အခန်း ၂၉၀

အခန်း (၂၉၀) - သတင်းအချက်အလက် အဆက်အသွယ် (၂)

"နန်းတော်တရားသူကြီးတိုင်းကို သတင်းပေးအဖွဲ့တစ်ဖွဲ့ ပေးအပ်ထားတယ်။ ဒီသတင်းပေးတွေက တိုက်ကြီးတစ်ခွင်မှာရှိတဲ့ မတူညီတဲ့ အဖွဲ့အစည်းတွေထဲက ထူးခြားတဲ့ နေရာတွေမှာ တာဝန်ချထားတဲ့သူတွေပဲ။

တချို့က ဂိုဏ်းတွေ၊ မျိုးနွယ်စုတွေ၊ ကုန်သည်အဖွဲ့အစည်းတွေ၊ ဆေးပညာရှင်တွေ၊ တိုင်းပြည်တွေ၊ အင်ပါယာတွေနဲ့ အခြားအဖွဲ့အစည်းတွေကပဲ။ တချို့ဆိုရင် ဓားပြတွေနဲ့ တခြားမသမာတဲ့ အဖွဲ့အစည်းက အဖွဲ့ဝင်တွေတောင် ပါသေးတယ်။"

"မင်းရဲ့အလုပ်က တရားရုံးတော်နဲ့ သူတို့ကြားက ဆက်သွယ်ရေးလမ်းကြောင်း ဖြစ်လာဖို့ပဲ။ မင်းရဲ့ကိုယ်ပိုင်ဆုံးဖြတ်ချက်နဲ့ သူတို့ကို တွေ့ဆုံပြီး သူတို့ဆီကနေ ရနိုင်တဲ့ သတင်းအချက်အလက်တွေကို ရယူရမယ်။

ပြီးတော့ သူတို့ရဲ့ စိတ်ပိုင်းဆိုင်ရာကျန်းမာရေးကို အကဲဖြတ်ပေးရမယ့်အပြင် မင်းက သူတို့ရဲ့ အသက်ကယ်ကြိုးနဲ့ အကူအညီပေးရမယ့် လက်တစ်ဖက်လည်း ဖြစ်လာလိမ့်မယ်။"

"သူတို့ ဘာအကူအညီပဲလိုလို မင်းက ထောက်ပံ့ပေးရမယ့်သူပဲ။ ရှုပ်ထွေးတဲ့ကိစ္စမျိုးဆိုရင်တော့ ငါတို့နဲ့ တိုင်ပင်ဆွေးနွေးလို့ ရတာပေါ့လေ။ ဒါပေမဲ့ မင်းဘာသာမင်း ဖြေရှင်းတာက ပိုပြီးတော့ သင့်တော်လိမ့်မယ်လို့ ငါထင်တယ်။"

"တရားရုံးတော်ကနေ မင်းရရှိမယ့် သီးသန့်ရန်ပုံငွေတွေက အဲဒီအတွက် အကူအညီပေးဖို့ ရည်ရွယ်ထားတာပဲ။ ခဏနေရင် ငါပြောပြမယ့် တခြားကိစ္စအချို့အတွက်လည်း ပါဝင်တယ်..."

ယန်ချင်း၏ မျက်နှာထား မှုန်ကုပ်သွားသည်ကို မြင်လိုက်ရချိန်တွင် လက်ထောက်ရှီက စကားကို ရပ်တန့်လိုက်၏။

"တစ်ခုခု မှားယွင်းနေလို့လား။"

လက်ထောက်ရှီက မေးမြန်းလိုက်၏။

"တောင်းပန်ပါတယ် စီနီယာရှီ။ ကျုပ်ရမယ့် ရန်ပုံငွေတွေက တစ်နှစ်ပတ်လုံး ကျုပ်ကိုင်တွယ်ရမယ့် အမှုတွေအတွက် ကော်မရှင်ခတွေ ပေးချေဖို့ပါ ရည်ရွယ်ထားတာဆိုတော့ လုံလောက်ပါ့မလားလို့ မတွေးဘဲ မနေနိုင်လို့ပါ။"

"ကျုပ်ရမယ့် အမှုအရေအတွက်တွေနဲ့ ကျုပ်ကိုပေးထားတဲ့ လစာအစီအစဉ်အရဆိုရင် တရားသူကြီးတစ်ယောက်အနေနဲ့ လုပ်ဆောင်ရမယ့် တာဝန်တွေအပြင် သတင်းအချက်အလက် အဆက်အသွယ်ကို ထိန်းသိမ်းဖို့အတွက်ပါ ဒီပမာဏက လုံလောက်မှာမဟုတ်ဘူးလို့ ခံစားနေရတယ်။"

