အခန်း (၂၃-၂၄)

အခန်း (၂၃) စွန့်စားခြင်း

သတိပေးချက်များ ပျောက်ကွယ်သွားပြီးနောက် အခန်းထဲတွင် တိတ်ဆိတ်ငြိမ်သက်သွားသည်။

"ဟက်... ဒီနေရာမှာ သေတဲ့အထိ ပိတ်လှောင်ခံရမယ်ဆိုတာကို ငါမယုံဘူး"

ဆုရှောင်သည် ကြမ်းပြင်ပေါ်တွင် ထိုင်ချလိုက်ပြီး ပြန်လည်ဝင်စားခြင်းသုခဘုံနှင့် အချိန်ဆွဲရန် ပြင်လိုက်သည်။

ယခု သူတစ်ခုကိုတော့ နားလည်သွားပြီဖြစ်သည်။ သူ၏သိုလှောင်အိတ်ထဲရှိ 'ကမ္ဘာ့သစ်ပင်လက်စွပ်' သည် အလွန်တန်ဖိုးကြီးမားသော ပစ္စည်းတစ်ခုဖြစ်ကြောင်းကိုပင်။

'ကမ္ဘာ့သစ်ပင်လက်စွပ်' ၏ အကဲဖြတ်ချက် '' ကို ကြည့်ခြင်းအားဖြင့် ပြန်လည်ဝင်စားခြင်းသုခဘုံသည် ထိုပစ္စည်း၏တန်ဖိုးကို ဖော်ပြလိုခြင်းမရှိကြောင်း အလွယ်တကူ သိမြင်နိုင်သည်။

[ ပြန်လည်ဝင်စားခြင်းသုခဘုံမှ ကမ္ဘာ့စွမ်းအားများကို စုပ်ယူနိုင်ရန်အတွက် ကမ္ဘာ့သစ်ပင်လက်စွပ်အား ရောင်းချပေးပါရန် အမဲလိုက်သူအား ပန်ကြားအပ်ပါသည် ]

သတိပေးချက် ထပ်မံပေါ်လာသောအခါ ဆုရှောင် စဉ်းစားလိုက်ပြီး မေးမြန်းလိုက်သည်။

"ငါ့ကို ကမ္ဘာတွေဆီ ပို့ဆောင်တာ မင်းမှာ ဘာရည်ရွယ်ချက်ရှိလို့လဲ။ ပြီးတော့ ဒီလက်စွပ်က အတိအကျ ဘာကြီးလဲ"

မျှော်လင့်မထားသည်မှာ ပြန်လည်ဝင်စားခြင်းသုခဘုံက သူ့အား အဖြေပေးလာခြင်းပင်ဖြစ်သည်။

[ ပြန်လည်ဝင်စားခြင်းသုခဘုံနှင့် အမဲလိုက်သူတို့သည် 'အပြန်အလှန် မှီခိုနေရသော' ဆက်ဆံရေးမျိုးဖြစ်သည်။ အမဲလိုက်သူ (သို့မဟုတ်) အခြားသော စာချုပ်ချုပ်ဆိုသူများသည် သွေဖီသွားသောကမ္ဘာများသို့ ဝင်ရောက်စူးစမ်းလေ့လာပြီး ကမ္ဘာ့အရင်းအမြစ်များကို ရယူကြသည်။ ပြန်လည်ဝင်စားခြင်းသုခဘုံအနေဖြင့် ဆင့်ကဲပြောင်းလဲရန်နှင့် ပုံမှန်လည်ပတ်နိုင်ရန်အတွက် ကမ္ဘာ့စွမ်းအားများ လိုအပ်သည် ]

[ ကမ္ဘာ့သစ်ပင်လက်စွပ်အတွင်း၌ ကမ္ဘာ့စွမ်းအားများ အမြောက်အမြားပါဝင်နေသဖြင့် အမဲလိုက်သူအား ချက်ချင်းရောင်းချပေးပါရန် ပန်ကြားအပ်ပါသည် ]

[ အောက်ပါအကြောင်းအရာများကို ခွင့်ပြုချက်အဆင့်အတန်း မလုံလောက်သဖြင့် ကြည့်ရှုခွင့်မရှိပါ ]

ပြန်လည်ဝင်စားခြင်းသုခဘုံက ပေးသော အချက်အလက်များ နည်းပါးသော်လည်း အရေးကြီးဆုံး အချက်တစ်ချက်ကို ဆုရှောင် နားလည်သွားသည်။

ပြန်လည်ဝင်စားခြင်းသုခဘုံသည် သူ့အား သွေဖီသွားသောကမ္ဘာများဆီသို့ ပို့ဆောင်ရခြင်း၏ အဓိကရည်ရွယ်ချက်မှာ သူ့ထံမှတစ်ဆင့် ကမ္ဘာ့စွမ်းအားများကို ရယူလိုသောကြောင့်ဖြစ်သည်။

ထိုကမ္ဘာ့စွမ်းအားဆိုသည်မှာ ကမ္ဘာ့အရင်းအမြစ်များမှတစ်ဆင့် ထုတ်ယူခြင်းဖြစ်လောက်သည်။ ထို့ကြောင့်ပင် ပြန်လည်ဝင်စားခြင်းသုခဘုံက ကမ္ဘာ့အရင်းအမြစ်ပမာဏအပေါ် မူတည်ပြီး သူ့အား ဆုလာဘ်များ ပေးအပ်ခြင်းဖြစ်သည်။

ပြန်လည်ဝင်စားခြင်းသုခဘုံသည် စည်းမျဉ်းတစ်ခုခုကို လိုက်နာဆောင်ရွက်နေခြင်းဖြစ်လောက်သည်။ ထို့ကြောင့်သာ 'ကမ္ဘာ့သစ်ပင်လက်စွပ်' ကို အတင်းအကျပ်မသိမ်းယူဘဲ သူ့အား ရောင်းချရန် တိုက်တွန်းနေခြင်းဖြစ်သည်။

သူ၏အမဲလိုက်သူအဆင့်အတန်းကလည်း တစ်ချက်ကို ဖော်ပြနေသည်။ ယင်းမှာ ပြန်လည်ဝင်စားခြင်းသုခဘုံသည် ပုံမှန်အခြေအနေမျိုးတွင် စာချုပ်ချုပ်ဆိုသူများကို သတ်ဖြတ်ပိုင်ခွင့် မရှိခြင်းပင်ဖြစ်သည်။

ပြန်လည်ဝင်စားခြင်းသုခဘုံ၏ စည်းမျဉ်းများကို မချိုးဖောက်သရွေ့ သူ့အား အပြစ်ပေးခွင့်မရှိပေ။ သူ့ကိုသာမက အခြားသော စာချုပ်ချုပ်ဆိုသူများကိုလည်း ထိုနည်းလည်းကောင်းပင်ဖြစ်သည်။ ထို့ကြောင့်သာ အမဲလိုက်သူဆိုသော အဆင့်အတန်း ပေါ်ပေါက်လာခြင်းဖြစ်သည်။

