အခန်း ၆၆

အခန်း (၆၆) ကျည်ဆန်များကို မယှဉ်နိုင်လျှင် ထွက်သွားနိုင်သည်

ဒိုင်း...

ရိုင်ဖယ်သေနတ်ပြောင်းဝက တန်ထိုက်ပေါင်ပေါင်၏ ခြေဖဝါးဆီသို့ ချိန်ရွယ်ထားပြီးနောက် သေနတ်တစ်ချက် ပစ်ဖောက်လိုက်၏။

သူတို့နှစ်ဦးမှာ ဆယ်မီတာခန့် ကွာဝေးပြီး ဤအကွာအဝေးသည် ကျည်ဆန်တစ်တောင့်အတွက် မျက်စိတစ်မှိတ်အတွင်း ရောက်ရှိနိုင်သော အကွာအဝေးဖြစ်သည်။

တန်ထိုက်ပေါင်ပေါင်က ကျည်ဆန်၏ အမြန်နှုန်းကို အာရုံခံမိလိုက်သော်လည်း သူမ၏ အလိုအလျောက် တုံ့ပြန်နိုင်စွမ်းအရ နောက်သို့ ခြေတစ်လှမ်း ခုန်ဆုတ်လိုက်မိ၏။

ကျည်ဆန်က မြေကြီးကို ထိမှန်သွားပြီး ကျောက်စရစ်ခဲများ ပေါက်ကွဲလွင့်စင်သွားစေသည်။

"စောစောက အဲ့ဒီကျည်ဆန်ရဲ့ အမြန်နှုန်းနဲ့ အစွမ်းကို မင်း ခံစားကြည့်လို့ရအောင် လုပ်ပေးလိုက်တာ..."

"မင်းရဲ့ ခန္ဓာကိုယ်က ဒီကျည်ဆန်ကို ခံနိုင်ရည်ရှိမလား မသိဘူး..."

ကျောက်လင်က ပြုံး၍ ပြောလိုက်၏။

တန်ထိုက်ပေါင်ပေါင်မှာ ထိုနေရာတွင် ရပ်နေကာ ကျည်ဆန်က ကျောက်တုံးကို ထိမှန်သွားသည့် အခိုက်အတန့်ကို အလေးအနက် ပြန်လည်စဉ်းစားနေပြီး သူမ၏ စိတ်ထဲတွင် အတွေးများစွာ ပြေးလွှားနေ၏။

"ငါ့ခန္ဓာကိုယ်ကို ပစ်ကြည့်စမ်းပါ ငါ တားနိုင်မလားဆိုတာ ကြည့်ချင်လို့..."

ရုတ်တရက် တန်ထိုက်ပေါင်ပေါင်၏ မျက်လုံးများက အရောင်လက်သွားပြီး အော်ပြောလိုက်၏။

သိုင်းပညာကို ရူးသွပ်သူတစ်ယောက်အနေဖြင့် တန်ထိုက်ပေါင်ပေါင်သည် စိန်ခေါ်မှုများကို နှစ်သက်ပြီး ပို၍ စိတ်လှုပ်ရှားစရာကောင်းလေ ပို၍ သဘောကျလေပင် ဖြစ်သည်။

ယုံမှားသံသယဖြစ်ဖွယ်မရှိဘဲ တန်ထိုက်ပေါင်ပေါင်က ကျည်ဆန်၏ အစွမ်းနှင့် အမြန်နှုန်းကို ခံစားသိရှိပြီးဖြစ်ကာ သူမ၏ ကန့်သတ်ချက်များကို စိန်ခေါ်ချင်နေခြင်းဖြစ်သည်။

"ကောင်းပြီလေ မင်းရဲ့ ပေါင်ကို ငါ ပစ်လိုက်မယ်..."

ကျောက်လင်က တည်ငြိမ်စွာ ပြောလိုက်၏။

သေနတ်က တန်ထိုက်ပေါင်ပေါင်၏ ညာဘက်ပေါင်ဆီသို့ ချိန်ရွယ်သွားပြီး ဒိုင်းခနဲ အသံနှင့်အတူ ကျည်ဆန်က ထပ်မံ ထွက်ပေါ်သွား၏။

"ဓားလမ်းညွှန်..."

