အခန်း ၄၉

အခန်း (၄၉) မင်းက လက်ဝတ်ရတနာ ကျွမ်းကျင်သူတစ်ယောက် ဖြစ်လာလိမ့်မယ်

"ဟဲဟဲ ဇနီးတို့ရေ... အချိန်လင့်နေပြီ..."

ရေချိုးပြီးနောက် ကျောက်လင်က အော်ခေါ်လိုက်၏။

ဤညသည် ကြမ်းတမ်းမည်ကို ကျောက်လင် သိနေခဲ့သည်။

သို့သော်လည်း ဤအရာက ငါးနှစ်စာ ကျင့်ကြံမှုနှင့် ညီမျှကြောင်းကို သူ ပို၍ပင် သိထားခဲ့၏။

တစ်ညတည်းဖြင့် ငါးနှစ်စာ ကျင့်ကြံမှုအမှတ်များကို ရရှိခြင်းက မည်သည့်ကျင့်စဉ်ကို ပေါင်းထည့်သည်ဖြစ်စေ တစ်ယောက်၏ စွမ်းအားကို သေချာပေါက် တိုးတက်လာစေမည် ဖြစ်သည်။

ကျောက်ကပ်ကိုသာ ဆက်ပြီး အစွမ်းကုန် အသုံးချရတော့မည်။

တစ်ညအကြာတွင်။

ကျင့်ကြံမှု +၅

နံနက်စောစော ကျောက်လင် နိုးလာသောအခါ ယဲ့လင်အာက အိပ်ရာထနေနှင့်ပြီဖြစ်ကာ ခြံဝင်းထဲ၌ သတ္တုစပ်ထန်ဓားကို ဝှေ့ယမ်းလေ့ကျင့်နေသည်ကို တွေ့လိုက်ရ၏။

သူမ၏ ဟန်ပန်ကို ကြည့်ရခြင်းအားဖြင့် ယဲ့လင်အာ၏ စွမ်းအားက သံမဏိအရိုးနယ်ပယ်အထိ ပြန်လည်သက်သာလာပြီ ဖြစ်သည်။

ဓားဝှေ့ယမ်းလိုက်တိုင်း စူးရှသော လေခွင်းသံများ ထွက်ပေါ်လာ၏။

ကျောက်လင်က ယဲ့လင်အာ၏ ကျင့်ကြံမှုကို မနှောင့်ယှက်တော့ပေ။ သူက ခြံဝင်းထဲမှ ထွက်ကာ စာမရီလှည်းပေါ်တက်၍ ထင်းရှူးနက်ကျေးရွာမှ ထွက်ခွာလာခဲ့သည်။

"ဒီနေ့ ဝယ်ယူခွင့် ငါးကြိမ်ကို သေချာ စီစဉ်ရမယ်..."

"စနစ်အမှတ် နှစ်ထောင့်ငါးရာ့ဆယ်... ငွေတစ်ရာ့ငါးဆယ့်လေးပြားနဲ့ ကြေးပြားလေးရာ့ငါးဆယ်... အဲ့တာတွေအကုန်လုံးကို အမှတ်ပြောင်းလိုက်ရင် တစ်သိန်းငါးသောင်းခြောက်ထောင်ကိုးရာ့ခြောက်ဆယ်ရမယ်..."

"ဒီငွေတွေ အကုန်လုံးကို စနစ်အမှတ်တွေနဲ့ လဲပစ်လို့ မဖြစ်သေးဘူး... လယ်မြေနဲ့ တောင်တန်းမြေတချို့ဝယ်ဖို့ စုထားရဦးမယ်..."

"ဒါဆို ငွေတစ်ရာကို ချန်ထားပြီး ကျန်တဲ့ ငွေငါးဆယ့်လေးပြားနဲ့ ကြေးပြားလေးရာ့ငါးဆယ်ကို စနစ်အမှတ် ပြောင်းလိုက်မယ်..."

