အခန်း (၁၃၅-၁၃၆)

🍋 Chapter 135

သူတို့နှစ်ယောက်သည် အပြန်အလှန် စကားပြောရင်း အတော်လေး ရင်းနှီးလာကြသည်။

ထိုစဉ်မှာပင် အသက်လတ်ပိုင်း အမျိုးသမီးတစ်ဦး အခန်းထဲသို့ ဝင်လာသည်။

"လာ၊ ရှောင်ကျိုး။ မင်းကို မိတ်ဆက်ပေးရဦးမယ်။ ဒါကတော့ ငါ့ဇနီး ဝမ်ရှောင်ပဲ။"

"ဒါကတော့ ထျန်းချိုင်နည်းပညာရဲ့ သူဌေး မစ္စတာကျိုးထျန်းပဲ။ သူက ဒီနေ့ ကျွန်တော်တို့ အောင်ပွဲခံတဲ့ပွဲကို တက်ရောက်ပြီး ပူးပေါင်းဆောင်ရွက်ဖို့ ဆွေးနွေးဖို့ ရောက်လာတာ"

ဝမ်ရှောင်ဆိုသော အမျိုးသမီးကို ကျိုးထျန်း ကောင်းကောင်းမှတ်မိသည်။

သူမသည် ဓာတ်ပုံထဲတွင် သူ၏နာရီကို ပတ်ထားသော အမျိုးသမီးပင် ဖြစ်သည်။

သူသည် သူမ လက်ကောက်ဝတ်ကို သေချာကြည့်ပြီးသား ဖြစ်သည်။

သို့သော် သူမသည် ယနေ့တွင် ထိုနီလာနာရီကို ပတ်မထားဘဲ တန်ဖိုး ယွမ် ၁၀၀,၀၀၀ အောက်သာရှိသည့် Cartier Ballon Bleu နာရီကိုသာ ပတ်ထားသည်။

'သူမက အရေးကြီးတဲ့ပွဲတွေမှပဲ အဲ့ဒီနာရီကို ပတ်တာ ဖြစ်လိမ့်မယ်'

သူသည် ထိုင်ခုံမှ ထကာ ဝမ်ရှောင်နှင့် လက်ဆွဲနှုတ်ဆက်လိုက်သည်။ သူမကလည်း ယဉ်ယဉ်ကျေးကျေးပင် နှုတ်ဆက်ကာ ဝင်ထိုင်လိုက်သည်။

"မစ္စတာကျိုးကို တွေ့ရတာ ဝမ်းသာပါတယ်။ ကျွန်မတို့ကုမ္ပဏီကို မကြာခဏ လာလည်ပေးပါ။ ဒီနေ့က လမ်းမှာ ကားပိတ်နေလို့ နည်းနည်းနောက်ကျသွားတယ်၊ အပြစ်မမြင်ပါနဲ့နော်"

"မဖြစ်ပါဘူးဗျာ။ မစ္စတာဝေနဲ့ တွေ့ရတာကိုက ကျွန်တော့်အတွက် ဂုဏ်ယူစရာပါ"

ဝမ်ရှောင်က သူမ၏ခင်ပွန်းကို တစ်ချက်ကြည့်လိုက်သည်။

"ဆွေးနွေးတာ အဆင်ပြေရဲ့လား"

"အဆင်ပြေတာပေါ့။ မစ္စတာကျိုးက တော်တော် ရက်ရောတာ၊ ကုမ္ပဏီနှစ်ခုရဲ့ အားသာချက်တွေကို ပေါင်းစပ်ပြီး စီမံကိန်းအသစ် လုပ်ကြမယ်တဲ့။ တော်တော် သတင်းကောင်းပဲ! နောက်နှစ် ကိုယ်တို့ကုမ္ပဏီရဲ့ စွမ်းဆောင်ရည်က မစ္စတာကျိုးအပေါ်မှာပဲ မူတည်နေတော့မှာ"

ချီးမွမ်းစကားများ တရစပ် ပြောနေကြသဖြင့် ကျိုးထျန်းက အလိုက်သင့် ပြုံးပြလိုက်သည်။

"နှစ်ယောက်လုံးကလည်း ချီးကျူးလွန်းပါတယ်"

"အစ်မ ဝမ်ရှောင်၊ အစ်မက တကယ်ကို နုပျိုတာပဲ၊ ကိုယ့်ကိုယ်ကိုယ် သေချာ ဂရုစိုက်ထားပုံရတယ်"

"အို... ဒီလောက်ပါပဲရှင်၊ ရံဖန်ရံခါ အလှပြင်ပေးရုံပါပဲ"

"အော်... ဟုတ်သားပဲ၊ ကျွန်တော့်ရည်းစား မွေးနေ့က ရက်ပိုင်းအတွင်း ရှိလာတော့မှာ။ နာရီလက်ဆောင်ပေးဖို့ စဉ်းစားထားလို့ပါ။ မိန်းကလေးသုံး နာရီအကြောင်း သိပ်မသိလို့ အစ်မရှောင်ဆီက အကြံဉာဏ်လေးများ ရနိုင်မလား"

ကျိုးထျန်း စကားကို အဓိကအချက်ဆီ တဖြည်းဖြည်း ရောက်အောင် ဆွဲခေါ်သွားသည်။

"ဟားဟား၊ မိန်းကလေးသုံး နာရီအကြောင်း ပြောရရင်တော့ အစ်မ နည်းနည်း သိတယ်နော်။ အစ်မ အကြိုက်ဆုံးကတော့ Cartier ပဲ၊ သူတို့ရဲ့ ကျောက်မျက်နာရီတွေက အရမ်းလှတယ်၊ အရသာရှိတယ်"

