အခန်း ၆၂၁

အခန်း (၆၂၁) ရက်စက်လှသော တာအိုသမီးတော်နှင့် စုဆောင်းမိသော ကုန်ကြမ်းများ အပိုင်း (၂)

“တာအိုသမီးတော်နဲ့ တွေ့ဆုံဖို့ နောက်ထပ် အခွင့်အရေးတစ်ခုကို စောင့်ဆိုင်းတာက ခင်ဗျားအတွက် ပိုပြီး ပညာရှိရာ ရောက်ပါလိမ့်မယ်... ခင်ဗျားတို့ ကျိမိသားစုရဲ့ မကြာသေးခင်က လုပ်ရပ်တွေကို ထည့်တွက်ရင်... အခုအချိန်မှာ တာအိုသမီးတော်ရဲ့ ရှေ့မှောက်ကို သွားတာက သူ့ရဲ့ စက်ဆုပ်ရွံရှာမှုကို ပိုပြီး တိုးပွားစေရုံပဲ ရှိလိမ့်မယ်...”

ချန်ကျိုးတောက်၏ စကားကြောင့် ကျိရုစုန်း၏ မျက်နှာမှာ အနည်းငယ် ပျက်ယွင်းသွားသော်လည်း သူသည် ထိုအကြံဉာဏ်ကိုပင် လိုက်နာရန် ဆုံးဖြတ်လိုက်သည်။

ဤအခိုက်အတန့်တွင် ကျိရုစုန်း၏ ရင်ထဲ၌ နောင်တတရားတို့ တနုံ့နုံ့ ဖြစ်ပေါ်နေ၏။ ဖန်ရှောင်၏ လုပ်ရပ်များမှာ သူ ထင်မှတ်ထားသည်ထက် များစွာ ပို၍ မြန်ဆန်ကာ ရက်စက် ကြမ်းကြုတ်လှသည်။ ချောင်မိသားစုနှင့် လန်မိသားစုတို့ကို မျက်စိတစ်မှိတ်အတွင်း အမြစ်ပြတ် သုတ်သင်ပစ်လိုက်ခြင်းက သူ့ကို များစွာ တုန်လှုပ်သွားစေခဲ့၏။

ဘာပဲပြောပြော ဖန်ရှောင်သည် အမြုတေ ဖွဲ့စည်းခြင်း အဆင့် ကျင့်ကြံသူ တစ်ဦးမျှသာ မဟုတ်ပါလော။ သို့သော်လည်း ထိုမိသားစုကြီး နှစ်ခုကို ချေမှုန်းလိုက်နိုင်ခြင်း၏ နောက်ကွယ်တွင် ကြောက်မက်ဖွယ်ကောင်းလှသော အနက်အဓိပ္ပာယ်များ ကိန်းအောင်းနေသည်။ ဤသည်မှာ တာအိုသမီးတော် တစ်ဦးတည်း၏ ဆန္ဒသာ မဟုတ်ဘဲ... မြေကမ္ဘာအင်မော်တယ် နန်းတော်၏ တိုက်ရိုက် အလိုတော်ပင် ဖြစ်နိုင်သည်။

ထိုအချက်ကို တွေးမိလေလေ ကျိရုစုန်း တစ်ယောက် ပို၍ ထိတ်လန့်လေလေ ဖြစ်နေတော့၏။

“ငါ အခြေအနေတွေကို အမြန်ဆုံး ဖြေရှင်းမှ ဖြစ်မယ်... ဖန်ရှောင်ဆီကနေ ခွင့်လွှတ်မှုကို မရရအောင် တောင်းရမယ်... မဟုတ်ရင်တော့ ငါ့ရဲ့ ကျိမိသားစုလည်း ကံဆိုးမိုးမှောင် ကျတော့မှာပဲ...”