ဆုံးဖြတ်ချက် ချပြီးနောက် ကျောက်လင်က ငွေတစ်ရာကို ချက်ချင်း ထုတ်ယူကာ ငွေအိတ်ထဲ ထည့်လိုက်ပြီး ကျန်ငွေများကို စနစ်အမှတ်အဖြစ် လဲလှယ်လိုက်၏။

စနစ်အမှတ် - ၅၆၉၆၀

[ဆန်ကြမ်း တစ်ရှီ - အမှတ် ၈၀၀]

ဆယ်ရှီ ဝယ်မည်။

[အမျိုးအစား၉၅ တိုက်ခိုက်ရေးရိုင်ဖယ် - အမှတ် ၂၀၀၀၀]

တစ်လက် ဝယ်မည်။

[ရိုင်ဖယ်ကျည်ဆန် - အမှတ် ၂၀]

ကျည်တစ်ရာ ဝယ်မည်။

[လက်ဝတ်ရတနာ စွယ်စုံကျမ်း - အမှတ် ၁၀၀]

တစ်အုပ်ဝယ်မည်။

[လက်လုပ် လက်ဝတ်ရတနာ ကိရိယာအစုံ - အမှတ် ၂၀၀၀၀]

တစ်စုံဝယ်မည်။

တစ်ထိုင်တည်းဖြင့် ကျောက်လင်က မတူညီသော ပစ္စည်းငါးမျိုးကို ဝယ်ယူရန် စနစ်အမှတ် ငါးသောင်းတစ်ရာကို သုံးစွဲလိုက်သည်။

စနစ်အမှတ် - ၆၈၆၀

လှည်းပေါ်တွင် ဆန်ကြမ်းဆယ်ရှီနှင့်အတူ လက်လုပ် လက်ဝတ်ရတနာ ကိရိယာအစုံကို တင်ထားလိုက်သည်။ ကျောက်လင်၏ လက်ထဲတွင်မူ လက်ဝတ်ရတနာ စွယ်စုံကျမ်း စာအုပ်ကို ကိုင်ဆောင်ထား၏။

ထို့နောက် စာမရီက လှည်းကို ဆွဲကာ ပြန်လာခဲ့သည်။

"ခင်ပွန်း ပြန်ရောက်လာပြီ..."

ခြံဝင်းထဲတွင် ဇနီးသည် ငါးယောက်ဖြစ်သော စုယောင်၊ ရှန်ချန်းရွှယ်၊ ယဲ့လင်အာ၊ ပိုင်ဝမ်ချင်းနှင့် ထျန်ကျီလင်တို့ အားလုံးက ကိုယ့်အလုပ်နှင့်ကိုယ် အလုပ်ရှုပ်နေကြ၏။

စာမရီလှည်းနှင့် ပြန်ရောက်လာသော ကျောက်လင်ကို မြင်သောအခါ သူတို့ငါးယောက်လုံး ခြံဝင်းတံခါးဝသို့ ရောက်လာကြသည်။

"ဝိုး... ဒီလှည်းအပြည့်က ဆန်တွေချည်းပဲလား..."

အိမ်တွင်းရေးရာ ခေါင်းဆောင်တစ်ယောက်အနေဖြင့် ရှန်ချန်းရွှယ်က အိမ်အသုံးစရိတ်များကို နေ့စဉ် စဉ်းစားရပြီး အထူးသဖြင့် သိုလှောင်ထားသော ရိက္ခာပမာဏကို ဂရုစိုက်ရသည်။

ယခု မိသားစုတွင် ကျွေးမွေးရမည့် လူနှစ်ဆယ့်ရှစ်ယောက် ရှိနေသဖြင့် စားနပ်ရိက္ခာက အရေးအကြီးဆုံး ဖြစ်လာ၏။

လှည်းပေါ်ရှိ အိတ်ဆယ်အိတ်စလုံးက ရိက္ခာများဖြစ်ပြီး မိသားစုတစ်ခုလုံးအတွက် လာမည့်ရက်များအထိ လောက်ငှမည်ဖြစ်ကြောင်း ရှန်ချန်းရွှယ်က ချက်ချင်း နားလည်လိုက်သည်။

စာမရီလှည်းက တံခါးဝတွင် ရပ်တန့်သွား၏။

ဒုက္ခသည် အမျိုးသားနှစ်ဆယ်က စောစောထကာ အနီးနားရှိ သစ်ပင်အောက်တွင် ထိုင်နေကြသည်။

အပြောခံစရာမလိုဘဲ ထိုလူများက သိတတ်စွာဖြင့် ရောက်လာကြပြီး အိတ်ဆယ်အိတ်ကို အိမ်ထဲသို့ ချက်ချင်း သယ်ယူသွားကြ၏။

လက်လုပ်လက်ဝတ်ရတနာ ကိရိယာအစုံကို ကိရိယာငါးဆယ်ကျော် ပါဝင်သော သစ်သားသေတ္တာကြီးတစ်ခုထဲတွင် ထည့်ပိုးထားသည်။ ကျောက်လင်က သစ်သားသေတ္တာကို ကိုယ်တိုင် သယ်ချလာပြီးနောက် ထျန်ကျီလင်ကို ကြည့်ကာ လက်ယပ်ခေါ်လိုက်၏။

ထျန်ကျီလင်က နားမလည်ဟန်ရှိသော်လည်း နာခံစွာဖြင့် လျှောက်လာခဲ့သည်။

ထို့နောက် ကျောက်လင်က သူ့လက်ထဲရှိ လက်ဝတ်ရတနာ စွယ်စုံကျမ်းကို ထျန်ကျီလင်ထံ ကမ်းပေးလိုက်၏။

"ငါ ပြောခဲ့တယ်လေ... မင်းလုပ်နေတဲ့အရာက ငါ့အတွက် အရမ်းအရေးကြီးတယ်လို့..."

