အခန်း ၇၉၄

အပိုင်း (၇၉၄) ဒေါသထွက်နေသော လင်းယွမ်

"ဘုန်း... ဘုန်း... ဘုန်း"

ရေခဲမြေရိုင်းဝက်ဝံက ဖုန်မှုန့်များကြားမှ ထွက်ပေါ်လာသည်။ အစပိုင်းတွင် တစ်လှမ်းချင်း လျှောက်လာသော်လည်း နောက်ပိုင်းတွင် ဒေါသတကြီးဖြင့် အပြင်းအထန် ပြေးဝင်လာလေသည်။

သူ့ခန္ဓာကိုယ်တစ်ဝိုက်တွင် ကြီးမားသော ရေခဲချပ်ဝတ်တန်ဆာများက စုစည်းဖြစ်ပေါ်လာ၏။

"သွားသေလိုက်စမ်း"

လင်းယွမ်က ဒေါသတကြီး အော်ဟစ်လိုက်ပြီး ရေခဲမြေရိုင်းဝက်ဝံက အကြမ်းတမ်းဆုံး တိုက်ခိုက်မှုပုံစံဖြင့် သူ၏ ဧရာမလက်ဝါးကြီးနှစ်ဖက်ကို အားကုန်လွှဲရိုက်လိုက်သည်။

"အုန်း"

လက်ဝါးပေါ်တွင် ကြောက်မက်ဖွယ်ကောင်းသော ရေခဲများက ဧရာမရေခဲလက်ဝါးကြီးအဖြစ် စုစည်းသွားပြီး ကြံ့အသွင်ပြောင်းထားသော ဟူဝေထံသို့ ပြင်းထန်စွာ ရိုက်ချလိုက်သည်။

ဟူဝေ၏ မျက်လုံးအိမ်များ ကျဉ်းမြောင်းသွားပြီး ခန္ဓာကိုယ်ရှိ သန္ဓေပြောင်းစွမ်းအင်များကို ချက်ချင်း လည်ပတ်စေလိုက်ရာ နဖူးရှိ ဦးချိုပေါ်မှ အလင်းကွင်းက ချက်ချင်း ပေါက်ကွဲထွက်လာသည်။

"ဆွဲငင်အား အလင်းကွင်း ပေါက်ကွဲ"

ဟူဝေက ဟိန်းဟောက်လိုက်ပြီး လင်းယွမ်ထံသို့ ခေါင်းဖြင့် အားကုန်ဝင်တိုက်လိုက်သည်။

ဦးချိုပေါ်မှ ကြောက်မက်ဖွယ်ကောင်းလောက်အောင် ပြင်းထန်သော တွန်းကန်အားက ချက်ချင်း ပေါက်ကွဲထွက်လာ၏။

ဆွဲငင်အား သံလိုက်စက်ကွင်းက အရာဝတ္ထုများကို ဆွဲငင်နိုင်ရုံသာမက တွန်းကန်နိုင်စွမ်းလည်း ရှိပေသည်။

သံလိုက်စက်ကွင်းကို ပြောင်းပြန်လှန်လိုက်ရုံဖြင့် ထိုအစွမ်းကို ရရှိနိုင်သည်။

ဆွဲငင်အား အလင်းကွင်းနှင့် ရေခဲလက်ဝါးတို့ ချက်ချင်း ဝင်တိုက်မိသွားပြီး ၎င်းတို့နှစ်ခုကြားမှ အလွန်ကျယ်လောင်သော ပေါက်ကွဲသံကြီး ထွက်ပေါ်လာလေသည်။

"အုန်း"

လင်းယွမ်၏ ဝက်ဝံလက်ဝါးက အနည်းငယ် ရပ်တန့်သွားပြီး မျက်မြင်မရသော ဧရာမစွမ်းအားတစ်ခု၏ တားဆီးခံလိုက်ရသကဲ့သို့ ဖြစ်သွားသည်။

ဤစွမ်းအားက ယခင်ကထက် အဆပေါင်းများစွာ ပိုမို အားကောင်းနေသည်။

သို့သော် လင်းယွမ်က အေးစက်စွာ ရယ်မောလိုက်ပြီး "ဒီလောက် အားလေးပဲ ရှိတာလား"

ဝက်ဝံလက်ဝါးက ရုတ်တရက် အားယူကာ တင်းမာသွားပြီး မျက်တောင်တစ်ခတ်အတွင်းမှာပင် ကြွက်သားများ ဖောင်းကြွလာကာ ဝက်ဝံမွေးများအားလုံး ထောင်မတ်သွားသည်ကို တွေ့လိုက်ရ၏။

နှိုင်းယှဉ်၍မရနိုင်သော ကြောက်မက်ဖွယ် ဧရာမခွန်အားကြီးတစ်ခုက သူ၏ ခန္ဓာကိုယ်ထဲမှ ရုတ်တရက် ပေါက်ကွဲထွက်လာလေသည်။

