အခန်း ၄၂၁

အခန်း (၄၂၁) - ဘုရင်သုတ်သင် ကောင်းကင်စက်ဝိုင်း(၃)

အစောပိုင်းက ပေါ်လာခဲ့သော ရွှေကျီးကန်းကပင် သူတို့ကို အံ့အားသင့်သွားစေရန် လုံလောက်ခဲ့ပြီဖြစ်သည်။

သို့သော်လည်း ရွှေကျီးကန်းမှာ အနည်းဆုံးတော့ ဒဏ္ဍာရီများထဲတွင် ပေါ်လာခဲ့ပြီး မှတ်တမ်းတင်ထားသော နတ်ဘုရား သားရဲတစ်ကောင် ဖြစ်သည်။

ဝူယွမ်က ရှင်းပြလိုက်သည်။ “ကျွန်တော်က သူ့ကို ကမ္ဘာသစ်ပင်လို့ ခေါ်တယ်၊ သူက ကြီးထွားဖို့အတွက် ဘယ်လို စွမ်းအားမျိုးကိုမဆို စုပ်ယူနိုင်တယ်၊ ဒါက ကျွန်တော် တိုက်တိုက်ဆိုင်ဆိုင် ရလာခဲ့တဲ့ မျိုးစေ့တစ်ခုဖြစ်ပြီး ဒီမဟာရှေးဟောင်း ကျောက်တိုင်ထဲမှာ စိုက်ပျိုးခဲ့တာပါ”

“ပြီးတော့ တိုက်တိုက်ဆိုင်ဆိုင်ပဲ မဟာရှေးဟောင်း ကျောက်တိုင်ရဲ့ ကျောက်တိုင်ဝိညာဉ်က ကမ္ဘာသစ်ပင်မှာ အခြေချသွားပြီး ဒီကမ္ဘာသစ်ပင်ရဲ့ သစ်ပင်ဝိညာဉ် ဖြစ်လာကာ ကမ္ဘာသစ်ပင်ရဲ့ စွမ်းအားကို ထိန်းချုပ်နိုင်လာတယ်၊ ဒီမဟာရှေးဟောင်း ကျောက်တိုင်ထဲမှာ ဖိနှိပ်ခံထားရတဲ့ ကမ္ဘာခြားနတ်ဆိုးဘုရင် တစ်ကောင်နဲ့ ပေါင်းစပ်လိုက်တော့ သစ်ပင်ဝိညာဉ်ရဲ့ ထိန်းချုပ်မှုအောက်မှာ အမြစ်တွေက အဲဒီ ကမ္ဘာခြားနတ်ဆိုးဘုရင်ရဲ့ စွမ်းအင်တွေကို တက်ကြွစွာ စုပ်ယူပြီး ရူးသွပ်စွာ ကြီးထွားလာခဲ့တယခ”

“ကမ္ဘာသစ်ပင်ရဲ့ စွမ်းရည်တွေက အရမ်း အစွမ်းထက်တယ်၊ သူက လေဟာနယ်ကို အဆက်မပြတ် ချဲ့ထွင်နိုင်ပြီး သိပ်သည်းတဲ့ ကောင်းကင်နဲ့ မြေကြီး ဝိညာဉ်စွမ်းအင်တွေကို ထုတ်လွှတ်ပေးနိုင်တယ်”

“အခု ဒီရှေးဟောင်းကျောက်တိုင်က ဒီကမ္ဘာငယ်လေး ဖြစ်လာပြီ၊ ပြီးတော့ သူက အဆုံးအစမရှိ ချဲ့ထွင်သွားနိုင်တယ်”

“ဒါဆိုရင် ကျွန်တော် ဘာလို့ ကမ္ဘာခြားနတ်ဆိုးတွေကို အရှင်လတ်လတ် ဖမ်းချင်ရတာလဲဆိုတာ စီနီယာတို့ နားလည်သင့်ပြီ မဟုတ်လား၊ ဒီကမ္ဘာခြားနတ်ဆိုးတွေက ကမ္ဘာသစ်ပင်အတွက် အကောင်းဆုံး အာဟာရတွေပဲလေ”