"ဒီလက်ဝတ်ရတနာ စွယ်စုံကျမ်းကို ယူပြီး သေချာလေ့လာထား... မင်းရဲ့ ရည်မှန်းချက်က မဟာချင်မင်းဆက်ရဲ့ ထိပ်တန်းလက်ဝတ်ရတနာ ကျွမ်းကျင်သူ ဖြစ်လာဖို့ပဲ..."

ကျောက်လင်က ပြုံးလျက် ပြောလိုက်သည်။

ထျန်ကျီလင်က အလွန် သိချင်သွားသဖြင့် လက်ဝတ်ရတနာ စွယ်စုံကျမ်းကို ဖွင့်ကြည့်လိုက်ရာ လည်ဆွဲများ၊ နားကပ်များ၊ လက်ကောက်များ၊ ဆွဲသီးများ၊ သရဖူများနှင့် အခြားသော ပစ္စည်းများ၏ သေသပ်လှပသော ပုံကြမ်းများကို တွေ့လိုက်ရပြီး အံ့သြလွန်းသဖြင့် ပါးစပ်ပင် မပိတ်နိုင်တော့ချေ။

ဤအရာက ထျန်ကျီလင်၏ လောကကြီးအပေါ် နားလည်ထားမှုကို ကျော်လွန်နေပြီဖြစ်သည်။

မဟာချင်မင်းဆက်တွင် ထိပ်တန်း လက်ဝတ်ရတနာ ပညာရှင်များ သဘာဝအတိုင်း ရှိသော်လည်း ထိုလူများက ကဏ္ဍတစ်ခုကိုသာ ကျွမ်းကျင်ကြခြင်းဖြစ်၏။ လက်ဝတ်ရတနာနယ်ပယ်တစ်ခုလုံးကို နှံ့နှံ့စပ်စပ် နားလည်ထားရန်မှာ သူတို့အတွက် မဖြစ်နိုင်ပေ။

ဤလက်ဝတ်ရတနာ စွယ်စုံကျမ်းက ထိပ်တန်း လက်ဝတ်ရတနာမျိုးစုံ၏ ဒီဇိုင်းပုံကြမ်းများကို ရှင်းလင်းစွာ ဖော်ပြထားပြီး ထျန်ကျီလင်၏ စိတ်ကူးယဉ်နိုင်စွမ်းကို အပြည့်အဝ ဖွင့်လှစ်ပေးလိုက်သည်။ ထျန်ကျီလင်၏ ကိုယ်ပိုင်ပန်းချီဆွဲစွမ်းရည်ဖြင့်ဆိုလျှင် မကြာမီ သူမက ဤလက်ဝတ်ရတနာ ဒီဇိုင်းပညာရပ်များကို ကျွမ်းကျင်လာနိုင်မည် ဖြစ်သည်။

ကျောက်လင်၏ အစီအစဉ်မှာ ထျန်ကျီလင်ကို လက်ဝတ်ရတနာ စွယ်စုံကျမ်းထဲမှ ထိပ်တန်း လက်ဝတ်ရတနာ အချို့ကို အသုံးပြုစေပြီး မဟာချင်မင်းဆက်တွင် အကျော်ကြားဆုံး လက်ဝတ်ရတနာ ကျွမ်းကျင်သူအဖြစ် ဖြစ်လာစေရန် ဖြစ်၏။

နာမည်ကျော်ကြားလာသည်နှင့်အမျှ ထျန်ကျီလင်က မည်သည့် လက်ဝတ်ရတနာကိုမဆို မိုးထိအောင်မြင့်သော ဈေးနှုန်းဖြင့် အလွယ်တကူ ရောင်းချနိုင်ပေလိမ့်မည်။

ထိုနည်းဖြင့် ကျောက်လင်က ထျန်ကျီလင်၏ နာမည်ကျော်ကြားမှုကို အသုံးချကာ လက်ဝတ်ရတနာ လုပ်ငန်းထဲသို့ ထိုးဖောက်ဝင်ရောက်ပြီး ကြီးမားသော ကြွယ်ဝချမ်းသာမှုကို ဖန်တီးနိုင်မည် ဖြစ်သည်။

"ခင်ပွန်း... ဒီစာအုပ်က တကယ့်ကို အံ့သြစရာပဲ..."