အမဲလိုက်သူဆိုသည်မှာ သွေဖီသွားသောကမ္ဘာများအတွင်း၌ 'စည်းမျဉ်းချိုးဖောက်' သော်လည်း ပြန်လည်ဝင်စားခြင်းသုခဘုံ၏ စည်းမျဉ်းများကို မချိုးဖောက်သော စာချုပ်ချုပ်ဆိုသူများကို ဖြေရှင်းပေးရန်ဖြစ်သည်။

ဥပမာအားဖြင့် စာချုပ်ချုပ်ဆိုသူတစ်ဦးက ပြန်လည်ဝင်စားခြင်းသုခဘုံ၏ စည်းမျဉ်းဟာကွက်များကို ရှာတွေ့ပြီး ကိုယ်ကျိုးရှာမည်ဆိုပါစို့။ ထိုအချိန်တွင် ဆုရှောင်၏အခန်းကဏ္ဍက စတင်လာပြီဖြစ်သည်။

စဉ်းစားကြည့်စရာပင်မလိုဘဲ ထို 'စည်းမျဉ်းချိုးဖောက်' သော စာချုပ်ချုပ်ဆိုသူများသည် အလွန်စွမ်းအားကြီးမားပြီး ဉာဏ်နီဉာဏ်နက်များကြမည်မှာ သေချာသည်။

ဆုရှောင်သည် ကြမ်းပြင်ပေါ်တွင် ဆက်လက်ထိုင်နေပြီး နဂါးသတ်ဓားကို ပေါ့ပေါ့ပါးပါးပင် ကစားနေသည်။

သူ့တွင် ရဲတင်းသော အကြံအစည်တစ်ခု ရှိနေသည်။ ယင်းမှာ ပြန်လည်ဝင်စားခြင်းသုခဘုံကို အကျပ်ကိုင်ရန်ပင်ဖြစ်သည်။

အပြင်ပန်းတွင် ကိုယ့်သေတွင်းကိုယ်တူးနေသည်ဟု ထင်ရသော်လည်း သူ၏အမဲလိုက်သူအဆင့်အတန်းကြောင့် ပြန်လည်ဝင်စားခြင်းသုခဘုံသည် သူ့အား ဘာမှလုပ်မည်မဟုတ်ပေ။

ဆုရှောင်က လောင်းကြေးထပ်နေခြင်းဖြစ်သည်။ သူ၏အမဲလိုက်သူအဆင့်အတန်းသည် အရေးပါမှုရှိမရှိ ဆိုသည်ကို စမ်းသပ်နေခြင်းဖြစ်သည်။ အကယ်၍ အရေးမပါပါက သူ အိပ်မက်ဆိုးအဆင့်ရှိသော ကမ္ဘာကို ဖြတ်သန်းခဲ့ရသည်မှာ အလဟဿဖြစ်သွားမည်မဟုတ်ပါလား။

အချိန်များ တစ်မိနစ်ပြီးတစ်မိနစ် ကုန်ဆုံးသွားရာ နောက်ဆုံး နှစ်နာရီအကြာတွင် ပြန်လည်ဝင်စားခြင်းသုခဘုံ၏ သတိပေးချက်က သူ၏မျက်စိရှေ့တွင် ပေါ်လာလေသည်။

[ အထူးတာဝန် - ရွေးချယ်မှု ]

အခက်အခဲအဆင့်။ ။

တာဝန်ဖော်ပြချက်။ ။ ကမ္ဘာ့သစ်ပင်လက်စွပ်ကို ပြန်လည်ဝင်စားခြင်းသုခဘုံသို့ ပေးအပ်ရန်။

တာဝန်အချက်အလက်။ ။ မရှိပါ။

အချိန်ကန့်သတ်ချက်။ ။ ၅ မိနစ်။

တာဝန်ဆုလာဘ်။ ။ အမဲလိုက်သူ၏ ပါရမီနှင့် အလွန်ကိုက်ညီမှုရှိသော အမွေအနှစ်။

ဆုရှောင်၏မျက်နှာပေါ်တွင် အပြုံးတစ်ခု ဖြစ်ပေါ်လာသည်။ သူ၏အမဲလိုက်သူအဆင့်အတန်းမှာ သူထင်ထားသည်ထက် ပိုမိုအရေးပါကြောင်း သိလိုက်ရသည်။ ပြန်လည်ဝင်စားခြင်းသုခဘုံက တာဝန်တစ်ခုကိုပင် ဖန်တီးပေးခဲ့သည် မဟုတ်ပါလား။

ခေတ္တမျှစဉ်းစားပြီးနောက် ဆုရှောင်သည် ထိုတာဝန်ကိုလက်ခံရန် ရွေးချယ်လိုက်သည်။

အေးစက်စက်နိုင်သော ပြန်လည်ဝင်စားခြင်းသုခဘုံ၏ သဘောထားကို ဆုရှောင်လည်း အသေအချာ မသိသေးပေ။ သူသည် နောင်တွင် ပြန်လည်ဝင်စားခြင်းသုခဘုံ၌ ဆက်လက်ရှင်သန်ရဦးမည်ဖြစ်သည်။

[ အထူးတာဝန် - ရွေးချယ်မှု ပြီးဆုံးပါပြီ။ ဆုလာဘ်များပေးအပ်ရန် ပြင်ဆင်နေပါပြီ။ အမဲလိုက်သူ ကြိုတင်ပြင်ဆင်ထားပါရန် ]

"ပြင်ဆင်ထားပါရန် ဟုတ်လား... ဒီဆုလာဘ်က သာမန်မဟုတ်ဘူးဆိုတာ သေချာသွားပြီ”

ပြန်လည်ဝင်စားခြင်းသုခဘုံ၏ သတိပေးချက် ထွက်ပေါ်လာပြီးနောက် အခန်းထဲတွင် အလင်းရောင်တစ်ချက် ဖြာထွက်လာပြီး ဆုရှောင်ကို လွှမ်းခြုံသွားလေသည်။

ဆုရှောင်သည် နေရာတွင်ပင် မလှုပ်မယှက်ထိုင်နေပြီး အရှေ့သို့ ငေးမောကြည့်နေသည်။ သူ၏မျက်လုံးများသည် အသက်မဲ့နေပြီး အပြာရောင်အလင်းတန်းများ ရံဖန်ရံခါ လက်ခနဲ ဖြတ်သန်းသွားသည်။

ယခုအချိန်တွင် ဆုရှောင်၏အသိစိတ်သည် အတိုင်းအဆမဲ့သော ခန်းမဆောင်ကြီးတစ်ခုသို့ ရောက်ရှိနေပြီဖြစ်သည်။