"ဝုန်း"

သူ့ကို ဆွဲဖြဲနေသော စွမ်းအားများ ချက်ချင်း ပြိုကွဲသွားပြီး လင်းယွမ်က ဆွဲငင်အား အလင်းကွင်း၏ ချုပ်နှောင်မှုကို ဆွဲဖြဲကာ ကြံ့၏ ဦးချိုပေါ်သို့ သူ၏ လက်ဝါးဖြင့် ပြင်းထန်စွာ ရိုက်ချလိုက်သည်။

"ဘုန်း"

ကျယ်လောင်သော အသံကြီးတစ်သံ ထွက်ပေါ်လာပြီး ကြံ့၏ခေါင်းက တောင်တစ်လုံးဖြင့် ဖိချခံလိုက်ရသကဲ့သို့ မြေပြင်ပေါ်သို့ အရှိန်ပြင်းပြင်းဖြင့် စိုက်ကျသွားလေသည်။

မျက်တောင်တစ်ခတ်အတွင်းမှာပင် မြေပြင်က အက်ကွဲပေါက်ကွဲသွားပြီး ဧရာမ အက်ကွဲကြောင်း တွင်းနက်ကြီးတစ်ခု ဖြစ်ပေါ်လာသည်။

"မဖြစ်နိုင်ဘူး... မင်းက ရေခဲဓာတ် မျိုးရိုးဗီဇလေ... ခွန်အားအမျိုးအစား မျိုးရိုးဗီဇမှ မဟုတ်တာ... ဘယ်လိုလုပ် ခွန်အားချင်းယှဉ်တာကို ငါ့ထက် ဒီလောက်တောင် သာနေရတာလဲ"

"ဒါ အမှန်မဟုတ်ဘူး... မဖြစ်နိုင်ဘူး"

ဟူဝေက မနေနိုင်ဘဲ အံ့သြဒေါသတကြီး ဟိန်းဟောက်လိုက်ပြီး မြေကြီးထဲ စိုက်ဝင်နေသော ခေါင်းကို ဆွဲထုတ်ရန် ခြေလက်လေးဖက်စလုံးကို အားပြုလိုက်သည်။

သို့သော် ရေခဲမြေရိုင်းဝက်ဝံက သူ့ကို ခြေထောက်ဖြင့် အားကုန် နင်းချလိုက်၏။

"ဘုန်း"

ထိုအခါ ကြံ့၏ခေါင်းက မြေအောက်တွင်းနက်ထဲသို့ ထပ်မံ၍ အကြမ်းပတမ်း ဖိသိပ်ခံလိုက်ရပြန်သည်။

ဤတစ်ကြိမ်တွင် ခန္ဓာကိုယ် တစ်ဝက်ကျော်အထိ မြေကြီးထဲသို့ နစ်ဝင်သွားလေသည်။

လင်းယွမ်က ရက်စက်စွာ ရယ်မောလိုက်ပြီး ဆွဲငင်အား ဦးချိုကို လက်တစ်ဖက်ဖြင့် ဖမ်းဆုပ်ကာ အော်ပြောလိုက်သည်။ "အခုထိ နားမလည်သေးဘူးလား ငတုံးကောင်... ငါတို့နှစ်ယောက်ကြားက ကွာဟချက်က အရမ်းကြီးနေတာကွ"

"ငါ့ရဲ့ မျိုးရိုးဗီဇ ပြန်လည်ဖွဲ့စည်းခြင်း နှုန်းက ၇၀% ကိုတောင် ကျော်လွန်သွားပြီ... အရည်အသွေးတွေ အကုန်လုံး အဆမတန် မြင့်တက်နေတာ... မင်းကရော မင်းရဲ့ မျိုးရိုးဗီဇ ပြန်လည်ဖွဲ့စည်းခြင်း နှုန်းက ဘယ်လောက်များ ရှိလို့လဲ"

"ဟားဟားဟား... ငါ့ရဲ့ စခန်းကိုတောင် ရဲရဲတင်းတင်း ဗုံးခွဲရဲတယ်ပေါ့လေ... သွားသေလိုက်စမ်း"

"ဘုန်း... ဘုန်း... ဘုန်း"

လင်းယွမ်က လက်နှစ်ဖက်ကို မြှောက်လိုက်ပြီး ဧရာမ ဝက်ဝံလက်ဝါးများကို လက်သီးဆုပ်ကာ မြေတွင်းထဲရှိ ဟူဝေကို ရူးသွပ်နေသူတစ်ယောက်အလား အဆက်မပြတ် ထိုးကြိတ်လေသည်။

ကြောက်မက်ဖွယ်ကောင်းသော ထိုးကြိတ်သံကြီးများကြောင့် မြေပြင်တစ်ခုလုံး ပြင်းထန်စွာ တုန်ခါသွား၏။