တန်ထိုက်ပေါင်ပေါင်မှာ အလွန်တရာ အာရုံစူးစိုက်ထား၏။ သူမက ကျည်ဆန်၏ လမ်းကြောင်းကို အာရုံခံမိပြီး ရုတ်တရက် အော်ဟစ်လိုက်သည်။

ချက်ချင်းပင် အပြာရောင်ဓားက သံလှံတစ်ချောင်းကဲ့သို့ ပစ်ထွက်သွားပြီး ဓားသွားဖြတ်သန်းသွားသည့် နေရာတိုင်းတွင် လေဆင်နှာမောင်းတစ်ခုကို ဖန်တီးလိုက်၏။

၎င်းက လေပြင်းရာပေါင်းများစွာဖြင့် ဖွဲ့စည်းထားသော လေဆင်နှာမောင်းတစ်ခုနှင့် တူပေသည်။

လေဆင်နှာမောင်း၏ ထိပ်ပိုင်းက ကျည်ဆန်များနှင့် ဆုံတွေ့သွား၏။

ကျည်ဆန်က မြန်ဆန်သော်လည်း လေဆင်နှာမောင်းက ၎င်း၏ အမြန်နှုန်းကို တစ်ဝက်အထိ လျှော့ချပစ်လိုက်သည်။

ကျည်ဆန်က တန်ထိုက်ပေါင်ပေါင်၏ ပေါင်ကို ထိမှန်သွားဆဲဖြစ်သည်။

ကျည်ဆန်က ပေါင်ကို ထိမှန်သွားပြီး တိမ်ယောင်သော ဒဏ်ရာတစ်ခုကိုသာ ဖြစ်ပေါ်စေသော်လည်း ကြွက်သားကို ဖောက်ထွင်းသွားနိုင်ခြင်း မရှိပေ။

"အား..."

တန်ထိုက်ပေါင်ပေါင်နှင့် ကျောက်လင်တို့ နှစ်ဦးစလုံးက တစ်ပြိုင်နက်တည်း အာမေဍိတ်သံ ထွက်ပေါ်သွား၏။

လူနှစ်ဦး၏ အံ့သြနေသော အမူအရာများက မတူညီသော အဓိပ္ပာယ်များကို ဖော်ပြနေကြသည်။

တန်ထိုက်ပေါင်ပေါင်မှာ သူမအနေဖြင့် ကျည်ဆန်၏ လမ်းကြောင်းကို အာရုံခံနိုင်ပြီး သူမ၏ အပြင်းထန်ဆုံး ဓားချက်ကို ထုတ်ဖော်နိုင်ခဲ့သော်လည်း ၎င်းကို တားဆီးနိုင်ခြင်း မရှိသေးသည့်အတွက် အံ့သြသွားရခြင်း ဖြစ်သည်။

ကျောက်လင်ကလည်း အံ့သြသွား၏။ မှန်ပေသည် ငွေရောင်ရိုးတွင်းခြင်ဆီနယ်ပယ်မှ လူတစ်ယောက်၏ ရုပ်ခန္ဓာက ကျည်ဆန်များပင် ဖောက်ထွင်း၍မရလောက်အောင် အစွမ်းထက်လှပေသည်။

ဓားလေဟုန်ကြောင့် ကျည်ဆန်၏ အစွမ်းမှာ အားနည်းသွားသော်လည်း ကျည်ဖူးက မျက်နှာပြင်ပေါ်တွင် သေးငယ်သော ဒဏ်ရာတစ်ခုကိုသာ ဖြစ်ပေါ်စေခဲ့သည်။ ကျည်ဆန်က ငွေရောင်ရိုးတွင်းခြင်ဆီနယ်ပယ် ကျင့်ကြံသူတစ်ဦး၏ ခန္ဓာကိုယ်ထဲသို့ ခိုးဝင်သွားလျှင်တောင်မှ အသက်အန္တရာယ်ဖြစ်စေသော ဒဏ်ရာရရှိစေရန် ခက်ခဲလိမ့်မည်ဟု ခန့်မှန်းရပေသည်။

ငွေရောင်ရိုးတွင်းခြင်ဆီနယ်ပယ်ရှိ ကျင့်ကြံသူများ၏ ရုပ်ခန္ဓာများသည် ကြွက်သားများနှင့် အရိုးများ အပိုင်းတွင် သံမဏိအရိုးနယ်ပယ်ရှိ သူများထက် များစွာ ပို၍ ခိုင်မာပြီး သံမဏိအလွှာတစ်ခုဖြင့် ဖုံးအုပ်ထားသကဲ့သို့ပင် ဖြစ်သည်။

"မင်းရဲ့ လျှို့ဝှက်လက်နက်က အရမ်းကို အစွမ်းထက်တာပဲ... အဲ့ဒီကျည်ဆန်ဆိုတာက ဘယ်လောက်တောင် များများ ရှိနေသေးတာလဲ..."

