အခန်း ၇၉၁

အပိုင်း (၇၉၁) မုန်ယာကုမ္ပဏီ၏ ဝင်ရောက်တိုက်ခိုက်ခြင်း

"တီ... တီ... တီ... တီ"

လေဟုန်စီး ငါးလိပ်စွန်ကျွန်း စခန်းအတွင်း၌ သတိပေး အချက်ပေးသံများ မြည်ဟည်းသွားသည်။

လူတိုင်းက ချက်ချင်းဆိုသလို တိုက်ခိုက်ရေး အနေအထားသို့ ပြင်ဆင်လိုက်ကြပြီး စခန်း၏ ကောင်းကင်ယံထက်တွင် အကာအကွယ်ဒိုင်းများက အလျင်အမြန် ထွက်ပေါ်လာသည်။

စခန်းတစ်ခုလုံး ခုခံကာကွယ်ရေး အနေအထားသို့ ရောက်ရှိသွားကာ ယာဉ်ပျံ အများအပြားလည်း လျင်မြန်စွာ ပျံတက်သွားကြသည်။

ထူလုံ၊ ရှီဟိုင်ကျူး၊ ချန်ကျန့်ဖုန်း၊ ကျိုးဟောင်ရန်၊ ဝမ်ထျန်အန်း နှင့် ယွီဝမ်ထောင်တို့ကလည်း ကောင်းကင်ပေါ်သို့ လျင်မြန်စွာ ပျံတက်သွားကြပြီး သူတို့၏ မျက်နှာအမူအရာများမှာ အလွန်တရာ တည်တင်းလေးနက်နေကြသည်။

အဝေးဆီမှ နှမ်းစေ့အရွယ်အစားခန့်သာ ရှိသော ယာဉ်ပျံများက မျက်စိတစ်မှိတ်အတွင်းမှာပင် ကြီးမားလာသည်ကို မြင်တွေ့လိုက်ရသည်။

ထိုအထဲမှ ယာဉ်ပျံတစ်စင်းမှာ အခြားယာဉ်များထက် သိသိသာသာ ကြီးမားနေပြီး နှမ်းစေ့များကြားထဲတွင် ကြက်ဥတစ်လုံး ရောက်နေသကဲ့သို့ ဖြစ်နေသည်။

ထိုနှမ်းစေ့များက ကြက်ဥကို ဝိုင်းရံထားကာ အလွန်လျင်မြန်သော အလျင်ဖြင့် လေခွင်းသံများပေးလျက် ပျံသန်းလာကြသည်။

ဆယ်မိုင်ခန့် ဝေးကွာသော ခရီးကို မျက်တောင်တစ်ခတ်အတွင်း ရောက်ရှိလာခြင်း ဖြစ်သည်။

တဖြည်းဖြည်း နီးကပ်လာသည်နှင့်အမျှ လူတိုင်းက ထိုယာဉ်ပျံများ၏ ပုံစံကို ရှင်းလင်းစွာ မြင်တွေ့လိုက်ရသည်။

ထိုယာဉ်ပျံ အများစုသည် အစိမ်းရောင် အပြင်ခွံများ ရှိကြပြီး အပေါ်တွင် သင်္ကေတ အက္ခရာများ ရေးဆွဲထားကာ တောက်ပနေသော စွမ်းအင်အကာအကွယ်ဒိုင်းက ယာဉ်ကို လွှမ်းခြုံထားသဖြင့် နည်းပညာ အဆင့်မြင့်မားလှကြောင်း သိသာစေသည်။

လူအများ၏ အာရုံကို အဖမ်းစားဆုံး အရာကတော့ ကြီးမားခန့်ထည်လွန်းလှသော ဧရာမ မိခင်ယာဉ်ပျံကြီးပင် ဖြစ်သည်။

ဤမိခင်ယာဉ်ပျံကြီးသည် အလွန်ကြီးမားကာ သင်္ဘောတစ်စင်း၏ ပုံစံမျိုး ရှိပြီး ကုန်းပတ်ပေါ်တွင် ယာဉ်ပျံရာချီ၊ စက်ရုပ်များနှင့် သံချပ်ကာကားများကို ရပ်နားထားသည်။

မိခင်ယာဉ်ပျံကြီး တစ်ခုလုံးတွင် အထပ်ပေါင်း ဆယ်ဂဏန်းမျှ ရှိပြီး ဘေးဘက်တစ်လျှောက်တွင် အမြောက်စင်များနှင့် အမြောက်ပြောင်းများစွာကို တပ်ဆင်ထားကာ ဧရာမ စွမ်းအင်အကာအကွယ်ဒိုင်းကြီးက ယာဉ်ကြီးကို ပတ်လည် ဝိုင်းရံကာကွယ်ထားသည်။

မိခင်ယာဉ်ပျံကြီး နီးကပ်လာသည်နှင့်အမျှ ၎င်း၏ အရှိန်ကလည်း တဖြည်းဖြည်း လျော့ကျသွားသည်။