ယန်ချင်းက ပြောလိုက်လေ၏။

အဆက်အသွယ်အတွင်း မည်သည့်ပြဿနာများ ပေါ်ပေါက်လာမည်ကို သူ မသိသော်လည်း မည်သို့ပင်ဖြစ်စေကာမူ ငွေကြေးအမြောက်အမြား ကုန်ကျမည်မှာ သေချာနေလေသည်။

"အဲဒီအတွက် မင်းစိုးရိမ်စရာမလိုပါဘူး။ သီးသန့်ရန်ပုံငွေတွေ မလုံလောက်ဘူးဆိုရင်တောင် ကွာဟချက်ကို ဖြည့်ဆည်းပေးမယ့် တခြားအရင်းအမြစ်တွေ ရှိပါသေးတယ်။ အဲဒါကို နောက်မှ ငါဆက်ပြောပြမလို့ပါ။ ဒါပေမဲ့ ဒါကလွဲရင် မင်းဆီမှာ တခြားသံသယတွေ ရှိနေသေးတယ်လို့ ငါခံစားရတယ်။ ဆက်ပြောပါ၊ ဒီမှာ ရှက်နေစရာမလိုပါဘူး။"

လက်ထောက်ရှီက ပြောလိုက်၏။

လက်ထောက်ရှီ၏ အမူအရာကို မြင်လိုက်ရသောအခါ ယန်ချင်းက လေးနက်သော မျက်နှာထားသို့ ပြောင်းလဲလိုက်ရင်း မေးမြန်းလိုက်လေ၏။

"သတင်းပေးတွေကိုရော အားလုံး ယုံကြည်စိတ်ချရရဲ့လား။"

သူသည် ထိုသူများနှင့် လူကိုယ်တိုင် သွားရောက်တွေ့ဆုံရမည်ဖြစ်ရာ ထိုသို့တွေ့ဆုံမှုများထဲမှ တစ်ကြိမ်ကြိမ်တွင် သူ့အတွက် ထောင်ချောက်ဆင်ထားနိုင်သည့် အန္တရာယ်တစ်ခု ရှိနေ၏။ ထို့ပြင် မကြာသေးမီက တရားရုံးတော်မှ ဝန်ထမ်းများအပေါ် တိုက်ခိုက်မှုများ မြင့်တက်လာခြင်းကြောင့် ထိုသို့ဖြစ်လာနိုင်ခြေမှာ အလွန်များပြားနေပေ၏။

"ယုံကြည်ရတာပေါ့။ ဘာပဲဖြစ်ဖြစ် သူတို့အားလုံးက တရားရုံးတော်ကပဲလေ။"

လက်ထောက်ရှီက သက်တောင့်သက်သာပင် ပြန်ဖြေလိုက်ရာ ယန်ချင်းထံမှ နားမလည်နိုင်သော အမူအရာကို ထွက်ပေါ်လာစေလေ၏။

တရားရုံးတော်၏ ဝန်ထမ်းများအနေဖြင့် ဂိုဏ်းတစ်ခု၊ အင်ပါယာတစ်ခု၊ တိုင်းပြည်တစ်ခု သို့မဟုတ် ကြီးမားသော ကုန်သည်အဖွဲ့အစည်းတစ်ခုအတွင်းသို့ ထိုးဖောက်ဝင်ရောက်ခြင်းကို သူနားလည်နိုင်သော်လည်း မျိုးနွယ်စုတစ်ခုကဲ့သို့ အလွန်တရာ စည်းလုံးညီညွတ်သော နေရာမျိုးသို့ ထိုးဖောက်ဝင်ရောက်ရန်မှာမူ အလွန်ခက်ခဲမည်ဖြစ်ပေ၏။

အချို့သော တိုင်းပြည်များနှင့် အင်ပါယာများသည်ပင် ၎င်းတို့၏ အုပ်ချုပ်မှုနယ်ပယ်အတွင်း ပြင်ပလူများကို လုံးဝခွင့်မပြုတတ်ကြပေ။ အာဏာကို အမြင့်ဆုံးအုပ်ချုပ်သူ မိသားစုများအတွင်း၌သာ ထိန်းသိမ်းထားလေ့ရှိပြီး တော်ဝင်မိသားစုသည်လည်း ၎င်းတို့ထဲမှ တစ်ခုအပါအဝင်ဖြစ်လေ၏။

