အခန်း (၁၅၇-၁၅၈)

Chapter 157

~

အခန်း ၁၅၇ : အလုပ် ရှာကြစမ်း...

~

​' ဒီအရာက... ငါ့ခန္ဓာကိုယ်ထဲက ထွက်လာတာလား... '

​အိမ်သာထဲ၌ လုံယဲ့သည် အိမ်သာအိုးရှေ့တွင် ရပ်ကာ ခွက်ထဲရှိ အသစ်စက်စက် စွန့်ထုတ်လိုက်သော အညစ်အကြေးများကို စူးစမ်းသော မျက်လုံးဖြင့် ငုံ့ကြည့်နေလေသည်။

​လွန်ခဲ့သော ရက်အနည်းငယ်အတွင်း သူသည် လူသားတို့၏ အစားအစာများကို အလွန်အကျူး စားသုံးခဲ့သော်လည်း သူ၏ခန္ဓာကိုယ်ထဲရှိ အညစ်အကြေးများကို သန့်စင်ရန် ကျင့်ကြံခြင်းစွမ်းအားကို အသုံးမပြုခဲ့ပေ။ ထို့ကြောင့် စုပုံနေသော အစာအကြွင်းအကျန်များသည် သဘာဝအတိုင်း ပြန်လည်ထွက်လာခဲ့၏။

​သူသည် နတ်ဆိုးလောကရှိ ရှေးဟောင်းမြေအောက်လောက ကိုးပါး နဂါး တို့၏ အနွယ်အဖွားဖြစ်ပြီး နတ်ဆိုးနှင့် သားရဲနှစ်မျိုးစပ် သတ္တဝါတစ်ဦး ဖြစ်သည်။ မွေးကတည်းက အင်မော်တယ်ဧကရာဇ် ကျင့်ကြံခြင်းအဆင့်ကို ပိုင်ဆိုင်ထားသူလည်း ဖြစ်သည်။ သူသည် အခြားနတ်ဆိုးသားရဲများ၊ အင်မော်တယ်သားရဲများ သို့မဟုတ် ကောင်းကင်ရေစင်များကိုပင် စားသုံးသော်လည်း သူ၏ အစွမ်းထက်သော နတ်ဆိုးခန္ဓာကိုယ်က ကျင့်ကြံခြင်းစွမ်းအားအဖြစ် ပြောင်းလဲပေးလေ့ရှိသည်။

​တစ်နည်းအားဖြင့်ဆိုရသော် သူ မွေးဖွားလာကတည်းက ခန္ဓာကိုယ်ထဲမှ အညစ်အကြေးများကို စွန့်ထုတ်ရန် တစ်ခါမျှ မလိုအပ်ခဲ့ဖူးပေ။ ယခုမှာ သူ၏ ပထမဆုံးအကြိမ်ပင် ဖြစ်သည်။

​ သူသည် မစင်ဆိုသည်မှာ မည်ကဲ့သို့ပုံစံရှိသည်ကို ပထမဆုံးအကြိမ် မြင်ဖူးခြင်းဖြစ်ပြီး ထိုအရာက သူကိုယ်တိုင် စွန့်ထုတ်လိုက်ခြင်းလည်း ဖြစ်နေသည်။

​ဤမျှလောက် နံစော်သော အရာတစ်ခုက သူ၏ ခန္ဓာကိုယ်ထဲမှ အမှန်တကယ် ထွက်လာသည်ဆိုသည်ကို သူ မယုံကြည်နိုင်အောင် ဖြစ်နေချေသည်။

​" ဒေါက်... ဒေါက်... ဒေါက်... လုံယဲ့... မင်း အထဲမှာ ဘာလုပ်နေတာလဲ... "

​" နတ်ဆိုးအရှင်က ငါတို့ကို ခေါ်နေပြီ..မြန်မြန်ထွက်ခဲ့တော့ .."

​အိမ်သာအပြင်မှ မေ့ကျီက တံခါးကို ခေါက်ကာ ပြောလိုက်သည်။

​မေ့ကျီသည် ဘေးအိမ်သို့ သွားကာ နတ်ဆိုးအရှင်ကို သွားရောက်ရှာဖွေစဉ်ကတည်းက လုံယဲ့မှာ အိမ်သာထဲသို့ ရောက်နေခဲ့ခြင်း ဖြစ်သည်။ ယခု သူ ပြန်ရောက်လာသည့်တိုင်အောင် လုံယဲ့မှာ အပြင်သို့ ထွက်မလာသေးပေ။ အကယ်၍ ကိုယ်လက်သန့်စင်နေသည်ဆိုလျှင်ပင် အလွန် ကြာလွန်းနေလေပြီ ။

​" မေ့ကျီ... မင်းလား..မင်း လာတာ အချိန်ကိုက်ပဲ.. "

​လုံယဲ့က အိမ်သာတံခါးကို ဖွင့်လိုက်ပြီး လမ်းဖယ်ပေးကာ သူ၏နောက်မှ အိမ်သာအိုးကို ညွှန်ပြလိုက်သည်။

​" ခုနက ငါ့ဗိုက် နည်းနည်း မအီမသာ ဖြစ်နေတာနဲ့ အိမ်သာလာလိုက်တာ.. မထင်မှတ်ဘဲ ငါ့ခန္ဓာကိုယ်ထဲကနေ ဒီလို ညစ်ပတ်တဲ့အရာတွေ ထွက်လာတယ်.. "

​အိမ်သာထဲတွင် ပျံ့လွင့်နေသော အနံ့ဆိုးကို ရလိုက်သည့်အခါ မေ့ကျီမျက်မှောင်ကြုတ်သွားသော်လည်း အိမ်သာအိုးအနားသို့ ချဉ်းကပ်ကာ ခွက်ထဲရှိ အညစ်အကြေးများကို ဇဝေဇဝါဖြစ်နေသော အမူအရာဖြင့် စိုက်ကြည့်နေသည်။

​" ဟမ်... ဒါက ဘာလဲ.. "

