အခန်း ၆၄၁

အနာဂတ်ရဲ့ အစားပုပ်ကလေးကို ချုပ်ချယ်ခြင်း

အပိုင်း ၆၄၁

သေစမ်း! သူတို့ပတ်ဝန်းကျင်ရှိ လူများ၏ အကြည့်များမှာ အဓိပ္ပာယ်မျိုးစုံ ပါဝင်နေသည်!

သူတို့နေထိုင်ရာနေရာမှာ လုံခြုံရေးအဆင့်အတန်း မြင့်မားသည့် တရားဝင်ဧည့်ဂေဟာတစ်ခု ဖြစ်သော်လည်း ဤနေရာမှ အတင်းအဖျင်းလေထုမှာလည်း လျှော့တွက်၍မရကြောင်း သိသာလှသည်။

လမ်းလျှောက်လာသည့် ဝန်ထမ်းများဖြစ်စေ၊ ဤနေရာတွင် နေထိုင်သည့် ဂြိုဟ်သားများဖြစ်စေ ထိုစုံတွဲ အပြင်ထွက်လာသည်ကို မြင်လျှင် သူတို့၏မျက်လုံးများတွင် လှောင်ပြောင်လိုစိတ်များဖြင့် ပြည့်နှက်နေသည်။ "အလို... နောက်ဆုံးတော့ ကုတင်ပေါ်က ဆင်းဖို့ ဆုံးဖြတ်လိုက်ပြီလား" ဆိုသည့် အကြည့်မျိုးပင်။

ခက်ခဲစွာ တည်ငြိမ်အောင် ထိန်းထားရသည့် မော့ချူး၏ မျက်နှာမှာ တစ်ဖန် ပြန်လည်နီရဲလာပြန်သည်။ သူတို့ ရက်အတော်ကြာ အခန်းထဲ၌ အောင်းနေသည့်ကိစ္စမှာ လူအများ သိသွားကြပြီလား။ အရှက်ရစရာ အဆင့်အတန်းက ဒီလောက်တောင် မြင့်နေရလား။

မော့ချူးသည် ချက်ချင်းပင် အခန်းထဲသို့ ပြန်လှည့်ပြေးချင်စိတ်များ ပြင်းပြလာသည်။ သို့သော်လည်း တစ်နေကုန် စောင့်ဆိုင်းနေသည့် မဟူရာ သမုဒ္ဒရာ ဂလက်ဆီ အစိုးရအဖွဲ့မှ လူများက သူမကို ထိုသို့လုပ်ရန် အခွင့်အရေး မပေးခဲ့ပေ။

"မင်္ဂလာပါ"

ထိုသူနှစ်ဦး ပေါ်လာသည်ကို မြင်လျှင် တစ်ဖက်လူ၏ မျက်လုံးများမှာ ဝင်းခနဲ ဖြစ်သွားပြီး အလျင်အမြန် လျှောက်လာခဲ့သည်။

"ကျွန်တော်က အကြီးအကဲလင်းရဲ့ လက်ထောက်ပါ။ ကျွန်တော့်မျိုးရိုးက ချန် ပါ"

"အင်း"

တခြားသူများနှင့် ရင်ဆိုင်သည့်အခါ နျဉ်ယွိယွမ်သည် သူ၏ အေးစက်ခက်ထန်သော ပုံစံသို့ ချက်ချင်း ပြန်ရောက်သွားသည်။ သူ လိုရင်းကိုသာ မေးလိုက်သည်၊

"ဘာကိစ္စရှိလို့လဲ"

"သာမန်အပင်တွေအကြောင်းပါ"

ထိုအကြောင်းကို ပြောသည့်အခါ ထိုသူ၏မျက်လုံးများတွင် အံ့သြမှုများ အရိပ်ထင်သွားသည်။ သာမန်အပင်များ၏ အစွမ်းမှာ ဤမျှ ကောင်းမွန်လိမ့်မည်ဟု သူတို့ လုံးဝ မထင်ထားခဲ့ကြပေ!

