အခန်း ၈၂၅

အပိုင်း(၈၂၅) လင်ယွီရုံ နှင့် စုန်းမ

လင်းယွမ်က စကားပြောလို့ပင် မဆုံးသေး၊ မြူခိုးမြို့တော်ဘက်ဆီမှ လူရိပ်တစ်ခုက အလွန်လျင်မြန်သော အလျင်ဖြင့် ပျံသန်းလာသည်ကို မြင်လိုက်ရသည်။

ထိုလူရိပ် ပျံသန်းလာသည်နှင့်အမျှ ပတ်ဝန်းကျင် လေထုထဲတွင် ရေခဲပွင့်များ အမြောက်အမြား ထွက်ပေါ်လာ၏။

အနီးနားရှိ ရွာကျနေသော မိုးရေပေါက်များသည်လည်း လျင်မြန်စွာ အေးခဲသွားပြီး ရေခဲစွယ်များအဖြစ်သို့ ပြောင်းလဲသွားကြသည်။

"ဘုန်း"

ရောက်လာသောသူက လေယာဉ်ပျံတစ်စင်းကို ဝင်တိုက်ဖြတ်သွားပြီး ခြေထောက်ဖြင့် ရေပြင်ကို အားကုန် ဆောင့်နင်းချလိုက်သည်။

"ဒိုင်း"

ရေအောက်ရှိ ရေငုပ်သင်္ဘောတစ်စင်းမှာ ထိုသို့ ဆောင့်နင်းလိုက်သော အရှိန်ကြောင့် အစိတ်စိတ်အမွှာမွှာ ပေါက်ကွဲသွားပြီး ကြီးမားသော မီးတောက်မီးလျှံများအဖြစ် ပြောင်းလဲသွားလေသည်။

ခြေအောက်ရှိ ရေငုပ်သင်္ဘောကို နင်းခွဲလိုက်ပြီးနောက် ထိုလူရိပ်က ဦးတည်ရာကို လျင်မြန်စွာ ပြောင်းလဲလိုက်ပြီး ကောင်းကင်ယံသို့ ပျံတက်သွားသည်ကို မြင်လိုက်ရ၏။

လေထဲတွင် ရှိနေစဉ်မှာပင် သူမ၏ ခန္ဓာကိုယ်က အဆမတန် ကြီးမားလာပြီး မျိုးရိုးဗီဇ ပြန်လည်ဖွဲ့စည်းခြင်း အခြေအနေသို့ ချက်ချင်း ကူးပြောင်းသွားတော့သည်။

"ဝုန်း... ဝုန်း... ဝုန်း"

လေထုပေါက်ကွဲသံများ ဆက်တိုက် ထွက်ပေါ်လာပြီးနောက် အမြင့်ပေ ၂၀၀ နီးပါးခန့်ရှိသော ဧရာမ ရေသူမကြီး တစ်ကောင် ကောင်းကင်ယံထက်တွင် ပေါ်ပေါက်လာသည်ကို မြင်တွေ့လိုက်ရသည်။

သူမ ထွက်ပေါ်လာသည်နှင့်အတူ ပတ်ဝန်းကျင်ရှိ လေထုအပူချိန်ကလည်း လျင်မြန်စွာ ကျဆင်းသွားလေသည်။

ရွာကျနေသော မိုးရေများသည် ရေခဲမိုးများအဖြစ်သို့ ချက်ချင်း ပြောင်းလဲသွားပြီး တဖျောက်ဖျောက် မြည်ကာ ကျဆင်းလာတော့သည်။

သူမကို ဗဟိုပြု၍ ပတ်လည် ပေရာချီ အကွာအဝေးအတွင်းရှိ ရေပြင်ကြီးမှာ အလျင်အမြန် အေးခဲသွား၏။

ဤမြင်ကွင်းကို မြင်လိုက်ရသောအခါ ချန်ကျန့်ဖုန်းက မနေနိုင်ဘဲ ရေရွတ်လိုက်သည်။ "လင်ယွီရုံ"

လင်းယွမ်ကလည်း လှမ်းကြည့်လိုက်ပြီး အနည်းငယ် အံ့သြသွားသည်။ "သူရဲ့ အစွမ်းတွေ ဒီလောက်တောင် တိုးတက်လာတာလား"

လင်းယွမ်က သူမကို သိမ်းသွင်းခဲ့စဉ်က သူမ၏ မျိုးရိုးဗီဇ ပြန်လည်ဖွဲ့စည်းခြင်း တိုးတက်မှုနှုန်းမှာ ၄၀% ဝန်းကျင်ခန့်သာ ရှိခဲ့သည် မဟုတ်ပါလော။

