အခန်း (၆၀၇-၆၀၉)

အခန်း (၆၀၇) - လေလံပွဲ (၂)

ဤလေလံပွဲက အသူရာတို့၏ စစ်တလင်းနှင့်ပင် ပို၍ ဆင်တူနေသည်ဟု စုယွီ ရင်တွင်း၌ ကြိတ်၍ တွေးတောနေမိ၏။ သူသည် မြို့တော်ရှိ တည်းခိုခန်းကြီးတစ်ခု၌ တည်းခိုနေစဉ်အတွင်း၌ပင် အလျှော့မပေးဘဲ ဝင်းအတွင်း၌ အဆင့်ဆင့်သော အခင်းအကျင်းများကို စီရင်ထားလိုက်သည်။

မျက်စိတစ်မှိတ်အတွင်းမှာပင် လဝက်ခန့် အချိန်ကုန်လွန်သွားခဲ့ချေပြီ။

စုယွီသည် လူအုပ်ကြားထဲတွင် ရောနှောလျက် စီးပွားရေးမျှော်စင်အတွင်းရှိ အခန်းတစ်ခုသို့ ဝင်ရောက်လာခဲ့၏။ ထိုစဉ် ဝမ်ပေါင် ကုန်သွယ်ရေးအသင်းမှ မူလဝိညာဉ်အဆင့် အရှင်သခင် အချို့လည်း ရောက်ရှိလာကြရာ ၎င်းတို့၏ အခန်းများသည် စုယွီနှင့် အထပ်တစ်ခုတည်းမှာပင် တည်ရှိနေသည်။

ထိုပုဂ္ဂိုလ်တို့သည် အခန်းအတွင်းသို့ ဝင်ရောက်လာပြီးနောက် ကျင့်ကြံသူများဖြင့် စည်ကားနေသော လေလံပွဲကြမ်းပြင်နှင့် လေလံစင်မြင့်ကို စီးမိုးကြည့်လိုက်ကြ၏။

“ယွင်ရှောင် ဆေးနန်းတော်ရဲ့ နန်းတော်သခင် ရောက်လာမလား ...” ဟု မူလဝိညာဉ်အဆင့်နှောင်းပိုင်း အရှင်သခင် တစ်ပါးက တိုးညှင်းစွာ မေးမြန်းလိုက်သည်။

“ဘယ်သူသိမှာလဲ ... သူ လာသည် ဖြစ်စေ မလာသည် ဖြစ်စေ ... ငါတို့က ဟင်းလင်းပြင် သတ္တုရိုင်း လေလံပွဲကိုသာ မျက်ခြေမပြတ် စောင့်ကြည့်ဖို့ လိုတယ် ... အဲဒီနောက်မှာ ဘယ်သူတွေ ပါဝင်ခဲ့သလဲဆိုတာ စုံစမ်းဖို့ကတော့ လွယ်ပါတယ် ...”

“ယွင်ရှောင် ဆေးနန်းတော်ရဲ့ နောက်ကွယ်က အင်အားစုကိုသာ စုံစမ်းတွေ့ရှိခဲ့မယ်ဆိုရင်တော့ အတိုင်းထက်အလွန်ပဲ ...”

“တတိယအဆင့် ထိပ်တန်းအရည်အသွေး ဆေးလုံးတွေပဲလေ ...” မူလဝိညာဉ်အဆင့် အထွတ်အထိပ်သို့ ရောက်ရှိနေသော အရှင်သခင် တစ်ပါးက အံ့သြတသစွာဖြင့် ရေရွတ်လိုက်၏။

“တိလင် ကုန်သွယ်ရေးအသင်း အပါအဝင် ကုန်သွယ်ရေးအိမ်တော် လေးခုနဲ့ ယွင်ရှောင် ဆေးနန်းတော်ရဲ့ ကိုယ်ပိုင် ရောင်းအားတွေကိုပါ ထည့်တွက်မယ်ဆိုရင် ... သူတို့ဟာ တစ်နှစ်ကို အနည်းဆုံး တတိယအဆင့် ထိပ်တန်းဆေးလုံး ခြောက်ထောင်လောက်ကို ဖော်စပ်နေကြတာပဲ …”

“အကယ်လို့ ငါတို့ ဝမ်ပေါင် ကုန်သွယ်ရေးအသင်းကသာ ဒီလောက်များပြားတဲ့ ထိပ်တန်းဆေးလုံး အရင်းအမြစ်တွေကို ထိန်းချုပ်နိုင်ခဲ့မယ်ဆိုရင် ... မြေကမ္ဘာ အင်မော်တယ် နယ်မြေရဲ့ ဆေးလုံးထောက်ပံ့မှုကိုပါ လက်ဝါးကြီးအုပ်နိုင်လိမ့်မယ် ... အဲဒီအခါကျရင် ငါတို့ဟာ မြေကမ္ဘာ အင်မော်တယ် နယ်မြေကိုတောင် မှီခိုအားထားစရာ မလိုတော့ဘူး …”

သူတို့သည် လောဘဇောများ ပြည့်နှက်နေသော အသံများဖြင့် တိုးညှင်းစွာ ဆွေးနွေးနေကြသည်။

စုယွီသည် သူတို့အား သတိပေးသည့်အနေဖြင့် သူ၏ အဆင့်မြင့် စတုတ္ထအဆင့် အခင်းအကျင်းများကို ပြသခဲ့ဖူးသော်လည်း ထိုအရာက ထိပ်တန်းအင်အားစုများကို တားဆီးရန် မလုံလောက်ခဲ့ချေ။ အကယ်၍ ရရှိမည့် အကျိုးအမြတ်က ဝမ်ပေါင် ကုန်သွယ်ရေးအသင်းအပေါ် ကြောက်ရွံ့မှုကို ကျော်လွန်သွားခဲ့မည်ဆိုလျှင် ထိုကုမ္ပဏီသည် အနည်းငယ်မျှသော စွန့်စားမှုကို ပြုလုပ်ရန် ဝန်လေးနေမည် မဟုတ်ပေ။

ကျင့်ကြံသူ အမြောက်အမြားသည် လေလံပွဲကျင်းပရာ နေရာသို့ တဖွဲဖွဲ ဝင်ရောက်လာကြသည်။

သူ၏ အခန်းငယ်အတွင်းမှနေ၍ စုယွီသည် ဖန်ရှောင်၏ အငွေ့အသက်ကို အာရုံခံမိလိုက်သဖြင့် ခေတ္တမျှ အံ့သြသွားရ၏။ သို့သော် လော့ချန်းယွီနှင့် တာအိုဆရာမ ချင်းချွမ်တို့မှာမူ ရောက်ရှိမလာခဲ့ကြချေ။ သူမတို့ နှစ်ဦးသည် မူလဝိညာဉ်အဆင့်သို့ တက်လှမ်းရန် ပြင်ဆင်ရန်အတွက် ဂိုဏ်းတော်သို့ ပြန်သွားကြပြီ ဖြစ်၏။

ထို အဆို့အတားကြောင့်ပင် ယခင်က စုယွီထက် ကျင့်ကြံခြင်းအဆင့် မြင့်မားခဲ့သော သူမတို့နှစ်ဦးမှာ ယခုအခါတွင်မူ စုယွီ၏ နောက်သို့ ရောက်ရှိသွားခဲ့ရချေပြီ။

ဖန်ရှောင်သည် ရွှေအမြုတေအဆင့် ကျင့်ကြံသူ မောင်နှံတစ်စုံနှင့်အတူ ရောက်ရှိလာပြီး စုယွီ၏ ဘေးခန်းတွင် နေရာယူလိုက်ကြသည်။ ထိုအခန်းမှာ အခင်းအကျင်းများဖြင့် အကာအကွယ် ပြုလုပ်ထားသော်လည်း စုယွီသည် တစ်စုံတစ်ခုကို စိုးရိမ်မိသဖြင့် သူ၏ နတ်ဘုရား စွမ်းရည် ဖြစ်သော ရွှေပုစဉ်းရင်ကွဲ မျက်လုံးကို အသုံးပြု၍ ဘေးခန်းသို့ ချောင်းကြည့်လိုက်သည်။