ခန်းမဆောင်ကြီးမှာ အဆုံးအစကိုပင် မမြင်ရလောက်အောင် ကျယ်ဝန်းလှသည်။

ဆုရှောင်သည် ပတ်ဝန်းကျင်ကို ကြည့်ရှုလိုက်ရာ သူ့ရှေ့တွင် မီတာတစ်ရာကျော်မြင့်မားသော ကျောက်ရုပ်ကြီးခြောက်ခု ရှိနေသည်ကို တွေ့လိုက်ရသည်။ ထိုကျောက်ရုပ်များသည် လူသားပုံစံများဖြစ်သော်လည်း အကြိမ်ပေါင်းများစွာ ကြီးမားအောင် ပြုလုပ်ထားခြင်းဖြစ်သည်။

"အမွေဆက်ခံသူ... ရှေ့သို့ တိုးလာခဲ့ပါ"

ခမ်းနားကြီးကျယ်သော အသံတစ်ခု ထွက်ပေါ်လာရာ ဆုရှောင် တစ်ကိုယ်လုံး တောင့်တင်းသွားသည်။ ထိုအသံမှာ သူ့ရှေ့ရှိ ကျောက်ရုပ်ကြီးတစ်ခုဆီမှ ထွက်ပေါ်လာခြင်းဖြစ်သည်။

"ဟိုတုန်းက ကတိကဝတ်တွေ အကောင်အထည်ဖော်ရမယ့်အချိန် ရောက်လာပြီပဲ"

နောက်ထပ် ကျောက်ရုပ်ကြီးတစ်ခုက စကားပြောလာသည်။ ဆုရှောင်၏ရောက်ရှိလာမှုသည် ဆက်တိုက်တုံ့ပြန်မှုများကို ဖြစ်ပေါ်စေသကဲ့သို့ ကျောက်ရုပ်ကြီးခြောက်ခုစလုံး စကားပြောလာကြသည်။

"မင်းက နောက်ဆုံးအမွေဆက်ခံသူပဲ၊ ဒီနေ့ကစပြီး ငါတို့ရဲ့ အမွေအနှစ်တွေ မင်းဆီမှာ အဆုံးသတ်သွားပြီ"

"ငါတို့တွေ အချိန်ရေစီးကြောင်းထဲမှာ ပျောက်ကွယ်သွားရမလား... ဒါမှမဟုတ် ဟိုမှော်ဆရာတွေ ပျောက်ကွယ်သွားရမလားဆိုတာကို မင်းက သက်သေပြရလိမ့်မယ်"

"မှော်ဆရာတွေက ကမ္ဘာကြီးနဲ့ သဘာဝတရားရဲ့ မျှတမှုကို ဖျက်ဆီးနေကြတယ် အဲဒီမှော်ပညာတွေက နိယာမစွမ်းအားတွေကို ဖြုန်းတီးနေတာပဲ"

"မိုက်မဲတဲ့ မှော်ဆရာတွေ... ငါတို့ရဲ့ ခန္ဓာကိုယ်တွေ ပျက်စီးသွားရင်တောင် အသိစိတ်က ထာဝရ ရှင်သန်နေဦးမှာပဲ"

ဆုရှောင်သည် နေရာတွင်ပင် မတ်တပ်ရပ်နေပြီး ခေါင်းတစ်ခုလုံး ကြက်သီးမွေးညှင်းများ ထနေသည်။ သူ့ရှေ့မှ စကားပြောနေသော ကျောက်ရုပ်ကြီးများသည် သူထင်မှတ်ထားသည်ထက် ပိုမိုစွမ်းအားကြီးမားလှသည်။

ထို့အပြင် ထိုကျောက်ရုပ်များသည် သက်ရှိများမဟုတ်ကြဘဲ အလွန်စွမ်းအားကြီးမားသော ပုဂ္ဂိုလ်များ ချန်ရစ်ခဲ့သည့် အသိစိတ်များသာဖြစ်သည်။

"ဖျက်ဆီးခြင်း၊ မွေးဖွားခြင်း၊ ပျက်သုဉ်းခြင်း၊ ပြန်လည်နိုးထခြင်း အားလုံးက ဒီ 'မွေးဖွားရာ သန့်ရှင်းသောနေရာ' မှာ ရှိတယ်"

"အမွေဆက်ခံသူ... မင်းနဲ့ငါတို့ ပိုင်ဆိုင်တဲ့ ဘုံနာမည်ကို မှတ်ထားပါ... ငါတို့က နိယာမဖျက်ဆီးသူရဲ့ အရိပ်တွေပဲ... မှော်ဆရာအားလုံးရဲ့ သဘာဝရန်သူတွေပဲ"

ကျောက်ရုပ်ကြီးခြောက်ခုစလုံး တစ်ပြိုင်နက်တည်း မျက်လုံးပွင့်လာပြီး ဆုရှောင်ကို ကြည့်လိုက်ကြသည်။ သူ၏ခန္ဓာကိုယ်ထဲသို့ ပြင်းထန်သောစွမ်းအားများ ဝင်ရောက်လာသည်ကို ခံစားလိုက်ရပြီးနောက် မူးဝေသွားကာ နားထဲတွင် အူသံများ ထွက်ပေါ်လာလေတော့သည်။

......

"ဟူး... ဟူး... ဟူး..."

အခန်းထဲရှိ ဆုရှောင် ပြန်လည်သတိရလာပြီး အသက်ကို ပြင်းပြင်းရှူနေရသည်။

သူ သီးသန့်အခန်းထဲတွင် ရှိနေဆဲဖြစ်သည်။ စောစောက ဖြစ်ပျက်ခဲ့သမျှသည် စိတ်ကူးယဉ်အိပ်မက်တစ်ခုလိုပင်။

[ ဆုလာဘ်ပေးအပ်မှု ပြီးဆုံးပါပြီ။ သီးသန့်အခန်းကို စတင်အသုံးပြုနိုင်ပါပြီ ]

ပြန်လည်ဝင်စားခြင်းသုခဘုံ၏ သတိပေးချက် ထွက်ပေါ်လာပြီးနောက် သီးသန့်အခန်း၏ နံရံတစ်ဖက်တွင် တံခါးပေါက်တစ်ခု ပေါ်လာသည်။ ယင်းက သူ နောက်ဆုံးတော့ အပြင်ထွက်ခွင့်ရပြီဟု ဆိုလိုခြင်းဖြစ်သည်။

သို့သော် ဆုရှောင်သည် ထိုအရာများကို ဂရုမစိုက်နိုင်တော့ပေ။ သူ၏ ခန္ဓာကိုယ်ထဲ၌ စွမ်းအားများ ပြည့်နှက်နေပြီး ပေါက်ကွဲထွက်တော့မတတ် ခံစားနေရသည်။

"ဘာ... ဘာဖြစ်တာလဲ..."