"တောင်ပိုင်းတိုက်ကြီးက တကယ်ကို ကြီးမားကျယ်ပြန့်တဲ့ နေရာတစ်ခုပဲ။ ပြီးတော့ နှစ်တွေတစ်လျှောက် ဖြစ်ပွားခဲ့တဲ့ စစ်ပွဲတွေက အဖြစ်ဆိုးတစ်ခု ဖြစ်ပေမယ့် တချို့အမြင်တွေအရတော့ အခွင့်အရေးတွေလို့ သတ်မှတ်လို့ရတယ်။"

"နှစ်တွေတစ်လျှောက် ပြီးခဲ့တဲ့ ရာစုနှစ်တစ်ခုအတွင်းမှာတင် အဆင့်နိမ့်အဖွဲ့အစည်း ဘယ်လောက်များများ ပျောက်ကွယ်သွားလဲဆိုတာ မင်းသိလား။"

လက်ထောက်ရှီက မေးမြန်းလိုက်၏။

"နှစ်သိန်းခွဲလောက်လား။"

ယန်ချင်းက မသေချာသော လေသံဖြင့် ပြန်ဖြေလိုက်လေ၏။

"အဲဒီလောက်နည်းပါစေလို့ ငါဆုတောင်းပါတယ်။ ဒါဆိုရင် ငါတို့ရဲ့ လုပ်ဆောင်ချက်တွေက သက်ရောက်မှုရှိတယ်ဆိုတဲ့ သက်သေဖြစ်လာမှာမို့လို့လေ။"

လက်ထောက်ရှီက ဝမ်းနည်းကြေကွဲဖွယ် အပြုံးတစ်ခုဖြင့် ပြောလိုက်လေ၏။

"ဆယ်သန်းထက် မနည်းဘူး။ ငါတို့ စကားပြောနေတဲ့ အချိန်မှာတင် အဖွဲ့အစည်းရာချီလောက် ကျဆုံးသွားလောက်ပြီ။"

လက်ထောက်ရှီက ပြောလိုက်၏။

တရားရုံးတော် ရှိနေသော်ငြား တိုက်ကြီးတစ်ခွင်ရှိ အခြေအနေများမှာ ခက်ခဲနေဆဲဖြစ်ကြောင်း ယန်ချင်းသိထားသော်လည်း ဤမျှလောက် ဆိုးရွားနေလိမ့်မည်ဟု သူတစ်ခါမှ မတွေးမိခဲ့ပေ။ အနည်းငယ်မျှဖြစ်စေ သူတို့ အပြောင်းအလဲတစ်ခုကို ဖန်တီးနိုင်ခဲ့ပြီဟု သူ ထင်မှတ်ထားခဲ့မိ၏။ သို့သော်လည်း ဆယ်သန်းဟူသော ကိန်းဂဏန်းက သူတို့ ဘာမှ မစွမ်းဆောင်နိုင်ခဲ့သကဲ့သို့ ဖြစ်စေလေ၏။

"စိတ်ဓာတ်မကျပါနဲ့။ အဲဒီကိန်းဂဏန်းက မြင့်မားနေပေမယ့် လွန်ခဲ့တဲ့ နှစ်တစ်ထောင်ကလိုတော့ မဆိုးရွားတော့ပါဘူး။ ပြီးတော့ အနည်းဆုံး အခုအချိန်မှာ အဲဒီအဆင့်နိမ့်အဖွဲ့အစည်းတွေအနေနဲ့ ကြီးထွားလာဖို့ ခက်ခဲတယ်ဆိုပေမယ့် သူတို့ရဲ့ ပျက်စီးမှုက လုံးဝ မျိုးတုံးပျောက်ကွယ်သွားတာမျိုးတော့ မဟုတ်တော့ဘူး။"

လက်ထောက်ရှီက ယန်ချင်း၏ အတွေးများကို ဖတ်ကြည့်နေသည့်အလား ပြောလိုက်လေ၏။

"တချို့က ပူးပေါင်းမှုတွေနဲ့ မဟာမိတ်ဖွဲ့ခြင်းတွေကတစ်ဆင့် ပျောက်ကွယ်သွားတယ်။ တခြားအဖွဲ့တွေက ဖျက်သိမ်းလိုက်တာမျိုးတွေ ရှိတယ်။ ဒါပေမဲ့ ဝမ်းနည်းစရာကောင်းတာက အများစုဟာ ပြိုင်ဘက်တွေ ဒါမှမဟုတ် သွေးလက်တစ္ဆေဂိုဏ်း၊ သွေးနီလှိုင်းလိုမျိုး မိစ္ဆာအဖွဲ့အစည်းတွေရဲ့ သတ်ဖြတ်မှုကြောင့် ပျက်စီးသွားကြတာပဲ။ အင်း... အဲဒီဂိုဏ်းတွေရဲ့ အကြွင်းအကျန်တွေပေါ့လေ..."

