အခန်း ၇၈၈

အပိုင်း (၇၈၈) ကုမ္ပဏီကြီးနှစ်ခုမှ ခေါင်းဆောင်များ၏ အစွမ်းများ

လင်းယွမ် အံ့ဩသွားသည်။ ခိုက်ရီနည်းပညာ ကုမ္ပဏီ၏ ဒါရိုက်တာဘုတ်အဖွဲ့ဝင်များအားလုံးက သန္ဓေပြောင်းလဲနှုန်း ၆၀ ရာခိုင်နှုန်းအထိ ရောက်ရှိနေသည့် အစွမ်းပိုင်ရှင်များ ဖြစ်နေကြသည်လား။

သူက ဘေးနားရှိ ဝမ်ထျန်အန်းကို မနေနိုင်ဘဲ လှမ်းကြည့်လိုက်ပြီး မေးခွန်းထုတ်လိုသည့် အမူအရာ ပြလိုက်သည်။

ဝမ်ထျန်အန်းက ခေါင်းအနည်းငယ် ညိတ်လိုက်ပြီး လေးနက်သောအသံဖြင့် "ဒါရိုက်တာဘုတ်အဖွဲ့ထဲ ဝင်နိုင်ဖို့ အနည်းဆုံး သတ်မှတ်ချက်က သန္ဓေပြောင်းလဲနှုန်း ၆၀ ရာခိုင်နှုန်း ရှိရမှာ... ဒါရိုက်တာဘုတ်အဖွဲ့ဝင် တချို့ဆိုရင် ဒီအဆင့်ကို ရောက်နေတာ လအတော်ကြာပြီ... သူတို့ထဲက တချို့ရဲ့ အစွမ်းက ၆၀ ရာခိုင်နှုန်းထက်တောင် ကျော်လွန်နေလောက်ပြီ"

လင်းယွမ် မျက်မှောင်အနည်းငယ် ကြုတ်လိုက်မိပြီး အနည်းငယ် ချဲ့ကားပြောလွန်းသည်ဟု ခံစားလိုက်ရသည်။

သူကိုယ်တိုင်က အစွမ်းပိုင်ရှင်တစ်ယောက် ဖြစ်ရာ သန္ဓေပြောင်းလဲနှုန်း မြှင့်တင်ရန် မည်မျှ ခက်ခဲကြောင်းကို ကောင်းကောင်းကြီး သိထား၏။

ကပ်ဘေးကျရောက်ချိန်မှစ၍ ယခုအထိ အတိအကျ တွက်ကြည့်လျှင် နှစ်နှစ်ကျော်ခန့်သာ ရှိသေးသော်လည်း တစ်စုံတစ်ယောက်က သန္ဓေပြောင်းလဲနှုန်း ၆၀ ရာခိုင်နှုန်းကို ကျော်လွန်နေပြီ ဟူသည်မှာ ဖြစ်နိုင်ပါ့မလား။

သူကိုယ်တိုင်က စနစ် ရှိနေ၍သာ ဤမျှ အလျင်အမြန် တိုးတက်လာခဲ့ခြင်း ဖြစ်သည်။

အခြားလူများက ဘာကိုအားကိုးပြီး ဤမျှ မြန်ဆန်စွာ ကျင့်ကြံနိုင်ခဲ့ကြသနည်း။

"သူတို့က တကယ်ပဲ အစွမ်းထက်တဲ့ သန္ဓေပြောင်းလဲခြင်း နည်းပညာကို ရှာဖွေတွေ့ရှိသွားတာများလား"

လင်းယွမ်အနေဖြင့် ဤအချက်ကို သံသယ မဝင်ဘဲ မနေနိုင်တော့ပေ။ သို့မဟုတ်ပါက ရှင်းပြစရာ အကြောင်းပြချက် မရှိတော့ချေ။

သူက ထပ်မေးလိုက်သည်။ "ခိုက်ရီနည်းပညာ ကုမ္ပဏီရဲ့ ဒါရိုက်တာဘုတ်အဖွဲ့ဝင် ဘယ်နှစ်ယောက် ရှိလဲ"

"သုံးယောက် ရှိတယ်... ဥက္ကဋ္ဌကလွဲရင် နောက်ထပ် နှစ်ယောက် ရှိသေးတယ်"

"အဲဒီနှစ်ယောက်က အရင်တုန်းက ယွီကျိုးပြည်နယ်မှာ တစ်နေရာစီ ကြီးစိုးခဲ့ကြတဲ့ အစွမ်းပိုင်ရှင်တွေပဲ... သူတို့က အရမ်း အစွမ်းထက်ကြတယ်... ကျွန်တော်တို့ ဥက္ကဋ္ဌနဲ့ တွေ့တဲ့အချိန်ကျမှ ဥက္ကဋ္ဌရဲ့ အနိုင်ယူတာကို ခံလိုက်ရပြီး ကျွန်တော်တို့ ကုမ္ပဏီထဲ ဝင်လာခဲ့ကြတာ"