နာရီအကြောင်း ပြောလိုက်သည်နှင့် ဝမ်ရှောင်၏မျက်လုံးများ တောက်ပလာကာ စိတ်လှုပ်ရှားသွားသည်ကို ကျိုးထျန်း သတိထားမိလိုက်သည်။

"အော်... ကျွန်တော့်ရည်းစားလည်း Cartier နာရီတွေကို သဘောကျပုံရတယ်။ အစ်မရှောင်ပြောတာ တည့်တည့်ပဲ! ဘယ်နာရီတွေကို ဝယ်သင့်လဲဆိုတာကိုတော့ မသိဘူး"

ကျိုးထျန်း နည်းနည်းပါးပါး သိဟန်ဆောင်ကာ သူမ၏ အကြံဉာဏ်ကို တောင်းဆိုလိုက်သည်။

"သာမန်ဆိုရင်တော့ အစ်မပတ်ထားတဲ့ Ballon Bleu ပုံစံမျိုး ဝယ်ပေးပါ။ ဂန္ထဝင်ဆန်တယ်၊ ဈေးနှုန်းလည်း သင့်တင့်တယ်၊ နေ့တိုင်း ပတ်ဖို့ကောင်းတယ်။ ပွန်းပဲ့သွားရင်တောင် ပြုပြင်ခ မကြီးဘူးလေ"

"မင်းရည်းစားက ပိုမြင့်တဲ့ အရည်အချင်းကို လိုချင်ရင်တော့ Pasa စီးရီးကိုရွေးပါ။ သာမန်ဆိုရင်တောင် သိန်းဂဏန်းလောက်ပဲ ရှိတာမို့ မစ္စတာကျိုးအတွက်တော့ ဘာမှမဟုတ်ပါဘူး"

ကျိုးထျန်းက တွန့်ဆုတ်ဟန်ဆောင်ကာ မေးပြန်သည်။

"အစ်မရှောင်၊ ကျွန်တော်က ပစ္စည်းဝယ်ရင် တော်တော် ရွေးတတ်တယ်။ လက်ဆောင်ပေးမယ့်ဟာဆိုရင် အကောင်းဆုံးမှ ကြိုက်တာ။ ကန့်သတ်ထုတ်ကုန်ဆိုရင် ပိုတောင် ကြိုက်သေးတယ်"

"အို... မစ္စတာကျိုးက တော်တော်လေး စိတ်ကူးကောင်းတာပဲ။ တကယ်ကို အရသာရှိတဲ့သူပဲ။ တကယ်ပါပဲ Limited Edition က ပိုကောင်းပါတယ်၊ ဈေးတက်ဖို့ အခွင့်အလမ်းလည်း ရှိတယ်လေ"

ကျိုးထျန်း ပြုံးကာ သူမကို တဖြည်းဖြည်းလမ်းကြောင်းပေးလိုက်သည်။

"ကျွန်တော့်ရည်းစားက ငယ်ငယ်ကတည်းက အလိုလိုက်ခံထားရတော့ ပစ္စည်းကောင်းတွေ အများကြီး မြင်ဖူးတယ်။ ဒါပေမဲ့ သူမက စိန်နဲ့ နီလာကိုပဲ ကြိုက်တယ်။ အစ်မရှောင် ဒီအကြောင်းတွေ ကျွမ်းကျင်လား"

"ဟား!"

ဝမ်ရှောင် ရယ်လိုက်သည်။

"မစ္စတာကျိုးရဲ့ ရည်းစားက အရသာရှိတာပဲ။ သူမ အကြိုက်က အစ်မအကြိုက်နဲ့ တစ်ထပ်တည်းပဲ။ တစ်နေ့ကျရင် သူမကို ခေါ်လာခဲ့ပါဦး၊ ကျွန်မတို့ ပြောစရာတွေ အများကြီး ရှိမှာ"

"နီလာနာရီအကြောင်း ပြောရရင်တော့ အစ်မ သိတာပေါ့။ Cartier မှာ ရှိတယ်၊ အဲ့ဒါက ကန့်သတ်ထုတ်ကုန်တွေမို့ တော်တော်ရှားတယ်"

ဝမ်ရှောင် မျက်လုံးများမှာ ဂုဏ်ယူဝံ့ကြွားမှုဖြင့် လင်းလက်သွားသည်။

သူမသည် ဖုန်းကို ထုတ်ယူကာ ကျိုးထျန်းကို ဓာတ်ပုံတစ်ပုံ ပြလိုက်သည်။

ဓာတ်ပုံထဲတွင် သူမလက်ကောက်ဝတ်၌ နာရီကို ပတ်ထားသည်ကို တွေ့ရသည်။

"ဒါပေမဲ့ မစ္စတာကျိုးရေ၊ ဒီလိုနာရီမျိုးက ဝယ်ရတာ တော်တော်ခက်လိမ့်မယ်။ အသစ်တွေက ကုန်သွားပြီ၊ တစ်ပတ်ရစ်ဆိုရင်တောင် ဝယ်မယ့်သူ ရှာဖို့ နှစ်ပေါင်းများစွာ စောင့်ရလိမ့်မယ်"

"အော်... ဒါဆို အစ်မရှောင်ပြောပုံအရဆိုရင် ကျွန်တော်က အခွင့်အလမ်း မရှိတော့ဘူးပေါ့"

