အခန်း ၁၉၁၄
Vol. 192 Ch. 1914
အခန်း (၁၉၁၄) - ဘယ်လို အခြေအနေမျိုး တွေရှိမလဲ
ဟေးရီဧကရာဇ်သည် နဂါးနတ်ဘုရားကို အခုထက်ထိ ကြောက်ရွံ့နေဆဲပင်။
လူတိုင်းသည် စိတ်ထဲတွင် ဝမ်းသာအားရ ဖြစ်သွားကြသလို တစ်ပြိုင်တည်းမှာပင် ထိတ်လန့်တုန်လှုပ်သွားကြသည်။ အကယ်၍ ထိုမျှလောက် တောင့်တင်းသော စစ်တပ်ကြီးကို ပိုင်ဆိုင်ထားသည့် ဟေးရီဧကရာဇ်ပင်လျှင် နဂါးနတ်ဘုရား အစီရင်ကို ကြောက်ရွံ့နေရသည်ဆိုပါက၊ ရှေးဟောင်း နဂါးနတ်ဘုရားနန်းတော်၏ အခြေခံအုတ်မြစ်မှာ မည်မျှအထိ နက်နဲခိုင်မာနေမည်ကို သူတို့ စိတ်ကူးပင် မယဉ်ရဲတော့ချေ။
"အရင်ကတော့ ရှေးဟောင်း နဂါးနတ်ဘုရားနန်းတော်ဟာ ငါတို့ထက် အနည်းငယ်ပဲ သာတယ်လို့ ထင်ခဲ့တာ... အခုကြည့်ရတာတော့ အဲဒီလို မဟုတ်ဘူးပဲ"
နန်မင်ရုယွဲ့က တိုးတိုးလေး ရေရွတ်လိုက်သည်။
"ငါးလေး... ဒီနေ့တော့ မင်းကို လောကအမြင် ကျယ်အောင် ခေါ်လာတာပဲ"
ချန်အင်းရွှယ်က ပြုံးလျက် ဆိုသည်
"ဒါကြောင့်လည်း နတ်ဘုရားဘုရင်နယ်မြေထဲမှာ ဘယ်အင်အားစုမဆို ရှေးဟောင်း နဂါးနတ်ဘုရားနန်းတော်ကို မျက်နှာသာပေးနေကြရတာပေါ့"
နန်မင်ရုယွဲ့မှာ ခါးသီးစွာ ပြုံးလိုက်မိသည်။ သို့သော် သူ ပို၍ စိုးရိမ်သည်မှာ အခြေအနေများက ဤသို့ ဖြစ်ပျက်နေပြီဆိုလျှင် ကျွယ်မင်နတ်နန်းတော်အနေဖြင့် အဘယ်ကဲ့သို့ အခန်းကဏ္ဍမှ ပါဝင်နိုင်မည်နည်းဟူ၍ ဖြစ်သည်။ သူသည် စိတ်ထဲရှိ စိုးရိမ်ပူပန်မှုများကို စွမ်းအားသုံးကာ အခြားသူများထံသို့ လှမ်း၍ မေးမြန်းလိုက်သည်။
တစ်ချိန်လုံး တိတ်ဆိတ်နေခဲ့သော ဝမ်ယဲ့က တည်ငြိမ်စွာ ဆိုလိုက်သည်။
"တကယ်လို့ ဘာအခန်းကဏ္ဍကမှ မပါဝင်နိုင်တော့ရင် ငါတို့က ကိုယ့်ကိုယ်ကိုယ် ဘေးကင်းဖို့ပဲ ရွေးချယ်ရတော့မှာလား အဲဒီလိုဆိုရင်လည်း နောက်ဆုံးမှာ သေရမှာပဲ... ကွာခြားချက်ကတော့ ထက်တဲ့ဓားနဲ့ အသတ်ခံရမလား၊ တုံးတဲ့ဓားနဲ့ အသတ်ခံရမလား ဆိုတာပဲ ရှိမယ်"
"ငါကတော့ တုံးတဲ့ဓားနဲ့ တဖြည်းဖြည်း အလှီးခံပြီး အသေမခံချင်ဘူး"
ဝမ်ယဲ့၏ မျက်ဝန်းထဲတွင် အပြုံးအရိပ်အယောင်တစ်ခု ဖြတ်ပြေးသွားပြီး ထိပ်တိုက်ရင်ဆိုင်နေကြသည့် နှစ်ဖက်စလုံးကို လှမ်းကြည့်ကာ