ဖန်ရှောင်၏ အင်အားမှာ အလွန်လျင်မြန်စွာ တိုးတက်လာခဲ့ချေပြီ။ ယခင်က သူမသည် ရွှေအမြုတေအဆင့် (၇) မှာသာ ရှိခဲ့သော်လည်း ယခုအခါတွင်မူ အဆင့် (၈) သို့ ရောက်ရှိနေခဲ့ပြီး အထွတ်အထိပ်အဆင့်သို့ ရောက်ရန် လက်တစ်ကမ်းသာ လိုတော့၏။

သူမ၏ အခြေခံနှင့် ပတ်သက်၍လည်း စုယွီသည် သူ၏ ရွှေပုစဉ်းရင်ကွဲ မျက်လုံးမှတစ်ဆင့် သူ၏ တူမငယ် ဖန်ရှောင်သည် အလှည့် ခြောက်ကြိမ် ရွှေအမြုတေကို စုစည်းထားနိုင်ကြောင်း ရှင်းလင်းစွာ မြင်တွေ့လိုက်ရသည်။

“ငါ့ရဲ့ ဘိုးဘေးကြီး ထျန်းယွီဆီက အထောက်အပံ့ ရဖို့ဆိုရင် ဦးလေးငယ် ရှောင်ယွီက အဓိကပဲ ...”

ဖန်ရှောင်သည် အခင်းအကျင်း အတားအဆီးကြားမှနေ၍ လေလံပွဲကျင်းပရာ နေရာကို ငုံ့ကြည့်ရင်း ပြောလိုက်၏။

“အကယ်လို့ ငါသာ ဘိုးဘေးကြီး ထျန်းယွီရဲ့ ထောက်ခံမှုကို ရခဲ့မယ်ဆိုရင် ... မြေကမ္ဘာ အင်မော်တယ် နယ်မြေမှာ ငါ့ရဲ့ ခြေကုပ်က အခိုင်အမာ ဖြစ်သွားလိမ့်မယ် …”

“အဲဒီအခါကျရင် ငါ့မိသားစုရဲ့ ဩဇာအာဏာကို အသုံးပြုပြီး တိလင် အင်မော်တယ် မြို့တော်ရဲ့ အထောက်အပံ့ကို ရယူနိုင်လိမ့်မယ် ... တခြားသော အင်မော်တယ် မြို့တော်တွေနဲ့ပါ ဆက်ဆံရေး တည်ဆောက်နိုင်ဖို့ အခွင့်အရေး ရလာနိုင်ပြီး ... တခြားသော တာအိုသားတော်တွေကို ကျော်ဖြတ်လို့ စံအိမ်တော် သခင်နေရာအတွက် ယှဉ်ပြိုင်နိုင်လိမ့်မယ် ...”

ဖန်ရှောင်၏ ဘေးရှိ မောင်နှံမှာ သူမ၏ စကားကို ကြားသောအခါ မျက်မှောင်ကြုတ်သွားကြသည်။

အမျိုးသားဖြစ်သူက သက်ပြင်းချရင်း “ညီမငယ် ... တာအိုသားတော်တွေမှာ ဝိညာဉ်ခွဲထွက်အဆင့် ဘိုးဘေးတွေရဲ့ နောက်ခံ ရှိနေတယ်လေ ...” ဟု ပြောလိုက်၏။

“ငါ့ကို ယုံကြည်စမ်းပါ ...” ဖန်ရှောင်က ခိုင်မာစွာ တုံ့ပြန်လိုက်သည်။ “ငါတို့သာ ဒါကို ကောင်းကောင်း ကိုင်တွယ်နိုင်မယ်ဆိုရင် ... ပြီးတော့ အကြီးအကဲတွေ ကိုယ်တိုင် ဝင်မစွက်ဘူးဆိုရင် ... စံအိမ်တော် သခင်နေရာကို ဘယ်သူ ရရှိသွားမလဲဆိုတာ မရေရာသေးပါဘူး ...”

ဘေးခန်းတွင် ထိုင်နေသော စုယွီသည် အတွေးနက်သွား၏။

ဖန်ရှောင်နှင့် အခြားသူများ၏ စကားကို အကြားအာရုံဖြင့် မကြားရသော်လည်း သူမတို့၏ နှုတ်ခမ်းလှုပ်ရှားမှုများကို ကြည့်ခြင်းဖြင့် ဘာတွေပြောနေကြသည်ကို သူ သိရှိနိုင်သည်။

'ငါ့ရဲ့ တူမငယ်က ရွှေအမြုတေအဆင့်မှာပဲ ရှိသေးတာတောင် စံအိမ်တော် သခင်နေရာကို မျှော်မှန်းနေပြီပဲ ...ရည်မှန်းချက် အတော်ကြီးတာပဲ ...' စုယွီသည် မျက်မှောင်အနည်းငယ် ကြုတ်ရင်း တွေးတောလိုက်မိ၏။

သို့သော်လည်း သူ လေ့လာမိသလောက်ဆိုလျှင် ဖန်ရှောင်၏ အခြေခံမှာ အမှန်တကယ်ပင် နက်ရှိုင်းလှပြီး ပိုင်ဆိုင်ထားသော အရင်းအမြစ်များမှာလည်း များပြားလှ၏။

အလှည့် ခြောက်ကြိမ် ရွှေအမြုတေ တစ်ခုနှင့်ဆိုပါက သူမသာ အသက်ရှင်ကျန်ရစ်မည်ဆိုလျှင် ဝိညာဉ်ခွဲထွက်အဆင့်သို့ ရောက်ရှိရန် အခွင့်အလမ်း အတော်ကြီးမားလှ၏။

ထိုမှတစ်ဆင့် ပိုမို မြင့်မားသော အဆင့်များသို့ပင် တက်လှမ်းနိုင်သည့် အလားအလာ ရှိနေသေး၏။

ဖန်ရှောင် ပြောဆိုခဲ့သော အခြား တာအိုသားတော် သုံးဦးနှင့် ပတ်သက်၍မူ စုယွီသည် ၎င်းတို့နှင့် မဆုံတွေ့ခဲ့ဖူးချေ။

သူမတို့သည် မြေကမ္ဘာ အင်မော်တယ် နယ်မြေအတွင်း၌ မရှိကြဘဲ တောရိုင်းနယ်မြေထဲတွင် ရှိနေကြမည်လော။

သူ ခန့်မှန်းလိုက်မိသည်။

မြေကမ္ဘာ အင်မော်တယ် နယ်မြေ၏ အင်မော်တယ် စစ်တပ် အစိတ်အပိုင်း အချို့သည် တောရိုင်းနယ်မြေအတွင်း၌ ရှိနေကြ၏။

တောရိုင်းနယ်မြေ ဆိုသည်မှာ တာ့ချန် ကျင့်ကြံခြင်း ကမ္ဘာ၏ အနောက်ဘက်ရှိ လူသူမနီးသော နယ်မြေ တစ်ခုကို ရည်ညွှန်းခြင်း ဖြစ်သည်။ ထိုနယ်မြေသည် မိစ္ဆာမျိုးနွယ်စုများနှင့် မှော်သားရဲများဖြင့် ပြည့်နှက်နေပြီး အခြားသော ကျင့်ကြံခြင်း လောကများနှင့်လည်း နယ်နိမိတ်ချင်း ထိစပ်နေ၏။

တောရိုင်းနယ်မြေ အတွင်း၌ မိစ္ဆာဂိုဏ်းနှင့် ဗုဒ္ဓဘာသာဂိုဏ်းများမှ ကျင့်ကြံသူများကိုလည်း ဆုံတွေ့ရနိုင်သည်။

