အခန်း ၁၁၅

အခန်း (၁၁၅)

တက်ဂယူက အံ့ဩပြီး မေးလိုက်တယ်။

“ဒီကိစ္စမှာ အွန်ဆောင်း မော်တာက ဘာလို့ ပါလာတာလဲ”

ကျွန်တော်လည်း အဲဒီအတိုင်းပဲ တွေးနေမိတယ်။ ဆိုဆောင်း SB ရဲ့ စီမံခန့်ခွဲမှု အငြင်းပွားမှုထဲကို အွန်ဆောင်း မော်တာက ဘာလို့ ပါလာရတာလဲ။

“မင်းတို့ သိတဲ့အတိုင်း ဆိုဆောင်း SB က ကမ္ဘာမှာ ပဉ္စမမြောက် အကြီးဆုံး လျှပ်စစ်ကား ဘတ္ထရီ ထုတ်လုပ်သူလေ။ အွန်ဆောင်း မော်တာကလည်း သူတို့ရဲ့ လျှပ်စစ်ကား ထုတ်လုပ်မှုကို ချဲ့ထွင်ဖို့ မျှော်လင့်နေတာလေ”

လောင်စာဆီသုံး အင်ဂျင်တွေကနေ သဘာဝပတ်ဝန်းကျင် ထိန်းသိမ်းရေး ကားတွေ (လျှပ်စစ်နဲ့ ဟိုက်ဒရိုဂျင်) ဆီကို ပြောင်းလဲလာတာက တားဆီးလို့မရတဲ့ လမ်းကြောင်းတစ်ခုပါ။ အွန်ဆောင်း မော်တာကလည်း အခုနောက်ပိုင်း လျှပ်စစ်ကားတွေ စတင်ထုတ်လုပ်နေပြီဖြစ်ပြီး လောလောဆယ် မော်ဒယ်နှစ်မျိုး ရောင်းနေပါတယ်။

ကားထုတ်လုပ်သူတွေက လျှပ်စစ်ကားဘက်ကို ပြောင်းလဲလာတာကို သိပ်မကြိုက်ကြတဲ့ အကြောင်းရင်းကတော့ ရိုးရိုးလေးပါပဲ။ ရောင်းရတဲ့ အမြတ်ကို ဘတ္ထရီ ကုမ္ပဏီတွေနဲ့ ခွဲဝေရလို့ပေါ့။

လျှပ်စစ်ကားတစ်စီးရဲ့ ကုန်ကျစရိတ် ၃၀ ရာခိုင်နှုန်းကျော်က ဘတ္ထရီဖိုးပဲ။ အဲဒီပမာဏက ဘတ္ထရီ ကုမ္ပဏီတွေရဲ့ အိတ်ထဲကို ရောက်သွားတာဆိုတော့ ကားထုတ်လုပ်သူတွေအတွက် စိတ်ပျက်စရာပဲပေါ့။

ဒါဆို သူတို့က ဆိုဆောင်း SB ကို သိမ်းပိုက်ဖို့ ကြိုးစားနေတာလား။

ဒုဥက္ကဋ္ဌ လင်ဂျင်ယုံက အခြေအနေကို ရှင်းပြတယ်။

“ငါ့အမေက ငါ့ညီကို ဆိုဆောင်း SB ရဲ့ စီအီးအို ခန့်ဖို့ စီစဉ်နေတာ”

အခုလက်ရှိ ဆိုဆောင်း SB ရဲ့ စီအီးအိုက ဥက္ကဋ္ဌ လင်အီကွမ်ပါ။ သူက စီမံခန့်ခွဲမှုကနေ နားထားတာကြောင့် သူ့ရဲ့ သစ္စာရှိ လက်အောက်ငယ်သားဖြစ်တဲ့ ဥက္ကဋ္ဌ လီဆူဟတ်က ယာယီ စီအီးအိုအဖြစ် လုပ်နေတာပါ။

တက်ဂယူက သိချင်စိတ်နဲ့ မေးတယ်။

“ဘာလို့ အမေက ဘက်လိုက်နေရတာလဲ... ဒါမှမဟုတ် ဘာလို့ ညီလေးဘက်ကနေ ရပ်တည်ပေးနေတာလဲ”

ဒုဥက္ကဋ္ဌ လင်ဂျင်ယုံက ခါးခါးသီးသီး ပြုံးလိုက်တယ်။

“အဲဒီကိစ္စမှာ အကြောင်းရင်း အမျိုးမျိုး ရှိပါတယ်”

ပထမအချက်က ဒုဥက္ကဋ္ဌ လင်ဂျင်ယုံနဲ့ ဆိုဆောင်း စက်မှုလုပ်ငန်းက အငယ်ဆုံးသား လင်ဆိုယုံတို့ကြားမှာ အသက် ၁၃ နှစ်လောက် ကွာပါတယ်။ အသက်ကြီးမှရတဲ့ သားဖြစ်လို့ အမေဖြစ်သူ ယွန်ဆိုဟျွန်းက အငယ်ဆုံးသားကို အရမ်းအလိုလိုက်တယ်။ ဆန့်ကျင်ဘက်အနေနဲ့ ဒုဥက္ကဋ္ဌ လင်ဂျင်ယုံကတော့ အမေနဲ့ ဆက်ဆံရေး အဆင်မပြေဘူးလို့ လူသိများတယ်။

