အခန်း ၅၂၂
Vol. 38 Ch. 522
အခန်း ( ၅၂၂ ) - ထာဝရအထွတ်အထိပ်၊ အဆုံးမဲ့တာအိုအားလုံးကို ခွဲခြမ်းစိတ်ဖြာခြင်း၊ မင်းက တာအိုအရှင်သခင်လား
သူကိုယ်တိုင်ပင် မစွမ်းဆောင်နိုင်ခဲ့သည်ကို သူ၏ရှေ့မှ ဤလူငယ်လေးက စွမ်းဆောင်နိုင်မည်တဲ့လော။
အဘိုးအိုမှာ လုံးဝ မယုံကြည်နိုင်ခဲ့ချေ။
သူ၏ မှတ်ဉာဏ်အများစုမှာ ပျောက်ဆုံးနေပြီ ဖြစ်သော်လည်း ထိုကပ်စက်ဝန်းအတွင်း၌ သူသည် အလွန်တရာ ထင်ရှားကျော်ကြားသော တည်ရှိမှုတစ်ခု ဖြစ်ခဲ့ပြီး ကောင်းကင်ဘုံများတစ်ခွင်လုံး၌ သူ့အား ပခုံးချင်းယှဉ်နိုင်သူမှာ လက်ချိုးရေတွက်၍ ရလောက်အောင် နည်းပါးလှကြောင်းကို သူ ဝေဝါးစွာ မှတ်မိနေသေး၏။
ယခုမူ သူ၏ရှေ့မှ ဤလူငယ်လေးမှာ အလွန်တရာ အားနည်းလှသည်ဖြစ်ရာ ယခင်ကပ်စက်ဝန်း၏ အဆုံးမဲ့တာအို ခြေရာများကို မည်သို့လုပ်၍ ထိန်းချုပ်နိုင်မည်နည်း။ ဤသည်မှာ လုံးဝ မဖြစ်နိုင်သော ကိစ္စပင်။
" စမ်းကြည့်မှပဲ သိရမှာပေါ့ "
အဘိုးအို၏ မယုံကြည်မှုအပေါ် ကုချန်သည် မည်သို့မျှ တုံ့ပြန်ခြင်းမရှိဘဲ အရောင်ငါးမျိုး ဝိညာဉ်အရည်ထဲတွင် ပါဝင်နေသော အဆုံးမဲ့တာအို စွမ်းအားကိုသာ ဂရုတစိုက် ဆက်လက် လေ့လာနေလေသည်။
သူ့အတွက်မူ ဤသည်မှာ လုံးဝ အသစ်စက်စက် အတွေ့အကြုံတစ်ခု ဖြစ်နေပြီး သူ့အား စိတ်လှုပ်ရှားလာစေရန်ပင် ဖန်တီးပေးနေ၏။
အကြောင်းမှာ ဤအရောင်ငါးမျိုး ဝိညာဉ်အရည်ထဲ၌ ပါဝင်နေသော အဆုံးမဲ့တာအို ခြေရာများကို ခွဲခြမ်းစိတ်ဖြာနေသည့် လုပ်ငန်းစဉ်အတွင်း သူ၏ ' ကောင်းကင်ဘုံအလုံးစုံ အမှန်တရား နားလည်ခြင်း ' အပေါ် နားလည်သဘောပေါက်မှုသည် ပိုမို နက်ရှိုင်းလာကြောင်း ကုချန် သတိပြုမိလိုက်သောကြောင့်ပင်။
' ကောင်းကင်ဘုံအလုံးစုံ အမှန်တရား နားလည်ခြင်း ' သည် အစကတည်းက ကောင်းကင်ဘုံများ၏ တာအိုကို အပြည့်အဝ ခွဲခြမ်းစိတ်ဖြာ ဖော်ထုတ်ထားခြင်းဖြစ်ပြီး စကြာဝဠာ၏ အဆုံးမဲ့တာအို အားလုံးအား အကျုံးဝင် ပါဝင်စေလေသည်။
တစ်နည်းအားဖြင့် ဆိုရလျှင် တစ်စုံတစ်ယောက်မှ ကောင်းကင်ဘုံအလုံးစုံ အမှန်တရား နားလည်ခြင်းကို ရာခိုင်နှုန်းပြည့် နားလည်သဘောပေါက်သွားပါက ၎င်းမှာ မဟာတာအိုသုံးထောင်ကို အပြည့်အဝ ကျွမ်းကျင်ပိုင်နိုင်သွားခြင်းပင် ဖြစ်သည်။
