အခန်း ၃၉၈

အခန်း။ ၃၉၈

စကားပြောပြီးနောက် ကျားမလေးသည် ဘေးနားရှိ ရုပ်ချောမောလှပသော ရွှီရန်အား ပြုံးလျက် တစ်ချက်လှမ်းကြည့်လိုက်သည်။

ထိုသို့ စကားပြောဆိုနေသည့် ခဏတာအတွင်းမှာပင် ရွှီရန်သည် မယ်ဒူဆာ၏ ကျင့်ကြံခြင်းအဆင့်ကို အကဲခတ်လိုက်သည်။

သူတစ်ပါးမျက်စိတွင် ထိုအဆင့်မှာ အလွန်ကြောက်မက်ဖွယ်ကောင်းလှသော်လည်း ရွှီရန်ကဲ့သို့သော ထူးကဲပါရမီရှင်တစ်ဦး၏ မျက်ဝန်းထဲတွင်မူ စကားလုံးလေးလုံးသာ ရှိသည်။

"ကြောက်စရာမရှိဘူး"

ဟင်…

ဒီလောက်အထိ အထင်သေးတဲ့ မျက်လုံးမျိုးလား…

မယ်ဒူဆာသည် ကျားမလေး၏ အကြည့်ကို သတိပြုမိသွားပြီး ရွှီရန်ဘက်သို့လည်း လှည့်ကြည့်လိုက်သည်။

ဤနတ်ဘုရားသတ်ဖြတ်ရေး တပ်ဖွဲ့တစ်ခုလုံးတွင် သွေးစွမ်းအင် အမြင့်ဆုံးရှိသူမှာ ငါးသန်းမျှသာဖြစ်ပြီး ကျန်ရှိသောသူများမှာ ယွဲ့နယ်ပယ်သို့ အသစ်စက်စက် တက်လှမ်းထားခါစဖြစ်၍ တစ်သိန်းဝန်းကျင်သာ ရှိကြသည်။

သူတို့သည် ပါရမီရှင်များဖြစ်ကြပြီး သာမန်ထက်ထူးကဲသော လျှို့ဝှက်လက်နက်များ ရှိနေနိုင်သော်လည်း စစ်မှန်သော နတ်ဘုရားတစ်ပါး၏ ရှေ့မှောက်တွင်မူ ဘာမျှတတ်နိုင်စွမ်း ရှိကြမည်မဟုတ်ချေ။

"ဒါပေမဲ့... ဒီပုရွက်ဆိတ်လို ကောင်တွေက... ဘာဖြစ်လို့ မြင့်မြတ်တဲ့ နတ်ဘုရားကိုမှ ဒီလောက်အထိ ရဲရဲတင်းတင်း မထင်မဲ့မြင် ကြည့်ရဲကြတာလဲ။

ဒါက... စစ်မှန်တဲ့ နတ်ဘုရားကို စော်ကားလိုက်တာပဲ။

သူတို့အားလုံး... သေရမယ်"

မယ်ဒူဆာ၏ မျက်ဝန်းများသည် ရက်စက်ကြမ်းကြုတ်ကာ အေးစက်သွားပြီး "မင်းတို့တွေ တကယ်ပဲ မိုက်မဲတဲ့အထိ ကိုယ့်ကိုယ်ကိုယ် ယုံကြည်မှုလွန်ကဲနေကြတာပဲ" ဟု ပြောလိုက်သည်။

ပြောပြီးသည်နှင့် သူမ၏ ဦးခေါင်းနောက်ရှိ အဆိပ်ပြင်းမြွေဆိုးများသည် ရုတ်တရက် ခေါင်းထောင်လာကြပြီး အရပ်မျက်နှာအနှံ့သို့ တရွရွ လှုပ်ရှားလာကြတော့သည်။

မြွေဆိုးများ၏ လေချွန်သံများသည် ကောင်းကင်ယံတစ်ခုလုံးကို ထိုးဖောက်သွားခဲ့သည်။

ထိုခဏချင်းမှာပင်

နတ်ဘုရားအဆင့် ပြင်းထန်လှသော ဖိအားကြီးသည် မယ်ဒူဆာ၏ ခန္ဓာကိုယ်ထံမှ လျှံထွက်လာပြီး အံ့ဖွယ်တပ်ဖွဲ့ဆီသို့ အုန်းခနဲ ပစ်ဝင်သွားတော့သည်။

