အခန်း (၂၄)

အခန်း ၂၄ အကြိမ်ကိုးဆယ်ရွှေခန္ဓာကျင့်စဉ်၊ မင်းသမီးလေးကို ပါးရိုက်ခြင်း

"သူ ရောက်လာပြီ..." ဤကံကြမ္မာသားတော်ဟု ခေါ်ဆိုသူက ဤမျှ ထင်ပေါ်ကျော်ကြားစွာ ဝင်ရောက်လာလိမ့်မည်ဟု ချင်လော့ မမျှော်လင့်ထားခဲ့ချေ။

"မာနကြီးလိုက်တာ... ကြည့်ရတာ သူတို့က ငါ့ကို လုံးဝ အလေးမထားဘူးထင်တယ်..."

"ငါ သိချင်တယ်... မင်းရဲ့ လျှို့ဝှက်ချက်က ဘာလဲဆိုတာကို..."

ချင်လော့က လင်းရွှမ်ကို ပေါ့ပေါ့ပါးပါး ကြည့်လိုက်ပြီး သူ၏ နှုတ်ခမ်းများတွင် အပြုံးတစ်ခု ပေါ်လာခဲ့ရာ ၎င်းက လင်းရွှမ်အမြင်တွင်မူ ကျေနပ်နေသော အပြုံးတစ်ခု ဖြစ်နေပေ၏။

ချင်လော့က သူ၏ အမျိုးသမီးကို မဖွယ်မရာ ထိတွေ့နေသည်ကို သူ သည်းမခံနိုင်ချေ။

ဒေါသများ ထွက်ပေါ်လာပြီး သူက ချင်လော့အား ဒေါသတကြီး ဟစ်အော်လိုက်သည်။ "ချင်းရွှဲ့ကို လွှတ်လိုက်... မဟုတ်ရင် မင်းကို ဒီနေရာမှာတင် သွေးထွက်အောင် လုပ်ပစ်ဖို့ ငါ တွန့်ဆုတ်နေမှာ မဟုတ်ဘူး..."

ဘုန်း...

ထိုနေရာရှိ လူတိုင်း ကြက်သေသေသွားခဲ့ကြ၏။

လူတိုင်း၏ အကြည့်က လင်းရွှမ်အပေါ်သို့ ရောက်ရှိသွားခဲ့သည်။

"ဒီကောင်လေးက တော်တော် မာနကြီးတာပဲ... မဟာချင်အင်ပါယာရဲ့ မင်းသားတစ်ပါးကိုတောင် ခြိမ်းခြောက်ရဲတယ်ပေါ့...

ကျွတ်ကျွတ်... ငါ သဘောကျတယ်..." ချင်ဖုန်းက သူ၏ မျက်လုံးများတွင် စူးစမ်းလိုသော အရိပ်အယောင်တစ်ခုဖြင့် လင်းရွှမ်ကို ကြည့်လိုက်၏။

လင်းရွှမ်၏ ထူးခြားသော အရည်အသွေးများကို သူလည်း မြင်တွေ့နိုင်ပြီး ယနေ့တွင် ကြည့်ရှုစရာ ပြဇာတ်ကောင်းတစ်ခု ရှိလာနိုင်သည်ဟု သူ ခံစားလိုက်ရလေသည်။

ပြီးတော့...

လင်းရွှမ်၏ အနောက်မှနေ၍ သူ့ဆီသို့ ဖြည်းညင်းစွာ လျှောက်လာနေသော အမျိုးသမီးတစ်ဦးကို သူ သတိပြုမိလိုက်ရာ သူ အလွန် အံ့အားသင့်သွားပြီး ချက်ချင်း မတ်တတ်ရပ်လိုက်မိပေ၏။

"မင်းသမီး ရောက်လာပါပြီ..." စူးရှသော အသံတစ်သံ ထွက်ပေါ်လာပြီး ကျော့ရှင်းလှပသော အမျိုးသမီးတစ်ဦးက ခြံဝင်းအတွင်းသို့ ဖြည်းညင်းစွာ ဝင်ရောက်လာခဲ့လေသည်။

ထိုနေရာရှိ လူတိုင်း မတ်တတ်ရပ်ကာ အမျိုးသမီးကို ဦးညွှတ်လိုက်ကြပြီး ပြောဆိုလိုက်ကြ၏။ "မင်းသမီးကို ဂါရဝပြုပါတယ်..."

