အခန်း ၇၉၈

အပိုင်း (၇၉၈) ရေခဲများအရည်ပျော်ခြင်း

"ဒီလောက်တောင် ကြာနေပြီဆိုတော့ တစ်ခုခုများ ဖြစ်နေတာလား မသိဘူး"

"ရန်မေ... လျှောက်မတွေးစမ်းပါနဲ့... ကိုလင်းယွမ်က အရမ်းစွမ်းတာလေ... ပြီးတော့ ရေပေါ်ကျွန်းကနေ နေ့တိုင်း လေယာဉ်ပျံတွေနဲ့ သတင်းလာပို့နေတာပဲ... ဘာမှမဖြစ်နိုင်ပါဘူး"

ရှင်းမြွေမိစ္ဆာဟင်းလင်းပြင်ရှိ ရှောင်မောင်းတောင် အပန်းဖြေစံအိမ်ထဲတွင် ဖြစ်သည်။

ရန်မေနှင့် လင်းယာတို့က ဟင်းသီးဟင်းရွက်များ ရွေးချယ်ရင်း စကားစမြည် ပြောဆိုနေကြ၏။

ရန်မေ၏ မျက်နှာထက်တွင် စိုးရိမ်ပူပန်မှုများ ပေါ်လွင်နေပြီး "ငါက စိတ်မချလို့ပါဟယ်"

လင်းယာက ရယ်မောရင်း "နင့်ဟာနင် တုတုလေးကိုသာ ပိုပြီး ဂရုစိုက်စမ်းပါ"

"ဟင်... တုတုလေးက ဘာဖြစ်လို့လဲ"

"ဒီကလေးက အခု လမ်းလျှောက်တတ်နေပြီလေ... နေ့တိုင်း အပြင်ကိုချည်း ထွက်ပြေးချင်နေတာ... ငါ မျက်ခြေပြတ်သွားတာနဲ့ အဝေးကြီးကို ရောက်သွားရော... နင်နဲ့တူတာလား... ကိုလင်းယွမ်နဲ့ တူတာလားတော့ မသိဘူး" ဟု လင်းယာက ရယ်မောလျက် ပြောလေသည်။

ထိုစကားကို ကြားသောအခါ ရန်မေလည်း ချက်ချင်း ပြုံးသွားမိသည်။ ကလေးတစ်ယောက် တက်ကြွသွက်လက်နေခြင်းက ကောင်းသောလက္ခဏာပင် ဖြစ်၏။

သူမက ရယ်မောရင်း "ကိစ္စမရှိပါဘူး... ရှောင်မောင်းတောင် အိမ်ရာဝင်းက အလုံပိတ်ထားတာဆိုတော့ အပြင်လူတွေ ဝင်လာလို့ မရပါဘူး... ဒါပေမဲ့ အရမ်းဝေးတဲ့အထိတော့ အသွားမခံနဲ့ပေါ့... အိမ်ရာဝင်းထဲမှာပဲ ပြေးလွှားဆော့ကစားနေရင် ရပါပြီ"

"ဟူး... ထိုက်ယန်တောင်ဘက်က အခြေအနေ ဘယ်လိုရှိလဲတော့ မသိဘူး... ငါက ဟိုဘက်က မှန်လုံခန်းလေးကို ပိုသဘောကျတယ်"

ရန်မေက သက်ပြင်းချရင်း ပြောလိုက်ရာ ဘေးနားရှိ လင်းယာကလည်း သက်ပြင်းချလျက် "ရေကြီးတာက အခုဆို လုံးဝကို မြင့်တက်လာပြီတဲ့... ရေပေါ်တံတားတောင် ရေမြုပ်သွားပြီလို့ ကြားတယ်"

"အခုဆို တောင်ထိပ်လေး နည်းနည်းပဲ ကျန်တော့တာ... အဲဒီအချိန်တုန်းက ကိုလင်းယွမ် စခန်းတစ်ခုလုံးကို ရွှေ့ပြောင်းခိုင်းလိုက်လို့ တော်သေးတာပေါ့... မဟုတ်ရင် ဒီလဝက်အတွင်းမှာ ရေခဲတွေ ဒီလောက်မြန်မြန် အရည်ပျော်ကျလာတာဆိုတော့ ငါတို့ အချိန်မီ ပြောင်းရွှေ့နိုင်မှာ မဟုတ်ဘူး"

ရန်မေလည်း အလွန်ခံစားမိသွားပြီး ခေါင်းညိတ်ကာ "ဒီဘေးဒုက္ခကြီးက တကယ်ကို အသက်ရှင်ခွင့် မပေးတော့တာပဲ... ကံကောင်းလို့ ရေပေါ်ကျွန်းလို ထူးဆန်းတဲ့နေရာမျိုး ရှိနေလို့ပေါ့... မဟုတ်ရင် လူတွေအတွက် နေစရာ နေရာတောင် ရှိတော့မှာ မဟုတ်ဘူး"

