အခန်း (၃၉)

အခန်း ၃၉ ထင်တဲ့အတိုင်းပဲ၊ နတ်ဆိုးနှိမ်နင်းရေးဌာန၏ ဒုတိယတပ်မှူးချုပ် ချင်လော့

စစ်မာဟောက်ကို နှုတ်ဆက်ပြီးနောက် ချင်လော့မှာ နက်ရှိုင်းသော အတွေးနွံထဲသို့ နစ်မြုပ်သွားခဲ့လေသည်။ ယင်းဝူစစ်သူကြီး၏ ယခင် ပြင်ဆင်မှုများက သူ့ကို နတ်ဆိုးနှိမ်နင်းရေးတပ်ဖွဲ့ ၁၀ ထဲသို့ ဝင်ရောက်နိုင်ရန် အခြေခံအားဖြင့် လုံလောက်နေခဲ့ပြီ ဖြစ်ပေ၏။

သို့သော် ယခုအခါ သူ့ကို တောင်ပိုင်းနယ်စပ်သို့ သွားရောက်စေရန် တောင်းဆိုမှုများ ပိုမို များပြားလာပြီး မြို့တော်ရှိ ပြည်သူလူထု၏ သဘောထားကိုပင် လှုံ့ဆော်မှုများ ရှိနေခဲ့လေသည်။

"ဒီလူတွေ ငါ သေတာကို တကယ် မြင်ချင်နေတာလား... သူတို့က ငါ့အပေါ် ဒီလောက်တောင် နက်နက်ရှိုင်းရှိုင်း ရန်ငြိုးဖွဲ့ထားတာလား..."

"တစ်ခုခုတော့ သေချာပေါက် မှားယွင်းနေပြီ..." ချင်လော့က သူ့ဘာသာ တိုးတိတ်စွာ ရေရွတ်လိုက်၏။

နောက်ဆုံးတော့ ဒါက လင်းရွှမ်ကြောင့်ပဲ ဖြစ်ဖို့ များတယ်...

"သေဆုံးသွားတဲ့ သူတစ်ယောက်က ဘယ်လောက်ပဲ တန်ဖိုးရှိနေပါစေ သူက သေသွားပြီလေ... အသက်ရှင်နေတဲ့သူတွေက သေဆုံးသွားသူတွေအတွက် ကလဲ့စားချေပေးချင်ကြပေမဲ့ အဲဒါက သူတို့ရဲ့ အရင်းနှီးဆုံး ဆွေမျိုးတွေမှာပဲ ကန့်သတ်ချက် ရှိတယ်... ဥပမာအနေနဲ့ ပြောရရင်..."

အဲဒီ ရုပ်တစ်သောင်းမြင့်မြတ်နယ်မြေက သူတော်စင်မလေးပေါ့...

တခြားသူတွေနဲ့ ပတ်သက်လို့တော့ သူတို့က ချင်လောကို သေစေချင်ရုံ သက်သက်သာ ဖြစ်ပေမဲ့ ယခုအခါ သူတို့မှာ ပိုမို နက်ရှိုင်းတဲ့ အကြောင်းရင်းတွေ ရှိနေတယ်လို့ ချင်လော ခံစားလိုက်ရလေသည်။

အရာအားလုံးက လင်းရွှမ်ကြောင့်ဖြစ်ပြီး ရလဒ်ကတော့ ရှင်းလင်းနေပေ၏။

"နဂါးအကြေးခွံ..." ချင်လော့က ပြဿနာ၏ အဓိကအချက်ကို သဘောပေါက်သွားခဲ့လေသည်။

"သူတို့က ငါ့ကို သတ်ပြီး လင်းရွှမ်ရဲ့ နဂါးအကြေးခွံကို ပြန်ယူချင်နေကြတာပဲ..."

"အကောင်းဆုံး အခွင့်အရေးက တောင်ပိုင်းနယ်စပ်မှာ ရှိနေတယ်..."

"ဒါပေမဲ့ တောင်ပိုင်းနယ်စပ်ကို ငါ သွားမှာ မဟုတ်ဘူး..."