လင်းယွမ်က မနေနိုင်ဘဲ ဆက်မေးလိုက်သည်။ "မင်းတို့ ဥက္ကဋ္ဌက ဘယ်သူလဲ... ဘာအစွမ်း ရှိလို့လဲ"

ဝမ်ထျန်အန်းက ပြန်ဖြေသည်။ "ကျွန်တော်တို့ ဥက္ကဋ္ဌက နိုင်ငံခြားသား ဂျိမ်းစ် လို့ ခေါ်တယ်... သူက ဥရောပ ရုံးချုပ်ကနေ စေလွှတ်လိုက်တာ... ရေဘေးကြီး ဖြစ်ပြီးတဲ့နောက်ပိုင်း ကုမ္ပဏီနဲ့ ရုံးချုပ်က အဆက်အသွယ် ပြတ်သွားတော့ သူကပဲ ကုမ္ပဏီရဲ့ တစ်ဦးတည်းသော အမြင့်ဆုံး အထက်လူကြီး ဖြစ်လာခဲ့တာ"

လင်းယွမ်က မျက်မှောင်ကြီး ကြုတ်သွားသည်။ "နိုင်ငံခြားသား တစ်ယောက်အတွက် မင်းတို့က အသက်ပေးပြီး အလုပ်လုပ်ပေးချင်နေကြတာလား"

ဝမ်ထျန်အန်းက ခါးသီးစွာ ပြုံးလိုက်ပြီး "ဆရာလင်း... ဥက္ကဋ္ဌက အလုပ်လုပ်တဲ့နေရာမှာ စည်းကမ်းရှိတယ်... အကောင်းအဆိုးကို ရှင်းရှင်းလင်းလင်း ခွဲခြားသိမြင်ပြီး ကျွန်တော်တို့အပေါ် ခွဲခြားဆက်ဆံတာမျိုး မရှိဘူး... ကိုယ့်လူအချင်းချင်း တည်ထောင်ထားတဲ့ ခိုလှုံရေးစခန်း တချို့ဆိုရင် နောက်ပေါက်ကနေ ဝင်တာတွေ... လူရာသွင်းပြီး မျက်နှာလိုက်တာတွေချည်းပဲ"

"အဲဒီ ခိုလှုံရေးစခန်းတွေက ခေါင်းဆောင် အများစုက ကိုယ့်လူဆိုရင် နေရာပေးတတ်ကြတယ်... အမှားအမှန်ကို ဂရုမစိုက်ဘဲ စကားနားထောင်သလား ဆိုတာကိုပဲ ကြည့်ကြတာ"

"ဒါတွေနဲ့ ယှဉ်လိုက်ရင် ဆရာဂျိမ်းစ်က အများကြီး ပိုကောင်းတယ်... ဒါကြောင့် အစပိုင်းတုန်းက သူ့လက်အောက်မှာ အလုပ်လုပ်ချင်တဲ့လူ တော်တော်များများ ရှိခဲ့တယ်"

"ပြီးတော့ ကုမ္ပဏီရဲ့ ဝင်ထွက်ခွင့်တွေနဲ့ လျှို့ဝှက် အချက်အလက် တော်တော်များများကို ထိန်းချုပ်ထားတဲ့ နိုင်ငံခြားသား အထက်တန်း အရာရှိတစ်စုလည်း သူ့မှာ ရှိနေသေးတယ်... အဲဒါကြောင့် နောက်ဆုံးမှာ သူတို့ကို ဗဟိုပြုပြီး တည်ဆောက်ထားတဲ့ ခိုလှုံရေးစခန်း တစ်ခု ဖြစ်လာခဲ့တာပဲ"

"ဒါပေမဲ့ အရေးအကြီးဆုံး အကြောင်းရင်းကတော့ ဆရာဂျိမ်းစ်ရဲ့ အစွမ်းက အရမ်းထူးခြားနေလို့ပဲ... ဒါကြောင့် သူက ခေါင်းဆောင်နေရာမှာ ခိုင်ခိုင်မာမာ ရပ်တည်နိုင်တာ"

လင်းယွမ်က ချက်ချင်း မေးလိုက်သည်။ "သူ့အစွမ်းက ဘာလဲ... ဘာတွေများ ထူးခြားနေလို့လဲ"

ဝမ်ထျန်အန်းက လေးနက်သော အသံဖြင့် "ဂျိမ်းစ်ရဲ့ အစွမ်းကို တိတ်ဆိတ်ဇုန် လို့ ခေါ်တယ်"

"တိတ်ဆိတ်ဇုန်... ဘာသဘောလဲ"

