အခန်း ၃၈၃

အခန်း ၃၈၃။ ဧကရာဇ်တစ်ပိုင်း ယွမ်ရွှီ

ဧကရာဇ်တစ်ပိုင်း ယွမ်ရွှီသည် နားထင်မှ သွေးကြောများ ထောင်ထွက်လာသည်အထိ ဒေါသထွက်နေပြီး

"မင်းတို့က အေးအေးဆေးဆေး အဖမ်းခံမှာလား၊ ဒါမှမဟုတ် အသေခံပြီး ခုခံဦးမှာလား"

ဟု ပြင်းထန်စွာ မေးမြန်းလိုက်သည်။

ဘေးနားရှိ အင်မော်တယ်ဘုရင် ဝူကျွယ်ကလည်း ရယ်မောလျက် ပြန်ပြောသည်။

"သေချာတာပေါ့၊ ငါတို့က တိုက်ပွဲကြီးတစ်ပွဲ ဆင်နွှဲရမှာပေါ့"

"မင်းတို့ သေချာလား"

ပန်းပဲဆရာ အင်မော်တယ်ဘုရင် မင်ချီက ရဲရင့်သောစစ်သည်တော်တစ်ဦးကဲ့သို့ ရင်ဘတ်ကိုပုတ်ကာ အတည်ပြုသည်။

"လုံးဝကို သေချာတယ်"

ဧကရာဇ်တစ်ပိုင်း ယွမ်ရွှီသည် အံကြိတ်ကာ ဒေါသတကြီး အော်ဟစ်တော့သည်။

"ငါက ဧကရာဇ်တစ်ပိုင်း တစ်ပါးပဲ... မင်းတို့လို အမှိုက်တွေက သေမှာကို မကြောက်ကြဘူးလား"

"မင်း ဘယ်လိုထင်လဲ"

အင်မော်တယ်ဘုရင် လျိုယွမ်က ပခုံးတွန့်ပြကာ ဂိုဏ်းချုပ်ကျန်းကို တစ်ချက်ကြည့်ရင်း

"အဲ့ဒီလူကြီး ရှိနေသရွေ့ ငါတို့အတွက် ဘာပြဿနာမှမရှိဘူးလို့ ထင်တယ်"

ပတ်ဝန်းကျင်ရှိ အင်မော်တယ်ဘုရင်များနှင့် အင်မော်တယ်အရှင်သခင်များမှာ ဒေါသထွက်လာကြပြီး

"သူတို့ကို သတ်ပစ်"

"ဧကရာဇ်တစ်ပိုင်း ယွမ်ရွှီကို ဒီလောက်အထိ မလေးမစား လုပ်ရဲတယ်"

"သူတို့က တကယ့်ကို ပုန်ကန်နေကြတာပဲ"

"သူလျှိုရန်သူတွေ ဖြစ်နေတာတောင် ဒီလောက်အထိ ရဲတင်းနေကြတာလား"

ဝိုင်းဝန်းအော်ဟစ် ကြိမ်းမောင်းကြသည်။

"အားလုံး ပါးစပ်ပိတ်ထားစမ်း"

ယွမ်ရွှီသည် စိတ်ပျက်လက်ပျက်ဖြင့် လူအုပ်ကို တားဆီးလိုက်ပြန်သည်။ သူသည် သက်ပြင်းချကာ အစ်ကိုကြီးချန်ကိုကြည့်ပြီး မတတ်သာသည့်လေသံဖြင့် မေးလိုက်သည်။

"မင်း တကယ်ပဲ အဖမ်းမခံဘူးလား"

ထိုသူ အကျပ်ရိုက်နေသည်ကို မြင်သောအခါ အစ်ကိုကြီးချန်က လက်နှစ်ဖက်ကို ဖြန့်ပြကာ

"ကောင်းပြီ၊ ကောင်းပြီ၊ ငါတို့ကို မင်း ဖမ်းမိသွားပါပြီ..."

