အခန်း ၆၂၅

အခန်း (၆၂၅) စတုတ္ထအဆင့် အဆင့်နိမ့် ထိုက်ရွှီနှင့် ကြယ်ခူး မျှော်စင်ရှိ ဖြစ်ရပ် အပိုင်း (၃)

မြားတစ်စင်းအလား တရွေ့ရွေ့ ကုန်လွန်နေသော အချိန်ကာလများအတွင်း... တစ်နှစ်ပင် မပြည့်မီသော အချိန်၌ စုယွီသည် အခြားသော မူလဝိညာဉ် အဆင့် ကျင့်စဉ်တစ်ခုကို ဓာတ်ကြီးငါးပါး ကျင့်စဉ်အတွင်းသို့ ထပ်မံ ပေါင်းစပ်နိုင်ခဲ့၏။

ထူးကဲလှသော ဝိညာဉ်အရည်နှင့် အချိန်နှေးကွေးစေသော အခင်းအကျင်း၏ စွမ်းအားကို အသုံးပြု၍ နေ့စဉ် ကျင့်ကြံနေခဲ့ရာ... သူ၏ ကျင့်ကြံခြင်း အရှိန်အဟုန်မှာ ယခင်ကထက် (၃၀) ရာခိုင်နှုန်းခန့် ပိုမို မြန်ဆန်လာခဲ့ပါ၏။

ထိုစဉ်အတွင်း ကျန်းဝမ်သည် စုယွီထံသို့ ကိုယ်တိုင်ကိုယ်ကျ လာရောက် တွေ့ဆုံခဲ့ပြီး... ချောင်ဝမ်ရှန်းမှာ ရောဂါဝေဒနာ ခံစားရပြီးနောက် ကွယ်လွန်သွားခဲ့ပြီ ဖြစ်ကြောင်း သတင်းစကား ပါးလာ၏။ ချောင်ဝမ်ရှန်း မရှိတော့သည်နှင့်အမျှ ချောင်မိသားစု၏ ဩဇာအာဏာမှာလည်း မှေးမှိန် ပျောက်ကွယ်သွားသည်။

ဖန်ရှောင်သည် ချောင်မိသားစုနှင့် လန်မိသားစုတို့ကို အသုံးချ၍ သူမ၏ အာဏာစက်ကို တည်ထောင်ခဲ့သည့် အချိန်ကာလမှာလည်း အပြီးတိုင် ကျော်လွန်သွားခဲ့လေပြီ။ ဖန်ရှောင်သည် အဆက်အသွယ်များ ပြုလုပ်ခြင်း၊ ဖိနှိပ်ခြင်းနှင့် သိမ်းသွင်းခြင်း နည်းလမ်းမျိုးစုံကို အသုံးပြုကာ ဟေးယွီ အင်မော်တယ် မြို့တော်၏ အခြေအနေ အရပ်ရပ်ကို အပြည့်အဝ ထိန်းချုပ်နိုင်ခဲ့၏။

ကျိမိသားစုသည် ယွီလုံ နန်းတော်မှ မူလဝိညာဉ် တတိယအဆင့်ရှိ အရှင်သခင် တစ်ပါးကို ဖမ်းဆီး၍ ဖန်ရှောင်ထံ အပ်နှံခဲ့ပြီးနောက်မှသာ သူမ၏ ဘက်တော်သားအဖြစ် ရပ်တည်ခွင့် ရရှိခဲ့သည်။

နောက်ထပ် ခြေလှမ်းအနေဖြင့် ဖန်ရှောင်သည် ဟေးယွီ အင်မော်တယ် မြို့တော် နယ်မြေအတွင်းရှိ ဓားပြကျင့်ကြံသူများနှင့်... ဤနေရာ၌ မငြိမ်မသက်မှုများ ဖြစ်အောင် ဖန်တီးနေသော ယွီလုံ နန်းတော်မှ လူများကို ရှင်းလင်းရန် စီစဉ်ခဲ့၏။

သူမသည် ကျိမိသားစုကို ရှေ့တန်းတပ်ဖွဲ့အဖြစ် အသုံးချခဲ့ရာ အလွန်ပင် အဆင်ပြေချောမွေ့ခဲ့သည်။ မျက်စိတစ်မှိတ် အတွင်းမှာပင် စုယွီ ဟေးယွီ အင်မော်တယ် မြို့တော်၌ စောင့်ကြပ်နေခဲ့သည်မှာ (၁၀) နှစ်တိတိ ရှိလေပြီ။

