အခန်း ၁၈
Vol. 2 Ch. 18
အခန်း ၁၈ ဖြိုခွင်းပြီး ပေါ်ပေါ်တင်တင် ကာကွယ်ပေးခြင်း
"သူတော်စင်အဆင့် ရတနာ..." မဝေးလှသော နေရာရှိ လီယွမ်က မျက်လုံးပြူးကာ စိုက်ကြည့်နေခဲ့ပြီး ချင်လော့က သူတော်စင်အဆင့် ရတနာတစ်ခုကို ချက်ချင်း အသုံးပြုလိမ့်မည်ဟု မမျှော်လင့်ထားခဲ့ချေ။
ချန်မို၏ မျက်လုံးများက ထိတ်လန့်မှုကြောင့် ပြူးကျယ်သွားခဲ့၏။
"အား..."
သူ၏ ချစ်သူမှာ ခြိမ်းခြောက်ခံနေရပြီဖြစ်ကြောင်း သူ ခံစားလိုက်ရပြီး သူ၏ ကိုယ်ပိုင် အစွမ်းအစမဲ့မှုကို သူ မုန်းတီးမိလေသည်။
သို့သော် သူတော်စင်အဆင့် ရတနာ၏ ကြီးမားသော ဖိအားအောက်တွင် သူသည် လှုပ်ရှား၍ မရနိုင်ခဲ့ချေ။
"ဒါ ဘယ်လိုလုပ် ဖြစ်နိုင်မှာလဲ..." လင်းရွှမ်၏ မျက်လုံးများတွင် ထိတ်လန့်မှု အရိပ်အယောင်တစ်ခု ဖြတ်ပြေးသွားခဲ့၏။
ထိပ်တိုက်ရင်ဆိုင်ရမယ် ဟုတ်လား... မဖြစ်နိုင်ဘူး...
ဘန်း...
သူတော်စင်အဆင့် ရတနာက ရထားလုံးကို ပြင်းထန်စွာ ဝင်ဆောင့်သွားပြီး ၎င်းကို ချက်ချင်း အစိတ်စိတ်အမွှာမွှာ ဖြစ်သွားစေခဲ့သည်။
ချင်လော့က အလွန် သတိထားခဲ့၏။ သူ မည်သူ့ကိုမျှ မသတ်ခဲ့ချေ။
ရထားလုံး ပျက်စီးသွားသဖြင့် လူနှစ်ဦးမှာ သဘာဝကျကျပင် ပေါ်ထွက်လာခဲ့လေသည်။
ချင်လော့က ချန်မိုကို ကန်လိုက်ပြီး ပြောဆိုလိုက်၏။
"အချစ်ရူးလေး... သေချာ ကြည့်စမ်း..."
လူတိုင်း၏ အကြည့်က ကုချင်းရွှဲ့နှင့် လင်းရွှမ်အပေါ်သို့ ချက်ချင်း ကျရောက်သွားခဲ့သည်။ ဤအခိုက်အတန့်တွင် လင်းရွှမ်က ကုချင်းရွှဲ့၏ရှေ့၌ ရပ်ကာ ချင်လော့၏ တိုက်ခိုက်မှုကို ကုချင်းရွှဲ့ ခံနိုင်ရည်ရှိအောင် ကူညီပေးရန် ကြိုးစားနေခဲ့၏။
သို့သော် ချင်လော့က ရပ်တန့်သွားခဲ့ပြီး သူတို့နှစ်ဦးမှာ အာရုံစိုက်ရာ ဗဟိုချက် ဖြစ်လာခဲ့လေသည်။
"တကယ်ကြီး နှစ်ယောက်လုံး ရှိနေတာလား..."
"ဘုရားရေ... တကယ်ကြီး အဲဒီလောက်တောင် စိတ်လှုပ်ရှားဖို့ ကောင်းနေတာလား..."
"အမျိုးသားတစ်ယောက်နဲ့ အမျိုးသမီးတစ်ယောက် အခန်းထဲမှာ နှစ်ယောက်တည်း... ဘယ်လောက်တောင် စိတ်လှုပ်ရှားဖို့ ကောင်းလိုက်လဲ..."