ကျိရုစုန်းသည် လေအေးတစ်ချက်ကို ပြင်းထန်စွာ ရှူသွင်းလိုက်မိ၏။ သူ၏ မျက်နှာတွင် ဖုံးကွယ်၍ မရနိုင်သော ကြောက်ရွံ့ ထိတ်လန့်မှုများ အထင်းသား ပေါ်လွင်နေသည်။

ကံကောင်းထောက်မစွာဖြင့် ကျိမိသားစုသည် ယခင်က အမိန့်ကို အနည်းငယ်သာ စမ်းသပ်ခဲ့ခြင်း ဖြစ်ပြီး အပေါ်ယံတွင်မူ နာခံဟန် ပြခဲ့သောကြောင့်သာ... ။ မဟုတ်ပါက ယခုတစ်ကြိမ်တွင် သူတို့လည်း မြေပုံပေါ်မှ ပျောက်ကွယ်သွားလောက်၏။

ဖန်ရှောင်၏ လျင်မြန် ပြတ်သားလှသော နှိမ်နင်းမှု သတင်းမှာ ဟေးယွီ အင်မော်တယ် မြို့တော် တစ်ဝိုက်တွင် ငလျင်လှုပ်လိုက်သကဲ့သို့ တုန်ခါသွားစေခဲ့၏။ ကျိမိသားစုသည်လည်း သူတို့၏ လက်အောက်ခံ ချင်မိသားစုကို ချက်ချင်းပင် ရှင်းလင်းပစ်လိုက်တော့သည်။

အခြားသော အင်အားစုများနှင့် အဖွဲ့အစည်းများမှာလည်း ဖန်ရှောင်၏ အမိန့်ကို ကြားသည်နှင့်တစ်ပြိုင်နက်... အမြုတေ ဖွဲ့စည်းခြင်း အဆင့်ရှိသော မာန်တက်နေသူ မှန်သမျှကို အမြန်ဆုံး သုတ်သင် ရှင်းလင်းလိုက်ကြသဖြင့်... ဟေးယွီ အင်မော်တယ် မြို့တော်၏ မငြိမ်မသက်မှုများမှာ မျက်စိတစ်မှိတ်အတွင်း ငြိမ်သက်သွားခဲ့ရသည်။

*

ဟေးယွီ အင်မော်တယ် စံအိမ်တော်ဝယ်..

ကျန်းဝမ်၊ ချန်ကျိုးတောက် နှင့် ပိုင်ချွမ် တို့သည် ဖန်ရှောင်၏ ရှေ့မှောက်တွင် တစ်ဦးပြီးတစ်ဦး အခြေအနေများကို တင်ပြနေကြ၏။ သူတို့၏ တင်ပြချက်များအရ အမိန့်ကို ဖီဆန်ခဲ့သော အင်အားစု အားလုံးမှာ ရှင်းလင်းခြင်း ခံလိုက်ရပြီ ဖြစ်သည်။

ဖန်ရှောင်၏ အမိန့်တော်မှာ အမှန်တကယ်ပင် အောင်မြင်စွာ အကောင်အထည် ဖော်နိုင်ခဲ့၏။ ဟေးယွီ အင်မော်တယ် မြို့တော်၏ စည်းစနစ်ကို ဖျက်ဆီးသူ မှန်သမျှမှာ ညှာတာခြင်း မရှိဘဲ အသတ်ခံလိုက်ရ၏။ ၎င်းတို့ အားလုံးမှာ ချွင်းချက်မရှိ ယမမင်းထံသို့ အပို့ခံလိုက်ရပြီ ဖြစ်သည်။

သွေးသံရဲရဲ ဤနှိမ်နင်းမှုကြီး ပြီးဆုံးသွားပြီးနောက်... ယခင်က ဖန်ရှောင်အား မည်သည့် သတင်းမျှ တင်ပြခြင်း မရှိခဲ့သော ကျန်းဝမ်မှာ ယခုအခါတွင်မူ အလွန်တရာ ရိုသေလေးစားသော စီမံခန့်ခွဲသူ တစ်ဦးပမာ မြို့တော်၏ သတင်း အချက်အလက် အားလုံးကို သူမထံသို့ တက်ကြွစွာ တင်ပြလာတော့၏။

