အခန်း ၈၃၁

အပိုင်း (၈၃၁) လျှိုချင့်ဟုန်က မော်လီကို လက်နက်ချရန် ဖျောင်းဖျခြင်း

လင်းယွမ်အတွက်တော့ သူ့ကိုယ်ပေါ်ရှိ အကြီးမားဆုံးသော လျှို့ဝှက်ချက်မှာ စနစ် ပင် ဖြစ်သည်။

စနစ်အပြင် လင်းယွမ်၏ အသွင်တစ်ရာ မျိုးရိုးဗီဇသည်လည်း အလွန်တရာ အားကောင်းသည့် ပင်ကိုယ်အစွမ်းတစ်ခု ဖြစ်သည်။

၎င်းမှာ စနစ်က သူ့အတွက် ဖော်ထုတ်ပေးထားသော အစွမ်းထက်ဆုံး ပင်ကိုယ်အစွမ်းဖြစ်ပြီး သူ၏ မူလ ဆင့်ကဲပြောင်းလဲခြင်း အစွမ်းအတွက် အသင့်တော်ဆုံးသော ဆင့်ကဲပြောင်းလဲမှု လမ်းကြောင်းလည်း ဖြစ်ပေသည်။

တကယ်တမ်းလည်း ထိုအတိုင်းပင် ဖြစ်သည်။ စနစ်၏ အကူအညီဖြင့် အသွင်တစ်ရာ မျောက်ဝံမိစ္ဆာ မျိုးရိုးဗီဇမျိုးစေ့သည် ၎င်း၏ စွမ်းပကားများကို အဆက်မပြတ် ဖော်ထုတ်နိုင်ခဲ့ပြီး အတုယူပြောင်းလဲနိုင်သည့် မျိုးရိုးဗီဇမျိုးစေ့များလည်း ပိုမို များပြားလာခဲ့သည်။

ယနေ့အချိန်အထိ လင်းယွမ်သည် မျိုးရိုးဗီဇမျိုးစေ့ အမျိုးအစား ကိုးမျိုးတိတိကိုပင် စုဆောင်းရရှိထားခဲ့ပြီ ဖြစ်သည်။

ထိုသို့ ဘက်စုံထောင့်စုံမှ စွမ်းဆောင်နိုင်သော မျိုးရိုးဗီဇမျိုးစေ့များကြောင့်သာ သူသည် မည်သည့် အားနည်းချက်မျှ မရှိဘဲ ဤမျှ အစွမ်းထက်နေခြင်း ဖြစ်သည်။

အခြား အစွမ်းပိုင်ရှင်များ၏ အစွမ်းများ ဆိုလျှင် အားနည်းချက်ဆိုတာ ရှိစမြဲပင်။

ထိုသို့ဆိုလျှင် အသွင်တစ်ရာ မျောက်ဝံမိစ္ဆာ မျိုးရိုးဗီဇမျိုးစေ့၏ တစ်ခုတည်းသော အားနည်းချက်မှာ တိုးတက်မှု နှေးကွေးလွန်းခြင်းပင် ဖြစ်နိုင်ချေရှိသည်။

အစောပိုင်းအဆင့် အသွင်တစ်ရာ မျောက်ဝံမိစ္ဆာ မျိုးရိုးဗီဇမျိုးစေ့သည် တိုက်ခိုက်ခြင်းနှင့် အကာအကွယ်ပေးခြင်းစသည့် မည်သည့်အစွမ်းမျိုးမှ မရှိခဲ့ပေ။

အသက်ရှင်သန်ရေး ရှုထောင့်မှ ကြည့်လျှင်သာ ပြင်းထန်ဆိုးရွားသော ပတ်ဝန်းကျင် အခြေအနေအမျိုးမျိုးနှင့် ပိုမိုလိုက်လျောညီထွေဖြစ်အောင် နေထိုင်နိုင်စွမ်း ရှိရုံမျှသာ ဖြစ်သည်။

သို့သော် ခွန်အားနှင့် အလျင် စသည့် အဓိက မျိုးရိုးဗီဇ အရည်အသွေးများတွင်မူ အသွင်တစ်ရာ မျောက်ဝံမိစ္ဆာက မည်သည့် အသာစီးရမှုမျှ မရှိပေ။

၎င်း၏ အစွမ်းထက်မြက်မှုမှာ ပြောင်းလဲလိုက်သည့် မျိုးရိုးဗီဇမျိုးစေ့ အမျိုးအစားပေါ်တွင်သာ မူတည်နေသည်။