တောင်ပိုင်းနယ်စပ်က ရင်ဆိုင်နေရတဲ့ ရန်သူတွေက လူရိုင်းတွေ ဖြစ်ပြီး သူတို့က မွေးရာပါ ကြီးမားတဲ့ ခွန်အားတွေ ပါလာကြကာ သူတို့ရဲ့ သွေးမျိုးဆက်တွေက သာမန် လူသားမျိုးနွယ်တွေနဲ့ သဘာဝအရ ကွဲပြားခြားနားကြလေသည်။ မဟာချင်အင်ပါယာနဲ့ လူရိုင်းတွေကြားက တိုက်ပွဲတွေဟာ မျိုးနွယ်စုစစ်ပွဲ တစ်ခုလို့ ဆိုနိုင်ပေ၏။

လူရိုင်းမျိုးနွယ်စုတွေက အကြောက်အလန့်ကင်းပြီး တန်ခိုးကြီးမားကြကာ မဟာချင်အင်ပါယာရဲ့ စစ်တပ်ဟာ အလွန်အမင်း ပြင်းထန်တဲ့ အသေအပျောက်တွေကို ခံစားခဲ့ရလေသည်။

နောက်ထပ် အလွန် အရေးကြီးတဲ့ အချက်တစ်ခုက လူရိုင်းတွေ နေထိုင်တဲ့ နယ်မြေဟာ အရင်းအမြစ် ရှားပါးလွန်းတယ်...

အကယ်၍ ချင်လော့သာ သူ၏ စွမ်းရည်များကို ဖွံ့ဖြိုးတိုးတက်အောင် လုပ်ချင်ပါက တောင်ပိုင်းနယ်စပ်သို့ သွားရောက်ခြင်းက အဆိုးရွားဆုံး ရွေးချယ်မှုပင် ဖြစ်လေသည်။

သူ့အတွက် အကောင်းဆုံး ရွေးချယ်မှုက တောင်တန်းတစ်သောင်းနယ်မြေပဲ...တောင်တန်းတစ်သောင်းနယ်မြေမှာ ဂိုဏ်းပေါင်း တစ်သိန်းကျော် ရှိတယ်...

မြင့်မြတ်နယ်မြေ ဂိုဏ်းတွေမှာ အများဆုံး ရှိနေတဲ့ သတ္တဝါကတော့ ကံကြမ္မာသားတော်တွေပဲ...

"မင်းတို့က ငါ့ကို သတ်ချင်နေတာလား... ဒီမှာ မင်းတို့အတွက် အခွင့်အရေးပဲ..." ချင်လော့၏ မျက်လုံးများတွင် ရူးသွပ်သော အလင်းတစ်ချက် လင်းလက်သွားခဲ့၏။

စစ်သူကြီး ကျန်းတိုဘက်မှလည်း သတင်းအချက်အလက်များ ရောက်ရှိလာပြီး ရဲ့ချန်၏ တိကျသော တည်နေရာကို ရှာဖွေတွေ့ရှိပြီဖြစ်ကြောင်း ဆိုလေသည်။

သူက လက်ရှိမှာ ဓားတစ်သောင်းစံအိမ်ကို ရောက်နေပြီး ဓားတစ်သောင်းစံအိမ်က သခင်မလေးနဲ့ ပူပူနွေးနွေး အချစ်ဇာတ်လမ်းလေး ဖန်တီးနေတယ်...

"ထင်တဲ့အတိုင်းပဲ ဇနီးသည်ကို အားကိုးပြီး အသက်မွေးရတဲ့ ကံကြမ္မာသားတော်က နေရာတိုင်းမှာ အဆင်ပြေနေတာပဲ..."

သို့သော် ချင်လော့ကို အနည်းငယ် အံ့အားသင့်သွားစေခဲ့သော နောက်ထပ် သတင်းတစ်ခု ရှိနေသေးပေ၏။

လျိုရူယန်က လက်ထပ်တော့မယ်... သူမက နတ်လက်နက်တောင်ကြားက သခင်လေးနဲ့ လက်ထပ်မှာ...

နတ်လက်နက်တောင်ကြားက အားကောင်းတဲ့ သူတော်စင်ရတနာ တစ်ခုကိုတောင် စေ့စပ်လက်ဆောင်အဖြစ် ပေးခဲ့သေးတယ်...

"လျိုရူယန်... လျိုရူယန်... မင်းက ကံကြမ္မာသားတော်နဲ့ ဖူးစာဆုံရမယ့်သူလေ... ဘယ်လိုလုပ်ပြီး တခြားသူနဲ့ လက်ထပ်လို့ ရမှာလဲ..."