ဖန်ရှောင်အနေဖြင့် အမိန့်မနာခံသော အင်အားစုများကို ရှင်းလင်းပြီးနောက်တွင်မူ... ဟေးယွီ အင်မော်တယ် မြို့တော် နယ်မြေမှာ အမှန်တကယ်ပင် ငြိမ်းချမ်းသွားခဲ့၏။ ရံဖန်ရံခါတွင် မိစ္ဆာသားရဲများနှင့် မိစ္ဆာမျိုးနွယ်စုများက ဈေးကွက်နှင့် အရင်းအမြစ် နယ်မြေများကို တိုက်ခိုက်ခြင်းမှလွဲ၍... အခြားသော မငြိမ်မသက်မှု လက္ခဏာများ လုံးဝ မရှိတော့ပါချေ။

တစ်နေ့တွင် စုယွီသည် ဟေးယွီ အင်မော်တယ် မြို့တော်မှ ထွက်ခွာ၍ အရှင်သခင်ဆယ်ပါး အင်မော်တယ် မြို့တော်၏ မှောင်ခိုဈေးသို့ သွားရောက်ခဲ့၏။ လင်းချင်းရှားထံမှ အလယ်အလတ်အဆင့် ဝိညာဉ်ကျောက်တုံး ငါးသန်းနီးပါးနှင့်အတူ... များပြားလှသော ဆေးဖော်စပ်ခြင်း၊ အဆောင်လက်ဖွဲ့၊ အခင်းအကျင်းနှင့် ရုပ်သေးပစ္စည်းများကို သူ ရယူနိုင်ခဲ့သည်။ အရင်းအမြစ်များ ရရှိပြီးနောက် စုယွီသည် အင်မော်တယ် ဂိတ်တံခါးသို့ ပြန်လည် ရောက်ရှိလာခဲ့လေ၏။

တာ့ယွဲ့ တောင်ထွတ်သို့ ရောက်ရှိလာချိန်... စုယွီသည် ကောင်းချီးပေးနယ်မြေအတွင်းသို့ ဝင်ရောက်လိုက်သည်နှင့်... စတုတ္ထအဆင့် အဆင့်နိမ့်သို့ အသစ်တက်လှမ်းထားသော ထိုက်ရွှီမှာ စူးရှသော အော်မြည်သံတစ်ခုကို ထုတ်လွှတ်လိုက်သည်။ ပေ (၂၀၀) ခန့် ရှည်လျားသော ဧရာမ ငှက်ကြီးသည် အတောင်ပံများကို ဖြန့်ကျက်ကာ စုယွီထံသို့ အရှိန်အဟုန်ဖြင့် ထိုးဆင်းလာတော့၏။ ၎င်း၏ မှော်ရတနာများကဲ့သို့ ထက်မြက်လှသော ခြေသည်း အစုံမှာ စုယွီကို တိုက်ရိုက် ဦးတည်နေသည်။

သို့သော်လည်း နောက်တစ်ခဏတွင်... စုယွီ၏ ပုံရိပ်မှာ ရုတ်ချည်း ဝေဝါးသွားကာ... ထိုက်ရွှီ၏ နောက်ကျောသို့ ချက်ချင်း ရောက်ရှိသွား၏။ သူသည် ကောင်းကင်ယံမှနေ၍ ကြွေလွင့်လာသော ကြယ်တံခွန်တစ်ခုအလား ထိုက်ရွှီ၏ အပေါ်သို့ အရှိန်အဟုန်ဖြင့် ဖိနှိပ် ဆင်းသက်လိုက်သည်။

မူလဝိညာဉ် ဒုတိယအဆင့်နှင့် ယှဉ်နိုင်သော ခန္ဓာကိုယ် သန့်စင်ခြင်း စွမ်းအားများမှာ ထိုက်ရွှီ၏ အပေါ်သို့ ပြင်းထန်စွာ ကျရောက်သွားကာ... ၎င်းကို မြေပြင်ပေါ်သို့ တစ်ချက်တည်းဖြင့် ကန်ချလိုက်တော့၏။

“ဝုန်း...”