အစပိုင်းတွင် ရွှီရန်မှလွဲ၍ ကျန်ရှိသော ကျားမလေးနှင့် အခြားအဖွဲ့ဝင်များသည် နတ်ဘုရားအဆင့် ဖိအားကို ခံစားလိုက်ရသဖြင့် မျက်နှာတွင် ခက်ခဲရုန်းကန်ရသည့် အရိပ်အယောင်များ ပေါ်ထွက်လာပြီး နဖူးထက်တွင် ချွေးစေးများ ပြန်လာခဲ့သည်။

သူတို့သည် ယွဲ့နယ်ပယ်သို့ ရောက်ခါစ ကျင့်ကြံသူသစ်များသာ ဖြစ်ကြသဖြင့် ထိုဖိအားကြီးမှာ အလွန်တရာ ကြီးမားလွန်းနေသည်။

"ဒီလောက် ဖိအားလေးကိုတောင် မတောင့်ခံနိုင်ဘဲနဲ့ စကားကြီးစကားကျယ် ပြောရဲကြသေးတယ်ပေါ့လေ"

မယ်ဒူဆာသည် သူမ၏ ထက်မြက်လှသော သွားစွယ်များကို ထုတ်ပြကာ အေးစက်စွာလှောင်ပြောင်လိုက်သည်။

သူမ ပြောပြီးပြီးချင်းမှာပင် ရွှီရန်၏ ခန္ဓာကိုယ်ထံမှ ပြာလဲ့လဲ့အလင်းလှိုင်းများ ဖြာထွက်လာပြီး တပ်ဖွဲ့ဝင်အားလုံးကို လွှမ်းခြုံကာကွယ်လိုက်သည်။

ချက်ချင်းပင် သူတို့အပေါ် ကျရောက်နေသော ဖိအားအားလုံးမှာ ကြက်ပျောက်ငှက်ပျောက် ပျောက်ကွယ်သွားခဲ့ရပြီး သူတို့၏ အမူအရာများမှာလည်း ပုံမှန်အတိုင်း ပြန်လည်အေးဆေးသွားကြတော့သည်။

ဖိအားများ ပျောက်ကွယ်သွားသည်ကို ခံစားမိလိုက်သောအခါ ကျားမလေးက ချက်ချင်းပင် ပြန်လည်တုံ့ပြန်လိုက်သည်။

"ဒါ နတ်ဘုရားတစ်ပါးရဲ့ ဖိအားလား ဘာမှလည်း အပြောအပလောက် မရှိပါဘူး"

မယ်ဒူဆာသည် ရွှီရန်အား မျက်မှောင်ကြုတ်၍ စိုက်ကြည့်လိုက်သည်။

ယခုလေးတင် ဖြစ်ပျက်သွားသမျှအရာအားလုံးမှာ သူမ၏ရှေ့မှောက်ရှိ အသက်တစ်ဆယ့်

တစ်နှစ်အရွယ်ကောင်လေး၏ လက်ချက်ဖြစ်ကြောင်း သူမ သိရှိလိုက်သည်။

မည်သည့်နည်းလမ်းကို အသုံးပြုသွားသည်ကို မသိရသော်လည်း ရွှီရန်သည် သူမအတွက် သေချာပေါက် သတ်ရမည့် ပထမဆုံးပစ်မှတ် ဖြစ်သွားခဲ့ပြီ ဖြစ်သည်။

ထို့နောက်တွင် သူမ၏ နောက်ကွယ်မှ မြွေဆံပင်များသည် အဆက်မပြတ် လေချွန်သံများပြုလုပ်ကာ ပိုမိုပြင်းထန်စွာ လှုပ်ရှားလာကြတော့သည်။

နောက်တစ်ခဏတွင် မရေမတွက်နိုင်သော မြွေဆိုးများ၏ ပုံရိပ်ယောင်များသည် အံ့ဖွယ်တပ်ဖွဲ့ဆီသို့ ပစ်ဝင်သွားကြပြီး၊ သွေးစွမ်းအင် တစ်သန်းအဆင့် စွမ်းအားများ ချက်ချင်း ပေါက်ကွဲထွက်လာကာ ရွှီရန်၏ ပတ်ပတ်လည်ကို ပိတ်ဆို့လိုက်ကြသည်။

