အခန်း (၁၈၉၁-၁၈၉၂)

အခန်း (၁၈၉၁) - မသေမမျိုး အမြဲရှင်သန်ခြင်း

မင်းရွှီနယ်မြေ၊ ရှဲ့ကျစ်

ဖန့်ချန်က လက်ဖက်ရည် ကြိုနေပြီး ဝမ်အိုကြီးကမူ ဖန့်ဟန်နှင့်အတူ နတ်ဘုရားမျိုးနွယ်၏ အရေးကိစ္စများကို ပြောဆိုနေကြရာ သူတို့၏ စကားသံများထဲတွင် နှမြောတသဖြစ်မှုများစွာ ပါဝင်နေသည်။

ခဏမျှ စကားပြောဆိုပြီးနောက် ဖန့်တိန်လည်း ရောက်ရှိလာသည်။ ထို့ကြောင့် အဆင့် ၇ တန်ခိုးရှင် နှစ်ဦး၊ အဆင့် ၉ တစ်ဦးနှင့် ကန့်သတ်ချက်ကျော်လွန်ခြင်း ပထမခြေလှမ်း သို့ ရောက်ရှိထားသူ တစ်ဦးတို့သည် လက်ဖက်ရည်၊ မုန့်ပဲသရေစာတို့နှင့်အတူ အချစ်ရေးအချစ်ရာများ မဟုတ်ဘဲ နတ်ဘုရားနယ်မြေ၏ လက်ရှိအခြေအနေအရပ်ရပ်ကိုသာ ဆွေးနွေးဖြစ်ကြတော့သည်။

"အားလုံးပဲ... နတ်ဘုရားမျိုးနွယ်လို အင်အားကြီးတဲ့ မျိုးနွယ်စုတောင်မှ ရေတိမ်မှာ နစ်ရသလိုမျိုး အောက်ခြေမျိုးနွယ်တွေရဲ့ အနိုင်ကျင့်တာကို ခံနေရပြီ။ အဲဒီ ကျင်ကန်းမျိုးနွယ်ရဲ့ တကယ့်ရည်ရွယ်ချက်က ဘာလဲဆိုတာ ခင်ဗျားတို့ သိလား နတ်ဘုရားမျိုးနွယ်ထဲက ပါရမီ အလွန်ကောင်းတဲ့ အမျိုးသမီးတစ်ယောက်ကို သူတို့ဆီမှာ ချန်ထားရစ်ခဲ့ပြီး သူတို့ရဲ့ 'သားဖောက်မိခင်' အဖြစ် အသုံးချချင်တာ။ အဲဒီကနေတစ်ဆင့် ပိုပြီး အစွမ်းထက်တဲ့ ကျင်ကန်းမျိုးနွယ်သစ်တွေကို မွေးဖွားချင်နေကြတာပဲ"

ဝမ်ချုံစန်းက ပြောရင်းနှင့် ခေါင်းကို တရမ်းရမ်း လုပ်နေကာ

"အရင်ကဆိုရင် သူတို့ အဲဒီလို ရည်ရွယ်ချက်မျိုး စိတ်ကူးမိရုံနဲ့တင် ဟင်းလင်းပြင် အဆင့်မြင့် မဟာမိတ်အဖွဲ့က စောင့်ကြည့်နေပါစေဦး... နတ်ဘုရားမျိုးနွယ်ရဲ့ နည်းလမ်းတွေနဲ့ဆိုရင် အဲဒီကောင်တွေကို နှစ်ပေါင်း တစ်သန်းလောက် ခေါင်းမဖော်နိုင်အောင် လုပ်ပစ်မှာ သေချာတယ်။ သူတော်စင် တစ်ပါးတောင် ထပ်ထွက်လာဖို့ စိတ်မကူးနဲ့တော့"

"ကျင်ကန်းမျိုးနွယ်က ဒီလိုလုပ်တာဟာ ပါရမီရှင် တစ်ယောက်ကို မွေးထုတ်ပြီး မျှော်စင်တိုက်ပွဲမှာ ရလဒ်ကောင်းတွေ ရချင်လို့လား "

ဖန့်ဟန်က စဉ်းစားသလိုဖြင့် မေးလိုက်သည်။

"စိတ်ကူးကတော့ တော်တော်ရဲတင်းတာပဲ။ ဒါပေမဲ့ လက်ရှိအခြေအနေအရဆိုရင် ကျင်ကန်းမျိုးနွယ် တစ်ခုတည်းတင် မဟုတ်ဘူး၊ တခြား ပိုပြီးအင်အားကြီးတဲ့ မျိုးနွယ်စုတွေလည်း ဒါမျိုးတွေ လုပ်နေကြလောက်ပြီ"

ဖန့်တိန်က လေးနက်စွာ ဆိုသည်

"ကျွန်တော်တို့ လူသားမျိုးနွယ်မှာတောင် ဒီလိုမျိုး လျှို့ဝှက်နည်းလမ်းတွေ ရှိပါတယ်။ တခြားမျိုးနွယ်စုတွေကို မိခင်အဖြစ် အသုံးချပြီး အစွမ်းထက်တဲ့ သွေးမျိုးဆက် အမျိုးမျိုးကို ပျိုးထောင်တာမျိုးပေါ့။ ဒါပေမဲ့ အဓိက သွေးမျိုးဆက်ကတော့ လူသားပဲ ဖြစ်ရမယ်။"

သူက ခေတ္တရပ်ကာ

"ကျင်ကန်းမျိုးနွယ်က အမြဲတမ်း မီးနတ်ဘုရားမျိုးနွယ် ရဲ့ ကျောထောက်နောက်ခံ ဖြစ်ခဲ့ပြီး ကျွန်တော်တို့ လူသားမျိုးနွယ်အပေါ် ရန်ငြိုးထားခဲ့တာ။ လူသားမျိုးနွယ်နဲ့ မီးနတ်ဘုရားမျိုးနွယ် တိုက်ခိုက်ခဲ့တဲ့ နှစ်ပေါင်းများစွာအတွင်းမှာ ကျင်ကန်းမျိုးနွယ်က နောက်ကွယ်ကနေ အင်အား တော်တော်စိုက်ထုတ်ခဲ့တယ်။

ကံကောင်းတာက ကျွန်တော်တို့ လူသားမျိုးနွယ်ဟာ အရှိန်အဟုန် ကောင်းနေတဲ့အချိန်ဖြစ်ပြီး သူတော်စင်တွေ ဆက်တိုက် ထွက်ပေါ်နေလို့သာ ရှေ့တန်းစစ်မျက်နှာပြင်တွေကို ထိန်းထားနိုင်တာ"