၎င်းတို့၏ နယ်မြေများတွင်မူ မိစ္ဆာနှင့် ဗုဒ္ဓဘာသာ ကျင့်စဉ်များက ထုံးစံတစ်ခုကဲ့သို့ ဖြစ်နေသော်လည်း တာ့ချန် ကျင့်ကြံခြင်း လောကတွင်မူ ရိုးရာနည်းလမ်းအတိုင်း ကျင့်ကြံအားထုတ်ခြင်းကိုသာ တရားဝင် အသိအမှတ်ပြုထားကြ၏။

ယခုအချိန်အထိ စုယွီသည် အခြားသော နယ်မြေများမှ ကျင့်ကြံသူများကို မတွေ့ဖူးသေးချေ။ မဟုတ်သေး၊ သူ တစ်ဦးကိုတော့ တွေ့ဖူးခဲ့သည်။ ထျန်းယွီ တာအိုပညာရှင်မှာ အခြားနယ်မြေတစ်ခုမှ ဖြစ်နိုင်၏။

သို့သော် ဝမ်းနည်းစရာ ကောင်းသည်မှာ စုယွီသည် တောရိုင်းနယ်မြေနှင့် ပတ်သက်၍ များစွာ မသိရှိထားဘဲ သိုင်းကျမ်းဆောင်အတွင်း၌လည်း ၎င်းနှင့် ပတ်သက်သော စာအုပ်များစွာ မရှိခြင်းပါပင်။

လေလံပွဲကို တရားဝင် စတင်လိုက်ပြီ ဖြစ်၏။

ပထမဆုံး လေလံတင်ရောင်းချသော ပစ္စည်းမှာ မိစ္ဆာမျိုးနွယ်စုမှ စတုတ္ထအဆင့် အဆင့်နိမ့် လူ အသွင်ပြောင်း မြေခွေးမိစ္ဆာမလေး တစ်ကောင်ပင်။

မည်သူက ဖမ်းဆီးယဉ်ပါးအောင် ပြုလုပ်ခဲ့သည်ကို မသိရသော်လည်း ကျန်းယွမ် ကုန်သွယ်ရေးအသင်း သို့မဟုတ် အခြားတစ်ဦးဦး ဖြစ်နိုင်၏။ အစပျိုး လေလံဈေးမှာ အလယ်အလတ်အဆင့် ဝိညာဉ်ကျောက်တုံး တစ်သန်းအထိ မြင့်မားနေပြီး ဈေးနှုန်းတိုးမြှင့်မှုတစ်ခုစီအတွက် ငါးသောင်းထက် မနည်းစေရဟု သတ်မှတ်ထားသည်။

စင်မြင့်ပေါ်ရှိ နုပျိုချောမောကာ ဆွဲဆောင်မှုရှိသော မြေခွေးမိစ္ဆာမလေးကို ကြည့်ရင်း ပရိသတ်ကြားရှိ ကျင့်ကြံသူများမှာ ဝုန်းဒိုင်းကြဲကာ ဆူညံသွားကြတော့၏။

ရွှေအမြုတေအဆင့် ကျင့်ကြံသူ အမြောက်အမြားမှာ ထိုမြေခွေးမိစ္ဆာမလေး၏ ဆွဲဆောင်မှုအောက်တွင် သူတို့၏ အသိစိတ်များပင် လွတ်ထွက်လုနီးပါး ဖြစ်နေကြပြီး မျက်လုံးများမှာလည်း မျက်ခွံများထဲမှ ပြူးထွက်နေကြသည်။

သို့သော်လည်း အလယ်အလတ်အဆင့် ဝိညာဉ်ကျောက်တုံး တစ်သန်းဟူသော အစပျိုးဈေးမှာ သာမန်လူတစ်ယောက် တတ်နိုင်သည့် အရာမျိုး မဟုတ်ပါပေ။

အတန်ကြာပြီးနောက် အခန်းတစ်ခုအတွင်းရှိ ကျင့်ကြံသူ တစ်ဦးက နောက်ဆုံးတွင် ဈေးစတင်ခေါ်လိုက်သည်။

အဆုံးသတ်တွင်မူ ထိုမြေခွေးမိစ္ဆာမလေးကို အလယ်အလတ်အဆင့် ဝိညာဉ်ကျောက်တုံး နှစ်သန်း ခြောက်သိန်း ငါးသောင်းဟူသော မြင့်မားသော ဈေးနှုန်းဖြင့် လေလံတင် ရောင်းချလိုက်ရသည်။ ယင်းမှာ အဆင့်နိမ့် မှော်ရတနာ တစ်ခု၏ တန်ဖိုး ထက်ဝက်နီးပါးနှင့် ညီမျှနေ၏။

ဆွဲဆောင်မှုရှိသော မြေခွေးမိစ္ဆာမလေးကို ကြည့်ရင်း စုယွီသည် လူတစ်ပိုင်း မိစ္ဆာတစ်ပိုင်းများ အဘယ်ကြောင့် မွေးဖွားလာကြသနည်းဆိုသည်ကို သဘောပေါက်သွားခဲ့ချေပြီ။ အခြားသော မျိုးနွယ်စုများ၏ ဆွဲဆောင်မှုမှာ အမှန်တကယ်ပင် ထူးခြားလှပါ၏။

လေလံပွဲက ဆက်လက် ကျင်းပနေခဲ့ပြီး စုယွီကတော့ သူ နှစ်သက်သော ကုန်ကြမ်းပစ္စည်းများကိုသာ ဈေးခေါ်သည်။ သူသည် တတိယအဆင့် ပစ္စည်းများကို အာရုံမစိုက်တော့ဘဲ ယခုအခါတွင်မူ စတုတ္ထအဆင့် အဆင့်နိမ့်နှင့် အလယ်အလတ်တန်းစား ကုန်ကြမ်းပစ္စည်းများကိုသာ စုဆောင်းလိုတော့၏။

ရက်အနည်းငယ် ကုန်လွန်သွားပြီးနောက်..

လေလံပွဲမှာ တစ်ဝက်ခန့်သို့ ရောက်ရှိလာခဲ့ပြီ ဖြစ်ရာ လက်မအရွယ်ခန့်ရှိသော ကြေးဝါ အပိုင်းအစလေးတစ်ခုကို လေလံစင်မြင့်ပေါ်သို့ တင်လိုက်သည်။

“ဒါကတော့ အမည်မသိ မှော်ရတနာ အပိုင်းအစလေး တစ်ခုပါ ... အဆင့်နိမ့် မှော်ရတနာ တစ်ခုရဲ့ အသွားကတောင် ဒီအပေါ်မှာ အမှတ်အသား မကျန်ရစ်စေနိုင်ပါဘူး ...”

လေလံဆရာက သူ၏လက်ထဲရှိ အပိုင်းအစကို မိတ်ဆက်ပေးလိုက်၏။

“လောလောဆယ်မှာတော့ ဒီအပိုင်းအစကို ပိုင်ရှင်အဖြစ် သတ်မှတ်နိုင်သေးပြီး လျှို့ဝှက်လက်နက်တစ်ခုအနေနဲ့ အသုံးပြုနိုင်သလို သူ့ရဲ့ အင်အားကလည်း မသေးလှပါဘူး ...”

“အစပျိုးဈေးကတော့ အလယ်အလတ်အဆင့် ဝိညာဉ်ကျောက်တုံး တစ်သိန်းပါ ... တစ်ခါတိုးရင် တစ်သောင်းထက် မနည်းရပါဘူး ...”