အသွင်တစ်ရာ မျောက်ဝံမိစ္ဆာသည် အခြား မျိုးရိုးဗီဇမျိုးစေ့များ အစဉ်လိုက် ထွက်ပေါ်လာပြီး ၎င်းတို့၏ တိုက်ခိုက်ရေးစွမ်းအားများကို ပြသနိုင်ရန် စင်မြင့်တစ်ခု ဖန်တီးပေးထားသည်ဟုပင် ဆိုနိုင်သည်။

သိသာထင်ရှားသည်မှာ ဤသည်က ဖွံ့ဖြိုးကြီးထွားမှုကို အသားပေးသော အစွမ်းတစ်မျိုး ဖြစ်သည်။

ဖြည်းဖြည်းချင်း အချိန်ယူ၍ ပျိုးထောင်ပေးရန် လိုအပ်လှသည်။

သို့သော် ပြဿနာမှာ ရေလွှမ်းမိုးနေသော ဤကမ္ဘာကြီးတွင် အန္တရာယ်များ ရေတွက်၍မရအောင် ရှိနေပြီး အချိန်မရွေး ဘေးအန္တရာယ်နှင့် ကြုံတွေ့ရနိုင်ခြင်းပင်။

ထို့အပြင် မျိုးရိုးဗီဇမျိုးစေ့ ဆိုသည်မှာလည်း ရှာဖွေရန် အလွန် ခက်ခဲလှပြီး အလွယ်တကူ စုစည်းဖန်တီး၍ မရနိုင်ပေ။

ထို့ကြောင့် တကယ်တမ်းတွင် သာမန်လူတစ်ယောက်သာ အသွင်တစ်ရာ မျောက်ဝံမိစ္ဆာ မျိုးရိုးဗီဇမျိုးစေ့ကို နိုးထလာခဲ့ပါက ထိုအရာက ကောင်းမွန်သော ကိစ္စတစ်ခုတော့ မဟုတ်ပေ။

ဒုတိယမြောက် မျိုးရိုးဗီဇမျိုးစေ့ကို မရှာတွေ့ခင်မှာပင် ထိုလူ သေဆုံးသွားနိုင်ချေ အလွန်များလှသည်။

လင်းယွမ်ကမူ စနစ်၏ အကူအညီကို ရရှိထားသောကြောင့်သာ ဤအားနည်းချက်ကို လျင်မြန်စွာ ဖြည့်ဆည်းနိုင်ခဲ့ခြင်း ဖြစ်သည်။

သို့သော် မုန်ယာကုမ္ပဏီမှ ကျင်းရှီရုံ ကို ပြန်ကြည့်လိုက်ပါဦး။

လျှိုချင့်ဟုန် ပြောစကားအရ တစ်ဖက်လူ၏ ပုံတူကူးချအစွမ်းသည် မည်သူ့အစွမ်းကိုမဆို ပုံတူကူးချနိုင်သည်တဲ့... ဒါက ဘယ်လို အားသာချက်ကြီး ဖြစ်နေတဲ့ စူပါအစွမ်းကြီးလဲ။

လင်းယွမ်ကိုယ်တိုင်ပင် ထိုအစွမ်းကို မနာလို ဖြစ်မိသွားသည်။

ဤအရာက သူ၏ အသွင်တစ်ရာ မျောက်ဝံမိစ္ဆာထက် များစွာ ပို၍ အဆင်ပြေလွယ်ကူနေသည်။

အသွင်တစ်ရာ မျောက်ဝံမိစ္ဆာသည် သက်ဆိုင်ရာ မျိုးရိုးဗီဇမျိုးစေ့များကို စုစည်းပြီးမှသာ အတုယူ ပြောင်းလဲနိုင်ခြင်း ဖြစ်သည်။

သို့သော် တစ်ဖက်လူကမူ အစွမ်းများကို တိုက်ရိုက် ပုံတူကူးချနိုင်နေသည်။

အကယ်၍ တစ်ဖက်လူက သူ့ဆီမှ အသွင်တစ်ရာ မျောက်ဝံမိစ္ဆာ ပင်ကိုယ်အစွမ်းကို တိုက်ရိုက် ပုံတူကူးချသွားမည် ဆိုပါက... ၎င်းက တစ်ဖက်လူကို ပိုမို အစွမ်းထက်လာစေရန် အကူအညီ ပေးလိုက်သလို ဖြစ်သွားမည် မဟုတ်ပါလော။