ကျိုးထျန်း ခေါင်းကုတ်လိုက်ကာ စိတ်ပျက်ဟန်ဆောင်သည်။

"ဒီနာရီကို မြင်လိုက်ရုံနဲ့တင် ကျွန်တော် သဘောကျသွားပြီ။ ကျွန်တော့်ရည်းစားကို ပေးလိုက်ရင် သူမ အရမ်း ပျော်မှာ သေချာတယ်"

ထို့နောက် သူက မော့ကြည့်လိုက်သည်။

"အစ်မ ရှောင်၊ ဒီနာရီက အစ်မပိုင်တာလား"

"ဟုတ်တာပေါ့၊ ဒါကို ရဖို့ အစ်မ တော်တော်လေး ကြိုးစားခဲ့ရတာ"

"ဒါဆို... အစ်မဆီကနေ ကျွန်တော့်ကို လက်လွှဲပေးနိုင်မလား။ ဈေးနှုန်းကတော့ စိတ်မပူပါနဲ့၊ ညှိနှိုင်းလို့ ရပါတယ်"

ကျိုးထျန်းမှာ နာရီကို တကယ်လိုချင်နေသူတစ်ယောက်ပမာ စိတ်ရင်းအမှန်ဖြင့် ပြောလိုက်သည်။

"အို... မစ္စတာကျိုးရေ၊ ရှင်က ကျွန်မထက် ငယ်တာမို့ မောင်လေးလို့ ခေါ်လိုက်မယ်နော်"

"မောင်လေးလို လူမျိုးနဲ့ မိတ်ဆွေဖြစ်ရတာ အစ်မအတွက် ဂုဏ်ယူစရာပါ။ တခြားပစ္စည်းတစ်ခုခုဆိုရင်တော့ မောင်လေး ကြိုက်ရင် ချက်ချင်း ပေးလိုက်မှာပါ။ ဒါပေမဲ့ ဒီနာရီကတော့ မတူဘူး၊ ကျွန်မအတွက် အမှတ်တရ ဖြစ်နေလို့ပါ"

သူမ သဘောတူမည်မဟုတ်ကြောင်း ကျိုးထျန်း သိထားသည်။ သူမသည် ဤနာရီကို ကြွားချင်နေမည်မှာ သေချာသည်။

ခရုဇ်သင်္ဘောပေါ်က ဓာတ်ပုံများကို ကြည့်ရသမျှ သူမသည် နာရီကို ပြသရန်အတွက် လက်ကောက် ဝတ်ကို တမင် ကြွထားသည်မှာ သူမ ဤနာရီကို အလွန်နှစ်သက်ကြောင်းပြသနေသည်။

"အစ်မရှောင်၊ အစ်မ ပြောလိုက်တဲ့ စကားကြောင့် ကျွန်တော့်မှာ သိချင်စိတ် ပိုတိုးသွားပြီ။ ကျွန်တော်က ဇာတ်လမ်းတွေကို ကြိုက်တတ်လို့ တစ်ခုလောက် ပြောပြလို့ ရမလား"

ဝမ်ရှောင်သည် ဝေဖေးယွီကို တစ်ချက်ကြည့်လိုက်သည်။

သူက ခေါင်းညိတ်ပြလိုက်သော်လည်း သူမ၏ မျက်ဝန်းထဲတွင် စိတ်ဝင်စားစရာ တစ်ခုခု ရှိနေသည်။

ကျိုးထျန်းမှာ ဤနေရာသို့ အခြားရည်ရွယ်ချက်ဖြင့် ရောက်လာသည်ဟု သူတို့ လုံးဝ သံသယမရှိကြပေ။

သူတို့နှစ်ယောက်စလုံးမှာ ကိုယ့်အကျိုးစီးပွားအတွက်နှင့်သာ မျက်စိကန်းနေကြသည်။

ဤလူမျိုးတို့၏ အကြီးမားဆုံး အားသာချက်မှာ ဉာဏ်ကောင်းခြင်း ဖြစ်ပြီး အကြီးမားဆုံး အားနည်းချက်မှာ မိမိကိုယ်ကို အခြားသူထက် ပိုဉာဏ်ပြေးသည်ဟု အမြဲတွေးခြင်း ဖြစ်သည်။

သူတို့၏ အမြင်တွင် ကျိုးထျန်းနှင့် ပိုနီးကပ်လေ၊ သူတို့၏ ဆက်ဆံရေးမှာ ပိုမိုကောင်းမွန်လေဟု ထင်မြင်ကြပြီး၊ နောင်တွင် ထိန်းချုပ်ရ ပိုမိုလွယ်ကူလိမ့်မည်ဟု ယူဆကြသည်။

ယခုမှာ ပထမဆုံးအကြိမ် တွေ့ဆုံခြင်းဖြစ်ပြီး သူကလည်း ငယ်ရွယ်ကာ ပေါင်းသင်းရလွယ်ပုံ ပေါက်နေသဖြင့် တတ်နိုင်သမျှ စကားများများပြောခြင်းက ရင်းနှီးမှု တည်ဆောက်ရန် အကောင်းဆုံးဖြစ်သည်။

ထို့ကြောင့် ကိုယ်ရေးကိုယ်တာ ကိစ္စအနည်းငယ် ဆွေးနွေးခြင်းမှာလည်း ရင်းနှီးမှု တည်ဆောက်ခြင်း၏ အစိတ်အပိုင်းတစ်ခုပင် ဖြစ်သည်။

ဝမ်ရှောင်က အနားသို့ တိုးကပ်လာကာ ပြုံးလျက် ပြောသည်။

"မောင်လေး၊ တခြားသူဆိုရင်တော့ ဒီအကြောင်း ပြောပြမှာ မဟုတ်ဘူး၊ မောင်လေးမို့လို့ ပြောပြတာ"