တန်ထိုက်ပေါင်ပေါင်က သူမ၏ ပေါင်တွင် စူးဝင်နေပြီး အစအနတစ်ခုနီးပါး ကြေမွသွားသော ကျည်ဆန်ပုံသဏ္ဍာန် အရာဝတ္ထုကို ဖယ်ရှားလိုက်ကာ တည်ငြိမ်စွာ မေးလိုက်၏။

"အခု တစ်ရာ ကျန်သေးတယ်..."

ကျောက်လင်က ပြုံး၍ ပြန်ဖြေလိုက်၏။

ပြီးခဲ့သည့်အကြိမ်က ကျောက်လင် သေနတ်ဝယ်စဉ်က ကျည်ဆန် အတောင့်တစ်ရာကိုလည်း ဝယ်ယူခဲ့သည်။ သူက ထျဲ့လင် အမဲလိုက်အဖွဲ့မှ အဖွဲ့ဝင် လေးဦးကို သတ်ရန် ကျည်ဆန်ငါးတောင့်ကို အသုံးပြုခဲ့ပြီး ယခုလေးတင် နောက်ထပ် နှစ်တောင့်ကို အသုံးပြုခဲ့၏။

သူ၏ လက်ထဲတွင် ကျည်ဆန် ကိုးဆယ်ကျော်သာ ကျန်ရှိတော့သော်လည်း ကျောက်လင်သည် ယနေ့အတွက် စနစ်ဈေးဆိုင်မှ သူ၏ ငါးကြိမ် ဝယ်ယူခွင့်ကို အသုံးမပြုရသေးပေ။ ထို့ကြောင့် သူက စနစ်အမှတ်များဖြင့် ကျည်ဆန်တစ်သုတ်ကို အချိန်မရွေး ဝယ်ယူနိုင်ပေသည်။

ဤစကားကို ကြားလိုက်ရသောအခါ တန်ထိုက်ပေါင်ပေါင်၏ အမူအရာ ပြောင်းလဲသွားပြီး သူမက ခြိမ်းခြောက်မှုအရိပ်အယောင်တစ်ခုကို အာရုံခံမိသွား၏။

ဤကျည်ဆန်တစ်ရာသာ ဆက်တိုက် ထွက်ပေါ်လာမည်ဆိုလျှင် တန်ထိုက်ပေါင်ပေါင်ပင်လျှင် ၎င်းတို့ကို တားဆီးရန် ဓားလမ်းညွှန်ကို ဆက်လက် အသုံးပြုနိုင်မည် မဟုတ်ပေ။ ထို့ပြင် ကျည်ဆန်များက တစ်နေရာတည်းကိုသာ စုပြုံပစ်ခတ်လာပါက သူမ၏ ငွေရောင်ရိုးတွင်းခြင်ဆီနယ်ပယ် ရုပ်ခန္ဓာဖြင့်ပင် ပြင်းထန်စွာ ဒဏ်ရာရသွားပေလိမ့်မည်။

ငွေရောင်ရိုးတွင်းခြင်ဆီနယ်ပယ်ရှိ လူတစ်ယောက်က သန်မာသော ရုပ်ခန္ဓာကို ပိုင်ဆိုင်ထားသော်လည်း ၎င်းက သူတို့ခန္ဓာကိုယ်၏ အစိတ်အပိုင်းတိုင်းသည် ကျည်ဆန်များကို ခံနိုင်ရည်ရှိသည်ဟု ဆိုလိုခြင်း မဟုတ်ပေ။ ဥပမာအားဖြင့် မျက်နှာနှင့် ဦးခေါင်းတို့သည် အဆက်မပြတ် ရွာကျလာမည့် ကျည်ဆန်မိုးများကို ယှဉ်နိုင်စွမ်း မရှိပေ။

"မင်းရဲ့ လျှို့ဝှက်လက်နက်တွေက အရမ်းကို သန်မာတာပဲ..."

"စောစောက မင်းက ငါ့ကို တမင်တကာ သတိပေးပြီး မင်းရဲ့ ကျည်ဆန်တွေကို တားဆီးဖို့ ငါ့ကို အချိန်အလုံအလောက် ပေးခဲ့တယ်..."

