အခန်း (၁၇၉-၁၈၀)

အခန်း (၁၇၉)

နီယိုအော်ကပ်စ်မှာတော့ မိုက်ကယ် နဲ့ ဖတ်ချ် တို့ဟာ အက်ဂ်နက်စ်နဲ့ ဂျာကူတို့ရဲ့ တစ်ဦးချင်း စမ်းသပ်တိုက်ခိုက်ပွဲကို စူးစမ်းလိုတဲ့ စိတ်နဲ့ ကြည့်နေကြတယ်။

ရီနေးတားရဲ့ လူတွေက ယူနာရဲ့ လူတစ်ပိုင်းသတ္တဝါ အစောင့်အရှောက်တွေကို ဘေ့စ်ဘောအကြောင်း သင်ပေးပြီးတဲ့နောက်မှာတော့ သူတို့ကလည်း ကျေးဇူးတုံ့ပြန်တဲ့အနေနဲ့ ခန္ဓာကိုယ်ပိုင်းဆိုင်ရာ အတတ်ပညာအကြောင်း လိုအပ်နေတဲ့သင်ခန်းစာအချို့ကို ပြန်ပြီး သင်ပေးခဲ့ကြတယ်။

အက်ဂ်နက်စ် ဟာ မောင့်ဂိုမာရီ မိသားစုရဲ့ နာမည်ကြီး တိုက်ခိုက်ရေး အော့ခ်အမျိုးသမီးအိမ်စေ ဖြစ်ပြီး သေရေးရှင်ရေး အတွေ့အကြုံတွေ အများကြီး ရှိခဲ့သူပါ။ ဒါကြောင့် သူမဟာ ပါရမီရှိကြပေမဲ့ တိုက်ခိုက်အတွေ့အကြုံနုနယ်သေးတဲ့ ဆင့်ကဲပြောင်းလဲပြီးစ ဒရာဂွန်ဘွန်းတွေကို သင်ပေးစရာတွေ အများကြီး ရှိနေတာပေါ့။

"မင်းရဲ့ အစောင့်အရှောက်က တကယ်ကော ဘယ်လောက်အထိ သန်မာလဲ" လို့ မိုက်ကယ် က သူ့ဘေးမှာ ထိုင်ပြီး ဖတ်ချ်ကို ပွတ်သပ်ပေးနေတဲ့ ယူနာကို မေးလိုက်တယ်။

"သူမက ကောင်းကင်ဘုံစစ်သည်တော်များအဖွဲ့ က စစ်သည်တော်လေ။ ပုဆိန်သိုင်းပါရဂူဖြစ်တဲ့ ခရူဂါကိုယ်တိုင် သင်ပေးထားတဲ့ နာမည်ကြီး ကြယ်ခုနစ်ပွင့် ကိုယ်ခံပညာရပ်မန္တန် အသုံးပြုသူလေ။ ပြောရရင် ခရူဂါ ကလည်း အော့ခ်တစ်ယောက်ပါပဲ"

မိုက်ကယ်က အက်ဂ်နက်စ် ကို ကြည့်လိုက်တဲ့အခါ သူမရဲ့ ခန္ဓာကိုယ်ထဲက မှော်စွမ်းအင် တွေက ဘယ်လောက်တောင် စနစ်တကျ ရှိနေလဲဆိုတာကို တွေ့လိုက်ရတယ်။ သူမ လှုပ်ရှားလိုက်တဲ့အခါ မှော်စွမ်းအင် တွေဟာ သူမရဲ့ သွေးကြောတွေထဲမှာ ဟန်ချက်ညီညီ စီးဆင်းနေပြီး အားအင်တွေ ဒါမှမဟုတ် ခွန်အားတွေ အလေအလွင့် မရှိဘဲ ခန္ဓာကိုယ်ရဲ့ ကြံ့ခိုင်မှုကို မြှင့်တင်ပေးနေတာပါ။

တစ်ဖက်မှာတော့ ဂျာကူ ဟာ မယုံနိုင်လောက်အောင် များပြားတဲ့ မှော်စွမ်းအင်တွေကို ပိုင်ဆိုင်ထားပေမဲ့ အဲဒါတွေကို ထိန်းချုပ်နိုင်စွမ်းတော့ မရှိသလောက်ပါပဲ။ အဲဒါက သူတို့ နှစ်ယောက်ကြားက အတွေ့အကြုံ ကွာခြားချက်ပါပဲ။

"ကျွန်မ စပါတော့မယ်" လို့ အက်ဂ်နက်စ် က သူမရဲ့ နှစ်ဖက်သွား တိုက်ပွဲဝင် ပုဆိန်ကို လေထဲမြှောက်ရင်း ဂျာကူ ကို သတိပေးလိုက်တယ်။

"ကျေးဇူးပြုပြီး ညှာပေးပါဦး" လို့ ဂျာကူက နှိမ့်ချတဲ့ပုံစံနဲ့ ဟာသလုပ်ပြီး ပြောလိုက်တယ်။ ဒါပေမဲ့ သူက ရုတ်တရက် လှုပ်ရှားမှုတွေအတွက် အသင့်ဖြစ်နေအောင် သူ့ရဲ့ ညာဘက်လက်ကိုတော့ ဓားရိုးပေါ်မှာ တင်ထားခဲ့ပါတယ်။