"အဲဒါက စိတ်စွမ်းအင် အမျိုးအစား အစွမ်းတစ်ခုပဲ... သူ့ရဲ့ စိတ်စွမ်းအင် လွှမ်းခြုံထားတဲ့ အောက်မှာရှိတဲ့ တခြားအစွမ်းပိုင်ရှင်တွေ အားလုံးရဲ့ အစွမ်းတွေက တိတ်ဆိတ်ဇုန် အာနိသင် သက်ရောက်သွားပြီး အသုံးပြုလို့ မရတော့ဘူး... ဘယ်လောက်ပဲ အစွမ်းထက်တဲ့ အစွမ်းပိုင်ရှင်ဖြစ်ပါစေ သာမန်လူတွေအဖြစ် ပြောင်းလဲသွားမှာပဲ"

လင်းယွမ် ရင်ထဲ ထိတ်လန့်သွားသည်။ ဤအစွမ်းက နားထောင်ကြည့်ရသလောက် ချိတ်ပိတ် သင်္ကေတ၏ အာနိသင်နှင့် ခပ်ဆင်ဆင် တူနေသည် မဟုတ်ပါလော။

သူ၏ မျက်နှာအမူအရာ အနည်းငယ် လေးနက်သွားသည်။ ချိတ်ပိတ် သင်္ကေတသည် အလွန်အမင်း အစွမ်းထက်ကြောင်း သူ သိထား၏။ ချိတ်ပိတ် သင်္ကေတ၏ လွှမ်းခြုံမှုကို ခံလိုက်ရသည်နှင့် တစ်ပြိုင်နက် ခန္ဓာကိုယ်တွင်းရှိ အစွမ်းများ လည်ပတ်၍ မရတော့ဘဲ စွမ်းအင်များ ရပ်တန့်သွားမည် ဖြစ်သည်။

သို့သော် လင်းယွမ် ထင်မှတ်မထားခဲ့သည်မှာ ချိတ်ပိတ် သင်္ကေတနှင့် တူညီသော အစွမ်းမျိုးကို နိုးထလာသည့် လူတစ်ယောက် ရှိနေလိမ့်မည်ဟူ၍ပင်။

အကယ်၍ တိုက်ခိုက်ကြမည်ဆိုပါက အားလုံး သာမန်လူများကဲ့သို့ တိုက်ခိုက်ရမည် မဟုတ်ပါလော။

ထို့နောက် လင်းယွမ်က ပြဿနာတစ်ခုကို ချက်ချင်း တွေးမိသွားပြန်သည်။ "နေပါဦး... သူ့အစွမ်းက တခြားလူတွေကို သာမန်လူ ဖြစ်သွားစေရုံ သက်သက်ဆိုရင်တောင် သူ့အတွက် ဘာအခွင့်အရေးများ ရှိလို့လဲ... အားလုံးက သာမန်လူတွေ ဖြစ်နေမှတော့ သူက တစ်ဖက်လူကို အနိုင်ရမယ်လို့ သေချာပေါက် မပြောနိုင်ဘူးလေ"

ဝမ်ထျန်အန်းက ခေါင်းအနည်းငယ် ခါယမ်းလိုက်ပြီး "မဟုတ်ဘူး... တိတ်ဆိတ်ဇုန် အစွမ်းက ပြိုင်ဘက်ရဲ့ အစွမ်းတွေကို တိတ်ဆိတ်သွားစေနိုင်ပေမဲ့ သူ့ကိုယ်ပိုင် သန္ဓေပြောင်းစွမ်းအင်တွေကတော့ ချိတ်ပိတ်ခံရတာ မဟုတ်ဘူး"

"ဆိုလိုတာက သူ့ရဲ့ သန္ဓေပြောင်းစွမ်းအင်တွေနဲ့ အစွမ်းလက်နက်တွေ... သင်္ကေတ ချပ်ဝတ်တန်ဆာတွေကို အသုံးပြုနိုင်သေးတယ်"

"ရန်သူတွေကတော့ အစွမ်းတွေ တိတ်ဆိတ်သွားပြီးတဲ့နောက် သန္ဓေပြောင်းစွမ်းအင် လည်ပတ်လို့ မရတော့သလို... ဘယ်လို အစွမ်းလက်နက် အာနိသင်တွေကိုမှလည်း အသက်မသွင်းနိုင်တော့ဘူး"

လင်းယွမ် ချက်ချင်း နားလည်သွားသည်။ ဤသည်မှာ တစ်ဖက်လူက အစွမ်းလက်နက်များကို အသုံးပြုနိုင်သော်လည်း မိမိဘက်ကမူ အသုံးပြု၍ မရနိုင်သည်နှင့် အတူတူပင် ဖြစ်သည်။

ဤသည်မှာ ချိတ်ပိတ် သင်္ကေတထက် ပိုမို အသုံးဝင်သော အစွမ်းကို ချိတ်ပိတ်သည့် နည်းလမ်းတစ်ခု ဖြစ်ပေသည်။