ကျွန်းတစ်ကျွန်းလုံး တုန်ခါနေသကဲ့သို့ ထင်ရသည်။

ပေ ၂၃၀ ခန့် မြင့်မားသော ဧရာမ ခန္ဓာကိုယ်ကြီးကြောင့် လင်းယွမ်၏ လက်သီးနှစ်ဖက်မှာ အိမ်နှစ်လုံးအလား ကြီးမားနေပြီး မြေကြီးထဲမှ ကြံ့အသွင်ပြောင်း ဟူဝေကို အဆက်မပြတ် ရိုက်နှက်နေသည်။

"ဆွဲငင်အား စက်ကွင်း အစွမ်းလား... ဆွဲငင်အားကို ထိန်းချုပ်တာ မဟုတ်လား"

"ဟားဟားဟား... လာလေ... ငါ့ကို ထိန်းချုပ်ကြည့်စမ်းပါဦး"

"မင်း အဂုဏ်ယူဆုံး အရာနဲ့ပဲ မင်းကို အသေသတ်ပြမယ်"

"ငါ့စခန်းကို ဖျက်ဆီးရဲတဲ့အပြင် ငါ့ရဲ့ မျိုးရိုးဗီဇ ပြန်လည်ဖွဲ့စည်းတာကိုပါ နှောင့်ယှက်ရဲတယ်ပေါ့လေ"

"အုန်း... အုန်း... အုန်း"

လင်းယွမ်က ဒေါသတကြီး အော်ဟစ်ဆဲရေးနေရင်း ခွန်အားအပြည့်သုံးကာ ဟူဝေကို ရူးသွပ်စွာ ထိုးကြိတ်နေသည်။

ဟူဝေက ဆွဲငင်အားကို အစွမ်းကုန် အသုံးပြုကာ လင်းယွမ်ကို လွင့်ထွက်သွားစေရန် ကြိုးစားနေ၏။

သို့သော် သူ၏ စွမ်းအားမှာ မျိုးရိုးဗီဇ ပြန်လည်ဖွဲ့စည်းခြင်း ၅၀% ကျော်သာ ရှိသေးသည်။

မျိုးရိုးဗီဇ ပြန်လည်ဖွဲ့စည်းခြင်း နှုန်း ၇၀% အထိ ရောက်ရှိနေသော လင်းယွမ်ကဲ့သို့ ကြောက်မက်ဖွယ်ကောင်းသည့် တည်ရှိမှုရှေ့တွင်တော့ ထိုအရာက လုံးဝ အသုံးမဝင်ပေ။

သီးသန့် ခွန်အားပိုင်းတွင်ပင် လင်းယွမ်က ကြွက်သားခွန်အားကို အသုံးပြု၍ သူ၏ ဆွဲငင်အား ချုပ်နှောင်မှုကို တိုက်ရိုက် ချိုးဖျက်နိုင်ပြီး သူ့ကို ရူးသွပ်စွာ ဖိချေနိုင်စွမ်း ရှိနေသည်။

အကယ်၍သာ ဆွဲငင်အား အလင်းကွင်း၏ တွန်းကန်အားက လင်းယွမ်၏ လက်သီးအမြန်နှုန်းနှင့် ထိုးကြိတ်အားကို ကြီးမားစွာ လျှော့ချမပေးနိုင်ခဲ့လျှင်...

ဟူဝေသည် ယခုအချိန်တွင် အသားပြားလေးတစ်ခု ဖြစ်နေလောက်ပြီ ဖြစ်သည်။

သို့သော် ထိုသို့ဖြစ်နေလင့်ကစား ဤမုန်ယာကုမ္ပဏီ၏ ဒါရိုက်တာမှာ အရိုက်ခံရလွန်း၍ ဘာလုပ်ရမှန်းမသိဖြစ်နေပြီး ခေါင်းကိုအုပ်ကာ ထွက်ပြေးရန်သာ အသည်းအသန် ရုန်းကန်နေရသည်။

သို့ရာတွင် သူ၏ခေါင်းကို လင်းယွမ်က ခြေတစ်ဖက်ဖြင့် နင်းထားသဖြင့် လုံးဝ လှုပ်ရှား၍ မရပေ။

ကျန်နေသော ခြေလက်လေးဖက်က မြေပြင်ကို အဆက်မပြတ် ကုတ်ခြစ်ကာ ချုပ်နှောင်မှုမှ ရုန်းထွက်ရန် ကြိုးစားနေသည်။

လင်းယွမ်က ထိုမြင်ကွင်းကိုမြင်သောအခါ ရက်စက်စွာ ရယ်မောလိုက်ပြီး လက်တစ်ဖက်ကို ဆန့်ထုတ်လိုက်ရာ မျက်တောင်တစ်ခတ်အတွင်းမှာပင် ဝက်ဝံလက်ဝါး၌ ဧရာမ အပြာရောင် ရေခဲဆူးကြီးတစ်ခု စုစည်းဖြစ်ပေါ်လာ၏။