မိသားစု ကိစ္စတွေက ထိခိုက်လွယ်တာမလို့ ဆက်ပြီး မမေးတာက ပိုကောင်းပါလိမ့်မယ်။

တက်ဂယူက တခြားတစ်ခုကို မေးလိုက်တယ်။

“ဟုတ်ပြီလေ။ ခင်ဗျားအမေက ညီလေးဘက်ကနေ ရပ်တည်ပေးနေတာပဲ ထားပါတော့။ ဒါပေမဲ့ ခင်ဗျားအမေနဲ့ အွန်ဆောင်း မော်တာနဲ့က ဘာပတ်သက်တာလဲ”

“ငါ့အမေရဲ့ ညီမ၊ ဆိုလိုတာက ငါ့ဒေါ်လေးက အွန်ဆောင်း မော်တာ အုပ်စုရဲ့ ကတော်လေ”

ဂျောင်အီဘိုက ကိုရီးယားမှာ အကြီးဆုံး သတင်းစာ ထုတ်ဝေသူဖြစ်ပြီး ကေဘယ်ရုပ်သံလိုင်း နှစ်ခုကိုလည်း ပိုင်ပါတယ်။

အခုခေတ်မှာ အင်တာနက်နဲ့ ဆိုရှယ်မီဒီယာတွေကြောင့် သြဇာကျဆင်းသွားပြီ ဆိုပေမဲ့ လွန်ခဲ့တဲ့ ဆယ်စုနှစ်တွေတုန်းကတော့ သတင်းဆောင်းပါး တစ်ပုဒ်က လူထုအမြင်ကို ပြောင်းလဲပစ်နိုင်ခဲ့တယ်။

ချေဘောတွေနဲ့ မီဒီယာတွေ အပြန်အလှန် အမှီသဟဲပြုနေကြတဲ့ အချိန်တုန်းက ဥက္ကဋ္ဌ ယွန်ထယ်မင်က သူ့သမီးနှစ်ယောက်ကို ချမ်းသာတဲ့ မိသားစုတွေဆီ အိမ်ထောင်ချပေးနိုင်ခဲ့တယ်။ သူ့ရဲ့ သမီးကြီး ယွန်ဆိုဟျွန်းက ဆိုဆောင်း အုပ်စုရဲ့ ဆက်ခံသူ လင်အီကွမ်နဲ့ လက်ထပ်ခဲ့ပြီး သမီးငယ် ယွန်ဆိုဂျင်ကတော့ အွန်ဆောင်း အုပ်စုရဲ့ ဆက်ခံသူ ဟန်မင်းဂူနဲ့ လက်ထပ်ခဲ့တယ်။

ဒါကြောင့် ဥက္ကဋ္ဌ ဟန်မင်းဂူက အခုဆိုရင် ဥက္ကဋ္ဌ လင်အီကွမ်ရဲ့ မယားညီအစ်ကို ဖြစ်နေတာပါ။

ကိုရီးယားမှာ ထင်ရှားတဲ့ ဒီချေဘော နှစ်ခုက တစ်ခါတလေ ပူးပေါင်းဆောင်ရွက်ကြသလို တစ်ခါတလေလည်း ပြိုင်ဆိုင်ကြတယ်။ ဒါပေမဲ့ ညီအစ်မဖြစ်သူ ယွန်ဆိုဟျွန်းနဲ့ ယွန်ဆိုဂျင်တို့ကတော့ အမြဲတမ်း ရင်းနှီးတဲ့ ဆက်ဆံရေး ရှိခဲ့ကြတယ်။

ယွန်ဆိုဟျွန်းက တရားဝင်အားဖြင့် ဆိုဆောင်း အနုပညာပြတိုက်ရဲ့ ဒါရိုက်တာ ရာထူးကို ယူထားတယ်။

ဆိုဆောင်း အုပ်စုက ဖွင့်ထားတဲ့ အနုပညာပြတိုက်ဖြစ်တာနဲ့အညီ ပြည်တွင်းပြည်ပက နာမည်ကြီး အနုပညာရှင်တွေရဲ့ ပြပွဲတွေကို ခဏခဏ ကျင်းပလေ့ရှိတယ်။ အဲဒီအချိန်တိုင်းမှာ ယွန်ဆိုဂျင်က လာတက်လေ့ရှိပြီး ညီအစ်မ သံယောဇဉ်ကို ပြသလေ့ရှိတယ်။

ဒါရိုက်တာ ယွန်ဆိုဟျွန်းက အွန်ဆောင်း အုပ်စုနဲ့ ပူးပေါင်းဖို့ ဆုံးဖြတ်ချက်ချတာက သူ့ညီမရဲ့ လွှမ်းမိုးမှု တော်တော်လေး ပါပုံရတယ်။

“အခု ဆိုဆောင်း SB ရဲ့ ရှယ်ယာဖွဲ့စည်းပုံက ဘယ်လိုရှိလဲ”

“အမေက ၅.၈ ရာခိုင်နှုန်း ကိုင်ထားပြီး ညီမက ၄.၇ ရာခိုင်နှုန်း ကိုင်ထားတယ်”

“ခင်ဗျားကရော”

“ငါ့ ရှယ်ယာက ၀.၈ ရာခိုင်နှုန်းပဲ”

တက်ဂယူက အံ့ဩသွားတယ်။

“ဒါပဲလား”

ဒုဥက္ကဋ္ဌ လင်ဂျင်ယုံက ပြုံးလိုက်တယ်။

“ပြီးတော့ ဆိုဆောင်း အီလက်ထရောနစ်က ၁၅.၉ ရာခိုင်နှုန်း ကိုင်ထားတယ်”