နန်းတွင်းအဝတ်အစားများကို ဝတ်ဆင်ထားပြီး ဂုဏ်သိက္ခာရှိသော အာဏာစက် အငွေ့အသက်နှင့်အတူ မဟာချင်အင်ပါယာ၏ မင်းသမီး ချင်ကျင်းက ဖြည်းညင်းစွာ လျှောက်လာခဲ့သည်။

သူမသည် မဟာချင်အင်ပါယာတွင် အလေးစားရဆုံး လူများထဲမှ တစ်ဦးဖြစ်ပြီး အလွန် အထူးတလည် ဖြစ်တည်မှုတစ်ခု ဖြစ်လေသည်။ သူမက မဟာချင်အင်ပါယာ၏ တစ်ဦးတည်းသော မင်းသမီးဖြစ်ပြီး အရှင်မင်းကြီး၏ အချစ်တော်ဖြစ်ကာ အလွန် ချစ်ခင်မြတ်နိုးခံရပေ၏။

သူမ၏ မိခင်ဘက်မှ ဆွေမျိုးများမှာ အလွန် တန်ခိုးကြီးမားပြီး မဟာချင်အင်ပါယာ၏ တော်ဝင်မိသားစုဝင် မဟုတ်သော ဘုရင်ခံများထဲမှ တစ်ပါး ဖြစ်လေသည်။ သူတို့၏ မြေယာနှင့် ဘွဲ့တံဆိပ်များ ချီးမြှင့်ခံရနိုင်စွမ်းက သူတို့၏ ထူးခြားသော အင်အားကို သက်သေပြနေပေသည်။

သူမ၏ ဆရာဖြစ်သူ၏ ဇာစ်မြစ်မှာ လျှို့ဝှက်ဆန်းကြယ်မှုများဖြင့် ဖုံးလွှမ်းနေပြီး ချင်ဧကရာဇ်၏ ဧည့်သည်တစ်ဦးဖြစ်ကြောင်း ဆိုကြကာ မဟာချင်အင်ပါယာ၏ အဖွဲ့ဝင်တစ်ဦးလည်း ဖြစ်လေသည်။ အင်ပါယာမျိုးနွယ်တရားရုံး၏ ဒုတိယအကြီးအကဲများထဲမှ တစ်ဦးအဖြစ် သူမ၏ အဆင့်အတန်းက မဟာချင် တော်ဝင်မိသားစုအတွင်း သူမ၏ အထူးနေရာကို ပြသနေပေ၏။

ထို့ပြင် သူမသည်လည်း ကံကြမ္မာသမီးတော် ဖြစ်လေသည်။

[ကံကြမ္မာသမီးတော်ကို ရှာဖွေတွေ့ရှိပါသည်...]

[အမည် - ချင်ကျင်း]

[အသက် - ၂၉ နှစ်]

[ကံကြမ္မာအဆင့် - တတိယအဆင့်]

[ခန္ဓာကိုယ် - သန့်စင်အေးစက်သောနှလုံးသား]

[သန့်စင်အေးစက်သောနှလုံးသား ရှိသည့် အမျိုးသမီးများသည် ငြိမ်သက်နေသော ရေပြင်ကဲ့သို့ ဖြစ်ပြီး တည်ငြိမ်မှုနှင့် ဆင်ခြင်တုံတရားကို ထိန်းသိမ်းထားနိုင်ကာ ကျင့်ကြံချိန်တွင် အလွယ်တကူ နှောင့်ယှက်ခံရခြင်း သို့မဟုတ် သွေးဆောင်ခံရခြင်း မရှိပါ...]

[ကံကြမ္မာတန်ဖိုး - ၅၉,၈၀၀ မှတ်]

[ကျင့်ကြံမှုအဆင့် - လိုဏ်ဂူကောင်းကင်အဆင့် ၁ ]

[ဖော်ပြချက် - တိုင်းဆ၍မရနိုင်သော မွန်မြတ်မှုရှိသည့် ကောင်းကင်ဘုံ၏ အချစ်တော် သမီးတစ်ဦး... မမျှော်လင့်ထားသောအရာများ မဖြစ်ပွားပါက သူမသည် ဇာတ်လိုက်၏ မယားငယ်များထဲမှ တစ်ဦး သေချာပေါက် ဖြစ်လာလိမ့်မည်။ သူမက ဤဇာတ်လိုက် ဖြစ်လာမည်လား...သို့မဟုတ် အနာဂတ်ရှိ အခြားဇာတ်လိုက် တစ်ဦး ဖြစ်လာမည်လား။ မည်သည့်အရာမဆို ဖြစ်နိုင်ပါသည်...]