ဆုရှောင်မှာ စကားပင် ကောင်းကောင်းမပြောနိုင်တော့ချေ။ ခန္ဓာကိုယ်တွင်းရှိ စွမ်းအားများက သူ၏ ရုပ်သွင်ကို လျင်မြန်စွာ ပြောင်းလဲပေးနေသည်။

သွေးများ အရှိန်အဟုန်ဖြင့် စီးဆင်းနေပြီး ထိုအမည်မသိ စွမ်းအားများက သူ၏ ခန္ဓာကိုယ်ကို ဖျက်ဆီးနေခြင်းမဟုတ်ဘဲ အလွန် ကြမ်းတမ်းသော နည်းလမ်းဖြင့် ကြံ့ခိုင်လာစေရန် ပုံသွင်းပေးနေခြင်းဖြစ်သည်။

ခန္ဓာကိုယ်တွင်းရှိ ဆဲလ်များ အပြောင်းအလဲ ဖြစ်ပေါ်နေပြီး အသိသာဆုံးသော အပြောင်းအလဲမှာ သူ၏ ဆံပင်များပင်ဖြစ်သည်။ အနက်ရောင် ဆံပင်များက တဖြည်းဖြည်း ငွေရောင်သန်းလာသော်လည်း အလွန်တရာ သိသာထင်ရှားလှခြင်းတော့ မရှိပေ။

ဘုတ်ခနဲ အသံနှင့်အတူ ဆုရှောင်သည် ကြမ်းပြင်ပေါ်သို့ ပျော့ခွေကျသွားသည်။ သူ ဆက်လက် တောင့်ခံနိုင်တော့မည် မဟုတ်ကြောင်း ခံစားလိုက်ရပြီး ထိုအတိုင်းသာ ဆက်သွားနေပါက မကြာမီ အသက်ပျောက်သွားနိုင်ပေသည်။

[ အမဲလိုက်သူ၏ အသက်ရှူနှုန်းနှင့် နှလုံးခုန်နှုန်း ပုံမှန်မဟုတ်ကြောင်း ထောက်လှမ်းသိရှိရပါသည်။ ကုသရေးစနစ်ကို စတင်ရန် ပြင်ဆင်နေပါသည်... ထိုစနစ်သည် အမဲလိုက်သူ ပိုင်ဆိုင်သော သုခဒင်္ဂါးများကို ကုန်ကျစေမည်ဖြစ်ပါသည်။ စတင်မည် / မစတင်ပါ ]

ယခုအချိန်တွင် ပြန်လည်ဝင်စားခြင်းသုခဘုံ၏ အသံသည် ဆုရှောင်၏ နားထဲ၌ အေးစက်စက်နိုင်ခြင်း မရှိတော့ဘဲ နတ်သမီး၏ အသံနှယ် သာယာနေတော့သည်။

"စတင်... လိုက်..."

ဆုရှောင်၏ စကားသံအဆုံးတွင် အစိမ်းရောင် အလင်းတန်းများက သူ့ကို လွှမ်းခြုံသွားပြီး တစ်ချိန်တည်းမှာပင် သူ၏ သုခဒင်္ဂါးများ လျင်မြန်စွာ လျော့ကျသွားလေသည်။

ငါးစက္ကန့်မျှပင် မကြာလိုက်သော အချိန်အတွင်း၌ပင် ကုသရေးစနစ်က သုခဒင်္ဂါး တစ်ထောင်ကျော်ကို ကုန်ကျသွားစေခဲ့သည်။

သို့သော် ခန္ဓာကိုယ်အနှံ့ ပြည့်နှက်နေသော ပြင်းထန်သည့် နာကျင်မှုများက သူ၏ အသိစိတ်ကို ဝါးမြိုတော့မည့်ဆဲဆဲတွင် ကုသရေးစနစ်က ကယ်တင်လိုက်ခြင်းဖြစ်သည်။

ဆယ်စက္ကန့်ကျော် ကြာပြီးနောက် ခန္ဓာကိုယ်ထဲရှိ စွမ်းအားများ ပျောက်ကွယ်သွားကာ ဆုရှောင်၏ ခန္ဓာကိုယ်က အားလုံးကို စုပ်ယူလိုက်ပြီဖြစ်သည်။ ကုသရေးစနစ်လည်း ရပ်တန့်သွားလေသည်။

ဆုရှောင် ထိုင်လိုက်ပြီး ခန္ဓာကိုယ်ကို လှုပ်ရှားကြည့်လိုက်ရာ ထူးခြားချက်ကို ချက်ချင်း သတိထားမိလိုက်သည်။

"ဒါက..."

သူသည် မိမိ၏ လက်နှစ်ဖက်ကို မယုံကြည်နိုင်စွာ ကြည့်ရှုနေမိသည်။ ထိုစွမ်းအားများကို စုပ်ယူပြီးနောက် သူ အနည်းငယ် ပိုမို သန်မာလာသကဲ့သို့ ခံစားလိုက်ရ၏။

မဟုတ်သေး... အဆပေါင်းများစွာ ပိုမို သန်စွမ်းလာခြင်းဖြစ်သည်။

သို့သော် ထိုကဲ့သို့ စွမ်းအားတိုးတက်လာခြင်းသည် ပြန်လည်ဝင်စားခြင်းသုခဘုံ၏ အကူအညီကြောင့် မဟုတ်သဖြင့် စနစ်က သတိပေးချက် မထုတ်ပြန်ခြင်းပင်။

'ကိုယ်ရေးအချက်အလက်' ကို ဖွင့်ကြည့်လိုက်ရာ ဆုရှောင် နေရာမှာတင် မင်တက်သွားလေတော့သည်။

ထို 'ကမ္ဘာ့သစ်ပင်လက်စွပ်' နှင့် လဲလှယ်လိုက်ရသော ဆုလာဘ်မှာ သူထင်ထားသည်ထက် ပိုမို၍ အံ့သြစရာကောင်းနေလေသည်။

အခန်း (၂၄) မျှော်လင့်မထားသောသူ

စာချုပ်ချုပ်ဆိုသူအမှတ် ၁၃၀၁၃။ (မုဆိုးအား ကာကွယ်ရန်အတွက် ထိုအမည်မှာ နာမည်ဝှက်သာဖြစ်သည်။ မည်သည့်နည်းလမ်းနှင့်မျှ မုဆိုးကို ခြေရာခံ၍မရနိုင်ပါ)

အမည် - ဆုရှောင် (မုဆိုး)