အက်ဂ်နက်စ်က ခြေတစ်လှမ်းတိုးလိုက်ပြီး သူမရဲ့ ပုဆိန်ကို ဝှေ့ယမ်းလိုက်တယ်။

မျက်တောင်တစ်ခတ်အတွင်းမှာတင် အက်ဂ်နက်စ် ရဲ့ ကိုယ်ထည်က ဝေဝါးသွားပြီး သူမ ရှိနေတဲ့ နေရာကနေ ပျောက်ကွယ်သွားကာ ဂျာကူ ရဲ့ အရှေ့တည့်တည့်မှာ ပြန်ပေါ်လာပြီး သူမရဲ့ ပုဆိန်နဲ့ သူ့ကိုယ်ပေါ်ကို ခုတ်ချဖို့ အသင့်ဖြစ်နေပါပြီ။

ဂျာကူ ခဏလောက် ကြောင်သွားပေမဲ့ သူ့ရဲ့ ဓားကို အမြန်ဆွဲထုတ်လိုက်ပြီး ပုဆိန်နဲ့ ဓားသွားကို လေထဲမှာ ဆုံတွေ့စေလိုက်တယ်။

လက်နက်နှစ်ခု ထိခိုက်မိတဲ့အချိန်မှာ မီးပွားတွေ လွင့်စင်သွားခဲ့တယ်။

တကယ်လို့ သူ့မှာ လျှပ်စီးလိုမြန်တဲ့ တုံ့ပြန်နိုင်စွမ်း ရှိစေမယ့် လျှပ်စစ်မိုးကြိုး တစ်ထောင်ဆိုတဲ့ စွမ်းရည်သာ မရှိဘူးဆိုရင် သူဟာ အက်ဂ်နက်စ်ရဲ့ ခုတ်ချက်ကို ကာကွယ်နိုင်မှာ မဟုတ်ပါဘူး။

အော့ခ်အစေခံက ဂျာကူ အနေနဲ့ သူမရဲ့ တိုက်ခိုက်မှုကို တောင့်ခံနိုင်တာကြောင့် မျက်ခုံးပင့်ပြီး အံ့သြသွားတယ်။ သူမက သူမရဲ့ ခွန်အားကို ဂျာကူထက် နည်းနည်းလေးပဲ သာတဲ့အဆင့်အထိ လျှော့ချထားပေမဲ့ သူဟာ သူမရဲ့ တိုက်ခိုက်မှုကို လွဲချော်စေနိုင်တဲ့ အံ့ဩစရာကောင်းတဲ့ မြန်ဆန်မှုကို ပြသခဲ့တာကိုး။

"ဟင်း... ကျွန်မ အရှိန် နည်းနည်း ထပ်မြှင့်လိုက်မယ်" လို့ သူမက ဒရာဂွန်ဘွန်း ကို သတိပေးလိုက်တယ်။

မိုက်ကယ်က သူမရဲ့ ခန္ဓာကိုယ်ထဲကနေ မီးဒြပ်စင် မှော်စွမ်းအင်အနည်းငယ် ထွက်ပေါ်လာတာကို တွေ့လိုက်ရတယ်၊ အဲဒါက သူမ ခန္ဓာကိုယ်ရဲ့ ကြံ့ခိုင်မှုအပိုင်းအားလုံးကို အဆမတန် မြှင့်တင်ပေးလိုက်တာပါပဲ။

သူမက သူမရဲ့ ပုဆိန်ကိုပြန်ဆွဲယူလိုက်ပြီး ဂျာကူရဲ့ အောက်ပိုင်းနဲ့ အပေါ်ပိုင်းကို ပြတ်သွားအောင် ဝှေ့ယမ်းလိုက်တယ်။

ဂျာကူ က ပုဆိန်ကို ခုခံဖို့ ကြိုးစားခဲ့ပေမဲ့ အရှိန်ကို လျှော့ချဖို့အတွက် အဲဒါက အရမ်းလေးလံနေတာကို တွေ့လိုက်ရတယ်။ သူမရဲ့ ဓားက သူ့ခါးဆီကို အဟန့်အတားမရှိ ဆက်ပြီး ဝှေ့ယမ်းလာတာကြောင့် သူ ခြေတစ်လှမ်း နောက်ဆုတ်လိုက်ရပါတော့တယ်။

ဒါပေမဲ့ ခြေတစ်လှမ်းတည်းနဲ့တင် အက်ဂ်နက်စ်က သူ့ဆီ အမီလိုက်လာပြီး သူ ပြင်ဆင်ထားတဲ့ ဘယ်လို အနေအထားမျိုးကိုမဆို ပျက်စီးသွားစေမယ့် လေးလံတဲ့ ဝှေ့ယမ်းမှုတွေနဲ့ သူ့ကို ဆက်တိုက် တိုက်ခိုက်ပါတော့တယ်။

မကာကွယ်နိုင်တော့တဲ့အပြင် ပြန်လည်း မတိုက်ခိုက်နိုင်တာကြောင့် ဂျာကူ ဟာ ထွက်ပြေးဖို့ ကြိုးစားခဲ့ရပါတယ်။

ဒီအတောအတွင်းမှာတော့ မိုက်ကယ်က အက်ဂ်နက်စ် ရဲ့ ခန္ဓာကိုယ်ထဲက မှော်စွမ်းအင် စီးဆင်းမှုကို အကဲခတ်ရင်း တိုက်ပွဲဆီကို အာရုံစိုက်နေခဲ့တယ်။

နိုဗာ၊ ဒါကို မြင်နေရလား

[မှော်ပညာစီးဆင်းမှုကို ခွဲခြမ်းစိတ်ဖြာနေပါသည်...]