ဝူယွမ်၊ လင်းတုန်နှင့် ယင်းရွှမ်ဇီတို့ အားလုံး၏ မျက်နှာများတွင် အပြုံးများရှိနေကြသည်။

ကမ္ဘာသစ်ပင်၏ လုပ်ဆောင်ချက်များကို သူတို့ သိရှိထားသောကြောင့် မိုလော့နှင့် အခြားသူများကဲ့သို့ စိုးရိမ်ပူပန်နေခြင်းမရှိဘဲ ကမ္ဘာခြားနတ်ဆိုးများကို ရင်ဆိုင်ရာတွင် ကောင်းမွန်သော စိတ်ဓာတ် ရှိနေခြင်းဖြစ်သည်။

တကယ်တော့ ယခု ဝူယွမ်ကဲ့သို့ပင် သူတို့အားလုံးက ကမ္ဘာခြားနတ်ဆိုးများကို ပိုမို ဖမ်းဆီးနိုင်ရန် ဆန္ဒရှိနေကြသည်။

“ဒီလို အံ့သြဖွယ်ကောင်းတဲ့ သစ်ပင်မျိုး တကယ်ရှိတာပဲ” ချင်းကျီက ၎င်းကို ကြားပြီးနောက် အံ့ဩတကြီး ရေရွတ်လိုက်သည်။

သူ့မျက်နှာပေါ်တွင် စိတ်ဝင်စားဖွယ်ကောင်းသော အမူအရာတစ်ခုပင် ပေါ်လာခဲ့သည်။

မျက်စိတစ်မှိတ်အတွင်းမှာပင် ကမ္ဘာသစ်ပင် ကြီးထွားလာစေရန် ကူညီပေးနိုင်မည့် နည်းလမ်းများစွာကို သူ တွေးတောမိသွားသည်။

ချင်းကျီက ပြောလိုက်သည်။ “ကမ္ဘာခြားနတ်ဆိုးတွေကို သတ်ဖို့ အရမ်းခက်ခဲတယ်၊ သူတို့ကို အနိုင်ယူနိုင်ရင်တောင် သုတ်သင်ဖို့အတွက် ကြီးမားတဲ့ တန်ဖိုးတစ်ခု ပေးရတယ်၊ ဒါကြောင့် ရှေးဟောင်းခေတ်က အင်အားစုတွေနဲ့ အစွမ်းထက်ပုဂ္ဂိုလ် အများအပြားဟာ ကမ္ဘာခြားနတ်ဆိုး အများအပြားကို နတ်ဘုရားရတနာတွေ၊ အစီအရင်တွေနဲ့ ဒါမှမဟုတ် သူတို့ကိုယ်သူတို့ ချိတ်ပိတ်ပြီး ဖိနှိပ်ထားခဲ့ကြတယ်၊”

“ငါတို့ နဂါး မျိုးနွယ်စုမှာလည်း ကမ္ဘာခြားနတ်ဆိုးအကျဉ်းထောင် တစ်ခု ရှိတယ်၊ အဲဒီမှာ ကမ္ဘာခြားနတ်ဆိုး အများအပြားကို ဖမ်းဆီးထားတယ်”

“ဒီသစ်ပင်က အရမ်း အံ့သြဖို့ကောင်းတယ်၊ သူ့ကို ကမ္ဘာခြားနတ်ဆိုး အကျဉ်းထောင်အထက်မှာ တိုက်ရိုက် ထားပြီး အဲဒီ ကမ္ဘာခြားနတ်ဆိုးတွေရဲ့ စွမ်းအားတွေကို စုပ်ယူခိုင်းလို့ ရတယ်”

၎င်းကို ကြားပြီးနောက် ဝူယွမ်က ခါးသီးစွာ ပြုံးလိုက်သည်။ ဤနည်းလမ်းကို သူ တကယ်ပင် တွေးမိခဲ့သည်။