အဆင့် - LV.2 (အဆင့် ၁)။ (၁၀ ဆင့်တက်တိုင်း အဆင့်တစ်ဆင့်ဟု သတ်မှတ်သည်။ အဆင့်တက်ခြင်းကြောင့် မည်သည့်စွမ်းရည်မျှ တိုးလာမည်မဟုတ်ဘဲ 'သုခဘုံ' အတွင်းရှိ မုဆိုး၏ လုပ်ပိုင်ခွင့်ကိုသာ ကိုယ်စားပြုသည်။ ကမ္ဘာ၏အခက်အခဲအဆင့်၊ တာဝန်အခက်အခဲအဆင့် အစရှိသည်တို့နှင့် သက်ဆိုင်သည်)

သက်စောင့်စွမ်းအား - ၁၀၀ ရာခိုင်နှုန်း။ (ထိုအချက်အလက်ကို ကိန်းဂဏန်းများဖြင့် အတိအကျဖော်ပြ၍မရနိုင်ဘဲ ဒဏ်ရာရရှိမှုအခြေအနေပေါ်မူတည်၍ ပြောင်းလဲမည်ဖြစ်သည်။)

မာနစွမ်းအင် - ၁၅၃။ (ဉာဏ်ရည် x ၁၀၊ လက်ရှိ မာနစွမ်းအင် ပြန်လည်ပြည့်ဝနှုန်း - တစ်နာရီလျှင် ၄ မှတ်)

ခွန်အား - ၁၂။ (တိုက်ခိုက်နိုင်စွမ်း၊ အလေးချိန်သယ်ဆောင်နိုင်စွမ်း အစရှိသည်တို့နှင့် သက်ဆိုင်သည်)

အမြန်နှုန်း - ၁၀။ (ရွေ့လျားမှု၊ တိုက်ခိုက်မှုအမြန်နှုန်း အစရှိသည်တို့နှင့် သက်ဆိုင်သည်)

ခံနိုင်ရည် - ၆။ (သက်စောင့်စွမ်းအား၊ ကာကွယ်နိုင်စွမ်း၊ ပုံမှန်မဟုတ်သောအခြေအနေများကို ခုခံနိုင်စွမ်း အစရှိသည်တို့နှင့် သက်ဆိုင်သည်)

ဉာဏ်ရည် - ၁၂။ (မှော်တိုက်ခိုက်နိုင်စွမ်း၊ မာနစွမ်းအင်၊ အာရုံခံနိုင်စွမ်း အစရှိသည်တို့နှင့် သက်ဆိုင်သည်)

ဆွဲဆောင်မှု - ၃။ (လူမှုဆက်ဆံရေး၊ ဆင့်ခေါ်ခြင်း အစရှိသည်တို့နှင့် သက်ဆိုင်သည်)

ကံကောင်းခြင်း - ၁။ (ပစ္စည်းများဖွင့်ခြင်း၊ ထုတ်လုပ်ခြင်း အစရှိသည်တို့နှင့် သက်ဆိုင်သည်။ ထိုစွမ်းရည်မှာ တိုးတက်ရန် အလွန်ခဲယဉ်းသဖြင့် မုဆိုးအနေဖြင့် တိုးတက်နိုင်မည့် အခွင့်အရေးကို တန်ဖိုးထားပါရန်)

မှတ်ချက် - အရွယ်ရောက်ပြီးသော သာမန်အမျိုးသားတစ်ဦး၏ စံသတ်မှတ်ချက်စွမ်းရည်မှာ ၅ မှတ်ဖြစ်ပြီး ကံကောင်းခြင်းမှာ ၁ မှတ်ဖြစ်သည်။

သတ်ဖြတ်မှုပါရမီ - ဝိညာဉ်ဝါးမျိုသူ။ ပစ်မှတ်ကို သတ်ဖြတ်ပြီးနောက် မာနစွမ်းအင် ၁ မှတ်မှ ၁၅ မှတ်အထိ အမြဲတမ်း ရယူနိုင်မည်။ ထိုပါရမီသည် ကမ္ဘာတစ်ခုလျှင် အများဆုံး မာနစွမ်းအင် ၁၀၀ မှတ်သာ ရယူနိုင်သည်။

......

နိယာမဖျက်ဆီးသူ၏အရိပ် အမွေအနှစ်ကို ရရှိပြီးနောက် ဆုရှောင်၏စွမ်းရည်များမှာ မိုးနှင့်မြေကဲ့သို့ ကွာခြားသွားခဲ့သည်။

ခွန်အားသည် မူလ ၇ မှတ်မှ ၁၂ မှတ်သို့ မြင့်တက်သွားသည်။

အမြန်နှုန်းမှာလည်း အပြောင်းအလဲကြီးမားလှပြီး မူလ ၇ မှတ်မှ ၁၀ မှတ်သို့ တိုးတက်လာသည်။

ဉာဏ်ရည်မှာလည်း မူလ ၆ မှတ်မှ ၁၂ မှတ်သို့ တိုးတက်လာသည်။

ခွန်အားနှင့် အမြန်နှုန်း တိုးတက်လာမှုက ချက်ချင်းပင် သိသာထင်ရှားလာခဲ့သည်။

ဆုရှောင်သည် လက်သီးတစ်ချက်ကို စမ်းသပ်ထိုးချလိုက်ရာ လေကိုခွဲထွက်သွားသောအသံ ထွက်ပေါ်လာပြီး ထိုလက်သီး၏အရှိန်အဟုန်သည် ယခင်ကထက် အဆပေါင်းများစွာ ပိုမိုပြင်းထန်နေသည်။

ရှေ့သို့ ခြေလှမ်းအနည်းငယ်မျှ စမ်းသပ်ပြေးကြည့်လိုက်ရာ သူ ချက်ချင်းရပ်တန့်လိုက်ရသည်။ အဘယ်ကြောင့်ဆိုသော် နံရံနှင့် ဝင်တိုက်မိလုနီးပါး ဖြစ်သွားသောကြောင့်ဖြစ်သည်။ ရုတ်တရက် မြင့်တက်လာသော အမြန်နှုန်းကြောင့် သူ အနည်းငယ် အသားမကျသေးခြင်းဖြစ်သည်။

ရုတ်တရက် တိုးပွားလာသော ထိုခွန်အားက သူ၏နှလုံးခုန်သံကို မြန်ဆန်စေသည်။

ဝမ်းပိစ်ကမ္ဘာတွင်သာ ယခုကဲ့သို့ စွမ်းရည်မျိုးရှိခဲ့ပါက ဘုရင်ကိုလုပ်ကြံခြင်းမှာ လက်ခမောင်းခတ်ရုံမျှမက အလွန်လွယ်ကူနေမည်ဖြစ်သည်။ သုံးရက်တောင် အချိန်ယူစရာမလိုဘဲ ခြောက်နာရီလောက် အချိန်ပေးရုံဖြင့် အောင်မြင်နိုင်မည်ဖြစ်သည်။

ထိုသည်ကား ခွန်အားကြီးမားခြင်းပင်ဖြစ်သည်။ မည်မျှပင် မူးယစ်စေလိုက်သနည်း။ အသက်ပေး၍ ရှာဖွေရမည်ဆိုလျှင်ပင် တန်ဖိုးရှိလှပေသည်။