"အဲဒီလူက ဘယ်သူလဲ... မင်းသားတစ်ပါးဆီက အမျိုးသမီးကို ဘယ်လိုများ လုယူရဲတာလဲ..."
ချန်မိုမှာလည်း ကြက်သေသေသွားခဲ့၏။ သူက လင်းရွှမ်ကို သိရှိပြီး ယခင်က သူမနှင့် မိတ်ဆွေဖွဲ့ရန် ရည်ရွယ်ထားခဲ့လေသည်။
သို့သော် သူ့အတွက် အလွန် အံ့အားသင့်စရာကောင်းသည်မှာ လင်းရွှမ်က သူ့ထက် လက်ဦးမှု ရယူသွားခဲ့ပြီး သူ အလွန်အမင်း စိတ်ပျက်ဝမ်းနည်းသွားခဲ့ရပေသည်။
ချင်လော့၏ အကြည့်က လီယွမ်အပေါ်သို့ ကျရောက်သွားပြီး သူက မေးမြန်းလိုက်၏။ "ဒီက သခင်ကြီး... ငါရဲ့အနာဂတ်ဇနီးလောင်းကို တစ်ယောက်ယောက်က သွေးဆောင်ဖြားယောင်းနေတယ်... ဘယ်လို လုပ်သင့်တယ်လို့ ခင်ဗျား ထင်လဲ..."
" အမှောင်ထဲကနေ တစ်ယောက်ယောက်က ငါတို့ကို ချောင်းကြည့်နေတယ်... သူတို့က အဲဒီကောင်လေးနဲ့ ပူးပေါင်းကြံစည်နေပုံရတယ်..." ရှီးဟွမ်၏ အသံက ချင်လော့အား သတိပေးလိုက်လေသည်။
"သူက သူ့ရဲ့ အစောင့်အရှောက် ဖြစ်နိုင်တယ်..."
လီယွမ် လုံးလုံးလျားလျား ကြက်သေသေသွားခဲ့၏။ သူက လူတစ်ယောက်ကို လာကြိုရုံသက်သက်သာ ဖြစ်လေသည်။ သူ့ကို အဘယ်ကြောင့် ဤကဲ့သို့ ဆက်ဆံရသနည်း။
ဘယ်လို ဖြေရမလဲဆိုတာ သူ မသိတော့ချေ။
ကုချင်းရွှဲ့က သူ၏ အခက်အခဲကို သတိပြုမိသွားပုံရပြီး သူ့ကို ပြတ်သားစွာ ကူညီပေးလိုက်လေသည်။လီယွမ်က သူ၏ နဖူးမှ မရှိသော ချွေးပေါက်များကို သုတ်လိုက်ပြီး စိတ်ထဲမှ တွေးလိုက်၏။
'တကယ့် လူကောင်းပဲ...'
"လင်းရွှမ်နဲ့ ကျွန်မက တယောက်နဲ့တယောက် ချစ်နေကြတာပါ... အဲဒါက ဘယ်လိုလုပ် သွေးဆောင်ဖြားယောင်းတာ ဖြစ်နိုင်မှာလဲ..." ကုချင်းရွှဲ့၏ အချစ်ရူး စိတ်က လင်းရွှမ် ပြင်ဆင်ထားသော ရှင်းပြချက်ကို လုံးလုံးလျားလျား အသုံးမဝင် ဖြစ်သွားစေခဲ့ပေသည်။
[လင်းရွှမ်သည် ဆုံးရှုံးမှုအချို့ကို ခံစားလိုက်ရပြီး ကံကြမ္မာတန်ဖိုး အမှတ် ၁၀,၀၀၀ ဆုံးရှုံးသွားပါသည်။ ပိုင်ရှင် ရရှိလာသော ဗီလိန်မှတ် ၁၀,၀၀၀...]