ဤလပိုင်း တိုတောင်းသော အချိန်လေးအတွင်း မိမိကိုယ်တိုင်က စနစ် ကို အသုံးချ၍ မျိုးရိုးဗီဇ ပြန်လည်ဖွဲ့စည်းခြင်း ဆေးရည်များကို လဲလှယ်ခဲ့သောကြောင့် အစွမ်းများ အရှိန်အဟုန်ဖြင့် တိုးတက်လာခဲ့ခြင်း ဖြစ်သည်။

သို့သော် သူမတွင် စနစ် မရှိဘဲနှင့်ပင် ဤမျှ မြန်ဆန်စွာ အစွမ်းတက်လာလိမ့်မည်ဟု မထင်မှတ်ထားခဲ့ပေ။

ထို့ကြောင့် လင်းယွမ် အံ့သြသွားခြင်းမှာ သဘာဝကျလှ၏။

ချန်ကျန့်ဖုန်းက မနေနိုင်ဘဲ ဝင်ပြောလိုက်သည်။ "ဆရာလင်း... သူ့ရဲ့ ခန္ဓာကိုယ် အရွယ်အစားကို ကြည့်ရတာ... မျိုးရိုးဗီဇ ပြန်လည်ဖွဲ့စည်းခြင်း တိုးတက်မှုနှုန်း ၆၀% အထက်ကို ရောက်နေလောက်ပြီ ထင်တယ်"

လင်းယွမ်က ခေါင်းညိတ်လိုက်ပြီး "အမှန်ပဲ"

မျိုးရိုးဗီဇ ပြန်လည်ဖွဲ့စည်းခြင်း တိုးတက်မှုနှုန်းကို ခန့်မှန်းရန် အလွယ်ကူဆုံး နည်းလမ်းမှာ တစ်ဖက်လူ၏ ခန္ဓာကိုယ် အရွယ်အစားကို ကြည့်ခြင်းပင် ဖြစ်သည်။

ယေဘုယျအားဖြင့် ထိုအချက်နှစ်ချက်သည် ပုံသေ ပြောင်းလဲလေ့ရှိသည်။

သေချာသည်မှာ... အချို့သော ထူးခြားသည့် မျိုးရိုးဗီဇ ပုံစံများတွင်တော့ ဤအခြေအနေနှင့် ကိုက်ညီမှု မရှိနိုင်ပေ။

သို့သော် အများအားဖြင့်တော့ ဤလက္ခဏာရပ်နှင့် ကိုက်ညီကြသည်။

ယခု လင်ယွီရုံ၏ ခန္ဓာကိုယ် အရွယ်အစားသည် ပေ ၂၀၀ ကျော်နေပြီ ဖြစ်ရာ မျိုးရိုးဗီဇ ပြန်လည်ဖွဲ့စည်းခြင်း တိုးတက်မှုနှုန်းမှာ သေချာပေါက် ၆၀% အထက်သို့ ရောက်ရှိနေပြီ ဖြစ်၏။

ချန်ကျန့်ဖုန်းက မနေနိုင်ဘဲ ထပ်မေးလိုက်သည်။ "သူ ဘယ်လိုများ လေ့ကျင့်ခဲ့လို့ ဒီလောက် မြန်နေရတာလဲ"

လင်းယွမ်က ပြုံးလိုက်ပြီး "ဒီ ရှေးခေတ်က အစွမ်းပိုင်ရှင်တွေရဲ့ လေ့ကျင့်တဲ့ နည်းလမ်းက ခင်ဗျားတို့နဲ့ မတူဘူး... သူတို့က ရှေးခေတ်တုန်းကတည်းက ဒီလို အဆင့်အတန်းမျိုးကို ရောက်ခဲ့ဖူးပြီးသားလေ"

"အခုက အရင် လျှောက်ခဲ့ဖူးတဲ့ လမ်းကို ပြန်လျှောက်နေရုံ သက်သက်ပဲ"

ချန်ကျန့်ဖုန်းက ထိုစကားကို ကြားသောအခါမှသာ သဘောပေါက်သွားတော့သည်။

"ဒါဆိုရင်တော့ တကယ်ကို ယှဉ်လို့ မရနိုင်တော့ဘူးပဲ... သူတို့က အစကတည်းက ထိပ်သီးတွေ ဖြစ်နေခဲ့တာကိုး" ဟု ချန်ကျန့်ဖုန်းက ခေါင်းညိတ်လိုက်သည်။

"ကဲ... ရန်သူတွေဘက်က မျိုးရိုးဗီဇ ပြန်လည်ဖွဲ့စည်းထားတဲ့ အစွမ်းပိုင်ရှင်တွေကို ထုတ်သုံးလာပြီဆိုတော့... ခင်ဗျားလည်း သွားပြီး သွေးပူအောင်လုပ်လိုက်ပါဦး... ဟိုစက်ရုပ်တွေကို သွားတားလိုက်"

"နားလည်ပါပြီ"