ချိတ်ပိတ် သင်္ကေတက ရန်သူ၊ မိတ်ဆွေ မခွဲခြားသော်လည်း ဂျိမ်းစ်၏ ဤအစွမ်းကမူ ရန်သူကိုသာ ချိတ်ပိတ်ပြီး မိမိကိုယ်ကို ချိတ်ပိတ်ခြင်း မရှိပေ။

လင်းယွမ်က ထပ်မေးလိုက်သည်။ "သူက လူတစ်ယောက်ကို သီးသန့်ရွေးပြီး တိတ်ဆိတ်သွားအောင် လုပ်လို့ရလား"

ဝမ်ထျန်အန်းက ခေါင်းညိတ်လိုက်သည်။ "ရတာပေါ့... သူ့အစွမ်းက သူ့ရဲ့ စိတ်စွမ်းအင်နောက်ကို လိုက်တာ... သူ့ရဲ့ စိတ်စွမ်းအင် လွှမ်းခြုံထားတဲ့ နေရာတိုင်းက တိတ်ဆိတ်ဇုန် ဖြစ်သွားတာပဲ"

လင်းယွမ်၏ မျက်နှာအမူအရာ များစွာ လေးနက်သွားသည်။

ဆိုလိုသည်မှာ ဤလူ၏ အစွမ်းသည် အုပ်စုဖွဲ့ တိုက်ပွဲများတွင်ပင် အလွန်ကြီးမားသော အထောက်အကူပြု အာနိသင် ရှိနေခြင်း ဖြစ်သည်။

"အင်အားစု တစ်ခုရဲ့ ခေါင်းဆောင် ဖြစ်လာနိုင်တာ အလကားမဟုတ်ဘူးပဲ"

လင်းယွမ် တွေးတောနေမိသည်။ အကယ်၍ သူသာ ဤဂျိမ်းစ်နှင့် တွေ့ဆုံပါက မည်သို့ ရင်ဆိုင်ဖြေရှင်းရမည်နည်း။

"ငါ့ရဲ့ အစွမ်းတွေသာ တစ်ဖက်လူရဲ့ ကန့်သတ်တာ ခံလိုက်ရရင်... တစ်ဖက်လူက အစွမ်းလက်နက် ပစ္စည်းအမျိုးမျိုးကို သုံးပြီး ငါ့ကို တိုက်ခိုက်လာနိုင်တယ်... အဲဒီအခါကျ ငါက ဘာကိုအားကိုးပြီး ပြန်တိုက်ခိုက်ရမလဲ"

လင်းယွမ် မျက်မှောင်ကို တင်းကျပ်စွာ ကြုတ်လိုက်ပြီးနောက် ရုတ်တရက် ပြဿနာတစ်ခုကို တွေးမိသွားသည်။

ချိတ်ပိတ် သင်္ကေတသည် သန္ဓေပြောင်းစွမ်းအင် လည်ပတ်မှုကို ချိတ်ပိတ်နိုင်သော်လည်း သန္ဓေပြောင်းလဲခြင်းကိုမူ ချိတ်ပိတ်နိုင်စွမ်း မရှိပေ။

အစွမ်းပိုင်ရှင်များ သန္ဓေပြောင်းလဲလိုက်သည်နှင့် ချက်ချင်းပင် ဧရာမ သားရဲကြီးများအဖြစ်သို့ ပြောင်းလဲသွားမည် ဖြစ်သည်။

သန္ဓေပြောင်းစွမ်းအင်ကို ထုတ်ယူသုံးစွဲ၍ မရသော်လည်း ဧရာမ သားရဲကြီး အခြေအနေတွင် သူတို့၏ ဖျက်ဆီးနိုင်စွမ်းသည် အလွန်တရာ ကြောက်မက်ဖွယ် ကောင်းနေဆဲပင်။

ဒါဆိုလျှင် ဂျိမ်းစ်၏ ဤ 'တိတ်ဆိတ်ဇုန်' အစွမ်းကရော သန္ဓေပြောင်းလဲခြင်းကို ဟန့်တားနိုင်စွမ်း ရှိပါမည်လော။

လင်းယွမ်က ဝမ်ထျန်အန်းအား ချက်ချင်း မေးလိုက်သည်။ "ဒီဂျိမ်းစ်ရဲ့ တိတ်ဆိတ်ဇုန် အစွမ်းက အစွမ်းပိုင်ရှင်တွေရဲ့ သန္ဓေပြောင်းလဲခြင်းကိုရော ကန့်သတ်နိုင်လား"