လေလံပွဲကျင်းပရာ နေရာတစ်ခုလုံး ရုတ်တရက် တိတ်ဆိတ်သွားခဲ့၏။

မှော်ရတနာ အပိုင်းအစလေးတစ်ခုကို ဝိညာဉ်ကျောက်တုံး တစ်သိန်းပေးရမည်ဆိုခြင်းမှာ အဓိပ္ပာယ်မရှိသော ကိစ္စတစ်ခုပင်။

သို့သော်လည်း အခန်းအတွင်းရှိ စုယွီမှာမူ ထိုကြေးဝါ အပိုင်းအစလေးကို ကြည့်ရင်း အလွန်တရာ ဝမ်းသာအားရ ဖြစ်နေတော့၏။

“ဒါကတော့ မမျှော်လင့်ဘဲ ရရှိလိုက်တဲ့ အရာပဲ ...”

မည်သူမျှ ဈေးမခေါ်ဘဲ ကျော်သွားတော့မည့် အခိုက်အတန့်တွင် စုယွီက ဝိညာဉ်ကျောက်တုံး တစ်သိန်းဖြင့် ဈေးခေါ်လိုက်ပြီး ထိုအပိုင်းအစကို ရရှိသွားတော့သည်။

မကြာမီမှာပင် တစ်စုံတစ်ယောက်က ထိုအပိုင်းအစကို သူ့ထံသို့ လာရောက် ပေးအပ်လာသည်။ သူက ဝိညာဉ်ကျောက်တုံးများကို ပေးချေလိုက်ပြီး အပိုင်းအစကို ရယူလိုက်၏။

ဘေးခန်းရှိ ဖန်ရှောင်နှင့် အခြားနှစ်ဦးမှာ ထူးဆန်းသော အကြည့်များဖြင့် ကြည့်နေကြ၏။

အထူးသဖြင့် ဖန်ရှောင်မှာ ပို၍ အံ့သြနေမိသည်။ ထိုအပိုင်းအစကို သူမက ကောင်းကင်မိစ္ဆာ သန့်စင်တောအုပ်ကြီးအတွင်း၌ တွေ့ရှိခဲ့ခြင်း ဖြစ်ပြီး လေလံပွဲသို့ အမှတ်မထင် ယူလာခဲ့ခြင်း ဖြစ်သည်။

ဘေးခန်းမှလူက ဤပစ္စည်းကို ဈေးခေါ်၍ ရယူသွားလိမ့်မည်ဟု သူမ လုံးဝ မထင်မှတ်ထားခဲ့ချေ။

'ဒီအပိုင်းအစက ဘယ်မှော်ရတနာကနေ လာတယ်ဆိုတာကို သူ သိနေတာများလား ...'

ဖန်ရှောင် သူမဘာသာ တွေးတောလိုက်မိသည်။

ထိုစဉ်မှာပင် စုယွီသည် ထိုအပိုင်းအစကို သူ၏ အစိမ်းရောင်သစ်သား လက်စွပ်အတွင်းရှိ ဟင်းလင်းပြင်ထဲသို့ ထည့်ထားလိုက်ပြီး ချီသန့်စင်အိုးအတွင်းသို့ ပေါင်းစပ်ရန်အတွက် မလောသေးချေ။

သို့သော် သူသည် များစွာ မျှော်လင့်ချက် ရှိနေ၏။

'အခု ချီသန့်စင်အိုးက စတုတ္ထအဆင့် အလယ်အလတ်တန်းစား ဝိညာဉ်အရည်တွေကို စုစည်းပေးနိုင်နေပြီပဲ ... အကယ်လို့ ဒီအပိုင်းအစနဲ့သာ ပေါင်းစပ်လိုက်မယ်ဆိုရင် စတုတ္ထအဆင့် ထိပ်တန်း ဝိညာဉ်အရည်တွေ၊ ဒါမှမဟုတ် ပဉ္စမအဆင့် ဝိညာဉ်အရည်တွေကိုတောင် စုစည်းပေးနိုင်မလားပဲ …’

လေလံပွဲက ဆက်လက် ကျင်းပနေပြီး ပိုမိုကောင်းမွန်သော ပစ္စည်းများ တစ်ခုပြီးတစ်ခု ထွက်ပေါ်လာသည်။

ကောင်းကင်မိစ္ဆာ သန့်စင်တောအုပ်ကြီး တိုက်ပွဲသည် လူအများအပြားအတွက် အမှန်တကယ်ပင် အကျိုးအမြတ်များ သယ်ဆောင်လာပေးခဲ့သည်မှာ သေချာလှ၏။

နောက်ထပ် ရက်အနည်းငယ်အတွင်းမှာပင် စုယွီသည် စတုတ္ထအဆင့် ဆေးဖော်စပ်မှု ကုန်ကြမ်း အစုပေါင်း နှစ်ထောင်ကျော်နှင့် စတုတ္ထအဆင့် အခင်းအကျင်း၊ ရုပ်သေးနှင့် အခြားသော ကုန်ကြမ်းပစ္စည်းများကို ရရှိခဲ့သည်။ ယင်းအတွက် အလယ်အလတ်အဆင့် ဝိညာဉ်ကျောက်တုံး ငါးသိန်းကျော် ကုန်ကျခဲ့သော်လည်း ထိုက်တန်လှ၏။

ဟင်းလင်းပြင်ကျောက်တုံး ကုန်ကြမ်းများသည် သူ တင်ထားသော ကောင်းကင်မိစ္ဆာ နတ်ဆေးလုံး သုံးလုံးထက်ပင် ပို၍ စောစွာ ထွက်ပေါ်လာခဲ့သည်။

လေလံစင်မြင့်ပေါ်ရှိ ဟင်းလင်းပြင်ကျောက်တုံး ပေါင်တစ်ထောင်ခန့်မှာ အစပျိုးဈေး အလယ်အလတ်အဆင့် ဝိညာဉ်ကျောက်တုံး တစ်သန်းမှ စတင်ခဲ့ပြီး တစ်ခါတိုးလျှင် တစ်သောင်းထက် မနည်းရဟု သတ်မှတ်ထား၏။

ဤပစ္စည်းအတွက် ယှဉ်ပြိုင်သူ များစွာမရှိသော်လည်း ယှဉ်ပြိုင်မှုမှာ ပြင်းထန်လှပြီး ဈေးနှုန်းမှာလည်း အလွန်တရာ မြင့်မားလှ၏။

စုယွီက ဝိညာဉ်ကျောက်တုံး နှစ်သန်း ခုနစ်သိန်းအထိ ဈေးခေါ်လိုက်သည့် အခါမှသာ ထို ဟင်းလင်းပြင်ကျောက်တုံး ကုန်ကြမ်းကို ခက်ခက်ခဲခဲ ရရှိခဲ့သည်။ ဤဈေးနှုန်းက ရောက်ရှိနေသော ကျင့်ကြံသူများကို တစ်ဖန် ထပ်မံ၍ တုန်လှုပ်သွားစေခဲ့ပြန်တော့သည်။

အခန်း (၆၀၈) - ရုန်းရင်းဆန်ခတ် တိုက်ပွဲနှင့် မှင်သက်သွားရသော ဖန်ရှောင် အပိုင်း (၁)

စုယွီ၏ လက်ဝယ်တွင် အလယ်အလတ်အဆင့် ဝိညာဉ်ကျောက်တုံးများစွာ ရှိမနေခဲ့ပါချေ။ သို့သော်ငြားလည်း များမကြာမီမှာပင် ကောင်းကင်မိစ္ဆာ နတ်ဘုရား ဝိညာဉ်ဆေးလုံး သုံးလုံးကို တစ်ခုပြီးတစ်ခု လေလံတင်ခဲ့ရာ တစ်လုံးလျှင် အစပျိုးဈေး ရှစ်သိန်းစီမှ စတင်ခဲ့သော်လည်း ဈေးနှုန်းများမှာ တစ်ဟုန်ထိုး မြင့်တက်သွားခဲ့သည်။ နောက်ဆုံးတွင် တစ်လုံးလျှင် တစ်သန်းတစ်သိန်းခန့်ဖြင့် လေလံအောင်မြင်ခဲ့ရာ စုယွီအတွက် ဝိညာဉ်ကျောက်တုံး သုံးသန်းကျော်အထိ ရရှိစေခဲ့၏။