[တွေ့ရှိထားသော ဗဟုသုတအသစ်များကို မှတ်ဉာဏ်ဘဏ်ထဲသို့ ထည့်သွင်းနေပါသည်...]

သူဟာ သူ အမြဲတမ်း ရင်းနှီးနေကျဖြစ်တဲ့ မှော်အတတ် မန္တန်တွေနဲ့ ကိုယ်ခံပညာရပ်မန္တန် တွေကြားက ခြားနားချက်တွေ အများကြီးကို တွေ့ရှိခဲ့ပါတယ်။

အသိသာဆုံး ခြားနားချက်ကတော့ သူတို့ရဲ့ မှော်စွမ်းအင် အမြုတေတွေပါပဲ။ ဥပမာပြောရရင် သူ့ရဲ့ မှော်စွမ်းအင် အမြုတေနဲ့ ဆီဘက်စတီယန် အော့ဂင်ဒေါ လိုမျိုး လူတွေရဲ့ မှော်စွမ်းအင် အမြုတေတွေဟာ စွမ်းအင်ပင်လယ် နားမှာ ရှိကြတာပါ။

ဒါကို မှော်ဆရာတွေက ဒန်တမ်လို့ ခေါ်ကြတယ်။ အဲဒါက မှော်အတတ်တွေ သုံးဖို့အတွက် မှော်စွမ်းအင် အရင်းအမြစ် ဖြစ်တာကြောင့် မှော်စွမ်းအင် အမြုတေတွေဟာ ခန္ဓာကိုယ်ရဲ့ တခြား အင်္ဂါအစိတ်အပိုင်းတွေနဲ့ လုံးဝမထိတွေ့ဘဲ သူတို့ရဲ့ သီးသန့် နေရာလွတ်တွေထဲမှာ လွတ်လပ်စွာ လွင့်ပျံနေကြတာပါ။

ဒါဟာ မှော်စွမ်းအင်အမြုတေတွေက မှော်စွမ်းအင်တွေနဲ့ ပြည့်နေပြီး အားအင်တွေ လျှံထွက်နေလို့ပါပဲ။ အရေးကြီးတဲ့ အင်္ဂါအစိတ်အပိုင်းတွေနဲ့ နီးကပ်နေတာက အဲဒီအစိတ်အပိုင်းတွေကို မီးပုံကြီးနဲ့ တိုက်ရိုက် ထိတွေ့စေသလို ဖြစ်နေမှာပါ။ တစ်နည်းပြောရရင်တော့ အဲဒါတွေက မြန်မြန်ဆန်ဆန် လောင်ကျွမ်းသွားပါလိမ့်မယ်။

မှော်စွမ်းအင် အမြုတေတွေကို သေနတ်ရဲ့ ကျည်အိမ်လို့ တွေးကြည့်နိုင်ပြီး မှော်စွမ်းအင်တွေကိုတော့ တကယ့် ကျည်ဆန်တွေလို့ တွေးနိုင်ပါတယ်။

မှော်အတတ် အသုံးပြုသူတွေဟာ တကယ့် သေနတ်တစ်ခုလို အလုပ်လုပ်တဲ့ မှော်ကျင့်စဉ် တွေနဲ့ မန္တန်တွေကို အသုံးပြုကြတာပါ။ ဒီ သေနတ်က ကျည်အိမ်ထဲကနေ ကျည်ဆန်တစ်ခုကို ယူပြီး ခန္ဓာကိုယ် အပြင်ဘက်ကို ပစ်ထုတ်လိုက်တာပေါ့။

အခုဆိုရင် မှော်ဆရာက သေနတ်ကို သူ့ခန္ဓာကိုယ်နဲ့ ဝေးရာဘက်ကို ချိန်ထားသရွေ့တော့ ကျည်ဆန်ရဲ့ ပေါက်ကွဲအားက သူ့ကို ဘယ်လိုမှ ထိခိုက်စေမှာ မဟုတ်ပါဘူး။

ဒါပေမဲ့ ကိုယ်ခံပညာရပ်မန္တန် အသုံးပြုသူတွေအတွက်တော့ အဲဒါက သူတို့ လုပ်ဆောင်နေတဲ့အရာနဲ့ လုံးဝ ဆန့်ကျင်ဘက်ပါပဲ။

သူတို့တွေက သေနတ်ကို သူတို့ရဲ့ ခန္ဓာကိုယ်ဘက်ကို ပြန်ချိန်ပြီး ကျည်ဆန်နဲ့ ကိုယ့်ကိုယ်ကိုယ် ပြန်ပစ်နေကြတာပါ။ ဒါပေမဲ့ တစ်နည်းနည်းနဲ့ ကိုယ်ခံပညာရပ်မန္တန် အသုံးပြုသူတွေဟာ အဲဒီကျည်ဆန်ကြောင့် ပျက်စီးသွားမယ့်အစား ခွန်အားတွေ ရလာအောင် သူတို့ကိုယ်သူတို့ ပုံသွင်းနိုင်ခဲ့ကြတယ်။