"မင်းရဲ့ လျှို့ဝှက်လက်နက်တွေကို ငါ မယှဉ်နိုင်ပါဘူး... ဒါပေမဲ့ မင်းရဲ့ ကြင်နာမှုကိုလည်း ငါ ခံစားမိပါတယ်..."

"မင်းတို့ သွားလို့ရပါပြီ..."

တန်ထိုက်ပေါင်ပေါင်က သူမ၏ ဓားကို ဓားအိမ်ထဲ ပြန်ထည့်ကာ တည်ငြိမ်စွာ ပြောလိုက်၏။

ကျောက်လင်ကလည်း ရိုင်ဖယ်သေနတ်ကို အဝတ်စဖြင့် ပြန်ပတ်လိုက်သည်။

ဤတန်ထိုက်ပေါင်ပေါင်သည် အတော်လေး ပြတ်သားပေသည်။ နိုင်လျှင် နိုင်မည်ဖြစ်ပြီး မနိုင်လျှင်လည်း အရှုံးကို ဝန်ခံရန် ဆန္ဒရှိသည်။ ၎င်းက သိုင်းပညာ၏ စစ်မှန်သော အနှစ်သာရပင် ဖြစ်၏။

ကျောက်လင်က တန်ထိုက်ပေါင်ပေါင်၏ စရိုက်ကို တကယ်ပင် သဘောကျသွားသည်။

"ငါ မင်းကို တကယ်သဘောကျတယ် ပြီးတော့ မင်းနဲ့ သူငယ်ချင်း ဖြစ်ချင်တယ်..."

"မင်းရဲ့ သူငယ်ချင်းတစ်ယောက်အနေနဲ့ မင်းကို တစ်ခုလောက် သတိပေးချင်တယ်..."

"အခု မဟာချင်မင်းဆက်ကို တည်ထောင်ပြီးသွားပြီဆိုတော့ နန်းတော်က သူ့ရဲ့ နယ်နိမိတ်တွေအတွင်းမှာ မတည်ငြိမ်တဲ့ အင်အားစု ဘယ်အရာကိုမဆို အပြစ်မပေးဘဲ သေချာပေါက် လွှတ်ထားမှာ မဟုတ်ဘူး..."

"မင်းတို့ကို ကြိုတင်ပြင်ဆင်ထားဖို့ အကြံပေးချင်တယ် စခန်းကို ဖျက်သိမ်းပြီးတော့ ကိုယ့်ဝမ်းစာ ကိုယ်ရှာဖို့ လမ်းစရှာကာ သာမန်လူတွေအဖြစ် ပြန်နေကြပါ..."

ကျောက်လင်က တည်ငြိမ်စွာ ပြောလိုက်၏။

အတိတ်ကာလက မဟာလီမင်းဆက်၏ နောက်ပိုင်းကာလများတွင် ပြည်နယ်အသီးသီးမှ စစ်ဘက်ရေးရာ အုပ်ချုပ်သူများသည် မဟာလီနန်းတော်အပေါ်တွင် အာဏာမရှိခဲ့ကြပေ။ ပြည်နယ်တစ်ခုစီ၏ စစ်တပ်အင်အားစုများသည် အိမ်နီးချင်းပြည်နယ်များကို သတိထားနေရသဖြင့် ဓားပြများကို နှိမ်နှင်းရန် သူတို့၏ စစ်အင်အားကို မဖြုန်းတီးချင်ခဲ့ကြချေ။

သို့သော် ယခုတော့ အခြေအနေတွေက ကွာခြားသွားပြီ ဖြစ်သည်။ မဟာချင်မင်းဆက်က နယ်မြေတစ်ခုလုံးကို စည်းလုံးပူးပေါင်းခဲ့ပြီ ဖြစ်၏။ မည်သည့် မင်းဆက်သစ်တွင်မဆို တည်ထောင်သူ ဧကရာဇ်သည် ၎င်း၏ နယ်နိမိတ်အတွင်းရှိ မည်သည့် သူပုန်အင်အားစုကိုမဆို အမြစ်ပြတ်ချေမှုန်းရန် အင်အားကို အသုံးပြုပေလိမ့်မည်။