ဤသို့ပြောပြီးနောက် သူက ပြုံးလျက် ဖန့်ချန်ကို ကြည့်ကာ

"ချန်ဘိုးဘေးက ဒီတစ်ခါ မျှော်စင်တိုက်ပွဲမှာ အားလုံးကို အပြတ်အသတ် အနိုင်ယူပြီး အဆင့် ၆ နံပါတ်တစ် ရခဲ့တာဟာ မီးနတ်ဘုရားမျိုးနွယ်ကို ကျွန်တော်တို့အပေါ် တော်တော်လေး ကြောက်လန့်သွားစေတယ်။ အခုဆို စစ်မျက်နှာပြင် အသီးသီးမှာ နယ်မြေချဲ့ထွင်တာတွေ ပိုပြီး ချောမွေ့လာသလို အငြင်းပွားဖွယ် နယ်မြေအတော်များများလည်း မင်းရွှီမြေပုံထဲ ရောက်လာပြီ"

"ဟုတ်တယ်... အဘိုးကြီးဖန့်ရဲ့ ဒီရလဒ်က ကျွန်တော်တို့ လူသားမျိုးနွယ်အပေါ် သက်ရောက်မှု အလွန်ကြီးမားတယ်"

ဝမ်ချုံစန်းက ထောက်ခံကာ ခေါင်းညိတ်သည်။

"အကယ်၍ တစ်နေ့မှာ လူသားမျိုးနွယ်သာ နတ်ဘုရားမျိုးနွယ်လို အခြေအနေမျိုး ကြုံလာခဲ့ရင် ဘယ်လိုလုပ်ကြမလဲ "

ဖန့်ချန်က လူတိုင်းကို လက်ဖက်ရည် တစ်ခွက်စီ ငှဲ့ပေးရင်း အမှတ်မထင် မေးလိုက်သည်။

"လူသားမျိုးနွယ်က နတ်ဘုရားမျိုးနွယ်လို ဖြစ်သွားမယ် ဟုတ်လား အဲဒါတော့ မဖြစ်နိုင်လောက်ပါဘူး..."

ဖန့်ဟန်က တိုးတိုးလေး ရေရွတ်သည်။

နတ်ဘုရားမျိုးနွယ် ဒီလောက်အထိ ဆိုးဆိုးဝါးဝါး ဖြစ်သွားရတာက သူတို့ဆီက ဆင်းသက်လာတဲ့ နယ်မြေအရှင် က ဟင်းလင်ပြင် အဆင့်မြင့် မဟာမိတ်အဖွဲ့ကို သစ္စာဖောက်ခဲ့လို့ အပြစ်ပေးခံရတာ ဖြစ်သည်။ လူသားမျိုးနွယ်ကတော့... မဟာမိတ်အဖွဲ့ကို သစ္စာဖောက်ဖို့အထိ အရည်အချင်းတောင် မရှိသေးပါချေ။

"လူသားမျိုးနွယ်သာ အဲဒီလို အခြေအနေမျိုး တကယ်ကြုံလာရင်တော့ ဘယ်လိုနည်းနဲ့မဆို ပြန်လည်နိုးထအောင် လုပ်ရမှာပဲ။ အဲဒီမတိုင်ခင်မှာတော့ အခြေခံအင်အားတွေ ကောင်းကောင်း စုဆောင်းနိုင်မယ့် ဘေးကင်းလုံခြုံတဲ့ နေရာတစ်ခုကို အရင်ရှာရမှာပေါ့"

ဝမ်ချုံစန်းက ဆိုသည်။

သူက ခေတ္တရပ်ကာ လှောင်ပြုံးပြုံးလျက်

"တကယ်လို့ အဲဒီလိုအချိန် ရောက်လာရင်တော့ နတ်ဘုရားမျိုးနွယ်ဆီကနေ သင်ခန်းစာ သွားယူရမှာပဲ၊ သူတို့ ဘယ်လိုအခြေအနေမျိုးတွေ ကြုံခဲ့ရလဲဆိုတာကိုပေါ့"

ဖန့်ချန်သည် ဝမ်ချုံစန်းကို မသိမသာ တစ်ချက် ကြည့်လိုက်မိသည်။ သူ ခန့်မှန်းထားသော အမှန်တရားတစ်ခုမှာ ပေါ်လွင်လုနီးပါး ဖြစ်နေသော်လည်း အတည်တော့ မပြုနိုင်သေးပေ။

အကယ်၍ ထိုခန့်မှန်းချက်သာ အမှန်ဖြစ်ခဲ့လျှင်... ယခင်က နတ်ဆိုးမျိုးနွယ် ကို အရင်ဆုံး ဆက်သွယ်ခဲ့သည်မှာ မိစ္ဆာမျိုးနွယ် ထံမှ ကောင်းကင်ဘုံ မဟုတ်ဘဲ လူသားမျိုးနွယ်ဘက်မှ အရင် စတင် လှုပ်ရှားခဲ့ခြင်း ဖြစ်နိုင်ပေသည်။ မိမိတို့ဘက်တွင် ကောင်းကင်ဘုံ၏ အကူအညီ မရှိဘဲ တစ်ဖက်တွင် ရှိနေသည့် အခြေအနေမျိုးမှာတောင် နောက်ဆုံးတွင် သရေကျအောင် တိုက်နိုင်ခဲ့ပြီး နတ်ဆိုးမျိုးနွယ်၏ အခြေခံအင်အားကို အကြီးအကျယ် ပျက်စီးစေခဲ့သည်...။

ဤသို့ဆိုလျှင် ထိုစဉ်က လူသားမျိုးနွယ်မှာ ဆိုးဝါးသည့် အခြေအနေတွင် ရှိနေခဲ့သည်မဟုတ်ဘဲ အလွန်အမင်း သန်မာနေခဲ့ခြင်း ဖြစ်သည်။ ၎င်းသည် မျိုးနွယ်စု တစ်ခုတည်းက မျိုးနွယ်စု နှစ်ခုကို ယှဉ်တိုက်ပြီး တစ်ခုကို သရေ၊ တစ်ခုကို အထိနာအောင် လုပ်နိုင်ခဲ့ခြင်းနှင့် တူညီနေသည်။

အားလုံး ခေတ္တမျှ စကားပြောပြီးနောက် ဝမ်ချုံစန်းက ဖန့်တိန်၏ ရှေ့သို့ ရုတ်တရက် တိုးသွားကာ ပြုံးစိစိဖြင့် မေးလိုက်သည်။