သူတို့ လုပ်ဆောင်တဲ့ နည်းလမ်းကတော့ စွမ်းအင်တွေ ပေါက်ကွဲထွက်ပြီး ပိုကြီးမားတဲ့ မန္တန်တစ်ခု ဖြစ်ပေါ်လာအောင် မှော်စွမ်းအင်တွေကို အတတ်နိုင်ဆုံး စုစည်းကြတဲ့ မှော်ဆရာတွေနဲ့ မတူဘဲ သူတို့ရဲ့ မှော်စွမ်းအင်တွေကို ခန္ဓာကိုယ်အနှံ့ ညီတူညီမျှ ပြန့်နှံ့သွားအောင် လုပ်ဆောင်ကြတာပါ။

မှော်စွမ်းအင်တွေကို ပြန့်နှံ့စေခြင်းအားဖြင့် သူတို့ရဲ့ ခန္ဓာကိုယ်က ပြင်းထန်တဲ့ စွမ်းအင်တွေကို တောင့်ခံနိုင်လာပြီး အဲဒါတွေကို ကြီးမားလှတဲ့ ခန္ဓာကိုယ်ပိုင်းဆိုင်ရာ ခွန်အားတွေအဖြစ် ပြောင်းလဲပစ်နိုင်တာပါ။

အဲဒါကြောင့်ပဲ အက်ဂ်နက်စ် ရဲ့ ခန္ဓာကိုယ်အတွင်းပိုင်းက အချိန်နဲ့အမျှ သိသိသာသာ ပြောင်းလဲသွားခဲ့တာ ဖြစ်ပါတယ်။ သူမရဲ့ သွေးကြောတွေက သူမရဲ့ မှော်စွမ်းအင် အမြုတေတွေနဲ့ တိုက်ရိုက် ချိတ်ဆက်နေပြီး သွေးတွေ ခန္ဓာကိုယ်အနှံ့ ပြန့်နှံ့သွားသလိုမျိုး မှော်စွမ်းအင်တွေကိုလည်း ညီတူညီမျှ ဖြန့်ဝေပေးနိုင်တာပါ။

ဝါရင့်တစ်ယောက်ဆီကနေ ဒါကို တိုက်ရိုက် မြင်တွေ့ရတာက တကယ့်ကို ထူးခြားတဲ့ အတွေ့အကြုံပါပဲ။

[ကိုယ်ခံပညာရပ် မှော်စွမ်းအင် စီးဆင်းမှုကို စုပ်ယူနေပါသည်... ပြီးဆုံးပါပြီ]

မိုက်ကယ် ဟာ သူ့ခန္ဓာကိုယ်ထဲက မှော်စွမ်းအင် အမြုတေတွေ တုန်ခါလာတာကို ခံစားလိုက်ရတယ်၊ ဒြပ်စင် မှော်စွမ်းအင် အမှုန်လေးတွေက သူ့ရဲ့ ခန္ဓာကိုယ်ထဲကို ပျံ့နှံ့သွားပြီး အက်ဂ်နက်စ် ရဲ့ မှော်စွမ်းအင် အမြုတေတွေက သူမရဲ့ သွေးကြောတွေနဲ့ ချိတ်ဆက်ထားသလိုမျိုး သူ့ရဲ့ သွေးကြောတွေနဲ့ လိုက်ပြီး ချိတ်ဆက်ဖို့ ကြိုးစားနေကြတယ်။

အဲဒီလို လုပ်လိုက်တဲ့အခါမှာတော့ ဒြပ်စင် မှော်စွမ်းအင်တွေရဲ့ ပြင်းထန်လှတဲ့ စွမ်းအင်တွေက သူ့ရဲ့ တစ်ကိုယ်လုံးမှာ စီးဆင်းသွားတာကို သူ ဖြည်းဖြည်းချင်း ခံစားလိုက်ရတယ်။

တကယ်လို့ တခြားလူတစ်ယောက်ကသာ လိုအပ်တဲ့ လေ့ကျင့်ခန်းတွေနဲ့ လေ့ကျင့်မှုတွေ မရှိဘဲ ဒါကို အတင်းအကျပ် လုပ်ဖို့ ကြိုးစားမယ်ဆိုရင် ဒြပ်စင် မှော်စွမ်းအင်တွေရဲ့ စွမ်းအင်က သူတို့ရဲ့ ခန္ဓာကိုယ်ကို မီးဖိုကြီးတစ်ခုလို ပူပြင်းစေပြီး သူတို့ရဲ့ သွေးတွေကို ရေနွေးငွေ့တွေအဖြစ် ပြောင်းလဲပစ်တာကို တွေ့ရပါလိမ့်မယ်။

ဒါပေမဲ့ မိုက်ကယ် ကတော့ လူတိုင်းနဲ့ မတူပါဘူး။ သူ့မှာ ဒြပ်စင်မှော်စွမ်းအင် အားလုံးကို အပြည့်အဝ ထိန်းချုပ်နိုင်စေမယ့် အဆင့်မြင့်စွမ်းရည် တစ်ခု ရှိနေတာလေ။

* * * * * * * * *

စာစဉ်(၁၅)

အခန်း (၁၈၀)