ကျိုးထျန်းကလည်း ရည်ရွယ်ချက်ရှိရှိ တိုးကပ်သွားသည်။

"အစ်မ၊ မြန်မြန် ပြောပြပါ! လျှို့ဝှက်ချက်တွေနဲ့မို့လို့ ကျွန်တော် တော်တော်ကို စိတ်မသက်မသာ ဖြစ်နေပြီ"

"ဟဲဟဲ၊ မလောပါနဲ့၊ အခုပဲ ပြောပြမယ်"

"ဒီနာရီရဲ့ မူရင်းပိုင်ရှင်က အစ်မနဲ့ ရန်ငြိုးရှိတဲ့သူတစ်ယောက်ပဲ၊ ဒါပေမဲ့ သူတို့မိသားစုက အခုတော့ အခြေအနေ ဆိုးသွားပြီ"

"အရင်က ပွဲတစ်ခုမှာ ဒီနာရီပိုင်ရှင်နဲ့ ကျွန်မ အဆင်မပြေခဲ့ဘူး။ သူက ကျွန်မ ပတ်ထားတဲ့ နာရီတွေကို အပေါစားတွေလို့ ပြောခဲ့တာ"

"မကြာသေးခင်ကပဲ သူတို့မိသားစုမှာ ပြဿနာတက်ပြီး ငွေအရေးပေါ် လိုအပ်နေလို့ ဒီနာရီကို ရောင်းလိုက်ရတယ်။

အစ်မ ဝယ်ချင်ပေမဲ့ သူမက အစ်မကို တမင် ဒေါသထွက်အောင်လုပ်ပြီး မရောင်းပေးဘူး၊

အခြားတစ်ယောက်ကို ဈေးလျော့ပြီး ရောင်းပစ်လိုက်တယ်။ အစ်မကို တော်တော် ဒေါသထွက်စေတာပဲ!"

ကြားလိုက်ရသောအခါ ကျိုးထျန်း စိတ်ထဲမှ တိုးတိုးလေး တွတ်ထိုးလိုက်သည်။

"သူမပြောတဲ့ ဈေးလျော့ပြီး ရောင်းလိုက်တဲ့သူက ငါများ ဖြစ်နေမလား?"

"ဒါဆိုရင် ငါ ကံကောင်းလို့ ဈေးသက်သက်သာသာနဲ့ ရသွားတာပေါ့၊ အဲ့ဒီသူက ဝမ်ရှောင်နဲ့ရန်ဖြစ်နေလို့ တမင်သက်သက် ရောင်းမပေးတာကိုး ?"

သူသည် သံသယ ပိုမိုဝင်လာသည်။

သူတို့နှစ်ယောက်စလုံးနှင့် သူသည် အချိန်အကြာကြီး ပတ်သက်နေခဲ့သည်မှာ ထင်ရှားသည်။

သို့သော် သူတို့နှစ်ယောက်စလုံးကတော့ သိကြမည် မဟုတ်ပေ။

"ဒါဆို အစ်မ၊ ဒီနာရီကို တခြားသူကို ရောင်းလိုက်တာ မဟုတ်ဘူးလား။ ဘယ်လိုလုပ်ပြီး အစ်မလက်ထဲ ပြန်ရောက်လာတာလဲ" ဟု ကျိုးထျန်းက ဆက်မေးသည်။

"အဲ့ဒါက ပိုပြီး စိတ်ဝင်စားဖို့ကောင်းတယ်။ ငါ့ပစ္စည်းဆိုတာ ဘယ်တော့မဆို ငါ့ဆီ ပြန်ရောက်လာမှာပဲ။ ကြည့်လေ၊ အဲ့ဒီမိန်းမက ငါ့ကို ဆန့်ကျင်ပြီး နောက်ဆုံးမှာတော့ ပိုက်ဆံမရှိ ဖြစ်သွားရတာပဲ။ ငါ့ကို မရောင်းပေးချင်တဲ့ ပစ္စည်းက နောက်ဆုံးမှာ ငါ့လက်ထဲ ပြန်ရောက်လာတာပဲ။ ကံတရားပါပဲ"

ဝမ်ရှောင်သည် ပြောလေလေ ဂုဏ်ယူလေလေဖြစ်ပြီး မောက်မာသော အပြုံးတစ်ခုပင် ပေါ်လာသည်။

ထိုအပြုံးထဲတွင် ရက်စက်မှုနှင့် ကဲ့ရဲ့လှောင်ပြောင်မှုများ ပါဝင်နေပြီး လက်စားချေရသည့် ကျေနပ်မှုမျိုးပင်။

"ဒီနာရီအကြောင်း ပြောရရင်တော့ သူ့မူလရင်းမြစ်က မောင်လေးနဲ့လည်း ဆက်စပ်နေသေးတယ်"

ဝမ်ရှောင် သူ့ကို ကြည့်လိုက်သည်။

ကျိုးထျန်း နှလုံးသားမှာ တစ်ချက် ရပ်တန့်သွားသလိုပင်။

‘သေပြီ၊ ငါ အဖမ်းခံလိုက်ရပြီလား?’