"ခင်ဗျား အဆင့် ၉ ကနေ ကန့်သတ်ချက်ကျော်လွန်ခြင်း အဆင့်ကို တက်သွားတုန်းက ဘယ်လို ခံစားချက်မျိုးလဲ ကျုပ်ကို နည်းနည်းလောက် ပြောပြပါဦး၊ နောက်ပိုင်း ကျုပ် တက်လှမ်းတဲ့အခါ နမူနာယူလို့ ရအောင်လို့ပါ"

"အတိအကျကြီးတော့ ပြောရခက်တယ်၊ ဒါပေမဲ့ တကယ်တမ်းက ကန့်သတ်ချက်တွေကို ချိုးဖောက်လိုက်တာပါပဲ။ ကန့်သတ်ချက်ကို အောင်အောင်မြင်မြင် ကျော်လွန်သွားပြီဆိုရင် ခန္ဓာကိုယ်ထဲက နတ်ဘုရားစွမ်းအား တွေက ကန့်သတ်ချက်ကျော်လွန်စွမ်းအား အဖြစ် ပြောင်းလဲသွားတယ်"

ဖန့်တိန်က သူ၏ လက်ညှိုးကို မြှောက်လိုက်ရာ အားကောင်းသော ကန့်သတ်ချက်ကျော်လွန်စွမ်းအား တစ်ခုသည် လက်ညှိုးပေါ်တွင် ဝဲပျံနေတော့သည်။ ၎င်းသည် နတ်ဘုရားစွမ်းအားနှင့် လုံးဝ ကွဲပြားနေပြီး အရှိန်အဝါမှာ ပို၍ ခံ့ညား ထူထဲလှသည်။

"နောက်ပြီးတော့ ထူးခြားချက် တစ်ခု ရှိသေးတယ်၊ ကန့်သတ်ချက် ကျော်လွန်ပြီးသွားရင် ပြင်ပကနေ နတ်ဘုရားစွမ်းအားတွေကို စုပ်ယူနေဖို့ မလိုတော့ဘူး။ ကျွန်တော့်ရဲ့ ကန့်သတ်ချက်ကျော်လွန်စွမ်းအားတွေ ကုန်သွားရင်လည်း အလိုအလျောက် ပြန်ပြည့်လာတတ်တယ်။ ဒီစွမ်းအားက ကျွန်တော့်ကိုယ်ပိုင် ဖြစ်သွားသလိုမျိုးပဲ။ ဒါဟာ နောင်တစ်ချိန်မှာ အတွင်းကမ္ဘာ ကို သွန်းလုပ်နိုင်ဖို့အတွက် အဓိက သော့ချက် ဖြစ်မယ် ထင်တယ်"

ဖန့်တိန်က ရှင်းပြသည်။

ထိုစကားကို ကြားသောအခါ သုံးဦးစလုံး စဉ်းစားတွေးတောဟန် ပေါ်သွားကြသည်။

ဝမ်ချုံစန်းနှင့် ဖန့်ဟန်တို့ ဘာတွေ ခံစားရသည်ကို ဖန့်ချန် မသိသော်လည်း ဖန့်တိန်၏ လက်ရှိ အခြေအနေမှာ သူနှင့် အလွန် ဆင်တူနေသည်ဟု သူ ခံစားလိုက်ရသည်။

သို့သော် သူသည် ထိုထူးခြားသော စွမ်းရည်ကို အမှတ်မထင် ရရှိခဲ့ခြင်း ဖြစ်သည်။ ဝိညာဉ်စွမ်းအား အချိန်မှစ၍ နတ်ဘုရားစွမ်းအား အချိန်အထိ ထိုစွမ်းအားများမှာ သူ၏ ကိုယ်ပိုင်ဖြစ်ပြီး ပြင်ပမှ စုပ်ယူရန် မလိုခဲ့ပေ။ ထို့ပြင် ကုန်ခမ်းသွားတိုင်း ပြန်ပြည့်လာသည့်အခါတွင်လည်း အင်အားမှာ ပိုမို တိုးတက်လာတတ်သေးသည်။

ငါ့ကို တစ်ချက် ကြည့်လိုက်ရုံနဲ့တင် ကန့်သတ်ချက်ကျော်လွန်ခြင်း အဆင့်နဲ့ ယှဉ်နိုင်တဲ့ ဒီလို ထူးခြားတဲ့ စွမ်းရည်တွေကို ရစေခဲ့တာလား အဲဒီ နတ်မိမယ်က... နယ်မြေအရှင် အဆင့်ရှိတဲ့ ပုဂ္ဂိုလ်များလား၊ ဒါမှမဟုတ်... အဲဒီထက်တောင် ပိုပြီး အစွမ်းထက်သလား။

"ကျွန်တော့်အိမ်က လူကြီး ပြောဖူးတာတော့... အတွင်းကမ္ဘာကို သွန်းလုပ်ပြီးတာနဲ့ စွမ်းအားတွေက မပြတ်မတောက် ထွက်ပေါ်နေတော့တာပဲတဲ့။ အတွင်းကမ္ဘာသာ မပျက်စီးသရွေ့ ခန္ဓာကိုယ် ပျက်စီးသွားရင်တောင် တကယ် သေတာ မဟုတ်ဘူး"

ဝမ်ချုံစန်းက ရုတ်တရက် သက်ပြင်းချကာ ဆိုသည်။

"ဒါဟာ သူတော်စင်တစ်ပိုင်း အဆင့်ကို ရောက်သွားတာနဲ့ အတူတူပဲ။ သက်တမ်းကုန်လို့ တကယ် သေရမယ့် အချိန် မရောက်မချင်း တစ်ယောက်ယောက်နဲ့ တိုက်ခိုက်လို့ သေဆုံးသွားရင်တောင် အတွင်းကမ္ဘာ ရှိနေသရွေ့ ပြန်လည် ရှင်သန်နိုင်တဲ့ အခွင့်အရေး ရှိတယ်။ ဝိညာဉ်မျိုးနွယ် တွေတောင် ဝိညာဉ်ကို အလွယ်တကူ ဖမ်းဆီးလို့ မရဘူး"

"ဒါဆိုရင်တော့ မသေမမျိုး အမြဲရှင်သန်နေတာပေါ့"

ဖန့်ဟန်က အံ့ဩစွာ ဆိုသည်။

ဖန့်တိန်၏ မျက်ဝန်းထဲတွင်လည်း တောင့်တမှုများ ပေါ်လာကာ

"ကန့်သတ်ချက်ကျော်လွန်ခြင်း အဆင့်ကို ရောက်မှသာ ဒီအဆင့်ရဲ့ သန်မာမှုကို ခံစားရတာ။ အရင်က ကျုပ် အဆင့် ၉ တုန်းကဆိုရင် အင်အားကြီးမျိုးနွယ်စုက အဆင့် ၈ တွေတောင် ကျုပ်ကို အဆင့်ကျော်ပြီး တိုက်နိုင်မလားလို့ စိုးရိမ်ခဲ့ရတယ်။

ဒါပေမဲ့ ကန့်သတ်ချက်ကျော်လွန်ခြင်း ပထမခြေလှမ်းကို ရောက်ပြီးတဲ့နောက်မှာတော့ အဲဒီလိုမျိုး ဖြစ်ဖို့ လုံးဝ မဖြစ်နိုင်တော့ဘူး။ အတွင်းကမ္ဘာကို သွန်းလုပ်ပြီး သူတော်စင်တစ်ပိုင်း ဖြစ်သွားရင်တော့ ဒါက နောက်ထပ် အဆင့်အတန်း တစ်ခုပဲ"

အတွင်းကမ္ဘာ... စွမ်းအားတွေက မပြတ်မတောက် ထွက်ပေါ်နေတယ်...