လေလံပွဲ၏ ဝန်ဆောင်ခ ဆယ်ရာခိုင်နှုန်းကို နုတ်လိုက်ပြီးနောက်တွင် စုယွီသည် အလယ်အလတ်အဆင့် ဝိညာဉ်ကျောက်တုံး သုံးသန်းကျော်ကို ရရှိခဲ့သည်။ ထို့အပြင် ဟင်းလင်းပြင် သတ္တုရိုင်းကို ရယူပြီးနောက် ကျန်းယွမ် ကုန်သွယ်ရေးအိမ်တော်ထံမှ ပိုလျှံနေသော ဝိညာဉ်ကျောက်တုံး နှစ်သိန်းကျော်ကိုပါ ပြန်လည် ထုတ်ယူနိုင်ခဲ့သည်။

ဤမျှ များပြားသော ဝိညာဉ်ကျောက်တုံးများနှင့် ဟင်းလင်းပြင် သတ္တုရိုင်းကို ရရှိပြီးနောက်တွင် စုယွီ၏ ရင်ထဲ၌ အတွေးစတစ်ခု လက်ခနဲ ပေါ်လာချေတော့သည်။

'ဒီလို အဖိုးတန် ဆေးလုံးတွေကို ဖော်စပ်ပြီး ငွေပိုရှာလို့ ရမယ့်ပုံပဲ...'

ရင်းနှီးရသော ကုန်ကျစရိတ်ကို ဖယ်ထုတ်လိုက်လျှင်ပင် ဆေးလုံးလေးလုံးခန့် ဖော်စပ်နိုင်ပါက ဆေးလုံးအရည်အသွေးမှာ သာမန်မျှသာ ရှိစေဦးတော့ ဝိညာဉ်ကျောက်တုံး သုံးသန်းကျော်အထိ အသားတင် အမြတ်ထွက်နိုင်သည်။

သို့ဖြစ်သော်ငြားလည်း သူသည် ဆေးဖော်စပ်ခြင်းကို ယခုမှ စတင်နေသူ ဖြစ်ရာ ဆုံးရှုံးနိုင်ခြေလည်း ရှိနေသေး၏။သို့သော် အောင်မြင်မှုနှုန်း ငါးဆယ်ရာခိုင်နှုန်းခန့် ရှိလျှင်ပင် သူ့အတွက် အကျိုးအမြတ် များစွာ ရရှိနိုင်သည်။ သို့ရာတွင် ကုန်ကြမ်းပစ္စည်း ရှားပါးမှုက အဓိက အဟန့်အတား ဖြစ်နေချေတော့သည်။

စုယွီသည် ကောင်းကင်မိစ္ဆာ နတ်ဘုရား ဝိညာဉ်ဆေးလုံးအတွက် လိုအပ်သော ကုန်ကြမ်းများကို မြေကမ္ဘာ အင်မော်တယ် နယ်မြေထံမှ လဲလှယ်ရယူထားခြင်း ဖြစ်သည်။ ဤဆေးလုံးမျိုးမှာ လူသားမျိုးနွယ်စု၏ မူလဝိညာဉ်ဆေးလုံးနှင့် တန်ဖိုးချင်း ညီမျှရာ ကုန်ကြမ်းပစ္စည်းများမှာ အလွန်တရာ ရှားပါးလှ၏။လူသားမျိုးနွယ်စုက ကောင်းကင်မိစ္ဆာ သန့်စင်တောအုပ်ကြီးကို တိုက်ခိုက် သိမ်းပိုက်နိုင်ခဲ့ခြင်းကြောင့်သာ မြေကမ္ဘာ အင်မော်တယ် နယ်မြေက အချို့အဝက်ကို ရရှိထားခြင်း ဖြစ်သော်လည်း ယခုအခါတွင်မူ ထိုကုန်ကြမ်းများမှာ ကုန်ဆုံးလုနီးပါး ဖြစ်နေချေပြီ။

နောင်အနာဂတ်တွင် ထိုကုန်ကြမ်းပစ္စည်းများ၏ ဈေးနှုန်းမှာ ပိုမို မြင့်တက်လာနိုင်သည်။ ဥပမာအားဖြင့် ယခု ကျင်းပနေသော လေလံပွဲ၌ပင် ကောင်းကင်မိစ္ဆာ နတ်ဘုရား ဝိညာဉ်ဆေးလုံး၏ ကုန်ကြမ်းများကို လေလံတင်ရောင်းချသူ တစ်ဦးမျှ မရှိဘဲ လူတိုင်းက တိတ်တဆိတ်သာ သိမ်းဆည်းထားကြသည်ကို တွေ့ရသည်။ ထို့ကြောင့်ပင် စုယွီသည် သူ၏ လောဘဇောများကို ပြန်လည် ထိန်းချုပ်လိုက်ရတော့၏။ဤကဲ့သို့သော အခွင့်အရေးမျိုးမှာ ခဏခဏ ကြုံနိုင်ရန် ခက်ခဲလှသည်။

ယခု လေလံပွဲတွင် ကောင်းကင်မိစ္ဆာ သန့်စင်တောအုပ်ကြီးမှ ရရှိသော ပစ္စည်းများက အဓိက ဖြစ်နေသော်လည်း လေလံဆရာက မိစ္ဆာမျိုးနွယ်စု၏ သားပေါက်လေးများနှင့် ဥများကို အမြောက်အမြား မိတ်ဆက်လာသည်ကို မြင်လိုက်ရသောအခါ စုယွီ၏ မျက်နှာမှာ အုံ့မှိုင်းသွားတော့သည်။ သူသည် မကောင်းသော အငွေ့အသက်များကို ခံစားမိလိုက်လေ၏။

'ငါ အခုချက်ချင်း ဒီကနေ ထွက်သွားမှ ဖြစ်မယ်...' စုယွီသည် နေရာမှ ထလိုက်ကာ သူ၏ အခန်းငယ်အတွင်းမှ ထွက်ခွာရန် ပြင်ဆင်လိုက်သည်။

“ဝုန်း...”

ရုတ်တရက်ဆိုသလိုပင် ဟွမ်ယွီ အင်မော်တယ် မြို့တော် တစ်ခုလုံး ပြင်းထန်စွာ တုန်ခါသွားတော့၏။လေလံပွဲ ခန်းမကြီးမှာလည်း သိသိသာသာ ယိမ်းထိုးသွားရာ နေရာမှ ထလိုက်သော စုယွီပင်လျှင် ဟန်ချက် ပျက်မတတ် ဖြစ်သွားရသည်။ မြို့တော်၏ အပြင်ဘက်တွင်မူ အကာအကွယ် အခင်းအကျင်းများ အားလုံးကို ဖွင့်လှစ်ထားသော်လည်း မြို့ပြင်၌ အဆုံးအစမဲ့သော မိစ္ဆာစစ်တပ်ကြီးက စုဝေးရောက်ရှိနေကာ မြို့ကို ရူးသွပ်စွာ တိုက်ခိုက်နေကြချေပြီ။

မိစ္ဆာအုပ်စုကြီး၏ အလယ်တွင် ပဉ္စမအဆင့် မိစ္ဆာသူရဲကောင်း တစ်ဦးက ပြင်းထန်သော ထိုးနှက်ချက်တစ်ချက်ကို ပေးလိုက်ရာ ဟွမ်ယွီ မြို့တော်၏ အကာအကွယ် အခင်းအကျင်းများမှာ တစ်လွှာပြီးတစ်လွှာ ကြွေလွင့် ပျက်စီးသွားရတော့၏။မြေပြင်ကြီးမှာလည်း ပြင်းထန်စွာ တုန်ခါသွားကာ အက်ကြောင်းများ ဟက်တက်ကွဲသွားရသည်အထိ ပျက်စီးခြင်းများ ဖြစ်ပေါ်လာသည်။