လင်းယာလည်း စိတ်မကောင်းစွာဖြင့် ခေါင်းညိတ်လိုက်ပြီး "ဒီတစ်ခေါက် ရေခဲတွေ အရည်ပျော်ကျတာ ခိုလှုံရေးစခန်းလေးတွေ ဘယ်လောက်များများ ဘေးဒုက္ခကြုံရမလဲ မသိဘူး"

"ဖန်ဆန်းကျွန်းလည်း လုံးဝ ရေမြုပ်သွားပြီလို့ ကြားတယ်"

ရန်မေကလည်း သက်ပြင်းချရင်း "ဖန်ဆန်းကျွန်းက ကျွန်းငယ်လေးပဲကိုး... ကံကောင်းတာက ကျွန်းပေါ်က သယံဇာတတွေ အကုန်လုံးကို ကြိုတင်ပြီး တွင်းနက်အရိပ်ရေပေါ်ကျွန်းပေါ် ရွှေ့ပြောင်းထားလို့ပေါ့"

လင်းယာက "တွင်းနက်အရိပ်ရေပေါ်ကျွန်းက ထိုက်ယန်တောင်ဘက်ကို မျောလာနေပြီလို့ ပြောကြတယ်... ကိုလင်းယွမ်က ရေပေါ်ကျွန်းတွေ အကုန်လုံးကို တစ်စုတစ်စည်းတည်းဖြစ်အောင် လုပ်ပြီး ဧရာမ ရေပေါ်ကျွန်း အခြေစိုက်စခန်းကြီးတစ်ခု တည်ဆောက်ဖို့ ပြင်ဆင်နေတယ်ဆိုတာ တကယ်လား" ဟု မေးလိုက်သည်။

ရန်မေက ခေါင်းညိတ်ပြပြီး "ဒါက အစောကြီးကတည်းက စီစဉ်ထားပြီးသားလေ... အခု ရေခဲတွေ အရည်ပျော်လာတော့ ဒီကိစ္စကိုလည်း အကောင်အထည်ဖော်ဖို့ အချိန်ကျလာတာပေါ့"

သူတို့နှစ်ဦး စကားပြောနေကြစဉ်မှာပင် တံခါးအပြင်ဘက်မှ ဆုန့်ဝမ် ဝင်လာလေသည်။

အခန်းထဲ ဝင်ဝင်ချင်းပင် သူမက ဝမ်းသာအားရဖြင့် "အမမေ... အမလင်းယာ... သတင်းရပြီ... ဒီနေ့ အစ်ကိုလင်း ပြန်လာတော့မယ်တဲ့" ဟု အော်ပြောလိုက်သည်။

"ဘာ"

ရန်မေက ရုတ်တရက် မတ်တတ်ထရပ်လိုက်ပြီး သူမ၏ မျက်နှာပေါ်တွင် အံ့အားသင့် ဝမ်းသာမှုများ ပြည့်နှက်သွားသည်။

လင်းယာလည်း အလျင်အမြန် မတ်တတ်ထရပ်ကာ တစ်ခုခု မေးမြန်းရန် ပြင်လိုက်သော်လည်း သူမကိုယ်သူမ အရမ်း စိတ်လှုပ်ရှားနေမိကြောင်း ချက်ချင်း သတိထားမိသွားပြီး ခြေလှမ်းများကို ပြန်ရပ်တန့်လိုက်သည်။

ရန်မေက ဆုန့်ဝမ်အနီးသို့ ခပ်မြန်မြန် လျှောက်သွားပြီး စိတ်လှုပ်ရှားစွာဖြင့် "သတင်းက သေချာရဲ့လား" ဟု မေးလိုက်၏။

"သေချာပါတယ်... ဦးလေးမာ ကိုယ်တိုင် ပြောတာပါ"

"ဦးလေးမာ ပြန်ရောက်ပြီလား" ဟု ရန်မေက ဝမ်းသာတကြီး မေးလိုက်သည်။

"ဟုတ်တယ်... လေပေါ်ကျွန်း တည်ဆောက်ရေး လုပ်ငန်းတွေက အခြေခံအားဖြင့် ပြီးစီးသွားပြီတဲ့... ကျန်တဲ့ ကိစ္စတွေကိုတော့ လက်အောက်ငယ်သားတွေဆီ လွှဲပေးခဲ့တယ်လို့ ပြောတယ်"

"ဒါနဲ့ နင့်အစ်ကိုလင်းရော တစ်ခုခု ဖြစ်သေးလား မေးကြည့်သေးလား"

"မေးတာပေါ့... အစ်ကိုလင်း ဘာမှမဖြစ်ပါဘူးတဲ့... ပြီးတော့ အစ်ကိုလင်းရဲ့ အစွမ်းတွေက ထပ်ပြီး တိုးတက်သွားပြီတဲ့... လွန်ခဲ့တဲ့ လဝက်လောက်က မုန်ယာကုမ္ပဏီက သူတို့ကို ဝင်တိုက်တုန်းကဆို အစ်ကိုလင်း တစ်ယောက်တည်း အခြေအနေကို ပြောင်းပြန်လှန်ပစ်ခဲ့တာ... ရန်သူ့ခေါင်းဆောင်ကို ဖမ်းမိရုံတင်မကဘူး သူတို့ရဲ့ မိခင်ယာဉ်ပျံကြီးကိုပါ သိမ်းပိုက်နိုင်ခဲ့တယ်တဲ့"