ဖန့်ချန်၏ မျက်ဝန်းများမှာ တဖြည်းဖြည်း လင်းလက်လာသည်။ သူသည် အချက်အလက်များကို ဆက်စပ်ကြည့်ရင်း နယ်မြေကိုးခု မှ ကောင်းကင်ဘုံနှင့် ဟင်းလင်ပြင် အဆင့်မြင့် မဟာမိတ်အဖွဲ့မှ နယ်မြေအရှင်တို့ အဘယ်ကြောင့် လုံးဝ ကွဲပြားနေရသနည်းဟူသော အချက်ကို ရိပ်မိသွားသည်။ ၎င်း၏ သော့ချက်မှာ အတွင်းကမ္ဘာ ပင် ဖြစ်သည်။

အကယ်၍ အတွင်းကမ္ဘာက မပြတ်မတောက်တဲ့ ကန့်သတ်ချက်ကျော်လွန်စွမ်းအားတွေကို ပေးစွမ်းနိုင်ရင် ပြင်ပလောကအပေါ် ဘာသက်ရောက်မှုမှ ရှိမှာ မဟုတ်ဘူး။

ဒါပေမဲ့ နယ်မြေကိုးခု ရဲ့ ကောင်းကင်ဘုံကတော့... လျှောက်လှမ်းတဲ့ လမ်းက အတွင်းကမ္ဘာကို သွန်းလုပ်ဖို့ မဖြစ်နိုင်ဘူး။ အဲဒီတော့ နယ်မြေကိုးခု တစ်ခုလုံးကပဲ သူ့ရဲ့ အတွင်းကမ္ဘာ ဖြစ်နေတာပဲ။ အဲဒီကနေ အမြဲတမ်း စုပ်ယူနေတဲ့အတွက် ကြာလာတဲ့အခါ နတ်ဘုရားစွမ်းအားတွေ၊ ဝိညာဉ်စွမ်းအားတွေ ကုန်ခမ်းသွားပြီး ထူးကဲစွမ်းအားတွေ ပျောက်ကွယ်သွားရတာပေါ့...

ဒါကြောင့် ဟင်းလင်ပြင် အဆင့်မြင့် မဟာမိတ်အဖွဲ့ရဲ့ ကျမ်းစာကျင့်စဉ် တွေက အတွင်းကမ္ဘာကို သွန်းလုပ်ဖို့ ရည်ရွယ်ပြီး ကိုယ့်ကိုယ်ကိုယ် ပြန်လည် ထောက်ပံ့တာဟာ တကယ့်ကို မှန်ကန်တဲ့ ကျင့်ကြံခြင်း လမ်းစဉ်ပဲ...

ဤခန့်မှန်းချက်မှာ အတည်ဖြစ်သွားသောအခါ ကောင်းကင်ဘုံတစ်ပိုင်း အဆင့်ပြီးနောက် အဘယ်ကြောင့် ကြားထဲက အဆင့်တွေကို ကျော်ဖြတ်ပြီး နယ်မြေအရှင်နှင့် ယှဉ်နိုင်သော တည်ရှိမှု ဖြစ်လာရသနည်းဆိုသည်ကို သူ နားလည်သွားတော့သည်။

ကောင်းကင်ဘုံတစ်ပိုင်း ဆိုတာ ကန့်သတ်ချက်ကျော်လွန်ခြင်း အဆင့်ပဲ၊ ဒီအဆင့်မှာ အားလုံးက အတူတူပဲ။ ကန့်သတ်ချက်ကျော်လွန်ပြီးရင် အတွင်းကမ္ဘာကို သွန်းလုပ်ရတယ်။ အစပိုင်းမှာ အတွင်းကမ္ဘာက သိပ်မကြီးနိုင်ဘူး၊ အတွင်းကမ္ဘာ ပိုကြီးလေလေ ကျင့်စဉ်က ပိုပြီး သန်မာလေလေပဲ။

ဒါပေမဲ့ ကောင်းကင်ဘုံတစ်ပိုင်း အဆင့်ပြီးတဲ့ ကောင်းကင်ဘုံ ကတော့ နယ်မြေကိုးခု တစ်ခုလုံးကို အတွင်းကမ္ဘာအဖြစ် တိုက်ရိုက် ပြောင်းလဲပစ်လိုက်တာ။ ဒီနယ်မြေရဲ့ ကျယ်ဝန်းမှု၊ စွမ်းအားတွေရဲ့ ကြွယ်ဝမှုဟာ သာမန် နယ်မြေအရှင်တွေတောင် လိုက်မမီနိုင်ဘူး၊ သူတော်စင်တွေဆိုရင်တော့ ပြောနေစရာတောင် မလိုဘူး...

ဒါပေမဲ့ ဆိုးကျိုးကတော့... သူတော်စင်ကျင့်စဉ်တွေနဲ့ သွန်းလုပ်တဲ့ အတွင်းကမ္ဘာက ကိုယ့်ကိုယ်ကိုယ် အဓိကထားတာ ဖြစ်လို့ ကန့်သတ်ချက်တွေ သိပ်မရှိဘူး။ ကောင်းကင်ဘုံကတော့ မတူဘူး။ နယ်မြေကိုးခု နဲ့ ကောင်းကင်ဘုံ ဖြစ်လာရင် အရာအားလုံးက နယ်မြေကိုးခု အပေါ်မှာပဲ မူတည်နေတော့တာ။ ဒါကြောင့် ကဏ္ဍပေါင်းစုံမှာ နယ်မြေကိုးခု ရဲ့ ကန့်သတ်ချက်တွေကို ခံနေရတာပဲ...