“ဒီနည်းလမ်းကို ကျွန်တော် စဉ်းစားမိတာ ကြာပြီ၊ အရင်က ထျန်းဖုန်း ပင်လယ်နယ်မြေက ကျွန်းတစ်ကျွန်းမှာ မီးတောက်သခင် အိပ်စက်နေတဲ့ နေရာကို တိုက်တိုက်ဆိုင်ဆိုင် ကျွန်တော် တွေ့ခဲ့တယ်၊ ပြီးတော့ မီးတောက်သခင်ရဲ့ ခန္ဓာကိုယ်အောက်မှာ ကမ္ဘာခြားနတ်ဆိုးထောင်ချီ ရှိနေတယ်”

“အဲဒါက စီနီယာ ပြောတဲ့ ကမ္ဘာခြားနတ်ဆိုးအကျဉ်းထောင် ဖြစ်ရမယ်”

“ဒါပေမယ့် ကမ္ဘာခြားနတ်ဆိုးတွေ အရမ်းများလွန်းတယ်၊ သူတို့ကို မီးတောက်သခင်၊ အစီအရင်တွေနဲ့ မီးတောင်ရဲ့ စွမ်းအားတွေကပဲ ဖိနှိပ်ထားတာ၊ အပေါက်တစ်ခု ပွင့်သွားတာနဲ့ နောက်ဆက်တွဲ ဆိုးကျိုးတွေက မှန်းဆလို့မရနိုင်ဘူး”

“ပြီးတော့ ကမ္ဘာသစ်ပင်ဝိညာဉ်က ပြန်ပေးတဲ့ အချက်အလက်တွေအရ လက်ရှိ ကမ္ဘာသစ်ပင်က ကမ္ဘာခြားနတ်ဆိုးစွမ်းအင် အများကြီးကို တစ်ပြိုင်နက်တည်း မစုပ်ယူနိုင်ဘူး၊ အကယ်၍ ကမ္ဘာခြားနတ်ဆိုးစွမ်းအင်က အရမ်းများလွန်းရင် သူက တန်ပြန် ထိခိုက်မှု ခံရလိမ့်မယ်၊ သစ်ပင် ကိုယ်တိုင်တောင် ကမ္ဘာခြားနတ်ဆိုးတွေရဲ့ တိုက်စားတာကို ခံရလိမ့်မယ်”

“ဒါကြောင့် ပြန့်ကျဲနေတဲ့ ကမ္ဘာခြားနတ်ဆိုးတွေကို ဖမ်းဆီးပြီး ဖြည်းဖြည်းချင်း စုပ်ယူတာက အကောင်းဆုံးပဲ၊ ကမ္ဘာသစ်ပင် တဖြည်းဖြည်း အားကောင်းလာတဲ့အခါကျရင် သူက ကမ္ဘာခြားနတ်ဆိုးတွေကို ပိုပြီးစုပ်ယူနိုင်လာလိမ့်မယ်”

“ဒီနေ့ အစွမ်းထက်တဲ့ ကမ္ဘာခြားနတ်ဆိုး အများအပြားကို ဖိနှိပ်လိုက်ရလို့ ကမ္ဘာသစ်ပင်က တခြားနတ်ဘုရားရတနာတွေရဲ့ အကူအညီနဲ့မှ သီသီလေး ဖိနှိပ်ထားနိုင်တာ၊ ပြီးတော့ ထိရောက်မှုက အတော်လေး နှေးကွေးသွားတယ်”

“စီနီယာတို့ကို အောက်ခေါ်လာတာ ပတ်ဝန်းကျင်ကို လိုက်ကြည့်ရုံသက်သက် မဟုတ်ဘူး၊ ကမ္ဘာသစ်ပင်ရဲ့ ဖိအားကို လျှော့ချပေးပြီး သူ့ရဲ့ စုပ်ယူမှုကို အရှိန်မြှင့်ဖို့အတွက်ပါ”