"ကျွတ်ကျွတ်... ချီးကျူးစရာ သတ္တိပါပဲလား..." ချင်လော့က လက်ခုပ်တီးလိုက်၏။
"ငါ မမှားဘူးဆိုရင် ငါတို့ရဲ့ စေ့စပ်မှုကို ချင်ဧကရာဇ်က စီစဉ်ပေးခဲ့တာလေ... အခု မင်းက တခြားတစ်ယောက်နဲ့ ခိုးပြေးချင်တယ်လို့ ပြောနေတာလား..."
ချင်လော့၏ လေသံက ပြင်းထန်သွားခဲ့၏။ "မင်းက ချင်ဧကရာဇ်ရဲ့ အမိန့်တွေကို ဖီဆန်နေတာလား... ငါ့ရဲ့ မဟာချင် တော်ဝင်မိသားစုကို စော်ကားနေတာလား..."
စကားလုံးတိုင်းက ကုချင်းရွှဲ့၏ မျက်နှာကို ဖြူလျော့သွားစေခဲ့သည်။ သူမ၏ နှုတ်ခမ်းများ လှုပ်ရှားသွားသော်လည်း သူမ ဘာပြောချင်သည်ကို ရှင်းလင်းစွာ မသိရချေ။
လင်းရွှမ်က ချက်ချင်း စကားပြောလိုက်ပြီး ချင်လော့ကို ကြည့်ကာ ပြောဆိုလိုက်၏။ "နဝမမင်းသား... ကုချင်းရွှဲ့နဲ့ ကျွန်တော်က... သခင်မလေးနဲ့ ကျွန်တော်က ဘယ်စည်းမှ မကျော်ရသေးပါဘူး... ကျွန်တော်တို့ရဲ့ ဆက်ဆံရေးက လုံးဝ အပြစ်ကင်းပါတယ်..."
"အပြစ်ကင်းတယ် ဟုတ်လား..." ချင်လော့က လှောင်ပြောင်လိုက်သည်။
မင်းတို့နှစ်ယောက်ကို လက်ပူးလက်ကြပ် ဖမ်းမိဖို့ တကယ် လိုသေးလို့လား...
"ဒီနေ့ မင်းတို့က ငါ့ကို ဒီလောက်တောင် အရှက်ခွဲရဲတယ်ဆိုတော့ မင်းတို့ကို ငါ သေချာပေါက် သတ်ပစ်မယ်..."
Passive ကစားပြီး ဇာတ်ကောင်ကို ဖွံ့ဖြိုးအောင် လုပ်တာက အကျိုးမရှိပါဘူး... King အဆင့် ရောက်တဲ့အထိ ရှင်သန်ဖို့ ကြိုးစားတာကလည်း ရွေးချယ်စရာ မဟုတ်ပါဘူး...
ဗီလိန်တစ်ယောက်အနေဖြင့် "တိုက်" ဟူသော စကားလုံး တစ်လုံးတည်းသာ ရှိလေသည်။
ဓားတစ်ချက်တည်းဖြင့် နိမိတ်လေးပါးဓားသိုင်းက မရပ်မနား ရွာကျလာပြီး ဓားမိုးရေစက်များက လင်းရွှမ်ကို လွှမ်းခြုံသွားရာ သူ၏ အမူအရာကို ချက်ချင်း ပြောင်းလဲသွားစေခဲ့ပေသည်။
ဘယ်ကနေ ပေါ်လာမှန်းမသိသော ဤမင်းသားတွင် ဤမျှ ကြီးမားသော စွမ်းအား ရှိနေလိမ့်မည်ဟု သူ မည်သည့်အခါကမျှ မမျှော်လင့်ထားခဲ့ချေ။
"ပြီးပြည့်စုံသောအဆင့် ဓားသိုင်း..." ခပ်လှမ်းလှမ်းမှ လီယွမ်က အာမေဍိတ်သံ ပြုလိုက်ပြီး သူ၏ အသံတွင် တုန်လှုပ်မှုများ ပြည့်နှက်နေခဲ့၏။
သိုင်းပညာတစ်ခုကို ပြီးပြည့်စုံသောအဆင့်သို့ ပြောင်းလဲနိုင်စွမ်းရှိခြင်းမှာ ပါရမီရှင်ဆယ်သိန်းတွင် တစ်ယောက်သာ ရှိသော ပါရမီရှင်တစ်ဦး ဖြစ်နေပြီ ဖြစ်လေသည်။
ငါ့ရှေ့က ချင်လော့က မဟာချင်အင်ပါယာရဲ့ သွေးမျိုးဆက်ဆိုတဲ့ နာမည်နဲ့ အမှန်တကယ်ကို ထိုက်တန်ပါပေတယ်...