ချန်ကျန့်ဖုန်းက ဘာမှဆက်မပြောတော့ဘဲ ချက်ချင်းပင် လေယာဉ်ပေါ်မှ ခုန်ထွက်သွားလေသည်။

လေထဲတွင် ရှိနေစဉ်မှာပင် သူက အကျယ်ကြီး ဟစ်အော်လိုက်၏။

"မုန်ယာကုမ္ပဏီက ငတုံးကောင်တွေ... ငါ မင်းတို့နဲ့ ကစားပေးမယ်ကွ"

သူက ချက်ချင်းပင် အသွင်ပြောင်းလိုက်ပြီး ဧရာမ ရွှေရောင် ကိုယ်ထည်ရှိသော ကျားသစ်ကြီး တစ်ကောင်အဖြစ်သို့ ပြောင်းလဲသွားတော့သည်။

ရွှေရောင် ကိုယ်ထည်ကြီးဖြင့် သူက လေယာဉ်တင်သင်္ဘောပေါ်မှ ပျံသန်းထွက်ပေါ်လာသော ဧရာမ စက်ရုပ်ကြီးများဆီသို့ ပြေးဝင်လုံးထွေးလိုက်လေသည်။

"ရေခဲဓာတ် အစွမ်းပိုင်ရှင်လား"

စုန်းမ မော်လီက လင်ယွီရုံကို ထက်မြက်သော အကြည့်များဖြင့် စူးစိုက်ကြည့်လိုက်ပြီး သူမ၏ မျက်ဝန်းများထဲတွင် အေးစက်စက် အငွေ့အသက်များ ပါဝင်နေသည်။

လင်ယွီရုံ၏ မျက်နှာလေးမှာ အလွန်တရာ လှပကျော့ရှင်းလှပြီး ခေါင်းတွင် ရေခဲသရဖူကို ဆောင်းထားသည်။ သူမက လက်ကို ဆန့်ထုတ်၍ ဖမ်းဆုပ်လိုက်ရာ နှင်းခဲများဖြင့် စုစည်းထားသော ဧရာမ ရေခဲဓားကြီး တစ်လက်က သူမ၏ လက်ထဲတွင် ထွက်ပေါ်လာ၏။

သူမက လက်ထဲရှိ ရေခဲဓားကြီးကို မြှောက်ကိုင်လိုက်ပြီး အေးအေးဆေးဆေးပင် ပြောလိုက်သည်။ "အမှောင်ဓာတ် အစွမ်းပိုင်ရှင်ချင်း အတူတူတောင်... နင့်ရဲ့ အစွမ်းက သခင်လေးနဲ့ ယှဉ်ရင် အရမ်း ကွာခြားလွန်းနေတယ်"

"ဟင်... နင့်ရဲ့သခင်... ဘယ်သူလဲ" မော်လီက ရင်ထဲတွင် အံ့သြသွားသည်။

မျိုးရိုးဗီဇ ပြန်လည်ဖွဲ့စည်းခြင်း ၆၀% အထက် ရောက်နေသည့် အစွမ်းထက်သူ တစ်ယောက်က သူတစ်ပါးရဲ့ ကျေးကျွန် ဖြစ်နေသေးတယ်ပေါ့။

သူမ၏ သခင်ဆိုသည်မှာ မည်သူနည်းဟု မော်လီမှာ မနေနိုင်ဘဲ စပ်စုချင်စိတ် ပေါ်လာသည်။

သို့သော် လင်ယွီရုံက ထိုကိစ္စကို ဆက်မပြောတော့ဘဲ လက်ထဲရှိ ရေခဲဓားကြီးကို မြှောက်ကိုင်ကာ ပြောလိုက်၏။ "ရောက်လာမှတော့ ဒီမှာပဲ အသက်ကို ထားရစ်ခဲ့တော့"

"ဝုန်း"

သူမ၏ ရေခဲဓားရှည်ကြီးကို မြှောက်ကိုင်လိုက်သည်နှင့် တစ်ပြိုင်နက် ခန္ဓာကိုယ်ပေါ်မှ အဆုံးအစမရှိသော စွမ်းအင်အလင်းတန်းများ ပေါက်ကွဲထွက်ပေါ်လာသည်။

မျက်စိတစ်မှိတ်အတွင်းမှာပင် ကြောက်မက်ဖွယ်ကောင်းသော အအေးဓာတ်က ပတ်ဝန်းကျင် အရပ်မျက်နှာ အနှံ့အပြားသို့ လျင်မြန်စွာ လွှမ်းခြုံသွားတော့သည်။

မိုင်အနည်းငယ် အကွာအဝေး ပတ်လည်အတွင်းတွင် ဧရာမ ရေခဲစက်ကွင်းကြီး တစ်ခု ဖြစ်ပေါ်လာလေသည်။

"ထာဝရ ရေခဲချောက်နက်"