တာအိုအရှင်သခင် အဆင့်ကဲ့သို့ မဟာတာအို တစ်ခုတည်းကိုသာ ထိန်းချုပ်နိုင်ခြင်းမျိုး မဟုတ်ဘဲ မဟာတာအိုသုံးထောင်လုံးကို ထိန်းချုပ်နိုင်သွားခြင်းပင် ဖြစ်လေသည်။
ထို့ကြောင့် ကောင်းကင်ဘုံအလုံးစုံ အမှန်တရား နားလည်ခြင်းကို ကျွမ်းကျင်ပိုင်နိုင်သွားပါက ကျယ်ပြောလှသော ကောင်းကင်ဘုံများ မည်သို့ပင် လည်ပတ်ပြောင်းလဲနေစေကာမူ သူသည် ထာဝရ မသေနိုင်တော့ဘဲ မရေမတွက်နိုင်သော ကပ်စက်ဝန်းများ တစ်လျှောက်လုံး အမြင့်ဆုံးနေရာကို ရယူထားနိုင်မည် ဖြစ်သည်။
အကြောင်းမှာ ကောင်းကင်ဘုံများ ပြောင်းလဲသကဲ့သို့ အဆုံးမဲ့တာအိုများမှာလည်း ပြောင်းလဲတတ်၏။ သို့ရာတွင် မဟာတာအိုများမှာမူကား ထာဝရတည်မြဲပြီး မည်သည့်အခါမျှ ပြောင်းလဲသွားခြင်း မရှိပေ။
ဤမဟာတာအိုသုံးထောင်ကို ကျွမ်းကျင်ပိုင်နိုင်ထားပြီးပြီ ဆိုပါက အဆုံးမဲ့တာအိုများ မည်သို့ပင် ပြောင်းလဲသွားစေကာမူ မည်သို့ အရေးပါတော့မည်နည်း။
ကုချန်၏ လက်ရှိ ကောင်းကင်ဘုံအလုံးစုံ အမှန်တရား နားလည်ခြင်းအပေါ် နားလည်မှုမှာ မနက်ရှိုင်းလှသေးဘဲ ကြီးမားသော အောင်မြင်မှုနှင့် လွန်စွာ ဝေးကွာနေသေးသော်လည်း အတိုင်းအတာ တစ်ခုအထိတော့ အောင်မြင်မှု ရရှိနေပြီ ဖြစ်သည်။
ထို့ကြောင့် သူသည် ယခင်ကပ်စက်ဝန်း၏ အဆုံးမဲ့တာအို အကြောအကွက် ခြေရာများကို ခွဲခြမ်းစိတ်ဖြာ နားလည်ရန် အမှန်တကယ် စတင် ကြိုးစားလိုက်သောအခါ ထိုအရာက အလွန်တရာ ရိုးရှင်းလွယ်ကူနေကြောင်းကို တွေ့ရှိလိုက်ရ၏။
အသက်ရှူချိန် အကြိမ်အနည်းငယ်အတွင်းမှာပင် သူသည် ထိုအရာများထဲမှ ဆယ်ပုံတစ်ပုံခန့်ကို ဖော်ထုတ်ကျွမ်းကျင်နေပြီ ဖြစ်လေသည်။
ထိုအရာအားလုံးကိုသာ သူ အပြည့်အဝ ကျွမ်းကျင်ပိုင်နိုင်သွားပါက သူ့အား ယခင်ကပ်စက်ဝန်းထဲသို့ ပို့ဆောင်လိုက်လျှင်တောင် ရေနှင့်ငါးကဲ့သို့ သက်သောင့်သက်သာ ရှင်သန်နေနိုင်မည်သာ ဖြစ်သည်။
" စိတ်ဝင်စားစရာပဲ..... "
ကုချန်သည် တီးတိုး ရေရွတ်လိုက်ကာ ယခင်ကပ်စက်ဝန်း၏ အဆုံးမဲ့တာအိုများကို ခွဲခြမ်းစိတ်ဖြာနေသည့် လုပ်ငန်းစဉ်ကို အရှိန်မြှင့်တင်လိုက်၏။