​" ငါ မမှားဘူးဆိုရင် ဒါက လူသားတွေ ခေါ်ကြတဲ့ မစင် ဆိုတာ ဖြစ်ရမယ်.. "

​" မစင် ဟုတ်လား.. မင်း အီးပါလိုက်တာလား.. "

​မေ့ကျီ၏ အမူအရာမှာ အံ့အားသင့်မှုအဖြစ် ပြောင်းလဲသွားပြီး သူ၏ရှေ့မှ အညစ်အကြေးများကို ပို၍ စပ်စုလိုသော မျက်လုံးများဖြင့် ကြည့်လိုက်သည်။

​သူသည်လည်း မွေးဖွားလာကတည်းက တစ်ခါမျှ အီးမပါခဲ့ဖူးသဖြင့် မစင်ဆိုသည်မှာ အမှန်တကယ် မည်သို့ပုံစံရှိသည်ကို မသိချေ။ လုံယဲ့ကဲ့သို့ပင် မစင်ကို သူ၏ ကိုယ်ပိုင်မျက်လုံးဖြင့် ပထမဆုံးအကြိမ် မြင်ဖူးခြင်း ဖြစ်သည်။

​လုံယဲ့က လေးနက်စွာဖြင့် ခေါင်းညိတ်ပြလိုက်သည်။

​ထိုအချိန်တွင် ထိုနေရာသို့ ဖြတ်သွားသော ရှန့်သည် မေ့ကျီနှင့် လုံယဲ့တို့ အိမ်သာထဲတွင် ပူးကပ်နေကြသည်ကို မြင်လိုက်ရသဖြင့် စပ်စုလိုစိတ်ဖြင့် ရောက်ရှိလာပြန်သည်။

​" ဝါး... ဒါ ဒဏ္ဍာရီထဲက... မစင် ပေါ့လေ.. "

​" ဒီလောက် အနီးကပ် မြင်ဖူးတာ ဒါ ပထမဆုံးပဲ.. "

​" အနံ့က ဆိုးလိုက်တာ.. ဥပုပ်သီးအတိုင်းပဲ ..."

​နတ်ဆိုးလောကရှိ ဟဲဖှာမျိုးနွယ် သည် ရှေးဟောင်းနည်းလမ်း အမျိုးမျိုးကို သုတေသနပြုရန် အစွဲအလမ်းကြီးသူများအဖြစ် လူတိုင်းက အသိအမှတ်ပြုထားကြသည်။

​ဟဲဖှာမျိုးနွယ်မှ တစ်စုံတစ်ယောက်အကြောင်းကို ပြောလိုက်သည်နှင့် ရှေးဟောင်းကျင့်ကြံခြင်း နည်းလမ်းများကို လေ့လာရန် စိတ်အားထက်သန်နေကြသော အရူးအုပ်စုတစ်ခုအဖြစ် ပထမဆုံး မြင်ယောင်တတ်ကြသည်။

​အမှန်စင်စစ် ဤစကားမှာ လုံးဝဥဿုံ မမှန်ကန်ချေ။ ဟဲဖှာမျိုးနွယ်သည် ရှေးဟောင်းနည်းလမ်းများကို သုတေသနပြုရန် အစွဲအလမ်းကြီးသည်မှာ မှန်သော်လည်း ၎င်းမှာ ကမ္ဘာပေါ်ရှိ လမ်းစဉ်များနှင့် အင်မော်တယ်ကျင့်စဥ်များ အားလုံးကို အလွန်စိတ်ဝင်စားသောကြောင့်သာ ဖြစ်သည်။

​တစ်နည်းအားဖြင့်ဆိုရသော် တစ်စုံတစ်ခုက သူတို့၏ စိတ်ဝင်စားမှုကို ဆွဲဆောင်နိုင်သည်နှင့် သူတို့သည် ထိုအပေါ်တွင် အစွဲအလမ်းကြီးသွားတတ်ကြသည်။

​အိမ်သာအိုးထဲမှ အညစ်အကြေးများကို ကြည့်ရင်း ရှန့်သည် အနံ့ကို မနှစ်သက်သော်လည်း သူမ၏ လှပသော မျက်နှာလေးတွင် ရွံရှာသော အမူအရာ မရှိ။ ဆန့်ကျင်ဘက်အနေဖြင့် သူမသည် မစင်များကို အလေးအနက် စိုက်ကြည့်ကာ စတင် လေ့လာနေတော့သည်။

​ထိုသည်ကို မြင်သည့်အခါ ထိုနေရာသို့ ဖြတ်သွားသော ယင်းနွီသည်လည်း အိမ်သာထဲသို့ လျှောက်ဝင်လာပြီး အိမ်သာအိုးထဲမှ အညစ်အကြေးများကို စပ်စုစွာ ကြည့်လိုက်သည်။

​ထိုလေးယောက်မှာ အိမ်သာအိုးဘေးတွင် ဆောင့်ကြောင့်ထိုင်ကာ အလေးအနက်ထား၍ ဆွေးနွေးနေကြတော့သည်။

​ရှန့် ... " လူသားတွေက သူတို့ခန္ဓာကိုယ်ထဲကနေ ဒီလိုအရာမျိုးကို နေ့တိုင်းနီးပါး စွန့်ထုတ်ကြတယ်လို့ ငါ ကြားဖူးတယ်... "

​လုံယဲ့ ..." တစ်နေ့မှာ ဒီလို ညစ်ပတ်တဲ့အရာတွေ ငါ့ခန္ဓာကိုယ်ထဲကနေ ထွက်လာလိမ့်မယ်လို့ တစ်ခါမှ မတွေးဖူးဘူး ..."