"ဘုရားရေ... သူတို့က သခင်ကြီးတစ်ယောက်ကို ခေါ်ထုတ်လာတာလား..." ချင်လော့က သူတို့ကို တစ်ခဏမျှသာ ကြည့်ပြီးနောက် သူ၏ အကြည့်က လင်းရွှမ်အပေါ်သို့ စူးစိုက်သွားခဲ့၏။

သူက လင်းရွှမ်အား သနားညှာတာမှုကင်းမဲ့စွာ အပြစ်တင်လိုက်သည်။ "မင်းကိုယ်မင်း ဘယ်သူလို့ ထင်နေတာလဲ... ဒီမှာ စကားပြောဖို့ အခွင့်အရေးကို ဘယ်သူက မင်းကို ပေးထားတာလဲ... မင်းက သဘောမတူဘူး ဟုတ်လား..."

"မင်းက ငါ့ရဲ့ ကိုယ်လုပ်တော်နဲ့ တကယ်ပဲ ဖောက်ပြန်နေတာလား... မင်းက တော်ဝင်မိသားစုကို စော်ကားလိုက်တာပဲ... မင်း ဘယ်လောက်တောင် ရဲတင်းနေတာလဲ... မင်းရဲ့ မိသားစုတစ်ခုလုံးကို သုတ်သင်ခံချင်နေတာလား..."

လင်းရွှမ်သည် သူ၏ မိသားစုတစ်ခုလုံး သုတ်သင်ခံရမည်ကို သေချာပေါက် မကြောက်ရွံ့ခဲ့ချေ။ အဘယ်ကြောင့်ဆိုသော် သူ့တွင် စတင်ကတည်းက ဆွေမျိုး မျိုးဆက်ကိုးဆက် မရှိခဲ့သောကြောင့်ပင်။

ကုမိသားစု သုတ်သင်ခံရမည်ဆိုသည်ကိုတောင် သူ စိုးရိမ်ပူပန်မနေခဲ့ချေ။ သူ မပျော်မရွှင် မဖြစ်သရွေ့ သူ၏ အမျိုးသမီးက အလုယူခံရ၍ မဖြစ်နိုင်ပေ။

အကယ်၍ သူ၏ အမျိုးသမီး၏ မိသားစုတစ်ခုလုံး သုတ်သင်ခံရလျှင် သူ၏ ကျင့်ကြံမှုတွင် အောင်မြင်လာချိန်၌ သူ ကလဲ့စားချေနိုင်လေသည်။

ကုချင်းရွှဲ့မှာ မျက်ရည်များဖြင့် လင်းရွှမ်ကို ခေါင်းအနည်းငယ် ခါယမ်းပြလိုက်၏။

နန်းတော်မှ မိန်းမစိုးများ၏ အသံကို ကိုယ်တိုင် ကြားခဲ့ရပြီး ဖခင်ဖြစ်သူ၏ ထိတ်လန့်ကာ ကူကယ်ရာမဲ့နေသော အသွင်အပြင်ကို မျက်စိဖြင့် တပ်အပ် မြင်တွေ့ခဲ့ရသဖြင့် သူမ ဆက်လက်၍ ခေါင်းမာ၍မရနိုင်တော့ကြောင်း သူမ သဘောပေါက်သွားခဲ့လေသည်။

ယခုအခါ လင်းရွှမ် ရောက်လာပြီဖြစ်ရာ သူမမှာ အခက်တွေ့နေပြီး လင်းရွှမ်က သူမအတွက် အန္တရာယ်စွန့်သည်ကို သူမ မမြင်လိုချေ။