🍋 Chapter 136

ဝမ်ရှောင်၏ စကားကို ကြားလိုက်ရသောအခါ ကျိုးထျန်း၏ နှလုံးသားမှာ ချက်ချင်းပင် တင်းကျပ်သွားသည်။

‘ငါ ဒီကိုလာတဲ့ ရည်ရွယ်ချက်က ပေါ်သွားပြီလား’

‘ဒီနှစ်ယောက်က ငါ ဒီနာရီအတွက် ရောက်လာတာကို ရိပ်မိသွားပြီလား’

‘ဖြစ်နိုင်ခြေ မရှိလောက်ပါဘူး။ တကယ်လို့သာ သူတို့ ရိပ်မိနေရင် ခုချိန်ထိ ငါ့ကို ယဉ်ယဉ်ကျေးကျေးနဲ့ စကားပြောနေပါ့မလား’

သူ၏ မျက်နှာအမူအရာမှာ တည်ငြိမ်နေဆဲပင် ဖြစ်ပြီး မည်သို့မျှ ပြောင်းလဲမှု မရှိပေ။

စိတ်ကို အတင်းပြန်ထိန်းကာ ကျိုးထျန်းသည် စပ်စုသည့်အမူအရာကို ပြသပြီး မေးလိုက်သည်။

"အစ်မရှောင်၊ ကျွန်တော် ဘာပြောမှန်း နားမလည်ဘူး။ 'ကျွန်တော်နဲ့ ဆက်စပ်နေတယ်' ဆိုတာ ဘာကို ဆိုလိုတာလဲ"

ဝမ်ရှောင်က သူ့ကို ကြည့်ကာ ပြုံးလျက် ပြောသည်။

"ဆိုလိုချင်တာက အဲ့အတိုင်းပဲပေါ့။ မောင်လေးကြောင့်သာ မဟုတ်ရင် ဒီနာရီကို ငါ့လက်ထဲ ရောက်လာမှာ မဟုတ်ဘူး"

"အော်? အဲ့ဒီနောက်ကွယ်မှာ တခြားဇာတ်လမ်း တစ်ခုခု ရှိနေသေးတာလား"

"ရှိတာပေါ့! အခုနက အစ်မပြောတဲ့၊ အစ်မနဲ့ အဆင်မပြေတဲ့ ဒီနာရီရဲ့ မူလပိုင်ရှင်က ဘယ်သူဖြစ်မလဲဆိုတာ မောင်လေး ခန့်မှန်းကြည့်ပါဦး"

ကျိုးထျန်းသည် ဝမ်ရှောင်၏ မျက်နှာကို ကြည့်လိုက်သည်။ သူမမှာ အလွန်ပင် မာနထောင်လွှားနေသည်။

သူ ဘယ်လိုလုပ် ခန့်မှန်းနိုင်မည်နည်း။

သို့သော် သူမကိုယ်တိုင် ပြောနေသည့်အတွက် နာရီ၏ မူလပိုင်ရှင်မှာ တကယ်ပင် သူ့နှင့် ဆက်စပ်နေကြောင်း သေချာသွားသည်။

"စကားကို လှည့်ပတ်မနေပါနဲ့တော့၊ တိုက်ရိုက်ပဲ ပြောပြလိုက်ပါ"

ကျိုးထျန်း၏ စကားကို ကြားသောအခါ ဝမ်ရှောင်သည် သူမ၏ ခင်ပွန်းကို နောက်တစ်ကြိမ် လှည့်ကြည့်လိုက်သည်။

ထို့နောက် အတည်ပြုသည့် အကြည့်တစ်ခုကို ရပြီးမှသာ ပြုံးလျက် ပြောသည်။

"ဟဲဟဲ၊ ဒီနာရီရဲ့ မူလပိုင်ရှင်က တခြားသူမဟုတ်ဘူး၊ အလွန်ချမ်းသာတဲ့ မိန်းမတစ်ယောက်ပဲ။ သူ့ခင်ပွန်းက ယင်းချိုင်နည်းပညာရဲ့ သူဌေး ဝူချန်ချိုင်ပဲ!"

ကျိုးထျန်း အံ့အားသင့်သွားသည်။

ဝူချန်ချိုင်။

သူသည် ထိုလူ၏ကုမ္ပဏီကို ဝါးမြိုခဲ့သူဖြစ်ရာ သူနှင့် ဆက်စပ်နေသည်မှာ မှန်ပေသည်။

ထိုသို့ဆိုလျှင် ဝမ်ရှောင် ပြောသည့်အတိုင်းပင် ဖြစ်သည်။ သူသာ ယင်းချိုင်ကို မဖျက်ဆီးခဲ့ပါက ဝူချန်ချိုင်နှင့် ဇနီးဖြစ်သူတို့သည် သူတို့၏ စုဆောင်းထားသော ပစ္စည်းများကို ငွေအတွက် ရောင်းချစရာ လိုမည်မဟုတ်ပေ။

သို့သော် ဝေဖေးယွီနှင့် ဝမ်ရှောင်တို့မှာ ယင်းချိုင်ကို သူ ဘာလုပ်လိုက်သည်ဆိုတာ သိကြမည်မဟုတ်ပေ။

သူတို့၏ အမြင်တွင် ယင်းချိုင်က ဆိုးရွားစွာ အရှုံးပေါ်ခဲ့ပြီး၊ သူကတော့ အခွင့်ကောင်း ရသွားသည့် သူဌေးသားတစ်ယောက်သာ ဖြစ်သည်။

၎င်းမှာလည်း အလွန်ပင် သဘာဝကျသည်။

ယင်းချိုင်နှင့် ဝမ်ချောင်မှာ အင်တာနက်နည်းပညာ ကုမ္ပဏီများဖြစ်ပြီး မိုဘိုင်းဂိမ်းများကိုသာ ထုတ်လုပ်နေကြခြင်းဖြစ်သည်။