ထို မိစ္ဆာသူရဲကောင်း အပြင် အခြားသော စတုတ္ထအဆင့်နှင့် တတိယအဆင့် မိစ္ဆာများလည်း အမြောက်အမြား ပါဝင်နေကြသည်။ အကာအကွယ် အခင်းအကျင်း ပျက်စီးသွားသည်နှင့်တစ်ပြိုင်နက် မိစ္ဆာများမှာ မြို့တော်အတွင်းသို့ အလုံးအရင်းနှင့် တိုးဝင်လာကြတော့၏။လေလံပွဲ ခန်းမအတွင်း၌ စုယွီသည် သူ၏ ခြေလှမ်းများကို ရပ်တန့်လိုက်ရသည်။ သူ၏ မျက်နှာမှာ လေးနက်တည်ကြည်သွားကာ အစွမ်းထက်သော အရှိန်အဝါ တစ်ခုကို ထုတ်လွှတ်လိုက်ပြီး မြို့တော်အတွင်းရှိ အခြေအနေများကို စူးစမ်းလိုက်သည်။

မိစ္ဆာမျိုးနွယ်စုများက မြို့ကို ဝိုင်းရံထားကြချေပြီ။ သူတို့သည် ကုန်သွယ်ရေးအိမ်တော်က ရောင်းချမည့် မိစ္ဆာသားပေါက်များနှင့် ဥများကို လာရောက် ကယ်တင်ကြခြင်းလော။ ထိုအထဲတွင် မိစ္ဆာမျိုးနွယ်စု၏ အလွန် ထူးချွန်သော မျိုးဆက်ပေါင်း တစ်ထောင်နီးပါး ပါဝင်နေသည် မဟုတ်ပါလော။

စုယွီသည် ရွှေပုစဉ်းရင်ကွဲ မျက်လုံးကို အသုံးပြု၍ ပတ်ဝန်းကျင်ကို ဝေ့ကြည့်လိုက်ရာ လူသားမျိုးနွယ်စု၏ ဝိညာဉ်ခွဲထွက်အဆင့်နှင့် ယှဉ်ပြိုင်နိုင်သော ပဉ္စမအဆင့် မိစ္ဆာသူရဲကောင်းကို မြင်တွေ့လိုက်ရသည်။ ထို့အပြင် အမှောင်ထဲတွင် ပုန်းကွယ်နေသော အခြား ပဉ္စမအဆင့် မိစ္ဆာသူရဲကောင်း နှစ်ဦးကိုပါ သူ ထပ်မံ တွေ့ရှိလိုက်သောအခါ စုယွီ၏ ရင်ထဲတွင် တုန်လှုပ်သွားရသည်။

ယခုအချိန်တွင် ထွက်ခွာရန်မှာ မဖြစ်နိုင်တော့ပါချေ။

'လူသား ကျင့်ကြံသူတွေနဲ့ ဒီ မိစ္ဆာသူရဲကောင်းတွေ တိုက်ခိုက်နေချိန်ကို ခဏ စောင့်ဦးမှပဲ... အဲဒီအချိန်ကျမှ ဟင်းလင်းပြင် ခွဲထွက်ခြင်း စွမ်းရည်ကို သုံးပြီး ငါ ထွက်သွားမယ်...'

စုယွီသည် သူ၏ အခန်းငယ်ထဲတွင် ပြန်လည် ထိုင်လိုက်ကာ အခွင့်ကောင်းကို စောင့်ဆိုင်းရန် ဆုံးဖြတ်လိုက်သည်။

သို့သော် သူ ထိုင်လိုက်သည်နှင့် တစ်ပြိုင်နက် ခန်းမအတွင်းရှိ မူလဝိညာဉ်အဆင့် အရှင်သခင်များက စတင် လှုပ်ရှားလာကြတော့၏။

သူတို့၏ ပစ်မှတ်မှာ စင်ပေါ်ရှိ လေလံဆရာနှင့် ကုန်သွယ်ရေးအိမ်တော်၏ နောက်ကွယ်ရှိ ပစ္စည်းများပင် ဖြစ်သည်။

“ဝုန်း...”

ထိုသူများ လှုပ်ရှားလိုက်သည်နှင့် တစ်ပြိုင်နက် အခြားသော အရှင်သခင်များစွာလည်း သူတို့၏ အခန်းများအတွင်းမှ ခုန်ထွက်လာကြကာ ထိုသူများကို ပိတ်ဆို့ တားဆီးလိုက်ကြတော့၏။

“ငါတို့က မင်းတို့ကို စောင့်နေတာ ကြာပြီ...”

ကုန်သွယ်ရေး အဆောက်အအုံ၏ အပြင်ဘက်တွင်မူ အသက် ဆယ်ကျော်သက်အရွယ်ခန့်သာ ရှိပုံရသော ချောမောလှပသည့် လူငယ်တစ်ဦးသည် ဖြည်းညင်းစွာ လမ်းလျှောက်လာနေသည်။ သူ၏ မျက်ဝန်းများမှာ လေးနက်သော အရောင်များ တောက်ဖြာနေ၏။

ဟွမ်ယွီ မြို့တော်အတွင်းရှိ ထောင်နှင့်ချီသော ကျင့်ကြံသူများမှာလည်း ထိုကုန်သွယ်ရေး အဆောက်အအုံဆီသို့ ဦးတည် လာနေကြချေပြီ။

လူငယ်လေးသည် လက်ကို မြှောက်လိုက်ရာ မူလဝိညာဉ်အဆင့်ထက် များစွာ ကျော်လွန်သော စွမ်းအားတစ်ခုနှင့်အတူ ကောင်းကင်နှင့် မြေကြီး တာအို စွမ်းအားများက ကုန်သွယ်ရေး အဆောက်အအုံဆီသို့ ဖိနှိပ် ဆင်းသက်သွားတော့၏။

ထိုအခါ အဆောက်အအုံ၏ အကာအကွယ် အခင်းအကျင်းမှာ မျက်စိတစ်မှိတ်အတွင်းမှာပင် ပြိုလဲ ပျက်စီးသွားရသည်။

“ချင်းယွီ အင်မော်တယ် နန်းတော်က လူတွေ... မင်းတို့က တကယ်ပဲ ဒီကိစ္စထဲကို ဝင်ပါရဲတယ် ပေါ့ လေ...”

လူငယ်လေး လှုပ်ရှားရန် ပြင်လိုက်စဉ်မှာပင် ခရမ်းရောင် ဝတ်စုံကို ဝတ်ဆင်ထားသော လူလတ်ပိုင်း အမျိုးသား တစ်ဦး ပေါ်ထွက်လာကာ ထိုလူငယ်၏ ရှေ့တွင် ပိတ်ဆို့ ရပ်တည်လိုက်သည်။

လူငယ်လေးသည် ထိုသူကို ကြည့်ကာ မျက်မှောင်ကြုတ်သွားရင်း တိုးညှင်းစွာ ရေရွတ်လိုက်၏။

“လီဟော့ ကျောင်းတော်က လေယန် သူရဲကောင်းကြီး ပါလား...”

ယင်းမှာ ယွီလုံ နန်းတော် မဟုတ်ဘဲ လီဟော့ ကျောင်းတော် ဖြစ်နေသည်လော။

“ဝုန်း...”