ဆုန့်ဝမ်၏ မျက်နှာပေါ်တွင် အပြုံးများ လွှမ်းမိုးနေပြီး စကားပြောနေစဉ်တွင် ဂုဏ်ယူဝင့်ကြွားမှုများ အထင်းသား ပေါ်လွင်နေ၏။

ရန်မေလည်း ရယ်မောလိုက်ပြီး "ဒါဆိုလည်း တော်သေးတာပေါ့... တော်သေးတာပေါ့... ဒါနဲ့ ညစာမစားခင်လောက်တော့ ပြန်ရောက်နိုင်တယ် မဟုတ်လား"

လင်းယာကလည်း အလျင်စလို ဝင်ပြောလိုက်သည်။ "ဒါဆို နေ့လယ်စာကိုပါ သူစားဖို့ တစ်ခါတည်း ချက်ထားလိုက်ရမလား"

ဆုန့်ဝမ်က ရယ်မောလျက် "နေ့လယ်လောက်မှ ပြန်ရောက်မယ်လို့ ပြောတယ်... နေ့လယ်စာအတွက်တော့ မလိုလောက်တော့ဘူး"

"အစ်ကိုလင်း ပြန်လာရင် ကျွန်မတို့ရဲ့ အိမ်သစ်လေးကို လိုက်ပြရမယ်... သူ တစ်ခါမှကို မလာဖူးသေးတာ"

"တုံယန်ရော... နေ့လယ်ကျရင် တုံယန်ကိုပါ ပြန်ခေါ်ထားလိုက်ဦး" ဟု ရန်မေက ဆုန့်ဝမ်ကို သတိပေးလိုက်သည်။

ဆုန့်ဝမ်က ရယ်မောရင်း "သူက အစောကြီးကတည်းက ထိုက်ယန်တောင်ဘက်ကို သွားနှင့်ပြီလေ"

"ဟင်... ထိုက်ယန်တောင်ကို ဘာသွားလုပ်တာလဲ... ဟိုဘက်မှာ အကုန်လုံး နီးပါး ရေမြုပ်နေပြီမလား" ဟု ရန်မေက နားမလည်နိုင်စွာ မေးလိုက်၏။

ဆုန့်ဝမ်က "သူက အစ်ကိုလင်းကို သွားကြိုမလို့တဲ့... အစ်ကိုလင်းက တစ်ခါမှ မလာဖူးတော့ ကျွန်မတို့ ဘယ်မှာနေလဲ မသိဘူးလေ... အဲဒါကြောင့် သူ ထိုက်ယန်တောင်ဘက် သွားစောင့်နေတာ"

ရန်မေမှာ ရယ်ရခက် ငိုရခက် ဖြစ်သွားပြီး "ဒီကောင်မလေးတော့... ကောင်းပါပြီလေ... ခဏနေရင် ငါတို့ လင်းယာနဲ့ အပြင်ထွက်ပြီး မောင်လေး ကြိုက်တတ်တဲ့ ဟင်းလေးတွေ သွားဝယ်လိုက်ဦးမယ်... နင်လည်း နေ့လယ်ကျရင် ဥယျာဉ်ဘက်ကို မသွားနဲ့တော့... အိမ်မှာပဲ နေတော့"

ဆုန့်ဝမ်က တခစ်ခစ်ရယ်လျက် ခေါင်းညိတ်ပြလိုက်သည်။

အိမ်လေးအတွင်းဝယ် ပျော်ရွှင်ဖွယ် လေထုက လွှမ်းမိုးနေပြီး ဆုန့်ဝမ်ကလည်း လင်းယွမ် ပြန်ရောက်လာသည့်အခါ အိမ်သစ်လေး၏ သန့်ရှင်းသပ်ရပ်သော ပတ်ဝန်းကျင်ကို မြင်တွေ့စေရန် အိမ်သန့်ရှင်းရေး စတင် လုပ်ဆောင်နေလေသည်။

တစ်ချိန်တည်းမှာပင် လေဟုန်စီး ငါးလိပ်စွန် ရေပေါ်ကျွန်းပေါ်ရှိ သီးသန့် အခန်းကျဉ်းလေးထဲတွင် ဖြစ်သည်။

လင်းယွမ်က ညစ်ညမ်းသော လေဆိုးများကို ရှူထုတ်လိုက်ပြီး မျက်လုံးများကို ဖွင့်လိုက်ရာ မျက်ဝန်းအိမ်အတွင်း၌ ထက်မြက်သော အလင်းတန်းတစ်ခုက လျှပ်တစ်ပြက် တောက်ပသွား၏။