ရှန့် ..." ဒါက လုံယဲ့ ပါလိုက်တဲ့ အီးပေါ့.. ငါတို့တွေရဲ့ အလှည့်ကရော ဘယ်တော့လဲ.. "

​မေ့ကျီ ... " လူသားတွေ စွန့်ထုတ်တဲ့ မစင်က အမျိုးအစား အများကြီး ရှိတယ်လို့ ပြောကြတယ်.. တချို့က အရမ်းမာပြီး တချို့ကတော့ ရွှံ့ဗွက်အိုင်လိုပဲ.. အရောင်တွေတောင် ကွဲပြားနိုင်သေးတယ်.. "

​" အော်... အဲ့လောက်တောင် အံ့သြဖို့ကောင်းတာလား..အမျိုးအစားတွေ အများကြီး ရှိတာပဲ.. "

​မေ့ကျီက ပြောသည်ကို ကြားသည့်အခါ ရှန့်မှာ ပို၍ပင် စိတ်ဝင်စားသွားတော့သည်။

​" လူသားတွေရဲ့ ခန္ဓာကိုယ် တည်ဆောက်ပုံက အတူတူပဲကို ဘာဖြစ်လို့ မတူညီတဲ့ မစင်တွေကို စွန့်ထုတ်နိုင်ကြတာလဲ.. "

​" သူတို့ စားတဲ့ အစားအစာတွေ မတူလို့ ဖြစ်နိုင်မလား.. "

​" ဒါမှမဟုတ် ခန္ဓာကိုယ် ဖွဲ့စည်းပုံတွေ ကွဲပြားလို့လား... "

​" ငါတော့ နားမလည်တော့ဘူး.. နောက်တစ်ခါ နင်တို့ထဲက ဘယ်သူမဆို အီးပါရင် ငါ့ကို အရင်လာ​ ပြောနော်.. ငါ သေချာ လေ့လာရမယ်.. "

​" ... "

​ယင်းနွီမှာမူ ဘေးတွင် ဆောင့်ကြောင့်ထိုင်၍ မေ့ကျီနှင့် အခြားနှစ်ယောက် အပြန်အလှန် ဆွေးနွေးနေသည်ကို စကားတစ်ခွန်းမှ ဝင်မပြောဘဲ တိတ်ဆိတ်စွာ ကြည့်နေသည်။

​ထိုအချိန်တွင် လင်းဖန်သည် အိမ်ထဲသို့ လျှောက်ဝင်လာပြီး ခေါင်းလှည့်ကြည့်လိုက်ရာ မေ့ကျီတို့ လေးယောက် အိမ်သာအိုးဘေးတွင် ဆောင့်ကြောင့်ထိုင်ကာ အသည်းအသန် ဆွေးနွေးနေကြသည်ကို မြင်လိုက်ရ၏။

​" မင်းတို့ လေးယောက်... ဘာလုပ်နေကြတာလဲ.. "

​" အို... အို... နတ်ဆိုးအရှင်.. အရှင် လာတာ အချိန်ကိုက်ပဲ.. ကျွန်တော်တို့တွေ မစင်ကို ကြည့်နေတာ.. အရှင်ရော လာကြည့်ဦးမလား.. "

​" ဒါက လုံယဲ့ ခုနက ပါလိုက်တဲ့ အီးပဲ.. အရှင်လည်း ဒါမျိုး တစ်ခါမှ မြင်ဖူးမှာ မဟုတ်ဘူး .."

​လင်းဖန် ရောက်လာသည်ကို မြင်သည့်အခါ ရှန့်နှင့် အခြားသူများက အသစ်တွေ့ရှိထားသော ရတနာတစ်ခုကို မျှဝေပြသနေသကဲ့သို့ စိတ်အားထက်သန်စွာ လက်ဝှေ့ယမ်း ပြလိုက်ကြသည်။

​" ... မစင်ကို ကြည့်နေတာ ဟုတ်လား... "

​ထိုစကားကို ကြားသည်နှင့် လင်းဖန်၏ မျက်နှာမှာ ချက်ချင်းပင် မည်းမှောင်သွားပြီး ဒေါသကြောင့် အသက်ရှူမှားမတတ် ဖြစ်သွားသည်။

​သူ ထိုလေးယောက်ကို ခေါ်ထားသော်လည်း အကြာကြီး စောင့်သည့်တိုင်အောင် တစ်ယောက်မှ ရောက်မလာသဖြင့် သူကိုယ်တိုင် လာရောက်ရှာဖွေခဲ့ခြင်း ဖြစ်သည်။

​အိမ်ထဲသို့ ဝင်ဝင်ချင်းမှာပင် သူ၏ ကြီးကျယ်လှသော နတ်ဆိုးစစ်သူကြီး လေးဦးမှာ အိမ်သာထဲတွင် ဆောင့်ကြောင့်ထိုင်ကာ အိမ်သာအိုးထဲမှ ချီးတုံးကို အားရပါးရ စိုက်ကြည့်နေကြသည်ကို မြင်လိုက်ရမည်ဟု လုံးဝလုံးဝ ထင်မထားခဲ့ချေ။

​အခြေအနေကို မသိသောသူများသာ မြင်ပါက သူတို့ အိမ်သာထဲတွင် စားသောက်နေကြသည်ဟု ထင်မှတ်သွားပေလိမ့်မည်။

​သူ ဒေါသထွက်နေသည့်ကြားမှ ဤမြင်ကွင်းက မီးလောင်ရာ လေပင့်သလို ဖြစ်သွားတော့သည်။

​လင်းဖန်သည် အိမ်သာအိုးအနားသို့ အမြန်လျှောက်သွားပြီး ရေဆွဲခလုတ်ကို နှိပ်လိုက်သည်။

​' ဝေါးးး... '

အသံနှင့်အတူ အိမ်သာထဲတွင် ရေများ လည်ပတ်သွားပြီး စုပုံနေသော အညစ်အကြေးများ အားလုံးမှာ မျောပါသွားတော့သည်။

​" အ..... နတ်ဆိုးအရှင်.. ဘာလုပ်လိုက်တာလဲ.. သမီး သေချာ မလေ့လာရသေးဘူးလေ... "

​" အနည်းဆုံးတော့ မှတ်တမ်းတင်ထားဖို့အတွက် နမူနာလေး တစ်ခုလောက်တော့ ယူခွင့်ပေးပါဦး... "

​ရှန့်က အိမ်သာအိုးကို နှမြောတသစွာ ကြည့်နေသော်လည်း လင်းဖန်က သူမ၏ ခေါင်းကို တစ်ချက် ထုလိုက်ကာ စိတ်တိုတိုဖြင့် ပြောလိုက်သည်။

​" ဒီလို အသုံးမကျတဲ့ အရာတွေကို လေ့လာဖို့ ခွင့်မပြုဘူး ..."