"ကျွန်မ နားလည်ပါပြီ... ခင်ပွန်းက ကျွန်မကို လက်ဝတ်ရတနာ ကျွမ်းကျင်သူတစ်ယောက် ဖြစ်လာစေပြီးတော့ လက်ဝတ်ရတနာတွေကနေတဆင့် ငွေရှာစေချင်တာပေါ့..."

စာမျက်နှာ တစ်ထောင်နီးပါးရှိသော လက်ဝတ်ရတနာ စွယ်စုံကျမ်းကို အမြန်လှန်လှောကြည့်ပြီးနောက် ထျန်ကျီလင်က ကျောက်လင်၏ ရည်ရွယ်ချက်များကို နားလည်သွားကာ သူမ၏ အနာဂတ် လေ့လာရမည့်နယ်ပယ်ကို ရှာတွေ့သွားသဖြင့် အလွန် ဝမ်းသာသွားခဲ့သည်။

"မင်းက အရမ်းထက်မြက်တာပဲ..."

"လာမယ့် ရက်အနည်းငယ်အတွင်းမှာ မင်း ဒီလက်ဝတ်ရတနာ စွယ်စုံကျမ်းကို သေချာ ဂရုတစိုက် လေ့လာသင့်တယ်... မင်းက လက်ဝတ်ရတနာ ဒီဇိုင်းပညာရပ် အားလုံးကို ကျွမ်းကျင်လာနိုင်မယ်လို့ ငါ မျှော်လင့်တယ်..."

"ဒီလက်လုပ် လက်ဝတ်ရတနာ ကိရိယာအစုံကို အိမ်ထဲယူသွားပြီးတော့ ကိရိယာတစ်ခုချင်းစီကို ရင်းနှီးကျွမ်းဝင်လာတဲ့အထိ လေ့လာထား..."

"အခုကစပြီး လက်ဝတ်ရတနာ သိုလှောင်ရုံ ဆောက်ဖို့ နေရာတစ်ခု ငါ ရှာမယ်... နေ့တိုင်း လှပတဲ့ လက်ဝတ်ရတနာတွေ ဖန်တီးဖို့နဲ့ ပြီးရင် လေလံတင်ရောင်းချဖို့ မင်းက လက်ဝတ်ရတနာ ဒီဇိုင်း သင်တန်းသားတချို့ကိုလည်း ခေါ်ယူသင့်တယ်…”

ကျောက်လင်က ပြုံးလျက် ပြောလိုက်၏။

ဤစကားကို ကြားသောအခါ ထျန်ကျီလင်၏ မျက်လုံးများက ပို၍ တောက်ပသွားပြီး သူမ၏ တောက်ပကာ မျှော်လင့်ချက်ရှိသော အနာဂတ်ကို ကြိုတင် မြင်ယောင်လာနိုင်ခဲ့သည်။

"ဟုတ်ကဲ့ပါ ခင်ပွန်း... ခင်ပွန်းရဲ့ မျှော်လင့်ချက်တွေကို ကျွန်မ သေချာပေါက် အကောင်အထည် ဖော်ပြပါ့မယ်..."

ထျန်ကျီလင်က ကတိတစ်ခုကို အမြန် ပေးလိုက်၏။

စုယောင်၊ ရှန်ချန်းရွှယ်၊ ယဲ့လင်အာနှင့် ပိုင်ဝမ်ချင်းတို့ အားလုံးက ထျန်ကျီလင်ကို မနာလိုသော မျက်ဝန်းများဖြင့် ကြည့်လိုက်ကြသည်။

ထိုအခိုက်တွင် ကျောက်လင်က ဒုက္ခသည် အမျိုးသားနှစ်ဆယ် ဆန်ကြမ်းများကို အိမ်ထဲသို့ ပြန်လည်သယ်ဆောင်နေသည်ကို မြင်လိုက်ရပြီး အမိန့်ပေးလိုက်၏။

"ဒီနေ့ မင်းတို့ မနေ့က ခုတ်ထားတဲ့ သစ်တွေ အားလုံးကို ထင်းရှူးနက်တောင်ဆီ ပြောင်းရွှေ့ရမယ်... အဲ့ဒီမှာ ငါ့သူငယ်ချင်းက လိုဏ်ဂူကြီးတစ်ခု တူးထားပြီးပြီ..."