ဝမ်ထျန်အန်းက ခေါင်းညိတ်လိုက်သည်။ "ရတယ်... သူ့အစွမ်းရဲ့ ပစ်မှတ်ထားတာကို ခံလိုက်ရပြီဆိုတာနဲ့... အစွမ်းပိုင်ရှင်က အချိန်မီ မျိုးရိုးဗီဇပုံစံကို မပြောင်းနိုင်ခဲ့ရင် ပြောင်းလဲနိုင်တဲ့ အခွင့်အရေးကို လုံးဝ လက်လွတ်သွားပြီး သူ့ကို သာမန်လူသား ပုံစံနဲ့ပဲ ရင်ဆိုင်ရတော့မှာ"

"ဒါပေမဲ့ အခု ကောလာဟလ ထွက်နေတာကတော့... သန္ဓေပြောင်းလဲပြီးရင်တောင်မှ ဂျိမ်းစ်ရဲ့ အစွမ်းနဲ့ ပစ်မှတ်ထားခံရပြီ ဆိုတာနဲ့ သန္ဓေပြောင်းလဲတဲ့ ပုံစံကို ဆက်လက် မထိန်းသိမ်းနိုင်တော့ဘဲ သာမန်လူသား ပုံစံကို တိုက်ရိုက် ပြန်ရောက်သွားနိုင်တယ်တဲ့"

"ဒါက ကောလာဟလ သက်သက်ပါပဲ... ဘာလို့လဲဆိုတော့ လအတော်ကြာက ဂျိမ်းစ်နဲ့ မုန်ယာကုမ္ပဏီ ခေါင်းဆောင် ကျင်းရှီရုံတို့ တိုက်ပွဲဖြစ်ပြီးတဲ့ နောက်ပိုင်းကစလို့ သူက ဘယ်တော့မှ ထပ်ပြီး လက်စွမ်းမပြတော့လို့ပဲ"

"ဒါကြောင့် သူက သန္ဓေပြောင်းလဲထားတဲ့ အစွမ်းပိုင်ရှင်တွေကို 'တိတ်ဆိတ်' သွားအောင် လုပ်နိုင်သလား ဆိုတာကိုတော့ ဘယ်သူမှ ရေရေရာရာ မသိကြဘူး"

"ကျင်းရှီရုံ" လင်းယွမ်က အရေးကြီးသော အချက်အလက်ကို ချက်ချင်း ဖမ်းဆုပ်လိုက်သည်။

သူ စိတ်ဝင်စားသွားပြီး မေးလိုက်သည်။ "ဒီကျင်းရှီရုံဆိုတာက မုန်ယာကုမ္ပဏီရဲ့ ခေါင်းဆောင်လား... သူက ဂျိမ်းစ်ကို ယှဉ်တိုက်နိုင်လို့လား"

ဝမ်ထျန်အန်းက ခေါင်းအနည်းငယ် ညိတ်လိုက်ပြီး "မှန်တယ်... ကျင်းရှီရုံက မုန်ယာကုမ္ပဏီရဲ့ သူဌေးပဲ... မုန်ယာကုမ္ပဏီ တစ်ခုလုံးက ကျင်းရှီရုံကို ဗဟိုပြုပြီး လည်ပတ်နေတာ"

"ကျင်းရှီရုံက ယွီကျိုးပြည်နယ်မှာ နာမည်ကြီး မိန်းမလိုက်စားတဲ့သူပဲ... သူက သူ့ရဲ့ ရေပေါ်ကျွန်းမှာ နန်းတော်တစ်ခု တည်ဆောက်ထားတယ်... အဲဒီနန်းတော်ထဲမှာ နေကြတဲ့သူတွေ အကုန်လုံးက သူ နည်းလမ်းမျိုးစုံ သုံးပြီး ဖမ်းလာခဲ့တဲ့ မိန်းမတွေချည်းပဲ"

"လက်ရှိအချိန်မှာ ဂျိမ်းစ်ကို ယှဉ်နိုင်တဲ့ တစ်ဦးတည်းသောလူက သူပဲ"

လင်းယွမ် ပို၍ စိတ်ဝင်စားသွားကာ မေးလိုက်သည်။ "သူက ဂျိမ်းစ်ကို ဘယ်လို ယှဉ်တိုက်တာလဲ... ဂျိမ်းစ်ရဲ့ အစွမ်းက ပြိုင်ဘက်ကင်းတယ် ဆိုတာ မဟုတ်ဘူးလား"

ဝမ်ထျန်အန်းက ရယ်မောလိုက်သည်။ "ဆရာလင်း... ဒီလောကကြီးမှာ ပြိုင်ဘက်ကင်းတဲ့ အစွမ်းဆိုတာ မရှိပါဘူး... အစွမ်းတစ်ခုကို နှိမ်နင်းနိုင်တဲ့ တခြားအစွမ်းတစ်ခုကတော့ အမြဲတမ်း ရှိနေစမြဲပဲ"

"ဒီကျင်းရှီရုံက မုန်ယာကုမ္ပဏီရဲ့ သူဌေးကြီး ဖြစ်တဲ့အလျောက် သူ့ရဲ့ အစွမ်းက အင်မတန်မှ ရှားပါးတယ်... ဆရာ့ရဲ့ အစွမ်းနဲ့ နည်းနည်း ဆင်တူတယ်"