​ပြောဆိုပြီးနောက် လင်းဖန်သည် ဧည့်ခန်းထဲတွင် ဒေါသတကြီး ထိုင်လိုက်ပြီး သူ၏ ရှေ့ကို ညွှန်ပြလိုက်သည်။

​" မင်းတို့ လေးယောက်စလုံး ဒီကိုလာပြီး သေချာ ရပ်နေစမ်း .."

​မေ့ကျီနှင့် အခြားသူများသည် သူ၏ ရှေ့တွင် တစ်တန်းတည်း ရပ်လိုက်ကြပြီး လက်များကို နောက်ပစ်ထားလိုက်ကြသည်။

​" မေ့ကျီ... မင်းက ငါ ခန့်အပ်ထားတဲ့ နတ်ဆိုးစစ်သူကြီး လေးဦးထဲက ပထမဆုံး တစ်ယောက်နော်.. မင်းက သူတို့ကို ငါ့ကိုယ်စား သေချာ ထိန်းသိမ်းရမှာ မလား.. အခုတော့ မင်းကပါ သူတို့နဲ့အတူ ရောယောင်ပြီး လုပ်နေတယ်ပေါ့... "

​" လုံယဲ့... မင်းကလည်း ဒီရက်ပိုင်း အစားတွေ အရမ်းစားနေတာပဲ.. တကယ် ဗိုက်မဆာဘူးဆိုရင် နောက်ဆို ဒီလောက်အထိ အများကြီး မစားရဘူး.. "

​" ပြီးတော့ နင်... ရှန့်..မရယ်နဲ့ဦး.. တစ်နေကုန် အိမ်မှာနေပြီး ဂိမ်းဆော့နေတာပဲ ရှိတယ်..ပြီးတော့ ငါ့ဆီကနေ စကင်ဝယ်ဖို့ ပိုက်ဆံတောင်းရဲသေးတယ်ပေါ့.. "

​" ယင်းနွီ... နင်ကတော့... "

​ယင်းနွီကို ပြောရန်အလှည့်တွင် လင်းဖန်မှာ ရုတ်တရက် စကားစ ပျောက်သွားတော့သည်။ သူ အကြာကြီး စဉ်းစားသော်လည်း သူမကို ဆူပူစရာ ရှာမတွေ့ချေ။

​ယင်းနွီသည် ပုံမှန်အားဖြင့် တိတ်ဆိတ်ပြီး အေးအေးဆေးဆေး နေတတ်သူ ဖြစ်ကာ အတော်ပင် လိမ္မာလှသည်။ ထိုလေးယောက်ထဲတွင် သူမမှာ ပြဿနာ အနည်းဆုံးသူ ဖြစ်ပုံရသည်။

​ယင်းနွီသည် သူမ၏ မျက်ဝန်းများကို ပုတ်ခတ်ပုတ်ခတ်လုပ်လိုက်ပြီး လင်းဖန်၏ စကားကို ငြိမ်သက်စွာ စောင့်ဆိုင်းနေသည်။

​လင်းဖန် ခဏ တိတ်ဆိတ်သွားပြီးမှ မှာကြားလိုက်သည်။

​" ယင်းနွီ... နင်က အလိမ္မာဆုံးပဲ..ကိစ္စမရှိရင် သူတို့နဲ့ သိပ်ပြီး မပတ်သက်နဲ့.."

​" အင်း ..."

​ယင်းနွီက နာခံမှုရှိစွာ ခေါင်းညိတ်ပြလိုက်သည်။

​သို့သော် ရှန့်ကမူ မျက်နှာဆူပုပ်လျက် မကျေမနပ် ရှင်းပြလိုက်သည်။

​" နတ်ဆိုးအရှင်... သမီးတို့က အခုထိ ပြန်ဖို့ နည်းလမ်း ရှာမတွေ့သေးဘူးလေ.. အဲ့ဒါကြောင့် ပျင်းလို့ ဂိမ်းဆော့ပြီး အပျင်းဖြေနေရတာပါ.. "

​သူမ ထိုသို့ ပြောလိုက်သည်နှင့် လုံယဲ့နှင့် မေ့ကျီတို့သည်လည်း ထောက်ခံသောအားဖြင့် ခေါင်းညိတ်ပြကြသည်။

​လောလောဆယ်တွင် ပြန်ရန် နည်းလမ်း မရှိသဖြင့် သူတို့ ဘာလုပ်ရမည်ကို မသိကြချေ။ တစ်နေ့ကုန် အိမ်မှာပဲ အောင်းနေရသည်မှာ တကယ့်ကို ပျင်းစရာ ကောင်းလှသည်။

​" အလုပ်မရှိဘူး ဟုတ်လား.. ဒါဆိုရင် မင်းတို့ အားလုံး အလုပ်သွားရှာကြစမ်း... "

​လင်းဖန်က စိတ်တိုတိုဖြင့် ပြောလိုက်သည်။

​ဤရက်ပိုင်းအတွင်း မေ့ကျီနှင့် အခြားသူများသည် ဤကမ္ဘာအကြောင်းကို အခြေခံအားဖြင့် နားလည်လာကြလေပြီ ။

​သူတို့ကို နေ့တိုင်း အိမ်မှာ အားယားနေပြီး ချီးတုံးတွေကို လေ့လာနေခိုင်းမည့်အစား အပြင်ထွက်ပြီး အလုပ်လုပ်ခိုင်းခြင်းက ပို၍ ကောင်းပေလိမ့်မည်။ ၎င်းမှာ အချိန်ကုန်စေရုံသာမက အပိုဝင်ငွေလည်း ရရှိနိုင်သဖြင့် အိမ်အသုံးစရိတ် ဝန်ထုပ်ဝန်ပိုးကိုလည်း လျှော့ချပေးနိုင်မည်ပင်။

Chapter 158

~

အခန်း ၁၅၈ : အလုပ်ရှာရသည်က မလွယ်...