ကိုရီးယားက ချေဘောတွေက ဒီလောက် ရှယ်ယာအနည်းငယ်လေးနဲ့ လုပ်ငန်းခွဲ အများကြီးကို စိုးမိုးထားနိုင်တာက ရှယ်ယာတွေကို စက်ဝိုင်းပုံစံ အပြန်အလှန် ပိုင်ဆိုင်ထားတဲ့ စနစ်ကြောင့်ပါ။

ဘာပဲဖြစ်ဖြစ် ဒုဥက္ကဋ္ဌ လင်ဂျင်ယုံက ဆိုဆောင်း အီလက်ထရောနစ်ကို ထိန်းချုပ်ထားနိုင်တာကြောင့် သူတို့ရဲ့ ရှယ်ယာတွေကို ပေါင်းလိုက်ရင် ၁၆.၇ ရာခိုင်နှုန်း ရှိပါတယ်။ အဲဒါက အမေနဲ့ ညီမတို့ ပေါင်းထားတဲ့ ၁၀.၅ ရာခိုင်နှုန်းထက် သာနေတာပါပဲ။

“ဒါဆိုရင် ပြဿနာ မရှိဘူး မဟုတ်လား”

“ဒါပေမဲ့ အကြီးဆုံး ရှယ်ယာရှင်က ငါ့ညီမဘက်က ရပ်တည်ပေးလိုက်ရင် ပြဿနာ ဖြစ်လာနိုင်တယ်”

“အာ”

ဒါက အလှည့်အပြောင်းဖြစ်နိုင်တဲ့အချက်ပဲ။

ချက်ချင်း နားလည်သွားတဲ့ ကျွန်တော်နဲ့ မတူဘဲ တက်ဂယူကတော့ ခေါင်းကုတ်နေပါတယ်။

“အကြီးဆုံး ရှယ်ယာရှင်က ဘယ်သူလဲ”

“စဉ်းစားကြည့်လေ။ ပြည်တွင်းက ကော်ပိုရေးရှင်းကြီးတွေရဲ့ အကြီးဆုံး ရှယ်ယာရှင်က ဘယ်သူ ဖြစ်နိုင်မလဲ”

ဒုဥက္ကဋ္ဌ လင်ဂျင်ယုံက “အမျိုးသား ပင်စင် ရန်ပုံငွေ အဖွဲ့ပဲ” လို့ ပြောတယ်။

အမျိုးသား ပင်စင် ရန်ပုံငွေ အဖွဲ့မှာ ဝမ် သန်းပေါင်း ၆၀ကုဋေကျော် တန်ဖိုးရှိတဲ့ ပိုင်ဆိုင်မှုတွေ ရှိတယ်။ ဒီပမာဏက ကမ္ဘာမှာ ထိပ်တန်း ပင်စင်ရန်ပုံငွေ အဖွဲ့ သုံးခုအတွင်းမှာ ပါဝင်ပါတယ်။ အမျိုးသား ပင်စင်အဖွဲ့က များပြားလှတဲ့ ဒီပိုင်ဆိုင်မှုတွေကို ပြည်တွင်းပြည်ပ စတော့တွေ၊ အိမ်ခြံမြေတွေ၊ ငွေတိုက်စာချုပ်တွေနဲ့ တခြားအရာတွေမှာ ရင်းနှီးမြှုပ်နှံထားတာပါ။

သူတို့ရဲ့ ရင်းနှီးမြှုပ်နှံမှု ပမာဏက အရမ်းကြီးမားတာကြောင့် ကုမ္ပဏီကြီး အတော်များများမှာ အနည်းဆုံး ရှယ်ယာ ၅ ရာခိုင်နှုန်းကျော် ပိုင်ဆိုင်ထားလေ့ရှိပါတယ်။

“အမျိုးသား ပင်စင်အဖွဲ့က ဘယ်လောက် ပိုင်ထားလဲ”

“၁၆.၁ ရာခိုင်နှုန်း။ မူလက ၁၀ ရာခိုင်နှုန်း ဝန်းကျင်ပဲ ရှိတာ၊ ဒါပေမဲ့ ပြီးခဲ့တဲ့ တစ်နှစ်အတွင်းမှာ သိသိသာသာ တိုးလာခဲ့တယ်”

“……”

တော်တော်များတာပဲ။

အမျိုးသား ပင်စင်အဖွဲ့က ရင်းနှီးမြှုပ်နှံမှုတွေကို ဖြန့်ကျက်ထားတဲ့ မူဝါဒကို ကျင့်သုံးတာကြောင့် ကုမ္ပဏီတစ်ခုတည်းမှာ ၁၀ ရာခိုင်နှုန်းထက် ပိုပိုင်ဆိုင်ဖို့ဆိုတာ ရှားပါတယ်။

“အမျိုးသား ပင်စင်အဖွဲ့က သူတို့ရဲ့ မဲပေးပိုင်ခွင့်ကို သိပ်သုံးလေ့မရှိပါဘူး”

အမျိုးသား ပင်စင်အဖွဲ့က ကုမ္ပဏီကြီး အတော်များများရဲ့ အကြီးဆုံး ရှယ်ယာရှင်ပါပဲ။ ဆိုဆောင်း အီလက်ထရောနစ်ရဲ့ ရှယ်ယာ ၉ ရာခိုင်နှုန်းလောက်ကို ပိုင်ထားတာတင် တော်တော်လေး အဓိပ္ပာယ်ရှိနေပါပြီ။

(ဒါက ဝမ် သန်း၃ကုဋေလောက် တန်ဖိုးရှိတာပါ)။

သဘာဝအရတော့ သူတို့ ပိုင်ဆိုင်ထားတဲ့ ရှယ်ယာတွေအပေါ် မူတည်ပြီး မဲပေးပိုင်ခွင့် သုံးလို့ရပေမဲ့ သူတို့ကတော့ အဲဒီလို မလုပ်ခဲ့ကြတာ များတယ်။

“သိပ်မကြာသေးခင်တုန်းက သမ္မတ ပက်ဆီဟျွန်းက အစိုးရအဖွဲ့ အစည်းအဝေးမှာ Stewardship Code အကြောင်း ပြောသွားသေးတယ်”

တက်ဂယူက ကျွန်တော့်ကို ကြည့်လိုက်တယ်။

“Stewardshipဆိုတာ ဘာကြီးလဲ...”