ထိုအချက်ကို လင်းယွမ် လုံးဝ လက်မခံနိုင်ပေ။

"ငါ့ကိုပြောစမ်း... ဒီကျင်းရှီရုံက ဘယ်လိုနည်းလမ်းကိုသုံးပြီး ပြိုင်ဘက်တွေရဲ့ အစွမ်းကို ပုံတူကူးချတာလဲ"

လင်းယွမ်က လျှိုချင့်ဟုန်ကို ကြည့်ကာ ထိုအရေးကြီးသော မေးခွန်းကို မေးလိုက်သည်။

အကယ်၍ တစ်ဖက်လူက တစ်ချက်ကြည့်ရုံဖြင့် သူတစ်ပါး၏ အစွမ်းကို ပုံတူကူးချနိုင်သည်ဆိုပါက... ထိုအရာက လုံးဝ ဖြေရှင်း၍ မရနိုင်သော ပြဿနာကြီးပင်။

သို့သော် ထိုသို့တော့ မဖြစ်နိုင်ဟု လင်းယွမ် ထင်သည်။

ဤကဲ့သို့ အစွမ်းကို ပုံတူကူးချသည့် နည်းလမ်းမှာ လွယ်ကူရိုးရှင်းလွန်းနေသည်။ ဤပုံတူကူးချအစွမ်း၏ အလုပ်လုပ်ပုံ သဘောတရားက မည်သို့ဖြစ်မည်ကို လင်းယွမ် စိတ်ကူးကြည့်ရန်ပင် ခက်ခဲလှသည်။

လျှိုချင့်ဟုန်က ဖြေလိုက်သည်။ "ကျွန်မလည်း သေချာတော့ မသိဘူး... ကျင်းရှီရုံက အစွမ်းတွေ အများကြီး သုံးနိုင်တယ်ဆိုတာလောက်ပဲ ကျွန်မတို့ သိထားတာ... အဲဒီအထဲက အစွမ်း တော်တော်များများက ကျွန်မတို့ မုန်ယာကုမ္ပဏီရဲ့ ရန်သူတွေဆီမှာ မြင်ဖူးခဲ့တဲ့ အစွမ်းတွေပဲ"

"ကျွန်မတို့ရဲ့ အစွမ်းတွေကိုတောင် ကျင်းရှီရုံက စောစောစီးစီးကတည်းက ပုံတူကူးချသွားလောက်ပြီလို့ ကျွန်မတို့ သံသယရှိနေကြတာ"

"ဒါပေမဲ့ သူ တကယ်တမ်း ဘယ်လိုလုပ်သွားလဲ ဆိုတာကိုတော့ ကျွန်မတို့ လုံးဝ မသိကြဘူး"

လင်းယွမ် မျက်မှောင်ကြုတ်လိုက်သည်။ "မင်းတို့ သွားမစုံစမ်းကြည့်ဖူးဘူးလား"

လျှိုချင့်ဟုန်က ခေါင်းငုံ့ကာ ပြန်ဖြေသည်။ "တိတ်တဆိတ် စုံစမ်းကြည့်ဖူးပါတယ်... ကျွန်မတို့ စုံစမ်းသိရှိရသလောက်တော့ သူက ပစ်မှတ်ကို ဖမ်းခေါ်လာပြီးတိုင်း ခဏလောက် ပျောက်သွားတတ်တယ်"

"သူ နောက်တစ်ကြိမ် ပြန်ပေါ်လာတဲ့ အချိန်ကျရင် အဲဒီလူရဲ့ အစွမ်းကို ရရှိနေပြီး ဟိုလူကတော့ လုံးဝ ပျောက်ချင်းမလှ ပျောက်သွားတော့တာပဲ"

"အဲဒီလူ သေသွားပြီလို့ ကျွန်မတို့ သံသယရှိကြတယ်... ဒါပေမဲ့ တစ်ဖက်လူရဲ့ အစွမ်းကို သူ ဘယ်လို ပုံတူကူးချလဲ ဆိုတာကိုတော့ မသိရပါဘူး"

လင်းယွမ် အတန်ကြာ စဉ်းစားခန်း ဝင်သွားပြီးနောက် မေးလိုက်သည်။ "ဒါဆို မင်းတို့ရဲ့ အစွမ်းတွေကို သူ ပုံတူကူးချသွားတဲ့ အချိန်တုန်းကရော... မင်းတို့ ဘာမှ မခံစားရဘူးလား"