ဖန့်ချန်သည် စိတ်ထဲမှ တိတ်တဆိတ် သက်ပြင်းချလိုက်မိသည်။

ရှေ့တွင် ရှိနေသော လမ်းကြောင်းနှစ်ခု၏ ကွဲပြားခြားနားမှုမှာ သူ၏ စိတ်ထဲတွင် ပိုမို ရှင်းလင်းလာလေတော့သတည်း။

အခန်း (၁၈၉၂) - ဒီအရာကို ငှားရန်ဆိုသည်မှာ လုံးဝ မဖြစ်နိုင်ပေ

အချိန်များ တရွေ့ရွေ့ ကုန်ဆုံးသွားခဲ့ရာ မျှော်စင်တိုက်ပွဲ ပြီးဆုံးခဲ့သည်မှာ ယခုဆိုလျှင် နှစ်ပေါင်း တစ်ရာနီးပါး ရှိခဲ့ပြီ ဖြစ်သည်။

နတ်ဘုရားမျိုးနွယ်၏ အရေးကိစ္စများသည်လည်း ဤနှစ်တစ်ရာအတွင်း တဖြည်းဖြည်း ငြိမ်သက်သွားခဲ့သည်။

ရှဲ့ကျစ် မှ ရံဖန်ရံခါ ရရှိသော သတင်းများအရ နတ်ဘုရားမျိုးနွယ်သည် အလုံးစုံ ပြိုကွဲသွားခဲ့ပြီ ဖြစ်သည်။ မျိုးဆက်အလိုက် နတ်ဘုရားနယ်မြေကို စောင့်ကြပ်ခဲ့သော နံပါတ်တစ် အင်အားကြီးမျိုးနွယ်စုကြီးမှာ ယခုအခါတွင်မူ အစိတ်စိတ်အမြွှာမြွှာ ကွဲအက်ကာ ထွက်ပြေးတိမ်းရှောင်နေရသော မျိုးနွယ်စုများအဖြစ်သို့ ကျဆင်းသွားခဲ့ရလေပြီ။

နတ်ဘုရားမျိုးနွယ်မှ အချို့သော သူတော်စင်တစ်ပိုင်းများသည် အခြားမျိုးနွယ်စုများထံ ခိုလှုံသွားကြပြီး၊ အချို့ကမူ မိမိတို့၏ လူမျိုးစုဝင်များကို ခေါ်ဆောင်ကာ နတ်ဘုရားနယ်မြေမှ ထွက်ခွာသွားကြသည်။

ဤကာလအတွင်း နတ်ဘုရားမျိုးနွယ်ဝင် အများအပြားမှာ လုပ်ကြံသတ်ဖြတ်မှုများနှင့် ကြုံတွေ့ခဲ့ကြရပြီး ၎င်းတို့ ရင်ဆိုင်ခဲ့ရသည့် ဘေးဒုက္ခနှင့် အန္တရာယ်များမှာ ပြင်ပလူများအတွက် ပြောမပြနိုင်လောက်အောင်ပင် ဆိုးဝါးလှပေသည်။

"ချန်ဘိုးဘေး... တစ်ယောက်ယောက် ထပ်ရောက်လာပြန်ပြီ။ ဒါပေမဲ့ ဒီတစ်ခါ လာတဲ့သူကိုတော့ အဘိုး တွေ့ဆုံပေးဖို့ လိုမယ်ထင်တယ်"

ဖန့်တိန်သည် ခြံဝင်းအပြင်ဘက်တွင် ပေါ်လာပြီး လက်ဖက်ရည် ကြိုနေသော ဖန့်ချန်ကို ခါးသက်သက် အပြုံးဖြင့် ကြည့်ကာ ပြောလိုက်သည်။

"လာတဲ့သူရဲ့ အဆင့်အတန်းက ထူးခြားလို့လား"

ဖန့်ချန်က အမှတ်မထင် မေးလိုက်သည်။

ဤနှစ်များအတွင်း သူသည် သူ၏ အဆင့် ၇ ကျင့်စဉ်ကို ပိုမို ခိုင်မာအောင် လုပ်ဆောင်နေခဲ့ပြီး အားလပ်သည့် အချိန်တိုင်းတွင် ရှဲ့ကျစ်စိန်ခေါ်မှု မျှော်စင် ထံသို့ သွားရောက်လေ့ ရှိသည်။

မျှော်စင်၏ ဖိအား ကို အသုံးချကာ မိမိ၏ နတ်ဘုရားစွမ်းအားများကို အကြိမ်ကြိမ် ကုန်ခမ်းစေခဲ့သည်။ မသိမသာပင် သူ၏ ကျင့်စဉ်မှာ အဆင့် ၇ အထွတ်အထိပ်သို့ တစ်ဖန် ရောက်ရှိလာပြန်သည်။

တစ်ချိန်တည်းမှာပင် သူ မင်းရွှီနယ်မြေမှ ထွက်ခွာရမည့် အချိန်သည်လည်း တဖြည်းဖြည်း နီးကပ်လာခဲ့ပြီ ဖြစ်သည်။

ဤအတောအတွင်း အင်အားကြီးမျိုးနွယ်စုများမှ တန်ခိုးရှင် အချို့သည် ဖန့်ချန်နှင့် လက်ရည်စမ်းရန် လာရောက်ခဲ့ကြသည်။ ၎င်းမှာ ဖန့်ချန်နှင့် ယှဉ်ပြိုင်ခြင်းဖြင့် မိမိတို့၏ အစွမ်းမှာ မည်သည့်အဆင့်တွင် ရှိနေသလဲဆိုသည်ကို တိုင်းတာရန်နှင့် နောက်တစ်ကြိမ် မျှော်စင်တိုက်ပွဲတွင် ရလဒ်ကောင်းများ ရရှိရန်အတွက် ဖြစ်သည်။

ယခင်က နတ်ဘုရားမျိုးနွယ် အင်အားကြီးစဉ်က သူတို့သည် နတ်ဘုရားမျိုးနွယ်၏ ထိပ်သီးတန်ခိုးရှင်များကို သွားရောက် လက်ရည်စမ်းရန် အရည်အချင်း မပြည့်မီခဲ့ကြပေ။

နောက်ပိုင်းတွင် နတ်ဘုရားမျိုးနွယ် ကျဆုံးသွားပြီးနောက် ထိုထိပ်သီး တန်ခိုးရှင်များကို မည်သူက ဖုံးကွယ်ထားသည်မသိ၊ သူတို့၏ ခြေရာလက်ရာများကို လုံးဝ ရှာမတွေ့နိုင်တော့ချေ။ နောက်ဆုံးတွင် သူတို့သည် ဖန့်ချန်အပေါ်သို့သာ အာရုံစိုက်လာကြတော့သည်။

အနည်းငယ်သော နှစ်များအတွင်း တန်ခိုးရှင် တစ်ဦးနှုန်းဖြင့် ဖန့်ချန် ရင်ဆိုင်ခဲ့ရသည်မှာ ဆယ်ဂဏန်းမက ရှိနေပြီ ဖြစ်သည်။

" အင်အားကြီး ၁၂ ခုက မျိုးနွယ်စုဝင်... အရိပ်မျိုးနွယ် ကပါ..."