"ရက်အနည်းငယ်အတွင်းမှာပဲ စိတ်ကူးယဉ်အပင်ရဲ့ လွှမ်းမိုးမှု နယ်ပယ်ကို ထိန်းချုပ်နိုင်ခဲ့ပါတယ်။ လှည့်စားမှုနယ်ပယ်ရဲ့ အတိုင်းအတာတောင် ကျုံ့ဝင်လာပါပြီ။ ဒါကြောင့် မဟူရာ သမုဒ္ဒရာ ဂလက်ဆီ အစိုးရကိုယ်စား ခင်ဗျားတို့ကို အထူးကျေးဇူးတင်ရှိကြောင်း ပြောကြားလိုပါတယ်"

ထိုသို့ပြောရင်း သူသည် သံလိုက်ကတ်ပြားအချို့ကို ကမ်းပေးလိုက်သည်။

"ဒီသံလိုက်ကတ်ပြားကို မဟူရာ သမုဒ္ဒရာ ဂလက်ဆီ တစ်ခုလုံးမှာ သုံးလို့ရပါတယ်။ အိမ်ဝယ်တာပဲဖြစ်ဖြစ်၊ ဈေးဝယ်တာပဲဖြစ်ဖြစ် ၃၀ ရာခိုင်နှုန်း ဒါမှမဟုတ် အဲဒီထက်ပိုတဲ့ လျှော့ဈေးတွေ ရပါလိမ့်မယ်။ ဒါက ကျွန်တော်တို့ဘက်က အနည်းငယ်သော ကျေးဇူးတုံ့ပြန်မှုလို့ မှတ်ယူပေးပါ"

...အို့ ဒါက အနည်းငယ်သော ကျေးဇူးတုံ့ပြန်မှုလား။ ဒါက အတော်လေး များပြားတဲ့ ပမာဏပဲ!

မော့ချူးသည် စိတ်ဝင်တစားဖြင့် မျက်ခုံးပင့်လိုက်ပြီး ထိုသူ၏လက်ထဲမှ သံလိုက်ကတ်ပြားကို ငုံ့ကြည့်လိုက်သည်။ သူမအနေဖြင့် ဒဏ္ဍာရီလာ 'စိန်ကတ်ပြား'ကို ပိုင်ဆိုင်ရလိမ့်မည်ဟု လုံးဝ မထင်ထားခဲ့ပေ! အမှန်တကယ်တော့ ၂၁ ရာစုတွင်လည်း ထိုကဲ့သို့သော ကတ်ပြားမျိုး ရှိခဲ့ဖူးသော်လည်း ကမ္ဘာပေါ်တွင် လူအနည်းငယ်သာ ပိုင်ဆိုင်နိုင်ကြသည်။

အများစုမှာ အာဏာရှိသည့် အင်အားစုကြီးများ သို့မဟုတ် ကုမ္ပဏီကြီးများသာ ဖြစ်ကြသည်။ မော့ချူးကဲ့သို့ သာမန်လူတစ်ယောက်အတွက်မူ မြင်ဖို့နေနေသာသာ ကြားဖူးနားဝရှိရုံသာ ရှိခဲ့သည်!

ထိုသူသည် လူကဲခတ် အလွန်တော်သည်။ မော့ချူး စိတ်ဝင်စားနေသည်ကို မြင်သည်နှင့် ထိုသံလိုက်ကတ်ပြားကို လက်နှစ်ဖက်ဖြင့် ကမ်းပေးလိုက်သည်။ နျဉ်ယွိယွမ်က အစက ယူရန် ရည်ရွယ်ချက်မရှိသော်လည်း မော့ချူး၏ ပုံစံကို မြင်သည့်အခါ ယူလိုက်တော့သည်။

"ဒီသာမန်အပင်က အဆင်ပြေနေပြီဆိုရင်တော့ ကျွန်တော်တို့ နောက်နှစ်ရက်နေရင် ပြန်တော့မယ်။ ကျွန်တော်တို့ရဲ့ ဆုံးဖြတ်ချက်ကို အဘိုးအိုလင်းကို ပြောပြပေးပါဦး"

"ဒါက..."