ကိုယ်ခံပညာရပ်မန္တန် အသုံးပြုသူတစ်ယောက် ဖြစ်လာဖို့အတွက် ဒီလို မဆင်မခြင် ကြိုးစားမှုမျိုးဟာ လူအများစုအတွက်တော့ သေချာပေါက် အသက်အန္တရာယ် ရှိနိုင်ပါတယ်။ အထူးသဖြင့် မိုက်ကယ် ရဲ့ အမြုတေတွေထဲမှာ ဒြပ်စင်အားလုံး ပါဝင်နေတာကြောင့် အဲဒါတွေ ပေါင်းစပ်လိုက်တဲ့အခါ မြို့တစ်မြို့လုံးကို မြေလှန်ပစ်နိုင်တဲ့ အလွန် ပေါက်ကွဲအားပြင်းတဲ့ သဟဇာတ ပေါင်းစည်းခြင်း စွမ်းအင် ဖြစ်ပေါ်လာမှာ ဖြစ်လို့ပါပဲ။

ဒါပေမဲ့ မိုက်ကယ် အတွက်တော့ သူ့ရဲ့ သွေးကြောတွေထဲမှာ စီးဆင်းနေတဲ့ သဟဇာတပေါင်းစည်းခြင်း စွမ်းအင်ဟာ ဗန်ဒါဘစ်အိမ်တော်မှာ သူ တည်ဆောက်ခဲ့တဲ့ ရေပူစမ်းတွေကို သတိရစေပါတယ်။ အလွန်ဆုံးရှိလှရင် နွေးထွေးတဲ့ ခံစားချက်မျိုးပါပဲ။ နတ်ဘုရားပန်းပဲဖိုရဲ့ မီးလုံးကြီးထဲကို သူ ဖြတ်သန်းနိုင်ခဲ့သလိုပဲ ဒါကိုလည်း သူ တောင့်ခံနိုင်ခဲ့ပါတယ်။

သဟဇာတပေါင်းစည်းခြင်း စွမ်းအင်ဟာ သူ့ရဲ့ ခန္ဓာကိုယ်ကို အတွင်းပိုင်းကနေ ဖျက်ဆီးမယ့်အစား ကြီးမားလှတဲ့ ခွန်အားတွေနဲ့ စွမ်းအင်တွေနဲ့ ပြုစုပျိုးထောင်ပေးခဲ့ပြီး သူ့ရဲ့ တစ်ကိုယ်လုံးကို သန်မာလာစေမယ့် ပြန်လည်နုပျိုခြင်း ဖြစ်စဉ်တစ်ခုကို ဖြစ်ပေါ်စေခဲ့တယ်။

ဖိအားတွေကြောင့် သူ့ရဲ့ အရိုးတွေ အက်ကွဲသွားပေမဲ့ ချက်ချင်းဆိုသလို ပြန်ပြီး ပြုပြင်သွားတယ်။ ဖောင်းကြွလာတဲ့ သွေးကြောတွေကြောင့် သူ့ရဲ့ ကြွက်သားတွေ ပြဲထွက်သွားပေမဲ့လည်း ခဏချင်းအတွင်းမှာပဲ ပြန်ပြီး စေ့သွားပါတယ်။ သူ့ရဲ့ အကြောတွေ၊ အရိုးနုတွေက ပျက်စီးသွားပြီးမှ ပိုပြီး ကြံ့ခိုင်တဲ့ အရာတွေနဲ့ အစားထိုးလိုက်တာပါ။

ဒါတွေ အားလုံးက သဟဇာတပေါင်းစည်းခြင်း မှော်စွမ်းအင်ဆီကနေ သူ့ခန္ဓာကိုယ်က ရရှိလိုက်တဲ့ စွမ်းအင်တွေကြောင့် ဖြစ်နိုင်ခဲ့တာပါ။ အဲဒါက ဆဲလ်ထုတ်လုပ်မှုကို မြှင့်တင်ပေးလိုက်တာကြောင့် သူ့ရဲ့ ခန္ဓာကိုယ်က အစိတ်အပိုင်းအသစ်တွေကို စက္ကန့်အနည်းငယ်အတွင်းမှာပဲ ဖန်တီးနိုင်သွားတာပေါ့။

သွေးကြောတွေဟာ သူ့ရဲ့ ကြွက်သားတွေ၊ အရိုးတွေနဲ့ အင်္ဂါအစိတ်အပိုင်းတွေကို ဖြတ်သန်းပြီး နောက်ဆုံးမှာတော့ ဒြပ်စင်အမြုတေတွေဆီကို ရောက်သွားပါတယ်။ အဲဒီ ချိတ်ဆက်နေတဲ့ သွေးကြောတွေဟာ သူ့ရဲ့ ဒန်တန်ထဲမှာ ရှစ်မြှောင့်ပုံစံတစ်ခုကို ဖန်တီးလိုက်ပြီး ပင့်ကူအိမ်တစ်ခုလို ဖြစ်သွားစေတယ်။

သူ့ရဲ့ ခန္ဓာကိုယ်က မှော်စွမ်းအင် အမြုတေတွေနဲ့ တိုက်ရိုက်ချိတ်ဆက်သွားတာကြောင့် သူ့ခန္ဓာကိုယ်အနှံ့ သဟဇာတပေါင်းစည်းခြင်း စွမ်းအင်တွေ စီးဆင်းမှုကို နောက်ဆုံးမှာတော့ နှေးကွေးတဲ့ အရှိန်နဲ့ ထိန်းချုပ်နိုင်သွားပါပြီ။