"ဝတ္ထုတွေထဲက ဂန္ထဝင် မြင်ကွင်းတချို့ကို ငါတို့ ပြန်လည်ဖန်တီးသင့်တယ်... ဥပမာ သတို့သမီးကို ပြန်ပေးဆွဲတာမျိုးပေါ့..."

ဤနေရာတွင် ချင်လော့မှာ တိတ်တဆိတ် စိတ်လှုပ်ရှားလာခဲ့လေသည်။

"ရဲ့ချန် သွားမလား၊ မသွားဘူးလားဆိုတာကိုပဲ ငါ မသိတာ..."

"မဟုတ်ဘူး... မဟုတ်ဘူး... သူ မသွားချင်ရင်တောင် သူ့ကို အတင်းသွားခိုင်းရမယ်... ဒီလောက် ပျော်စရာကောင်းတဲ့ ကိစ္စမှာ သူက ဘယ်လိုလုပ် မပါဝင်ဘဲ နေနိုင်မှာလဲ..."

"တောင်တန်းတစ်သောင်းနယ်မြေကို ငါတို့ သေချာပေါက် သွားရမယ်..." ချင်လော့က စားပွဲကို ပြင်းပြင်းထန်ထန် ရိုက်ချကာ လေးနက်သော အသံဖြင့် ပြောဆိုလိုက်၏။

အကယ်၍ အခြားရွေးချယ်စရာ နည်းလမ်းမရှိတော့ပါက စုချန်ချန်ကို ဝင်ပါရန် အကူအညီတောင်းရမည်သာ ဖြစ်သည်။ သို့သော် သေချာသည်က စုချန်ချန်သာ ဆောင်ရွက်ပေးခဲ့လျှင် ချင်ဧကရာဇ်အပေါ် ကျေးဇူးကြွေးတင်သွားမည်ဖြစ်ပြီး၊ နောက်ပိုင်းတွင် ထိုကျေးဇူးကြွေးကို ပြန်လည်ပေးဆပ်ရပေလိမ့်မည်။

စစ်မာဟောက်သည် စစ်မာမိသားစုသို့ ပြန်ရောက်ပြီးနောက် သူ၏ ဖခင်ထံသို့ ချက်ချင်း သွားရောက်တွေ့ဆုံခဲ့လေသည်။

"ချင်လော့က နတ်ဆိုးနှိမ်နင်းရေးဌာနကို သွားမှာလား..."

"ဟုတ်တယ်... သူက ကျွန်တော်တို့ စစ်မာမိသားစုသာ သူ့ကို နတ်ဆိုးနှိမ်နင်းရေးဌာနထဲ ဝင်နိုင်အောင် ကူညီပေးမယ်ဆိုရင် ကျွန်တော့်ကို သူ့ရဲ့ လက်အောက်ခံအဖြစ် ခန့်အပ်ပေးမယ်လို့ ပြောပါတယ်..."

စစ်မာဟောက်က ခါးသီးစွာ ပြုံးလိုက်၏။ သူတို့ စစ်မာမိသားစုမှ အဖွဲ့ဝင်များက အခြား မင်းသားများကို သွားရောက် အမှုထမ်းချိန်၌ သူတို့အားလုံးမှာ မင်းသားများ၏ တန်ဖိုးထားမှုကို ခံခဲ့ရလေသည်။ သူတို့ကို လုံးဝ အလိုမရှိသော ချင်လော့ကဲ့သို့ လူမျိုး တစ်ယောက်မျှ မရှိခဲ့ဖူးချေ။

သို့သော် သူ့တွင် အခြား ရွေးချယ်စရာ မရှိခဲ့ပေ။

"နတ်ဆိုးနှိမ်နင်းရေးဌာနက ချင်လော့အပေါ် ရန်ငြိုးထားနေပါတယ်... ချင်လော့က နတ်ဆိုးနှိမ်နင်းရေးဌာနကို အကြိမ်ကြိမ် အရှက်ခွဲခဲ့ပြီး လုချန်နဲ့ ချူဟန်ကတောင် ချင်လော့အပေါ် သူတို့ရဲ့ ရန်လိုမှုကို လူသိရှင်ကြား ဖော်ပြခဲ့ကြပါတယ်..."

"ချင်လော့က ကျွန်တော့်အတွက် တမင်တကာ အခက်အခဲ ဖြစ်အောင် လုပ်နေတာပဲ... ကြည့်ရတာ သူက ကျွန်တော် စစ်မာဟောက်ကို သူ့နောက် လိုက်စေချင်ပုံ မပေါ်ဘူး..."