"အာ... ကျွန်မတို့ရဲ့ အစွမ်းတွေကို သူ ဘယ်အချိန်က ပုံတူကူးချသွားလဲ ဆိုတာကိုတောင် မသိတာပါ"

"ပြီးတော့ သူ ကျွန်မတို့ရဲ့ အစွမ်းတွေကို တကယ်ရော ပုံတူကူးချသွားရဲ့လား ဆိုတာလည်း သေချာ မသိဘူး"

"အခုအချိန်အထိ သူ ကျွန်မတို့ရဲ့ အစွမ်းတွေကို သုံးပြတာ မမြင်ဖူးသေးဘူး"

လင်းယွမ်က မေးစေ့ကို ပွတ်သပ်ရင်း "မင်း ဆိုလိုချင်တာက သူ မင်းတို့ရဲ့ အစွမ်းတွေကို ပုံတူကူးချမထားတာလည်း ဖြစ်နိုင်တယ်ပေါ့"

လျှိုချင့်ဟုန်က ပြန်ပြောသည်။ "ဒါက သိပ်တော့ မဖြစ်နိုင်ဘူး ထင်တယ်... သူ့မှာ အဲဒီလို အစွမ်းမျိုး ရှိနေမှတော့ ကျွန်မတို့ရဲ့ အစွမ်းတွေကို ဘာလို့ ပုံတူကူးချမထားဘဲ နေပါ့မလဲ"

"သူ စောစောစီးစီးကတည်းက ပုံတူကူးချထားပြီးသား ဖြစ်မှာပါ... မသုံးဘဲ သိမ်းထားတာပဲ ဖြစ်မယ်လို့ ထင်တယ်"

သို့သော် လင်းယွမ်က ထိုအမြင်ကို သဘောမတူပေ။ ပုံတူကူးချပြီးမှတော့ သုံးစရာ အကြောင်းမရှိစရာ ဘာရှိဦးမည်နည်း။

ရာခိုင်နှုန်းများများ ဖြစ်နိုင်ချေရှိသည်က ကျင်းရှီရုံသည် သူတို့၏ အစွမ်းများကို တိုက်ရိုက် ပုံတူကူးချထားခြင်း မဟုတ်နိုင်ပေ။

ကျင်းရှီရုံ အနေဖြင့် အစွမ်းများကို ပုံတူကူးချရန် အခြား သီးသန့် လိုအပ်ချက်များများ ရှိနေသလား။

အကယ်၍ ထိုသို့သာဆိုလျှင် ဤအစွမ်းမှာ တော်တော်လေးကို အားနည်းသွားပြီ ဖြစ်သည်။

လင်းယွမ်က ထပ်မေးလိုက်သည်။ "ဒါဆို ကျင်းရှီရုံမှာ အခု လက်ရှိ အစွမ်းဘယ်နှစ်မျိုးလောက် ရှိနေလဲ သိလား"

"ဒါကတော့... ကျွန်မလည်း သေချာ မသိဘူး... သူက အခုနောက်ပိုင်း ကိုယ်တိုင်ဝင်ပါတာ တော်တော်လေး နည်းသွားပြီ... တစ်ခုခု လိုချင်ရင် ကျွန်မတို့ကိုပဲ သွားရှာခိုင်းတော့တာ"

"မင်း သိသလောက် ဘယ်နှစ်မျိုး ရှိလဲ"

"ကျွန်မ သိသလောက်ဆိုရင်ကို အစွမ်း အမျိုး ၃၀ ထက် မနည်းတော့ဘူး" လျှိုချင့်ဟုန်က ခဏမျှ ပြန်လည် စဉ်းစားပြီးမှ ဖြေလိုက်သည်။

လင်းယွမ် ရင်ထဲ ထိတ်သွားသည်။

အမျိုး ၃၀ ကျော်။

ဤသည်မှာ လျှိုချင့်ဟုန် သိထားသည်များသာ ရှိသေးသည်။ သူမ မသိထားသည်များကရော မည်မျှ ရှိနေဦးမည်နည်း။