ပြင်းထန်လှတဲ့ သဟဇာတပေါင်းစည်းခြင်း မှော်စွမ်းအင်တွေဟာ သောင်းကျန်းနေတာကို ရပ်တန့်လိုက်ပြီး သူ့ရဲ့ မှော်စွမ်းအင် အမြုတေတွေဆီကို လိမ္မာယဉ်ကျေးစွာနဲ့ ပြန်သွားကြပါတယ်။ အခုဆိုရင် အဲဒါတွေက လိုအပ်တဲ့ အချိန်မှာတင် သူ့ရဲ့ သွေးကြောတွေထဲ စီးဆင်းပြီး သူ့ခန္ဓာကိုယ်ကို ခွန်အားတွေ ပေးစွမ်းမှာ ဖြစ်ပါတယ်။

"ဟား..." မိုက်ကယ် က မျက်လုံးတွေကို ဖွင့်ပြီး သူ့ရဲ့ ခန္ဓာကိုယ်ကို ကြည့်လိုက်တယ်။ သူ လက်ဖဝါးတွေကို ဖြန့်လိုက်တဲ့အခါ သူ့ကိုယ်သူ ခန္ဓာကိုယ်ပိုင်းရော စိတ်ပိုင်းဆိုင်ရာပါ ပိုပြီး ချိတ်ဆက်နေသလို ခံစားလိုက်ရတယ်။

"သခင်၊ အဆင်ပြေရဲ့လား။ သခင့်မျက်နှာက ခုနကတည်းက တစ်မျိုးကြီး ဖြစ်နေလို့ပါ"

ဖတ်ချ်က မိုက်ကယ်ရဲ့ တိတ်ဆိတ်နေမှုနဲ့ သူ့နဖူးပေါ်က ထွက်နေတဲ့ ချွေးအေးတွေကို သတိထားမိသွားတယ်။

မိုက်ကယ်က ပြုံးပြီး ဖတ်ချ် ကို ပွတ်သပ်ပေးလိုက်တယ်။

"ငါ အဆင်ပြေပါတယ် ဖတ်ချ်"

ယူနာက မိုက်ကယ်ကို ထူးဆန်းတဲ့ အကြည့်နဲ့ ကြည့်နေတယ်။ သူ့ဆီမှာ တစ်ခုခုပြောင်းလဲသွားတာကို သူမ ခံစားမိပေမဲ့ အဲဒါက ဘာလဲဆိုတာကိုတော့ ရှင်းမပြတတ်ဘူး ဖြစ်နေတယ်။

"ဘာဖြစ်သွားတာလဲ" လို့ သူမက သူ့ကို မေးလိုက်တယ်။

မိုက်ကယ်ဟာ သူ့ရဲ့ ကြံ့ခိုင်မှုပိုင်းမှာ အဆင့်ကျော်ဖြတ်မှုကို ခံစားလိုက်ရတာကြောင့် သူ့ရဲ့ ခန္ဓာကိုယ်က ကောင်းကောင်း လေ့ကျင့်ထားတဲ့ စစ်သည်တော်တစ်ယောက်လိုမျိုး ပိုပြီး သန်မာပြီး ကြံ့ခိုင်လာခဲ့ပါပြီ။

တကယ်တော့ မိုက်ကယ်ဟာ ပြီးခဲ့တဲ့ နှစ်အနည်းငယ်အတွင်းမှာ သူ့ရဲ့ ခန္ဓာကိုယ် ကျန်းမာကြံ့ခိုင်မှုကို လျစ်လျူရှုထားခဲ့တာပါ။ ဘာပဲဖြစ်ဖြစ် သူ့မှာ အကြွင်းမဲ့ ဒြပ်စင်ဘက်စုံအကာအကွယ် နဲ့ သူ့ရဲ့ မှော်ပညာ ရှိနေတာကြောင့် ကိုယ့်ကိုယ်ကိုယ်ကာကွယ်ဖို့ ဒါမှမဟုတ် အားစိုက်ထုတ်ဖို့အတွက် လက်တစ်ချောင်းတောင် မလှုပ်ခဲ့ရဘူးလေ။

ဒါပေမဲ့ စစ်မှန်တဲ့ ကိုယ်ခံပညာရပ်မန္တန် ဆရာတစ်ယောက်က သူတို့ရဲ့ ခန္ဓာကိုယ်ထဲမှာ မှော်စွမ်းအင်တွေကို ဘယ်လို သုံးနေလဲဆိုတာကို အကဲခတ်ရုံနဲ့တင် မိုက်ကယ် ဟာ သူတို့ရဲ့ နည်းစနစ်ကို စုပ်ယူပြီး ကိုယ်ပိုင်အဖြစ် ပြောင်းလဲနိုင်ခဲ့ပါတယ်။

မိုက်ကယ် က သူ့ရဲ့ အမြုတေတွေကို ကြည့်လိုက်တဲ့အခါ အဲဒါတွေက သိသိသာသာ ကြီးထွားလာတာကို တွေ့လိုက်ရတယ်။ သဟဇာတ ပေါင်းစည်းခြင်း မှော်စွမ်းအင်တွေရဲ့ ပေါင်းစပ်မှုကြောင့် မိုက်ကယ် ဟာ နောက်ဆုံးမှာတော့ ကြယ်ငါးပွင့်မှော်ဆရာတစ်ယောက် ဖြစ်လာခဲ့ပုံရပါတယ်။