"ရွှစ်"

ထိုဓားချက်ကို အားကုန် ခုတ်ချလိုက်ရာ ကြောက်မက်ဖွယ်ကောင်းသော ဓားအလင်းတန်းက ကောင်းကင်ယံကို ဖြတ်သန်းသွားပြီး ဧရာမ ရေခဲဓားသွားကြီးအဖြစ် ပြောင်းလဲကာ လေခွင်းသံများဖြင့် ခုတ်ပိုင်းသွားလေသည်။

ထိုရေခဲများ လွှမ်းခြုံသွားသည့် ခဏမှာပင် စုန်းမ မော်လီက အခြေအနေ မဟန်တော့ကြောင်း သတိထားမိလိုက်သည်။

သူမက ချက်ချင်းပင် အစွမ်းကို ထုတ်ဖော်လိုက်ရာ တစ်ကိုယ်လုံးတွင် အမှောင်ဓာတ် စွမ်းအင်များ တရိပ်ရိပ် ထွက်ပေါ်လာ၏။

သို့သော် ချက်ချင်းမှာပင် သူမ၏ မျက်နှာအမူအရာ ပြောင်းလဲသွားသည်။

"ဒုက္ခပဲ... ဒီဧရိယာထဲမှာ ရေခဲဓာတ် စွမ်းအင်တွေ အရမ်းများနေတော့ တခြား ဓာတ်စွမ်းအင်တွေကို ဖိနှိပ်ထားသလို ဖြစ်နေတယ်"

မျက်နှာပျက်သွားသည်နှင့် တစ်ပြိုင်နက် သူမ၏ ခန္ဓာကိုယ်က နောက်သို့ လျင်မြန်စွာ ဆုတ်ခွာသွားလေသည်။

"ဝှစ်"

ကြောက်မက်ဖွယ်ကောင်းသော ရေခဲဓားကြီးက မျက်စိတစ်မှိတ်အတွင်းမှာပင် ရစ်ပတ်တိုက်ခတ်သွားသည်။

ဖြတ်သန်းသွားသော နေရာတိုင်းရှိ အရာအားလုံး ရေခဲအဖြစ် အေးခဲသွားတော့၏။

ဆံခြည်တစ်မျှင်စာ အသက်လုရမည့် အချိန်တွင် မော်လီ၏ ခန္ဓာကိုယ်က ရုတ်တရက် ပုံစံပျက်သွားပြီး အရိပ်တစ်ခုအဖြစ် ပြောင်းလဲကာ ချက်ချင်း ပျောက်ကွယ်သွားလေသည်။

"ဒိုင်း"

ဓားချက်က လွဲချော်သွားပြီးနောက် ကျယ်လောင်စွာ ပေါက်ကွဲထွက်သွားသည်။

လင်ယွီရုံက အကြည့်တစ်ချက် ဝေ့ကြည့်လိုက်ပြီး အေးစက်စက် မျက်နှာပေါ်တွင် လှောင်ပြုံးတစ်ခု ပေါ်လာသည်။ "ထာဝရ ရေခဲချောက်နက် စက်ကွင်းထဲမှာ နင် ငါ့ရဲ့ အာရုံခံနိုင်စွမ်းကနေ ဘယ်လိုမှ လွတ်အောင် ပြေးနိုင်မှာ မဟုတ်ဘူး"

သူမ၏ ရေခဲဓားရှည်ကြီးကို ရုတ်တရက် လွှဲယမ်းလိုက်၏။

"ရွှစ်"

အားကောင်းသော ရေခဲဓားလှိုင်းတစ်ခုက ရေခဲပြင်ကို ဆုတ်ဖြဲကာ လေခွင်းသံများဖြင့် ထွက်ပေါ်လာပြီး ကျယ်လောင်စွာ ပေါက်ကွဲသွားပြန်သည်။

သို့သော် ပတ်ဝန်းကျင်တွင် မည်သည့် လှုပ်ရှားမှုမျှ မရှိသေးသဖြင့် သူမ၏ မျက်ဝန်းများ ကျဉ်းမြောင်းသွားသည်။

ထိုစဉ် ရုတ်တရက် သူမ၏ ခြေအောက်ရှိ အရိပ်က အနည်းငယ် လှုပ်ရှားသွားပြီး အမြီးတစ်ခုက ရုတ်တရက် ထွက်ပေါ်လာကာ ရစ်ပတ်လိုက်လေသည်။

"ဂျွတ်... ဂျွတ်... ဂျွတ်"

မျက်စိတစ်မှိတ်အတွင်းမှာပင် ထိုအမြီးကြီးက လင်ယွီရုံကို ရစ်ပတ်သွားပြီးနောက် အောက်ဘက်သို့ အားကုန် ဆွဲချကာ အရိပ်ထဲသို့ ဆွဲသွင်းရန် ကြိုးစားတော့သည်။