“Stewardship Code လေ။ အဖွဲ့အစည်းအလိုက် ရင်းနှီးမြှုပ်နှံသူတွေက တာဝန်ရှိတဲ့ ဘဏ္ဍာစိုးတွေအဖြစ် ဆောင်ရွက်သင့်တယ်လို့ ဆိုလိုတာ”

“အဲဒါက ဘာကို ပြောတာလဲ”

“အတိုချုပ်ပြောရရင် သူတို့ရဲ့ မဲပေးပိုင်ခွင့်ကို တက်တက်ကြွကြွ သုံးဖို့ တိုက်တွန်းနေတာပဲ”

သမ္မတ ပက်ဆီဟျွန်းက မကြာသေးမီက အရှုံးပေါ်ခဲ့တဲ့ ကိစ္စအချို့ကို ထောက်ပြခဲ့ပြီး ပြည်သူတွေရဲ့ အငြိမ်းစား ပင်စင် ရန်ပုံငွေတွေကို သေသေချာချာ စီမံခန့်ခွဲခြင်း မရှိတဲ့အတွက် အမျိုးသား ပင်စင် ရန်ပုံငွေ အဖွဲ့ ဥက္ကဋ္ဌကို ဝေဖန်ခဲ့တယ်။

သူပြောတာလည်း မှန်တာပါပဲ။

ပြည်သူတွေရဲ့ အငြိမ်းစား ရန်ပုံငွေတွေကို ကာကွယ်ပေးမယ်ဆိုတဲ့ အကြံဉာဏ်ကို ဘယ်သူက ကန့်ကွက်မှာလဲ။ ဒါပေမဲ့ သူ့စကားတွေရဲ့ နောက်ကွယ်မှာ ပိုပြီး နက်ရှိုင်းတဲ့ အဓိပ္ပာယ် ရှိပုံရတယ်။

နိုင်ငံရေးသမားတွေရဲ့ စကားကို သတိထားပြီး နားထောင်သင့်တာ ဒါကြောင့်ပါပဲ။

အရင်က ဖြစ်ခဲ့တဲ့ အဖြစ်အပျက်တွေကို ကြည့်ရင် သမ္မတ ပက်ဆီဟျွန်းက အွန်ဆောင်း မော်တာရဲ့ အကျိုးစီးပွားအတွက်ပဲ အပြည့်အဝ လုပ်ဆောင်နေတာပါ။ အမျိုးသား ပင်စင် ရန်ပုံငွေ အဖွဲ့ ဥက္ကဋ္ဌ ချွိုင်းမွန်ဟျွန်းနဲ့ ရန်ပုံငွေ စီမံခန့်ခွဲမှု ဌာနချုပ် ဒါရိုက်တာ ကင်မြောင်ဆူး တို့ကလည်း သမ္မတ ပက်ဆီဟျွန်းရဲ့ လူရင်းတွေပါပဲ။

လင်အီကွမ်က ကိုရီးယား စီးပွားရေး သမိုင်းမှာ သင်္ကေတ တစ်ခုလို ဖြစ်နေတဲ့လူပါ။ သူက ဆိုဆောင်း အုပ်စုကို ကြီးထွားအောင် လုပ်ခဲ့သလို ဆိုဆောင်း အီလက်ထရောနစ်ကိုလည်း ကမ္ဘာ့အဆင့်မီ ကုမ္ပဏီ ဖြစ်အောင် လုပ်ခဲ့တယ်ဆိုတာ ဘယ်သူမှ ငြင်းလို့မရပါဘူး။

အမျိုးသား ပင်စင် ရန်ပုံငွေ အဖွဲ့က သူတို့ရဲ့ မဲပေးပိုင်ခွင့်ကို သုံးမယ်ဆိုရင်တောင် လင်အီကွမ်ကို ရာထူးက ဖြုတ်ဖို့ဆိုတာ ပြင်းထန်တဲ့ ကန့်ကွက်မှုတွေ ကြုံရမှာပါ။

ဒါပေမဲ့ သူ ဆုံးသွားပြီးတဲ့နောက်မှာတော့ အခြေအနေက ပြောင်းလဲသွားပါလိမ့်မယ်။

စီအီးအို တစ်ယောက် ဆုံးသွားရင် စီအီးအို အသစ် ခန့်ရတာက သဘာဝပဲ။ ပြဿနာကတော့ အစ်ကိုဖြစ်သူဘက်က ရပ်တည်မှာလား ဒါမှမဟုတ် ညီဖြစ်သူဘက်က ရပ်တည်မှာလား ဆိုတာပါ။

ဆိုဆောင်း SB ရဲ့ ရှယ်ယာတွေကို တိုးမြှင့်ဖို့ ကြိုးစားခဲ့တာက အဲဒီလို နေ့မျိုး ရောက်လာဖို့ မျှော်လင့်ပြီး လုပ်ခဲ့တာလား။