ယာဉ်ကြီးထံမှ ထွက်ပေါ်လာသော ပြင်းထန်လှသည့် ဖိအားကြောင့် ကြောက်မက်ဖွယ်ကောင်းသော လေပူလှိုင်းများ ဖြစ်ပေါ်လာပြီး လေဟုန်စီး ငါးလိပ်စွန်ကျွန်းဆီသို့ တဟုန်ထိုး ရိုက်ခတ်လာသည်။

ရှီဟိုင်ကျူးတို့ တစ်စုမှာ လေပြင်းများကြောင့် မျက်လုံးများ မှေးစင်းသွားကြပြီး မျက်နှာအမူအရာများလည်း အလွန်တရာ တည်တင်းသွားကြသည်။

နှစ်ဖက်စလုံး၏ တပ်ဖွဲ့များက အသင့်အနေအထားဖြင့် တိုက်ပွဲဝင်ရန် ပြင်ဆင်နေကြသည်။

သို့သော် အရေအတွက်အရ ပြောရလျှင် မုန်ယာကုမ္ပဏီဘက်မှ ယာဉ်ပျံ အရေအတွက်သည် လေဟုန်စီး ငါးလိပ်စွန်ကျွန်းထက် အဆပေါင်းများစွာ သာလွန်နေပြီး နှစ်ဖက်အင်အားမှာ လုံးဝ ယှဉ်ပြိုင်၍ မရနိုင်လောက်အောင် ကွာဟနေသည်။

"ဝူး"

မုန်ယာကုမ္ပဏီ၏ မိခင်ယာဉ်ပျံကြီးထဲမှ ယာဉ်ပျံတစ်စင်းက လျင်မြန်စွာ ပျံထွက်လာပြီးနောက် ယာဉ်ထဲမှ အသံတစ်သံ ထွက်ပေါ်လာသည်။

"ဒီနေရာက တာဝန်ခံ ဘယ်သူလဲ"

ရှီဟိုင်ကျူးတို့ သုံးယောက်က တစ်ယောက်ကိုတစ်ယောက် အကဲခတ်လိုက်ကြပြီးနောက် နောက်ဆုံးတွင် ရှီဟိုင်ကျူးက ရှေ့သို့ ထွက်လာခဲ့သည်။

သူက လေဟုန်စီး ငါးလိပ်စွန်ကျွန်း၏ တာဝန်ခံ ဖြစ်သည်။ ထူလုံက နတ်သစ်ပင်ကျွန်း၏ တာဝန်ခံအဖြစ် လင်းယွမ်၏ ခန့်အပ်ခြင်းခံထားရပြီး ချန်ကျန့်ဖုန်းကမူ ငရဲကျွန်းဘက်ကို တာဝန်ယူရသည်။

"ငါပဲ... မင်းတို့က ငါတို့ရဲ့ လေပိုင်နက်ထဲကို ကျူးကျော်ဝင်ရောက်လာပြီ... အခုချက်ချင်း ဆုတ်ခွာသွားကြ"

ရှီဟိုင်ကျူးက ပြင်းထန်စွာ အော်ဟစ် သတိပေးလိုက်သည်။

တစ်ဖက်ရှိ ယာဉ်ပျံထဲမှ လှောင်ရယ်သံတစ်သံ ထွက်ပေါ်လာသည်။ "ဟားဟား... ကျူးကျော်တဲ့သူတွေကပဲ နစ်နာသူတွေ ဖြစ်သွားတာလား... ဒီနေရာက အစကတည်းက လူသူကင်းမဲ့တဲ့ လေပေါ်ကျွန်းပဲ... ငါတို့ မုန်ယာကုမ္ပဏီက အရင်ဆုံး တွေ့ရှိပြီး သိမ်းပိုက် တည်ဆောက်ထားတာ... မင်းတို့ကမှ ကျူးကျော်သူတွေပဲ"

"ကျိုးဟောင်ရန်နဲ့ ယွီဝမ်ထောင်ကို ထွက်လာခဲ့ခိုင်းလိုက်"

ယာဉ်ပျံထဲမှ လူက လှောင်ပြုံးဖြင့် အော်ပြောလိုက်သည်။

ရှီဟိုင်ကျူးက ဒေါသတကြီးဖြင့် ပြန်အော်လိုက်သည်။ "ဒီကျွန်းက ငါတို့ လင်ကျန်းမြို့ရဲ့ လေပိုင်နက်ထဲမှာ ရှိတာ... ငါတို့ လင်ကျန်းမြို့ပိုင်ပဲ ဖြစ်ရမယ်... ယွီကျိုးပြည်နယ်က လာတဲ့ မင်းတို့က ဘာအကြောင်းပြချက်နဲ့ ဒီကျွန်းကို သိမ်းပိုက်ရတာလဲ"

ယာဉ်ပျံထဲမှ လူက ဒေါသထွက်လွန်း၍ ရယ်မောလိုက်သည်။ "ကောင်းပြီ... ကောင်းပြီ... မင်းတို့က မျက်နှာပြောင်တိုက်တော့မယ်ပေါ့လေ... လေပေါ်ကျွန်းရဲ့ တည်နေရာဆိုတာ အချိန်မရွေး ပြောင်းလဲ မျောပါနေတာ... မင်းတို့ဆီ ရောက်လာတိုင်း မင်းတို့ပိုင် ဖြစ်သွားရောလား"