"ဒါပေမဲ့ ဒီလို‌ကြေကွဲစရာကောင်းတဲ့ အကြောင်းအရာတွေကို ဒီလောက်နဲ့ပဲ ရပ်လိုက်ကြစို့။ အခု အဖွဲ့အစည်းတွေ အများကြီး ပျောက်ကွယ်သွားတဲ့အတွက် အဲဒီအဖွဲ့အစည်းတွေရဲ့ အပျက်အစီးတွေကြားထဲကို လူတစ်ယောက်ယောက် ထည့်သွင်းထားဖို့က ပိုပြီး လွယ်ကူသွားစေတယ်။"

"နှစ်တွေတစ်လျှောက် ငါတို့ စုဆောင်းထားတဲ့ သတင်းအချက်အလက်တွေ၊ ငါတို့ဆီမှာရှိတဲ့ ပျောက်ဆုံးနေတဲ့ ကျင့်ကြံခြင်းသိုင်းပညာ အမြောက်အမြားနဲ့ဆိုရင် တရားရုံးတော်က လူတစ်ယောက်ကို ဖျက်ဆီးခံလိုက်ရတဲ့ အဖွဲ့အစည်းတစ်ခုရဲ့ နောက်ခံမှာ ထည့်သွင်းထားဖို့ ပိုလွယ်ကူတယ်။ တခြားအခြေအနေတွေမှာဆိုရင် ငါတို့ကိုယ်တိုင် အဖွဲ့အစည်းတစ်ခုကို ဖန်တီးလိုက်လို့တောင် ရသေးတယ်၊ ဘယ်သူမှလည်း ရိပ်မိမှာ မဟုတ်ဘူး။"

"ငါတို့က တရားရုံးတော်ထဲကနေ လူတစ်ယောက်ကို ရွေးချယ်ပြီး အဲဒီအဖွဲ့ဝင်ရဲ့ ကျွမ်းကျင်မှုအပေါ် မူတည်ပြီး မျိုးနွယ်စုတစ်ခု ဒါမှမဟုတ် ဂိုဏ်းတစ်ခု၊ ဒါမှမဟုတ် တခြားမတူညီတဲ့ အဖွဲ့အစည်းအမျိုးအစားတွေကို စတင်ဖို့ လုံလောက်တဲ့ ထောက်ပံ့မှုတွေ ပေးလိုက်တယ်။"

"အဖွဲ့အစည်းရဲ့ ဦးတည်ချက်နဲ့ တိုးတက်မှုက သူတို့အပေါ်မှာပဲ လုံးလုံးလျားလျား မူတည်တယ်။ ငါတို့ရဲ့ အပိုင်းကတော့ သူတို့အခြေချမယ့် နေရာတွေမှာ ချောချောမွေ့မွေ့ ဝင်ဆံ့နိုင်ဖို့ သေချာအောင် လုပ်ပေးဖို့ပဲ။ ငါတို့က သူတို့ရဲ့ ကံကြမ္မာအပါအဝင် သူတို့နဲ့ပတ်သက်သမျှ အရာအားလုံးကို ဖန်တီးပေးတယ်။ ကံကြမ္မာဖုံးကွယ်နယ်ပယ် သလင်းကျောက်ကို မင်းတွေ့ဖူးတယ်မလား။ တချို့အရာတွေကို အဲဒီအရာရဲ့ အကူအညီနဲ့ လုပ်ဆောင်ထားတာပဲ။"