ကျွန်တော် ပြန်ပြီး တွက်ချက်ကြည့်လိုက်တယ်။

အမျိုးသား ပင်စင် ရန်ပုံငွေ အဖွဲ့ရဲ့ ရှယ်ယာတွေကို ပေါင်းလိုက်ရင် ဆန့်ကျင်ဘက် ရှယ်ယာပိုင်ဆိုင်မှုက ၂၆.၆ ရာခိုင်နှုန်း ရှိလာပြီး ဒုဥက္ကဋ္ဌ လင်ဂျင်ယုံမှာတော့ ၁၆.၇ ရာခိုင်နှုန်းပဲ ရှိပါတယ်။

ထောက်ခံတဲ့ ရှယ်ယာရှင်တွေကို မရှာနိုင်ရင်တော့ ရှယ်ယာရှင်များ အစည်းအဝေးမှာ သူ ရှုံးမှာ သေချာပါတယ်။

တက်ဂယူက သိချင်စိတ်နဲ့ မေးတယ်။

“ဒါပေမဲ့ ညီဖြစ်သူက ဆိုဆောင်း SB ရဲ့ စီအီးအို ဖြစ်သွားရင်တောင် အဲဒါက အွန်ဆောင်း မော်တာနဲ့ တိုက်ရိုက် မပတ်သက်ဘူး မဟုတ်လား”

ဒါက မှန်တဲ့ အချက်ပဲ။ ကျွန်တော်လည်း အဲဒါကို တွေးနေတာပါ။

“အမေက သူ့သားကို အမှုဆောင် ဒါရိုက်တာ ဟန်ဟျိုရင်နဲ့ ပေးစားဖို့ ရည်ရွယ်ထားတယ်”

ဒါက ကျွန်တော် မကြားဖူးတဲ့ နာမည်ပဲ။

“ဟန်ဟျိုရင်က ဘယ်သူလဲ...”

“သူက အွန်ဆောင်း ကတ်ရဲ့ စီအီးအို ဟန်ဂျောင်ဂူရဲ့ ဒုတိယသမီးပါ”

အွန်ဆောင်း အုပ်စုကို တည်ထောင်သူဖြစ်ပြီး တောင်ကိုရီးယားရဲ့ အချမ်းသာဆုံး ပုဂ္ဂိုလ်ဖြစ်တဲ့ ဟန်ယောင်ဂျူက သားသမီး အများကြီးရှိတဲ့ လူအဖြစ်လည်း နာမည်ကြီးပါတယ်။

သူ့မှာ သားငါးယောက်နဲ့ သမီးသုံးယောက် ရှိတယ်။ (တခြား အပြင်က သားသမီးတွေကို ထည့်မတွက်ရင်တောင်ပေါ့)။ သားသမီး များတာက မိဘတွေအတွက် ပျော်စရာ ဖြစ်နိုင်ပေမဲ့ အုပ်စုရဲ့ ဥက္ကဋ္ဌ တစ်ယောက်အနေနဲ့ကတော့ ဆက်ခံမယ့် ကိစ္စအတွက် မစိုးရိမ်ဘဲ မနေနိုင်ပါဘူး။

မူလကတော့ အွန်ဆောင်း အုပ်စုရဲ့ ဆက်ခံသူက အကြီးဆုံးသား ဟန်မင်းဂူပဲ။

စီမံခန့်ခွဲမှု စွမ်းရည် ကောင်းမွန်တဲ့ သားကြီး ဖြစ်တာကြောင့် သူပဲ အုပ်စုကို ဆက်ခံလိမ့်မယ်လို့ ထင်ခဲ့ကြတာ။ ဒါပေမဲ့ မျှော်လင့်မထားဘဲ ဥက္ကဋ္ဌ ဟန်ယောင်ဂျူက သူ့ရဲ့ နောက်ဆုံးနှစ်တွေမှာ ဟန်မင်းဂူ အစား စတုတ္ထမြောက်သား ဟန်အွန်ဂူကို ဆက်ခံသူအဖြစ် သတ်မှတ်လိုက်တယ်။

ဟန်မင်းဂူအတွက်ကတော့ ဒါက အရမ်းဒေါသထွက်စရာပဲ။

အုပ်စုတစ်ခုလုံးကို သူ့ညီလက်ထဲ အပါမခံနိုင်ဘူးလေ။ ဒါကြောင့် သူက တခြားမောင်နှမတွေတင်မကဘဲ သူ့ရဲ့ သစ္စာရှိ လက်ထောက်တွေကိုပါ စုစည်းပြီး သူ့ရဲ့ စတုတ္ထမြောက်ညီနဲ့ သူ့အဖေကိုပါ စီမံခန့်ခွဲမှုဆိုင်ရာ အငြင်းပွားမှုနဲ့ ပြန်တိုက်ခဲ့တယ်။

ရလဒ်အနေနဲ့ အင်ပါယာတစ်ခုလို ဖြစ်နေတဲ့ အွန်ဆောင်း အုပ်စုက တကွဲတပြား ဖြစ်သွားခဲ့တယ်။

အဲဒီအချိန်မှာ ဟန်မင်းဂူက အွန်ဆောင်း မော်တာကို ယူခဲ့တယ်၊ ဒုတိယသား ဟန်ဟျွန်ဂူက အွန်ဆောင်း ကုန်တိုက်ကို ယူတယ်၊ တတိယသား ဟန်ဆန်ဂူက အွန်ဆောင်း စက်မှုလုပ်ငန်းကို ယူတယ်၊ ပဉ္စမသား ဟန်ဂျောင်ဂူကတော့ အွန်ဆောင်း ရင်းနှီးမြုတ်နှံမှုကို ယူခဲ့တယ်။