ထိုကြောက်မက်ဖွယ် အရှိန်အဝါကြီးမှာ ရွှီရန်အား တစ်စစီ ဆုတ်ဖြဲပစ်တော့မည့်အလား ပြင်းထန်လှသည်။

"သူ့ကို သတ်ပြီးတာနဲ့ မင်းတို့လို ပုရွက်ဆိတ်တွေကတော့ ခြင်းထဲက ငါးတွေလိုပဲ ဖြစ်သွားမှာ"

ထိုသို့ဖြစ်နေသော်လည်း ကျားမလေးနှင့် ကျန်ရှိသောအဖွဲ့သားများမှာ တည်ငြိမ်နေဆဲဖြစ်ပြီး တိုက်ခိုက်ခြင်းခံနေရသော ရွှီရန်အတွက် စိုးစဉ်းမျှ စိုးရိမ်ပူပန်ခြင်း မရှိကြချေ။

မယ်ဒူဆာ၏ မြွေမျက်လုံးများသည် ရွှီရန်ရှိရာအရပ်သို့ သေသေချာချာ စိုက်ကြည့်နေခဲ့ပြီး မီးခိုးငွေ့များ လွင့်စင်သွားသောအခါ ရွှီရန်၏ဘေးတွင် လက်နက်တစ်ခုကို ကိုင်ဆောင်ထားသော မိုဓားစစ်သည်တော်တစ်ဦး မတ်တတ်ရပ်နေသည်ကို တွေ့ရှိလိုက်ရသည်။

ပို၍ ထိတ်လန့်စရာကောင်းသည်မှာ ထိုမိုဓားစစ်သည်တော်၏ သွေးစွမ်းအင်မှာ ၁၅ သန်းအထိ ရှိနေပြီး သူမ၏ စွမ်းအားနှင့် အဆင့်တူနီးပါး ဖြစ်နေခြင်းပင်။

"မဖြစ်နိုင်တာ"

မယ်ဒူဆာသည် သူမ၏ရှေ့မှောက်တွင် ဖြစ်ပျက်နေသောအရာများကို မယုံကြည်နိုင်လွန်းသဖြင့် ထိတ်လန့်တုန်လှုပ်စွာဖြင့် အော်ဟစ်လိုက်တော့သည်။

"မင်းက သွေးစွမ်းအင် ၅ သန်းပဲရှိတဲ့ ယွဲ့နယ်ပယ် ကျင့်ကြံသူတစ်ယောက်ဖြစ်ပြီးတော့... ဘယ်လိုလုပ် သွေးစွမ်းအင် ၁၅ သန်းရှိတဲ့ စက္ကူရုပ်စစ်သည်တော်တစ်ယောက်ကို ထိန်းချုပ်နိုင်ရတာလဲ ဒါ လုံးဝ မဖြစ်နိုင်ဘူး"

ဤကဲ့သို့သော ဆန်းကြယ်ဆိုးဝါးလှသည့် နတ်ဘုရားနည်းစနစ်မျိုးမှာ သန်မာလှပါသည်ဆိုသော ဂြိုလ်ပြင်ပတွင်ပင် တစ်ခါမျှ ပေါ်ပေါက်ဖူးခြင်း မရှိခဲ့ချေ။

ရွှီရန်က အနည်းငယ် ပြုံးလိုက်ရင်း "ဘယ်သူက မဖြစ်နိုင်ဘူးလို့ ပြောလဲ"

"ဒါတင်မကသေးဘူး... ငါ ထိန်းချုပ်နိုင်တာက ဒီမိုဓားစစ်သည်တော် တစ်ယောက်တည်း မဟုတ်ဘူး"

ပြောပြီးသည်နှင့် ကျန်ရှိသော မိုဓားစစ်သည်တော် ၄၉ ဦးသည် မယ်ဒူဆာ၏ ရှေ့မှောက်တွင် ဘုန်းခနဲ ထပ်မံပေါ်ထွက်လာခဲ့ကြပြီး ထိုမိုဓားစစ်သည်တော် တစ်ဦးချင်းစီ၏ သွေးစွမ်းအင်မှာလည်း ၁၅ သန်း စီ အသီးသီး ရှိနေကြသည်။

မယ်ဒူဆာသည် ဤမြင်ကွင်းကို မြင်လိုက်ရချိန်တွင် တစ်ကိုယ်လုံး သွေးခြေဥမတတ် အေးစက်သွားခဲ့ရတော့သည်။