လင်းရွှမ်က အော်ဟစ်လိုက်၏။ "သေမျိုးကင်းစင်ရွှေခန္ဓာကျင့်စဉ်..."
သူ၏ ပတ်လည်တွင် စူးရှတောက်ပသော အလင်းရောင်တစ်ခု လင်းလက်သွားပြီးနောက် သူက ချင်လော့ဆီသို့ လက်သီးတစ်ချက် ထိုးချလိုက်သည်။
မီးတောက်လက်ဝါး...
ကြီးမားသော လက်ဝါးရာကြီးတစ်ခုက ချင်လော့ဆီသို့ ပြင်းထန်စွာ ဝင်ရောက်လာခဲ့၏။
ဘန်း...
သူတို့နှစ်ဦး ရင်ဆိုင်မိသွားကြသည်။ လင်းရွှမ်မှာ သူနှင့် ယှဉ်ပြိုင်နိုင်စွမ်းမရှိဘဲ လွင့်စင်သွားကာ မြေပြင်ပေါ်သို့ ပြင်းထန်စွာ ကျဆင်းသွားခဲ့သည်။ အစိမ်းရောင် အလင်းတန်းတစ်ခုက သူ၏ ခန္ဓာကိုယ်ပေါ်တွင် ပေါ်လာပြီး သူ၏ ဒဏ်ရာများက အချိန်တိုအတွင်းမှာပင် ပျောက်ကင်းသွားခဲ့လေသည်။
"ဟင်း... ဒါက စိတ်ဝင်စားစရာ ကောင်းလာပြီပဲ... ဒါပေမဲ့ ကံမကောင်းစွာနဲ့ပဲ အဲဒါတွေ အကုန်လုံးက အလကားပါပဲ..."
"ထိုက်ရွှီခေါင်းလောင်းကို ရိုက်ခွဲလိုက်..." ချင်လော့က ဟိန်းဟောက်လိုက်ရာ ထိုက်ရွှီခေါင်းလောင်းက နားကွဲမတတ် အသံတစ်ခုကို ထုတ်လွှတ်လိုက်ပြီး ဝိညာဉ်ကို တိုက်ရိုက် သက်ရောက်သွားစေခဲ့ပေသည်။
ဒေါင်းးး...
ခေါင်းလောင်းသံ ထွက်ပေါ်လာသည်နှင့် တစ်ပြိုင်နက် ထိုနေရာရှိ လူတိုင်းနီးပါး ကြက်သေသေသွားခဲ့ကြ၏။
လင်းရွှမ်လည်း တစ်ခဏမျှ အသိလွတ်သွားခဲ့လေသည်။
သူ၏ ခန္ဓာကိုယ်မှ ထွက်ပေါ်နေသော ရွှေရောင်အလင်းတန်းက ဤအခိုက်အတန့်တွင် အနည်းငယ် မှေးမှိန်သွားခဲ့လေသည်။
မင်းရဲ့ အားနည်းချက်ကို အခွင့်ကောင်းယူပြီး မင်းကို သတ်ပစ်မယ်...