"မုန်ယာကုမ္ပဏီမှာ လူမရှိတော့ဘူးလား... ဒီကိစ္စတွေကို ဖြေရှင်းဖို့ မင်းလို အသုံးမကျတဲ့ကောင်ကို လွှတ်လိုက်ရတာလား"

"ဟားဟား... မင်းရဲ့သုံးစားမရတဲ့ ဆွဲငင်အား စက်ကွင်းက မင်းထက် အားသာနေတဲ့ ခွန်အားရှေ့မှာတော့ အမှိုက်လိုပဲ"

"ဝှီး"

လင်းယွမ်က တစ်ဖက်လူ၏ ခြေထောက်တစ်ဖက်ဆီသို့ အားကုန် ထိုးချလိုက်သည်။

ချက်ချင်းပင် သွေးများ ပန်းထွက်လာသော်လည်း မြေပြင်ပေါ်သို့ မကျမီမှာပင် သွေးများက ကြောက်မက်ဖွယ် အအေးဒဏ်ရှိသော ရေခဲဆူးကြောင့် တိုက်ရိုက် ခဲသွားလေသည်။

"အားးးးးးးးးးးး"

ဟူဝေ၏ ပါးစပ်မှ အလွန် နာကျင်စူးရှသော အော်ဟစ်သံကြီး ထွက်ပေါ်လာ၏။

သူ အော်ဟစ်၍ မဆုံးမီမှာပင် လင်းယွမ်က ရေခဲဆူး သုံးချောင်းကို ထပ်မံ စုစည်းလိုက်ပြီး အဆက်မပြတ် ထိုးချလိုက်ပြန်သည်။

"ရွှပ်... ရွှပ်... ရွှပ်"

"အားးးးးးးးးးးး"

ဟူဝေ၏ ပါးစပ်မှ ပိုမို ပြင်းထန်သော အော်ဟစ်သံကြီး ထွက်ပေါ်လာပြီး ခြေလက်လေးဖက်စလုံး မြေကြီးပေါ်တွင် တိုက်ရိုက် သံမှိုရိုက်ခံလိုက်ရသကဲ့သို့ ဖြစ်သွားသည်။

အားကောင်းသော ရေခဲအအေးငွေ့များက သူ၏ ခြေလက်များကို ချက်ချင်း အေးခဲသွားစေသဖြင့် သူ့ကို လုံးဝ လှုပ်ရှား၍ မရအောင် ဖြစ်သွားစေသည်။

ကြံ့၏ ခေါင်းပေါ်တွင် နင်းထားသော လင်းယွမ်၏ ခြေဝါးများတွင်လည်း အအေးငွေ့များစွာ စုစည်းနေပြီး ရေခဲစွမ်းအင်များကို အဆက်မပြတ် ထုတ်လွှတ်ကာ ဟူဝေ၏ ခန္ဓာကိုယ်ကို အလွန်လျင်မြန်စွာ အေးခဲသွားစေသည်။

ဟူဝေ၏ ဆွဲငင်အား စက်ကွင်းက မည်မျှပင် အလုပ်လုပ်နေစေကာမူ လင်းယွမ်ကိုတော့ အနည်းငယ်မျှပင် ထိန်းချုပ်နိုင်စွမ်း မရှိချေ။

"ဂျစ်"

မျက်တောင်တစ်ခတ်အတွင်းမှာပင် ဟူဝေမှာ အေးခဲသွားပြီး ရေခဲရုပ်တုတစ်ခုအဖြစ် ပြောင်းလဲသွားလေသည်။

သို့သော် သူ၏ နှလုံးက ခုန်နေဆဲဖြစ်ပြီး ရေခဲလွှာများအောက်တွင် အေးခဲနေသော်လည်း သူ သေဆုံးသွားခြင်း မရှိသေးပေ။

လင်းယွမ်က အေးစက်စွာ ရယ်မောလိုက်သည်။ ဤတစ်ကြိမ်တွင်တော့ သူ့အနေဖြင့် မည်သည့် ကျေးကျွန်မျှ သိမ်းဆည်းရန် အစီအစဉ် မရှိတော့ချေ။

ဟူဝေအပေါ်တွင် သူ အလွန်အမင်း မုန်းတီးခြင်း တစ်ခုသာ ရှိသည်။

သူ ခက်ခက်ခဲခဲ လဲလှယ်ထားခဲ့ရသော မျိုးရိုးဗီဇမြေပုံ ကိုက်ညီဆေးရည်မှာ အာနိသင်ပြချိန် မိနစ် ၄၀ အထိ ရောက်ရှိနေပြီ ဖြစ်သော်လည်း ဤကောင်က မုန်ယာကုမ္ပဏီ၏ တပ်ဖွဲ့ကို ခေါ်ဆောင်လာခဲ့သောကြောင့် ဖြစ်သည်။