ဟေးလုံစခန်းက ရှရွှယ်ချန်တောင်ကို အချိန်ကြာမြင့်စွာ သိမ်းပိုက်ထားခဲ့ပြီး ဆယ်စုနှစ်များစွာကြာ ပူပင်သောကကင်းစွာ နေထိုင်ခဲ့ကြကာ တောင်တန်း၏ ကြမ်းတမ်းသော မြေမျက်နှာသွင်ပြင်ကို အားကိုး၍ နန်းတော်စစ်တပ်ကို ခုခံနိုင်မည်ဟု ထင်မှတ်ထားခဲ့ကြ၏။ ၎င်းက စိတ်ကူးယဉ်ဆန်လွန်းပေသည်။

နန်းတော်မှ ထိန်းချုပ်ထားသော အဆင့်မြင့် ကျင့်ကြံသူ အမျိုးမျိုးသည် သူတို့ထဲမှ တစ်ယောက်ကို စေလွှတ်လိုက်ရုံဖြင့် ဟေးလုံစခန်းကို အလွယ်တကူ လွှမ်းမိုးသွားနိုင်ပေသည်။

တန်ထိုက်ပေါင်ပေါင်သည် နှစ်သက်ဖွယ် စရိုက်ရှိသော အဆင့်(၁) အလှမယ်တစ်ဦးဖြစ်ပြီး ကျောက်လင်က သူမကို နန်းတော်စစ်တပ်၏ ဝိုင်းရံပိတ်ဆို့မှုအတွင်း သေဆုံးသွားစေရန် မလိုလားပေ။

"ရိုင်းစိုင်းလှချည်လား..."

တန်ထိုက်ပေါင်ပေါင် ပြန်မပြောနိုင်ခင်မှာပင် သူမ၏ ဘေးတွင် ရပ်နေသော လူလတ်ပိုင်းအရွယ် အမျိုးသားက ဒေါသတကြီး အော်ဟစ်လိုက်၏။

ရှင်းလင်းစွာပင် ဤဟေးလုံစခန်းမှ ဓားပြများသည် အသိဉာဏ်တိမ်မြုပ်ပြီး လောက၏ ယေဘုယျအခြေအနေများကို လုံးဝ သတိမထားမိကြပေ။

သူတို့က ဟေးလုံစခန်းမှ ခေါင်းဆောင်များသည် သိုင်းပညာစွမ်းရည် အချို့ရှိသည်ဟု ယူဆထားကြပြီး ရှရွှယ်ချန်တောင်၏ အန္တရာယ်များကာ ရှုပ်ထွေးသော မြေမျက်နှာသွင်ပြင်ကို အားကိုး၍ ဟေးလုံစခန်းသည် မကျဆုံးနိုင်ဟု ထင်မြင်ကာ ကြောက်ရွံ့မှု မရှိကြချေ။

"မင်းတို့ သွားလို့ရပါပြီ..."

တန်ထိုက်ပေါင်ပေါင်၏ အမူအရာက ပြောင်းလဲသွား၏။ သူမက ကျောက်လင်၏ စကားများနောက်ကွယ်မှ အဓိပ္ပာယ်ကို တကယ်ပင် နားလည်သွားပြီး သူ၏ စေတနာကို ခံစားမိလိုက်သည်။

ကျောက်လင်က လက်နှစ်ဖက်ကို ယှက်၍ အရိုအသေပေးလိုက်ပြီး ထပ်မပြောတော့ပေ။

ထို့နောက် မြင်းရိုင်းလေးကောင်က ခွာသံပြင်းပြင်းဖြင့် ထွက်ခွာသွားကြ၏။

"သခင်လေး အဲ့ဒီလေးယောက်ကို ဒီတိုင်း ပေးသွားလိုက်တော့မလို့လား..."

ထိုလူလတ်ပိုင်းအရွယ် အမျိုးသားက ကျောက်လင် ထွက်သွားသည်ကို ကြည့်ပြီး လက်မလျှော့ချင်သေးပေ။

"ပေးသွားလိုက်ရမလို့လား..."

"ဦးလေးလိန် ခင်ဗျား နားမလည်ဘူးလား..."

"သူက ကျည်ဆန်တွေ ဆက်တိုက်ပစ်နေရင် ကျုပ်က တားပြီး ထွက်ပြေးနိုင်ပေမဲ့ ခင်ဗျားက ထွက်ပြေးနိုင်မယ်လို့ ထင်နေတာလား..."

"သူက ခင်ဗျားတို့ရဲ့ အသက်ကို ချမ်းသာပေးခဲ့တာတောင်မှ ခင်ဗျားက သူ့ရဲ့ ရန်သူ ဖြစ်ချင်နေသေးတယ်ပေါ့..."