"သေရမယ်ဆိုရင်လည်း ထိုက်တန်တဲ့နေရာမှာ သေချင်တယ်၊ သေရတာ မြန်မြန်ဆန်ဆန်နဲ့ ပြတ်ပြတ်သားသား ဖြစ်ချင်တယ်"
"နှစ်လေး... မင်းက တကယ်ကို စကားပြောတတ်တာပဲ။ ဘာသေတာတွေ ပြောနေတာလဲ၊ ဒီနေ့ ငါတို့ ကျိန်းသေ သေရမယ်လို့ ဘယ်သူပြောလဲ"
ချန်အင်းရွှယ်က လှောင်ပြောင်သည့်အလား ဆိုလိုက်ပြီးနောက် ဟွားကျိသိုက် ဝိညာဉ်မယ်တော်နှင့် ယင်ရှန်ဘုရင်တို့ထံသို့ အကြည့်ကို ပို့လိုက်သည်။
"ငါတို့ဆီမှာလည်း ယင်နတ်ဆိုးဘုရင် နှစ်ပါး ရှိနေတာပဲ။ ပြီးတော့ ကိုးလေးရဲ့ ဘေးမှာလည်း အမြဲတမ်း ကာကွယ်ပေးနေတဲ့ အဆင့် ၉ တစ်ယောက် ရှိနေတာ မဟုတ်လား အဲဒါတင်မကဘူး... ကိုးလေးရဲ့ နောက်ကွယ်မှာ ဘာရှိလဲ ယန်နတ်ဘုရား တွေ ရှိသေးတယ်။ အဲဒီ ယန်နတ်ဘုရားတွေ ပေါ်မလာသေးဘူး... ဒါဟာ ဟေးရီဧကရာဇ် ပြောတဲ့ 'ထမင်းစားမယ့်သူတွေ မစုံသေးဘူး' ဆိုတာပဲ။ သူတို့ အကုန်စုံသွားရင် လက်ရှိ အခြေအနေကို ပြန်ကြည့်လိုက်... ငါတို့မှာ အနိုင်ရမယ့် အခွင့်အရေး မရှိဘူးလို့ ဘယ်သူပြောနိုင်မှာလဲ"
လူတိုင်းမှာ ထိုစကားကြောင့် စိတ်ဓာတ်များ ပြန်လည် နိုးကြားလာပြီး စိတ်ထဲမှ အုံ့မှိုင်းမှုများ အတန်ငယ် လွင့်ပြယ်သွားကြသည်။
"မင်းက စားပွဲဝိုင်းမှာ ထိုင်စားမယ့်သူတွေ စုံအောင် စောင့်ချင်တယ်ဆိုမှတော့... မင်းကို ငါ အခွင့်အရေး ပေးလိုက်မယ်။ မင်း ဘယ်လိုသေသွားရတယ်ဆိုတာကို ရှင်းရှင်းလင်းလင်း သိအောင်ပေါ့"
နဂါးနတ်ဘုရားက အေးစက်စွာ ရယ်မောလိုက်ပြီးနောက်၊ သူ၏ ဧရာမ အစီရင် ကိုယ်ထည်ကြီးကို လှုပ်ရှားကာ ဖန့်ချန်ရှိရာဘက်သို့ ဖြည်းညှင်းစွာ ပျံသန်းလာခဲ့သည်။
ကျွယ်မင်နတ်နန်းတော်မှ ကျင့်ကြံသူများမှာ စိုးရိမ်တကြီး ဖြစ်သွားကြသော်လည်း၊ ကံကောင်းသည်မှာ ရှေးဟောင်း နဂါးနတ်ဘုရားနန်းတော်သည် ယခုအခါ လူသားမျိုးနွယ်ဘက်တွင် ရပ်တည်နေသော မဟာမိတ် အင်အားစု ဖြစ်နေခြင်းပင်။
နဂါးနတ်ဘုရား အစီရင်သည် တဖြည်းဖြည်း နီးကပ်လာသည်နှင့်အမျှ၊ လူတိုင်းသည် ထိုဝိညာဉ်ဖိအားကို ပိုမို ရှင်းလင်းစွာ ခံစားလာရပြီး ခန္ဓာကိုယ်ပေါ်ရှိ ချွေးပေါက်များပင်လျှင် ထိုဖိအားကို တုံ့ပြန်နေကြသည်။
"နဂါးနတ်ဘုရား စီနီယာ..."