"စနစ်"

သူက စိတ်ထဲမှနေ၍ စနစ်၏ အရည်အသွေး မှတ်တမ်းကို ခေါ်လိုက်သည်။

အမည် - လင်းယွမ်

ခန္ဓာကိုယ်ကြံ့ခိုင်မှု - ၁၈၂

ခွန်အား - ၁၈၆

အလျင် - ၁၈၂

စိတ်စွမ်းအင် - ၁၈၉

ဘုံအရည်အသွေးမှတ်များ - ဝ

မျိုးရိုးဗီဇမျိုးစေ့ - အသွင်တစ်ရာ မျောက်ဝံမိစ္ဆာ၊ ရေခဲမြေရိုင်းဝက်ဝံ၊ သုမာရု ဟင်းလင်းပြင် ပုရွက်ဆိတ်၊ တွင်းနက်အရိပ်နဂါး၊ လိပ်ဝိညာဉ် ပုံရိပ်ယောင်မြွေ၊ ရဲရဲတောက် မီးလင်းယုန်၊ နတ်ရေစင်ဖီးနစ်ငှက်၊ အမွေးရှည်ဆင်ကြီး၊ ရွှေမွေးခြင်္သေ့မိစ္ဆာ

မျိုးရိုးဗီဇမြေပုံ - အသွင်တစ်ရာ မျောက်ဝံမိစ္ဆာ (၇၄%)

...

"မျိုးရိုးဗီဇ ပြန်လည်ဖွဲ့စည်းခြင်း တိုးတက်နှုန်းက ၇၄% အထိ ရောက်သွားပြီပဲ... ဒါက အရင်တုန်းက မျိုးရိုးဗီဇမြေပုံ ကိုက်ညီဆေးရည်ရဲ့ အာနိသင်ကို အပြည့်အဝ ထုတ်ဖော်နိုင်လိုက်တာလို့ ဆိုရမယ်"

လင်းယွမ်က ပြုံးလိုက်ပြီး လက်တစ်ချက် ဝှေ့ယမ်းလိုက်ရာ ရေစီးကြောင်းတစ်ခု စုစည်းပေါ်ထွက်လာသည်။

ရေစီးကြောင်းက ရေမုံပြင်အဖြစ် ပြောင်းလဲသွားပြီး သူ၏ မျက်နှာကို ထင်ဟပ်စေ၏။

ရေမှန်ပြင်ထဲတွင် လင်းယွမ်သည် သူ၏ မူလ ခန့်ညားသော ရုပ်ရည်သွင်ပြင်သို့ ပြန်လည်ရောက်ရှိနေပြီး အရပ်အမောင်းမှာလည်း ၆ ပေကျော်ခန့်အထိ ပြန်လည် မြင့်မားလာသည်။

ဤခန္ဓာကိုယ်ထဲတွင် အကန့်အသတ်မဲ့သော အလားအလာများ ကိန်းအောင်းနေပြီး မျိုးရိုးဗီဇကို ပြန်လည်ဖွဲ့စည်းလိုက်သည်နှင့် တစ်ပြိုင်နက် ကြောက်မက်ဖွယ်ကောင်းသော ဧရာမ သားရဲကြီးတစ်ကောင်အဖြစ်သို့ ပြောင်းလဲသွားမည် ဖြစ်သည်။

"အရည်အသွေး အမှတ်တွေ အကုန်လုံး တစ်ရာ့ရှစ်ဆယ်အထက်ကို ရောက်သွားပြီ... ဒီလို အခြေအနေမျိုးနဲ့ဆိုရင် မျိုးရိုးဗီဇ ပြန်လည်ဖွဲ့စည်းခြင်း အသွင်ကို မပြောင်းလဲရင်တောင် မျိုးရိုးဗီဇ ပြန်လည်ဖွဲ့စည်းခြင်း အဆင့်အောက်က ဘယ်ပြိုင်ဘက်ကိုမဆို အလွယ်တကူ သတ်ဖြတ်နိုင်နေပြီ"

"ငါ့ရဲ့ လက်ရှိ မျိုးရိုးဗီဇ ပြန်လည်ဖွဲ့စည်းခြင်း အခြေအနေနဲ့ဆိုရင် မိုးကြိုးတိမ်တိုက်ရဲ့ အဖျက်စွမ်းအားကိုရော တောင့်ခံနိုင်ပါ့မလား မသိဘူး"

လင်းယွမ်၏ စိတ်ထဲတွင် ထိုအတွေး ဖြတ်ပြေးသွားပြီး ချက်ချင်းပင် စမ်းသပ်ကြည့်လိုစိတ်များ ပေါက်ဖွားလာလေသည်။

"လောစရာ မလိုဘူး... အပြင်ရောက်မှပဲ ကြည့်ကြသေးတာပေါ့"