ချင်လော့က ဝှစ်ခနဲ ပြေးထွက်သွားပြီး နိတ်မိတ်လေးပါးဓားသိုင်း၏ စွမ်းအားကို ထုတ်ဖော်လိုက်ပေသည်။
သူ၏ လက်ထဲရှိ ဓားရှည်က လင်းရွှမ်၏ ရင်ဘတ်ဆီသို့ တည့်မတ်စွာ ချိန်ရွယ်ထား၏။ သူက ဒြပ်ငါးပါးဝိညာဉ်ခန္ဓာကို မြည်းစမ်းတော့မည်ဆိုသည်မှာ အံ့သြစရာ မဟုတ်ချေ။
"တကယ်လို့ အဲဒီလူက လှုပ်ရှားရဲရင် သူ့ကို ဖိနှိပ်လိုက်..." ချင်လော့၏ အသံက ရှီးဟွမ်၏ နားထဲတွင် ပဲ့တင်ထပ်သွားခဲ့သည်။
"ကောင်းပြီ..."
ချင်လော့က ကြမ်းတမ်းသော ခွန်အားဖြင့် သူ၏ရှေ့ရှိ ကံကြမ္မာသားတော်ကို သတ်ဖြတ်နိုင်မလား ဆိုသည်ကို စမ်းသပ်ချင်ခဲ့ခြင်း ဖြစ်လေသည်။
ရွှမ့.. ဘန်း...
"အစ်ကိုလင်းရွှမ်..." ကုချင်းရွှဲ့၏ နှလုံးကွဲကြေမတတ် အသံက ထွက်ပေါ်လာခဲ့၏။
လင်းရွှမ်မှာ ပြိုလဲသွားပြီး သူ၏ အမူအရာက ကြမ်းကြုတ်သွားကာ ဟိန်းဟောက်လိုက်သည်။
"ဖွင့်စမ်း... ဖွင့်စမ်း... ဖွင့်စမ်း..."
ဘုန်း...
သူ၏ ဒြပ်ငါးပါးဝိညာဉ်ခန္ဓာက အရူးအမူး အလုပ်လုပ်နေပြီး သူ၏ ဖျက်ဆီး၍မရနိုင်သော ရွှေခန္ဓာကိုယ်ကို ထိန်းသိမ်းရန်အတွက် ၎င်းအားလုံးကို စွမ်းအင်တစ်ခုအဖြစ်သို့ ပြောင်းလဲလိုက်လေသည်။
ဖူး...
သူက သွေးခဲများပင် ပါဝင်နေသော သွေးတစ်လုတ်ကို အန်ထုတ်လိုက်ရ၏။
သေစေနိုင်သော တိုက်ခိုက်မှုတစ်ခုပင်။
သူက ချင်လော့၏ တိုက်ခိုက်မှုကြောင့် ပြင်းထန်စွာ ဒဏ်ရာရသွားခဲ့ပေသည်။
[လင်းရွှမ်သည် ပြင်းထန်စွာ ဒဏ်ရာရသွားပြီး သူ၏ အနိုင်ယူ၍မရနိုင်သော ယုံကြည်ချက် ပြိုလဲသွားပါသည်။ သူ ကံကြမ္မာတန်ဖိုး အမှတ် ၁၀၀,၀၀၀ ဆုံးရှုံးသွားပြီး ပိုင်ရှင် ရရှိလာသော ဗီလိန်မှတ် ၁၀၀,၀၀၀...]
တိုက်ချက်က မလုံလောက်ဘူးလား...
သူက အရူးတစ်ယောက်ကဲ့သို့ ဖြစ်နေခဲ့၏။ သူက သူ၏ လက်ဝယ်ရှိ တားမြစ်ထားသော အရာတခုကို ထုတ်ယူပြီး ချင်လော့ကို အရှင်လတ်လတ် ဖိနှိပ်ချင်နေခဲ့ပေသည်။
"မလှုပ်နဲ့... တစ်ယောက်ယောက် လာနေတယ်..."
ကျယ်လောင်သော အသံတစ်သံက သူ၏ နားထဲတွင် ပဲ့တင်ထပ်သွားခဲ့၏။ တစ်ချိန်တည်းမှာပင် အားကောင်းသော အငွေ့အသက်က ချင်လော့နှင့် လင်းရွှမ်ကို ချက်ချင်း ပစ်မှတ်ထားလိုက်လေသည်။
"အရေးအကြီးဆုံး နေရာဖြစ်တဲ့ မြို့တော်မှာ ဘယ်သူက လှုပ်ရှားရဲတာလဲ..."