~

​" ငါတို့ ဘာလုပ်ကြမလဲ..နတ်ဆိုးအရှင်က ငါတို့ကို အလုပ်ရှာခိုင်းနေပြီ.. "

​ဧည့်ခန်းထဲတွင် လင်းဖန်က အားလုံးကို ဆူပူကြိမ်းမောင်း၍ ထွက်သွားပြီးနောက် မေ့ကျီနှင့် အခြားသူများသည် ချက်ချင်း အစည်းအဝေးထိုင်ကာ တိုင်ပင်ကြတော့သည်။

​မေ့ကျီသည် ဆပ်ကျူးဘတ်စ် မျိုးနွယ်၏ ခေါင်းဆောင်ဖြစ်ပြီး လုံယဲ့မှာ မြေအောက်လောကကိုးပါးနဂါး၏ အနွယ်အဖွားဖြစ်သည်။ နတ်ဆိုးစစ်သူကြီး ရှန့်မှာမူ ဟဲဖှာမျိုးနွယ်တွင် သက်တမ်းအရှည်ဆုံး ရှင်သန်နေသည့် ပြိုင်ဘက်ကင်း ပါရမီရှင်မလေးဖြစ်ကာ ယင်းနွီမှာလည်း အရိပ်မျိုးနွယ် မှ မွေးဖွားလာသည့် ထူးခြားဆန်းပြားသော မိန်းကလေးတစ်ဦးဖြစ်သည်။

​သူတို့လေးဦး၏ မိသားစုနောက်ခံများမှာ ထူးခြားလွန်းလှပြီး မွေးကတည်းက ရွှေဇွန်းကိုက်လာသူများဟု ပြောလျှင်ပင် မှားမည်မထင်။ အင်မော်တယ်နတ်ဆိုးတိုက်ကြီး ပေါ်တွင် သူတို့တစ်ဦးချင်းစီမှာ နယ်မြေတစ်ခုကို စိုးမိုးထားနိုင်သည့် ပြိုင်ဘက်ကင်း ပညာရှင်များ ဖြစ်ကြလေသည်။

​သူတို့ မွေးဖွားလာကတည်းက ကျင့်ကြံခြင်းနှင့် တိုက်ခိုက်ခြင်းမှလွဲ၍ အခြားမည်သည့်အလုပ်ကိုမျှ မလုပ်ခဲ့ဖူးသလို အလုပ်အကိုင်တစ်ခုကိုလည်း ရှာဖွေရန် စိတ်မကူးဖူးကြပေ။

​အထူးသဖြင့် ကျင့်ကြံခြင်းစွမ်းအား မရှိသော ဤကမ္ဘာတွင် သူတို့၏ မည်သူမည်ဝါဖြစ်ကြောင်းကို ထုတ်မပြနိုင်သလို စွမ်းအားများကိုလည်း အသုံးမပြုနိုင်ချေ။ ထိုကဲ့သို့သော အခြေအနေမျိုးတွင် အလုပ်လုပ်ရန် ခိုင်းစေခြင်းမှာ သူတို့ကို လမ်းစပျောက်စေပြီး များစွာ စိတ်အနှောင့်အယှက် ဖြစ်စေခဲ့သည်။

​အမှန်အတိုင်း ပြောရလျှင် သူတို့သည် ဤကမ္ဘာတွင် အလုပ်တစ်ခုကို မည်သို့ရှာရမည်ကိုပင် မသိကြချေ။

​အားလုံးက ဘာလုပ်ရမှန်းမသိ ဖြစ်နေချိန်တွင် မေ့ကျီမှာမူ တိတ်ဆိတ်နေပြီး သူ၏ လက်ချောင်းများက ဖုန်းမျက်နှာပြင်ပေါ်တွင် လျင်မြန်စွာ လှုပ်ရှားနေသည်။

​" မေ့ကျီ... မင်း အကြံတစ်ခုခု ရနေပြီလား... "

​လုံယဲ့က မေးလိုက်သည်။

​ကျန်ရှိနေသော သုံးဦးမှာလည်း သူ့ထံသို့ သိချင်သောအကြည့်များဖြင့် လှည့်ကြည့်လိုက်ကြ၏။

​နတ်ဆိုးအရှင်၏ အမိန့်နှင့် ပတ်သက်လာလျှင် သူသည် တုံ့ဆိုင်းခြင်းမရှိဘဲ ပထမဆုံး အကောင်အထည်ဖော်တတ်သူ ဖြစ်သည်။ တိုက်ပွဲထဲသို့ ပြေးဝင်ရမည်ဆိုလျှင်ပင် သူ အနည်းငယ်မျှ တွန့်ဆုတ်မည် မဟုတ်ပေ။

​နတ်ဆိုးအရှင် အမိန့်ပေးတိုင်း သူသည် အမြန်ဆုံးနှင့် အကောင်းဆုံး အကောင်အထည်ဖော်နိုင်သူ ဖြစ်သည်။

​ယခုတစ်ကြိမ်တွင် နတ်ဆိုးအရှင်က အလုပ်ရှာရန် အမိန့်ပေးထားသဖြင့် သူသည် အကြံတစ်ခုခု ရရှိထားပြီး ဖြစ်ကာ စတင် လုပ်ဆောင်နေပြီ ဖြစ်ရမည်ဟု အားလုံးက မျှော်လင့်နေကြသည်။

​အားလုံး မျှော်လင့်ထားသည့်အတိုင်းပင် မေ့ကျီသည် သူ၏ ဖုန်းကို မြှောက်ပြလိုက်ပြီး မျက်နှာပြင်ကို လုံယဲ့နှင့် အခြားသူများဘက်သို့ လှည့်လိုက်သည်။