"ဒါဆို မင်းတို့ အရင်က ဘာလို့ မတည်ဆောက်ခဲ့တာလဲ... မလုပ်ချင်လို့လား... ဒါမှမဟုတ် အဲဒီလောက် အရည်အချင်း မရှိလို့လား"

"စကားတွေ အများကြီး ပြောမနေနဲ့တော့... မင်းတို့ မဆုတ်ခွာရင် ငါတို့ အင်အားသုံးတာကို အပြစ်မတင်နဲ့"

ထိုယာဉ်ပျံထဲမှ လူက လှောင်ရယ်လိုက်ပြီးနောက် အမြောက်ပြောင်းများက တိုက်ရိုက် လင်းလက်လာသည်။

၎င်းက အချက်ပြမှု တစ်ခုကဲ့သို့ပင် ဖြစ်ပြီး အခြားသော ယာဉ်ပျံများကလည်း အမြောက်ပြောင်းများကို လင်းလက်စေကာ သူတို့လူစုကို ချိန်ရွယ်လိုက်ကြသည်။

ရှီဟိုင်ကျူးတို့ လူစု၏ မျက်နှာများ ပြောင်းလဲသွားပြီး နောက်သို့ လျင်မြန်စွာ ဆုတ်ခွာလိုက်ချိန်မှာပင် ထူလုံက ကျယ်လောင်စွာ အော်ဟစ်လိုက်သည်။

"တိုက်ပွဲဝင်ဖို့ ပြင်ကြ"

"ဝုန်း"

ထိုက်ယန်တောင်မှ ယာဉ်ပျံများက တိုက်ခိုက်ရေး အနေအထားသို့ ချက်ချင်း ပြောင်းလဲလိုက်ပြီး အမြောက်ပြောင်းများကို မော့ကာ ရန်သူ့ဆီသို့ ချိန်ရွယ်လိုက်သည်။

စွမ်းအင်တန်းတစ်ခုက စွမ်းအင်များကို စုစည်းလည်ပတ်နေပြီး အချိန်မရွေး ပစ်ခတ်ရန် အသင့်ဖြစ်နေသည်။

မျက်နှာချင်းဆိုင်ရှိ မုန်ယာယာဉ်ပျံထဲမှ လှောင်ရယ်သံတစ်သံ ထွက်ပေါ်လာသည်။ "ကောင်းကောင်းပြောတာကို နားမထောင်ဘဲ သေချင်နေမှတော့... မင်းတို့ ဆန္ဒကို ဖြည့်ဆည်းပေးရတာပေါ့"

"ပစ်"

"ဝုန်း"

မျက်တောင်တစ်ခတ်အတွင်းမှာပင် နှစ်ဖက်စလုံးက အစွမ်းကုန် ပစ်ခတ်ကြလေရာ ပေါက်ကွဲသံများ အဆက်မပြတ် ထွက်ပေါ်လာပြီး ကြောက်မက်ဖွယ်ကောင်းသော လေလှိုင်းများ လွင့်စင်သွားသည်။

အနီးအနား ကောင်းကင်ယံထက်တွင် ပြင်းထန်သော ပေါက်ကွဲသံကြီးများ အဆက်မပြတ် ထွက်ပေါ်နေသည်။

နှစ်ဖက်စလုံး၏ ပစ်ခတ်မှုများမှာ အလွန် ပြင်းထန်လွန်းလှပြီး ပေါက်ကွဲမှုများကြားတွင် တစ်ဖက်စီ၏ အကာအကွယ်ဒိုင်းများမှာ အဆက်မပြတ် တွန့်လိမ် ပုံပျက်သွားကြသည်။

ထိုက်ယန်တောင်၏ ယာဉ်ပျံများတွင် စွမ်းအင်ငြိမ် သင်္ကေတ အစီအရင်ဖြင့် တည်ဆောက်ထားသော စွမ်းအင်အကာအကွယ်ဒိုင်း ရှိသလို တစ်ဖက်မှ မုန်ယာကုမ္ပဏီ၏ ယာဉ်ပျံများတွင်လည်း မည်သည့် အစီအရင်မှန်း မသိရသော စွမ်းအင်အကာအကွယ်ဒိုင်းများ ရှိနေပြီး အလွန်တရာ ခိုင်မာနေသည်။

နှစ်ဖက်စလုံး အဆက်မပြတ် ပစ်ခတ်နေကြသော်လည်း မည်သည့်ဘက်ကမျှ တစ်ဖက်ရန်သူ၏ အကာအကွယ်ဒိုင်းများကို မဖျက်ဆီးနိုင်ခဲ့ပေ။