"မဟာချင် ဥပဒေက မရှိဘူးထင်နေတာလား..."
ဘုန်း...
အားကောင်းသော အငွေ့အသက်က ချင်လော့ကို ယိမ်းယိုင်သွားစေခဲ့ပြီး သက်လတ်ပိုင်းအရွယ် အမျိုးသားတစ်ဦးက လေထဲတွင် ပေါ်လာကာ ချင်လော့နှင့် လင်းရွှမ်ကို အေးစက်စွာ ကြည့်ရှုလိုက်ပေသည်။
"မင်းတို့ ငါ့ကို ရှင်းပြရင် ကောင်းမယ်... မဟုတ်ရင် ဒီနေ့ မင်းတို့ကို နတ်ဆိုးနှိမ်နင်းရေးဌာနမှာ သေချာပေါက် အကျဉ်းချပစ်မယ်..."
လင်းရွှမ်က ချက်ချင်း လက်အုပ်ချီကာ နှုတ်ဆက်လိုက်ပြီး ပြောဆိုလိုက်၏။ "နတ်ဆိုးနှိမ်နင်းရေးဌာနက တပ်မှူး လင်းရွှမ်က တပ်မှူးကြီး လုကို ဂါရဝပြုပါတယ်..."
လုချန်က လင်းရွှမ်ကို တစ်ချက်ကြည့်လိုက်ရာ သူ၏ နှုတ်ခမ်းများတွင် အပြုံးတစ်ခု ပေါ်လာခဲ့သည်။ "မဆိုးဘူး... မဆိုးဘူး... မတွေ့ရတာ ကြာပြီ... မင်းက နတ်စွမ်းအင်အဆင့် အထွတ်အထိပ်ကိုတောင် ရောက်နေပြီပဲ... ကြည့်ရတာ နတ်ဘုရားအသွင်ပြောင်းအဆင့်နဲ့ တစ်လှမ်းပဲ ကွာတော့ပုံပဲ..."
လုချန်၏ အကြည့်က ချင်လော့ဆီသို့ ရွေ့လျားသွားပြီး သူ၏ နှုတ်ခမ်းများမှ တိုးတိတ်သော အာမေဍိတ်သံတစ်ခု ထွက်ပေါ်လာခဲ့၏။ "ဒီလောက် ငယ်ရွယ်တဲ့ နတ်စွမ်းအင်အဆင့် ၉ ဟုတ်လား..."
ချင်လော့က သူ့ကို တည်ငြိမ်စွာ ကြည့်ကာ ပြောဆိုလိုက်သည်။ "ငါက မဟာချင်အင်ပါယာရဲ့ နဝမမင်းသား ချင်လော့ပဲ... နတ်ဆိုးနှိမ်နင်းရေးဌာနက တပ်မှူး လင်းရွှမ်က ငါ့ရဲ့ စေ့စပ်ထားသူနဲ့ တိတ်တဆိတ် တွေ့ဆုံခဲ့တယ်... တပ်မှူးကြီး လု... ကျေးဇူးပြုပြီး လူသိရှင်ကြား တရားစီရင်ပေးပါ..."
လုချန်က မျက်မှောင်ကြုတ်သွားပြီး လင်းရွှမ်ကို ကြည့်ကာ မေးမြန်းလိုက်၏။ "ဒါ အမှန်ပဲလား..."
လင်းရွှမ်က ချက်ချင်း ပြန်လည်ဖြေကြားလိုက်သည်။ "ဒါ အထင်လွဲမှုသက်သက်ပါ... တပ်မှူးကြီး လု... ကျေးဇူးပြုပြီး စုံစမ်းစစ်ဆေးပေးပါ..."