မာန်တက်ခဲ့သော ချန်ကျိုးတောက်မှာလည်း ယခုအခါတွင်မူ မိမိကိုယ်ကို နှိမ့်ချကာ ဖန်ရှောင်၏ ရှေ့တွင် ခေါင်းငုံ့၍ ရပ်နေရ၏။ ပိုင်ချွမ်၏ အကြည့်များတွင်လည်း ဖန်ရှောင်အပေါ် ရိုသေလေးစားမှုနှင့်အတူ ကြောက်ရွံ့မှုများပါ ရောယှက် ကိန်းအောင်းနေတော့သည်။

ဖန်ရှောင်သည် ဤအပြောင်းအလဲများ အားလုံးကို ကိုယ်တိုင် မြင်တွေ့လိုက်ရ၏။

ခြံဝင်းငယ်လေး အတွင်း၌မူ..

ဖန်ရှောင်သည် စုယွီထံသို့ တစ်ဦးတည်း လာတွေ့သည်။

သူမသည် စုယွီကို ဝမ်းသာအားရ ကြည့်ရင်း ဖားယားသော လေသံဖြင့် ဆိုလိုက်၏။

“ဦးလေးငယ်... ဦးလေးငယ် ပြောတာ တကယ် မှန်တာပဲနော်... အရင်ကတော့ ဒီလူတွေက အပြင်ပန်းမှာပဲ နာခံချင်ယောင် ဆောင်နေကြတာ... အခုကျတော့ တကယ့်ကို လိမ္မာသွားကြပြီ... ကျိမိသားစုဆိုရင်လည်း သူတို့ရဲ့ လက်အောက်ခံ ချင်မိသားစုကို ကိုယ်တိုင်တောင် ရှင်းပစ်လိုက်ကြတယ်...”

သို့သော်လည်း စုယွီမှာမူ ထူးထူးခြားခြား အံ့အားသင့်ခြင်း မရှိပါချေ။

အုပ်ချုပ်သူ၏ နယ်မြေအတွင်း၌ အင်မော်တယ် တမန်တော် တစ်ဦးကို မည်သူက စော်ကားရဲပါမည်နည်း။ ထိုသို့ လုပ်ဆောင်ခြင်းမှာ သေတွင်းတူးခြင်းမျှသာ ဖြစ်သည်။

သို့ရာတွင် ဤသည်မှာ ပထမဆုံး ခြေလှမ်းမျှသာ ရှိသေး၏။

ထို့ကြောင့် စုယွီက သူမကို ကြည့်ကာ ဆိုလိုက်သည်။

“ဒါက အစပဲ ရှိသေးတာ... ချောင်မိသားစုနဲ့ လန်မိသားစုကို သုံးပြီး မင်းရဲ့ အာဏာစက်ကို တည်ဆောက်လိုက်နိုင်ပေမယ့်... အဲဒီ အရှိန်အဝါက ကြာရှည် ခံမှာ မဟုတ်ဘူး...”

ဖန်ရှောင်က ခေတ္တမျှ စဉ်းစားပြီးနောက် မေးမြန်းလိုက်၏။

“ဦးလေးငယ်... ဒါဆိုရင် အဲဒီ အာဏာစက်ကို ပိုပြီး ခိုင်မာအောင် လုပ်ဖို့ လိုအပ်တယ်လို့ ပြောချင်တာလား...”

စုယွီက ခေါင်းညိတ်ပြလိုက်သော်လည်း မည်သို့ လုပ်ဆောင်ရမည်ကိုမူ ရှင်းမပြချေ။

သူမကိုသာ သေချာ စဉ်းစားခိုင်းလိုက်ပြီး အဖြေထွက်လာမှသာ လက်တွေ့ လုပ်ဆောင်ရန် မှာကြားလိုက်၏။ အစကောင်းခဲ့ပြီ ဖြစ်ရာ ကျန်ရှိသော ကိစ္စရပ်များမှာ ကြီးမားသော ပြဿနာ မရှိနိုင်တော့ပါချေ။