ရှဲ့အာမန်က ရှေ့သို့ တစ်လှမ်းတိုးကာ လက်အုပ်ချီ ဂါရဝပြုလိုက်ပြန်သည်။ တစ်ချိန်တည်းမှာပင် ယင်ရှန်ဘုရင်နှင့် ဟွားကျိသိုက် ဝိညာဉ်မယ်တော်တို့ကလည်း ဤဘက်သို့ တိုးကပ်လာကြသည်။ ချင်းဟယ်သီလရှင်မှာမူ ဖန့်ချန်၏ ရှေ့တွင် ရပ်ကာ ရှေ့မှ နဂါးနတ်ဘုရား အစီရင်ကို စူးစမ်းလိုသော မျက်ဝန်းများဖြင့် မော့ကြည့်နေသည်။
"ငါ မင်းတို့ ကျွယ်မင်နတ်နန်းတော်နဲ့ ပြောစရာ စကားမရှိဘူး။ မင်းတို့ ငါတို့ ရှေးဟောင်း နဂါးနတ်ဘုရားနန်းတော်ဆီကနေ ပစ္စည်းတွေ အများကြီး ခိုးယူခဲ့တာကို ငါ အခုထိ စာရင်းမရှင်းရသေးဘူး"
နဂါးနတ်ဘုရားက တည်ငြိမ်စွာ ဆိုလိုက်သည်။
လူအတော်များများမှာ တစ်ဦးကိုတစ်ဦး ကြည့်လိုက်ကြသည်။ ကျွယ်မင်နတ်နန်းတော်နှင့် ရှေးဟောင်း နဂါးနတ်ဘုရားနန်းတော်၏ ဆက်ဆံရေးမှာ မကောင်းလှဘူးလား ကျွယ်မင်နတ်နန်းတော်မှ အမာခံတပည့် အတော်များများပင်လျှင် ထိုကိစ္စကို ထူးဆန်းနေကြသည်။
ရှဲ့အာမန်မှာမူ အတွင်းရေးအချို့ကို သိထားဟန်ရှိပြီး ခါးသီးစွာ ပြုံးရုံသာ တတ်နိုင်သည်။ နဂါးနတ်ဘုရား၏ အကြည့်သည် ဖန့်ချန်ထံသို့ ကျရောက်သွားပြီးနောက် အသာအယာ ပြုံးလိုက်သည်။
"ဖန့်ငရဲမင်း... တကယ်လို့ အရင်က မိစ္ဆာမျိုးနွယ်ရဲ့ ကောင်းကင်ဘုံအတုက မင်းရဲ့ အကြောင်းကို ကမ္ဘာကို မဖွင့်ချခဲ့ရင်၊ ယင်လောကရဲ့ ငရဲမင်း အမွေအနှစ်ကို လူတစ်ယောက်က လုံးဝ ထိန်းချုပ်လိုက်ပြီဆိုတာ ငါ သိမှာ မဟုတ်ဘူး။
မင်းကို အချိန်အနည်းငယ်လောက် ထပ်ပေးမယ်ဆိုရင်... အများကြီး မလိုပါဘူး၊ နှစ်ပေါင်း ထောင်ဂဏန်း သို့မဟုတ် သောင်းဂဏန်းလောက်ဆိုရင်ကို လုံလောက်ပြီ။ မင်း ဖူထူလောကကို သိမ်းပိုက်ပြီး ယင်လောကရဲ့ စနစ်သစ်ကို ပြန်လည် တည်ဆောက်နိုင်မယ့် အခွင့်အရေး ရှိခဲ့မှာပဲ"
နယ်ပယ်အသီးသီးမှ ယင်မသေမျိုးများမှာ ရုတ်ရုတ်သဲသဲ ဖြစ်သွားကြသည်။ နဂါးနတ်ဘုရားက ဤဖန့်ငရဲမင်းအပေါ် ဤမျှအထိ အထင်ကြီးလိမ့်မည်ဟု သူတို့ မထင်ထားခဲ့ကြချေ။