ထိုအခြေအနေကို မြင်သောအခါ မုန်ယာကုမ္ပဏီဘက်မှ မိခင်ယာဉ်ပျံကြီးပေါ်ရှိ စွမ်းအင်ဒိုင်းက ရုတ်တရက် ပွင့်ဟသွားပြီး နောက်ကွယ်မှ ယာဉ်ပျံ အစင်းဆယ်ဂဏန်းခန့်က လေခွင်းသံများပေးလျက် ပျံထွက်လာကြသည်။

ထိုယာဉ်ပျံများ၏ အရောင်မှာ အခြားယာဉ်များနှင့် သိသိသာသာ ကွဲပြားနေပြီး အပြာနုရောင် အဆင်းရှိနေသည်။

ထိုယာဉ်များ ထွက်ပေါ်လာသည်နှင့်တစ်ပြိုင်နက် အမြောက်ပြောင်းများ ပွင့်လာကာ အပြာနုရောင် စွမ်းအင်အမြောက်ဆံများက တဝုန်းဝုန်းဖြင့် ပစ်လွှတ်လိုက်သည်။

အံ့သြစရာကောင်းသည်မှာ ထိုစွမ်းအင်အမြောက်ဆံများ ပစ်လွှတ်လိုက်သည့် အချိန်၌ပင် ရှေ့ရှိ ဟင်းလင်းပြင်က တွန့်လိမ်ပွင့်ဟသွားပြီး ဟင်းလင်းပြင်လမ်းကြောင်း တစ်ခု ထွက်ပေါ်လာခြင်းပင် ဖြစ်သည်။

ဘေးဘက်ရှိ အခြားယာဉ်ပျံများကလည်း ထိုလမ်းကြောင်းများထဲသို့ အမြောက်ဆံများကို အပြိုင်အဆိုင် ပစ်ခတ်လိုက်ကြသည်။

"ဒိုင်း"

အမြောက်ဆံများ ဟင်းလင်းပြင် လမ်းကြောင်းများထဲသို့ ဝင်ရောက်သွားသည်နှင့် အဝေးရှိ လေဟုန်စီး ငါးလိပ်စွန်ကျွန်း၏ အကာအကွယ်ဒိုင်း အထဲတွင် ဟင်းလင်းပြင်လမ်းကြောင်းများ အများအပြား ရုတ်တရက် တွန့်လိမ်ထွက်ပေါ်လာသည်ကို မြင်တွေ့လိုက်ရသည်။

မရေမတွက်နိုင်သော အမြောက်ဆံများက ဟင်းလင်းပြင် လမ်းကြောင်းထဲမှ တိုက်ရိုက် ပစ်ခတ်ထွက်ပေါ်လာပြီး ပြင်းထန်စွာ ပေါက်ကွဲသွားလေသည်။

ပြင်းထန်သော ပေါက်ကွဲသံများက အဆက်မပြတ် ထွက်ပေါ်လာကာ မျက်တောင်တစ်ခတ်အတွင်းမှာပင် စခန်းတစ်ခုလုံး မီးပင်လယ်ကြီးအဖြစ် ပြောင်းလဲသွားတော့သည်။

ဟုန်းဟုန်းတောက်လောင်နေသော မီးတောက်များက စခန်းကို တိုက်ရိုက် လောင်ကျွမ်းသွားစေသည်။

ထူလုံတို့ လူစု၏ မျက်နှာများမှာ သိသိသာသာ ပျက်ယွင်းသွားကြသည်။

ကျိုးဟောင်ရန်က အလျင်အမြန် ပြောလိုက်သည်။ "အဲဒါ မုန်ယာကုမ္ပဏီရဲ့ လက်နက်သစ်... ဟင်းလင်းပြင်အမြောက်ပဲ"

ဘေးနားရှိ ယွီဝမ်ထောင်ကလည်း ပျာပျာသလဲဖြင့် ဝင်ပြောသည်။ "သူတို့ တကယ်ကြီး တီထွင်နိုင်သွားတာပဲ... အဲဒါက ဟင်းလင်းပြင် လမ်းကြောင်းတွေကို ဖန်တီးနိုင်ပြီး အကာအကွယ်ဒိုင်းတွေကို ကျော်ဖြတ်ပြီး ပစ်မှတ်ကို တိုက်ရိုက် ချိန်ရွယ်နိုင်တဲ့ ဟင်းလင်းပြင် နည်းပညာသုံး သင်္ကေတ လက်နက် တစ်မျိုးပဲ"

ထူလုံက ဒေါသတကြီး အော်ဟစ်လိုက်သည်။ "မင်းတို့ကောင်တွေ စောစောကတည်းက ကြိုပြောပါလား"

ကျိုးဟောင်ရန်က စိတ်ပျက်လက်ပျက်ဖြင့် ရှင်းပြသည်။ "အဲဒါက လက်နက်သစ်လေ... ပြီးခဲ့တဲ့အကြိမ် ငါတို့ ပြန်သွားတုန်းက အဲဒါကို မတီထွင်ရသေးဘူး"

"စကားတွေ များမနေနဲ့တော့... စွမ်းအင်ချိတ်ပိတ်ကျည် သုံးပြီး မြန်မြန် ပြန်တိုက်ကြ" ချန်ကျန့်ဖုန်းက အော်ပြောလိုက်သည်။