လုချန်က ဖြစ်ပျက်ခဲ့သမျှကို လျှို့ဝှက်စွာ ကြည့်ရှုနေခဲ့ပြီး သူ၏ မေးခွန်းမှာ လင်းရွှမ်ကို ကာကွယ်ရန် ဆင်ခြေတစ်ခုသာ ဖြစ်လေသည်။
"အထင်လွဲတာဆိုတော့ ဒီကိစ္စကို ဒီမှာတင် အဆုံးသတ်လိုက်ကြရအောင်..." သူက လီယွမ်ကို တစ်ချက်ကြည့်ကာ တည်ငြိမ်စွာ ပြောဆိုလိုက်၏။
"မင်းသားရဲ့ ကိုယ်ပိုင်အမှတ်အသားကို အင်ပါယာမျိုးနွယ်တရားရုံးမှာ စစ်ဆေးအတည်ပြုဖို့ လိုသေးလား..."
လီယွမ်က ချက်ချင်း ခေါင်းငုံ့ကာ ပြောဆိုလိုက်သည်။ "တပ်မှူးကြီး လုကို သတင်းပို့ပါတယ်... အဲဒါကို အင်ပါယာမျိုးနွယ်တရားရုံးမှာ စစ်ဆေးအတည်ပြုဖို့ လိုပါသေးတယ်..."
သူဆိုလိုသည်မှာ ချင်လော့သည် မင်းသားတစ်ပါး မဖြစ်သေးကြောင်းပင်။
စိတ်ဝင်စားစရာပဲ...
ချင်လော့၏ နှုတ်ခမ်းများက အနည်းငယ် တွန့်ကွေးသွားခဲ့၏။ စိန်ခေါ်မှုများက အရာရာကို စိတ်ဝင်စားစရာ ဖြစ်စေလေသည်။
လင်းရွှမ်က ချင်လော့ကို အနည်းငယ် ကျေနပ်နေသော အမူအရာဖြင့် ပြုံးပြကာ စိတ်ထဲမှ တွေးလိုက်၏။
'ဘာမင်းသားလဲ... သူက ဘယ်ကနေ ပေါ်လာမှန်းမသိတဲ့ တောသား တစ်ယောက်ပါပဲ...'
"ဒီနေ့ အရှက်ခွဲခံရမှုကို အနာဂတ်မှာ ဆယ်ဆ ဒါမှမဟုတ် အဆတစ်ရာလောက် ပြန်ဆပ်ပေးမယ်..." လင်းရွှမ်က စိတ်ထဲတွင် တိတ်တဆိတ် ကျိန်ဆိုလိုက်လေသည်။
သူ၏ စိတ်ထဲတွင် ချင်လော့မှာ သေလူတစ်ယောက် ဖြစ်နေပြီဖြစ်ပြီး သူက ချင်လော့ကို သေချာပေါက် သတ်မည် ဖြစ်ပေသည်။
ချင်လော့က ပြုံးလိုက်ပြီး ကုချင်းရွှဲ့ဆီသို့ လျှောက်သွားကာ လင်းရွှမ်၏ ဒေါသထွက်နေသော အကြည့်အောက်တွင် ကုချင်းရွှဲ့ကို သူ၏ ရင်ခွင်ထဲသို့ အတင်း ဆွဲသွင်းလိုက်လေသည်။
"အထင်လွဲတာဆိုတော့ အရာအားလုံးကို ပွင့်ပွင့်လင်းလင်း ဆွေးနွေးလို့ ရတာပေါ့... ဒါပေမဲ့..."
သူက လင်းရွှမ်ကို ကြည့်ကာ သရော်သလို ပြောဆိုလိုက်၏။ "ဒီအမျိုးသမီးက ငါနဲ့ မထိုက်တန်ဘူးလို့ ငါ ထင်တယ်... သူမက ငါ့ရဲ့ မိန်းမ မဖြစ်နိုင်ဘူးဆိုတော့ ငါ့ရဲ့ ကိုယ်လုပ်တော် လုပ်ရင်ကော ဘယ်လိုလဲ..."
[လင်းရွှမ်၏ စိတ်အခြေအနေ ပြိုလဲသွားပါသည်။ ဆုံးရှုံးသွားသော ကံကြမ္မာတန်ဖိုး အမှတ် ၅၀,၀၀၀၊ ပိုင်ရှင် ရရှိလာသော ဗီလိန်မှတ် ၅၀,၀၀၀...]