​" ငါ ကိုယ်ရေးမှတ်တမ်း ရေးနေတာ... "

​" ကိုယ်ရေးမှတ်တမ်း ဟုတ်လား.. "

​လုံယဲ့နှင့် အခြားသူများမှာ ကိုယ်ရေးမှတ်တမ်းဆိုသည်မှာ ဘာမှန်း လုံးဝမသိသဖြင့် ဇဝေဇဝါ ဖြစ်သွားကြသည်။

ထိုသည်ကို မြင်သည့်အခါ မေ့ကျီက အတိုချုံ့ ရှင်းပြလိုက်သည်။

​" ကိုယ်ရေးမှတ်တမ်းဆိုတာက ဒီကမ္ဘာက လူသားတွေ အလုပ်ရှာတဲ့အခါ ဖြည့်စွက်ရတဲ့ ကိုယ်ရေးအချက်အလက်တွေပဲ..ဒီကမ္ဘာမှာ အပြင်ထွက်စရာ မလိုဘူး.. အွန်လိုင်းကနေ ကိုယ်ရေးမှတ်တမ်း ဖြည့်ပြီး ကုမ္ပဏီတွေကို ပို့လိုက်ရုံနဲ့ အလုပ်ရှာလို့ရတယ်.. "

​" အို... ဒီကမ္ဘာက လူသားတွေက အဲ့လောက်တောင် အံ့သြဖို့ကောင်းတာလား.. အိမ်ကနေ မထွက်ဘဲနဲ့ အလုပ်ရှာနိုင်တယ်ပေါ့.. "

​လုံယဲ့နှင့် အခြားသူများမှာ အံ့အားသင့်သွားကြပြီးနောက် ချက်ချင်းပင် ထရပ်ကာ မေ့ကျီ၏ ဘေးသို့ ဝိုင်းလာကြသည်။

​" မြန်မြန်... ဒါကို ဘယ်လိုလုပ်ရမလဲဆိုတာ ဒီအရှင်ကို သင်ပေးစမ်း ..."

​" ဒီကိုယ်ရေးမှတ်တမ်းကို ဘယ်မှာ ရေးရမှာလဲ... "

​" ... ငါလည်း သိချင်တယ်.. "

​အားလုံး၏ အသည်းအသန် မေးမြန်းမှုများအောက်တွင် မေ့ကျီမှာ မျက်မှောင် အနည်းငယ် ကြုတ်သွားသည်။

​" ငါလည်း ကိုယ့်ဘာသာကိုယ် ရှာနေတုန်းပဲဟ.. ကိုယ်ရေးမှတ်တမ်း ပုံစံထဲမှာ ဘယ်လို ဖြည့်ရမလဲ မသိတဲ့ အချက်တွေ အများကြီး ရှိနေသေးတယ်.. နတ်ဆိုးအရှင်နဲ့ အရှင်မကို တိုင်ပင်ဖို့ လိုလိမ့်မယ် ထင်တယ်.. "

​ထိုသို့ပြောပြီးနောက် မေ့ကျီသည် ထရပ်လိုက်ပြီး လုံယဲ့နှင့် အခြားသူများ၏ အကြည့်များအောက်တွင် အခန်းထဲမှ ထွက်ခွာသွားကာ လင်းဖန်၏ တံခါးဝသို့ ရောက်ရှိလာပြီး တံခါးကို အသာအယာ ခေါက်လိုက်သည်။

​" နတ်ဆိုးအရှင်... ကျွန်တော် တိုင်ပင်စရာလေး ရှိလို့ပါ.. "

​" ဝင်ခဲ့.. "

​လင်းဖန်၏ အသံက အိမ်ထဲမှ ထွက်ပေါ်လာသည်။

​မေ့ကျီက တံခါးကို တွန်းဖွင့်ကာ ဝင်သွားလိုက်သည်။

​" ဘာဖြစ်ပြန်တာလဲ.. "

​ဘေးအိမ်မှ တစ်စုံတစ်ယောက်က ပြဿနာ ထပ်ရှာနေသည်ဟု လင်းဖန်က ထင်မှတ်ကာ စိတ်မရှည်စွာ မေးလိုက်ခြင်း ဖြစ်သည်။

​" နတ်ဆိုးအရှင်... တကယ်တော့ ဒါက အရှင်နဲ့ တိုင်ပင်ချင်တဲ့ ကျွန်တော့်ရဲ့ ကိုယ်ပိုင်ကိစ္စလေးပါ.. အရှင်နဲ့ အရှင်မကို အနှောင့်အယှက် ပေးမိတဲ့အတွက် တောင်းပန်ပါတယ်.. "

​မေ့ကျီက တောင်းပန်သောအားဖြင့် ဦးညွှတ်လိုက်သည်။

​ဘေးအိမ်မှ ပြဿနာမဟုတ်သည်ကို သိလိုက်ရသည့်အခါ လင်းဖန်၏ မျက်မှောင်က ပြေလျော့သွားပြီး သူ၏ လေသံမှာလည်း ချက်ချင်းပင် နူးညံ့သွားတော့သည်။

​" ကိုယ်ပိုင်ကိစ္စ ဟုတ်လား... ဘာဖြစ်လို့လဲ.. "

​" အရှင်က ကျွန်တော်တို့ကို အလုပ်ရှာခိုင်းထားတဲ့အတွက် အွန်လိုင်းကနေ ကိုယ်ရေးမှတ်တမ်း တင်ချင်လို့ပါ.. ဒါပေမဲ့ အခက်အခဲလေး တစ်ခုနဲ့ ကြုံနေရပြီး ကိုယ်ရေးမှတ်တမ်းကို ဘယ်လို ဖြည့်ရမလဲ မသိလို့ပါ.. "

​မေ့ကျီသည် သူ၏ ဖုန်းကို လက်နှစ်ဖက်ဖြင့် ကိုင်ထားပြီး မပြီးပြတ်သေးသော ကိုယ်ရေးမှတ်တမ်း ပုံစံကို လင်းဖန်ထံသို့ ကမ်းပေးလိုက်သည်။