ဤနေရာသို့ ရောက်သောအခါ ဝူယွမ်က ရက်စက်သော အပြုံးတစ်ခုကို ပြသလိုက်ပြီး ပြောလိုက်သည်။

“ဒီမှာ ဖိနှိပ်ခံထားရတဲ့ ကမ္ဘာခြားနတ်ဆိုး အားလုံးကို ရိုက်နှက်ချင်တယ်၊ သူတို့ကို ခုခံနိုင်စွမ်း လုံးဝမရှိအောင် လုပ်ပစ်ချင်တယ်”

“အို၊ တကယ်လား” ၎င်းကို ကြားပြီးနောက် မိုလော့၏ မျက်လုံးများ တောက်ပသွားသည်။

ဤကမ္ဘာခြားနတ်ဆိုးများကို မသတ်ခဲ့ဘဲ သူတို့ကို အသက်နည်းနည်းပိုရှည်အောင် ထားခဲ့ရသဖြင့် သူ နောင်တရနေခဲ့ခြင်းဖြစ်သည်။

ချင်းကျီက ပြောလိုက်သည်။“ငါကလည်း သူတို့ဆီကနေ မိစ္ဆာအကျဉ်းထောင်နဲ့ ပတ်သက်တဲ့ သတင်းအချက်အလက်တွေကို စုံစမ်းချင်နေတာ၊ ဒါကြောင့် လှုပ်ရှားကြစို့၊ တတ်နိုင်သမျှ ရက်ရက်စက်စက်လုပ်ကြ၊ မိစ္ဆာအကျဉ်းထောင်နဲ့ ပတ်သက်တဲ့ သတင်းအချက်အလက် တချို့ကို သူတို့ဆီကနေ ရနိုင်ရင် အကောင်းဆုံးပဲ၊ အဲဒါက ငါတို့ရဲ့ နောက်လုပ်မယ့် လှုပ်ရှားမှုတွေအတွက် အကျိုးရှိလိမ့်မယ်”

၎င်းကို ကြားပြီးနောက် အဖွဲ့က ချက်ချင်းသဘောတူလိုက်ကြသည်။

ဤရက်စက်သော သတ္တဝါများဖြစ်သည့် ကမ္ဘာခြားနတ်ဆိုးများသည် သူတို့၏ကမ္ဘာကို ကျူးကျော်ဝင်ရောက်လာခဲ့ကြသည်။ သူတို့အပေါ်တွင် အဆုံးအစမဲ့ သတ်ဖြတ်လိုစိတ်သာရှိ၏။

ထို့ကြောင့် ဤကမ္ဘာခြားနတ်ဆိုးများကို ရင်ဆိုင်ရာတွင် သနားညှာတာမှုမရှိပေ။

“ဘုရင်အဆင့် ကမ္ဘာခြားနတ်ဆိုး တစ်ကောင်ကို တိုက်ခိုက်ဖို့က သိပ်မလွယ်ဘူးနော်၊ ဒီမြေအောက်အကျဉ်းထောင်က ခံနိုင်ရည်ရှိပါ့မလား” မိုလော့က စိုးရိမ်တကြီး မေးလိုက်သည်။

သံသရာအဆင့် တိုက်ပွဲများ အားလုံးမှာ အရာရာကိုဖျက်ဆီးပစ်နိုင်လောက်သော စွမ်းအားများ ရှိကြသည်။

“အဆင်ပြေလောက်ပါတယ်၊ ကျွန်တော်တို့ဆီမှာ ဘိုးဘေးအဆောင်တွေ ရှိတယ်ဆိုတော့ သူတို့ကို တစ်ကောင်ချင်းစီ ညှဉ်းပန်းနှိပ်စက်လို့ ရတယ်” ဝူယွမ်က ခဏစဉ်းစားပြီးနောက် ပြောလိုက်သည်။