ဟန်အွန်ဂူကတော့ အွန်ဆောင်း အုပ်စုရဲ့ ဥက္ကဋ္ဌ ရာထူးနဲ့ အဓိက လုပ်ငန်းခွဲဖြစ်တဲ့ အွန်ဆောင်း ဆောက်လုပ်ရေးကို မောင်နှမတွေကြားကနေ မနည်းရအောင်ယူပြီး ထိန်းထားနိုင်ခဲ့ပေမဲ့ ဒါက ဒဏ်ရာတွေနဲ့ ပြည့်နေတဲ့ အောင်မြင်မှုပါ။

အဲဒီနောက်ပိုင်းမှာ အွန်ဆောင်း ဆောက်လုပ်ရေးနဲ့ အွန်ဆောင်း အီလက်ထရောနစ်တို့က ဒေဝါလီခံရမယ့် အခြေအနေတွေ ကြုံလာရတာကြောင့် အွန်ဆောင်း အုပ်စုက ဆုတ်ယုတ်သွားခဲ့တယ်။ ဒါပေမဲ့ ဟန်မင်းဂူကတော့ သူ့ရဲ့ ထူးချွန်တဲ့ စီမံခန့်ခွဲမှု စွမ်းရည်တွေနဲ့ အွန်ဆောင်း မော်တာကို အရင် အွန်ဆောင်း အုပ်စုရဲ့ အထွတ်အထိပ် အချိန်တွေထက်တောင် ကျော်လွန်တဲ့ အုပ်စုတစ်ခုဖြစ်အောင် လုပ်နိုင်ခဲ့တယ်။

ဟန်ဂျောင်ဂူရဲ့ အကြောင်းကို ပြန်ပြောရရင် ၂၀၀၀ ပြည့်နှစ် အစောပိုင်း ခရက်ဒစ်ကတ် အကြပ်အတည်းတုန်းက အွန်ဆောင်း ရင်းနှီးမြုတ်နှံမှုက ဒေဝါလီခံရမယ့် အခြေအနေ ဖြစ်ခဲ့ပါတယ်။

အခြေအနေတွေ ဆိုးလာတော့ ဟန်ဂျောင်ဂူက ဟန်မင်းဂူဆီ အကူအညီ တောင်းခဲ့တယ်။ ဒါက အကူအညီ တောင်းတာထက် အသက်ရှင်ဖို့အတွက် အသည်းအသန် တောင်းပန်ခဲ့တာပါ။

ဥက္ကဋ္ဌ ဟန်မင်းဂူက အဲဒီတောင်းဆိုမှုကို လက်ခံခဲ့ပြီး အုပ်စုရဲ့ ရန်ပုံငွေတွေနဲ့ အွန်ဆောင်း ရင်းနှီးမြုတ်နှံမှုကို ဝယ်ယူခဲ့တယ်။ ဒါပေမဲ့ သူ့ညီရဲ့ စီမံခန့်ခွဲမှု စွမ်းရည်ကို သံသယရှိပုံရတာကြောင့် အွန်ဆောင်း ရင်းနှီးမြုတ်နှံမှုကို အွန်ဆောင်း ကတ်ကနေ ခွဲထုတ်လိုက်ပြီး ဟန်ဂျောင်ဂူကိုတော့ အွန်ဆောင်း ကတ်ကိုပဲ စီမံခန့်ခွဲဖို့ ပေးခဲ့တယ်။

ဟန်ဟျိုရင်က ဟန်မင်းဂူရဲ့ တူမဖြစ်သလို ဟန်ချန်ယောင်းရဲ့ ဝမ်းကွဲညီမလည်း ဖြစ်တယ်။

အိမ်ထောင်ရေးကတစ်ဆင့် ဆိုဆောင်း SB ကို အွန်ဆောင်း မော်တာဘက် ဆွဲခေါ်ဖို့ စီစဉ်နေတာလား။

ဒါပေမဲ့ အဲဒါတစ်ခုထဲနဲ့တော့ မလုံလောက်ဘူးလေ။

“သူတို့ လက်ထပ်ပြီးရင် ဆိုဆောင်း SB က သူ့ရဲ့ ရှယ်ယာတွေကို အွန်ဆောင်း မော်တာ အုပ်စုကို ပြန်ရောင်းလိမ့်မယ်။ အခု လောလောဆယ် ဆိုဆောင်း SB ရဲ့ စတော့ဈေးက အနိမ့်ဆုံး ရောက်နေတာဆိုတော့ ဝယ်ရတာက သိပ်ပြီး ဝန်ထုပ်ဝန်ပိုး မဖြစ်စေဘူးလေ”

သူပြောသလိုပဲ တစ်ချိန်က ဝမ် ၃၂၀,၀၀၀ အထိ တက်ခဲ့တဲ့ စတော့ဈေးက အခုဆိုရင် ဝမ် ၁၇၀,၀၀၀ အောက်မှာပဲ ရှိတော့တာပါ။ ဒါက လျှပ်စစ်ကား ဘတ္ထရီ ရောင်းအား အခက်အခဲတွေကြောင့်လည်း ပါတာပေါ့။

တရုတ်က သူတို့ရဲ့ ပြည်တွင်း ဘတ္ထရီ ထုတ်လုပ်သူတွေကို ထောက်ပံ့ဖို့အတွက် တောင်ကိုရီးယား ဘတ္ထရီ ကုမ္ပဏီတွေကို ထောက်ပံ့ကြေးပေးတဲ့ စာရင်းကနေ တမင် ဖယ်ထုတ်ထားခဲ့တယ်။