လင်းရွှမ်က ကုချင်းရွှဲ့၏ အမူအရာကို သူ နားလည်သည်ဟု ယုံကြည်လိုက်၏။ ကုချင်းရွှဲ့မှာ သူ့အတွက် စိုးရိမ်ပူပန်နေရုံမျှသာ ဖြစ်သည်ဟု သူ ခံစားလိုက်ရသဖြင့် ချင်လော့၏ အတင်းအကျပ် သိမ်းပိုက်ခြင်းကို ကုချင်းရွှဲ့အား မခံစေရန် သူ ပို၍ပင် ဆုံးဖြတ်ချက် ခိုင်မာသွားခဲ့လေသည်။

"ငါက သဘောမတူရင်ရော ဘာဖြစ်လဲ..." ချင်ကျင်းက ဖြည်းညင်းစွာ ထွက်လာစဉ် အေးစက်သော အသံတစ်ခု ထွက်ပေါ်လာခဲ့၏။

သူမတွင် မာနထောင်လွှားသော အမူအရာ ရှိနေပြီး ချင်လော့ကို အလွန် စိမ်းသက်နေသော မျက်လုံးများဖြင့် ကြည့်လိုက်သည်။ သူမ၏ ပထမဆုံး စကားများက ချင်လော့ကို ချက်ချင်း ရွံရှာသွားစေခဲ့ပေ၏။

"မင်းက အပြင်ဘက်မှာ ကြီးပြင်းလာတဲ့ ငါ့ ချင်မိသားစုက တောရိုင်းကောင်လေး တစ်ယောက်မျှသာပဲ"

"ထင်တဲ့အတိုင်းပဲ လူတစ်ယောက်ရဲ့ စရိုက်ကို သူတို့ရဲ့ သစ္စာခံမှုနဲ့ အကဲဖြတ်လို့ မရဘူးပဲ..." ချင်လော့က သူ့ဘာသာ တိုးတိတ်စွာ ရေရွတ်လိုက်သည်။

သူ ဆုံတွေ့ခဲ့ရသော ကံကြမ္မာသားတော် နှစ်ဦးစလုံးမှာ လူကောင်းများ မဟုတ်ကြချေ။ သူတို့က ကောင်းကင်တာအို၏ မျက်နှာသာပေးမှုကို ခံရရုံသက်သက်သာ ဖြစ်လေသည်။

[ပိုင်ရှင်အနေဖြင့် အမှန်တရားကို နားလည်သဘောပေါက်ပါသည်။ သမိုင်းကို အမြဲတမ်း အောင်နိုင်သူများကသာ ရေးသားကြပါသည်... ကောင်းကင်တာအိုက ဘယ်သူပဲဖြစ်ဖြစ် ဇာတ်လိုက်ကို သတ်မှတ်ခွင့် ရှိပါသည်... တရားမျှတမှုနဲ့ မကောင်းဆိုးဝါး ဟုတ်လား... အဲဒါတွေက မတူညီတဲ့ ရှုထောင့်တွေမျှသာ ဖြစ်ပါသည်...]

[စနစ်က သင်ကို ကျေနပ်သွားပြီး နတ်ဘုရားအဆင့် ကျင့်စဉ်တစ်ခုကို ဆုချီးမြှင့်ရန် ဗီလိန်မှတ်အားလုံးကို အသုံးပြုနိုင်ပါသည်... သဘောတူပါသလား...]

ချင်လော့၏ နှုတ်ခမ်းများ တွန့်ကွေးသွားခဲ့၏။ ဤစနစ်က သူ၏ ဗီလိန်မှတ်များကို အမြဲတမ်း စောင့်ကြည့်နေခဲ့လေသည်။

သို့သော်...

နတ်ဘုရားအဆင့် ကျင့်စဉ်... ဒါက တကယ့်ကို တန်တဲ့ အပေးအယူပဲ...

