသယဝင်လာခဲ့တယ်။ သူမရဲ့ အရင်ဘဝက တစ်စုံတစ်ယောက်ကလည်း ပြန်လည်ဝင်စားလာခဲ့ပြီး အရင်ကမ္ဘာက နည်းပညာတွေကို ဒီကမ္ဘာထဲကို ယူဆောင်လာခဲ့တာ ဖြစ်ရမယ်လို့ပေါ့။ သူမက ဒီဆန်းကြယ်တဲ့ ပြန်လည်ဝင်စားလာသူက ဘယ်သူလဲဆိုတာကို သိချင်နေခဲ့တာပါ။ ဒီမေးခွန်းကို ဖြေနိုင်မယ့် တစ်ဦးတည်းသောသူကတော့ နတ်ဘုရားမကိုယ်တိုင်ပါပဲ။ ဘုရားကျောင်းကို သွားရောက်ပြီး ဒီဘဝမှာ နတ်ဘုရားမနဲ့ ဒုတိယအကြိမ် တွေ့ဆုံချိန်မှာတော့ သူမ ရရှိခဲ့တဲ့ တစ်ခုတည်းသော အဖြေက "ဒီကမ္ဘာမှာ ပြန်လည်ဝင်စားလာသူ နောက်ထပ် တစ်ယောက်ပဲ ရှိတယ်" လို့ သူမက နောက်ပြောင်ချင်တဲ့ အပြုံးနဲ့ ပြောလိုက်တာပါ။ "ပြီးတော့ နင် သွားနေတဲ့ နေရာမှာပဲ သူ့ကို တွေ့ရလိမ့်မယ်" လို့လည်း ဆိုခဲ့တယ်။ ယူနာ က သူမဘာသာ ပြန်စဉ်းစားကြည့်လိုက်မိတယ်၊ ရီနေးတားနိုင်ငံတော်လား။ သူမ သိထားသင့်တာပါ။ အဲဒီနာမည်ကတင် အသိသာကြီးပဲလေ။ သူတို့က နာမည်ကြီး အန်နီမေး တစ်ခုထဲက ချစ်စရာကောင်းတဲ့ စလိုင်းမ် ဖတ်ချ် ကိုတောင် သေချာပေါက် ပုံတူယူထားတာပဲ။ အဲဒီအစီအစဉ်က တိုက်တိုက်ဆိုင်ဆိုင်ပဲ သူမ အကြိုက်ဆုံး တီဗီစီးရီးတွေထဲက တစ်ခုဖြစ်နေတာကိုး။ ပြီးတော့ သူမ ရီနေးတားနိုင်ငံတော်ကို ရောက်ဖို့ ခြောက်သွေ့လွင်ပြင်ဆီကို ခရီးနှင်ခဲ့တဲ့အခါမှာတော့ ဒီနေရာက ဘယ်လောက်အထိ တိုးတက်နေလဲဆိုတာကို ကြည့်ပြီး ပိုတောင် အံ့သြသွားရပြန်တယ်။ ဒါက သူမ အရင်ဘဝက တိုးတက်ဆဲနိုင်ငံတစ်ခုက ခေတ်မီမြို့တော်တစ်ခုနဲ့တောင် ပိုတူနေသေးတယ်။ လျှပ်စစ်မီးသီးတွေ၊ အဲကွန်းတွေ၊ ရေခဲသေတ္တာတွေနဲ့ အရေးကြီးဆုံးဖြစ်တဲ့ အိမ်သာတွေကို မြင်လိုက်ရတာက သူမကို ပျော်လွန်းလို့ မျက်ရည်တောင် ဝဲသွားစေခဲ့တာပေါ့။ လျှပ်စစ်ပစ္စည်းတွေဆီကနေပဲရနိုင်တဲ့ အဆင်ပြေမှုနဲ့ သက်သောင့်သက်သာရှိမှုတွေက သူမရဲ့ အရင်ကမ္ဘာကနေ လွမ်းမောနေခဲ့ရတဲ့ အရာတွေထဲက တစ်ခုပဲလေ။ ဒီဆန်းကြယ်တဲ့ ပြန်လည်ဝင်စားလာသူက ဘယ်သူလဲဆိုတဲ့ အဖြေကိုရဖို့အတွက်လည်း သိပ်မကြာလိုက်ပါဘူး။ အဲဒါကတော့ သူမရဲ့ စေ့စပ်ထားသူလို့ ပြောနေကြတဲ့ မိုက်ကယ် ဗန်ဒါဘစ်ပဲ ဖြစ်နေတာပေါ့။ ဒီလို တိုက်ဆိုင်မှုကို သူမ မယုံနိုင်အောင် ဖြစ်နေရတယ်။ တစ်ဦးတည်းသော ပြန်လည်ဝင်စားလာသူက သူမရဲ့ စေ့စပ်ထားသူလည်း ဖြစ်နေတယ် ဟုတ်လား။ သံသယ ဖြစ်စရာပဲ။ ဒါက နတ်ဘုရားမရဲ့ လက်ချက်တစ်ခုခု ဖြစ်ရမယ်လို့ သူမကို တွေးမိစေခဲ့တာပေါ့၊ အထူးသဖြင့် သူမကို သူ့အကြောင်း ဘာမှမပြောဘဲနဲ့ ဒီအတိုင်း ပြုံးပြီးကြည့်နေတဲ့ ပုံစံကို ကြည့်ခြင်းအားဖြင့်ပေါ့။ သူမက သူနဲ့ တွေ့ချင်နေခဲ့တာပါ။ ကံကောင်းတာက သူမ ဖျော်ဖြေဖို့အတွက် စင်တစ်ခုက အဆင်သင့် ရှိနေခဲ့ပြီးသားပဲလေ။ သူမက ဂစ်တာတစ်လုံး ငှားလိုက်ပြီး သူမရဲ့ အကျော်ကြားဆုံး သီချင်းတစ်ပုဒ်ကို စတင်တီးခတ် သီဆိုလိုက်ပါတယ်။ အဲဒီသီချင်းက ဂီတဝဘ်ဆိုက်တစ်ခုရဲ့ အဆင့်သတ်မှတ်ချက်မှာ အချိန်တိုင်းရဲ့ ထိပ်ဆုံးကို ရောက်ခဲ့ဖူးပြီး ၂၀ ပတ်ဆက်တိုက် ပထမနေရာကို ယူထားနိုင်ခဲ့တဲ့ သီချင်းပေါ့။ အဲဒီနောက်မှာတော့ သူ ပေါ်လာခဲ့တယ်။ တစ်ချက်ကြည့်လိုက်ရုံနဲ့တင် သူ ဒီသီချင်းကို မှတ်မိသွားပြီဆိုတာ သူမ သိလိုက်ပြီ။ ပြီးတော့ သူ့မျက်နှာပေါ်က အံ့သြသွားတဲ့ အမူအရာကို ကြည့်ပြီး ဒီကမ္ဘာမှာ နောက်ထပ် ပြန်လည်ဝင်စားလာသူ တစ်ယောက် ရှိသေးတယ်ဆိုတာကို သူလည်း မသိခဲ့ဘူးဆိုတာ သူမ နားလည်လိုက်ပါတော့တယ်။ * * * * * * * * * စာစဉ်(၁၂) အခန်း(၁၄၄) မိုက်ကယ်က စကားတစ်ခွန်းမှ မပြောနိုင်ဘဲ ယူနာကို ကြည့်နေမိတယ်။ သူအကြိုက်ဆုံး K-pop အိုင်ဒေါက သူ့လိုပဲ ဒီကမ္ဘာထဲကို ပြန်လည်ဝင်စားလာတာကို မြင်လိုက်ရတော့ သူ ခြေမကိုင်မိ လက်မကိုင်မိတောင် ဖြစ်သွားရတာပေါ့။ တစ်ဖက်မှာလည်း ယူနာက သီချင်းဆိုတာကို အဆုံးသတ်လိုက်ပြီး ပရိသတ်တွေကို ဦးညွှတ်နှုတ်ဆက်လိုက်တယ်။ သူမရဲ့ အဆိုတော်တစ်ယောက်အနေနဲ့ ရှိခဲ့တဲ့ အတွေ့အကြုံတွေက ဒီအချိန်မှာ ပေါ်လွင်လာပြီး သူမ စိတ်လှုပ်ရှားနေတာကို ဘယ်သူမှ မသိအောင် ကျော့ရှင်းတဲ့ အမူအရာနဲ့ စင်ပေါ်ကနေ ဆင်းသွားခဲ့တယ်။ သူမ စင်ပေါ်ကနေ ဆင်းသွားတဲ့အချိန်မှာ မိုက်ကယ်ကို မော့ကြည့်ပြီး သူမနောက်ကို လိုက်ခဲ့ဖို့ လက်ဟန်ခြေဟန် ပြလိုက်တယ်။ မိုက်ကယ်လည်း လေထဲကနေ ဖြည်းဖြည်းချင်း ဆင်းသက်လာပြီး သူတို့နှစ်ယောက်ထဲ သီးသန့် စကားပြောလို့ရမယ့် စင်နောက်ဘက်ကို လိုက်သွားခဲ့တာပေါ့။ ယူနာက နောက်ကို ချက်ချင်း လှည့်လိုက်ပြီး လက်နှစ်ဖက်ကို နောက်ပစ်ကာ ကိုယ်ကို အရှေ့ကို အနည်းငယ် ကိုင်းလိုက်တယ်။ "ရှင်က ကျွန်မရဲ့ ကမ္ဘာဟောင်းက လာတာလား" လို့ ယူနာက အင်္ဂလိပ်လို မေးလိုက်တယ်။ [သူမက မင်းကို မေးခွန်းတစ်ခု မေးနေတာလေ မိုက်ကယ်] နိုဗာ ရဲ့ အသံက သူ့ခေါင်းထဲမှာ မြည်ဟည်းသွားတော့မှပဲ မိုက်ကယ်တစ်ယောက် ငေးမှိုင်နေတာကနေ သတိပြန်ဝင်လာတော့တယ်။ "အာ... ဟုတ်ကဲ့။ တောင်းပန်ပါတယ်။ ကျွန်တော် နည်းနည်း ဇဝေဇဝါ ဖြစ်သွားလို့ပါ။ မင်းက ယူနာကင် မဟုတ်လား" လို့ သူက မေးလိုက်မိတယ်။ အခု မြင်နေရတဲ့ မိန်းကလေးနဲ့ K-pop အိုင်ဒေါရဲ့ ပုံရိပ်ကို သူ အခုထိ ပေါင်းစပ်ကြည့်လို့ မရသေးဘူးလေ။ ယူနာက ခေါင်းခါပြလိုက်တယ်။ "မဟုတ်ဘူး၊ အခု ကျွန်မက မောင့်ဂိုမာရီ တစ်ယောက်ပါ။ ရှင်ပြောတဲ့ ယူနာကင်က သေသွားပါပြီ"။ မိုက်ကယ်က သူမကို ကြည့်ပြီး အခုမှပဲ တစ်ခုခုကို သတိပြုမိသွားတယ်။ အကယ်၍ သူမက သူ့လိုပဲ ဒီကမ္ဘာမှာ ပြန်လည်ဝင်စားလာတာဆိုရင် ဒါက သူမ အရင်ကမ္ဘာမှာ သေဆုံးသွားခဲ့ပြီဆိုတဲ့ အဓိပ္ပာယ်ပဲပေါ့။ သူမ ဘယ်လိုပုံစံနဲ့ သေဆုံးသွားခဲ့လဲဆိုတာကိုတော့ မမေးတာ အကောင်းဆုံးပဲလို့ သူ သိထားပါတယ်။ ဒါပေမဲ့ သူ ထူးဆန်းတယ်လို့ ခံစားရတဲ့ အချက်တစ်ခုတော့ ရှိနေသေးတယ်။ ယူနာက ပြန်လည်ဝင်စားလာတာ ဆိုပေမဲ့ သူမရဲ့ မျက်နှာက အရင်အတိုင်းပဲ ဖြစ်နေပြီး ပိုပြီး နုပျိုနေတာပဲ ကွာခြားတာပါ။ အကယ်၍ သူမက အသက်ပိုကြီးနေမယ်ဆိုရင်တော့ သူမ တစ်နည်းနည်းနဲ့ မသေဘဲ ဒီကမ္ဘာကို ရောက်လာတာလို့ သူ ထင်မိမှာပေါ့။ တစ်ဖက်မှာတော့ သူကတော့ ခန္ဓာကိုယ်အသစ်နဲ့ မျက်နှာအသစ်ကို ရရှိထားပြီး အရင်ဘဝနဲ့ လုံးဝကို ကွဲပြားခြားနားနေတာပါ။ 'ငါ့ရဲ့ သေဆုံးမှုက မတော်တဆ ဖြစ်ခဲ့လို့လား' လို့ မိုက်ကယ်က နိုဗာ ကို မေးကြည့်ပေမဲ့ သူ့ရဲ့ ကိုယ်ပိုင် အေအိုင် အကူဆီမှာလည်း အဖြေ မရှိပါဘူး။ "ရှင် ဒီနေရာကို ပြုပြင်ပြောင်းလဲထားတာတွေကို ကျွန်မ တကယ် သဘောကျတယ်" လို့ ယူနာက သူတို့ပတ်ဝန်းကျင်က ခေတ်မီတဲ့ အဆောက်အဦးတွေကို ကြည့်ပြီး ပြောလိုက်တယ်။ "ကျွန်မလည်း လျှပ်စစ်မီးတွေကို ဖန်တီးချင်ခဲ့တာ၊ ဒါပေမဲ့ အဲဒါနဲ့ ပတ်သက်ပြီး ဘာမှ မသိလို့လေ" မိုက်ကယ်လည်း သူမလိုပါပဲ။ ကားတွေ ဘယ်လိုမောင်းနှင်သလဲဆိုတာ ဒါမှမဟုတ် အိမ်သာတွေ ဘယ်လိုအလုပ်လုပ်သလဲဆိုတဲ့ စက်မှုပိုင်းဆိုင်ရာတွေကို သူ ဘာမှမသိပါဘူး။ ဒါတွေအားလုံးက နိုဗာ ရဲ့ ကျေးဇူးတွေပေါ့။ "ကျွန်တော့်မှာ အကူအညီ ရှိလို့ပါ" လို့ သူက သူမကို ပြန်ဖြေလိုက်တယ်။ ယူနာက လမ်းလျှောက်နေရာက ရပ်လိုက်ပြီး သူ့ကို လှည့်ကြည့်လိုက်တယ်။ "နတ်ဘုရားမဆီက ရတဲ့ ဆုလာဘ် ဖြစ်ရမယ် မဟုတ်လား။ ကျွန်မမှာလည်း တစ်ခု ရှိပါတယ်။ ဒါပေမဲ့ ကျွန်မရဲ့ ဆုလာဘ်က တိုက်ခိုက်ရေးဘက်ကိုပဲ ပိုပြီး အားသန်နေတာ။ တစ်ခါတလေကျရင် ဒါက ကုဒ်ခိုးသုံးနေရသလိုမျိုး ခံစားရတယ် သိလား" "ဟုတ်ကဲ့၊ မင်း ခံစားချက်ကို ကျွန်တော် နားလည်ပါတယ်" လို့ မိုက်ကယ်က ပြုံးပြီး ပြောလိုက်တယ်။ သူ့ရဲ့ ခံစားချက်ကို အတိအကျ နားလည်ပေးနိုင်တဲ့သူတစ်ယောက်နဲ့ စကားပြောရတာ တကယ်ကို လန်းဆန်းစေတာပေါ့။ သူ့ရဲ့ မိဘတွေဖြစ်တဲ့ လိုင်လီယာနဲ့ ဘတ်ကို ဘယ်လောက်ပဲ ချစ်ပါစေ၊ သူက တခြားကမ္ဘာကနေ ပြန်လည်ဝင်စားလာသူ ဖြစ်တယ်ဆိုတာကိုတော့ သူ ထုတ်မပြောရဲပါဘူး။ သူတို့က သူ့ကို သူတို့သားလို့ မမြင်တော့ဘဲ သူ့နေရာကို အစာထိုး ဝင်ရောက်လာတဲ့ ဂြိုဟ်သားတစ်ယောက်လို့ ထင်သွားမှာကို သူ ကြောက်နေမိတာပါ။ "မင်းကော ကလေးဘဝနဲ့ပဲ ပြန်ဝင်စားလာတာလား" လို့ သူက သူမကို မေးလိုက်တယ်။ "တကယ်ကို ပျင်းစရာ ကောင်းတာရှင့်" လို့ သူမက မကျေမနပ် ညည်းညူလိုက်တယ်။ "ကျွန်မ စကားပြောတတ်တယ်ဆိုတာကို မိဘတွေကို ဖွင့်ပြောပြဖို့ လက်မတင်လေးပဲလိုတော့တာ။ သူတို့တွေရဲ့ တုံ့ပြန်မှုကို ကြည့်ပြီး အပျင်းဖြေချင်လို့လေ" မိုက်ကယ်က တဟားဟား ရယ်လိုက်တယ်။ သူလည်း အဲဒီလိုပဲ တွေးခဲ့ဖူးတာကိုး။ "ကျွန်တော်ကတော့ မှော်စွမ်းအင် စုဆောင်းရင်းနဲ့ပဲ အချိန်ကုန်လွန်စေခဲ့တာ" ယူနာက သူ့အနားကို လျှောက်လာပြီး သူ့ကို လက်ညှိုးနဲ့ ခပ်ဖွဖွ တွန်းလိုက်တယ်။ "လူလည်ကြီး။ ကျွန်မရဲ့ ပါရမီက ကိုယ်ခံပညာမှာပဲ ရှိတာဆိုတော့ ကလေးဘဝတုန်းက ဘာမှ လုပ်လို့မရဘူး။ ဟင်း... နတ်ဘုရားမ က ကျွန်မကိုလည်း ရှင့်လိုမျိုး ပါရမီမျိုးပဲ ပေးခဲ့ရင် ကောင်းမှာပဲ"။ မိုက်ကယ်က ပြုံးလိုက်ပြီး ဂုဏ်ယူဝင့်ကြွားတဲ့ အမူအရာနဲ့ ခေါင်းညိတ်လိုက်တယ်။ "ဟုတ်ပ။ နတ်ဘုရားမက ကျွန်တော့်အပေါ် အကြွေးနည်းနည်းတင်နေတာဆိုတော့ ကျွန်တော့်ဘဝကို ပိုပြီး သက်သောင့်သက်သာ ဖြစ်အောင် လုပ်ပေးခဲ့ရတာပေါ့။ ကျွန်တော် အသက် ငါးနှစ်အရွယ်မှာတင် ရေချိုးခန်းမှာသုံးတဲ့ ရေပန်းကို ဖန်တီးနိုင်ခဲ့တာလေ" ယူနာက လက်ပိုက်ပြီး နှုတ်ခမ်းဆူလိုက်တယ်။ "တကယ်ကို အားကျစရာပဲ" "အော်... ဟုတ်သားပဲ။ ဆပ်ပြာတွေလည်း ကျွန်တော် လုပ်ခဲ့သေးတယ်..." မိုက်ကယ်နဲ့ ယူနာတို့ဟာ ဒီဘဝမှာ ကြုံတွေ့ခဲ့ရတဲ့ အခက်အခဲတွေနဲ့ ပျော်ရွှင်စရာ အတွေ့အကြုံတွေအကြောင်းကို စတင်ပြောဆိုကြတော့တယ်။ သူတို့နှစ်ယောက်ဟာ နောက်ခံသမိုင်းကြောင်း လုံးဝ မတူညီကြပေမဲ့ တစ်ယောက်က တစ်နေ့လုံး အခန်းထဲမှာပဲ ပုန်းနေတတ်တဲ့ လူတောမတိုးတဲ့သူတစ်ယောက်ဖြစ်ပြီး၊ နောက်တစ်ယောက်ကတော့ လူသန်းပေါင်းများစွာရဲ့ ကိုးကွယ်အားပေးမှုကို ရရှိထားတဲ့ ဖော်ရွေသွက်လက်တဲ့ K-pop အိုင်ဒေါ တစ်ယောက် ဖြစ်ပေမဲ့လည်း မိုက်ကယ်ကတော့ သူမနဲ့ စကားပြောရတာ လုံးဝကို စိတ်မနေမကု ဖြစ်မနေပါဘူး။ 'ဒါကြောင့်လည်း သူမက လူတိုင်းရဲ့ ချစ်ခြင်းကို ရရှိနေတာ ဖြစ်ရမယ်။ သူမက တကယ်ကို စကားပြောလို့ ကောင်းတဲ့သူပဲ' လို့ မိုက်ကယ်က သူ့ဘာသာ တွေးလိုက်မိတယ်။ "ရှင် ရေခဲမုန့် လုပ်ပေးရမယ်နော်" လို့ ယူနာက မိုက်ကယ်ကို အတင်း တောင်းဆိုနေပါတော့တယ်။ "တောင်းပန်ပါတယ်။ ရှင် လုပ်ပေးမှ ဖြစ်မယ်။ ဒါက ရေခဲမုန့်လုပ်နိုင်တဲ့ တစ်ဦးတည်းသောသူ အနေနဲ့ ရှင့်ရဲ့ တာဝန်ပဲလေ" "ကျွန်တော် လုပ်ဖို့ စီစဉ်ထားပါတယ်" လို့ သူက သူမကို အလိုလိုက်တဲ့ အသံနဲ့ ပြောလိုက်တယ်။ "ဟေး... ကျွန်မကို လှောင်မနေနဲ့ဦး။ အလယ်ခေတ်ကမ္ဘာကြီးထဲမှာ ရှင်သန်နေရတာ တော်တော် ကြာနေပြီ၊ ရှင်ကတော့ ရှင့်နိုင်ငံတော်မှာ တော်တော်လေး သက်သောင့်သက်သာ နေနေရတာပဲ" လို့ သူမက သူ့ကို စိုက်ကြည့်ရင်း ပြောလိုက်တယ်။ "ဒါကြောင့်လည်း ကျွန်တော့်ရဲ့ ကုမ္ပဏီကို ကွင်းစ်နယ်မြေဘက်ကို တိုးချဲ့ဖို့ စီစဉ်နေတာပါ" လို့ သူက သူမကို ရှင်းပြလိုက်တယ်။ "အဲဒီမှာ ဘုံဘိုင်ခေါင်းတွေ၊ ကွန်ကရစ်တွေ၊ ပြီးတော့ ဖြစ်နိုင်ရင် လျှပ်စစ်မီးတွေကိုပါ စတင်ရောင်းချချင်လို့" ယူနာရဲ့ မျက်လုံးတွေက ဝိုင်းစက်သွားတယ်။ "ဟုတ်တယ် အဲဒါ တကယ့်ကို လုပ်သင့်တဲ့ အလုပ်ပဲ။ သိလား... ကျွန်မ ရှင့်ကို အခမဲ့တောင် ကူညီပေးပါ့မယ်။ ကျွန်မတို့ မိသားစုက အဆက်အသွယ်တွေကြောင့် တော်တော်လေး နာမည်ကြီးတာ ရှင်လည်း သိတာပဲ မဟုတ်လား" "တကယ်လား" လို့ မိုက်ကယ်က မျက်ခုံးပင့်ပြီး မေးလိုက်တယ်။ "ဒီလွန်ခဲ့တဲ့ ဆယ်နှစ်အတွင်းမှာ ကျွန်မ ဘာမှ မလုပ်ဘဲ ထိုင်နေခဲ့တာ မဟုတ်ဘူးနော်။ ဒီတိုက်ကြီးတစ်ခုလုံးရဲ့ နိုင်ငံရေး အခြေအနေတွေထဲမှာ နစ်မျောနေခဲ့တာဆိုတော့ နယ်မြေတိုင်းမှာ ဘယ်သူတွေက အဓိကလူတွေလဲဆိုတာ ကျွန်မ အကုန်သိတယ်။ ကျွန်မ ရှင့်ကို ကူညီနိုင်မယ်လို့ ထင်ပါတယ်။ သေချာတာပေါ့... အလဲအလှယ် တစ်ခုတော့ ရှိရမယ်။ ရေခဲမုန့် တစ်သေတ္တာလောက် ဆိုရင်တော့ လုံလောက်မှာပါ" လို့ ယူနာက လောဘတကြီး ပြောလိုက်တယ်။ သူမရဲ့ မျက်လုံးထဲမှာတော့ ကွတ်ကီးတွေ ရေခဲမုန့်တွေနဲ့ ပြည့်နှက်နေတာပေါ့။ မိုက်ကယ်က ခဏလောက် စဉ်းစားကြည့်လိုက်တယ်။ "အဲဒါက ကျွန်တော့်အတွက် တကယ့်ကို အများကြီး အထောက်အကူ ဖြစ်စေမှာပါ။ ကွင်းစ်နယ်မြေ ဘက်ကို သွားမယ့် ကျွန်တော်တို့ရဲ့ အဝေးပြေးလမ်းမကြီးကလည်း အခု အချောသပ်ဖို့ ပြင်ဆင်နေပြီလေ" အဲဒီအချိန်မှာပဲ ယူနာက မိုက်ကယ်နဲ့ ပတ်သက်ပြီး တစ်ခုခုကို သတိပြုမိသွားတယ်။ "ရှင်ကတော့ ရှင့်ရဲ့ ဆုလာဘ် စွမ်းရည်ကပဲ ရှင့်အတွက် အရာရာကို လုပ်ပေးနေတာလို့ ပြောပေမဲ့၊ ရှင် လူပု မိုင်းလုပ်သားများ နဲ့ မဟာမိတ်ဖွဲ့နိုင်ခဲ့တာကတော့ အဲဒီစွမ်းရည်နဲ့ မဆိုင်ဘူးလို့ ကျွန်မ ထင်တယ်" လို့ သူမက အလေးအနက် ပြောလိုက်တယ်။ "လူပုတွေအကြောင်း ကျွန်မ သိသလောက်ဆိုရင် သူတို့က ရုပ်ဝတ္ထုပစ္စည်းတွေကို ဂရုစိုက်တဲ့သူတွေ မဟုတ်ဘူး။ နဂါးတွေက သူတို့ကို ရွှေတွေ အမြောက်အမြားနဲ့ ကမ်းလှမ်းခဲ့ဖူးတယ်။ နတ်သူငယ်တွေကလည်း မှော်ပညာနဲ့ ကမ်းလှမ်းခဲ့တယ်။ လူသားတွေကတော့ နှစ်မျိုးစလုံးနဲ့ ကြိုးစားခဲ့တာပေါ့။ ဒါပေမဲ့ ဘယ်သူမှ မအောင်မြင်ခဲ့ကြဘူး။ ရှင် တစ်ယောက်တည်းပဲ အောင်မြင်ခဲ့တာ။ အဲဒါကို ရှင် ဘယ်လို လုပ်ခဲ့တာလဲ" မိုက်ကယ်က ပုခုံးတွန့်ပြလိုက်တယ်။ "အမှန်အတိုင်း ပြောရရင် ကျွန်တော် ဘာမှကို မလုပ်ခဲ့ရပါဘူး" ဒါပေမဲ့ ယူနာကတော့ ဒါဟာ အမှန်တရား မဟုတ်ဘူးဆိုတာ သိနေပါတယ်။ ကင်းစ်နယ်မြေ ရဲ့ လူ့အဖွဲ့အစည်းတိုင်းမှာ လူတစ်ပိုင်းသတ္တဝါတွေကို ဒီလောက်အထိ လက်ခံလာအောင် လုပ်နိုင်ခဲ့တာကတင် မိုက်ကယ်ဟာ လူပုတွေ သဘောကျပြီး သူတို့ရဲ့ တံခါးတွေကို ဖွင့်ပေးလာအောင် တစ်ခုခုကို ဖန်တီးပေးခဲ့တယ်ဆိုတာ သိသာနေတာပေါ့။ မိုက်ကယ်က သူကိုယ်တိုင်ဟာ သာမန်လူတစ်ယောက်ပါလို့ ဘယ်လိုပဲ ပြောနေပါစေ၊ ယူနာကတော့ အဲဒီလို မတွေးပါဘူး။ * * * * * * *