လင်းယွမ်က တံခါးကြီးပေါ်သို့ လက်တင်လိုက်ရာ "ချပ်" ဟူသော အသံနှင့်အတူ တံခါးပေါ်ရှိ သင်္ကေတများ လင်းလက်လာပြီး ဆွဲငင်အား သင်္ကေတကို ထိန်းချုပ်ကာ သတ္တုစပ်တံခါးကြီးကို အလွယ်တကူ ဖွင့်လိုက်လေသည်။

သူ လေ့ကျင့်နေသည့် ဤလဝက်အတွင်း ဆွဲငင်အား သင်္ကေတ၏ အသုံးချပုံကို လုံးဝ နားလည်သဘောပေါက်ထားပြီး ဖြစ်၏။

ဟူဝေ၏ ခရုခွံပေါ်ရှိ ဆွဲငင်အား သင်္ကေတသော့ခလောက်ကိုလည်း သူ အပြည့်အဝ ထိန်းချုပ်နိုင်နေပြီ ဖြစ်သည်။

လင်းယွမ်က ၎င်းကို ဤသတ္တုစပ်တံခါးကြီးပေါ်တွင် အသုံးချထားပြီး ဖြစ်လေသည်။

တံခါးအပြင်ဘက်မှ လှုပ်ရှားသံကို ကြားလိုက်ရသော ကင်းသမားက ချက်ချင်း ဝမ်းသာတကြီးဖြင့် "ဆရာလင်း... ဆရာ ထွက်လာပြီလား" ဟု မေးလိုက်သည်။

လင်းယွမ်က ပြုံး၍ ခေါင်းညိတ်ပြကာ "စခန်းမှာ အားလုံး အဆင်ပြေကြရဲ့လား" ဟု မေးလိုက်၏။

ကင်းသမားက အလျင်အမြန်ပင် "အားလုံး အဆင်ပြေပါတယ် ဆရာ... လတ်တလော ဘာပြဿနာမှ မရှိပါဘူး" ဟု ဖြေလေသည်။

လင်းယွမ်က "အခု စခန်းကို ဘယ်သူ တာဝန်ယူထားလဲ" ဟု မေးလိုက်သည်။

"ခေါင်းဆောင်ကျိုးနဲ့ ခေါင်းဆောင်ရှီ တို့ပါ ဆရာ"

လင်းယွမ်က ခေါင်းညိတ်လိုက်ပြီး "ကောင်းပြီ... ကိစ္စမရှိဘူး... မင်းအလုပ် မင်းဆက်လုပ်... ငါ့ဟာငါပဲ သွားလိုက်မယ်"

"ဟုတ်ကဲ့ပါ ဆရာ"

မြေအောက် သီးသန့်အခန်းမှ ထွက်လာပြီးနောက် စခန်းအတွင်းပိုင်းသို့ ရောက်ရှိလာခဲ့သည်။

ယခုအခါ စခန်းကို ပြန်လည် တည်ဆောက်ထားသဖြင့် နေရာပိုမို ကျယ်ဝန်းလာရုံသာမက ပစ္စည်းကိရိယာများကိုလည်း အသစ်များနှင့် အစားထိုးထားလေပြီ။

သတ္တုဓာတ် အစွမ်းရှိသော ချန်ကျန့်ဖုန်း ရှိနေသဖြင့် မည်မျှပင် တိကျမှုမြင့်မားသော သတ္တုပုံစံခွက်များကိုမဆို လက်ဖြင့် အလွယ်တကူ ဖန်တီးနိုင်ပေသည်။

လင်းယွမ်ကလည်း ဤကာလအတွင်း အခြေခံ အဆောက်အအုံများ တည်ဆောက်ရန်အတွက် ကိရိယာများနှင့် ပစ္စည်းအမြောက်အများကို လဲလှယ်ကာ ဂိုဒေါင်ထဲတွင် သိမ်းဆည်းပေးထားခဲ့သည်။

ထို့ကြောင့် လေဟုန်စီး ငါးလိပ်စွန် ရေပေါ်ကျွန်းသည် လေထဲတွင် ရှိနေသော်လည်း အမှန်တကယ်တွင် မည်သည့်အရာမျှ လိုအပ်ချက် မရှိပေ။

ဆေးသုတ်ရန်အတွက် သုတ်ဆေးများကိုပင် လင်းယွမ်က ကြိုတင် ပြင်ဆင်ထားပြီး ဖြစ်သည်။

လမ်းတစ်လျှောက်တွင် လင်းယွမ်ကို မြင်တွေ့သူတိုင်းက ရိုသေလေးစားစွာဖြင့် အရိုအသေ ပေးကြ၏။

လင်းယွမ်က အပြုံးဖြင့် တုံ့ပြန်နှုတ်ဆက်လိုက်ပြီး မကြာမီမှာပင် ကျိုးဟောင်ရန်က လူတစ်စုကို ဦးဆောင်ကာ အလျင်စလို ရောက်ရှိလာသည်။

"ဆရာလင်း... ဆရာ လေ့ကျင့်လို့ပြီးသွားပြီလား"