ဒီ ကျင်းရှီရုံက တကယ်တမ်း အစွမ်း ဘယ်နှစ်မျိုးကို ပိုင်ဆိုင်ထားသနည်း။

လင်းယွမ် မျက်မှောင်ကြုတ်လိုက်မိသည်။ အစွမ်းနှင့် မျိုးရိုးဗီဇမျိုးစေ့တို့သည် မတူညီသော်လည်း... စိတ်စွမ်းအင် အမျိုးအစား အစွမ်းကဲ့သို့သော တူညီသည့် အစွမ်းများပင်လျှင် ထုတ်ဖော်ပြသသည့် စွမ်းရည်များမှာ ကွဲပြားခြားနားကြပေသည်။

ဥပမာအားဖြင့် စိတ်စွမ်းအင်ဖြင့် တိုက်ခိုက်ခြင်း၊ စိတ်အဝေးထိန်းအစွမ်း၊ စိတ်ဖတ်ခြင်း စသည်တို့သည် တကယ်တမ်းတွင် အဓိက အရည်အသွေးမှာ စိတ်စွမ်းအင်ပင် ဖြစ်သည်။

သို့သော် ထုတ်ဖော်ပြသသည့် စွမ်းရည်များမှာမူ မတူညီကြပေ။

ကျင်းရှီရုံ ထုတ်ဖော်ပြသထားသည့် စွမ်းရည်များမှာ အစွမ်း ၃၀ ကျော်အထိ ရှိနေရာ ထိုစွမ်းရည်များထဲတွင် အစွမ်းအရည်အသွေးများ၏ ကွာဟချက်က မည်မျှ ကြီးမားကျယ်ပြန့်မည်ကို လင်းယွမ် မသိနိုင်ပေ။

အကယ်၍ ဤစွမ်းရည်များကို ပညာရပ်များအဖြစ် သတ်မှတ်လိုက်မည် ဆိုပါက... တစ်ဖက်လူသည် အနည်းဆုံး ပညာရပ် ၃၀ ကျော်ကို တတ်မြောက်ထားသည်နှင့် တူညီနေသည်။

လင်းယွမ်က ချက်ချင်း မေးလိုက်သည်။ "သူ့ရဲ့ အဲဒီ အစွမ်း ၃၀ ကျော်ထဲမှာ အရည်အသွေး အလိုက် ခွဲခြားကြည့်မယ်ဆိုရင်... အရည်အသွေး အမျိုးအစား ဘယ်နှစ်မျိုးလောက် ရှိလဲ"

လျှိုချင့်ဟုန်က လင်းယွမ် ဆိုလိုချင်သည့် သဘောကို ချက်ချင်း နားလည်သွားပြီး စိတ်ထဲတွင် အမြန် တွက်ချက်လိုက်ကာ ဖြေလိုက်သည်။ "ကျွန်မ ခန့်မှန်းရသလောက်ဆို ၁၀ မျိုးထက် မနည်းဘူး"

"ဟမ်... ၁၀ မျိုး... ဘာတွေလဲ"

"သူ သုံးပြဖူးတဲ့ ခန္ဓာကိုယ် အမျိုးအစား အစွမ်းတစ်မျိုးကို ကျွန်မ မြင်ဖူးတယ်... ဒဏ်ရာတွေကို မြန်မြန်ဆန်ဆန် ပြန်လည်ကောင်းမွန်စေနိုင်တဲ့ အစွမ်းမျိုးပဲ... သေမျိုးမဟုတ်တဲ့ ခန္ဓာကိုယ်လို့ ခေါ်ကြတယ်"

"နှလုံးကို ဖောက်ဝင်သွားရင်တောင် ချက်ချင်း ပွဲချင်းပြီး သေမသွားသရွေ့ သူက ပြန်ကောင်းလာနိုင်တယ်"

"ဒီလို စွမ်းရည်မျိုးက ခန္ဓာကိုယ် အမျိုးအစား အစွမ်း ဖြစ်လောက်တယ်" လင်းယွမ်က ခေါင်းတစ်ချက် ညိတ်လိုက်သည်။

လျှိုချင့်ဟုန်က ဆက်ပြောသည်။ "ပြီးတော့ ဓာတ်သဘာဝ အမျိုးအစား အစွမ်းတွေကိုလည်း သူ သုံးပြဖူးတယ်"

"အဲဒီအထဲက ရွှေ... သစ်သား... ရေ... မီး... မြေ ဓာတ်တွေနဲ့ ပတ်သက်တဲ့ အစွမ်းမျိုးတွေကို သုံးပြတာ ကျွန်မ မြင်ဖူးတယ်"