အကယ်၍ ဖန်ရှောင် အမှားအယွင်း တစ်ခုခု လုပ်မိခဲ့လျှင်ပင် ပြန်လည် ပြုပြင်ရန် အခွင့်အရေး ရှိနေသေးသည် မဟုတ်ပါလော။ စုယွီသည် အပြင်ကိစ္စများကို စိတ်မဝင်စားတော့ဘဲ ကောင်းကင်မိုးကြိုး ကြွက်အုပ်စုကိုသာ ဟေးယွီ အင်မော်တယ် မြို့တော်၏ အရပ်ရပ်ကို မျက်ခြေမပြတ် စောင့်ကြည့်ရန် အမိန့်ပေးလိုက်၏။ တစ်စုံတစ်ရာ ဖြစ်ပျက်လာပါက သူ ချက်ချင်း တုံ့ပြန်နိုင်ရန် ဖြစ်သည်။

မြေအောက် လျှို့ဝှက်ခန်းအတွင်း၌။

စုယွီသည် ‘အိုမင်းခြင်း ကင်းမဲ့သော အခင်းအကျင်း’ တစ်ခုကို တည်ဆောက်လိုက်ရာ... သူ၏ ပတ်ဝန်းကျင်ရှိ အချိန် စီးဆင်းမှုမှာ ရုတ်ချည်း ပြောင်းလဲသွားတော့၏။ သူ၏ သက်တမ်းမှာ ပြင်ပထက် ထက်ဝက်ခန့် ပိုမို နှေးကွေးစွာ ကုန်ဆုံးနေပြီ ဖြစ်ရာ... သူသည် ပြင်ပထက် အချိန် နှစ်ဆ ပိုမို ရရှိသွားခဲ့၏။

ထိုအခင်းအကျင်း အတွင်း၌ ထိုင်ရင်း စုယွီသည် ရွှေပုစဉ်းရင်ကွဲ ကျင့်စဉ်ကို နှိုးဆော်လိုက်ကာ သူ၏ စိတ်အာရုံကို သန့်စင်စေလိုက်သည်။ သူသည် ရေဓာတ် သဘာဝရှိသော မူလဝိညာဉ် အဆင့် ကျင့်စဉ် တစ်ခုကို စူးစမ်း လေ့လာနေပြီး... ၎င်းကို အခြေခံ ငါးပါး ကျင့်စဉ်အတွင်းသို့ ပေါင်းစပ် ထည့်သွင်းရန် ကြိုးပမ်းနေလေသည်။ ထိုသို့ဖြင့် ကျင့်စဉ်၏ စွမ်းအားနှင့် နက်နဲမှုကို မြှင့်တင်ရန် ဖြစ်၏။

သို့သော်လည်း အမြုတေ ဖွဲ့စည်းခြင်း အဆင့်ရှိ ကျင့်စဉ်များနှင့် နှိုင်းယှဉ်ပါက မူလဝိညာဉ် အဆင့်ရှိ ကျင့်စဉ်များမှာ များစွာ ပိုမို ရှုပ်ထွေး နက်နဲလှသည်။ ၎င်းတို့ကို အခြေခံ ငါးပါး ကျင့်စဉ်အတွင်း ပေါင်းစပ်ရန်အတွက် သူသည် မရေမတွက်နိုင်သော ပဋိပက္ခများနှင့် အမှားအယွင်းများကို ဖြေရှင်းခဲ့ရ၏။

ဤသို့ဖြင့် နှစ်ဝက်ခန့် အချိန်ကာလ ကုန်လွန်သွားခဲ့သည်။

စုယွီသည် ရေဓာတ် သဘာဝရှိသော မူလဝိညာဉ် အဆင့် ကျင့်စဉ်ကို အခြေခံ ငါးပါး ကျင့်စဉ်အတွင်းသို့ အောင်မြင်စွာ ပေါင်းစပ်နိုင်ခဲ့ပြီး ၎င်း၏ စွမ်းအားကို အနည်းငယ် မြှင့်တင်နိုင်ခဲ့၏။ အင်မော်တယ် စံအိမ်တော်တွင် မူလဝိညာဉ် အဆင့်ရှိ ကျင့်စဉ်ပေါင်း (၂၀၀) ကျော် ရှိနေသည်။