ကုချင်းရွှဲ့သည် လင်းရွှမ်၏ နှလုံးသားထဲတွင် အလွန် အရေးပါသော နေရာတစ်ခု ရယူထားကြောင်း ဤသည်က ရှင်းလင်းစွာ ပြသနေပေ၏။ အချစ်ရူးတစ်ယောက် ဖြစ်ခြင်းက အမျိုးသမီးများ၏ လက္ခဏာရပ်တစ်ခုသာ မဟုတ်ဘဲ အမျိုးသားများ၏ လက္ခဏာရပ်လည်း ဖြစ်လေသည်။
"ရှင်..."
ကုချင်းရွှဲ့က ခုခံရန် ကြိုးစားလိုက်သော်လည်း သူမ၏ နားထဲတွင် ချင်လော့၏ အသံ ပဲ့တင်ထပ်လာသည်ကို ကြားလိုက်ရ၏။
"လှုပ်ရဲရင် လှုပ်ကြည့်... မင်းရဲ့ မိသားစုတစ်ခုလုံးကို ငါ သုတ်သင်ပစ်မယ်..."
တစ်ချိန်တည်းမှာပင် ချင်လော့က စိတ်ထဲမှ စနစ်ကို မေးမြန်းလိုက်သည်။ "ငါ့လူတွေ ဘယ်တော့ ရောက်လာမလဲ..."
ကျောထောက်နောက်ခံပေးမယ့်သူ မရှိရင် ဘဝက ခက်ခဲတယ်လေ... သူက ဗီလိန်တစ်ယောက်ဆိုတော့ အနည်းဆုံးတော့ ဗီလိန်တစ်ယောက်ရဲ့ အငွေ့အသက် ရှိသင့်တာပေါ့... ကံကြမ္မာသားတော်ရဲ့ ဟန့်တားခြင်းကို ခံရတယ်ဆိုတာ ဘယ်လို ယုတ္တိမျိုးလဲ...
[ကြိုးစားမှု တစ်ကြိမ်လျှင် ဗီလိန်မှတ် ၁၀,၀၀၀ ကုန်ကျမည်ဖြစ်ပြီး ခန့်မှန်းချက် တစ်ခု ပြုလုပ်နိုင်ပါသည်...]
"ဘုရားရေ... စနစ်လေး... မင်းက အခြေအနေရှုပ်ထွေးနေတုန်း အခွင့်ကောင်းယူနေတာပဲ..."
"စလိုက်ကြရအောင်..."
[ဗီလိန်မှတ် ၁၀,၀၀၀ သုံးစွဲလိုက်ပါသည်...]
[သွားရောက်မည့် နေရာမှာ မဟာချင်အင်ပါယာ မြို့တော်မှ သုံးရက်ခရီး ကွာဝေးပါသည်... မမျှော်လင့်ထားသော အခြေအနေများ မရှိပါက သုံးရက်အတွင်း ရောက်ရှိပါမည်...]
"ယုံကြည်စိတ်ချရရဲ့လား..."
[မင်း ငါ့ကို မယုံဘူးလား... ဒါမှမဟုတ် ငါ ထွက်သွားရမလား...]
ဒီစနစ်လေးက ဒေါသတော်တော် ကြီးတာပဲ...
ချင်လော့က လင်းရွှမ်ထံသို့ လှည့်ကာ ပြုံးရင်း ပြောဆိုလိုက်၏။ "နောက်သုံးရက်နေရင် ငါ့ရဲ့ ကိုယ်လုပ်တော် ယူတဲ့ပွဲကို မင်း လာတက်ရင်ကော ဘယ်လိုလဲ..."
လူအချို့က သဘောတူသည်ဖြစ်စေ၊ သဘောမတူသည်ဖြစ်စေ သုံးရက်ကြာပြီးနောက် မည်သူကမျှ သဘောမတူဘဲ နေလိမ့်မည်မဟုတ်ဟု သူ ခံစားရပေသည်။