"ပြီးတော့ ရေခဲဓာတ်... အမှောင်ဓာတ်... လျှပ်စီးဓာတ်... အလင်းဓာတ်... စိတ်စွမ်းအင်ဓာတ် စတဲ့ ရှားပါးတဲ့ ဓာတ်သဘာဝ အမျိုးအစားတွေကိုလည်း သူ အသုံးပြုဖူးတယ်"

လင်းယွမ် အနည်းငယ် တိတ်ဆိတ်သွားသည်။ လျှိုချင့်ဟုန်၏ ပြောစကားများကို နားထောင်ကြည့်ရသလောက် သူ တတ်မြောက်ထားသည်များကို ဤ ကျင်းရှီရုံကလည်း တတ်မြောက်ထားပုံရသည်။

သူ မတတ်မြောက်ထားသည်များကိုပင် တစ်ဖက်လူက တတ်မြောက်နေသေးသည်။

ဥပမာအားဖြင့် သေမျိုးမဟုတ်သည့် ခန္ဓာကိုယ် ဆိုသည့် ခန္ဓာကိုယ် အမျိုးအစား အစွမ်းမျိုးကို လင်းယွမ် မပိုင်ဆိုင်ထားပေ။

ထိုကဲ့သို့သော ဆင်တူသည့် မျိုးရိုးဗီဇမျိုးစေ့ကိုပင် သူ စုစည်းဖန်တီးနိုင်ခြင်း မရှိသေးပေ။

သို့သော် ထိုသို့တော့လည်း လုံးဝ ပြော၍မရပေ။ တကယ်တမ်း တိတိကျကျ ပြောရလျှင် အသွင်တစ်ရာ မျောက်ဝံမိစ္ဆာသည်လည်း ခန္ဓာကိုယ် အမျိုးအစား အစွမ်းတွင် အကျုံးဝင်ပေသည်။

ခန္ဓာကိုယ်ကို ပြန်လည်ကောင်းမွန်စေရန် အသားပေးသည့် အစွမ်းမျိုး မဟုတ်သည်သာ ရှိသည်။

"တကယ့်ကို ရန်သူကြီးပဲ"

လင်းယွမ်က သက်ပြင်းချကာ ရေရွတ်လိုက်ပြီးနောက် ဆက်ပြောသည်။ "မုန်ယာကုမ္ပဏီနဲ့ ခိုက်ရီနည်းပညာတို့ ပူးပေါင်းသွားရင် အန္တရာယ် မသေးဘူး... သူတို့ ပူးပေါင်းသွားတာကို ငါ လက်ပိုက်ကြည့်နေလို့ မဖြစ်ဘူး"

"သူတို့ကြားက မဟာမိတ်ကို ဖျက်ဆီးချင်ရင် နည်းလမ်း တစ်ခုပဲ ရှိတယ်... သူတို့ကို ရန်သူတွေ ပြန်ဖြစ်သွားအောင် လုပ်ရမယ်"

လင်းယွမ်က မတ်တတ်ရပ်လိုက်ပြီး ပြောလိုက်သည်။ "ငါ့အတွက် သတင်းပို့ပေးမယ့်သူ တစ်ယောက် လိုအပ်တယ်... သတင်းပို့ပေးမယ့်သူနေရာမှာ မင်းကလွဲပြီး ဒီလောက်အရေးပါတဲ့သူ ဘယ်သူရှိနိုင်မလဲဆိုတာ ငါ စဉ်းစားလို့မရဘူး"

"ငါ့နောက် လိုက်ခဲ့"

လျှိုချင့်ဟုန်က အမြန် လိုက်ပါသွားရင်း မနေနိုင်ဘဲ ပြောလိုက်သည်။ "သခင်... ကျွန်မ တကယ်ပဲ ကျင်းရှီရုံကို လိမ်ညာဖုံးကွယ်ထားနိုင်မှာ မဟုတ်ဘူး"

လင်းယွမ်က ခေါင်းခါလိုက်သည်။ "ဟင့်အင်း... မင်း ဖုံးကွယ်ထားဖို့ မလိုဘူး... မင်း တွေ့ခဲ့မြင်ခဲ့ရသမျှ အားလုံးကို အတိအကျသာ သူ့ကို ပြန်ပြောပြလိုက်"