"သဘောတူတယ်..." ချင်လော့က စိတ်ထဲမှ တိတ်တဆိတ် ပြောဆိုလိုက်၏။

[လဲလှယ်ခြင်း အောင်မြင်ပါသည်... ကျင့်စဉ်တစ်ခုကို ရရှိပါသည် - အကြိမ်ကိုးဆယ်ရွှေခန္ဓာကျင့်စဉ် (နတ်ဘုရားအဆင့်)]

[ထိပ်တန်းအဆင့် ခန္ဓာကိုယ် သန့်စင်ခြင်း] ကျင့်စဉ်ပါပဲ... လင်းရွှမ် ကျင့်ကြံထားတဲ့ သေမျိုးကင်းစင်ရွှေခန္ဓာကျင့်စဉ်ကို သင် မြင်ဖူးတယ် မဟုတ်လား... ဒီကျင့်စဉ်က အဲဒါထက် အဆတစ်ရာလောက် ပိုသန်မာပါတယ်... အမြင့်ဆုံးအဆင့်အထိ ကျင့်ကြံနိုင်ရင် သွေးတစ်စက်တည်းနဲ့တောင် ပြန်လည်မွေးဖွားနိုင်ပါတယ်]

ကျွတ်ကျွတ်... စနစ်နဲ့ ထိုက်တန်ပါပေတယ်... စနစ်က လှုပ်ရှားလိုက်ပြီဆိုတာနဲ့ ၎င်းက ဘယ်လောက်အထိ ခံနိုင်ရည်ရှိမလဲဆိုတာ ကြည့်ကြရအောင်...

ချင်လော့မှာ အလွန် ကျေနပ်နေသော်လည်း ချင်ကျင်း ပြောခဲ့သောအရာက သူ့ကို အလွန် မကျေမနပ် ဖြစ်သွားစေခဲ့ပေသည်။

"မင်း မြို့တော်ကို ရောက်တာ မကြာသေးဘူး... မင်းသားဆိုတဲ့ အဆင့်အတန်းကို အားကိုးပြီး ဒီလောက် ကြီးမားတဲ့ ပြဿနာကို ဖြစ်အောင် လုပ်နေပြီ... မဟာချင် တော်ဝင်မိသားစုရဲ့ ဂုဏ်သတင်းကို မင်း ထိခိုက်အောင် လုပ်နေတယ်ဆိုတာ မင်း သိရဲ့လား..."

"ကိုယ်လုပ်တော် ယူဖို့ က မလိုတော့ဘူးလို့ ငါ ထင်တယ်... မင်းရဲ့ စံအိမ်ကနေ ကုမိသားစုက အမျိုးသမီးကို ထုတ်ပစ်ဖို့ ဒီစာရွက်မှာ လက်မှတ်ထိုးလိုက်... ပြီးရင် အပြစ်ပေးခံရဖို့ ငါနဲ့အတူ အင်ပါယာမျိုးနွယ်တရားရုံးကို လိုက်ခဲ့..."

ပေါ့ပေါ့ပါးပါး ပစ်ပေးလိုက်မှုနှင့်အတူ ကုမိသားစု၏ သမီး ကုချင်းရွှဲ့နှင့် ပတ်သက်မှုကို မိမိသဘောဆန္ဒအလျောက် ဖြတ်တောက်ကြောင်း စာရွက်က ချင်လော့၏ရှေ့တွင် လွင့်မျောနေခဲ့လေသည်။

ချန်မိုက ဤမြင်ကွင်းကို ကြည့်နေပြီး ထူးဆန်းသော ရင်းနှီးမှုတစ်ခုကို ခံစားလိုက်ရ၏။ ကွာခြားချက်မှာ သူက အရင်တုန်းက ဟာသတစ်ခုမျှသာ ဖြစ်နေခဲ့ခြင်းပင်။

သူက တစ်မြို့လုံး၏ လှောင်ပြောင်စရာ ဖြစ်လာခဲ့ပြီး သူ၏ အသိုင်းအဝိုင်းရှိ လူတိုင်း၏ လှောင်ပြောင်မှုကို ခံခဲ့ရလေသည်။

"မင်းသမီး ချင်ကျင်းအပေါ်ကို မင်း ဒီလောက် မာနကြီးရဲလားဆိုတာ ငါ ကြည့်ချင်သေးတယ်..." ချန်မိုက ချင်လော့ကို စူးစိုက်ကြည့်နေပြီး ချင်လော့ အရှက်ခွဲခံရမည်ကို မျှော်လင့်နေသလို၊ ချင်လော့က ချင်ကျင်းကို အရှက်ခွဲမည်ကိုလည်း မျှော်လင့်နေခဲ့ပေသည်။

နောက်ဖြစ်နိုင်ခြေက သိပ်မမြင့်မားသော်လည်း အကယ်၍ ထိုဖြစ်နိုင်ခြေသာ အမှန်တကယ် ဖြစ်လာပါက သူသည် ထိုလူများ၏ လှောင်ပြောင်စရာ အချိန်အကြာကြီး ဖြစ်နေခဲ့မည် မဟုတ်ချေ။

ချင်လော့က စာရွက်ကို ယူလိုက်ပြီး ၎င်း၏ အကြောင်းအရာများကို ကြည့်ကာ နှုတ်ခမ်းများ တွန့်ကွေးသွားခဲ့၏။

"ကျွတ်ကျွတ်... တကယ့်ကို အာဏာပြတာပဲ..."