စစ်မာဟောက်က ခါးသီးစွာ ပြုံးလိုက်လေသည်။

"ဒါမှမဟုတ်ရင်လည်း..."

"နတ်ဆိုးနှိမ်နင်းရေးဌာနအတွင်းမှာ နောက်ထပ် နေရာတစ်ခု ရှိပါသေးတယ်..."

"နတ်ဆိုးနှိမ်နင်းရေးတပ်ဖွဲ့ ၁၀ လေ..." စစ်မာရှင်းက ပြောဆိုလိုက်၏။

စစ်မာဟောက် အံ့အားသင့်သွားခဲ့သည်။ "ဒါပေမဲ့ နတ်ဆိုးနှိမ်နင်းရေးတပ်ဖွဲ့ ၁၀ က လူအများစုက ရာဇဝတ်ကောင်တွေလေ... ချင်လော့ကကျတော့ မင်းသားတစ်ပါး ဖြစ်နေတယ်..."

"သူလည်း အပြစ်သား တစ်ယောက်ပဲလေ..."

"ဒါ့အပြင် သူက နတ်ဆိုးနှိမ်နင်းရေးတပ်ဖွဲ့ ၁၀ ထဲကိုပဲ ဝင်ရောက်နိုင်မှာ... မဟုတ်ရင် တောင်ပိုင်းနယ်စပ်ကိုပဲ သွားရလိမ့်မယ်..."

"မိသားစု ခေါင်းဆောင်ဆီ ငါ သွားမယ်... ဒီကိစ္စကို အဆင်ပြေအောင် လုပ်လို့ရနိုင်တယ်... ယင်းဝူစစ်သူကြီးက ချင်လော့ကို ပြစ်မှုတွေ ချေဖျက်ဖို့အတွက် နတ်ဆိုးနှိမ်နင်းရေးတပ်ဖွဲ့ ၁၀ ကို သွားဖို့ အကြံပြုအောင် တစ်ယောက်ယောက်က နားချထားတယ်လို့ ငါ ကြားတယ်..."

"ဒါပေမဲ့ နတ်ဆိုးနှိမ်နင်းရေးတပ်ဖွဲ့ ၁၀ ထဲ ဝင်ရောက်တယ်ဆိုတာ အမည်းစက် ထင်သွားပြီး တိုးတက်ဖို့ အလားအလာ မရှိတော့ဘူးလို့ ဆိုလိုတာလေ... နဝမမင်းသားက အနာဂတ်မှာ ရာဇပလ္လင်အတွက် ဘယ်လိုလုပ် ယှဉ်ပြိုင်နိုင်တော့မှာလဲ..." စစ်မာဟောက်မှာ စိုးရိမ်လာခဲ့လေသည်။

သူက မကောင်းတဲ့ ဖဲချပ်တစ်ခုကို လိုချင်ခဲ့ပေမဲ့ ဖဲချပ်ဆိုး သုံးကတ်ပါတဲ့ လက်တစ်ဖက်ကိုတော့ မလိုချင်ပါဘူး...

နတ်ဆိုးနှိမ်နင်းရေးတပ်ဖွဲ့ ၁၀ ကို ဝင်ရောက်ခြင်းက အရာအားလုံးအတွက် ကိုယ့်ကိုယ်ကိုယ်သာ အားကိုးရမည်ဖြစ်ပြီး ချင်လော့မှာ ရာထူးတိုးရန် လမ်းကြောင်း သို့မဟုတ် သူ့ကို ထောက်ပံ့ပေးမည့် မည်သည့် အရင်းအမြစ်မျှ မရှိရန် ဖန်လာခဲ့ပြီ ဖြစ်ကြောင်း ဆိုလိုပေသည်။

မင်းသားများက အရင်းအမြစ် အများအပြား ရရှိနိုင်သည်တော့ မဟုတ်ချေ။ အင်ပါယာနန်းတော်မှ အရင်းအမြစ်များကို ရရှိရန် သူတို့သည် စွမ်းဆောင်ရည်များ ပြသရန် လိုအပ်ပေ၏။

နတ်ဆိုးနှိမ်နင်းရေးတပ်ဖွဲ့ ၁၀ တွင် အရင်းအမြစ် အလွန် နည်းပါးလှလေသည်။

နတ်ဆိုးနှိမ်နင်းရေးတပ်ဖွဲ့ ၁၀ တွင် တက်လှမ်းနိုင်သော အမြင့်ဆုံး ရာထူးမှာ တပ်မှူးသာ ဖြစ်ပေသည်။