သူမ၏ မျက်စိရှေ့မှောက်တွင် ဖြစ်ပျက်နေသမျှ အရာအားလုံးသည် သူမ ယခင်က သိရှိနားလည်ထားခဲ့သမျှ သဘောတရားအားလုံးကို လုံးဝဥဿုံ ဆန့်ကျင်ဖောက်ဖျက်နေတော့သည်။

ထိုမျှမက သွေးစွမ်းအင် ၁၅ သန်းအထိ ရှိကြသော မိုဓားစစ်သည်တော် ငါးဆယ်မှာ သူမအား ဤနေရာ၌ ပိတ်လှောင်ထားရန် အလုံအလောက် ရှိနေပြီ ဖြစ်သည်။

ယခုအချိန်တွင် အကောင်းဆုံးနည်းလမ်းမှာ ဤနေရာမှ အမြန်ဆုံး စွန့်ခွာထွက်ပြေးရန်သာ ရှိတော့သည်။

ဤသို့ တွေးမိသည်နှင့် မယ်ဒူဆာသည် ချက်ချင်းပင် ထွက်ပြေးရန် ကြံစည်တော့သည်။

ဘေးနားရှိ ရွှီရန်သည် သူမ၏ အကြံအစည်ကို ရိပ်မိလိုက်သည်နှင့် တပြိုင်နက် မိုဓားစစ်သည်တော် ငါးဆယ်စလုံးသည် သူမအား ဝိုင်းပတ်ပိတ်ဆို့လိုက်ကြပြီး ထွက်ပြေးနိုင်မည့် လမ်းကြောင်းမှန်သမျှကို လုံးဝ ဖြတ်တောက်လိုက်ကြသည်။

ထို့နောက် ရွှီရန်၏ အမိန့်ပေးမှုအောက်တွင် မိုဓားစစ်သည်တော် ငါးဆယ်စလုံးသည် တညီတညွတ်တည်း တိုက်ပွဲအစီအရင်ကို ဖန်တီးကာ မယ်ဒူဆာရှိရာဆီသို့ ဓားချက်များကို ပြိုင်တူ ပိုင်းခုတ်လိုက်ကြတော့သည်။

မကြာမီအချိန်အတွင်းမှာပင် မယ်ဒူဆာသည် ဆုတ်ဖြဲခံလိုက်ရပြီး အပိုင်းပိုင်းအပြတ်ပြတ် ဖြစ်သွားခဲ့ရသည်။

ကျားမလေးက ရှေ့သို့ လှမ်းတက်လိုက်ပြီး အပိုင်းပိုင်းပြတ်နေသော မယ်ဒူဆာ၏ ခန္ဓာကိုယ်ကို ကြည့်ကာ သရော်လိုက်သည်။

"မင်းလို နတ်ဘုရားက အရမ်းအစွမ်းထက်တယ်လို့ ငါက ထင်နေတာ။ ငါ့အစ်ကိုကြီးရဲ့ စက္ကူရုပ်စစ်သည်တော်တွေကိုတောင် မကျော်ဖြတ်နိုင်ဘဲနဲ့ ငါတို့ကို သတ်ချင်သေးတယ်ပေါ့လေ"

ထိုခဏ၌ ရွှီရန်သည် တစ်စုံတစ်ခု မှားယွင်းနေကြောင်း အာရုံခံမိလိုက်သဖြင့် "ကျားမလေး... ချက်ချင်း ပြန်လာခဲ့" ဟု အော်ဟစ်လိုက်သည်။

ကျားမလေးသည် ရှေ့သို့တက်ကာ သရော်နေခဲ့သော်လည်း ရွှီရန်၏ စကားကိုမူ အမြဲတမ်း အလွန်နားထောင်သူ ဖြစ်သည်။ ရွှီရန်၏ လှမ်းခေါ်သံကို ကြားသည်နှင့် သူမသည် အမြန်ဆုံးနှုန်းဖြင့် ရွှီရန်၏ ဘေးနားသို့ ပြန်လည်ရောက်ရှိလာခဲ့သည်။

"အစ်ကိုကြီး... ဘာဖြစ်လို့လဲ ဒီနတ်ဘုရားက အပိုင်းပိုင်းပြတ်သွားပြီ မဟုတ်ဘူးလား"