“ဒါနဲ့ စကားမစပ် မေးပါရစေ၊ အရင်တုန်းက မင်း ဘိုးဘေးအဆောင် စွမ်းအား အမျိုးမျိုးကို သုံးတာ ငါ မြင်ခဲ့တယ်၊ ဒါပေမယ့် မင်းဆီမှာ ဘိုးဘေးအဆောင် ရှိမနေတာတော့ သေချာတယ်၊ ဘယ်လို နည်းလမ်းတွေနဲ့ မင်းက ဘိုးဘေးအဆောင်တွေရဲ့ စွမ်းအားကို ကျွမ်းကျင်ပိုင်နိုင်သွားတာလဲ” ချင်းကျီက ဝူယွမ်ကို စိုက်ကြည့်ကာ မေးလိုက်သည်။

ဝူယွမ်အပေါ်တွင် မိုးကြိုး၊ ဝါးမျိုခြင်း၊ မီးတောက်နှင့် ရှင်သန်ခြင်းနှင့် သေဆုံးခြင်း စွမ်းအားများကို သူ ခံစားခဲ့ရသည်။ ၎င်းတို့အားလုံးမှာ ဘိုးဘေးအဆောင်များထံမှ စွမ်းအားများ ဖြစ်ကြသည်။

သို့သော်လည်း ဤဘိုးဘေးအဆောင်တစ်ခုမျှ ဝူယွမ်တွင်မရှိပေ။

“အင်း၊ ဘိုးဘေးအဆောင်တွေရဲ့ စွမ်းအားကို ရဖို့ ကျွန်တော့်မှာ နည်းလမ်းတချို့ ရှိပါတယ်၊ ဒါပေမယ့် သူတို့က ဘိုးဘေးအဆောင်တွေလောက်တော့ မစွမ်းထက်ပါဘူး၊ သူတို့ရဲ့ စွမ်းအား တစ်ဝက်လောက်ပဲ ရှိမယ်ထင်တယ်” ဝူယွမ်က ခေါင်းညိတ်ကာ သက်ပြင်းချလိုက်သည်။

“ဘိုးဘေးအဆောင်တစ်ခုရဲ့ စွမ်းအား တစ်ဝက်လား” ချင်းကျီ တံတွေးတစ်ချက် မျိုချလိုက်မိသည်။

“မင်းဆီမှာ ဘိုးဘေးအဆောင်လေးခုရဲ့ စွမ်းအား ရှိတယ်၊ တစ်ဝက်စီပဲ ဆိုရင်တောင် ဘိုးဘေးအဆောင် နှစ်ခု ပိုင်ဆိုင်ထားတာနဲ့ ညီမျှတယ်”

“ငါ့ဆီမှာ မင်းနဲ့ တော်တော်လေး သင့်တော်မယ့် နတ်ဘုရားရတနာ တစ်ခု ရှိတယ်၊ မင်း သုံးလို့ရမလား ကြည့်ကြည့်ပါလား”

ချင်းကျီက အစိမ်းရောင် ကျောက်စိမ်းပြားတစ်ခုကို ထုတ်ယူလိုက်သည်။

“ဒါက”

လူတိုင်း၏ မျက်နှာများပေါ်တွင် မေးခွန်းသင်္ကေတများ ပေါ်လာသည်။

“ဘုရင်သုတ်သင် ကောင်းကင်စက်ဝိုင်း”

ဟွမ်ယွမ်၏ အသံက ဝူယွမ်၏ စိတ်ထဲတွင် ချက်ချင်း ပဲ့တင်ထပ်သွားသည်။

ဤနတ်ဘုရားရတနာကို သူ ရှင်းရှင်းလင်းလင်း မှတ်မိကြောင်း ထင်ရှားလှသည်။

ချင်းကျီက ပြောလိုက်သည်။ “ဒါက ဘုရင်သုတ်သင် ကောင်းကင်စက်ဝိုင်းပဲ၊ ရှေးဟောင်း နတ်ဘုရားရတနာစာရင်းမှာ အဆင့်ခြောက်ရှိတယ်”

လူတိုင်း၏ အကြည့်များက ချင်းကျီထံသို့ ရောက်သွားပြီး သူ၏ လက်ထဲရှိ အစိမ်းရောင် ကျောက်စိမ်းပြားကို ကြည့်လိုက်ကြသည်။