မိုက်ကယ် က သူ့ရဲ့ ကျင့်ကြံမှုမှာ အဆင့်တစ်ခုကို ကျော်ဖြတ်နိုင်ခဲ့တဲ့အတွက် ပီတိဖြစ်နေတဲ့အချိန်မှာ စမ်းသပ်တိုက်ခိုက်နေတဲ့ နှစ်ယောက်ကတော့ ဒါကို ဘာမှ မသိကြပါဘူး။

ဂျာကူ ကတော့ အက်ဂ်နက်စ် ရဲ့ ပြင်းထန်လှတဲ့ တိုက်ခိုက်မှုတွေကြားကနေ လွတ်မြောက်ဖို့အတွက် သူ့ရဲ့ ဗီဇအသိ အားလုံးကို သုံးနေရပါတယ်။

ဒီအတောအတွင်းမှာတော့ အက်ဂ်နက်စ်က ဂျာကူရဲ့ လှုပ်ရှားမှုတွေကို မျက်တောင်မခတ်တမ်း စောင့်ကြည့်နေပြီး သူက သူမရဲ့ မျှော်လင့်ချက်ထက် ကျော်လွန်ပြီး လုပ်ဆောင်နိုင်တဲ့ အခါတိုင်း သူမ အံ့သြနေမိတယ်။

တိုက်ပွဲ အစပိုင်းမှာတော့ သူမက သူ့ကို အားပျော့သွားအောင် လုပ်ဖို့အတွက် သူမရဲ့ ခန္ဓာကိုယ်ပိုင်းဆိုင်ရာ ခွန်အားသက်သက်ကိုပဲ သုံးခဲ့ပါတယ်၊ သူမ ဝှေ့ယမ်းလိုက်တဲ့ ပုဆိန်ရဲ့ အလေးချိန်ကြောင့် သူ့ရဲ့ လက်မောင်းတွေ တုန်ခါသွားစေဖို့ လုံလောက်တဲ့ အင်အားနဲ့ပဲ ခုတ်ချခဲ့တာပါ။

သူ မြင်နိုင်ပြီး တုံ့ပြန်နိုင်တဲ့ အရှိန်ထက် နည်းနည်းလေး ပိုတဲ့အဆင့်အထိတောင် သူမရဲ့ အရှိန်ကို ချိန်ညှိပေးထားခဲ့ပါတယ်။

ဒါပေမဲ့ တိုက်ပွဲကဆက်တာနဲ့အမျှ ဂျာကူဟာ သူမရဲ့ ပုဆိန်ကို ယှဉ်ပြိုင်တိုက်ခိုက်လာနိုင်ပြီး ပုဆိန်နဲ့ဓါးထိမိတဲ့ အကြိမ်တိုင်းမှာလည်း အင်အားချင်းက ပိုပြီး ညီမျှလာတာကို သူမ သတိထားမိသွားတယ်။

သူ့ရဲ့ အားနည်းချက်တွေဖြစ်တဲ့ အမြင်ကွယ်နေတဲ့ နေရာတွေနဲ့ ခြေလှမ်းအနေအထားတွေက တိုက်ပွဲ အလယ်မှာတင် ဖြည်းဖြည်းချင်း ပြင်ဆင်လာနိုင်ခဲ့တယ်။ အမှားတစ်ခုလုပ်မိတာနဲ့တင် နောက်တစ်ကြိမ်မှာ အဲဒီသင်ခန်းစာကို မှတ်သားပြီး အားနည်းချက်ကို ဖုံးကွယ်ဖို့ သူ့ရဲ့ အနေအထားကို ပြောင်းလဲနိုင်စွမ်း ရှိနေတာပါ။

ဒါတင် မကသေးပါဘူး။ သူမ တွေ့လိုက်ရတဲ့ အထင်ကြီးစရာ အကောင်းဆုံးအရာကတော့ သူ့ရဲ့ မှော်စွမ်းအင် စီးဆင်းမှုပါပဲ။

သူ့ရဲ့ ခန္ဓာကိုယ်ကနေ ထွက်ပေါ်နေတဲ့ မှော်စွမ်းအင်တွေက သူ့ရဲ့ ဓားဆီကို စိမ့်ထွက်သွားပြီး အရင်က မရှိခဲ့တဲ့ ထက်မြက်မှုကို ပေးစွမ်းနေတာကို သူမ ခံစားလိုက်ရတယ်။

တစ်နည်းနည်းနဲ့ သူဟာ ဗီဇအသိနဲ့တင် မှန်ကန်တဲ့ မှော်စွမ်းအင် စီးဆင်းမှုကို လေ့ကျင့်ရင်းနဲ့ ကိုယ်တိုင် သင်ယူနေတာပါ။ သူ့ရဲ့ ခန္ဓာကိုယ်က အမြုတေတွေဆီက မှော်စွမ်းအင်တွေနဲ့ ပြည့်နှက်လာပြီး ကိုယ်ခံပညာရပ်မန္တန် အတွက် သင့်တော်တဲ့ ခန္ဓာကိုယ်တစ်ခုအဖြစ် ဖြည်းဖြည်းချင်း ပြောင်းလဲလာတာကို သူမ တကယ်ကို မြင်နေရသလိုပါပဲ။