လင်းယွမ်က ခပ်ဖွဖွ ရယ်မောလိုက်ပြီးနောက် နားမလည်နိုင် ဖြစ်နေသော လျှိုချင့်ဟုန်၏ အကြည့်များကြားတွင် လက်တစ်ချက် ဝှေ့ယမ်းကာ သူမကို သုမာရု ဟင်းလင်းပြင် ထဲသို့ ခေါ်ဆောင်သွားလေသည်။

သုမာရု ဟင်းလင်းပြင် အတွင်း၌ စွမ်းအင်ချိတ်ပိတ် အစီအရင်ကို ရုပ်သိမ်းထားလိုက်ပြီ ဖြစ်သည်။ စုန်းမ မော်လီမှာမူ ကျေးကျွန်လည်ပတ်ကို တပ်ဆင်ခံထားရပြီး ကင်းစောင့်စက်ရုပ် နှစ်ရုပ်၏ ထိန်းသိမ်းခြင်းကို ခံထားရလျက် ဘေးတစ်ဖက်တွင် ရှိနေသည်။

လျှိုချင့်ဟုန် ဝင်လာပြီး ပထမဆုံး မြင်လိုက်ရသည်က စုန်းမ မော်လီ ဖြစ်နေသဖြင့် ရင်ထဲ ထိတ်ခနဲ ဖြစ်သွားသည်။

မော်လီကလည်း လျှိုချင့်ဟုန်ကို မြင်လိုက်ရချိန်တွင် အလန့်တကြား အော်ဟစ်လိုက်သည်။ "နင်တောင် အဖမ်းခံလိုက်ရတာလား"

လျှိုချင့်ဟုန်က ဘာမှ ပြန်မပြောဘဲ ဘေးနားရှိ လင်းယွမ်ကိုသာ ကြည့်လိုက်ပြီး သူမမျက်နှာတွင် နားမလည်နိုင်မှုများ ရှိနေသည်။

လင်းယွမ် ဘာလုပ်မည်ကို သူမ မသိပေ။

လင်းယွမ်က ပြောလိုက်သည်။ "မင်း ဒီမှာပဲ စောင့်နေ"

ထိုသို့ပြောပြီးနောက် သူ၏ ကိုယ်ရိပ် ပျောက်ကွယ်သွားလေသည်။

သုမာရု ဟင်းလင်းပြင် အတွင်းတွင် လျှိုချင့်ဟုန်နှင့် မော်လီတို့ နှစ်ယောက်တည်းသာ ကျန်ရစ်ခဲ့တော့သည်။

မော်လီသည် တစ်ကိုယ်လုံး မည်သည့် ဒဏ်ရာမျှ မရှိသော လျှိုချင့်ဟုန်ကို ကြည့်ရင်း တစ်ခုခုကို ချက်ချင်း ရိပ်မိသွားကာ ဒေါသတကြီး အော်ပြောလိုက်သည်။ "သစ္စာဖောက်မ... နင် လက်နက်ချလိုက်ပြီလား"

လျှိုချင့်ဟုန် မျက်မှောင်ကြုတ်လိုက်ပြီး မော်လီကို တစ်ချက် ကြည့်ကာ ပြောလိုက်သည်။ "ငါ့သခင်ရဲ့ စွမ်းဆောင်ရည်ကို နင် မမြင်ဖူးတာမှ မဟုတ်တာ"

"ပြောစမ်းပါဦး... ငါက လက်နက်မချဘဲ ဘာလုပ်ရမှာလဲ... အသေခံပြီး ဆက်တောင့်ခံနေရမှာလား"

"ဟက်ဟက်... ငါက အောက်ခြေအဆင့်... ကပ်ဘေးမတိုင်ခင်က သာမန် စားပွဲထိုးမလေး ဘဝကနေ ဒီလို အခြေအနေအထိ ရောက်အောင် မနည်း ကြိုးစားခဲ့ရတာ... မုန်ယာကုမ္ပဏီနဲ့ ရှင့်တို့ ခိုက်ရီနည်းပညာ... ပြီးတော့ ထိုက်ယန်တောင် ခိုလှုံရေးစခန်းတို့ကြားက ရန်ငြိုးတွေအတွက် ငါက ဘာလို့ သေပေးရမှာလဲ"

မော်လီက ဒေါသတကြီး ဟောက်လိုက်သည်။ "နင်က မုန်ယာကုမ္ပဏီရဲ့ ဒါရိုက်တာလေ... နင် ဒီလိုလုပ်တာက ကျင်းရှီရုံ ပျိုးထောင်ပေးခဲ့တာနဲ့ တန်လို့လား"