လုပ်ငန်းတူဖြစ်သဖြင့် ပဋိပက္ခအချို့ ဖြစ်ပေါ်လာခြင်းမှာ မလွဲမသွေပင်။

ပြိုင်ဘက်များဖြစ်ကြသည် မဟုတ်ပါလား။

ထို့အပြင် ဝူချန်ချိုင်၏ ဇနီးမှာ ဝမ်ရှောင်ကို မုန်းတီးနေခြင်းမှာလည်း သဘာဝပင်။

ခင်ပွန်းသည်များမှာ စီးပွားရေးလောကတွင် တိုက်ပွဲဝင်ကြပြီး ဇနီးသည်များမှာလည်း အမျိုးမျိုးသော ပါတီပွဲများနှင့် ထိပ်သီးအစည်းအဝေးများတွင် တွေ့ဆုံကြသည်။

ထို့ကြောင့် သူတို့မှာလည်း တစ်ဦးကိုတစ်ဦး ယှဉ်ပြိုင်ကြမည်မှာ သေချာသည်။

သူတို့မိသားစု စီးပွားရေးအတွက် တစ်ဖက်ကို တစ်ချက်လောက် အနိုင်မယူရလျှင် တန်မည်မဟုတ်ပေ။

ထို့အပြင် တရုတ်ပြည်တွင် နှစ်စဉ် အင်တာနက် ထိပ်သီးအစည်းအဝေး အနည်းငယ်သာ ရှိပြီး၊ ရှန်ဟိုင်းတွင် ဂုဏ်သတင်းရှိသော မိုဘိုင်းဂိမ်းကုမ္ပဏီမှာလည်း လက်ချိုးရေတွက်ရုံသာ ရှိသည်။

သူတို့သည် ဒါလုံ သို့မဟုတ် ယင်းချိုင်နှင့် ပြိုင်ဆိုင်နေကြရသည်။

ထို့ကြောင့် ဝမ်ရှောင်သည် ဤနာရီကို တစ်ချိန်လုံး မျက်စိကျနေခဲ့ခြင်း ဖြစ်မည်။

သူမက ဒီနာရီကို ကြိုက်လို့တင် မဟုတ်ဘဲ ဝူမိသားစု အခြေအနေ ဆိုးရွားသွားချိန်တွင် မိမိ၏ ပြိုင်ဘက် ဝါကြွားလေ့ရှိသည့်အရာကို ပိုင်ဆိုင်လိုက်ရခြင်းက သူမကို အောင်နိုင်သူတစ်ဦးကဲ့သို့ ခံစားရစေမည်ဖြစ်သည်။

သူမက ၎င်းကို ဆုတံဆိပ်တစ်ခုလို သဘောထားသည်။

ထို့အပြင် ဝူချန်ချိုင်၏ဇနီးမှာ ဝမ်ရှောင်၏ ကြံရွယ်ချက်ကို သိရှိသဖြင့် ဤမိန်းမကို လက်ဝယ်မရစေရန် ဈေးလျော့ကာ အမြန်ရောင်းထုတ်ပစ်လိုက်ခြင်း ဖြစ်နိုင်သည်။

၎င်းမှာ ယခင်က သူဌေးကတော်တစ်ဦး ဖြစ်ခဲ့သည့် သူမ၏ နောက်ဆုံး ကျန်ရှိနေသော ဂုဏ်သိက္ခာပင်ဖြစ်ပေမည်။

သူမသည် ဝမ်ရှောင်ရှေ့တွင် ဒူးမထောက်ချင်သဖြင့် ငွေရှုံးခံပြီး ရောင်းပစ်လိုက်ခြင်း ဖြစ်သည်။

‘အော်... ဒါဆိုရင်တော့ ဒီမိန်းမက ဘာလို့ ဒီနာရီကို ရောင်းလိုက်တာလဲဆိုတာ နားလည်သွားပြီ’

‘ဒီနာရီက ဘယ်လိုလုပ်ပြီး အဲ့ဒီလူနှစ်ယောက် လက်ထဲ ရောက်သွားရတာလဲဆိုတာ နားမလည်နိုင်ခဲ့တာ။ ဟက်၊ ဒီနှစ်ယောက်ကတော့ တကယ်ကို ရွံစရာကောင်းတဲ့ ကောင်တွေပဲ။ ဝူချန်ချိုင် အခြေအနေ ဆိုးနေတာကိုတောင် အနိုင်ကျင့်ချင်နေသေးတယ်’

‘ပြီးတော့ ငါသိသလောက် ဝမ်ချောင်နဲ့ ယင်းချိုင်မှာ အရင်က ဘာပဋိပက္ခမှ မရှိခဲ့ဘူး။ သူတို့က သူများ ဒုက္ခရောက်တာကို ကြည့်ပြီး ပျော်နေရုံသက်သက်ပဲ’

"ဒါပေမဲ့ ဝူချန်ချိုင်က တကယ်ကို လူကောင်းပါ။ သူက ကျွန်တော့်ကုမ္ပဏီကို ပေးအပ်ခဲ့ပြီး နာရီတစ်လုံးကိုတောင် အလကား ပေးခဲ့သေးတယ်။ သူ့ကို ကျေးဇူးတင်စာလေး တစ်စောင်လောက် ရေးပေးလိုက်ဦးမှပဲ။"

ကျိုးထျန်း၏ အံ့အားသင့်သည့် အမူအရာမှာ စစ်မှန်နေသည်။ ဝမ်ရှောင်၏ အမြင်တွင် ၎င်းမှာ သဘာဝပင် ဖြစ်သည်။ မည်သူမဆို အံ့ဩကြမည်သာ။