မျိုးဆက်သစ် လူငယ်တစ်ဦးက... နှစ်ပေါင်းများစွာကြာအောင် မော်ထျန်းဌာနပင် မလုပ်နိုင်ခဲ့သော ကိစ္စကို တကယ်ပဲ လုပ်နိုင်မှာတဲ့လား အကယ်၍ ဟေးရီဧကရာဇ်သာ ပေါ်မလာခဲ့လျှင် ၁၈ ထပ် ငရဲမျှော်စင်ကို ရသူသည် ယင်လောကကို စိုးမိုးနိုင်မည်ဟု သူတို့ ယူဆကောင်း ယူဆကြလိမ့်မည်။ သို့သော် ယခုအခါ ဟေးရီဧကရာဇ်၏ ရွှေစစ်သည် စစ်တပ်ကြီး ရှိနေပါလျက်နှင့် နဂါးနတ်ဘုရားက ဘာကြောင့် ဤငရဲမင်းကို အထင်ကြီးနေရသနည်း။
ငရဲမင်းအမိန့်တော်ပြားကြောင့်လား၊ ဒါမှမဟုတ် သူ့လက်ထဲ ရောက်လာနိုင်တဲ့ ၁၈ ထပ် ငရဲမျှော်စင်ကြောင့်လား။
"နဂါးနတ်ဘုရားက မြှောက်ပင့်လွန်းနေပါပြီ။ ယင်လောကမှာ ပညာရှင်တွေ အများကြီး ရှိပါတယ်။ ကျွန်တော့်ကို နှစ်ပေါင်း သောင်းဂဏန်းလောက် ထပ်ပေးရင်တောင် ရှုပ်ထွေးနေတဲ့ ဆက်ဆံရေးတွေကို ရှင်းထုတ်နိုင်ဖို့ မသေချာသလို၊ စနစ်သစ်ကို ပြန်လည် တည်ဆောက်ဖို့ ဆိုတာကတော့ ဝေးပါသေးတယ်"
ဖန့်ချန်က ပြုံးလျက် ဆိုလိုက်သည်။
"မင်း တစ်ယောက်တည်းနဲ့တော့ မရနိုင်တာ မှန်ပါတယ်။ ဒါပေမဲ့ မင်းရဲ့ နောက်ကွယ်မှာ မင်း တစ်ယောက်တည်း ရှိတာမှ မဟုတ်တာ"
နဂါးနတ်ဘုရားက အသာအယာ ရယ်မောလိုက်သည်။
"တကယ်လို့ မင်းက ဒီ ၁၈ ထပ် ငရဲမျှော်စင်ကို လိုချင်တယ်ဆိုရင်၊ ဒီတစ်ခေါက် ငါ မင်းကို ကူညီပေးနိုင်တယ်"
"ဗျာ"
ရှဲ့အာမန်နှင့် ကျန်ရှိသူများမှာ တစ်ဦးကိုတစ်ဦး ကြည့်လိုက်ကြပြီးနောက် မျက်ဝန်းများ တောက်ပသွားကြသည်။
အထက်နယ်မြေ သုံးခုမှ ယင်မသေမျိုးများ၏ မျက်နှာမှာမူ ပျက်သွားကြသည်။ ဤသို့ဆိုလျှင် ၁၈ ထပ် ငရဲမျှော်စင်ကို ဤပုဂ္ဂိုလ်ကြီးများက ကြိုတင် သတ်မှတ်ထားပြီးသား ဖြစ်နေပြီပေါ့။ ထိုသို့ဆိုလျှင် သူတို့အနေဖြင့် ဤနေရာသို့ လာရခြင်းမှာ မည်သည့် အကျိုးအမြတ်မျှ ရလိမ့်မည် မဟုတ်တော့ဘူးလား။
"ဖြစ်နိုင်တာက... ဘက်ရွေးရမယ့် အချိန် ရောက်နေပြီထင်တယ်။ အချိန် ထပ်နှောင့်နှေးနေရင်... ဘက်ရွေးဖို့ အရည်အချင်းတောင် ရှိမှာ မဟုတ်တော့ဘူး..."