ယွမ်ရွှီမှာ ချက်ချင်းပင် ဝမ်းသာသွားပြီး လက်ကိုအမြန်ယမ်းကာ

"ကောင်းပြီ၊ ရန်သူတွေကို ငါ အောင်မြင်စွာ ဖမ်းဆီးနိုင်ခဲ့ပြီ။ အခု သူတို့ကို ပြင်းပြင်းထန်ထန် စစ်ဆေးဖို့ ခေါ်သွားမယ်"

"အားလုံး ကိုယ့်နယ်မြေကို ကိုယ်ပြန်ကြ... ခွင့်ပြုချက်မရှိဘဲ ဘယ်သူမှ တာဝန်ကနေမထွက်ရဘူး"

ဟု အမိန့်ပေးလိုက်သည်။

အမ်... ဒါက ဘာလဲ...

ပတ်ဝန်းကျင်ရှိ အင်မော်တယ်ဘုရင်များနှင့် အင်မော်တယ်အရှင်သခင်များမှာ လုံးဝကို ဇဝေဇဝါ ဖြစ်သွားကြသည်။ ၎င်းကို ဖမ်းဆီးသည်ဟု ခေါ်ဆိုနိုင်ပါသလား...

သူတို့မျက်စိထဲတွင်မူ အခြေအနေမှာ တစ်မျိုးကြီးဖြစ်နေသည်။

"ဘာလဲ၊ မင်းတို့က ငါ့ရဲ့ စွမ်းအားကို မယုံကြည်တာလား၊ ဒါမှမဟုတ် ငါ့အမိန့်ကို ဖီဆန်ချင်တာလား"

ယွမ်ရွှီက မေးလိုက်သောအခါ

"မလုပ်ရဲပါဘူး၊ မလုပ်ရဲပါဘူး..."

ဟုသာ ပြန်ပြောနိုင်ကြတော့သည်။

ဧကရာဇ်တစ်ပိုင်းတစ်ဦးအတွက် အင်မော်တယ်ဘုရင် ဆယ်ဂဏန်းခန့်ကို ဖမ်းဆီးရန်မှာ ခက်ခဲလိမ့်မည်မဟုတ်ဟု ယူဆကာ စောစောက အင်မော်တယ်အရှင်သခင်၏ အဖြစ်အပျက်ကိုလည်း သတိရမိသဖြင့် အားလုံးမှာ ငြိမ်သက်စွာ ဆုတ်ခွာသွားကြသည်။ လူအားလုံး ထွက်ခွာသွားပြီးမှသာ ယွမ်ရွှီသည် အသံလုံအတားအဆီးတစ်ခုကို တည်ဆောက်လိုက်ပြီးနောက် သူသည် ခါးကိုကိုင်းကာ မြေပြင်ပေါ်အထိ ဦးညွှတ်၍ ဂါရဝပြုတော့သည်။

"လင်မင်နယ်မြေက ယွမ်ရွှီ၊ ဂိုဏ်းချုပ်ကျန်းကို ဂါရဝပြုပါတယ်"

"နှစ်ပေါင်း သန်းတစ်ရာရှိခဲ့ပြီ... ဒီလူအိုကြီးက... နောက်ဆုံးတော့ ပြန်တွေ့ရပြီ"

ယွမ်ရွှီ ခေါင်းပြန်မော့လာသောအခါ သူ၏မျက်ဝန်းတွင် မျက်ရည်များဝဲနေပြီး အသံမှာလည်း ထိန်းမနိုင်သိမ်းမရ တုန်ရင်နေသည်။ လင်မင်နယ်မြေမှာ ယခင် အောက်လောက၏ နယ်မြေပေါင်း တစ်သောင်းတွင် ထိပ်တန်း အခု ၃၀ အတွင်းပါဝင်သော နယ်မြေကြီးတစ်ခု ဖြစ်သည်။ ထိုစဉ်က အားလုံးအတူတကွ ဟင်းလင်းပြင်အင်မော်တယ်လောကထဲသို့ ဝင်ရောက်ခဲ့စဉ်က သူတို့တွင် သူတော်စင်အဆင့် ၁၀ ယောက်ရှိခဲ့ပြီး ခေါင်းဆောင်မှာ စိန့်ယွမ်ရွှီဖြစ်သည်။ အချိန်များကုန်လွန်သွားပြီးနောက် သူသည် ယခုအခါ ဧကရာဇ်တစ်ပိုင်း ယွမ်ရွှီ ဖြစ်နေလေပြီ။