"မစ္စတာကျိုး ဒီလိုဖြစ်မယ်လို့ မထင်ထားဘူးနဲ့ တူတယ်၊ ဒါဆိုရင်တော့ ကျွန်မတို့ ကျေးဇူးတင်ရမှာပဲ။"

"အစ်မရှောင်၊ ရပါတယ်ဗျာ။ ကျေးဇူးတင်စရာ မလိုပါဘူး။ ဒါက အစ်မရဲ့ ကံကောင်းခြင်းပါပဲ။

အစ်မပြောသလိုပဲ ကိုယ့်ပစ္စည်းဆိုတာ ဘယ်တော့မဆို ကိုယ့်ဆီ ပြန်ရောက်လာမှာပါပဲ၊ နောက်ဆုံးတော့လည်း အစ်မဆီ ရောက်လာတာပဲလေ။"

ကျိုးထျန်းက ပြုံး၍ ပြန်ပြောလိုက်သော်လည်း သူ၏ မျက်ဝန်းထဲတွင်မူ ရက်စက်သော အငွေ့အသက်များ ပေါ်လာသည်။

‘ငါ့ပစ္စည်းဆိုတာ ငါ့အပိုင်ပဲ။ မင်းတို့ ယူသွားရင် ငါ အကုန်ပြန်အန်ခိုင်းမယ်!’

‘ငါ ပြန်ယူရုံတင်မကဘဲ တစ်နေ့ကျရင် မင်းတို့ကို သင်ခန်းစာပေးပြီး အချို့သူတွေရဲ့ ပစ္စည်းကို မထိရဲအောင် လုပ်ပြဦးမယ်!’

ထို့နောက် စိတ်ရှည်စွာဖြင့် သူတို့နှစ်ဦးနှင့် ဝိုင်ခွက်ချင်း တိုက်လိုက်သည်။

ဝိုင်များကို တစ်ကျိုက်တည်း မော့သောက်လိုက်သဖြင့် ဝေဖေးယွီမှာ လက်ခုပ်တီးကာ ချီးကျူးလိုက်သည်။

"ကောင်းတယ်၊ တကယ်ကောင်းတယ်။ မစ္စတာကျိုးက ငယ်ငယ်ရွယ်ရွယ်နဲ့ အရက်သောက်တာမှာလည်း အတွေ့အကြုံ ရင့်ကျက်နေလိမ့်မယ်လို့ မထင်ထားဘူး။ နောက်ပိုင်းကျရင် ဒီထက်ပိုပြီး အတွေ့အကြုံချင်း ဖလှယ်ကြတာပေါ့"

ကျိုးထျန်းလည်း ပြုံးကာ ပြန်လည် တုံ့ပြန်လိုက်သည်။

တရုတ်ပြည်၏ ကျော်ကြားမှုနှင့် ငွေကြေးလောကတွင် အရက်သည် သူစိမ်းနှစ်ယောက်ကြား ဆက်ဆံရေးကို လျင်မြန်ပြီး ထိရောက်စွာ တံတားထိုးပေးနိုင်သည်။

လူအများစုမှာ အရက်ကို မကြိုက်ကြသော်လည်း ၎င်း၏ အကျိုးသက်ရောက်မှုကို ငြင်းဆို၍ မရပေ။

၎င်းမှာ ရေပန်းစားသော ယဉ်ကျေးမှုနှင့် အမျိုးသားရေး ဓလေ့ထုံးတမ်း ဖြစ်ရာ ပြောင်းလဲ၍ မရနိုင်ပေ။

ကျိုးထျန်းသည်လည်း အသက်သေအောင် သောက်ခိုင်းသည့် အရက်ဝိုင်းမျိုးကို မနှစ်သက်သော်လည်း လောကဓံမှာ ဤအတိုင်းပင် ဖြစ်သည်။ မသောက်လျှင်လည်း မရပေ။

အနည်းငယ် စကားပြောဆိုပြီးနောက် သူသည် စကားလမ်းကြောင်းကို ပြန်ပြောင်းလိုက်သည်။

"အစ်မရှောင်၊ ဒီနာရီရဲ့ မူလပိုင်ရှင်က ဘယ်သူဆိုတာ ပြောပြပေးသွားပေမဲ့ ဘယ်လိုလုပ်ပြီး အစ်မလက်ထဲ ရောက်လာတာလဲဆိုတာတော့ မပြောပြသေးဘူးနော်။ ကျွန်တော် တကယ်ကို သိချင်တာ"

ဝမ်ရှောင်လည်း အရက်အနည်းငယ် မူးနေပြီဖြစ်ပြီး ဝူချန်ချိုင်တို့ဇနီးမောင်နှံ အဆင်မပြေဖြစ်ရပုံကို ပြောပြရသဖြင့် အလွန်စိတ်လှုပ်ရှားနေသည်။

"ဟားဟားဟား၊ အမှန်အတိုင်းပြောရရင် ဒီဖြစ်စဉ်က ရုပ်မြင်သံကြား ဇာတ်လမ်းတွဲထက်တောင် ပိုစိတ်လှုပ်ရှားဖို့ ကောင်းသေးတယ်။ အစ်မ ပြောပြမယ်၊ ငါတို့က..."

"အဟွတ်!"