လင်းယွမ် အံ့ဩသွားသည်။ "ငါ့အစွမ်း"

ဝမ်ထျန်အန်းက ဆက်ပြောသည်။ "ဆရာ့အစွမ်းက ပုံတူကူးချတဲ့ အမျိုးအစား အစွမ်း မဟုတ်လား... အဲလိုမှ မဟုတ်ရင် ဆရာက ဘာဖြစ်လို့ အစွမ်းပေါင်းများစွာကို တစ်ပြိုင်နက်တည်း ပိုင်ဆိုင်ထားရတာလဲ ဆိုတာကို ကျွန်တော် တကယ် စဉ်းစားလို့ မရဘူး"

လင်းယွမ်က မနေနိုင်ဘဲ မျက်ခုံးကို အနည်းငယ် ပင့်လိုက်သည်။ "မင်း ပြောချင်တာက ဒီကျင်းရှီရုံရဲ့ အစွမ်းက ပုံတူကူးချအစွမ်း လို့ ပြောတာလား"

ဝမ်ထျန်အန်းက ခေါင်းညိတ်လိုက်သည်။ "ဟုတ်တယ်... ကျင်းရှီရုံရဲ့ မုန်ယာကုမ္ပဏီက ဒီလောက် အင်အားကြီးမားနေရတာက သူ့တစ်ယောက်တည်းရဲ့ အစွမ်းအစအပေါ် လုံးလုံးလျားလျား မှီခိုနေရလို့ပဲ"

"ကျင်းရှီရုံက မိန်းမဆိုရင် အသက်တမျှကို နှစ်သက်တာ... သူက အိမ်ရာတည်ဆောက်ထားတဲ့ အမျိုးသမီးကောင်း တော်တော်များများကို စော်ကားခဲ့ဖူးပေမဲ့ အခုချိန်ထိ လွတ်လွတ်လပ်လပ် သွားလာလှုပ်ရှားနိုင်ရုံသာမက မုန်ယာကုမ္ပဏီကိုပါ သူ့လက်တစ်ဖက်တည်းနဲ့ တည်ထောင်နိုင်ခဲ့တာက သူ့ရဲ့ အစွမ်းထက်လှတဲ့ အစွမ်းကြောင့်ပဲ"

"တကယ်လို့ ဒီကမ္ဘာပေါ်မှာ တကယ်ပဲ ပြိုင်ဘက်ကင်းတဲ့ အစွမ်းတစ်မျိုး ရှိနေတယ် ဆိုရင်တောင်... ကျင်းရှီရုံရဲ့ အစွမ်းက ပြိုင်ဘက်ကင်းတယ်လို့ ဆိုလို့ရလောက်တယ်လို့ ကျွန်တော် ထင်တယ်"

"ကျင်းရှီရုံရဲ့ အစွမ်းက တခြားလူတွေရဲ့ အစွမ်းကို ပုံတူကူးချတာပဲ... တစ်ဖက်လူရဲ့ အစွမ်းကို ပုံတူကူးချပြီးတာနဲ့ တစ်ဖက်လူရဲ့ အစွမ်းနဲ့ ပင်ကိုယ်အစွမ်းတွေကို အချိန်တိုအတွင်းမှာ သူက ပိုင်ဆိုင်သွားလိမ့်မယ်... သန္ဓေပြောင်းလဲခြင်းအဆင့် ပင်ကိုယ်အစွမ်းကိုတောင် ပုံတူကူးချနိုင်တယ်"

"ဒါတင်မကသေးဘူး... သူက အချိန်တိုအတွင်းမှာ ပင်ကိုယ်အစွမ်း အများအပြားကို ပုံတူကူးချနိုင်တယ်... အဲဒါက သူတစ်ယောက်တည်းက ပင်ကိုယ်အစွမ်း အများအပြားကို ထိန်းချုပ်နိုင်တယ်ဆိုတဲ့ သဘောပဲ"

လင်းယွမ်၏ မျက်နှာအမူအရာ မနေနိုင်ဘဲ အနည်းငယ် ပြောင်းလဲသွားသည်။

ဤကဲ့သို့သော အစွမ်းမျိုးသည် အလွန်အမင်းကို ပုံမှန်မဟုတ်တော့ချေ။

စဉ်းစားကြည့်လျှင် သူ့အတွက်ပင် အစွမ်းတစ်မျိုး ပိုရလာရန်အတွက် ထိုအစွမ်း၏ မျိုးရိုးဗီဇမျိုးစေ့ကို အရင်စုစည်းရပြီးမှသာ အသွင်တစ်ရာ မျောက်ဝံမိစ္ဆာ ပင်ကိုယ်အစွမ်းကို အသုံးပြုကာ သက်ဆိုင်ရာ ပင်ကိုယ်အစွမ်းအဖြစ် အသွင်ပြောင်းလဲနိုင်ခြင်း ဖြစ်သည်။