ဖန့်တိန်က တိုးတိုးလေး ဆိုသည်။

ဤစကားကို ပြောနေစဉ်မှာပင် အင်အားကြီးမျိုးနွယ်၁၂ စုမှ တန်ခိုးရှင်တစ်ဦးက ဤနေရာရှိ ဖန့်ချန်ဘိုးဘေးထံသို့ သီးသန့် လာရောက်တွေ့ဆုံသည်ဆိုသော အချက်ကို သူကိုယ်တိုင်ပင် သိပ်မယုံကြည်နိုင်ဖြစ်နေမိသည်။ ယခင် လာရောက်ခဲ့သူများထဲတွင် အဆင့်အတန်း အမြင့်ဆုံးမှာ ထိပ်တန်း မျိုးနွယ်စု တစ်ရာဝင်များသာ ဖြစ်ခဲ့ကြသည်။

"အရိပ်မျိုးနွယ်လား... ဒါဆိုရင်တော့ တွေ့ပေးရမှာပေါ့"

ဖန့်ချန်၏ မျက်နှာတွင် စိတ်ဝင်စားဟန် တစ်ခု ဖြတ်ပြေးသွားပြီး ခေါင်းညိတ်ပြလိုက်သည်။ ထို့နောက် ဖန့်တိန်၏ နောက်သို့လိုက်ကာ ဧည့်ခန်းမဆောင်ဘက်သို့ လျှောက်လှမ်းခဲ့သည်။

ယခင်က သူသည် ရိပ်ခြေဗုဒ္ဓကျင့်စဉ် ဆိုသည်မှာ တာအိုဂိုဏ်း မှ ဘိုးဘွားစဉ်ဆက် လက်ဆင့်ကမ်းလာသော ကောင်းကင်ဘုံ လှည့်စားခြင်း ကျင့်စဉ် အမျိုအစားတစ်ခုဟုသာ ထင်မှတ်ခဲ့သည်။ အရေခွံခွာခြင်းအတတ်၊ မိုးကြိုးပြာအတတ် တို့ကဲ့သို့ပင် ဖြစ်မည်ဟု ယူဆခဲ့ခြင်းဖြစ်သည်။

သို့သော် ယခုတစ်ကြိမ် မျှော်စင်တိုက်ပွဲတွင် ပါဝင်ခဲ့ပြီးမှသာ ရိပ်ခြေဗုဒ္ဓ ကျင့်စဉ်သည် အင်အားကြီးမျိုးနွယ် ၁၂ စုဖြစ်သော အရိပ်မျိုးနွယ် တို့၏ မွေးရာပါ ပင်ကိုစွမ်းရည် ဖြစ်ကြောင်း သူ သိရှိသွားခဲ့ရသည်။

ဧည့်ခန်းမဆောင်

နုပျိုလှပသော အရိပ်မျိုးနွယ် အမျိုးသမီးတစ်ဦးသည် ငြိမ်သက်စွာ ထိုင်နေသည်။ သူမ ထိုင်နေပုံမှာ လှုပ်ရှားမှုမရှိ ကျောက်ရုပ်တစ်ခုကဲ့သို့ပင် ဖြစ်ပြီး ပတ်ဝန်းကျင်ရှိ အချိန်ကာလများပင် ရုတ်တရက် ရပ်တန့်သွားသကဲ့သို့ ခံစားချက်မျိုးကို ပေးစွမ်းနေသည်။

သူမ၏ မျက်နှာပေါ်တွင် ရွှေရောင်မျဉ်းကြောင်း သုံးကြောင်းရှိပြီး ရင်ဘတ်ဆီသို့ သွယ်တန်းနေသည်။

သူမ၏ ခန္ဓာကိုယ် တည်ဆောက်ပုံမှာ လူသားများနှင့် ဆင်တူသော်လည်း ရုပ်ရည်သွင်ပြင်မှာ လူသားများနှင့် များစွာ ကွဲပြားသည်။ သို့သော် သူမကို အစောပိုင်းက တွေ့ခဲ့သော ဖန့်မျိုးနွယ် တန်ခိုးရှင်များကမူ ဤအရိပ်မျိုးနွယ် အမျိုးသမီးမှာ အလွန်ပင် လှပလွန်းလှသဖြင့် စိတ်လှုပ်ရှားမိခဲ့ကြသည်။

ရုတ်တရက် ထိုအမျိုးသမီးသည် တစ်စုံတစ်ခုကို ရိပ်မိသွားဟန်ဖြင့် ဖြည်းညှင်းစွာ ထရပ်လိုက်ပြီး တံခါးအပြင်ဘက်သို့ လှမ်းကြည့်လိုက်သည်။

ဖန့်တိန်သည် အထဲသို့ ဝင်မလာဘဲ အပြင်ဘက်တွင်သာ စောင့်နေခဲ့သည်။ ဖန့်ချန် တစ်ဦးတည်းသာ ဧည့်ခန်းထဲသို့ ဝင်လာခဲ့သည်။ အမျိုးသမီးကို တွေ့သောအခါ သူက ခေါင်းညိတ်ပြကာ အဓိက နေရာတွင် ထိုင်လိုက်သည်။

ဖန့်ချန်က ထိုင်နေပြီး အရိပ်မျိုးနွယ် အမျိုးသမီးက မတ်တပ်ရပ်နေသည်။

နှစ်ဦးစလုံး စကားမပြောဘဲ အတော်ကြာ ငြိမ်သက်နေပြီးနောက် အရိပ်မျိုးနွယ် အမျိုးသမီးက တိုးညင်းသော အသံဖြင့် စတင် စကားဆိုလာသည်။

"ဖန့်သခင်လေး... ကျွန်မက အရိပ်မျိုးနွယ်က ဝူရှင်းလင် ပါ"

သူမ၏ စကားပြောသံမှာ သိမ်မွေ့လှသဖြင့် အလွန်ပင် ယဉ်ကျေးသိမ်မွေ့သူဟု ခံစားရစေသည်။ သို့သော် အရိပ်မျိုးနွယ်၏ နည်းလမ်းများကို သိရှိသူတိုင်းမှာမူ သူမကို သာမန် ယဉ်ကျေးသူတစ်ဦးဟု မည်သည့်အခါမျှ ထင်မှတ်ကြမည် မဟုတ်ပေ။