ငါးလိပ်စွန်ကျွန်းကို ဝင်ရောက်တိုက်ခိုက်ပြီး သူ့ကို အနှောင့်အယှက် ပေးခဲ့သဖြင့် အရေးကြီးသော အချိန်တွင် သူ၏ မျိုးရိုးဗီဇ တစ်စုံ အမှားအယွင်း ဖြစ်သွားခဲ့ရကာ ဤကဲ့သို့ လူတစ်ပိုင်း ဝက်ဝံတစ်ပိုင်း ပုံစံမျိုး ပြောင်းလဲသွားခဲ့ရခြင်း ဖြစ်သည်။

အမှားအယွင်းများ ဖြစ်ပေါ်ခဲ့မှုကြောင့်ပင် သူသည် ဤမျိုးရိုးဗီဇ ပြန်လည်ဖွဲ့စည်းခြင်းကို အချိန်မတိုင်မီ အဆုံးသတ်လိုက်ရပြီး ဆေးအာနိသင် မကုန်ဆုံးသေးဘဲ ၃ မိနစ်တိတိ အလဟဿ ဖြုန်းတီးပစ်လိုက်ရသည်။

၃ မိနစ်တောင်မှပဲ။

ဒါက မျိုးရိုးဗီဇ ပြန်လည်ဖွဲ့စည်းခြင်းရဲ့ ၃ မိနစ်ပဲလေ။

အကယ်၍သာ အောင်မြင်ခဲ့မည်ဆိုလျှင် သူသည် ၇၃% အထက်သို့ သေချာပေါက် တက်လှမ်းနိုင်မည် ဖြစ်သည်။

ယခုတော့ သူ ကျရှုံးသွားခဲ့ပြီ။ မျိုးရိုးဗီဇ ပြန်လည်ဖွဲ့စည်းခြင်း နှုန်း ၇၀% တွင် တစ်သွားရုံသာမကဘဲ ခက်ခက်ခဲခဲ ရရှိထားသော မျိုးရိုးဗီဇမြေပုံ ကိုက်ညီဆေးရည်၏ အာနိသင်ပြချိန်ကိုပါ အလဟဿ ဖြစ်သွားစေခဲ့သည်။

ထို့အပြင် သူ ကိုယ်တိုင် ခက်ခက်ခဲခဲ တည်ဆောက်ထားခဲ့ရသော စခန်းမှာလည်း တစ်ဖက်လူ၏ ဖျက်ဆီးမှုကြောင့် လုံးဝ ပျက်စီးသွားခဲ့ရသည်။

ထိုက်ယန်တောင် စခန်း၏ ထိခိုက်သေဆုံးမှုများကိုလည်း မျက်မြင်ကိုယ်တွေ့ မြင်တွေ့နေရပေသည်။

ထိုလူများအားလုံးသည် လင်းယွမ် ခက်ခက်ခဲခဲ ပြုစုပျိုးထောင်ထားခဲ့ရသော လေယာဉ်မှူးများနှင့် သိပ္ပံသုတေသနပညာရှင်များ ဖြစ်ကြသည်။

ထို့ကြောင့် လင်းယွမ်၏ ရင်ထဲတွင် မည်မျှလောက် ဒေါသထွက်နေမည်ဆိုသည်ကို တွေးကြည့်နိုင်ပေသည်။

ဒါကြောင့် ဒီဝက်ကြီးက သေချာပေါက် သေကိုသေရမည်။

လင်းယွမ်အနေဖြင့် တစ်စုံတစ်ယောက်ကို ဤမျှလောက် သေစေချင်ခဲ့သည့် အချိန်မျိုး တစ်ကြိမ်တစ်ခါမျှ မရှိခဲ့ဖူးပေ။

ယခုအချိန်ကလွဲ၍ပေါ့။

"ဘုန်း"

လင်းယွမ်က ကြံ့၏ ဦးချိုကို လက်တစ်ဖက်ဖြင့် ဖမ်းဆုပ်ထားပြီး ခြေတစ်ဖက်က ကြံ့၏ လည်ပင်းကို တင်းကျပ်စွာ နင်းထားလိုက်သည်။

နောက်တစ်ခဏတွင် သူက အားကုန်သုံးကာ အနောက်သို့ ဆွဲလိုက်၏။

ကြောက်မက်ဖွယ်ကောင်းသော ခွန်အားများ ပေါက်ကွဲထွက်လာမှုအောက်တွင် မျက်တောင်တစ်ခတ်အတွင်းမှာပင် ထိုကြံ့၏ ဦးချိုက ကျွတ်ထွက်သံနှင့်အတူ အသားနှင့် ဆက်နေသော နေရာမှ သွေးများ အမြောက်အမြား ထွက်ပေါ်လာလေသည်။

ကြံ့၏ ဦးချိုတစ်ချောင်းလုံးမှာ လင်းယွမ်၏ အရှင်လတ်လတ် ဆွဲနုတ်ခံလိုက်ရသကဲ့သို့ ဖြစ်သွားသည်။