သို့သော် ဤကျင်းရှီရုံကမူ မျိုးရိုးဗီဇမျိုးစေ့ စုစည်းရမည့် အဆင့်ကိုပင် မလိုအပ်ဘဲ တစ်ဖက်လူ၏ အစွမ်းကို တိုက်ရိုက် ပုံတူကူးချနိုင်သည်လား။

ထို့အပြင် ပြိုင်ဘက် အများအပြား၏ အစွမ်းများကို တစ်ပြိုင်နက်တည်း ပုံတူကူးချနိုင်သေးသည်။

အကယ်၍ တကယ်သာ တိုက်ခိုက်ကြမည်ဆိုပါက ကျင်းရှီရုံက ပြိုင်ဘက်ကင်းသော တည်ရှိမှုတစ်ခုဟု ဆို၍ ရနိုင်ပေသည်။

သင် တတ်ကျွမ်းသော အစွမ်းတိုင်းကို သူလည်း တတ်ကျွမ်းမည်။

သင် မတတ်ကျွမ်းသော အစွမ်းများကိုပါ သူက တတ်ကျွမ်းနေဦးမည် ဖြစ်သည်။

အကယ်၍ သူ၏ သန္ဓေပြောင်းလဲနှုန်းက သင့်ထက် ပိုမြင့်နေပါက အနိုင်ရရန် လုံးဝ မဖြစ်နိုင်တော့ပေ။

"ဒါဆို သူနဲ့ ဂျိမ်းစ်တို့ တိုက်ပွဲဖြစ်ခဲ့တော့... သူတို့နှစ်ယောက်ထဲက ဘယ်သူ နိုင်သွားလဲ" လင်းယွမ်က မနေနိုင်ဘဲ မေးလိုက်သည်။

စဉ်းစားကြည့်ပါ... တိတ်ဆိတ်ဇုန် အစွမ်းပိုင်ရှင် တစ်ယောက်နှင့် ပုံတူကူးချ အစွမ်းပိုင်ရှင် တစ်ယောက်။

ဤမျှ ထူးခြားလှသော ထိပ်တန်း အစွမ်းပိုင်ရှင် နှစ်ယောက် တိုက်ခိုက်ကြရာတွင် နောက်ဆုံး၌ မည်သူ အနိုင်ရခဲ့သနည်း။

လင်းယွမ်ပင်လျှင် အဖြေကို ခန့်မှန်း၍ မရနိုင်တော့ပေ။

ဝမ်ထျန်အန်းကလည်း ခေါင်းခါယမ်းလိုက်သည်။ "မသိဘူး... အရင်တုန်းက ယွီကျိုးပြည်နယ်မှာ ရှိနေတုန်းက ခိုက်ရီနည်းပညာ ကုမ္ပဏီရော မုန်ယာကုမ္ပဏီပါ အင်မတန် အရှိန်အဟုန်နဲ့ ကြီးထွားလာခဲ့တာ... သူတို့ရဲ့ နယ်မြေတွေက အချင်းချင်း အမြန်ဆုံး ဆက်စပ်သွားပြီး ပြင်းထန်တဲ့ ပဋိပက္ခတွေ ဖြစ်ပွားခဲ့တယ်"

"အဲဒီနောက် ခေါင်းဆောင်နှစ်ယောက်စလုံး ကိုယ်တိုင် ပါဝင်လာပြီး တစ်ဖက်လူကို အဆုံးသတ်ဖို့ ကြံစည်ခဲ့ကြတာ"

"အဲဒီအချိန်က သူတို့နှစ်ယောက် တိုက်ခိုက်ရင်း ရေအောက်ကို ပြုတ်ကျသွားကြတာ... အချိန်အတော်ကြာမှပဲ ကျွန်တော်တို့ ဥက္ကဋ္ဌ ပြန်ရောက်လာတယ်"

"အဲဒီအချိန်က သူ့တစ်ကိုယ်လုံးမှာ ဒဏ်ရာတွေ အပြည့်နဲ့... သူ့ကိုယ်ပေါ်က လက်နက်ကိရိယာ တော်တော်များများလည်း ပျက်စီးကုန်ပြီ"

"အဲဒီအချိန်ကစပြီး အင်အားစု နှစ်ခုကြားမှာ နောက်ထပ် ပဋိပက္ခတွေ ထပ်မဖြစ်ကြတော့ဘူး... အထက်ကလည်း အမိန့်ချမှတ်လိုက်တယ်... နှစ်ဖက်စလုံးက မင်ဟူကျွန်းကို နယ်နိမိတ်အဖြစ် သတ်မှတ်ပြီး ကိုယ့်လူတွေကို နယ်ကျွံမလာဖို့ အသီးသီး ထိန်းချုပ်ထားခဲ့ကြတယ်"