ဆိုဆောင်း SB က အွန်ဆောင်း မော်တာကို ဘတ္ထရီတွေ ထောက်ပံ့ပေးဖို့ ဖြစ်ပြီး နားလည်မှုစာချွန်လွှာ MOU တောင် ထိုးထားခဲ့တာပါ။ ဒါပေမဲ့ ဘာကြောင့်လဲ မသိဘဲ အွန်ဆောင်း မော်တာက နောက်ဆုံးမိနစ်မှာ ကျောခိုင်းသွားပြီး CL Chemical နဲ့ စာချုပ်ချုပ်လိုက်တယ်။

ဒါက ဆိုဆောင်း SB ရဲ့ စတော့ဈေးကို ချဖို့အတွက် ကြိုတင်ပြင်ဆင်ထားတဲ့ အစီအစဉ်များဖြစ်နေမလား။

“အခု ကုမ္ပဏီရဲ့ စတော့ဈေးက ဘယ်လောက်လဲ”

“၆.၃ ရာခိုင်နှုန်း”

ဒါက မင်္ဂလာဦး လက်ဆောင်လို ဖြစ်နေတာပဲ။

တက်ဂယူက ဇဝေဇဝါ ဖြစ်နေတဲ့ မျက်နှာနဲ့ မေးတယ်။

“ကုမ္ပဏီရဲ့ကိုယ်ပိုင် ရှယ်ယာတွေနဲ့ ကာကွယ်လို့ မရဘူးလား”

ဒါက အကြံကောင်းပဲ၊ ဒါပေမဲ့...

“ကိုယ်ပိုင် ရှယ်ယာတွေမှာ မဲပေးပိုင်ခွင့် မရှိဘူး”

ပြန်ဝယ်ထားတဲ့ ကုမ္ပဏီ ရှယ်ယာတွေကို မဲပေးတာနဲ့ အမြတ်ဝေစု ခွဲဝေတာတွေကနေ ဖယ်ထုတ်ထားတာပါ။

ဒုဥက္ကဋ္ဌ လင်ဂျင်ယုံက စိတ်ပျက်လက်ပျက် အမူအရာနဲ့ ပြောတယ်။

“အွန်ဆောင်း အုပ်စုက အရင်ဆုံး ကိုယ်ပိုင် ရှယ်ယာတွေကို အပိုင်စီးလိမ့်မယ်။ ပြီးတော့ ဈေးကွက်ထဲကနေ ဝယ်တာနဲ့ ရှယ်ယာအသစ်တွေ ထုတ်ဝေတာတွေကတစ်ဆင့် ဆိုဆောင်း SB မှာ သူတို့ရဲ့ ရှယ်ယာတွေကို တိုးအောင် လုပ်လိမ့်မယ်။ အားလုံး ပြီးသွားလို့ အမျိုးသား ပင်စင် ရန်ပုံငွေ အဖွဲ့က စပြီး ပြန်ရောင်းပြီဆိုရင်တော့ စတော့ဈေးက ပိုကျသွားမှာပဲ”

ဒါက အမျိုးသား ပင်စင် ရန်ပုံငွေ အဖွဲ့အတွက် အကြီးအကျယ် အရှုံးပေါ်စေမှာပါပဲ။ ဒါပေမဲ့ အရှုံးပေါ်မှာက ပြည်သူ့ပိုက်ဆံဆိုတော့ သူတို့အတွက် တကယ်ရော အရေးပါလို့လား။

ကျွန်တော့်ဘာသာ ကျွန်တော် တွေးနေမိတယ်။ ကိုယ်ရေးကိုယ်တာ ခံစားချက်တွေကို ဖယ်ထားရင်တောင် ဥက္ကဋ္ဌ ဟန်မင်းဂူရဲ့ စီမံခန့်ခွဲမှု စွမ်းရည်ကတော့ တကယ့်ကို အထင်ကြီးစရာပါပဲ။

ဒုဥက္ကဋ္ဌက ကျွန်တော့်ကို ကြည့်ပြီး ပြောတယ်။

“ငါ တောင်းဆိုချင်တာက OTK Company အနေနဲ့ ဆိုဆောင်း SB ရဲ့ ကိုယ်ပိုင် ရှယ်ယာတွေကို ဝယ်ပေးဖို့ပါ”

စီမံခန့်ခွဲမှု အခွင့်အရေးကို ကာကွယ်ဖို့အတွက် ကိုယ်ပိုင် ရှယ်ယာတွေကို တတိယအဖွဲ့အစည်းဆီ ရောင်းပြီး ထောက်ခံတဲ့ ရှယ်ယာရှင်တွေ ရအောင်လုပ်တာက သာမန် နည်းဗျူဟာ တစ်ခုပါပဲ။

ထင်ရှားတဲ့ ဥပမာ တစ်ခုကတော့ Dexon က LCSoft ရဲ့ စီမံခန့်ခွဲမှု အခွင့်အရေးကို ခြိမ်းခြောက်လာတုန်းက စီအီးအို ကင်ဂျင်တေးက Netmarble နဲ့ ကိုယ်ပိုင် ရှယ်ယာတွေ လဲလှယ်ခဲ့တာလေ။

“ခင်ဗျားက ကျွန်တော့်ကို White Knight အဖြစ် လုပ်ပေးဖို့ တောင်းဆိုနေတာလား”

“White Knightဟုတ်လား။ White Knightဆိုတာ ဘာကြီးတုန်း”

“အေး။ အမှန်ပဲ”