လင်းယွမ်က ခေါင်းအနည်းငယ် ညိတ်ပြပြီး "အင်း... စခန်းမှာ ဘာကိစ္စမှ မရှိဘူးမလား" ဟု မေးလိုက်သည်။

"မရှိပါဘူး ဆရာလင်း... လောလောဆယ် ဆရာလင်း မလေ့ကျင့်ခင်က ချမှတ်ခဲ့တဲ့ အစီအစဉ်အတိုင်းပဲ ဆက်လက် တိုးချဲ့ တည်ဆောက်နေပါတယ်"

"စခန်း တည်ဆောက်ရေး လုပ်ငန်းတွေက အခြေခံအားဖြင့် ပြီးစီးသွားပါပြီ... ဒါပေမဲ့ လူဦးရေ ပြဿနာကတော့ အကြီးမားဆုံး အခက်အခဲ ဖြစ်နေတုန်းပါပဲ... လက်ရှိ ကျွန်တော်တို့ဆီမှာ လူဦးရေ အရမ်း နည်းနေသေးတယ်"

"လူတွေနေရာမှာ စက်ရုပ်တွေ အစားထိုးဖို့ အစီအစဉ်ရော ဘယ်လောက်အထိ ရောက်သွားပြီလဲ"

"အရမ်းကို အလျင်အမြန် တိုးတက်နေပါတယ်... ဝမ်ထောင် ကိုယ်တိုင် သုတေသနနဲ့ ဖွံ့ဖြိုးတိုးတက်ရေး ဌာနရဲ့ အလုပ်တွေကို တာဝန်ယူထားလို့ အရာအားလုံး အဆင်ပြေချောမွေ့နေပါတယ်" ဟု ကျိုးဟောင်ရန်က အလျင်အမြန် ပြန်ဖြေလေသည်။

လင်းယွမ်က ပတ်ဝန်းကျင်ကို ဝေ့ကြည့်လိုက်ရာ အလုပ်လုပ်နေသော စက်ရုပ် အမြောက်အများကို အမှန်တကယ် မြင်တွေ့လိုက်ရသည်။

အပြင်ဘက်တွင် သွားလာနေသော ကင်းလှည့်တပ်ဖွဲ့ဝင်များထဲတွင်လည်း အများစုမှာ စက်ရုပ်များ ဖြစ်ကြ၏။

ဤအရာက လူအင်အား လိုအပ်ချက်ကို များစွာ လျှော့ချပေးနိုင်ခဲ့သည်။

"ရှီဟိုင်ကျူးရော"

"ခေါင်းဆောင်ရှီက လူတချို့ ခေါ်ပြီး မြွေခရုကျွန်းကို ကင်းထောက်ဖို့ သွားပါတယ်... အစီအစဉ်အရ ကျွန်တော်တို့က မြွေခရုကျွန်းနဲ့ သားရဲကျွန်းကို တိုက်ယူရမှာလေ... လက်ရှိ မြွေခရုကျွန်းကို သိမ်းပိုက်ဖို့ တာဝန်က ကျွန်တော်တို့ လေဟုန်စီး ငါးလိပ်စွန် လေပေါ်ကျွန်းရဲ့ တာဝန်ဖြစ်နေလို့ပါ"

"သားရဲကျွန်းဘက်ကိုတော့ နတ်သစ်ပင်ကျွန်းနဲ့ ငရဲကျွန်းက ပူးပေါင်းပြီး တိုက်ခိုက်သိမ်းပိုက်ကြမှာပါ"

လင်းယွမ်က ခေါင်းအနည်းငယ် ညိတ်လိုက်သည်။ ဤလုပ်ငန်းစဉ်များမှာ သူ မလေ့ကျင့်မီကတည်းက ကြိုတင် ရေးဆွဲထားခဲ့သော အစီအစဉ်များပင် ဖြစ်၏။

လင်ကျန်းမြို့ အထက်ကောင်းကင်ယံရှိ လေပေါ်ကျွန်း ငါးကျွန်းစလုံးကို သူ အပြည့်အဝ ထိန်းချုပ်ထားနိုင်ရန် လိုအပ်သည်မှာ သဘာဝပင် ဖြစ်သည်။

မြွေခရုကျွန်းပေါ်တွင် မြွေများ အလွန်များပြားနေသဖြင့် ၎င်းတို့ကို ရှင်းလင်းရန် နည်းလမ်း ရှာရမည် ဖြစ်သည်။

သားရဲကျွန်းပေါ်တွင်လည်း သန္ဓေပြောင်း သတ္တဝါများ များပြားနေသဖြင့် ၎င်းတို့ကိုလည်း ရှင်းလင်းပစ်နိုင်ပေသည်။

ယခု သူ၏ မျိုးရိုးဗီဇ ပြန်လည်ဖွဲ့စည်းခြင်း တိုးတက်မှု အဆင့်အရ ကောင်းကင်ယံရှိ သန္ဓေပြောင်း သတ္တဝါများထဲတွင် သူ့ကို ခြိမ်းခြောက်နိုင်စွမ်းရှိသူမှာ အလွန် နည်းပါးလှသည်။