ရှီဟိုင်ကျူးကလည်း အော်ဟစ်လိုက်သည်။ "အားနာမနေကြနဲ့တော့... မျိုးရိုးဗီဇအသွင် ပြောင်းပြီး တိုက်ကြ"

ချက်ချင်းဆိုသလိုပင် သူတို့အားလုံး မျိုးရိုးဗီဇ ပြန်လည်ဖွဲ့စည်းခြင်း အနေအထားသို့ အသီးသီး ကူးပြောင်းသွားကြပြီး မျက်စိတစ်မှိတ်အတွင်းမှာပင် ပေရာချီ ကြီးမားသော သားရဲကြီးများအဖြစ် ပြောင်းလဲကာ ကောင်းကင်သို့ ပျံတက်သွားကြသည်။

ထိုအချိန်မှာပင် ကောင်းကင်ယံထက်တွင် လင်းယွမ်၏ ကပ်ပါးမျိုးစေ့ဖြင့် ထိန်းချုပ်ခံထားရသော အတောင်ပံပါ သန္ဓေပြောင်း သားရဲများကလည်း ကူညီတိုက်ခိုက်ရန် အပြိုင်အဆိုင် ပျံတက်လာကြသည်။

ထိုက်ယန်တောင်၏ ယာဉ်ပျံများကလည်း စွမ်းအင်ချိတ်ပိတ်ကျည်များကို အဆက်မပြတ် စတင်ပစ်ခတ်ကြလေသည်။

ဧရာမ ပေါက်ကွဲသံကြီးများ ဆက်တိုက် ထွက်ပေါ်လာပြီး စွမ်းအင်ချိတ်ပိတ်ကျည်များ၏ တိုက်ခိုက်မှုအောက်တွင် ရန်သူ၏ အကာအကွယ်ဒိုင်းများမှာ ချက်ချင်းဆိုသလို အရည်ပျော် ကျသွားတော့သည်။

ထို့ကြောင့် တိုက်ပွဲအခြေအနေမှာ ပိုမို ပြင်းထန်လာတော့သည်။

နှစ်ဖက်စလုံးက တစ်ဖက်ရန်သူ၏ အကာအကွယ် စနစ်များကို ဖျက်ဆီးနိုင်သွားကြပြီဖြစ်ရာ ပထမဆုံးသော ထိခိုက်သေဆုံးမှုများ စတင် ထွက်ပေါ်လာတော့သည်။

မုန်ယာကုမ္ပဏီ၏ မိခင်ယာဉ်ပျံကြီးပေါ်ရှိ ကွပ်ကဲရေးအခန်းထဲတွင် ဆူဖြိုးသော ခန္ဓာကိုယ်ရှိသည့် လူတစ်ယောက်က ထမင်းစားပွဲရှေ့၌ ထိုင်ကာ ဝိုင်နီ သောက်နေသည်။

ဘေးနားတွင် ကိုယ်လုံးကိုယ်ပေါက် လှပပြီး ဆွဲဆောင်မှုရှိသော အဝတ်အစားများ ဝတ်ဆင်ထားသည့် မိန်းမချော နှစ်ယောက်ရှိနေကာ တစ်ယောက်က ဝိုင်ပုလင်းကို ကိုင်ထားပြီး အချိန်မရွေး ငှဲ့ပေးရန် အသင့်ရှိနေသလို အခြားတစ်ယောက်ကလည်း ဟင်းခပ်ပေးကာ အချိန်မရွေး ခွံ့ကျွေးနေသည်။

အရှေ့ဘက်ရှိ ဖန်သားပြင် ကြီးပေါ်တွင်မူ အပြင်ဘက်မှ ပြင်းထန်သော တိုက်ပွဲ မြင်ကွင်းကို ပြသနေသည်။

ရုတ်တရက် မီးရောင်တစ်ခု ပြင်းထန်စွာ ပေါက်ကွဲသွားပြီး "ဝုန်း" ဟူသော အသံကြီးနှင့်အတူ မိခင်ယာဉ်ပျံကြီး တစ်ခုလုံးပင် တုန်ခါသွားသည်။

လူဝကြီး၏ ဝိုင်ခွက်မှာ ချက်ချင်း ယိမ်းယိုင်သွားပြီး ဝိုင်ပုလင်း ကိုင်ထားသော မိန်းမမှာမူ အမှတ်တမဲ့ ဖြစ်သွားကာ သူမလက်ထဲရှိ ဝိုင်များ ဖိတ်စင်သွားပြီး လူဝကြီး၏ ကိုယ်ပေါ်သို့ ကျဆင်းသွားလေသည်။

ထိုလူဝကြီးက ရုတ်တရက် မတ်တတ်ထရပ်လိုက်ပြီး မျက်နှာကို အားကုန် ရိုက်ချလိုက်သည်။

"ဖြန်း"

မိန်းမမှာ ချက်ချင်းပင် ကြောက်လန့်တကြားဖြင့် မျက်နှာ ဖြူဖျော့သွားကာ မြေပြင်ပေါ်သို့ အလျင်အမြန် ဒူးထောက်ချလိုက်သည်။ "တောင်းပန်ပါတယ်... တောင်းပန်ပါတယ် ဥက္ကဌဟူ"