လင်ယွီရုံ၏ မျက်နှာ ခက်ထန်သွားပြီး ဓားရှည်ကြီးဖြင့် မြေပြင်ကို ခုတ်ချလိုက်သည်နှင့် တစ်ပြိုင်နက် ခြေအောက်တွင် ရေခဲများ စုစည်းသွား၏။

ခဏချင်းမှာပင် ကြောက်မက်ဖွယ် ရေခဲများက သူမ၏ ခြေထောက်နှစ်ဖက်ကို အေးခဲစေလိုက်ပြီး မြွေအမြီးကြီးဆီသို့ လျင်မြန်စွာ ကူးစက်သွားလေသည်။

ဓားရှည်ကြီးကလည်း ထပ်ချပ်မကွာ ခုတ်ပိုင်းလာတော့သည်။

ထိုမြွေအမြီးကြီးမှာ ချက်ချင်း အေးခဲသွားပြီး ဓားရှည်ကြီး၏ ခုတ်ပိုင်းမှုကို ခံရတော့မည့်ဆဲဆဲတွင်...

မြွေအမြီးက ရုတ်တရက် လှုပ်ရှားသွားပြီး အရိပ်တစ်ခုအဖြစ် လျင်မြန်စွာ ပြောင်းလဲကာ အရိပ်ထဲသို့ ပျောက်ကွယ်သွားလေသည်။

လင်ယွီရုံက မျက်မှောင်ကြုတ်လိုက်ပြီး သူမ ခြေအောက်ရှိ အရိပ်ကို ကြည့်ကာ လင်းယွမ်နှင့် ပထမဆုံးအကြိမ် တိုက်ခိုက်ခဲ့စဉ်က သုံးခဲ့သော နည်းလမ်းကို သတိရသွားသည်။

သူမ၏ လက်ထဲရှိ ဧရာမ ဓားကြီးက တစ်ချက် တုန်ခါသွားပြီးနောက် သူမ၏ ခန္ဓာကိုယ်သည်လည်း စစ်မှန်သော ရေခဲတုံးများအဖြစ်သို့ အဆက်မပြတ် ပြောင်းလဲသွား၏။

တစ်ကိုယ်လုံးက ရေခဲဓာတ်များဖြင့် ဖွဲ့စည်းထားသော ရေခဲလူသားအဖြစ်သို့ လျင်မြန်စွာ ပြောင်းလဲသွားတော့သည်။

သူမက ရေခဲလူသားအဖြစ် ပြောင်းလဲသွားသည်နှင့်အမျှ အလင်းတန်းများက သူမ၏ ခန္ဓာကိုယ်ကို ဖောက်ထွင်းဖြတ်သန်းသွားနိုင်သဖြင့် အရိပ်ထွက်ပေါ်ခြင်း မရှိတော့ပေ။

ချက်ချင်းပင် စုန်းမ မော်လီမှာ ပုန်းကွယ်စရာ နေရာမရှိတော့ဘဲ သူမ၏ ခန္ဓာကိုယ် အစစ်အမှန် ပြန်လည် ထွက်ပေါ်လာလေသည်။

သူမ၏ ခန္ဓာကိုယ်က လျင်မြန်စွာ လှုပ်ရှားသွားပြီး ဆိတ်ခေါင်းပေါ်ရှိ ဦးချိုနှစ်ချောင်းဖြင့် လင်ယွီရုံကို အားကုန် ဝင်တိုက်လိုက်သည်။

ရေခဲလူသားအဖြစ် ပြောင်းလဲထားသော လင်ယွီရုံက ရေခဲဓားရှည်ကြီးကို မြှောက်ကာ မော်လီ၏ ဦးချိုများပေါ်သို့ အားကုန် ခုတ်ချလိုက်၏။

"ဘုန်း"

လူရိပ်နှစ်ခုလုံး ချက်ချင်း လွင့်စင်သွားကြပြီး ကြောက်မက်ဖွယ် လေထုပေါက်ကွဲမှုက ဧရာမ လေလှိုင်းကြီးအဖြစ် ပေါက်ကွဲထွက်ကာ အရပ်မျက်နှာ အနှံ့အပြားသို့ အဆက်မပြတ် ပျံ့နှံ့သွားတော့သည်။

၎င်းသည် သူတို့နှစ်ဦး တိုက်ခိုက်ခဲ့သည့် အချိန်မှစ၍ ပထမဆုံးအကြိမ် အမှန်တကယ် ထိတွေ့တိုက်ခိုက်မိခြင်း ဖြစ်သည်ဟု ဆိုနိုင်သည်။

မော်လီ၏ ခန္ဓာကိုယ်က နောက်သို့ လွင့်စဉ်သွားပြီး ရှည်လျားသော မြွေကိုယ်ထည်ကြီးက ရေခဲပြင်ပေါ်တွင် လိမ့်ဆင်းသွားကာ ရေခဲပြင်ကို အက်ကွဲသွားစေသည်။