"လိုဏ်ဂူက တောင်တစ်ခုလုံးကို ဖြတ်ဖောက်ထားတာ... လိုဏ်ဂူရဲ့ အစွန်းနှစ်ဖက်စလုံးမှာ စင်မြင့်ကြီးတစ်ခုစီ ရှိတယ်... မင်းတို့က ဒီသစ်လုံးတွေကို သုံးပြီး နားနေဆောင်နှစ်ခု ဆောက်လို့ရတယ်..."

"ဒီအရိပ်ရတဲ့ နေရာကျယ်ကြီး နှစ်ခုက အခုကစပြီး လူတိုင်း ဟင်းချက်စားသောက်ရမယ့် နေရာတွေ ဖြစ်လာလိမ့်မယ်..."

ဤစကားကို ကြားသောအခါ ဒုက္ခသည် အမျိုးသားနှစ်ဆယ်မှာ အံ့သြသွားကြ၏။

ဇနီးသည် ငါးယောက်ပင်လျှင် မှင်တက်သွားကြသည်။

သူ့သူငယ်ချင်းက တောင်ကို ဖြတ်ပြီး လိုဏ်ဂူ ဖောက်ထားတယ်တဲ့လား။

ဤအချိန်တွင် ဇနီးသည် ငါးယောက်စလုံး၏ ရင်ထဲ၌ ခန့်မှန်းချက်တစ်ခု ရှိနေကြသည်မှာ ကျောက်လင်၏ နောက်ကွယ်တွင် အလွန် စွမ်းအားကြီးမားသော ကျင့်ကြံသူတစ်ယောက် သေချာပေါက် ရှိနေရမည်ဟူ၍ပင်။

စွမ်းအားကြီးမားသော ကျင့်ကြံသူများသာလျှင် ၎င်းတို့၏ လက်ထဲရှိ လက်နက်များဖြင့် တောင်များကို ဖြိုခွဲကာ မြေကြီးကို ခွဲခြမ်းနိုင်စွမ်း ရှိကြသည်။

အထူးသဖြင့် သွေးဆီးနှင်းပန်း လုပ်ကြံသတ်ဖြတ်ရေး အဖွဲ့အစည်းမှ လာသော ယဲ့လင်အာက ဤလောက၏ ထိပ်ဆုံးတွင် ရပ်တည်နေသော စွမ်းအားကြီးမားသည့် တည်ရှိမှုများကို မျက်မြင်ကိုယ်တွေ့ ကြုံဖူးခဲ့သည်။ ထိုသို့သော တည်ရှိမှုများက တောင်တစ်တောင်ကို ပြန့်ပြူးသွားစေရန် သူတို့၏ ဓားကို ဝှေ့ယမ်းလိုက်ရုံသာ လိုအပ်၏။

ယဲ့လင်အာက ခဏတာ စဉ်းစားခန်း ဝင်လိုက်ပြီး ကျောက်လင်က ထိုသို့သော စွမ်းအားကြီးမားသည့် တည်ရှိမှုမျိုးကို သိကျွမ်းနေနိုင်ကြောင်း ကောက်ချက်ချလိုက်သည်။

သေချာပေါက် ယဲ့လင်အာက တိုက်ရိုက် မေးမြန်းမည် မဟုတ်ပေ။

ကျောက်လင်က ထိုသို့သော စွမ်းအားကြီးသည့် တည်ရှိမှုကို ထုတ်ဖော်မပြောချင်သဖြင့် ၎င်း၏ နောက်ကွယ်တွင် အကြောင်းပြချက်တစ်ခု သေချာပေါက် ရှိနေမည်ဖြစ်ကာ ယဲ့လင်အာကလည်း သူမကိုယ်သူမ လူရွှင်တော်တစ်ယောက်လို အဖြစ်မခံချင်ချေ။

ဤကိစ္စများကို စီစဉ်ပြီးနောက် ကျောက်လင်က ကွင်းတပ်ဓားနှင့် ပေါင်းစပ်လေးကို ကောက်ကိုင်လိုက်ကာ တောင်နောက်ဘက်သို့ သွားရန် ပြင်ဆင်လိုက်၏။

ယောင်းဟွိုင်တောက်၊ တျန်ဆုန့်၊ လီချန်၊ ဖန်ယွင်ရှန်၊ ကျားကျီချင်းနှင့် ရှုံ့တကျွမ်းတို့က တောင်နောက်ဘက်ရှိ တောင်ကြားလမ်းတွင် စောင့်ဆိုင်းနေနှင့်ပြီ ဖြစ်သည်။