လူဝကြီးက လှောင်ရယ်လိုက်ပြီး သူ၏ ခြေခုံပေါ်တွင် ပေကျံနေသော ဝိုင်နီကို လက်ညှိုးထိုးကာ ကြိမ်းမောင်းလိုက်သည်။ "မိန်းမယုတ်... အကုန် ပြောင်အောင် လျှာနဲ့လျက်စမ်း"

ထိုမိန်းမသည် အနည်းငယ်မျှ တွန့်ဆုတ်ရဲခြင်း မရှိဘဲ အလျင်အမြန် ဝပ်တွားလိုက်ကာ ခေါင်းငုံ့၍ သူမ၏ လျှာနီနီလေးကို ထုတ်ပြီး တစ်ဖက်လူ၏ ခြေခုံကို လျက်ပေးရရှာသည်။

လူဝကြီးသည် ထိုမိန်းမ၏ ကော့ထွက်နေသော တင်ပါးများဆီမှ အကြည့်ကို လွှဲဖယ်လိုက်ပြီး မလှမ်းမကမ်းတွင် အလုပ်များနေသော ယာဉ်မောင်းဆီသို့ လှမ်းကြည့်လိုက်သည်။

"ဘာဖြစ်တာလဲ"

ဘေးနားရှိ ခေါင်းဆောင်တစ်ယောက်က အလျင်အမြန် ရိုသေစွာ ဖြေကြားလိုက်သည်။ "ဥက္ကဌဟူ... တစ်ဖက်ရန်သူက ကျွန်တော်တို့ရဲ့ အကာအကွယ်စနစ်ကို အလွယ်တကူ ဖျက်ဆီးနိုင်တဲ့ အထူး အမြောက်ဆံ တစ်မျိုးကို အသုံးပြုနေပါတယ်"

"ဒါ့အပြင် တစ်ဖက်ရန်သူက မျိုးရိုးဗီဇ ပြန်လည်ဖွဲ့စည်းထားတဲ့ အစွမ်းပိုင်ရှင် ငါးယောက်ကိုလည်း စေလွှတ်ထားပါတယ်... အဲဒီအထဲမှာ သန္ဓေပြောင်း သားရဲတွေကို ထိန်းချုပ်နိုင်တဲ့ အစွမ်းပိုင်ရှင်လည်း ပါဝင်ပုံရပြီး ကျွန်တော်တို့ကို ပြန် တိုက်ခိုက်နေပါတယ်"

"ဟမ်... သုတေသနဌာနက အသုံးမကျတဲ့ ကောင်တွေ... ဒီမိခင်ယာဉ်ပျံကြီးရဲ့ အကာအကွယ်စနစ်က ယွီကျိုးပြည်နယ် တစ်ခုလုံးမှာ အကောင်းဆုံးလို့ ပြောထားတာ မဟုတ်ဘူးလား... အခုတော့ သူများ ဖျက်ဆီးတာကို ခံလိုက်ရပြီပေါ့" လူဝကြီး၏ မျက်နှာပေါ်တွင် ဒေါသအမျက်များ ဖုံးလွှမ်းနေသည်။

ခေါင်းဆောင်မှာမူ ပြန်လည် မချေပရဲပေ။ ရန်သူများ မည်သည့် လက်နက်ကို အသုံးပြုနေမှန်း သူလည်း မသိပေ။

ဥက္ကဌဟူဟု ခေါ်သော ထိုလူဝကြီးသည် သူ၏ ခြေခုံကို လျက်ပေးနေသော မိန်းမကို ခြေထောက်ဖြင့် ကန်ထုတ်လိုက်ပြီး ကွပ်ကဲရေးစင်မြင့်ဆီသို့ ခြေလှမ်းကျဲကြီးများဖြင့် လျှောက်သွားကာ ဖန်သားပြင်ကြီးမှတစ်ဆင့် အပြင်ဘက်သို့ လှမ်းကြည့်လိုက်သည်။

အပြင်ဘက် နေရာအနှံ့အပြားတွင် ပေါက်ကွဲသံကြီးများ ဆူညံနေပြီး မီးတောက်များ လောင်ကျွမ်းနေကာ ယာဉ်ကိုယ်ထည်များလည်း ပေါက်ကွဲ ပျက်စီးနေသည်ကို မြင်တွေ့လိုက်ရသည်။

ထိုအထဲတွင် ဧရာမ သားရဲကြီး ငါးကောင်က ကောင်းကင်ယံ၌ လူလာလျှင် လူကိုသတ်၊ နတ်လာလျှင် နတ်ကိုသတ်မည့်ဟန်ဖြင့် အလွန်တရာ ရိုင်းစိုင်းကြမ်းကြုတ်စွာ တိုက်ခိုက်နေကြသည်။

သူ တစ်ချက် ဝေ့ကြည့်လိုက်သည်နှင့် ရင်းနှီးနေသော သားရဲကြီး နှစ်ကောင်ကို ချက်ချင်း မြင်တွေ့လိုက်ရသည်။