ထိုစကားကို ကြားသောအခါ ထိုသူက အနည်းငယ် မျက်မှောင်ကြုတ်သွားမိသည်။ သာမန်အပင်၏ အစွမ်းမှာ အလွန်ကောင်းမွန်နေသော်လည်း နောင်တွင် ပြဿနာမတက်စေရန် မဟူရာ သမုဒ္ဒရာ ဂလက်ဆီဘက်က သူတို့ကို နောက်ထပ် ရက်သတ္တပတ်ဝက်ခန့် ထပ်ထားရန် ရည်ရွယ်ထားသော်လည်း နျဉ်ယွိယွမ်တို့က ဤမျှအစောကြီး ပြန်ချင်လိမ့်မည်ဟု မထင်ထားခဲ့ပေ။

"မဟူရာ သမုဒ္ဒရာ ဂလက်ဆီအပြင် တခြား စောင့်နေတဲ့ ဂလက်ဆီတွေလည်း ရှိသေးတယ်!"

နျဉ်ယွိယွမ်က အသံလေးလေးဖြင့် သတိပေးလိုက်သည်။

ထိုသူသည် ခေတ္တမျှ တိတ်ဆိတ်သွားပြီးနောက် ပြောလိုက်သည်။"ဒါဆိုရင် ခဏလောက် စောင့်ပေးလို့ ရမလား။ ကျွန်တော် အကြီးအကဲလင်းကို အရင်ဆုံး ဆက်သွယ်လိုက်ပါဦးမယ်"

"ကောင်းပြီ"

နျဉ်ယွိယွမ်က ခေါင်းညိတ်ပြလိုက်သည်။ ထိုသူ ထွက်သွားပြီးနောက် သူသည် လက်ထဲရှိ သံလိုက်ကတ်ပြားအားလုံးကို မော့ချူးအား ပေးလိုက်ပြီး စနောက်လိုက်သည်။

"မင်း ဒါကို ဒီလောက်တောင် ကြိုက်နေတာလား"

နျဉ်ယွိယွမ်၏ အမြင်တွင် မဟူရာ သမုဒ္ဒရာ ဂလက်ဆီ အစိုးရ၏ လုပ်ရပ်မှာ ငါးအကြီးကြီးရရန် ငါးအသေးလေးဖြင့် မျှားခြင်းသာ ဖြစ်သည်။ နောက်ဆုံးတော့ တစ်ဂလက်ဆီလုံးတွင် သာမန်အပင်များကို ထုတ်လုပ်ပေးနိုင်သူမှာ မော့ချူးနှင့် ချန်ပိုင်တို့သာ ရှိသဖြင့် သူတို့ကို မျက်နှာသာပေးထားခြင်းမှာ သဘာဝကျလှသည်။

မော့ချူးက ၎င်းကို နှစ်သက်နေသဖြင့် နျဉ်ယွိယွမ်သည် သူမ၏ စိတ်အခြေအနေကို မပျက်စီးစေရန် ဘာမှ ထပ်မပြောတော့ပေ။

"ဒါပေါ့၊ စိတ်ဝင်စားတာပေါ့!"

မော့ချူးက ဂုဏ်ယူစွာ နှာခေါင်းရှုံ့လိုက်သည်။ ၎င်းမှာ သူမ၏ အဆင့်အတန်းကို ဖော်ပြနေသည် မဟုတ်ပါလား!

နျဉ်ယွိယွမ်သည် မော့ချူးလက်ထဲရှိ ကတ်ပြားများကို ကြည့်လိုက်သည်။

"စုစုပေါင်း ကတ်သုံးကတ်ရှိတယ်။ တစ်ကတ်က ချန်ပိုင်အတွက်၊ ကျန်တဲ့ နှစ်ကတ်ကတော့ မင်းနဲ့ ကိုယ့်အတွက် ဖြစ်မှာပဲ။ ကိုယ်ကတော့ မလိုဘူး၊ မင်းပဲ အကုန်ယူထားလိုက်တော့"