​ကိုယ်ရေးမှတ်တမ်းအကြောင်း ကြားလိုက်သည့်အခါ လုံယွဲ့သည် သူမကိုယ်တိုင် ပထမဆုံးအကြိမ် ကိုယ်ရေးမှတ်တမ်း ဖြည့်ခဲ့စဉ်က အခြေအနေကို ပြန်လည်သတိရသွားကာ စပ်စုလိုစိတ်ဖြင့် အနားသို့ တိုးကပ်လာသည်။

​ကိုယ်ရေးမှတ်တမ်း ဖြည့်သည့် အပိုင်းတွင် သူမအား အတွေ့အကြုံရှိသူဟု ခေါ်ဆိုနိုင်သည် မဟုတ်ပါလော။

​လင်းဖန်က ဖတ်ကြည့်လိုက်ပြီးချက်ချင်းပင် မျက်မှောင်ကြုတ်သွားသည်။

​မေ့ကျီ၏ ကိုယ်ရေးမှတ်တမ်းထဲတွင် ပါဝင်သော အချက်အလက်များမှာ လုံယွဲ့၏ ပထမဆုံး ကိုယ်ရေးမှတ်တမ်းနှင့် ထပ်တူနီးပါး ဖြစ်နေသည်။ အသက်မှာ နှစ်ပေါင်း ရာချီရှိနေခြင်း၊ ပညာအရည်အချင်းမှာ မူလတန်းအဆင့်ပင် မရှိခြင်းနှင့် နတ်ဆိုးလောကတွင် နတ်ဆိုးစစ်သူကြီး လေးဦးအဖြစ် တာဝန်ထမ်းဆောင်ကာ စစ်သည်တော် သောင်းနှင့်ချီ၍ ကွပ်ကဲခဲ့ခြင်း စသည့် အလုပ်အကိုင် အတွေ့အကြုံများ ဖြစ်သည်။

​" မေ့ကျီ... ဒါကို ဒီလို ရေးလို့ မရဘူးလေ.. "

​" မှန်ပါတယ် နတ်ဆိုးအရှင်... အရှင်လည်း ဒီအတိုင်းပဲ ထင်တယ်ပေါ့.. ဒီလို ရေးတာက မသင့်တော်ဘူးလို့ ကျွန်တော်လည်း ယူဆပါတယ်.. ဒီလိုရေးရင် ကျွန်တော့်ရဲ့ နတ်ဆိုးဖြစ်တည်မှုကို ထုတ်ဖော်ပြသလို ဖြစ်သွားပြီး အရှင့်ရဲ့ အမိန့်ကို ချိုးဖောက်မိသလို ဖြစ်သွားမှာပါ.. "

​မေ့ကျီက သူ၏ မေးစေ့ကို ပွတ်သပ်ရင်း ပြောလိုက်သည်။

​လင်းဖန် ဘာပြန်ပြောရမှန်းကို မသိတော့။

​သူ စိုးရိမ်သည်မှာ ဤသို့ရေးခြင်းကြောင့် နတ်ဆိုးဖြစ်တည်မှု ပေါ်ပေါက်သွားသည်ထက် အရူးထင်ကာ အလုပ်မခန့်မည်ကိုပင် ။ ဤသို့သော အကြောင်းအရာများအား မည်သူ ယုံကြည်နိုင်ပါမည်နည်း။

​" မေ့ကျီ... နတ်ဆိုးလောကမှာ ရခဲ့တဲ့ အတွေ့အကြုံတွေ အားလုံးကို ကျောင်းက အတွေ့အကြုံတွေအဖြစ် ပြောင်းလိုက်.. ဥပမာ... နတ်ဆိုးလောကမှာ စစ်သည် တစ်သိန်းကို ကွပ်ကဲခဲ့တယ်ဆိုတာကို ကျောင်းအတွင်းမှာ လူပေါင်း သောင်းနဲ့ချီတဲ့ အကြီးစား အဖွဲ့လိုက် လှုပ်ရှားမှုတစ်ခုကို စီစဉ်ခဲ့တယ်လို့ ပြောင်းလိုက်.. "

​လင်းဖန်က ကိုယ်ရေးမှတ်တမ်း၏ ကျောင်းအတွေ့အကြုံအပိုင်းရှိ အချက်အလက်များကို ပြင်ဆင်ရန် အကြံပြုလိုက်သည်။

​မေ့ကျီသည် ထိုစကားကို ကြားသည့်အခါ သူ၏ မျက်နှာတွင် အလွန်အမင်း အထင်ကြီး လေးစားသော အရိပ်အယောင်များ ပေါ်လာသည်။

​" ဪ... ဒါကြောင့်..အရှင်က နတ်ဆိုးအရှင် ဖြစ်နေတာကိုး..."

​" နတ်ဆိုးလောကက ကျွန်တော့်ရဲ့ အတွေ့အကြုံတွေကို ဒီကမ္ဘာက အတွေ့အကြုံတွေအဖြစ် အသွင်ပြောင်းဖို့ကို တွေးမိတယ်ပေါ့ .."

​" ဒီနည်းလမ်းဆိုရင် ကျွန်တော့်ကို ဘယ်သူမှ သံသယဝင်မှာ မဟုတ်တော့ဘူး ..."