အရိပ်မျိုးနွယ်တိုင်းမှာ မွေးရာပါ လုပ်ကြံသတ်ဖြတ်သူများ ဖြစ်ကြသလို မွေးရာပါ စစ်သည်တော်များလည်း ဖြစ်ကြသည်။ ရိပ်ခြေဗုဒ္ဓ ကျင့်စဉ်သည် အသက်ဘေးမှ လွတ်မြောက်ရန်၊ ရုတ်တရက် တိုက်ခိုက်ရန် သို့မဟုတ် ပြင်းထန်စွာ ထိုးစစ်ဆင်ရန်တို့တွင် အလွန်ကြီးမားသော အားသာချက်များ ရှိပေသည်။

"လူသားမျိုးနွယ် ဖန့်ချန်ပါ"

ဖန့်ချန်က ခေါင်းညိတ်ပြလိုက်ပြီး

"မင်းရဲ့ အရှိန်အဝါက မအားနည်းဘူးပဲ၊ ကန့်သတ်ချက်ကျော်လွန်သူ လား "

"ဟုတ်ကဲ့... ကန့်သတ်ချက်ကျော်လွန်ခြင်း တတိယအဆင့်ပါ။ မကြာခင်မှာ အတွင်းကမ္ဘာကို သွန်းလုပ်နိုင်တော့မှာပါ"

ဝူရှင်းလင်က ဆိုသည်။

"အရင်က ကျွန်တော့်ဆီ လာတဲ့ တန်ခိုးရှင်တွေက ကျွန်တော်နဲ့ အဆင့်တူတွေပဲ။ ကျွန်တော်နဲ့ လက်ရည်ယှဉ်ပြီး သူတို့ရဲ့ အစွမ်းက ဘယ်အဆင့်မှာ ရှိလဲဆိုတာ တိုင်းတာချင်ကြတာ။ ဒါပေမဲ့ မင်းကတော့ အဲဒီလို မဟုတ်ဘူး။ မင်းအနေနဲ့ ဒီလောက်ဝေးတဲ့ နေရာအထိ လာခဲ့တာ ဘာများ လမ်းညွှန်ပေးချင်လို့လဲ"

ဖန့်ချန်က မေးလိုက်သည်။

"ကျွန်မ... မျိုးစေ့ ငှားချင်လို့ပါ"

ဝူရှင်းလင်က ယခင်အတိုင်းပင် တည်ငြိမ်စွာ ဆိုသည်။

"လူမျိုးခြားတွေက လက်ထပ်လို့ မရဘူးဆိုတာ မင်းသိတယ် မဟုတ်လား"

ဖန့်ချန်သည် ခဏမျှ ဆွံ့အသွားပြီးနောက် ထူးဆန်းသော မျက်နှာထားဖြင့် မေးလိုက်သည်။

လွန်ခဲ့သော နှစ်အနည်းငယ်က ကျင်ကန်းမျိုးနွယ်သည် လန်ယွီအာကို သားဖောက်မိခင်အဖြစ် အတင်းအကျပ် တောင်းဆိုခဲ့ကြသည်။ ယခု အရိပ်မျိုးနွယ်ကတော့ ပြောင်းပြန်ပင်။ ဖန့်မျိုးနွယ်ဆီက မျိုးစေ့လာငှားရန် အမျိုးသမီးတစ်ဦးကို တိုက်ရိုက် လွှတ်လိုက်သည်လား။

"လက်ထပ်လို့ မရတာတော့ အမှန်ပါပဲ။ အတင်းအကျပ် သားသမီး ရယူမယ်ဆိုရင်လည်း မိခင်ရဲ့ ခန္ဓာကိုယ်က အကြီးအကျယ် ထိခိုက်နိုင်ပါတယ်။"

ဝူရှင်းလင်က ခေါင်းကို အသာအယာ ညိတ်ကာ

"ဒါပေမဲ့ ရှင်ရဲ့ သွေးမျိုးဆက်က ကျွန်မတို့ရဲ့ အလင်းဗောဓိသတ်ကျင့်စဉ် ကို တားဆီးနိုင်ဖို့ ကူညီပေးနိုင်လိမ့်မယ်လို့ ကျွန်မ ထင်တယ်"

"အလင်းဗောဓိသတ်ကျင့်စဉ် ဟုတ်လား"

ဖန့်ချန်မှာ ခဏမျှ မှင်တက်သွားသည်။ စာသားအရကြည့်လျှင် ၎င်းမှာ ရိပ်ခြေဗုဒ္ဓ ကျင့်စဉ်ကို အထူးနှိမ်နင်းနိုင်သည့် စွမ်းရည်တစ်ခု ဖြစ်ပုံရသည်။

"ရှင်က လူသားမျိုးနွယ် ဖြစ်ပေမဲ့ အမှောင်ရိပ် ဗောဓိသတ်ကျင့်စဉ်ကို နိုးထစေနိုင်ခဲ့တာဟာ ကျွန်မတို့ အရိပ်မျိုးနွယ်ထဲမှာ အတော်လေး ပြန့်နှံ့သွားခဲ့ပြီ။ အမျိုးမျိုးသော ခန့်မှန်းချက်တွေလည်း ရှိနေကြတယ်။ နတ်ဘုရားနယ်မြေ တည်ရှိလာတဲ့ သက်တမ်းတစ်လျှောက်မှာ ရှင်ဟာ လူမျိုးခြား အနေနဲ့ ဒီစွမ်းရည်ကို ပထမဦးဆုံး နိုးထစေနိုင်ခဲ့သူပါ"

ဝူရှင်းလင်က ဆက်လက် ရှင်းပြသည်

"ကျွန်မတို့ အရိပ်မျိုးနွယ်ရဲ့ သွေးမျိုးဆက်က ထူးခြားတယ်၊ ဒါပေမဲ့ မွေးရာပါပဲ အလင်းဗောဓိသတ်ကျင့်စဉ်ရဲ့ နှိမ်နင်းမှုကို ခံရတယ်။ အကယ်၍ ကျွန်မက ရှင့်ရဲ့ မျိုးဆက်ကို မွေးဖွားနိုင်ခဲ့ရင် အဲဒီကလေးက အရိပ်မျိုးနွယ်လည်း ဖြစ်မယ်၊ လူသားသွေးလည်း ပါမယ်၊ အမှောင်ရိပ် ဗောဓိသတ်ကျင့်စဉ်ကိုလည်း နိုးထနိုင်မယ်။ ဒါဆိုရင် အလင်းဗောဓိသတ်ကျင့်စဉ်ရဲ့ သက်ရောက်မှုကို မခံရဖို့ အခွင့်အလမ်း အများကြီး ရှိသွားပြီ"

"မျှော်စင်တိုက်ပွဲတုန်းက ကျွန်တော် အင်အားကြီးမျိုးနွယ် ၁၂ စုတွေက တန်ခိုးရှင်တွေနဲ့ လက်ရည်ယှဉ်ခဲ့ဖူးတယ်။ ဒါပေမဲ့ ဘယ်မျိုးနွယ်ကမှ အလင်းဗောဓိသတ်ကျင့်စဉ် ကို နိုးထစေတယ်လို့ မကြားဖူးဘူး..."