ပြင်းထန်သော နာကျင်မှုကြောင့် ဟူဝေတစ်ယောက် တိုက်ရိုက် သတိလစ်မတတ် ဖြစ်သွားရ၏။

သူက အော်ဟစ်ငိုယိုကာ အသံကျယ်ကြီးဖြင့် အသနားခံလေသည်။ "ချမ်းသာပေးပါ... ကျွန်တော့်ကို အသက်ချမ်းသာပေးပါ"

"ကျွန်တော့်ကို အသက်ချမ်းသာပေးပါ... ခင်ဗျား ဘာလိုချင်လဲ အကုန်ပေးပါ့မယ်"

"လူတွေကို ချက်ချင်း ခေါ်ပြီး ပြန်ဆုတ်သွားပါ့မယ်... အခုချက်ချင်း သွားပါ့မယ်"

"ယာဉ်ပျံတွေရော လေယာဉ်တင်သင်္ဘောတွေရော အကုန်လုံး ခင်ဗျားကို ပေးခဲ့ပါ့မယ်... ဆက်မဆွဲပါနဲ့တော့... အားးးးးးးးးးးးး"

လင်းယွမ်က ရပ်တန့်မသွားသည့်အပြင် အခြား ဝက်ဝံလက်ဝါးတစ်ဖက်ကလည်း ကြံ့၏ ဦးချိုကို ချက်ချင်း ဖမ်းဆုပ်လိုက်သည်။

ကြောက်မက်ဖွယ် ခွန်အားများ ပေါက်ကွဲထွက်လာမှုအောက်တွင် ဦးချိုကို အနောက်သို့ ရူးသွပ်စွာ ဆွဲနုတ်လိုက်၏။

ကြံ့၏ ဦးချိုနှင့် ပတ်ဝန်းကျင်ရှိ အရေပြားများ ဆုတ်ပြဲသွားပြီး သွေးများ အမြောက်အမြား ပန်းထွက်လာကာ ကြံ့၏ အရေပြားပေါ်ရှိ မညီညာသော အရေးအကြောင်းများအတိုင်း စီးကျသွားလေသည်။

နာကျင်မှုကြောင့် ဟူဝေတစ်ယောက် သတိလစ်မတတ် ဖြစ်သွားရသည်။

သူ တကယ်ကို အခုချက်ချင်း သေချင်စိတ် ပေါက်နေမိသည်။

ဤကဲ့သို့ နာကျင်မှုမျိုးမှာ သူ၏ အရိုးများကို အရှင်လတ်လတ် ချိုးဖြတ်ခံရပြီး အရေခွံခွာခံရသည်ထက် မလျော့နည်းပေ။

သို့သော် လင်းယွမ်က သူ့ကို အလွန်အမင်း မုန်းတီးနေသဖြင့် ဤအော်ဟစ် အသနားခံသံများကို လုံးဝ ဂရုမစိုက်ချေ။

ဟူဝေက အရင်တုန်းက မည်မျှလောက် မောက်မာခဲ့သလဲ ဆိုသည်ကို ယခုအချိန်တွင် မည်မျှလောက် သနားစရာကောင်းနေသလဲ ဆိုသည်က သက်သေပြနေသည်။

အဝေးမှ ထူလုံနှင့် ယွီဝမ်ထောင်တို့ နှစ်ယောက်သား တစ်ယောက်ကိုတစ်ယောက် ကြည့်လိုက်ကြပြီး တစ်ဖက်လူ၏ ဖြူဖျော့နေသော မျက်နှာနှင့် ကြောက်ရွံ့မှုများကို မြင်တွေ့လိုက်ကြရသည်။

"ဆရာ... ဆရာလင်းက အမြဲတမ်း ဒီလောက်တောင် ရက်စက်တတ်တာလား" ယွီဝမ်ထောင်က မနေနိုင်ဘဲ မေးလိုက်သည်။

ဤသူမှာ သူ၏ သခင်ဖြစ်သော်လည်း သူက တစ်ဖက်လူကို ကောင်းစွာ နားမလည်သေးပေ။

ယခုလို လင်းယွမ်၏ အလွန် ကြမ်းတမ်းရက်စက်သော မြင်ကွင်းကို မြင်တွေ့လိုက်ရသောအခါ ကြောက်ရွံ့လွန်း၍ ရင်တုန်သွားရသည်။

ဘေးနားရှိ ထူလုံက ခေါင်းခါလိုက်ပြီး လေးနက်သော လေသံဖြင့် "ငါလည်း ဆရာလင်းရဲ့ ဒီလောက် ကြောက်စရာကောင်းတဲ့ပုံစံကို အခုမှ ပထမဆုံးအကြိမ် မြင်ဖူးတာပဲ"