အကယ်၍ ထိုကျင့်စဉ်များ၏ ထက်ဝက်ခန့်ကိုသာ အခြေခံ ငါးပါး ကျင့်စဉ်အတွင်း ပေါင်းစပ်နိုင်ခဲ့မည် ဆိုလျှင်... ၎င်းသည် မူလဝိညာဉ် အဆင့်၌ ‘ပြိုင်ဘက်ကင်း’ ကျင့်စဉ် တစ်ခုအဖြစ်သို့ အသွင်ပြောင်းလဲသွားပေလိမ့်မည်။ ဤသည်မှာ ကြီးမားလှသော လုပ်ငန်းစဉ်ကြီး တစ်ရပ် ဖြစ်သော်လည်း စုယွီကမူ ဇွဲမလျှော့ဘဲ တစ်ဆင့်ချင်းစီ တိုးတက်အောင် လုပ်ဆောင်ရန် ဆုံးဖြတ်ထား၏။

ကျင့်စဉ် တစ်ခုကို ပေါင်းစပ်ပြီးနောက်တွင် စုယွီသည် အရှင်သခင်ဆယ်ပါး အင်မော်တယ် မြို့တော်ရှိ ဆေးလုံးစံအိမ် အတွက် လိုအပ်သော တတိယအဆင့် အဆင့်မြင့် ဝိညာဉ်ဆေးလုံးများကို ဖော်စပ်ရန် အချိန်ပေးလိုက်သည်။ အချိန်နှေးကွေးစေသော အခင်းအကျင်း၏ စွမ်းအားဖြင့် သူသည် တစ်နေ့လျှင် ဆေးမီးဖို (၁၅) ဖိုခန့်ကို ဖော်စပ်နိုင်ပြီး ဆေးလုံးပေါင်း (၆၅) လုံးကျော် ထွက်ရှိ၏။

ဤနည်းဖြင့် သုံးလအတွင်းမှာပင် စုယွီသည် ဆေးလုံးစံအိမ် အတွက် လုံလောက်သော ဆေးလုံး အရေအတွက်ကို စုဆောင်းနိုင်ခဲ့၏။

ကျန်ရှိသော အားလပ်ချိန်များတွင်မူ စုယွီသည် စတုတ္ထအဆင့် အဆင့်နိမ့် ဝိညာဉ်ဆေးလုံး အသစ်များ၊ လက်ဖွဲ့များ၊ အခင်းအကျင်းများနှင့် ရုပ်သေးများ ဖန်တီးခြင်းတွင် အချိန်ခွဲဝေ အသုံးပြုကာ သူ၏ ကျွမ်းကျင်မှုများကို တစ်စထက်တစ်စ မြှင့်တင်နေခဲ့သည်။

သူ၏ နေ့ရက်များမှာ အလုပ်များပြားလှသော်လည်း ပျော်ရွှင်စရာ ကောင်းလှသည်။ နေ့စဉ်နေ့တိုင်း သူ၏ တိုးတက်မှုများကို ရှင်းလင်းစွာ မြင်တွေ့နေရသည် မဟုတ်ပါလော။ သူ၏ ကျင့်ကြံခြင်း အခြေခံ၊ စွမ်းအားနှင့်တကွ ကျွမ်းကျင်မှု ပညာရပ် လေးမျိုးစလုံးမှာ တစိုက်မတ်မတ် တိုးတက်နေခဲ့၏။

တစ်နှစ် ကုန်လွန်သွားပြီးနောက် စုယွီသည် ဟေးယွီ အင်မော်တယ် မြို့တော်မှ ထွက်ခွာလာခဲ့ပြီး အရှင်သခင်ဆယ်ပါး အင်မော်တယ် မြို့တော်သို့ နေရာရွှေ့ပြောင်းကာ... သူ၏ ရုပ်သွင်ကို ‘တာအိုဆရာ အရိပ်နီ’ အဖြစ် ပြောင်းလဲ၍ မှောင်ခိုဈေးရှိ ဆေးလုံးစံအိမ်သို့ ပြန်လည် ရောက်ရှိလာခဲ့တော့၏။