နျဉ်ယွိယွမ်က သူ၏ ကိုယ်ပိုင်ငွေများကို ကိုယ်တိုင်ကိုယ်ကျ အပ်နှံလိုက်သဖြင့် မော့ချူးမှာ အလွန်ကျေနပ်သွားသည်။ သူမသည် အလွန်ပျော်ရွှင်သွားပြီး လက်ထဲမှ သံလိုက်ကတ်ပြားကို ကစားနေမိသည်။ ကတ်ပြားမှာ အပြင်ပန်းကြည့်လျှင် အနက်ရောင်ဖြစ်ပြီး ထူးခြားမှုမရှိသော်လည်း အလင်းရောင်နှင့် ထိတွေ့သည့်အခါ တလက်လက် တောက်ပနေသည်။ ၎င်းကို အနီးကပ်ကြည့်လျှင် အလွယ်တကူ ကူးယူနိုင်သည့် အဆင့်နိမ့်ပစ္စည်းမဟုတ်ကြောင်း သိနိုင်သည်။

"ဒီသံလိုက်ကတ်ပြားတွေကို သီးသန့်ပစ္စည်းတွေနဲ့ လုပ်ထားတာ။ သာမန်လူတွေက ဒီလိုပစ္စည်းမျိုးကို မရနိုင်သလို ကူးယူဖို့လည်း မဖြစ်နိုင်ဘူး"

"အတွင်းထဲက သံလိုက်ဒေတာတွေက မဟူရာ သမုဒ္ဒရာ ဂလက်ဆီရဲ့ ဒေတာဘေ့စ်နဲ့ တိုက်ရိုက် ချိတ်ဆက်ထားတာ။ စစ်ဆေးတဲ့ အဆင့်ဆင့်ကလည်း အရမ်းရှုပ်ထွေးပြီး မြင့်မားတယ်"

နျဉ်ယွိယွမ်က မော့ချူး၏ အတွေးကို သိသည့်အလား ရှင်းပြလိုက်သည်။

"ဒါကြောင့် ဒါကို အောင်မြင်အောင် ကူးယူနိုင်ဖို့က လုံးဝ မဖြစ်နိုင်သလောက်ပဲ"

"ဟို..."

ထိုအချိန်တွင် ဖုန်းပြောပြီး ပြန်လာသည့် လက်ထောက်ဖြစ်သူမှာ နျဉ်ယွိယွမ်၏ စကားကို ကြားသွားသဖြင့် အနည်းငယ် မျက်နှာပျက်သွားသည်။ ဘာလဲ၊ ဗိုလ်မှူးကြီးနျဉ်က ဤကတ်ပြားများကို ကူးယူဖို့ စိတ်ဝင်စားနေတာလား။

"အဟမ်း... ဟိုလေ"

မော့ချူးသည် တစ်ဖက်လူ၏ အမူအရာကို သတိထားမိသဖြင့် စကားလမ်းကြောင်း လွှဲလိုက်သည်။

"အဘိုးအိုလင်းက ဘာပြောလဲ"

"အော်... အကြီးအကဲလင်းက လူတိုင်း ပြန်သွားရမယ့်အပေါ် စိတ်မကောင်းဖြစ်ရပေမဲ့ နားလည်ပေးနိုင်ပါတယ်တဲ့"

ထိုသူ၏ မျက်နှာမှာ ချက်ချင်း ပြန်တည်ကြည်သွားသည်။ "ဒါဆိုရင် ကျွန်တော်တို့ နှုတ်ဆက်ပွဲလေးတစ်ခု ပြင်ဆင်ပေးပါရစေ..."

"မလိုပါဘူး!" ပွဲအကြောင်း ပြောသည်နှင့် နျဉ်ယွိယွမ်က ချက်ချင်း ငြင်းဆိုလိုက်သည်။ တခြားအမျိုးသားများက မော့ချူး၏ စွဲမက်ဖွယ်ကောင်းသော အကကို ကြည့်ခဲ့ကြသည်ကို သတိရတိုင်း သူ စိတ်တိုနေမိသည်။ သူသည် ထိုကဲ့သို့သော အမှားမျိုးကို ထပ်၍အဖြစ်ခံမည်မဟုတ်ပေ။

"ကျွန်တော်တို့ နောက်နှစ်ရက်အတွင်း အထုတ်အပိုးပြင်ပြီး ချက်ချင်း ထွက်ခွာပါ့မယ်"

နျဉ်ယွိယွမ်၏ သဘောထားမှာ ခိုင်မာလှသဖြင့် ထိုသူလည်း ထပ်မပြောတော့ဘဲ ခေါင်းညိတ်လိုက်ရသည်။