သို့သော် ရုတ်တရက် မြင့်တက်လာသော စွမ်းရည်များကို သူ အသားကျစေရန် အချိန်အနည်းငယ် ယူရဦးမည်ဖြစ်သည်။ ယခုချက်ချင်း တိုက်ခိုက်ခိုင်းပါက သူ အလွန်အဆင်မပြေ ဖြစ်နေလိမ့်မည်။

ယခုစွမ်းရည်များကို အသားကျသွားသည်နှင့် သူ၏တိုက်ခိုက်နိုင်စွမ်းသည် အလွန်ကြောက်မက်ဖွယ်ကောင်းသော အဆင့်သို့ ရောက်ရှိသွားမည်ဖြစ်သည်။

"နိယာမဖျက်ဆီးသူ၏အရိပ် ဟုတ်လား။ တကယ်ကို အံ့သြစရာကောင်းတဲ့ ရလဒ်ပဲ”

ကိုယ်ရေးအချက်အလက်များကို ပိတ်ရန်ပြင်လိုက်စဉ် သူ၏စွမ်းရည်ရွေးချယ်မှုအကွက်သည် တဖျပ်ဖျပ်လင်းလက်နေသည်ကို ရုတ်တရက် သတိပြုမိလိုက်သည်။

စွမ်းရည်မျက်နှာပြင်ကို ဖွင့်ကြည့်လိုက်ရာ အပြောင်းအလဲများစွာ ဖြစ်ပေါ်နေသည်။ မူလက ဗလာဟင်းလင်းဖြစ်နေသော နေရာတွင် စွမ်းရည်သစ်ပင်တစ်ပင် ပေါ်လာသည်။

ပြန်လည်ဝင်စားခြင်းသုခဘုံ၏ သတိပေးချက် ထွက်ပေါ်လာသည်။

[ မုဆိုးသည် 'နိယာမဖျက်ဆီးသူ၏အရိပ်' (တစ်ဦးတည်းသော အတန်းအစား) ကို ရရှိခဲ့သောကြောင့် စွမ်းရည်စာရင်းများ အလိုအလျောက် ပြောင်းလဲသွားပါသည်။ ]

နိယာမဖျက်ဆီးသူ၏အရိပ် (တစ်ဦးတည်း)

စွမ်းရည် (၁)

သံမဏိပြာအရိပ် - LV.1 (အသုံးပြုရသော စွမ်းရည်)

အသုံးပြုရန် လိုအပ်ချက် - [သံမဏိပြာအရိပ်] ကို ဖွင့်ထားပြီးပါက မုဆိုးသည် တစ်မိနစ်လျှင် မာနစွမ်းအင် ၂ မှတ် ကုန်ဆုံးမည်။ မာနစွမ်းအင် ၁ ရာခိုင်နှုန်းထက် နည်းသွားပါက အလိုအလျောက် ပိတ်သွားမည်။

စွမ်းရည် အကျိုးသက်ရောက်မှု - [သံမဏိပြာအရိပ်] ကို ဖွင့်ထားပြီးနောက် အနီးကပ်တိုက်ခိုက်မှုတိုင်းသည် ရန်သူ၏ မာနစွမ်းအင် ၁၀ မှတ်ကို ဖျက်ဆီးပစ်မည်ဖြစ်ပြီး တူညီသောပမာဏအတိုင်း အစစ်အမှန်ထိခိုက်မှုကို ဖြစ်ပေါ်စေမည်။ ရန်သူသည် မာနစွမ်းအင် လောင်ကျွမ်းသွားပြီးနောက် ပြင်းထန်သော နာကျင်မှုကို ခံစားရမည်။

......

စွမ်းရည် (၂)

ဓားပညာကျွမ်းကျင်မှု - LV.1 (အလိုအလျောက် စွမ်းရည်)

စွမ်းရည် အကျိုးသက်ရောက်မှု - အနီးကပ်တိုက်ခိုက်နိုင်စွမ်း ၁၀ ရာခိုင်နှုန်း တိုးလာမည်ဖြစ်ပြီး ဓားအမျိုးအစား လက်နက်များကို အသုံးပြုရာတွင် ပိုမိုကျွမ်းကျင်လာမည်။

(မှတ်ချက် - နည်းစနစ်ပိုင်းဆိုင်ရာ စွမ်းရည်များကို အခြေခံ၊ ကျွမ်းကျင်၊ အထူးကျွမ်းကျင်၊ ဆရာတစ်ဆူ အစရှိသည်ဖြင့် အဆင့်များ ခွဲခြားထားသည်။ အဆင့်မြင့်လေလေ တိုးတက်နိုင်စွမ်း ပိုများလေလေဖြစ်သည်။ အထူးကျွမ်းကျင်အဆင့် စွမ်းရည်ကို ရရှိနိုင်ရန် အလွန်ခဲယဉ်းသည်။)

......

စွမ်းရည် (၃)

မှော်အတတ်ကိုဖြတ်တောက်နိုင်သောခန္ဓာကိုယ် - Lv.MAX။

စွမ်းရည် အကျိုးသက်ရောက်မှု - မှော်ပညာအမျိုးအစား စွမ်းရည်အားလုံးကို တတ်မြောက်နိုင်ခြင်း / သင်ယူနိုင်ခြင်း မရှိတော့ပါ။

......

စွမ်းရည် (၄) - မပွင့်သေးပါ။ ဖွင့်ရန်အတွက် ဝိညာဉ်ခရစ်စတယ်(အသေး) ၁ ခု နှင့် သုခဒင်္ဂါး ၁၀၀၀ လိုအပ်သည်။

......

ဆုရှောင်သည် မိမိ ယခင်က ဘာတွေရရှိခဲ့သလဲဆိုတာကို နားလည်သွားသည်။ သူသည် ပြီးပြည့်စုံသော အတန်းအစားအမွေအနှစ်တစ်ခုကို ရရှိခဲ့ခြင်းဖြစ်သည်။

ထိုအတန်းအစားကို 'နိယာမဖျက်ဆီးသူ၏အရိပ်' ဟု ခေါ်ဆိုပြီး အထက်ပါစွမ်းရည်အချို့ကို ကြည့်ခြင်းအားဖြင့် ထိုအတန်းအစားသည် မှော်ဆရာအမျိုးအစားများ၏ သဘာဝရန်သူဖြစ်ကြောင်း ဆုရှောင် ရိပ်မိလိုက်သည်။

'သံမဏိပြာအရိပ်' ကို ဖွင့်ထားပြီးနောက် သူ၏ အနီးကပ်တိုက်ခိုက်မှုတိုင်းသည် ရန်သူ၏ မာနစွမ်းအင်ကို လောင်ကျွမ်းစေမည်ဖြစ်သည်။