သူမ၏ ခန္ဓာကိုယ်က အနည်းငယ် လှုပ်ရှားသွားပြီး အရိပ်မည်းတစ်ခုအဖြစ် ချက်ချင်း ပြောင်းလဲသွားပြန်၏。

အရိပ်မည်းက လျင်မြန်စွာ ကျယ်ပြန့်လာပြီး မျက်စိတစ်မှိတ်အတွင်းမှာပင် မိုင်ပေါင်းများစွာ ကျယ်ဝန်းလာတော့သည်။

"အမှောင် မိစ္ဆာစက်ကွင်း"

အမည်းရောင် အရိပ်ထဲမှ မော်လီ၏ ဒေါသတကြီး ဟစ်အော်သံ ထွက်ပေါ်လာပြီးနောက် ဧရာမ အရိပ်ဧရိယာကြီးက ခိုင်မာလာကာ အမည်းရောင် ဧရိယာအဖြစ် ပြောင်းလဲသွားပြီး လင်ယွီရုံ၏ ထာဝရ ရေခဲချောက်နက် နှင့် စက်ကွင်းနယ်မြေ လုကြလေတော့သည်။

သူတို့နှစ်ဦး၏ စက်ကွင်းများ ရိုက်ခတ်မှုကြောင့် ပေါက်ကွဲသံများ အဆက်မပြတ် ထွက်ပေါ်နေ၏။

ရေခဲများနှင့် အမှောင်စွမ်းအင်များ ပြင်းထန်စွာ ရိုက်ခတ်နေကြပြီး အနီးနားသို့ ချဉ်းကပ်လာသော လေယာဉ်များ၊ စစ်သင်္ဘောများနှင့် ရေငုပ်သင်္ဘောများမှာ ဤစွမ်းအား၏ ရိုက်ခတ်မှုကို ခံရကာ မျက်စိတစ်မှိတ်အတွင်းမှာပင် ပေါက်ကွဲကြေမွသွားကြသည်။

လင်းယွမ်က ကောင်းကင်ယံတွင် ထိုင်ရင်း ဤမြင်ကွင်းကို စူးစိုက်ကြည့်နေသည်။

"အမှောင်ဓာတ် စွမ်းအင်... တွင်းနက်အရိပ်ရေပေါ်ကျွန်းနဲ့ ဆင်တူတဲ့ စက်ကွင်းစွမ်းရည်မျိုး ရှိပြီး... အရိပ်ထဲကို အချိန်မရွေး ပုန်းကွယ်နိုင်တဲ့ စွမ်းရည်လည်း ရှိသေးတယ်"

"ကြည့်ရတာ အမှောင်ဓာတ် အစွမ်းပိုင်ရှင်တွေရဲ့ တိုက်ခိုက်ပုံက တော်တော်လေး ဆင်တူနေတာပဲ"

"ဒါပေမဲ့ နှမြောစရာပဲ... ဒါတွေက ငါ့အတွက်တော့ ဘာအန္တရာယ်မှ မပေးနိုင်ဘူး"

သူက ခပ်ဟဟ ရယ်မောလိုက်သည်။ ယခင်က လျှိုချင့်ဟုန်က စုန်းမသည် မည်မျှ အစွမ်းထက်ကြောင်း ကြွားဝါပြောဆိုခဲ့သည်ကို ကြားခဲ့ရသည်။

ယခု ကြည့်ရသည်မှာ ထိုမျှလောက်သာ ရှိသေးသည်။

သေချာသည်မှာ... လျှိုချင့်ဟုန်၏ အမြင်တွင်တော့ စုန်းမ မော်လီ၏ အစွမ်းများက တကယ်ကို ကြောက်မက်ဖွယ် ကောင်းနေပေလိမ့်မည်။

အနည်းဆုံးတော့ မော်လီက အမှောင်ဓာတ် အစွမ်းများကို သုံးလိုက်ပြီးနောက် လျှိုချင့်ဟုန်၏ အစောင့်အရှောက်တော်ဝင်နတ်ဘုရားက သူမကို ဘာမှ တတ်နိုင်ခဲ့မည် မဟုတ်ပေ။

လင်းယွမ်က အကြည့်ကို လွှဲကာ မုန်ယာကုမ္ပဏီ၏ လေယာဉ်တင်သင်္ဘောဘက်သို့ ကြည့်လိုက်သည်။

ချန်ကျန့်ဖုန်းက မျိုးရိုးဗီဇ ပြန်လည်ဖွဲ့စည်းခြင်း ပုံစံဖြင့် အသွင်ပြောင်းကာ စက်ရုပ်များကို စတင် ဝင်ရောက်တိုက်ခိုက်လိုက်သည်နှင့်...