လူလတ်ပိုင်း အမျိုးသားသည် စကားပြန်ကို စောင့်မနေဘဲ ကြီးမားလှသော မိုးကြိုးနှင့် မီးတောက် စွမ်းအားများဖြင့် ထိုလူငယ်ကို တိုက်ခိုက်လိုက်တော့၏။ မူလဝိညာဉ်အဆင့်ကို ကျော်လွန်သော အစွမ်းထက် စွမ်းအားကြီး နှစ်ခု၏ ထိပ်တိုက် တွေ့ဆုံမှုပင် ဖြစ်သည်။

မျက်စိတစ်မှိတ်အတွင်းမှာပင်...ကောင်းကင်ယံတစ်ခုလုံး ခရမ်းရောင်နှင့် ရွှေရောင် အလင်းတန်းများဖြင့် ဖုံးလွှမ်းသွားကာ အချင်းချင်း ရိုက်ခတ် ဖျက်ဆီးနေကြတော့၏။ သူတို့၏ စွမ်းအားများကို ချုပ်တည်းထားခြင်းကြောင့်သာ ဖြစ်တန်ကောင်းသည်။

ထို ဝိညာဉ်ခွဲထွက်အဆင့် နှစ်ဦး၏ တိုက်ပွဲမှ ထွက်ပေါ်လာသော စွမ်းအားအကြွင်းအကျန်များမှာ ပြင်ပသို့ မယိုစိမ့်ခဲ့ပါချေ။ သို့မဟုတ်ပါက ဟွမ်ယွီ မြို့တော်တစ်ခုလုံးမှာ ပျက်စီးသွားလောက်ချေပြီ။

ကုန်သွယ်ရေး အဆောက်အအုံအတွင်း၌လည်း ဝိညာဉ်ခွဲထွက်အဆင့် ပုဂ္ဂိုလ်ကြီးများနှင့် မူလဝိညာဉ်အဆင့် အရှင်သခင်များစွာမှာ ရုန်းရင်းဆန်ခတ် တိုက်ခိုက်နေကြရာ အလွန်ပင် ရှုပ်ထွေးလှသည်။

မြို့ပြင်တွင်မူ ချင်းယွီ အင်မော်တယ် နန်းတော်မှ ကျင့်ကြံသူများစွာက အဆောက်အအုံကို စတင် တိုက်ခိုက်နေကြပြီ ဖြစ်၏။

အခြေအနေများမှာ တစ်စထက်တစ်စ ပိုမို ဆိုးရွားလာနေသည်။ ပြင်ပမှ အင်အားစုများ မြို့အတွင်းသို့ ကျူးကျော်ဝင်ရောက်ရန် ပြင်နေစဉ်မှာပင် လူသားမျိုးနွယ်စုမှ အခြား ဝိညာဉ်ခွဲထွက်အဆင့် အစွမ်းထက် ပုဂ္ဂိုလ်ကြီး လေးဦး ထပ်မံ ရောက်ရှိလာခဲ့ပြန်သည်။

ထိုအခါ မိစ္ဆာမျိုးနွယ်စုနှင့် ချင်းယွီ အင်မော်တယ် နန်းတော်ကို ပစ်မှတ်ထားကာ ယွီလုံ နန်းတော်နှင့် လီဟော့ ကျောင်းတော်ဟူသော အင်မော်တယ် အင်အားစုကြီး နှစ်ခုက လွှမ်းမိုးထားသော အနေအထားသို့ ရောက်ရှိသွားတော့၏။

အခန်း (၆၀၉) - ရုန်းရင်းဆန်ခတ် တိုက်ပွဲနှင့် မှင်သက်သွားရသော ဖန်ရှောင် အပိုင်း (၂)

ဟွမ်ယွီ အင်မော်တယ် မြို့တော်ကြီး တစ်ခုလုံးမှာ မြေအောက်သို့ နစ်မြုပ်သွားတော့မည့်အလား မြေပြင်များက အဆက်မပြတ် နိမ့်ဆင်း ပြိုကျလျက် ရှိနေချေပြီ။ တစ်မြို့လုံးမှာလည်း ဖရိုဖရဲ ဖြစ်ရပ်များဖြင့် ပြည့်နှက်နေတော့၏။

ကုန်သွယ်ရေး မျှော်စင်အတွင်းရှိ အခန်းများ၏ အကာအကွယ် အခင်းအကျင်းများ ပျက်စီးသွားသည်နှင့်အမျှ စုယွီ တည်းခိုရာ အခန်းငယ်လေးမှာလည်း ပြိုကျသွားခဲ့ရသည်။ ထိုစဉ် ဖန်ရှောင်နှင့် အခြားနှစ်ဦးမှာ စုယွီကို လှမ်းကြည့်မိရာ ဆံပင်ဖြူဖွေးလျက် သပ်ရပ်မှု မရှိသော အဘိုးအို တစ်ဦး၏ ရုပ်သွင်ကို မြင်လိုက်ရသဖြင့် အတော်ပင် အံ့သြသွားကြ၏။

အဘယ်ကြောင့်ဆိုသော် မကြာမီက ကျင်းပခဲ့သော လေလံပွဲ၌ ထိုအဘိုးအိုမှာ အလယ်အလတ်အဆင့် ဝိညာဉ်ကျောက်တုံး သုံးသန်းကျော်ကို ရက်ရက်ရောရော သုံးစွဲခဲ့သောကြောင့်ပင် ဖြစ်၏။

“ဝုန်း ...”

စိမ်းပြာ ငရဲ အင်မော်တယ် နန်းတော်မှ အရှင်သခင် တစ်ဦးက လက်ကို ဝှေ့ယမ်းလိုက်ရာ သံမဏိဓာတ်အားများ ပါဝင်သော မှော်ဓားဆယ်လက်မှာ လေထုကို ဖြတ်သန်းကာ သတ်ဖြတ်ခြင်း အက္ခရာကို ရေးထွင်းလာသည်။ ထိုဓားများမှာ မျက်စိတစ်မှိတ်အတွင်း ရွှေအမြုတေအဆင့် ကျင့်ကြံသူ ဆယ်ဦးကျော်ကို အပိုင်းပိုင်း ပိုင်းဖြတ်လိုက်ပြီးနောက် စုယွီနှင့် ဖန်ရှောင်တို့ဆီသို့ ဦးတည် လာနေတော့၏။

ဖန်ရှောင်တို့၏ မျက်နှာများမှာ သွေးဆုတ် ဖြူရော်သွားကာ စုပေါင်း ခုခံရန် ပြင်ဆင်နေကြစဉ် စုယွီမှာ သူတို့ဘေးမှ ရုတ်တရက် ပျောက်ကွယ်သွားသည်။

နောက်တစ်ခဏ၌ စုယွီမှာ မြေကမ္ဘာ အင်မော်တယ် နယ်မြေမှ အရှင်သခင်၏ နောက်ကျောသို့ ရောက်ရှိနေခဲ့ချေပြီ။

စုယွီက လက်ဝါးစောင်းကို ဓားကဲ့သို့ အသုံးပြုကာ ကောင်းကင်ခွဲထွက် ကျိန်စာဖြင့် ခုတ်ချလိုက်၏။

“ဝုန်း ...”

“ဗြိ ...”

မူလဝိညာဉ်အဆင့် (၂) ရှိသော အရှင်သခင်မှာ စုယွီ၏ တစ်ချက်တည်းသော ခုတ်ချက်ကြောင့် ခန္ဓာကိုယ် နှစ်ပိုင်းကွဲကာ မြေပြင်ပေါ်သို့ ပြုတ်ကျသွားသည်။

သွေးမြူများ ဖျန်းခနဲ ပန်းထွက်သွားပြီးနောက် ထိုကျင့်ကြံသူ၏ အရှိန်အဝါမှာလည်း မိုးရွာပြီးနောက် ပျော်ကျသွားသော နှင်းပွင့်များပမာ ပျောက်ကွယ်သွားရတော့၏။ သူ၏ ခန္ဓာကိုယ်တွင် အစွမ်းထက်သော ကာကွယ်ရေး မှော်ရတနာများ ရှိနေသော်လည်း သေမင်း၏ လက်တွင်းမှ မလွတ်မြောက်နိုင်ခဲ့ချေ။

ဖန်ရှောင်နှင့် အခြားသူများမှာ ထိုမြင်ကွင်းကို ကြည့်ရင်း ‌ကြက်သီးထသွားကြသည်။

ဖန်ရှောင်၏ မျက်ဝန်းများမှာလည်း မယုံကြည်နိုင်လောက်အောင် ပြူးကျယ်သွားရ၏။

‘ဒါ ဘာဖြစ်သွားတာလဲ ... သူက ရွှေအမြုတေအဆင့် (၇) မှာပဲ ရှိသေးတာ မဟုတ်လား ... ဒါပေမဲ့ မူလဝိညာဉ်အဆင့် (၂) ကို တစ်ချက်တည်းနဲ့ သတ်ပစ်လိုက်တာပဲ ...’