မှော်ဆရာတစ်ယောက်တွင် မာနစွမ်းအင် မရှိတော့ပါက အသုံးမကျသောလူတစ်ယောက်သာ ဖြစ်သွားမည်ဖြစ်ပြီး တုတ်ဖြင့်ရိုက်ရုံသာ တတ်နိုင်တော့မည်။

သို့သော် ဆုရှောင် နားမလည်သည်မှာ ပြန်လည်ဝင်စားခြင်းသုခဘုံတွင် မှော်ဆရာဆိုသော သက်ရှိများ တကယ်ရှိမရှိ ဆိုသည်ကိုပင်ဖြစ်သည်။

နိယာမဖျက်ဆီးသူ၏အရိပ်သည် စွမ်းရည်များကို များစွာတိုးတက်စေရုံသာမက အလွန်အစွမ်းထက်သော စွမ်းရည်နှစ်ခုကိုလည်း သင်ယူနိုင်စေခဲ့သော်လည်း ဆိုးကျိုးမရှိသည်တော့ မဟုတ်ပေ။ နောင်တွင် သူသည် မှော်ပညာအမျိုးအစား စွမ်းရည်များကို သင်ယူနိုင်တော့မည်မဟုတ်ပေ။

ယခုအချိန်တွင် ထိုအရာများကို စဉ်းစားရန် စောလွန်းသေးသည်။ နိယာမဖျက်ဆီးသူ၏အရိပ်၏ စတုတ္ထမြောက်စွမ်းရည်ကို ဖွင့်ရန်လည်း ဆုရှောင် မလောသေးပေ။ သူသည် ပြန်လည်ဝင်စားခြင်းသုခဘုံ၏ အသွင်သဏ္ဍာန်ကို အရင်ဆုံး ကြည့်ရှုချင်သေးသည်။

အခန်းတံခါးကို တွန်းဖွင့်လိုက်ရာ ဆူညံသော လူသံများ ထွက်ပေါ်လာပြီး ပြန်လည်ဝင်စားခြင်းသုခဘုံ၏ ပုံပန်းသဏ္ဍာန်သည် သူ၏မျက်စိရှေ့တွင် ပေါ်လာသည်။

ကြီးမားသော အဆောက်အအုံများစွာသည် ဆုရှောင်၏ အမြင်အာရုံထဲသို့ ဝင်ရောက်လာသည်။ ထိုအဆောက်အအုံများ၏ ပုံစံမှာ အမျိုးမျိုး ကွဲပြားနေသည်။ အချို့မှာ သတ္တုဖြင့် ပြုလုပ်ထားပြီး အချို့မှာ အုတ်ခဲများဖြင့် တည်ဆောက်ထားသည်။ အချို့မှာမူ သက်ရှိသတ္တဝါတစ်ကောင်ကဲ့သို့ ဖြစ်နေပြီး မျက်နှာပြင်မှ အရည်များပင် ရံဖန်ရံခါ စိမ့်ထွက်နေသည်။

ထိုကဲ့သို့သော အဆောက်အအုံများ တန်းစီနေသဖြင့် ပြန်လည်ဝင်စားခြင်းသုခဘုံတွင် လမ်းမများ အသွယ်သွယ် ဖြစ်ပေါ်နေသည်။

အထက်ကောင်းကင်သို့ မော့ကြည့်လိုက်ရာ ပြန်လည်ဝင်စားခြင်းသုခဘုံ၏အမိုးတွင် နို့နှစ်ရောင်အလွှာပါးလေးတစ်ခု ရှိနေသည်။ မှောက်ထားသော ဇလုံကြီးတစ်ခုကဲ့သို့ ပြန်လည်ဝင်စားခြင်းသုခဘုံတစ်ခုလုံးကို လွှမ်းခြုံထားသည်။

ခြေအောက်ရှိ မြေပြင်မှာ အဝါနုရောင် ဂျယ်လီကဲ့သို့ အရာဝတ္ထုတစ်မျိုးဖြစ်သည်။ မပျော့အိသော်လည်း အလွန်ပြန့်ပြူးနေသည်။

ပြန်လည်ဝင်စားခြင်းသုခဘုံ၏ ဧရိယာမှာ အလွန်ကျယ်ဝန်းသည်။ အနည်းဆုံးတော့ ဆုရှောင် အဆုံးအစကို မမြင်ရပေ။

လမ်းမများပေါ်တွင် ဝတ်စားဆင်ယင်မှုအမျိုးမျိုးရှိသော လူအုပ်ကြီး သွားလာနေကြသည်။ အချို့က သံချပ်ကာအပြည့် ဝတ်ဆင်ထားပြီး အချို့က မှော်တုတ်ကို ကိုင်ဆောင်ကာ ဝတ်ရုံရှည်များ ဝတ်ဆင်ထားကြသည်။ ထိုသူများမှာ မှော်ဆရာပုံစံ အတိအကျပင်ဖြစ်သည်။

သူသည် တစ်နေရာရာရှိ ကော့စ်ပလေး (Cosplay) ပွဲတော်တစ်ခုထဲသို့ ဝင်ရောက်လာသကဲ့သို့ ခံစားလိုက်ရသည်။ ထူးထူးဆန်းဆန်း ဝတ်စားဆင်ယင်ထားသူများ အဆက်မပြတ် ပေါ်လာသည်။

အချို့က လမ်းဘေးတွင် ထိုင်ချလိုက်ပြီး ရှေ့တွင် ကော်ဇောလေးခင်းကာ ဈေးရောင်းနေကြသည်။

"အဖြူရောင် အဆင့် ၆ သေနတ်၊ သုခဒင်္ဂါး ၇၀၀၊ ပိုက်ဆံမရှိရင် လစ်စမ်း”

"သက်စောင့်စွမ်းအား ၅ ရာခိုင်နှုန်း ပြန်လည်ပြည့်ဝစေတဲ့ ဆေးရည်၊ သုခဒင်္ဂါး ၁၀၀၀၊ သုံးပုလင်းနဲ့အထက်ဆိုရင် ၂၀ ရာခိုင်နှုန်း လျှော့ပေးမယ်”

"မှော်ဆရာရဲ့ ကာကွယ်မှုအတွက် ဈေးကောင်းပေးမယ်။ ကျွန်တော့်ရဲ့ နောက်ကမ္ဘာ အခက်အခဲအဆင့်က Lv.3 ပါ၊ ဈေးညှိလို့ရတယ်”

ထိုလူများ၏ အပြောအဆိုများက ဆုရှောင်ကို ရင်းနှီးသောခံစားချက်ကို ရရှိစေသည်။ ၎င်းက ပြန်လည်ဝင်စားခြင်းသုခဘုံရှိ ထိုလူများအားလုံးသည် လက်တွေ့ကမ္ဘာမှ လာကြခြင်းဖြစ်နိုင်ကြောင်း ခန့်မှန်းမိစေသည်။