"အဲ့တာကလတ်တလော အချိန်အထိပဲ... အင်အားစု နှစ်ခုစလုံးက အပြင်ဘက်ကို တိုးချဲ့လာကြပြီး လေပေါ်ကျွန်းတွေကို သိမ်းပိုက်တဲ့ လုပ်ငန်းစဉ်အတွင်းမှာ ပွတ်တိုက်မှုတွေနဲ့ ပဋိပက္ခတွေ ထပ်မံ ဖြစ်ပွားလာခဲ့တာ"

"ဒါပေမဲ့ နှစ်ဖက်စလုံးက အခုထက်ထိ စောင့်စည်းနေကြတုန်းပဲ... တစ်ဖက်နဲ့တစ်ဖက်ကြားမှာ ကြီးကြီးမားမား လှုပ်ရှားမှုတွေ မရှိသေးဘူး"

"အဲဒါကလည်း ကျွန်တော်တို့ အရင်က ငရဲကျွန်းနဲ့ နတ်သစ်ပင်ကျွန်းကို သိမ်းပိုက်ပြီးတဲ့နောက် ငါးလိပ်စွန်ကျွန်းကို သွားပြီး ပြဿနာ မရှာရတဲ့ အကြောင်းရင်းပဲ"

"မဟုတ်ရင် ငါးလိပ်စွန်ကျွန်းက ကျွန်တော်တို့နဲ့ ဒီလောက်နီးနေတာကို ခိုက်ရီနည်းပညာ ကုမ္ပဏီက သူတို့ ဆက်တည်ရှိနေတာကို သည်းခံနိုင်မှာ မဟုတ်ဘူး"

လင်းယွမ် သဘောပေါက်သွားသည်။ ဤအင်အားစု နှစ်ခုက အစောကြီးကတည်းက တိုက်ပွဲဖြစ်ခဲ့ဖူးကြခြင်း ဖြစ်သည်။

အင်အားစု အသီးသီး၏ ခေါင်းဆောင်များပင် ကိုယ်တိုင် ကိုယ်ကျ ပါဝင် တိုက်ခိုက်ခဲ့ကြသေးသည်။

လင်းယွမ်က ခန့်မှန်းလိုက်သည်။ "ဒီလူနှစ်ယောက် တိုက်ခိုက်ကြတဲ့အခါမှာ အနိုင်အရှုံး မပေါ်လောက်ဘူး... ဘယ်သူမှလည်း အသေအချာ နိုင်မယ်ဆိုတဲ့ ယုံကြည်ချက် မရှိကြတော့ နှစ်ဖက်စလုံးက နောက်ဆုတ်သွားကြပြီး ကိုယ့်လမ်းကို လျှောက်ခဲ့ကြတာ ဖြစ်မယ်"

"ဖြစ်နိုင်တယ်" ဝမ်ထျန်အန်းက ခေါင်းညိတ်လိုက်ပြီး "အဲဒီအချိန်က ကျွန်တော်တို့ထဲက လူတော်တော်များများလည်း ဒီလိုပဲ ခန့်မှန်းခဲ့ကြတာ"

သူတို့နှစ်ယောက် စကားပြောနေစဉ်အတွင်း ကျန့်ယွမ်က အေးစက်သော အကြည့်ဖြင့် ဘေးမှ စောင့်ကြည့်နေပြီး မျက်နှာပေါ်တွင် လှောင်ပြုံးတစ်ခု ချိတ်ဆွဲထားသည်။

သူက လင်းယွမ်တို့ကို လုံးဝ အရေးမစိုက်ကြောင်း သိသာထင်ရှားလှသည်။

သေးနုပ်လှသော ထိုက်ယန်တောင်က ကုမ္ပဏီကို ရင်ဆိုင်ရဲသည်ဟူသည်မှာ သေလမ်းရှာနေခြင်း သက်သက်ပင်။

သူ စိတ်ထဲမှ ထိုသို့တွေးလိုက်ပြီး ဝမ်ထျန်အန်းကို ကြည့်လိုက်သည့်အခါတွင်လည်း သရော်လှောင်ပြောင်မှု အငွေ့အသက် အနည်းငယ် ပါဝင်နေသည်။

"ဒီအရူး... ဒီအချိန်မှ လက်နက်ချနေတယ်... ရုံးချုပ်က လူတွေ ရောက်လာတာနဲ့ ဒီ ထိုက်ယန်တောင်က လူတွေ ချက်ချင်း ပြိုကွဲပျက်စီးသွားမှာပဲ... အဲဒီအချိန်ကျမှ မင်းကိုယ်မင်း ဘယ်လို ရပ်တည်မလဲ ဆိုတာကို ငါ ကြည့်ရသေးတာပေါ့"

ဆက်ရန်...