"ဒီစီမံကိန်းကို လွန်ခဲ့တဲ့ နှစ် ၇၀၀ ကတည်းက စတင်လုပ်ဆောင်ခဲ့တာ၊ အခုတော့ နောက်ဆုံးမှာ အသီးအပွင့်တွေ စတင်ပေါ်ပေါက်လာပြီလေ။ ဒါပေမဲ့လည်း ဒါကို ထိန်းသိမ်းရမယ့် အလုပ်တာဝန်တွေက အရိပ်သိမ်းငှက်တစ်ဖွဲ့တည်း ကိုင်တွယ်ဖို့ဆိုတာ အရမ်းကို များပြားလွန်းနေတယ်။ ဒါကြောင့် ငါတို့ အကူအညီလိုတယ်၊ ဒီအလုပ်ကို လုပ်ဖို့အတွက်ဆိုရင် ငါတို့ရဲ့ တရားသူကြီးတွေထက် ပိုကောင်းတာ ဘယ်သူရှိသေးလို့လဲ"

"အဲဒီအဆက်အသွယ်ထဲမှာရှိတဲ့ အဖွဲ့အစည်းတွေထဲက ဘယ်အဖွဲ့အစည်းမှ အင်အားမကြီးကြဘူး။ အများစုက အဆင့် ၄ နဲ့ အဆင့် ၅ ကြားမှာ ရှိပြီး လက်တစ်ဆုပ်စာလောက်ကတော့ အဆင့် ၃ ကို ရောက်နေတယ်။ ဒါပေမဲ့ အဲဒီ အဆင့် ၃ တွေကလည်း အရေအတွက် ၁၀ ထက် မပိုဘူး။ အဆင့် ၂ မှာတော့ ဘယ်အဖွဲ့မှ မရှိသေးဘူး။"

ယန်ချင်းက မယုံနိုင်သော အမူအရာကို ပြသလိုက်၏။ တရားရုံးတော်၏ ပါရမီရှင်များဖြင့်ဆိုလျှင် လွန်ခဲ့သော နှစ် ၇၀၀ အတွင်း အနည်းဆုံး လူတစ်ယောက်ကို နယ်ပယ်အဆင့်သို့ ရောက်ရှိစေရန် သေချာပေါက် စွမ်းဆောင်နိုင်ပေလိမ့်မည်။ သို့မဟုတ်ပါကလည်း တရားရုံးတော်မှ တမင်တကာ စီစဉ်ထားခြင်းဖြစ်ပြီး သံသယမျက်လုံးများကို မဆွဲဆောင်နိုင်စေရန်အတွက် ထိုအဖွဲ့ဝင်များ၏ တိုးတက်မှုကို နှေးကွေးအောင် ပြုလုပ်ထားခြင်းသာ ဖြစ်ပေမည်။

"ဒီအစီအစဉ်အတွက် ရွေးချယ်ခံရသူတွေက ဝင်ခွင့်စာမေးပွဲတွေမှာ ကျရှုံးခဲ့ပေမယ့် တချို့ကဏ္ဍတွေမှာတော့ ပါရမီအချို့ကို ပြသနိုင်ခဲ့တဲ့ သူတွေပဲ။ အဆင့် ၂ အဖွဲ့အစည်း မရှိတာက တမင်တကာ စီစဉ်ထားတာ မဟုတ်ပါဘူး။ တကယ်တော့ ငါတို့ဆီမှာရှိတဲ့ အဆင့် ၃ အဖွဲ့အစည်းတွေထဲက အချို့ဆိုရင် လုံးဝကို အံ့အားသင့်စရာကောင်းလောက်အောင် ပေါ်ထွက်လာခဲ့တာပဲ။"

"ပါရမီရှင်တစ်ယောက်ကို လူပုံလယ်မှာ ဖုံးကွယ်ထားတာက ဖွင့်ဟပြသလိုက်တာထက် မျက်လုံးပိုများများကို အထူးသဖြင့် ကျွမ်းကျင်တဲ့ မျက်လုံးတွေကို ပိုပြီး ဆွဲဆောင်နိုင်တယ်။ ဒီလိုကိစ္စမျိုးမှာ ပုံမှန် ပါရမီပါတဲ့သူတွေကို အသုံးပြုတာက ပိုပြီး ဘေးကင်းပါတယ်။

ပြီးတော့ တရားရုံးတော်က သူတို့ရဲ့ အမြင့်ဆုံး ပါရမီရှင်တွေကို ဒီလိုစွန့်စားခန်းမျိုးအတွက် အန္တရာယ်အဖြစ်မခံနိုင်ဘူးလေ။ အခုလက်ရှိ အနေအထားအရလည်း အဲဒီလောက် ပါရမီရှင်တွေ အလုံအလောက် မရှိသေးပါဘူး။"

လက်ထောက်ရှီက ဂရုတစိုက် ရှင်းပြလိုက်လေ၏။