"ငါ့ရဲ့ ဒီအစွမ်းအစတွေက ကျင်းရှီရုံ ပေးထားတာ မဟုတ်ဘူး"

လျှိုချင့်ဟုန်က ချက်ချင်း ရယ်မောလိုက်ပြီးနောက် ပြောလိုက်သည်။ "တကယ်တမ်းက ပြောင်းပြန်ပဲ... ကျင်းရှီရုံက ငါ့စွမ်းဆောင်ရည် အားကောင်းတာကို မြင်လို့ ထိုက်ယန်တောင် ခိုလှုံရေးစခန်း ထဲကို ဝင်ခွင့်ပြုခဲ့တာ"

"ဒါကြောင့် အဲဒီလို စကားမျိုးတွေနဲ့ လာပြီး စိတ်ဓာတ်ရေးရာအရ အကျပ်ကိုင်ဖို့ မကြိုးစားနဲ့"

"ငါက မုန်ယာကုမ္ပဏီကို ဘာမှ အကြွေးတင်မနေဘူး... ပြောင်းပြန်ပြောရရင် ဒီနှစ်တွေထဲမှာ ငါ မုန်ယာကုမ္ပဏီထဲ ဝင်ခဲ့လို့ နယ်မြေ ဘယ်လောက်တောင် ချဲ့ထွင်ပေးခဲ့ပြီး လူအင်အားနဲ့ အရင်းအမြစ်တွေ ဘယ်လောက်များများ လုယူပေးခဲ့လဲ"

"ဒါကြောင့် စုန်းမ... ရိုးအလွန်းမနေပါနဲ့... ဒီခေတ်ကြီးမှာ ငါတို့တွေ အားလုံးက ကိုယ့်အတွက်ကိုယ် ရှင်သန်နေကြတာချည်းပဲ"

"နင်လည်း အချိန်မီ လက်နက်ချလိုက်ပါတော့... အချည်းနှီး ရုန်းကန်ဖို့ စိတ်ကူးယဉ်မနေနဲ့တော့"

"ငါ့သခင် ဘယ်လောက် ကြောက်စရာကောင်းလဲ ဆိုတာကို နင် လုံးဝ မသိသေးဘူး... ကျင်းရှီရုံ ဒါမှမဟုတ် ဂျိမ်းစ် ကိုယ်တိုင် ရောက်လာရင်တောင် ငါ့သခင်ကို အသေအချာ နိုင်မယ်လို့ မပြောရဲဘူးဆိုတာ ငါ ရဲရဲကြီး အာမခံရဲတယ်"

လျှိုချင့်ဟုန်၏ မျက်နှာပေါ်တွင် ခံစားချက် တစ်ချို့ ပေါ်လွင်လာသည်။ ပွင့်ပွင့်လင်းလင်း ပြောရလျှင် လင်းယွမ်နှင့် မတွေ့ဆုံခင်က ကျင်းရှီရုံသည် ဤကမ္ဘာကြီး၏ ကံကြမ္မာအကျိုးပေး အကောင်းဆုံးသူ ဖြစ်နေပြီဟု သူမ ထင်မှတ်ထားခဲ့သည်။

ပုံတူကူးချအစွမ်း... ဤမျှ ကြောက်မက်ဖွယ်ကောင်းသော အစွမ်းကို မည်သူက ယှဉ်ပြိုင်နိုင်မည်နည်း။

ဂျိမ်းစ် ပေါ်ထွက်လာပြီး ခိုက်ရီနည်းပညာ ကုမ္ပဏီ ပေါ်ပေါက်လာသည့် အချိန်ရောက်မှသာ တောင်တစ်တောင်ထက် မြင့်သော တောင်တစ်တောင် ရှိသေးကြောင်း လျှိုချင့်ဟုန် သိရှိခဲ့ရသည်။

ထိုအချိန်က ကမ္ဘာပေါ်တွင် ဤထိပ်တန်းအစွမ်းပိုင်ရှင် နှစ်ဦးသာလျှင် ကြီးမားကျယ်ပြန့်ပြီး လုံခြုံစိတ်ချရသော ခိုလှုံရေးစခန်းများကို တည်ဆောက်နိုင်စွမ်း ရှိလိမ့်မည်ဟု သူမ ထင်မြင်ခဲ့မိသည်။

ဆက်ရန်...