အမှန်တကယ် ထိပ်တန်းအဆင့်ရှိသော မျိုးရိုးဗီဇ ပြန်လည်ဖွဲ့စည်းခြင်း သန္ဓေပြောင်း သတ္တဝါများမှာမူ ပိုမိုမြင့်မားသော နေရာများသို့ ပျံသန်းသွားခဲ့ကြပြီ ဖြစ်၏။

မှန်ပါသည်။ ကောင်းကင်ယံရှိ ပိုမိုမြင့်မားသော နေရာများတွင် လေပေါ်ကျွန်း အမြောက်အများ တည်ရှိနေဆဲပင် ဖြစ်သည်။

သို့သော် အထက်ကောင်းကင်ယံသို့ ပို၍ မြင့်တက်လေလေ လေထုအလွှာနှင့် ပို၍ နီးကပ်လေလေ ဖြစ်ပြီး ထိုနေရာတွင် အပူချိန် ကွာခြားချက် ကြီးမားကာ ရာသီဥတု ဆိုးရွားလွန်းသဖြင့် လေပေါ်ကျွန်းများပေါ်တွင် ဂေဟစနစ်ဟူ၍ လုံးဝ မရှိသလောက် ဖြစ်နေသည်။

ထိုနေရာတွင် ရှင်သန်နေထိုင်နိုင်သူများမှာ ထိပ်တန်းအဆင့် သန္ဓေပြောင်း သတ္တဝါများသာ ဖြစ်ကြ၏။

လေထုအလွှာကို ဖောက်ထွက်နိုင်စွမ်းရှိပြီး ဤဂြိုဟ်မှ ထွက်ခွာသွားနိုင်သော ကြယ်စင်သားရဲများမှာမူ ကြယ်တာရာ ဟင်းလင်းပြင်ဆီသို့ ပျံသန်းသွားခဲ့ကြလေပြီ။

အကြောင်းမှာ ကြယ်တာရာ ဟင်းလင်းပြင်တွင် သန္ဓေပြောင်း စွမ်းအင်များ ပိုမို ပြည့်ဝနေပြီး ကြယ်စင်သားရဲများ ရှင်သန်ရန်အတွက် ပို၍ သင့်လျော်သောကြောင့် ဖြစ်သည်။

အစွမ်းပိုင်ရှင်များပင်လျှင် နောက်ပိုင်းတွင် မျိုးရိုးဗီဇ ပြန်လည်ဖွဲ့စည်းခြင်း ၁၀၀% သို့ ရောက်ရှိသွားပါက အဆင့်တက်ရန်အတွက် ကြယ်တာရာ ဟင်းလင်းပြင်သို့ ဝင်ရောက်နိုင်ရန် နည်းလမ်း ရှာဖွေရမည် ဖြစ်သည်။

လင်ယွီရုံက လင်းယွမ်ကို ပြောပြချက်အရ ရှေးခေတ် အစွမ်းပိုင်ရှင်များက ထိုလုပ်ရပ်ကို ကောင်းကင်ဘုံသို့ တက်လှမ်းခြင်း ဟု ခေါ်ဝေါ်ခဲ့ကြသည်။

သာမန်လူများ၏ အမြင်တွင်မူ ၎င်းသည် နတ်ပြည်သို့ ဝင်ရောက်သွားခြင်းပင် ဖြစ်ပေသည်။

သို့သော် အမှန်တကယ်တွင်မူ ပိုမိုများပြားသော သန္ဓေပြောင်း စွမ်းအင်များကို စုပ်ယူရန်အတွက် ကြယ်တာရာ ဟင်းလင်းပြင်သို့ ဝင်ရောက်သွားခြင်းသာ ဖြစ်၏။

ထို့အပြင် ကြယ်စင်နတ်ဘုရား အဆင့်သို့ ရောက်ရှိသွားသော အစွမ်းပိုင်ရှင်များသည် ဂြိုဟ်ပေါ်တွင် အချိန်ကြာမြင့်စွာ မနေထိုင်သင့်ပေ။ ထိုသို့နေထိုင်ပါက ခန္ဓာကိုယ်တွင်းရှိ အစွမ်းများ ယိုစိမ့်ပျောက်ဆုံးသွားနိုင်ပေသည်။

ဂြိုဟ်ပေါ်ရှိ သန္ဓေပြောင်း စွမ်းအင်များသည် ကြယ်စင်နတ်ဘုရား အဆင့်ရှိ အစွမ်းပိုင်ရှင် တစ်ယောက်၏ ကိုယ်ပိုင် စွမ်းအင် သုံးစွဲမှုကိုပင် ဖြည့်ဆည်းပေးနိုင်စွမ်း မရှိပေ။

အချိန်ကြာမြင့်စွာ နေထိုင်ပါက ကြယ်စင်နတ်ဘုရား အဆင့်ရှိ အစွမ်းပိုင်ရှင်များ၏ အစွမ်းများပင် လျော့ကျသွားနိုင်သည့် အခြေအနေမျိုး ဖြစ်ပေါ်လာနိုင်သည်။