မကြာမီမှာပင် သူ၏လက်ဖဝါးထဲရှိ အရောင်ငါးမျိုး ဝိညာဉ်အရည် တစ်စက်မှာ လုံးဝ အငွေ့ပျံသွားလေတော့သည်။
ထို့ကြောင့် ကုချန်၏အကြည့်တို့သည် ရေအိုင်ငယ်လေးထဲတွင် ကျန်ရစ်နေသေးသော အရောင်ငါးမျိုး ဝိညာဉ်အရည်များဆီသို့ ရောက်ရှိသွား၏။
" အဟွတ်! အဟွတ်...! ယူချင်လည်း ယူလိုက်ပါတော့ကွာ... ဘယ်လိုပဲဖြစ်ဖြစ် ဒီအဘိုးကြီးက အခြေအနေမလှတော့ပါဘူး... စောစောသေတာနဲ့ နောက်ကျသေတာလောက်ပဲ ကွာတော့တာပါ "
ကုချန်၏ အကြည့်နှင့် ဆုံလိုက်ရသောအခါ အဘိုးအိုသည် ကုချန် ဘာကို တွေးနေသည်ကို သဘာဝကျကျပင် သိလိုက်သဖြင့် ပွင့်ပွင့်လင်းလင်း ပြောဆိုလိုက်၏။
လက်ရှိတွင် သူသည် သေခါနီးအသက်ကို ဖက်တွယ်ထားရုံမျှသာ ဖြစ်ပြီး ဤအရောင်ငါးမျိုး ဝိညာဉ်အရည်များသည်လည်း သူ၏ နောက်ဆုံးရုန်းကန်မှုကို အချိန်အနည်းငယ်မျှ ပိုဆွဲဆန့်ပေးနိုင်ရုံမှတစ်ပါး ကြီးကြီးမားမား အဓိပ္ပာယ်မရှိတော့ချေ။
အကြောင်းမှာ ထိုအချိန်အထိ သူ ဆက်လက် အသက်ရှင်နေနိုင်ခဲ့လျှင်တောင် နောက်ဆုံးတွင် သေရမည်သာဖြစ်ရာ သူ့အတွက် ရှင်သန်ရန် မျှော်လင့်ချက် တစ်စက်ကလေးမျှပင် ပေးစွမ်းနိုင်မည် မဟုတ်သောကြောင့်ပင်။
ထို့ပြင် သူသည် ယခင်ကဲ့သို့ အထွတ်အထိပ် တည်ရှိမှုကြီး တစ်ခု မဟုတ်တော့ပေ။ ဤကပ်စက်ဝန်း၌ သူသည် ဆည်းဆာချိန်သို့ ရောက်ရှိနေပြီဖြစ်ကာ သာမန် ကျင့်ကြံသူတစ်ယောက်ထက်ပင် အောက်ရောက်နေပြီ ဖြစ်သည်။
ဤအခြေအနေမျိုးတွင် ကုချန်အား တားဆီးနေခြင်းက ဘာအဓိပ္ပာယ် ရှိမည်နည်း။ မိမိကိုယ်ကို အရှက်ခွဲခံနေမည့်အစား ပွင့်ပွင့်လင်းလင်း ရှိလိုက်သည်ကသာ ပိုကောင်းပေမည်။ စောစောသေရသည်ဖြစ်စေ နောက်ကျမှ သေရသည်ဖြစ်စေ မည်သို့ပင်ဆိုစေ သူ ဆက်လက် ရှင်သန်နိုင်မည် မဟုတ်ပေ။
အဘိုးအို၏ပွင့်လင်းမှုကို မြင်သောအခါ ကုချန်လည်း အားနာမနေတော့ချေ။
ဤတစ်ကြိမ်တွင်မူ သူသည် အရောင်ငါးမျိုး ဝိညာဉ်အရည် ဆယ်စက် တိတိကို ယူလိုက်လေသည်။