"ကဏန်းကောင်နဲ့ စက်ရုပ်ကိုယ်ထည်လား... တောက်... ကျိုးဟောင်ရန်နဲ့ ယွီဝမ်ထောင်ဆိုတဲ့ သစ္စာဖောက် နှစ်ကောင်... တကယ်ပဲ ကုမ္ပဏီကို သစ္စာဖောက်သွားတာကိုး"

ဥက္ကဌဟူ၏ ဆူဖြိုးသော မျက်နှာပေါ်တွင် အေးစက်သော သတ်ဖြတ်လိုစိတ်များ ချက်ချင်း ထွက်ပေါ်လာသည်။

ထိုလုံးဝန်းနေသော မျက်နှာကြီးတွင် ဒေါသများဖြင့် ပြည့်နှက်နေသည်။

သူက ကွပ်ကဲရေး စားပွဲကို ပြင်းထန်စွာ ရိုက်ချလိုက်ပြီး အော်ပြောလိုက်သည်။ "တံခါးဖွင့်... အဲဒီ သစ္စာဖောက် နှစ်ကောင်ကို ငါကိုယ်တိုင် သွားဖမ်းမယ်... သူတို့ရဲ့ အရိုးတွေကို တစ်စစီ ချေမွပစ်ပြီး ငါတို့ မုန်ယာကုမ္ပဏီကို သစ္စာဖောက်ရဲတဲ့ အကျိုးဆက်က ဘယ်လိုလဲဆိုတာ သိအောင် လုပ်ပေးရမယ်"

"ဟုတ်ကဲ့ပါ ဥက္ကဌဟူ"

"ဝုန်း"

အခန်းတံခါးကြီးက အသံမြည်ကာ ပွင့်သွားပြီး ဥက္ကဌဟူ၏ လုံးဝန်းနေသော ခန္ဓာကိုယ်ကြီးက တံခါးဆီသို့ ခြေလှမ်းကျဲကြီးများဖြင့် လျှောက်သွားလေသည်။

သူ တံခါးပေါက်မှ ထွက်လာသည်နှင့်တစ်ပြိုင်နက် သူ၏ ခန္ဓာကိုယ်ထဲမှ ကြောက်မက်ဖွယ်ကောင်းသော ဖိအားများ လျှံကျလာသည်။

ထိုဖိအားကြောင့် ကောင်းကင်ပေါ်ရှိ သန္ဓေပြောင်း သားရဲများမှာ မျက်လုံးပြူးသွားကြကာ အသနားခံသံများ ပြုလုပ်၍ လျင်မြန်စွာ ထွက်ပြေးသွားကြလေသည်။

ထူလုံ၊ ရှီဟိုင်ကျူးတို့ လူစုကလည်း ပုံမှန်မဟုတ်သော ထိုကြောက်မက်ဖွယ် ဖိအားကြီးကို ခံစားလိုက်ရသဖြင့် အားလုံးက လှည့်ကြည့်လိုက်ကြသည်။

ထိုအခါ ဥက္ကဌဟူက ကောင်းကင်ယံ၌ လမ်းလျှောက်ကာ ပျံသန်းလာသည်ကို မြင်တွေ့လိုက်ရသည်။

သူ၏ ကြောက်မက်ဖွယ်ကောင်းသော အရှိန်အဝါကြောင့် ပတ်ဝန်းကျင်ရှိ လေထုမှာပင် တွန့်လိမ်သွားတော့သည်။

ထိုက်ယန်တောင်၏ ယာဉ်ပျံ တစ်စင်းက လေခွင်းသံများပေးလျက် သူ့ဆီသို့ တဟုန်ထိုး ဝင်လာသည်ကို မြင်တွေ့လိုက်ရသော်လည်း ယာဉ်မှာ သူ၏ ခန္ဓာကိုယ်အနီးသို့ မရောက်မီမှာပင် ဥက္ကဌဟူက လက်ညှိုးတစ်ချောင်းကို ရုတ်တရက် မြှောက်လိုက်ပြီး လေဟာနယ်ကို ဘယ်မှညာသို့ လှမ်း၍ ခုတ်ပိုင်းလိုက်သည်။

"ဝုန်း"

ပေသုံးဆယ်ခန့် မြင့်သော ထိုယာဉ်ပျံမှာ "ရွှစ်" ဟူသော အသံနှင့်အတူ သူ၏ လက်ချောင်း လှုပ်ရှားမှုနောက်သို့ လိုက်ပါကာ မျက်စိတစ်မှိတ်အတွင်း ဘေးဘက်သို့ လွင့်စင်ထွက်သွားတော့သည်။

ထို့နောက် "ဝုန်း" ဟူသော အသံကြီးနှင့်အတူ အခြားယာဉ်ပျံ တစ်စင်းပေါ်သို့ တိုက်ရိုက် သွားစောင့်မိလေသည်။