ဥပမာအားဖြင့် "လစ်စမ်း"၊ "မှော်ဆရာ" စသည့် စကားလုံးများကို သွေဖီသွားသောကမ္ဘာများတွင် ကြားရခဲသည်။

ဆုရှောင်သည် အခန်းထဲမှ ထွက်လာပြီး ပြန်လည်ဝင်စားခြင်းသုခဘုံတွင် လမ်းလျှောက်နေသည်။ ထိုနေရာကို သူ အမြန်ဆုံး နားလည်ရန် လိုအပ်သည်။

"ဟေး အစ်ကို၊ ကျွန်တော့် ပစ္စည်းလေးတွေ ကြည့်ပါဦး။ တကယ် ဈေးပေါပါတယ်။ ကျွန်တော် သွေဖီသွားတဲ့ကမ္ဘာထဲကို မကြာခင် ဝင်ရတော့မှာမို့လို့ အသက်ကယ်ဖို့ သုခဒင်္ဂါးတွေ အရေးတကြီး လိုနေလို့ပါ”

ဝတ်စုံပြည့် ဝတ်ဆင်ထားပြီး မျက်နှာတွင် မြူခိုးများ ဖုံးလွှမ်းနေသော အမျိုးသားတစ်ဦးက ဆုရှောင်ကို လှမ်းခေါ်လိုက်သည်။

ဆုရှောင် ဘေးသို့ ကြည့်လိုက်ရာ တစ်ဖက်သူက မျက်နှာကို ဖုံးကွယ်ထားခြင်းမရှိသော်လည်း ထိုသူ၏ ရုပ်သွင်ကို သူ မည်သို့မျှ ရှင်းလင်းစွာ မမြင်ရကြောင်း တွေ့လိုက်ရသည်။

ဝတ်စုံပြည့် အမျိုးသား၏ ဈေးဆိုင်ရှေ့တွင် ရပ်တန့်လိုက်ပြီး ထိုသူရောင်းချနေသော ပစ္စည်းများကို ဆုရှောင် စတင်ကြည့်ရှုလိုက်သည်။

ကုန်ပစ္စည်းများအားလုံးကို အနက်ရောင်အဝတ်စပေါ်တွင် တင်ထားသည်။ အခြားသူများ လုယူသွားမည်ကို အနည်းငယ်မျှ စိုးရိမ်ပုံမရပေ။

ဆုရှောင်သည် ပစ္စည်းတစ်ခုကို ကောက်ကိုင်လိုက်ရာ အကြောင်းရင်းကို ချက်ချင်းနားလည်သွားသည်။

[ သားရဲအရိုး ]

အရည်အသွေး - အဖြူရောင် အမျိုးအစား - ကုန်ကြမ်း အဆင့်သတ်မှတ်ချက် - ၁ (မှတ်ချက် - အဖြူရောင်ကုန်ကြမ်းများ၏ အဆင့်သတ်မှတ်ချက်မှာ ၁ မှ ၁၀ အထိဖြစ်ပြီး အဆင့်သတ်မှတ်ချက် မြင့်မားလေလေ ထိုကုန်ကြမ်းသည် ပိုမိုတန်ဖိုးကြီးလေလေဖြစ်သည်။) ဖော်ပြချက် - သာမန်သားရဲကောင်များ၏ အရိုးများ။

[ ထိုပစ္စည်းသည် အခြားသူ၏ ပိုင်ဆိုင်မှုဖြစ်သဖြင့် တစ်မီတာ အကွာအဝေးအတွင်းမှ ယူဆောင်သွား၍မရပါ။ သိုလှောင်အိတ်ထဲသို့ ထည့်သွင်း၍မရပါ။ ပိုင်ဆိုင်ခွင့် ရရှိရန် ဝယ်ယူရမည်။ ]

......

ပြန်လည်ဝင်စားခြင်းသုခဘုံတွင် ကုန်ပစ္စည်းများရောင်းချခြင်းသည် အာမခံချက်တစ်ခု ရှိနေပုံရသည်။

သို့သော် အမှန်အတိုင်းပြောရလျှင် ဝတ်စုံပြည့်အမျိုးသား၏ရှေ့ရှိ ပစ္စည်းများအားလုံးသည် သိပ်ပြီး မကောင်းလှပေ။

"ဒီပစ္စည်းက တကယ်ပဲ အသုံးဝင်လို့လား”

ဝတ်စုံပြည့်အမျိုးသားသည် ရှက်ကိုးရှက်ကန်း ရယ်မောလိုက်သော်လည်း မျက်နှာတွင်မူ အနည်းငယ် မကျေနပ်သော အရိပ်အယောင်များ ပေါ်လာသည်။

"ဒါက ကျွန်တော် အသက်ကိုရင်းပြီးမှ ရလာတာ။ အဲဒီကြံ့ကို သတ်ဖို့အတွက် ကျွန်တော် သေလုမတတ် ဖြစ်ခဲ့ရတာ”

"ဒီလိုလုပ်ပါ အစ်ကို၊ သုခဒင်္ဂါး ၃၀ ထားလိုက်။ ဒီသားရဲအရိုးက အဆင့်သတ်မှတ်ချက် မမြင့်ပေမဲ့ လက်နက်လုပ်တဲ့ ကုန်ကြမ်းပါ”

ဆုရှောင် ခေါင်းခါလိုက်ပြီး သားရဲအရိုးကို ချထားကာ ဆက်လက် လမ်းလျှောက်သွားသည်။

"ဟေး... ဟိုဘက်က လူသစ်၊ ဟုတ်တယ်၊ ရှင်ပဲ”

အဖြူရောင်ဝတ်စုံဝတ်၊ မျက်လုံးအပြာရောင်နှင့် မိန်းကလေးတစ်ယောက်က ဆုရှောင်ကို လှမ်းခေါ်လိုက်သည်။ ထိုမိန်းကလေး၏ ပုံပန်းသဏ္ဍာန်ကို သေချာမြင်လိုက်ရသောအခါ ဆုရှောင် အနည်းငယ် မှင်သက်သွားသည်။

"ကန်... ကန်နား လား”

[Footnote: ထိုအခန်းတွင်ပါဝင်သော ကန်နား (Kanna) ဆိုသည်မှာ ဂျပန်အန်နီမေးရှင်း Miss Kobayashi's Dragon Maid (ကိုဘာယာရှီဆန်၏ နဂါးအိမ်ဖော်မလေး) ဇာတ်လမ်းမှ နဂါးမလေးဇာတ်ကောင်ဖြစ်ပါသည်။ သူမသည် ချစ်စရာကောင်းပြီး အစားအသောက်မက်မောသော စရိုက်လက္ခဏာရှိသည့်အတွက် ထင်ရှားပါသည်။]