ချက်ချင်းပင် ထိုဧရာမ စက်ရုပ်ကြီးများမှာ အရေးနိမ့်သွားကြပြီး ရွှေရောင်ချပ်ဝတ် ကျားသစ်ကြီး၏ ကိုက်ဖြတ်မှုကြောင့် အပြင်ဘက် သံချပ်ကာများ အလွယ်တကူ စုတ်ပြဲကုန်ကြသည်။

အချို့သော စွမ်းအင် အကာအကွယ်ကို ဖွင့်နိုင်သည့် စက်ရုပ်များကတော့ ကျားသစ်ကြီး၏ ခြေသည်းများကို ကာကွယ်နိုင်ကြသည်။

သို့သော် မမေ့သင့်သောအချက်မှာ ချန်ကျန့်ဖုန်းသည် သတ္တုဓာတ် အစွမ်းပိုင်ရှင် တစ်ယောက် ဖြစ်သည်။ သူက သတ္တုအဖြစ် အသွင်ပြောင်းနိုင်ရုံသာမက သတ္တုများကိုလည်း အတိုင်းအတာ တစ်ခုအထိ ထိန်းချုပ်နိုင်စွမ်း ရှိပေသည်။

ဤဧရာမ စက်ရုပ်ကြီးများသည် သူနှင့် အနီးကပ် တိုက်ခိုက်လိုက်သည်နှင့် ချက်ချင်းပင် သူ၏ စိတ်စွမ်းအင် လွှမ်းမိုးမှုကို ခံရပြီး တစ်စိတ်တစ်ပိုင်း သတ္တုအဖြစ် ပြောင်းလဲသွားကြသည်။

အကာအကွယ် ခံထားလျှင်တောင် အသုံးမဝင်ဘဲ စက်ပိုင်းဆိုင်ရာ ချို့ယွင်းမှု အဆင့်အမျိုးမျိုး ဖြစ်ပေါ်လာကြ၏။

ဤသည်ကို မြင်သောအခါ လေယာဉ်တင်သင်္ဘော ကုန်းပတ်ပေါ်ရှိ ဝူယောင်ပန်းမှာ ဆက်၍ ငြိမ်မနေနိုင်တော့ပေ။

"ခန္ဓာကိုယ် အရွယ်အစားက ပေ ၆၀ ကျော်ပဲ ရှိတာ... သူ့ရဲ့ မျိုးရိုးဗီဇ ပြန်လည်ဖွဲ့စည်းခြင်း တိုးတက်မှုနှုန်းက သေချာပေါက် ၂၀% မကျော်သေးဘူး... ဒါကိုတောင် ဒီလောက် ရမ်းကားရဲသေးတယ်ပေါ့လေ"

"အာရှင်း... သူ့ကို သွားရှင်းလိုက်"

"ဟုတ်ကဲ့ပါ"

ဝူယောင်ပန်း၏ နောက်ကျောမှ အမျိုးသားတစ်ဦး ထွက်လာသည်။

သူက အပေါ်သို့ ခုန်တက်လိုက်ပြီး လေထဲတွင် ရှိနေစဉ်မှာပင် သူ၏ ခန္ဓာကိုယ်မှ သွေးရောင် မြူခိုးများ ပျံ့နှံ့ထွက်ပေါ်လာ၏။

နောက်တစ်စက္ကန့်တွင် အလွန် ဧရာမ ကြီးမားလှသော ကျွဲကြီးတစ်ကောင်နှင့် တူသည့် သတ္တဝါကြီးအဖြစ် ပြောင်းလဲသွားလေသည်။

ထိုကျွဲကြီး၏ တစ်ကိုယ်လုံးကို ရေဓာတ်များဖြင့် ဖွဲ့စည်းထားပြီး အပြာနုရောင် အလင်းတန်းများ ဖြာထွက်နေသည်။

ခြေဖဝါး လေးဖက်စလုံးတွင် ရေစီးကြောင်းများ လည်ပတ်နေပြီး ရေတိမ်တိုက်များကို နင်းထားသကဲ့သို့ ဖြစ်နေ၏。

"ဝုန်း... ဝုန်း... ဝုန်း"

၎င်းက ခြေလေးဖက်ကို ကားလိုက်ရာ ကြောက်မက်ဖွယ် ရေလှိုင်းကြီးများ ပေါက်ကွဲထွက်လာသည်။

၎င်းက ချန်ကျန့်ဖုန်း၏ နောက်ကျောသို့ မျက်စိတစ်မှိတ်အတွင်း ရောက်ရှိသွားသည်။

"ဒိုင်း"