နတ်ဘုရားရတနာ ဆိုသည်မှာ သန့်စင်ယွမ်ရတနာထက် သာလွန်သော အမြင့်မြတ်ဆုံး လက်နက်ဖြစ်ပြီး သာမန်ဝိညာဉ်ရတနာများကို ကျော်လွန်သွားပြီဖြစ်သည်။

၎င်း၏ တန်ဖိုးနှင့် လုပ်ဆောင်ချက်မှာ ဘိုးဘေးအဆောင်တစ်ခုထက် မနိမ့်ကျပေ။

ထိုနှစ်မျိုးတွင် ကိုယ်ပိုင်အားသာချက်များ ရှိကြပြီး တစ်ခုကိုတစ်ခု အစားထိုး၍ မရနိုင်ပေ။

နတ်ဘုရားရတနာ အများစုကို ရှေးခေတ် အဆောင်ဘိုးဘေးက ဖန်တီးခဲ့ခြင်းဖြစ်ပြီး အများအပြားမှာ ၎င်းတို့၏ စွမ်းအားကို အသုံးပြုရန် ဘိုးဘေးအဆောင်တစ်ခု လိုအပ်သည်။

သူတို့ရှေ့ရှိ ဘုရင်သုတ်သင်ကောင်းကင်စက်ဝိုင်း

ကဲ့သို့စွမ်းအားမျိုးအသုံးပြုချင်ပါက ဘိုးဘေးအဆောင်များစွာ လိုအပ်ပေမည်။

ချင်းကျီက အစိမ်းရောင် ကျောက်စိမ်းပြားကို ဝူယွမ်ထံသို့ ပေးလိုက်ရင်း ပြုံးကာ ပြောလိုက်သည်။

“ဒါကို ရှေးဟောင်း အပျက်အစီးတစ်ခုမှာ ငါ နောက်ဆုံး ရှာတွေ့ခဲ့တာပဲ၊ သူ့ကို အသက်သွင်းဖို့ ဘိုးဘေးအဆောင် လေးခု လိုအပ်တယ်၊ မူလကတော့ ဒါကို အခြား ကမ္ဘာခြားနတ်ဆိုးဘုရင်တွေကို တိုက်ခိုက်ရင် အသုံးပြုဖို့ စီစဉ်ထားခဲ့‌တာ၊အခု ကမ္ဘာခြားနတ်ဆိုး ဘုရင် နှစ်ကောင် ပါလာတော့ မြေအောက်ကမ္ဘာ ဘုရင်ကို ထိန်းထားဖို့ မင်းတို့က မိုးကြိုးဘိုးဘေးအဆောင်နဲ့ ဝါးမျိုခြင်းဘိုးဘေးအဆောင်ကိုလည်း လိုအပ်နေလို့ ဒါကို ငါ ထုတ်လာခဲ့တာပဲ”

“အခု ကောင်းကင် မြေအောက်ကမ္ဘာ ဘုရင်က ထွက်ပြေးသွားပြီဆိုတော့ ဒီဘုရင်သုတ်သင် ကောင်းကင်စက်ဝိုင်းက ငါ့ဆီမှာ သိပ်အသုံးမဝင်တော့ဘူး၊ ဘိုးဘေးအဆောင်တွေ မပါဘဲနဲ့ သူ့ရဲ့ စွမ်းအားကို မထုတ်လွှတ်နိုင်ဘူး၊ မင်းရဲ့ ဘိုးဘေးအဆောင် စွမ်းအားက ဘုရင်သုတ်သင် ကောင်းကင်စက်ဝိုင်းကို အသုံးပြုနိုင်မလားဆိုတာ စမ်းကြည့်ပါဦး၊ အကယ်၍ အောင်မြင်ခဲ့မယ်ဆိုရင် ဒီနတ်ဘုရားရတနာက မင်းနဲ့ အစစ်အမှန် ထိုက်တန်တာပဲ”