တန်ထိုက်ပေါင်ပေါင်က သတိပေးလိုက်၏။

ဤစကားကို ကြားလိုက်ရသောအခါ လူလတ်ပိုင်းအရွယ် အမျိုးသားဖြစ်သော လိန်ကျန်းရှန်းမှာ ဘာဖြစ်သွားသည်ကို ရုတ်တရက် နားလည်သွားပြီး ချွေးအေးများ ပျံကျလာ၏။ အကယ်၍ သူက ကျောက်လင်ကို တားဆီးရန် ဝင်ရောက်စွက်ဖက်ခဲ့ပါက သူသည် ကျည်ဆန်များဖြင့် အပေါက်အပြဲ ဖြစ်သွားနိုင်သည်ကို ထိုအချိန်ကျမှ နားလည်သွားတော့သည်။

အခြားတစ်ဖက်တွင်။

ယဲ့လင်အာသည် သူမ၏ မြင်းရိုင်းကို စီးနင်းရင်း သူမ၏ အကြည့်များကို ကျောက်လင်အပေါ်တွင် စူးစိုက်ထား၏။

“ခင်ပွန်း... ရှင့်ရဲ့ လျှို့ဝှက်လက်နက်တွေက အရမ်းကို အစွမ်းထက်တာပဲ... အကယ်လို့ ရှင်သာ အဲ့ဒါတွေကိုသုံးပြီး တစ်ယောက်ယောက်ကို ခြုံခိုတိုက်ခိုက်မယ်ဆိုရင် ကာကွယ်ဖို့ဆိုတာ အရမ်းကို ခက်ခဲလိမ့်မယ်..."

ယဲ့လင်အာက ရုတ်တရက် ပြောလိုက်သည်။

"မင်း ခင်ပွန်းရဲ့ အစွမ်းက ဒီရိုင်ဖယ်သေနတ်တစ်ခုတည်းနဲ့တင် ကန့်သတ်ထားတာ မဟုတ်ဘူး... နောက်ပိုင်းကျရင် ငါက ဒီထက်ပိုပြီး အစွမ်းထက်တဲ့ လျှို့ဝှက်လက်နက်တွေကို ထုတ်သုံးပြတာကို မင်း မျက်စိနဲ့တပ်အပ် မြင်ရမှာပါ..."

ကျောက်လင်က ပြုံး၍ ပြန်ဖြေလိုက်၏။

အကယ်၍ ကျောက်လင်သာ သူ၏ ရိုင်ဖယ်သေနတ်ဖြင့် တန်ထိုက်ပေါင်ပေါင်ကို မောင်းထုတ်နိုင်ခြင်း မရှိခဲ့လျှင် သူက သူ၏ ငွေများကို စနစ်အမှတ်များနှင့် လဲလှယ်ပြီး စနိုက်ပါရိုင်ဖယ်တစ်လက်ကို တိုက်ရိုက် ဝယ်ယူခဲ့ရပေလိမ့်မည်။

ရိုင်ဖယ်များက တန်ထိုက်ပေါင်ပေါင်ကို မထိခိုက်နိုင်သော်လည်း စနိုက်ပါရိုင်ဖယ်များကမူ ထိုသို့မဟုတ်ပေ။

စနိုက်ပါရိုင်ဖယ်များပင် အလုပ်မဖြစ်ခဲ့လျှင် ကျောက်လင်သည် အာပီဂျီ-၇ ဒုံးပစ်လောင်ချာတစ်လက် ဝယ်ယူရန် ဝန်လေးနေမည် မဟုတ်ပေ။ သံချပ်ကာဖောက် အာပီဂျီကို တန်ထိုက်ပေါင်ပေါင် အနေဖြင့် မယှဉ်နိုင်ဘူး မဟုတ်ပါလား။

"ခင်ပွန်းက အရမ်းကို အံ့သြစရာကောင်းတာပဲ..."

ပိုင်ဝမ်ချင်းနှင့် ထျန်ကျီလင်တို့မှာ သိုင်းပညာကို မသိနားမလည်ကြသော်လည်း ကျောက်လင်၏ စကားများထဲမှ ယုံကြည်မှုများကို အာရုံခံမိပြီး ချီးကျူးစကား မဆိုဘဲ မနေနိုင်ကြတော့ပေ။