"နောင်မှာ တစ်ခုခု လိုအပ်တာရှိရင် ကျွန်တော့်ဆီ တိုက်ရိုက် ဆက်သွယ်နိုင်ပါတယ်။ ဒါက ကျွန်တော့်ရဲ့ တာမီနယ်နံပါတ်ပါ"

"ကောင်းပြီ"

နျဉ်ယွိယွမ်က ခေါင်းညိတ်ပြီး ထိုနံပါတ်ကို ကြည့်လိုက်သည်။ သူက ပွဲမတက်ချင်သော်လည်း အနီရောင်ဖျော်ရည် ပုလင်းအချို့ကိုတော့ ပြန်သယ်သွားချင်နေသေးသည်။ နောက်ဆုံးတော့ မော့ချူး၏ စိတ်လှုပ်ရှားဖွယ် ပုံစံလေးမှာ အတော်လေး စိတ်ဝင်စားစရာ ကောင်းသည် မဟုတ်ပါလား...။

မော့ချူးကမူ နျဉ်ယွိယွမ် ဘာတွေးနေသည်ကို မသိဘဲ ဤသံလိုက်ကတ် သုံးကတ်ကို မည်သို့ ခွဲဝေရမလဲဟုသာ စဉ်းစားနေသည်! သူမနှင့် နျဉ်ယွိယွမ်မှာ တစ်ကတ်တည်း အတူတူ သုံးလျှင်ပင် ရသည်။ ကျန်တစ်ကတ်ကို သိမ်းထားရုံနှင့် နှမြောစရာ ကောင်းနေသည်။

မော့ချူး စဉ်းစားနေစဉ် အလှမ်းမဝေးသော နေရာမှ လျှောက်လာသည့် ကျိုးလင်နှင့် ကျုံးဝမ်တို့ကို မြင်လိုက်ရသည့်အခါ သူမ၏ မျက်လုံးများ ဝင်းခနဲ ဖြစ်သွားသည်! ဤသူနှစ်ဦးသည် နျဉ်ယွိယွမ်နောက်သို့ လိုက်နေသည်မှာ ကြာပြီ ဖြစ်ရာ သူတို့ကို ဆုလာဘ်အဖြစ် ဘာလို့ မပေးရမည်နည်း။

မော့ချူးသည် ကတ်များကို သိမ်းလိုက်ပြီးနောက် သူတို့ကို လက်ဝှေ့ယမ်းပြလိုက်သည်။ "မြန်မြန်လာ၊ ရှင်တို့အတွက် ဝေမျှစရာ အကောင်းလေးတွေ ရှိတယ်!"

'အကောင်း' ဟု ကြားသည်နှင့် ကျိုးလင်မှာ စိတ်လှုပ်ရှားသွားပြီး အမြန် လျှောက်လာသည်။ ကျုံးဝမ်ကမူ ပုံမှန်အတိုင်းသာ လျှောက်လာခဲ့သည်။

"အော်... နှစ်ယောက်လုံး... နောက်ဆုံးတော့ အပြင်ထွက်လာဖို့ ဆုံးဖြတ်လိုက်ပြီလား"

ကျိုးလင်မှာ စနောက်တတ်သော အမူအရာအတိုင်း သူတို့နှစ်ဦးကို ကြည့်ကာ နှုတ်ခမ်း၌ မဲ့ပြုံးတစ်ခုဖြင့် မေးလိုက်သည်။

မော့ချူး၏ နှုတ်ခမ်းများ အနည်းငယ် တွန့်သွားသည်။ မျှော်လင့်ထားသည့်အတိုင်းပင် လူပျိုကြီးဖြစ်နေသည်မှာ ကြာပြီဖြစ်သော ဤလူ၏ ခေါင်းထဲတွင် တခြားအရာများ မရှိနိုင်ပေ!

"ကြည့်ပါဦး၊ ညီမလေးရဲ့ မျက်နှာက နည်းနည်း ဖြူဖျော့နေသလိုပဲ။ အကြီးအကဲ ကတော့ အတူတူပဲ၊ ဘာမှ ဂရုမစိုက်ဘူး!"