ထိုယာဉ်ပျံ နှစ်စင်းမှာ ပြင်းထန်သော ပေါက်ကွဲသံကြီးများ ထွက်ပေါ်လာပြီး တစ်စစီ ပြိုကွဲကာ ပေါက်ကွဲသွားတော့သည်။

ဤမြင်ကွင်းကြောင့် ထူလုံနှင့် ရှီဟိုင်ကျူးတို့ လူစုမှာ မျက်လုံးများ ပြူးကျယ်သွားကြပြီး ထိတ်လန့် အံ့သြသွားကြသည်။

"ဒါ... ဒါက ဘယ်လို အစွမ်းမျိုးလဲ"

"လက်ညှိုးတစ်ချောင်းတည်းနဲ့ ယာဉ်ပျံ တစ်စင်းကို အလွယ်တကူ ဖျက်ဆီးပစ်နိုင်တယ်... ဘယ်လိုလုပ် ဖြစ်နိုင်မှာလဲ"

"သတိထားကြ... သူက အစွမ်းထက်တဲ့သူပဲ"

ဥက္ကဌဟူက လေဟာနယ်ကို ဖြတ်ကျော်လာပြီးနောက် အေးစက်သော မျက်နှာအမူအရာဖြင့် အရှေ့ရှိ လူသုံးယောက် ပြောင်းလဲထားသော သားရဲကြီးများကို ကြည့်ကာ တည်ငြိမ်စွာ ပြောလိုက်သည်။ "အခြေအနေမှန်ကို မသိတဲ့ ငတုံးတွေ... ငါတို့ မုန်ယာကုမ္ပဏီကို ရန်စရဲတယ်ပေါ့... မင်းတို့ တကယ် သေချင်နေတာပဲ"

"သူ့ကို ငါ သွားစမ်းကြည့်လိုက်မယ်"

ချန်ကျန့်ဖုန်းက ပထမဆုံး စကားစပြောလိုက်သည်။ ယခုအချိန်တွင် သူသည် ရွှေကြေးခွံကျားသစ် အဖြစ် ပြောင်းလဲထားပြီး ဖြစ်သည်။

သူ၏ တစ်ကိုယ်လုံးမှာ သတ္တုသားဖြင့် ဖွဲ့စည်းထားပြီး ဓားနှင့်လှံများပင် မဖောက်ဝင်နိုင်ပေ။ အတောင်ပံ နှစ်ဖက်မှာ ဓားသွားများကဲ့သို့ ထက်မြက်ပြီး ခြေသည်းလေးဖက်မှာလည်း ဓားများအလား ချွန်ထက်နေကာ အတောင်ပံများကို တဖျပ်ဖျပ် ခတ်လိုက်တိုင်း "ချွင်" ဟူသော အသံများ အဆက်မပြတ် ထွက်ပေါ်နေသည်။

မျက်စိတစ်မှိတ်အတွင်းမှာပင် သူက ဥက္ကဌဟူဆီသို့ ခုန်အုပ်သွားလေသည်။

"ဝုန်း"

ရွှေရောင် အရိပ်တစ်ခုက ကောင်းကင်ယံကို လျင်မြန်စွာ ဖြတ်သန်းသွားချိန်တွင် ဥက္ကဌဟူ၏ နှုတ်ခမ်းထောင့်တွင် အထင်အမြင်သေးသော လှောင်ပြုံးတစ်ခု ဖြတ်ပြေးသွားသည်။

သူက လက်နှစ်ဖက်ကို ရင်ဘတ်တွင် ပိုက်ထားပြီး တိုက်ခိုက်ရန်ပင် မကြိုးစားဘဲ စကားတစ်ခွန်းကိုသာ တည်ငြိမ်စွာ ရေရွတ်လိုက်သည်။

"ရပ်"

"ဒိုင်း"

လျင်မြန်စွာ ရွေ့လျားနေသော ရွှေရောင်အရိပ်မှာ လေထဲတွင် ချက်ချင်းဆိုသလို ရပ်တန့်သွားတော့သည်။

အလွန်မြန်ဆန်သော အရှိန်ဖြင့် ရွေ့လျားနေရာမှ လေဟာနယ်ထဲတွင် ချက်ချင်း ရပ်တန့်သွားသော ထိုမြင်ကွင်းက မြင်ရသူများကိုပင် အလွန်အမင်း နေရခက်စေသည်။

ကာယကံရှင် ဖြစ်သော ချန်ကျန့်ဖုန်းမှာမူ သူ၏ သံမဏိခန္ဓာကိုယ်ကြီးပါ အဆက်မပြတ် တုန်ခါနေပြီး မျက်စိဖြင့် မမြင်နိုင်သော ဧရာမ အင်အားကြီး တစ်ခုက သူ့ကို သေချာပေါက် ချုပ်နှောင်ထားသကဲ့သို့ ဖြစ်နေကာ အနည်းငယ်မျှပင် လှုပ်ရှား၍ မရတော့ပေ။

ဤမြင်ကွင်းကြောင့် ထိုနေရာရှိ လူအားလုံး၏ မျက်လုံးများ ပြူးကျယ်သွားကြတော့သည်။

ဆက်ရန်...