ဤအရောင်ငါးမျိုး ဝိညာဉ်အရည်များထဲတွင် ယခင်ကပ်စက်ဝန်း၏ အဆုံးမဲ့တာအို အကြောအကွက် ခြေရာများ ပါဝင်နေသော်လည်း ၎င်းတို့မှာ ပြည့်စုံခြင်း မရှိပေ။ ယခင်ကပ်စက်ဝန်း၏ အဆုံးမဲ့တာအို ခြေရာများကို အပြည့်အဝ ပုံဖော်နိုင်ရန်အတွက် အရောင်ငါးမျိုး ဝိညာဉ်အရည် အစက်များစွာထံမှ အဆုံးမဲ့တာအို အကြောအကွက် ခြေရာများကို စုပ်ယူကာ တစ်ခုနှင့်တစ်ခု တိုက်ဆိုင်စစ်ဆေး ပေါင်းစပ်ရန် လိုအပ်လေသည်။
အချိန်များသည် တရွေ့ရွေ့ ကုန်ဆုံးသွား၏။
ကုချန်၏ လက်ဖဝါးထဲမှ အရောင်ငါးမျိုး ဝိညာဉ်အရည်များသည်လည်း တစ်စက်ပြီးတစ်စက် အငွေ့ပျံ ပျောက်ကွယ်သွားကြသည်။
နောက်ဆုံးသော အရောင်ငါးမျိုး ဝိညာဉ်အရည်တစ်စက် ပျောက်ကွယ်သွားချိန်တွင် ကုချန်သည် ယခင်ကပ်စက်ဝန်း၏ အဆုံးမဲ့တာအို ခြေရာများကို ကျွမ်းကျင်ပိုင်နိုင်သွားခဲ့လေပြီ။
စိတ်ဆန္ဒအရ သူ၏လက်ဖဝါးထဲတွင် အဆုံးမဲ့တာအို အငွေ့အသက်များ ထွက်ပေါ်လာကာ လည်ပတ်သွား၍ ယခင်ကပ်စက်ဝန်း၏ အဆုံးမဲ့တာအို စွမ်းအားအဖြစ်သို့ လျင်မြန်စွာ ပြောင်းလဲသွားလေသည်။
ထို့နောက် အသက်စွမ်းအင် အနှစ်သာရများအားလုံး လက်ထဲသို့ စီးဝင်သွား၍ အဆုံးမဲ့တာအို၏ ပြောင်းလဲမှုမှတစ်ဆင့် ယခင်ကပ်စက်ဝန်းမှ သက်ရှိများ စုပ်ယူနိုင်သော အသက်စွမ်းအင်များအဖြစ်သို့ ပြောင်းလဲသွားကာ နဂါးငယ်လေးများ အသွင်ဖြင့် သစ်ပင်ငယ်လေးထဲသို့ ဝင်ရောက်သွားကြသည်။
" ဆက်မစမ်းသပ်ပါနဲ့တော့ကွာ... ဒီအဘိုးကြီးကို အေးအေးဆေးဆေးလေး နေပြီး လမ်းဖြောင့်ဖြောင့် သွားခွင့်ပြုပါတော့ "
ကုချန် ဆက်လက် ' လျှောက်လုပ် ' နေသည်ကို မြင်သောအခါ အဘိုးအိုမှ စိတ်မရှည်စွာဖြင့် ပြောဆိုလိုက်၏။
ကုချန် အောင်မြင်လိမ့်မည်ဟု သူ လုံးဝ မယုံကြည်ပေ။ ကုချန်၏ အဆက်မပြတ် စမ်းသပ်နေမှုက သူ၏ တိတ်ဆိတ်ငြိမ်သက်မှုကို အနှောင့်အယှက်ပေးနေသည်ဟုသာ ခံစားရ၏။ မည်သို့ပင်ဆိုစေ သူ သေရမည်ဖြစ်ရာ အေးအေးချမ်းချမ်းလေး သေဆုံးခွင့်ပြုလိုက်၍ မရဘူးလော။
သို့သော် အဘိုးအိုမှ ကုချန်အား နေရာရှိ အရောင်ငါးမျိုး ဝိညာဉ်အရည်များ အားလုံးကို ယူဆောင်သွားစေ၍ သူ့အား အေးအေးဆေးဆေး သေဆုံးခွင့်ပြုရန် ပြောတော့မည့် ဆဲဆဲမှာပင် ထိုအသက်စွမ်းအင် နဂါးငယ်လေးများ အားလုံး သူ၏ခန္ဓာကိုယ်ထဲသို့ ဝင်ရောက်လာလေသည်။