ထို့ပြင် နတ်ဆိုးနှိမ်နင်းရေးတပ်ဖွဲ့ ၁၀ ထဲသို့ ဝင်ရောက်ပြီးသည်နှင့် မည်သည့်အခါကမျှ ထွက်ခွာ၍ မရနိုင်တော့ချေ။ တာဝန်ထမ်းဆောင်နေစဉ် သေဆုံးသွားခြင်းမှလွဲ၍ အခြား ဌာနများသို့ ပြောင်းရွှေ့၍ မရနိုင်ပေ။

ချင်လော့က အိမ်ရှေ့စံမင်းသား နေရာအတွက် ယှဉ်ပြိုင်နိုင်ခြေမှာ သုညနီးပါး ဖြစ်သွားပြီ ဖြစ်သည်။ သူ့ကို မည်သူကမျှ မဆန့်ကျင်နိုင်သည့် အဆင့်အထိ သူ တိုးတက်လာလျှင်တော့ တစ်မျိုးပေါ့။ သို့သော် နတ်ဆိုးနှိမ်နင်းရေးတပ်ဖွဲ့ ၁၀ တွင် ၎င်းက ဖြစ်နိုင်ပါ့မလား။

"အိမ်ရှေ့စံမင်းသား နေရာအတွက် ယှဉ်ပြိုင်မယ် ဟုတ်လား..." စစ်မာရှင်းက လှောင်ပြောင်လိုက်၏။

"သူက အရင်ဆုံး သူတော်စင်အဆင့်ကို ဖောက်ထွက်နိုင်အောင် လုပ်သင့်တယ်..."

"ငါတို့က အပေါ်ယံ လှုပ်ရှားမှုလေး တစ်ခု လုပ်နေရုံပါပဲ... အဲဒါက စစ်မာမိသားစုရဲ့ မိသားစု အစဉ်အလာ တစ်ခုလေ... မဟုတ်ရင် စစ်မာမိသားစုက ဒီလို မင်းသားမျိုးအပေါ်မှာ ရင်းနှီးမြှုပ်နှံလိမ့်မယ်လို့ မင်း ထင်နေလား..."

စစ်မာရှင်း၏ စကားများက စစ်မာဟောက်၏ နှလုံးသားကို ထိုးဖောက်သွားသော ချွန်ထက်သည့် မြားတစ်စင်းနှင့် တူနေခဲ့လေသည်။

သူက စွန့်ပစ်ခံလိုက်ရပြီဆိုသည်က ထင်ရှားနေခဲ့ပေ၏။

စစ်မာမိသားစု ပါဝင်လာခြင်းကြောင့် ပြည်သူလူထု၏ သဘောထားမှာ အမှန်တကယ်ပင် အနည်းငယ် ပြောင်းလဲသွားခဲ့လေသည်။

"စစ်မာမိသားစုက ချင်လော့ကို နတ်ဆိုးနှိမ်နင်းရေးဌာနထဲ ဝင်စေချင်တာလား... အဲဒါ လုံးဝကို ရယ်စရာကောင်းတာပဲ... နတ်ဆိုးနှိမ်နင်းရေးဌာနက အဲဒါကို ခွင့်ပြုမှာတဲ့လား..." ဤသတင်းကို ကြားချိန်၌ ချင်ဖုန်းက လှောင်ပြောင်လိုက်ပြီး အထင်အမြင်သေးသော အမူအရာကို ပြသလိုက်၏။

"အရှင်မင်းသား... ဖြစ်နိုင်တာက နတ်ဆိုးနှိမ်နင်းရေးဌာနက တကယ်ပဲ ခွင့်ပြုပေးလိမ့်မယ်... နတ်ဆိုးနှိမ်နင်းရေးဌာနမှာ တပ်ဖွဲ့ ၁၀ ရှိတယ်ဆိုတာကို အရှင်မင်းသား မေ့နေတာလား..."

ဤသည်ကို ကြားချိန်၌ ချင်ဖုန်း အံ့အားသင့်သွားပြီးနောက် မျက်မှောင်ကြုတ်ကာ ပြောဆိုလိုက်လေသည်။

"ချင်လော့က တပ်ဖွဲ့ ၁၀ ကို သွားမှာလား..."