ဖန့်ချန်က စဉ်းစားသလိုဖြင့် ဆိုသည်။

"ဒီစွမ်းရည်ကို နိုးထနိုင်တဲ့သူတွေကလည်း အရိပ်မျိုးနွယ်တွေပါပဲ၊ ဒါပေမဲ့ သူတို့က အရိပ်မျိုးနွယ်ရဲ့ မျိုးကွဲတစ်ခုပေါ့။ အကြောင်းရင်းကတော့ လွန်ခဲ့တဲ့ နှစ်ပေါင်း တစ်သန်းလောက်အထိ ပြန်သွားရမယ်။ အဲဒီအချိန်တုန်းက နဂါးသူတော်စင် တောင် ဒီနေရာကို စောင့်ကြပ်ဖို့ ရောက်မလာသေးဘူး။

ကျွန်မကလည်း အသက်သိပ်မကြီးသေးတော့ အသေးစိတ်တွေကို သိပ်မသိလှဘူး။ အခုလက်ရှိ နတ်ဘုရားနယ်မြေရဲ့ အပြင်ဘက်မှာ အရိပ်မျိုးနွယ်စု တစ်စု ရှိနေပြီး ကျွန်မတို့ မျိုးနွယ်စုကို အမြဲတမ်း ချောင်းမြောင်းနေတယ်ဆိုတာပဲ သိတယ်။

သူတို့ ပိုင်ဆိုင်ထားတဲ့ အလင်းဗောဓိသတ်ကျင့်စဉ်ဟာ ကျွန်မတို့ အရိပ်မျိုးနွယ်အတွက် တစ်ခုတည်းသော ကြောက်စရာကောင်းတဲ့ ဖိနှိပ်မှုပဲ"

ဝူရှင်းလင်သည် ထိုသို့ ပြောပြီးနောက် ဖန့်ချန်ကို အလွန် လေးနက်စွာ ကြည့်လိုက်သည်။

"ကျွန်မ အခု လာခဲ့တာဟာ ကျွန်မတို့ မျိုးနွယ်ထဲက စီနီယာတစ်ယောက်က ဒီနည်းလမ်းကို အကြံပြုခဲ့လို့ပါ။ ဒါကြောင့် ဖန့်သခင်လေးအနေနဲ့ ကူညီပေးဖို့ မျှော်လင့်ပါတယ်။ ကျွန်မ ရှင့်ကို လက်ထပ်လို့ မရပေမဲ့ ကျွန်မတို့ ဇနီးမောင်နှံအဖြစ် ရှိခဲ့မယ်ဆိုရင်... တစ်နေ့မှာ ရှင် လူသားမျိုးနွယ်မှာ ဆက်မနေချင်တော့တဲ့အခါ အမှောင်ရိပ်မျိုးနွယ်ဆီကို လာနိုင်ပါတယ်။ ကျွန်မတို့ ရှင့်ကို နွေးနွေးထွေးထွေး လက်ခံကြိုဆိုပါ့မယ်"

"ဒီလိုလုပ်ပါ... နောက် နှစ်အနည်းငယ်ကြာရင် ဝူမိန်းကလေးကို ကျွန်တော် အကြောင်းပြန်ပါ့မယ်"

ဖန့်ချန်က စဉ်းစားပြီးမှ ပြောလိုက်သည်။

"နောက် နှစ်အနည်းငယ်ကြာရင် ဟုတ်လား"

ဝူရှင်းလင်မှာ ခဏမျှ မှင်တက်သွားပြီး

"ဒါဆို ဘယ်နှစ်နှစ်လောက် စောင့်ရမှာလဲ"

"သုံးနှစ်ကနေ ငါးနှစ်လောက်ပေါ့။ ဒါက ကလေးကစားစရာ မဟုတ်တော့ ကျွန်တော့်ကို စဉ်းစားဖို့ အချိန်ပေးပါဦး"

ဖန့်ချန်က ဆိုသည်။

"ကောင်းပါပြီ... ဒါဆိုရင် ဒီသုံးလေးနှစ်အတွင်းမှာ ရှင့်တို့ဆီမှာပဲ ကျွန်မ ခဏလောက် နေထိုင်ပါရစေ"

ဝူရှင်းလင်က ခေါင်းညိတ်သဘောတူလိုက်သည်။

"ဒါဆိုရင်လည်း နေပါ" ဖန့်ချန်က ပြုံးလိုက်သည်

"ဝူမိန်းကလေးအတွက် နေစရာ စီစဉ်ပေးဖို့ ကျွန်တော် ပြောလိုက်ပါ့မယ်"

နောက်ထပ် နှစ်အနည်းငယ် ကြာလျှင် သူသည် သမိုင်းဝင်မသေမျိုးကျမ်း ထဲမှ ထွက်ခွာရတော့မည် ဖြစ်သည်။ ဖန့်လဲ့ ပြောခဲ့သလိုပင် သူနှင့် ပတ်သက်သည့် မှတ်ဉာဏ်များသည် ဆန်းကြယ်သော အင်အားတစ်ခုကြောင့် သူ့ကို သိကျွမ်းသူအားလုံး၏ ဦးနှောက်ထဲမှ ပျောက်ကွယ်သွားလိမ့်မည် ဖြစ်သည်။

ထိုအချိန်ရောက်လျှင် ဝူရှင်းလင်ရော၊ အရိပ်မျိုးနွယ်ပါ ဤကိစ္စကို မေ့သွားကြလိမ့်မည်။ သူသည် ဝူရှင်းလင်ကို တိုက်ရိုက် ငြင်းပယ်ခြင်း မပြုခဲ့သည်မှာ အရိပ်မျိုးနွယ်က အငြင်းခံရပြီးနောက် အခြားသော ပြဿနာရှာမှုများ ပြုလုပ်လာမည်ကို စိုးရိမ်၍ ဖြစ်သည်။

အခြားအရာကို ငှားလျှင် ငှားနိုင်သော်လည်း... ဤအရာကို ငှားရန်ဆိုသည်မှာ လုံးဝ မဖြစ်နိုင်ပေ။