ရန်လိုတဲ့ သိမ်းပိုက်မှုတွေမှာ စီမံခန့်ခွဲမှုကို ကာကွယ်ပေးတဲ့ ရှယ်ယာရှင်တွေကို White Knight လို့ ခေါ်ပါတယ်။ ဆန့်ကျင်ဘက်ဘက်က ရှယ်ယာရှင်တွေကိုတော့ Black Knightလို့ ခေါ်တာပေါ့။

ကျွန်တော့်ရဲ့ ရှင်းပြချက်ကို ကြားတော့ တက်ဂယူက ခေါင်းညိတ်လိုက်တယ်။

“အို၊ တကယ်လား။ ငါကတော့ ဂန်ဒါဖ် အကြောင်း ပြောနေတာ ထင်လို့”

(ဂန်ဒါဖ်ဆိုတာက Lord of the ringsထဲက မှော်ဆရာအဖိုးကြီးရဲ့နာမည်ပါ)

“ဂန်ဒါဖ်က ဘယ်ကပါလာတာလဲ”

“အဲဒီ အဖိုးကြီးရဲ့ နာမည်ပြောင်က White Knight လေ။ သူက Middle-Earthမှာ ရန်လိုတဲ့ M&A လုပ်ဖို့ ကြိုးစားနေတဲ့ ဆော်ရွန်ကို ပြန်တိုက်ခဲ့တာကွ။ အဲဒါကြောင့် ဒီနာမည် ရတာ ဖြစ်မှာပေါ့”

“………”

တော်ပါတော့ကွာ။

ဒုဥက္ကဋ္ဌ လင်ဂျင်ယုံက ရယ်လိုက်တယ်။

“အဲ့ဒီဇာတ်လမ်းက ဂန္ထဝင်လက်ရာပဲ မဟုတ်လား။ ငါလည်း ကြိုက်ပါတယ်”

တကယ်တော့ ကျွန်တော်လည်း ကြိုက်ပါတယ်။

ဂဏန်းတွေကို ကျွန်တော်တွက်ချက်ကြည့်လိုက်တယ်။ ပေါင်းလိုက်၊ နှုတ်လိုက် လုပ်ပြီးနောက်မှာ အဖြေက ချက်ချင်း ထွက်လာတယ်။ လင်ဂျင်ယုံ စီမံနိုင်မယ့်ရှယ်ယာတွေကို ပေါင်းလိုက်ရင်တောင် ၂၃ ရာခိုင်နှုန်းပဲ ရှိပါတယ်။ အဲဒါက ဆန့်ကျင်ဘက် ရှယ်ယာ ၂၆.၆ ရာခိုင်နှုန်းထက် နည်းနေတုန်းပဲ။

“ဒီလောက်လေးနဲ့ ကာကွယ်ဖို့အတွက် မလုံလောက်သေးဘူး”

“ဒါကြောင့်လည်း ဈေးကွက်ထဲကနေ ထပ်ပြီး ဝယ်ယူပေးဖို့ တောင်းဆိုချင်တာပါ”

အနည်းဆုံး ၃.၆ ရာခိုင်နှုန်းလောက် ထပ်ဝယ်ဖို့ လိုပါတယ်။

လောလောဆယ် ဆိုဆောင်း SB ရဲ့ ဈေးကွက်တန်ဖိုးက ဝမ် သိန်းပေါင်း ၂၂ကုဋေရှိတယ်။

၁၀ ရာခိုင်နှုန်း ရှယ်ယာ ရဖို့ဆိုရင် ဝမ် သိန်းပေါင်း ၂ကုဋေယံကျော် သုံးရမှာပါ။

“ဆန့်ကျင်ဘက် ရှယ်ယာ ၂၆.၆ ရာခိုင်နှုန်းက အားလုံး မဟုတ်သေးဘူး။ သူတို့တွေဟာ တခြားရှယ်ယာတွေလည်း ရထားနိုင်တယ် မဟုတ်လား”

ဒုဥက္ကဋ္ဌ လင်ဂျင်ယုံက ခေါင်းညိတ်ပြီး သဘောတူတယ်။

“မှန်ပါတယ်”

ဆိုလိုတာက ဝမ် သိန်းပေါင်း ၂ကုဋေ သုံးလိုက်ရုံနဲ့ စီမံခန့်ခွဲမှု အခွင့်အရေးကို ကာကွယ်နိုင်ဖို့ မသေချာပါဘူး။ အခြေအနေသာ ဆိုးသွားရင် ကျွန်တော်တို့မှာ စတော့တွေပဲ ကျန်ခဲ့ပြီး ဘာမှ လုပ်ပိုင်ခွင့် ရှိမှာ မဟုတ်ဘူးလေ။

“ဒါကို ဘာလို့ ကျွန်တော်တို့ကို တောင်းဆိုတာလဲ”

“ငါ့ကို သစ္စာမဖောက်မယ့် မဟာမိတ်တွေ လိုအပ်လို့ပါ”

ဒုဥက္ကဋ္ဌ လင်ဂျင်ယုံက ကျွန်တော့်ကို ကြည့်ပြီး ပြောတယ်။

“ပြီးတော့ ဆိုဆောင်း အုပ်စုနဲ့ OTK Company က နောင်အနာဂတ်မှာ ပူးပေါင်းဆောင်ရွက်လို့ ရတာပဲ မဟုတ်လား”

ပူးပေါင်းဆောင်ရွက်မှု...

အဲဒီအချိန်မှာပဲ ကျွန်တော့်မျက်လုံးရှေ့မှာ ဟိုလိုဂရမ် တစ်ခု ပေါ်လာပါတော့တယ်။

-CarOS နဲ့ ဆိုဆောင်း SB ဘတ္ထရီ ပေါင်းစပ်မှု-