သို့သော် ဤတစ်ကြိမ်တွင်မူ အံ့ဖွယ်ကိစ္စတစ်ခု ဖြစ်ပေါ်လာခဲ့၏။
ထိုအသက်စွမ်းအင် နဂါးငယ်လေးများသည် ယခင်ကကဲ့သို့ သစ်ပင်ငယ်လေးထဲသို့ ဝင်ရောက်သွားပြီးနောက် လုံးဝ ပေါင်းစပ်၍မရ ဖြစ်မနေတော့ပေ။ ဤတစ်ကြိမ်တွင် ထိုအသက်စွမ်းအင် နဂါးငယ်လေးများ အားလုံးသည် သစ်ပင်ငယ်လေး၏ အစိတ်အပိုင်း အားလုံးထဲသို့ ဝင်ရောက်သွားပြီး ယိုယွင်းပျက်စီးနေသော ခန္ဓာကိုယ်ကို အားဖြည့်ပေးနေတော့၏။
ကူးပြောင်းရောက်ရှိလာသော အသက်စွမ်းအင်မှာ အရောင်ငါးမျိုး ဝိညာဉ်အရည် တစ်စက်စာနှင့် မယှဉ်နိုင်သေးသော်လည်း ဤသည်က အဘိုးအိုကို ရှင်းပြ၍မရနိုင်လောက်အောင် အံ့အားသင့် မှင်တက်သွားစေခဲ့သည်။
အကြောင်းမှာ ဤသည်က ဘာကို ကိုယ်စားပြုနေသည်ကို သူ ရှင်းရှင်းလင်းလင်း သိရှိထားသောကြောင့်ပင်။
ဤသည်မှာ အရောင်ငါးမျိုး ဝိညာဉ်အရည်များထံမှ စွမ်းအားမဟုတ်ဘဲ ဤလူငယ်လေးကိုယ်တိုင် ဖန်တီးပေးအပ်လိုက်သော စွမ်းအား ဖြစ်၏။
ဆိုလိုသည်မှာ ဤလူငယ်လေးသည် ယခင်ကပ်စက်ဝန်း၏ အခြေခံ အဆုံးမဲ့တာအို အကြောအကွက်များကို အမှန်တကယ်ပင် ကျွမ်းကျင်ပိုင်နိုင်သွားခဲ့ပြီ။
သို့မဟုတ်ပါက သူ စုပ်ယူနိုင်သော အသက်စွမ်းအင်အဖြစ်သို့ ပြောင်းလဲပေးနိုင်ရန်မှာ လုံးဝကို မဖြစ်နိုင်သော ကိစ္စပင်။
သို့သော်... ဤသည်မှာ လုံးဝကို မဖြစ်နိုင်ချေ!!
သူကိုယ်တိုင်ပင် မစွမ်းဆောင်နိုင်ခဲ့သော ကိစ္စရပ်ကို ဤကောင်လေးက မည်သို့ စွမ်းဆောင်နိုင်ခဲ့သနည်း။
ထို့အပြင် ဤမျှ တိုတောင်းလှသည့် အချိန်လေးအတွင်းမှာတဲ့လော။
အဘိုးအို၏ရင်ထဲတွင် ကြိတ်၍ အော်ဟစ်ညည်းတွားလိုက်မိ၏။ သူ ရှင်းရှင်းလင်းလင်း မြင်တွေ့လိုက်ရသည်။
ကုချန်သည် ဤအရောင်ငါးမျိုး ဝိညာဉ်အရည်ထဲမှ စွမ်းအားများကို စတင် ခွဲခြမ်းစိတ်ဖြာရန် ကြိုးစားခဲ့ချိန်မှစ၍ ယခင်ကပ်စက်ဝန်း၏ အဆုံးမဲ့တာအို ခြေရာများကို အပြည့်အဝ ကျွမ်းကျင်ပိုင်နိုင်သွားသည့် အချိန်အထိ ဤဖြစ်စဉ်တစ်ခုလုံး ကြာမြင့်ချိန်မှာ လက်ဖက်ရည်တစ်ခွက်စာ အချိန်မျှပင် မရှိခဲ့ချေ!