ကျိုးလင်၏ စကားမှာ စလိုက်သည်နှင့် ရပ်တန့်ရန် ခက်လှသည်။ သူက ဘေးရှိ ကျုံးဝမ်ကိုပါ စကားထဲ ဆွဲသွင်းလိုက်သည်၊

"ကြည့်ရတာ သူမက အားဆေးတွေ ပိုလိုနေသလိုပဲ! ကျုံးဝမ်၊ မော့ချူးအတွက် အားဆေးလေး ဘာလေး လိုမလားဆိုတာ ကြည့်ပေးပါဦး"

"မင်းပြောချင်တာက... ငါက မော့ချူးကို အားနည်းအောင် လုပ်တယ်လို့လား"

နျဉ်ယွိယွမ်က အေးအေးဆေးဆေးပင် မေးလိုက်သည်။ နျဉ်ယွိယွမ်၏ လေသံမှာ တည်ငြိမ်နေသော်လည်း ကျိုးလင်ကမူ "ဟုတ်ပါတယ်" ဟု ပြောဝံ့ပါမည်လား။ သူ၏ အကြီးအကဲ အကြောင်းကို သူ သိသည်။ သူ၏ စည်းကို ကျော်လာလျှင် ဘာမဆို လုပ်တတ်သူ မဟုတ်ပါလား!

ထို့ကြောင့် ကျိုးလင်မှာ အူကြောင်ကြောင်ဖြင့် ရယ်မောကာ စကားကို အမြန် ပြောင်းလိုက်သည်၊

"ဒါက မော့ချူးရဲ့ ကိုယ်ခံအားက သိပ်မကောင်းလို့ ဖြစ်မှာပါ။ အကြီးအကဲနဲ့ ဘာဆိုင်မှာလဲ"

'ဟင်း! သူက အခြေအနေကို ကြည့်ပြီး မျက်နှာပြောင်းတာ မြန်လှချည်လား!'

မော့ချူးသည် သူတို့ကို မျက်စောင်းထိုးလိုက်ပြီး လက်ထဲမှ သံလိုက်ကတ်ပြားကို ဝှေ့ယမ်းပြလိုက်သည်။

"ကျွန်မကတော့ ရှင်တို့ကို ပေးဖို့ ရည်ရွယ်ထားတာ။ အခုတော့ ကျွန်မရဲ့ ကိုယ်ခံအားက မကောင်းဘူးဆိုတော့ မပေးတော့ဘူး၊ ကိုယ့်ဘာသာပဲ သိမ်းထားလိုက်တော့မယ်!"

သေစမ်း! ဒါက...

မော့ချူး လက်ထဲရှိ သံလိုက်ကတ်ပြားကို မြင်လိုက်ရသည့်အခါ ကျိုးလင်၏ မျက်လုံးများမှာ ဝင်းခနဲ ဖြစ်သွားသည်! မရီးက တကယ်ကို ရက်ရောတာပဲ! ရာထူးတက်တာ မကြာသေးခင်မှာပဲ သူတို့ကို ဤမျှ ကောင်းမွန်သော ဆုလာဘ်တွေ ပေးနေပြီလား။ သူ တကယ်ကို ဝမ်းသာမိသည်!

"မရီး၊ ခုနက မြူတွေဆိုင်းနေလို့ ကျွန်တော် အမှားမြင်သွားတာပါ။"

ကျိုးလင်က အတည်ပေါက်ဖြင့် ပြောလိုက်သည်။

"ညီမလေးရဲ့ မျက်နှာက ပန်းရောင်သန်းနေတာပဲ၊ ကိုယ်ခံအားက ဘယ်လိုလုပ် မကောင်းရမှာလဲ"

မော့ချူးမှာ ဘာမှပင် မပြောနိုင်တော့ပေ။ ကျိုးလင်၏ မျက်နှာပြောင်တိုက်မှုမှာ နျဉ်ယွိယွမ်နှင့် တစ်တန်းတည်း ဖြစ်လိမ့်မည်ဟု သူမ မထင်ထားခဲ့ပေ! တကယ့်ကို 'အကျင့်တူသူများ စုဝေးခြင်း' ပင် မဟုတ်ပါလား။