သူ၏ အကြည့်က ချင်ကျင်းအပေါ်သို့ ကျရောက်သွားပြီး သူက အနည်းငယ် ပြုံးလိုက်ကာ ၎င်းကို ဆုတ်ဖြဲပစ်လိုက်လေသည်။

"မင်းကိုယ်မင်း ဘယ်သူလို့ ထင်နေတာလဲ... ငါ့ကို အမိန့်ပေးဖို့ အခွင့်အရေးကို ဘယ်သူက မင်းကို ပေးထားတာလဲ..."

"အရှင်မင်းကြီးကတောင် ငါ ကိုယ်လုပ်တော် ယူတာကို သဘောတူထားပြီးပြီ... ငါ့ကို ဝေဖန်ဖို့ မင်းက ဘယ်သူလဲ... မင်းက မဟာချင်အင်ပါယာရဲ့ ချင်ဧကရာဇ်ထက် ပိုသာတယ်လို့ တကယ်ကြီး ထင်နေတာလား... အရှင်မင်းကြီးက ဒီလောက် လေးစားမှု ခံရဖို့တောင် ထိုက်တန်သေးရဲ့လား..."

ဘုန်း...

ချင်လော့က ချင်ကျင်းကို ပေါ်ပေါ်တင်တင် ဆန့်ကျင်လိမ့်မည်ဟု မည်သူကမျှ မမျှော်လင့်ထားခဲ့ကြချေ။

ချင်ဖုန်းမှာ ချင်လော့ကို မလေးစားဘဲ မနေနိုင်တော့ချေ။ "ထင်တဲ့အတိုင်းပဲ မွေးကင်းစ နွားသငယ်က ကျားကို မကြောက်ဘူးပဲ... ငါ့ရဲ့ သနားစရာကောင်းတဲ့ ကိုယ်လုပ်တော်တွေ အကျပ်အတည်းကနေ လွတ်မြောက်ဖို့ တစ်ယောက်ယောက်က လာကူညီပေးနေပုံရတယ်..."

ချင်ကျင်း၏ အမူအရာက ချက်ချင်း ပြောင်းလဲသွားခဲ့ပြီး သူမ၏ အေးစက်သော အကြည့်က ချင်လော့အပေါ်သို့ ကျရောက်သွားလေသည်။

"မင်း ဘယ်လောက်တောင် ရဲတင်းနေတာလဲ... မသိနားမလည်တဲ့ ကောင်လေး... မင်းက နိမ့်ကျတဲ့သူတစ်ယောက်ရဲ့ ကလေးတစ်ယောက်ပဲ.. အမြဲတမ်း အဓိပ္ပာယ်မရှိတာတွေ လျှောက်ပြောနေတယ်..."

"ဒီနေ့ ငါ မင်းကို သင်ခန်းစာပေးပြီး သင့်လျော်တဲ့ အမူအကျင့်တွေက ဘာလဲဆိုတာ ပြပေးမယ်..."

ဝှစ်ခနဲ အသံနှင့်အတူ သူမက ချင်လော့၏ရှေ့တွင် ပြန်လည်ပေါ်လာပြီး ချင်လော့၏ မျက်နှာကို ပါးရိုက်လိုက်ပေသည်။

ချင်လော့က အေးစက်စွာ ပြောဆိုလိုက်၏။

"ငါ့အမေကို စော်ကားတဲ့သူက ပါးရိုက်ခံရဖို့ ထိုက်တန်တယ်..."

ဖြန်း...

ပြင်းထန်သော ပါးရိုက်ချက်တစ်ခုက ချင်ကျင်း၏ မျက်နှာပေါ်သို့ ကျရောက်သွားလေတော့သည်။