ထိုစဉ် ဖန်ရှောင်၏ မျက်နှာအမူအရာမှာ တစ်ဖန် ပြောင်းလဲသွားပြန်သည်။

“သတိထား ...”

ဝမ်ပေါင် ကုန်သွယ်ရေးအသင်းမှ မူလဝိညာဉ်အဆင့်နှောင်းပိုင်း ကျင့်ကြံသူတစ်ဦးမှာ စုယွီ၏ နောက်ကွယ်မှ တိတ်တဆိတ် ချဉ်းကပ်လာခဲ့သည်။

သူက မျက်လှည့်ပြသလို ပြုံးလိုက်ရင်း ဟင်းလင်းပြင် သတ္တုရိုင်းကို ရယူသွားသော စုယွီကို ဖမ်းဆီးရန် ကြံရွယ်နေခြင်း ဖြစ်၏။

သို့သော် စုယွီက ဟင်းလင်းပြင် တာအို စွမ်းအားကို ထုတ်ဖော်လိုက်ရာ ထိုကျင့်ကြံသူမှာ မျက်စိတစ်မှိတ်အတွင်း မြင်ကွင်းများ ပြောင်းလဲသွားသည်ကို တွေ့လိုက်ရ၏။ သူ ရောက်ရှိသွားသော နေရာမှာ ဝိညာဉ်ခွဲထွက်အဆင့် သူရဲကောင်းနှစ်ဦး တိုက်ခိုက်နေသည့် စစ်တလင်း အလယ်တည့်တည့်ပင် ဖြစ်တော့သည်။

“ဝုန်း ...”

စဉ်းစားချိန်ပင် မရလိုက်ဘဲ အစွမ်းထက်သော စွမ်းအားနှစ်ခုမှာ သူ့ထံသို့ တိုက်ရိုက် ကျရောက်လာသည်။ မူလဝိညာဉ်အဆင့်နှောင်းပိုင်း ကျင့်ကြံသူကြီးမှာ ဝိညာဉ်ခွဲထွက်အဆင့် စွမ်းအားနှစ်ခုကြားတွင် အမှုန်အမွှားများပမာ ကြေမွ ပျောက်ကွယ်သွားရတော့၏။ စုယွီမှာမူ ထိုသူ သေဆုံးသွားသည်ကို တစ်ချက်မျှ လှည့်ကြည့်ပြီးနောက် ဟင်းလင်းပြင်အတွင်းသို့ ကိုယ်ယောင်ဖျောက်ကာ ပျောက်ကွယ်သွားခဲ့ချေပြီ။

ဖန်ရှောင်တို့မှာ မှင်သက်သွားကြသည်။

‘ဒါ ဘာဖြစ်သွားတာလဲ ...’

ထိုအခါ၊ ဖန်ရှောင်နှင့် ရုပ်ချင်းဆင်သော အမျိုးသမီး တစ်ဦးက တုန်ယင်နေသော အသံဖြင့် ဖြေလိုက်၏။

“ဟင်းလင်းပြင် တာအို စွမ်းအား ... ဒီလူက ဟင်းလင်းပြင် တာအိုကို နားလည်ထားတာပဲ ... အဲဒါကြောင့် မူလဝိညာဉ်အဆင့်ကို အလွယ်တကူ သတ်နိုင်တာပေါ့ ... ပြီးတော့ ဝမ်ပေါင် ကုန်သွယ်ရေးအသင်းက လူကိုလည်း ဝိညာဉ်ခွဲထွက်အဆင့်တွေဆီ ပို့လိုက်သေးတယ် ...”

ဤကဲ့သို့သော လှည့်ကွက်မျိုးကို ဖန်ရှောင်တို့မှာ တစ်ခါမျှ မမြင်ဖူးခဲ့ကြချေ။

သို့သော် အံ့သြနေရမည့် အချိန် မဟုတ်သဖြင့် ဖန်ရှောင်က စတုတ္ထအဆင့် အဆင့်နိမ့် လက်ဖွဲ့သုံးခုကို ထုတ်ယူလိုက်၏။ ဤလက်ဖွဲ့များမှာ မိုင်တစ်ရာခန့်အကွာသို့ ချက်ချင်း ပို့ဆောင်ပေးနိုင်သော အဖိုးတန် ရတနာများပင်။

“သွားစို့ ... ငါတို့ ဒီကိစ္စထဲမှာ ပါဝင်လို့ မဖြစ်ဘူး ...”

တစ်ရက်ခန့် ကြာပြီးနောက်တွင် စိမ်းပြာ ငရဲ အင်မော်တယ် နန်းတော်နှင့် မိစ္ဆာစစ်တပ်မှာ အကျအဆုံး များစွာဖြင့် ဆုတ်ခွာသွားကြသည်။

စုယွီမှာမူ သူ၏ ရုပ်သွင်ကို တာအို ရုပ်သေး အဖြစ် ပြောင်းလဲကာ အရှင်သခင် ဆယ်ပါး အင်မော်တယ် မြို့တော်၏ မှောင်ခိုဈေးကွက်သို့ ပြန်လည် ရောက်ရှိလာခဲ့လေပြီ။ ယွင်ရှောင် ဆေးနန်းတော်၏ နောက်ဖေးဝင်းအတွင်းရှိ အပန်းဖြေ ကုလားထိုင်ပေါ်၌ သူက သက်သောင့်သက်သာ လဲလျောင်းနေစဉ် လင်းပင်းနှင့် ယန်ယွီမင်တို့က ပုခုံးများကို နှိပ်နယ်ပေးကာ ပြုစုနေကြ၏။

စုယွီက ရရှိလာသော တာအိုလက်စွပ် နှစ်ကွင်းကို စစ်ဆေးကြည့်လိုက်ရာ အနည်းဆုံး ဝိညာဉ်ကျောက်တုံး နှစ်သန်းခန့် တန်ဖိုးရှိသော ပစ္စည်းများကို တွေ့လိုက်ရ၏။

ထိုအထဲတွင် ဝမ်ပေါင် ကုန်သွယ်ရေးအသင်း၏ တံဆိပ်ကို တွေ့လိုက်ရသဖြင့် စုယွီ၏ မျက်ဝန်းများမှာ အေးစက်သွားရတော့၏။

‘ဝမ်ပေါင် ကုန်သွယ်ရေးအသင်း ... မင်းတို့ကတော့ သေတွင်းတူးနေတာပဲ ...’

ဘေးနားမှ လင်းပင်းနှင့် ယန်ယွီမင်တို့က စုယွီ၏ အစွမ်းထက်ပုံကို ကြားရသောအခါ အားကျ ဂုဏ်ယူသော မျက်ဝန်းများဖြင့် ကြည့်နေကြသည်။

“သခင်က တကယ့်ကို အစွမ်းထက်တာပဲ ...”

“ဝမ်ပေါင် ကုန်သွယ်ရေးအသင်းက ဘာမို့လို့လဲ ... တစ်နေ့ကျရင် သခင့်ခြေရင်းမှာ ဒူးထောက်ပြီး အပြစ်ပေးခံရမှာပါ ...”

စုယွီသည် ယခုအခါ မူလဝိညာဉ်အဆင့်သို့ ရောက်ရှိနေပြီ ဖြစ်ရာ မိမိဘေးနားရှိ သူများနှင့် သူ၏ မှော်သားရဲများပါ အဆင့်တက်လှမ်းနိုင်ရန် ပြင်ဆင်ရန် ဆုံးဖြတ်လိုက်တော့၏။