ဟေးရီအကြီးအကဲက တိုးတိုးလေး ရေရွတ်လိုက်သည်။
သူမ၏ အသံသည် အခြားသော ဝါရင့် ယင်မသေမျိုးများ၏ နားထဲသို့ ရောက်ရှိသွားပြီး သူတို့ကို အတွေးနက်သွားစေသည်။
ဟေးရီဧကရာဇ်၏ အကြည့်မှာမူ အလွန်ပင် ပြင်းထန်စူးရှလာပြီး နဂါးနတ်ဘုရားကို ဓားဖြင့် အပိုင်းပိုင်း ခုတ်ထစ်ပစ်ချင်နေသည့်အလား ရှိသည်။ သို့သော် နဂါးနတ်ဘုရားက သူ၏ အကြည့်ကို လုံးဝ ဂရုမစိုက်ဘဲ ဖန့်ချန်ကိုသာ ပြုံးလျက် ကြည့်နေသည်။
"ဘယ်လို အခြေအနေမျိုး တွေရှိမလဲ"
ဖန့်ချန်၏ မျက်နှာမှ အပြုံးများ တဖြည်းဖြည်း ပျောက်ကွယ်သွားပြီး၊ နဂါးနတ်ဘုရားကို လေးနက်စွာ ကြည့်ကာ ရိုသေမှုပြသည့် အသုံးအနှုန်းကိုပင် မသုံးတော့ချေ။ ဤအခိုက်အတန့်တွင် လူတိုင်း၏ မျက်စိထဲ၌ လောကကို အစိုးရသော စစ်မှန်သော ငရဲမင်းတစ်ပါး၏ ပုံရိပ်ကို မြင်တွေ့လိုက်ရသကဲ့သို့ပင်။
ယင်လောက၏ ငရဲမင်းသည် နယ်မြေကိုးခုရှိ မည်သည့် ပုဂ္ဂိုလ်နှင့်မဆို တန်းတူရပ်တည်နိုင်သော အရည်အချင်း ရှိသည် မဟုတ်ပါလား။
"တကယ်ပဲ အခြေအနေတွေ ရှိပါတယ်"
နဂါးနတ်ဘုရားက ပြုံးကာ ဆိုသည်။
"ဒီနေ့ ငါဟာ ရှေးဟောင်း နဂါးနတ်ဘုရားနန်းတော်ကို ကိုယ်စားပြုပြီး၊ နယ်မြေကိုးခု ယင်လောကရဲ့ ငရဲမင်းနဲ့ ပဋိညာဉ်တစ်ခု ချုပ်ဆိုချင်တယ်။ ငါ မင်းကို ၁၈ ထပ် ငရဲမျှော်စင်ကို ထိန်းချုပ်နိုင်အောင် ကူညီပေးမယ်။ အဲဒီအစား... မင်းက ငါ့ရဲ့ မျိုးနွယ်စုအတွက် ရှင်သန်ခွင့် လမ်းစလေးတစ်ခု ချန်ထားပေးရမယ်"
"........"
လူတိုင်းမှာ တစ်ဦးကိုတစ်ဦး ကြည့်ရင်း မျက်လုံးအစုံမှာ ဝေဝါးသွားကြသည်။
ဟေးရီဧကရာဇ်ပင်လျှင် နဂါးနတ်ဘုရားကို ထူးဆန်းသော အကြည့်ဖြင့် ကြည့်လိုက်မိသည်။ ရှေးဟောင်း နဂါးနတ်ဘုရားနန်းတော်၏ နဂါးနတ်ဘုရားက... အခုမှ ကြီးထွားလာခါစ ငရဲမင်းတစ်ဦးကို မိမိမျိုးနွယ်စုအတွက် ရှင်သန်ခွင့် လမ်းစ ချန်ထားပေးဖို့ တောင်းဆိုနေတာတဲ့လား။
"နဂါးနတ်ဘုရား ပြောတာ ဘာအဓိပ္ပာယ်လဲ"
ဖန့်ချန်၏ အမူအရာ အနည်းငယ် လှုပ်ရှားသွားသည်။
"မင်း နားလည်ပါတယ်"
နဂါးနတ်ဘုရားက ပြုံးလိုက်ရာ နက်ရှိုင်းသော မျက်ဝန်းအိမ်ထဲတွင် ကြယ်တာရာများ တောက်ပနေသည့်အလား ရှိသည်။