"မျိုးရိုးဗီဇ ပြန်လည်ဖွဲ့စည်းခြင်း ကျရှုံးသွားလို့ သူ့ရဲ့ စိတ်ခံစားချက်တွေကို ထိခိုက်သွားတာလားတော့ မသိဘူး" ထူလုံက အရင်တုန်းက ဖုန်းကျန့်ကုန်းကို သတိရသွားသည်။

ဖုန်းကျန့်ကုန်း မျိုးရိုးဗီဇ ပြန်လည်ဖွဲ့စည်းခြင်း အမှားအယွင်း ဖြစ်ပေါ်ခဲ့ပြီးနောက်တွင်လည်း တစ်ခဏတာမျှ ဒေါသကြီးပြီး ကြမ်းတမ်းရက်စက်စွာ ပြုမူတတ်ခဲ့သည်။

ထို့ကြောင့် သူ ဤကဲ့သို့ သံသယဝင်မိခြင်း ဖြစ်သည်။

ယွီဝမ်ထောင်က ထိုစကားကို ကြားသောအခါ ချက်ချင်း သဘောပေါက်သွားပြီး "ဟုတ်တယ်... ဟုတ်တယ်... အဲဒီလို ဖြစ်နိုင်ခြေရှိတယ်... ကျွန်တော်လည်း မုန်ယာကုမ္ပဏီမှာ အဲဒီလို အခြေအနေမျိုးနဲ့ ဆင်တူတာ ကြုံဖူးတယ်"

"မျိုးရိုးဗီဇ ပြန်လည်ဖွဲ့စည်းခြင်း ကျရှုံးသွားရင် အစွမ်းပိုင်ရှင်တွေရဲ့ စိတ်ခံစားချက် အပြောင်းအလဲက အရမ်းကို သိသာတတ်တယ်"

"ဆရာလင်းလည်း စိတ်ခံစားချက်ရဲ့ လွှမ်းမိုးမှုကို ခံလိုက်ရတာ ဖြစ်ဖို့ များတယ်"

သူတို့နှစ်ယောက်သား ဤမြင်ကွင်းမှာ လင်းယွမ် မျိုးရိုးဗီဇ ပြန်လည်ဖွဲ့စည်းခြင်း၏ လွှမ်းမိုးမှုကို ခံလိုက်ရခြင်းကြောင့် ဖြစ်ပေါ်လာရသည်ဟု အလျင်စလို ကောက်ချက်ချလိုက်ကြသည်။

အမှန်တကယ်တွင် သူတို့နှစ်ယောက်၏ ခန့်မှန်းချက်မှာလည်း သိပ်မမှားပေ။

မျိုးရိုးဗီဇ ပြန်လည်ဖွဲ့စည်းခြင်း ကျရှုံးပြီး မှားယွင်းသော မျိုးရိုးဗီဇအတွဲများ ပြန်လည်ဖွဲ့စည်းပြီးနောက်တွင် စိတ်ခံစားချက်များ ထိန်းချုပ်မရ ဖြစ်လာတတ်သည်မှာ အမှန်ပင်။

ကြမ်းတမ်းရက်စက်ခြင်းဆိုသည်မှာ စိတ်ခံစားချက်များစွာထဲမှ တစ်ခုသာ ဖြစ်သည်။

အထူးသဖြင့် ဒေါသထွက်နေသည့် အခြေအနေမျိုးတွင် ကြမ်းတမ်းရက်စက်ခြင်းက အသိသာဆုံးသော ဖော်ပြချက်ပင် ဖြစ်သည်။

ယခုအချိန်တွင် လင်းယွမ်၏ ရင်ထဲ၌ သတ်ဖြတ်လိုစိတ်များ ဖုံးလွှမ်းနေ၏။

သူ့ရှေ့မှ ကြံ့အသွင်ပြောင်း ဟူဝေကို အရှင်လတ်လတ် ဆွဲမဖြဲပစ်နိုင်သည်ကိုသာ မကျေမနပ် ဖြစ်နေမိသည်။

ရုတ်တရက် သူ၏ လက်မောင်းနှစ်ဖက်က အားကုန်သုံးလိုက်သည်ကို တွေ့လိုက်ရသည်။

"ဂျွတ်"

ကျွတ်ထွက်သံတစ်ခုနှင့်အတူ ဟူဝေ၏ အော်ဟစ်သံကြီးက မျက်တောင်တစ်ခတ်အတွင်းမှာပင် ပိုမို စူးရှကျယ်လောင်သွားလေသည်။

ခေါင်းပေါ်ရှိ ကြံ့ဦးချိုမှာ လင်းယွမ်၏ အရှင်လတ်လတ် ဆွဲချိုးခြင်းကို ခံလိုက်ရပြီ ဖြစ်သည်။

ကြောက်မက်ဖွယ်ကောင်းသော သွေးများက တိုက်ရိုက် ပန်းထွက်လာပြီး ရေတံခွန်တစ်ခုအလား စီးကျလာ၏။