လက်ဖက်ရည်တစ်ခွက်စာ အချိန်လေးအတွင်းမှာပင် ကပ်စက်ဝန်းတစ်ခု၏ အဆုံးမဲ့တာအို အသုံးချနည်းများကို ကျွမ်းကျင်သွားခဲ့သည်။
ဒါက... ဒါက.....
အကယ်၍ အဘိုးအိုတွင် ရုပ်ခန္ဓာ ရှိနေသေးမည် ဆိုပါက သူ၏မျက်လုံးများ ပြူးကျယ်ထွက်နေမည်မှာ သေချာလှပေသည်။
" မင်းက ဒီအဘိုးကြီးကို လာနောက်နေတဲ့ တာအိုအရှင်သခင် တစ်ပါးပါးများ ဖြစ်နေမလား "
အဘိုးအိုသည် တိုးညင်းသော လေသံဖြင့် မေးမြန်းလိုက်၏။
လက်ဖက်ရည်တစ်ခွက်စာ အချိန်လေးအတွင်း ကပ်စက်ဝန်းတစ်ခု၏ အဆုံးမဲ့တာအို အသုံးချနည်းများကို ကျွမ်းကျင်ပိုင်နိုင်သွားရန် ဆိုသည်မှာ လုံးဝ မဖြစ်နိုင်သော ကိစ္စပင်။
ဤအတွက် တစ်ခုတည်းသော ရှင်းပြချက်မှာ သူ၏ရှေ့မှ ဤသူသည် လူငယ်လေးတစ်ဦး လုံးဝ မဟုတ်ဘဲ ကျားကိုစားရန် ဝက်ယောင်ဆောင်နေသည့် တာအိုအရှင်သခင်တစ်ပါး ဖြစ်နေပြီး ယခင်ကပ်စက်ဝန်း၏ အဆုံးမဲ့တာအို ခြေရာများကို ကျွမ်းကျင်ထားပြီးသား ဖြစ်နေခြင်းသာတည်း။
သို့မဟုတ်ပါက ဤအရာများ အားလုံးကို မည်သို့မျှ ရှင်းပြနိုင်စွမ်း ရှိမည်မဟုတ်ချေ။
" အရှင် အထင်လွဲနေပါပြီ "
ကုချန်သည် အေးဆေးတည်ငြိမ်စွာ ပြောဆိုလိုက်၏။
သူသည် လုံးဝ တာအိုအရှင်သခင်အဆင့် တည်ရှိမှုတစ်ခု မဖြစ်နိုင်ပေ။ သို့သော် ' ကောင်းကင်ဘုံအလုံးစုံ အမှန်တရား နားလည်ခြင်း ' ဆိုသည်မှာ ကုချန်၏ အကြီးမားဆုံး လျှို့ဝှက်ချက် ဖြစ်နေသောကြောင့် ဤအဘိုးအိုအား မည်သည့်အရာကိုမျှ ရှင်းပြမည် မဟုတ်သည်မှာ သေချာပေသည်။
အစပိုင်း အံ့အားသင့်မှုများ လွန်ဆုံးပြီးနောက် အဘိုးအိုလည်း သတိပြန်ဝင်လာကာ ကုချန်မှာ တာအိုအရှင်သခင် ဖြစ်နိုင်ခြေ မရှိကြောင်း နားလည်သွားခဲ့သည်။ အကြောင်းမှာ သူသည် သေလုမြောပါး ဖြစ်နေကာ သူ၏ထံတွင်လည်း ကြီးမားလှသော လျှို့ဝှက်ချက်များလည်း မရှိတော့ပေ။ တာအိုအရှင်သခင်တစ်ပါးမှ သူ့လိုလူကို ဤသို့ လာရောက်ကစားနေရန်အတွက် သူ့ရှိ မည်သည့်အရာက တန်ဖိုးရှိနေမည်နည်း။