ဖုန်မှုန့်များမှာ ကောင်းကင်ယံသို့ အလိပ်လိုက် တက်သွားခဲ့ပြီး... ခရမ်းရောင် သန်းနေသော ဝဝတုတ်တုတ် ငှက်ကြီးမှာ မြေပြင်ပေါ်ရှိ ကျင်းနက်ကြီးအတွင်း၌ လဲလျောင်းနေရ၏။ ၎င်းသည် ခေါင်းကို မြေကြီးထဲမှ အတင်း ရုန်းထွက်လိုက်ပြီးနောက်... အပေါ်တွင် ပျံသန်းနေသော အရှင်သခင်ကို အလွန်တရာ မကျေမနပ်ဖြစ်သော မျက်ဝန်းများဖြင့် မော့ကြည့်လိုက်၏။ ၎င်းအနေဖြင့် အစွမ်းကုန် မထုတ်ရသေးပါချေ။

ဘေးနားရှိ လိပ်ကြီးနှင့် ကြွက်ကြီးတို့မှာမူ... ကျင်းထဲမှ ငှက်ကြီးကို စိတ်ဝင်တစား ကြည့်နေကြကာ... စားစရာ တစ်ခုခုကို ဝါးရင်း ပွဲကြည့်နေကြသကဲ့သို့ပင် ရှိနေတော့၏။

စုယွီသည် မြေပြင်ပေါ်သို့ ခြေချလိုက်ရင်း ထိုက်ရွှီကို ကြည့်ကာ ဆိုလိုက်သည်။

“မြန်မြန်ထတော့... ငါတို့ လုပ်စရာ အရေးကြီးတဲ့ အလုပ်တွေ ရှိတယ်...”

ထိုက်ရွှီသည် စတုတ္ထအဆင့် အဆင့်နိမ့် အင်အားကို ရရှိသွားပြီ ဖြစ်ရာ... စုယွီသည် ကြယ်ခူး မျှော်စင်သို့ တစ်ခေါက် သွားရန် ဆုံးဖြတ်လိုက်၏။ သူသည် ထိုက်ရွှီနှင့် ကောင်းကင်မိုးကြိုး ကြွက်မိစ္ဆာဘုရင်တို့ကို သူ၏ ဟင်းလင်းပြင် မှော်နန်းတော် အတွင်းသို့ သိမ်းဆည်းလိုက်ပြီးနောက်... အာရုံလှည့်စားမှု ကျောက်တုံးထံမှ ချီသန့်စင်အိုးကို ပြန်လည် ရယူလိုက်၏။ နှစ်ပေါင်းများစွာအတွင်း အိုးအတွင်း၌ စတုတ္ထအဆင့်နှင့် ပဉ္စမအဆင့် ဝိညာဉ်အရည် အမြောက်အမြား စုဆောင်းမိထားလေရာ... အခြေအနေမှာ အလွန်ပင် ကောင်းမွန်လှသည်။

အစပိုင်းတွင် စုယွီသည် သူ၏ ဆရာဖြစ်သူ တာအိုဆရာ ထျန်းယွီထံသို့ သွားရောက် တွေ့ဆုံရန် ရည်ရွယ်ခဲ့သော်လည်း... ဆရာဖြစ်သူမှာ တံခါးပိတ် ကျင့်ကြံနေသည်ကို တွေ့ရှိလိုက်ရသည်။

ထို့ကြောင့် သူသည် အနှောင့်အယှက် မပေးတော့ဘဲ အင်မော်တယ် ဂိတ်တံခါးမှ တိုက်ရိုက် ထွက်ခွာလာခဲ့ကာ... မြေကမ္ဘာအင်မော်တယ် မြို့တော်၏ နေရာရွှေ့ပြောင်း အခင်းအကျင်းကို အသုံးပြု၍ အရှင်သခင်ဆယ်ပါး အင်မော်တယ် မြို့တော်သို့ ရောက်ရှိလာခဲ့၏။

ထိုမှတစ်ဆင့် ကြယ်ခူး မျှော်စင်နှင့် အနီးဆုံး မြို့တော်ဆီသို့ ထပ်မံ ကူးပြောင်းလိုက်၏။ သို့သော်လည်း သူ ရောက်ရှိသွားချိန်တွင်မူ... ကြယ်ခူး မျှော်စင် တစ်ခုလုံးမှာ လုံးဝကို ဖရိုဖရဲ ဖြစ်နေသည်ကို တွေ့ရှိလိုက်ရ၏။