ဟူဝေမှာ မျက်လုံးများ လန်သွားပြီး အရှင်လတ်လတ် နာကျင်လွန်း၍ သေဆုံးသွားခဲ့လေပြီ။

လင်းယွမ်က လက်ဝါးကို မြှောက်လိုက်ပြီး ကြံ့ဦးချို ကျိုးထွက်သွားသော သွေးတွင်းပေါက်ကြီးဆီသို့ အားကုန် ထိုးချလိုက်သည်။

"မင်းက အရမ်းမောက်မာနေတာ မဟုတ်ဘူးလား... ဟမ်"

"မင်းက ငါ့ကို သတ်ပစ်မယ်ဆိုတာ မဟုတ်ဘူးလား"

"လာလေ... ထစမ်း"

"ဘုန်း... ဘုန်း... ဘုန်း"

အဆက်မပြတ် ထိုးကြိတ်နေသော လက်သီးချက်များ ကျဆင်းလာသည်။

ထိုဧရာမ ကြံ့ခေါင်းကြီးမှာ အရှင်လတ်လတ် အသားပြားလေးတစ်ခုအဖြစ် အရိုက်ခံလိုက်ရလေပြီ။

သွေးများ နေရာအနှံ့ ပန်းထွက်ကုန်ပြီး မြေပြင်တွင် ကြောက်မက်ဖွယ် တွင်းနက်ကြီးတစ်ခု ဖြစ်ပေါ်သွားသည်။

လင်းယွမ်၏ မျက်လုံးအစုံတွင် သွေးရောင်များ ရောယှက်နေ၏။

ပတ်ဝန်းကျင်ရှိ မုန်ယာကုမ္ပဏီမှ လူများဖြစ်စေ၊ ထိုက်ယန်တောင်မှ လူများဖြစ်စေ အားလုံး ရပ်တန့်သွားကြပြီး ဤမြင်ကွင်းကို ကြောက်ရွံ့ထိတ်လန့်စွာ ကြည့်နေကြသည်။

"ဆရာလင်း"

ထူလုံက မနေနိုင်ဘဲ လင်းယွမ်ကို လှမ်းခေါ်လိုက်သည်။

အလောင်းကို ထိုးကြိတ်နေသော လင်းယွမ်၏ လက်မောင်းက အနည်းငယ် ရပ်တန့်သွားသည်။

သူ ခေါင်းမော့ကာ ထူလုံကို ကြည့်လိုက်၏။

ထူလုံက သူ့၏ ကြောက်စရာကောင်းသော အကြည့်များနှင့် ဆုံတွေ့လိုက်ရသောအခါ ရင်တုန်သွားရသည်။

"ဆရာလင်း... သူ... သူ သေသွားပါပြီ"

ထူလုံက သတ္တိမွေးကာ ခက်ခက်ခဲခဲ စကားဟလိုက်သည်။

လင်းယွမ်က ခေါင်းငုံ့ကာ မြေပြင်ပေါ်ရှိ သွေးသံရဲရဲဖြစ်နေသော ကြံ့အလောင်းကို ကြည့်လိုက်ပြီး မျက်လုံးထဲမှ သတ်ဖြတ်လိုစိတ်များ တဖြည်းဖြည်း လျော့ကျသွားလေသည်။

သူ၏ လက်ဝါးများကို ပြန်ကြည့်လိုက်ပြီး မျက်နှာအမူအရာက တဖြည်းဖြည်း ပျက်ယွင်းလာသည်။

"မျိုးရိုးဗီဇ ပြန်လည်ဖွဲ့စည်းခြင်း မှားယွင်းသွားပြီးတဲ့နောက် ငါ့ရဲ့ စိတ်ခံစားချက်ကို ထိန်းချုပ်နိုင်စွမ်းတွေပါ ကျဆင်းသွားတာပဲ"

"ကြည့်ရတာ အိမ်မပြန်ခင် မျိုးရိုးဗီဇကို ပြန်လည်ဖွဲ့စည်းပြီး အမှားတွေကို ပြင်ဆင်မှ ရတော့မယ်"

လင်းယွမ်က ရင်ထဲတွင် ဆူပွက်နေသော သတ်ဖြတ်လိုစိတ်များနှင့် အခြားသော စိတ်အနှောင့်အယှက် ဖြစ်မှုများကို ဖိနှိပ်လိုက်သည်။

သူ၏ လက်ထဲရှိ ကြံ့ဦးချိုကို ကြည့်လိုက်သောအခါ မျက်ခုံးများ အနည်းငယ် ပင့်တက်သွား၏။

ဤဦးချိုပေါ်တွင် သင်္ကေတများ လည်ပတ်နေပြီး အစွမ်း သင်္ကေတများ ရှိနေသည်ကို အံ့သြဖွယ် တွေ့လိုက်ရပေသည်။

ဆက်ရန်...