"နားလည်ပြီ ထင်ပါတယ်" ဖန့်ချန်က အသာအယာ ခေါင်းငြိမ့်ပြလိုက်သည်။
"ဒီအခြေအနေကို ကျွန်တော် သဘောတူတယ်။ ကြယ်တစ်သောင်းနန်းတော် ဆီကနေ ပဋိညာဉ်စာချုပ် တစ်ခု တောင်းပေးရမလား"
ကြယ်တစ်သောင်းနန်းတော်မှ ဦးဆောင်လာသော ယင်မသေမျိုး၏ မျက်နှာတွင် ချက်ချင်းပင် ရှက်ကိုးရှက်ကန်း အမူအရာ ပေါ်လာသည်။ သူတို့ ထုတ်လုပ်သော ပဋိညာဉ်စာချုပ်များမှာ နယ်မြေကိုးခုတွင် အဆင့် ၉ အချင်းချင်းကြား ပထမနေရာယူထားနိုင်သည့် ပညာရှင်နှင့် ယင်လောက ငရဲမင်းတို့ လက်မှတ်ထိုးရန် အရည်အချင်း မပြည့်မီပါချေ။
"ဘယ်လို ပဋိညာဉ်စာချုပ်မှ မလိုပါဘူး။ မင်းက ငရဲမင်းပဲ၊ ငါ မင်းကို ယုံကြည်ပါတယ်"
နဂါးနတ်ဘုရားက ပြုံးလိုက်ပြီးနောက် ဟေးရီဧကရာဇ်ကို အေးစက်စွာ တစ်ချက် ကြည့်လိုက်သည်။
"အရင်တုန်းကဆိုရင် ဒီလို အကောင်ပေါက်လေးက ငါ့ရှေ့မှာ ဘာရဲတင်းခွင့် ရှိလို့လဲ။ ဒီနေ့တော့ သူ့ကို ခဏလောက် ရမ်းကားခွင့် ပေးထားလိုက်တာပေါ့"
ဖန့်ချန်၏ အတွေးများ လည်ပတ်သွားပြီး ရှေ့မှ နဂါးနတ်ဘုရားကို အသေအချာ ပြန်ကြည့်လိုက်သည်။ သူသည် ရှေ့မှ ပုဂ္ဂိုလ်မှာ ထို နဂါးသူတော်စင် ဖြစ်နိုင်မလားဟု မသေချာချေ။
ထိုစဉ်က နတ်ဘုရားမျိုးနွယ် များ အတိုက်ခိုက်ခံရစဉ်တွင် ထိုနဂါးသူတော်စင်လည်း ပါဝင်ပတ်သက်ခဲ့ပုံ ရသည်။
'ထိုစဉ်က နဂါးသူတော်စင်ရဲ့ စွမ်းအားဟာ နယ်မြေတစ်ခုရဲ့ အရှင်သခင်ထက် မနိမ့်ကျလောက်ဘူး။ အကယ်၍ သူတောင်မှ လူသားမျိုးနွယ်နဲ့အတူ ထွက်ပြေးပုန်းအောင်းနေရတယ်ဆိုရင်၊ ဒီစခန်းနှစ်ခုကြားက အားပြိုင်မှုဟာ တကယ်ကို ရက်စက်ကြမ်းကြုတ်လှတာပဲ'
ဖန့်ချန်၏ အတွေးများကို နဂါးနတ်ဘုရားက ဖြတ်တောက်လိုက်သည်။
"မင်းတို့ အားလုံး ကြားကြပြီလား ရှေးဟောင်း နဂါးနတ်ဘုရားနန်းတော်ဟာ ငရဲမင်းကို ယင်လောက အာဏာ ပြန်လည်ရရှိဖို့ ထောက်ခံတယ်။ မင်းတို့ရဲ့ သဘောထားကရော ဘယ်လိုလဲ"
နက်ရှိုင်းလှသော နဂါးမျက်ဝန်းများက ယင်မသေမျိုး အားလုံးကို ဖြည်းညှင်းစွာ ဝေ့ကြည့်လိုက်ရာ၊ မမြင်ရသော ဖိအားကြောင့် သူတို့အားလုံး အသက်ရှူရ ကြပ်သကဲ့သို့ ခံစားလိုက်ရတော့သတည်း။