ဝေဖေးယွီက ရုတ်တရက် ချောင်းဆိုးလိုက်ပြီး မျက်နှာကို တည်တင်းလိုက်ကာ သူ့ဇနီးကို ဆက်မပြောရန် သတိပေးလိုက်သည်။

ဝမ်ရှောင်သည် သူမ၏ခင်ပွန်း၏ အချက်ပြမှုကို ရလိုက်သည်နှင့် ချက်ချင်း စကားရပ်လိုက်သည်။

"အစ်မရှောင်၊ အစ်မရှောင်၊ ဘာလို့ တစ်ဝက်တစ်ပျက်နဲ့ ရပ်လိုက်တာလဲ"

"ဟဲဟဲ၊ မစ္စတာကျိုးရေ၊ ဒါတွေက သေးမွှားတဲ့ကိစ္စပါ၊ အဲ့ဒီအကြောင်းတွေ မပြောတော့ပါဘူး၊ ဆက်သောက်ကြရအောင်"

ဝေဖေးယွီက သူ၏ ဝိုင်ခွက်ကို တိုက်ရိုက် ကောက်ယူကာ တိုက်လိုက်သည်။

ကျိုးထျန်းက ဘာမှမဖြစ်သလို ဟန်ဆောင်ကာ သူတို့နှစ်ယောက်နှင့်အတူ ရယ်မောပြီး သောက်လိုက်သည်။

‘ဒီကောင်နှစ်ကောင်က တော်တော် သံသယဖြစ်စရာ ကောင်းတယ်။ ဒီကိစ္စက သူတို့နဲ့ ၁၀၀ ရာခိုင်နှုန်း ပတ်သက်နေတာ သေချာတယ်။ လျူမိသားစုကို ဘယ်သူ လုယက်ပြီး မုယန်ရဲ့ အမေကို ထိခိုက်အောင် လုပ်ခဲ့လဲဆိုတာ သူတို့ သိနေမှာပဲ!’

ဝေဖေးယွီ၏ မျက်နှာထားကို ကြည့်ခြင်းအားဖြင့် သူ အကုန်သိပြီးသား ဖြစ်ကာ သူ့ဇနီးကို ပြောခွင့်မပေးခြင်းမှာ ဤကိစ္စမှာ အလွန်လေးနက်ကြောင်း သိသာသည်။

သူသည် အနီးကပ်ဆုံးအထိ ရောက်နေခဲ့ပြီး ဝမ်ရှောင်ဆီက အချက်အလက်ရရန် လက်တစ်ကမ်းအလိုသာ ရှိတော့သည်။

‘အင်း... ဝမ်ရှောင်ကို တစ်ယောက်တည်း ဖမ်းပြီး အရက်တိုက် မေးကြည့်ဖို့ အခွင့်အရေး တစ်ခု ရှာရဦးမယ်’

ဝေဖေးယွီမှာ လည်ပတ်နေသော မြေခွေးအိုတစ်ကောင်ဖြစ်ပြီး နေ့စဉ်ဘဝတွင် အလွန်သတိထားသူဖြစ်သည်။ သူရှိနေသမျှ ကိစ္စမှာ အောင်မြင်ရန် ခက်ခဲလိမ့်မည်။

ဝမ်ရှောင်မှာ ကွဲပြားသည်။ လိင်ပိုင်းဆိုင်ရာ ဖျော်ဖြေရေးလောကတွင် လုပ်ကိုင်ခဲ့ဖူးသူဖြစ်ရာ လူများနှင့် စကားပြောရသည်ကို နှစ်သက်သည်။

သူမ၏ အလုပ်ဟောင်းတစ်ခု ဖြစ်ခဲ့သောကြောင့် ဖြစ်သည်။

ထို့အပြင် ဤကိစ္စမှာ သူမကို အလွန်ကျေနပ်ပျော်ရွှင်စေသဖြင့် ဝါကြွားချင်နေသည်။

ထို့ကြောင့် စနစ်တကျ လမ်းကြောင်းပေးနိုင်ပါက သူလိုချင်သည့် အဖြေကို ရရှိနိုင်မည်မှာ သေချာသည်။

သူ၏ ရည်မှန်းချက်ကို ချမှတ်ပြီးနောက် ကျိုးထျန်းသည် ဘာမှမဖြစ်သလို ဟန်ဆောင်ကာ သူတို့နှစ်ဦးနှင့်အတူ အလပ်စကားများ ဆက်ပြောနေလိုက်သည်။

အချိန်တန်ပြီဟု ယူဆသောအခါ ဝေဖေးယွီက အချက်ပြလိုက်ရာ သုံးယောက်သား အပြင်သို့ ထွက်လာခဲ့ကြသည်။

အပြင်ဘက်တွင် ဝမ်ချောင်နည်းပညာမှ ဝန်ထမ်းများမှာလည်း မူးယစ်နေကြပြီဖြစ်ပြီး၊ ပွဲမှာလည်း အထွတ်အထိပ်သို့ ရောက်နေကာ ကိတ်မုန့်လှီးရန် အချိန်တန်နေပြီ ဖြစ်သည်။

သူသည် ဝမ်းမြောက်ဝမ်းသာစွာ ပွဲထဲတွင် ပါဝင်လိုက်သည်။

"ဥက္ကဋ္ဌဝေ၊ ဂုဏ်ပြုပါတယ်!"

"ဥက္ကဋ္ဌကျိုး၊ ခင်ဗျားကလည်း ရပါတယ်။ အားလုံး မစ္စတာကျိုးရဲ့ ကျေးဇူးတွေပါ"

နှစ်ယောက်သား ဝိုင်ခွက်ချင်း တိုက်နေကြပြီး အားလုံးမှာ ပျော်ရွှင်နေကြစဉ်၊ ဗီလာ၏ ကြီးမားသော သံတံခါးကို ပြင်းထန်စွာ ထုရိုက်သံ ပေါ်လာသည်။

"တံခါးဖွင့်! တံခါး အမြန်ဖွင့်ကြ! ငါတို့က ရဲတွေပဲ!"