"တယ်လို့ သူသာ နတ်ဆိုးနှိမ်နင်းရေးတပ်ဖွဲ့ ၁၀ ကို သွားမယ်ဆိုရင် သူ မြို့တော်ကနေ ထွက်သွားရလိမ့်မယ်..."

"တစ်ခါတလေကျရင်လည်း အရာရာက သူ့သဘောဆန္ဒအပေါ်မှာ မူတည်တာ မဟုတ်ဘူးလို့ မင်း မထင်ဘူးလား..."

"အရှင်မင်းကြီးက ဆုံးဖြတ်ချက် ချဖို့ လိုအပ်နေပြီ..."

မှန်ပေသည်။ ချင်ဧကရာဇ်က ဆုံးဖြတ်ချက် တစ်ခု ချမှတ်ရန် လိုအပ်နေလေပြီ။

ထိုအချိန် အမိန့်တော် တစ်ရပ် ထုတ်ပြန်လိုက်သည်။

"စုချန်ချန်ကို တွေ့ဆုံရန် ဆင့်ခေါ်ဖို့ အရှင်မင်းကြီးက အမိန့်ပေးလိုက်ပြီ..."

ချင်ဧကရာဇ်နှင့် တွေ့ဆုံပြီးနောက် စုချန်ချန်မှာ ပထမအဆင့် စစ်သူကြီး ဘွဲ့တံဆိပ်ကို ချီးမြှင့်ခြင်း ခံရလေသည်။

ချင်လောနှင့် ပတ်သက်၍မူ...

အိုမင်းနေသော မိန်းမစိုးကြီးက ချင်လော့ကို ကြည့်ကာ ပြောဆိုလိုက်၏။ "အရှင်မင်းသား... အရှင်မင်းကြီးက ရွေးချယ်စရာ နှစ်ခု ပေးထားပါတယ်... တစ်က မြို့တော်မှာ နေပြီး အင်ပါယာမျိုးနွယ်တရားရုံးမှာ ဆယ်နှစ်ကြာ အမှုထမ်းဖို့... နှစ်က မြို့တော်ကနေ ထွက်သွားပြီး နတ်ဆိုးနှိမ်နင်းရေးဌာနရဲ့ တပ်ဖွဲ့ ၁၀ ထဲ ဝင်ရောက်ဖို့ပါပဲ..."

"ငါ နတ်ဆိုးနှိမ်နင်းရေးဌာနကို သွားမယ်..." ချင်လော့က ပြတ်သားစွာ ဆုံးဖြတ်လိုက်လေသည်။

ထပ်မံ နှောင့်နှေးခြင်း မရှိတော့ဘဲ အိုမင်းနေသော မိန်းမစိုးကြီးက ကြေညာလိုက်၏။ "နဝမမင်းသား ချင်လော့ကို ဒီနေ့မှစပြီး နတ်ဆိုးနှိမ်နင်းရေးဌာန ဒသမတပ်ဖွဲ့ ၁၀ ရဲ့ ဒုတိယတပ်မှူးချုပ်အဖြစ် ခန့်အပ်လိုက်တယ်..."

သတင်းအချက်အလက်များကို လျှို့ဝှက်ထားခဲ့သော်လည်း ချင်လော့က နတ်ဆိုးနှိမ်နင်းရေးဌာန တပ်ဖွဲ့ ၁၀ ၏ ဒုတိယတပ်မှူးချုပ်ဖြစ်လာပြီး မကြာမီမှာပင် မြို့တော်ရှိ လူများက သူ၏ တည်နေရာကို သိရှိချင်လာခဲ့ကြသည်။ ချင်လော့၏ ဩဇာလွှမ်းမိုးမှု ကွန်ရက်အတွင်းရှိ သူများအားလုံးက ချင်လော့၏ ခန့်အပ်မှုကို သိရှိသွားခဲ့ကြလေသည်။

မမြင်ရသော လက်တစ်ဖက်က သတင်းအချက်အလက် အားလုံးကို သိလိုသူတိုင်းထံသို့ လွှဲပြောင်းပေးခဲ့ပေ၏။

ထို့ပြင် ချင်လော့က တာဝန်ကို လွှဲပြောင်းရယူပြီးနောက် သူ မြို့တော်မှ ထွက်ခွာမည့် အတိအကျ အချိန်နှင့် လမ်းကြောင်းကိုပင် သူတို့က ပေးပို့ခဲ့ကြလေသည်။