ဒီအခြေအနေအတိုင်းဆိုရင် သူဟာ တစ်လအတွင်းမှာတင် သူ့ရဲ့ သွေးကြောတွေကို မှော်စွမ်းအင် အမြုတေတွေနဲ့ အပြည့်အဝ ချိတ်ဆက်နိုင်သွားလိမ့်မယ် ဆိုတာကို သူမ အံ့ဩမှာ မဟုတ်ပါဘူး။

တချို့အချိန်တွေမှာတော့ ကောင်းကင်ဘုံက တကယ်ကို မတရားပါဘူး။ အက်ဂ်နက်စ် အတွက်တော့ သွေးကြော ချိတ်ဆက်မှု ရရှိဖို့အတွက် တစ်နှစ်လုံးလုံး အပြင်းအထန် လေ့ကျင့်ခန်းတွေနဲ့ ခန္ဓာကိုယ်ပိုင်းဆိုင်ရာ နှိပ်စက်မှုတွေကို ခံယူခဲ့ရတာပါ။ တကယ်လို့ သူမရဲ့ ဆရာသာ မရှိခဲ့ရင် ဒါက ဒီထက်မက အများကြီး ပိုကြာနိုင်တယ်လို့ သူမ တွက်ဆထားပါတယ်။

အခုလောလောဆယ်မှာတော့ ဂျာကူဟာ သိပ်ပြီး မသန့်စင်သေးတဲ့ မှော်စွမ်းအင်စီးဆင်းမှုပုံစံကိုပဲ သုံးနေပါသေးတယ်။ သူက ဘာကိုမှ သေသေချာချာ မစဉ်းစားဘဲ သူ့ခန္ဓာကိုယ်ထဲကို မှော်စွမ်းအင်တွေကို ဒီအတိုင်းပဲ လောင်းထည့်နေတာကြောင့် စွမ်းအင်က အများကြီး လျော့နည်းနေပြီး ထိရောက်မှုလည်း သိပ်မရှိလှပါဘူး။

ဒါပေမဲ့ အကူအညီ နည်းနည်းလောက် ထပ်ရမယ်ဆိုရင်တော့ ဂျာကူ ဟာ သူမတောင်မှ သတိထားရမယ့် လုံးဝကို ကွဲပြားခြားနားတဲ့ သားရဲတစ်ကောင် ဖြစ်လာလိမ့်မယ်ဆိုတာကို သူမ မြင်ယောင်နေမိပါတယ်။

အက်ဂ်နက်စ် ရဲ့ ခန္ဓာကိုယ် ပတ်ပတ်လည်မှာ သူမရဲ့ စွမ်းရည်တစ်ခုကို သုံးလိုက်တာကြောင့် အနည်းငယ် ဖောက်ထွင်းမြင်ရတဲ့ မီးတောက်တွေ ထွက်ပေါ်လာတယ်။

သူမက သူမရဲ့ အနေအထားကို လက်တစ်ဖက်တည်းနဲ့ ကိုင်တဲ့ ပုဆိန်ပုံစံ ပြောင်းလိုက်ပြီး ဂျာကူ ဆီကို ဝှေ့ယမ်းလိုက်တယ်။

သူက ဒါကို မျှော်လင့်ထားပုံရပြီး သူမရဲ့ ပုဆိန်ကို သူ့ရဲ့ ဓားပေါ်ကနေ အနောက်ဘက်ကို လျှောတိုက်သွားအောင် လုပ်ပြီး လမ်းကြောင်း ပြောင်းလဲပစ်လိုက်တယ်။

ဒါဟာ နောက်ဆုံးမှာတော့ တန်ပြန်တိုက်စစ်ဆင်ဖို့ အခွင့်အရေးပဲလို့ ဂျာကူ ထင်လိုက်ပါတယ်။

ပုဆိန်က သူ့ရင်ဘတ်ကို လွဲသွားတာနဲ့ သူ နောက်ပြန်လှည့်လိုက်ပြီး အရှိန်ကို သုံးကာ အက်ဂ်နက်စ် ရဲ့ ပုဆိန်ကိုင်ထားတဲ့ လက်အောက်က အားနည်းချက်ဆီကို သူ့ရဲ့ ဓားနဲ့ ထိုးစိုက်လိုက်တယ်။

ဒါပေမဲ့ အက်ဂ်နက်စ် က သူ့အရှေ့တည့်တည့်မှာ ရောက်နှင့်နေပြီဖြစ်ပြီး သူမရဲ့ နောက်ထပ် လက်တစ်ဖက်ကလည်း လက်သီးဆုပ်ထားကာ သူ့ရဲ့ ဝမ်းဗိုက်ကို အနီးကပ် ထိုးနှက်ဖို့ အသင့်ဖြစ်နေတာကို တွေ့လိုက်ရလို့ သူ အံ့သြသွားပါတော့တယ်။

"ပြီးသွားပြီ" လို့ အက်ဂ်နက်စ် က ပြောလိုက်ပြီး မီးရဲ့ စွမ်းအားနဲ့ ထိုးနှက်လိုက်တာကြောင့် ဂျာကူ ဟာ လေထဲကို လွင့်ထွက်သွားပြီး သစ်ပင်တစ်ပင်နဲ့ သွားတိုက်မိပါတယ်။

* * * * * * * * *