၎င်း၏ ခေါင်းဖြင့် ချန်ကျန့်ဖုန်းကို အားကုန် ဝင်တိုက်လိုက်သည်ကို မြင်လိုက်ရ၏။

ဧရာမ ပေါက်ကွဲသံကြီး ထွက်ပေါ်လာသည်။

ချန်ကျန့်ဖုန်း၏ ခန္ဓာကိုယ် ချက်ချင်း လွင့်စဉ်သွားသော်လည်း လေထဲတွင် ကျွမ်းတစ်ပစ် ထိုးလိုက်ပြီးနောက် သူ ပြန်လည် ရပ်တန့်သွားသည်။

ရွှေရောင် တောက်ပနေသော ကျားသစ်ကြီးက မဲ့ပြုံး ပြုံးလိုက်သည်။ "ဘယ်က ငတုံးကောင်လဲ... ငါက သတ္တုနဲ့ လုပ်ထားတာဆိုတာ မသိဘူးလား"

"ငါ့ကို ဝင်တိုက်ရဲတယ်ပေါ့... မင်းကို ငါ ဆွဲဖြဲပစ်မယ်ကွ"

"ရွှစ်"

သူက ရွှေရောင် အရိပ်တစ်ခုအဖြစ် ပြောင်းလဲသွားပြီး ကျွဲကြီး၏ အပေါ်ဘက်သို့ မျက်စိတစ်မှိတ်အတွင်း ရောက်ရှိသွား၏။

ထက်မြက်သော ခြေသည်းများဖြင့် အားကုန် ကုတ်ဖဲ့လိုက်သည်။

"ဗွက်... ဗွက်"

ထူးဆန်းသော အသံနှစ်သံနှင့်အတူ ရေလှိုင်းပွင့် နှစ်ခု ထသွားပြီး ရေပက်သံများ ထွက်ပေါ်လာသည်။

ထိုကျွဲကြီးက နောက်ခြေထောက်ဖြင့် အားကုန် ကန်ထုတ်လိုက်၏။

"ဒိုင်း" ခနဲ အသံနှင့်အတူ ချန်ကျန့်ဖုန်းမှာ နောက်တစ်ကြိမ် လွင့်စဉ်သွားရပြန်သည်။

ကျွဲကြီးက လှည့်ကြည့်ကာ လှောင်ပြုံး ပြုံးလိုက်သည်။ "ဒါဆို မင်းကရော မသိဘူးလား... ရေဓာတ် အသွင်ပြောင်းထားတဲ့ အခြေအနေမှာ မင်းရဲ့ ရုပ်ပိုင်းဆိုင်ရာ တိုက်ခိုက်မှုတွေက ငါ့အတွက်တော့ ယားတာလေး ကုတ်ပေးနေသလိုပဲဆိုတာ"

ချန်ကျန့်ဖုန်းကလည်း လှည့်ကြည့်လိုက်ပြီး ပတ်ဝန်းကျင်မှ ပေါက်ကွဲသံများက အဆက်မပြတ် ထွက်ပေါ်နေဆဲ ဖြစ်သည်။

ဧရာမ သားရဲကြီး နှစ်ကောင် အကြည့်ချင်း ဆုံသွားကြပြီး ကျားသစ်ကြီးက လူစကား ပြောလိုက်၏။

"ဟက်ဟက်... ရေဓာတ် အစွမ်းပိုင်ရှင်ကိုး"

"ဒါပေမဲ့ မင်းတစ်ယောက်တည်း ဓာတ်အသွင် ပြောင်းနိုင်တယ်လို့ ထင်နေတာလား"

ရွှေရောင်ချပ်ဝတ် ကျားသစ်ကြီးက ကိုယ်လုံးကို ဆန့်ထုတ်လိုက်ပြီး တောင်ပံနှစ်ဖက်ကို ခပ်ဖွဖွ တုန်ခါလိုက်ရာ အေးစက်စက် အလင်းရောင်များ တောက်ပလာသည်။

"ဓာတ်အစွမ်းပိုင်ရှင်တွေကို ရုပ်ပိုင်းဆိုင်ရာ တိုက်ခိုက်မှုနဲ့ သတ်ဖို့ဆိုတာ တကယ် ခက်ခဲတယ်"

"ဒါပေမဲ့ နှမြောစရာပဲ... မင်း မေ့နေတယ်ထင်တယ်... ဒီနေရာက စစ်မြေပြင်ကွ... ငါက မင်းကို လာသတ်တာ မဟုတ်ဘူး... မင်းနောက်က စက်အစုတ်အပြတ်တွေကမှ ငါ့ရဲ့ ပစ်မှတ်ကွ"

ချန်ကျန့်ဖုန်းက ခပ်ထေ့ထေ့ ရယ်မောလိုက်ပြီး သူ၏ ခန္ဓာကိုယ်မှာ မျက်စိတစ်မှိတ်အတွင်း ပျောက်ကွယ်သွားလေတော့သည်။

ဆက်ရန်...