လင်းယွမ်က "ဘာပြဿနာတွေ ကြုံရသေးလဲ" ဟု မေးလိုက်သည်။

"လောလောဆယ်တော့ မကြုံရသေးပါဘူး"

"ဒီကျွန်းနှစ်ကျွန်းရဲ့ နှလုံးအမြူတေနဲ့ ဦးနှောက်အမြူတေကိုရော ရှာတွေ့ပြီလား"

ကျိုးဟောင်ရန်က ခေါင်းခါလျက် "မတွေ့သေးပါဘူး... မြွေခရုကျွန်းနဲ့ သားရဲကျွန်းပေါ်က သန္ဓေပြောင်း သတ္တဝါတွေက အရမ်းများလွန်းပြီး နေရာကလည်း မသေးဘူးလေ"

"ဘယ်သန္ဓေပြောင်း သတ္တဝါက နှလုံးအမြူတေနဲ့ ဦးနှောက်အမြူတေကို သန့်စင်ထားလဲဆိုတာ ရှာဖွေဖို့က နည်းနည်းတော့ ခက်ခဲတယ်... သူတို့ကိုယ်တိုင် ဝင်မတိုက်ခိုက်သရွေ့တော့ ကျွန်တော်တို့ဘက်က ဖြည်းဖြည်းချင်း လိုက်လံ သတ်ဖြတ်နေရဦးမှာပါပဲ"

လင်းယွမ်က ခေါင်းညိတ်လိုက်ပြီး "ဒါဆိုလည်း ဖြည်းဖြည်းချင်းပဲ လုပ်ကြတာပေါ့... မှတ်ထားနော် သူတို့ကို သုတေသနနဲ့ ဖွံ့ဖြိုးတိုးတက်ရေး ဌာနက ထုတ်ပေးထားတဲ့ လက်နက်တွေကို သုံးပြီး သတ်ဖြတ်ခိုင်းလိုက်"

ကျိုးဟောင်ရန် ကြောင်သွားပြီး မည်သည့်အကြောင်းကြောင့် မှန်း နားမလည်သော်လည်း ခေါင်းညိတ်ကာ နာခံလိုက်လေသည်။

လင်းယွမ်က "ပြန်ဖို့ ယာဉ်ပျံရော ပြင်ဆင်ပြီးပြီလား" ဟု မေးလိုက်၏။

"အဆင်သင့် ပြင်ဆင်ပြီးပါပြီ"

"ငါ မပြန်ဖြစ်တာတောင် လဝက်လောက် ရှိနေပြီ... အောက်မှာ ဘယ်လို အခြေအနေ ရှိနေလဲ မသိဘူး"

လင်းယွမ်က သက်ပြင်းချကာ ရေရွတ်လိုက်ပြီးနောက် ကျိုးဟောင်ရန်၏ ဦးဆောင်မှုဖြင့် လေယာဉ်ကွင်းဆီသို့ လျှောက်သွားလေသည်။

လဝက်ကျော်ခန့် မပြန်ဖြစ်သောကြောင့် လင်းယွမ်သည် ရန်မေတို့ကို အနည်းငယ် လွမ်းဆွတ်နေမိသည်။

ဤတစ်ကြိမ် မလေ့ကျင့်မီက အောက်ဘက်မှ သတင်းရောက်လာပြီး ရေခဲများ အရည်ပျော်နှုန်း ပိုမိုမြန်ဆန်လာကာ ထိုက်ယန်တောင်၏ ရေမျက်နှာပြင်မှာလည်း သိသိသာသာ မြင့်တက်လာကြောင်း သိခဲ့ရသည်။

ယခု အခြေအနေ မည်သို့ ရှိနေမည်နည်း။

ထိုစကားကို ကြားသောအခါ ကျိုးဟောင်ရန်က "ရှီဟိုင်ကျူး ပြောတာတော့ ကြားမိတယ်... ထိုက်ယန်တောင်က လူတွေ အကုန်လုံး အခု ပြောင်းရွှေ့သွားကြပြီတဲ့... ထိုက်ယန်တောင် တစ်ခုလုံး အခု ရေပေါ်မှာ နည်းနည်းပဲ ကျန်တော့ပြီး အများစုကတော့ ရေမြုပ်သွားပြီတဲ့"

လင်းယွမ် အံ့သြသွားပြီး "ဒီလောက်တောင် မြန်တာလား"

"အတိအကျတော့ ကျွန်တော်လည်း သေချာ မသိဘူး" ဟု ကျိုးဟောင်ရန်က ခေါင်းကုတ်ရင်း ဖြေလိုက်သည်။

လင်းယွမ်က ချက်ချင်းပင် "သွားမယ်... ငါ့ကို အောက်ကို ချက်ချင်း လိုက်ပို့ပေး" ဟု ပြောလိုက်လေသည်။

ဆက်ရန်...