ရှောင်ကွန်းနှင့် ကျီယွမ်တို့ မစိုးရိမ်ခဲ့ခြင်းမှာလည်း တစ်ဖက်ခေါင်းဆောင်မှာ လူဟောင်းတစ်ဦး ဖြစ်နေသောကြောင့်ပင်။ အစ်ကိုကြီးချန်က ပြုံးလျက် သူ့ကိုထူပေးလိုက်ပြီး

"မဆိုးဘူး၊ မဆိုးဘူး။ မတွေ့ရတာ ကြာပြီ။ မင်းရဲ့ ညီငယ်တွေနဲ့ သူငယ်ချင်းတွေကော နေကောင်းကြလား"

ဟု မေးလိုက်သည်။ သူသည် လူများကိုမှတ်မိခဲသော်လည်း ဤသူ့ကိုမူ ချက်ချင်းမှတ်မိသည်၊ အကြောင်းမှာ ထိုစဉ်က အစည်းအဝေးများကို တက်ရောက်နိုင်သူတစ်ဦး ဖြစ်သောကြောင့်ပင်။

"အားလုံး နေကောင်းကြပါတယ်"

"အခု သူတို့က အင်မော်တယ်လောကရဲ့ နေရာအနှံ့မှာ ပျံ့နှံ့နေကြပြီး အချို့က အင်မော်တယ်-နတ်ဆိုးတောင်တန်းရဲ့ တခြားစစ်မြေပြင်တွေမှာ ရှိနေကြတယ်။ အားလုံးက ဂိုဏ်းချုပ်ကျန်းကို အမြဲသတိရနေကြတာပါ"

ယွမ်ရွှီက စိတ်လှုပ်ရှားစွာ ပြောသည်။

မိစ္ဆာဘုရင် ရှယ်လန်က တမင်တကာ အော်လိုက်သည်။

"မင်းက တော်တော်ရဲတင်းတာပဲ ယွမ်ရွှီ... ဂိုဏ်းချုပ်ကျန်းကို သေပါစေလို့ ကျိန်ဆဲနေတာလား"

အင်မော်တယ်ဘုရင်ကျင့်ယွီကလည်း ဝိုင်းဝန်းပြောဆို၏။

"မှန်တယ်... သူ့မှာ မကောင်းတဲ့ ရည်ရွယ်ချက်တွေ ရှိနေတာပဲ။ ဂိုဏ်းချုပ်ကျန်း၊ သူ့ကို ခေါ်မသွားနဲ့တော့"

ယွမ်ရွှီမှာ ဒေါသထွက်သွားပြီး ပြန်လည်တုံ့ပြန်သည်။

"မင်းတို့ ဒီလူအိုကြီးကို လျှောက်မပြောကြနဲ့။ ငါ့ရဲ့ သစ္စာတရားကို ကောင်းကင်နဲ့ မြေကြီးက သက်သေထူလိမ့်မယ်"

ခဏအကြာတွင် အစ်ကိုကြီးချန်က သူတို့ကိုတားဆီးကာ အရေးကြီးသော ကိစ္စရပ်များကို ဆွေးနွေးကြသည်။ ယွမ်ရွှီသည် အင်မော်တယ်-နတ်ဆိုးတောင်တန်းတွင် နှစ်ပေါင်းများစွာ တပ်စွဲထားသူ ဖြစ်သည့်အတွက် ဤနေရာရှိ အခြေအနေအရပ်ရပ်ကို ကောင်းစွာသိရှိ၏။

"ဂိုဏ်းချုပ်ကျန်းက တပည့်တွေကိုရှာဖို့ ယောင်လောကကို သွားမှာလား"