ကျားမလေးက ဝေခွဲမရစွာဖြင့် မေးလိုက်သည်။

ကျန်ရှိသော အဖွဲ့ဝင်များလည်း ဘာဖြစ်နေသည်ကို နားမလည်ကြချေ။

အခြားသူများ မသိနိုင်သော်လည်း ရွှီရန်ကတော့ အလွန်တရာ ရှင်းလင်းစွာ သိရှိနေသည် ဤမြွေဆံပင်နှင့် မိစ္ဆာနတ်ဘုရားမသည် သေဆုံးသွားခြင်း မရှိသေးချေ။

အကယ်၍ သူမသာ တကယ်သေဆုံးသွားခဲ့လျှင် သူသည် နတ်ဘုရားအနှစ်သာရကို ရရှိပြီးဖြစ်ရပေလိမ့်မည်။ ယခုအခါ မည်သည့်တုံ့ပြန်မှုမျှ မရှိသေးခြင်းက သူတို့ရှေ့မှောက်ရှိ မိစ္ဆာနတ်ဘုရားသည် အသက်ရှင်နေဆဲဖြစ်ကြောင်း သက်သေပြနေသည်။

မကြာမီမှာပင် ဆန်းကြယ်ဆိုးဝါးလှသော နတ်ဘုရားရုပ်တုကြီးတစ်ခု ပေါ်ထွက်လာပြီး၊ ရုပ်တုအတွင်းမှ အနက်ရောင်လောက်ကောင်ကြီးများ တွားသွားထွက်လာကာ အပိုင်းပိုင်းပြတ်နေသော မယ်ဒူဆာ၏ ခန္ဓာကိုယ်ဆီသို့ တည့်တည့်မတ်မတ် ပျံသန်းသွားကြတော့သည်။

အံ့ဖွယ်တပ်ဖွဲ့၏ မျက်စိရှေ့မှောက်တွင်ပင် မယ်ဒူဆာသည် မယုံနိုင်စရာကောင်းလောက်အောင် ပြန်လည်အသက်ရှင်လာခဲ့ပြီး သူမ၏ အရှိန်အဝါမှာလည်း စိုးစဉ်းမျှ လျော့ပါးသွားခြင်း မရှိချေ။

မယ်ဒူဆာက ရွှီရန်အား တုန်လှုပ်ချောက်ချားမှုများ ကျန်ရှိနေသေးသည့် မျက်ဝန်းများဖြင့် စိုက်ကြည့်လိုက်သည်။

သူမအနေဖြင့် သွေးစွမ်းအင် ၅ သန်းသာရှိသော လူသားကျင့်ကြံသူတစ်ဦး၏ လက်ချက်ဖြင့် သေဆုံးရလိမ့်မည်ဟု ထင်မထားခဲ့မိချေ။

အကယ်၍ သူမ၏ ရုပ်တုကြီးအတွင်း၌ အဆုံးမရှိသော ဆန်းကြယ်သည့် ယုံကြည်မှုဆုတောင်းသံများ ရှိမနေခဲ့ဘဲ သူတို့မှတဆင့် ပြန်လည်အသက်သွင်းနိုင်ခြင်း မရှိခဲ့ပါက သူမသည် အစောကြီးကတည်းက အသက်ပျောက်နေခဲ့ပြီ ဖြစ်သည်။

စိတ်ထဲတွင် ကြောက်ရွံ့မှုများ ရှိနေသော်လည်း သူမက ရွှီရန်အား မာန်မာနထောင်လွှားစွာဖြင့် "မင်းက ငါ့ကို သတ်ချင်တာလား" ဟု မေးလိုက်သည်။

ကျားမလေးသည် ဤမြင်ကွင်းကို မြင်လိုက်ရသောအခါ ဆက်လက်၍ စကားမဆိုတော့ချေ။

ရွှီရန်ကမူ ယခုလေးတင် ဖြစ်ပျက်သွားခဲ့သော အခြေအနေကို သေသေချာချာ ပြန်လည်

သုံးသပ်လိုက်သည်။

သူတို့ရှေ့မှောက်ရှိ မိစ္ဆာနတ်ဘုရားမသည် သူ၏ စက္ကူရုပ်စစ်သည်တော်များ၏ လက်ချက်ဖြင့် အပိုင်းပိုင်းပြတ်ကာ သေဆုံးသွားခဲ့ပြီး မည်သည့်အရှိန်အဝါမျှ ကျန်ရှိမနေခဲ့သည်မှာ အမှန်ပင်။