​ထိုသို့ပြောပြီးနောက် မေ့ကျီသည် လင်းဖန်၏ ရှေ့မှောက်တွင်ပင် သူ၏ ကိုယ်ရေးမှတ်တမ်းကို ပြင်ဆင်လိုက်သည်။

​မကြာမီမှာပင် သူ ပြင်ဆင်ပြီးသော ကိုယ်ရေးမှတ်တမ်းကို လင်းဖန်ထံသို့ ကမ်းပေးလိုက်၏။

​လင်းဖန်က ကြည့်ရှုပြီးနောက် ကျေနပ်သွားပြီး ခေါင်းညိတ်လိုက်သည်။

​" အင်း... မဆိုးဘူး..အများကြီး ပိုကောင်းသွားပြီ.. "

​ပြင်ဆင်ပြီးနောက်တွင် အစောပိုင်းက ကလေးဆန်သော စိတ်ကူးယဉ်သမားတစ်ဦး ရေးထားသကဲ့သို့ ဖြစ်နေသော ကိုယ်ရေးမှတ်တမ်းမှာ အတော်ပင် ကြည့်ကောင်းသွားတော့သည်။

​သူ၏ အသက် သို့မဟုတ် ကျောင်းအတွေ့အကြုံ ဖြစ်စေ၊ အရာရာကို အွန်လိုင်းမှ တွေ့ရှိသော ကိုယ်ရေးမှတ်တမ်း ပုံစံများနှင့်အညီ ပြုပြင် မွမ်းမံထားပြီး နတ်ဆိုးလောကမှ နတ်ဆိုးစစ်သူကြီးအဖြစ် သူ ရရှိခဲ့သော အတွေ့အကြုံများနှင့် ပေါင်းစပ်ထားသည်။ ယခုအခါတွင်မူ ဤသည်က သာမန် လူသစ် တစ်ဦး၏ ကိုယ်ရေးမှတ်တမ်းနှင့် ဘာမှ မခြားတော့ချေ။

​" နတ်ဆိုးအရှင်ရဲ့ ချီးကျူးမှုကို ရရှိတဲ့အတွက် ကျွန်တော် အလွန် ဂုဏ်ယူမိပါတယ်.. "

​မေ့ကျီ၏ နှုတ်ခမ်းဖျားတွင် ပျော်ရွှင်သော အပြုံးတစ်ခု ပေါ်လာပြီးနောက် သူက ချက်ချင်းပင် ထပ်မံ မေးလိုက်သည်။

​" နတ်ဆိုးအရှင်... ဒါဆိုရင် ဒါကို အခု တင်လိုက်လို့ ရပြီလား .."

​" စမ်းကြည့်လေ .."

​လင်းဖန်က အတည်ပြုချက် ပေးလိုက်သည့်အခါ လုံယွဲ့သည်လည်း ထိုအချိန်တွင် စီနီယာတစ်ဦး၏ အမူအရာဖြင့် ကြားဝင် ပြောလိုက်သည်။

​" ဒီဧကရီလည်း အခု နင်လုပ်သလိုမျိုး ကိုယ်ရေးမှတ်တမ်း တင်ပြီးတော့မှ အလုပ်ရှာတွေ့ခဲ့တာပဲ.. နင့် စိတ်ကိုတော့ ကြိုတင် ပြင်ဆင်ထားရမယ်..ဒီကမ္ဘာမှာ အလုပ်ရှာရတာက ထင်သလောက်မလွယ်ကူဘူး.."

​" ဘယ်သူ့ဆီကမှ အကြောင်းပြန်တာ ဒါမှမဟုတ် အင်တာဗျူး ခေါ်တာမျိုး မရခင်အထိ အချိန်အကြာကြီး စောင့်ရနိုင်တယ်.. "

​သူမ စကားပြောပြီးသည်နှင့် တစ်ပြိုင်နက် မေ့ကျီက ခေါင်းမော့လိုက်ပြီး တည်ငြိမ်စွာ ပြောလိုက်သည်။

​" ကျွန်တော့်ဆီကို အင်တာဗျူး ခေါ်စာ ရောက်လာပုံရတယ် .."

​" အမ်... "

​လုံယွဲ့၏ အမူအရာမှာ ချက်ချင်းပင် အံ့အားသင့်မှုအဖြစ် ပြောင်းလဲသွားပြီး သူမ၏ မျက်နှာမှာ မယုံကြည်နိုင်မှုများဖြင့် ပြည့်နှက်နေလေသည်။

​'နင်...အရမ်း မြန်လွန်းမနေဘူးလား..'

​သူမ တုန်းကဆိုလျှင် အင်တာဗျူး ခေါ်စာ ရရှိရန်အတွက် ဘာသတင်းမှ မကြားဘဲ ရက်ပေါင်းများစွာ စောင့်ခဲ့ရသည်ကို ပြန်လည် သတိရသွားသည်။

​ထိုသည်နှင့် နှိုင်းယှဉ်လျှင် ဧကရီဖြစ်သော သူမသည် မည်သူမှ မလိုချင်သောသူကဲ့သို့ ဖြစ်နေချေသည်။

​ထိုအချိန်တွင် လုံယွဲ့မှာ ပြင်းထန်သော စိတ်ဒဏ်ရာကို ခံစားလိုက်ရပြီး မိမိကိုယ်ကို သံသယဝင်လာတော့သည်။

'​ဘာလို့ သူက အင်တာဗျူး ခေါ်စာကို ဒီလောက် မြန်မြန် ရရတာလဲ... ဘာကြောင့်လဲ...'

​" အင်တာဗျူး ခေါ်စာက ဘယ်လို အလုပ်မျိုးအတွက်လဲ.. "

လင်းဖန်က မေးလိုက်သည်။

​မေ့ကျီက အင်တာဗျူး ခေါ်စာကို အလွန် မြန်ဆန်စွာ ရရှိလိုက်သဖြင့် လင်းဖန်အနေဖြင့် သူ မည်သို့သော အလုပ်မျိုးအတွက် ကိုယ်ရေးမှတ်တမ်း တင်ခဲ့သည်ကို စပ်စုချင်သွားသည်။

​" ကျွန်တော်လည်း မသိဘူး..ရေးထားတာကတော့... Gigoloတဲ့... "

​" Gigolo ဟုတ်လား .."

​လင်းဖန်နှင့် လုံယွဲ့တို့၏ အမူအရာမှာ အံ့အားသင့်မှုကြောင့် ပြောင်းလဲသွားကြသည်။

ထိုသည်က ဒဏ္ဍာရီများထဲတွင် ခေါ်ကြသည့် ထမင်းပျော့စားသူများကို ခေါ်ခြင်း မဟုတ်ပါလော။