ယွမ်ရွှီကမေး၏

"မှန်တယ်"

ယွမ်ရွှီက ဆက်လက်၍ရှင်းပြသည်။

"ကျွန်တော်ကူညီရင် ဒီတောင်ကိုဖြတ်သန်းဖို့ မခက်ခဲပေမဲ့... ယောင်မျိုးနွယ်စုတွေက တခြားသူတွေကို လက်မခံတတ်ကြဘူး။ ထျန်းရှုဂိုဏ်းကလွဲရင် ကျန်တဲ့မျိုးနွယ်စုတွေ ယောင်နယ်မြေထဲဝင်ဖို့ မဖြစ်နိုင်သလောက်ပဲ"

အစ်ကိုကြီးချန်က သူ၏တပည့်များ မည်သို့ဝင်သွားခဲ့သည်ကို မေးမြန်းရာ၊ ယွမ်ရွှီက

"ရွှေနဂါးဘုရင် အောက်ရန်ရဲ့ ထောက်ခံမှုကြောင့်ပါ"

အောက်ရန်သည် အထက်အင်မော်တယ်လောကသို့ ရောက်ရှိပြီးနောက် နဂါးမျိုးနွယ်စု၏ အဆင့်မြင့်ပုဂ္ဂိုလ်များမှ ရတနာတစ်ခုကဲ့သို့ တန်ဖိုးထားခြင်းခံခဲ့ရသည်။ လွန်ခဲ့သော နှစ်ပေါင်းသန်းငါးဆယ်က သူသည် ဧကရာဇ်တစ်ပိုင်းအဆင့်သို့ ရောက်ရှိကာ လက်သည်းရှစ်ခုပါရွှေနဂါး ဖြစ်လာခဲ့ပြီး၊ လက်သည်းကိုးခုပါနဂါးဧကရာဇ်ပြီးလျှင် ဒုတိယအရှိန်အဝါအကြီးဆုံး ဖြစ်လာ၏။ သူ၏ အကာအကွယ်ပေးမှုကြောင့်သာ ဖေးရှန်ဂိုဏ်းသားများမှာ ယောင်လောကတွင် ခိုလှုံခွင့်ရရှိခဲ့ခြင်းဖြစ်သည်။

သို့သော် ယခုအခါ အောက်ရန်မှာ နတ်ဆိုးသောင်းချီညီလာခံအတွက် ကျင့်ကြံအားထုတ်နေသဖြင့် အပြင်ထွက်လာနိုင်ဦးမည်မဟုတ်။ သူ့ထောက်ခံချက်မပါဘဲ လူမျိုးစုစုံလင်လှသော အစ်ကိုကြီးချန်၏အဖွဲ့အတွက် ယောင်နယ်မြေထဲသို့ဝင်ရောက်ရန် မလွယ်ကူလှပေ။

အစ်ကိုကြီးချန်သည် အကြံတစ်ခု ရရှိသွားပြီးနောက်၊ ဧကရာဇ်တစ်ပိုင်း ယွမ်ရွှီ၏ ဖမ်းဆီးခေါ်ဆောင်မှုဖြင့် အင်မော်တယ်-နတ်ဆိုးတောင်တန်း၏ ထိပ်ဆုံးသို့ ရောက်ရှိလာခဲ့သည်။ ဤနေရာသည် ရှေ့တန်း၏ အရေးကြီးဆုံးနေရာဖြစ်ပြီး၊ ကောင်းကင်ယံတွင် ကင်းလှည့်နေသော အင်မော်တယ်အရှင်သခင်များနှင့် အင်မော်တယ်ဘုရင်များကို နေရာအနှံ့မြင်တွေ့ရ၏။ တစ်ဖက်တွင်မူ ယောင်မျိုးနွယ်စုမှ ယောင်အရှင်သခင်နှင့် ယောင်ဘုရင်များစွာမှာလည်း ရင်ဆိုင်စောင့်ဆိုင်းနေကြသည်။